ប្រែក្លាយ​ពី​បឹង​និង​វាល​រហោ​ដ្ឋា​ន បច្ចុប្បន្ន​តំបន់​ព្រៃ​ស​ទាក់ទាញ​គម្រោង​វិនិយោគ​លើវិស័យ​លំនៅឋាន​យ៉ាងច្រើន

ដោយ​វុត្ថា

ភ្នំពេញៈ តំបន់​ព្រៃ “ស” បាន​នឹង​កំពុង​ទាក់ទាញ គម្រោង​វិនិយោគ​លើ​វិស័យ​លំនៅឋាន ជាច្រើន​ប្រភេទ រាប់​ចាប់​គិតពី​ចំណុច​ផ្លូវបំបែក​ស្ដុ​ប​ចំការ​ដូង ឆ្ពោះទៅកាន់​វត្ត​ព្រៃ​ស​មិនតិចជាង១០គម្រោង​នោះទេ និង​បានប្រែក្លាយ​មកជា​តំបន់​នេះ ឱ្យមាន​ប្រជាប្រិយភាព និង​មាន​សក្ដានុពល​ខ្ពស់។

សហ​ស្ថាបនិក​ក្រុមហ៊ុន​អភិវឌ្ឍន៍ គម្រោង​លំនៅដ្ឋាន​បែប​បុរី ហេង ណា លោក សាវុធ ដា​ណា បាន​ប្រប់​គេហទំព័រ Propertyarea.asia ឱ្យដឹង​កាលពីពេល​ថ្មី​នេះ​ថា  តំបន់​ព្រៃ​ស​បច្ចុប្បន្ននេះ​មាន​គម្រោង​បុរីធំៗ លំនៅឋាន មិន​ក្រោម១០នោះទេ ដែល​កំពុងតែ​ធ្វើ​សកម្មភាព​អភិវឌ្ឍន៍​យ៉ា​មមាញឹក និង​មាន​គម្រោងផ្សេងៗជាច្រើន​ទៀត។

លោក​បន្តថា “តំបន់​នេះ​មានការ​ប្រែប្រួល មកជា​តំបន់​មានការ​អភិវឌ្ឍន៍​បណ្តុំ​លំ នៅ​ឋាន​ក្នុង​រយៈពេល​ដ៏​ខ្លី​នេះ ក៏​ព្រោះ​តែមាន​បណ្តាញ​ហេដ្ឋារចនាសម្ព័ន្ធ​នានា ជាច្រើន របស់​រដ្ឋាភិបាល បានបញ្ចប់​ការសាងសង់​ជា​ស្ថាពរ ដូចជា​ផ្លូវថ្នល់​តូចធំ​ក្នុង​តំបន់ ការតភ្ជាប់​បណ្តាញ​អគ្គិសនី បណ្តាញ​ទឹកស្អាត ដែល​អនុវត្ត​ទៅតាម​ផែនការមេ​របស់​រដ្ឋបាល​ក្រុង” ។

លោក​បន្ថែមថា ហេដ្ឋារចនាសម្ព័ន្ធសំខាន់ៗ ដែល​កាន់តែ​ធ្វើឱ្យ​តំបន់​ព្រៃ “ស”កាន់​តែមាន​សក្ដានុពល និង​ប្រជាប្រិយភាព​ក្នុងការ​វិនិយោគ​រួមមាន ដូចជា មហាវិថី​សម្ដេច​តេ​ជោ៦០ម៉ែត្រ មហាវិថី៥០ម៉ែត្រ ផ្លូវ៣០ម៉ែត្រ រួម​ជាមួយនឹង​គម្រោង​ផ្លូវ​ក្រវ៉ាត់​ក្រុង​ទី២ ខណៈដែល​គម្រោង​នៃ​ការសាងសង់ ព្រលានយន្តហោះ​ភ្នំពេញ-អន្តរជាតិ​ថ្មី ត្រូវបាន​ប្រកាសឡើង​ផងដែរ។

អគ្គនាយក​ក្រុមហ៊ុន​អចលនទ្រព្យ Century21 Fortuna Investment លោក វ៉ា វិ​រៈ បាន​មាន​ទទួលស្គាល់​នូវ​ភាព​រីកចម្រើន និង​សន្ទុះ​នៃ​ការអភិវឌ្ឍ​គម្រោង​លំនៅដ្ឋាន​ជាច្រើន​នៅ​តំបន់​ខាងលើនេះ ដោយ​លាក​បាន​អះអាងថា រាល់​គម្រោង​អភិវឌ្ឍន៍​នានា​សុទ្ធតែ​ត្រូវបាន​សិក្សា​ពី​គម្រោង និង​ផែនការ​របស់​រដ្ឋាភិបាល ជាពិសេស​នៅពេល​ដែលមាន​លំហូរ​ប្រជាជន​ចូលទៅ​រស់នៅ​កាន់តែច្រើន។

លោក​បន្តថា “វត្តមាន​របស់​ក្រុមហ៊ុន​អភិវឌ្ឍន៍ ដែល​ចូលទៅ​កាន់​តំបន់​ខាងលើនេះ​នៅ​មិនទាន់​គ្រប់គ្រាន់​នោះ​តែ ដែល​នឹងមាន​គម្រោងថ្មីៗចូល​បន្ថែមទៀត នៅពេល​ខាងមុខនេះ ដោយសារតែ​ទីតាំង​តំបន់​មាន​ភាពល្អប្រសើរ ងាយស្រួល​ក្នុងការ​រស់នៅ និង​ប្រកប​អាជីវកម្ម” ។

បច្ចុប្បន្ននេះ ចំពោះ​តម្លៃ​ដីធ្លី​នៅក្នុង​សង្កាត់​ព្រៃ​ស មានការ​ហក់​ឡើង​ខ្ពស់ ពោលគឺ​កាលបី​ប្រមាណ២ឆ្នាំមុន ដី​ដែល​ស្ថិត​នៅជាប់​ផ្លូវ៣០ម៉ែត្រ មានតម្លៃ​ក្នុង​ចន្លោះ​ចាប់ពី ៣៥០-៥០០ដុល្លារ​ក្នុង​មួយ​ម៉ែត្រការ៉េ ឬ​លើសពីនេះ​អាស្រ័យ​ទៅតាម​សណ្ឋាន​ដី ដោយឡែក​នៅពេល​បច្ចុប្បន្ន​នេះ ដី​នៅ​ទីតាំង​ដដែល​នេះ​ឡើង ដល់​ប្រមាណ១០០០ដុល្លារ​ក្នុង​មួយ​ម៉ែត្រ។

សម្រាប់​គម្រោង​លំនៅដ្ឋាន​នៅពេល​បច្ចុប្បន្ននេះ ភាគច្រើន​ត្រូវបាន​ក្រុមហ៊ុន​អភិ   វឌ្ឍន៍​សាងសង់ ជា​ប្រភេទ​លំនៅដ្ឋាន​កម្រិត​មធ្យម ដែល​ដាក់លក់​ចាប់ពី​តម្លៃ៧ម៉ឺន​រហូតដល់១៥ម៉ឺន​ដុល្លារ​ក្នុង​មួយ​ល្វែង។ ក្រៅពីនេះ ក៏មាន​គម្រោង​បុរី​ខ្លះ​ធ្វើការ​សាងសង់​លំនៅដ្ឋាន​បែប​ទំនើប និង​ប្រណីត ដាក់លក់​នៅក្នុង​តម្លៃ​ចន្លោះ​ពី២៥ – ៣០ម៉ឺន​ដុល្លារ​ក្នុង​មួយ​ខ្នង​ផងដែរ៕

កត្តា​អ្វីខ្លះ​ដែល​ត្រូវ​យកមក​ពិចារណា​ថា​តើ​អ្នក​គួរ​ដាក់ពាក្យ​ស្នើសុំ​ចុះបញ្ជី?

ដោយ​វុត្ថា

ភ្នំពេញៈ ក្នុងការ​ពិចារណា​ថា​តើ​លោក /លោកស្រី​គួរ​ចុះបញ្ជី​អាករ លើ​តម្លៃបន្ថែម​ឬ​យ៉ាងណា​នោះ លោក/លោកស្រី​ត្រូវ សួរ​ខ្លួនឯង​ថាៈ

ក. តើ​ឥណទាន​អាករ​លើ​ធាតុ​ចូល​របស់ខ្ញុំ តែងតែ​លើសពី​អាករ​ដែល​ខ្ញុំ​កំណត់​លើ​ការលក់ដូរ​របស់ខ្ញុំ​ឬទេ?។

ឧ​ទា​ហរ​ណ៏ ប្រសិនបើ​លោក/លោកស្រី ជា​អ្នក​ប្រកប​អាជីវកម្ម​ទាក់ទិន​ដល់​ការនាំចេញ​សេវា​ដែល​ជាប់​អាករ​តាម អត្រា​សូន្យ​ភាគរយ លោក/លោកស្រី​អាច​ពិចារណា​បាន​ថា​លោក/លោកស្រី នឹង​មានបំណង​ចុះបញ្ជី ដោយ​ស្ម័គ្រ ចិត្ត​ដើម្បី​ស្នើសុំ​បង្វិល​សង​វិញ​នូវ​ប្រាក់​អាករ​ដែល​បាន​បង់​លើ​ការទិញ​និង​ចំណាយ​នានា។

ខ. តើ​ខ្ញុំ​ធ្វើការ​ផ្គត់ផ្គង់​ជាប់​អាករ​ឱ្យ​បុគ្គល​ជាប់​អាករ​ដែល​បាន​ចុះបញ្ជី​ដទៃទៀត​ឬទេ?

ប្រសិនបើ​លោក/លោកស្រី មិនបាន​ចុះបញ្ជី​អាករ​លើ​តម្លៃបន្ថែម​ទេ លោក/លោកស្រី​មិនអាច​ចេញ​វិ​ក្ក័​យ​ប័ត្រ អាករ​លើ​តម្លៃបន្ថែម​ឱ្យ​អតិថិជន ដែល​បាន​ចុះបញ្ជី​របស់លោក/លោកស្រី​បានទេ។ ពេលនោះ​អតិថិជន​របស់ លោក/លោកស្រី​មិនអាច​ស្នើសុំ​ឥណទាន​អាករ​លើ​ធាតុ​ចូល​បានទេ ម្ល៉ោះហើយ​ពេល​លក់​ចេញ​វិញ អតិថិជន របស់លោក/លោកស្រី​ត្រូវ​គិតថ្លៃ​ខ្ពស់ជាង​សព្វដង។

ក្នុងករណីនេះ គាត់​អាច​នឹង​ជ្រើសរើស​ការធ្វើ​អាជីវកម្ម​ជា មួយ​អ្នកផ្គត់ផ្គង់​ដែល​បាន​ចុះបញ្ជី​ផ្សេងទៀត ហើយ​លោក/លោកស្រី​នឹង​បាត់បង់​មុខរបរ​របស់ខ្លួន។

គ. តើ​ខ្ញុំ​ធ្វើ​អាជីវកម្ម​ជាសំខាន់​ជាមួយ​បុគ្គល​ជាប់​អាករ​ដែល​មិនបាន​ចុះបញ្ជី​ឬទេ?

ក្នុងករណីនេះ វា​ហាក់ដូចជា​គ្មាន​ផលប្រយោជន៍​អ្វី ដល់​លោក/លោកស្រី ដើម្បី​ចុះ​ច​ញ្ជី​អាករ​លើ​តម្លៃបន្ថែម​ទេ រហូតដល់​ពេលណា​ដែល​លោក/ លោកស្រី​មាន​ផលរបរ​ដល់​កំរិត​ត្រូវ​ចុះ​ច​ញ្ជី​ដូច​ពោល​ក្នុង​ចំណុច​ទី៣ខាងលើ។

ឃ. លោក/លោកស្រី​គួរ​យកមក​ពិចារណា​ផងដែរ​នូវ​កាតព្វកិច្ច​នៃ​ការចុះបញ្ជី?

នៅពេលដែល​បាន​ចុះបញ្ជី​រួច​លោក/ លោកស្រី​ត្រូវ​គណនា​អាករ លើ​ធាតុ​ចេញ​លើ​ការផ្គត់ផ្គង់​ជាប់​អាករ​ទាំង អស់។លោក/ លោកស្រី​អាច​ស្នើសុំ​ឥណទាន​បានតែ​ចំពោះ​អាករ​លើ​ធាតុ​ចូល ដែល​អាចបែងចែក​បាន​ចំពោះ ការផ្គត់ផ្គង់​ជាប់​អាករ​ប៉ុណ្ណោះ។

លោក/ លោកស្រី​ត្រូវដាក់​លិខិត​ប្រកាស​អាករ​លើ​តម្លៃបន្ថែម​ជូន អគ្គនាយកដ្ឋាន ពន្ធដារ​ឱ្យបាន​ទៀងទាត់ ហើយ​និង​កាន់​រក្សា​បញ្ជី​កា​គណនេយ្យ ឱ្យបាន​ត្រឹមត្រូវ​សម្រាប់​មន្ត្រី អគ្គនាយកដ្ឋាន ពន្ធដារ​ត្រួតពិនិត្យ​នៅ​គ្រប់ពេលវេលា។ ប្រសិនបើ​លោក/លោកស្រី​សម្រេច​ធ្វើការ​ស្នើសុំ​ចុះបញ្ជី ដោយ​ស្ម័គ្រចិត្ត ត្រូវ​ភ្ជាប់​មក​ជាមួយនិង​ទម្រង់​ពាក្យស្នើសុំ​នូវ​លិខិត​ពន្យល់​អំពី​ចរិត នៃ​អាជីវកម្ម​របស់លោក/លោកស្រី និង​មូល​ហេតុដែល​លោក/លោកស្រី​មាន បំណង​ចុះបញ្ជី​ព្រមទាំង​ចុះ​កាលបរិច្ឆេទ​នៃ​ការស្នើសុំ​ចុះបញ្ជី​ផង។

ប្រសិនបើ​លោក/ លោកស្រី​ពុំមាន​បំណង​ចុះបញ្ជី​ក្នុងពេល​បច្ចុប្បន្ន​ទេ លោក/លោកស្រី​ត្រូវ​បញ្ជាក់​ហេតុផល។

ប្រសិនបើ​លោក/ លោកស្រី​ត្រូវ​ចុះបញ្ជី​ដោយ​ស្ម័គ្រចិត្ត លោក/លោកស្រី​ស្ថិតក្នុង​លក្ខណៈ​ជា​បុគ្គល​ចុះបញ្ជី​ក្នុង រយៈពេល២ឆ្នាំ​ដោយ​មិន​គិតពី​តម្លៃ នៃ​ផលរបរ​ជាប់​អាករ​នៃ​អាជីវកម្ម​របស់លោក/លោកស្រី​ឡើយ៕

ការចុះ​កិច្ចព្រមព្រៀង​ពាណិជ្ជកម្ម​សេរី​របស់​កូរ៉េខាងត្បូង​ផ្តល់​សន្ទុះ​ខ្លាំងសម្រាប់​ទំហំ​ពាណិជ្ជកម្ម

ដោយ ហ្សូ​លី

សេ​អ៊ូ​លៈ ប្រទេស​កូរ៉េខាងត្បូង​កំពុង​បង្កើនល្បឿន ក្នុង​ការចុះ​កិច្ចព្រមព្រៀង​ពាណិជ្ជកម្ម​សេរី ជាមួយ​បណ្តារ​ប្រទេស​មាន​សក្តានុពល​ជាច្រើន។ កិច្ចព្រមព្រៀង​នេះ​បាន​ដើរតួនាទី​យ៉ាងសំខាន់ ក្នុងការ​ជម្រុញ​ពាណិជ្ជកម្ម និង​រក្សាបាន​ទំហំ​ពាណិជ្ជកម្ម​ចំពេល​ការផ្ទុះ​ឡើង​នៃ​មេរោគ។

យោងតាម​ទិន្នន័យ​ពី​សេ​វាគយ នៃ​រដ្ឋាភិបាល​កូរ៉េខាងត្បូង​បាន​បង្ហាញថា ប្រទេស​ដែលមាន​សេដ្ឋកិច្ច​លំដាប់​ទី៤ នៅក្នុង​តំបន់​អាស៊ី​នេះ បាន​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​ដៃគូ​ប្រទេស​នានា ស្មើនឹង​ទឹកប្រាក់​ប្រមាណ៤០.៤ពាន់​លាន​ដុល្លារ ក្នុង​ខែមករា រហូតដល់​ខែកញ្ញា។

ផ្ទុយទៅវិញ ប្រទេស​កូរ៉េខាងត្បូង បានប្រកាស​ឱនភាព​ពាណិជ្ជកម្ម​ចំនួន១២,៨ ពាន់​លាន​ដុល្លារ ជាមួយ​ដៃគូ​មិនមែន​តំបន់​ពាណិជ្ជកម្ម​សេរី ដែលជា​លទ្ធផល​ធ្វើឱ្យ​ឳ​ន​ភាព​ពាណិជ្ជកម្ម​មាន​ទំហំ​សរុប​ចំនួន២៧,៦ពាន់​លាន​ដុល្លារ។

គិត​មក​ត្រឹម​ក្នុង​រយៈពេល៩ខែ នៃ​ឆ្នាំ២០២០នេះ ទំហំ​ពាណិជ្ជកម្ម​របស់​កូរ៉េខាងត្បូង ជាមួយ​ដៃគូ​ពាណិជ្ជកម្ម​កិច្ចព្រមព្រៀង ពាណិជ្ជកម្ម​សេរី​បាន​ធ្លាក់ចុះ៥,៣ ភាគរយ​ពីមួយ​ឆ្នាំទៅ​មួយឆ្នាំ ដែល​ទាប​ជាង១៦,៨ ភាគរយ ធ្លាក់ចុះ​នៅក្នុង​ពាណិជ្ជកម្ម​ជាមួយ​ដៃគូ​មិនមែន​ដៃគូ​ចុះ​កិច្ចព្រមព្រៀង​ជាមួយគ្នា។

ដោយសារ​ការផ្ទុះ​ឡើង​នៃ​មេរោគ​នេះ ការនាំចេញ​និង​ការនាំ​ចូល​ជាទូទៅ​របស់​កូរ៉េខាងត្បូង​បាន​ធ្លាក់ចុះ៨,៦ ភាគរយ និង៩,១ ភាគរយ​ធៀប​នឹង​ឆ្នាំ២០១៩ កន្លងទៅ។

ប្រទេស​កូរ៉េខាងត្បូង បាន​ជំរុញ​ការធ្វើ​ពាណិជ្ជកម្ម ដោយបាន​កើន​ដល់​ចំនួន២៣,៥ពាន់​លាន​ដុល្លារ ជាមួយ​សមាគម​ប្រជាជាតិ​អាស៊ីអាគ្នេយ៍ (អាស៊ាន) ក្នុងអំឡុង​ពេលនេះ ទោះបីជា​ការនាំចេញ​បាន​ធ្លាក់ចុះ១០,៣ ភាគរយ​ក្តី។

ឱនភាព​ពាណិជ្ជកម្មរ​បស់​កូរ៉េខាងត្បូង ជាមួយ​សហភាព​អឺរ៉ុប​មាន​ទំហំ៥,៧ ពាន់​លាន​ដុល្លារ ដោយសារ​ការនាំ​ចូល​ពី​តំបន់​នោះបាន​កើនឡើង២,៨ភាគរយ បើទោះបីជា​ការនាំចេញ​ធ្លាក់ចុះ៧,៧ភាគរយ​ក៏ដោយ។

ទីភ្នាក់ងារ​គយ​បាន​និយាយថា ការនាំ​ចូល​ជាទូទៅ​របស់​កូរ៉េខាងត្បូង ពី​សហភាព​អ៊ឺរ៉ុប បាន​កើនឡើង ខណៈពេលដែល​ថ្នាំពេទ្យ វ៉ាក់សាំង ទំនិញ​ប្រណីត និង​រថយន្ត​ត្រូវបាន​នាំចូល៕ Yonhap៕

គម្រោង​ស្ថាបនា​ហេដ្ឋារចនាសម្ព័ន្ធ​ផ្លូវថ្នល់​ទាំង៣៨ខ្សែ​នឹង​ផ្លាស់ប្តូរ​នគរូបនីយកម្មក្នុង​សៀមរាប

ដោយៈ រ៉ា​ណេ​ត

ភ្នំពេញៈ ហេដ្ឋារចនាសម្ព័ន្ធ​ផ្លូវថ្នល់​ទាំង៣៨ខ្សែ​នេះ នឹងត្រូវ​សាងសង់ឡើង​ដោយ​អង្គភាព​ចំនួន៦ បែង​ចែកជាកំណាត់ៗ ប្រកបដោយ​ភាពបត់បែន និង​ច្នៃប្រឌិត​ខ្ពស់ ចាក់​បេតុង​កៅស៊ូ​សមស្រប​តាម​ទំហំ​ចរាចរណ៍ និង​ការដឹក​ទំនិញ​ធ្ងន់ ឬ​ស្រាល ដោយ​ផ្ដោតជាសំខាន់​លើ​គុណភាព ប្រសិទ្ធភាព និង​បញ្ចប់​គម្រោង​បាន​ទាន់ពេលវេលា​តាម​ការគ្រោងទុក។

លោក​ទេសរដ្ឋមន្ត្រី ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន នៅក្នុង​កិច្ចប្រជុំ​ពិភាក្សា​លើ​ការងារ ស្ថាបនា​ហេដ្ឋារចនាសម្ព័ន្ធ​ផ្លូវថ្នល់​នៅ​ក្រុង​សៀមរាប ខេត្តសៀមរាប នៅ​ថ្ងៃទី ២៨ ខែតុលា ឆ្នាំ ២០២០នេះ ដោយមាន​ការចូលរួម​ពី​សំណាក់​មន្ត្រីជាន់ខ្ពស់ មន្ត្រី​បច្ចេកទេស​ក្រោម​ឱវាទ​ក្រសួង និង​ភាគី​ពាក់ព័ន្ធ​ផងដែរ។

លោក​បន្តថា “ដើម្បី​ទទួលបាន​ផ្លូវ​មានគុណ​ភាព ស្របតាម​ស្តង់ដារ​បច្ចេកទេស និង បញ្ចប់​គម្រោង​តាម​ការគ្រោងទុក ភាគី​ពាក់ព័ន្ធ​ទាំងអស់​ទាំង​រដ្ឋ ក៏ដូចជា ផ្នែក​ឯកជន​ក្តី ត្រូវ​សហការគ្នា​ឱ្យបាន ជិតស្និទ្ធ​ក្នុងទិសដៅ​តែមួយ” ។ លោក​បន្តថា “យើង​សាងសង់​ផ្លូវ​ឱ្យមាន​ប្រសិទ្ធភាព​និង​គុណភាព​រឹងមាំ និង​បញ្ចប់ គម្រោង​តាម​ផែនការ ដោយ​ប្រើប្រាស់​សម្ភារ​មាន​ស្តង់ដារ និង​ការផ្គត់ផ្គង់​សម្ភារៈ​បាន​ទាន់​តម្រូវការ​ផងដែរ” ។

លោក​ស៊ុនចាន់ថុល បញ្ជាក់ទៀតថា ប្រសិនបើ​អង្គភាព​សាងសង់​ណាមួយ​ត្រូវបាន​រកឃើញថា ហេដ្ឋារចនាសម្ព័ន្ធ​សំណង់​របស់ខ្លួន មិនបាន​អនុវត្ត​ត្រឹមត្រូវ​តាម​បទដ្ឋាន​បច្ចេកទេស ឬ​សៀវភៅ​បន្ទុក អង្គភាព​នោះ​នឹងមិន​ទទួលបាន​ការទូទាត់​ប្រាក់ ជាដាច់ខាត។

គម្រោង​ស្ថាបនា​ហេដ្ឋារចនាសម្ព័ន្ធ​ផ្លូវថ្នល់​ទាំង៣៨ខ្សែ​នេះ គ្រោង​សម្ពោធ​បើក​ការដ្ឋាន​សាងសង់​នៅ ថ្ងៃទី១៦ ខែវិច្ឆិកា ឆ្នាំ២០២០ខាងមុខនេះ ក្រោម​អធិបតីភាព​សម្តេច​តេ​ជោ​ហ៊ុន សែន​នាយករដ្ឋមន្ត្រី​នៃ​កម្ពុជា។ គំរោង​នេះ​នឹង​ប្រើប្រាស់​ថវិកា​សន្សំ​របស់​រដ្ឋ​ចំនួន ១៥០លាន​ដុល្លារ​អាមេរិក។

បើតាម​លោក ស៊ុន ចាន់ថុល កិច្ចប្រជុំ​ពិភាក្សា​លើ​ការងារ​ស្ថាបនា​ហេ​ដ្ឋា​រចនា​ស   ម្ព័​ន្ធ​ផ្លូវថ្នល់​នៅ​ក្រុង​សៀមរាប ខេត្តសៀមរាប ធ្វើឡើង​ដើម្បី​ពិភាក្សា​ឱ្យបាន​យល់​កាន់តែច្បាស់​អំពី​តម្រូវការ គោលជំហរ និង​គោលការណ៍ នៃ​ការស្ថាបនា​ហេដ្ឋារចនាសម្ព័ន្ធ​ផ្លូវថ្នល់​ឱ្យមាន​គុណភាព​រឹងមាំ ក៏ដូចជា​នីតិវិធី​នៃ​ការផ្គត់ផ្គង់ ការទូទាត់​ថ្លៃ សម្ភារៈ និង​ការជ្រើសរើស​សម្ភារៈ​សាងសង់​ប្រកបដោយ​ស្តង់ដារ តាម​អនុសាសន៍​ណែនាំ​របស់ សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ និង​ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួង​រៀបចំ​ដែនដី នគរូបនីយកម្ម និង​សំណង់៕

ធនាគារពិភពលោក​កោតសរសើរ​រដ្ឋាភិបាល​កម្ពុ​ជាមាន​សមត្ថភាព​គ្រប់គ្រង​ទុនបម្រុង​សម្រាប់​វិបត្តិ​សេដ្ឋកិច្ច​សកល

ដោយ ហ្សូ​លី

ភ្នំពេញៈ រដ្ឋាភិបាល​កម្ពុជា បានបង្ហាញ​ពី​សមិទ្ធផល​ដ៏​ជោគជ័យ​របស់ខ្លួន ចំពោះ​ការគ្រប់គ្រង​ទុនបម្រុង សម្រាប់​វិបត្តិ​សេដ្ឋកិច្ច​សកល ដោយសារ​ជំងឺ​រាតត្បាត។ នេះ​តាម​ឱ្យដឹងពី​វេទិកា​របស់​ធនាគរ​ពិភពលោក World តាម​ប្រព័ន្ធ​អន​ឡាញ។

ក្នុង​វេទិកា​របស់​ធនាគារពិភពលោក​ស្តីពី កម្មវិធី​គ្រប់គ្រង​និង​ពិគ្រោះ​យោបល់​ទុនបម្រុង RAMP តាម​ប្រព័ន្ធ​អន​ឡាញ ដោយមាន​ការចូលរួម​ជា​កិត្តិយស ពី​លោក​ទេសាភិបាល ទេសាភិបាលរង អគ្គនាយក និង​អគ្គនាយករង​របស់​ធ​នាគារ​កណ្តាល​ជា​សមាជិក ដែល​សរុប​មាន​ចំនួន៤៤ប្រទេស។ ជាពិសេស លោក ជា ចាន់តូ ទេសាភិបាល​នៃ​ធនាគារជាតិ​កម្ពុជា ក៏បាន​ចូលរួម​ក្នុង​វេទិកា​នេះ​ផងដែរ។

ធនាគារពិភពលោក World Bank បាន​កោតសរសើរ​ដល់​សមិទ្ធផល ដែល​កម្ពុជា​សម្រេចបាន ក្នុងការ​គ្រប់គ្រង​ទុនបម្រុង​វិនិយោគ និង​ការចូលរួម​របស់​ធនា​គារ​ជាតិ​កម្ពុជា ក្នុងនាម​ជា​សមាជិក​របស់​វេទិកា​នេះ​នៃ​ធនាគារពិភពលោក។

ទន្ទឹមនេះ ធនាគារពិភពលោក​ធ្លាប់បាន​ផ្តល់ជំនួយ​ជា​បច្ចេកទេស និង​អាហារូបករណ៍​ដល់ក​ម្ពុ​ជា ជាពិសេស​ផ្តោតលើ​ការគ្រប់គ្រង​ទុនបម្រុង​វិនិយោគ​ផ្ទាល់​តែម្តង។

លោក​ជា ចាន់តូ​បាន​ចួ​ល​រួម​ចែករំលែក​បទពិសោធន៍​របស់​កម្ពុជា ក្នុងការ​ដាក់ចេញ​និង​អនុវត្ត​នូវ​វិធានការ គោលនយោបាយ​រូបិយវត្ថុ និង​គោលនយោបាយ​ម៉ាក្រូសេដ្ឋកិច្ច​សម្រាប់​គ្រឹះស្ថាន​ធនាគារ​និង​ហិរញ្ញវត្ថុ ដើម្បី​ធានាឱ្យមាន​ភាពរឹងមាំ អំឡុងពេល​កម្ពុជា​ប្រឈម​និង​វិបត្តិ​សុខភាព​សកល។

វេទិកា​នេះ​គឺជា​ការប្រជុំ​ពិភាក្សា និង​ចែករំលែក​នូវ​បទពិសោធន៍​របស់​ប្រទេស​សមាជិក​របស់​កម្មវិធី RAMP និង​រៀបចំឡើង​ក្នុង​គោលបំណង​ពិភាក្សា និង​ផ្លាស់ប្តូរ​យោបល់​អំពី​ផលប៉ះពាល់​នៃ​ជំងឺ​កូ​វីដ-១៩ ទៅលើ​ស្ថិរភាព​ម៉ាក្រូសេដ្ឋកិច្ច និង​ការដាក់ចេញ​អនុវត្ត​គោលនយោបាយ​រូបិយវត្ថុ ការគ្រប់គ្រង​ទ្រព្យសកម្ម វិនិយោគ​ក្នុង​បរិការណ៍​ថ្មី។

ផ្តោត​សំខាន់​ទៅលើ​ការអនុវត្ត គោលនយោបាយ​ធុរកិច្ច ប្រកបដោយ​ការទទួលខុសត្រូវ (Economic, Social and Governance-ESG- Policy)៕

ទីផ្សារ​ខុន​ដូ​ចាប់ផ្តើម​កក្រើក​នៅក្នុង​បណ្តា​ខេត្ត​សក្តានុពលពិសេសៗចំនួន២

ដោយ ហ្សូ​លី

ភ្នំពេញៈ ទីផ្សារ​ខុន​ដូ​កំពុងមាន​ភាព​រីកចម្រើន និង​សាយភាយ​ពាសពេញ​ទីក្រុង គួបផ្សំ​ទៅតាម​បណ្តារ​ខេត្ត​មាន​សក្តានុពល​មួយចំនួន។ យ៉ាងណាមិញ អ្នកជំនាញ​បាន​បង្ហើប​ពី​ខេត្ត​ចំនួន២ ហាក់​មានការ​អភិវឌ្ឍ​យ៉ាង​ផុសផុល​ទៅលើ​វិស័យ​ខុន​ដូ។

លោក​ខន គង្គារ អគ្គនាយក​ក្រុមហ៊ុន​អចលនទ្រព្យ ERA Cambodia បាន​ថ្លែងប្រាប់​គេហទំព័រ Propertyarea.asia នៅ​ថ្ងៃទី ២៨ ខែតុលា ឆ្នាំ ២០២០នេះ​ថា ខេត្ត​ដែលមាន​សក្តានុពល លើ​ខុន​ដូ​ច្រើនជាង​បណ្តា​ខេត្ត​ទូទៅ​នៅ​កម្ពុជា គឺ​ខេត្ត​ព្រះសីហនុ និង​ខេត្តសៀមរាប។

លោក​បន្តថា “សក្តានុពល​ខេត្ត​ព្រះសីហនុ​កំពុង​ផ្ទុះ​ជាខ្លាំង បើសិនជា​បងប្អូន​ដែល​ខាន​ទៅលេង​កម្សាន្ត​នៅ​ខេត្ត​ព្រះសីហនុ​យូរ ច្បាស់​ជា​មើល​លែង​ស្គា​ល់ហើយ ព្រោះ​ខេត្ត​បាន​ផ្លាស់ប្តូរ​រូបរាង​ដូច​ទៅនឹង​ប្រទេស​ចិន ឬ​ប្រទេស​សិង្ហ​បុរី​ទៅហើយ ដោយសារ​តែមាន​អគារខ្ពស់ៗជាច្រើន លូត​ត្រដែត​ដូច​ផ្សិត” ។ លោក​បន្តថា “មិនតែប៉ុណ្ណោះ មាន​អ្នកវិនិយោគ​បរទេស​ជាច្រើន បាន​ចាប់អារម្មណ៍​ទៅលើ​ទឹកដី​ជាប់មាត់​សមុទ្រ​ជាច្រើន” ។

ក្នុងនាម​ជា​អ្នក​ប្រឡូក​លើ​វិស័យ​អចលនទ្រព្យ ជាពិសេស​វិស័យ​ខុន​ដូ លោក ខន គង្គារ បានបញ្ជាក់​ទៀតថា ថ្វី​ត្បិត​ការអភិវឌ្ឍ​លើ​គម្រោង​ខុន​ដូ​ច្រើន​ក៏ពិតមែន ប៉ុន្តែ​គម្រោងល្អៗមិន​ប្រាកដថា មាន​ច្រើន​ដូច​ចំនួន​អគារ​នោះឡើយ។

ខេត្ត​មួយទៀត​នោះ គឺ​ខេត្តសៀមរាប ដែល​លោក​បាន​បញ្ជាក់ថា សម្រាប់​ខេត្តសៀមរាប គម្រោង​ខុន​ដូ​មិនមាន​ជា​លក្ខណៈធំៗច្រើន​ជាន់ ដូច​នៅក្នុង​ទីក្រុង​ភ្នំពេញ ឬ​នៅ​ក្រុងព្រះសីហនុ​ឡើយ។ កម្ពស់​ខុន​ដូ​មាន​ប្រមាណ​ត្រឹម៥ជាន់​តែប៉ុណ្ណោះ ដោយហេតុថា វា​ជាគោលការណ៍​របស់​អាជ្ញា​ដែល​គ្រប់គ្រង​នៅ​តំបន់​នោះ។

សក្តានុពល​តំបន់​នេះ មិនមែន​ពឹងផ្អែក​តែ​នៅលើ​អ្នកវិនិយោគ​ទេ តែ​វិស័យ​ទេសចរណ៍ គឺជា​ស្នូល​ក្នុងការ​ជម្រុញ​វិស័យ​អចលនទ្រព្យ​ខេត្ត​ទាំងមូល។ នៅពេល​ភ្ញៀវទេសចរ​ទៅដល់​គោលដៅ​ទេសចរណ៍​ណាមួយ ច្បាស់​ណាស់​ថា អ្នក​អភិវឌ្ឍ​ចាប់ផ្តើម​សម្រុក​ទៅ​តំបន់​នោះ ដោយសារ​កំណើន​តម្រូវការ​ជា​ចាំបាច់​នៅលើ​ទីផ្សារ។ ជាពិសេស ពួកគេ​ត្រូវការ​ស្នាក់នៅ​ជា​លក្ខណៈ​ឯកជន មាន​ផាសុកភាព និង​មានតម្លៃ​សមរម្យ ស័ក្តិ​ក​សម​សម្រាប់​ការរស់នៅ និង​ស្ថានភាព​ហិរញ្ញវត្ថុ​ផ្ទាល់ខ្លួន៕

រដ្ឋាភិបាលគុយបា សរសើរពីការរៀបចំនគរូបនីយកម្ម និងការអភិវឌ្ឍន៍វិស័យសំណង់នៅរាជធានីភ្នំពេញ

ដោយ ៖ រ៉ាណេត

ភ្នំពេញ ៖ រដ្ឋាភិបាលប្រទេសគុយបា តាមរយៈឯកអគ្គរដ្ឋទូតប្រចាំនៅកម្ពុជា បានបង្ហាញពីការកោតសរសើរចំពោះកិច្ចអភិវឌ្ឍន៍យ៉ាងឆាប់រហ័សរបស់ប្រទេសកម្ពុជាទៅលើហេដ្ឋារចនាសម្ព័ន្ធនានា ជាពិសេស ការរៀបចំនគរូបនីយកម្មនៅទូទាំងរាជធានីភ្នំពេញ ដែលកំពុងមានសោភ័ណភាព និងរីកចម្រើន។

ឯកអគ្គរដ្ឋទូតនៃប្រទេសគុយបាប្រចាំនៅកម្ពុជា លោកស្រី Liurka Rodriguez Barrios ក្នុងឱកាសចូលជួបសម្ដែងការគួរសមជាមួយលោកឧបនាយករដ្ឋមន្ត្រី ជា សុផារ៉ា នៅថ្ងៃទី២៨ ខែតុលា ឆ្នាំ២០២០នេះ បានបង្ហាញពីការកោតសរសើរ និងក្ដីជឿជាក់ថា កម្ពុជានៅតែបន្តការអភិវឌ្ឍសេដ្ឋកិច្ចរីកចម្រើនទៅមុខបានដោយរលូនជាបន្តបន្ទាប់ទៀត។

លោកស្រីបានបញ្ជាកើថា “កម្ពុជា ក៏ជាប្រទេសគំរូមួយដែលទទួលបានជោគជ័យក្នុងការប្រយុទ្ធប្រឆាំងនឹងមេរោគឆ្លងរាតត្បាតកូវីត១៩ ដែលកំពុងរីករាលដាលនៅតាមបណ្ដាប្រទេសនៅពាសពេញពិភពលោក”។

លោកស្រីបន្តថា “ខ្ញុំសង្កេតឃើញថា ការរៀបចំនគរូបនីយកម្មនៅក្នុងរាជធានីភ្នំពេញប្រទេសកម្ពុជា គឺពិតជាមានការអភិវឌ្ឍរីកចម្រើនជឿនលឿនធំអស្ចារ្យខុសពីអ្វីដែលលោកជំទាវធ្លាប់បានឮពីមុនមក។ ម្យ៉ាងទៀត ឆ្នាំ២០២០នេះជាឆ្នាំនៃខួបគម្រប់ ៦០ ឆ្នាំនៃទំនាក់ទំនងការទូតរវាងកម្ពុជា និងគុយបាដូច្នេះហើយភាគីគុយបានឹងរៀបចំកម្មវិធីជាច្រើនទាក់ទិននឹងកិច្ចសហប្រតិបត្តិការរវាងកម្ពុជា និងគុយបា ដោយក្នុងនោះស្ថានទូតគុយបាកំពុងតែខិតខំរិះរកមធ្យោបាយ ដើម្បីធ្វើកិច្ចសហប្រតិបត្តិការជាមួយនឹងកម្ពុជា ហើយនឹងស្វះស្វែងជួបជាមួយបណ្ដាក្រសួងស្ថាប័ននានា ដើម្បីធ្វើកិច្ចសហប្រតិបត្តិការបន្ថែមទៀត។

លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា បេសកកម្មរបស់ក្រសួងរៀបចំដែនដី រួមមានដូចជាការចុះបញ្ជីដីធ្លីជូនប្រជាពលរដ្ឋទូទាំងប្រទេសដែលផ្ដល់នូវសុវត្ថិភាពដីធ្លីជូនម្ចាស់កម្មសិទ្ធិ ការគៀងគរវិនិយោគទុនក្នុងវិស័យដីធ្លី ការបង្កើនចំណូលពន្ធរដ្ឋ និងការកាត់បន្ថយឈានទៅដល់ការបញ្ចប់បញ្ហាវិវាទដីធ្លីទូទាំងប្រទេស ការរៀបចំប្លង់គោលប្រើប្រាស់ដីធ្លីនៅតាមបណ្ដារាជធានីខេត្តឲ្យបានឆាប់រហ័ស ការគ្រប់គ្រងវិស័យសំណង់ និងការថែរក្សាតំបន់ឆ្នេរជាដើម។

ជាមួយគ្នានេះលោកឧបនាយករដ្ឋមន្ត្រី ក៏បានលើកឡើងអំពីការខូចខាត និងផលប៉ះពាល់ផ្សេងៗ ដែលបង្កឡើងដោយសារគ្រោះទឹកជំនន់មួយរយៈពេលកន្លងមកថ្មីៗនេះ ដែលក្រោមការយកចិត្តទុកដាក់ពីប្រមុខរាជរដ្ឋាភិបាលកម្ពុជាក្នុងការជួយសង្គ្រោះប្រជាពលរដ្ឋរងគ្រោះទឹកជំនន់បានទាន់ពេលវេលានោះ មកទល់ពេលនេះស្ថានភាពគ្រោះទឹកជំនន់ក៏បានធូរស្រាលឡើងវិញហើយ។

លោកឧបនាយករដ្ឋមន្ត្រីបានបញ្ជាក់ថា ថ្វីដ្បិតតែកាលពីពេលកន្លងទៅ ក្រសួងរៀបចំដែនដីនគរូបនីយកម្ម និងសំណង់ មិនធ្លាប់មានកិច្ចសហប្រតិបត្តិការជាមួយប្រទេសគុយបាកន្លងមកនោះក៏ពិតមែន ប៉ុន្តែក្នុងឱកាសនេះក្រសួងក៏នឹងខិតខំរិះរកមធ្យោបាយដើម្បីធ្វើកិច្ចសហប្រតិបត្តិការជាមួយ និងស្ថានទូតគុយបាផងដែរ៕

សភាពាណិជ្ជកម្មៈកម្ពុជាបន្តរក្សាបានលំហូរការវិនិយោគ និងសក្តានុពលពាណិជ្ជកម្ម

ដោយ ហ្សូលី

ភ្នំពេញៈ ប្រទេសកម្ពុជានៅតែបន្តទទួលបានការវិនិយោគ ពីបណ្តារវិនិយោគិនក្នុងស្រុក និងក្រៅស្រុក ពិសេសអាចរក្សាសក្តានុពលពាណិជ្ជកម្ម ព្រមទាំងកិច្ចសហប្រតិបត្តិការការងារបានជាធម្មតា។ នេះបើតាមការលើកឡើងរបស់សភាពាណិជ្ជកម្មកម្ពុជា។

សភាពាណិជ្ជកម្មកម្ពុជាបានលើកឡើងថា ស្ថិតនៅក្នុងដំណាក់កាលនៃផលប៉ះពា​ល់ជំងឺកូវីដ–១៩ ស្ថានភាព វិនិយោគក្នុងស្រុក ធុរកិច្ច និងវិនិយោគមកពីបរទេសមិនមានការប្រែប្រួលខ្លាំងនោះឡើយ ពោលគឺនៅបន្តទំនាក់ទំនងក្នុងការធ្វើពាណិជ្ជកម្ម និងវិនិយោ​គជាធម្មតា ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍នៅក្នុងសិក្ខាសាលាផ្សព្វផ្សាយស្តីពី សក្តានុពលទីផ្សារមូលបត្រសម្រាប់និរន្តរភាព អាជីវកម្មនៅកម្ពុជាកាលពីថ្ងៃទី២៧ ខែតុលា ឆ្នាំ២០២០ថា ការវិនិយោគក្នុងស្រុក និងវិនិយោគមកពីបរទេសនៅកម្ពុជានៅដំណើរការជាធម្មតា ដោយមិនមានការប្រែប្រួលខ្លាំងនោះឡើ​យ ពោលគឺទំនាក់ទំនងក្នុងភាពជាដៃគូក្នុងការធ្វើពាណិជ្ជកម្ម និងវិនិយោគបន្តអនុវត្តការ​ងារជាធម្មតា។

លោកបន្តថា “រាជរដ្ឋាភិបាលបានអនុគ្រោះ និងមានការយល់យោគខ្ពស់ជំរុញលើ​កទឹកចិត្ត ដើម្បីឲ្យក្រុមហ៊ុន រោងចក្រ សហគ្រាស មានឱកាសពង្រឹងនៅក្នុងខ្សែសង្វាក់ផលិតកម្មរបស់ខ្លួន”។

លោកឧកញ៉ាបន្តទៀតថា ការរីករាលដាលនៃជំងឺកូវីដ១៩ បានធ្វើឲ្យពិភពលោករងផលប៉ះពាល់យ៉ាងខ្លាំង ក្នុងនោះក៏មានកម្ពុជា ដែលមានផ្នែកជាច្រើន ជាពិសេសវិស័យទេសចរណ៍រងនូវផលប៉ះពាល់យ៉ាងខ្លាំងដូចជា ទីផ្សារបម្រើដល់ វិស័យទេសចរណ៍បានធ្លាក់ចុះធ្វើឲ្យបាត់បង់ការងារ និងបាត់បង់ប្រាក់ចំណូល។

ស្ថិតនៅក្នុងដំណាក់កាលនេះ មានក្រុមហ៊ុនមួយចំនួន បានងាកមកវិនិយោគលើវិស័យកសិកម្ម ដើម្បីបម្រើការផ្គត់ផ្គង់ទីផ្សារ និងស្របពេលដែលកម្ពុជាបានចុះកិច្ចព្រមព្រៀង ជំរុញពាណិជ្ជកម្មរវាងកម្ពុជា-ចិន និង កម្ពុជា-កូរ៉េ។

តាមរយៈនេះ កម្ពុជានឹងទទួលបានក្រុមហ៊ុនវិនិយោគបង្កើត រោងចក្រកែច្នៃ ដើម្បីនាំចេញ ខណៈពីមុនៗមក កម្ពុជាច្រើននាំចេញវត្ថុធាតុដើម កសិផលដោយមិនបានកែច្នៃ ដែលធ្វើឱ្យបង់លើតម្លៃបន្ថែមជាច្រើន៕

ឆ្នាំ២០២៣សេដ្ឋកិច្ចកម្ពុជានឹងឈានទៅកាន់កាន់លំដាប់ថ្មីមួយទៀតជាមួយនឹងការបង្ហាញកិត្យានុភាពលើឆាកអន្តរជាតិ

ដោយៈ រ៉ាណេត

ភ្នំពេញៈ កិត្យានុភាពកម្ពុជានឹងលេចឡើង លើឆាកអន្តរជាតិកាន់តែត្រដែតត្រដឹមនៅឆ្នាំ២០២៣ខាងមុខ ពិសេសសេដ្ឋកិច្ចកម្ពុជា នឹងឈានទៅកាន់លំដាប់ថ្មីមួយទៀតស្របពេលគំរោងអភិវឌ្ឍន៍ធំៗ និងការរៀបចំធ្វើជាម្ចាស់ផ្ទះនៃកីឡាអាស៊ានហ្គេម។

គម្រោងអភិវឌ្ឍន៍ធំៗ ដែលជាការបណ្តាក់ទុនវិនិយោគដោយផ្ទាល់ ពីសំណាក់រាជរដ្ឋាភិបាលកម្ពុជា និងវិស័យឯកជន ដែលមានតម្លៃរាប់ពាន់លានដុល្លារ កំពុងដំណើរការយ៉ាងសកម្ម និងគ្រោងបញ្ចប់ទាំងស្រុកនៅត្រឹមឆ្នាំ២០២៣ខាងមុខនេះ នឹងក្លាយជាមូល​ដ្ឋានសេដ្ឋកិច្ចកម្ពុជាយ៉ាងសំខាន់បំផុត ខណៈដែលកំណើននៃគម្រោងវិនិយោគជាច្រើននឹងសម្រុកចូលមកយ៉ាងសន្ធឹកសន្ធាប់។

គម្រោងអភិវឌ្ឍន៍ធំៗ ដែលនឹងក្លាយជាកំលាំងចលករជំរុញ ឱ្យសេដ្ឋកិច្ចកម្ពុជា មានសន្ទុះខ្លាំង និងបញ្ចប់នៅត្រឹមឆ្នាំ២០២៣ខាងមុខនេះ រួមមាន គម្រោងអភិវឌ្ឍន៍ទីក្រុងកោះនរា គម្រោងអភិវឌ្ឍន៍ព្រលានយន្ដហោះអន្តរជាតិ-ភ្នំពេញថ្មី គំរោងព្រលានយន្តហោះអន្តរជាតិខេត្តសៀមរាប គម្រោងអភិវឌ្ឍន៍ផ្លូវក្រវាត់ក្រុង គម្រោងអភិវឌ្ឍន៍ផ្លូវល្បឿនលឿនភ្នំពេញ-ព្រះសីហនុ ដែលមានតម្លៃទុនសរុបរាប់ពាន់លានដុល្លារ រួមជាមួ​យនឹងឱកាសមាស នៃការទទួលបានកិច្ចព្រមព្រៀងពាណិជ្ជកម្ម សេរីជាមួយប្រទេសចិន និងបណ្តាប្រទេសនានា នៅក្នុងតំបន់អាស៊ានក្នុងពេលឆាប់ៗខាងមុខនេះ។

 

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍នៅល្ងាចថ្ងៃទី២៨ ខែតុលា ឆ្នាំ២០២០ថា ទឡ្ហីករសំខាន់ៗទាំង៥ ដូចដែលបានលើកឡើងខាងលើនេះ គឺជាឃ្នាស់ដ៏សំខាន់សម្រាប់គាស់កំណើនសេដ្ឋកិច្ចកម្ពុជា ស្របពេលដែលវិបត្តិនៃជំងឺ Covid-19 ត្រូវបានបញ្ចប់ជាស្ថាពរ។

លោកឧកញ៉ាបានបញ្ជាក់ថា បន្ថែមពីលើនេះ បច្ចុប្បន្នរាជរដ្ឋាភិបាលក៏កំពុងសិ​ក្សាទៅលើសេចក្ដីព្រាងច្បាប់វិនិយោគថ្មីនៅកម្ពុជា ដើម្បីផ្តល់ភាពងាយស្រួល ក៏ដូចជាជំរុញលើកទឹកចិត្តដល់អ្នកវិនិយោគជាតិ និងអន្តរជាតិនានានៅលើសាកលលោក ឱ្យចូលមកកាន់កម្ពុជាបន្ថែម តាមរយៈការកាត់បន្ថយនូវនិតិវិធី កាត់បន្ថយពេលវេលា និងផ្តល់ឱកាសចំណេញច្រើន។

លោកឧកញ៉ាបន្តថា “អ្វីដែលកាន់តែជាឱកាសមាស ចំណេញលើចំណេញទៀតនោះគឺ ការទទួលបានកិច្ចព្រមព្រៀងពាណិជ្ជកម្មសេរី ជាមួយប្រទេសមហាអំណាចសេដ្ឋកិច្ចចិន ដែលមានទីផ្សាររហូតដល់ប្រមាន១៤០០លាននាក់ រួមជាមួយនឹងកិច្ចព្រមព្រៀងពាណិជ្ជកម្មសេរី ជាមួយបណ្តាប្រទេសផ្សេងៗនៅក្នុងអាស៊ាន ដែលមានប្រជាជនជាង ៦០០លាននាក់។

 

លើសពីនេះការរៀបចំកិច្ចព្រមព្រៀងពាណិជ្ជកម្មសេរី ជាមួយប្រទេសមានសេដ្ឋកិច្ចរីកចម្រើនខ្លាំងដូចជា ប្រទេសកូរ៉េខាងត្បូង ជប៉ុន ហុងកុង និងឥណ្ឌា ជាដើម ដែលទាំងអស់នេះ សុទ្ធតែជាចំណុចខ្លាំងរបស់កម្ពុជា ក្នុងការទាក់ទាញវិនិយោគិនអន្តរជាតិទាំងអស់។

ជាមួយគ្នានេះ លោកបណ្ឌិត ហុង វណ្ណៈ អ្នកវិភាគនិងស្រាវជ្រាវសេដ្ឋកិច្ចនៃរាជ​បណ្ឌិត្យសភាកម្ពុជា បានបង្ហាញពីការសាទរ ទៅនឹងអ្វីដែលអាចនឹងលេចចេញជារូបរាងយ៉ាងពិតប្រាកដនៅកម្ពុជាក្នុងឆ្នាំ២០២៣ខាងមុខនេះ។

លោកបានមានប្រសាសន៍ថា “សមិទ្ធផលធំៗ ដែលនឹងសម្រេចបាននៅត្រឹមឆ្នាំ២០២៣ គឺជាសាច់ដុំសេដ្ឋកិច្ច និងជាសក្ដានុពលរបស់កម្ពុជា ក្រោមការវិនិយោគដោយធុរកិច្ចខ្មែរក្រោមការដឹកនាំដោយអ្នកឧកញ៉ា ពុង ឃាវសែ ដែលជាអ្នកវិនិយោគដ៏ធំ និងសំខាន់នៅក្នុងវិស័យជាច្រើនរបស់កម្ពុជា។ រាល់ការវិនិយោគ និងអភិវឌ្ឍន៍គ្រប់រូបភាពនឹងជួយកែប្រែសោភ័ណភាពកម្ពុជា ឱ្យកាន់តែស្រស់បំព្រង ទាក់ទាញចំណាប់អារម្មណ៍ធុរកិច្ចអន្តរជាតិក្រោមការផ្តល់ទំនុកចិត្តយ៉ាងសំខាន់”។


លោកបណ្ឌិត ហុង វណ្ណៈបានបន្តទៀតថា ការវិនិយោគរបស់បរទេសលើផ្នែកហេ ដ្ឋារចនាសម្ព័ន្ធ ជាពិសេសផ្លូវល្បឿនលឿនភ្នំពេញ-ព្រះសីហនុ ដែលគ្រោងនឹងបញ្ចប់នៅត្រឹមឆ្នាំ២០២៣ រួមជាមួយនឹងគម្រោងផ្សេងៗទៀត ខ្ញុំគិតថាជាការបង្ហាញពីសក្ដានុពលក្នុងទាក់ទាញទាំងការវិនិយោគ ទាំងកម្លាំងទេសចរណ៍ ដែលនឹងកាន់កម្ពុជាកាន់តែច្រើន​។

លោកបន្តថា “ទម្រាំដល់ឆ្នាំ២០២៣ ខ្ញុំជឿជាក់ថា បញ្ហានៃវិបត្តិជំងឺCovid-19 នឹងត្រូវបញ្ចប់សព្វគ្រប់។ ដូច្នេះ កម្ពុជានឹងមានលទ្ធភាពច្រើន ក្នុងការបង្កើនកំណើនសេដ្ឋកិច្ចជាក់ជាមិនខាន”។

លោកបន្តថា “ត្រឹមតែតាមរយៈព្រលានយន្តហោះ អន្តរជាតិ-ភ្នំពេញថ្មី កម្ពុជាអាចនឹងទទួលបានផលចំណូលយ៉ាងច្រើនរួចទៅហើយ ដោយការបង្កើនលទ្ធភាពដឹកជញ្ជូនទាំងអ្នកធ្វើដំណើរ ទាំងការដឹកជញ្ជូនទំនិញ ព្រមទាំងមានលទ្ធភាពក្នុងស្វាគមន៍នូវប្រភេ​ទយន្តហោះធុនធំគ្រប់ប្រភេទផងដែរ”។

ពាក់ព័ន្ធទៅនឹងគម្រោងអភិវឌ្ឍន៍ ទៅលើហេដ្ឋារចនាសម្ព័ន្ធធំៗប្រចាំប្រទេសដែលនឹងសម្រេចនៅត្រឹមឆ្នាំ២០២៣ ប្រធានសមាគមអ្នកជំនាញអចនទ្រព្យកម្ពុជា CREA លោកស្រី ចេវ សុឃុន បានមានប្រសាសន៍ថា គ្រប់គម្រោងអភិវឌ្ឍន៍ ជាពិសេសផ្នែកហេដ្ឋារចនាសម្ព័ន្ធ គឺមានសារៈសំខាន់ សម្រាប់វិស័យអចលនទ្រព្យបំផុត ទាំងផ្នែកដីធ្លី និងផ្នែក​សំណង់។

លោកស្រីបានបន្តថា “ជាមួយនឹងសមិទ្ធផលសំខាន់ៗ ទាំងអស់ខាងលើនេះ មិនត្រឹមមានប្រយោជន៍ ដល់វិស័យអចលនទ្រព្យនោះទេ ប៉ុន្តែថែមទាំងអនុគ្រោះទៅដល់វិស័យផ្សេងៗជាច្រើនទៀត ដូចជាទេសចរណ៍ និងពាណិជ្ជកម្ម ដែលវាកាន់តែផ្តល់នូវឱកាសកាន់តែច្រើនសម្រាប់អ្នកវិនិយោគស្ទើរគ្រប់វិស័យផងដែរ”៕

ប្រាសាក់ផ្តល់សេវាទូទាត់យុគសម័យថ្មីឆ្លងធនាគារ «បាគង»

ដោយ ប្រាសាក់

ភ្នំពេញ៖ នាយុគសម័យឌីជីថល និងស៊ីវីល័យលើការប្រើប្រាស់សេវាហិរញ្ញវត្ថុ ប្រាសាក់ បានចូលរួមយ៉ាងសកម្មក្នុង​ការ​សម្រេច​ឱ្យបាននូវការលើកកម្ពស់បរិយាប័ន្នហិរញ្ញវត្ថុនៅកម្ពុជា ដែលជាចក្ខុវិស័យនិងកិច្ចខិតខំប្រឹងប្រែងរបស់ ធនាគារ​ជាតិ​នៃ​កម្ពុជា​។

បាគង ដែលជាសេវាទូទាត់និងសេវាផ្ទេរប្រាក់ឆ្លងធនាគារ ឬ គ្រឹះស្ថានមីក្រូហិរញ្ញវត្ថុ បានបង្កើតឡើងក្រោមការផ្ដួច​ផ្ដើម​ពី​ធនាគារជាតិនៃកម្ពុជា និងសហការចូលរួមពីបណ្តាគ្រឹះស្ថានធនាគារ និងហិរញ្ញវត្ថុជាដៃគូ បាននិងកំពុងផ្តល់ជាជម្រើសថ្មី និងល្អឯកជូនដល់ប្រជាជនកម្ពុជា។

ប្រាសាក់ ផ្តល់ជូនអតិថិជន និងសាធារណជន ក្នុងការប្រើប្រាស់សេវាបាគង ដោយអាចធ្វើប្រតិបត្តិការតាម ប្រាសាក់ Mobile Banking, Internet Banking និងតាមសាខាប្រាសាក់បានយ៉ាងងាយស្រួល។

អតិថិជនអាចធ្វើការផ្ទេរប្រាក់ពីគណនីប្រាសាក់ទៅគណនីធនាគារជាដៃគូរហូតដល់ 400 លានរៀល ឬ 10 ម៉ឺនដុល្លារក្នុងមួយថ្ងៃ ហើយអាចផ្ទេរទៅគណនីបាគងបានរហូតដល់ 10 លានរៀល ឬ 2,500 ដុល្លារក្នុងមួយថ្ងៃ។

អ្វីដែលកាន់តែពិសេសនោះអតិថិជនគ្រប់ធនាគារជាដៃគូអាចធ្វើការស្កេនទូទាត់ជាមួយនឹងដៃគូស្កេនទូទាត់បាគងរបស់ប្រាសាក់បាននៅទូទាំងប្រទេស ។

លោក សាយ សូនី នាយកប្រតិបត្តិ​របស់ប្រាសាក់ បានមានប្រសាសន៍ថា «ប្រាសាក់ពិតជាមានកិត្តិយស​និងសប្បាយ​រីករាយ​ដែលបានក្លាយជា​ចំណែក​ដ៏សំខាន់​មួយ​នៃគម្រោង​បាគង​របស់ធនាគារជាតិ​នៃកម្ពុជា។ នេះ​ជាសេវាទូទាត់​តាមទូរស័ព្ទដៃដោយ​ប្រើប្រាស់​បច្ចេកវិទ្យា Blockchain ដែលពាំនាំគ្រប់គ្រឹះស្ថានដែលផ្ដល់សេវាទូទាត់និងគ្រឹះស្ថាន​ហិរញ្ញវត្ថុ​ឱ្យស្ថិត​នៅ​ប្រព័ន្ធតែមួយ ក្នុងគោលបំណងបង្កលក្ខណៈងាយស្រួល​ដល់​អ្នកប្រើប្រាស់​ព្រមទាំងសម្រួល​ដល់ការចាត់ចែងសាច់ប្រាក់ប្រចាំថ្ងៃផងដែរ» ។

លោកបន្ថែមថា «បាគង ជាមធ្យោបាយ និងឧបករណ៍ទូទាត់ថ្មីទំនើបដែលអនុញ្ញាតឱ្យ​អតិថិជន​អាចធ្វើ​ប្រតិបត្តិការ​អន្តរធនាគារ និងទូទាត់វិក្កយបត្របានយ៉ាងងាយស្រួល លឿនរហ័ស ប្រកបដោយសុវត្ថិភាព និងមិនអស់កម្រៃសេវា។ ហេតុនេះអតិថិជ​នអាចរីករាយ​ប្រើប្រាស់សេវានេះ​ក្នុងការផ្ទេរប្រាក់ ទូទាត់ ដាក់ប្រាក់ និងទទួលប្រាក់​ដោយងាយស្រួល»។

ប្រាសាក់ មានកិត្តិយសសូមចូលរួមអបអរសាទរជាមួយ ធនាគារជាតិនៃកម្ពុជា និងបណ្តាគ្រឹះស្ថានធនាគារ​និងហិរញ្ញវត្ថុ ក្នុងការដាក់ឱ្យដំណើរការប្រព័ន្ធបាគងដែលជាសេវាទូទាត់យុគសម័យថ្មីនាថ្ងៃទី 28 ខែតុលា ឆ្នាំ 2020 នេះ។ ប្រាសាក់ ប្តេជ្ញាបន្តក្នុងការជំរុញ និងផ្តល់សេវាហិរញ្ញវត្ថុកាន់តែទំនើប និងងាយស្រួលជូនដល់អតិថិជន៕