ប្រធាន​សមាគម CVEA ប្រាប់​ពី​វិធីសាស្ត្រ​ធ្វើឱ្យ​អតិថិជន​មាន​ទំនុកចិត្ត​ខ្ពស់

ដោយៈ រ៉ា​ណេ​ត

ភ្នំពេញៈ គ្មាន​ភ្នាក់ងារ​អចលនទ្រព្យ​ណា​ម្នាក់ ហ៊ាន​បដិសេធន៍​មិន​ចង់បាន​ទំនុកចិត្ត​ពី​អតិថិជន​របសខ្លួន​នោះឡើយ ប៉ុន្តែ​អ្វី​ដែលជា​បញ្ហា​នៅត្រង់ថា តើ​គួរ​ធ្វើ​យ៉ាងដូចម្ដេច​ទើប​អាចធ្វើឱ្យ​អតិថិជន​ទាំងអស់នោះ មាន​ភាពជឿជាក់​ខ្ពស់​មកលើ​ខ្លួន ហើយ​ទទួល​ទិញ​អចលនវត្ថុ​ដែល​ខ្លួន​បាន​ណែនាំ។

លោក​ច្រឹ​ក សុខ​នី​ម ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា (CVEA) បាន​លើកឡើងថា ដើម្បី​អាច​ទទួលបាន​ទំនុកចិត្ត និង​ទទួលបាន​ផលចំណេញ​ខ្ពស់​ពី​អតិថិជន ភ្នាក់ងារ​អចលនទ្រព្យ ឬ​ក្រុមហ៊ុន​ផ្តល់​សេវា​អចលនទ្រព្យ ត្រូវ​ផ្តល់​សេវាកម្មផ្សេងៗ លើសពី​ការរំពឹងទុក ទៅកាន់​អតិថិជន​របស់ខ្លួន តាមរយៈ​ផ្តល់​ប្រឹក្សា​យោបល់ និង​មាន​ភាពស្មោះត្រង់​បំផុត និង​ភាព​រួសរាយ​រាក់ទាក់​ជាទីបំផុត។

លោក​បាន​មានប្រសាសន៍ថា “ភ្នា​ក់រ​អចលនទ្រព្យ ឬ​ក្រុមហ៊ុន​ផ្តល់​សេវា​អចលនទ្រព្យ គឺ​ត្រូវ​ផ្តល់​សេវា​ជា​កញ្ចប់​មាន​ទាំង​រត់​ឯកសារ លិខិត​កក់​ប្រាក់ កិច្ចសន្យា​ទិញ-លក់ និង​មាន​ទាំង​ប្រថាប់ត្រា​ពី​សំណាក់​មេធាវី ដើម្បី​ឲ្យ​អតិថិជន​មាន​ភាពកក់ក្តៅ និង​ការទិញ​លក់​របស់​ពួកគេ​មាន​សុវត្ថិភាព និង​មាន​ភាពងាយស្រួល” ។ លោក​បន្តថា “បើ​អតិថិជន​បាន​ទិញ​ចលនទ្រព្យ តាមរយៈ​ភ្នាក់ងារ​ជំនាញ យើង​ត្រូវធ្វើ​ឱ្យមាន​ភាព​ចំណេញ លើ​ការទិញ​អចលនទ្រព្យ​នោះ តាមរយៈ​របស់​ល្អ និង​មានតម្លៃ​ក្រោម​ទីផ្សារ ហើយ​ថ្ងៃក្រោយ​គាត់​នឹង​ណែនាំ​អ្នកផ្សេង​ឲ្យ​មករក​សេវាកម្ម​របស់​យើង” ។

លោក​បន្តថា នៅពេល​អ​ថិ​ជន​ណែនាំ​បន្ត​គា្ន នោះ​មានន័យថា គេ​មាន​ជំនឿ​របស់​យើង និង​ទទួលបាន​ផល​ច្រើន តែបើ​អតិថិជន ដែល​មិនដែល​ប្រើ​សេវាកម្ម​របស់​យើង ប្រាកដ​ណាស់​គេ មិនសូវ​ទុកចិត្ត​ខ្លាំង​នោះទេ” ។

លោក​ច្រឹ​ក សុខ​នី​ម បានផ្តល់​យោបល់​បន្ថែម​ទៀតថា ក្នុងនាម​ជា​អ្នកផ្តល់​សេវាកម្ម​លើ​វិស័យ​អចលនទ្រព្យ យើង​ត្រូវមាន​ចំណេះដឹង​ឲ្យ​បាន​ជ្រៅជ្រះ តាមរយៈ​បង្កើន​ចំណេះដឹង​ជាប្រចាំ កា​អនុវត្ត​ផ្ទាល់ និង​ដឹង​ពី​តម្លៃ​ទីផ្សារ​នៅក្នុង​តំបន់​ដែល​ខ្លួន​កាន់ ដែល​ចំណេះដឹង​ទាំងអស់នេះ នឹងធ្វើ​ឲ្យ​អតិថិជន​មាន​ទំនុកចិត្ត និង​ជឿជាក់​លើ​យើង។

លោក​បន្តថា “បើ​យើង​មានចំណេះដឹង​ទាប​ជាង​ពួកគាត់ នៅពេលដែល​យើង​និយាយ​ទៅ គាត់​នឹងមិន​ទុកចិត្ត​យើង​នោះទេ និង​ជាពិសេស​យើង​ត្រូវ​ស្គាល់​អ​ថិ​ជន ជា​គោលដៅ​របស់ខ្លួន​អោយបាន​ច្បាស់លាស់ ហើយ​យើង​ធ្វើការ​ជាមួយ​អ្នក និង​អ្នក​ផ្ទាល់” ។ លោក​បន្តថា “បើ​មិន​ស្គាល់​អតិថិជន​របស់ខ្លួន​ច្បាស់​ទេ យើង​នឹង​បរាជ័យ​តាមរយៈ​ការធ្វើ​កិច្ច​ការមិន​ច្បាស់លាស់” ។

បើតាម​លោក ច្រឹ​ក សុខ​នី​ម ភ្នាក់ងារ​ផ្តល់​សេវា​អ​ចនទ្រ​ព្យ​ទាំង​ចុះបញ្ជី និង​មិន​ចុះបញ្ជី​មាន​ប្រមាណ​ក្រោម៣ម៉ឺន​នាក់ នៅ​ទាំង​ទូទាំងប្រទេស ដែល​កំពុង​ប្រតិបត្តិការ ខណៈដែល​កម្ពុជា នៅ​ខ្វះខាត​អ្នកជំនាញ​លើ​វិស័យ​ជាច្រើន ស្របពេល​ដែល​ដែល​កំពុង​បោះជំហាន​ទៅមុខ៕

អ្នកជំនាញ​អន្តរជាតិ៖ តំបន់​អាស៊ីអាគ្នេយ៍​ជា​ប្លុក​ងាយស្រួល​វិនិយោគ​ជាងគេ

ដោយ ហ្សូ​លី

ភ្នំពេញៈ បណ្តា​ប្រទេស​នៅ​អាស៊ីអាគ្នេយ៍​ត្រូវបាន​គេ​ស្គាល់​ថា ជា​អ្នក​ទាក់ទាញ​អ្នកទេសចរ​ថ្ងៃ​ឈប់សម្រាក និង​អ្នកធ្វើដំណើរ​សា​កាដូ​ជុំវិញ​ពិភពលោក ដោយសារ​ឆ្នេរ​ដ៏​ស្រស់ស្អាត​មាន​ម្ហូបប្លែកៗ និង​ការចំណាយ​ទាប ទាក់ទង​នឹង​ការរុករក​តំបន់​នេះ។

ទោះយ៉ាងណា​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ តំបន់​ដែល​រួមមាន មី​យ៉ាន់​ម៉ា ប្រ៊ុយណេ កម្ពុជា ទី​ម័​រ​ខាងកើត​ឥណ្ឌូនេស៊ី ឡាវ ម៉ាឡេស៊ី ហ្វីលីពីន សឹង្ហ​បូរី ថៃ និង​វៀតណាម ត្រូវបាន​គេ​ចាត់ទុកថា ជា​តំបន់​យុទ្ធសាស្ត្រ​អាទិភាព​ខ្ពស់ ដោយសារ​កត្តា​ជាច្រើន ដែល​ធ្វើឱ្យ​ការធ្វើ​អាជីវកម្ម នៅក្នុង​តំបន់​នេះ មើលទៅ​កាន់តែ​ទាក់ទាញ​នៅពេល​សេដ្ឋកិច្ចពិភពលោក​បន្ត​អភិវឌ្ឍ​និង​ផ្លាស់ប្តូរ។

ខណៈពេលដែល​មានគុណ​សម្បត្តិផ្សេងៗគ្នា ក្នុង​ការធ្វើ​ពាណិជ្ជកម្ម​នៅ​ជ្រុង​មួយ​នៃ​ពិភពលោក​នេះ ក៏​មានមតិ​មួយចំនួន​ពី​ម្ចាស់​អាជីវកម្ម ដែល​កំពុង​រីកចម្រើន​គួរ​ពិចារណា មុនពេល​សម្រេចចិត្ត​បង្កើត​ហាង​នៅក្នុង​តំបន់។  សូម​ក្រឡេកមើល​គុណសម្បត្តិ​មួយចំនួន​នៃ​ការធ្វើ​ពាណិជ្ជកម្ម​នៅក្នុង​តំបន់​អាស៊ីអាគ្នេយ៍។

 សេដ្ឋកិច្ច​រឹងមាំ និង​រីកចម្រើន

ពាណិជ្ជកម្ម​នៅក្នុង​តំបន់​នេះ ត្រូវបាន​ជួយ​ដោយ​សមាគម ប្រជាជាតិ​អាស៊ីអាគ្នេយ៍ (អាស៊ាន) ។  ជា​ក្រុម​ប្រទេស​ក្នុង​តំបន់ ដែលមាន​គោលបំណង​ជំរុញ​កិច្ចសហប្រតិបត្តិការ​ន​យោ​បាយ​សេដ្ឋកិច្ច និង​សន្តិសុខ​ក្នុងចំណោម​ប្រទេស​ចំនួន១០ នៃ​ប្រជាជាតិ​ទាំង១១នៅ​អាស៊ីអាគ្នេយ៍។  ចាប់តាំងពី​ការបង្កើត​សមាគម​អាស៊ាន ទទួលបាន​សារៈសំខាន់ ជា​ប្លុក​ពាណិជ្ជកម្ម ហើយ​ឥឡូវនេះ​ត្រូវបានគេទទួលស្គាល់​ថា ជា​តំបន់​ធំ​លំដាប់​ទី៣ នៅលើ​ពិភពលោក។

អាស៊ាន​ទទួលខុសត្រូវ ក្នុងការ​លុបចោល​រាល់​ពន្ធ​លើ​ការនាំ​ចូល និង​នាំចេញ​លើ​ទំនិញ​ដែល​បាន​ជួញដូរ នៅក្នុង​ប្រទេស​សមាជិក​ទាំង១០ ក៏ដូចជា​កិច្ចព្រមព្រៀង​ពាណិជ្ជកម្ម​សេរី​ជាច្រើន ដែល​បាន​ចូល​ជាមួយ​ដៃគូ​សន្ទនា​ផ្សេងទៀត ដូចជា ជប៉ុន ចិន ឥណ្ឌា សាធារណរដ្ឋ​កូរ៉េខាងត្បូង ណូ​វែ​ល​សេ​ឡង់ និង​អូស្ត្រាលី។

កិច្ចព្រមព្រៀង​ទាំងនេះ បាន​ដើរតួ​ក្នុងការ​អនុញ្ញាតិ ឱ្យមាន​កំណើនសេដ្ឋកិច្ច​និង​ការអភិវឌ្ឍ ដែល​ត្រូវបាន​គេ​រំពឹងថា នឹង​លើសពី​មធ្យម​សកល សម្រាប់​អនាគត​ដែល​អាច​មើលឃើញ​ជាមុន។  នៅ​ឆ្នាំ២០១៩ ផលិតផល​សរុប​ក្នុងស្រុក​សរុប របស់​អាស៊ាន​មាន​ប្រមាណ៩,៣៤ទ្រី​លាន​ដុល្លារ ដែលជា​ការកើនឡើង​គួរឱ្យកត់សម្គាល់​ពីឆ្នាំមុនៗ ដែល​ឆ្លុះបញ្ចាំង​ពី​កំណើនសេដ្ឋកិច្ច​រីកចម្រើន និង​រីកលូតលាស់​របស់​ប្រទេស​សមាជិក។

ភាពងាយស្រួល​នៃ​ការធ្វើ​អាជីវកម្ម

ចំពោះ​ការខិតខំ​ប្រឹងប្រែង​រប​ស់​ធនាគារពិភពលោក ដែល​បាន​បង្កើត​ភាពងាយស្រួល​ក្នុងការ​ធ្វើ​អាជីវកម្ម និង​គម្រោង​ធ្វើ​ធុរកិច្ច វា​កាន់តែ​ងាយស្រួល​ជាង​មុន ក្នុងការ​សម្រេចចិត្ត ដែលមាន​ការអប់រំ​អំពី​កន្លែង ដែល​ត្រូវបង្កើត​អាជីវកម្ម​ថ្មី​របស់​អ្នក។

យោងតាម​ស​ន្ទ​ស្សន៍​ធ្វើ​អាជីវកម្ម​ឆ្នាំ២០២០ បើ​និយាយ​ពី​ការចាប់ផ្តើម​អាជីវកម្ម​គឺ​ប្រទេស៣ ក្នុងចំណោម​ប្រទេស​អាស៊ាន​ទាំង១០ ស្ថិតក្នុង​លំដាប់​ទី២៥ ដោយ​ប្រទេស​ថៃ​ឈរ​នៅ​លេខ២១ ម៉ាឡេស៊ី​ឈរ​នៅ​លេខ១២ និង​សិង្ហ​បុរី ឈរ​នៅ​ពីក្រោយ​ប្រទេស​ណូ​វែ​ល​ហ្សេ​ឡង់​ចំណាត់ថ្នាក់​លេខ។

ពិន្ទុ​នេះ​រួមមាន​កត្តា​ជាច្រើន រួមទាំង​ពេលវេលា​ដែល​ត្រូវការ ដើម្បី​បង្កើត​អាជីវកម្ម​ចំនួន​នីតិវិធី ត្រូវអនុវត្ត​និង​ថ្លៃដើម និង​ចំណាយ​ដើមទុន​អប្បបរមា សម្រាប់​អាជីវកម្ម​ខ្នាតតូច​និង​មធ្យម​ដើម្បី​ចាប់ផ្តើម និង​ចាប់ផ្តើម​ប្រតិបត្តិការ​ជា​ផ្លូវការ។ វា​ក៏​ជាការ​ចង្អុលបង្ហាញ​ផងដែរ នូវ​អ្វីដែល​ម្ចាស់​អាជីវកម្ម អាច​មានការ​ប្រឈម​នៅក្នុង​វិស័យ​ទាំងនេះ៕ Business Manchester

គម្រោងចាក់បេតុងរៀបខឿនចែកទ្រូងផ្លូវជា២នៅកំណាត់ផ្លូវជាតិលេខ៤ ចាប់ផ្តើមសាងសង់នៅថ្ងៃទី២៣ ខែតុលានេះ

ដោយ ៖ វុត្ថា

ភ្នំពេញ ៖ គម្រោងចាក់បេតុងរៀបខឿនសួនច្បារកណ្តាលថ្នល់ពុះខ័ណ្ឌចែកទ្រូងផ្លូវជា២នៅកំណាត់ផ្លូវជាតិលេខ៤ បានចាប់ផ្តើមសាងសង់នៅថ្ងៃទី២៣ ខែតុលានេះ ដើម្បីបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ និងកាត់បន្ថយគ្រោះថ្នាក់ចរាចរណ៍ ។

លោក វង្ស សំអាត អគ្គមេបញ្ជាការរងកងវិស្វកម្មសម្ដេចតេជោ ហ៊ុន សែន ឱ្យដឹងនៅថ្ងៃទី២៣ ខែតុលា ឆ្នាំ ២០២០នេះថា ផែនការខ័ណ្ឌចែកពុះទ្រូងផ្លូវជាតិលេខ៤ ចាប់ពីមុខរោងចក្រស្រាបៀអង្គរ រហូតមកដល់មុខទីបញ្ជាការកងរាជអាវុធហត្ថ គឺត្រូវពង្រីកទទឹង២៩ម៉ែត្រ និងបណ្តោយ ៦៧០០ម៉ែត្រ ដោយធ្វើការខ័ណ្ឌពុះទ្រូងផ្លូវដោយសួនដែលមានបណ្តោយ៦៧០០ម៉ែត្រផងដែរ ។

លោកបន្តថា ផ្លូវនេះគឺមានលក្ខណៈពិសេស ដែលមានទំហំផ្លូវធំ គឺមានផ្លូវ៣គន្លងទៅ និង៣គន្លងមក និងមានផ្លូវអាចឱ្យបត់ត្រឡប់ក្រោយ២កន្លែង គឺនៅចំណុចក្បាលឆាយ និងជិតសាលាបឋមសិក្សាចំការកៅស៊ូ ដែលអាចឱ្យរថយន្តកុងតឺណឺដែលមានខ្នាតវែងបំផុត អាចបត់បញ្ច្រាសគ្នាបានតែម្តង ។

លោកបន្ថែមថា ការបង្កើតឱ្យមានខ័ណ្ឌចែកពុះទ្រូងផ្លូវនេះនឹងអាចកាត់បន្ថយនូវគ្រោះថ្នាក់ចរាចរណ៍និងបង្កើនសោភ័ណភាពរបស់ផ្លូវបន្ថែមទៀត ។ ជាមួយគ្នានេះ លោកអំពាវនាវដល់អ្នកបើកបរម៉ូតូ រថយន្ត តូច ធំ មេត្តាប្រុងប្រយត្ន័ដើម្បីចៀសសវាងគ្រោះថ្នាក់ដែលកើតឡើងជាយថាហេតុ និងបើកបរប្រុងប្រយ័ត្នទាំងអស់គ្នា ដើម្បីកម្ពុជាគ្មានគ្រោះថ្នាក់ចរាចរណ៏ ។

តាមផែនការ ក្រសួងសាធារណការ និងដឹកជញ្ជូន នឹងលើកម្ពស់ផ្លូវជាតិលេខ ៤នេះ ចាប់ពីភ្នំពេញទៅកាន់ខេត្តព្រះសីហនុ ដោយពង្រីកឱ្យដល់ ១១ ម៉ែត្របន្ថែមទៀត ដែលទទួលបានហិរញ្ញប្បទានពីធនាគារអភិវឌ្ឍន៍អាស៊ី (ADB) ដើម្បីសម្រួលដល់ការធ្វើដំណើរ និងដឹកជញ្ជូនទំនិញ៕

រដ្ឋាភិបាលអនុម័តគម្រោងវិនិយោគសាងសង់រោងចក្រអគ្គិសនីដុតធ្យូងថ្ម តម្លៃជិត ៣០០លានដុល្លារនៅខេត្តឧត្តរមានជ័យ

ដោយ ៖ វុត្ថា

ភ្នំពេញ៖ រាជរដ្ឋាភិបាលកម្ពុជា បានសម្រេចអនុម័តគម្រោងវិនិយោគសាងសង់រោងចក្រអគ្គិសនីដុតធ្យូងថ្ម អានុភាព ២៦៥ មេហ្កាវ៉ាត់ ដែលមានទីតាំងវិនិយោគស្ថិតនៅភូមិពាមក្នុង និងភូមិឈើទាលជ្រុំ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ មានទុនវិនិយោគចំនួន ២៩៤,៣ លានដុល្លារអាមេរិក។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាចេញផ្សាយនៅថ្ងៃទី ២៣ ខែតុលា ឆ្នាំ ២០២០នេះ បានឱ្យដឹងថា គម្រោងនេះ ត្រូវបានវិនិយោគ ដោយក្រុមហ៊ុន ODDORMEANCHEY POWER INDUSTRIAL CO., LTD និងអាចបង្កើតការងារបានចំនួន ២២០កន្លែង។

ក្រុមហ៊ុន ODDORMEANCHEY POWER INDUSTRIAL CO., LTD បានចុះបញ្ជីពាណិជ្ជកម្ម និងប្រតិបត្តិការវិនិយោគនៅក្នុងប្រទេសកម្ពុជាកាលពីខែមករា ឆ្នាំ ២០២០ កន្លង មកនេះ ដែលជាប្រភេទក្រុមហ៊ុនឯកជនទទួលខុសត្រូវមានកម្រិត។

រាជរដ្ឋាភិបាលកម្ពុជា បានដាក់ចេញផែនការអភិវឌ្ឍន៍វិស័យថាមពលអគ្គិសនី ដោយបានទាក់ទាញវិនិយោគិនជាតិ និងអន្តរជាតិឱ្យវិនិយោគសាងសង់រោងចក្រថាមពលអគ្គិនីឃ្យូងថ្ម ប្រព័ន្ធកកើតឡើងវិញ (Solar System) និងវារីអគ្គិសនីជាដើម្បី ដើម្បីបំពេញតម្រូវប្រើប្រាស់ ដែលកើនឡើងជារៀងរាល់ឆ្នាំ កម្ពុជា និងកាត់បន្ថយការនាំចូលពីក្រៅប្រទេស៕

រដ្ឋាភិបាលអនុម័តគម្រោងវិនិយោគចំនួន៦ តម្លៃជិត៤០០លានដុល្លារអាមេរិក

ដោយ ៖ រ៉ាណេត

ភ្នំពេញ ៖ តបតាមសំណើសុំវិនិយោគរបស់ក្រុមហ៊ុនចំនួន៦ ដែលមានទំហំទឹកប្រាក់វិនិយោគសរុបជិត៤០០លានដុល្លារ ត្រូវបានរាជរដ្ឋាភិបាល តាមរយៈគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា សម្រេចចេញវិញ្ញាបនបត្រចុះបញ្ជីជាស្ថាពរ។

ក្រុមហ៊ុនទាំង៦ ដែលទើបតែទទួលបានការគាំទ្រពីសំណាក់រាជរដ្ឋាភិបាលនៅរសៀលថ្ងៃទី២៣ ខែតុលា ឆ្នាំ២០២០នេះ រួមមានដូចខាងក្រោម៖
១. LUENTEC TEXTILE SOLUTIONS CO., LTD គម្រោងបង្កើតរោងចក្របោកគក់ ជ្រលក់ពណ៌ និងបោះពុម្ពដែលមានទីតាំងវិនិយោគស្ថិតនៅផ្លូវជាតិលេខ៣ ភូមិក្រាំងទ្រា សង្កាត់ព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៣,៦លានដុល្លារអាមេរិក និងអាចបង្កើតការងារបានចំនួន ២៦៨កន្លែង។
២. LECROWN SHOES INDUSTRY CO., LTD គម្រោងបង្កើតរោងចក្រផលិតស្បែកជើង និងគ្រឿងបន្សំស្បែកជើង ដែលមានទីតាំងវិនិយោគស្ថិតនៅផ្លូវជាតិលេខ៦ ភូមិរវាង ឃុំខ្នុរដំបង ស្រុកជើងព្រៃ ខេត្តកំពង់ចាម មានទុនវិនិយោគប្រមាណ ២២,៣លានដុល្លារអាមេរិក និងអាចបង្កើតការងារបានចំនួន ៤,២៤៣កន្លែង។
៣. C.F.C GARMENT PTY CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅសួនឧស្សាហកម្មវៀលស៊ុន អគារ B ផ្លូវជាតិលេខ៤ ភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ មានទុនវិនិយោគប្រមាណ ៥,១ លានដុល្លារអាមេរិក និងអាចបង្កើតការងារបានចំនួន ១,៦៧២កន្លែង។
៤. ODDORMEANCHEY POWER INDUSTRIAL CO., LTD គម្រោងសាងសង់រោងចក្រអគ្គិសនីដុតធ្យូងថ្ម អានុភាព ២៦៥ មេហ្កាវ៉ាត់ ដែលមានទីតាំងវិនិយោគស្ថិតនៅភូមិពាមក្នុង និងភូមិឈើទាលជ្រុំ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ មានទុនវិនិយោគចំនួន ២៩៤,៣ លានដុល្លារអាមេរិក និងអាចបង្កើតការងារបានចំនួន ២២០កន្លែង។
៥. ODM POWER LINE COMPANY LIMITED គម្រោងសាងសង់ខ្សែបណ្តាញបញ្ជូនអគ្គិសនី តង់ស្យុង ២៣០គីឡូវ៉ុល តភ្ជាប់ពីរោងចក្រអគ្គិសនីដុតធ្យូងថ្ម ខេត្តឧត្តរមានជ័យ មកអនុស្ថានីយសៀមរាបខាងកើត ដែលមាន ទីតាំងវិនិយោគស្ថិតនៅខេត្តឧត្តរមានជ័យ និងខេត្តសៀមរាប មានទុនវិនិយោគប្រមាណ ៦១,៤ លានដុល្លារអាមេរិក និងអាចបង្កើតការងារបានចំនួន ៤៩កន្លែង។
៦. SUNENERGY TECHNOLOY (CAMBODIA) CO., LTD គម្រោងបង្កើតរោងចក្រផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅបុរីសង្ឃឹមថ្មី ភូមិតានួន សង្កាត់កំបូល ខណ្ឌកំបូល រាជធានីភ្នំពេញ មានទុនវិនិយោគប្រមាណ ៦,៦ លានដុល្លារអាមេរិក និងអាចបង្កើតការងារបានចំនួន ១៥៥កន្លែង។

រដ្ឋាភិបាលនឹងចាប់ផ្តើមពិគ្រោះយោបល់លើសេចក្តីព្រាងច្បាប់ថ្មីស្តីពីវិនិយោគ កម្ពុជានៅចុងខែនេះ

ដោយវុត្ថា

ភ្នំពេញៈ រាជរដ្ឋាភិបាលកម្ពុជា នឹងចាប់ផ្តើមបើកកិច្ចប្រជុំពិគ្រោះយោបល់លើសេចក្តីព្រាងច្បាប់ថ្មីស្តីពី វិនិយោគនៃកម្ពុជាជាមួយភាគីពាក់ព័ន្ធ នៅថ្ងៃទី២៨ ខែតុលា ឆ្នាំ ២០២០ខាងមុខនេះ ដែលដឹកនាំដោយលោក អូនព័ន្ធ មុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់គេហទំព័រ propertyarea.asia នៅថ្ងៃទី ២៣ ខែតុលា ឆ្នាំ ២០២០នេះ ឱ្យដឹងថា សភាពាណិជ្ជកម្មកម្ពុជា ដែលមានក្រុមការងារ “ឃ” “នីតិកម្ម ពន្ធដារ និងអភិបាលកិច្ច” កាលពីម្សិលមិញនេះ បានបើកកិច្ចប្រជុំពិភាក្សាសេចក្តីព្រាងច្បាប់ថ្មីស្តី ពីវិនិយោគកម្ពុជា ដើម្បីប្រមូលធាតុចូល ការយល់ឃើញ និងការស្នើសុំពីផ្នែកឯកជនពាក់ព័ន្ធ ដើម្បីដាក់ចូលក្នុងកិច្ចប្រជុំពិភាក្សាពិគ្រោះយោបល់ជាមួយនឹងដៃគូ រដ្ឋាភិបាលនៅថ្ងៃទី២៨ ខែតុលា ឆ្មាំ២០២០។

លោកឧកញ៉ា បន្តថា “កិច្ចប្រជុំពិគ្រោះយោបល់រួមនេះ ដែលនឹងប្រព្រឹត្តិទៅនៅចុងខែនេះ ដឹកនាំដោយ ឯកឧត្តម ឧបនាយករដ្ឋមន្ត្រី អូន ព័ន្ធមុនីរ័ត្នដោយផ្ទាល់ ព្រោះថា ច្បាប់វិនិយោគថ្មីនេះ ត្រូវបានដាក់មកវិស័យឯកជនក្នុងការផ្តល់មតិបន្ថែម   ហើយនេះ គឺជាអ្វីដែល វិស័យឯកជនចង់បាន ព្រោះថារាល់ច្បាប់ពាក់ព័ន្ធនឹងពាណិជ្ជកម្ម ត្រូវបានឆ្លងជាមួយសភាពាណិជ្ជកម្ម ដែលមានសមាជិកជាអ្នករកស៊ីច្រើន”។

លោកឧកញ៉ាបន្ថែមថា “ការធ្វើយ៉ាងដូច្នេះ គឺដើម្បីធ្វើយ៉ាងកុំឱ្យច្បាប់ថ្មី ដែលចេញទៅហើយមានភាពប្រទាំងទិសគ្នាក្នុងការអនុវត្ត ដែលនឹងធ្វើឱ្យប៉ះពាល់ដល់ប្រយោជន៍បុគ្គលផង និងផលប្រយោជន៍ដល់សេដ្ឋកិច្ចជាតិផង”។

លោកឧកញ៉ាពន្យល់ថា “សេចក្តីព្រាងច្បាប់វិនិយោគថ្មីនេះ នឹងជួយច្រើនដល់ការសម្រួលវិនិយោគទាំងនៅក្នុងស្រុក និងបរទេស  ដូចជាមួយការលើកទឹកចិត្តឱ្យមានការលើកលែងចំពោះប្រាក់ចំណេញ និងការនាំចូលនូវវត្ថុធាតុដើម ឬបង្កើតរោងចក្រសហគ្រាសដោយរួចពន្ធជាដើម ហើយទាំងនេះ គឺជាចំណុចនៃការទាក់ទាញវិនិយោគ”។

លោកឧកញ៉ាលឹម ហេងបញ្ជាក់ទៀតថា បើទោះបីមានការលើកទឹកចិត្តចំពោះពន្ធក៏ដោយ អ្វីដែលសំខាន់គឺកំណែទម្រង់សេដ្ឋកិច្ចផ្ទៃក្នុង ដូចប្រមុខនៃរាជរដ្ឋាភិបាលសម្តេចតេជោ ហ៊ុន សែន ធ្លាប់បានលើកឡើង ដោយមានការកាត់បន្ថយការិយាធិប្បតេយ្យ  និងកាត់បន្ថយចំពោះស្ថាប័នមិនចាប់បាច់ជាដើម។

អនុប្រធានសមភាពាណិជ្ជកម្មរូបនេះ បញ្ជាក់ទៀតថា “នៅពេលគ្រប់ភាគីពាក់ព័ន្ធបានឯកភាពគ្នា នៅក្នុងកិច្ចប្រជុំពិគ្រោះយោបល់ខាងមុខនេះ នឹងដាក់ជូនទៅគណរដ្ឋម  ន្ត្រី ដើម្បីពិនិត្យ និងសម្រេច ហើយនៅពេលដល់នេះ ខ្ញុំថា វាមិនយូនោះទេ ព្រោះសម្តេចតេជោ ហ៊ុន សែន បានមានបំណងចំពោះការធ្វើច្បាប់ថ្មីនេះ យូមកហើយ។

លោកឧកញ៉រំពឹងថា “ច្បាប់វិនិយោគថ្មីរបស់កម្ពុជា យ៉ាងយូនៅឆ្នាំក្រោយនេះយើងនឹងបានប្រើប្រាស់ហើយ”៕

លោកឧកញ៉ាបណ្ឌិតគីម ហ៊ាង បង្ហាញវិថីឆ្ពោះទៅកាន់ភាពជោគជ័យក្នុងវិស័យ អចលនទ្រព្យ

ដោយៈ រ៉ាណេត

បាត់ដំបងៈ ជាប្រតិបត្តិករយ៉ាងជោគជ័យ នៅក្នុងវិស័យអចលនទ្រព្យ បច្ចុប្បន្នលោកឧកញ៉ា បណ្ឌិត គីម ហ៊ាង បាននិងកំពុងនាំយកក្រុមហ៊ុនភ្នាក់ងារអចលនទ្រព្យលំដាប់ពិភពលោកមកកាន់កម្ពុជា ដែលមានឈ្មោះថា KW  Cambodia រួមជាមួយនឹងផែនការយុទ្ធសាស្ត្រ បង្កើតសាខាឱ្យបាន១០០ទីតាំង និងបង្កើនក្រុមការងារឱ្យបាន៧០០០នាក់នៅទូទាំងប្រទេស។

ប្រធាន KW Cambodia លោកឧកញ៉ា បណ្ឌិត គីម ហ៊ាង បានមានប្រសាសន៍ប្រាប់ភ្នាក់ងារគេហទំព័រ Propertyarea.asia នៅព្រឹកថ្ងៃទី២៣ ខែតុលា ឆ្នាំ២០២០ថា គោលដៅចម្បងរបស់លោក គឺធ្វើយ៉ាងណាអាចជំរុញវិស័យអចលនទ្រព្យនៅកម្ពុជា ឱ្យមានភាពរីកចម្រើនខ្លាំង និងបណ្តុះបណ្តាល ចែករំលែកចំណេះដឹង និងជំនាញផ្នែកអចលនទ្រព្យ ដល់មនុស្សជុំវិញខ្លួនឱ្យបានច្រើនតាមដែលអាចធ្វើទៅបាន។

លោកឧកញ៉ាបានបញ្ជាក់ថា “ជាញឹកញាប់ ខ្ញុំតែងផ្តល់ពេលវេលាសម្រាប់វគ្គប  ណ្តុះបណ្តាល និងចែករំលែកនូវចំណេះដឹង ជាពិសេសពាក់ព័ន្ធទៅនឹងវិស័យអចលនទ្រព្យនៅកម្ពុជា ត្បិតវិស័យមួយនេះមានភាពទូលំទូលាយ ដែលអាចផ្តល់នូវផលប្រយោជន៍យ៉ាងច្រើនដល់អ្នកប្រតិបត្តិ”។ លោកបន្តថា “ជាក់ស្ដែងដូចជានៅថ្ងៃទី២៤ ខែតុលា ឆ្នាំ២០២០ តាមរយៈក្រុមហ៊ុនភ្នាក់ងារអចលនទ្រព្យអន្តរជាតិ KW Cambodia បានបង្កើតវគ្គសិក្ខាសាលាស្ដីពី វិថីឆ្ពោះទៅកាន់ភាពជោគជ័យ ក្នុងវិស័យអចលនទ្រព្យ ដែលមានអ្នកចូលរួមសិក្សា និងស្វែងយល់ចំនួន២០០នាក់ នៅសណ្ឋាគារ ប្រេស៊ីដង់ ក្រុងបាត់ដំបង”។

លោកឧកញ៉ាបណ្ឌិត គីម ហ៊ាង បានមានប្រសាសន៍បន្តទៀតថា តាមរយៈនៃអង្គសិក្ខាសាលាមួយនេះ អ្នកចូលរួមទាំងអស់ដែលពាក់ព័ន្ធ និងកំពុងប្រឡូកនៅក្នុងទីផ្សារអចលនទ្រព្យ នឹងបានស្វែងយល់បន្ថែមពីយុទ្ធសាស្ត្រទីផ្សារ គន្លឹះនៃការទិញ-លក់អចល​នទ្រព្យដែលទទួលបានផលចំណេញ ក៏ដូចជាវិធីសាស្ត្រនៃការតាមដានវាយតម្លៃអចលនវត្ថុប្រកបដោយភាពសុក្រឹត្យ និងស្របទៅនឹងតម្លៃលើទីផ្សារ ក្រោមការបណ្តុះបណ្តាលរបស់ខ្ញុំដោយផ្ទាល់ រួមជាមួយគ្រូជំនាញជាច្រើននាក់ទៀត”។

នៅក្នុងគោលដៅចម្បង របស់ក្រុមហ៊ុនភ្នាក់ងារអចលនទ្រព្យអន្តរជាតិ KW Cambodia ដែលគ្រប់គ្រង និងដឹកនាំដោយលោកឧកញ៉ាបណ្ឌិតគីម ហ៊ាង គឺបង្កើតសា​ខានៅតាមបណ្តាខេត្តក្រុងនានា ទូទាំងប្រទេសកម្ពុជាឱ្យបានចំនួន១០០ទីតាំង បង្កើនក្រុមការងារ និងពង្រីកវិសាលភាពឱ្យបានចំនួន៧០០០នាក់ រួមជាមួយនឹងការរកប្រាក់ចំណូលប្រចាំឆ្នាំឱ្យបានចំនួន១០០លានដុល្លារ នៅត្រឹមឆ្នាំ២០២៨ខាងមុខនេះ ៕

រដ្ឋាភិបាលអះអាងថា សេដ្ឋកិច្ចកម្ពុជារំពឹងថានឹងសម្រេចបានកំណើន ក្នុងរង្វង់៣,៥%នៅឆ្នាំ២០២១

ដោយៈប៊ី

ភ្នំពេញៈ រដ្ឋាភិបាលកម្ពុជាបានព្យាករណ៍ថា សេដ្ឋកិច្ចកម្ពុជានឹងងើបឡើងវិញ ក្នុងរង្វង់៣,៥ភាគរយនៅឆ្នាំ២០២១ខាងមុខនេះ។ នេះបើយោងតាមសិក្សារបស់រដ្ឋាភិបាលចេញផ្សាយនៅថ្ងៃទី២៣ ខែតុលា ឆ្នាំ២០២០ អំឡុងកិច្ចពិភាក្សាលើរបៀបវារៈស្ដីពី “សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២១”។

ការសម្រេចបានកំណើនក្នុងរង្វង់៣,៥ភាគរយនេះ នឹងធ្វើឱ្យផលិតផលសរុបក្នុងស្រុក (ផ.ស.ស.) ថ្លៃបច្ចុប្បន្ន ស្ថិតក្នុងរង្វង់១១៧,៩៣៩ពាន់លានរៀល សមមូលនឹងប្រមាណ២៩,០១៣លានដុល្លារអាមេរិក ស្របពេលដែលផ.ស.ស. សម្រាប់មនុស្សម្នាក់ត្រូវបានរំពឹងថានឹងកើនឡើងដល់១៧៧១ដុល្លារអាមេរិក បើប្រៀបធៀបនឹង១ ៦៨៣ដុល្លារអាមេរិកក្នុងឆ្នាំ២០២០។

– វិស័យឧស្សាហកម្មត្រូវបានព្យាករថា នឹងងើបឡើងវិញក្នុងអត្រាកំណើន៤,១%ក្នុងឆ្នាំ២០២១ ពីកំណើនអវិជ្ជមានក្នុងអត្រា -២,២% ក្នុងឆ្នាំ២០២០ ដោយសារការរំពឹងទុកនូវការងើបឡើងវិញ ក្នុងកម្រិតទាបនៃអនុវិស័យកាត់ដេរ និងអនុវិស័យសំណង់ ខណៈដែលអនុវិស័យកម្មន្តសាល មិនមែនកាត់ដេរត្រូវបានរំពឹងថា នៅរក្សាបានកំណើនល្អប្រសើរ។

– វិស័យសេវាកម្មត្រូវបានព្យាករថា នឹងមានកំណើនក្នុងអត្រាទាប៣,៦%ក្នុងឆ្នាំ២០២១ បើធៀបនឹងកំណើនអវិជ្ជមានក្នុងអត្រា -៣,០%ក្នុងឆ្នាំ២០២០ ដោយសារការរំពឹងទុកនៃការងើបឡើងវិញ ក្នុងកម្រិតទាបនៃសកម្មភាពសេដ្ឋកិច្ច ពិសេសក្នុងវិស័យទេ សចរណ៍ និងការប្រើប្រាស់ក្នុងស្រុកបន្ទាប់ពីវិបត្តិកូវីដ-១៩។

– វិស័យកសិកម្ម ត្រូវបានប៉ាន់ស្មានថាកើនឡើងក្នុងអត្រា១,៦%ក្នុងឆ្នាំ២០២១ ពីកំណើន០,៩%ក្នុងឆ្នាំ២០២០ ដោយសារការកើនឡើងនៃអនុវិស័យដំណាំ អនុវិស័យចិញ្ចឹមសត្វ និងអនុវិស័យនេសាទ។ អនុវិស័យដំណាំត្រូវបានព្យាករថា នឹងសម្រេចបានកំណើនខ្ពស់ជាងឆ្នាំ ២០២០ ដោយសារការរំពឹងទុក នូវកំណើនផលិតកម្មកសិកម្ម ស្របពេលដែលថ្លៃ និងតម្រូវការខាងក្រៅមានការកើនឡើង។

អត្រាអតិផរណាមធ្យមប្រចាំឆ្នាំត្រូវបានប៉ាន់ស្មានថា ស្ថិតក្នុងកម្រិតអាចគ្រប់គ្រងបានក្នុងអត្រា៣,១%ក្នុងឆ្នាំ២០២១ ដោយសារការរំពឹងទុកការកើនឡើងថ្លៃប្រេង លើទីផ្សារអន្តរជាតិ បន្ទាប់ពីការធ្លាក់ចុះយ៉ាងគំហុកក្នុងឆ្នាំ២០២០៕

ដើម្បីសម្រេចបានកំណើនសេដ្ឋកិច្ច ក្នុងរង្វង់៣,៥% ក្នុងបរិបទនៃ ការកើនឡើងនូវភាពមិនប្រាកដប្រជាទាំងក្នុង និងក្រៅប្រទេស។

+ ការរក្សាលំនឹងសង្គម-សេដ្ឋកិច្ច តាមរយៈការបន្តប្រយុទ្ធប្រឆាំងនឹងជំងឺកូវី៨-១៩ និងការបន្តរក្សាលំនឹងសកម្មភាពអាជីវកម្ម ព្រមទាំងការបន្តរក្សាលំនឹងជីវភាពប្រជាជន ដែលរួមមាន៖

– ការបន្តប្រយុទ្ធប្រឆាំងនឹងជំងឺកូវីដ- ១៩ តាមរយៈវិធានការសំខាន់ៗរួមមាន៖ការបង្កើនចំណាយលើវិស័យសុខាភិបាល និងការជំរុញអនុវត្តកម្មវិធី លើកកម្ពស់សុខភាពសាធារណៈ ដោយផ្តោតលើវិធានការការពារនិងព្យាបាល។

– ការបន្តរក្សាលំនឹងសកម្មភាពអាជីវកម្ម តាមរយៈការផ្តល់នូវការលើកទឹកចិត្ត និងការអនុគ្រោះផ្នែកសារពើពន្ធ គួបផ្សំនឹងការជំរុញផ្តល់ឥណទាន ព្រមទាំងការបង្កើនសន្ទនីយភាពទៅក្នុងទីផ្សារ ដើម្បីឱ្យអាជីវកម្មអាចបន្តដំណើរការបាន។

– ការបន្តរក្សាលំនឹងជីវភាពប្រជាជន តាមរយៈការបន្តអនុវត្តនូវកម្មវិធីផ្ទេរសាច់ប្រាក់កម្មវិធីសាច់ប្រាក់ពលកម្ម និងកម្មវិធីបណ្តុះបណ្តាលជំនាញរយៈពេលខ្លី ដើម្បីបង្កើនលទ្ធភាពបង្កើតអាជីវកម្មផ្ទាល់ខ្លួន ចាប់យកការងារក្នុងវិស័យថ្មី ឬមានបច្ចេកទេសខ្ពស់ជាងមុន បង្កើតការងារថ្មីជំនួសការងារ ដែល បាត់បង់ជំរុញសកម្មភាព អាជីវកម្មរបស សហគ្រាសធុនតូច និងមធ្យម និងជួយសម្រួលការផ្លាស់ប្តូរការងារពីវិស័យ ដែលទទួលរងផលប៉ះពាល់ពីជំងឺកូវីដ-១៩ ទៅវិស័យផ្សេងទៀត។

+ ការជំរុញកំណើនសេដ្ឋកិច្ច តាមរយៈការបន្តលើកកម្ពស់ភាពប្រកួតប្រជែង ការជំរុញការធ្វើពិពិធ-កម្មសេដ្ឋកិច្ច និងការបន្តកែទម្រង់ជារចនាសម្ព័ន្ធ ដែលរួមមាន៖

– ការបន្តបង្កើនភាពប្រកួតប្រជែង តាមរយៈវិធានការសំខាន់ៗរួមមាន ការជួយសម្រួលកាត់បន្ថយថ្លៃដើមពេលវេលា និងបង្កើនភាពងាយស្រួលដល់កាធ្វើអាជីវកម្ម ដោយបន្តពង្រឹងកិច្ចសម្រួលពាណិជ្ជកម្ម បន្តកាត់បន្ថយថ្លៃ និងធានាស្ថិរភាពនៃការផ្គត់ផ្គង់អគ្គិសនី កាត់បន្ថយថ្លៃដឹកជញ្ជូន និង ឡូជីស្ទីក បង្កើនការតភ្ជាប់ឌីជីថល និងហេដ្ឋារចនាសម្ព័ន្ធរូបវន្ត បង្កើនការបណ្តុះបណ្តាលជំនាញ កាត់បន្ថយកម្រៃសេវាមិនផ្លូវការ លើកកម្ពស់សេវាបង់ពន្ធ កាត់បន្ថយការធ្វើសវនកម្ម និងអធិការកិច្ចត្រួតគ្នា និងជំរុញការប្រកួតប្រជែងដោយស្មើភាព៕

ក្រុមហ៊ុនជីប ម៉ុងលែនដ៏កំពុងកែលំអរផ្លូវ១២ខ្សែដើម្បីផ្លាស់ប្តូរមុខមាត់ Grand Phnom Penh City

ដោយគង់ សូរិយា

ភ្នំពេញៈ ក្រុមហ៊ុន ជីប ម៉ុង លែនបាននិងកំពុងសិក្សាលើវិថីចំនួន១២ខ្សែពង្រីកឲ្យ

ធំជាងមុន និងធ្វើឲ្យប្រសើរឡើងនូវបរិស្ថាន ដើម្បីជំរុញភាពប្រសើរឡើងគួរឲ្យកត់សម្គា​ល់នូវមុខមាត់ ហ្គ្រេន ភ្នំពេញ ស៊ីធី ក្រោយទទួលបានសិទ្ធិអភិវឌ្ឍគម្រោងនេះ។

យោងតាមព៌តមាន ដែលបានចេញផ្សាយនៅសារព៌តមានFreshnewsបានឲ្យដឹងថា លក្ខណៈកែប្រែគួរឲ្យកត់សម្គាល់មានដូចជាវិថីចូល ហ្គ្រេន ភ្នំពេញ ស៊ីធី និងវិថីក្នុងគម្រោង។ជីប ម៉ុង លែន កំពុងកែលម្អវិថី និងមហាវិថីចំនួន១២ខ្សែ ដែល៣ខ្សែមានទទឹង១៨ម៉ែត្រ និង៩ខ្សែទៀតមានទទឹង៨ម៉ែត្រ ដើម្បីសម្រួលចរាចរណ៍ក្នុងគម្រោងឲ្យកាន់តែល្អប្រសើរ សម្រាប់ទាំងយានយន្ត និងថ្មើរជើង។ កាន់តែពិសេស ផ្លូវក្នុងគម្រោងអមសងខាងដោយផ្លូវថ្មើរជើងធំទូលាយ មានសួនច្បារ និងដើមឈើធំៗ។

ទន្ទឹមនឹងនេះ ជីប ម៉ុង លែន បានវិនិយោគទឹកប្រាក់ជាង១លានដុល្លារ សហរដ្ឋអាមេរិកបន្ថែមទៀត ដើម្បីកែលម្អសោភ័ណភាពទីលានវាយកូនហ្គោល ដោយបានទិញយកសម្ភារៈបរិក្ខាទំនើបៗមាន ដូចជា ឡានកូនហ្គោល (Golf Cart) ម៉ាស៊ីនកាត់ស្មៅ និងសម្ភារទំនើបៗជាច្រើនទៀត ដើម្បីថែទាំទីលានវាយកូនហ្គោល កែលម្អសោភ័ណភាព Club House ដើម្បីផ្តល់សេវាកម្មកាន់តែប្រសើរជូនភ្ញៀវផងដែរ។

ជីប ម៉ុង លែន ក៏បានផ្តោតលើការអភិវឌ្ឍបៃតងក្នុងគម្រោង ដែលនឹងមាន Central Park ដែលជាឧទ្យានដ៏ធំ ផ្តល់ជូនសហគមន៍រស់នៅក្នុង ហ្គ្រេន ភ្នំពេញ ស៊ីធី ភាពបៃតង ដើមឈើធំៗ ដែលផ្ដល់ម្លប់ដ៏ ត្រឈៃ កន្លែងហាត់ប្រាណ និងសួនកុមារ ស្រស់ស្រាយពេញ៣៦៥ថ្ងៃក្នុងមួយឆ្នាំ។ ជាងនេះទៅទៀត ហ្គ្រេន ភ្នំពេញ ស៊ីធី មានទីលានវាយហ្គោលស្តង់ដារអន្តរជាតិ១៨ឡូ គ្របដណ្តប់ដោយវាលស្មៅពណ៌បៃតងស្រស់។

កាលពីខែកញ្ញាកន្លងទៅ ក្រុមហ៊ុនជីប ម៉ុង លែនដ៏ បានចូលរួមបដិភាគជាមួយសាលារាជធានីភ្នំពេញ កសាងមហាវិថីមួយប្រវែង៥,៨៦គីឡូម៉ែត្រ និងទទឹង៣០ម៉ែត្រខាងមុខគម្រោង ហ្គ្រេន ភ្នំពេញ ស៊ីធី ដែលងាយក្នុងការធ្វើដំណើរទៅកាន់ផ្សារទំនើបៗក្នុងតំបន់នោះ ដូចជា ផ្សារទំនើប ជីប ម៉ុង សែនសុខ ផ្សារទំនើប អ៊ីអន ម៉ល សែនសុខ ផ្សារម៉ាក្រូ ផ្សារគ្លូប៊លហោស៍ រង្វង់មូលកាំកូស៊ីធី និងស្ពានជ្រោយចង្វារជាដើម។

ជីប ម៉ុង លែន បន្តកិច្ចខិតខំប្រឹងប្រែងអភិវឌ្ឍគម្រោង ហ្គ្រេន ភ្នំពេញ ស៊ីធី ឲ្យបានល្អប្រសើរបំផុត ដើម្បីផ្តល់ជូនសហគមន៍រស់នៅដែលល្អបំផុត ប្រកបដោយភាពកក់ក្តៅ ព្រមទាំងផ្សារភ្ជាប់នឹងធម្មជាតិ៕

 

រដ្ឋាភិបាលកម្ពុជាគ្រោងធ្វើវិសោធនកម្មមាត្រានៃច្បាប់ស្តីពីសារពើពន្ធ ដើម្បីទាក់ទាញទេសចរ និងជំរុញបរិយាកាសវិនិយោគ

        ដោយស៊ីវ ម៉េង

        ភ្នំពេញៈ រាជរដ្ឋាភិបាលកម្ពុជា គ្រោងនឹងធ្វើវិសោធនកម្មលើមាត្រចំនួន២ នៃច្បាប់ស្តីពីសារពើពន្ធ ដើម្បីជំរុញបរិយាកាសវិនិយោគនៅកម្ពុជា ឲ្យកាន់តែល្អប្រសើរ។ នេះបើតាមខ្លឹមសារសង្ខេបនៃសេចក្ដីព្រាងច្បាប់ ស្ដីពីហិរញ្ញវត្ថុសម្រាប់ការគ្រប់គ្រង ឆ្នាំ២០២១ ដែលបញ្ចេញដោយលោកផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល នៅថ្ងៃទី២៣ ខែតុលានេះ។

វិសោធនកម្មលើមាត្រចំនួន២ នៃច្បាប់ស្តីពីសារពើពន្ធ ដែលនឹងគ្រោងធ្វើនៅឆ្នាំ២០២១ រួមមានទី១ ធ្វើវិសោធនកម្មមាត្រា៧២ថ្មី នៃច្បាប់សារពើពន្ធ ដើម្បីការកែសម្រួ​ល និងបញ្ចូលខ្លឹមសារបន្ថែមទាក់ទិន នឹងការដាក់ឱ្យអនុវត្តយន្តការបង្វិលសងអាករលើតម្លៃបន្ថែម សម្រាប់ទេសចរបរទេស ក្នុងគោលដៅធានាបាននូវចីរភាព កំណើនសេដ្ឋកិច្ច និងគាំទ្រគោលនយោបាយលើកទឹកចិត្ត របស់រាជរដ្ឋាភិបាលចំពោះទេសចរបរទេស សំដៅជំរុញបរិយាកាសវិនិយោគ នៅកម្ពុជាឱ្យកាន់តែល្អប្រសើរ និងក្នុងគោលបំណងទាក់ទាញទេសចរបរទេស ឱ្យមកកំសាន្តនៅកម្ពុជា និងទិញទំនិញសម្រាប់យកទៅប្រើប្រាស់ នៅក្រៅកម្ពុជា ឱ្យមានការកើនឡើងកាន់តែច្រើន។

ទី២ ធ្វើវិសោធនកម្មមាត្រា៤០ថ្មី (មួយ) នៃច្បាប់ស្តីពីសារពើពន្ធ ដើម្បីជំរុញបរិ​យាកាសវិនិយោគ នៅកម្ពុជាឱ្យកាន់តែមានភាពងាយស្រួល និងគាំទ្រដល់ការដាក់ឱ្យអនុវត្តការចុះបញ្ជីពន្ធដារ តាមប្រព័ន្ធបច្ចេកវិទ្យាព័ត៌មានតែមួយកន្លែង និងសម្រាលបន្ទុកចំណាយលើការចុះបញ្ជី គឺតម្រូវឱ្យមានការកែសម្រួលបទប្បញ្ញត្តិស្តីពី ពន្ធប្រថាប់ត្រា ដោយលុបការតម្រូវ ឱ្យបង់ពន្ធប្រថាប់ត្រាចំនួន១លានរៀល ចំពោះលិខិតមានលក្ខណៈគតិយុត្តស្តីពីការបង្កើតក្រុមហ៊ុន។

សេចក្ដីព្រាងច្បាប់ ស្ដីពីហិរញ្ញវត្ថុសម្រាប់ការគ្រប់គ្រង ឆ្នាំ២០២១ ដែលជាច្បាប់សម្រាប់ការចាយវាយរបស់រដ្ឋក្នុងឆ្នាំ២០២១ ត្រូវបានគណៈរដ្ឋមន្រ្តីសម្រេចអនុម័តទាំ​ង​ស្រុង នៅក្នុងកិច្ចប្រជុំពេញអង្គ ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នាព្រឹកថ្ងៃទី២៣ ខែតុលា ឆ្នាំ២០២០នេះ។

ថវិកាឆ្នាំ២០២១ ត្រូវបានរាជរដ្ឋាភិបាលចាត់ទុកថា ជាឧបករណ៍ដ៏មានប្រសិទ្ធភា​ព ដែលអាចជួយឱ្យរាជរដ្ឋាភិបាលឆ្លើយតបទៅនឹងបញ្ហាប្រឈម និងហានិភ័យផងទាំង​ពួង ទាំងក្នុងនិងក្រៅប្រទេសសំដៅធានាលំនឹងសង្គម- សេដ្ឋកិច្ចកម្ពុជា និងការពារអាយុជីវិតប្រជាជនពីការរាតត្បាតនៃជំងឺកូវីដ-១៩ ព្រមទាំងការស្តារ និងជំរុញការងើបឡើងវិញនូវកំណើនសេដ្ឋកិច្ច ក្រោយពីវិបត្តិនៃជំងឺកូវីដ-១៩ បានស្រាកស្រាន្ត។

ថវិកាឆ្នាំ២០២១ អាចប្រសិទ្ធនាមបានថាជា “ថវិកាប្រយុទ្ធការពារអាយុជីវិតប្រជាជន រក្សាលំនឹងសង្គម-សេដ្ឋកិច្ច និងជីវភាពរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្តារ និងជំរុញកំណើនសេដ្ឋកិច្ចឡើងវិញ នៅក្រោយពេលស្រាកស្រាន្តពីវិបត្តិជំងឺកូវីដ-១៩ តាមគន្លងប្រក្រតីថ្មីដើម្បីធានាសុខសន្តិភាព ស្ថិរភាពសង្គម និងចីរភាព នៃកំណើនសេដ្ឋកិច្ច ព្រមទាំងភាពប្រកួតប្រជែងរបស់កម្ពុជា ជាមួយនឹងការបន្តលើកស្ទួយសុខុមាលភាពរបស់ប្រជាជន”៕