ដោយវុត្ថា

បាងកកៈ រដ្ឋាភិបាលនៃប្រទេសហ្វាំងឡង់ គ្រោងនឹងជួយពង្រឹងប្រព័ន្ធសិក្សាពីចម្ងាយ ឬហៅថាE-Learning និងដំឡើងចក្រសម្រាប់ម៉ាស៊ីនភ្លើង ដែលនាំចូលពីហ្វាំងឡង់ តាមរយៈការបញ្ជូនវិស្វករ និងជំនាញការមកកាន់កម្ពុជា ដើម្បីផ្ទេរចំណេះដឹង និងចំណេះធ្វើ សំដៅពង្រឹងកិច្ចសហប្រតិបត្តិការនៃប្រទេសទាំងពីរ។

គម្រោងនេះ  ត្រូវបានបង្ហើបនៅក្នុងជំនួបពិភាក្សារវាងលោកអ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃឡង់ដ៏ និងលោកស្រី Satu Suikkari-Kleven ឯកអគ្គ​រដ្ឋទូតសាធារណរដ្ឋហ្វាំងឡង់ ប្រចាំប្រទេសថៃឡង់ដ៏ និងកម្ពុជាកាលពីពេលថ្មីៗនេះ នៅស្ថានឯកអគ្គរាជទូតកម្ពុជា នាទីក្រុងបាងកក។

លោកស្រី Satu Suikkari-Kleven ឯកអគ្គរដ្ឋទូតសាធារណរដ្ឋហ្វាំងឡង់ថ្លែងថា ជាមួយគ្នានេះ រដ្ឋាភិបាលនៃប្រទេសហ្វាំងឡង់ មានផែនការបើកស្ថានកុងស៊ុលកិត្តិយសហ្វាំងឡង់នៅទីក្រុងភ្នំពេញ ដើម្បីពង្រឹង និងពង្រីកទំនាក់ទំនងការទូតទ្វេភាគី ឱ្យកាន់តែស៊ីជម្រៅថែមទៀត។

លោកអ៊ូក សោភ័ណ បានស្វាគមន៍គម្រោងខាងលើនេះ ព្រោះកន្លងមក ហ្វាំងឡង់បានផ្តល់ជំនួយ ដើម្បីគាំទ្រការអភិវឌ្ឍសេដ្ឋកិច្ចកម្ពុជា ជាពិសេសការងារចុះបញ្ជីដីធ្លី ការអភិវឌ្ឍវិស័យកសិកម្ម ការបោសសម្អាតមីន និងការទប់ស្កាត់អំពើជួញដូរមនុស្ស។

ក្រោយពីកិច្ចប្រជុំត្រួតពិនិត្យឡើងវិញជាសកល លើជំនួយសម្រាប់ពាណិជ្ជកម្ម ឆ្នាំ ២០១៩ របស់អង្គការពាណិជ្ជកម្មពិភពលោក (WTO) នៅទីក្រុងហ្សឺណែវ ប្រទេសស្វីស កម្ពុជាបានចុះកិច្ចព្រមព្រៀងទិញម៉ាស៊ីនភ្លើង ដែលអាចផលិតថាមពលអគ្គិសនីរហូតដល់២០០មេហ្គាវ៉ាត់ ពីប្រទេសហ្វាំងឡង់ ដើម្បីបំពេញតម្រូវការកង្វះខាតថាមពលអគ្គិសនីនៅក្នុងប្រទេស៕

ដោយៈ រ៉ាណេត

ភ្នំពេញៈ ការដោះស្រាយផលប៉ះពាល់ ក្នុងគម្រោងធ្វើឱ្យប្រសើរឡើងវិញផ្លូវជាតិលេខ២ រហូតមកដល់ពេលនេះសម្រេចបានប្រមាណ៩៨,៥ភាគរយ និងផ្លូវជាតិលេខ២២សម្រេចបាន១០០ភាគរយហើយ។

រដ្ឋលេខាធិការប្រចាំការ នៃក្រសួងសាធារណការ និងដឹកជញ្ជូន លោក តូច ចាន់កុសល នៅទីស្ដីការក្រសួងកាលពីថ្ងៃទី២៣ ខែមិថុនា ឆ្នាំ២០២០ ក្នុងកិច្ចប្រជុំពិនិត្យ និងតាមដានស្ថានភាពទូទៅ និងលទ្ធផលនៃការដោះស្រាយផលប៉ះពាល់ ពាក់ព័ន្ធទៅនឹងគម្រោងខាងលើនេះបានបញ្ជាក់ថា សម្រេចជិត១០០ភាគរយហើយ។

លោកបានលើកឡើងាថា ក្រុមកាងារពាក់ព័ន្ធទាំងអស់បាន និងកំពុងបន្តកិច្ចសហការយ៉ាងជិតស្និទ្ធជាមួយក្រុមហ៊ុនឯកជន សហគ្រាស និងអាជីវករនានាដែលប្រកបរបរលើបណ្ដាញទឹកស្អាត បង្គោលអគ្គិសនី ខ្សែកាបិ៍ល អុបទិក ជាដើម ដើម្បីរុះរើ និងប្ដូរទៅទីតាំងថ្មី ក្នុងគោលបំណងបង្កភាពងាយស្រួល ដល់ក្រុមហ៊ុនសាងសង់អនុវត្តគម្រោងរបស់ខ្លួនប្រកបដោយប្រសិទ្ធភាពបំផុត និងអាចបញ្ចប់គម្រោងតាមការគ្រោងទុក។

ការរុះរើហេដ្ឋារចនាសម្ព័ន្ធនានាទាំងលើដីនិងក្រោមដី ក្នុងនោះរួមមាន៖ បណ្ដាញទឹកស្អាត បង្គោលអគ្គិសនី ខ្សែ កាប្លិ៍អុបទិកជាដើម ក្នុងគម្រោងធ្វើឱ្យប្រសើរឡើងវិញផ្លូវជាតិលេខ២ និងលេខ២២ ព្រមទាំងបានពិភាក្សាស្វែងរកយន្តការ ដោះស្រាយចំណុចដែលសេសសល់ សំដៅឱ្យការសាងសង់មានសន្ទុះទៅមុខកាន់តែលឿនថែមទៀត។

ជាមួយគ្នានេះ លោកក៏បានណែនាំឱ្យក្រុមហ៊ុនសាងសង់ ក្រុមហ៊ុនត្រួតពិនិត្យ​បច្ចេកទេស និងភាគីពាក់ព័ន្ធទាំងអស់ត្រូវយកចិត្តទុកដាក់ រៀបចំប្រឡាយបង្ហូរទឹកនៅសងខាងផ្លូវដែលកំពុងសាងសង់ឱ្យបានត្រឹមត្រូវ និងសមស្របតាមគម្រោង ដើម្បីជៀសវាងការជន់លិចលង់ភូមិ និងទ្រព្យសម្បត្តិរបស់បងប្អូនប្រជាពលរដ្ឋ ដោយហេតុថារដូវភ្លៀងបានមកដល់ហើយ ហើយភ្លៀងបានបន្តធ្លាក់ជាបន្តបន្ទាប់ជារៀងរាល់ថ្ងៃ នៅតាមតំបន់មួយចំនួនផងដែរ។

ដោយឡែកសម្រាប់បងប្អូនប្រជាពលរដ្ឋ ក្រុមហ៊ុន សហគ្រាស និងអាជីវករដែលកំពុងប្រកបរបរនៅតាមបណ្ដោយផ្លូវជាតិទាំងពីរ ជាពិសេស បងប្អូនប្រជាពលរដ្ឋ ដែលទទួលបានសំណងលើផលប៉ះពាល់រួចហើយ សូមអនុវត្តតាមកិច្ចព្រមព្រៀងឱ្យមានប្រសិ​ទ្ធភាព បំផុតដើម្បីកុំឱ្យមានការរាំងស្ទះដល់ការសាងសង់ ក៏ដូចជាការធ្វើដំណើរ និងការប្រកបរបរចិញ្ចឹមជីវិត របស់បងប្អូនប្រជាពលរដ្ឋផងដែរ៕

ដោយ ៖ ប៊ី

ភ្នំពេញ ៖ ប្រតិបត្តិករផ្សារទំនើប Siam Piwat និងក្រុមហ៊ុន The Mall Group កំពុងទទូចដល់រដ្ឋាភិបាល (ថៃ) ឱ្យអនុញ្ញាតឱ្យមានការបន្តជើងហោះហើរពីបណ្តាប្រទេសអាស៊ាន CLMV (កម្ពុជា ឡាវ មីយ៉ាន់ម៉ា វៀតណាម) ក្នុងកិច្ចប្រឹងប្រែងដើម្បីជំរុញអាជីវកម្មលក់រាយឡើងវិញ។

លោកស្រី Mayuree Chaipromprasit អនុប្រធានប្រតិបត្តិជាន់ខ្ពស់ផ្នែកទីផ្សារនៅក្រុមហ៊ុន Siam Piwat បានថ្លែងថា ក្រុមហ៊ុនសូមស្នើឱ្យរដ្ឋាភិបាលអនុញ្ញាតឱ្យភ្ញៀវទេសចរបរទេសមកពីប្រទេស CLMV ធ្វើទស្សនកិច្ចនៅប្រទេសថៃ ដោយលើកឡើងពីចំនួនករណីឆ្លងមេរោគឆ្លងទាបនៅក្នុងប្រទេសទាំងនោះ។ លោកស្រីបាននិយាយថា រដ្ឋាភិបាលគួរតែបង្កើតវិធានការការពារជាក់ស្តែងសម្រាប់ក្រុមទេសចរពីប្រទេស CLMV ។

លោកស្រី Mayuree បានបញ្ជាក់ថា អ្នកទេសចរមកពីប្រទេស CLMV មានអំណាចទិញខ្ពស់ និងមានចំនួនច្រើនដែលជាភ្ញៀវទេសចរបរទេសមកទស្សនាមជ្ឈមណ្ឌល Siam Center មជ្ឈមណ្ឌល Siam Discovery និង Siam Paragon។
ភ្ញៀវទេសចរបរទេសមានចំនួន ៤០ ភាគរយនៃចំនួនភ្ញៀវសរុបដែលមកទស្សនាផ្សារទំនើបទាំង ៣ ហើយ ៣០ ភាគរយនៃភ្ញៀវទេសចរមកពីប្រទេសជិតខាងទាំង៤។

លោកស្រី Mayuree បាននិយាយថា “ភ្ញៀវទេសចរមកពី CLMV បានចំណាយជាមធ្យម ១០ ម៉ឺនបាតក្នុងមួយដំណើរទេសចរណ៍។ អ្នកទិញទំនិញទាំងនេះរីករាយនឹងសេវាកម្មផ្សេងៗគ្នា ចាប់ពីម៉ូដរហូតដល់សម្រស់ ដោយជួយផ្តល់ប្រាក់ចំណូលដល់ម្ចាស់អាជីវកម្មផ្សេងៗគ្នាៗ។ ក្រុមហ៊ុនក៏បានស្នើសុំឱ្យរដ្ឋាភិបាលបើកយុទ្ធនាការពិសេស ដើម្បីទាក់ទាញប្រជាជននៅប្រទេសអភិវឌ្ឍន៍ឱ្យមកក្រុងបាងកក ដើ ម្បីទិញទំនិញ”។

លោកស្រី Mayuree មានប្រសាសន៍ថា “យើងចង់ឲ្យរដ្ឋាភិបាលលើកទឹកចិត្តដល់ការចំណាយនៅទីក្រុងបាងកក ដែលរងផលប៉ះពាល់កាន់តែខ្លាំងពីជំងឺរាតត្បាតជាងតំបន់នានានៅប្រទេស”។
លោកស្រីបានជំរុញឱ្យរដ្ឋាភិបាលលើកកម្ពស់យុទ្ធនាការផ្សាទំនើបថៃ ដើម្បីជំរុញប្រជាជនថៃឱ្យទិញផលិតផលថៃបន្ថែមទៀត។ អ្នកផលិតផលិតផលថៃខ្លះប្រហែលជាត្រូវបិទហាងរបស់ពួកគេនាពេលអនាគត ដូច្នេះយើងអំពាវនាវឱ្យប្រជាជនថៃជួយគាំទ្រយីហោថៃ”។

លោក Voralak Tulaphorn ប្រធានផ្នែកទីផ្សារនៃ The Mall Group បាននិយាយថា ដោយអាជីវកម្មលក់រាយរបស់ប្រទេសថៃពឹងផ្អែកលើវិស័យទេសចរណ៍ ក្រុមហ៊ុនរំពឹងថាឧស្សាហកម្មលក់រាយ ៣,៦ ពាន់ពាន់លានបាតនឹងធ្លាក់ចុះនៅឆ្នាំនេះ។

លោកស្រី Voralak បានមានប្រសាសន៍ថា “អតិថិជនរបស់យើងប្រហែល ៥០ ភាគរយបានចាប់ផ្តើមទិញទំនិញឡើងវិញ ប៉ុន្តែការលក់មិនទាន់ងើបឡើងវិញនៅឡើយទេ ពីព្រោះអ្នកទិញទំនិញភាគច្រើនដែលមកហាងនេះមានតម្រូវការជាក់លាក់ ដែលពួកគេទិញទំនិញ”។

ជាផ្នែកមួយនៃកិច្ចខិតខំប្រឹងប្រែងដើម្បីជំរុញការទិញទំនិញ និងអារម្មណ៍អតិថិជន ហាង The Mall Group និងក្រុមហ៊ុន Siam Piwat បានចំណាយប្រាក់ចំនួន ១៨០ លានបាត ដើម្បីបង្រួបបង្រួមហាងលក់ទំនិញនិ ងអគារលក់ទំនិញរបស់ពួកគេរួមទាំងផ្សារទំនើប The Mall Department Store, The Emporium, The EmQuartier, Siam Paragon, Siam Center និងSiam Discovery – ក្រោមយុទ្ធនាការទិញទំនិញនៅទីក្រុងបាងកក៕

ដោយ ៖ វុត្ថា

ភ្នំពេញ ៖ សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជា បានអំពាវនាវដល់បណ្តាធនាគារទាំងអស់ប្តឹងទៅតុលាការដើម្បីរឹបអូសទ្រព្យសម្បត្តិអ្នកដែលជំពាក់ធនាគារ ហើយមិនព្រមសងតាមការញុះញុងរបស់ជនអគតិមួយចំនួន ខណៈដែលរាជរដ្ឋាភិបាល បាន នឹងកំពុងរៀបចំឥណទានឡើងវិញ ដើម្បីសម្រួលដល់អត្រាកាប្រាក់ និងយោគយល់ក្នុងវិបត្តិជំងឺ Covid-19។

សម្តេចតេជោ ហ៊ុន សែន នៅក្នុងពិធីអញ្ជើញប្រកាសអនុវត្តន៍កម្មវិធីផ្តល់សាច់ប្រាក់ជូនប្រជាពលរដ្ឋមានជីវភាពក្រីក្រ និងងាយរងគ្រោះដោយសារជំងឺ Covid-19 ប្រមាណ៦០ម៉ឺនគ្រួសារនៅថ្ងៃទី២៤ ខែមិថុនា ឆ្នាំ២០២០នេះ បានសម្តែងការគាំទ្រយ៉ាងពេញទំហឹងចំពោះវិស័យធនាគារក្នុងការរឹបអូសទ្រព្យសម្បត្តិអ្នកដែលមិនបានសងធនាគារវិញ ដែលបានអនុវត្តតាមការបំផុសពីជនអគតិ។

សម្តេចតេជោ បានមានប្រសាសន៍ថា “ឥឡូវនេះមានអ្នកបំផុសឱ្យដកលុយពីធនាគារ គេមានដកឯណា ហើយធនាគារខ្លះសល់លុយ ហើយអ្នកដែលចង់ឱ្យធនាគារនៅក្នុងស្រុកខ្មែរដួលរលំ កុំសងធនាគារ ដកលុយពីធនាគារ ប្រហែលខកចិត្តមិនតិចនោះទេ”។

ត្រង់ចំណុចនេះ សម្តេចតេជោបញ្ជាក់ថា “ខ្ញុំសូមបញ្ជាក់ថា ខ្ញុំលើកទឹកចិត្តឱ្យមានការរឹបអូស ប្រសិនបើអ្នកឯងជឿទៅលើអ្នកដែលឃោសនាកុំឱ្យសងលុយទៅធនាគារ។ ខ្ញុំគ្រាន់តែអំពាវនាវសុំឱ្យធនាគារធ្វើការយោគយល់ នៅក្នុងដំណាក់កាលនៃការលំបាក ប៉ុន្តែការសងនៅតែសងហ្នឹង”។

សម្តេចតេជោបន្ថែមថា “ប៉ុន្តែអ្នកចលនានៅតែចលនាកុំឱ្យសងទៅធនាគារ ខ្ញុំមិនគាំទ្រ ហើយធនាគារត្រូវប្តឹងទៅតុលាការ ដើម្បីរឹបអូស បើសិនជាជននោះ គាំទ្រនូវនយោបាយរបស់អ្នកដែលបំផុសចលនាអវិជ្ជមាន ព្រោះអ្នកឯងរកស៊ីខូច មិនទាន់ស្អីផង ចាប់ផ្តើមដំណើររឿងនេះ ព្រោះកាលណាគេធ្វើអីចឹង”។

សម្តេចតេជោ ហ៊ុន សែន ព្រមានថា “អីចឹងសាក់មើល ភាសាណាដែលញុះញង់កុំឱ្យសងធនាគារ យើងគាំទ្រឱ្យធនាគាររឹបអូស អីចឹងអ្នកឯងតាមមើលទៅ អ្នកឯងអំពាវនាវអីចឹង តែយើងនៅទីនេះ យើងអំពាវនាវ យើងមិនចង់ឱ្យមានការរឹបអូសនោះទេ ខ្ញុំធ្លាប់និយាយថា មិនគួរមានការរឹបអូស ក្នុងដំណាក់កាលកូវីដ នេះទេ ប៉ុន្តែខ្ញុំគាំទ្រឱ្យមានការឹបអូស ប្រសិនបើអ្នកដែលជំពាក់ធនាគារ បន្តការឃោសនា ចលនាកុំឱ្យមានការសង ចឹងធនាគារប្តឹង ដើម្បីរឹបអូសទៅ”។

សម្តេច តេជោ បន្ថែមថា “អាហ្នឹង ធ្វើបានតើ អ្នកឯងចង់សាកមើលទៅ ព្រោះច្បាប់ផ្នែកធនាគារគេមាន គោលការណ៍ធនាគារ គេមានរបស់គេ ។ យើងអំពាវនាវឱ្យមានការរៀបចំឥណទានឡើងវិញសម្រាប់សម្រាលដល់អត្រាការប្រាក់ ទុនបំរុងកាតព្វកិច្ច ចុះពី ១២ ភាគរយ និង ១២,៥ ភាគយ មកនៅត្រឹម ៧ ភាគរយនៅក្នុងមួយឆ្នាំ” ៕

ដោយ ៖ វុត្ថា

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានឱ្យដឹងថា រដ្ឋាភិបាលកម្ពុជាមិនដែលប្រកាសបិទសេដ្ឋកិច្ចនៅក្នុងប្រទេសម្តងណានោះទេ ខណៈដែលរដ្ឋបានរឹតបន្តឹងទៅលើវិស័យអប់រំ និង កន្លែងហាត់ប្រាណព្រមទាំងកន្លែងសេវាកម្សាន្តដោយព្រួយបារម្ភពីការឆ្លងក្នុងវិបត្តិជំងឺ Covid-19 ។

សម្តេចតេជោ ហ៊ុន សែន នៅក្នុងពិធីអញ្ជើញប្រកាសអនុវត្តន៍កម្មវិធីផ្តល់សាច់ប្រាក់ជូនប្រជាពលរដ្ឋ មានជីវភាពក្រីក្រ និងងាយរងគ្រោះដោយសារជំងឺ Covid-19 ប្រមាណ៦០ម៉ឺនគ្រួសារនាថ្ងៃទី ២៤ ខែមិថុនា ឆ្នាំ ២០២០នេះ ឱ្យដឹងថា វិស័យសេវាកម្ម ឧស្សាហកម្ម និង កសិកម្មដែលជាវិស័យជំរុញសេដ្ឋកិច្ចនៅក្នុងប្រទេសនៅតែដំណើរការធម្មតា ស្របពេលដែលរដ្ឋបាននឹងកំពុងយកចិត្តទុកដាក់លើវិស័យទាំងនេះ។

សម្តេចតេជោ បានថ្លែងថា “យើងមិនដែលប្រកាសបិទរោងចក្រ យើងក៏មិនដែលប្រកាសបិទទីផ្សារនោះទេ ហើយកាន់តែពិសេសជាងនេះទៅទៀត ភាពប្រទាក់ក្រឡាគ្នា យើងនៅទីនេះ បានបោះទុនជាង ១០០ លានដុល្លារអាមេរិក ត្រូវបានទំលាក់ទៅជនបទដែលបាត់បង់ការងារធ្វើ អាចធ្វើការនៅទីនោះបាន”។

សម្តេចតេជោ បានបន្ថែមថា រាល់ការរដ្ឋានសំណង់ជាពិសេសគម្រោងស្ថាបនាហេដ្ឋារចនាសម្ព័ន្ធរបស់ក្រុមហ៊ុនចិននៅក្នុងប្រទេសកម្ពុជា ពុំមានការផ្អាក់នោះទេ ខណៈ គម្រោងទាំងនេះ បានផ្តល់ឱកាសការងារ និងប្រាក់ចំណូលដល់ប្រជាពលរដ្ឋយ៉ាងច្រើននៅក្នុងអំឡុងនៃវិបត្តិជំងឺ Covid-19។

សម្តេចតេជោ ហ៊ុន សែន បានបញ្ជាក់ថា “រាល់ការដ្ឋាសំណង់ដូចជានៅព្រលានយន្តហោះអន្តរជាតិភ្នំពេញថ្មី បានស្រូបយកកម្លាំងពលកម្មបច្ចុប្បន្នជាង ១០០០នាក់ និងទៅអនាគតមានជាង ២ ម៉ឺននាក់ និងការដ្ឋាននៅក្នុងខេត្តព្រះសីហនុក៏នៅតែដំណើរការ និងផ្តល់ឱកាសការងារដល់ពលរដ្ឋបានផងដែរ”។

សម្តេចតេជោ បន្ថែមថា “រាលគម្រោងដែលកំពុងសាងសង់ផ្លូវដោយក្រុមហ៊ុនចិន ដូចជាស្ពានឆ្នងទន្លេមេគង្គ និងគម្រោងសាងសង់ផ្លូវដទៃទៀត នៅតែដំណើរការ ហើយមានការងារធ្វើនៅទីនោះបន្ថែមទៀត”៕