បុរីKCផ្តល់ជូនលំនៅដ្ឋានតម្លៃសមរម្យជាមួយរចនាបទផ្ទះដ៏ស្រស់ស្អាត

ដោយគង់ សូរិយា

ភ្នំពេញៈ ក្នុងគោលដៅផ្តល់លំនៅដ្ឋានតម្លៃសមរម្យដល់ប្រជាពលរដ្ឋកម្ពុជា បុរីKCបាននិងកំពុងវិនិយោគ លើលំនៅដ្ឋានតម្លៃមធ្យមដល់ប្រជាពលរដ្ឋ ដែលមានជីវភាពមធ្យម។

បុរីដែលមានទីតាំងនៅក្បែរផ្សារព្រែកព្នៅថ្មីនេះ បាននិងងកំពុងសាងសង់លំនៅ ដ្ឋានតម្លៃមធ្យម និងខុនដូតម្លៃសមរមន្យផងដែរ។

លំនៅដ្ឋានដែលមានតម្លៃ ត្រឹមជាង៦០០០០ដុល្លារអាមេរិកនេះ មានទំហំ៥ម៉ែត្រ និងបណ្តោយ៨ម៉ែត្រ ដែលមានបន្ទប់គេងចំនួន៣ និងបន្ទប់ទឹក៣ ជាជម្រើសសំរាប់គ្រួសារទាន់សម័យ និងមានជីវភាពកម្រិតមធ្យម។

បុរីខេ ស៊ី អំណោយផលដល់ការរស់នៅ និងប្រកអាជីវកម្មគ្រប់ប្រភេទ ដោយសារតែស្ថិតនៅជាប់ផ្លូវធំទំហំ៣០ម៉ែត្រ ជាផ្លូវតភ្ជាប់រវាងផ្លូវជាតិលេខ៥និងមហាវិថី ឈ្នះ ឈ្នះ នៃទីក្រុងមរតកសម្ដេចតេជោ ឆ្ពោះទៅកាន់ផ្លូវជាតិលេខ៤។ បន្ថែមពីនេះ ទីតាំងរបស់បុរី ខេ ស៊ី មានហ៊ុព័ទ្ធទៅដោយទីប្រជុំជនជាច្រើន ដូចជា ខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន បន្ថែមដោយគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូ នៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាពរបស់រដ្ឋបាលរាជធានីភ្នំពេញផងដែរ។

លំនៅដ្ឋាននៅក្នុង ខេស៊ី ត្រូវបានសាងសង់ឡើងជា៣ប្រភេទ រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។

សម្រាប់ព័ត៌មានបន្ថែម លោកអ្នកអាចទំនាក់ទំនងបានតាមរយៈទូរស័ព្ទលេខ ៖ ០៨៩ ៧៨៧ ៧២១ / ០៨៧ ៣៦ ៩៥ ៣៦ / ០១៦ ៦៨៥ ៨៥៨ ៕

រដ្ឋមន្ត្រីទេសចរណ៍បង្ហាញពីសក្តានុពលវិនិយោគទេសចរណ៍នៅកម្ពុជាដល់សមាជិកក្រុមប្រឹក្សាធុរកិច្ចអាស៊ាន-US

ដោយៈ រ៉ាណេត

ភ្នំពេញៈ លោកថោង ខុន រដ្ឋមន្ត្រីក្រសួងទេសចរណ៍ បានបង្ហាញពីឱកាសវិនិយោគជាច្រើនលើវិស័យទេសចរណ៍នៅកម្ពុជា ដល់ក្រុមប្រឹក្សាធុរកិច្ចអាស៊ាន-សហរដ្ឋអាមេរិក (US-ABC) ដែលជាស្ថាប័នដ៏ធំមួយ មានសមាជិកនៅពាសពេញ តំបន់អាស៊ីអាគ្នេយ៍ ក៏ដូចជាជុំវិញពិភពលោក ប៉ុន្តែកម្ពុជាក៏បានស្នើសុំកិច្ចសហការរួមគ្នា ទប់ស្កាត់ការរាតត្បាតជំងឺ COVID-19 ឱ្យខាងតែបានជាមុនផងដែរ។

ការលើកឡើងនេះ ត្រូវបានធ្វើឡើងនៅក្នុងកិច្ចប្រជុំជាមួយក្រុមប្រឹក្សាធុរកិច្ចអាស៊ាន-សហរដ្ឋអាមេរិក (US-ABC) តាមរយៈ Video Conference នារសៀលថ្ងៃទី២៩ ខែមិថុនា ឆ្នាំ២០២០ (ម៉ោងនៅកម្ពុជា) ដោយក្នុងកិច្ចប្រជុំនេះ ភាគី US-ABC បានលើកសំណើជាច្រើន ដើម្បីស្វែងរកការជួយកម្ពុជា ជាពិសេសក្នុងវិស័យធុរកិច្ចទេសចរណ៍ នាកំលុងពេលកម្ពុជាជួបវិបត្តិ COVID-19 និងក្រោយពេលវិបត្តិនេះត្រូវបានបញ្ចប់។

លោក Amb. Michael W.Michala អនុប្រធានជាន់ខ្ពស់ និងជានាយកគ្រប់គ្រងប្រចាំតំបន់ នៃក្រុមប្រឹក្សាធុរកិច្ចអាស៊ាន-អាមេរិកបានថ្លែងថា បច្ចុប្បន្នUS-ABC មានបណ្តាក្រុមហ៊ុនរបស់សហរដ្ឋអាមេរិកជាច្រើន នៅពាសពេញតំបន់អាស៊ីអាគ្នេយ៍ និងលើពិភពលោកជាសមាជិក ហើយតាមរយៈកិច្ចប្រជុំនេះUS-ABC ស្នើសុំបង្កើតកិច្ចសហប្រតិបត្តិការ និងការដោះស្រាយបញ្ហាធុរកិច្ចក្នុងវិស័យទេសចរណ៍នៅកម្ពុជា និងការប្រយុទ្ធប្រឆាំងការរាតត្បាតជំងឺ COVID-19។

លោកបន្តថា សម្រាប់កិច្ចប្រជុំនាពេលមានការចូលរួម ដោយបណ្តាថ្នាក់ដឹកនាំក្រុមហ៊ុនជាសមាជិក មកពីក្រុមហ៊ុន Google, Visa, Agoda, Expedia Group, និងក្រុមហ៊ុន Air nb ជាដើម ក្នុងគោលបំណងបង្កើតគំនិត និងការអនុវត្តល្អៗក្នុងការប្រយុទ្ធប្រឆាំងមេរោគ COVID-19 និងលើកផែនការបង្កើតកិច្ចសហប្រតិបត្តិការ ស្តារវិស័យទេសចរណ៍ឡើងវិញបន្ទាប់ពីវិបត្តិCOVID-19ត្រូវបានបញ្ចប់ និងស្នើបន្តកិច្ចសហការជាមួយកម្ពុជា ក្នុងវិស័យធុរកិច្ចទេសចរណ៍នៅឆ្នាំបន្តបន្ទាប់ទៀត។

ឆ្លើយតបនឹងសំណើនេះ លោករដ្ឋមន្ត្រីក្រសួងទេសចរណ៍ ថោង ខុន បានស្នើឱ្យ US-ABC បន្តសហការជាមួយផ្នែកជំនាញក្រសួងទេសចរណ៍កម្ពុជា ដើម្បីអនុវត្តគម្រោងកិច្ចសហប្រតិបត្តិការនានា ក្នុងវិស័យទេសចរណ៍។ ជាមួយគ្នានេះ លោកក៏បានស្នើដល់ US-ABC ជំរុញសមាជិករបស់ខ្លួនមកវិនិយោគនៅកម្ពុជា ក្នុងវិស័យទេសចរណ៍ ជាពិសេសសហគមន៍ទេសចរណ៍ និងអេកូទេសចរណ៍ដែលកំពុងមានសក្តានុពល និងទាក់ទាញភ្ញៀវទេសចរជាតិ-អន្តរជាតិយ៉ាងខ្លាំង៕

ទំហំពាជ្ជកម្មទ្វេភាគីរវាងកម្ពុជានិងជប៉ុនបន្តកើនឡើង ខណៈជប៉ុនបានក្លាយនៅទីផ្សារសំខាន់សម្រាប់កម្ពុជា

ដោយ ប៊ី

ភ្នំពេញៈ កម្ពុជាបាននាំចេញផលិតផល មានតម្លៃ៦២៧លានដុល្លារទៅទីផ្សារជប៉ុន ក្នុងរយៈពេល៤ខែដំបូងឆ្នាំនេះ កើនឡើង៤ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ខណៈកម្ពុជាគួរតែធ្វើពិពិធកម្មទៅរកការនាំចេញ គ្រឿងអេឡិចត្រូនិច និងគ្រឿងបន្លាស់រថយន្តបន្ថែមទៅកាន់ទីផ្សារជប៉ុន។

យោងតាមរបាយការណ៍ចុងក្រោយ ពីអង្គការពាណិជ្ជកម្មក្រៅប្រទេសជប៉ុន (JETRO) បានបង្ហាញថា ចាប់ពីខែមករាដល់ខែមេសាពាណិជ្ជកម្មទ្វេភាគី រវាងប្រទេសទាំងពីរមានទំហំទឹកប្រាក់៧៧៨ លានដុល្លារអាមេរិក បានកើនឡើង៤ភាគរយ។

ក្នុងរយៈពេលដូចគ្នានេះដែរ ការនាំចូលរបស់កម្ពុជាពីប្រទេសជប៉ុនមានតម្លៃ ១៥១លានដុល្លារកើនឡើង៣ភាគរយ។

យោងតាមក្រសួងពាណិជ្ជកម្ម ផលិតផលសក្តានុពលសម្រាប់នាំចេញពីប្រទេសកម្ពុជាទៅកាន់ប្រទេសជប៉ុន មានសម្លៀកបំពាក់ ស្បែកជើង និងគ្រឿងអេឡិចត្រូនិច។

កាលពីពេលថ្មីៗនេះ ធនាគារពិភពលោកបានលើកឡើងថា ប្រទេសកម្ពុជាគួរតែធ្វើពិពិធកម្មពីការនាំចេញសម្លៀកបំពាក់ ដោយជំរុញបន្ថែមទៀតនូវការនាំចេញ គ្រឿងអេឡិចត្រូនិច និងគ្រឿងបន្លាស់រថយន្តទៅកាន់ប្រទេសជប៉ុន។

ធនាគារនេះបានឱ្យដឹង នៅក្នុងរបាយការណ៍របស់ធនាគារពិភពលោកស្តីពី បច្ចុប្បន្នភាពសេដ្ឋកិច្ចចុងក្រោយ សម្រាប់ប្រទេសកម្ពុជាកាលពីពេលថ្មីៗនេះថា ការនាំចេញសម្លៀកបំពាក់ស្បែកជើង និងទំនិញធ្វើដំណើររបស់កម្ពុជា បានកើនឡើងត្រឹមតែ៧,៥ភាគរយក្នុងរយៈពេល៣ ខែគិតត្រឹមខែមីនាធ្លាក់ចុះពី១៧,៧ ភាគរយកាលពីឆ្នាំមុន។

នៅក្នុងឆ្នាំ២០១៩ កំណើននៃការនាំចេញសម្លៀកបំពាក់ ស្បែកជើង និងទំនិញធ្វើដំណើរបានថយចុះមកត្រឹម១៣,៦ភាគរយ ធ្លាក់ចុះពី១៧,៧ភាគរយ បើធៀបកាលពីឆ្នាំមុនមួយទៀត។

បន្ទាប់ពីទីផ្សារអាមេរិក និងអឺរ៉ុប ធនាគារពិភពលោកបានឱ្យដឹងទៀតថា ទីផ្សារនាំចេញធំជាងគេពីរបន្ទាប់របស់កម្ពុជាគឺជប៉ុន (តម្លៃការនាំចេញ ១,០៥ ពាន់លានដុល្លារ) និងអង់គ្លេស (៩៤៥ លានដុល្លារអាមេរិក) នៅឆ្នាំ២០១៩។

កាលពីឆ្នាំមុន ពាណិជ្ជកម្មទ្វេភាគីរវាងប្រទេសទាំងពីរ មានទំហំទឹកប្រាក់២,២៩២ លានដុល្លារអាមេរិក បានកើនឡើង១៣ភាគរយ៕

ធនាគារកណ្តាលអឺរ៉ុបចាត់វិធានការបន្ទាន់ថ្មី ដើម្បីជំរុញសេដ្ឋកិច្ចឡើងវិញ

ដោយ ប៊ី

អន្តរជាតិៈធនាគារកណ្តាលអឺរ៉ុប បានចាត់វិធានការបន្ទាន់ថ្មីបន្ថែមទៀតដើម្បីជំរុញសេដ្ឋកិច្ចរបស់តំបន់អឺរ៉ុប អំឡុងពេលវិបត្តិសេដ្ឋកិច្ចធំបំផុត ចាប់តាំងពីសង្គ្រាមលោកលើកទី២។

គ្រាន់តែប៉ុន្មានខែ បន្ទាប់ពីមានការចាត់វិធានការបន្ទាន់ ធនាគារកណ្តាលបានឱ្យដឹងថា ខ្លួននឹងបង្កើនទំហំកម្មវិធីទិញ មូលបត្របំណុលរបស់ខ្លួនពី៦០០ពាន់លានអឺរ៉ូ ដល់ ១.៣៥ទ្រីលានអឺរ៉ូ។

កម្មវិធីនេះនឹងដំណើរការ រហូតដល់ខែមិថុនា ឆ្នាំ ២០២១ ដែលមានរយៈពេលយូរជាងការគ្រោងទុក៦ខែ។

វិធានការណ៍នេះនឹងរក្សាអត្រាការប្រាក់ទាប សម្រាប់បណ្តាប្រទេសជាច្រើន និងក្រុមហ៊ុន ខណៈដែលពួកគេប្រឈមនឹងឱនភាពថវិកា និងវិបត្តិសេដ្ឋកិច្ច។

ធនាគារកណ្តាលបានឱ្យដឹងថា ការទិញនេះគាំទ្រដល់ “លក្ខខណ្ឌផ្តល់មូលនិធិនៅក្នុងសេដ្ឋកិច្ចជាក់ស្តែងជា ពិសេសសម្រាប់អាជីវកម្ម និងគ្រួសារ”។

ធនាគារកណ្តាលក៏បានសម្រេចចិត្ត រក្សាអត្រាការប្រាក់របស់ខ្លួននៅកម្រិតទាបបំផុត។

លោក Rachel Winter នាយករងនៃក្រុមហ៊ុនវិនិយោគ Killik & Co បាននិយាយថា ការទិញប័ណ្ណបំណុលបន្ថែមទំនង ជាជំរុញឱ្យទិន្នផលមូលបត្ររបស់រដ្ឋាភិបាលអឺរ៉ុបទៅក្នុងភាពអវិជ្ជមាន ហើយវិនិយោគិន ក្នុងការស្វែងរកផលវិជ្ជមាននឹងត្រូវប្រឈមនឹងហានិភ័យកាន់តែច្រើន។

នៅពេលធនាគារកណ្តាលទិញមូលបត្របំណុល ដោយប្រើប្រាស់សាច់ប្រាក់ តម្លៃមូលបត្របំណុលកើនឡើង ហើយតម្លៃប្រាក់កម្ចីធ្លាក់ចុះ។

អ្នកជំនាញក្នុងទីផ្សារខ្លះឆ្ងល់ថា តើលុយចំនួនប៉ុន្មានអាចត្រូវបានបោះពុម្ពដោយសុវត្ថិភាពដោយមិនធ្វើឱ្យតម្លៃប្រាក់ថយចុះ៕ BBC៕

ខេត្តក្រចេះទទួលបានទុនវិនិយោគក្នុងវិស័យសំណង់សរុបជិត៤លានដុល្លារ លើ៧៩គម្រោង

ដោយ ៖ រ៉ាណេត
ក្រចេះ ៖ ស្របទៅនឹងចក្ខុវិស័យនៃការអភិវឌ្ឍហេដ្ឋារចនាសម្ព័ន្ធនៅទូទាំងខេត្តក្រចេះ ជាពិសេសតំបន់ទីប្រជុំជន និងតំបន់ទេសចរណ៍ រដ្ឋបាលខេត្តទទួលទុនវិនិយោគពីវិស័យឯកជនផ្នែកអចលនទ្រព្យ និងសំណង់សរុបចំនួនជិត៤លានដុល្លារ ទៅលើគម្រោងចំនួន៧៩នៅទូទាំងខេត្ត។

អភិបាលខេត្តក្រចេះ លោក វ៉ា ថន បានមានប្រសាសន៍នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្ត នៅទីស្ដីការគណៈរដ្ឋមន្ត្រី នាព្រឹកថ្ងៃទី៣០ ខែមិថុនា ឆ្នាំ២០២០នេះថា បច្ចុប្បន្នរាជរដ្ឋាភិបាលបានផ្តល់ទុនវិនិយោគក្នុងវិស័យហេដ្ឋារចនាសម្ព័ន្ធនានាជាច្រើនស្ទើរទូទាំងខេត្ត ដូចជាផ្លូវថ្នល់ ស្ពានមេតុង បណ្តាញទឹកស្អាត និងផ្នែកដទៃទៀតដែលបម្រើប្រយោជន៍ដល់ប្រជាពលរដ្ឋសរុបរហូតដល់ប្រវែង៩៨៨,៣៩គីឡូម៉ែត្រ។

លោកបានបញ្ជាក់ថា “សម្រាប់វិស័យអចលនទ្រព្យ និងសំណង់ ក៏មានការអភិវឌ្ឍន៍គួរឱ្យកត់សម្គាល់ផងដែរ ដោយទទួលបានទុនវិនិយោគក្នុងការសាងសង់សំណង់នានាលើគម្រោងសរុបចំនួន៧៩ ស្មើនឹងថវិកាចំនួន ៣ ៨០១ ១០០ដុល្លារ។ ជាមួយគ្នានេះ រដ្ឋបាលខេត្តក៏បានដោះស្រាយនូវវិវាទដីធ្លីស្ថិតក្នុងយន្តការគណៈកម្មការសុរិយោដី ៥៤ករណី និងក្រៅយន្តការគណៈកម្មការសុរិយោដី ចំនួន៩៨ករណី”។

ជាមួយគ្នានេះ លោកក៏បានលើកឡើងផងដែរថា ពាក់ព័ន្ធទៅនឹងការចុះបញ្ជីដីធ្លីដែលមានលក្ខណៈជាប្រព័ន្ធចំនួន៤ក្រុង / ស្រុក (ក្រុងក្រចេះ ចិត្របុរី ព្រែកប្រសព្វ និងស្រុកឆ្លូង) បានចំនួន ១៥ ៩៨៨ ប័ណ្ណ ក្នុងនោះបណ្ណសម្បទានដីសង្គមកិច្ច ចំនួន ២៤៩១បណ្ណ។ ចុះបញ្ជីដីសហគមន៍ជនជាតិភាគតិច ចំនួន២សហគមន៍ ស្ថិតនៅភូមិស្រែឈូក និងឃុំរលួសមានជ័យ ភូមិត្នោត ឃុំស្រែជិះ ស្រុកសំបូរ។ ជាមួយគ្នានេះ ការចុះបញ្ជីដីធ្លីមានលក្ខណៈដាច់ដោយដុំបានចំនួន២៤បណ្ណ ការចុះបញ្ជីផ្ទេរកម្មសិទ្ធិ ចំនួន៣៦២បណ្ណ និងការចុះបញ្ជីប្រាតិភោគ (ដាក់បញ្ចាំ / ហ៊ីប៉ូតែក) ចំនួន ២៩៥ក្បាលដី៕

សម្តេចតេជោ ៖ អាជីវកម្មអចលនទ្រព្យដំណើរការធម្មតានៅក្នុងប្រទេសកម្ពុជា

ដោយ ៖ វុត្ថា

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសរសេរនៅលើបណ្តាញសង្គម Facebook ផ្លូវការនៅថ្ងៃទី៣០ ខែមិថុនា ឆ្នាំ ២០២០នេះថា ទោះបីជាបញ្ហាជំងឺ Covid-19 បានបង្កនូវផលប៉ះពាល់ដល់សេដ្ឋកិច្ចកម្ពុជាក៏ពិតមែន ប៉ុន្តែឃើញថាបងប្អូនប្រជាពលរដ្ឋអាជីវករក្នុងប្រទេសកម្ពុជានៅតែបន្តខិតខំប្រឹងប្រែងក្នុងមុខរបររបស់របស់ខ្លួនជាធម្មតា។

សម្តេចតេជោបន្តថា ក្នុងនោះអាជីវកម្មលក់ផ្ទះទិញផ្ទះនៅតែបន្តដដែល គ្រាន់តែមិនដាច់ខ្លាំងដូចកាលពីមុន ហើយបច្ចុប្បន្ននេះ លំនៅដ្ឋានបែប Shop house កំពុងតែពេញនិយមសំរាប់ការធ្វើអាជីវកម្មមានពេលបច្ចុប្បន្នផងដែរ។

លោកឧកញ៉ា ចេង ខេង ស្ថាបនិក និងជាអគ្គនាយកក្រុមហ៊ុនអចលនទ្រព្យ CPL បានថ្លែងតាមវីដេអូ Conference ក្នុងកម្មវិធីមួយរបស់សមាគមអ្នកវាយតម្លៃ និងភ្នាក់ងារអចលនទ្រព្យកម្ពុជានៅថ្ងៃទី២៥ ខែមិថុនានេះថា ចលនាទិញលក់អចលនទ្រព្យនៅតែមានសកម្មភាពធម្មតា អំឡុងពេលវិបត្តិនៃជំងឺ Covid-19 នេះ។

លោកឧកញ៉ាបានថ្លែងថា “ទីផ្សារអចលនទ្រព្យនៅដំណើរការធម្មតា ព្រោះបុគ្គលិករបស់ក្រុមហ៊ុន ខ្ញុំឆ្លើយតបបានជាមួយនឹងគោលដៅរបស់ក្រុមហ៊ុន ដែលបានដាក់ចេញ ហើយចំណូលរបស់គាត់នៅតែទទួលបានធម្មតា” ។ លោកបន្តថា “បញ្ហាសំខាន់គឺសមត្ថភាពរបស់បុគ្គលិក ព្រោះបើសិនជាទីផ្សារដំណើរធម្មតា តែចំណូលយើងធ្លាក់ចុះ បញ្ហាគឺមកយើង។ ដូច្នេះយើងត្រូវមានវិជ្ជាជីវក្នុងវិស័យអចលនទ្រព្យ និងព្យាយាមបន្ថែមដើម្បីទទួលបានជោគជ័យក្នុងវិស័យនេះ” ។

លោក សន សៀប អគ្គនាយកក្រុមហ៊ុនអចលនទ្រព្យ Key Real Estate បាននិយាយថា លោកសង្កេតឃើញថា អំឡុងពេលកូវីដនេះ អ្នកទិញមានចំនួនជាងមុនពេលកូវីដទៀត។ លោកថា “នេះសម្រាប់តែអ្វីដែលខ្ញុំបានឃើញ” ។ លោកបានថ្លែងថា “នៅក្នុងគ្រាលំបាកនេះ គឺយើងអាចមានឱកាសច្រើន។ ចំនួនសកម្មភាពជារួមរបស់ភ្នាក់ងារអចលនទ្រព្យមានថមផយចុះ ដូច្នេះនេះជាឱកាសសម្រាបភ្នាក់ងារពិតប្រាកដ ក្នុងការបញ្ចេញស្នាដៃចាប់យកអតិថិជន” ។

លោកបានបន្តថា “អំឡុងពេលនេះ អ្នកទិញដែលចុះទៅមើលដីធ្លី គឺអ្នកទិញពិតប្រាកដ ហើយយើង (ភ្នាក់ងារ) ចំណេញពេលជាងមុនទៀត។ បើគាត់មិនទិញទេ គាត់មិនចុះទៅទេអំឡុងពេលនេះ” ។លោកបានឱ្យដឹងទៀតថា សកម្មភាពរបស់ទិញឃើញមានច្រើនបច្ចុប្បន្ន ព្រោះអ្នកទិញអំឡុងពេលនេះ មានភាពច្បាស់ លាស់ជាងពេលមុនកូវីដនេះទៅទៀត។

ទុនវិនិយោគក្នុងវិស័យសំណង់នៅទូទាំងប្រទេស មានទំហំទឹកប្រាក់សរុបជាង៣ពាន់លានដុល្លារអាមេរិក ក្នុងរយៈពេល ៤ខែដំបូងដើមឆ្នាំ២០២០នេះ បានកើនឡើងជាង ២០ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យរបស់ក្រសួងសេដ្ឋកិច្ច និងហិរញ្ញវត្ថុ។

ទិន្នន័យរបស់ក្រសួងសេដ្ឋកិច្ច និងហិរញ្ញវត្ថុ បានបង្ហាញថា ក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតលើសំណើសុំសាងសង់ សរុបទូទាំងប្រទេសមានចំនួន១ ៦៤៧ គម្រោងក្នុងរយៈពេល៤ខែ ដើមឆ្នាំ ២០២០ កើនឡើង ២២៣គម្រោង ខណៈទំហំតម្លៃវិនិយោគសរុបប្រមាណ៣០៤៩លានដុល្លារអាមេរិក បានកើនឡើង ២០,៥ ភាគរយ ធៀបនឹងរយៈដូចគ្នាកាលពីឆ្នាំ២០១៩ ៕

ក្រុមហ៊ុន China Railway កំពុងសិក្សាគម្រោងស្ថាបនាផ្លូវដែកតម្លៃ ៩០០០លានដុល្លារនៅមីយ៉ានម៉ា

ដោយ ហ្សូលី

ប៉េកាំង៖ ក្រុមហ៊ុន China Railway Group បានដាក់សំណើ និងរៀបចំការសិក្សាអំពីលទ្ធភាពនៅក្នុងការស្ថាបនាផ្លូវរថភ្លើងល្បឿនមធ្យមនៅមីយ៉ាន់ម៉ា ដែលមានតម្លៃប្រមាណ ៩០០០លានដុល្លារអាមេរិក។

គម្រោងស្ថាបនាផ្លូវដែកនេះមានចម្ងាយប្រមាណ ៦៥០គីឡូម៉ែត្រ នឹងសង្ឃឹមអំពីការស៊ើបអង្កេតទៅលើខ្សែចន្លោះរវាងក្រុង MandaLay នៃកណ្តាលទីក្រុងមីយ៉ាន់ម៉ា ក៏ដូចជាកំពង់ផែទឹកជ្រៅ និងជម្រើសមួយទៀតគឺតំបន់ឧស្សាហកម្ម kyauk pyu។

ខ្សែរថភ្លើងនេះនឹងមានចម្ងាយប្រហែលពាក់កណ្តាលនៃចម្ងាយ ១២១៥គីឡូម៉ែត្រ ដែលបានគ្រោងទុករវាងកំពង់ផែថ្មី និងរដ្ឋធានីរបស់ចិនគឺខេត្តយុនណាន តាមរយៈទីក្រុង MandaLay។ ខ្សែរថភ្លើងមួយនេះមានតម្លៃប្រមាណ ២០ពាន់លានដុល្លារ និងបញ្ចប់ការសាងសង់កាលពីឆ្នាំ ២០១១ ។ អនុស្សរណៈនៃការយោគយល់គ្នាសម្រាប់ផ្លូវដែកត្រូវបានចុះហត្ថលេខារវាងរដ្ឋាភិបាលមីយ៉ាន់ម៉ា និងក្រុមហ៊ុនផ្លូវដែកចិន កាលពីខែតុលា ឆ្នាំ ២០១៨ ។

សេចក្តីប្រកាសដែលប្រទេសចិនចង់ចាប់ផ្តើមប្រតិបត្តិការសាងសង់ត្រូវបានធ្វើឡើងដោយលោក U nyi nyi swe អ្នកគ្រប់គ្រងទូទៅនៃក្រុមហ៊ុនផ្លូវដែក។ នេះបើតាមឱ្យដឹងព័ត៌មានពីកាសែត Myanmar Times ។

លោកបាននិយាយថា អនុស្សរណៈនៃការស្ថាបនាគម្រោងរថភ្លើងនៅ Mandalay ចម្ងាយប្រមាណ ៦៥០ គីឡូម៉ែត្រ និងមានទុនប្រមាណ ៩០០០លានដុល្លារនេះ មានរួមបញ្ចូលទាំងការអនុម័តការអនុញ្ញាតនៃលទ្ធភាពរៀបចំការសិក្សាក្នុងគោលបំណងពង្រីកផ្លូវដែកពីក្រុង Mandalay ទៅកាន់ខេត្ត Kyauk pyu។ លទ្ធភាពសិក្សាអំពីគម្រោងនេះនឹងត្រូវចំណាយពេលប្រមាណ ២ទៅ ៣ឆ្នាំ។

អ្នកគ្រប់គ្រងទូទៅរូបនេះបន្ថែមថា គម្រោងផ្លូវដែកនឹងអនុញ្ញាតឱ្យរថភ្លើងរត់ក្នុងល្បឿនប្រហែល ១៦០គីឡូម៉ែត្រក្នុងមួយម៉ោង និងចំណាយថវិកាប្រហែល ៩០០០លានដុល្លារ៕

ក្រុមហ៊ុនធំមួយនឹងសាងសងរោងចក្រថាមពលអគ្គិសនីថ្មីមួយ ដើរដោយធ្យូងថ្មលើផ្ទៃដីជិត ៥៥ហិកតា នៅខេត្តព្រះសីហនុ

ដោយ ៖ រ៉ាណេត

ព្រះសីហនុ ៖ គម្រោងសាងសង់រោងចក្រផលិតថាមពលអគ្គិសនីដើរដោយធ្យូងថ្មដែលវិនិយោគក្រុមហ៊ុន អេស ប៊ី ខេ រ៉ីស៊ើន អេនឌីវេឡុមមេន មានអនុភាព ២x៣៥០មេហ្គាវ៉ាត់ គ្រោងសាងសង់លើផ្ទៃដី ៥៤,៩ហិកតា ស្ថិតនៅក្នុងភូមិ សាស្ត្រភូមិ២ ឃុំកំពេញ ស្រុកស្ទឹងហាវ ខេត្តព្រះសីហនុក្រោយការគាំទ្រពីរាជរដ្ឋាភិបាលកម្ពុជា។

តំណាងក្រុមហ៊ុន អេស ប៊ី ខេ រ៉ីស៊ើន អេន ឌីវេឡុមមេន បានឱ្យដឹងនៅល្ងាចថ្ងៃទី២៩ ខែមិថុនា ឆ្នាំ២០២០ ថា ក្រុមហ៊ុនបានទទួលសិទ្ធិសាងសង់រោងចក្រផលិតអគ្គីសនីដុតធ្យូងថ្ម មានអនុភាព ២x៣៥០មេហ្គាវ៉ាត់ នៅឃុំកំពេញ ស្រុកស្ទឹងហាវខេត្តព្រះសីហនុ និងបានធ្វើបទបង្ហាញ ចំណុចនិយាមកា គម្រោងហេដ្ឋារចនាសម្ព័ន្ធសំខាន់ៗ ផលប៉ះពាល់សំខាន់ៗ និងវិធានការដោះស្រាយមួយចំនួនក្នុងដំណាក់កាលប្រតិបត្តិគម្រោងសុវត្ថិភាពការងារ។

គម្រោងរោងចក្រផលិតអគ្គិសនីធ្យូងថ្មកម្លាំង ២x៣៥០មេហ្គាវ៉ាត់ ផ្តល់ផល ប្រយោជន៍មានដូចជា ផ្តល់ការងារជូនប្រជាពលរដ្ឋ កាត់បន្ថយការនាំ ចូលអគ្គិសនីពីប្រទេសជិតខាង កាត់បន្ថយការចំណាយរបស់ប្រជាពលរដ្ឋ ហើយគម្រោងសាងសង់នេះ នឹងត្រូវបញ្ចប់នៅចុងឆ្នាំ២០២២ខាងមុខ ។

ដោយឡែកសម្រាប់គោលការណ៍សុវត្ថិភាពការងារដែលក្រុមហ៊ុនត្រូវទទួលបន្ទុករួមមាន ទាក់ទងនឹងខ្សែពាន, គន្លឹះសុវត្ថិភាពនៅតំបន់ស្តុកធ្យូងថ្ម និងផេះធ្យូងថ្ម កន្លែងកិនធ្យូងថ្ម, សុវត្ថិភាពការងារនៅទីខ្ពស់, បុគ្គលិកធ្វើការនៅមន្ទីរ ពិសោធន៍, បុគ្គលិកធ្វើការនៅកន្លែងដែលមានសំឡេងខ្លាំង, បុគ្គលិកធ្វើការនៅកន្លែងឡចំហាយ, សុវត្ថិភាពនៅកន្លែងផ្ទេរចរន្តអគ្គិសនី (Switch Yard), ការផ្តល់ជូននូវអនាម័យ និងសុខ មាលភាពជូនដល់បុគ្គលិក កម្មករ, ការបិទស្លាកសញ្ញា និងគំនូសចរាចរណ៍នៅតាម ទីតាំងសំខាន់នៅក្នុងរោងចក្រ, ការអប់រំ, ការសង្គ្រោះបឋម, ការស៊ើបអង្កេតគ្រោះថ្នាក់ និងរបាយការណ៍, ប្រព័ន្ធពន្លត់អគ្គិភ័យ, ប្រព័ន្ធគ្រប់គ្រងខ្យល់ និងកំដៅក្នុងរោងចក្រជាដើម។

អភិបាលរងខេត្តព្រះសីហនុ លោក ឈិន សេងងួន បានស្វាគមន៍ចំពោះវត្តមាននៃការវិនិយោគរបស់ក្រុមហ៊ុន អេស ប៊ី ខេ រ៉ីស៊ើន អេន ឌីវេឡុមមេន ដោយបានធ្វើបទបង្ហាញពីផលប៉ះពាល់បរិស្ថាន និងសង្គម ពេញលេញ លើគម្រោងអភិវឌ្ឍន៍ និងវិនិយោគលើរោងចក្រផលិតអគ្គិសនីដុតធ្យូងថ្មមួយនេះ។ ក្នុងនាមរដ្ឋបាលខេត្ត នឹងព្យាយាមចូលរួមសហការ ដើម្បីឱ្យក្រុមហ៊ុនមានលទ្ធភាពក្នុងការសាងសង់ស្ពានជញ្ជូនធ្យូងថ្ម និងការសាងសង់រោងចក្រអគ្គិសនីដុតធ្យូងថ្ម នៅស្រុកស្ទឹងហាវ ប្រកបដោយភាពរលូន៕

កាន់តែសប្បាយទិញ ជាមួយការបញ្ចុះតម្លៃរហូតដល់ ៨០ភាគរយនៅផ្សារទំនើប FURI Times Square

ដោយៈ រ៉ាណេត

ព្រះសីហនុៈ កាន់តែអស្ចារ្យជាមួយការលក់ទំនិញបញ្ចុះតម្លៃពិសេស ចាប់ពី១០-៨០ភាគរយ ព្រមទាំងទទួលបានសន្លឹកឆ្នោតផ្សងសំណាង ចាប់រង្វាន់យកវត្ថុអនុស្សាវរីយ៍យ៉ាងសន្ធឹកសន្ធាប់មិនធ្លាប់មានពីមុនមក នៅក្នុងផ្សារទំនើប FURI Times Square ក្រុងព្រះសីហនុ ដែលកម្មវិធីនេះនឹងអនុវត្តចាប់ពីថ្ងៃទី៣០ ខែមិថុនា រហូតដល់ថ្ងៃទី១៩ ខែក ក្កដា ឆ្នាំ២០២០ខាងមុខនេះ។

បុគ្គលិកផ្នែកទីផ្សារជាន់ខ្ពស់ប្រចាំនៅផ្សារទំនើប FURI Times Square ក្រុងព្រះសីហនុ កញ្ញាប៉ែន ម៉ារ៉ា បានប្រាប់ឱ្យដឹងតាមទូរស័ព្ទនៅល្ងាចថ្ងៃទី២៩ ខែមិថុនា ឆ្នាំ២០២០ថា ជាការអបអរសាទរនៃការបើកដំណើរការរបស់ផ្សារទំនើប FURI Times Square ក្រុងព្រះសីហនុក្រោមការទទួលបានកិច្ចគាំទ្រ ពីសំណាក់អតិថិជនអស់រយៈពេល៦ខែកន្លងទៅនេះ គណៈគ្រប់គ្រង រួមជាមួយក្រុមហ៊ុន និងហាងជាដៃគូ ដែលកំពុងដំណើរការនៅក្នុងផ្សារ បានរៀបចំកម្មវិធីពិសេស ដោយការលក់ទំនិញបញ្ចុះតម្លៃរហូតដល់៨០ភាគរយ។

កញ្ញាបានបន្តថា “ជាមួយនឹងកម្មវិធីពិសេស ដែលបង្កើតឡើងដោយគណៈគ្រប់គ្រងផ្សារ FURI Times Square ដែលមានឈ្មោះថា Mid-Year Sale Promotion (ព្រឹត្តិការណ៍លក់ពាក់កណ្តាលឆ្នាំ) គ្រប់ស្តង់លក់ទំនិញ និងហាងអាហារដ្ឋានទាំងអស់ដែលកំពុងដំណើរការលក់ នៅក្នុងផ្សារសុទ្ធតែមានការបញ្ចុះតម្លៃចាប់ពី១០ ដល់៨០ភាគរយភ្លាម” ។

កញ្ញាបន្តថា “គ្រប់អតិថិជនទាំងអស់ ក៏ដូចជាអ្នកមកកម្សាន្តនៅផ្សារទំនើប FURI Times Square ចាប់ពីថ្ងៃទី៣០ ខែមិថុនា រហូតដល់ថ្ងៃទី១៩ ខែកក្កដា ឆ្នាំ២០២០ នឹងទទួលបានឆ្នោតផ្សងសំណាង សម្រាប់ចាប់យករង្វាន់ជា Voucher សម្រាប់ទិញទំនិញក្នុងផ្សារ និងវត្ថុអនុស្សាវរីយ៍ជាច្រើនទៀត។ ការបញ្ចុះតម្លៃពិសេសនឹងត្រូវបានអនុវត្តចាប់ពីថ្ងៃទី៣០ ខែមិថុនា រហូតដល់ថ្ងៃទី១៩ ខែកក្កដា ឆ្នាំ២០២០ ។

ដោយឡែកសម្រាប់ការកម្មវិធីចាប់ឆ្នោត យករង្វាន់នឹងត្រូវធ្វើឡើងចំនួន២លើក។ ការចាប់ឆ្នោតលើកទី១ នឹងត្រូវធ្វើឡើងនៅល្ងាចថ្ងៃទី១១ ហើយលើកទី២ ធ្វើនៅល្ងាចថ្ងៃទី១៩ ខែកក្កដា ឆ្នាំ២០២០ ។

ជារៀងរាល់ថ្ងៃមានអតិថិជនជាច្រើនបានបង្ហាញពីការគាំទ្រ និងចេញចូលក្នុងផ្សារទំនើប FURI Times Square ជាប់ឥតដាច់ ជាពិសេសនៅថ្ងៃចុងសប្ដាហ៍ ដែលមានទាំងអតិថិជនជាលក្ខណៈគ្រួសារដែលក្រៅពីទិញសម្ភារៈប្រើប្រាស់ប្រចាំថ្ងៃ រួមនឹងផលិតផលផ្សេងៗ ហើយក្រៅពីនេះ ក៏មានការទទួលទានអាហាររួមគ្នាជាលក្ខណៈគ្រួសារ និងមិត្តភ័ក្ដិប្រកបទៅដោយភាពសប្បាយរីករាយផងដែរ។

ផ្សារទំនើប FURI Times Square មានទីតាំងស្ថិតនៅសង្កាត់លេខ៤ ក្រុងព្រះសីហនុ បាននាំមកជូននូវបទពិសោធន៍ថ្មីនៅក្នុងតំបន់ ដោយការនាំយកមកនូវបណ្តាផលិតផល មុខទំនិញចំរុះគ្រប់ប្រភេទយ៉ាងសម្បូរបែប ដែលសុទ្ធតែជាម៉ាកយីហោល្បីៗលំដាប់សាកលលោក ដូចជា ក្រុមហ៊ុន KFC ក្រុមហ៊ុន Starbucks ក្រុមហ៊ុន Amazon Café ,ក្រុមហ៊ុន KOI ក្រុមហ៊ុន Dakasi Tea ហាងអាហារមកពីប្រទេសសាំងហ្គាពួរ ក្រុមហ៊ុនលក់សម្លៀកបំពាក់ LEVI’s ក្រុមហ៊ុន NIKE ក្រុមហ៊ុន Samsonite ក្រុមហ៊ុននាឡិកាដ៏ល្បីឈ្មោះ G-Shock ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងសំអាងផងដែរ៕

ម្ចាស់អគារជួលអាជីវកម្មមួយចំនួនចាប់ផ្តើមបញ្ចុះតម្លៃពី៣០ទៅ៥០ភាគរយក្នុងកំឡុងវិបត្តិជំងឺ Covid-19

ដោយ វុត្ថា

ភ្នំពេញៈ ឆ្លើយតបទៅនឹងការអំពាវនាវរបស់ប្រមុខនៃរាជរដ្ឋាភិបាលកម្ពុជាឱ្យមានការបញ្ចុះតម្លៃនៃអាគារជួលអាជីវកម្ម នាពេលកន្លងមកនេះ ម្ចាស់អគារជួលមួយចំនួននៅក្នុងប្រទេសកម្ពុជា បានចាប់ផ្តើមបញ្ចុះតម្លៃជួលរបស់ខ្លួនប្រមាណ ៣០ ទៅ ៥០ ភាគរយ ដើម្បីរក្សាអតិថិជន។

លោក ឡុង គឹមសួគ៌ អគ្គនាយកក្រុមហ៊ុនភ្នាក់ងារអចលនទ្រព្យ Century21 Advance បានប្រាប់គេហទំព័រ Propertyarea.asia នៅថ្ងៃទី ២៩ ខែមិថុនា ឆ្នាំ ២០២០នេះ បានឱ្យដឹងថា ចាប់តាំងពីមានជំងឺ Covid-19 កើតឡើងបានធ្វើឱ្យទីផ្សារជួលអាគារអាជីវកម្មមានការថមថយ ខណៈគម្រោងអាគារថ្មីៗ មិនមានការបើក ហើយអ្នកដែលជួលរួចហើយ ក៏មានបញ្ហាពាក់ព័ន្ធនឹងចំណូលផងដែរ។

លោកបន្តថា “អ្នកជួលទាំងអស់បានស្នើសុំម្ចាស់អគារឱ្យមានការបញ្ចុះតម្លៃ តែយ៉ាងណាការបញ្ចុះតម្លៃនេះ វាអាស្រ័យទៅលើម្ចាស់អគារយល់ឃើញតែប៉ុណ្ណោះ ហើយអ្នកខ្លះបានបញ្ចុះរហូតដល់៥០ភាគរយ និងអ្នកខ្លះទៀបញ្ចុះបានត្រឹម៣០ភាគរយ តាម រយៈការយោគយល់ និងមើលឃើញក្នុងស្ថានភាពជាក់ស្តែង និងអ្នកខ្លះទៀតបញ្ចុះ ២៥ ភាគយ” ។

លោកបន្ថែមថា “នៅក្នុងខែ មិនា មេសា និងឧសភា មានការធ្លាក់ចុះយ៉ាងគំហុកនូវតម្រូវការជួល ទាំងអាជីវកម្មក៏មានការធ្លាក់ចុះផងដែរ ទើបតែដើមខែមិថុនា ស្ថានការមានភាពល្អប្រសើរឡើងបន្តិច ។ ហើយអ្វីដែលគូរឱ្យកត់សម្គាល់ នៅក្នុងរយៈពេលមួយសប្តាហ៍មុននេះ តម្រូវការមានការធ្លាក់ចុះសារជាថ្មី ដែលបណ្តាលមកពីមានការផ្ទុះឡើងវិញខ្លះនូវជំងឺ Covid-19 ។

លោកបញ្ជាក់ថា “អគារប៉ះពាល់ខ្លាំងជាងគេ គឺអគារបំរើអាជីវកម្ម ភោជនីយដ្ឋាន ហាងលក់ដូរទំនិញផ្សេងៗ សេវាទេសចរណ៍ និងអគារដែលវិនិយោគធំៗពីបរទេស។

អគ្គនាយកក្រុមហ៊ុនអចលនទ្រព្យ Basac Realty បានឱ្យដឹងដែរថា មិនថាតែចំពោះអាគារសម្រាប់បម្រើឱ្យវិស័យ ការិយាល័យកម្រិតខ្ពស់ អគារជាន់ផ្ទាល់ដី ឬអាគារដទៃទៀតសម្រាប់ជួលនោះទេ ភាគច្រើនកំពុងជួបភាពប្រឈម ដោយសារតែអតិថិជនបញ្ឈប់កុងត្រាជួល។

លោកថ្លែងថា “ហេតុផលដែលបញ្ឈប់កុងត្រា ក៏ព្រោះដំណើរការអាជីវកម្មជួបភាពរាំងស្ទះ ជាក់ស្ដែងដូចជាក្រុមហ៊ុនផ្នែក បដិសណ្ឋារកិច្ច និងទេសចរណ៍មណ្ឌលកម្សាន្ត និងមណ្ឌលស្ទីម សូណា ជាដើមដែលត្រូវផ្អាកសកម្មភាព ហើយក្រុមហ៊ុន បម្រើសេវាខ្លះ ក៏ជួបបញ្ហាដូចគ្នាដោយសារតែបាត់ចំណូលពីប្រតិបត្តិការរបស់ខ្លួន” ។

ដើម្បីចូលរួមលើកស្ទួយវិស័យនេះ ឱ្យមានភាពរឹងមាំ និងយូរអង្វែង ហើយអាចរក្សាបាននូវចំណែកទីផ្សារស្ថិតស្ថេរ លោក នី ទីណាត បានផ្តល់ជាយោបល់ថា ម្ចាស់អាគារ ក៏ដូចជាក្រុមហ៊ុនអភិវឌ្ឍន៍ អាគារសម្រាប់ជួល គួរតែមានការបន្ធូរបន្ថយ ឬបញ្ចុះតម្លៃសម្រាប់អតិថិជនរបស់ខ្លួន ដែលយ៉ាងហោចណាស់ក្នុងរង្វង់ចាប់ពី៣០ ទៅ៥០ភាគរយនៃតម្លៃចាស់ទម្រាំ វិបត្តិមួយនេះមានភាពស្ងប់ស្ងាត់ ហើយចរន្តសេដ្ឋកិច្ចចាប់ផ្តើមល្អប្រសើរឡើងវិញ ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍កន្លងមកនេះ អំពាវនាវដល់ម្ចាស់ទីតាំងនានា ដែលបានជួលទីកន្លែងរបស់ខ្លួន ឱ្យដល់អ្នកដទៃរកស៊ី ត្រូវមានការយោគយល់ ចំពោះការបង់ថ្លៃសេវាជួលទីតាំង ឬអាចទម្លាក់ពេលបង់លុយ ឬទម្លាក់តម្លៃ ប្រមាណ ៥០ ទៅ ៧០ ភាគរយក្នុងកាលៈទេសៈប្រទេសកម្ពុជា កំពុងតែជួបវិបត្តិនៃការរាតត្បាតវីរុស COVID-19 ៕