កំពត នៅតែជាខេត្តដែលទាក់ទាញវិនិយោគអចលនទ្រព្យច្រើនជាងគេនៅចុងត្រីមាសទី២ឆ្នាំ២០២០

ដោយៈ រ៉ាណេត

កំពតៈ ឈានចូលមកដល់ចុងត្រីមាសទី២ ឆ្នាំ២០២០ បើទោះជាស្ថិតនៅក្នុងភាពប្រឈមនៃវិបត្តិនៃជំងឺឆ្លង និងជះឥទ្ធិពលអវិជ្ជមានស្ទើរគ្រប់វិស័យ រួមទាំងផ្នែកអចលនទ្រព្យផងដែរនោះ សម្រាប់ការទិញ-លក់ ដីធ្លីនៅក្នុងដែនដីនៃខេត្តកំពត នៅតែរក្សាបានភាពល្អប្រសើរដដែល ជាពិសេសការអភិវឌ្ឍលំនៅដ្ឋានបែបលំហែរ នៅតាមតំបន់កម្សាន្តជាប់មាត់ព្រែក។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ប្រាប់តាមទូរស័ព្ទ កាលពីល្ងាចថ្ងៃទី២៤ ខែមិថុនា ឆ្នាំ២០២០ថា ពាក់ព័ន្ធទៅនឹងទំនោរនៃការវិនិយោគ និងអភិវឌ្ឍលើវិស័យលំនៅដ្ឋានបែបលំហែរកាយនៅក្នុងខេត្តកំពត ក៏ព្រោះតែខេត្តនេះគឺជាគោលដៅទេសចរណ៍ ដ៏មានសក្ដានុពលបើប្រៀបធៀបទៅនឹងបណ្តាខេត្តមួយចំនួនទៀត។

លោកស្រីបន្តថា “ការអភិវឌ្ឍលំនៅដ្ឋានបែបលំហែរកាយ នៅតាមតំបន់កម្សាន្តមួយចំនួនក្នុងខេត្តកំពត នៅតែមានតម្រូវការ ដែលវាជាផ្នែកមួយយ៉ាងសំខាន់ក្នុងចរន្តទិញ-លក់ ដីធ្លីនៅក្នុងខេត្តជាប់មាត់សមុទ្រ និងតំបន់ភ្នំមួយនេះ” ។

លោកស្រីបានបញ្ជាក់ថា“ខេត្តកំពតនឹងមានការអភិវឌ្ឍលឿន ដោយសារការខិតខំអភិវឌ្ឍរបស់រាជរដ្ឋាភិបាល ដូចជាគម្រោងផ្លូវរថភ្លើងល្បឿនលឿន ការពង្រីកផ្លូវជាតិលេខ៣ គម្រោងកំពង់ផែទេសចរណ៍ គម្រោងកំពង់ផែទឹកជ្រៅ គម្រោងបង្កើតឧទ្យានជាតិ សម្ដេច ហ៊ុន សែន កំពត រួមជាមួយនឹងគម្រោងអភិវឌ្ឍន៍ជាច្រើនទៀតដែលចូលរួមពីវិស័យឯកជនផងដែរ” ។

ខេត្តកំពតមួយរយៈពេលចុងក្រោយ គឺកំពុងតែព្យាយាមបង្ហាញពីសក្ដានុពល រួមជាមួយគម្រោងអភិវឌ្ឍនានាជាច្រើន ជាពិសេសពាក់ព័ន្ធនឹងគម្រោងអភិវឌ្ឍលើវិស័យទេសចរណ៍កម្សាន្តបែបធម្មជាតិ និងតំបន់សមុទ្រ ខណៈដែលគម្រោងកំពង់ផែទេសចរណ៍របស់រដ្ឋាភិបាល កំពុងតែពន្លឿនការសាងសង់ បន្ថែមពីលើគម្រោងអភិវឌ្ឍជាច្រើនទៀតពីវិស័យឯកជន។

អគ្គនាយកក្រុមហ៊ុនអចលទ្រព្យ R Investment Group លោកឧកញ៉ា តេង រិទ្ធី ដែលបានបណ្តាក់ទុនវិនិយោគជាច្រើនលានដុល្លារ ទៅលើការសាងសង់លំនៅដ្ឋានបែបលំហែរកាយនៅក្នុងទឹកដីនៃខេត្ត ដ៏ទាក់ទាញផ្នែកទេសចរណ៍មួយនេះ បានមានប្រសាសន៍ថា ខេត្តកំពតមានភាពខុសប្លែកពីបណ្តាខេត្តដទៃ ដែលមានភាពស្ងប់ស្ងាត់ក្នុងការទិញ-លក់ នៅក្នុងវិបត្តិជំងឺ Covid-19 ។

លោកបានបន្តទៀតថា “បច្ចុប្បន្ននេះមានអ្នកវិនិយោគជាច្រើន បានទម្លាក់ទុនធ្វើការអភិវឌ្ឍតំបន់មួយចំនួន ឱ្យក្លាយទៅជាតំបន់កម្សាន្តបែបកែច្នៃ និងធម្មជាតិ ជាពិសេសតំបន់ដែលស្ថិតនៅជាប់មាត់ព្រែក ជាប់សមុទ្រ និងតំបន់ក្បែរជើងភ្នំ” ។ លោកបន្តថា “ជាមួយនឹងសកម្មភាពដែលកំពុងអភិវឌ្ឍន៍ ក៏មានគម្រោងថ្មីបន្តបន្ទាប់ទៀត ដែលមិនយូរមិនឆាប់ខេត្តកំពត នឹងក្លាយទៅជាទីតាំងគោលដៅទេសចរណ៍ ដ៏មានប្រជាប្រិយភាពជាក់មិនខាន” ។

ជាមួយនឹងការបង្ហាញពីសក្ដានុពល ក្នុងការវិនិយោគខាងលើនេះ លោកឧកញ៉ា តេង រិទ្ធី បានបញ្ជាក់សម្រាប់ការអភិវឌ្ឍ លើវិស័យលំនៅដ្ឋានបែបលំហែរកាយ គឺត្រូវបានធ្វើឡើងជាច្រើនគម្រោង និងច្រើនកម្រិត ហើយតម្លៃក៏អាស្រ័យទៅតាមគម្រោងផងដែរ ដែលក្នុងនោះមានតម្លៃចាប់ពីជាង៣-៤ម៉ឺនដុល្លារឡើងទៅ៕

លោកច្រឹក សុខនីម៖ តើគួរប្រើប្រាស់បំណុលបែបណា ដើម្បីទទួលបានប្រសិទ្ធភាពខ្ពស់ ក្នុងវិស័យអចលនទ្រព្យកម្ពុជា?

ដោយ វុត្ថា

ភ្នំពេញៈ ការវិនិយោគអចលនទ្រព្យ មិនថាការទិញដី ឬទិញលំនៅដ្ឋានសម្រាប់ស្នាក់នៅ ឬទុកលក់យកផលចំណេញវិញ មិនមែនជារឿងងាយស្រួលនោះទេ ហើយក៏មិនមែនជារឿងដែលពិបាកនោះដែរ។

លោកច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជានឹងចូលខ្លួនមកបកស្រាយលើប្រធានបទ “តើគួរប្រើប្រាស់បំណុលបែបណា ដើម្បីទទួលបានប្រសិទ្ធភាពខ្ពស់ ក្នុងវិស័យអចលនទ្រព្យកម្ពុជា”? ។

លោក ច្រឹក សុខនីម បានឱ្យដឹងថា ជាទូទៅនៅក្នុងពិភពលោកតែងតែមានបំណុលដែលបំណុលទាំងនេះ មានលក្ខណៈជាគ្រួសារ សហគមន៍ ឯកជន ក្រុមហ៊ុន និងប្រទេសជាតិ ហើយនៅពេលដែលប្រើប្រាស់បំណុលទាំងនេះ មានប្រសិទ្ធិភាពនោះ នឹងជំរុញឱ្យជីវភាពនៅក្នុងស្ថានភាពសេដ្ឋកិច្ចគ្រួសារ សហគន៍ ប្រទេស និង ក្រុមហ៊ុន មានការរីកចំរើន។

លោកពន្យល់ថា “បំណុលគឺជាការប្រើប្រាស់ធនធានអ្នកដទៃ តាមរយៈការប្រើប្រាស់ជាថវិកាឬជាទ្រព្យសម្បត្តិ និងអ្វីផ្សេងៗទៀតសម្រាប់ធ្វើការការដោះដូរ និងជាប្រយោជន៍ក្នុងការវិស័យជំនួញឱ្យមានប្រសិទ្ធិភាព” ។

លោកបន្តថា នៅក្នុងការវិនិយោគលើវិស័យអចលនទ្រព្យ អ្នកវិនិយោគអាចស្វែងរកបំណុល តាមរយៈធនាគារដែលជាស្ថាប័នឯករាជ្យ ក្នុងការផ្តល់ប្រាក់កម្ចីដល់អតិថិជនទូទៅ ក្នុងការទិញលំនៅឋានសម្រាប់ស្នាក់នៅ ឬទិញលំនៅឋានសម្រាប់ធ្វើការវិនិយោគបន្ត ។

លោកពន្យល់ថា “មុនដំបូងយើងត្រូវធ្វើការសិក្សានូវគុណតម្លៃ នៃវិស័យអចលនទ្រព្យដែលយើងត្រូវវិនិយោគ តើជាប្រភេទអចលនទ្រព្យបែបណា ។ ឧទាហរណ៍បើយើងវិនិយោគលើលំនៅឋាន ដូចជាផ្ទះ ឬខុនដូ ឬមួយជាគម្រោងដែលកំពុងសាងសង់ សម្រាប់ទុកវិនិយោគបន្ត ឬសម្រាប់ជួលជាដើមនោះ យើងត្រូវសិក្សាពីចំណូល និងកំណើនតម្លៃអចលនទ្រព្យនៅពេលខាងមុខ ដោយធៀបជាមួយនឹងបំណុល” ។

លោកបន្ថែមទៀតថា នៅពេលដែល យើងមានគម្រោងដាក់ទុនវិនិយោគលើវិស័យអចលនទ្រព្យប្រកបដោយចីរភាព យើងត្រូវវិភាគអំពីឱកាសនៅក្នុងការវិនិយោគ រួមផ្សំជាមួយនឹងការសងត្រឡប់ បូកជាមួយប្រាក់បំរ៉ុងទុក។ បើយើងមានធនធានទាំងអស់នេះ បំណុលនៅក្នុងវិស័យអចលនទ្រព្យ គឺទុន និងជាលទ្ធភាពល្អបំផុត ពីព្រោះ នៅពេលដែលយើងប្រើប្រាស់បំណុលធ្វើឱ្យយើងចំណេញពេលវេលា និងអាចធ្វើឱ្យជីវភាពដើរលឿនជាអ្នកដែលមិនប្រើប្រាស់បំណុល។

លោកបញ្ជាក់ថា “ដូច្នេះនៅពេលដែលយើងប្រើប្រាស់បំណុលបានត្រឹមត្រូវ ហើយ ស្ទង់មើលនូវឥទ្ធិពល នៅក្នុងកម្រិតដែលជាវិជ្ជមាន គឺជាហេតុផលចម្បងដែលធ្វើឱ្យសេដ្ឋកិច្ចក្រុមគ្រួសារ មានការរីកចំរើន ។ ការប្រើប្រាស់បំណុល ជាទ្រព្យសម្បត្តិ នឹងទទួលបាននូវគុណតម្លៃពីការវិនិយោគ” ។

លោកបន្ថែមថា ជាមួយគ្នានេះដើម្បីទទួលបាននូវព័ត៌មានជុំវិញ ការប្រើប្រាស់បំណុលើការវនិយោគវិស័យអចលចនទ្រព្យ លោកអ្នកអាចប្រឹក្សាយោបល់ជាមួយភ្នាក់ងារអចលនវត្ថុ ឬ ក៏មន្ត្រីធនាគារ៕

IMF៖ សេដ្ឋកិច្ចពិភពលោកខាតបង់ទឹកប្រាក់ប្រមាណ ១២ទ្រីលានដុល្លារដោយសារជំងឺរាតត្បាត

ដោយ ហ្សូលី

ភ្នំពេញៈ មូលនិធិរូបិយវត្ថុអន្ដរជាតិ IMF បាននិយាយថា សេដ្ឋកិច្ចពិភពលោកខាតបង់ប្រាក់ចំនួន ១២ទ្រីលានដុល្លារ (១២លានលានដុល្លារ) ពីជំងឺរាតត្បាត Covid-19 បន្ទាប់ពីកាត់បន្ថយការព្យាករណ៍កំណើននៅឆ្នាំ ២០២០ ។

IMF បាននិយាយថា វានឹងចំណាយពេលពីរឆ្នាំ សម្រាប់ទិន្នផលពិភពលោកដើម្បីវិលត្រឡប់មករកកម្រិតដើមវិញដូចនៅចុងឆ្នាំ២០១៩ ហើយបានព្រមានថា រដ្ឋាភិបាលប្រទេសនានាគួរតែប្រុងប្រយ័ត្ន ក្នុងការដកការគាំទ្រផ្នែកហិរញ្ញវត្ថុ ដល់សេដ្ឋកិច្ចដែលផុយស្រួយនោះ។

នៅក្នុងការធ្វើបច្ចុប្បន្នភាពទៅនឹងការព្យាករណ៍ ដែលបានចេញផ្សាយកាលពីខែមេសា IMF ដែលមានមូលដ្ឋាននៅទីក្រុងវ៉ាស៊ីនតោនបានរំពឹងថា សេដ្ឋកិច្ចពិភពលោកនឹងធ្លាក់ចុះ ៤,៩ភាគរយនៅឆ្នាំនេះ បើធៀបនឹងការធ្លាក់ចុះ ៣ភាគរយ ដែលបានរំពឹងកាលពីថ្មីៗនេះ។

អ្នកពិគ្រោះយោបល់ផ្នែកសេដ្ឋកិច្ចរបស់ IMF លោកស្រី Gita Gopinath មានប្រសាសន៍ថា “ ជំងឺរាតត្បាតបានរុញច្រានសេដ្ឋកិច្ចឲ្យធ្លាក់ចូលក្នុងវិបត្តិ ដែលបង្កឱ្យមានវិបត្តិសេដ្ឋកិច្ចអាក្រក់” ។ លោកស្រីបន្ថែមទៀតថា “វានឹងមានការធ្លាក់ចុះនៃកម្រិតជីវភាពសម្រាប់៩៥%នៃប្រទេសទាំងអស់នៅឆ្នាំនេះ” ។

ការធ្លាក់ចុះជិត៥ភាគរយ នៃទិន្នផលសកលនៅឆ្នាំនេះ នឹងមានកម្រិតទាបជាងការធ្លាក់ចុះ០,១ភាគរយនៅឆ្នាំ២០០៩ បន្ទាប់ពីការធ្លាក់ចុះនៃប្រព័ន្ធធនាគារពិភពលោកនា រដូវស្លឹកឈើជ្រុះមុន។ IMF បានប្រមើលមើលថា ឆ្នាំ២០២០ ជាឆ្នាំអាក្រក់បំផុតសម្រាប់កំណើនសេដ្ឋកិច្ចពិភពលោក ចាប់តាំងពីមហាសេដ្ឋកិច្ចធ្លាក់ចុះក្នុងទសវត្សឆ្នាំ១៩៣០ ។

កំណើនសេដ្ឋកិច្ចពិភពលោកត្រូវបានព្យាករណ៍ថា នឹងមានកំនើនដល់ ៥,៤% ក្នុងឆ្នាំ ២០២១ ។

មូលនិធិរូបិយវត្ថុអន្ដរជាតិ បានណែនាំដល់ប្រទេសទាំងអស់ រួមទាំងប្រទេសដែលបានឆ្លងផុតការឆ្លងខ្ពស់ផងដែរ ដើម្បីធានាថាប្រព័ន្ធថែទាំសុខភាពរបស់ពួកគេ ត្រូវបានផ្គត់ផ្គង់គ្រប់គ្រាន់ ហើយបានអំពាវនាវដល់ប្រទេសអភិវឌ្ឍន៍ថា ប្រទេសក្រីក្រគួរទទួលបានវ៉ាក់សាំងគ្រប់គ្រាន់ និងមានតំលៃសមរម្យ៕ The Guardian

អ្នកជំនាញអន្តរជាតិ៖ កម្ពុជាមានលក្ខណៈសម្បត្តិជាច្រើនកំពុងទាក់ទាញការវិនិយោគបរទេស

ដោយ ប៊ី

ភ្នំពេញៈ កម្ពុជាគឺជាប្រទេសមានសេដ្ឋកិច្ចកំពុងរីកចម្រើន ដែលបានបង្ហាញពីកំនើនសេដ្ឋកិច្ចខ្ពស់រង្វង់៧ភាគរយ ក្នុងរយៈពេលពីទស្សវត្តចុងក្រោយ ខណៈប្រហែលពាក់កណ្តាលនៃប្រជាជនមានអាយុក្រោម២៥ឆ្នាំ ដូច្នេះកំណើនសេដ្ឋកិច្ចរឹងមាំត្រូវបានគេរំពឹងទុក។

ប្រទេសកម្ពុជាមានបទប្បញ្ញត្តិចំនួនស្តីពីមូលធនបរទេស។ នៅក្នុងវិស័យភាគច្រើន ការវិនិយោគត្រូវបានអនុញ្ញាតតាមការរាយការណ៍ ហើយភាពជាម្ចាស់បរទេស ១០០ភាគរយត្រូវបានអនុញ្ញាត។ ប្រតិបត្តិការភាគច្រើនធ្វើឡើង តាមរយៈប្រាក់ដុល្លារអាមេរិក មិនមែនរូបិយប័ណ្ណក្នុងស្រុកទេ ដូច្នេះហានិភ័យនៃការផ្លាស់ប្តូរប្រាក់មានតិចតួច។

គម្រោងវិនិយោគ ដែលត្រូវបានអនុម័តដោយរដ្ឋាភិបាលកម្ពុជា ត្រូវបានរួចផុតពីពន្ធសាជីវកម្ម និងពន្ធនាំចូលសម្រាប់វត្ថុធាតុដើម និងគ្រឿងបរិក្ខារសម្រាប់រយៈពេល៩ ឆ្នាំ។ នោះហើយជាមូលហេតុដែលប្រទេសកម្ពុជា ត្រូវបានគេចាត់ទុកថាជាទិសដៅវិនិយោគដ៏ទាក់ទាញមួយ។ នេះបើយោងតាមការលើកឡើងរបស់លោក Kim Hyun-su ប្រធានអ្នកស្រាវជ្រាវ នៅវិទ្យាស្ថានសម្រាប់ពាណិជ្ជកម្មអន្តរជាតិ នៅក្រោមសមាគមពាណិជ្ជកម្មអន្តរជាតិកូរ៉េ។

ផលិតផលក្នុងស្រុកសរុបសម្រាប់មនុស្សម្នាក់ របស់ប្រទេសកម្ពុជាមានចំនួន ១.៧០០ដុល្លារក្នុងឆ្នាំ២០១។ ប្រទេសនេះមានភាពទាក់ទាញខាងវប្បធម៌ល្បីៗ នៅលើពិភពលោកដូចជាប្រាសាទអង្គរវត្ត ធនធានកម្លាំងពលកម្មច្រើន និងគោលនយោបាយមិត្តភាពឆ្ពោះទៅរកការវិនិយោគបរទេស។ អរគុណចំពោះគុណសម្បត្តិទាំងនេះ សេដ្ឋកិច្ចកម្ពុជាបានកើនឡើងច្រើនជាង ៧ ភាគរយក្នុងរយៈពេល២០ឆ្នាំចុងក្រោយនេះ។

នៅប្រទេសកម្ពុជា កម្រិតប្រាក់ឈ្នួលមានកម្រិតទាប ដែលជាចំណុចខ្លាំងមួយទៀត។ កាលពីឆ្នាំមុន ប្រាក់ឈ្នួលអប្បបរមាប្រចាំខែ នៅក្នុងវិស័យកាត់ដេររបស់ប្រទេសនេះមានចំនួន១៨២ ដុល្លារអាមេរិក ដែលស្មើនឹង៦០ ភាគរយនៃប្រាក់ឈ្នួលរបស់ប្រទេសថៃ ដែលនៅជិតខាង។ បំពាក់ដោយមានកម្លាំងពលកម្មវ័យក្មេង និងសម្បូរបែប ប្រទេសកម្ពុជាមានអត្រាចូលរួមកម្លាំងខ្ពស់បំផុតនៅក្នុងអាស៊ាន។

អ្វីដែលប្រសើរជាងនេះ ប្រទេសកម្ពុជាគឺជាប្រទេសមួយ ដែលទទួលបានអត្ថប្រយោជន៍ពីប្រព័ន្ធអនុគ្រោះពន្ធទូទៅ។ ក្រោមប្រព័ន្ធអនុគ្រោះពន្ធនេះ ទំនិញ ដែលនាំចូលពីប្រទេសកំពុងអភិវឌ្ឍន៍ ត្រូវបានផ្តល់ការកាត់បន្ថយ ឬគ្មានអត្រាពន្ធ។

លោក Kim បានបន្តថា “ប្រទេសកម្ពុជាអាចទទួលបានអត្ថប្រយោជន៍ពន្ធគយនៅពេលនាំចេញផលិតផលទៅសហរដ្ឋអាមេរិកសហភាព អឺរ៉ុប និងជប៉ុន។ លោកបន្ថែមថា “គ្មានអ្វីប្លែកទេដែលប្រទេសកម្ពុជាត្រូវបានគេហៅថា “គុជដែលលាក់ខ្លួននៅអាស៊ីអាគ្នេយ៍” ៕

ចំណេះដឹង! អ្វីជាប្រាក់បម្រុងកាតព្វកិច្ច?

ដោយ វុត្ថា

ភ្នំពេញៈ ប្រាក់បម្រុងកាតព្វកិច្ចជាឧបករណ៍ គោលនយោបាយរូបិយវត្ថុមួយ ដែលធនាគារជាតិនៃកម្ពុជាប្រើដើម្បីគ្រប់គ្រងល្បឿនកំណើនឥណទាន។

បច្ចុប្បន្ន អត្រាប្រាក់បម្រុងកាតព្វកិច្ចសម្រាប់រូបិយប័ណ្ណបរទេស (ជាពិសេសប្រាក់ដុល្លារអាមេរិក) និងរូបិយវត្ថុជាតិ ត្រូវបានកំណត់ផ្សេងគ្នា ។ អត្រាប្រាក់បម្រុងកាតព្វកិច្ចសម្រាប់រូបិយបណ្ណបរទេស និងរូបិយវត្ថុជាតិ ត្រូវបានកំណត់ក្នុងអត្រា ១២,៥% និង ៨% រៀងគ្នា ។

ចំពោះប្រាក់បម្រុងកាតព្វកិច្ច ជារូបិយប័ណ្ណបរទេសចំនួន១២,៥% ក្នុងនោះ៤,៥ភាគរយ ត្រូវបានផ្តល់ការប្រាក់ដោយធនាគារជាតិនៃកម្ពុជា និង៨%បន្ថែមទៀត មិនត្រូវបានផ្តល់ការប្រាក់ទេ ។ ចំពោះប្រាក់បម្រុងកាតព្វកិច្ចជារៀល ក៏មិនត្រូវបានផ្តល់ការប្រាក់ដែរ៕

រដ្ឋបាលខេត្តកំពត ចែកប័ណ្ណកម្មសិទ្ធិកាន់កាប់ដីជូនពលរដ្ឋបានជាង ៤២ម៉ឺនក្បាលដី

ដោយ ៖ រ៉ាណេត

កំពត ៖ អនុវត្តតាមគោលនយោបាយ និងការណែនាំរបស់ក្រសួងរៀបចំដែនដី នគរូបនីយកម្ម និងសំណង់ រដ្ឋបាលខេត្តកំពត បានធ្វើការចុះបញ្ជីដីធ្លី និងចែកប័ណ្ណកម្មសិទ្ធិកាន់កាប់ដីជូនដល់ប្រជាពលរដ្ឋជាង៤២ម៉ឺនក្បាលដី ក្នុងចំណោមទិន្នន័យសរុបដែលប្រមូលបានជាង ៥២ម៉ឺនក្បាលដី នៅទូទាំងខេត្ត។

អភិបាលខេត្តកំពត លោក ជាវ តាយ នៅថ្ងៃទី២៤ ខែមិថុនា ឆ្នាំ២០២០ បានជំរុញឱ្យមន្ត្រីជំនាញពន្លឿនការងារចុះបញ្ជីដីធ្លី ដើម្បីចេញប័ណ្ណកម្មសិទ្ធិ ជូនពលរដ្ឋឱ្យបានឆាប់រហ័ស ដើម្បីអាចប្រើប្រាស់ និងទាញយកប្រយោជន៍ពីដីធ្លីឱ្យអស់សក្តានុពល ជាពិសេសកាត់បន្ថយបញ្ហាវិវាទដីធ្លីផងដែរ។

នៅថ្ងៃទី២៤ ខែមិថុនា ឆ្នាំ២០២០ នេះផងដែរ ក្រុមប្រឹក្សាខេត្តកំពត បានចុះចែកបណ្ណកម្មសិទ្ធិកាន់កាប់ដីធ្លីចំនួន១៣៧២ បណ្ណ ជូនដល់ប្រជាពលរដ្ឋ ៧០០គ្រួសារ មកពី ២៣ភូមិ ក្នុងឃុំចំនួន៥ របស់ស្រុកដងទង់ ក្នុងបរិវេណសាលាស្រុក ដោយមានមន្ត្រីអាជ្ញាធរពាក់ព័ន្ធ និងពលរដ្ឋជាច្រើននាក់។

លោកអភិបាលខេត្ត បានបញ្ជាក់ថា ក្រោមការដឹកនាំប្រកបដោយស្មារតីស្នេហាជាតិមាតុភូមិ និងស្រឡាញ់ប្រជាពលរដ្ឋ គឺប្រមុខរាជរដ្ឋាភិបាល បានធ្វើកំណែទម្រង់ដីធ្លី ដោយក្នុងនោះរាជរដ្ឋាភិបាលបានធ្វើយុទ្ធនាការចុះវាស់វែងដីធ្លី ដើម្បីធ្វើការចុះបញ្ជី និងចេញប័ណ្ណកម្មសិទ្ធិជូនប្រជាពលរដ្ឋទូទាំងប្រទេស ពាក់ព័ន្ធនឹងដីដែលប្រជាពលរដ្ឋ កាន់កាប់ជាក់ស្តែង ហើយពុំទាន់មានមូលដ្ឋានច្បាស់លាស់។

លោកអភិបាលបន្តថា ប័ណ្ណកម្មសិទ្ធិដីធ្លីពិតជាមានប្រយោជន៍ច្រើនណាស់ សម្រាប់ប្រជាពលរដ្ឋជាម្ចាស់ដី គឺធានាបាននូវសុវត្ថិភាព ក្នុងការកាន់កាប់ដីធ្លី ជាឯកសារ និងជាភស្តុតាងរឹងមាំ ចំពោះមុខច្បាប់ ក្នុងករណីមានទំនាស់ដីធ្លីកើតឡើង។ សន្លឹកប័ណ្ណនេះ ក៏អាចដាក់ធានានៅធនាគារ ដើម្បីយកថវិកាមកពង្រីកមុខរបរ ធ្វើឲ្យជីវភាពកាន់តែប្រសើរឡើង និងនាំឲ្យមានកំណើនសេដ្ឋកិច្ចគ្រួសារផងដែរ។

ផ្អែកតាមរបាយការណ៍របស់មន្ទីររៀបចំដែនដី នគររូបនីយកម្ម សំណង់ និងសូរិយោដីខេត្ត គិតត្រឹមថ្ងៃទី៣០ ខែឧសភា ឆ្នាំ២០២០ មន្ទីរសម្រេចលទ្ធផលបាន៖ ប្រកាសតំបន់វិនិច្ឆ័យ ៣៤៧ភូមិ ក្នុង៦៧ឃុំ, ប្រមូលទិន្ន័យបានជាង៥២ម៉ឺនក្បាល់ដី, គូសក្បាលដីក្នុងកុំព្យូទ័របានជាង៥០ម៉ឺនក្បាលដី, បិទផ្សាយទិន្ន័យជាសាធារណៈបានជាង៤៧ម៉ឺនក្បាលដី និងចែកប័ណ្ណកម្មសិទ្ធិបាន៤៦ម៉ឺនក្បាលដី។

តាមការប៉ាន់ស្មានខេត្តកំពត នៅសល់ផ្ទៃដីប្រមាណ៣០ភាគរយទៀត ដែលនៅមិនទាន់បានវាស់វែងនៅឡើយ។ ដូច្នេះលោកអភិបាលខេត្តបានជំរុញឱ្យមន្ត្រីជំនាញ និងពាក់ព័ន្ធ អាជ្ញាធរមូលដ្ឋានត្រូវសហការគ្នា អនុវត្តការងារចុះបញ្ជីដីធ្លី ឱ្យបានរួចរាល់ឆាប់រហ័ស ដើម្បីប្រគល់ប័ណ្ណជូនដល់ប្រជាពលរដ្ឋជាម្ចាស់ដីឱ្យមានភាពក្ដីកក់ក្ដៅក្នុងចិត្ត ព្រមទាំងអាចទាញយកប្រយោជន៍ពីដីធ្លីរបស់ខ្លួនឱ្យអស់សក្ដានុពល៕

រដ្ឋាភិបាលទំលាក់ថវិកាចំនួន ១០០ លានដុល្លារដើម្បីស្ថាបនានូវហេដ្ឋារចនាសម្ព័ន្ធនៅទីជនបទ

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជា បានសម្រេចទំលាក់កញ្ចប់ថវិកាចំនួន ១០០ លានដុល្លារអាមេរិក ជនបទ ដើម្បីស្ថាបនានូវហេដ្ឋារចនាសម្ព័ន្ធនានាសម្រាប់គាំទ្រ និងផ្តល់នូវការងារជូនប្រជាពលរដ្ឋនៅទីជនបទ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសអញ្ជើញប្រកាសអនុវត្តន៍កម្មវិធីផ្តល់សាច់ប្រាក់ជូនប្រជាពលរដ្ឋ មានជីវភាពក្រីក្រ និងងាយរងគ្រោះដោយសារជំងឺកូវីដ១៩ ប្រមាណ៦០ម៉ឺនគ្រួសារនា ថ្ងៃទី២៤ ខែមិថុនា ឆ្នាំ២០២០នេះថ្លែងថា ការបោះទុន១០០លានដុល្លារទៅដល់ទីជបទនេះ មិនមែនជាការចិញ្ចឹមរបស់រដ្ឋ ដល់ប្រជាពលរដ្ឋនោះទេ តែគឺជាជំនួយសង្គម ដែលនឹងជួយបង្កើតការងារនៅទីជនបទ និងការបាត់បង់ការងារនៅទីក្រុង។

សម្តេចតេជោ ថា “ថវិកាចំនួន ១០០លានដុល្លារសាច់ប្រាក់ពលកម្ម គឺផ្តល់ជូនឲ្យប្រជាពលរដ្ឋរបស់យើង អាចធ្វើជាកូនប្រឡាយ ដើម្បីយកទឹកទៅស្រោចស្រព្វ គាត់អាចនាំគ្នាជីកស្រះ ឬអ្វីៗផ្សេង ដែលផលប្រយោជន៍បាន ទៅលើការអភិវឌ្ឍន៍ហេដ្ឋារចនាសម្ព័ន្ធជនបទផង និងទឹកប្រាក់ទាំងឡាយបានមកដល់ ក្នុងហោប៉ៅរបស់ប្រជាពលរដ្ឋយើងផង”។

សម្តេចតេជោ ក៏បានអំពាវនាវប្រជាពលរដ្ឋ កុំឱ្យផ្តេកផ្តួលជាមួយការឧបត្ថម្ភរបស់រាជរដ្ឋាភិបាល ត្រូវប្រឹងប្រែងរកការងារធ្វើបន្ថែម ដូចជាការដាំដុះធ្វើកសិកម្មជាដើម លើកលែងតែកុមារ និងមនុស្សចាស់ប៉ុណ្ណោះ។សម្តេចថ្លែងថា កម្ពុជាមិនមែនដូចប្រទេសគេ តែរាជរដ្ឋាភិបាលមានមាយាទ ក្នុងការគ្រប់គ្រង និងដឹកនាំរដ្ឋ ព្រមទាំងចាត់ចែងថវិកា។ ដូច្នេះរាជរដ្ឋាភិបាល មានថវិកាគ្រប់គ្រាន់សម្រាប់ឧបត្ថម្ភដល់ប្រជាពលរដ្ឋ។

គម្រោងសាច់ប្រាក់ពលកម្មសម្រាប់អភិវឌ្ឍន៍ហេដ្ឋារចនាសម្ព័ន្ធជនបទ និងការគាំទ្រកសិករ ជំហានទី២ សម្រាប់ឆ្នាំ ២០២០-២០២២ ដែលមានទឹកប្រាក់១០០លានដុល្លារត្រូវបានប្រកាសជាផ្លូវការ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១១ ខែមិថុនា ឆ្នាំ២០២០។

គម្រោងសាច់ប្រាក់ពលកម្ម សម្រាប់អភិវឌ្ឍន៍ហេដ្ឋារចនាសម្ព័ន្ធជនបទ និងការគាំទ្រកសិករ» មានគោលដៅចូលរួមកាត់បន្ថយភាពក្រីក្រ, លើកកម្ពស់ជីវភាព និងសុខមាលភាពរស់នៅរបស់ប្រជាជនជនបទ និងប្រជាកសិករក្រីក្រ ដែលត្រូវធ្វើឡើងតាមរយៈ៖

១) ការបង្កើតឱកាសការងាររយៈពេលខ្លី តាមកម្មវិធីសាច់ប្រាក់ពលកម្ម ដែលនឹងជួយដោះស្រាយជីវភាព បន្ទាន់ក្នុងរយៈពេលខ្លីផង ក៏ដូចជាបង្កើតជាទុន សម្រាប់ការវិនិយោគបន្តលើរបរកសិកម្ម ឬមុខរបរសមស្របដ៏ទៃទៀតផងដែរ

២) ការអភិវឌ្ឍហេដ្ឋារចនាសម្ព័ន្ធកសិកម្ម និងជនបទ ដែលរួមមាន៖ ផ្លូវលំ, ប្រឡាយជើងក្អែបសម្រាប់បង្ហូរ ទឹក ចូលក្នុងស្រែ, និងការតភ្ជាប់បណ្តាញអគ្គិសនីតម្លៃទាប ឲ្យដល់ស្ថានីយ៍បូមទឹកកសិកម្ម៕

កិច្ចព្រមព្រៀងពាណិជ្ជកម្មដ៏ធំក្នុងពិភពលោក កម្ពុជានឹងក្លាយជាប្រទេសហត្ថលេខីមួយនឹងត្រូវចុះហត្ថលេខាចុងឆ្នាំនេះ

ដោយ ប៊ី

ភ្នំពេញៈ រដ្ឋមន្រ្តីនៃប្រទេសសមាជិកទាំង១០ នៃសមាគមប្រជាជាតិអាស៊ីអាគ្នេយ៍ (អាស៊ាន) ចិន ជប៉ុន កូរ៉េខាងត្បូង អូស្រ្តាលី និងនូវែលសេឡង់បានបញ្ជាក់ជាថ្មី ពីការ ប្តេជ្ញាចិត្តរបស់ខ្លួន ក្នុងការចុះហត្ថលេខាលើកិច្ច ព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នៅចុងឆ្នាំនេះ។ នៅក្នុងសេចក្តីថ្លែងការណ៍រួមមួយស្តីពីប្រព័ន្ធផ្សព្វផ្សាយកាលថ្ងៃអង្គារកន្លងមកនេះ។

សេចក្តីថ្លែងការណ៍ប្រព័ន្ធផ្សព្វផ្សាយ ពីកិច្ចប្រជុំថ្នាក់រដ្ឋមន្ត្រីអន្តរក្រសួង (RCEP) លើកទី១០ ដែលដឹកនាំដោយក្រសួងឧស្សាហកម្ម និងពាណិជ្ជកម្មវៀតណាមនៅថ្ងៃអង្គារកន្លងមកនេះបានឱ្យដឹងថា ការចុះហត្ថលេខាលើកិច្ចព្រមព្រៀងនេះ នឹងក្លាយជាសញ្ញាច្បាស់មួយ នៃការគាំទ្រដោយមិនផ្លាស់ប្តូររបស់សមាជិក សម្រាប់ប្រព័ន្ធពាណិជ្ជកម្មពហុភាគី សមាហរណកម្មតំបន់ ក៏ដូចជាការអភិវឌ្ឍសេដ្ឋកិច្ចនៅទូទាំងតំបន់។

បណ្តារដ្ឋមន្រ្តីទាំងអស់បានឯកភាព នៅក្នុងសេចក្តីថ្លែងការណ៍ថា សារៈសំខាន់របស់ RCEP នៅតែបន្តរីកចំរើន បើទោះជាមានការរីករាលដាលនៃជំងឺរាតត្បាត COVID-១៩ ដែលជាបញ្ហាប្រឈមដែលមិនធ្លាប់មាន សម្រាប់ពាណិជ្ជកម្មការវិនិយោគ និងបណ្តាញផ្គត់ផ្គង់សកល ដែលទាមទារឱ្យមានការឆ្លើយតបជាសកល។

រដ្ឋមន្ត្រីក៏បានយល់ព្រមបង្កើនកិច្ចសហប្រតិបត្តិការ និងការសម្របសម្រួល ដើម្បីជួយសម្រួលដល់ការងើបឡើងវិញនៃសេដ្ឋកិច្ចរឹងមាំ និងកំណើន ក៏ដូចជាកំណើនប្រកបដោយចីរភាព តុល្យភាព និងការរួមបញ្ចូលគ្នា បន្ទាប់ពីវិបត្តិនេះ។

សេចក្តីថ្លែងការណ៍បានឱ្យដឹងទៀតថា ប្រទេសឥណ្ឌាគឺជាអ្នកចូលរួមដ៏សំខាន់នៅក្នុងការចរចារRCEP ដោយកត់សម្គាល់ថារដ្ឋមន្រ្តីនានាជឿជាក់ថា ការចូលរួមរបស់ឥណ្ឌានៅក្នុងRCEP នឹងរួមចំណែកដល់ការជម្រុញ និងភាពរុងរឿងក្នុងតំបន់ និងសង្កត់ធ្ងន់ថា RCEP នៅតែបើកចំហសម្រាប់ប្រទេសឥណ្ឌា។

ផ្តួចផ្តើមគំនិតដោយអាស៊ានក្នុងឆ្នាំ២០១២ RCEP គឺជាកិច្ចព្រមព្រៀងពាណិជ្ជកម្មសេរី ដែលបានស្នើឡើងរវាងប្រទេសជាសមាជិកអាស៊ានទាំង១០ និងដៃគូពាណិជ្ជកម្មសេរី (FTA) ចំនួន ៦ របស់ពួកគេគឺចិន ជប៉ុន កូរ៉េខាងត្បូង អូស្រ្តាលី នូវែលសេឡង់ និងឥណ្ឌា។ កាលពីខែវិច្ឆិកាឆ្នាំមុនប្រទេសចំនួន១៥ ដែលបានចូលរួមក្នុងកិច្ចព្រមព្រៀងបានបញ្ចប់ការចរចាអត្ថបទ ដោយផ្អែកលើបញ្ហាសំខាន់ៗ ដែលអាចចូលទៅដល់ទីផ្សារនៅឯកិច្ចប្រជុំកំពូល RCEP នៅទីក្រុងបាងកកប្រទេសថៃ។

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអះអាងនាពេលកន្លងមកថា ទីផ្សារប្រទេសRCEP គឺមានសក្តានុពលធំធេងធំជាងទីផ្សារអឺរ៉ុប និងអាមេរិកឆ្ងាយណាស់ ដែលវាជាជម្រើសសម្រាប់ផលិតផលកម្ពុជា ខណៈដែលកម្ពុជាគឺជាសមាជិកនៃទីផ្សារតំបន់មួយនេះ។

លោកបានគូសបញ្ជាក់ផងដែរថា “កម្ពុជានឹងទទួលបានប្រយោជន៍សេដ្ឋកិច្ចសន្ធឹកសន្ធាប់ និងការវិនិយោគដ៏ច្រើនមហិមា ដែលនឹងនាំឱ្យពលរដ្ឋមានកិច្ចការងារធ្វើ ហើយមានតម្លៃពលកម្មខ្ពស់ថែមទៀតផង”។

មួយវិញទៀត កិច្ចព្រមព្រៀងសេដ្ឋកិច្ចពាណិជ្ជកម្មសេរីក្នុងតំបន់នេះ គឺជាជម្រើសទីផ្សារមួយដ៏ធំ សម្រាប់កម្ពុជាក្នុងការនាំចេញ ហើយនេះគឺជាយុទ្ធសាស្ត្រពង្រីកទីផ្សារបស់កម្ពុជាផងដែរ៕

ការសាងសង់ស្ពានអាកាសនិងផ្លូវក្រោមដីតំបន់រង្វង់មូលចោមចៅសម្រេចបាន ជាង៤០ភាគរយ

ដោយៈ រ៉ាណេត

ភ្នំពេញៈ មន្ត្រីជំនាញមន្ទីរសាធារណការ និងដឹកជញ្ជូនរាជធានីភ្នំពេញ បានបញ្ជាក់ថា គិតត្រឹមដើមសប្ដាហ៍នេះ គម្រោងស្ថាបនា សាងសង់ស្ពានអាកាស និងផ្លូវក្រោមដីត្រង់រង្វង់មូលចោមចៅ សម្រេចបានលទ្ធផលជាង៤០ភាគរយហើយ ដោយគ្រោងបញ្ចប់ទាំងស្រុងនៅត្រឹមចុងឆ្នាំ២០២១ ខាងមុខនេះ។

ដូចទៅនឹងប្រសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជាលើកឡើងថា វិបត្តិនៃជំងឺ Covid-19 មិនមែនជាឧបសគ្គ ដែលអាចរារាំងការអភិវឌ្ឍហេដ្ឋារចនាសម្ព័ន្ធនៅទូទាំងប្រទេសកម្ពុជាបាននោះទេ។ ជាក់ស្ដែងគិតត្រឹមដើមសប្ដាហ៍នេះ ជាលទ្ធផលនៃការសាងសង់ស្ពានអាកាស និងផ្លូវក្រោមដី តំបន់រង្វង់មូលចោមចៅ សម្រេចបានជាង៤០ភាគរយស្របទៅតាមផែនការដែលបានកំណត់។

ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោកសាំ ពិសិដ្ឋ បានអះអាងថា សំណង់ផ្លូវថ្នល់នៅចំណុចបំបែកចោមចៅផ្នែកផ្លូវក្រោមដី នឹងស្ថាបនារួចរាល់នៅចុងខែកក្កដាខាងមុខនេះ បន្ទាប់មកក្រុមការងារនឹងបន្តសាងសង់ ស្ពានអាកាសបន្តទៀត ដើម្បីបង្កភាពងាយស្រួលដល់ប្រជាពលរដ្ឋ ក្នុងការធ្វើចរាចរណ៍ ពិសេសកាត់បន្ថយភាពកកស្ទះ។

លោកបានបញ្ជាក់ថា “ពេលនេះក្រុមជំនាញកំពុងមមាញឹក ក្នុងការស្ថាបនាគម្រោងនេះឱ្យហើយតាមផែនការ បើទោះបីជារដូវវស្សាឈានចូលមកដល់ ដែលបង្កឱ្យមានផលប៉ះពាល់នូវដំណើរការស្ថាបនាបន្តិចមែន ប៉ុន្ដែមិនមែនជាឧបសគ្គដល់ការសាងសង់នោះទេ ដោយខាងមន្ទីរសហការជាមួយភាគីពាក់ព័ន្ធទាំងអស់ ធ្វើយ៉ាងណាជំរុញឱ្យការងារនេះរួចរាល់តាមការកំណត់ ដែលផ្លូវក្រោមនឹងរួចរាល់ជាស្ថាពរនៅចុងខែកក្កដាខាងមុខនេះ”។

លោកបន្តថា ក្រោយពេលឡើងផុតផ្លូវក្រោមដីទៅ យើងនឹងមានភាពធូស្រាលហើយ ដោយមិនមានភាពលំបាកអ្វីទៀតនោះទេ ដោយយើងកំពុងតែជំរុញ ផ្លូវក្រោមដីស្ថាបនារួចរាល់នៅខែកក្កដា ផុតពីហ្នឹងទៅយើងនឹងមានភាពងាយស្រួល និងមានការលំបាកខ្លះនៅផ្លូវក្រោមដីពេលមេឃភ្លៀង។

នៅក្នុងគម្រោងនេះ ផ្លូវក្រោមដី គឺជាផ្លូវកោងតភ្ជាប់ចរាចរណ៍ពីផ្លូវវេងស្រេង មកផ្លូវជាតិលេខ៤ មានប្រវែងសរុប១៣០ម៉ែត្រ មានទទឹង៨,៥ម៉ែត្រ សម្រាប់ចរាចរណ៍មួយទិស ដែលមាន២គន្លងសម្រាប់រថយន្ត និងមួយគន្លងទោចក្រយានយន្ត។ ចំណែកផ្លូវក្រោមដីមួយទៀត ជាផ្លូវតភ្ជាប់ចរាចរណ៍ពីផ្លូវជាតិលេខ៤ មកមហាវិថីសហព័ន្ធរុស្ស៊ី ដែលមានប្រវែងសរុប៤៧០ម៉ែត្រ មានទទឹង៨,៥ម៉ែត្រ សម្រាប់ចរាចរណ៍មួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។

ជាមួយគ្នានេះ គម្រោងនេះនឹងមានស្ពានអាកាសចំនួន៣ខ្សែបន្ថែមទៀត ដែលមានស្ពានអាកាសមេទី១ តភ្ជាប់ចរាចរណ៍ពីមហាវិថីសហព័ន្ធរុស្ស៊ី និងផ្លូវជាតិលេខ៣ ដោយមានប្រវែងសរុប៤០៨ ម៉ែត្រ ទទឹង១៥,៨ម៉ែត្រ មានចរាចរចំនួនពីរគន្លងទៅ និងចំនួនពីរគន្លងមក។

ស្ពានអាកាសទី២ គឺបំបែកចេញពីស្ពានអាកាសមេទី១ បត់ឆ្វេងតភ្ជាប់ចរាចរណ៍ពីមហាវិថីសហព័ន្ធរុស្ស៊ីឆ្ពោះទៅផ្លូវវេងស្រេង សម្រាប់តែចរាចរណ៍មួយទិសប៉ុណ្ណះ ដោយមួយគន្លងសម្រាប់ថយន្ត និងមួយគន្លងទោចក្រយានយន្ត មានប្រវែងសរុប២០២ម៉ែត្រ និងមានទទឹង៥,២៥ម៉ែត្រ។ ចំណែកស្ពានទី៣ ជាស្ពានកោងបត់ឆ្វេងតភ្ជាប់ចរាចរពីផ្លូវវេងស្រេង មកផ្លូវជាតិលេខ៣ មានប្រវែងសរុប ២០៦ម៉ែត្រ មានទទឹង៥,២៥ម៉ែត្រ សម្រាប់ចរាចរមួយទិស ដែលមានមួយគន្លងរថយន្ត និងមួយគន្លងទោចក្រយានយន្ត៕

អ្នកជំនាញៈ លំនៅដ្ឋានប្រកបអាជីវកម្មជាប្រភេទលំនៅដ្ឋានព្រួញមួយបាញ់បានសត្វពីរ

ដោយ ហ្សូលី

ភ្នំពេញៈ លំនៅដ្ឋានប្រកបអាជីវកម្ម (shop house) ជាប្រភេទលំនៅដ្ឋានដែលកំពុងមានប្រជាប្រិយភាព និងមានការអភិវឌ្ឍច្រើន ពីសំណាក់ក្រុមហ៊ុនអភិវឌ្ឍលំនៅ ដ្ឋាននានា។

អ្នកជំនាញបានលើកឡើងថា ភាគច្រើនលំនៅដ្ឋានប្រភេទនេះ បានរីកសាយភាពពាសពេញទីក្រុង និងជាយក្រុង ដោយសារតែអត្ថប្រយោជន៍ជាច្រើនខុសពីប្រភេទដទៃ។

លោកស្រីតាំង ហួរ នាយិកាក្រុមហ៊ុនអចលនទ្រព្យ Amatak Property Service បានថ្លែងឱ្យដឹងមកកាន់គេហទំព័រ Property Area Asia ថា សម្រាប់អ្នកដែលមានជីវភាពមធ្យមពួកគេនិយមរស់នៅ ជាប្រភេទលំនៅដ្ឋានប្រកបអាជីវកម្មច្រើន ព្រោះវាផ្តល់ភាពងាយស្រួលសម្រាប់ការរស់នៅ ដែលអនុញ្ញាតឱ្យអ្នកទិញចង់រកស៊ីប្រកបមុខរបរក៏បាន ឬរស់នៅក៏បាន។

លោកស្រីបន្តថា “សម្រាប់តម្លៃវាស្ថិតទៅលើទីតាំងនិងតំបន់ បើនៅឯជាយក្រុងអាចមានត្រឹមចាប់ពី៧ម៉ឺនឡើងទៅ”។

បន្ថែមពីនេះ លោកម៉ម សិរីបញ្ញា អគ្គនាយកក្រុមហ៊ុនអចលនទ្រព្យ Easy Property Investment បានលើកឡើងពីមូលហេតុថា ភាគច្រើនគម្រោងលំនៅដ្ឋានប្រភេទនេះ ច្រើនតែសាងសង់នៅក្បែរតំបន់ទីប្រជុំជន និងជាទីតាំងល្អ ក្នុងការរកស៊ី និងរស់នៅ។ ចំណុចខ្លាំងនោះមានផ្សារនៅក្បែរ ដែលបង្ករឱ្យពលរដ្ឋងាយស្រួលបង្កើតជំនួញ និងធ្វើឱ្យការរស់នៅមានភាពទាន់សម័យ និងងាយស្រួលរស់នៅ។ ហេតុផលទាំងអស់នេះហើយ ដែលបណ្តាលឱ្យប្រភេទលំនៅដ្ឋាននេះ ហាក់បីដូចជាមានតម្រូវការច្រើន។

លោកលើកឡើងថា “អ្នកមានថវិកាក្រោម១០ម៉ឺនដុល្លារ អាចទិញលំនៅដ្ឋានបាននៅក្នុងតំបន់ខណ្ឌដង្កោរ ឬខណ្ឌកំប៉ូល ព្រោះថានៅតំបន់នេះកំពុងមានការអភិវឌ្ឍជាហូរហែទៅលើវិស័យលំនៅដ្ឋាន”។ លោកបន្ថែមថា “ម្យ៉ាងទីតាំងនោះគឺសាកសមសម្រាប់គ្រួសារខ្នាតតូចដែលចង់រស់នៅក្នុងទីក្រុងភ្នំពេញ ថ្វីត្បិតតែឆ្ងាយពីកណ្តាលក្រុងក៏ពិតមែន តែហ៊ុមព័ទ្ធទៅដោយផ្សារ ឬតំបន់រកស៊ី”។

អ្នកជំនាញអចលនទ្រព្យអន្តរជាតិមួយរូបទៀត និងជាអគ្គនាយកក្រុមហ៊ុន Century 21 Advance Property ធ្លាប់បានពន្យល់ស្រដៀងគ្នាថា សម្រាប់ប្រភេទលំនៅដ្ឋានប្រកបអាជីវកម្ម ត្រូវបានអ្នកទិញទិញមានគោលបំណង២ ដែលក្រៅពីអាចរស់នៅប្រកបដោយផាសុកភាព តែអាចប្រកបអាជីវកម្មបានថែមទៀត។ ដោយឡែកតម្លៃផ្ទះប្រភេទនេះមានតម្លៃថ្លៃជាងផ្ទះល្វែងបន្តិច ព្រោះទីតាំងអាចស្ថិតនៅក្នុងទីប្រជុំជន និងប្រមូលផ្តុំដោយអាជីវកម្មចម្រុះ៕

1...2,3532,3542,355...3,255 Page 2,354 of 3,255