ប្រទេស​ឡាវ​បន្ត​បើកទ្វារ​សេដ្ឋកិច្ច​បន្ថែម​ដើម្បី​ទប់ស្កាត់​ស្ថានភាព​យ៉ាប់យឺន

ដោយ ហ្សូ​លី

វៀង​ច័​ន្ទៈ រដ្ឋាភិបាល​ឡាវ​កំពុងបើក​ជាថ្មី ជា​បណ្តោះអាសន្ន​នូវ​ច្រកព្រំដែន ក្នុងស្រុក និង​តាម​តំបន់​ក្នុង​គោលបំណង​ដើម្បី​ស្តារ​សេដ្ឋកិច្ច និង​កាត់បន្ថយ​ផលប៉ះពាល់​នៃ​ជំងឺ​រាតត្បាត Covid-19 ។

សកម្មភាព​នេះ ជា​ផ្នែក​មួយ​នៃ​កិច្ចខិតខំ​ប្រឹងប្រែង​រប​ស់​រដ្ឋាភិបាល ក្នុងការ​ថ្លឹងថ្លែង​វិធានការ​នានា ជាមួយនឹង​ការបន្ធូរបន្ថយ​ការ​រឹតត្បិត ដែល​អាចឱ្យ​អាជីវកម្ម​អាច​នាំចូល​និង​នាំចេញ​ទំនិញ​បាន។ ការដក​ការ​រឹតបន្តឹង​ជាក់លាក់ នឹង​អនុញ្ញាត​ធ្វើឱ្យ​ប្រសើរឡើង​នូវ​ពាណិជ្ជកម្ម​ឆ្លងកាត់​ព្រំដែន រវាង​ខេត្ត​ចំនួន​បួន​នៅក្នុង​ប្រទេស​ឡាវ និង​ប្រទេសជិតខាង។

ច្រកព្រំដែន​ផាង​ហៃ នឹង​បើក​ដំណើរការ​វិញ​ចាប់ពី​ថ្ងៃទី១ខែវិច្ឆិកា រហូតដល់​ថ្ងៃទី ៣០ ខែមិថុនា​ឆ្នាំ ២០២១ ដើម្បី​ជួយ​ពាណិជ្ជកម្ម​រវាង​ប្រទេស​ឡាវ​និង​ចិន។ ទោះយ៉ាងណា​អ្នក​នាំចូល និង​អ្នក​នាំចេញ ត្រូវតែ​អនុវត្តតាម​រាល់​វិធានការណ៍ ពាក់ព័ន្ធ​នឹង​ការដឹកជញ្ជូន​ទំនិញ ដែល​បានដាក់​ដោយ​អាជ្ញាធរ​ក្នុងប្រទេស​ឡាវ​និង​ចិន ដើម្បី​ការពារ​ការរីក​រាលដាល​នៃ​មេរោគ​ឆ្លង។

ការិយាល័យ​នាយករដ្ឋមន្ត្រី អនុញ្ញាត​ឱ្យមាន​ការនាំ​ចូល​វត្ថុធាតុដើម និង​ឧបករណ៍​ដែល​ត្រូវការ សម្រាប់​សាងសង់​រោងចក្រ​វា​រី​អគ្គិសនី​ណា​មធុ​ន១ ។ ច្រក​ឆ្លងកាត់​ព្រំដែន​តាម​តំបន់​និង​តាម​តំបន់ ដែល​នៅ​សេសសល់​នៅតែ​ត្រូវបាន​បិទ លើកលែងតែ​មានការ​អនុញ្ញាត​ឱ្យ​បើក​សម្រាប់​ការដឹកជញ្ជូន​ទំនិញ។

ធនាគារពិភពលោក World Bank បាន​និយាយ​នៅក្នុង​សេចក្តីប្រកាស​ព័ត៌មាន​មួយ​ថា ក្រុមប្រឹក្សា​ប្រតិបត្តិ​របស់​ធនាគារពិភពលោក កាលពី​សប្តាហ៍​មុន​បានអនុម័ត​ថវិកា​ចំនួន៤០លាន​ដុល្លារ​អាមេរិក សម្រាប់​ការផ្តល់​ហិរញ្ញប្បទាន​បន្ទាន់​សម្រាប់​អាជីវកម្ម​ធុន​តូច និង​មធ្យម នៅក្នុង​ប្រទេស​ឡាវ ដើម្បី​ជួយ​ពួកគេ​ឱ្យ​រួច​ផុតពី​ផលប៉ះពាល់។ ថវិកា​នេះ​នឹងត្រូវ​បញ្ជូន តាមរយៈ​គម្រោង​ខ្នាតតូច និង​មធ្យម​របស់​សហគ្រាស​ធ​នាគារ​ពិភពលោក ដើម្បី​ទទួលបាន​ជំនួយ​គាំទ្រ​និង​ស្តារឡើងវិញ នូវ​គ្រាអាសន្ន​ហិរញ្ញវត្ថុ ដែល​នឹង​ធ្វើការ​ជាមួយ​ក្រសួង​ឧស្សាហកម្ម និង​ពាណិជ្ជកម្ម​និង​ស្ថាប័នហិរញ្ញវត្ថុ ក្នុងស្រុក​ផ្តល់​ឥណទាន​ដល់​អាជីវកម្ម​ខ្នាតតូច ដែល​កំពុង​តស៊ូ ដើម្បី​ដោះស្រាយ​ជាមួយនឹង​ការធ្លាក់ចុះ​នៃ​សេដ្ឋកិច្ច។

ក្រុមហ៊ុនតូចៗ នឹងមាន​ឱកាស​ទទួល​បាន​ប្រាក់កម្ចី​ដើមទុន ដែល​អាច​ធ្វើការ​ទ្រទ្រង់​អាជីវកម្ម​របស់​ពួកគេ ដំណាក់កាល​ងើបឡើង​វិញ​ដំបូង ឬ​ប្រាក់កម្ចី​វិនិយោគ​សម្រាប់​ឧបករណ៍​ថ្មី​ឬ​ការពង្រីក​ទីតាំង។ សហគ្រាស​ធុន​តូច​សហគ្រាស​ធុន​តូច និង​មធ្យម​គឺជា​គ្រឹះ​នៃ​សេដ្ឋកិច្ច​ឡាវ​ដែល​ស្មើនឹង៨២ភាគរយ​នៃ​ការងារ​សរុប។

ជា​លទ្ធផល​ក្រុមហ៊ុន​ជាច្រើន​រំពឹងថា នឹង​បញ្ឈប់​បុគ្គលិក​របស់ខ្លួន​មួយ​ភាគ​ធំ ខណៈដែល​ពាក់កណ្តាល នៃ​អាជីវកម្ម​ទាំងអស់​បាន​រាយការណ៍​ថា ពួកគេ​នឹងត្រូវ​បិទ​ជា​អចិន្ត្រៃយ៍។

លោកស្រី Mariam Sherman នាយក​ធនាគារពិភពលោក​ប្រចាំ​ប្រទេស​មី​យ៉ាន់​ម៉ា កម្ពុជា និង​ឡាវ​បាន​មានប្រសាសន៍ថា “ គម្រោង​ថ្មី​នេះ នឹង​ជួយ​ក្រុមហ៊ុន SME ឱ្យ​ស្ថិតក្នុង​អាជីវកម្ម​ការពារ​ជីវភាព​របស់​និ​យោ​ជិ​ក និង​កាត់បន្ថយ​ការរំខាន​ដល់​សេដ្ឋកិច្ចសង្គម។ សកម្មភាព​ទាំងនេះ​ពង្រឹង​និង​បន្តការងារ ដែល​បាន​អនុវត្ត​ដោយ​គម្រោង ទទួលបាន​ហិរញ្ញប្បទាន​សហគ្រាស​ខ្នាតតូច និង​មធ្យម​ដែល​បាន​គាំទ្រ ដោយ​ជោគជ័យ​នូវ​ប្រា​ក់ក ម្ចី៕ The Star

អ្នកជំនាញ៖ រដ្ឋាភិបាល​មាន​ចក្ខុវិស័យ​ច្បាស់លាស់​ក្នុង​អភិវឌ្ឍន៍​ជាយក្រុង

ដោយ​វុត្ថា

ភ្នំពេញៈ អ្នកជំនាញ​មើលឃើញថា រាជរដ្ឋាភិបាល​នាពេល​បច្ចុប្បន្ននេះ មាន​ចក្ខុវិស័យ​ច្បាស់លាស់ ក្នុងការ​អភិវឌ្ឍន៍​នៅ​តាន​តំបន់​ជាយក្រុង ស្របតាម​ផែនការ​និង​ប្លង់គោល​ប្រើប្រាស់​ដី​ឆ្នាំ២០៣៥  ខណៈដែល​បច្ចុប្បន្ននេះ តំបន់​ជាយក្រុង​ភ្នំពេញ បាន​នឹង​កំពុងមាន​ការរីកចំរើន លើ​គម្រោង​អភិវឌ្ឍន៍​លំនៅឋាន បុរី និង​រោងចក្រ​សហគ្រាស​ជាច្រើន។

លោកស្រី ចេ​វ សុ​ឃុន ប្រធាន​សមាគម​អ្នកជំនាញ​អចលនទ្រព្យ​កម្ពុជា  បាន​ប្រាប់​គេហទំព័រ Propertyea.asia កាលពីពេលថ្មីៗនេះ​ថា រដ្ឋាភិបាល មាន​គោលការណ៍​របស់ខ្លួន​ក្នុង​អភិវឌ្ឍន៍ ជាយក្រុង​ឱ្យមាន​ការរីកចំរើន  ទាំង​ការអភិវឌ្ឍន៍​ប្រព័ន្ធ​ហេ​ដ្ឋា​រចនា​សម្ព័​ន្ធ ដោយ​មិន​មានការ​ទុកចោល​នោះទេ ។

លោកស្រី​ថ្លែងថា “រដ្ឋាភិបាល ក៏ដូចជា​ស្ថាប័ន​ពាក់ព័ន្ធ បានដាក់​ចេញ​ផែនការអភិវឌ្ឍន៍​ដែល​នៅ​កៀក​នឹង​ទីក្រុង​បំផុត ដែលមាន​ចំងាយ​ប្រមាណ២០គីឡូ ឬ១៥ គីឡូ​ពី​កណ្តាល​ក្រុង” ។ លោកស្រី​បន្តថា “រដ្ឋាភិបាល​បាននិងកំពុង​កសាង​នូវ​ប្រព័ន្ធ​ហេដ្ឋារចនាសម្ព័ន្ធ ដើម្បី​ឱ្យមាន​ផ្លូវ​ខ្វាត់ខ្វែង ក្នុងការ​សម្រួល​ដល់​ចរាចរណ៍​ចេញចូល​បាន និង​មួយទៀត​ធ្វើឱ្យ​ក្រុមហ៊ុន​អាចធ្វើ​ការផ្លាស់​ទី​មាន​ភាពងាយស្រួល” ។

លោកស្រី​បន្ថែមថា ការអភិវឌ្ឍន៍​នៅតាម​ជាយក្រុង  បើទោះបីជា​មិនទាន់​ល្អ​ដូច​នៅ​កណ្តាល​ក្រុង ដែលមាន​អគារ​ពាណិជ្ជកម្ម និង​ទំនាក់ទំនង​សេដ្ឋកិច្ច ពាណិជ្ជកម្ម ប៉ុន្តែ​សម្រាប់​ជាយក្រុង​ក៏មាន​ដូចគ្នា​ផងដែរ ដោយសារតែ​រដ្ឋាភិបាល​បាន​យកចិត្តទុកដាក់​ក្នុង​អភិវឌ្ឍន៍ ដើម្បីឱ្យ​ជីវភាព​របស់​ប្រជាជន​កាន់តែ​ប្រសើរ​ដូច​នៅ​ណ្តា​ល​ក្រុង។

លោកស្រី​បញ្ជាក់ទៀតថា “យ៉ាងណាក៏ដោយ យើង​មើលឃើញថា ការអភិវឌ្ឍន៍​របស់​រាជរដ្ឋាភិបាល​មាន​គ្រប់​ទីកន្លែង មិន​ថា​ជាយក្រុង ឬ​កណ្តាល​ក្រុង​នោះទេ ដើម្បី​ធ្វើ​យ៉ាង​មិច​ឱ្យមាន​ចរន្ត​សេដ្ឋកិច្ច និង​ការធ្វើដំណើរ​របស់​ប្រជាពលរដ្ឋ ចេញចូល​កាន់តែ​ល្អប្រសើរ” ។

ជាមួយគ្នានេះ អគ្គនាយក​ក្រុមហ៊ុន​អចលនទ្រព្យ Khmer Foundation Appraisal  លោក​ឧកញ៉ា នួន រិទ្ធី  ធ្លាប់បាន​ឱ្យដឹងថា នៅ​តំបន់​ជាយក្រុង​មិន​ថា តំបន់​ណា ឬ​ទីកន្លែង​ណា​នោះទេ គឺមាន​ការ​កា​រីកចំរើន​ទាំង​ហេដ្ឋារចនាសម្ព័ន្ធ និង​ការអភិវឌ្ឍន៍​លើ​វិស័យ​សំណង់​ផ្សេង ៗ ព្រោះ​នៅពេល​តំបន់​កណ្តា​ក​ក្រុង កាន់តែ​មានការ​អភិវឌ្ឍ មនុស្ស​ចូលមក​ធ្វើ​ពាណិជ្ជកម្ម ឬ​ជំនួញ​កាន់តែច្រើន វា​នឹង​ធ្វើឱ្យ​ក្រុង​កាន់តែ​ពង្រីក​វិសាលភាព​របស់ខ្លួន។

លោក​ឧកញ៉ា​បន្តទៀតថា“នៅពេល​ក្រុង​កាន់តែ​ពង្រីក​វិសាលភាព ឱ្យ​កាន់តែ​ទូលាយ នោះ​តំបន់​ជាយក្រុង​នឹងមាន​តម្រូវការ​អភិ​វ​ឌ្ឈ។ លោក​ឧកញ៉ា​បន្ថែមទៀត​ថា “ដោយសារ​ការអភិវឌ្ឍ​មាន​សន្ទុះ​យ៉ាង​លឿន បាន​ជម្រុញ​តម្លៃ​ដី​នៅ​តំបន់​ជាយក្រុង ពិសេស​មានការ​កើនឡើង” ។

លោក ម៉េ​ត មាស​ភក្តី អ្នកនាំពាក្យ​រដ្ឋបាល​រាជធានី​ភ្នំពេញ​ឱ្យដឹង​ដែរ​ថា ការអភិវឌ្ឍ​រាជធានី​ភ្នំពេញ កំពុង​ដើរ​តាម​ផែនការមេ នៃ​ប្លង់គោល​អភិវឌ្ឍន៍​ក្រុង​ឆ្នាំ២០១៥ ២០៣០ ដែល​រាជរដ្ឋាភិបាល​បានអនុម័ត ហេតុនេះ​គំរោង​វិនិយោគ​នានា​ទាំង​របស់​រដ្ឋាភិបាល និង​របស់​វិស័យ​ឯកជន​ត្រូវតែដើរ​តាម​ផែនការមេ ដែល​បាន​ដាក់ចេញ ។

លោក​បន្តថា “តំបន់​មួយចំនួន​នៅតាម​ជាយក្រុង  ដូចជា​ភាគខាងត្បូង​រាជធានី រដ្ឋបាល​រាជធានី​ភ្នំពេញ បានរៀបចំ​ហេ​ដ្ឋា​រចនា​ស​ម្ព័​ន្ឋ ដើម្បី​ជំរុញ​ឱ្យ​ការអភិវឌ្ឍ​តំបន់​នេះ​ធ្វើឡើង​ប្រកបដោយ​ចីរភាព និង​ឆ្លើយតប​កំនើន​រីកចម្រើន​យ៉ាង​ឆាប់រហ័ស” ៕

អ្នកជំនាញ៖ គ្រប់​គម្រោង​វិនិយោគ និង​អភិវឌ្ឍន៍​សំណង់​អគារ​ពាណិជ្ជកម្ម​នានា​ចាំបាច់គួរតែ​សហការ​ជាមួយ​ភ្នាក់ងារ​ជំនាញ

ដោយៈ រ៉ា​ណេ​ត

ភ្នំពេញៈ គ្រប់​គម្រោង​វិនិយោគ និង​អភិវឌ្ឍន៍​ក្នុង​វិស័យ​សំណង់​នានា ជាពិសេស​អគារ​ដែល​បម្រើ​ដល់​វិស័យ​ពាណិជ្ជកម្ម អគារ​ខុន​ដូ ក៏ដូចជា​លំនៅដ្ឋាន គឺ​សុទ្ធតែ​ត្រូវការ​សហការ​យ៉ាង​ជិតស្និទ្ធ ជាមួយ​ក្រុមហ៊ុន​ភ្នាក់ងារ ដើម្បី​អាច​ទទួលបាន​លទ្ធផល​ខ្ពស់ និង​ភាពជោគជ័យ​របស់​គម្រោង។ នេះ​បើតាម​ការអះអាង​ពី​សំណាក់​លោក​ខន គង្គា អគ្គនាយក​ក្រុមហ៊ុន​ភ្នាក់ងារ​អចលនទ្រព្យ​អន្តរជាតិ ERA Cambodia ។

លោក​ខន គង្គា បាន​មានប្រសាសន៍​នៅ​ល្ងាច​ថ្ងៃទី២៧ ខែតុលា ឆ្នាំ២០២០កន្លងមក​ថា ប្រសិនបើ​គម្រោង​អភិវឌ្ឍន៍​ដែលមាន​ទ្រង់ទ្រាយ​តូច អាច​មិនចាំបាច់​ត្រូវការ​សេវា​ពី​ក្រុមហ៊ុន​ភ្នាក់ងារ ក្នុងការ​ជំរុញ​ដល់​ការលក់​បាន ដែល​អ្នក​អភិវឌ្ឍន៍​ក៏​អាចមាន​លទ្ធភាព​គ្រប់គ្រាន់​ក្នុង​ការលក់​ដោយ​ខ្លួនឯង ប៉ុន្តែ​សម្រាប់​គម្រោង​វិនិយោគ និង​អភិវឌ្ឍន៍​ធំ​ដែលមាន​ទំហំ​ដើមទុន​រាប់សិប​លាន​ដុល្លារ គឺ​ចាំបាច់​ត្រូវតែ​សហការ ជាមួយ​ក្រុមហ៊ុន​ភ្នាក់ងារ​ជំនាញ។

លោក​បាន​បញ្ជាក់ថា “សម្រាប់​ក្រុមហ៊ុន ក៏ដូចជា​អ្នក​អភិវឌ្ឍន៍​គម្រោងធំៗ ចាំបាច់​ត្រូវតែ​សហការ​យ៉ាង​ជិតស្និទ្ធ ជា​ក្រុមហ៊ុន​ភ្នាក់ងារ​ដែលមាន​ជំនាញ និង​យល់ដឹង​ទូលំទូលាយ​នៅក្នុង​ទីផ្សារ​អចលនទ្រព្យ​រួម ជាពិសេស​មុនពេល​សម្រេចចិត្ត សហការ​ជាមួយ​ក្រុមហ៊ុន​ភ្នាក់ងារ​ណាមួយ អ្នក​អភិវឌ្ឍន៍​ក៏​ត្រូវតែ​សិក្សា និង​ស្វែងយល់​លម្អិត​ទៅ​ភាព​ជំនាញ និង​កេរ្តិ៍ឈ្មោះ​របស់​ក្រុមហ៊ុន​ភ្នាក់ងារ​ផងដែរ” ។

លោក​ខន គង្គា បាន​មានប្រសាសន៍ថា “ការសម្រេចចិត្ត​ជ្រើសរើស​ក្រុមហ៊ុន​ភ្នាក់ងារ​ជំនាញ​លក់​គម្រោង គឺជា​រឿង​សំខាន់បំផុត ព្រោះ​វា​ទាក់ទង​ទៅនឹង​ការវិនិយោគ​របស់​អ្នក​អភិវឌ្ឍន៍ ប្រសិនបើ​ជ្រើសរើស​ក្រុមហ៊ុន​ភ្នាក់ងារ​ជំនាញ​ដែល​ល្អ គម្រោង​នឹង​ជោគជ័យ​បាន​ឆាប់រហ័ស” ។ លោក​បន្ថែមថា “ប៉ុន្តែ​បើ​ប៉ះ​ក្រុមហ៊ុន​ភ្នាក់ងារ​មិនល្អ អាចធ្វើឱ្យ​មានការ​ខាតបង់​ច្រើន ដែល​ក្រៅពី​ចំណាយពេល​យូរ​ក្នុង​ការលក់ គាំង​លំហូរ​ចរន្ត​សាច់ប្រាក់​វិនិយោគ ហើយ​ថែមទាំង​ប៉ះពាល់​ដល់​កេរ្តិ៍​របស់​គម្រោង​ថែមទៀត” ។

លោក​បាន​បញ្ជាក់ទៀតថា ក្រុមហ៊ុន​ភ្នាក់ងារ​នៅលើ​ទីផ្សារ​កម្ពុជា អាចមាន​ច្រើនជាង៣០០ក្រុមហ៊ុន ដែល​ក្នុង​មាន​ទាំង​ក្រុមហ៊ុន​ជាតិ និង​អន្តរជាតិ ប៉ុន្តែ​ចំពោះ​ក្រុមហ៊ុន​ដែលមាន​ជំនាញ និង​លទ្ធភាព​ពិតប្រាកដ មានកេរ្តិ៍ឈ្មោះ​ល្បី ដែលមាន​ការទទួលស្គាល់​ជា​សាកល​គឺមាន​មិន​ច្រើន​នោះទេ។ ជា​បទពិសោធន៍ សម្រាប់​ក្រុមហ៊ុន​ភ្នាក់ងារ​អចលនទ្រព្យ​អន្តរជាតិ ERA Cambodia បានសម្រេច​នូវ​គម្រោង​ជាច្រើន​រួចមកហើយ ហើយក៏​បាន​កសាង​ទំនុកចិត្ត​ខ្ពស់ ដល់​អតិថិជន​ដែលជា​ក្រុមហ៊ុន និង​អ្នក​អភិវឌ្ឍន៍​ជាច្រើន​រួចមកហើយ​ផងដែរ” ៕

ស្ថាប័ន​ចំនួន​ពីរ​បាននិងកំពុង​ជម្រុញ​សហគ្រិនភាព​ដើម្បី​ជួយ​ឱ្យ​សេដ្ឋកិច្ច​រីកចម្រើន

ដោយ:គង់ សូរិយា

ភ្នំពេញ: ស្ថាប័ន​ចំនួន​ពីរ​គឺ Impact Hub Phnom Penh និង Swissconact បានរៀបចំ​សិក្ខាសាលា​ពិគ្រោះ​យោបល់​រួមគ្នា​មួយ ស្តីពី​ប្រព័ន្ធ​អេកូឡូស៊ី​សហគ្រិនភាព​នៅ​ភ្នំពេញ ដើម្បី​ផ្តល់ឱកាស​ដល់​ស្ថាប័ន​ពាក់ព័ន្ធ​ទាំងឡាយ ឱ្យ​យល់ច្បាស់​ពី​ស្ថានភាព​បច្ចុប្បន្ន​នៃ​ប្រព័ន្ធ​នេះ និង​ចូលរួម​ផ្តល់នូវ​ធាតុ​ចូល​បន្ថែម ដើម្បី​ជួយ​កែលម្អ​ចក្ខុវិស័យ​រួម​របស់​យើង​សម្រាប់​ថ្ងៃ​អនាគត។

លោក ខេ​វិ​ន រ៉​ប់​ប៊ី​នស៍ នាយករង Swissconact ប្រចាំ​កម្ពុជា​បាន​មានប្រសាសន៍  ឱ្យដឹងថា តាមរយៈ​ការងារ​នៅ​ទូទាំង​ពិភពលោក ស្វី​ស​ខន់​ថាក់ បាន​មើលឃើញ​ពី​សក្តានុពល​របស់​ភាព​ជា​សហគ្រិន ដែលជា​កម្លាំង​ដ៏​វិជ្ជមាន​មួយ សម្រាប់​ចូលរួម​ក្នុងការ​ផ្លាស់ប្តូរ​សេដ្ឋកិច្ច បរិស្ថាន និង​សង្គម។

លោក​បន្តថា “សិក្ខាសាលា​នេះ ជា​ឱកាស​មួយ ដើម្បី​ចូលរួម​ចែករំលែក​លទ្ធផល​ដំបូង​នៃ​ការសិក្សា ក៏ដូចជា​ធ្វើការ​ប្រមែប្រមូល​ធាតុ​ចូល និង​ចំណេះដឹងសំខាន់ៗបន្ថែមទៀត​ពី​អ្នកចូលរួម​ទាំងអស់ ដែល​ញ៉ាំងឱ្យ​លទ្ធផល​នៃ​ការសិក្សា​នេះ កាន់​តែមាន​សុក្រឹតភាព ដើម្បី​យកទៅ​ផលិត​ជា​របាយការណ៍​ចុងក្រោយ ដែល​នឹងត្រូវ​បានធ្វើការ​ផ្សព្វផ្សាយ​ជា​សាធារណៈ​នៅក្នុង​ខែវិច្ឆិកា​ខាងមុខ” ។

ជាមួយគ្នានេះ លោក ឈៀង វណ្ណ​មុនិ​ណ្ឌ នាយក​ប្រតិបត្តិ​នៃ​សហគ្រិន​ខ្មែរ​បាន​លើកឡើងថា ក្នុងនាម​ស្ថាប័ន​ប្រតិបត្តិ​ករ​មួយ ក្រោម​ការគាំទ្រ​របស់រ​បស់​ក្រសួង​សេដ្ឋកិច្ច​និង​ហិរញ្ញវត្ថុ សហគ្រិន​ខ្មែរ​មាន​ចក្ខុវិស័យ ក្លាយជា​ថ្នាល​ជាតិ​សម្រាប់​ការលើកកម្ពស់​គ្រប់​សកម្មភាព​របស់​រិ​ស័​យ​សហគ្រិនភាព​នៅ​កម្ពុជា។

លោក​បន្តថា “ការពិគ្រោះ​យោបល់​នៅក្នុង​សិក្ខាសាលា​ថ្ងៃនេះ ធ្វើឡើង​ដើម្បី​ស្វែងយល់​ពី​ទំនាក់ទំនង​ទាំងឡាយ នៅក្នុង​ប្រព័ន្ធ​អេកូឡូស៊ី​សហគ្រិនភាព របស់​សហគ្រិនភាព” ។

កាលពី​ខែមេសា​កន្លងទៅ Urban Hub Phnom Penh និង Swissconact បានធ្វើការ​សិក្សា​រួមមួយ​ដោយ​ប្រើប្រាស់ ឧបករណ៍​អង្កេត​វិភាគ​លើ​បណ្តាញ​សង្គម (Social Network Analysis Survey Tool) ក្នុងការ​ប្រមូល​ព័ត៌មាន​អំពី​អ្នកពាក់ព័ន្ធ និង​ស្ថាប័ន​ទាំងឡាយ ដែល​ធ្វើការ​ក្នុង​ប្រព័ន្ធ​អេកូឡូស៊ី សហគ្រិនភាព​នៅ​ភ្នំពេញ។ គម្រោង​នេះ​ជា​ផ្នែក​មួយ​នៃ​កម្មវិធី​សកល ដែល​ធ្វើឡើង​ក្នុង​គោលបំណង ដើម្បី​កំណត់​ឱ្យបាន​នូវ​ការអនុវត្តល្អៗ នៅក្នុង​ការលើកកម្ពស់​សហគ្រិនភាព និង​ការកសាង​ប្រព័ន្ធ​អេកូឡូស៊ី​សហគ្រិនភាព នៅក្នុង​ប្រទេស​ចំនួន៦ រួមមាន៖ប្រទេស​កម្ពុជា ហ្គា​តេ​ម៉ា​ឡា ពេ​រូ រ​វ៉ាន់ដា អ៊ូ​ហ្គា​ន់​ដា និង​ប្រទេស​វៀតណាម៕

កម្ពុជារកចំណូលបានជាង ២៧០លានដុល្លារ ពីការនាំចេញដំណាំកៅស៊ូ ក្នុងរយៈពេល ៩ខែ

ដោយ ហ្សូលី

ភ្នំពេញ៖ កម្ពុជាទទួលបានថវិកាបានសរុបជាង ២៧០លានដុល្លារ ពីការនាំចេញដំណាំកៅស៊ូ ក្នុងរយៈពេល ៩ខែ ឆ្នាំ ២០២០នេះ។ នេះបើយោងតាមរបាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៧ ខែតុលា ឆ្នាំ២០២០នេះ។

របាយការណ៍បានបញ្ជាក់ថា នៅរយៈពេល៩ខែ ឆ្នាំ២០២០នេះ កម្ពុជាបាននាំចេញជ័រកៅស៊ូបាន២០៩,៨១៩តោន កើនឡើង២១ភាគរយ បើធៀបនឹងរយៈពេលដូចគ្នាកាលពីឆ្នាំ២០១៩ កន្លងទៅ។

របាយការណ៍ដដែលបន្តថា ក្នុងរយៈពេល៩ខែមកនេះតម្លៃជ័រកៅស៊ូជាមធ្យមមានតម្លៃ ១,២៩២ដុល្លារក្នុង១តោន។

អគ្គនាយកដ្ឋានកៅស៊ូបានឲ្យដឹងទៀតថា បច្ចុប្បន្នកម្ពុជាមានផ្ទៃដីផលិតផលជ័រកៅស៊ូចំនួន ៤០២,៣១៣ហិកតា ក្នុងនោះផ្ទៃដីចៀរជ័រ ចំនួន២៩០,០០៧ហិកតា ស្មើនឹង៧២ភាគរយ និងផ្ទៃដីថែទាំមានចំនួន ១១២,៣០៦ហិកតាស្មើនឹង២៨ភាគរយ។ ជារួមចំណូលបានពីការនាំចេញជ័រកៅស៊ូ ៩ខែឆ្នាំ២០២០នេះ មានជាង២៧០លានដុល្លារអាមេរិក។

កាលពីឆ្នាំ២០១៩ កម្ពុជាបាននាំចេញជ័រកៅស៊ូជិត ៣០ម៉ឺនតោន ទទួលបានចំណូលជិត៤០០លានដុល្លារ។ ជ័រកៅស៊ូកម្ពុជា បាននាំចេញទៅកាន់ទីផ្សារក្រោប្រទេសជាច្រើនដូចជា ប្រទេសចិន វៀតណាម សង្ហឹបុរី និងម៉ាឡេស៊ី។

យោងតាម អ្នកជំនាញ ក្នុង វិស័យ កៅស៊ូ បានឱ្យដឹងថា តម្លៃជ័រកៅស៊ូកំពុងហក់ឡើងខ្ពស់គួរឱ្យកត់សម្គាល់ចាប់ពីដើមខែតុលានេះ ដោយសារតែតម្រូវការវត្ថុធាតុដើម ក្នុងវិស័យឧស្សាហកម្មដែលងើបឡើងវិញ ក្រោយភាពយឺតយ៉ាវបង្កឡើងដោយការឆ្លងរាតត្បាតជំងឺកូវីដ ១៩ ស្របជាមួយប្រទេសផលិតជ័រកៅស៊ូជាច្រើនកំពុងរងគ្រោះដោយសារទឹកជំនន់៕

ខេត្តមណ្ឌលគិរីបើកដំណើរការ «ផ្សារចុងសប្តាហ៍» ក្នុងគោលបំណងលើកស្ទួយសេដ្ឋកិច្ចប្រជាពលរដ្ឋ

ដោយ ៖ ហ្សូលី

មណ្ឌលគិរី ៖ មន្ទីរពាណិជ្ជកម្មខេត្តមណ្ឌលគិរីបានបើកដំណើរការផ្សារចុងសប្តាហ៍ខ្នាតតូច ក្នុងគោលបំណងជម្រុញផលិតផលកសិផលរបស់ប្រជាពលរដ្ឋក្នុងតំបន់ ក៏ដូចជាលើកស្ទួយកម្រិតជីវភាព និងសេដ្ឋកិច្ចរបស់ប្រជាពលរដ្ឋទូទាំងខេត្ត។

ផ្សារនេះមានចំនួន ២០ ស្តង់ ដាក់លក់នូវប្រភេទកសិផលសុវត្ថិភាព រួមមានត្រីសាច់ បន្លែ ផ្លែឈើគ្រប់មុខ នៅ រៀងរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង០៦ ព្រឹក ដល់ ម៉ោង០៦ ល្ងាច ស្ថិតនៅទីតាំងសួនច្បារសែនមនោរម្យ ក្បែររូបសំណាកដំរីដែក។

អភិបាលរងខេត្តមណ្ឌលគិរី លោក ជាក់ ម៉េងហ៊ាង បានឱ្យដឹងថា ផ្សារចុងសប្ដាហ៍នេះនឹងបើកទូលាយ អនុញ្ញាតឱ្យប្រជាកសិករយកកសិផលទៅលក់នៅលើទីផ្សាររៀងរាល់ចុងសប្តាហ៍ ។ ជាមួយគ្នានេះ លោកក៏បានជំរុញ និងលើកទឹកចិត្តប្រជាកសិករឱ្យខិតខំថែមទៀតដើម្បីបានចំណូលបន្ថែម សម្រាប់លើកស្ទួយ ជីវភាពគ្រួសារ និងផ្គត់ផ្គង់តម្រូវការទីផ្សារឱ្យមាននិរន្តរភាព ។

លោក លឹម ស្រេង ប្រធានមន្ទីរពាណិជ្ជកម្មខេត្តមណ្ឌលគិរីបានឱ្យដឹងថា ការបើកដំណើរការផ្សារចុងសប្ដាហ៍ នេះ ក្នុងគោលបំណង ដើម្បីលើកកម្ពស់តម្លៃកសិផលក្នុងស្រុកនៅលើទីផ្សារ និងបង្កើនប្រាក់ចំណូលដល់ប្រជាកសិករខ្នាតតូចក្នុងមូលដ្ឋាន និងជួយផ្សព្វផ្សាយពីផលិតផលកសិកម្មផលិតដោយប្រជាសហគមន៍កសិកម្ម និង សហគ្រាសនានាដែលគាំទ្រដោយគម្រោងជំរុញទីផ្សារកសិកម្មខ្នាតតូច។

លោកបានបន្ថែមថា ផ្សារចុងសប្តាហ៍នេះមិនត្រឹមតែផ្ដល់ប្រាក់ចំណូលប៉ុណ្ណោះទេ តែក៏ជាកន្លែងសម្រាប់ឱ្យ អ្នកប្រើប្រាស់បានទិញផលិតផលដែលមានប្រភពច្បាស់លាស់។ មន្ទីរពាណិជ្ជកម្មបានសហការជាមួយមន្ទីរ កសិកម្មខេត្តរាល់កសិផលដែលយកមកលក់ សុទ្ធតែមានបិទតែមសម្គាល់ចៀសវាងការនាំយកផលិតផលពី ខាងក្រៅខេត្តមកលក់៕

រដ្ឋាភិបាលអនុម័តគម្រោងបង្កើតរោងចក្រចំនួន ៣ មានទុនវិនិយោគជាង ១២ លានដុល្លារ

ដោយវុត្ថា

ភ្នំពេញ៖ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា  (CDC)បានអនុម័តគម្រោងវិនិយោគបង្កើតរោងចក្រចំនួន ៣  ដែលមានទុនវិនិយោគប្រមាណ ១២,៤៤ លានដុល្លារអាមេរិក នៅក្នុងខេត្តក្រចេះចំនួន ២និងខេតព្រះសីហនុចំនួន ២ ដែលនឹងផ្តល់ឱកាសការងារជូនពលរដ្ឋជាច្រើនរយកន្លែង។

តាមសំណើសុំវិនិយោគរបស់ក្រុមហ៊ុន គណ:កម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី ២៧ ខែតុលាឆ្នាំ ២០២០នេះ  បានសម្រេចចេញ “វិញ្ញាបនបត្រចុះបញ្ជីជាស្ថាពរ” ជូនដល់ក្រុមហ៊ុនដូចខាងក្រោម៖

១- ក្រុមហ៊ុន Southeast Asia Paint Chemical Industry Co., Ltd.: គម្រោងបង្កើតរោងចក្រផលិតថ្នាំលាប កាវទឹក និងសារធាតុរំលាយ,  មានទីតាំងស្ថិតនៅក្នុងតំបន់សេដ្ឋកិច្ចពិសេស ហាយផាក ខេត្តស្វាយរៀង, មានទុនវិនិយោគចំនួន ៥០០ពាន់ដុល្លារអាមេរិក និងអាចបង្កើតការងារបានចំនួន ៧០កន្លែង។

២- ក្រុមហ៊ុន Ying Hai Coating (Cambodia) Co., Ltd.: គម្រោងបង្កើតរោងចក្រផលិតសម្ភារ:បរិក្ខារទោចក្រយាន ទឹកថ្នាំ បោះពុម្ភតែម និងសម្ភារ:វេចខ្ចប់, មានទីតាំងស្ថិតនៅក្នុងតំបន់សេដ្ឋកិច្ចពិសេស តាយសេង បាវិត ខេត្តស្វាយរៀង, មានទុនវិនិយោគចំនួន ១,៩៤លានដុល្លារអាមេរិក និងអាចបង្កើតការងារបានចំនួន ១៣០កន្លែង។

៣- ក្រុមហ៊ុន Flying Feather (Cambodia) Wood Industry  Co., Ltd.: គម្រោងបង្កើតរោងចក្រផលិតស៊ុមទ្វារ គ្រឿងបំណែកគ្រឿងសង្ហារឹម និងសម្ភារ:តុបតែងធ្វើពីឈើ, មានទីតាំងស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ, មានទុនវិនិយោគចំនួន ១០លានដុល្លារអាមេរិក និងអាចបង្កើតការងារបានចំនួន ១៨០កន្លែង៕

ក្រុមហ៊ុនចិនដ៏ធំមួយគ្រោងឈានជើងវិនិយោគលើវិស័យអាកាសចរណ៍នៅកម្ពុជា

ដោយ ហ្សូលី

ភ្នំពេញ៖ ក្រុមហ៊ុនអាកាសចរណ៍របស់ចិនដ៏ធំ និងមានកេរ្តិ៍ឈ្មោះល្បីមួួយគ្រោងចូលខ្លួនមកវិនិយោគនៅក្នុងប្រទេសកម្ពុជា ដោយសម្លឹងឃើញពីសក្តានុពលលើវិស័យអាកាសចរណ៍ និងការអភិវឌ្ឍយ៉ាងឆាប់រហ័សរបស់កម្ពុជា។

នេះបើយោងតាមការឱ្យដឹងក្នុងជំនួបរវាងលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងលោក Ted Chen អ្នកចាត់ការទូទៅក្រុមហ៊ុន អេវីក នៅព្រឹកថ្ងៃទី២៧ ខែតុលា ឆ្នាំ២០២០។

ក្រុមហ៊ុនអន្តរជាតិចិន ឈ្មោះ អេវីក (AVIC INTERNATIONAL HOLDING CORPORATION) គ្រោងមកបណ្តាក់ទុនវិនិយោគលើវិស័យអាកាសចរណ៍នៅក្នុងប្រទេសកម្ពុជា ដោយតំណាងក្រុមហ៊ុននេះ កំពុងពិនិត្យលទ្ធភាពតាមផ្លូវច្បាប់ដែលក្រុមហ៊ុនមានលទ្ធភាពអាចទទួលយកបាន។

លោក Ted Chen បានលើកឡើងពីគោលបំណងស្វែងយល់ពីលទ្ធភាពនៃកិច្ចសហប្រតិបត្តិការរវាងក្រុមហ៊ុន ជាមួយរដ្ឋលេខាធិការដ្ឋានអាកាសចរណ៍ស៊ីវិល និងពិនិត្យលទ្ធភាពរួមទាំងសក្តានុពលដែលអាចឱ្យក្រុមហ៊ុនធ្វើការវិនិយោគ ឬធ្វើជាដៃគូអភិវឌ្ឍន៍លើវិស័យអាកាសចរណ៍ស៊ីវិល។ ជាពិសេស ពិនិត្យមើលកិច្ចពាក់ព័ន្ធនឹងការបណ្តុះបណ្តាលធនធានមនុស្សតាមលទ្ធភាពដែលក្រុមហ៊ុនអាចជួយបាន។

ជាការឆ្លើយតប លោកបណ្ឌិត ម៉ៅ ហាវណ្ណាល់ បានស្វាគមន៍ចំពោះសំណើរបស់ក្រុមហ៊ុនក្នុងកិច្ចសហប្រតិបត្តិការ ជំរុញឱ្យមានការវិនិយោគលើវិស័យអាកាសចរណ៍ស៊ីវិលទៅតាមលទ្ធភាពដែលក្រុមហ៊ុនអាចធ្វើបាន និងស្នើដល់ក្រុមហ៊ុនពិនិត្យលទ្ធភាពផ្តល់ជំនួយបច្ចេកទេសសម្រាប់ការបណ្តុះបណ្តាលធនធានមនុស្សលើវិស័យអាកាសចរណ៍ស៊ីវិលកម្ពុជា។

តំណាងក្រុមហ៊ុន បានទទួលយកសំណើរបស់លោករដ្ឋមន្ត្រី ទៅសិក្សា និងពិនិត្យលទ្ធភាពតាមផ្លូវច្បាប់ទៅតាមលទ្ធភាពរបស់ក្រុមហ៊ុនដ៏ធំមួយនេះ៕

រដ្ឋាភិបាលកំពុងរៀបចំគម្រោងធ្វើឱ្យប្រសើរឡើងនូវតាមច្រកព្រំដែនអន្តរជាតិ

ដោយ ៖ វុត្ថា

ភ្នំពេញ ៖ រាជរដ្ឋាភិបាលបាននឹងកំពុងរៀបចំសំណើគម្រោងធ្វើឱ្យប្រសើរឡើងនូវច្រកទ្វារព្រំដែនអន្តរជាតិ បាវិត-ម៉ុកបៃ ប៉ោយប៉ែត-អារញ្ញប្រាថេត ស្ទឹងបត់-បានណងអៀន និងព្រៃវល្លិ៍-ប៊ិញហៀប”  និងគម្រោងចំនួន៤៣ផ្សេងទៀត ដើម្បីអភិវឌ្ឍហេដ្ឋារចនាសម្ព័ន្ធរូបវន្តទាំងផ្នែកទន់ និងផ្នែករឹងនៅតាមច្រកព្រំដែនអន្តរជាតិនានា។

នេះបើយោងតាមកិច្ចប្រជុំក្រុមប្រឹក្សាជាតិភ័ស្តុភារកម្មលើកទី២ នៅថ្ងៃទី២៧ ខែតុលា ឆ្នាំ២០២០នេះ ក្រោមអធិបតីភាព លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិភ័ស្តុភារកម្ម ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា ចំពោះការរៀបចំគម្រោងធ្វើឱ្យប្រសើរឡើងនូវចក្រទ្វារព្រំដែនអន្តរជាតិបាវិត-ម៉ុកបៃ ប៉ោយប៉ែត-អារញ្ញប្រាថេត ស្ទឹងបត់-បានណងអៀន និងព្រៃវល្លិ៍-ប៊ិញហៀប” កំពុងមានវឌ្ឍនភាព ខណៈច្រកទ្វារព្រំដែនអន្តរជាតិព្រៃវល្លិ៍-ប៊ិញហៀប (កម្ពុជា-វៀតណាម) ត្រូវបានសាងសង់អគាររដ្ឋបាលរួចរាល់ ព្រមទាំងបានដាក់ឱ្យដំណើរការបណ្ដោះអាសន្នផងដែរ។

លោកបន្តថា “ក្រសួងបានសហការជាមួយស្ថាប័នពាក់ព័ន្ធសិក្សា និងរៀបចំគម្រោងចំនួន៤៣ ដើម្បីអភិវឌ្ឍហេដ្ឋារចនាសម្ព័ន្ធរូបវន្តទាំងផ្នែកទន់ និងផ្នែករឹង នៅតាមច្រកទ្វារអន្តរជាតិ ក្នុងទិសដៅកាត់បន្ថយភាពស្មុគស្មាញ និងការកកស្ទះចរាចរណ៍នៅតំបន់នោះ ដែលនាំឱ្យរំខានដល់សង្វាក់ពាណិជ្ជកម្មរបស់ពាណិជ្ជករ”។

ពាក់ព័ន្ធនឹងការរៀបចំអភិវឌ្ឍន៍មជ្ឈមណ្ឌលភ័ស្តុភារកម្ម លោក ស៊ុន ចាន់ថុល ថ្លែងថា កិច្ចព្រមព្រៀងក្របខណ្ឌរវាងក្រសួងសាធារណការ និងដឹកជញ្ជូនជាមួយក្រុមហ៊ុន YCH ក្នុងការអភិវឌ្ឍមជ្ឈមណ្ឌលភ័ស្តុភារកម្មភ្នំពេញ ត្រូវបានរៀបចំជាសេចក្ដីព្រាងរួចរាល់ ហើយដែល នឹងត្រូវកែសម្រួលឡើងវិញបន្ទាប់ពីទទួលបានធាតុចូលបន្ថែមទៀតពីអង្គប្រជុំ ធ្វើយ៉ាងណាឱ្យកិច្ចព្រមព្រៀងនេះមានខ្លឹមសារ និងវិសាលភាពឆ្លើយតបទៅនឹងកម្មវត្ថុនៃកិច្ចព្រមព្រៀង ព្រមទាំងផ្ដល់ប្រយោជន៍ដល់ជាតិមាតុភូមិ។

លោកបញ្ជាក់ថា ការអភិវឌ្ឍមជ្ឈមណ្ឌលភ័ស្តុភារកម្មភ្នំពេញធ្វើឡើង ស្របតាមផែនការមេភ័ស្តុភារកម្មកម្ពុជា ទាក់ទងនឹងការប្រែក្លាយកម្ពុជាទៅជាមជ្ឈមណ្ឌលភ័ស្តុភារកម្មក្នុងតំបន់ បម្រើឱ្យការដឹកជញ្ជូនឆ្លងកាត់ព្រំដែនរវាងប្រទេសថៃ កម្ពុជា  វៀតណាម ភូមា និងឡាវជាដើម និងរួមចំណែកយ៉ាងសកម្មក្នុងលើសកម្ពស់ការប្រកួតប្រជែងលើវិស័យដឹកជញ្ជូនជាមួយប្រទេសក្នុងតំបន់ បង្កើតការងារ លើកកម្ពស់ជីវភាពគ្រួសារ និងសេដ្ឋកិច្ចជាតិផងដែរ។

លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រក្រសួងសេដ្ឋកិច្ច និងហិរញ្ញវត្ថុ បានសារទរចំពោះការខិតខំប្រឹងប្រែងទាំងនេះ ព្រមទាំងបានណែនាំស្ថាប័នទទួលបន្ទុការងារនេះ សិក្សាពីតម្រូវការចាំបាច់របស់ក្រុមហ៊ុន YCH ថាតើក្រុមហ៊ុននេះមានតម្រូវការអ្វីខ្លះដើម្បីអភិវឌ្ឍមជ្ឈមណ្ឌលនេះ ហើយរាជរដ្ឋាភិបានមានលទ្ធភាពដោះស្រាយបានប៉ុនណា  ដើម្បីជួយជំរុញឱ្យគម្រោងនេះកាន់តែមានវឌ្ឍនភាពឆ្ពោះទៅមុខ។

លោកបន្តថា ការជ្រើសរើសគំរូអាជីវកម្ម បែបណានោះ នឹងធ្វើឡើងបន្ទាប់ពីការសិក្សាសមិទ្ធិលទ្ធភាព (Feasibility Study) ព្រោះលទ្ធផលនៃការសិក្សានេះ គឺជាគន្លឺះ និងទឡ្ហីករណ៍ដ៏សំខាន់ ក្នុងការជ្រើសរើសប្រភេទគំរូអាជីវកម្មនៃគម្រោងនេះ។

ដោយឡែកទាក់ទងនឹងគម្រោងធ្វើឱ្យប្រសើរឡើងច្រកទ្វារព្រំដែនអន្តរជាតិកម្ពុជា-ថៃ និងកម្ពុជា-វៀតណាម លោកឧបនាយករដ្ឋមន្ត្រី បានមានប្រសាសន៍ថា គម្រោងបន្ទាន់ត្រូវតែអនុវត្តឱ្យមានប្រសិទ្ធភាពបំផុត និងឱ្យបានទាន់ពេលវេលា។ លោកបន្ថែមថា ចំណែកឯ គម្រោងសម្រាប់រយៈពេលខ្លី និងមធ្យម បានផ្ដល់គោលការណ៍ឱ្យសិក្សាឱ្យកាន់តែលម្អិតបន្ថែមទៀត៕

អ្នកអភិវឌ្ឍន៍អះអាងពីគុណភាពសំណង់នៅក្នុងរដូវវស្សាកាន់តែមានភាពរឹងមាំ

ដោយ ៖ រ៉ាណេត

ភ្នំពេញ ៖ ផ្ទុយពីការលើកឡើងដែលបង្ហាញក្ដីព្រួយបារម្ភរបស់អតិថិជនមួយចំនួនទៅលើគុណភាពសំណង់ក្រោយការជួបគ្រោះជំនន់នៅតាមបណ្តាការដ្ឋានសាងសង់លំនៅដ្ឋាន ជាពិសេសនៅតំបន់ជាយរាជធានីភ្នំពេញដែលកំពុងបន្តជន់លិចនោះ អ្នកអភិវឌ្ឍន៍នៅក្នុងវិស័យនេះបានអះអាងថា មិនមានការប៉ះពាល់ទៅលើគុណភាពសំណង់នោះទេ ប៉ុន្តែវាបានបង្កើនភាពរឹងមាំនៃសំណង់កាន់តែល្អ។

អគ្គនាយកក្រុមហ៊ុន PREMIUM Group លោក ម៉ាន់ ច័ន្ទឌី ដែលជាអ្នកអភិវឌ្ឍន៍ក្នុងវិស័យលំនៅដ្ឋាននៅតំបន់ជាយក្រុងមួយរូបបានអះអាងនៅរសៀលថ្ងៃទី២៧ ខែតុលា ឆ្នាំ២០២០នេះថា ចំពោះបញ្ហាដែលអតិថិជនបានលើកឡើងខាងលើនេះ វាមិនមែនជាក្ដីកង្វល់ ឬជះឥទ្ធិពលអាក្រក់ដល់គុណភាពសំណង់នោះទេ។ ផ្ទុយទៅវិញ មានតែជួយបង្កើននូវគុណភាពគ្រឹះសំណង់ឱ្យកាន់តែរឹងមាំ។

លោក ម៉ាន់ ច័ន្ទឌី បានមានប្រសាសន៍ថា “ការជន់លិចនេះមិនមែនជាបញ្ហាធំដុំនោះទេ ព្រោះវាគ្រាន់តែជាព្រឹត្តិការណ៍ដែលកើតមានក្នុងរយៈពេលខ្លីតែប៉ុណ្ណោះ។ ជាក់ស្ដែង គិតត្រឹមថ្ងៃទី២៧ ខែតុលា ឆ្នាំ២០២០នេះ នៅតាមតំបន់មួយចំនួនបានស្រកទៅវិញជាបណ្តើរៗហើយ”។ លោកបន្តថា “ពាក់ព័ន្ធទៅនឹងក្ដីព្រួយបារម្ភទៅលើគុណភាពសំណង់ រឹតតែមិនគួរឱ្យគិត ផ្ទុយទៅវិញគឺមានតែជួយបង្កើននូវគុណភាពសំណង់ឱ្យកាន់តែរឹងមាំ ជាពិសេសគ្រឹះសំណង់ ដោយសារមានភាពឆ្អែតនឹងទឹក ដីកាន់តែហាប់ណែន”។

លោកបានបញ្ជាក់ថា “ការសាងសង់នៅតែបន្តសកម្មភាព លើកលែងតែជាប្រភេទការងារបេតុង ដែលត្រូវបានផ្អាកជាបណ្តោះអាសន្នដោយសារកត្តាអាកាសធាតុ ព្រោះការចាក់បេតុងមិនត្រូវធ្វើពេលមានភ្លៀងធ្លាក់ខ្លាំងនោះទេ។ អតិថិជនមិនមានការខាតបង់នោះទេ ផ្ទុយទៅវិញអ្នកខាតបង់អាចជាអ្នកអភិវឌ្ឍន៍ដោយសារការអូសបន្លាយពេលវេលាក្នុងការសាងសង់។ ប៉ុន្តែទោះជាយ៉ាងណា ខ្ញុំនៅតែបញ្ជាក់ថា កត្តាទាំងអស់នេះមិនមែនជាបញ្ហាធំសម្រាប់សំណង់លំនៅដ្ឋាននោះទេ ដោយឡែកទាំងការសាងសង់ ទាំងការលក់ គឺនៅតែបន្តរក្សាបាននូវស្ថានភាពល្អដដែល គ្មានការប្រែប្រួលនោះទេ”។