ខេត្តកំពង់ស្ពឺបាននឹងកំពុងទាក់ទាញលើគម្រោងអភិវឌ្ឍន៍វិស័យអចលនទ្រព្យច្រើន

ដោយវុត្ថា

ភ្នំពេញ៖ បើទោះបីខេត្តក្រុងមួយចំនួនរបស់កម្ពុជាបានធ្លាក់ចុះនៃការអភិវឌ្ឍន៍លើវិស័យអចលនទ្រព្យដែលបង្កឡើងដោយវិបត្តិសេដ្ឋកិច្ចសកលយ៉ាងណាក្តី    ប៉ុន្តែសម្រាប់ខេត្តកំពង់ស្ពឺវិញ គឺមិនថយចុះនៃការអភិវឌ្ឍន៍លើវិស័យអចលនទ្រព្យឡើយ ដោយទទួលបានការទាក់ទាញគម្រោងវិនិយោគលើវិស័យអចលនទ្រព្យជាច្រើនពីអ្នកអភិវឌ្ឍន៍។

លោក ម៉ន សុខា ប្រធានសមាគមអ្នកអភិវឌ្ឍន៍ដីឡូត៍កម្ពុជា នៅក្នុងកិច្ចសម្ភាសជាមួយគេហទំព័រ propertyarea.asia កាលពីពេលថ្មីនេះថា ខេត្តកំពង់ស្ពឺ បានទាក់ទាញគម្រោងអភិវឌ្ឍន៍លើវិស័យអចលនទ្រព្យជាច្រើន ទាំងតូច ទាំងធំ ពីវិនិយោគិនជាតិ និងអ្នកអភិវឌ្ឍន៍នៅក្នុងវិបត្តិនេះ។

លោកថ្លែងថា “យើងឃើញមានគម្រោងអភិវឌ្ឍន៍ធំជាច្រើនរួមមាន៖ គម្រោងអភិវឌ្ឍន៍សួនឧស្សាហកម្មកាណាឌីយ៉ា ដែលមានផ្ទៃដីរាប់រយហិកតា គម្រោងអគារ និងគួបផ្សំជាមួយនឹងប្រព័ន្ធហេដ្ឋារចនាសម្ព័ន្ធនៅក្នុងខេត្តមួយនេះមានស្ថានភាពធំទូលាយ និងស្ថាបនាបានច្រើនខ្សែ ដែលទាំងនេះ បានធ្វើឱ្យខេត្តកំពុងមានការចាប់អារម្មណ៍យ៉ាងខ្លាំង”។

លោកបន្តថា “ម្យ៉ាងទៀត យើងក៏ឃើញមានក្រុមហ៊ុនធំៗជាច្រើន  បានចាប់អារម្មណ៍សាងសង់លើអគារខ្ពស់ៗ  តំបន់សេដ្ឋកិច្ចពិសេស តំបន់លំហែរហែកាយ នៅក្នុងខេត្តកំពង់ស្ពឺតាមរយៈការណែនាំពីអភិបាលខេត្ត ឯកឧត្តម វុី សំណាង ឱ្យមកវិនិយោគនៅក្នុងខេត្ត”។

លោកបន្ថែមថា “និយាយជារួម ខេត្តកំពង់ស្ពឺ មានការចាប់អារម្មណ៍ខ្លាំងមែនពីអ្នកវិនិយោគក្នុងស្រុក និងក្រៅស្រុក និងម្យ៉ាងទៀតខេត្តនេះ ក៏មានដង់ស៊ីតេប្រជាពលរដ្ឋរស់នៅច្រើន និងមានកម្មករកម្មការិនីបំរើការនៅក្នុងរោងចក្រច្រើន បើធៀបជាមួយនឹងបណ្តាខេត្តមួយចំនួនរបស់កម្ពុជា”។

លោក វុី សំណាង អភិបាលខេត្តកំពង់ស្ពឺ បានឱ្យដឹងដែរថា វិនិយោគិនជាតិ និងអន្តរជាតិ បានចាប់អារម្មណ៍ចំពោះការវិនិយោគក្នុងខេត្តកំពង់ស្ពឺ ខណៈដែលខេត្តមួយនេះ បាននឹងកំពុងមានសក្តានុពលខ្ពស់ក្នុងការវិនិយោគ។

លោកបន្តថា “វិនិយោគិនបានចាប់អារម្មណ៍លើការវិនិយោគជាច្រើនទីតាំងនៅក្នុងខេត្តកំពង់ស្ពឺ ជាពិសេសទីតាំងចំនួន ៣ ដែលមានការចាប់អារម្មណ៍ខ្លាំង គឺ នៅតាមបណ្តោយជាតិលេខ៤៤ ផ្លូវជាតិ ៥១ និងផ្លូវជាតិ ៤១ ដែលជាផ្លូវជាតិដ៏មានសក្តានុពលក្នុងការវិនិយោគ និងមានសេដ្ឋកិច្ចល្អ”។

លោកបញ្ជាក់ទៀតថា “រដ្ឋបាលខេត្តកំពង់ស្ពឹ បានគាំទ្រ និងចូលរួមសហការយ៉ាងពេញទំហឹង ដើម្បីសម្រួលគ្រប់និតិវិធី ក្នុងការធ្វើយ៉ាងណាឱ្យគម្រោងវិនិយោគរបស់វិនិយោគិនទាំងនោះទទួលបានជោគជ័យ ស្របតាមផែនការដែលបានគ្រោងទុក”៕

តើផែនការអភិវឌ្ឍន៍សេដ្ឋកិច្ចថ្មីរបស់ចិន អាចនឹងរុញច្រានអាមេរិក ធ្លាក់ពីប្រទេសមហាអំណាចសេដ្ឋកិច្ច?

ដោយ៖ ប៊ី

អន្តរជាតិ៖ ប៉ុន្មានថ្ងៃមុនការបោះឆ្នោតរបស់សហរដ្ឋអាមេរិក ដែលពោរពេញការប្រកួតប្រជែងបំផុតនៅក្នុងប្រវត្តិសាស្ត្រ នឹងជ្រើសរើសយកប្រធានាធិបតី ដើម្បីទប់ទល់ឥទ្ធិពលចិន មិនថាអ្នកណាឈ្នះក៏ដោយ ខណៈប្រធានាធិបតីចិន លោកស៊ី ជីនពីង បានបើកកិច្ចប្រជុំមួយនៅទីក្រុងប៉េកាំងនៅសប្តាហ៍នេះ ដើម្បីដាក់ចេញនូវដំណាក់កាលបន្ទាប់នៃការអភិវឌ្ឍសេដ្ឋកិច្ចនៅក្នុងរយៈពេលមួយទសវត្សរ៍ខាងមុខ។

ផែនការរយៈពេល ៥ ឆ្នាំលើកទី ១៤ របស់ប្រទេសចិន ត្រូវបានគេរំពឹងថានឹងផ្តោតសំខាន់ទៅលើការច្នៃប្រឌិតបច្ចេកវិទ្យា ការពឹងផ្អែកលើសេដ្ឋកិច្ចខ្លួនឯង និងបរិស្ថានស្អាត។

មន្ត្រីបក្សកុម្មុយនិស្តក៏នឹងកំណត់គោលដៅសម្រាប់រយៈពេល ១៥ ឆ្នាំខាងមុខទៀតផងដែរ ខណៈលោកស៊ីបានប្តេជ្ញាសម្រាប់ការស្តារជាតិឡើងវិញ ដោយផ្តោតលើការនាំមុខពិភពលោកខាងបច្ចេកវិទ្យា និងយុទ្ធសាស្ត្រឧស្សាហកម្មផ្សេងទៀត។

ការប្រជុំនេះត្រូវបានបិទ សម្រាប់សារពត៌មាន ហើយការសម្រេចចិត្តសំខាន់ៗទំនងជានឹងមិនត្រូវបានគេដឹងច្បាស់ទេ មុនពេលបញ្ចប់នៅថ្ងៃព្រហស្បតិ៍ខាងមុខ។

ប្រសិនបើសេដ្ឋកិច្ចរបស់ចិន ដែលកំពុងស្ទុះងើបឡើងវិញភ្លាមៗពីការឆ្លងវីរុសកូរ៉ូណា អាចរក្សាបាននូវក្នុងរយៈពេលប៉ុន្មានឆ្នាំមុខ សេដ្ឋកិច្ចចិននឹងវ៉ាដាច់សហរដ្ឋអាមេរិកក្នុងរយៈពេលមួយទសវត្សរ៍បន្ទាប់។

ការមិនចុះសម្រុងកាន់តែស៊ីជម្រៅជាមួយសហរដ្ឋអាមេរិក បានធ្វើឱ្យយុទ្ធសាស្ត្ររបស់លោក ស៊ី ពន្លឿនផែនការ ដើម្បីការពារប្រទេសចិនពីភាពមិនច្បាស់លាស់នៃសេដ្ឋកិច្ចពិភពលោក។

លោក Fred Hu ស្ថាបនិកក្រុមហ៊ុន Primavera Capital Ltd ដែលមានមូលដ្ឋាននៅទីក្រុងប៉េកាំង បានមានប្រសាសន៍ថា “វាឆ្លុះបញ្ចាំងពីការវាយតម្លៃរបស់ប្រទេសចិន ចំពោះភាពជាក់ស្តែងនៃស្ថានភាពពិភពលោកបច្ចុប្បន្ន”។

លោក បានថ្លែងថា “ការពឹងផ្អែកលើខ្លួនឯងគឺអំពីការអភិវឌ្ឍសមត្ថភាពសេដ្ឋកិច្ចក្នុងស្រុកជាក់លាក់ តាមរយៈការវិនិយោគក្នុងការស្រាវជ្រាវ និងអភិវឌ្ឍន៍ និងការច្នៃប្រឌិត ដែលជាការឆ្លើយតបចាំបាច់ និងប្រុងប្រយ័ត្នចំពោះភាពមិនច្បាស់លាស់ពីខាងក្រៅ”។

លោក Hu ដែលធ្លាប់បម្រើការឱ្យមូលនិធិរូបិយវត្ថុអន្តរជាតិ (IMF) និងដឹកនាំក្រុមហ៊ុន Goldman Sachs Group Inc បានមានប្រសាសន៍ថា“ ទោះយ៉ាងណាវាមិនមានន័យថាចិននឹងបដិសេធនូវគោលនយោបាយបើកចំហរេនោះទេ”។

លោក ស៊ី និងមន្រ្តីដទៃទៀត បានបង្ហាញថា សេដ្ឋកិច្ចចិននឹងបើកទ្វាររបស់ខ្លួនបន្ថែមទៀតចំពោះមូលធនបរទេស និងការប្រកួតប្រជែង។

នៅក្នុងសុន្ទរកថាមួយនៅទីក្រុងសិនចិនក្នុងខែនេះ លោក ស៊ី បានប្តេជ្ញាជំរុញការច្នៃប្រឌិតបច្ចេកវិទ្យា ប៉ុន្តែបានបញ្ចេញសារមួយ ដោយបញ្ជាក់យ៉ាងច្បាស់ថា លោកចង់បានប្រព័ន្ធសេដ្ឋកិច្ចបើកចំហថ្មីមួយ៕ Bloomberg

រដ្ឋសភាកំពុងពិនិត្យ និងសិក្សាលើសេចក្តីព្រាងច្បាប់ហិរញ្ញវត្ថុឆ្នាំ២០២១

ដោយ ៖ គង់ ម៉ាលីន

ភ្នំពេញ ៖ គណៈកម្មាធិការអចិន្រ្តៃយ៍រដ្ឋសភាដឹកនាំដោយសម្តេចអគ្គមហាពញាចក្រី ហេង សំរិន ប្រធានរដ្ឋសភា បានបើកកិច្ចប្រជុំដើម្បីទទួលយកសេចក្ដីព្រៀងច្បាប់ហិរញ្ញវត្ថុឆ្នាំ២០២១ ដើម្បីពិនិត្យ និងសិក្សា ដើម្បីឈានទៅដល់ការសម្រេចអនុម័តគាំទ្រទាំងស្រុង។

ក្រោមកិច្ចដឹកនាំប្រជុំដោយ សម្ដេចអគ្គមហាពញាចក្រី ហេង សំរិន នៅព្រឹកថ្ងៃអង្គារ ទី២៧ ខែតុលា ឆ្នាំ២០២០នេះ បានអនុម័តទទួលយកសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ និង សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៩មកប្រគល់ឱ្យគណៈកម្មការជំនាញរដ្ឋសភា ធ្វើការពិនិត្យសិក្សា តាមសំណើរបស់រាជរដ្ឋាភិបាល ហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភាវិញ។

ជាមួយគ្នានេះ កិច្ចប្រជុំគណៈកម្មាធិការអចិន្រ្តៃយ៍រដ្ឋសភា បានអនុម័តបញ្ចូលក្នុងរបៀបវារៈសម័យប្រជុំរដ្ឋសភាលើកទី៥ នីតិកាលទី៦ នាពេលខាងមុខនេះ នូវសេចក្តីព្រាងច្បាប់ចំនួនពីរមាន សេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម និងទី២ សេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាស្តីពីការហាមឃាត់អាវុធនុយក្លេអ៊ែរ។

បន្ទាប់មកកិច្ចប្រជុំបានអនុម័ត កំណត់កាលបរិច្ឆេទ ថ្ងៃចន្ទ ទី២ ខែវិច្ឆិកា ឆ្នាំ២០២០ បន្តសម័យប្រជុំរដ្ឋសភាលើកទី៥ នីតិកាលទី៦ ដោយមានរបៀបវារៈ ចំនួន៦ រួមមាន៖

១-ការពិភាក្សានិងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើពិធីសារទីមួយ ធ្វើវិសោធនកម្មកិច្ចព្រមព្រៀង ស្តីពីភាពជាដៃគូសេដ្ឋកិច្ចទូលំទូលាយ រវាងរដ្ឋជាសមាជិក សមាគមប្រជាជាតិអាស៊ីអាគ្នេយ៍ និងជប៉ុន។

២-ការពិភាក្សានិងអនុម័ត សេចក្តីព្រាងច្បាប់ស្តីពី ការអនុម័តយល់ព្រមលើពិធីសារអនុវត្តកញ្ចប់សន្យាទី១០ ក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម។

៣-ការពិភាក្សានិងអនុម័ត សេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀង ស្តីពីការវិនិយោគក្រោមកិច្ចព្រមព្រៀងក្របខ័ណ្ឌ ស្តីពីកិច្ចសហប្រតិបត្តិការសេដ្ឋកិច្ចទូលំទូលាយ រវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា។

៤-ការពិភាក្សានិងអនុម័ត សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង ស្តីពីការវិនិយោគរវាងបណ្តារដ្ឋសមាជិកនៃសមាគមប្រជាជាតិអាស៊ីអាគ្នេយ៍ និងរដ្ឋាភិបាលនៃតំបន់រដ្ឋបាលពិសេសហុងកុង នៃសាធារណរដ្ឋប្រជាមានិតចិន។

៥-ការពិភាក្សានិងអនុម័ត សេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម

៦-ការពិភាក្សានិងអនុម័តសេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាស្តីពីការហាមឃាត់អាវុធនុយក្លេអ៊ែរ៕

រដ្ឋាភិបាលត្រៀមចាប់ផ្តើមសាងសង់ផ្លូវជាតិថ្មីមួយខ្សែទៀតតភ្ជាប់ពីខេត្តបាត់ដំបងទៅកាន់ខេត្តសៀមរាប

ដោយ៖វុត្ថា

ភ្នំពេញ៖ រាជរដ្ឋាភិបាលបាននឹងកំពុងសិក្សា និងត្រៀមចាប់ផ្តើមស្ថាបនាផ្លូវជាតិថ្មីមួយខ្សែទៀតនាពេលខាងមុខដ៏ខ្លី ដែលតភ្ជាប់ពីខេត្តបាត់ដំបងមកដល់ខេត្តសៀមរាប ប្រវែង ៧២,១៥៤គីឡូម៉ែត្រ  ដើម្បីសម្រួលដល់ការដឹកជញ្ជូន ពាណិជ្ជកម្ម និងធ្វើដំណើររបស់ប្រជាពលរដ្ឋ។

ក្រុមការងារអន្តរក្រសួង រដ្ឋបាលខេត្ត និងក្រុមហ៊ុនសាងសង់ CHINA ROAD AND BRIDGE CORPORATION កាលពីម្សិលមិញនេះ បានបើកិច្ចប្រជុំសិក្ខាសាលាផ្សព្វផ្សាយលទ្ធផលការសិក្សាវាយតម្លៃហេតុប៉ះពាល់បរិស្ថាន និងសង្គមពេញលេញ លើគម្រោងសាងសង់ផ្លូវជាតិតភ្ជាប់បាត់ដំបង-សៀមរាប ប្រវែង ៧២,១៥៤គីឡូម៉ែត្រ ស្ថិតក្នុងខេត្តបាត់ដំបង ខេត្តបន្ទាយមានជ័យ និងខេត្តសៀមរាប ។

កិច្ចប្រជុំបានឯកភាព និងសូមគាំទ្រចំពោះគម្រោងសាងសង់ផ្លូវជាតិតភ្ជាប់បាត់ដំបង-សៀមរាបនេះ  និងឱ្យក្រុមហ៊ុន PPIC រៀបចំនិងបញ្ជូលនូវធាតុចូលទាំងអស់ដែលនៅក្នុងអង្គប្រជុំបានលើកឡើង ដើម្បីអាចបន្តនីតិវិធីប្រជុំនៅក្រសួងបរិស្ថាន និងកិច្ចប្រជុំអន្តរក្រសួងដែលរៀបចំដោយក្រសួងបរិស្ថាន។

កិច្ចប្រជុំក៏បានស្នើសុំអោយម្ចាស់គម្រោង និងក្រុមហ៊ុន CHINA ROAD AND BRIDGE CORPORATION ធ្វើការពិចារណារាល់មតិយោបល់ និងសំណូមពររាល់ធាតុចូលដែលលើកឡើងក្នុងអង្គប្រជុំទាំងមូល។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីកន្លងមកនេះ បានស្នើឱ្យស្ថាប័នពាក់ព័ន្ធ ធ្វើការសិក្សាការកសាងផ្លូវថ្មី ដែលតភ្ជាប់ពីខេត្តបាត់ដំបងទៅខេត្តសៀមរាប ដែលផ្លូវនេះអាចកាត់បន្ថយពេលវេលា ក្នុងការធ្វើដំណើររបស់ប្រជាពលរដ្ឋ។

សម្តេចតេជោបានថ្លែងថា “យើងនឹងខំរៀបចំដើម្បីកសាងផ្លូវតភ្ជាប់រវាងខេត្តបាត់ដំបង ជាមួយនឹងខេត្តសៀមរាប ដែលផ្លូវនោះនឹងអាចជួយកាត់បន្ថយចំណាយនៃការធ្វើដំណើរ ដែលជាការធ្វើដំណើរពីបាត់ដំបង ទៅបន្ទាយមានជ័យ ហើយទៅកាន់ខេត្តសៀមរាប។ ប្រៀបធៀបនឹងផ្លូវថ្មី យើងអាចចំណេញរហូតដល់៦៩គីឡូម៉ែត្រ ដែលជាការតភ្ជាប់មួយក្នុងចំណោមការតភ្ជាប់ខាងផ្នែកគមនាគមន៍របស់យើង”។

សម្តេចតេជោបន្តថា “ចំណុចនេះ គឺស្ថិតនៅក្នុងបេក្ខភាពគម្រោងនៅឆ្នាំ២០២១។ ប្រសិនបើការសិក្សាជាក់លាក់រួចហើយនោះ យើងនឹងរកឥណទាន ដើម្បីធ្វើផ្លូវមួយខ្សែនេះ ដែលជាការតភ្ជាប់មួយដ៏សំខាន់ សម្រាប់ខេត្តបាត់ដំបង បន្ទាប់ពីខេត្តនានាដែលជាប់នឹងខេត្តបាត់ដំបងនេះ បានតភ្ជាប់ជាមួយនឹងខេត្តជុំវិញរួចហើយ ក្នុងនោះមានខេត្តបន្ទាយមានជ័យ ទៅខេត្តប៉ៃលិន ហើយពោធិ៍សាត់តភ្ជាប់ទៅខេត្តកោះកុង”៕

ក្រសួងសាធារណការកំពុងពន្លឿនការវាយតម្លៃផលប៉ះពាល់ហេដ្ឋារចនាសម្ព័ន្ធដែលរងគ្រោះដោយជំនន់ទឹកភ្លៀង

ដោយ ៖ វុត្ថា

ភ្នំពេញ ៖ ក្រសួងសាធារណការ និងដឹកជញ្ជូន បាននឹងកំពុងពន្លឿនការវាយតម្លៃផលប៉ះពាល់ហេដ្ឋារចនាសម្ព័ន្ធដែលរងគ្រោះដោយជំនន់ទឹកភ្លៀងក្នុងរយៈពេលប៉ុន្មានសប្តាហ៍កន្លងមកនេះ ដើម្បីដាក់ជូនរដ្ឋាភិបាលក្នុងការសម្រេចទម្លាក់ថវិកា។

លោក វ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងនៅថ្ងៃទី២៧ ខែតុលា ឆ្នាំ២០២០នេះ ឱ្យដឹងថា  ក្រុមការងាររបស់ក្រសួងបាននឹងកំពុងវាយតម្លៃផលប៉ះពាល់លើហេដ្ឋារចនាសម្ព័ន្ធដែលត្រូវស្តារ និងជួសជុលឡើងវិញ  ដែលរហូតមកដល់ពេលនេះ គឺមិនទាន់ចប់ទេ។

លោកបន្តថា “យើងឥឡូវនេះការវាយតម្លៃមិនទាន់ចប់ទេ  យើងបានធ្វើបច្ចុប្បន្នភាពពី ៤០០ គីឡូម៉ែត្រ ឡើងដល់ ៦៦០ គីឡូម៉ែត្រ ដែលក្នុងនោះ យើងគ្រោងថវិការពី១៥០ លានដុល្លារអាមេរិក  ប៉ុន្តែវាឡើងទៀតហើយ អ៊ីចឹង យើងមិនទាន់សម្រេចថាដូចម្តេចនោះទេ ព្រោះការវាយតម្លៃផលប៉ះពាល់មិនទាន់ចប់”។

លោកបន្តថា “ជាមួយគ្នានេះយើងក៏ថា គួរធ្វើក្នុងកម្រិតណា ផ្លូវខ្លះក៏វាស្ថិតនៅក្នុងកុងត្រាជាមួយគម្រោង ហើយផ្លូវខ្លះក៏មិនស្ថិតនៅក្នុងកុងត្រា  និងជាបឋម ក្រោយជំនន់ទឹកភ្លៀងនេះ  យើងលប់គ្រលុកខ្លះ  ដើម្បីបង្កងាយស្រួលក្នុងការធ្វើដំណើរសិន”។

លោកបញ្ជាក់ទៀតថា “ក្រុមការងាររបស់ក្រសួងកំពុងធ្វើកិច្ចការងារនេះជាមួយក្រសួងសេដ្ឋកិច្ច និងហិរញ្ញវត្ថុ   ខណៈដែលក្រុមការងារនេះកំពុងសិក្សា និងវាយតម្លៃផលប៉ះពាល់នៅតាមបណ្តាខេត្តមួយចំនួនទៀត ដូចជាខេត្តព្រះវិហារជាដើម យើងគ្រាន់តែវាយតម្លៃបានដោយផ្នែកប៉ុណ្ណោះ”។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីម្សិលមិញនេះ បានឱ្យដឹងថា ទឹកជំនន់បានធ្វើឱ្យខូចផ្លូវជាតិ ផ្លូវលំ និងទំនប់ផ្សេងៗបានរងការខូចខា។ សម្តេចតេជោ បានណែនាំរដ្ឋមន្ត្រីសាធារណការ និងដឹកជញ្ជូន, រដ្ឋមន្ត្រីធនធានទឹក និងឧតុនិយម, រដ្ឋមន្ត្រីអភិវឌ្ឍន៍ជនបទ និងរដ្ឋមន្ត្រីកសិកម្ម មិនត្រូវរង់ចាំការវាយតម្លៃពីតាមមន្ទីរនានាទេ ត្រូវចាត់មន្ត្រីរដ្ឋលេខាធិការចុះទៅវាយតម្លៃដោយផ្ទាល់។

សម្តេចតេជោបានថ្លែងថា “រដ្ឋមន្ត្រីទាំង៤ ត្រូវធ្វើសកម្មភាពភ្លាមៗ ដើម្បីជួសជុល និងតភ្ជាប់ផ្លូវ ស្ពាន ដែលខូចខាតជូនប្រជាពលរដ្ឋ”។ សម្តេចបន្តថា “ការដោះស្រាយរឿងទឹកជំនន់មិនមែនបញ្ចប់ត្រឹមការចែកជំនួយនោះទេ។ អ្វីដែលជាការដោះស្រាយសំខាន់សម្រាប់ប្រជាពលរដ្ឋរងការជន់លិច គឺការបង្កឱកាសឱ្យពួកគាត់អាចដាំដុះឡើងវិញបាន”។សម្តេចតេជោ ហ៊ុន សែន បានដាក់បទបញ្ជាឱ្យចុះសិក្សាបន្ទាន់ ពីផលប៉ះពាល់របស់ប្រជាពលរដ្ឋ ហើយដាក់ចេញដំណោះស្រាយបន្ទាន់។ សម្តេចតេជោ បានសង្កត់ធ្ងន់ថា “ត្រូវការថវិកាប៉ុន្មាន ក៏ត្រូវតែទម្លាក់ទៅ ដើម្បីដោះស្រាយ”៕

ភ្ញៀវទេសចរក្នុងស្រុកជាង៧លាននាក់ចេញដើរកម្សាន្តនៅក្នុងរយៈពេល៩ខែឆ្នាំ២០២០នេះ

ដោយ ៖ រ៉ាណេត

ភ្នំពេញ ៖ នៅក្នុងរយៈពេល៩ខែ ឆ្នាំ២០២០កន្លងទៅនេះ ចំនួនទេសចរជាតិ និងអន្តរជាតិសរុបជាង៨លាននាក់ ដែលបានធ្វើដំណើរកម្សាន្តនៅតាមតំបន់នានាទូទាំងប្រទេស ដែលក្នុងទេសចរក្នុងស្រុកមានរហូតដល់ជាង៧លាននាក់ ហើយទេសចរអន្តរជាតិមានជាង១លាននាក់។

តាមរយៈបាយការណ៍ដែលចេញដោយក្រសួងទេសចរណ៍នៅល្ងាចថ្ងៃទី២៦ ខែតុលា ឆ្នាំ២០២០ម្សិលមិញនេះបានបង្ហាញថា ក្នុងរយៈពេល៩ខែ ឆ្នាំ២០២០ ទេសចរអន្តរជាតិមកទស្សនាកម្ពុជាមានត្រឹមតែ ១,២៤៧,៦៨០នាក់ ថយចុះ ៧៤.១ភាគរយ និងទេសចរផ្ទៃក្នុង ៧,២៨៤,៤០៩នាក់ ថយចុះ ៥១.៩ភាគរយ ដែលការថយចុះនេះគឺដោយសាររងផលប៉ះពាល់ខ្លាំងពីវិបត្តិជំងឺ Covid-19 ។

ក្នុងដំណាក់កាលវិបត្តិ Covid-19 ចាប់ពីខែមេសា ដល់ខែកញ្ញា និន្នាការទេសចរណ៍មានការប្រែប្រួលយ៉ាងខ្លាំង ជាក់ស្ដែង ទេសចរសម្រាកលំហែកម្សាន្តមាន ៤៣.៤ភាគរយ ទេសចរធុរកិច្ច និងការទូតមាន ៥៤.៤ភាគរយ និងផ្សេងៗ ២.៣។ កាលពីឆ្នាំ២០១៩ ទេសចរសម្រាកលំហែកម្សាន្តមានរហូតដល់ ៧៦.២ភាគរយ ទេសចរធុរកិច្ច និងការទូតមាន ២០.៧ភាគរយ និងប្រភេទផ្សេងៗ ៣.១ភាគរយ។

តាមការព្យាករណ៍នៅឆ្នាំ២០២០ កម្ពុជានឹងទទួលទេសចរអន្តរជាតិប្រមាណ ១.៣២លាននាក់ ថយចុះ ៨០ភាគរយ ធៀបនឹងឆ្នាំ២០១៩។

អ្នកជំនាញទេសចរណ៍បានវាយតម្លៃថា ស្ថានភាពទេសចរណ៍កម្ពុជានឹងវិលត្រលប់មកប្រក្រតីភាពឡើងវិញ តាមសេណារីយ៉ូចំនួន ២៖

សេណារីយ៉ូទី១៖ ប្រើរយៈពេល ៣ឆ្នាំ (២០២០-២០២៣)

សេណារីយ៉ូទី២៖ ប្រើរយៈពេល ៥ឆ្នាំ (២០២០-២០២៥)

តាមការព្យាករណ៍ ឆ្នាំ២០២០ កម្ពុជានឹងទទួលទេសចរផ្ទៃក្នុងបានប្រមាណ ៩លាននាក់ ថយចុះ ២០ភាគរយ ធៀបនឹងឆ្នាំ២០១៩ ខណៈទេសចរផ្ទៃក្នុងនឹងវិលមកប្រក្រតីភាពឡើងវិញក្នុងរយៈពេល ៣ឆ្នាំ ពោលគីឆ្នាំ២០២៣ កម្ពុជានឹងទទួលបាន ១១លាននាក់។

ផ្នែក​ខ្លះ​នៃ​គម្រោង​ផ្លូវ​ក្រវ៉ាត់​ក្រុង​ទី៣ និង​ទី៤ អាច​នឹង​កាត់​ជា​ចំណុះ​នៃ​ទីក្រុង​ភ្នំពេញ​នាពេល​អនាគត

ដោយ វុត្ថា

ភ្នំពេញ៖ ផ្នែក​ខ្លះ​នៃ​គម្រោង​ផ្លូវ​ក្រវ៉ាត់​ក្រុង​ទី៣  និង​ទី៤ ដែល​ពាក់ព័ន្ធ​នឹង​ខេត្តកណ្តាល ខេត្តកំពង់ស្ពឺ ខេត្តតាកែវ និង​ខេត្តព្រៃវែង នឹងត្រូវ​កាត់​ចូល​មកជា​ចំណុះ​នៃ​ទីក្រុង​ភ្នំពេញ​នាពេល​អនាគត។

លោកស្រី​អាន សុ​ធិ​តា នាយិកា​ក្រុមហ៊ុន CBRE Cambodia បាន​ប្រាប់​គេហទំព័រ propertyarea.asia កាលពី​កន្លងមក​ទៅនេះ​ថា ប្រទេស​កម្ពុជា​ត្រូវការ​ប្រព័ន្ធ​ហេ​ដ្ឋ​រចនាសម្ព័ន្ធ​កាន់តែច្រើន​ថែមទៀត ជាពិសេស​ផ្លូវ​ក្រវ៉ាត់​ក្រុង ដើម្បី​ជួយ​សម្រួល​ដល់​ចរាចរណ៍​ដឹកជញ្ជូន​ទំនិញ​ផ្សេង ខណៈដែល​ទីក្រុង​ភ្នំពេញ​នឹង​បន្ត​ពង្រីក​ថែមទៀត។

លោកស្រី​បា​ន្ត​ថា ជា​ផែន​ការណ៍​រប​ស់ការរ​បស់​រាជរដ្ឋាភិបាល គឺមាន​ការពង្រីក​ក្រុងភ្នំពេញ​បន្ថែមទៀត ហើយ​ការ​ការសាងសង់​គម្រោង​ផ្លូវ​ក្រវ៉ាត់​ក្រុង អាចជា​ផែនការ​ពង្រីក​ក្រុង​ឱ្យដល់​ទីនោះ ព្រោះ​វា​ជា​ផ្លូវ​ក្រវ៉ាត់​ក្រុង។  ហើយ​គម្រោង​ផ្លូវ​នេះ នឹង​ជួយ​ជំរុញឱ្យមាន​ការរីកចំរើន​លើ​វិស័យ​អចលនទ្រព្យ​គ្រប់​ប្រភេទ។

លោកស្រី​តាំង ហួរ នាយិកា​ក្រុមហ៊ុន Amatak Property Service បានឱ្យដឹង​ដែរ​ថា គម្រោង​នៃ​ការស្ថាបនា​ផ្លូវ​ក្រវាត់ក្រុង​របស់​រាជរ​ដ្ឋា​ភិ​បាល​នាពេល​ច្ចុ​ប្បន្ន​នេះ  គឺជា​ផែនការ​នៃ​ការពង្រីក​ទីក្រុង​ភ្នំពេញ​ឱ្យមាន​វិសាលភាព​កាន់តែ​ធំ។

លោកស្រី​បន្តថា ក្រៅពីនេះ គម្រោង​ផ្លូវ​ក្រវ៉ាត់​ក្រុង​នេះ គឺ​ដើម្បី​បង្វែ​រោងចក្រ​សហគ្រាសផ្សេងៗ ពី​ទីក្រុង អោយទៅ​កាន់​ជាយក្រុង និង​ម្យ៉ាងទៀត គឺ​ដើម្បី​សម្រួល​ដល់​ការដឹកជញ្ជូន​ទំនិញ និង​ការកកស្ទះ​ចំពោះ​ការធ្វើដំណើរ ឬ ចរាចរណ៍ ដែល​អាចមាន​ភាពងាយស្រួល​ក្នុង​ក​ចេញចូល ឬ​ធ្វើដំណើរ ។

លោកស្រី​បន្ថែមថា យើង​មាន​ផ្លូវ​ក្រ​វ៉ាត​ក្រុង​នេះ វា​នឹង​ជួយ​សម្រួល​ដល់​ចរាចរណ៍ និង​ផែនការ​ព​ង្រី​ក្រុង​របស់​រាជរដ្ឋាភិបាល​ជាពិសេស គឺជារ​ច​ន្ត​នៃ​ដង្ហើម​សេដ្ឋកិច្ច​របស់​ជាតិ​ផងដែរ។

សម្តេច​តេ​ជោ ហ៊ុន សែន ប្រមុខ​ន​រា​រដ្ឋាភិបាល​នៃ​កម្ពុជា បាន​មានប្រសាសន៍​ដែរ​ថា ទីក្រុង​ភ្នំពេញ បាន​ពង្រីក​ជា​បន្តបន្ទាប់ ចាប់តាំងពី ៣០០ ម៉ែត​ក្រឡា នៅក្នុង​ទសវត្ស ៩០ រហូតដល់​បច្ចុប្បន្ននេះ​មាន​ជិត ៧០០ ម៉ែត្រ​ការ​ដោយបាន​កាត់​ផ្នែក​ខ្លះ​នៃ​ភូមិ​សាសន៍​ខេត្តកណ្តាល​មកជា​ចំណុះ​ទីក្រុង​ភ្នំពេញ ដើម្បី​ងាយស្រួល​គ្រប់​គ្រប់គ្រង។

រាជរដ្ឋាភិបាល​តាមរ​យៈ​ក្រសួង​សាធារណការ និង​ដឹក​ជ​ញ្ជូ បាន​ស្ថាបន​ការ​ផ្លូវ​ក្រវ៉ា​ត់ទី១ ទី ២ ត្រូវបាន​បញ្ចប់ និង​គម្រោង​ផ្លូវ​ក្រវ៉ាត់​ក្រុង​ទី៣ បាន​នឹង​កំពុង​ស្ថាបនា ដែល​រហូត​ម​ដល់ពេលនេះ​សម្រេចបាន​ជិត ៥០ ភាគរយ និង​កាលពីពេលថ្មីៗ រាជរដ្ឋាភិបាល​បាន​នឹង​ឈានដល់​ការស្ថាបនា​ផ្លូវ​ក្រវ៉ាត់​ក្រុង​ទី ៤ បន្ថែមទៀត ខណៈ​បានបញ្ចប់​ការសិក្សា៕

ចំណេះដឹង! តើ​អ្វី​ជា​ប្រាក់ចំណូល​ដែល​មិន​ជាប់ពន្ធ និង ប្រាក់ចំណូល​ជាប់ពន្ធ?

ដោយ​វុត្ថា

ភ្នំពេញ៖ យោងតាម​ច្បាប់​ស្តីពី​ពន្ធដារ​កម្ពុជា​ត្រូវបាន​បែងចែក​ប្រាក់ចំណូល​ជា២ យ៉ាង​ពោលគឺ​ប្រាក់ចំណូល​មិន​ជាប់ពន្ធ និង​ប្រាក់ចំណូល​ជាប់ពន្ធ។

ប្រាក់ចំណូល​មិន​ជាប់ពន្ធ

ប្រាក់ចំណូល​មិន​ជាប់ពន្ធ​សំដៅ​ដល់ ប្រាក់ចំណូល​របស់​រាជ​រដ្ឋាភិបាល ឬ​ប្រាក់ចំណូល​ស្ថាប័ន​រាជរដ្ឋាភិបាល។ ប្រាក់ចំណូល​របស់​អង្គការ​ណាមួយ​ដែល​ត្រូវបាន​រៀបចំឡើង និង​ដំណើរការ​សំរាប់​គោលដៅ​សុទ្ធសាធ​ខាង​សាសនា សប្បុរសធម៌ វិទ្យាសាស្ត្រ អក្សរសាស្ត្រ ឬ​អប់រំ និង​គ្មាន​ចំណែក​ណាមួយ​នៃ​ទ្រព្យ ឬ​ប្រាក់ចំណូល​ត្រូវបាន​ប្រើប្រាស់​ជា​ផលប្រយោជន៍​ឯកជន។

ប្រាក់ចំណូល​របស់​អង្គការ​ពលករ ឬ​សភាពាណិជ្ជកម្ម ឧស្សាហកម្ម ឬ​កសិកម្ម ក្នុងករណី​ដែល​ប្រាក់ចំណូល​របស់​អង្គការ​ទាំងនោះ មិន​ត្រូវបាន​ប្រើប្រាស់​ជា​ផលប្រយោជន៍​ឯកជន​របស់​អ្នក​ចូល ហ៊ុន ឬ​រូបវន្តបុគ្គល ក៏​មិនត្រូវ​បង់ពន្ធ និង​ប្រាក់ចំណេញ​ដែល​បានមកពី​ការលក់​ផលិតផល​កសិកម្ម ដែល​បុគ្គល​មិនមែនជា​អ្នក​ជាប់ពន្ធ​តាម​របប​ពិត​ផលិត​បាន​ដោយ​ខ្លួនឯង ទោះបី​ផលិតផល​នោះ​មិនទាន់​កែច្នៃ ឬ​កែច្នៃ​ហើយ​ក៏ដោយ​ទៅតាម​ទំលាប់​នៃ​ការងារ​កសិកម្ម។

ប្រតិបត្តិការ​តាម​មធ្យោបាយ​ឧស្សាហកម្ម រួមទាំង​ការកែច្នៃ​ការរក្សា​គុណភាព ការ​វេច​ខ្ចប់​សំរាប់​លក់ ពុំ​ត្រូវបាន​ចាត់ទុកជា​ទំលាប់​នៃ​ការងារ​កសិកម្ម​ឡើយ។

ប្រាក់ចំណូល​ជាប់ពន្ធ

ប្រាក់ចំណូល​ជាប់ពន្ធ គឺជា​ប្រាក់ចំណូល​សុទ្ធ​បានមកពី​លទ្ធផល​ទាំងអស់​នៃ​ប្រតិបត្តិការ អាជីវកម្ម​គ្រប់​ប្រភេទ​រួមបញ្ចូល​ទាំង​ចំណូល​មូលធន​ដែល​សម្រេចបាន​ក្នុងពេល​កំពុង​ប្រកប​អាជីវកម្ម ឬ​នៅពេល​បញ្ចប់​អាជីវកម្ម​ព្រមទាំង​ប្រាក់ចំណូល​ពី​ទ្រព្យសកម្ម​ហិរញ្ញវត្ថុ ឬ​ទ្រព្យសកម្ម​វិនិយោគ​ការប្រាក់​ថ្លៃឈ្នួល និង​សួយ​សារ​ផង។

ប្រាក់ចំណូល​ជាប់ពន្ធ​ក៏​រួម បញ្ចូល​ផងដែរ​នូវ​ចំណូល​ធន​ទាំង​អស់ពី​អចលនទ្រព្យ ទ្រព្យ​ហិរញ្ញវត្ថុ ឬ​ទ្រព្យ​វិនិយោគ ដែល​សម្រេច​បានមកពី​ប្រតិបត្តិការ​នានា​ក្រៅពី​ប្រតិបត្តិការ​អាជីវកម្ម៕

តើ​ជីវភាព​របស់​ប្រជាពលរដ្ឋ​ជាប់ទាក់ទង​គ្នា​យ៉ាងដូចម្តេច​ពី​ការរីកចម្រើន​នៃ​វិស័យ​សំណង់ និង​អចលនទ្រព្យ?

ដោយៈ​ប្រុស​ណេ​ត

ភ្នំពេញៈ កំណើនសេដ្ឋកិច្ច​កម្ពុជា ក្នុង​រយៈពេល​ជាង២ទសវត្សរ៍​កន្លងមក ដែល រក្សាបាន​នូវ​អត្រាកំនើន​ក្នុង​រង្វង់៧ភាគរយ ធ្វើឱ្យ​ពលរដ្ឋ​មាន​ជីវភាព​កាន់តែ​ប្រសើរ​ជាមុន និង​បាន​ជំ​រុញឱ្យ​តម្រូវការ​នៃ​ភាព​ស៊ីវិល​ស័​យ​ក្នុងប្រទេស​ក៏​កាន់តែ​កើន​ជាង​មុន​ដែរ។

ជាក់ស្ដែង តម្រូវការ​លំនៅឋាន​លំហែកាយ នៅ​តំបន់​ទេសចរណ៍​ក៏​ឃើញ មាន​កំណើន​ជាង​មុន និង​កំពុងមាន​ការអភិវឌ្ឍ ដើម្បី​ផ្គត់ផ្គង់​ទៅតាម​តម្រូវការ បើទោះបីជា​បច្ចុប្បន្ននេះ​កម្ពុជា​កំពុង​ជួបនឹង​វិបត្តិ​នៃ​កូ​វីដ១៩ក្ដី។

ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា លោក​ច្រឹ​ក សុខ​នី​ម បាន​មានប្រសាសន៍​កាលពីថ្មីៗនេះ​ថា ដោយសារតែ​កំណើនសេដ្ឋកិច្ច​កម្ពុជា មាន​សន្ទុះ​ក្នុង​រង្វង់៧ភាគរយ​ក្នុង​មួយឆ្នាំ រយៈពេល​ប៉ុន្មាន​ចុងក្រោយ​នេះ ធ្វើឱ្យ​កម្រិតជីវភាព​ពលរដ្ឋ​កម្ពុជា​បាន​ប្រសើរឡើង​មួយកម្រិត​ទៀត និង​ធ្វើឱ្យ​ភាព​ស៊ី​វិ​ល័យ​របស់​ប្រជាជន​កម្ពុជា ចាប់ផ្ដើម​មាន​តម្រូវការ។

លោក​បន្តថា “ដំបូង​ឡើយ​ពលរដ្ឋ​ត្រូវ​មានផ្ទះ​ធម្មតា ស្នាក់នៅ​អចិន្ត្រៃយ៍ បន្ទាប់មក​ពួកគាត់​ក៏​ស្វែងរក​ផ្ទះ​ទី២ ផ្ទះ​សម្រាប់​ស្នាក់​លំហែ​ពេលទំនេរ” ។ លោក​បន្តថា ក្នុងស្ថានភាព​បច្ចុប្បន្ន​នេះ គឺជា​ស្ថានភាព​ដែល​កម្ពុជា​ចាប់ផ្ដើម មាន​តម្រូវការ​លំនៅឋាន​លំហែកាយ​ចុង​សប្ដាហ៍ ក៏​ប៉ុ​ន្ត​ទន្ទឹមនឹងនោះ ការវិនិយោគ​លើ​លំនៅឋាន​លំហែកាយ​ក៏ត្រូវ​ជ្រើសរើស​រក​ទីតាំង​សម្រាប់​អភិវឌ្ឍន៍​ផងដែរ” ។

លោក​ច្រឹ​ក សុខ​នី​ម​បាន​បន្តថា ទីតាំង​សមស្រប​សម្រាប់​អភិវឌ្ឍន៍​លំនៅឋាន​លំហែកាយ​គឺជា​កន្លែង ដែលមាន​សក្ដានុពល​ក្នុង​វិស័យ​ទេសចរណ៍ ហើយ​ស្ថិតនៅ​តំបន់​ធម្មជាតិ ជាក់ស្ដែង​ក្នុងនោះ​កំពត ដែលជា​ខេត្ត​មួយ​សមស្រប​បំផុត សម្រាប់​ការអភិវឌ្ឍ​ជា​លំនៅឋាន​លំហែកាយ​ទាំង​បច្ចុប្បន្ន​និង​នៅពេល​អនាគត។

ជាមួយគ្នានេះ លោក Seraj Sutton តំណាង​ក្រុមហ៊ុន​អភិវឌ្ឍន៍​លំនៅឋាន​លំហែកាយ​មួយ​នៅ​ខេត្តកំពត​បាន​និយាយថា ក្រុមហ៊ុន​របស់លោក​បាន​អភិវឌ្ឍន៍​លំនៅឋាន​លំហែកាយ​លើ​គម្រោង​ទី១ ដែលមាន​ទីតាំងនៅ​ខេត្តកំពត ទទួលបាន​ជោគជ័យ និង​លក់​អស់​រួចហើយ ហើយ​ពេលនេះ ក៏​ឈានដល់​ការបើក​លក់​គម្រោង​ទី២ បន្តបន្ទាប់​ទៀត។

លោក​បន្តថា តាមរយៈ​ការលក់​គម្រោង​ទី១អស់​ក្នុងពេល​ខ្លី​នេះ បានបង្ហាញ​ពី​តម្រូវការ​លំនៅឋាន​លំហែកាយ​នៅ​កម្ពុជា​ចាប់ផ្ដើម​មាន និង​ជំរុញ​ឱ្យ​ក្រុមហ៊ុន​អភិវឌ្ឍន៍​ត្រូវ​រក​វិធី​ក្នុងការ​ទាក់ទាញ​អតិថិជន ប្រជាជន​កម្ពុជា និង​បរទេស ដើម្បី​ទទួលបាន​លំនៅឋាន​លំហែកាយ ប្រកបដោយ​ផាសុកភាព និង​មិន​ខកបំណង​ចំពោះ​ការទិញ​លំនៅឋាន​សម្រាប់​សម្រាកលំហែ​នៅ​ចុង​សប្ដាហ៍ និង​ថ្ងៃ​ឈប់សម្រាក។

យោងតាម​ការសិក្សា​រប​ស់​ក្រសួង​រៀបចំ​ដែនដី នគរូបនីយកម្ម​និង​សំណង់​បាន​ឲ្យ​ដឹងថា កម្ពុជា​ត្រូវការ​លំនៅដ្ឋាន​ប្រមាណ ៩០ម៉ឺន​ខ្នង​បន្ថែមទៀត សម្រាប់​ចន្លោះ​រយៈពេល​ពី​ឆ្នាំ២០១៥ ដល់​ឆ្នាំ២០៣០ខាងមុខនេះ ហើយ​ប្រជាពលរដ្ឋ​រស់នៅ​តាម​ទីក្រុង​និង​តាម​ទីប្រជុំជន​នឹង​កើន​ឡើងដល់​ជាង៧លាន​នាក់៕

វិភាគ៖ តើ​ការជ្រៀតជ្រែក​របស់​អាមេរិក​លើ​កិច្ចការ​ផ្ទៃក្នុង​ចិន​ជា​មូល​ហេតុដែល​ចិនដាក់ទណ្ឌកម្ម​លើ​ក្រុមហ៊ុន​អាមេរិក?

ដោយៈ​ប៊ី

អន្តរជាតិៈ លោក ចាវ លី​ចៀន (Zhao Lijian) អ្នកនាំពាក្យ​ក្រសួងការបរទេស​ចិន បាន​និយាយ​នៅ​ថ្ងៃ​ចន្ទ​នេះ​ថា រដ្ឋាភិបាល​ទីក្រុង​ប៉េកាំង​នឹងដាក់​ទណ្ឌកម្ម ទៅលើ​ក្រុមហ៊ុន និង​បុគ្គល​មួយចំនួន​នៅ​សហរដ្ឋអាមេរិក ដែល​ពាក់ព័ន្ធ​នឹង​ការលក់​សព្វាវុធ​ឲ្យ​កោះ​តៃវ៉ាន់។

លោក Zhao បាន​ថ្លែងថា “រដ្ឋាភិបាល​ចិន​បានសម្រេច​ថា នឹង​ចាត់វិធានការ​ចាំបាច់ ដើម្បី​ដាក់ទណ្ឌកម្ម​ទៅលើ​ក្រុមហ៊ុន ដែល​ចូលរួម​ពាក់ព័ន្ធ​ក្នុង​ការលក់​អាវុធ របស់​សហរដ្ឋអាមេរិក​ឲ្យ​ទៅ​តៃវ៉ាន់ ក្នុងនោះ​រួមមាន​ក្រុមហ៊ុន Lockheed Martin ក្រុមហ៊ុន Boeing Defense និង​ក្រុមហ៊ុន Raytheon ដើម្បី​ការពារ​ផលប្រយោជន៍​ជាតិ​របស់​ប្រទេស​ចិន» ។

ក្រុមហ៊ុន​ទាំង៣នេះ សុទ្ធតែជា​ក្រុមហ៊ុន​ផលិត​សព្វាវុធធំៗ បំផុត​របស់​សហរដ្ឋ​អាមេរិក។

លោក Zhao បាន​ថ្លែងថា ក្រុមហ៊ុន និង​បុគ្គល​អាមេរិក​ផ្សេងទៀត ដែលមាន​ប្រវត្តិ​មិនល្អ​ក្នុង​ការលក់​សព្វាវុធ ក៏​នឹងត្រូវ​រង​ទណ្ឌកម្ម​ដូចគ្នា​ផងដែរ ប៉ុន្តែ​អ្នកនាំពាក្យ​ក្រសួងការបរទេស​ចិន​រួប​នេះ​មិនបាន​បញ្ជាក់ថា មាន​ចំនួន​ប៉ុន្មាន​ឲ្យ​ច្បាស់លាស់​នោះឡើយ។

សហរដ្ឋអាមេរិក កាលពី​ថ្ងៃទី២១ខែតុលា បានអនុញ្ញាត​ចំពោះ គម្រោង​ប្រព័ន្ធ​សព្វាវុធ​ចំនួន៣ឲ្យ​ទៅ​កោះ​តៃវ៉ាន់ រួមមាន​ដូចជា ប្រព័ន្ធ​ចាប់​សញ្ញា​សិន​ស័​រ (Sensor)ប្រព័ន្ធ​មី​ស៉ី​ល និង​ប្រព័ន្ធ​កាំភ្លើង​ធំ​ដែលមាន​តម្លៃ​សរុប រហូតដល់១.៨ពាន់​លាន​ដុល្លារ។

ពេលនោះ​ចិន​បាន​សម្តែង​ការជំទាស់​ជាខ្លាំង ហើយក៏​ព្រមាន​ពី​ការឆ្លើយតប​ចាំបាច់​ទៅវិញ​ផងដែរ។

កាលពី​ថ្ងៃ​ព្រហស្បតិ៍ សប្តាហ៍​មុន ក្រសួងការបរទេស​ចិន​បាន​អះអាងថា ប្រទេស​ចិន​នឹងធ្វើ​ការឆ្លើយតប​ចាំបាច់ នៅពេលដែល​ស្ថានការណ៍​មាន​ការវិវឌ្ឍ បន្ទាប់ពី​សហរដ្ឋអាមេរិក​បាន​យល់ព្រម លើ​ការលក់​អាវុធ​ចំនួន១,៨ពាន់​លាន​ដុល្លារ​ទៅកាន់​កោះ​តៃវ៉ាន់។

សកម្មភាព​បែបនេះ បាន​រំលោភ​យ៉ាងធ្ងន់ធ្ងរ ទៅលើ​គោលការណ៍​ចិន​តែមួយ និង​សេចក្តីថ្លែងការណ៍​រួម​ប្រទេស​ចិន-សហរដ្ឋអាមេរិក​ចំនួន៣ ដែល​បង្ហាញ​ពីស​ញ្ញា​ខុសឆ្គង ដែល​ចាត់ទុក​កោះ​តៃវ៉ាន់ ជា​ប្រទេស​ឯករាជ្យ។ នេះ​បើ​យោងតាម​ការលើកឡើងរ​បស់​អ្នកនាំពាក្យ​ក្រសួងការបរទេស​ចិន​លោក Zhao Lijian នៅក្នុង​សន្និសីទ​សារព័ត៌មាន​មួយ​នៅ​ទីក្រុង​ប៉េកាំង។

លោក Zhao បាន​កត់សម្គាល់ថា “ប្រទេស​ចិន​បាន​ជំរុញ​ឱ្យ​ភាគី សហរដ្ឋអាមេរិក លុបចោល​ការលក់​អាវុធ និង​បញ្ឈប់​ការទាក់ទង​យោធា​ជាមួយ​កោះ​តៃវ៉ាន់” ។

ប៉ុន្មាន​ម៉ោង​ក្រោយ​ម ក​អ្នកនាំពាក្យ​ចិនដីគោក បាន​សម្តែង​ការប្រឆាំង​យ៉ាងខ្លាំង​ចំពោះ​សហរដ្ឋអាមេរិក ដែល​បានគ្រោង​លក់​អាវុធ​ទៅ​តំបន់​តៃវ៉ាន់ របស់​ប្រទេស​ចិន​ដោយ​ជំ​រុញឱ្យ​សហរដ្ឋអាមេរិក គោរព​តាម​គោលការណ៍​ចិន​តែមួយ និង​សេចក្តី​ថ្លែង​ការរួម​អាមេរិក-ចិន​ទាំង។

អ្នកនាំពាក្យ​ការិយាល័យ​កិច្ចការ​កោះ​តៃវ៉ាន់ នៃ​ក្រុមប្រឹក្សារដ្ឋ លោក Zhu Fenglian បាន​និយាយថា យើង​បាន​អំពាវនាវ​ឱ្យ​អាជ្ញាធរ មាន​សមត្ថកិច្ច​របស់​គណបក្ស​ប្រជាធិបតេយ្យ (DPP) នៅ​តៃវ៉ាន់ បញ្ឈប់​ទំនាក់​ទំនងជា​មួយ​សហរដ្ឋអាមេរិក តាម​គ្រប់​រូបភាព និង​ជៀសវាង​កុំ​ធ្វើដំណើរ​ទៅមុខទៀត ដើម្បី​ស្វែងរក​ឯករាជ្យ​តៃវ៉ាន់។

លើសពីនេះ ក្រសួងការពារជាតិ​ចិន​នៅ​យប់​ថ្ងៃ​ព្រហស្បតិ៍​នេះ បាន​ជំរុញ​យ៉ាងខ្លាំង​ដល់​សហរដ្ឋអាមេរិក ឱ្យ​បញ្ឈប់​ទំនាក់ទំនង​យោធា​ជាមួយ​កោះ​តៃវ៉ាន់ និង​ដោះស្រាយ​ដោយ​ប្រយ័ត្នប្រយែង​នូវ​បញ្ហា ដែល​ទាក់ទង​នឹង​កោះ​តៃវ៉ាន់ ដើម្បី​ជៀសវាង​ផលប៉ះពាល់​ធ្ងន់ធ្ងរ ដល់​ទំនាក់ទំនង​ទ្វេភាគី និង​យោធា​រវាង​ចិន និង​សហរដ្ឋអាមេរិក ក៏ដូចជា​សន្តិភាព​និ ង​ស្ថេរភាព​ឆ្លងកាត់​ច្រក​សមុទ្រ​តៃវ៉ាន់។

ក្រសួង​បាន​ថ្លែង​នៅក្នុង​សេចក្តីថ្លែងការណ៍​មួយ​ថា ភាគី​ចិន​នឹង​ប្រយុទ្ធ​តប​វិញ ដោយ​ម៉ឺងម៉ាត់ ប្រសិនបើ​ភាគី​អាមេរិក មិន​អើពើ​នឹង​បទដ្ឋាន​ជា​មូលដ្ឋាន នៃ​ទំនាក់ទំនង​អន្តរជាតិ និង​បន្ត​មាន​អាកប្បកិរិយា​បែបនេះ។

ទីភ្នាក់ងារសារព័ត៌មាន​រ៉​យ​ទ័​រ​បាន​រាយការណ៍​នៅ​ថ្ងៃ​ពុធ​នេះ​ថា ក្រសួងការបរទេស​ស​ហ​រដ្ឋ​អាមេរិក បាន​ជូនដំណឹង​ជា​ផ្លូវការ​ទៅ​សភា អំពី​ការលក់​អាវុធ​ដែល​បាន​គ្រោងទុក​ទៅកាន់​កោះ​តៃវ៉ាន់​របស់​ប្រទេស​ចិន បើទោះបីជា​ប្រទេស​ចិន​បាន​ព្រមាន​ម្តង​ហើយ ម្តងទៀត​ដល់​សហរដ្ឋ​អាមេរិក ឱ្យ​បញ្ឈប់​កិច្ចព្រមព្រៀង​នេះ​ក៏ដោយ។

ដកស្រង់​សម្តី​មន្ទីរ​បញ្ច​កោណ ទីភ្នាក់ងារ​ព័ត៌មាន​រ៉​យ​ទ័​របា​ន​និយាយថា ក្រសួងការបរទេស​ស​ហ​រដ្ឋ​អាមេរិក បាន​យល់ព្រម​លើ​សក្តានុពល នៃ​ការលក់​ប្រព័ន្ធ​អាវុធ​ចំនួន៣ ទៅ​កោះ​តៃវ៉ាន់​របស់​ប្រទេស​ចិន រួមមាន​ឧបករណ៍​ចាប់​សញ្ញា កាំជ្រួច​មី​ស៊ី​ល និង​កាំភ្លើង​ធំ​ដែល​អាចមាន​តម្លៃ​សរុប១,៨ ពាន់​លាន​ដុល្លារ។

កាលពី​សប្តាហ៍​មុន សេត​វិមាន បាន​អះអាងថា ពួកគេ​កំពុង​ឆ្ពោះទៅមុខ​ជាមួយនឹង​ការលក់​ឧបករណ៍​យោធា ទំនើប​ចំនួន៥ដាច់ដោយឡែក​ពីគ្នា ទៅកាន់​កោះ​នេះ ដែលមាន​តម្លៃ​សរុប​ប្រហែល៥ពាន់​លាន​ដុល្លារ។

ប្រភព​បាន​និយាយថា ស្ថានីយ៍​មី​ស៊ី​ល​ចំនួន១០០ និង​មី​ស៊ី​ល៤០០គ្រាប់​នឹងត្រូវ​ចំណាយ​ថវិកា​ប្រមាណ២ពាន់​លាន​ដុល្លារ ។

ការជូនដំណឹង​ជា​ផ្លូវការ​ផ្តល់ឱ្យ​សភា រយៈពេល៣០ថ្ងៃ ដើម្បី​ជំទាស់​ទៅនឹង​ការលក់​ណាមួយ ប៉ុន្តែ​ទីភ្នាក់ងារ​ព័ត៌មាន​រ៉​យ​ទ័​រ​បាន​និយាយថា ការណ៍​នេះ​ទំនងជា​មិនមាន​ការគាំទ្រ​ទ្វេភាគី​ចំពោះ​កោះ​តៃវ៉ាន់​ឡើយ។

ប្រទេស​ចិន បាន​ព្រមាន​ម្តង​ហើយ​ម្តងទៀត ដល់​សហរដ្ឋអាមេរិក កុំ​ឲ្យ​មាន​ការលក់​អាវុធ ខណៈដែល​ទំនាក់ទំនង​នៃ​ប្រទេស​ទាំងពីរ ស្ថិតក្នុង​ស្ថានភាព​តានតឹង ចាប់តាំងពី​ការរីក​រាលដាល​នៃ​ជំងឺ​រាតត្បាត​កូ​វីដ១៩ ។

អ្នកនាំពាក្យ​ក្រសួងការបរទេស​ចិន​លោក Zhao Lijian បាន​និយាយ​កាលពី​សប្តាហ៍​មុន​ថា ការលក់​អាវុធ​របស់​សហរដ្ឋអាមេរិក ទៅកាន់​កោះ​តៃវ៉ាន់​របស់​ប្រទេស​ចិន បានធ្វើឱ្យ​ខូចខាត​ដល់​អធិបតេយ្យភាព និង​ផលប្រយោជន៍​សន្តិសុខរ​បស់​ចិន​យ៉ាងធ្ងន់ធ្ងរ។

សហរដ្ឋអាមេរិក​កំពុង​រំលោភ​យ៉ាងធ្ងន់ធ្ងរ លើ​គោលការណ៍​ចិន​តែមួយ និង​បទ​ប្បញ្ញត្តិ​នៃ​សេចក្តីថ្លែងការណ៍​ប្រទេស​ចិន-សហរដ្ឋអាមេរិក​ទាំង​បី។

លោក Zhao បាន​និយាយ​នៅក្នុង​សន្និសីទ​សារព័ត៌មាន ប្រចាំ​ថ្ងៃមួយ​កាលពី​ថ្ងៃទី ១៣ ខែតុលា​ថា សេចក្តីថ្លែងការណ៍​រួម​រួមគ្នា ជាពិសេស​គឺ​សេចក្តីថ្លែងការណ៍​ថ្ងៃទី ១៧ ខែសីហា​ដោយ​ការលក់​អាវុធ​ទៅ​កោះ​តៃវ៉ាន់ គឺជា​ការជ្រៀតជ្រែក​យ៉ាងខ្លាំង នៅក្នុង​កិច្ចការ​ផ្ទៃក្នុង​របស់​ប្រទេស​ចិន។

លោក​បាន​ទទូច​ដល់​សហរដ្ឋអាមេរិក ឱ្យ​លុបចោល​ការលក់ ដែល​បាន​គ្រោងទុក ហើយ​បាន​ព្រមាន​ថា ប្រទេស​ចិន​នឹងធ្វើ​ការឆ្លើយតប​ស្របច្បាប់ និង​ចាំបាច់​ស្របតាម​ស្ថានភាព​ជាក់ស្តែង៕