កម្ពុជាប្រមូលចំណូលពីពន្ធដារជាង ១,៦៨ ពាន់លានដុល្លារនៅឆមាសទី១

ដោយ ប៊ី

ភ្នំពេញៈ អគ្គនាយកដ្ឋានពន្ឋដារ នៃក្រសួងសេដ្ឋកិច្ច និងហិរញ្ញវត្ថុ បានប្រមូលចំណូលពន្ធ-អាករ សម្រាប់ថវិកាជាតិចំនួន៦ ៨២០.៤៨ប៊ីលានរៀល (ប្រមាណជា ១ ៦៨៤.០៧លានដុល្លារអាមេរិក) ស្មើនឹង៥៩.០៩% នៃផែនការប្រចាំឆ្នាំ នៅឆមាសទី១ ឆ្នាំ២០២០ ។

ចំណូលនេះ បើធៀបនឹងចំណូលពន្ធ-អាករក្នុងរយៈពេលដូចគ្នា ឆ្នាំ២០១៩ កើនឡើងចំនួន ៧៣៥,៨២ ប៊ីលានរៀល (ប្រមាណជា ១៨១.៦៨ លានដុល្លារអាមេរិក) ស្មើនឹង១២ ភាគរយ។

ព៌តមាននេះត្រូវបានប្រកាស ក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែមិថុនា និងប្រចាំឆមាសទី១ឆ្នាំ២០២០ ព្រមទាំងទិសដៅសម្រាប់អនុវត្តបន្ត របស់អគ្គនាយកដ្ឋានពន្ធដារ នៅថ្ងៃទី១០ ខែកក្កដា ឆ្នាំ២០២០ ក្រោមអធិបតីភាពរបស់លោក គង់ វិបុល ប្រតិភូរាជរដ្ឋាភិបាលទទួលបន្ទុកជា អគ្គនាយកនៃអគ្គនាយកដ្ឋានពន្ធដារ។

អគ្គនាយកដ្ឋានពន្ធដារបានឱ្យដឹងថា ក្នុងឆមាសទី១ ឆ្នាំ២០២០ ចំណូលពីប្រភេទពន្ធ០២ នៅរក្សាកំណើនគួរឱ្យកត់សម្គាល់ក្នុងនោះ អាករលើតម្លៃបន្ថែមជាង១ ៣៨៥ប៊ីលានរៀល ធៀបនឹងរយៈពេលដូចគ្នាឆ្នាំ២០១៩ កើនឡើង៦៣.៧៩ ប៊ីលានរៀល ប្រមាណ៤.៨៣ ភាគរយ និងពន្ធលើប្រាក់ចំណូលចំនួន ២ ៧១០.១៨ប៊ីលានរៀល ធៀបនឹងរយៈពេលដូចគ្នាឆ្នាំ២០១៩ កើនឡើង៥០៧.២៦ ប៊ីលានរៀល ប្រមាណ២៣,០៣ភាគរយ។

លោកគង់ វិបុល បានថ្លែងថា សម្រាប់ឆ្នាំ២០២០នេះ ដើម្បីធានានូវប្រសិទ្ធភាព ក្នុងការអនុវត្ត ការប្រមូលចំណូលពន្ធបានគ្រប់តាមផែនការច្បាប់ ចំនួនប្រមាណ១១ ៥៤៣.៣១ ប៊ីលានរៀល (ប្រមាណ ២ ៨៨៥,៨៣ លានដុល្លារអាមេរិក) អគ្គនាយកដ្ឋានពន្ធដារនឹងបន្តអនុវត្តយ៉ាងម៉ឺងម៉ាត់ និងប្រកបដោយប្រសិទ្ធភាពខ្ពស់ថែមទៀត នូវគោលនយោបាយកែទម្រង់ស៊ីជម្រៅរបស់រាជរដ្ឋាភិបាល៕

មហាយក្សចិនពង្រីកឥទ្ធិពលសេដ្ឋកិច្ចកាន់តែជ្រៅក្នុងទ្វីបអាហ្វ្រិក

ដោយ វុត្ថា

ភ្នំពេញៈ មហាយក្សចិនបាននិងកំពុងពង្រីកឥទ្ធិពលកាន់តែខ្លាំងនៅទ្វីបអាហ្វ្រិក ដើម្បីពង្រីកឥទ្ឋិពលរបស់ខ្លួន នៅទ្វីបដែលត្រូវគេគេងប្រវ័ញ្ច និងហាក់បំភ្លេចចោលអស់ជាច្រើនសម័យកាល។

ជាមួយនឹងការបង្ហូរទុន ដើម្បីកសាងហេដ្ឋារចនាសម្ព័ន្ឋ មហាយក្សចិនបានចុះហត្ថលេខាបោះទុនវិនិយោគ សាងសង់អគារខ្ពស់កប់ពពកកំពស់៣២០ម៉ែត្រ ដែលមានឈ្មោះថា Pinnacle Towers ក្នុងប្រទេសតំបន់អាហ្វ្រិក ស្របតាមគោលនយោបាយ ផ្លូវមួយ និងខ្សែក្រវ៉ាត់មួយ របស់ប្រធានាធិបតី ស៊ី ស៊ីភីង។

ក្រុមហ៊ុន China State Construction Engineering Corporation (CSCEC) ដែលជាក្រុមហ៊ុនរបស់រដ្ឋាភិបាលចិនដ៏ធំ បានឈ្នះការដេញថ្លៃក្នុងសាងសង់អគារខ្ពស់កប់ពពកនេះ ក្នុងទីក្រុង Nairobi ប្រទេសកេនយ៉ា ក្នុងចំណោមក្រុមហ៊ុអភិវឌ្ឍន៍អចលនទ្រព្យល្បីៗចំនួន១០នៅលើពិភពលោក។ នេះបើតាមការចុះផ្សារដោយ Global Construction Review។

អគារនេះ គឺជាអគារខ្ពស់កប់កពពក់មួយ ក្នុងចំណោមអគារផ្សេងទៀតក្នុងប្រទេសអាហ្វ្រិក ដែលខ្ពស់ជាងអគារ Carlton Centre ដែលមានកំពស់ត្រឹមតែ២២៣ ម៉ែត្រស្ថិតនៅក្នុងទីក្រុង Johannesburg និង អគារ Britam Tower ដែលមានកំពស់២០០ម៉ែត្រ ស្ថិតនៅក្នុងទីក្រុង Nairobi ។

ការសាងសង់អគារ Pinnacle Towers ដ៏ខ្ពស់នេះ គ្រោងនឹងបញ្ចប់សាងសងរបស់ខ្លួននៅក្នុងឆ្នាំ ២០២១ ។

អគារ Pinnacle Towers សាងសង់ឡើងសម្រាប់ជាមជ្ឈមណ្ឌលពាណិជ្ជកម្មចម្រុះរួមមាន ជាការិយាល័យ សណ្ឋាគារ អាផាតម៉ិនទំនើប២០០យូនីត ផ្សារទំនើប និងជាកន្លែងទស្សនាទេសភាពប្រទេស Kenya ។

លោក ប្រធានាធិបតីប្រទេស Kenya លោក Uhuru Kenyatta បានថ្លែងនៅក្នុងពិធីបញ្ចុះបថមសិលា សាងសង់អាគារកប់ពពកនេះកាលពីពេលថ្មីនេះថា ការសាងសងស់អគារនេះ ដោយសារគេមានជំនឿចិត្ត លើកគោលនយោបាយកំណែទំម្រង់របស់ប្រទេស Kenya ដើម្បីទាក់ទាញ និងប្រកួតប្រជែងវិស័យទេសចរណ៍ និងជាមូលដ្ឋានគ្រឹះសម្រាប់ទាក់ទាញវិនិយោគិន ៕

ជប៉ុនផ្តល់ជំនួយ ១០៦លានដុល្លារដល់ប្រទេសក្នុងតំបន់ទន្លេមេគង្គ

ដោយៈរ៉ាណេត

ភ្នំពេញៈ រដ្ឋាភិបាលជប៉ុន បានសម្រេចបន្តផ្តល់ជំនួយឥតសំណងចំនួន១០៦លានដុល្លារ សម្រាប់ដោះ ស្រាយបញ្ហាវិបត្តិ នៃជំងឺឆ្លងនៅបណ្តាប្រទេស ដែលស្ថិតនៅក្នុងតំបន់មេគង្គ ជាមួយនឹងគោលបំណងស្នើសុំបង្កើតមជ្ឈមណ្ឌលអាស៊ាន សម្រាប់ភាពបន្ទាន់ផ្នែកសុខភាពសាធារណៈ និងជំងឺដែលកំពុងកើតមាន។

ក្រសួងការបរទេស និងសងប្រតិបត្តិការអន្តរជាតិ បានចេញសេចក្ដីប្រកាសព័ត៌មានស្តីពីលទ្ធផលនៃកិច្ចប្រជុំរដ្ឋមន្ត្រីការបរទេសមេគង្គ-ជប៉ុនលើកទី១៣ នៅថ្ងៃទី១០ ខែកក្កដា ឆ្នាំ២០២០កន្លងមកថា រដ្ឋាភិបាលជប៉ុន បានសម្រេចផ្តល់នូវជំនួយឥតសំណងចំនួន១០៦លានដុល្លារដល់បណ្តាប្រទេស ដែលស្ថិតនៅក្នុងតំបន់មេគង្គ សម្រាប់ដោះស្រាយបញ្ហាដែលកំពុងប្រឈម ដោយសារការរាតត្បាតនៃជំងឺឆ្លងនាពេលបច្ចុប្បន្ន បើទោះជានៅក្នុងប្រទេសរបស់ខ្លួនកំពុងជួបគ្រោះទឹកជំនន់ក៏ដោយ។

ជាមួយនឹងការផ្តល់ជំនួយឥតសំណង នូវចំនួនទឹកប្រាក់១០៦លានដុល្លារខាងលើនេះ បណ្តាសមាជិកប្រទេសក្នុងតំបន់មេគង្គបានកោតសរសើរចំពោះ ការសម្រេចចិត្តបន្តការគាំទ្ររបស់រាជរដ្ឋាភិបាលជប៉ុន ក្នុងការផ្តល់ជំនួយដើម្បីធានាបាននូវប្រព័ន្ធថែទាំសុខភាព ប្រកបដោយប្រសិទ្ធភាព និងភាពរឹងមាំ។

នៅក្នុងសេចក្តីប្រកាសព័ត៌មានដដែលបានបញ្ជាក់ទៀតថា ជំនួយរបស់រដ្ឋាភិបាលជប៉ុន ដែលមានទឹកប្រាក់ចំនួន១០៦លានដុល្លារ នឹងត្រូវបែងចែក៥៦លានដុល្លារសម្រាប់ប្រើប្រាស់ ចំពោះកិច្ចសហប្រតិបត្តិការបច្ចេកទេស លើក្រុមបុគ្គលិកគ្រូពេទ្យ និងការផ្តល់បរិក្ខារវេជ្ជសាស្ត្រជូនមន្ទីរពេទ្យ និងស្ថាប័នវេជ្ជសាស្ត្រដទៃទៀត។

ដោយឡែកសម្រាប់ទឹកប្រាក់ចំនួន ៥០លានដុល្លារទៀត នឹងត្រូវផ្តល់តាមរយៈការផ្តល់ជំនួយជាបរិក្ខារវេជ្ជសាស្ត្រ ដើម្បីពង្រឹងការត្រៀមខ្លួនឆ្លើយតបទៅនឹងជំងឺឆ្លង និងការបណ្តុះបណ្តាលបច្ចេកទេស របស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ស្របតាមតម្រូវការរបស់បណ្ដាប្រទេសមេគង្គនីមួយ។

ពាក់ព័ន្ធទៅនឹងកិច្ចពង្រឹងនូវទំនាក់ទំនងសេដ្ឋកិច្ច មេគង្គ-ជប៉ុន ក្រោយទទួលបញ្ចប់បញ្ហា Covid-19 រដ្ឋមន្ត្រីគ្រប់ប្រទេសទាំងអស់ បានបញ្ជាក់ពីការប្តេជ្ញាចិត្ត ក្នុងការអនុវត្តជំនួយឥតសំណង សម្រាប់គម្រោងសុវត្ថិភាពប្រជាជនថ្នាក់មូលដ្ឋាន ឆ្នាំ២០២០ ក្រោមគំនិតផ្ដួចផ្ដើមគូសាណូណិមេគង្គ សម្រាប់គោលដៅអភិវឌ្ឍន៍ប្រកបដោយចីរភាព ក្នុងទំហំទឹកប្រាក់សរុបចំនួន១០០០លានយ៉េន ដែលរៀបចំឡើងក្នុងគោលបំណងទ្រទ្រង់ការអភិវឌ្ឍសេដ្ឋកិច្ច និងសង្គម នៅតាមភូមិស្រុកថ្នាក់មូលដ្ឋាននានាទូទាំងតំបន់មេគង្គ៕

រដ្ឋាភិបាលដាក់ចេញផែនការពង្រឹងការគ្រប់គ្រងផ្ទៃដីទំហំជាង ៧,២លានហិកតាអភិរក្សជាតំបន់ធម្មជាតិ

ដោយ វុត្ថា

ភ្នំពេញៈ រាជរដ្ឋាភិបាលកម្ពុជាបានដាក់ចេញផែនការ ពង្រឹងការគ្រប់គ្រង និងអភិរក្សតំបន់ធម្មជាតិសរុបចំនួន៦៩កន្លែង គ្របដណ្តប់លើផ្ទៃដីប្រមាណជាង ៧,២ លានហិកតា ស្មើប្រមាណ ៤១%នៃផ្ទៃដីសរុបរបស់កម្ពុជា ខណៈតំបន់ការពារ និងអភិរក្សមួយចំនួននៅក្នុងប្រទេសត្រូវបានទន្ទ្រាន និងកាន់កាប់ធ្វើជាកម្មសិទ្ធិខុសច្បាប់។

យោងតាមរបាយការណ៍របស់ក្រសួងបរិស្ថាន បានបង្ហាញនៅក្នុងកិច្ចប្រជុំអន្តរក្រសួង ដើម្បីពិនិត្យនិងពិភាក្សាលើការ គ្រប់គ្រង តំបន់ការពារធម្មជាតិនៅថ្ងៃទី១០ ខែកក្កដា ឆ្នាំ ២០២០កន្លងមកបានឱ្យដឹងថា តំបន់ធម្មជាតិនទាំងនោះរួមមាន តំបន់ឧទ្យានជាតិ តំបន់ដែនជម្រកសត្វព្រៃ តំបន់ការពារទេសភាព តំបន់ប្រើប្រាស់ច្រើនយ៉ាង តំបន់រាមសារ តំបន់ស្នូលនៃឋបនីយជីវមណ្ឌល តំបន់បេតិកភណ្ឌធម្មជាតិ តំបន់ឧទ្យានជាតិសមុទ្រ និងរបៀងអភិរក្សជីវៈចម្រុះ។

យោងតាមអនុក្រឹត្យ ដែលចុះហត្ថលេខាដោយសម្ដេចតេជោ ហ៊ុន សែនដែលបានផ្សព្វផ្សាយកាលពីន្លងមកនេះបង្ហាញថា ការបង្កើតតំបន់ការពារធម្មជាតិ ធ្វើឡើងក្នុងគោលបំណងដើម្បី ធានាការថែរក្សា និងការពារសោភ័ណភាពធម្មជាតិ ប្រព័ន្ធអេកូឡូស៊ី សារព័នមជ្ឈដ្ឋានធម្មជាតិ សត្វព្រៃ រុក្ខជាតិ និងវប្បធម៌ ថែរក្សាការពារលំនឹងបរិស្ថាន និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិ។

អនុក្រឹត្យដដែលបន្តថា តំបន់ការពារធម្មជាតិនេះ នឹង ផ្តល់ផលិតផល និងសេវាកម្មធម្មជាតិ សម្រាប់ការប្រើប្រាស់ប្រកប ដោយនិរន្តភាព លើកកម្ពស់ការចូលរួមរបស់សហគមន៍មូលដ្ឋាន ក៏ដូចជាសាធារណជន ក្នុងការរួមចំណែកដល់ការ គ្រប់គ្រង ការការពារ និងកាអភិរក្សជីវៈចម្រុះ និងធនធានធម្មជាតិក្នុងតំបន់ ថែរក្សាការពារ វប្បធម៌ ប្រពៃណី ការអភិវឌ្ឍ និងសារៈសំខាន់ផ្នែកវប្បធម៌របស់សហគមន៍មូលដ្ឋាន និងបង្កើនតួនាទីប្រព័ន្ធអេកូឡូស៊ីក្នុងតំបន់ការពារធម្មជាតិ សម្រាប់ជាផលប្រយោជន៍ ដល់សង្គមជាតិគ្រប់ជំនាន់។

ក្រសួងរៀបចំដែនដី នគរូបនីយកម្ម និងសំណង់ កាលពីពេលថ្មីបានចេញ“វិញ្ញាបនបត្រសម្គាល់ម្ចាស់អចលនវត្ថុ” ជូនក្រសួងបរិស្ថានចំនួន១៨ប័ណ្ណ ក្នុងនោះ១០ប័ណ្ណ សម្រាប់សម្គាល់កម្មសិទ្ធិដីរដ្ឋក្នុងតំបន់ស្នូល និងតំបន់អភិរក្សនៃដែន ជម្រកសត្វព្រៃ ពាមក្រសោប ខេត្តកោះកុង ដែលគ្រប់ដណ្តប់លើផ្ទៃដីសរុប៤.៦៧២,៦១ហិកតា និង៨ប័ណ្ណសម្រាប់សម្គាល់កម្មសិទ្ធិដីរដ្ឋក្នុងតំបន់ស្នូល នៃដែនជម្រកសត្វព្រៃភ្នំព្រេច ខេត្តមណ្ឌលគីរី ដែលគ្របដណ្តប់លើផ្ទៃដីសរុប ៤៥.៥១៩,២៦ ហិកតា។

ក្រសួងបរិស្ថានបញ្ជាក់ថា “នេះគឺជាលទ្ធផលប្រវត្តិសាស្ត្រសម្រាប់កម្ពុជា ដែលរាជរដ្ឋាភិបាលបានគាំទ្រ និងជំរុញឱ្យមានការចុះបញ្ជីដីរដ្ឋ នៅក្នុងតំបន់ការពារធម្មជាតិជាលើកដំបូង ហើយក៏ឆ្លុះបញ្ចាំងអំពីការយកចិត្តទុកដាក់ និងការប្តេជ្ញាចិត្តខ្ពស់របស់រាជរដ្ឋាភិបាលលើការងារការពារ និងអភិរក្សធនធានធម្មជាតិនៅកម្ពុជាផងដែរ។ ក្រសួងបរិស្ថាន ដែលជាសេនាធិការរបស់រាជរដ្ឋាភិបាល ទទួលបន្ទុកគ្រប់គ្រងតំបន់ការពារធម្មជាតិ នឹងបន្តដកស្រង់មេរៀន និងបទពិសោធពីគម្រោងនេះ ដើម្បីកែសម្រួលនីតិវិធី និងជំរុញដំណើរការចុះបញ្ជីដីរដ្ឋ នៅក្នុងតំបន់ការពារធម្មជាតិដទៃទៀតនៅទូទាំងប្រទេស៕

ចំណេះដឹង! អ្វីជាវិញ្ញាបនបត្រអនាម័យ និងភូតគាមអនាម័យ?

ដោយ វុត្ថា

ភ្នំពេញៈ វិញ្ញាបនបត្រអនាម័យ និងភូតគាមអនាម័យ (Sanitary and Phytosanitary Certificate-SPS) ជាឯកសារចាំបាច់ សម្រាប់ការនាំចេញផ្លែឈើស្រស់ បន្លែស្រស់ រុក្ខជាតិស្រស់ ត្រី សត្វរស់ និងផលិតផល ផ្សេងទៀត ដែលតម្រូវដោយប្រទេសនាំចូល។

វិញ្ញាបនបត្រនេះបញ្ជាក់ថា ផលិតផលនាំចេញគ្មានផ្ទុកសត្វ ល្អិតបង្កជំងឺ ឬសត្វល្អិតចង្រៃដែលអាចបំផ្លាញផលដំណាំ។ អ្នកនាំចូលត្រូវទទួលខុសត្រូវ ក្នុងការបំពេញទៅតាមលក្ខខណ្ឌអនាម័យ និងភូតគាមអនាម័យ។

ទំនិញជាកម្មវត្ថុនៃការត្រួតពិនិត្យភូតគាមអនាម័យមាន ៖

រុក្ខជាតិ បំណែករុក្ខជាតិ ផលិតផលរុក្ខជាតិ និងផលិតផលកែច្នៃពីផលិតផល
រុក្ខជាតិដែលអាចជាជម្រក និងចម្លងសមាសភាពចង្រៃ
សម្ភារវេចខ្ចប់ ឡាំងឈើ កំណាត់ឈើ ឬ មធ្យោបាយដឹកជញ្ជូនគ្រប់ប្រភេទ និងឃ្លាំងសន្និធិ។
ដីឬ ដីដែលជាប់នឹងឬស ឬ បំណែករុក្ខជាតិ
កត្តាចង្រៃ ឬ សរីរៈមានប្រយោជន៍ រស់ ឬ ងាប់
ផលិតផលដែលគ្មានដើមកំណើតពីរុក្ខជាតិ តែអាចជាជម្រកនៃសមាសភាពចង្រៃ។

បញ្ជីមុខទំនិញជាកម្មវត្ថុ នៃការត្រួតពិនិត្យភូតគាមអនាម័យ ត្រូវកំណត់ដោយប្រកាសរួមរបស់រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ និងរដ្ឋមន្ត្រីក្រសួងសុខាភិបាល៕

អាគារការិយាល័យជួលថ្មីទំហំ៥៩,០០០ម៉ែត្រការ៉េនឹងដាក់ចូលទីផ្សារនៅចុងឆ្នាំនេះ

ដោយ៖ ប៊ី

ភ្នំពេញៈ បើទោះបីអាត្រាជួលការិយាល័យធ្លាក់ចុះ៤,៥ ភាគរយ នៅត្រីមាសទី២ ឆ្នាំ២០២០ បើធៀបនឹងត្រីមាស១ឆ្នាំមុនក្តី ក៏ការផ្គត់ផ្គង់អាគារការិយាល័យនៅបន្តកើនឡើងរហូតដល់ជិត៦០,០០០ម៉ែត្រការ៉េរហូតដល់ចុងឆ្នាំនេះ។ នេះបើយោងតាមរបាយការណ៍ចុងក្រោយរបស់ក្រុមហ៊ុន CBRE Cambodia។

របាយការណ៍ដដែលបានឲ្យដឹងថា គម្រោងការិយាល័យជួលថ្មីៗចំនួន៥ រួមមានគម្រោងការិយាល័យGrade B មាន១គម្រោង និងគម្រោង Grade C មានចំនួន៤ គម្រោង ត្រូវបានបញ្ជប់នៅក្នុងត្រីមាសទី២ ឆ្នាំ២០២០នេះ ខណៈគម្រោងការិយោជួលសហកម្មសិទ្ធ១ បានបញ្ចប់នៅត្រីមាសទី២នេះ។

តម្លៃជួលការិយាល័យGrade B នៅតំបន់ពាណិជ្ជកម្ម ធ្លាក់ចុះ៣,១ ភាគរយ ក្នុងមួយម៉ែត្រការ៉េនៅត្រីមាសទី២ បើធៀបនឹងត្រីមាសទី១ ខណៈតម្លៃជួលការិយាល័យ Grade B នៅក្រៅតំបន់ពាណិជ្ជកម្មធ្លាក់ចុះ២,៩ ភាគរយ។

ផ្ទុយទៅviJតម្លៃជួលការិយាល័យ Grade C នៅតំបន់ពាណិជ្ជកម្ម មានកើនឡើង ៨.០ភាគរយ នៅក្នុងត្រីមាសទី២ បើធៀបនឹងត្រីមាសទី១ ហើយតម្លៃជួលការិយាល័យ Grade C នៅក្រៅតំបន់ពាណិជ្ជកម្ម កើនឡើង៤,៥ភាគរយ។

របាយការណ៍បានឱ្យដឹងថា អ្នកជួលដែលមានស្រាប់ នៅតែមានបំណងបន្តការជួលរបស់ពួកគេ ហើយបានរំពឹងថាការផ្គត់ផ្គង់ការិយាល័យជួលថ្មី ដែលមានទំហំ ៥៩,០០០ ម៉ែត្រការ៉េនឹងចូលមកក្នុងទីផ្សារនៅចុងឆ្នាំ២០២០នេះ។

នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា បានប្រាប់ Propertyarea.asia កាលពីពេលថ្មីៗនេះថា ដោយសារតែវិបត្តិនៃជំងឺឆ្លង ចាប់តាំងពីពាក់កណ្តាលត្រីមាសទី១ ឆ្នាំ២០២០ ទីផ្សារនៃការជួលអាគារការិយាល័យត្រូវបានធ្លាក់ចុះយ៉ាងខ្លាំង។

លោកស្រីបន្តថា “ទីផ្សារនៃការជួយអាគារការិយាល័យ នៅក្នុងត្រីមាសទី១ ឆ្នាំ២០២០ គឺមានការធ្លាក់ចុះយ៉ាងខ្លាំង ប៉ុន្តែនៅត្រឹមដើមត្រីមាសទី២ ហាក់មានភាពងើបឡើងវិញបន្តិច ដោយសារតែការគ្រប់គ្រងនៃការរាលដាល នៃជំងឺឆ្លងរបស់រដ្ឋាភិបាលទទួលបានលទ្ធផលល្អប្រសើរ ជាពិសេសម្ចាស់អាគារមួយចំនួន បានប្រើយុទ្ធសាស្ត្របញ្ចុះតម្លៃ ដើម្បីជួយសម្រាលដល់អតិថិជនចាស់ និងឈោងចាប់យកអតិថិជនថ្មី”។

លោកស្រីអាន សុធីតាបានបន្តទៀតថា បច្ចុប្បន្ននេះ តាមការមើលពីភាពជាក់ស្ដែង ទីផ្សារជួលអាគារការិយាល័យ ហាក់មានភាពល្អប្រសើរជាងពេលមុនបន្តិច ហើយក៏ល្អជាងទីផ្សារជួល ទីតាំងលក់រាយនៅតាមបណ្តាផ្សារនើបផងដែរ ដែលគេរំពឹងថា នឹងកាន់តែមានស្ថានភាពល្អជាងនេះនៅត្រីមាសបន្ទាប់ ជាពិសេសនៅដើមឆ្នាំក្រោយ ខណៈដែលការភាពភ័យខ្លាច នៃការឆ្លងជំងឺត្រូវបានកាត់បន្ថយ ហើយការគ្រប់គ្រងស្ថានការរបស់រដ្ឋាភិបាលកាន់តែទទួលបានលទ្ធផលវិជ្ជមាន”៕

ឈ្មួញជាច្រើនកំពុងដើររកទិញដីនៅតំបន់ជុំវិញព្រលានយន្តហោះអន្តរជាតិថ្មី

ដោយវុត្ថា

ភ្នំពេញៈ លោកស្រីតាំង ហួរ នាយិកាក្រុមហ៊ុនភ្នាក់ងារអចលនទ្រព្យ Amatak Property Service បានឱ្យដឹងថា នាពេលបច្ចុប្បន្ននេះ មានឈ្មួញ និងអ្នកវិនិយោគដីធ្លីជាច្រើនបាននឹងកំពុងដើរស្វែងរកទិញដីធ្លី នៅតំបន់ជុំវិញព្រលានយន្តហោះអន្តរជាតិភ្នំពេញថ្មី ស្ថិតនៅក្នុងខេត្តកណ្តាល ខណៈគម្រោងព្រលនាយន្តហោះអន្តរជាតិភ្នំពេញនេះ បាននឹងកំពុងសាងសង់យ៉ាងសកម្ម។

លោកស្រីតាំង ហួរ បានប្រាប់គេហទំព័រ Propertyarea.asia ពីតំបន់ព្រលានយន្តហោះអន្តរជាតិថ្មីនៅថ្ងៃទី ១០ ខែកក្កដា ឆ្នាំ ២០២០នេះថា ដីនៅតំបន់ជុំវិញព្រលានយន្តហោះអន្តរជាតិភ្នំពេញ មានអ្នកវិនិយោគជាច្រើនបាន និងកំពុងសម្រុកមកកាន់ទីនេះ ដើម្បីទិញដីសម្រាប់ទុកលក់យកចំនេញបន្ត ខណៈដែលដីនៅតំបន់នេះ នៅមានតម្លៃធូរ ថ្លៃ។

លោកស្រីបន្តថា “គេដើររកទិញដីនៅតំបន់នេះ (ព្រះលានយន្តហោះថ្មី) ព្រោះវាមានតម្លៃធូថ្លៃ ដែលអាចទុកលក់ យកចំនេញនៅថ្ងៃក្រោយបាននាពេលខាងមុខ”។លោកស្រីបន្ថែមថា “និយាយជារួមនៅតំបន់ជុំវិញក្រុងភ្នំពេញចន្លោះពី ២០ ទៅ៣០គីឡូម៉ែត្រ គឺមានអ្នកវិនិយោគដើររកទិញដីទុកច្រើន”។

នៅពេលសួរចំពោះតម្លៃដីធ្លី នៅតំបន់ជុំវិញព្រលានយន្តហោះថ្មី ក្នុងមួយម៉ែត្រការ៉េមានតម្លៃប៉ុន្មាន? លោកស្រី មិនបានបញ្ជាក់នោះទេ ព្រោះតម្លៃរបស់វាអាស្រ័យទៅតាមទំហំដីតូឬ ធំ និងស្ថានភាពដីជាក់ស្តែងជិត ឬឆ្ងាយ។

លោក គង់ សោភណ្ឌ អភិបាលខេត្តកណ្តាលធ្លាប់បានឱ្យដឹងកន្លងមកនេះថា នាពេលបច្ចុប្បន្ននេះ មានអ្នករកស៊ីក្នុងវិស័យអចលនទ្រព្យជាច្រើនបាន និងកំពុងផ្តោតលើការចាប់អារម្មណ៍យ៉ាងខ្លាំង លើការវិនិយោគលើដីធ្លី នៅតំបន់ព្រលានយន្តហោះអន្តរជាតិភ្នំពេញនៅខេត្តកណ្តាល។

លោកថា អ្នកវិនិយោគលើវិស័យអចលនទ្រព្យទាំងនោះ រួមមាន ទាំងវិនិយោគលើវិស័យសណ្ឋាគារ ផ្ទះសំណាក់ លំនៅឋាន បុរី និង គម្រោងធំៗផ្សេងទៀត ដែលធ្វើឱ្យតម្លៃដីធ្លីនៅក្នុងតំបន់នោះ កាន់តែមានតម្លៃខ្ពស់ ហើយផ្តល់ជីវភាពធូធារដល់ប្រជាពលរដ្ឋនៅក្នុងមូលដ្ឋានថែមទៀតផងដែរ។

គម្រោងអាកាសយានដ្ឋានអន្តរជាតិភ្នំពេញថ្មី ស្ថាបនាលើដីទំហំប្រមាណ២៦០០ ហិកតា មានបណ្តោយប្រមាណ៦គីឡូម៉ែត្រ និងទទឹងប្រមាណ៤គីឡូម៉ែត្រ ។ ដំណើការ នៃការសាងសង់ព្រលានយានដ្ឋានអន្តរជាតិភ្នំពេញថ្មី អាចនឹងបញ្ចប់ដំណាក់កាលទី១ នៅឆ្នាំ២០២៣ខាងមុខនេះ។ ទុនវិនិយោគព្រលានយន្ដហោះមួយនេះ មានទំហំទឹកប្រាក់ប្រមាណ១៥០០លានដុល្លារ ដែលជាប្រភេទ 4F អនុញ្ញាតឱ្យប្រភេទព្រលានយន្តហោះធំ Airbus A380-800 និង យន្តហោះ Boeing 747-800 ហោះហើរពីឆ្ងាយឆ្លងទ្វីបចុះចតបាន៕

ប្រទេសចិនសាងសង់ផ្លូវហាយវេដោយប្រើប្រាស់ម៉ាស៊ីនទំនើបគ្មានមនុស្សបញ្ជា

ដោយ ហ្សូលី

ប៉េកាំងៈ ប្រទេសចិនកំពុងសាងសង់នូវគម្រោងផ្លូវហាយវេ (Highway) ដែលប្រើប្រាស់ជាមួយម៉ាស៊ីនទំនើប បច្ចេកវិទ្យាចុងក្រោយ ដោយម៉ាស៊ីនទាំងនោះមិនមានមនុស្សនៅក្បែរចាំបញ្ជាឡើយ។

គម្រោងផ្លូវហាយវេនេះ ត្រូវសាងសង់ឡើងស្ថិតនៅចន្លោះ រវាងខេត្តស៊ីឈាន់ និង ដាលី ដែលមានឈ្មោះថា Panzhihua-Dali Highway។ ការស្ថាបនាផ្លូវហាយវេ ដោយប្រើប្រាស់បច្ចេកវិទ្យាថ្មី ផ្សារភ្ជាប់នឹងប្រព័ន្ធកំណត់ទីតាំងGPS ទំនាក់ទំនងមីក្រូ និងឧបករណ៍ចាប់សញ្ញាយ៉ាងទំនើប ដែលប្រកបដោយភាពវៃឆ្លាតអាចស្វែងរកផ្លូវបាន ព្រមទាំងញាណក្នុងការប្រើប្រាស់ឧបករណ៍ផ្សេងៗផងដែរ។

គោលបំណងនៃការប្រើប្រាស់ម៉ាស៊ីន ដែលគ្មានមនុស្សបញ្ជានេះ ដើម្បីកាត់បន្ថយថ្លៃដើម និងបង្កើនភាពច្នៃប្រឌិត និងផលិតកម្ម។

បើតាមឱ្យដឹងពីទីភ្នាក់ងារសារព័ត៌មានស៊ីនហួរបានរាយការណ៍ថា ម៉ាស៊ីននិងគ្រឿងចក្រសម្រាប់សាងសង់ផ្លូវហាយវេ ត្រូវបានសម្របសម្រួល និងបញ្ជាពីមជ្ឈមណ្ឌលគ្រប់គ្រងទិន្នន័យ។ ស្ពាននិងផ្លូវរូងក្នុងដីប្រមាណ៨១ភាគរយ នៃគម្រោងផ្លូវហាយវេទាំងនេះ មានលក្ខណៈជាក់លាក់ស្ពស់សម្រាប់ដំណើរការរលូនរបស់ផ្លូវ។

បច្ចេកវិទ្យាទំនើបបែបនេះត្រូវបានបង្កើតឡើង និងអភិវឌ្ឍដោយក្រុមហ៊ុនផលិតគ្រឿងម៉ាស៊ីន Xuzhou Construction Machinery (XCMG) សហការជាមួយក្រុមហ៊ុនវិនិយោគផ្លូវដែកស៊ីឈាន់ និងសាកលវិទ្យាល័យ ហ្ស៊ីងហ័រ។

អ្នកស្រាវជ្រាវមកពីសាកលវិទ្យាល័យ គឺជាអ្នកដែលស្វែងរក និងបង្កើតខួរក្បាលនៃប្រព័ន្ធដំណើរការម៉ាស៊ីននេះ។

ក្រសួងដឹកជញ្ជូនរបស់ចិន បានចេញសេចក្តីណែនាំ កាលពីខែឧសភាកន្លងទៅ ដែលជម្រុញឱ្យប្រើប្រាស់ប្រព័ន្ធ5G ក្នុងការស្ថាបនាផ្លូវ និងជាតិចនិចកម្រិតខ្ពស់មួយ យ៉ាងច្បាស់លាស់ ដែលជាឥទ្ធិពលដ៏ខ្លាំងក្លានៃថាមពលកុំព្យូទ័រ។

ប្រទេសចិន បានចំណាយទឹកប្រាក់ជាង២២៥ពាន់លានដុល្លាររួចមកហើយ ក្នុងគម្រោងស្ថាបនាហេដ្ឋារចនាសម្ព័ន្ធផ្លូវថ្នល់ កាលពីឆ្នាំ ២០១៩។ ជាមួយនឹងជំនួយពីប ច្ចេកវិទ្យាបណ្តាញ5Gនេះ នឹងធ្វើឱ្យមានការតភ្ជាប់ឆាប់រហ័ស និងបន្ថយភាពយឺតយ៉ាវរបស់គម្រោង ដែលក្រុមហ៊ុនម៉ៅការសាងសង់រំពឹងថា នៅការដ្ឋានសំណង់ក្នុងប្រទេសចិននឹងមានការប្រើប្រាស់ម៉ាស៊ីនបែបនេះឱ្យបានច្រើន៕

មជ្ឈមណ្ឌលកម្សាន្តធំផុតរបស់អាមេរិកគ្រោងបើកដំណើរឡើងវិញ បើទោះមាន វិបត្តិជំងឺរាតត្បាតសកល

ដោយ ប៊ី

អន្តរជាតិៈ មជ្ឈមណ្ឌលកម្សាន្ត Disney World ដ៏ធំរបស់អាមេរិកបានបិទទ្វារអស់រយៈពេល១១៦ ថ្ងៃ ដែលជារយៈពេលក្រុមហ៊ុន Walt Disney World បានផ្អាកដំណើរការ ដោយសារតែការផ្ទុះឡើងនៃជំងឺរាតត្បាតឆ្លងរាលដាល។

នៅថ្ងៃសៅរ៍ខាងមុខនេះ ក្រុមហ៊ុនDisney នឹងបើកទ្វារស្វាគមន៍ភ្ញៀវនៅឧទ្យានកម្សាន្តរបស់ខ្លួននៅទីក្រង Orlando រដ្ឋ Florida ឡើងវិញ។

ក្រុមហ៊ុន Disney (DIS) គ្រោងនឹងបើកដំណើរការជាផ្លូវការឡើងវិញ នៅថ្ងៃសៅរ៍ខាងមុខ សម្រាប់ឧទ្យាន Magic Kingdom និងសួនសត្វរបស់ខ្លួន។

ទោះបីជាDisney កំពុងអនុវត្តន៍វិធានការណ៍ជាច្រើន ដើម្បីបើកដំណើរការដោយសុវត្ថិភាពក៏ដោយ ក៏ការបើកឡើងវិញនូវឧទ្យានកម្សាន្តនេះ នៅហ្វ្រាន់ស៊ីស្កូធ្វើឡើងដោយប្រឈមនឹងហានិភ័យ សំណួរ និងការរិះគន់នៅពេលដែលករណីឆ្លង កំពុងកើនឡើងនៅរដ្ឋផ្លរីដា។

សួនកម្សាន្តនេះ មាននិយោជិកជាង៧៥.០០០នាក់ ហើយមនុស្សរាប់លាននាក់មកទស្សនាជារៀងរាល់ឆ្នាំ។

លោក Trip Miller ដែលជាម្ចាស់ភាគហ៊ុន និងជាដៃគូគ្រប់គ្រងរបស់ក្រុមហ៊ុន Gullane Capital Partners បានឱ្យដឹងថា “នៅពេលអ្នកគិតសួនកម្សាន្ត Disney អ្នកនឹងស្រមៃឃើញមនុស្សជាច្រើននៅទីនោះ”។

សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19ច្រើនជាងគេនៅលើពិភពលោក។ សហរដ្ឋអាមេរិកមានអ្នកឆ្លងជំងឺ COVID-19 ចំនួនជាង៣,២លាននាក់ ស្លាប់ចំនួន១៣៥,៩១៥នាក់ និងជាសះស្បើយចំនួន ១,៤២៦,១៧០នាក់៕ CNN៕

មន្រ្តីជាន់ខ្ពស់លើកឡើងពីសារៈសំខាន់នៃធនធានប្រេងកាត ខណៈការទាញយកមិនទាន់មានភាពច្បាស់លាស់

ដោយវុត្ថា

កោះកុងៈ មន្ត្រីជាន់ខ្ពស់នៃក្រសួងរ៉ែ និងថាមពលបានអះអាងថា ធនធានប្រេងកាត ជាដើមទុនដ៏មានតម្លៃរបស់ជាតិសម្រាប់ការជំរុញ និងអភិវឌ្ឍសេដ្ឋកិច្ចសង្គមផលប្រយោជន៍យូរអង្វែងរបស់ជាតិ និងលើកកម្ពស់កម្រិតជីវភាព រស់នៅរបស់ប្រជាជនកម្ពុជា ខណៈកម្ពុជាធនធានប្រេងកាតទាញយកបាននៅពេលណា មិនទាន់កំណត់ច្បាស់លាស់នៅឡើយ។

អនុរដ្ឋលេខាធិការក្រសួងរ៉ែ និងថាមពល ញឹម សុមេធបានមានប្រសាសន៍ក្នុងសិក្ខាសាលាផ្សព្វផ្សាយស្តីពី «បច្ចុប្បន្នភាព នៃវិស័យប្រេងកាតកម្ពុជា» នៅខេត្តកោះកុងនាថ្ងៃទី ១០ ខែកក្កដា ឆ្នាំ ២០២០នេះឱ្យដឹថា ការធ្វើធុរកិច្ចដើម្បីទាញយកមកប្រើប្រាស់បណ្ដាធនធាននេះ គឺជាវិនិយោគរបស់ជាតិ ដើម្បីទទួលបាននូវផលប្រយោជន៍ជាវឌ្ឍនភាពរុងរឿង នៃសង្គមជាតិ នឹងភាពល្អប្រសើរនូវជីវភាពរស់នៅ របស់ប្រជាជនកម្ពុជាទាំងអស់។

លោកបន្តថា “ការធ្វើអាជីវកម្មធនធាននេះជាទូទៅ ជៀសមិនផុតពីផលប៉ះពាល់ផ្សេងៗ ចំពោះបរិស្ថានសង្គម និងជាពិសេសចំពោះសហគមន៍មូលដ្ឋាន ដូច្នេះបេសកកម្មចម្បងរបស់ក្រសួងរ៉ែ និងថាមពល គឺការប្រកាន់យកនូវទស្សនៈវិស័យ ដែលជំរុញឲ្យការអភិវឌ្ឍ និងអាជីវកម្មធនធានប្រេងកាត”។លោកបន្តថា “រដ្ឋាភិបាលនឹងបញ្ជៀសឲ្យបានជាអតិបរមានៅផលប៉ះពាល់អវិជ្ជមានផ្សេងៗ ដល់បរិស្ថានសង្គមព្រមទាំង ការពារ និងជំរុញលើកកម្ពស់ផលប្រយោជន៍របស់សហគមន៍មូលដ្ឋាន ដើម្បីប្រែក្លាយជាវិនិយោគក្នុងវិស័យនេះ បានប្រកបដោយទិន្នផលសេដ្ឋកិច្ចសង្គមខ្ពស់បំផុតនិងមានតម្លាភាព”។

មន្រ្តីជាន់ខ្ពស់រូបនេះ បានថ្លែងទៀតថា រហូតមកដល់ពេលនេះ យើងអាចវាយតម្លៃបានថា ការអនុវត្តកម្មវិធីកំណែទម្រង់សំខាន់ៗ ក្នុងវិស័យប្រេង និងឧស្ម័នត្រូវបានអនុវត្តប្រកបដោយ ការព្យាយាមចិត្តទុកដាក់ខ្ពស់នឹងទទួលបានផលគួរជាទីមោទនៈ ហើយក្រសួងក៏បានយកចិត្តទុកដាក់ លើការអនុវត្តសកម្មភាពអាទិភាពសំខាន់ៗដូចជា ទី១ ការកសាងសមត្ថភាពស្ថាប័នការពង្រឹងប្រសិទ្ធភាពអភិបាលកិច្ច ទី២ ការគ្រប់គ្រងប្រតិបត្តិការប្រេងកាត ដោយសង្កត់លើការរៀបចំគោលនយោបាយបទដ្ឋានគតិយុត្តិ ទី៣ ការរៀបចំឡើងវិញផ្នែកស្ថាប័នកិច្ចការបណ្ដុះបណ្ដាល។

ទី៤ កសាងសមត្ថភាពមន្ត្រីរាជការ រួមទាំងការរឹតបន្តឹងការត្រួតពិនិត្យ និងប្រសិទ្ធភាព នៃការអនុវត្តកាតព្វកិច្ចព្រមព្រៀងប្រេងកាត ទី៥ ការពង្រឹងគុណភាព និងប្រសិទ្ធភាព នៃការប្រមូលចំណូលមិនមែនសារពើពន្ធពីវិស័យប្រេង និងឧស្ម័ន ទី៦ ការរៀបចំយន្តការ និងក្របខ័ណ្ឌអភិវឌ្ឍន៍ដើម្បីពង្រឹងស្តង់ដារសុវត្ថិភាពបរិស្ថាន និងសង្គម ទី៧ ការវាយតម្លៃយុទ្ធសាស្ត្រនៃផែនការបរិស្ថានក្នុងគម្រោងប្រេងកាត។

គោលនយោបាយ និងសកម្មភាពអទិភាពឆ្នាំ២០១៩-២០២៣ នៃវិស័យប្រេងកាតកម្ពុជាក្រសួងរ៉ែ និងថាមពល មានបេសកកម្មយ៉ាងធំធេង ក្នុងការអភិវឌ្ឍវិស័យប្រេងកាត ឲ្យអស់លទ្ធភាពតាមរយៈការស្វែងរុករកអភិវឌ្ឍន៍ផលិតកម្ម ប្រព្រឹត្តិកម្ម ដឹកជញ្ជូនសន្និធិ និងការធ្វើពាណិជ្ជកម្មប្រេង និងឧស្ម័នដើម្បីរួមចំណែកអភិវឌ្ឍន៍សេដ្ឋកិច្ចសង្គម និងផលប្រយោជន៍យូរអង្វែង នៃប្រទេសជាតិ នឹងភាពល្អប្រសើរនៃជីវភាពរស់នៅរបស់ប្រជាជនកម្ពុជា៕

1...2,3302,3312,332...3,255 Page 2,331 of 3,255