ទំហំពាណិជ្ជកម្មរវាងកម្ពុជានិងសិង្ហបុរី កើនដល់ ២០០០លានដុល្លារ

ដោយ ហ្សូលី

ភ្នំពេញ៖ ទំហំពាណិជ្ជកម្មទ្វេភាគីរវាងប្រទេសកម្ពុជា និងសិង្ហបុរី បានកើនដល់សរុប ២០០០លានដុល្លារ ក្នុងឆ្នាំ ២០២០នេះ។ នេះបើតាមឱ្យដឹងតាមរយៈជំនួបពិភាក្សាការងាររវាងឯកអគ្គរដ្ឋទូតសិង្ហបុរី និងប្រមុខរដ្ឋស្តីទីនៃកម្ពុជា។

ក្នុងជំនួបពិភាក្សាការងារជាមួយលោក មៃខើល តាន់ កេង ស៊ីង (Michael Tan Keng Siong) ឯកអគ្គរដ្ឋទូតសិង្ហបុរី ប្រចាំកម្ពុជា នាថ្ងៃទី២៨ ខែតុលា ឆ្នាំ២០២០ នៅវិមាន ព្រឹទ្ធសភា សម្តេច សាយ ឈុំ បានសម្ដែងសេចក្តីរីករាយចំពោះ កំណើននៃទំហំពាណិជ្ជកម្ម ការវិនិយោគ និងការ មកទស្សកិច្ចរបស់ប្រជាជន សិង្ហបុរី ដែលមានការកើនឡើងជាលំដាប់។

សម្តេច សាយ ឈុំ ប្រមុខរដ្ឋស្តីទី នៃកម្ពុជា បានថ្លែងថា ឆ្នាំ២០២០នេះ ពាណិជ្ជកម្មទ្វេភាគី រវាងកម្ពុជា-សិង្ហបុរី មានទំហំជិត២ពាន់លានដុល្លារ ចំណែកឯការវិនិយោគសិង្ហបុរីនៅកម្ពុជា មានទំហំដល់ទៅ ២៥.៦%។

ប្រមុខស្តីទីនៃកម្ពុជារូបនេះបានមានប្រសាសន៍ថា ជាក់ស្តែងក្នុងឆ្នាំ២០២០នេះ ពាណិជ្ជកម្មទ្វេភាគីរបស់ប្រទេសមានទំហំជិត ២០០០ លានដុល្លារអាមេរិក ហើយការវិនិយោគរបស់សិង្ហបុរីនៅកម្ពុជាមានទំហំដល់ទៅ២៥.៦ភាគយ។

ជាងនេះទៅទៀត សម្តេច សាយ ឈុំ សង្ឃឹមថា ក្រោយជំងឺកូវីដ-១៩ ត្រូវបានបញ្ចប់ ទំនាក់ទំនង និងកិច្ច សហប្រតិបតិ្តរវាងប្រជាជនប្រទេសទាំងពីរ នឹងបន្តរីកចម្រើនជាបន្តបន្ទាប់ថែមទៀត។ ការវាយតម្លៃខ្ពស់ចំពោះរដ្ឋាភិបាលសិង្ហបុរី ដែលបានទប់ស្តាត់នៃការឆ្លង និងការីករាលដាលជំងឺកូវីដ១៩ ប្រកបដោយប្រសិទ្ធភាព និងជូនពរឲ្យរដ្ឋាភិបាល និងប្រជាជនសិង្ហបុរី ជម្នះបានលើជំងឺ កូវីដ១៩នេះ ដោយឆាប់រហ័ស។

ឆ្លៀតឱកាសនេះ ឯកអគ្គរដ្ឋទូតសិង្ហបុរីប្រចាំកម្ពុជាបានលើកឡើងថា ទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរមានការរីកចម្រើន ជាពិសេសទំហំពាណិជកម្មទ្វេភាគីនៃប្រទេសទាំងពីរមានការកើនឡើងខ្ពស់។

ឯកអគ្គរដ្ឋទូតបន្ដថា ពាណិជ្ជកម្មរបស់សិង្ហបុរី រក្សាបានចំណាត់ថ្នាក់លំដាប់ទី២ ក្នុងចំណោមប្រទេសទាំង១០ ដែលកំពុងវិនិយោគនៅកម្ពុជា៕

អ្នកជំនាញអន្តរជាតិថា ការលក់គម្រោងខុនដូនៅកម្ពុជាចាប់ផ្តើមបង្ហាញ សញ្ញាប្រសើរឡើង

ដោយវុត្ថា

ភ្នំពេញៈ បើទោះបីកម្ពុជាប្រឈម នឹងទៅនឹងវិបត្តិសេដ្ឋកិច្ចសកលយ៉ាងណាក្តី អ្នកជំនាញបានអះអាង ការលក់គម្រោងខុនដូនាពេលបច្ចុប្បន្ននេះ មិនមានអ្វីជាបញ្ហាប្រឈ​មនោះទេ ប៉ុន្តែអ្វីដែលប្រឈមគឺការស្វែងរកអតិថិជនឱ្យចំគោលដៅ និងឱ្យបានត្រឹមត្រូវ។

លោក Russel Tizon  អគ្គនាយកក្រុមហ៊ុន ក្រុមហ៊ុន Prestige Homes នៅក្នុងកិច្ចប្រជុំ តាមរយៈកម្មវិធី ZOOM ស្តីពី “ការផ្ដល់ប្រឹក្សាអាជីវកម្មអចលនវត្ថុ ” ដែលរៀបចំដោយសមាគមភ្នាក់ងារ និងវាយតម្លៃអចលវត្ថុកម្ពុជា នៅថ្ងៃទី២៨ ខែតុលា ឆ្នាំ ២០២០នេះឱ្យដឹងថា ក្នុងនាមយើងជាអ្នកលក់ ត្រូវដឹងពីទំហំថវិការបស់អតិថិជនឱ្យបានច្បា​ស់លាស់ ដើម្បីមានភាពងាយស្រួល ក្នុងការសម្របសម្រួលជាមួយពួកគាត់ ឱ្យជ្រើសរើសតំបន់ដែលត្រូវទិញ ។

លោកបន្តថា “នៅពេលយើងដឹងព័ត៌មានគ្រប់ជ្រុងជ្រោយ ពីអតិថិជនច្បាស់លាស់ហើយនោះ ក្នុងនាមជាភ្នាក់ងារលក់ ត្រូវស្វែងទីតាំង ឬតំបន់ណានៃគម្រោងខុនដូលក់ឱ្យសាក់សមជូនពួកគាត់”។  លោកបន្តថា “នៅក្នុងពេលនេះ (Covid-19) គឺយើងមានភាពងាយស្រួលក្នុងការសម្របសម្រួល ឬចចារជាមួយម្ចាស់គម្រោង”។

លោកបន្ថែមថា បើទោះបីមានការថមថយនៃការទិញនៅក្នុងវិបត្តិនេះ  ប៉ុន្តែវាមិនជាប់គាំងនោះទេ ការលក់ចេញទៅកាន់អតិថិជនជាគោលដៅ នៅតែមានជាបន្តបន្តបន្ទា​ប់។

លោក ខាត់ សុវណ្ណ នាយកក្រុមហ៊ុន Cam Top Property Group បានយល់ស្រប​នឹងការលើកឡើងខាងលើ ដោយលោកបានមានប្រសាសន៍ថា ម្ចាស់គម្រោងខុនដូនីមួយ​ៗ នៅក្នុងអំឡុងពេលមានវិបត្តិសេដ្ឋកិច្ចនេះ បានបញ្ចុះតម្លៃរបស់ខ្លួន និងបន្ធូបន្ថយនៃការបង់ប្រាក់ ដើម្បីទាក់ទាញអតិថិជន និងជាយុទ្ធសាស្ត្រដ៏ល្អ ប៉ុន្តែក្នុងនាមជាភ្នាក់ងារលក់  យើងត្រូវសិក្សាពីតម្លៃគម្រោងខុនដូឱ្យបានច្បាស់លាស់។

លោកបន្តថា“យើងត្រូវដឹកថាម្ចាស់គម្រោង ដែលដាក់លក់ហ្នឹងវាស័ក្តិសមជាមួ​យនឹងទីផ្សារដែរឬទេ” ។ លោកបន្តថា “នៅពេលដែលពួកគាត់បញ្ចុះតម្លៃក្រោមទីផ្សារ ឧទា​ហរណ៍បើគាត់(អ្នកវិនិយោគ)លក់តម្លៃ១០០០ ដុល្លារក្នុងមួយម៉ែត្រការ៉េ ប៉ុន្តែនៅពេលដែលគាត់បញ្ចុះតម្លៃ មកត្រឹម៧០០ឬ៨០០ ដុល្លារអាមេរិកក្នុងមួយម៉ែត្រការ៉េ នេះគឺឱកាសល្អសម្រាប់យើងក្នុងការនាំភ្ញៀវមកទិញ ឬទិញទុកខ្លួសម្រាប់វិនិយោគ”។

លោកបញ្ជាក់ទៀតថា អ្វីដែលចំណុចបារម្ភ គឺតម្លៃលើសទីផ្សារ ដែលយើងក្នុងនាមជាភ្នាក់ងារ មិនមានលទ្ធភាពទៅសិក្សាតម្លៃរបស់ម្ចាស់គម្រោងទេ  ដូច្នេះយើងមានសិទ្ធិ ឬមិនមានសិទ្ធិក្នុងការណែនាំឱ្យភ្ញៀវមកទិញបាន ឧទាហរណ៍ គាត់ដាក់តម្លៃលើសទីផ្សារ យើក៏ពិបាកដែរនៅក្នុងវិបត្តិនេះ ប៉ុន្តែ បើយើងដឹងពីតម្លៃ ហើយមានការបញ្ចុះតម្លៃក្រោមទីផ្សារ នោះយើងនឹងភាពងាយស្រួលក្នុងណែនាំភ្ញៀវមកទិញបាន៕

លោករិន ច័ន្ទរិទ្ឋត្រូវបានតែងតាំងជាអនុប្រធានសមាគមអ្នកជំនាញអចលនទ្រព្យកម្ពុជា

ភ្នំពេញៈ អគ្គនាយកក្រុមហ៊ុនDNZ Realty លោករិន ច័ន្ទរិទ្ឋត្រូវបានសមាគមអ្នកជំនាញអចលនទ្រព្យកម្ពុជា ប្រកាសតែងតាំងជា អនុប្រធានសមាគមអ្នកជំនាញអចលនទ្រព្យកម្ពុជា(CREA)។

លោករិន ច័ន្ទរិទ្ធិ បានមានប្រសាសន៍ដោយបានថ្លែងអំណរគុណ ដល់លោកស្រី ចេវ សុឃុនប្រធានសមាគម និងលោកឃាង ពុទ្ឋីប្រធានក្រុមប្រឹក្សាភិបាលសមាគម ដែលបានផ្តល់សេចក្តីទុកចិត្ត ឲ្យលោកបានទទួលដំណែង ជាអនុប្រធានសមាគមអ្នកជំនាញអចលនទ្រព្យកម្ពុជា។

លោកបន្តថា លោកនឹងប្រើប្រាស់តួនាទីនេះ ដើម្បីលើកកម្ពស់វិស័យអចលនទ្រព្យនៅកម្ពុជាឲ្យកាន់តែប្រសើរជាងមុន ការពារសិទ្ធិភ្នាក់ងារលក់ហើយនិងអតិថិជន ព្រមទាំងជម្រុញឲ្យមានការចូលរួមចំណែកបន្ថែមទៀត ពីក្រុមហ៊ុននិងភ្នាក់ងារអចលនទ្រព្យ ក្នុងកិច្ចការងារមនុស្សធម៌និងកិច្ចការសង្គមនានា។

លោករិន ច័ន្ទរិទ្ឋបានបន្តថា “ការរួមចំណែកក្នុងការជួយដល់សមាគម ជាកិច្ចការសង្គមមួយដែលយើងរួមគ្នាធ្វើ ដើម្បីជំរុញភាពរីកចម្រើនក្នុងក្រុមហ៊ុនភ្នាក់ងារអចលនទ្រព្យ ក៏ដូចជាជំរុញភាពរីកចម្រើននៃវិស័យសំណង់ និងអចលនទ្រព្យនៅកម្ពុជា”។

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានថ្លែងថា ការតែងតាំងថ្នាក់ដឹកនាំសមាគមនេះ ជាការរួមចំណែកដើម្បីជំរុញភាពរីកចម្រើនរបស់សមាគម ដោយសារសមាគមបង្កើតឡើង ក្នុងគោលដៅបណ្តុះបណ្តាល និងពង្រឹងធនធានមនុស្សក្នុងវិស័យនេះ ពិសេសគាំទ្រគោលនយោបាយរបស់រដ្ឋាភិបាលកម្ពុជាក្នុងការជំរុញការរីកចម្រើន ក្នុងវិស័យអចលនទ្រព្យ ក៏ដូចជា លើកកំពស់សេដ្ឋកិច្ចសង្គមឲ្យកាន់តែមានភាពរីកចម្រើនបន្ថែមទៀត។

លោកបន្តថា“វិស័យសំណង់ និងអចលនទ្រព្យត្រូវការធនធានមនុស្សកាន់តែច្រើន ដោយសារវិស័យនេះមានភាពរីកចម្រើនលឿន បើទោះជាមានធនធានមនុស្សមកពីបរទេសច្រើនក៏ដោយ ប៉ុន្តែយើងត្រូវការបណ្តុះធនធានមនុស្សច្រើនថែមទៀត ដើម្បីបំពេញតម្រូវការទីផ្សារ”៕

អូស្រ្តាលីអនុញ្ញាតឱ្យសាងសង់អគារលំនៅឋានខ្ពស់លំដាប់ទី៤ក្នុង តម្លៃ១,១ពាន់លានដុល្លារ

ដោយវុត្ថា

អូស្ត្រាលីៈ រដ្ឋាភិបាលអូស្ត្រាលី បានអនុញ្ញាតជាផ្លូវការក្នុងការអនុញ្ញាត្តិ ឱ្យសាងសង់អគារលំនៅឋានខ្ពស់បំផុតទី៤ ចំនួន២ដែលមានឈ្មោះថា Elizabeth Quay នៅក្នុងតំបន់ពាណិជ្ជកម្ម តាមមាត់ទឹកនៃទីក្រុង Perth។

អគារ Elizabeth Quay នឹងក្លាយជាអគារខ្ពស់បំផុតទី៤ នៅក្នុងទីក្រុង ជាមួយនឹងការរចនាប្លង់ប្រកបដោយភាពទាក់ទាញ និងមានតែមួយគត់ ។

អគារនេះ មានកំពស់៥៨ជាន់ ដែលត្រូវបានសាងសង់ឡើងដោយការប្រើប្រាស់ចំរុះ រួមមាន ការិយាល័យ សណ្ឋាគារ៨៤បន្ទប់ និងអាផាតម៉ិនចំនួន២០០យូនីត ។ ចំណែកអារ អគារទី២ មានកំពស់២១ជាន់ដែលភាគច្រើន ជាប្រភេទការិយាល័យ ។

ក្រុមហ៊ុនអភិវឌ្ឍន៍ Brookfield បានឱ្យដឹងថា គម្រោងអគារទី២នេះ នឹងចាប់ផ្តើមបុកគ្រឹះសាងសង់មុនគេនៅពាក់កណ្តាលឆ្នាំក្រោយ។ គម្រោងអគារទាំងពីរនេះ មានតម្លៃវិនិយោគ១,១ ពាន់លានដុល្លារអាមេរិក។

លោកBen Wyatt រដ្ឋមន្ត្រីរតនាគារ និងដែនដីនៃប្រទេសអូស្ត្រាលីបានឱ្យដឹងថា គម្រោងសាងសង់អគារនេះ (Elizabeth Quay) ត្រូវបានរំពឹងថា នឹងផ្តល់ឱកាសការងារជូនពលរដ្ឋចំនួន២៥០០កន្លែង នៅក្នុងអំឡុងពេលនៃការសងសង់។

លោកបន្តថា “នៅពេលយើងនាំមនុស្សឱ្យមករស់នៅក្នុងទីក្រុង យើងត្រូវផ្ញើសារទៅកាន់ពួកគាត់ឱ្យដឹងថា ទីក្រុងបើកចំហរលើការធ្វើធុរកិច្ចគ្រប់ប្រភេទ”៕

ក្រុមហ៊ុនភ្នាក់ងារអចលនទ្រព្យតូចៗនឹងប្រឈមបញ្ហាខ្លាំង ខណៈក្រុមហ៊ុនធំៗកាន់តែពង្រីកសក្ដានុពលលើទីផ្សារនៅឆ្នាំ២០២១

ដោយ ៖ រ៉ាណេត

ភ្នំពេញ ៖ នៅឆ្នាំ២០២១ខាងមុខនេះ ខណៈដែលបណ្តាអ្នកជំនាញបានបង្ហាញពីភាពជឿជាក់ថា វិស័យអចលនទ្រព្យនឹងវិលត្រឡប់ទៅរកស្ថានភាពល្អប្រសើរឡើងវិញនោះ បញ្ហា និងភាពប្រឈមមួយចំនួននឹងកើតមានចំពោះបណ្តាក្រុមហ៊ុនភ្នាក់ងារនៅកម្ពុជា ដែលតម្រូវឱ្យមានការត្រៀមខ្លួបជាមុនដើម្បីគេចចេញពីបញ្ហា។

លោក ខាត់ សុវណ្ណ នាយកក្រុមហ៊ុនភ្នាក់ងារអចលនទ្រព្យ CamTop Property Group បានមានប្រសាសន៍ថា អត្រាភាគរយច្រើននៅឆ្នាំ២០២១ សេដ្ឋកិច្ចសាកលអាចនឹងចាប់ផ្តើមល្អជាបណ្តើរៗឡើងវិញ ហើយវិស័យអចលនទ្រព្យនៅកម្ពុជាក៏នឹងវិលត្រឡប់ទៅរកភាពល្អប្រសើរឡើងវិញផងដែរ ហើយក្នុងនោះក៏នឹងមានកំណើនក្រុមហ៊ុនថ្មីៗបន្ថែមទៀតចូលមកក្នុងទីផ្សាររួម ដែលវាអាចជាបញ្ហាប្រឈមជាមួយនឹងក្រុមហ៊ុនភ្នាក់ងារមួយចំនួន។

លោក ខាត់ សុវណ្ណ បានមានប្រសាសន៍បញ្ជាក់ថា “ជាធម្មតានៅពេលដែលវិស័យណាមួយរីកចម្រើន វានឹងជម្រុញឱ្យមានការប្រកួតប្រជែងគ្នាជាមិនខាន។ ដោយឡែកសម្រាប់ទីផ្សារអចលនទ្រព្យនៅកម្ពុជានៅក្នុងឆ្នាំ២០២១ខាងមុខខ្ញុំជឿថា ក៏នឹងមានវត្តមានក្រុមហ៊ុនថ្មីៗចូលមកបន្ថែមទៀតជាមិនខាន ដែលក្នុងនោះមានទាំងក្រុមហ៊ុនក្នុងស្រុក និងក្រុមហ៊ុនអន្តរជាតិផងដែរ”។

លោកបន្តថា “នៅពេលមានក្រុមហ៊ុនកាន់តែច្រើនវាបង្ហាញពីភាពរីកចម្រើន និងល្អប្រសើររបស់វិស័យអចលនទ្រព្យ ប៉ុន្តែដែលជាបញ្ហាប្រឈមគឺក្រុមហ៊ុនភ្នាក់ងារតូចៗក្នុងស្រុកមួយចំនួន ដែលតម្រូវឱ្យមានការប្រកួតប្រជែងជាមួយបណ្តាក្រុមហ៊ុនភ្នាក់ងារជំនាញធំៗ ជាពិសេសក្រុមហ៊ុនដែលចូលមកពីក្រៅប្រទេសដែលពួកគេមានជំនាញច្បាស់ និងចំណេះដឹងទូលំទូលាយពាក់ព័ន្ធទៅនឹងវិស័យមួយនេះ។ ដូច្នេះ អ្វីដែលក្រុមហ៊ុនភ្នាក់ងារតូចៗគួរធ្វើនោះគឺការពង្រឹកសមត្ថភាព គុណភាព និងចំណេះដឹងបន្ថែមឱ្យបានច្បាស់លាស់ ជាពិសេសត្រូវបង្កើតក្រុមសហការងារឱ្យបានរឹងមាំ គ្រប់ជ្រុងជ្រោយ និងភាពស្មោះត្រង់ដើម្បីធានាបាននូវប្រសិទ្ធភាពខ្ពស់ ដែលអាចទទួលបានទំនុកពីអតិថិជន”។

លោក ខាត់ សុវណ្ណ បានបញ្ជាក់ផងដែរថា អ្វីដែលមិនអាចខ្វះបានសម្រាប់ក្រុមហ៊ុនភ្នាក់ងារអចលនទ្រព្យ គឺការរៀបចំជាយុទ្ធសាស្ត្ររបស់ក្រុមការងារ ក៏ដូចជាក្រុមហ៊ុន ដើម្បីអាចធ្វើការប្រកួតប្រជែងជាមួយក្រុមហ៊ុនដទៃទៀតដែលស្ថិតនៅក្នុងវិស័យរួមគ្នា ៕

សម្តេចក្រឡាហោម ស ខេងស្នើរុស្សីរៀបចំចរចារកិច្ចព្រមព្រៀងពាណិជ្ជកម្មសេរី ជាមួយកម្ពុជានាពេលអនាគត

ដោយវុត្ថា

ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ  បានស្នើដល់ភាគីរុស្ស៊ី រៀបចំចរចារកិច្ចព្រមពាណិជ្ជកម្មសេរី ជាមួយកម្ពុជានាពេលខាងមុខ ខណៈដែលកម្ពុជាបានចុះហត្ថលេខាកិច្ចព្រមព្រៀងនេះ ជាមួយភាគីចិន និងកំពុងចរចារជាមួយភាគីកូរ៉េ។

សម្តេចក្រឡាហោម ស ខេង ឧបនាយករដ្ឋមន្ត្រី នៅក្នុងជំនួបពិភាក្សាការងារជាមួ​យ លោកAnatoly BOROVIK ឯកអគ្គរដ្ឋទូតសហព័ន្ធរុស្ស៊ីប្រចាំនៅកម្ពុជា កាលពីម្សិលមិញនេះឱ្យដឹងថា  ក្នុងកាលៈទេសៈបច្ចុប្បន្ននេះ កម្ពុជាកំពុងខិតខំស្វះស្វែងរកដៃគូសេដ្ឋកិច្ច ដោយនាពេលកន្លងទៅនេះ បានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយភាគីចិន ហើយនាពេលខាងមុខជាមួយសាធារណរដ្ឋកូរ៉េ ឬកូរ៉េខាងត្បូង។

សម្ដេចក៏សង្ឃឹមថាភាគីរុស្ស៊ី និងកម្ពុជា ក៏អាចនឹងមានកិច្ចព្រមព្រៀងនេះដែរ ដើម្បីបង្កើនទំហំសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរ។

លោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា បានឱ្យដឹងថា អ្វីដែលកម្ពុជាស្នើឱ្យមានកិច្ចព្រមព្រៀងពាណិជ្ជកម្ម ជាមួយបណ្តាប្រទេសនានា ដូចជាប្រទេសរុស្សី ជាយុទ្ធសាស្ត្រដ៏ល្អសម្រាប់រាជរដ្ឋាភិបាលកម្ពុជា ដែលបាននឹងកំពុងធ្វើ និងគួរតែធ្វើ ដើម្បីជំរុញការនាំចេញនូវផលិតផលរបស់កម្ពុជា ។

លោកបណ្ឌិតបន្តថា  កន្លងមកនេះកម្ពុជា បាននាំចេញទៅកាន់រុស្សីមានតែផលិត​ផលកសិកម្ម និងសម្លៀកបំពាក់ប៉ុណ្ណោះ ប៉ុន្តែសម្រាប់រស្សីវិញបាននាំនូវគ្រឿងចក្រ និងផលិតកម្មធំៗចូលមកកម្ពុជា  ដែលបានកន្លងមកនេះ។ ម៉្យាងទៀត វាជាផលលំបាកនិងប្រកបដោយរលូនផងដែរ ព្រោះប្រទេសរុស្សីស្ថិតនៅឆ្ងាយ ។

មន្ត្រីជាន់ជាន់នៃក្រសួងពាណិជ្ជកម្ម  បានឱ្យដឹងដែរថា “កន្លងមកនេះ កម្ពុជាបានបង្កើតក្រុមការងារក្នុងការចរចារ កិច្ចព្រមព្រៀងពាណិជ្ជកម្មសេរីជាមួយភាគីរុស្សី មកដល់ពេលនេះ មិនទាន់មានការបើកចរចារនៅឡើយទេ ប៉ុន្តែបាននឹងកំពុងត្រៀមចរចារផងដែរ”។លោកបន្តថា “ជំហ៊ានដំបូងនេះ កម្ពុជាបានធ្វើចរចារជាមួយចិន និងកូរ៉េ ហើយក៏បានចរចារជាមួយប្រទេសនៅក្នុងតំបន់អឺរ៉ាស៊ី ដែលមានរុស្សីផងដែរ”។

សម្រាប់ទីផ្សាររុស្សី យើងបាននាំចេញទំនិញទៅកាន់ច្រើន ដូចជាស្រូវអង្ករ កៅស៊ូ ល្ងរ សណ្តែក ដែលជាគ្រាប់ធុញជាតិផងដែរ ដែលបញ្ចុប្បន្ននេះ យើងបនាំចេញនូវផលិផលសម្លៀកបំពាក់ទៅកាន់រុស្សីផងដែរ។

លោកបន្ថែមថា “នៅពេលដែលយើងបានចរចារជាមួយរុស្សី និងធ្វើឱ្យកម្ពុជាពង្រី​កទីផ្សារកាន់តែធំ ព្រមទាំងទាក់ទាញវិនិយោគិនរុស្សីបានកាន់តែច្រើនថែមទៀត”។

ទំនាក់ទំនងការទូតរវាងកម្ពុជា និងរុស្សី មកទល់ពេលនេះគឺមានរយៈពេល៦៤ឆ្នាំ ហើយនៅឆ្នាំក្រោយនេះគឺជាខួប៦៥ ឆ្នាំ នៃទំនាក់ទំនងការទូតរវាងកម្ពុជា និងរុស្ស៊ី ដោយភាគីទាំងពីរបានផ្តោតសំខាន់ ជាពិសេសលើវិស័យ អភិវឌ្ឍន៍ធនធានមនុស្ស សេដ្ឋកិច្ច ពាណិជ្ជកម្ម វប្បធម៌ ការទូត និងវិស័យដទៃទៀត ដែលនាំមកនូវការរីកចម្រើនសម្រាប់ប្រទេសទាំង២៕

រដ្ឋបាលខេត្តកែបកំណត់ឱ្យពលរដ្ឋរុះរើសំណង់រំលោភលើឆ្នេរកែប ក្រោយបញ្ចប់ពិធីបុណ្យអុំទូក

ដោយ ហ្សូលី

កែប៖ រដ្ឋបាលខេត្តកែប បានកំណត់ឱ្យប្រជាពលរដ្ឋ និងអាជីវករ ចាំបាច់ត្រូវរុះរើសំណង់ដែលរំលោភលើតំបន់សាធារណៈឆ្នេរកែបឱ្យបានមុនថ្ងៃទី ១៥ វិច្ឆិកា ខាងមុខ បន្ទាប់ពីអាជ្ញាធរបានព្រមានជាច្រើនលើកច្រើនសារ តែពលរដ្ឋមិនគោរពតាមការណែនាំ។

ការដាក់ចេញនូវឱសាទវាទនេះ ក្រោយមានកិច្ចប្រជុំធំមួយរបស់ អាជ្ញាធរខេត្តកែប និងអាជីវករដែលមានទីតាំងលក់ដូរតាមបណ្តោយឆ្នេរកែប ដោយដឹកនាំដោយ លោក សោម ពិសិដ្ឋ អភិបាលខេត្តកែប នៅសាលប្រជុំសាលាខេត្តកែប។

អភិបាលខេត្តកែប បានដាក់បញ្ជាដាច់ខាតឱ្យអភិបាលក្រុងកែប និងមន្រ្តីជំនាញពាក់ព័ន្ធ ត្រូវចាត់វិធានក្តៅ ដោយធ្វើយ៉ាងណាក៏ដោយត្រូវរុះរើសំណង់រំលោភទីតាំងសាធារណៈរបស់រដ្ឋចេញឱ្យអស់ ដើម្បីយកទីតាំងទាំងនោះ សម្រាប់បម្រើឱ្យផលប្រយោជន៍សាធារណៈ ជាពិសេសភ្ញៀវទេសចរ ដែលមកសម្រាកកម្សាន្តនៅខេត្តកែបនេះតែម្តង។

លោកស្រី ទិត្យ សុខា អភិបាលក្រុងកែប បានកំណត់ឱ្យបណ្តាអាជីវករណា ដែលបានសង់សំណង់រំលោភលើទីតាំងសាធារណៈរបស់រដ្ឋ ត្រូវរុះរើចេញមកវិញ ហើយសម្អាតទីតាំងទាំងនោះ ឱ្យដូចសភាពដើម។

ប្រសិនបើម្ចាស់ទីតាំងទាំងនោះមិនគោរពតាមទៀត អាជ្ញាធរនឹងចុះទៅរុះរើជូន ដោយម្ចាស់ទីតាំងត្រូវបង់ថ្លៃនៃការរុះរើជូនអាជ្ញាធរ ហើយអាជ្ញាធរមិនធានានូវការខូចខាតទ្រព្យសម្បត្តិទាំងនោះឡើយ។

ទោះបីជាយ៉ាងណាក៏ដោយ អាជ្ញាធរបានទុកពេលឱ្យអាជីវករ អាចរក្សាទីតាំងទាំងនោះសម្រាប់លក់ដូរ នៅថ្ងៃឈប់សម្រាកក្នុងព្រះពិធីគ្រប់គ្រងរាជសម្បត្តិរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី និងពិធីបុណ្យអំទូក បណ្តែតប្រទីប អកអំបុក និងសំពះព្រះខែ ពោលគឺការរុះរើបន្ទាប់ពីបញ្ចប់ពិធីបុណ្យធំទាំងពីរនេះ។

ក្រៅពីបញ្ហាការសង់សំណង់រំលោភលើទីតាំងសាធារណៈរបស់រដ្ឋមានដូចជា ផ្លូវដើរកម្សាន្តតាមប្របមាត់ឆ្នេរ ផ្លូវធ្វើដំណើររបស់យានយន្តជាដើម អភិបាលខេត្តកែប ក៏បានឱ្យអាជីវករទាំងនោះបញ្ឈប់នូវសកម្មភាពចេញមកចាប់ឡាន ដើម្បីឱ្យចូលកន្លែងរបស់ខ្លួន ដែលនេះអាចមានហានិភ័យខ្ពស់នូវការជួបគ្រោះថ្នាក់ចរាចរណ៍។

គេមើលឃើញថា នេះជាលើកដំបូងហើយ ដែលអាជ្ញាធរខេត្តកែប បានចាត់វិធានការក្តៅទៅលើបញ្ហាអវិជ្ជមានមួយចំនួនដែលបានកើតឡើងជាយូរមកហើយ នៅតាមបណ្តោយឆ្នេរកែបនេះ ដែលកន្លងមកអាជ្ញាធរ នៅប្រើវិធីសាស្រ្តត្រជាក់ៗ តែហាក់មិនបានផល ឬបានផលមួយរយៈខ្លី ហើយបញ្ហាទាំងនោះនៅតែបន្តកើតមាន ឬកើតឡើងលើសដើម៕

រដ្ឋមន្ត្រីទេសចរណ៍៖ ការបង្កើតទីក្រុងសៀមរាបថ្មី មិនអនុញ្ញាតឱ្យសាងសង់អគារខ្ពស់ៗទេ

ដោយវុត្ថា

ភ្នំពេញ៖  រដ្ឋាភិបាលតាមរយៈការក្រសួងទេសចរណ៍ បាននឹងកំពុងរៀបចំផែនការទេសចរណ៍ខេត្តសៀមរាប ដោយគ្រោងបង្កើតទីក្រុងសៀមរាបថ្មីមួយទៀត ប៉ុន្តែមិនត្រូវបានអនុញ្ញាតឱ្យសាងសង់សំណង់អគារខ្ពស់ៗនោះទេ គោលដៅទេសចរណ៍ថ្មីនៅទីតាំងផ្សេងទៀតក៏គ្រោងនឹងបង្កើត ដើម្បីទាក់ទាញភ្ញៀវទេសចរឱ្យបាន៧លាននាក់នៅឆ្នាំ២០៣៥។

លោក ថោង ខុន រដ្ឋមន្ត្រីក្រសួងទេសចរណ៍ បានប្រាប់ក្រុមអ្នកសារព័ត៌មានកាលពីពេលថ្មីៗនេះ ឱ្យដឹងថា ផែនការមេអភិវឌ្ឍន៍ទេសចរណ៍អាចនឹងបង្កើតគោលដៅទេសចរណ៍ថ្មីចំនួន ៤ ធំៗបន្ថែមទៀតនៅក្នុងខេត្តសៀមរាបលើគោលដៅទេសចរណ៍ ២ ដែលមានស្រាប់ក្នុងនោះរួមមានតំបន់បឹងទន្លេសាប តំបន់ភ្នំគូលែន តំបន់បន្ទាយស្រី និងទីក្រុងសៀមរាបថ្មី ដើម្បីទាក់ទាញទេសចរអន្តរជាតិមកកាន់ខេត្តសៀមរាប-អង្គរឱ្យបានប្រមាណ ៧ លាននាក់ នៅឆ្នាំ២០៣៥ ។

លោក ថោង ខុន បន្តថា ផែនការមេអភិវឌ្ឍន៍ទេសចរណ៍ខេត្តសៀមរាប ត្រូវបានដាក់ឆ្លងគណៈកម្មការជាតិអភិវឌ្ឍន៍វិស័យទេសចរណ៍ហើយ ក្នុងនោះក្រសួងទេសចរណ៍ក៏កំពុងរៀបចំកែសម្រួលឱ្យវាខ្លីជាងមុន ដើម្បីដក់ឆ្លងរាជរដ្ឋាភិបាល ពិនិត្យនិង អនុមត្តិ នៅពេលខាងមុខ។

លោកបន្ថែមថា “ចំពោះការបង្កើតទីក្រុងសៀមរាបថ្មីនេះ គឺក្នុងគោលបំណងដើម្បីទ្រទ្រង់ដល់ទីក្រុងសៀមរាបបច្ចុប្បន្ន ដែលមិនអាចសាងសង់សំណង់ទំនើបខ្ពស់ៗ ឬសំណង់ដែលប៉ះពាល់ដល់សម្បត្តិបេតិកភណ្ឌវប្បធម៌”។

លោកបន្តថា ម្យ៉ាងវិញទៀត រាជរដ្ឋាភិបាលកម្ពុជាបានដាក់ចេញចក្ខុវិស័យទាក់ទាញភ្ញៀវទេសចរអន្តរជាតិមកទស្សនខេត្តសៀមរាបឱ្យបាន ៧ លាននាក់ នៅឆ្នាំ២០៣៥ ដោយនឹងបង្កើការងារផ្ទាល់ប្រមាណ ៩០ ម៉ឺននាក់ រួមជាមួយការទទួលបានប្រាក់ចំណូលប្រមាណ ៥ ពាន់លានដុល្លារ ក្នុងរយៈពេលដូចគ្នានោះ។ ដើម្បីសម្រេចចក្ខុវិស័យនេះ ទីក្រុងសៀមរាបបច្ចុប្បន្នមិនអាចទ្រទ្រង់បានគ្រប់គ្រាន់ឡើយ គឺចាំបាច់ត្រូវបង្កើតឱ្យមានទីក្រុងថ្មីមួយទៀត។

លោក ថោង ខុនបញ្ជាក់ទៀតថា ទីក្រុងថ្មីនេះត្រូវតែរៀបចំឱ្យក្លាយជាទីក្រុងវៃឆ្លាត (Smart City) ប៉ុន្តែប្លង់គោលទីក្រុងទាំងមូលអាចនឹងត្រូវសិក្សារចនាឡើងតាមទម្រង់បុរាណខ្មែរ។ ចំពោះទីតាំងទីក្រុងសៀមរាបថ្មីនេះ ត្រូវបានលោករដ្ឋមន្ត្រីបង្ហើបឱ្យដឹងថា គឺត្រូវស្ថិតនៅក្រៅពីតំបន់ការពាររបស់អាជ្ញាធរជាតិអប្សារា៕

បុរី​លំនៅឋាន​ដ៏​ទាន់សម័យ ខេ​ស៊ី​ជាប់​ផ្សារ​ព្រែក​ព្នៅ​កាន់តែ​មាន​ភាព​ទាក់ទាញ

ដោយៈ រ៉ា​ណេ​ត

ភ្នំពេញៈ សម្រាប់តែ​តំបន់​ព្រែក​ព្នៅ ដែល​ស្ថិតនៅ​ប៉ែក​ខាងជើង​រាជធានី​ភ្នំពេញ បច្ចុប្បន្ននេះ មាន​គម្រោង​អភិវឌ្ឍន៍​លំនៅដ្ឋាន​តូច ធំ​មិន​ក្រោម២០ទីតាំង​នោះ កំពុងដំណើរការ​សាងសង់ ដើម្បី​បំពេញតម្រូវការ​ទីផ្សារ​របស់ខ្លួន ហើយ​ក្នុងនោះ គម្រោង​អភិវឌ្ឍន៍​លំនៅឋាន​បែប​ទាន់សម័យ​របស់​បុរី ខេ​ស៊ី ត្រូវបាន​គេ​មើលឃើញថា មាន​ភាព​ទាក់ទាញ ខណៈដែល​ការសាងសង់​ជិត​បានបញ្ចប់​ជា​ស្ថាពរ។

តាម​ការ​ឱ្យដឹងពី​បុគ្គលិក​ផ្នែក​លក់​គម្រោង​បុរី ខេ​ស៊ី ដែល​កំពុង​ព​ន្លឿ​ន​ការសាងសង់ និង​ទទួលបាន​ការចាប់អារម្មណ៍ ពី​សំណាក់​អតិថិជន​យ៉ាងច្រើន កញ្ញា ឡេង ម៉ា​ឡា បាន​ប្រាប់ឱ្យដឹង​នៅ​ថ្ងៃទី២៧ ខែតុលា ឆ្នាំ២០២០ថា ខណ្ឌ​ព្រែក​ព្នៅ​ពេលនេះ បានក្លាយ​ទៅជា​គោលដៅ​វិនិយោគ និង​អភិវឌ្ឍន៍​លំនៅដ្ឋាន​តម្លៃ​សមរម្យ មិន​ចាញ់​តំបន់​ភាគ​ខាងលិច​រាជធានី​ភ្នំពេញ​នោះឡើយ។

កញ្ញា​បាន​បញ្ជាក់ថា “តាម​ខ្ញុំ​ដឹង​ពេលនេះ​មាន​គម្រោង​តូចធំ ដែល​សាងសង់​លំនៅដ្ឋាន​មិនតិចជាង២០គម្រោង​នោះទេ ហើយ​តម្លៃ​ក៏មាន​ភាពខុសគ្នា​ផងដែរ អាស្រ័យ​ទៅតាម​ទីតាំង និង​ម៉ូដ​ផ្ទះ​នៅក្នុង​គម្រោង” ។ កញ្ញា​បន្តថា “យ៉ាងយូរ​ត្រឹម១ឆ្នាំ ឬ២ឆ្នាំ​ទៀត តំបន់​ព្រែក​ព្នៅ អាច​នឹង​ក្លាយទៅជា​ក្រុង​ថ្មី​មួយទៀត ចំណុះឱ្យ​រាជធានី​ភ្នំពេញ ដោយសារតែ​កំណើនប្រជាជន​មក​រស់នៅ​កាន់តែច្រើន ហើយ​ហេដ្ឋារចនាសម្ព័ន្ធ​នានា ដូចជា​អគារ​ពាណិជ្ជកម្ម ផ្លូវថ្នល់សំខាន់ៗមាន​ច្រើន​ខ្សែ ងាយស្រួល​ក្នុង​ក្នុង​ធ្វើដំណើរ​ចេញចូល​ក្រុង និង​ចេញ​ទៅតាម​បណ្តា​ខេត្តផ្សេង” ។

បុរី ខេ ស៊ី អំណោយផល​ដល់​ការរស់នៅ និង​ប្រក​អាជីវកម្ម​គ្រប់​ប្រភេទ ដោយសារតែ​ស្ថិតនៅ​ជាប់​ផ្លូវធំ​ទំហំ៣០ម៉ែត្រ ជា​ផ្លូវ​ត​ភ្ជាប់​រវាងផ្លូវ​ជាតិ​លេខ៥និង​មហាវិថី ឈ្នះ ឈ្នះ នៃ​ទីក្រុង​មរតក​សម្ដេច​តេ​ជោ ឆ្ពោះទៅកាន់​ផ្លូវជាតិ​លេខ។ បន្ថែម​ពីនេះ ទីតាំង​របស់​បុរី ខេ ស៊ី មាន​ហ៊ុ​ព័ទ្ធ​ទៅដោយ​ទីប្រជុំជន​ជាច្រើន ដូចជា ខាងក្រោយ​មាន​ផ្សារ​ព្រែក​ព្នៅ​ចាស់ នៅខាងមុខ​ជាប់​ផ្លូវ មាន​ផ្សារ​ព្រែក​ព្នៅ សាលារៀន​រដ្ឋ និង​ឯកជន មណ្ឌល​សុខភាព គ្លីនិក​ឯកជន និង​បណ្តាញ​ហេដ្ឋារចនាសម្ព័ន្ធ​ផ្លូវថ្នល់​ខ្វាត់ខ្វែង​ជាច្រើន បន្ថែម​ដោយ​គម្រោង​អភិវឌ្ឍ​បឹង​តា​ម៉ោ​ក និង​តំបន់​អភិវឌ្ឍ​រមណីយដ្ឋាន​គំរូ នៅ​តំបន់​ជាយក្រុង​នៃ​ភ្នំ​ប្រសិទ្ធិ ដែលជា​គម្រោង​អាទិភាព​របស់​រដ្ឋបាល​រាជធានី​ភ្នំពេញ​ផងដែរ។

លំនៅដ្ឋាន​នៅក្នុង ខេ​ស៊ី ត្រូវបាន​សាងសង់​ឡើងជា៣ប្រភេទ រួមមាន​ប្រភេទ Link House, Shop House និង​ប្រភេទ Twin Villa ដែល​សុទ្ធតែ​សមស្រប​ទៅនឹង​ការរស់នៅ​ដែល​ពោរពេញ​ទៅដោយ​ផាសុកភាព​ខ្ពស់​ទាំងអស់។

សម្រាប់​ព័ត៌មាន​បន្ថែម លោកអ្នក​អាច​ទំនាក់ទំនង​បាន​តាមរយៈ​ទូរស័ព្ទ​លេខ ៖ ០៩៣ ៦៦១ ១៥០ / ០១៦ ៧៣ ១៦ ៦១ ៕

ចំណេះដឹង! តើ​សហគ្រាស​ធុន​តូច​និង​មធ្យម​ណាខ្លះ​ដែល​ត្រូវបាន​លើកទឹកចិត្ត​ផ្នែក​គយ?

ដោយ​វុត្ថា

ភ្នំពេញៈ រដ្ឋាភិបាល​បានដាក់​ចេញ​គោលនយោបាយ លើកទឹកចិត្ត​ជា​បន្តបន្ទាប់​ដល់​សហគ្រាស​ធុន​តូច និង​មធ្យម​នៅ​កម្ពុជា ដើម្បី​ជម្រុញ​ឲ្យ​សកម្មភាព​សេដ្ឋកិច្ច​មាន​ភាពប្រសើរ​ឡើង​និង​រស​រវើក។

ជាមួយគ្នានេះ សហគ្រាស​ធុន​តូច និង​មធ្យម​ក្នុង​វិស័យ​អាទិភាព អាច​ទទួលបាន​ការលើក​ទឹកចិត្ត​ផ្នែក​គយ​ចំពោះមុខ​សញ្ញា ដូចខាងក្រោម៖

  • សម្ភារ​បរិក្ខារ​ផលិតកម្ម សំដៅ​ដល់​គ្រឿង​ម៉ាស៊ីន ឧបករណ៍​ដែល​បាន​ប្រើប្រាស់​ជា​មូលដ្ឋាន​ក្នុងការ​បំប្លែង​ធាតុ​ចូល​ផលិតកម្ម ហើយ​ដែល​វត្ថុ​ទាំងនោះ​មិនអាច​បំប្លែង​បាន​ដោយ​ខ្លួនឯង ឬ​មិន​ត្រូវបាន​ប្រើប្រាស់​អស់​ក្នុង​រយៈពេល២ឆ្នាំ បន្ទាប់ពី​បាន​នាំចូល។
  • សម្ភារ​សាងសង់ សំដៅ​ដល់​សម្ភារ​សំណង់ រួមទាំង​ឧបករណ៍ បរិក្ខារ ដែល​បាន​បំប្លែង ឬ​បាន​ប្រើប្រាស់​ទាំងស្រុង នៅក្នុង​ការសាងសង់​សំណង់​បម្រើឱ្យ​ផលិតកម្ម។
  • ធាតុ​ចូល​ផលិតកម្ម សំដៅ​ដល់​ទំនិញ រួមទាំង​វត្ថុធាតុដើម ផលិតផល​ពាក់កណ្តាល​សម្រេច និង​សម្ភារ បន្ទាប់បន្សំ​បម្រើឱ្យ​ផលិតកម្ម ដែល​ត្រូវ​បំប្លែង ឬ​ត្រូវបាន​ប្រើប្រាស់​យ៉ាង​ពេញលេញ នៅក្នុង​កិច្ច​ដំណើរ-ការផលិត​កម្ម មិនឱ្យ​ហួស​រយៈពេល២ឆ្នាំ បន្ទាប់ពី​បាន​នាំចូល។

សម្ភារៈ​បរិក្ខារ​ផលិតកម្ម  សម្ភារ​សាងសង់ និង​ធាតុ​ចូល​ផលិតកម្ម មិន​គិត​បញ្ចូល​នូវ​យានយន្ត គ្រឿងបន្លាស់​យានយន្ត ផលិតផល​តេ​ល​សិលា និង​សម្ភារ​បរិក្ខារ​និង​គ្រឿង​សង្ហា​រឹម​សម្រាប់​ប្រើប្រាស់​ក្នុង​ការិយាល័យ៕