ដោយវុត្ថា

ភ្នំពេញ៖រដ្ឋាភិបាលបាននឹងកំពុងរៀបចំសេចក្តីព្រាងយុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា ២០២០-២០២៥ ខណៈវិស័យទាំងនេះ បានដើរតួនាទីយ៉ាងសំខាន់ ក្នុងការរួមចំណែកដល់ការអភិវឌ្ឍសេដ្ឋកិច្ចកម្ពុជា តាមរយៈការបង្កើតការងារ បង្កើនចំណូលដល់ប្រជាពលរដ្ឋ និងកាត់បន្ថយភាពក្រីក្រ។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុដែលបានផ្សព្វផ្សាយនៅថ្ងៃទី ៣០ ខែកក្កដា ឆ្នាំ ២០២០នេះ ឱ្យដឹងថា ថ្វីត្បិតវិស័យកាត់ដេរ ផលិតស្បែកជើង និងការបូបត្រូវបានអភិវឌ្ឍជាបន្តបន្ទាប់ ដោយផ្អែកលើភាពខ្លាំងដែលជាឧត្តមភាពប្រកួតប្រជែងកន្លងមកនេះ ក៏វិស័យនេះ នៅតែជួបនឹងបញ្ហាប្រឈមមួយចំមួនផងដែរ។

រាជរដ្ឋាភិបាលកម្ពុជា បានគិតគូររៀបចំ យុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា ២០២០-២០២៥ នេះ ជាផែនទីបង្ហាញផ្លូវដ៏មានសារៈសំខាន់ ដោយយុទ្ធសាស្ត្រនេះ បានកំណត់ចក្ខុវិស័យប្រែក្លាយវិស័យកាត់ដេរ ផលិតស្បែកជើង និងកាបូបកម្ពុជា ឱ្យទៅជាឧស្សាហកម្មដែលមានភាពឆ្លើយតប មានតម្លៃបន្ថែមខ្ពស់ មានមូលដ្ឋានគំាទ្រពិពិធកម្ម និងមានភាពប្រកួតប្រជែង មុនបំណាច់ឆ្នាំ ២០២៥ ហើយដែលវិស័យនេះ អាចចូលរួមចំណែកសកម្មក្នុងការអភវិឌ្ឍសង្គម-សេដ្ឋកិច្ចកម្ពុជា។

យុទ្ធសាស្ត្រនេះ មានគោលបំណងកំណត់នូវទិសដៅអភិវឌ្ឍន៍រួម បង្កើនភាពឯករាជ ពង្រឹងភាពប៉ាន់ស្មានបាន និងស្ថិរភាពនៃវិស័យកាត់ដេរ ផលិតស្បែកជើង និងកាបូបកម្ពុជា ដើម្បីបន្តលើកកម្ពស់ការអភិវឌ្ឍវិស័យនេះ ប្រកបដោយចីរភាព និងបរិយាប័ន្ន។

ដើម្បីសម្រេចបាននូវគោលបំណង និងចក្ខុវិស័យ យុទ្ធសាស្ត្របានកំណត់គោលដៅដូចខាងក្រោម៖១) បន្តពង្រឹងធនធានមនុស្សដើម្បីបង្កើនផលិតភាព និងបង្កើតគន្លងអាជីពសម្រាប់កម្មករ-និយោជិត ២)បន្តធ្វើឱ្យប្រសើរឡើងនូវលក្ខខណ្ឌការងារនិងសុខុមាលភាពរបស់កម្មករ-និយោជិត ៣) លើកម្ពស់ការវិនិយោគក្នុងស្រុក និងអន្តរជាតិដោយផ្តោតលើផលិតផលមានបន្ថែមតម្លៃខ្ពស់ ៤) ទាក់ទាញការវិនិយោគនៅក្នុងឧស្សាហកម្មគាំទ្រវិស័យនេះ និង ៥)ជំរុញការធ្វើពិពិធកម្មទីផ្សារសម្រាប់ការនាំចេញផលិតផលកាត់ដេរ ស្បែកជើង និងកាបូប៕

ដោយ៖ ប៊ី
ភ្នំពេញ៖ ក្រសួងពាណិជ្ជកម្មជប៉ុន នៅថ្ងៃព្រហស្បតិ៍នេះ បានសម្តែងការសោកស្តាយចំពោះការសម្រេចចិត្តរបស់អង្គការពាណិជ្ជកម្មពិភពលោក (WTO) ក្នុងការបង្កើតគណៈកម្មាធិការមួយ ដើម្បីគ្រប់គ្រងលើការនាំចេញរបស់តូក្យូលើវត្ថុធាតុដើមបច្ចេកវិទ្យាមួយចំនួនទៅកាន់ប្រទេសកូរ៉េ នៅក្នុងបង្កើនជម្លោះ ដែលកើតឡើងពីប្រវត្តិសាស្ត្រសង្គ្រាម។

កាលពីខែកក្កដាឆ្នាំ ២០១៩ រដ្ឋាភិបាលជប៉ុន បានឱ្យដឹងថា ខ្លួននឹងបញ្ឈប់ការអនុគ្រោះសម្រាប់ការដឹកជញ្ជូនទៅប្រទេសកូរ៉េខាងត្បូងនូវវត្ថុធាតុដើមចំនួន៣ ដែលក្រុមហ៊ុនដូចជាក្រុមហ៊ុនស Samsung ដើម្បីផលិតបន្ទះឈីបស្មាតហ្វូន និងអេក្រង់។

កូរ៉េខាងត្បូងដែលបានដាក់ពាក្យបណ្តឹង បានឱ្យដឹងថា អង្គការពាណិជ្ជកម្មពិភពលោកបានបង្កើតស្ថាប័នដោះស្រាយវិវាទនៅថ្ងៃពុធ ទោះបីមានការប្រឆាំងពីទីក្រុងតូក្យូក៏ដោយ។
ក្រសួងពាណិជ្ជកម្មកូរ៉េខាងត្បូង បានបញ្ជាក់ថា ខ្លួនគ្រោងនឹងបង្ហាញថា វិធានការរឹតត្បិតការនាំចេញរបស់ជប៉ុនគឺ “បំពាន និងរើសអើង” និងដើម្បីជំរុញឱ្យរដ្ឋាភិបាលទីក្រុងតូក្យូដកវិធានការនេះចេញឱ្យបានឆាប់ តាមដែលអាចធ្វើទៅបាន។

ក្រុងសេអ៊ូល បានឱ្យដឹងថា ជាធម្មតា វាត្រូវចំណាយពេល ១០ ទៅ ១៣ ខែ សម្រាប់ស្ថាប័នដោះស្រាយវិវាទអង្គការពាណិជ្ជកម្មពិភពលោក ដើម្បីធ្វើការសម្រេចចិត្តចុងក្រោយ។
មន្ត្រីក្រសួងពាណិជ្ជកម្មជប៉ុន បានឱ្យដឹងដែរថា ប្រទេសជប៉ុនជឿជាក់ថា បញ្ហានេះគួរតែត្រូវបានដោះស្រាយតាមរយៈការសន្ទនា ហើយខ្លួនគួរឱ្យសោកស្តាយ ដែលប្រទេសកូរ៉េខាងត្បូងបានធ្វើតាមរបៀបមួយ ដែលអាចធ្វើឱ្យខូចដល់កិច្ចពិភាក្សារវាងប្រទេសទាំងពីរ។

ប្រទេសកូរ៉េខាងត្បូងកាលពីឆ្នាំមុនបានដាក់ពាក្យបណ្តឹងទៅអង្គការពាណិជ្ជកម្មពិភពលោក (WTO) ជុំវិញការរឹតបន្តឹងការនាំចេញរបស់ជប៉ុន ប៉ុន្តែទីក្រុងសេអ៊ូលកាលពីខែវិច្ឆិកាបានផ្អាកដំណើរការនេះ។
ទោះយ៉ាងណានៅខែមិថុនា កូរ៉េខាងត្បូង បាននិយាយថា ខ្លួននឹងលើកឡើងនូវវិធានការរបស់អង្គការពាណិជ្ជកម្មពិភពលោក ដោយលើកឡើងពីវឌ្ឍនភាពតិចតួចនៅក្នុងកិច្ចពិភាក្សាជាមួយជប៉ុន៕ Reuters

ដោយ ៖ រ៉ាណេត

ភ្នំពេញ ៖ សហព័ន្ធឧស្សាហកម្មឥណ្ឌា (CII) នឹងរៀបចំពិព័រណ៍ និងកិច្ចប្រជុំកំពូលធុរកិច្ចមហាសមុទ្រឥណ្ឌូ-អាស៊ានលើកទី១នៅចុងសប្ដាហ៍ក្រោយនេះរយៈពេល៣ថ្ងៃ ដើម្បីផ្សព្វផ្សាយ និងស្វែងរកក្រុមហ៊ុនសហការជាដៃគូវិនិយោគរួមគ្នា។

តាមរយៈក្រសួងពាណិជ្ជកម្មកម្ពុជា បានធ្វើការផ្សព្វផ្សាយនៅព្រឹកថ្ងៃទី៣០ ខែកក្កដា ឆ្នាំ២០២០នេះថា សហព័ន្ធឧស្សាហកម្មឥណ្ឌា (CII) នឹងរៀបចំពិព័រណ៍ និងកិច្ចប្រជុំកំពូលធុរកិច្ចមហាសមុទ្រឥណ្ឌូ-អាស៊ានលើកទី១ រយៈពេល៣ថ្ងៃនៅចុងសប្ដាហ៍ក្រោយនេះ ពោលគឺចាប់ពីថ្ងៃទី៤-៦ ខែសីហា ឆ្នាំ២០២០។
នៅក្នុងសេចក្ដីប្រកាសដដែលបានបញ្ជាក់ថា ការរៀបចំពិព័រណ៍ និងកិច្ចប្រជុំកំពូលធុរកិច្ចខាងលើនេះ នឹងត្រូវធ្វើឡើងតាមរយៈវេទិកាអេឡិចត្រូនិក ដោយអ្នកចូលរួមអាចធ្វើការទំនាក់ទំនងជាលក្ខណៈឌីជីថល។

ពិព័រណ៍ និងកិច្ចប្រជុំមួយនេះ គឺជាជំនួបត្រីភាគីដំបូងបង្អស់របស់ប្រទេសឥណ្ឌា ដែលមានការចូលរួមពីបណ្តាប្រទេសលេចធ្លោមកពីអាស៊ាន និងតំបន់មហាសមុទ្រ ក៏ដូចជាការចូលរួមពីរដ្ឋាភិបាល សហគ្រាសធំៗមកពីបណ្តាប្រទេសទាំងអស់នៅក្នុងតំបន់ ដោយមានការផ្តោតសំខាន់ទៅលើវិស័យចំនួន៦ រួមមានដូចជា វិស័យជីវបច្ចេកវិទ្យាឱសថ និងសុខភាព វិស័យកសិ-និងផលិតផលសម្ព័ន្ធ វិស័យថាមពល(ថាមពលកកើតឡើងវិញ) វិស័យដឹកជញ្ជូន និងខ្សែសង្វាក់ផលិតកម្ម វិស័យទូរគមនាគមន៍ និងឧបករណ៍បច្ចេកវិទ្យាព័ត៌មានវិទ្យា ព្រមទាំងវិស័យខ្សែច្រវ៉ាក់តម្លៃផលិតកម្ម។

សម្រាប់កម្មវិធីពិព័រណ៍ និងកិច្ចប្រជុំធុរកិច្ចកំពូលលើកដំបូងខាងលើនេះ ម្ចាស់សហគ្រាស ផលិតករ ពាណិជ្ជករ សេវាករ និងម្ចាស់ក្រុមហ៊ុនវិនិយោគ ដែលមានបំណងចូលរួមផ្សព្វផ្សាយពីផលិតផល ឬសេវាកម្មរបស់ខ្លួន ក៏ដូចជាគម្រោងផ្សេងៗក្នុងការស្វែងរកដៃគូពាណិជ្ជកម្មអាចបំពេញបែបបទនៃការចុះឈ្មោះបានតាមរយៈគេហទំព័រ www.cii.in ៕

ដោយ ៖ រ៉ាណេត

ភ្នំពេញ ៖ មន្ត្រីជាន់ខ្ពស់រាជរដ្ឋាភិបាលកម្ពុជា បានទទូច និងលើកទឹកចិត្តដល់បណ្តាម្ចាស់អាជីវកម្មនានា គម្បីត្រូវចុះបញ្ជីនៅក្រសួងពាក់ព័ន្ធ ដើម្បីបានដំណើរការអាជីវកម្មដោយស្របច្បាប់ និងមានភាពងាយស្រួលក្នុងការទទួលបានទំនុកបម្រុងទុនបន្ថែមពីសំណាក់រាជរដ្ឋាភិបាលក្នុងកំឡុងពេលកំពុងជួបវិបត្តិសេដ្ឋកិច្ច។

ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានមានប្រសាសន៍នៅក្នុងសន្និសីទសារព័ត៌មានស្ដីពីដំណើរការ និងនីតិវិធីនៃគម្រោងហិរញ្ញប្បទានទ្រទ្រង់សហគ្រាសធនតូចនិងមធ្យមនៅទីស្ដីការគណរដ្ឋមន្ត្រី នាព្រឹកថ្ងៃទី៣០ ខែកក្កដា ឆ្នាំ២០២០ នេះថា បច្ចុប្បន្ននេះឧបសគ្គដ៏ធំរបស់ម្ចាស់អាជីវកម្មមួយចំនួនក្នុងការទទួលបានឥណទានពីធនាគារ ក្រៅពីគ្មានវត្ថុបញ្ចាំ ថែមទាំងមិនមានចុះបញ្ជីនោះទេ។

លោក ផែ ស៊ីផាន បានបញ្ជាក់ថា “លទ្ធភាពដែលអាចទទួលបានឥណទានពីធនាគារឯកជន ក៏ដូចជាធនាគារអភិវឌ្ឍន៍ជនបទ និងធនាគារ SME ដែលគាំទ្រដោយរាជរដ្ឋាភិបាល ទាល់តែសហគ្រាសទាំងនោះជាសហគ្រាសស្របច្បាប់ដែលមានការចុះបញ្ជីត្រឹមត្រូវ។ ដូច្នេះសម្រាប់សហគ្រាស ឬអាជីវកម្មណាដែលស្របច្បាប់គឺមានអាទិភាពខ្ពស់ក្នុងទទួលបានការជួយទំនុកបម្រុងពីរដ្ឋាភិបាលជាមួយកញ្ចប់ថវិការរហូតដល់ ៥០០លានដុល្លារដែលបានត្រៀមទុក”។

តាមរយៈក្រសួងសេដ្ឋកិច្ច និងហិរញ្ញវត្ថុ បានត្រៀមកញ្ចប់ថវិកាចំនួន៥០០លានដុល្លារ សម្រាប់ទ្រទ្រង់ និងលើកកម្ពស់វិស័យសហគ្រាសធុនតូច និងមធ្យម ឬ វិស័យ SMEs ក្នុងរូបភាពផ្តល់កម្ចីឥណទានដោយធនាគារ SME ធនាគារអភិវឌ្ឍន៍ជនបទ និងគ្រឹះស្ថានមីក្រូហិរញ្ញវត្ថុដទៃទៀតដែលធ្វើការពាក់ព័ន្ធវិស័យមួយនេះ។

លោក រស់ ស៊ីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ បច្ចុប្បន្ននេះរាជរដ្ឋាភិបាលបានត្រៀម និងរៀបចំកញ្ចប់ថវិកាចំនួន៥០០លានដុល្លារសម្រាប់ជួយទ្រទ្រង់ និងលើកកម្ពស់ដល់បណ្តាសហគ្រាសធុនតូច និងមធ្យមនៅកម្ពុជាក្នុងកំឡុងពេលជួបវិបត្តិសេដ្ឋកិច្ច។ នៅក្នុងកំឡុងពេលនេះ មានបណ្តាសហគ្រាសជាច្រើនដែលតម្រូវសាច់ប្រាក់ដើម្បីអាចបន្តដំណើរការអាជីវកម្មរវបស់ខ្លួន ប៉ុន្តែអ្វីដែលជាបញ្ហាគឺភាគច្រើនសហគ្រាសទាំងនោះមិនមានវត្ថុបញ្ចាំ សមត្ថភាពនៃការសងត្រឡប់មកវិញគឺមានកម្រិត ជាពិសេសអាជីវកម្មមិនមានការចុះបញ្ជី ដែលទាំងអស់នេះជារបាំងនៃការទទួលបានឥណទាន៕

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា-ជប៉ុន បានបន្តកិច្ចសហប្រតិបត្តិការរក្សាការបើកចំហរទីផ្សារ និងធានានូវលំហូស្បៀងក៏ដូចជាផ្គត់ផ្គង់ទំនិញនានារវាងប្រទេសទាំង២ ក៏ដូចជាជ្រៀតចូលក្នុងសង្វាក់ផ្គត់ផ្គង់ស្បៀងនៅក្នុងតំបន់ផងដែរ។

រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានចូលរួមនៅក្នុងកិច្ចប្រជុំពិសេសរដ្ឋមន្ត្រីសេដ្ឋកិច្ចអាស៊ាន-ជប៉ុន ដើម្បីឆ្លើយតបទៅនឹងកូវីដ-១៩ តាមរយៈសន្និសីទវីដេអូ កាលពីថ្ងៃទី២៩ ខែកក្កដា ឆ្នាំ២០២០ម្សិលមិញនេះបានលើកឡើងពីភាពប្រឈមនានារបស់កម្ពុជាពាក់ព័ន្ធទៅនឹងវិបត្តិសាកលមួយនេះ។

លោករដ្ឋមន្ត្រីបានលើកឡើងពីសារៈសំខាន់នៃការតភ្ជាប់ខ្សែច្រវាក់ផ្គត់ផ្គង់ កិច្ចសហប្រតិបត្តិការលើការស្រាវជ្រាវលើថ្នាំពេទ្យ និងវ៉ាក់សាំង ការរក្សាការបើកចំហទីផ្សារ ក៏ដូចជាការធានានូវលំហូរស្បៀង និងទំនិញក្នុងតំបន់។ ក្នុងន័យនេះ កម្ពុជាបានលើកទឹកចិត្តឱ្យមានការសហការគ្នាឱ្យកាន់តែជិតស្និទ្ធលើកិច្ចសម្រួលពាណិជ្ជកម្ម និងវិនិយោគ លុបបំបាត់របាំងពាណិជ្ជកម្ម និងប្រើប្រាស់បច្ចេកវិទ្យាឌីជីថល ដើម្បីស្តារឡើងវិញនូវទំនុកចិត្តរបស់វិស័យធុរកិច្ច និងអតិថិជន។

នៅក្នុងកិច្ចប្រជុំមួយនេះក៏បានផ្លាស់ប្តូរយោបល់ពីស្ថានភាពនៃកូវីដ-១៩ នៅក្នុងតំបន់ ចែករំលែកពីវិធានការនានាក្នុងការប្រយុទ្ធនឹងមេរោគកូវីដ-១៩ និងពិភាក្សាពីការស្តារសេដ្ឋកិច្ចឡើងវិញផងដែរ។ ជាលទ្ធផល កិច្ចប្រជុំបានអនុម័តលើ “ផែនការសកម្មភាពក្នុងការពង្រឹងសេដ្ឋកិច្ចអាស៊ាន-ជប៉ុន” ដែលផែនការនេះផ្តោតសំខាន់លើការថែរក្សាទំនាក់ទំនងសេដ្ឋកិច្ចយ៉ាងជិតស្និទ្ធរវាងអាស៊ាន និងជប៉ុន កាត់បន្ថយផលប៉ះពាល់មកលើសេដ្ឋកិច្ចបណ្តាលមកពីមេរោគកូវីដ-១៩ និងពង្រឹងសេដ្ឋកិច្ចឱ្យកាន់តែរឹងមាំ។

កាលពីពេលថ្មីៗនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាធ្លាប់បានបង្ហាញពីគោលបំណងរបស់កម្ពុជាក្នុងការជ្រៀតចូលក្នុងសង្វាក់ផ្គត់ផ្គង់ស្បៀងនៅក្នុងតំបន់តាមតែលទ្ធភាពអាចធ្វើទៅបាន។

សម្ដេចតេជោ បានមានប្រសាសន៍ថា “ Covid-19 មិនអាចផ្តាច់ដង្ហើម ជីពចរសេដ្ឋកិច្ច ដែលចិញ្ចឹមប្រជាជនឱ្យរស់គឺវិស័យកសិកម្ម។ ពេលនេះកម្ពុជា មិនមានខ្វះខាតស្បៀងនោះទេ ហើយថែមទាំងមានលទ្ធភាព សម្រាប់ធ្វើការនាំចេញទៅកាន់ទីផ្សារក្រៅប្រទេសថែមទៀត”។សម្តេចបានបន្ថែមថថា “កម្ពុជាអាចចូលរួមក្នុងសង្វាក់ផ្គត់ផ្គង់ស្បៀងក្នុងតំបន់ និងពិភពលោក។ ក្នុង១ឆ្នាំៗ កម្ពុជាមានសមត្ថភាពសល់ស្រូវជាង៦លានតោន ដែលគិតជាអង្ករមានជាង៤លានតោន បន្ទាប់ពីផ្គត់ផ្គង់ក្នុងស្រុករួច”។

សម្តេចតេជោបានបញ្ជាក់ថា នៅពេលបច្ចុប្បន្ននេះ ស្រូវអង្កររបស់យើង កំពុងនាំចូលទៅអឺរ៉ុបទោះបីជាត្រូវបង់ពន្ធក៏ដោយ។ ក្នុងរយៈពេល៦ខែក្នុងឆ្នាំ២០២០នេះ យើងបាននាំអង្ករ ( អង្ករក្រអូប ) ទៅទីផ្សារប្រទេសអឺរ៉ុបបានជាង១៣៨ ០០០តោន ស្មើនឹង៣៤ភាគរយនៃការនាំចេញសរុប។ នាំទៅចិនមានជាង១៤៨,០០០តោន នាំចេញទៅអាស៊ានជាង៥៤,០០០តោន។ នាំទៅកាន់ទិសដៅទីផ្សារផ្សេងៗបានជាង៦៣,០០០តោន សរុបក្នុងពេល៦ខែ ដើមឆ្នាំ២០២០នេះ កម្ពុជាបាននាំចេញអង្ករជាង៤០ម៉ឺនតោន៕

ដោយ៖ ប៊ី

ភ្នំពេញ៖ ប្រទេសកូរ៉េខាងត្បូង បានឱ្យដឹងថា ខ្លួនបានចាប់ផ្តើមការចរចារពាណិជ្ជកម្មសេរីជុំទី១ ជាមួយប្រទេសកម្ពុជានៅថ្ងៃព្រហស្បតិ៍នេះ ក្នុងគោលបំណង ដើម្បីជ្រៀតចូលកាន់តែជ្រៅទៅក្នុងទីផ្សារកម្ពុជា និងជម្នះរាល់រាល់ប៉ះពាល់សេដ្ឋកិច្ច ដែលបង្កដោយជំងឺកូវីដ១៩។

ក្រសួងពាណិជ្ជកម្មឧស្សាហកម្ម និងថាមពលរបស់កូរ៉េខាងត្បូង បានឱ្យដឹងថា ក្នុងអំឡុងពេល ២ ថ្ងៃនៃការចរចារជាក់ស្តែង ក្រុងសេអ៊ូល និងក្រុងភ្នំពេញនឹងពិភាក្សាលម្អិតអំពីកិច្ចព្រមព្រៀងពាណិជ្ជកម្មសេរី (FTA) ដែលរួមមានការពង្រីកកិច្ចសហប្រតិបត្តិការសេដ្ឋកិច្ចទ្វេភាគី។

សម័យប្រជុំនេះបានកើតឡើង បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើធ្វើឱ្យមានការរៀបចំសម្រាប់កិច្ចចរចាពាណិជ្ជកម្មសេរីទ្វេភាគី ក្នុងអំឡុងពេលកិច្ចប្រជុំកំពូលរបស់លោកជាមួយប្រធានាធិបតីកូរ៉េខាងត្បូងលោកមូន ជេអ៊ីន នៅរាជធានីភ្នំពេញកាលពីខែមីនាឆ្នាំ ២០១៩។

ប្រទេសកម្ពុជាគឺជាទិសដៅនាំចេញធំជាងគេលំដាប់ទី ៥៨ សម្រាប់ប្រទេសកូរ៉េខាងត្បូងដែលមានសេដ្ឋកិច្ចធំទី ៤ នៅអាស៊ី។

ទំហំពាណិជ្ជកម្មរវាងប្រទេសទាំងពីរ បានឈានដល់កម្រិតខ្ពស់បំផុត ១០០០ លានដុល្លារអាមេរិកក្នុងឆ្នាំ ២០១៩ កើនឡើង ៦ ភាគរយបើប្រៀបធៀបទៅនឹងឆ្នាំមុន។ នេះបើយោងតាមទិន្នន័យដែលចងក្រងដោយសមាគមពាណិជ្ជកម្មអន្តរជាតិកូរ៉េ។

ការនាំចេញរបស់កូរ៉េខាងត្បូងមកកាន់កម្ពូជាបានឈានដល់ ៦៩៧ លានដុល្លារក្នុងឆ្នាំ ២០១៩ កើនឡើង ៥.៥ ភាគរយ។ អតិរេកពាណិជ្ជកម្មឈានដល់ ៣៦១ លានដុល្លារ។

ប្រទេសនេះភាគច្រើននាំចេញរថយន្តដឹកទំនិញ ភេសជ្ជៈ និងវាយនភ័ណ្ឌប៉ាក់មកកាន់ប្រទេសកម្ពុជា ខណៈពេលដែលនាំចូលសម្លៀកបំពាក់ និងស្បែកជើង។

នៅពេលចុះហត្ថលេខារួច ប្រទេសកម្ពុជានឹងត្រូវបញ្ចូលទៅក្នុងបញ្ជីដៃគូពាណិជ្ជកម្មសេរីរបស់កូរ៉េខាងត្បូងនៅអាស៊ីអាគ្នេយ៍ ដែលបច្ចុប្បន្នគ្របដណ្តប់លើប្រទេសវៀតណាម និងសិង្ហបុរី។

កូរ៉េខាងត្បូងបានចុះកិច្ចព្រមព្រៀងពាណិជ្ជកម្មសេរី (FTA) ជាមួយអាស៊ាន ប៉ុន្តែប្រទេសនេះបាននិងកំពុងស្វែងរកកិច្ចព្រមព្រៀងដាច់ដោយឡែកពីគ្នាជាមួយសមាជិកនីមួយៗដើម្បីធ្វើឱ្យកិច្ចព្រមព្រៀងនីមួយៗកាន់តែមានភាពស៊ីជម្រៅ៕