ដោយ ៖ ប៊ី
ភ្នំពេញ ៖ ក្រុមហ៊ុន AEON បានឱ្យដឹងកាលពីថ្ងៃអង្គារកន្លងមកនេះថា ខ្លួននឹងសាងសង់កន្លែងពាណិជ្ជកម្មដ៏ធំមួយនៅក្នុងទីក្រុងយ៉ាំងហ្គោន ដែលជាទីក្រុងធំបំផុតនៅប្រទេសមីយ៉ាន់ម៉ា ជាមួយនឹងការបោះទុនវិនិយោគចំនួន ១៨០ លានដុល្លារ បន្ទាប់ទទួលបានជោគជ័យខ្លាំងនៅកម្ពុជា។

គម្រោងសាងសង់ផ្សារទំនើប Aeon Mall ដែលទើបតែមានលើកដំបូងនៅក្នុងប្រទេសមីម៉ាន់ម៉ាមួយនេះ ស្ថិតនៅលើផ្ទៃដីទំហំ ៧២ ០០០ ម៉ែត្រការ៉េ គ្រោងចាប់ផ្តើមបើកការដ្ឋាននៅឆមាសទីមួយនៃឆ្នាំ២០២១ ហើយនឹងបើកដំណើរនៅឆ្នាំ២០២៣ ។

ការវិនិយោគខាងលើនេះត្រូវបានអនុម័តដោយរដ្ឋាភិបាលមីយ៉ាន់ម៉ាកាលពីចុងខែកក្កដាកន្លងទៅនេះ ដែលជាការបណ្តាក់ទុនរួមគ្នារវាងក្រុមហ៊ុន AEON ៧០ភាគរយ និងក្រុមហ៊ុន Shwe Taung Group ចំនួន៣០ភាគរយ ដែលជាក្រុមហ៊ុនក្នុងស្រុក។

ផ្សារទំនើប AEON បានក្លាយជាក្រុមហ៊ុនអន្តរជាតិនាំមុខអ្នកលក់រាយធំៗ ផ្សេងទៀតនៅជុំវិញពិភពលោក ជាពិសេសក្នុងការវិនិយោគនៅតំបន់អាស៊ីអាគ្នេយ៍ ក្នុងនោះក៏មានប្រទេសកម្ពុជាផងដែរ។

នាយកប្រតិបត្តិរបស់ក្រុមហ៊ុនបាននិយាយថា ដោយទទួលបានការលើកទឹកចិត្តពីប្រតិបត្តិករដ៏ខ្លាំងនៃសាខារបស់ខ្លួន ផ្សារទំនើប AEONនឹងចាប់ផ្តើមប្រតិបត្តិការនៅក្នុងប្រទេសមីយ៉ាន់ម៉ាដើម្បីដណ្តើមយកទីផ្សារដ៏លេចធ្លោមួយដោយគ្មានគូប្រជែង ។

ដោយឡែក ក្រុមហ៊ុនអចលនទ្រព្យ Shwe Taung ក៏បានចេញសេចក្តីថ្លែងការណ៍របស់នាយកប្រតិបត្តិរបស់ខ្លួនគឺលោក Sandar Htun កាលពីថ្ងៃអង្គារ ដោយបញ្ជាក់ថា “យើងមានក្តីរំភើបណាស់ ដែលបានចូលរួមក្នុងការបណ្តាក់ទុនរួមគ្នារួមគ្នាជាមួយផ្សារទំនើប AEON ដើម្បីនាំមកនូវគំនិតលក់រាយ និងរបៀបរស់នៅបែបថ្មី ប្រកបដោយភាពច្នៃប្រឌិតជាងមុនដល់ប្រទេសមីយ៉ាន់ម៉ា”៕

ដោយ ៖ រ៉ាណេត
ភ្នំពេញ ៖ រដ្ឋាភិបាលកម្ពុជា តាមរយៈក្រសួងពាណិជ្ជកម្មបានបង្ហាញពីគោលជំហរបស់ខ្លួន និងគម្រោងបង្កើនលទ្ធិភាពនៃការធ្វើពាណិជ្ជកម្ម ជំរុញកំណើនសេដ្ឋកិច្ចកម្ពុជា-ឥណ្ឌា តាមរយៈកិច្ចព្រមព្រៀងពាណិជ្ជកម្មសេរីរួមគ្នា។

នៅក្នុងកិច្ចប្រជុំកំពូលធុរកិច្ច និងពិព័រណ៍ពាណិជ្ជកម្ម ឥណ្ឌូ-អាស៊ាន -អូសិនីក លើកទី១ នាថ្ងៃទី៤ ខែសីហា ឆ្នាំ២០២០ម្សិលមិញនេះ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ស៊ាង ថៃ បានលើកឡើងពីគោលបំណងសំខាន់ៗរបស់រាជរដ្ឋាភិបាលកម្ពុជាចំនួន៥ចំណុច ដែលក្នុងនោះក៏មានការបង្ហាញពីគម្រោងនៃកិច្ចចរចាព្រមព្រៀងពាណិជ្ជកម្មសេរីរវាងកម្ពុជា និងប្រទេសឥណ្ឌាផងដែរ ។

វឌ្ឍនភាពនៃការធ្វើពាណិជ្ជកម្មទ្វេភាគីរវាងប្រទេសទាំង២ មានការកើនឡើងជាលំដាប់គួឱ្យកត់សម្គាល់ ដោយទំហំពាណិជ្ជកម្មទ្វេភាគីនៅក្នុងឆ្នាំ២០១៨ មានចំនួន ១២៨លានដុល្លាអាមេរិក ហើយនៅក្នុងឆ្នាំ២០១៩ បានកើនដល់ ២៧១លានដុល្លាអាមេរិក ។

នៅក្នុងកិច្ចប្រជុំខាងលើនេះ លោក ស៊ាង ថៃ ក៏បានអំពាវនាវឱ្យមានកិច្ចសហប្រតិបត្តិយ៉ាងជិតស្និតរវាងប្រទេសក្នុងតំបន់ ជាពិសេសប្រទេសឥណ្ឌា ដែលជាប្រទេសសមាជិកអាស៊ាន និងប្រទេសនៅតំបន់មហាសមុទ្រ ក្នុងការធ្វើសេរីភាវូបណីយកម្មសេដ្ឋកិច្ច ការលុបបំបាត់វិធានការនិងរបាំងមិនមែនពន្ធគយ ការមិនគាំទ្រប្រព័ន្ធគាំពារនិយមនិងជំនួសមកវិញនូវការគាំទ្រយ៉ាងពេញទំហឹងនូវប្រព័ន្ធពាណិជ្ជកម្មពហុភាគីនិយមជាពិសេសការគាំទ្រវត្តមាននិងតួនាទីរបស់អង្គការពាណិជ្ជកម្មពិភពលោក ជំរុញឲ្យមានវេទិកាធុរកិច្ចជននឹងធុរកិច្ចជន និងជំរុញការចូលរួមពីសំណាក់សហគ្រាសធុនតូចនិងមធ្យម (SMEs)។

កម្ពុជាមានផែនការយុទ្ធសាស្រ្តក្នុងការជំរុញកិច្ចសហប្រតិបត្តិការសំដៅធ្វើសមាហរណកម្ម និងការធ្វើឲ្យប្រសើរឡើងនូវសេដ្ឋកិច្ចតំបន់ ដែលនឹងជួយជំរុញការធ្វើពាណិជ្ជកម្ម វិនិយោគ និងឱកាសការងារ។ ផែនការទាំងនោះរួមមាន ការចរចាកិច្ចព្រមព្រៀងពាណិជ្ចកម្មសេរីទ្វេភាគីជាមួយដៃគូពាណិជ្ជកម្មសក្តានុពល បន្តការចរចាឲ្យប្រសើរឡើងបន្ថែមទៀតនូវកិច្ចព្រមព្រៀងពាណិជ្ជកម្មតំបន់ដែលមានស្រាប់ក្រោមក្របខណ្ឌ អង្គការពាណិជ្ជកម្មពិភពលោក អាស៊ាននិងដៃគូអាស៊ាន និងរៀបចំវេទិកាធុរកិច្ចនិងពិពរណ័ពាណិជ្ជកម្ម ។ល។

បន្ថែមពីនេះ រាជរដ្ឋាភិបាលកម្ពុជា ក៏បានធ្វើកំណែទម្រង់ស៊ីជម្រៅសំដៅបង្កើតបរិយាកាសល្អប្រសើរក្នុងការធ្វើអាជីវកម្ម និងវិនិយោគ កាត់បន្ថយការចំណាយក្នុងការធ្វើអាជីវកម្ម សម្រួលពាណិជ្ជកម្ម បង្កើនលទ្ធភាពប្រកួតប្រជែងក្នុងឆាកអន្តរជាតិ និងដើម្បីចូលរួមក្នុងខ្សែច្រវាក់ផលិតកម្មសកល៕

ដោយ ៖ រ៉ាណេត

ភ្នំពេញ ៖ រាជរដ្ឋាភិបាល កម្ពុជា បានសម្រេច ធ្វើសេចក្ដីកែសម្រួលទៅលើវិធានការសុខាភិបាលចំពោះមន្ត្រីការទូត និងអង្គការអន្តរជាតិកាន់ទិដ្ឋាការការទូតប្រភេទ A និងទិដ្ឋាការផ្លូវការប្រភេទ B ដែលចូលមកកាន់កម្ពុជា។

គណៈកម្មការអន្តរក្រសួង ដើម្បីប្រយុទ្ធនឹងជំងឺកូរីដ១៩ នៅថ្ងៃទី៥ ខែសីហា ឆ្នាំ២០២០នេះ បានចេញសេចក្ដីប្រកាសព័ត៌មាន សម្រេចការកែសម្រួលវិធានការសុខាភិបាល សម្រាប់អនុវត្តចំពោះមន្ត្រីការទូត និង អង្គការអន្តរជាតិដែលកាន់ទិដ្ឋាការការទូតប្រភេទ A និងទិដ្ឋាការផ្លូវការប្រភេទ B ដែលចូលមកប្រទេសកម្ពុជា។

បើតាមសេចក្តីប្រកាសព័ត៌មានរបស់ក្រសួងសុខាភិបាលនៅព្រឹកថ្ងៃទី៥ ខែសីហាឆ្នាំ២០២០នេះ បានបញ្ជាក់ ពីការកែសម្រួលវិធានការសុខាភិបាលមួយចំនួន ដោយមានយល់ព្រមពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

សម្រាប់អនុវត្តចំពោះមន្ត្រីការទូត និងអង្គការអន្តរជាតិ ដែលកាន់ទិដ្ឋាការការទូតប្រភេទ A និងទិដ្ឋាការប្រភេទ B ចង់ចូលមកកម្ពុជា ត្រូវអនុវត្តតាមគោលការណ៍ខាងក្រោម៖

១៖ មន្ត្រីការទូត និងអង្គការអន្តរជាតិ តម្រូវឱ្យមានវិញ្ញាបនបត្របញ្ជាក់សុខភាព (Health Certificate) ចេញដោយអាជ្ញាធរសុខាភិបាល ដែលទទួលស្គាល់ដោយប្រទេសសាមីបញ្ជាក់ ថាគ្មានជំងឺកូវីដ-១៩ ក្នុងរយៈពេល ៧២ម៉ោង មុនពេលចេញដំណើរ។

២៖ តម្រូវឱ្យមន្ត្រីការទូត និងអង្គការអន្តរជាតិ ដែលទទួលបានទិដ្ឋាការការទូតប្រភេទ A និងទិដ្ឋាការផ្លូវការប្រភេទ B ត្រូវធ្វើតេស្តទាំងអស់ ពេលមកដល់កម្ពុជា ហើយសំណាកត្រូវយកនៅទីតាំងពិសេស ក្នុងស្ថានីយមកដល់របស់អ្នកដំណើរតែម្ដង។

៣៖ ត្រូវរង់ចាំលទ្ធផលតេស្តរយៈពេលយ៉ាងតិច២៤ម៉ោង នៅទីតាំងសណ្ឋាគារ ឬកន្លែងស្នាក់នៅណាមួយ ដោយគោរពតាមគោលការណ៍ប្រតិបត្តិស្ដង់ដារ (SOPs) ដែលបានឯកភាពដោយគណៈកម្មការអន្តរក្រសួង និងការធ្វើចត្តាឡីស័ក១៤ថ្ងៃ នៅទីតាំងទាំងនោះបើមាន តម្រូវការចាំបាច់នៃវិធានការសុខាភិបាលសាធារណៈ។

៤៖ សំណាកដែលបានធ្វើពេលមកដល់ នឹងត្រូវបញ្ជូនទៅធ្វើតេស្តនៅវិទ្យាស្ថានប៉ាស្ទ័រកម្ពុជា និងការធ្វើតេស្តលើកទី២ នៅថ្ងៃទី១៣ ក៏ត្រូវធ្វើនៅវិទ្យាស្ថានប៉ាស្ទ័រកម្ពុជា តាមការកំណត់របស់ក្រសួងសុខាភិបាល។

៥៖ ក្នុងករណីមានការរកឃើញវីរុសកូវីដ-១៩ វិជ្ជមាន បញ្ជាក់ដោយមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា អ្នកជំងឺត្រូវបញ្ជូនទៅកាន់មន្ទីរពេទ្យរ៉ូយ៉ាល់ភ្នំពេញ ឬមន្ទីរពេទ្យណាផ្សេង ដែលស្ថានទូតសំណូមពរ ហើយដែលក្រសួងសុខាភិបាលឯកភាពដើម្បីធ្វើការព្យាបាល។ ការសម្រាកព្យាបាល នៅមន្ទីរពេទ្យរ៉ូយ៉ាល់ភ្នំពេញ ឬមន្ទីរពេទ្យណាផ្សេង រាល់ការចំណាយ និង តម្លៃសេវាព្យាបាលជាបន្ទុករបស់មន្ត្រីទូត ឬស្ថានទូត និងអង្គការអន្តរជាតិផ្ទាល់។

៦៖ ស្ថានបេសកកម្មបរទេសទាំងអស់ នឹងតម្រូវឱ្យចុះអនុស្សរណៈនៃការយោគយល់គ្នា (MOU) ជាមួយក្រសួងសុខាភិបាល ពាក់ព័ន្ធនឹងគោលការណ៍ប្រតិបត្តិស្ដង់ដារ (SOPs) ដើម្បីបង្ការ ការចម្លងជំងឺកូវីដ-១៩ នៅកម្ពុជា។

ដោយឈរលើគោលការណ៍មនុស្សធម៌ ការលើកកម្ពស់កិច្ចសហប្រតិបត្តិការ និងទំនាក់ទំនងល្អ ជាមួយបណ្ដាប្រទេសជាមិត្ត និងផ្អែកលើកត្តាសត្យានុម័ត ដែលចំនួនអ្នកកាន់ទិដ្ឋាការការទូតប្រភេទ A និង ទិដ្ឋាការផ្លូវការប្រភេទ B ពុំមានចំនួនច្រើនលើសលប់នោះ រាជរដ្ឋាភិបាលកម្ពុជា បានសម្រេចលើកលែងការបង់ថ្លៃ ធ្វើតេស្តរកវីរុសកូដ-១៩ លើកទី១ និងលើកទី២៕

ដោយៈ ម៉ា​ណេ​ត

ភ្នំពេញៈ ក្រសួង​សេដ្ឋកិច្ច និង​ហិរញ្ញវត្ថុ បាន​ដាក់ចេញ​ការកំណត់​បែបបទ នីតិវិធី និង​លក្ខ​ខ័​ណ្ឌ​តម្រូវ ក្នុង​ការដាក់​របាយការណ៍​ហិរញ្ញវត្ថុ​ឱ្យ​រង​នូវ​សវកម្ម​ឯករាជ្យ ចំពោះ​បុគ្គល​ជាប់​កាតព្វកិច្ច ព្រមទាំង​កំណត់​អំពី​កាតព្វកិច្ច​នានា សម្រាប់​សហគ្រាស សហគ្រាស​សាធារណៈ គម្រោង​វិនិយោគ និង​អង្គ​ភាពមិន​ស្វែងរក​ប្រាក់ចំណេញ។

ក្រសួង​សេដ្ឋកិច្ច និង​ហិរញ្ញវត្ថុ ចេញ​សេចក្តីប្រកាស ស្តីពី​កាតព្វកិច្ច​ដាក់​របាយការណ៍​ហិរញ្ញវត្ថុ​ឲ្យ​រង​នូវ​សវនកម្ម​ឯករាជ្យ កាលពី​ចុងខែ​កក្កដា ឆ្នាំ២០២០ ដែល​ប្រកាស​នេះ​បានកំណត់​អំពី​បែបបទ នីតិវិធី និង​លក្ខ​ខ័​ណ្ឌ​តម្រូវ ក្នុង​ការដាក់​របាយការណ៍​ហិរញ្ញវត្ថុ​ឲ្យ​រង​នូវ​សវកម្ម​ឯករាជ្យ ចំពោះ​បុគ្គល​ជាប់​កាតព្វកិច្ច ព្រមទាំង​កំណត់​អំពី​កាតព្វកិច្ច​នានា សម្រាប់​សហគ្រាស សហគ្រាស​សាធារណៈ គម្រោង​វិនិយោគ និង​អង្គ​ភាពមិន​ស្វែងរក​ប្រាក់ចំណេញ ក្នុង​គោលដៅ​ពង្រឹង​អនុលោមភាព និង​ការគ្រប់គ្រង​ការដាក់​របាយការណ៍​ហិរញ្ញវត្ថុ​ឲ្យ ប្រកបដោយ​ប្រសិទ្ធភាព។

ទាក់ទង​បញ្ហា​នេះ គ្រប់​សហគ្រាស​សាធារណៈ សហគ្រាស​ទទួលខុសត្រូវ​ជា​សាធារណៈ និង​គម្រោង​វិនិយោគ ត្រូវដាក់​របាយការណ៍​ហិរញ្ញវត្ថុ សម្រាប់​កាលបរិច្ឆេទ​គណនេយ្យនីមួយៗរបស់ខ្លួន​ឲ្យ រង​នូវ​សវនកម្ម​ឯករាជ្យ ក្នុងនោះ ប្រសិនបើ​សហគ្រាស​ស្ថិតក្នុង​លក្ខណៈវិនិច្ឆ័យ​យ៉ាងតិច​ពីរ ក្នុងចំណោម​លក្ខណៈវិនិច្ឆ័យ​បី។

លក្ខណៈវិនិច្ឆ័យ​ទី១ មាន​ទឹកប្រាក់​ផលរបរ​ប្រចាំ​ការិយបរិច្ឆេទ គណនេយ្យ​ចាប់ពី ៤ ពាន់​លាន​រៀល​ឡើងទៅ លក្ខណៈវិនិច្ឆ័យ​ទី២ មានទ្រព្យ​សកម្ម​សរុប​ចាប់ពី៣ពាន់​លាន​រៀល​ឡើងទៅ ដោយ​ចាប់​គិត​ត្រឹម​ថ្ងៃ​បិត​ការិយបរិច្ឆេទ​គណនេយ្យ និង​លក្ខណៈវិនិច្ឆ័យ​ទី៣ មាន​ចំនួន​កម្មករ និយោជិត​បម្រើ​ការងារ​ចាប់ពី១០០នាក់ ឡើងទៅ ក្នុងនោះ​សហគ្រាស ត្រូវ​ស្ថិតក្នុង​លក្ខណៈវិនិច្ឆ័យ​យ៉ាងតិច​ពីរ ក្នុងចំណោម​លក្ខណៈវិនិច្ឆ័យ​បី ដែល​អាចដាក់​របាយការណ៍​ហិរញ្ញវត្ថុ ឲ្យ​រង​នូវ​សវកម្ម ដោយ​ឈរលើ​គោលការណ៍​ស្មោះ​ចិត្ត។

សម្រាប់​អង្គភាព​មិន​ស្វែងរក​ប្រាក់ចំណេញ ត្រូវដាក់​របាយការណ៍​ហិរញ្ញវត្ថុ សម្រាប់​កាលបរិច្ឆេទ​គណនេយ្យនីមួយៗ របស់ខ្លួន​ឲ្យ​រង​នូវ​សវនកម្ម​ឯករាជ្យ ប្រសិនបើ​អង្គភាព​មិន​ស្វែងរក​ប្រាក់ចំណេញ​ស្ថិតក្នុង​លក្ខខណ្ឌ​ដូចជា ចំណាយ​សរុប​ប្រចាំឆ្នាំ​លើសពី២ ពាន់​លាន​រៀល និង​មាន​ចំនួន​កម្មករ និយោជិត​បម្រើ​ការងារ​ចាប់ពី២០នាក់​ឡើង ដោយយោង​ទៅតាម​កម្មក​រ និយោជិត​មធ្យម​ភា​គប្រ​ចាំ​ឆ្នាំ ក្នុងនោះ​អង្គភាព​ណា​ដែល​ស្ថិតនៅក្នុង​លក្ខណៈវិនិច្ឆ័យ​ទាំងពីរ​ខាងលើនេះ អាចដាក់​របាយការណ៍​ហិរញ្ញវត្ថុ​ប្រចាំឆ្នាំ​ឲ្យ​រង​សវនកម្ម​ឯករាជ្យ ដោយ​ឈរលើ​គោលការណ៍​ស្ម័គ្រចិត្ត ។

ពាក់ព័ន្ធ​និង​បទ​ប្បញ្ញត្តិ សម្រាប់​បុគ្គល​ជាប់​កាតព្វកិច្ច ដែល​ប្រព្រឹត្ត​ផ្ទុយ​និង​ប្រកាស​នេះ ត្រូវ​ទទួលរង​នូវ​ការផាកពិន័យ​អន្ត​រកា​រល ពី​ក្រុមប្រឹក្សា​ជាតិ​គណនេយ្យ ដូច​បានចែង​ក្នុង​អនុក្រឹត្យ ចុះ​ថ្ងៃទី១ ខែមិថុនា ឆ្នាំ២០២០ ស្តីពី​ពិន័យ​អន្តរកាល​ចំពោះ​បទល្មើស​ទៅនឹង​ច្បាប់​គណនេយ្យ និង​សវនកម្ម៕

ដោយ ​វុត្ថា

ភ្នំពេញៈ ថ្មីៗនេះ​កម្ពុជា​ទើបតែ​បញ្ចប់​កិច្ចចរចា បង្កើត​កិច្ចព្រមព្រៀង​ពាណិជ្ជកម្ម​សេរី​កម្ពុជា-ចិន (FTA) និង​រង់ចាំ​ពេលវេលា​ចុះហត្ថលេខា នាពេល​ខាងមុខនេះ ខណៈដែល​កិច្ចព្រមព្រៀង​នេះ នឹង​ផ្ដល់​ផលប្រយោជន៍​យ៉ាងច្រើន​ដល់​កម្ពុជា តាមរយៈ​ការអនុគ្រោះ​ពន្ធ​ក្នុង​ការនាំ​ទំនិញ​ចេញទៅ​ប្រទេស​ចិន ជាមួយគ្នានេះ​វិស័យ​ដីធ្លី​ក៏​នឹងមាន​ទីផ្សារ​ផងដែរ។

លោក​ឧកញ៉ា លឹម ហេង អនុប្រធាន​សភាពាណិជ្ជកម្ម​កម្ពុជា បានឱ្យដឹង​នៅ​ថ្ងៃទី ៤ ខែសីហា ឆ្នាំ ២០២០នេះ ឱ្យដឹងថា​បន្ទាប់ពី​កិច្ចព្រមព្រៀង​នេះ ចូល​ជា​ធរមាន ទំនិញ​ជាច្រើន​មុខ នឹងត្រូវ​ទម្លាក់​ពន្ធ​នាំចូល​ដោយ​ស្វ័យប្រវត្តិ​ហើយ​នោះ ចលនា​នៃ​ចរន្ត​វិនិយោគ​ដីធ្លី​និង​លំនៅឋាន​នៅក្នុង​ប្រទេស​កម្ពុជា ក៏​នឹង​ទទួលបាន​ផលប្រយោជន៍​ជាច្រើន​ផងដែរ​តាមរយៈ​ការជួល និង​ទិញ​វិនិយោគ​បង្កើត​រោងចក្រ​សហគ្រាស​នានា នៅក្នុង​ប្រទេស​កម្ពុជា។

លោក​បន្តថា “តាមរយៈ​កិច្ចព្រមព្រៀង​ពា​ណិ​ជ្ចក​ម្ម​សេរី​នេះ វិនិយោគិន​ចិន​មួយចំនួនធំ​នឹង​ចូលមក​វិនិយោគ​នៅក្នុង​ប្រទេស​កម្ពុជា នៅ​នោះ​តម្រូវការ​មុនគេ​គឺ​ទីតាំង ពោលគឺ​ដីធ្លី និង នោះ​ពេលនេះ តម្លៃ​ដីធ្លី​វា​នឹង​ឡើងថ្លៃ” ។ លោក​បន្តថា “ក្រៅពី​តម្រូវការ​ដីធ្លី វិនិយោគិន​នឹងត្រូវ​ការ​ការិយាល័យ​ស​ម្រា​ប់​ធ្វើការ នឹង​លំនៅ​សម្រាប់​ស្នាក់នៅ និង​ម្ហូបអាហារ​ផ្សេង​ថែមទៀត” ។

លោក​បញ្ជាក់ថា “ហេតុដូច្នេះ អ្វីៗនឹង​ក្លាយជា​ចលករ​សេដ្ឋកិច្ច​មួយ ដែល​ធ្វើឱ្យ​កំណើន​សេដ្ឋកិច្ចជាតិ និង​អ្នកលក់ដូរ​ទាំង​អស់ទ​ទួលបាន​ផលប្រយោជន៍ ពី​កិច្ចព្រមព្រៀង​ពាណិជ្ជកម្ម​សេរី​កម្ពុជា-ចិន​នេះ តាមរយៈ​ការ​មក​វិនិយោគ​ទាំង​នៅក្នុង​ស្រុក និង​ក្រៅ​ស្រុក” ។

លោកស្រី ចេ​វ សុ​ឃុន ប្រធាន​សមាគម​អ្នកជំនាញ​អចល​ទ្រព្យ​កម្ពុជា​ឱ្យដឹង​ដែរ​ថា តាមរយៈ​កិច្ចព្រមព្រៀង​ពាណិជ្ជកម្ម​សេរី​កម្ពុជា-ចិន​នឹងត្រូវ​ចុះហត្ថលេខា​នាពេល​ខាង​មុ​នេះ កម្ពុជា​នឹង​ទ​ទួ​ប​ល​បាន​ផល​វិជ្ជមាន​ច្រើន ដែល​ក្រៅពី​វិស័យ​ឧស្សាហកម្ម កសិកម្ម និង​ទេសចរណ៍ ព្រមទាំង​ការធ្វើ​ពាណិជ្ជកម្ម​ទ្វេភាគី នៅក្នុង​នោះ​វិស័យ​អចលនទ្រព្យ ក៏​នឹង​ទទួលផល​មួយចំណែក​ផងដែរ។

លោកស្រី​បន្តថា “ខ្ញុំ​និយាយ​ត្រឹមតែ​វិស័យ​កសិកម្ម នៅពេល​ដែលមាន​តម្រូវការ​ទីផ្សារ​ខ្ពស់ គឺ​ទាមទា​ឱ្យមាន​បង្កើន​ការផលិត ដែល​ចាំ​បាត់​ត្រូវការ​ប្រើប្រាស់​ដីធ្លី​ក្នុង​រូប​ភាពជា​កសិដ្ឋាន​ដាំ​ដុះ រោងចក្រ​កែច្នៃ និង​វេច​ខ្ចប់​សម្រាប់ធ្វើ​ការនាំចេញ ដែល​សុទ្ធតែជា​ផ្នែក​មួយ​នៃ​វិស័យ​អចលនទ្រព្យ​ដូចគ្នា” ។

លោកស្រី​បន្ថែមថា “នៅពេល​មានការ​វិនិយោគ​កាន់តែច្រើន តម្រូវការ​នៃ​ការប្រើប្រាស់​អគារ​សម្រាប់​ធ្វើជា​ការិយាល័យ​ក៏មាន​កាន់តែច្រើន​ផងដែរ” ៕

        ដោយ ប.ណែត

ភ្នំពេញៈ យោងតាមគេហទំព័របរទេសមួយ Africa Trendy បានចាត់ចំណាត់ថ្នាក់មហាសេដ្ឋីកំពូលទាំង១០ របស់កម្ពុជា ក្នុងឆ្នាំ២០២០នេះ និងបានបង្ហាញមុខជំនាញនិងអាជីវកម្មរបស់ពួកគាត់ផងដែរ។

គេហទំព័រនេះបានបង្ហាញថាមហាសេដ្ឋីទាំង១០រូបដែលមានឥទ្ឋិពលនៅកម្ពុជា រួមមាន

១.អ្នកឧកញ៉ាគិត ម៉េង ជាប្រធានក្រុមប្រឹក្សាភិបាលក្រុមហ៊ុន Royal Group ដែលជាក្រុមហ៊ុនវិនិយោគធំមួយក្នុងប្រទេសកម្ពុជា និងវិនិយោគទៅលើវិស័យទូរគមនាគមន៍ វិស័យដឹកជញ្ជូន ថាមពល ប្រព័ន្ធផ្សព្វផ្សាយ ធនាគារ សណ្ឋាគារ អចលនទ្រព្យ វិស័យអប់រំ និងវិស័យកសិកម្មជាដើម។

២.អ្នកឧកញ៉ាពុង ឃាវសែ អគ្គនាយកក្រុមហ៊ុនវិនិយោគទុនអណិជកម្ពុជា ( OCIC ) ដែលក្រុមហ៊ុននេះ ភាគច្រើនវិនិយោគទៅលើវិស័យអចលនទ្រព្យ និងមានគម្រោងជាច្រើននៅក្នុងប្រទេសកម្ពុជា ដូចជាខុនដូ បុរី ផ្សារទំនើប មជ្ឈមណ្ឌលអាពាហ៍ពិពាហ៍ជាដើម។

៣ លោកជំទាវ ភាព ហៀក  ក្រុមហ៊ុនជីបម៉ុងគ្រុប ដែលក្រុមហ៊ុននេះ បានវិនិយោគទៅលើអចលនទ្រព្យ វិស័យភេសជ្ជៈ ផ្សារទំនើប និងវិស័យសំណង់ផងដែរ។

៤. លោកជំទាវ លឹម ឈីវហូ ក្រុមហ៊ុន អ៊ែតវូដ អាហរ័ណ នីហរ័ណ ។ លោកជំទាវ បច្ចុប្បន្នបានវិនិយោគទៅលើការនាំចូលម៉ាកស្រា និងភេសជ្ជៈល្បីៗ នៅលើពិភពលោក និងវិនិយោគទៅលើ តំបន់សេដ្ឋកិច្ច ដែលមានសកម្មភាពខ្លាំងជាងគេនៅកម្ពុជាផងដែរ។

៥. អ្នកឧកញ៉ា លី យ៉ុងផាត់ ជាម្ចាស់ក្រុមហ៊ុន LYP Group ៖ ក្រុមហ៊ុននេះ បានវិនិយោគទៅលើអចលនទ្រព្យ ការនាំចូល និងវិនិយោគទៅលើវិស័យកសិកម្មផងដែរ។

៦. អ្នកឧកញ៉ាសុខ គង់ អគ្គនាយកក្រុមហ៊ុនសុខាគ្រុប ដែលវិនិយោគទៅលើសណ្ឋាគារ ថាមពល អចលនទ្រព្យនិងកាស៊ីណូ ផងដែរ ។

៧.អ្នកឧកញ៉ា ម៉ុង ឬទ្ធី ជាម្ចាស់ក្រុមហ៊ុនម៉ុង ឬទ្ធីគ្រុប ដែលក្រុមហ៊ុនបានផ្ដោតទៅលើវិស័យកសិកម្ម។

៨. លោកឧកញ៉ា សៀ ឬទ្ធី ម្ចាស់ក្រុមហ៊ុនWorldbridge Group ដែលក្រុមហ៊ុនគេដឹងថាបានវិនិយោគភាគច្រើន ទៅលើវិស័យអចលនទ្រព្យ ក្នុងនោះមានគម្រោងធំៗជាច្រើននៅកម្ពុជា ដូចជា អគារ The Bridge អគារកំពុងសាងសង់ The Peak និងលំនៅឋានតម្លៃសមរម្យនៅស្រុកស្អាងខេត្តកណ្ដាល។

៩. លោកឧកញ៉ាលី ហួរ អគ្គនាយក្រុមហ៊ុនលី ហួរគ្រុប ដែលវិនិយោគទៅលើអចលនទ្រព្យ ហិរញ្ញវត្ថុ និងកសិកម្ម។

១០. លោកឧកញ៉ាសំ អាង ក្រុមហ៊ុនវឌ្ឍនៈគ្រុប ដែលកំពុងវិនិយោគលើអចលនទ្រព្យ និងកំពុងសាងសង់លើក្រុមហ៊ុនស្រាបៀរតម្លៃរាប់រយលានផងដែរ ៕