វិនិយោគិនបរទេសនៅតែបន្តធ្វើដំណើរមកកាន់ខេត្តព្រះសីហនុ

ដោយ ៖ វុត្ថា

ភ្នំពេញ ៖ មន្ត្រីជាន់ខ្ពស់នៃរដ្ឋបាលខេត្តព្រះសីហនុ បានឱ្យដឹងថា វិនិយោគិនបរទេសនៅតែបន្តធ្វើដំណើរមកកាន់ខេត្តព្រះសីហនុ និងមានចំនួនកើនឡើងចាប់តាំងពីខែឧសភា រហូតដល់បច្ចុប្បន្ននេះ បន្ទាប់ពីស្ថានភាពនៃវិបត្តិការរីករីករាលដាលនៃជំងកូវីដ ១៩ មានភាពធូរស្រាលបន្តិច។

លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានឱ្យដឹងថា តាមរបាយការណ៍សរុបស្តីពីអ្នកធ្វើដំណើរបរទេសមកកាន់ខេត្តព្រះសីហនុ និងធ្វើការតេស្តរកមេរោគ Covid-19 ចាប់ពីខែឧសភា ដល់ខែកញ្ញា ឆ្នាំ ២០២០ មានកំណើនៅក្នុងខែនីមួយៗ ខណៈនៅក្នុងតុលានេះ គិតត្រឹមថ្ងៃទី ២១ មានចំនួន ១៩៧៦ នាក់។

លោកបន្តថា ចាប់តាំងពីថ្ងៃទី២៣ ខែឧសភា ដល់ថ្ងៃទី២១ ខែតុលា ឆ្នាំ ២០២០ អ្នកធ្វើដំណើរតាមជើងហោះហើរមានចំនួន ១២៨ ជើង មានភ្ញៀវសរុបចំនួន ១០,៥៧៥ នាក់ ដែលមានស្រីចំនួន ២, ២១៥ នាក់ មកកាន់ខេត្តព្រះសីហនុ ។

លោកបន្តថា “ចំនួនបរទេសដែលធ្វើដំណើរមកកាន់ខេត្តព្រះសីហនុ មានចម្រុះជាតិសាសន៍ ដែលភាគច្រើនជាជនជាតិចិន ប៉ុន្តែយ៉ាងណាក៏ដោយ ក៏មានភ្ញៀវបរទេសចាកចេញទៅវិញក៏ច្រើនដែរ”។

លោកបន្ថែមថា “នៅពេលដែលមានភ្ញៀវបរទេសចូលមកកាន់ខេត្តកាន់តែច្រើន នឹងធ្វើឱ្យដំណើរការអាជីវកម្មនានានៅក្នុងខេត្តមានសន្ទុះឡើងវិញ តាមរយៈការចំណាយរបស់ជនបរទេស ទាំងការស្នាក់នៅ និងលើការហូបចុកផ្សេងៗ “។

យោងតាមរបាយការណ៍សរុបស្តីពីអ្នកធ្វើដំណើរបរទេសមកកាន់ខេត្តព្រះសីហនុ បានបង្ហាញថា នៅក្នុងខែឧសភា មានចំនួន ៤៧០ នាក់ ខែមិថុនា មានចំនួន ១១៧៨ នាក់ ខែកក្កដាមានចំនួន ១៩០១នាក់ ខែសីហា មានចំនួន ២១៣៣នាក់ ខែកញ្ញា មានចំនួន ២៩១៧ នាក់ និង ខែតុលា ១៩៧៦ នាក់៕

កម្ពុជា នឹងក្លាយជាប្រទេសផ្ដល់សេវានៅក្នុងទីផ្សារអាស៊ាន

ដោយ ៖ រ៉ាណេត

ភ្នំពេញ ៖ តាមរយៈកិច្ចព្រមព្រៀងពាណិជ្ជកម្មសេរីជាមួយប្រទេសមហាអំណាចសេដ្ឋកិច្ចចិន និងប្រទេសមួយចំនួនទៀតដែលគ្រោងនឹងបញ្ចប់កិច្ចព្រមព្រៀងនៅពេលខាងមុខនេះ កម្ពុជា នឹងក្លាយជាប្រទេសគោលដៅដ៏សំខាន់របស់បណ្តាប្រទេសនានានៅលើសាកលលោក ក្នុងនាមជាប្រទេសសេវាកម្មក្នុងការផលិត និងនាំចេញទៅកាន់ទីផ្សារអាស៊ានដែលមានជាង៦០០លាននាក់ ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី២៣ ខែតុលា ឆ្នាំ២០២០នេះថា ក្រោមភាពអំណោយផលពីកិច្ចព្រមព្រៀងពាណិជ្ជកម្មសេរីជាប្រទេសចិន កម្ពុជា នឹងក្លាយទៅជាប្រទេសគោលដៅយ៉ាងសំខាន់របស់បណ្តាអ្នកវិនិយោគ និងក្រុមហ៊ុនអន្តរជាតិចូលមកកាន់តែច្រើន។

លោកឧកញ៉ាបន្តថា “យើងមានកិច្ចព្រមព្រៀងពាណិជ្ជកម្មសេរីជាមួយចិន គឺជាចំណុចដ៏សំខាន់មួយដែលបណ្តាប្រទេសនានានៅលើសាកលលោកប្រាថ្នាចង់បាន ដែលប្រៀបបានទៅនឹងឱកាសមាស ហើយពួកគេទាំងនោះនឹងងាកមកកាន់កម្ពុជា ដែលជាគោលដៅក្នុងការបណ្តាក់ទុនវិនិយោគដម្បីអាចទទួលបានផលចំណេញវិលត្រឡប់ទៅវិញ”។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍បញ្ជាក់ទៀតថា “រាល់គម្រោងវិនិយោគរបស់ពួកគេនៅលើទឹកដីប្រទេសកម្ពុជា គឺមានតែចំណេញលើចំណេញ ដោយសារតែការនាំចូលវត្ថុធាតុដើមសំខាន់ៗសម្រាប់សង្វាក់ផលិតកម្មរបស់ពួកគេភាគច្រើននាំយកមកពីប្រទេសចិន ហើយការនាំផលិតផល ឬវត្ថុធាតុដើមពីប្រទេសចិនមកកាន់កម្ពុជាត្រូវបានអនុគ្រោះពន្ធមួយចំណែកធំ ហើយក្រោយពេលផលិតបាន សម្រាប់ការនាំចេញពីកម្ពុជាទៅកាន់បណ្តាប្រទេសមួយចំនួនក្នុងតំបន់អាស៊ាន ដែលមានជាង៦០០លាននាក់ ជាពិសេសទីផ្សារដ៏ធំទូលាយនៃប្រទេសចិនដែលមានរហូតដល់ជាង១៤០០លាននាក់ ក៏ត្រូវបានរួចពន្ធ។ ដូច្នេះ វាជាឱកាសមាសសម្រាប់ការវិនិយោគ និងចំណេញ លើចំណេញ”។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានមានប្រសាសន៍ថា តាមរយៈកិច្ចព្រមព្រៀងពាណិជ្ជកម្មសេរីជាមួយប្រទេសចិន ក្រុមហ៊ុនអាមេរិកជាច្រើនក៏នឹងមកកាន់កម្ពុជាផងដែរ ជាមួយនឹងការរៀបចំច្បាប់ពាណិជ្ជកម្មថ្មី ដើម្បីជួយសម្រួលការដំណើរការវិនិយោគថ្មីបន្ថែមទៀតនៅលើទឹកដីកម្ពុជា។

សម្តេចតេជោ បានបញ្ជាក់ថា “ ខ្ញុំសង្ឃឹមថា ច្បាប់ និងកិច្ចព្រមព្រៀងពាណិជ្ជកម្មសេរីកម្ពុជា–ចិន នឹងដើរតួជាកត្តាដ៏សំខាន់មួយជួយធ្វើឱ្យកម្ពុជាក្លាយជាគោលដៅសម្រាប់ក្រុមហ៊ុនអាម៉េរិក ដែលកំពុងរកទីតាំងផលិតកម្មថ្មីនៅតំបន់អាស៊ីអាគ្នេយ៍។

បន្ថែមលើនេះរាជរដ្ឋាភិបាលក៏បានដាក់ចេញជាបន្តបន្ទាប់នូវវិធានការកែទម្រង់មុតស្រួចនានា សំដៅដោះស្រាយបញ្ហាប្រឈមសំខាន់ៗ ដែលបណ្ដាវិនិយោគិន កំពុងជួបប្រទះ ក្នុងគោលបំណងបង្កើនភាពប្រកួតប្រជែងរបស់កម្ពុជា តាមរយៈការបង្កភាពងាយស្រួល និងការបង្កើតបរិយាកាសអំណោយផលដល់ការធ្វើអាជីវកម្ម និងការវិនិយោគនៅក្នុងប្រទេស៕

គម្រោងវិនិយោគក្នុងវិស័យថាមពលចំនួន៣ មានទំហំសរុប ៥២៧លានគីឡូវ៉ាត់ក្នុង១ឆ្នាំ ត្រូវបានគាំទ្រ និងអនុម័តពីរដ្ឋាភិបាល

ដោយ ៖ រ៉ាណេត
ភ្នំពេញ ៖ គម្រោងវិនិយោគ និងអភិវឌ្ឍន៍នៅក្នុងវិស័យថាមពលអគ្គិសនីចំនួន៣ធំ ស្ថិតនៅខេត្តកោះកុង និងតំបន់ព្រំដែនកម្ពុជា-ឡាវ និងថៃ ត្រូវបានរដ្ឋាភិបាលសម្រេចគាំទ្រ និងអនុម័ត ក្រោមកិច្ចដឹកនាំប្រជុំពេញអង្គគណៈរដ្ឋមន្ត្រីដោយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

កិច្ចប្រជុំពេញអង្គគណៈរដ្ឋមន្ត្រី នៅព្រឹកថ្ងៃទី២៣ ខែតុលា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តពិភាក្សាលើរបៀបវារៈ និងគាំទ្រទៅលើសំណើសុំការពិនិត្យសម្រេចលើគម្រោងវិនិយោគអភិវឌ្ឍវារីអគ្គិសនីស្ទឹងតាតៃលើ និងគម្រោងវិនិយោគអភិវឌ្ឍខ្សែបណ្ដាញបញ្ជូនអគ្គិសនី៥០០គីឡូវ៉ុល ពីភ្នំពេញទៅព្រំដែនកម្ពុជា-ឡាវ និងពីបាត់ដំបងទៅព្រំដែនកម្ពុជា-ថៃ។
គម្រោងវិនិយោគក្នុងវិស័យអគ្គិសនីថ្មីចំនួន ៣ បន្ថែមទៀតទាំងនេះ រួមមាន គម្រោងវិនិយោគអភិវឌ្ឍវារីអគ្គិសនីស្ទឹងតាតៃលើ អានុភាព១៥០ មេហ្កាវ៉ាត់ នៅស្រុកថ្មបាំង ខេត្តកោះកុង- គម្រោងវិនិយោគអភិវឌ្ឍខ្សែបណ្ដាញបញ្ជុន ៥០០គីឡូវ៉ុលពីភ្នំពេញទៅព្រំដែនកម្ពុជា-ឡាវ- គម្រោងវិនិយោគអភិវឌ្ឍខ្សែបណ្ដាញបញ្ជូន ៥០០គីឡូវ៉ុល ពីបាត់ដំបងទៅព្រំដែនកម្ពុជា-ថៃ។

ផលប្រយោជន៍សំខាន់នៃការអភិវឌ្ឍន៍គម្រោងនេះ ក្រៅពីផលិតអគ្គសនី ៥២៧ លានគីឡូវ៉ាត់ម៉ោងក្នុង ១ឆ្នាំ ដែលមានថ្លៃ ៧,៩២ សេនអាមេរិកក្នុង១គីឡូវ៉ាត់ម៉ោង ថេរ ៣៥ឆ្នាំ កម្រោងនេះនឹងជួយស្តុកប្រភពទឹកភ្លៀងនៅរដូវវស្សាបន្ថែម ទុកនៅក្នុងអាងទឹកថ្មីទាំង២នៃគម្រោងវារីអគ្គិសនីតាតៃលើ ដែលជួយកាត់បន្ថយការហៀរទឹកចោល និងការពិន័យដោយមិនបានផលិតអគ្គិសនីនៅវារីអគ្គិសនីស្ទឹងតាតៃ នៅរដូវវស្សា។ បន្ថែមពីនេះ ទឹកដែលស្តុកទាំងនេះទុកសម្រាប់ការផលិតអគ្គិសនីនៅវារីអគ្គិសនីស្ទឹងតាតៃលើនៅរដូវប្រាំង និងបង្ហូរចុះមកឱ្យអាងវារីអគ្គិសនីស្ទឹងតាតៃនៅខាងក្រោម ដើម្បីផលិតអគ្គិសនីបន្ថែមនៅរដូវប្រាំងចំនួន ១០៨ លានគីឡូវ៉ាត់ម៉ោងបន្ថែមទៀត។ ផ្អែកតាមច្បាប់ស្តីពីសារពើពន្ធ បទប្បញ្ញត្តិជាធរមាន និងការលើកទឹកចិត្តវិនិយោគ រដ្ឋនឹងទទួលបានចំណូលពន្ធពីគម្រោង៕

រដ្ឋាភិបាលសម្រេចអនុម័តច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០២១

ដោយ វុត្ថា

ភ្នំពេញ៖ រដ្ឋាភិបាលកម្ពុជា បានបានសម្រេចអនុម័ត និងគាំទ្រទាំងស្រុងលើ “សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២១” ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

យោងតាមខ្លឹមសារនៃកិច្ចប្រជុំពេញគណៈរដ្ឋមន្រ្តីនៅថ្ងៃទី២៣ ខែតុលា ឆ្នាំ ២០២០នេះ បង្ហាញថា សេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២១ ត្រូវបានរៀបចំឡើងនៅក្នុងបរិការណ៍ដែលជំងឺកូវីដ-១៩ ដ៏កាចសាហាវបាន និងកំពុងយាយី ហើយនាំមកនូវផលប៉ះពាល់ អវិជ្ជមានបញ្ហាប្រឈម និងហានិភ័យជាច្រើន ដែលមិនធ្លាប់មានពីមុនមកចំពោះតំបន់ និងពិភពលោកទាំងមូលដោយគ្មានការលើកលែងចំពោះប្រទេសណាមួយឡើយ ព្រមទាំងបានធ្វើឱ្យមនុស្សរាប់លាននាក់បាត់បង់ការងារធ្លាក់ចុះនូវប្រាក់ចំណូលហើយ ប្រជាជនមួយចំនួនធំនៅលើពិភពលោកធ្លាក់ចូលទៅក្នុងភាពក្រីក្រវិញ។

របាយការណ៍ដដែលបន្តថា កម្ពុជាក៏មិនអាចគេចរួចពីវិបាកអាក្រក់ទាំងនេះដែរហើយបាន និងកំពុងទទួលរងនូវផលប៉ះពាល់អវិជ្ជមានពីជំងឺនេះមកលើបញ្ហាសុខភាពសង្គម-សេដ្ឋកិច្ច ជីវភាពរស់នៅប្រចាំថ្ងៃរបស់ប្រជាជន ពិសេសគ្រួសារប្រជាជនក្រីក្រ និងងាយរងគ្រោះ។

ជាងនេះទៅទៀតការរាតត្បាតនៃជំងឺកូវីដ-១៩ មិនត្រឹមតែធ្វើឱ្យប៉ះពាល់ដល់សមិទ្ធផលសង្គម-សេដ្ឋកិច្ច ដែលកម្ពុជាសម្រេចបាននាពេលកន្លងមកដោយលំបាកប៉ុណ្ណោះទេ តែថែមទាំងអាចបន្ទុចបង្អាក់ដល់កិច្ចដំណើរការអភិវឌ្ឍន៍ឈានឡើងរបស់កម្ពុជា ពិសេសអាចនឹងពន្យាពេលនៃការឈានទៅសម្រេចបាននូវចក្ខុវិស័យរបស់កម្ពុជា ក្នុងការប្រែក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ ២០៥០ ផងដែរ។

ក្នុងន័យនេះ ថវិកាឆ្នាំ២០២១ គឺជាថវិកាប្រយុទ្ធការពារអាយុជីវិតប្រជាជន រក្សាលំនឹងសង្គម-សេដ្ឋកិច្ច និងជីវភាពរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្តារ និងជំរុញកំណើនសេដ្ឋកិច្ចឡើងវិញ នៅក្រោយពេលស្រាកស្រាន្តពីវិបត្តិជំងឺកូវីដ-១៩ តាមគន្លងប្រក្រតីថ្មី ដើម្បីធានាសុខសន្តិភាព ស្ថិរភាពសង្គម និងចីរភាពនៃកំណើនសេដ្ឋកិច្ច ព្រមទាំងភាពប្រកួតប្រជែងរបស់កម្ពុជា ជាមួយនឹងការបន្តលើកស្ទួយសុខុមាលភាពរបស់ប្រជាជន។

ជាមួយគ្នានេះ កម្ពុជាត្រូវចេះសម្របខ្លួនទៅនឹងជំងឺនេះ តាមគន្លងប្រក្រតីថ្មី (New Normal)ដោយគិតថ្លឹងថ្លែងរវាងម្ខាងការធានារក្សាឱ្យបាននូវលំនឹងសង្គម-សេដ្ឋកិច្ច និងម្ខាងទៀត ការបន្តប្រយុទ្ធនឹងជំងឺ ដើម្បីការពារអាយុជីវិតរបស់ប្រជាពលរដ្ឋ៕

អ្នកប្រតិបត្តិក្នុងវិស័យអចលនទ្រព្យសាទរនឹងការសម្រេចពន្យាពេលការយកពន្ធលើចំណេញមូលធនរបស់រដ្ឋាភិបាល

ដោយ ៖ រ៉ាណេត

ភ្នំពេញ ៖ បណ្តាប្រតិបត្តិករនៅក្នុងវិស័យអចលនទ្រព្យកម្ពុជា បានសម្ដែងនូវភាពរីករាយ និងសាទរទៅនឹងក្ដីសម្រេចរបស់រាជរដ្ឋាភិបាលក្រោមចំណាររបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ទៅលើការពន្យាពេលលើការយកពន្ធលើចំណេញមូលធនក្នុងរយៈពេល១ឆ្នាំបន្ទាប់ទៀត។

លោកឧកញ៉ា បណ្ឌិត គីម ហ៊ាង អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ KW Cambodia ដែលជាអ្នកប្រតិបត្តិនៅក្នុងវិស័យនេះ នៅព្រឹកថ្ងៃទី២៣ ខែតុលា ឆ្នាំ២០២០ បានបង្ហាញពីក្ដីរីករាយ និងសាទរទៅនឹងការសម្រេចប្រកបដោយគតិបណ្ឌិតរបស់សម្ដេចតេជោ ហ៊ុន សែន ដែលសមស្របទៅនឹងស្ថានការដែលកំពុងប្រឈមរបស់ប្រជាពលរដ្ឋនាពេលបច្ចុប្បន្ន។

លោកឧកញ៉ាបានបញ្ជាក់ថា “រាជរដ្ឋាភិបាល ជាពិសេសសម្ដេចនាយករដ្ឋមន្ត្រីនៃកម្ពុជា ពិតជាបានយល់ច្បាស់ពីទុក្ខធុរៈរបស់ប្រជាពលរដ្ឋទូទៅ ជាពិសេសបងប្អូនដែលជាអ្នករកស៊ីកំពុងតែស្ថិតនៅក្នុងស្ថានភាពប្រឈម ដូច្នេះប្រសិនបើអនុវត្តនៃការយកពន្ធចាប់ពីដើមឆ្នាំក្រោយគឺជាការដាក់បន្ទុកមួយកម្រិត ប៉ុន្តែពេលនេះសម្ដេចបានអនុគ្រោះ និងសម្រេចលើកពេលទៅឆ្នាំបន្ទាប់១ឆ្នាំទៀតនេះគឺជារឿងមួយដ៏ល្អបំផុត”។

លោកឧកញ៉ាបញ្ជាក់ទៀតថា “ការរកស៊ីស្ទើរគ្រប់វិស័យទាំងអស់ ភាគច្រើនគឺមានការពាក់ព័ន្ធគ្នា ដូច្នេះ ការសម្រេចលើកពេលនៃការយកពន្ធនេះ គឺបានជួយសម្រួលដល់វិស័យអចលនទ្រព្យបានយ៉ាងច្រើន ហើយតាមរយៈភាពល្អប្រសើររបស់វិស័យអចលនទ្រព្យ ក៏នឹងជួយសម្រួលបន្តទៅដល់វិស័យផ្សេងៗទៀតឱ្យកាន់តែមានភាពធូរស្រាល”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា “ក្ដីសម្រេចរបស់សម្ដេចតេជោ ហ៊ុន សែន គឺជាការជំរុញ និងលើកទឹកចិត្តដ៏ប្រសើរបំផុតសម្រាប់អ្នករកស៊ីនៅក្នុងវិស័យនេះ ដោយមានការពន្យាពេលមួយរយៈធំដល់ប្រតិបត្តិករ”។ លោកបានបន្តថា “នេះគឺជាសញ្ញាវិជ្ជមានមួយសម្រាប់អ្នកប្រឡូកនៅក្នុងវិស័យអចលនទ្រព្យគ្រប់ប្រភេទ ដែលត្រូវត្រៀមខ្លួន និងចាប់ផ្តើមអនុវត្តនៅក្នុងទីផ្សារ ហើយក្រៅពីនេះ ក៏ជាសញ្ញាដែលសម្ដេចតេជោ បានបញ្ជាក់ពីកិច្ចយកចិត្តទុកដាក់ពីសំណាក់រាជរដ្ឋាភិបាលកម្ពុជា ក្នុងកិច្ចសហការជាដៃគូជាមួយវិស័យឯកជន”។

លោក ច្រឹក សុខនីម “ថ្វីត្បិតការបង់ពន្ធ គឺជាកាតព្វកិច្ចរបស់ប្រជាពលរដ្ឋ ក៏ដូចជាបណ្តាអ្នកជំនួញនានា ប៉ុន្តែសម្ដេចតេជោ លោកបានមើលឃើញ និងថ្លឹងថ្លែងយ៉ាងច្បាស់ពីលទ្ធភាពជាក់ស្ដែង និងបញ្ហាដែលកំពុងប្រឈមផងដែរ។ ក្នុងនាមរូបខ្ញុំជាអ្នកអនុវត្តនៅក្នុងវិស័យអចលនទ្រព្យ និងក្នុងនាមជាប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា ពិតរីករាយ និងសាទរជាមួយនឹងការសម្រេចរបស់សម្ដេច ហើយក៏សូមអរគុណចំពោះទឹកចិត្តរបស់សម្ដេចដែលតែងតែយល់ពីទុក្ខលំបាករបស់ប្រជាពលរដ្ឋ ក៏ដូចជាអ្នកជំនួញគ្រប់វិស័យនៅកម្ពុជា” ៕

ការព្យាករណ៍ ៖ ឆ្នាំ២០២១ ប្រជាពលរដ្ឋកម្ពុជាអាចមានចំណូល ១៧៧១ដុល្លារ

ដោយ ៖ រ៉ាណេត

ភ្នំពេញ ៖ សេដ្ឋកិច្ចកម្ពុជានៅឆ្នាំ២០២១ ត្រូវបានព្យាករថានឹងងើបឡើងវិញ ហើយរំពឹងថានឹងសម្រេចបានកំណើនក្នុងរង្វង់ ៣,៥ភាគរយ ដែលធ្វើឱ្យ ផ.ស.ស. ថ្លៃបច្ចុប្បន្ន ស្ថិតក្នុងរង្វង់ ១១៧ ៩៣៩ ប៊ីលានរៀល សមមូលនឹងប្រមាណ២៩ ០១៣លានដុល្លារអាមេរិក ស្របពេលដែល ផ.ស.ស. សម្រាប់មនុស្សម្នាក់ត្រូវបានរំពឹងថានឹងកើនឡើងដល់១ ៧៧១ដុល្លារអាមេរិក បើប្រៀបធៀបនឹង១ ៦៨៣ដុល្លារអាមេរិក ក្នុងឆ្នាំ២០២០។

តាមរយៈខ្លឹមសារនៃកិច្ចប្រជុំពេញអង្គគណៈរដ្ឋមន្ត្រីក្រោមអធិបតីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២៣ ខែតុលា ឆ្នាំ២០២០ បានធ្វើការព្យាការណ៍ថា នៅក្នុងឆ្នាំ២០២១ ខាងមុខនេះ សេដ្ឋកិច្ចកម្ពុជានឹងមានកំណើនក្នុងរង្វង់ប្រមាណ ៣,៥ភាគរយ ដែលជំរុញឱ្យប្រជាពលរដ្ឋអាចមានលទ្ធភាពក្នុងការរកបានចំណូលគិតជាមធ្យមប្រមាណ ១៧៧១ដុល្លារ ។

ក្នុងន័យនេះ វិស័យឧស្សាហកម្មត្រូវបានព្យាករថា នឹងងើបឡើងវិញក្នុងអត្រាកំណើន ៤,១ភាគរយក្នុងឆ្នាំ២០២១ ពីកំណើនអវិជ្ជមានក្នុងអត្រា -២,២ភាគរយ ក្នុងឆ្នាំ ២០២០ ដោយសារការរំពឹងទុកនូវការងើបឡើងវិញក្នុងកម្រិតទាបនៃអនុវិស័យកាត់ដេរ និងអនុវិស័យសំណង់ ខណៈដែលអនុវិស័យកម្មន្តសាលមិនមែនកាត់ដេរត្រូវបានរំពឹងថា នៅរក្សាបានកំណើនល្អប្រសើរ។ ដោយឡែកវិស័យសេវាកម្មត្រូវបានព្យាករថានឹងមានកំណើនក្នុងអត្រាទាប៣,៦ភាគរយក្នុងឆ្នាំ២០២១បើប្រៀបធៀបនឹងកំណើនអវិជ្ជមានក្នុងអត្រា -៣,០ភាគរយក្នុងឆ្នាំ២០២០ ដោយសារការរំពឹងទុកនៃការងើបឡើងវិញក្នុងកម្រិតទាបនៃសកម្មភាពសេដ្ឋកិច្ច ពិសេសក្នុងវិស័យទេសចរណ៍ និងការប្រើប្រាស់ក្នុងស្រុកបន្ទាប់ពីវិបត្តិកូវីដ-១៩។

វិស័យកសិកម្ម ត្រូវបានប៉ាន់ស្មានថាកើនឡើងក្នុងអត្រា១,៦ភាគរយក្នុងឆ្នាំ២០២១ ពីកំណើន០,៩ភាគរយក្នុងឆ្នាំ២០២០ ដោយសារការកើនឡើងនៃអនុវិស័យដំណាំ អនុវិស័យចិញ្ចឹមសត្វ និងអនុវិស័យនេសាទ។ អនុវិស័យដំណាំត្រូវបានព្យាករថានឹងសម្រេចបានកំណើនខ្ពស់ជាងឆ្នាំ ២០២០ ដោយសារការរំពឹងទុកនូវកំណើនផលិតកម្មកសិកម្ម ស្របពេលដែលថ្លៃ និងតម្រូវការខាងក្រៅមានការកើនឡើង។

ជាមួយគ្នានេះ ឱនភាពគណនីចរន្ត (រួមបញ្ចូលបង្វែរ) ត្រូវបានព្យាករថារួមតូចបន្តិចមកត្រឹម ១៧,៣ភាគរយ នៃផ.ស.ស. ដោយសារការរំពឹងនៃការងើបឡើងវិញសន្សឹមៗនូវការនាំចេញ និងវិស័យទេសចរណ៍។ទុនបម្រុងអន្តរជាតិសរុប ត្រូវបានរំពឹងថានឹងកើនឡើងដល់ ១៦ ៩៨១លានដុល្លារអាមេរិក និងធានាការនាំចូលបាន៨,០ខែ ដោយហេតុថាការនាំចូលរបស់កម្ពុជាក៏នឹងងើបឡើងបន្តិចវិញ៕

ឆ្នាំ២០២០ រដ្ឋាភិបាលសន្សំថវិកាបានប្រមាណ ៩១៨ លានដុល្លា

ដោយ ៖ វុត្ថា

ភ្នំពេញ ៖ ភាពប្រសើរឡើងនៃប្រព័ន្ធគ្រប់គ្រងហិរញ្ញវត្ថុសាធារណៈរបស់កម្ពុជា បានផ្តល់លទ្ធភាពដល់រាជរដ្ឋាភិបាល ក្នុងការធ្វើវិចារណកម្មចំណាយថវិកាឆ្នាំ២០២០ ចំនួន២លើក ដែលអាចធ្វើឱ្យរាជរដ្ឋាភិបាលសន្សំថវិកាបានសរុបចំនួន ៣ ៧១៦០៥៤លានរៀល ឬសមមូលនឹងប្រមាណ ៩១៨លានដុល្លារ។

នេះបើយោងតាមខ្លឹមសារនៃរបាយការណ៍នៅក្នុងកិច្ចប្រជុំពេញអង្គគណៈរដ្ឋមន្រ្ដី ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានចាប់ផ្ដើមពិភាក្សាលើរបៀបវារៈស្ដីពី “សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២១” នៅថ្ងៃទី ២៣ ខែតុលា ឆ្នាំ ២០២០នេះ ។

របាយការណ៍ដដែលបន្តថា ក្នុងនោះថវិកាថ្នាក់ជាតិសន្សំបាន៦៧៧លានដុល្លារអាមេរិក សម្រាប់បំពេញតម្រូវការចំណាយចាំបាច់ ក្នុងការប្រយុទ្ធនឹងជំងឺកូវីដ-១៩ ក៏ដូចជាការទប់ទល់ផលប៉ះពាល់អវិជ្ជមានមកលើសង្គម-សេដ្ឋកិច្ចកម្ពុជា ដោយឡែកសម្រាប់រដ្ឋបាលថ្នាក់ក្រោមជាតិ ត្រូវបានកាត់បន្ថយចំណាយទៅតាមការថយចុះចំណូលចំនួន២៤១លានដុល្លារអាមេរិក ដើម្បីរក្សាតុល្យភាពចំណូល-ចំណាយថ្នាក់ក្រោមជាតិ។

សមិទ្ធផលខាងលើដែលសម្រេចបានមកនេះ គឺមិនអាចកាត់ផ្តាច់ចេញពីការខិតខំប្រឹងប្រែងជាប់ជាប្រចាំ និងលទ្ធផលនៃការកែទម្រង់ការគ្រប់គ្រងហិរញ្ញវត្ថុសាធារណៈ ដែលមានចក្ខុវិស័យប្រែក្លាយប្រព័ន្ធហិរញ្ញវត្ថុសាធារណៈកម្ពុជា ឆ្ពោះទៅកាន់ប្រព័ន្ធហិរញ្ញវត្ថុសាធារណៈផ្តោតលើលទ្ធផលឬសមិទ្ធកម្ម និងវិមជ្ឈការ ស្របតាមស្តង់ដារនិងឧត្តមានុវត្តអន្តរជាតិ របស់រាជរដ្ឋាភិបាលបានឡើយ។

នៅក្នុងបរិការណ៍នៃការប្រយុទ្ធនឹងវិបត្តិនៃជំងឺកូវីដ-១៩ គិតមកទល់នឹងពេលនេះ រាជរដ្ឋាភិបាលបានដាក់ចេញនូវវិធានការចំនួន៦ជុំរួចមកហើយ ដែលក្នុងនោះរួមមាន៖

-កញ្ចប់វិធានការផ្នែកសារពើពន្ធ មានចំនួន១៣វិធានការ ដែលមានជាអាទិ៍៖ ការអនុគ្រោះពន្ធ និងការលើកលែងពន្ធ ការអនុគ្រោះការបង់ប្រាក់វិភាគទានធានារ៉ាប់រងរបបហានិភ័យការងារ និងការថែទាំសុខភាព និងការពន្យារនូវ ការបង់កាតព្វកិច្ចរបបសន្តិសុខសង្គម ព្រមទាំងការលើកលែងការបង់ថ្លៃ អាជ្ញាបណ្ណទេសចរណ៍ គ្រប់ប្រភេទ និងការមិនធ្វើសវនកម្មពន្ធដារពេញលេញ ចំពោះសហគ្រាស ក្នុងវិសយទេសចរណ៍

-កញ្ចប់វិធានការផ្នែកហិរញ្ញវត្ថុ មានចំនួន៥វិធានការ ដែលមានជាអាទិ៍៖ ការបង្កើតសហហិរញ្ញប្បទាន និងចែករំលែកហានិភ័យ ការបង្កើតមូលនិធិធានាឥណទាន ការបង្កើតហិរញ្ញប្បទានពិសេស និងការត្រៀមបង្កើតឧបករណ៍ហិរញ្ញប្បទានបន្ថែម ព្រមទាំងការបន្ធូរបន្ថយការអនុវត្តពន្ធកាត់ទុកលើការប្រាក់សម្រាប់អ្នកផ្តល់កម្ចីក្នុងស្រុក និងក្រៅស្រុក

-កញ្ចប់វិធានការផ្នែកជំនួយសង្គម មានចំនួន៨វិធានការ ដែលមានជាអាទិ៍៖ ការឧបត្ថម្ភជាសាច់ប្រាក់ជូនគ្រួសារក្រីក្រ និងងាយរងគ្រោះ កម្មវិធីសាច់ប្រាក់ពលកម្មនិងការផ្តល់ប្រាក់ ឧបត្ថម្ភជូនកម្មករ-និយោជិត ក្នុងវិស័យកាត់ដេរ និងទេសចរណ៍ ព្រមទាំងការរៀបចំវគ្គបណ្តុះបណ្តាលដល់កម្មករ-និយោជិត ទាំងជំនាញទន់ និងជំនាញបច្ចេកទេស និង

-កញ្ចប់វិធានការផ្សេងៗ ដែលមានលក្ខណៈអន្តរវិស័យ ចំនួន១៧វិធានការ គួបផ្សំនឹងវិធានការរូបិយវត្ថុដែលដាក់ចេញដោយធនាគារជាតិនៃកម្ពុជា ដែលមានជាអាទិ៍៖ ការដាក់ឱ្យដំណើរការជំហានទី១ នូវការចុះបញ្ជីពាណិជ្ជកម្មតាមថ្នាលបច្ចេកវិទ្យាព័ត៌មាន ការជំរុញ និងអភិវឌ្ឍន៍សហគ្រាសធុនតូច និងមធ្យមការកែសម្រួលនីតិវិធី និងបង្កកាងាយស្រួលដល់សកម្មភាពនាំចេញនាំចូលគ្រប់ប្រភេទពិសេសការនាំចូលវត្ថុធាតុដើម និងកាកែសម្រួលលក្ខខណ្ឌឥណទាន ព្រមទាំងការបង្កើនសន្ទនីយភាពនៅលើទីផ្សារជាដើម៕

ចំណេះដឹង! តើ​កម្ពុជា​ទទួលបាន​ផលប្រយោជន៍​អ្វីខ្លះ​ពី​អាស៊ាន?

ដោយ​វុត្ថា

ភ្នំពេញៈ ប្រទេស​កម្ពុជា​បាន​ក្លាយជា​សមាជិក របស់​សមាគម​ប្រជាជាតិ​អាស៊ីអាគ្នេយ៍ (អាស៊ាន) នៅ​ថ្ងៃទី៣០ ខែមេសា ឆ្នាំ១៩៩៩ ។ សហគមន៍​អាស៊ាន (ASEAN Community) មាន​សសរស្ដម្ភ​ចំនួន៣៖ សហគមន៍​សន្តិសុខ​អាស៊ាន សហគមន៍​សេដ្ឋកិច្ច​អាស៊ាន និង​សហគមន៍​សង្គម-វប្បធម៌​អាស៊ាន។

សម្រាប់​ប្រទេស​កម្ពុជា និង​សហគមន៍​សេដ្ឋកិច្ច​អាស៊ាន​មាននូវ​ទីផ្សារ និង​មូលដ្ឋាន​ផលិតកម្ម​តែមួយ ដែល​នឹង​ធ្វើអោយ​កាន់​តែមាន​សក្ដានុពល និង​ភាព​ប្រកួតប្រជែង​ខ្ពស់​ជាមួយនឹង​យន្តការ និង​វិធានការ​ក្នុង​ពង្រឹង​ការអនុវត្ត​កិច្ចព្រមព្រៀង​សេដ្ឋកិច្ច ដែលមាន​ស្រាប់ បង្កើន​សន្ទុះ​សមាហរណកម្ម​តំបន់​លើ​វិស័យ​អាទិភាព សម្របសម្រួល​លំហូរ​ធុរជន ពលករ​ជំនាញ និង ធនធានមនុស្ស ព្រមទាំង​ពង្រឹង​នូវ​យន្តការ​ស្ថាប័ន​របស់​អាស៊ាន។

ទីផ្សារ និង​មូលដ្ឋាន​ផលិតកម្ម​រួម​របស់​អាស៊ាន​មាន​ធាតុ​សំខាន់ ៥គឺ៖ (១) លំហូរ​ដោយ​សេរី​នូវ​ទំនិញ (២) លំហូរ​ដោយ​សេរី​នូវ​សេវាកម្ម (៣) លំហូរ​ដោយ​សេរី​នូវ​វិនិយោគ (៤) លំហូរ​ដោយ​សេរី​នូវ​មូលធន និង (៥) លំហូរ​ដោយ​សេរី​នូវ​ពលករ​ជំនាញ។ ទីផ្សារ និង​មូលដ្ឋាន​ផលិតកម្ម​រួម​របស់​អាស៊ាន មាន​ផ្នែក​សំខាន់​ពីរ​គឺ៖ វិស័យ​អាទិភាព​សម្រាប់​សមាហរណកម្ម និង ចំណីអាហារ កសិកម្ម និង​រុក្ខា​សាស្ត្រ៕

ការទូទាត់​តាម​ប្រព័ន្ធ​ឌីជីថល​នៅ​កម្ពុជា​កំពុង​ទទួលបាន​ទំនុកចិត្ត​ពី​អ្នកប្រើប្រាស់

ដោយៈ ម៉ា​ណេ​ត

ភ្នំពេញៈ នៅពេល​អ្នកប្រើប្រាស់ និង​អាជីវកម្ម នៅ​ទូទាំង​តំបន់​អាស៊ី​ប៉ាស៊ីហ្វិក​កាន់តែ​ងាក​ទៅរក​ការទូទាត់​ប្រាក់ តាម​ប្រព័ន្ធ​ឌីជីថល ក្នុងកំឡុងពេល​មាន​ជំងឺ​រាតត្បាត​កូ​វីដ១៩ ក្រុមហ៊ុន វី​សា កំពុង​ជំរុញ​វិស័យ​ទូទាត់​ប្រាក់ ដើម្បី​ព​ន្លឿ​ន​ការរក​ដំណោះស្រាយ​ប្រព័ន្ធ​ឌីជីថល​តាម​ទូរស័ព្ទ ដែល​ហៅ Tap to Phone នៅក្នុង​ប្រទេស​កម្ពុជា ក្នុងការ​ជំ​ង​រុញ​អាជីវកម្ម​ខ្នាតតូច និង​មធ្យម​ទៅក្នុង​សេដ្ឋកិច្ច​ឌីជីថល។

ប្រព័ន្ធ Tap to Phone អាចឱ្យ​អ្នកលក់ អាច​ទទួលយក​ការទូទាត់ ដោយ​គ្មាន​ការទាក់ទង​ដោយផ្ទាល់​នៅលើ​ស្មា​ត​ហ្វូ​ន ដែល​ដំណើរការ​ដោយ​ប្រព័ន្ធ Android NFC ដោយ​មិនចាំបាច់​ប្រើ​កន្លែង​ទទួល​ការទូទាត់​ដាច់ដោយឡែក។

ការស្រាវជ្រាវ​ថ្មី​ក្រុមហ៊ុន វី​សា កាលពីពេលថ្មីៗនេះ​បាន​រកឃើញថា ភាគច្រើន (៥៥ ភាគរយ) នៃ​អ្នកប្រើប្រាស់​អាស៊ី​ប៉ាស៊ីហ្វិក នឹង​ប្រើការ​ទូទាត់​ទៅ​ទូរស័ព្ទ ទោះបី​មាន​ដំណោះស្រាយ​មិនទាន់មាន​ទូលំទូលាយ នៅតាម​តំបន់​មួយចំនួន​ក៏ដោយ។ ដោយ​គួបផ្សំ​ជាមួយនឹង​ភាព​ពេញនិយម នៃ​ការទូទាត់​ឌីជីថល​នៅ​កម្ពុជា ក្នុង​អត្រា​ជាង៤២ភាគរយ កៅ​ពីនេះ​គឺ​ប្រតិបត្តិការ​ប័ណ្ណ​ទាំងអស់។

ការស្រាវជ្រាវ​នេះ​បង្ហាញថា ការទូទាត់​ប្រាក់​ទៅ​ទូរស័ព្ទ អាចជា​និន្នាការ​មួយ​ដែល​នឹងមាន​ពេញនិយម​នៅក្នុង​ប្រទេស​កម្ពុជា​ផងដែរ។

លោកស្រី Chum Monika ប្រធាន​គ្រប់គ្រង​ក្រុមហ៊ុន វី​សា ប្រចាំ​ប្រទេស​កម្ពុជា “ប្រទេស​កម្ពុជា មាន​អត្រា​ប្រើប្រាស់​ទូរស័ព្ទ​ចល័ត​ខ្ពស់​ណាស់ ដែល​ចំនួន៩៦ភាគរយ​នៃ​ប្រជាជន ដែលមាន​ទូរស័ព្ទ​ចល័ត ហើយ​ស្ទើរតែ​ពាក់កណ្តាល​នៃ​ការប្រើប្រាស់ Internet ។ បន្ថែម​លើ​ការទទួលយក​កាត​ទូទាត់​ឌីជីថល ដែល​កំពុង​កើនឡើង​របស់ខ្លួន ប្រទេស​កម្ពុជា កំពុងស្ថិត​ក្នុង​ជំហរ​ដ៏​ប្រសើរ​មួយ ក្នុងការ​សម្រប​ខ្លួន​ទៅនឹង​ទំរង់​ទូរស័ព្ទ ដែល​មិនចាំបាច់​មានការ​ទំនាក់ទំនង” ។

លោកស្រី​បាន​បន្តថា “ជាមួយនឹង​ប្រព័ន្ធ Tap to Phone ទៅ​ឆ្លុះបញ្ចាំង​អំពី​សុវត្ថិភាព និង​ភាពងាយស្រួល​ដែល​អ្នកប្រើប្រាស់ នៅក្នុង​ប្រទេស​កម្ពុ​ជាមាន​ទម្លាប់​ប្រើ​រួចហើយ។លោកស្រី​បន្ថែមថា “យើង​ជឿជាក់ថា ការទូទាត់​ដោយ​មិនចាំបាច់​ទំនាក់ទំនង មាន​សមត្ថភាព​ក្នុងការ​បង្កើន​ទំនុកចិត្ត​ជាតិ ក្នុងការ​ទូទាត់​តាម​ឌីជីថល និង​បង្កើន​ការទទួលយក​ជាទូទៅ” ៕

ក្រុមហ៊ុន​ជប៉ុន​ជាច្រើន​បង្ហាញ​ពី​បំណង​ផ្លាស់ប្ដូរ​ទីតាំង​វិនិយោគ​របស់ខ្លួនពី​ប្រទេស​ចិន​មកកាន់​កម្ពុជា

ដោយៈ​ម៉ា​ណេ​ត

ភ្នំពេញៈ ប្រធាន​តំណាង​អង្គការ​ពាណិជ្ជកម្ម​ក្រៅ​ស្រុក​ជប៉ុន បាន​លើកឡើងថា កម្ពុជា​គឺជា​ប្រទេសមួយ ក្នុងចំណោម​ប្រទេស​អទិភាព សម្រាប់​ក្រុមហ៊ុន​ជប៉ុន​មួយចំនួន ដែលមាន​បំណង​ផ្លាស់ប្ដូរ​ទីតាំង​របស់ខ្លួន​ពី​ប្រទេស​ចិន។

លោក Masahiro Miyao ប្រធាន​តំណាង​អង្គការ​ពាណិជ្ជកម្ម ក្រៅ​ស្រុក​ជប៉ុន (JETRO) ប្រចាំ​ប្រទេស​កម្ពុជា​បានលើកឡើង​បែបនេះ អំឡុងពេល​ជួប​សម្ដែង​ការគួរសម និង​ជម្រាបលា​ជាមួយ លោក​ប៉ាន សូរ​ស័ក្ដិ រដ្ឋមន្ដ្រីក្រសួង​ពាណិជ្ជកម្ម ក្នុងឱកាស​ដែល​លោក​ត្រូវ​បញ្ចប់​អណ​ត្តិ​បេសកកម្ម នៅ​កម្ពុជា​ក្នុង​ខែតុលា​នេះ។

ជាមួយគ្នានេះ លោកស្រី Marisa Haruta ប្រធាន​តំណាង​អង្គការ JETRO ប្រចាំ​កម្ពុជា​ដែល​ទើប​តែងតាំង​ថ្មី ក៏មាន​វត្តមាន​ដើម្បី​សម្ដែង​ការគួរសម និង​ពិភាក្សា​ការងារ​មួយចំនួន​ផងដែរ។

លោក Masashiro Miyao បាន​ថ្លែងថា “ក្រុមហ៊ុន​ជប៉ុន​មួយចំនួន​មានបំណង​ផ្លាស់ប្ដូរ​ទីតាំង​របស់ខ្លួន​ពី​ប្រទេស​ចិន មក​បណ្ដា​ប្រទេស​អាស៊ាន ដែល​កម្ពុជា​គឺជា​ប្រទេសមួយ​ក្នុងចំណោម​ប្រទេស​អទិភាព​សម្រាប់​វិនិយោគិន​ជប៉ុន” ។

លោក​បាន​បន្តទៀទថា “ជាមួយនេះដែរ តំណាង JETRO ក៏បាន​ជម្រាបជូន​ផងដែរ​ថា ក្រុមហ៊ុន​ជប៉ុន​មួយចំនួន កំពុង​តែមាន​ការចាប់​អារម្មណ៍​ខ្ពស់ លើ​វិស័យ​កសិកម្ម​នៅ​កម្ពុជា ជាពិសេស​លើ​ប្រភេទ​កសិផល​សរីរាង្គ សម្រាប់​ផ្គត់ផ្គង់​ទៅ​ទីផ្សារ​ក្នុងស្រុក និង​សម្រាប់​នាំ​ចេញទៅ​ជប៉ុន និង​គោលដៅ​ដទៃទៀត ដែល​ផលិតផល​សរីរាង្គ​មាន​តម្រូវការ​ខ្ពស់” ។

ជាការ​ឆ្លើយតប លោក ប៉ាន សូរ​ស័ក្ដិ បាន​ថ្លែងសេចក្ដី​ស្វាគមន៍ និង​ជំរុញ​ឱ្យ​វិនិយោគិន​ជប៉ុន មក​បើក​អាជីវកម្ម​ឬ​រោងចក្រ​កែច្នៃផ្សេងៗនៅ​កម្ពុជា និង​លើកទឹកចិត្ត​ឱ្យមាន​ការនាំចេញ​កសិផល ក៏ដូចជា​ផលិតផល​កែច្នៃ​របស់​កម្ពុជា បន្ថែម​ទៅ​ប្រទេស​ជប៉ុន និង​គោលដៅ​សក្ដានុពល​ដទៃទៀត ជាពិសេស​គឺ​ត្រូវ​ទាញយក​ផលប្រយោជន៍ ឱ្យបាន​ពេញលេញ​ពី​កិច្ចព្រមព្រៀង​ពាណិជ្ជកម្ម​សេរី​នានា ដែល​កម្ពុជា​ជា​គូភាគី។

ទន្ទឹមនឹងនេះ លោកស្រី Marisa Haruta ប្រធាន​តំណាង​អង្គការ JETRO ថ្មី​ប្រចាំ​កម្ពុជា​បាន​ថ្លែងថា ក្នុង​អណ​ត្តិ​បំពេញការងារ​របស់លោក​ស្រី នឹង​ពង្រឹង​បាន​ថែមទៀត​នូវ​កិច្ចសហប្រតិបត្តិការ ក្នុង​ការបន្ដ​លើកកម្ពស់​ទំនាក់ទំនង​ដ៏​ល្អប្រសើរ​រវាង​កម្ពុជា-ជប៉ុន។

លោក​រដ្ឋមន្ដ្រី ក៏បាន​ជម្រាប​ដល់​តំណាង​អង្គការ JETRO នូវ​គម្រោង​ជំរុញ​ទីផ្សារ​សម្រាប់​កសិកម្ម​ខ្នា​តូច (AIMS) របស់​ក្រសួងពាណិជ្ជកម្ម ដែល​អ្នក​ផលិត​ជា​ក្រុម​កសិករ​ខ្នាតតូច និង​ក្រីក្រ​នៃ​ផលិតផល ដូចជា បន្លែ មាន់​ស្រែ ស្រូវ ដំ​ឡូ​វ​មី និង​សូត្រ​ឆៅ និង​ស្នើ​សុំឱ្យ​ក្រុមហ៊ុន AEON របស់​ជប៉ុន ពិនិត្យ​លទ្ធភាព​ដាក់លក់​ផលិតផល របស់​គម្រោង AIMS នៅ​ទីផ្សារ​របស់ខ្លួន​ផងដែរ៕