ដោយ: គង់ លាងហួរ
អន្តរជាតិ: យោងតាមកាសែត Kyodo News បានចុះផ្សាយឱ្យដឹងថា រដ្ឋាភិបាលជប៉ុនគ្រោងពន្យារពេលក្នុងការបញ្ចប់គម្រោងពង្រីកបណ្តាញខ្សែរថភ្លើង Hokkaido Shinkansen ឆ្ពោះទៅកាន់ទីក្រុង Sapporo រហូតដល់ខែមីនា ឆ្នាំ២០៣៩។

គម្រោងពង្រីកខ្សែរថភ្លើង Hokkaido Shinkansen នេះមានប្រវែង២១២គីឡូម៉ែត្រ ដោយតភ្ជាប់រវាងស្ថានីយ៍រថភ្លើង Shin-Hakodate-Hokuto ស្ថិតនៅភាគខាងត្បូងនៃកោះហុកកៃដូ និងទីក្រុង Sapporo ដែលជាទីប្រជុំជនរបស់កោះមួយនេះ។

កាលបរិច្ឆេទនៃការបញ្ចប់គម្រោងខាងលើនឹងត្រូវបានពន្យារពេលរហូតដល់ឆ្នាំ២០៣៩ បើប្រៀបធៀបនឹងកាលបរិច្ឆេទដំបូង ដែលកំណត់នៅត្រឹមឆ្នាំ២០៣១។ ភាពយឺតយ៉ាវនេះបណ្តាលមកពីកង្វះកម្លាំងពលកម្មនៅការដ្ឋានសំណង់ និងបញ្ហាប្រឈមភូមិសាស្ត្រ ដែលកំពុងបង្កការលំបាកដល់ការងារស្ថាបនាកំណាត់ផ្លូវដែកក្រោមដី។

ការស្ថាបនាកំណាត់ផ្លូវដែកក្រោមដីមានចម្ងាយស្មើនឹង៨០ភាគរយនៃចម្ងាយសរុបរបស់គម្រោងផ្លូវដែកទាំងមូល ដែលនឹងធ្វើដំណើរឆ្លងកាត់តំបន់ភាគខាងត្បូងកោះហុកកៃដូឆ្ពោះទៅកាន់រមណីយដ្ឋានជិះស្គីឈ្មោះ “Niseko”ដ៏ល្បីល្បាញនៅលើកោះមួយនេះ។

រដ្ឋាភិបាលជប៉ុនបានអនុម័តគម្រោងនេះនៅក្នុងឆ្នាំ២០១២ ដោយបានព្យាករណ៍ថា គម្រោងនេះនឹងត្រូវចំណាយទុនវិនិយោគចំនួន១,៦៧ទ្រីលានយ៉េន(ប្រហែល១១,៣ពាន់លានដុល្លារ)។

យ៉ាងណាមិញ នៅខែធ្នូ ឆ្នាំ២០២២ ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុនបានបង្កើនការព្យាករណ៍តួលេខនៃទំហំទុនវិនិយោគកើនឡើងដល់ចំនួន២,៣ទ្រីលានយ៉េន ដោយសារការកើនឡើងនៃតម្លៃសម្ភារៈសំណង់៕ប្រភព: Kyodo News៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនាព្រឹកថ្ងៃច័ន្ទដើមសប្តាហ៍នេះ ដោយសារប្រាក់ដុល្លារអាមេរិកបានងើបឡើងថ្លៃវិញ ខណៈក្រុមអ្នកវិនិយោគកំពុងរង់ចាំអ៊ុតមើលសភាពការណ៍ថ្មីៗបន្ថែមទៀត។

តួយ៉ាង តម្លៃមាស Spot Gold បានធ្លាក់ចុះ០,២១ភាគរយដល់៣០១៧,១៥ដុល្លារក្នុងមួយអោន។ចំណែក តម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,០៣ភាគរយដល់៣០២២,៤០ដុល្លារក្នុងមួយអោនគិតត្រឹមម៉ោង១០:៥២នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៦៥,៣ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៤,១៣ពិន្ទុនាព្រឹកថ្ងៃច័ន្ទនេះ បន្ទាប់ពីបានបិទការជួញដូរត្រឹម១០៤,០៩ពិន្ទុកាលពីថ្ងៃសុក្រសប្តាហ៍មុន។

ចំណែក តម្លៃលោហៈធាតុប្រាក់ Spot silver បានងើបឡើង០,៥៨ភាគរយដល់៣៣,៦៨ដុល្លារក្នុងមួយអោន ខណៈតម្លៃផ្លាទីនបានងើបឡើង០,៣៧ភាគរយដល់៩៨២ដុល្លារក្នុងមួយអោន ហើយតម្លៃ palladium បានងើបឡើង០,៥ភាគរយដល់៩៦៧ដុល្លារក្នុងមួយអោនគិតត្រឹមម៉ោង១០:៥៤នាទីព្រឹក៕

ដោយៈ ច្រាយ ចំណាន

    តាកែវៈ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំដល់ក្រសួង ស្ថាប័នពាក់ព័ន្ធ ត្រូវរួមគ្នាពង្រឹងសមត្ថភាពប្រជាសហគមន៍ នៅមូលដ្ឋានទេសចរណ៍ ឲ្យបានយល់ពីបដិសណ្ឋារកិច្ច និងការផ្ដល់សេវាគាំទ្រនានា សំដៅដល់ការចូលរួមចំណែកទាក់ទាញភ្ញៀវទេសចរកាន់តែល្អប្រសើរបន្ថែមទៀត។

ការណែនាំបែបនេះរបស់បវរធិបតី ហ៊ុន ម៉ាណែត បានធ្វើឡើងកាលពីល្ងាចថ្ងៃសៅរ៍ ទី២២ ខែមីនា ឆ្នាំ២០២៥នេះ ក្នុងឱកាសសម្តេច និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញជាអធិបតីបើកពិធីបុណ្យទន្លេលើកទី៩ នៅក្នុងខេត្តតាកែវ។

សម្តេចបានអះអាងថា “ការពង្រឹងសមត្ថគួរភាពប្រជាសហគមន៍ ជាចំណែកមួយដ៏សំខាន់ ក្នុងការរុញឲ្យពួកគាត់ កាន់តែទទួលបានជោគជ័យ ជាមួយនឹងផលិតផលដែលមាននៅហ្នឹ​ងកន្លែង មុនស្វែងរកការចូលរួមពីវិស័យឯកជនទៅវិនិយោគ”។ សម្តេចបន្ថែមថា “សមត្ថភាពប្រជាសហគមន៍កាន់ខ្ពស់ មិនមែនមានន័យថា មិនត្រូវការចូលរួមវិនិយោគបន្ថែមនោះទេ ប៉ុន្ដែជាការជួយបំពេញឲ្យគ្នាទៅវិញទៅមក នូវរាល់អ្វីដែលជាចំណុចខ្វះខាត និងសេចក្ដីតម្រូវការរបស់អតិថិជនដែលជាភ្ញៀវទេសចរ”។

សារថ្មីសម្រាប់ពិធីបុណ្យចូលឆ្នាំប្រពៃណីជាតិ

ជាមួយគ្នានេះ សម្តេចមហាបវរធិបតី ហ៊ុន ម៉ាណែត បញ្ជាក់ឲ្យដឹងថា ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងចូលមកដល់ នាពេលឆាប់ៗខាងមុខនេះ គឺមិនមានការហាមលេងបាញ់ទឹកទេ ប៉ុន្ដែត្រូវលេងដោយប្រយ័ត្នប្រយែង កុំឱ្យមានគ្រោះថ្នាក់ តែត្រូវបំផុសការលេងល្បែងប្រជាប្រិយខ្មែរ ឱ្យបានច្រើន។

សម្តេចបវរធិបតីបានបញ្ជាក់ថា “សូមជំរុញ និងលើកទឹកចិត្ដ ឲ្យមានការរៀបចំជាលក្ខណៈលេងល្បែងប្រជាប្រិយឲ្យបានច្រើន នៅតាមមូលដ្ឋានរបស់យើង នៅគ្រប់ទីកន្លែង។ យើងមិនហាមទេបាញ់ទឹក ប៉ុន្ដែលេងឲ្យស្រួលប្រួល ប្រយ័ត្នគ្រោះថ្នាក់”។

ទន្ទឹមគ្នានេះ សម្តេចបវរធិបតី ហ៊ុន ម៉ាណែត ក៏សូមស្នើដល់រដ្ឋ​បាលរាជធានី-ខេត្ដទាំងអស់ បំផុសឲ្យមានការរៀបចំ ព្រឹត្ដិការណ៍អបអរសង្ក្រាន្ដឆ្នាំថ្មីកម្ពុជា នៅក្នុងមូលដ្ឋានរបស់ខ្លួន ចាប់ពីកម្រិតថ្នាក់ខេត្ដ ដល់ថ្នាក់ស្រុក-ឃុំ ទៅតាមគោលដៅទេសចរណ៍ វត្ដអារាមនានា បន្ថែ​មពីលើព្រឹត្ដិការណ៍ មហាអង្គរសង្គ្រាន្ដ ដែលបានរៀបចំនៅក្នុងខេត្ដសៀមរាប។

ពិធីបុណ្យចូលឆ្នាំថ្មី ប្រពៃណីជាតិខ្មែរ នឹងឈានចូលមកដល់ នាពេលខាងមុខនេះ ដែលនឹងប្រព្រឹត្តិ ទៅរយៈពេល៣ថ្ងៃ ចាប់ពីថ្ងៃទី១៣ រហូតដល់ថ្ងៃទី១៦ ខែមេសា ឆ្នាំ២០២៥។

អ្វីកាន់តែគួរឲ្យចាប់អារម្មណ៍បន្ថែមទៀត សម្តេចបវរធិបតី ហ៊ុន ម៉ាណែត បានជម្រាបដល់ប្រជាពលរដ្ឋកុំព្រួយឱ្យសោះ រដ្ឋមិនអនុញ្ញា​តឱ្យក្រុមហ៊ុនធំ អភិវឌ្ឍគម្រោងតំបន់ទេសចរណ៍ធម្មជាតិ រហូតប៉ះពាល់ប្រជាពលរដ្ឋឡើយ និងណែនាំទៅអ្នកវិនិយោគ សុំកុំកសាងអគារខ្ពស់ និងបុរីនៅលើភ្នំ ដែលជាគោលដៅទេសចរណ៍ធម្មជាតិបន្ថែមទៀត ពីព្រោះភ្ញៀវទេសចរណ៍ចង់មកទស្សនា នៅតាមគោលដៅសាមញ្ញៗ។

សម្ដេចធិបតី ហ៊ុន ម៉ាណែត បានស្នើឱ្យក្រសួង ស្ថាប័នពាក់ព័ន្ធ ផ្ដល់កិច្ចសហការ ឱ្យបានល្អជាមួយក្រសួងទេសចរណ៍ ដើម្បីកំណើន និងផ្ដល់ភាពវិជ្ជមាន ដល់វិស័យទេសចរណ៍ នៅក្នុងប្រទេសកម្ពុជាកាន់តែរីកចម្រើន ផ្ដល់ជាប្រយោជន៍ជូនពលរដ្ឋកម្ពុជា ព្រមទាំងណែនាំឱ្យទុកឱកាសឱ្យសហគមន៍ អភិវឌ្ឍន៍វិស័យទេសចរណ៍ ឱ្យអស់លទ្ធភាពសិន មុននឹងផ្ដល់ឱ្យក្រុមហ៊ុនជន ឬវិស័យឯកជន វិនិយោគលើគម្រោង។

សម្ដេចធិបតី ហ៊ុន ម៉ាណែត បានបន្តថា ពលរដ្ឋនៅតាមសហគមតែងតែបង្ហាញក្ដីព្រួយបារម្ភ នៅចំពោះមុខសម្ដេច ខ្លាចពេលក្រុមហ៊ុនចូលវិនិយោគ នៅតំបន់ទេសចរណ៍ធម្មជាតិ គឺបាត់បង់ចំណូលរបស់ពួកគាត់ និងបាត់បង់អ្វីដែលជាតំបន់ទេសចរណ៍ធម្មជាតិ។ កន្លងមកមានសំណើរសុំឱ្យក្រុមហ៊ុន ឬវិស័យឯកជន ចូលវិនិយោគនៅតាមតំបន់ទេសចរណ៍ធម្មជាតិមួយចំនួន ប៉ុន្តែត្រូវបានសម្ដេចបដិសេធ ហើ​យណែនាំឱ្យបង្រៀនពលរដ្ឋ ពីរបៀបបដិសណ្ឋារកិច្ចភ្ញៀវ និងសាងសង់កន្លែងលក់អាហារ កន្លែងសង្គ្រោះបន្ទាន់ បង្គន់អនាម័យបន្ថែមជូន៕

ដោយៈ គង់ សូរិយា

    ព្រះសីហនុៈ ក្រុមមន្រ្តីបានចុះ ចុះពិនិត្យការអនុវត្តគម្រោងវិនិ​យោគ របស់បណ្តាក្រុមហ៊ុនអភិវឌ្ឍន៍កោះ ឆ្នេរ និងរមណីយដ្ឋា​ននា​នា នៅខេត្តកោះកុង និងខេត្តព្រះសីហនុ។

គណៈកម្មការអន្តរក្រសួងសម្រាប់សិក្សាវាយតម្លៃ និងរៀបចំប្លង់​មេលើបណ្តាកោះ ដែលមានសក្តានុពលសេដ្ឋកិច្ច ដឹកនាំដោយ លោ​ក​ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានចុះ​ពិនិ​ត្យ​ការអនុវត្តគម្រោងវិនិយោគ របស់បណ្តាក្រុមហ៊ុនអភិវឌ្ឍន៍កោះ និងឆ្នេរនានា នៅខេត្តកោះកុង និងខេត្តព្រះសីហនុ ដោយមាន​ការ​ចូលរួមពីសំណាក់ថ្នាក់ដឹកនាំ និងមន្ត្រីជំនាញនៃក្រសួង ស្ថាប័ន​ពាក់​ព័ន្ធមានសមត្ថកិច្ច រួមទាំងអាជ្ញាធរដែនដីផង ក្នុងភូមិសាស្ត្រខេត្ត​កោះ​កុង និងខេត្តព្រះសីហនុ។

ការចុះពិនិត្យខាងលើ ត្រូវបានធ្វើឡើងរៀងរាល់ឆ្នាំ ក្នុងគោ​លបំ​ណង ដើម្បីពិនិត្យលើវឌ្ឍនភាពនៃការអនុវត្តគម្រោង ការផ្តល់មតិយោ​បល់​លើផ្នែកបច្ចេកទេស ព្រមទាំងស្តាប់នូវបញ្ហាប្រឈម និងសំណូ​មពរនានារបស់វិនិយោគិន សំដៅជំរុញការអនុវត្តគំរោងស្រប​តាមខ្លឹម​សារនៃកិច្ចសន្យា និងដើម្បីរៀបចំរបាយការណ៍បូកសរុបគោរពរាយ​ការណ៍ជូនរាជរដ្ឋាភិបាល។

ឆ្លៀតក្នុងឱកាសនៃការបំពេញភារកិច្ចនេះដែរ គណៈកម្មការអន្តរ​ក្រសួង ក៏បានឆ្លៀតចុះជួបសំណេះសំណាល និងសាកសួរសុខទុក្ខ​នាយ​នាវី នាយនាវីរង និងពលនាវិក កងការពារកោះតាងលេខ៣ ដែលបានឈរជើងនៅមូលដ្ឋានកោះតាងផងដែរ៕

ដោយ: គង់ លាងហួរ
អន្តរជាតិ: ក្នុងរយៈពេលជិត៣ទសវត្សរ៍កន្លងមកនេះ ផលិតផលទូរសព្ទស្មាតហ្វូនបានក្លាយជាវត្ថុប្រើប្រាស់មិនអាចខ្វះបាននៅក្នុងស្ថានភាពរស់នៅប្រចាំថ្ងៃរបស់មនុស្សនៅទូទាំងពិភពលោក។

ប៉ុន្តែ ខណៈពេលដែលវិស័យបច្ចេកវិទ្យាកំពុងបន្តបោះពួយទៅមុខឥតឈប់ឈរ លោកកំពូលមហាសេដ្ឋី Mark Zuckerberg នាយកប្រតិបត្តិក្រុមហ៊ុន Meta បានប្រកាស​ពី​ការ​ត្រៀមបញ្ចប់​យុគសម័យនៃការប្រើប្រាស់ទូរសព្ទ​ស្មាតហ្វូន និងដាក់​ជំនួសមកវិញដោយបច្ចេកវិទ្យា​​ថ្មី។

លោកបានព្យាករណ៍ថា “វ៉ែនតាឆ្លាតវៃ(Smart Glass) នឹងក្លាយជាឧបករណ៍តភ្ជាប់ទំនាក់ទំនងដ៏សំខាន់មួយរបស់យើងទៅនឹងពិភពឌីជីថល ដោយនឹងធ្វើឱ្យស្មាតហ្វូនក្លាយជាវត្ថុដែលគេប្រើប្រាស់កាលពីអតីតកាល”។

ចក្ខុវិស័យរបស់លោក Mark Zuckerberg មិនមែនគ្រាន់តែជាការស្រមើស្រមៃនោះទេ។ ប៉ុន្តែ វាកំពុងចាប់ផ្តើមលេចចេញជារូបរាងហើយ។

គម្រោងដែលមានឈ្មោះថា “Meta’s Orion” ត្រូវបានគេចាត់ទុកថា ជាការច្នៃប្រឌិតវ៉ែនតាឆ្លាតវៃទំនើបបំផុតដែលមិនធ្លាប់មាន។វ៉ែនតានាពេលអនាគតទាំងនេះមានលក្ខណៈពិសេសបែប Holographic ដែលធ្វើឱ្យអ្នកប្រើប្រាស់វ៉ែតាឆ្លាតវៃអាចផ្ញើសារ ហៅទូរសព្ទ ឬស្វែងរក ដោយមិនចាំបាច់ចុចទូរសព្ទ។

ក្រុមហ៊ុន Meta ក៏បានចាប់ដៃគូជាមួយក្រុមហ៊ុនម៉ាកយីហោវ៉ែនតាប្រណីត Ray-Ban ដើម្បីនាំយកវ៉ែនតាឆ្លាតវៃទៅកាន់ពិភពលោកផងដែរ។ វ៉ែនតាឆ្លាតវៃ Ray-Ban Meta កើតចេញពីការច្របាច់បញ្ចូលគ្នារវាងវ៉ែនតារបស់ក្រុមហ៊ុន Ray-Ban ជាមួយនឹងបច្ចេកវិទ្យា AI-driven របស់ក្រុមហ៊ុន Meta។

ការផលិតវ៉ែនតាទាំងនេះជាការបោះជំហានដ៏សំខាន់នៅក្នុងវិស័យបច្ចេកវិទ្យា។ប្រសិនបើមនុស្សមានភាពងាយស្រួលក្នុងការប្រើប្រាស់មុខងាររបស់វ៉ែនតាឆ្លាតវៃសម្រាប់ការស្តាប់តន្ត្រី ការថតរូប និងការហៅទូរសព្ទ នោះការងាកចេញឆ្ងាយពីស្មាតហ្វូននឹងអាចក្លាយជាការពិត។

បណ្តាក្រុមហ៊ុនផ្សេងទៀត រួមទាំងក្រុមហ៊ុនអាមេរិក Google និងក្រុមហ៊ុនកូរ៉េខាងត្បូង Samsung ក៏កំពុងព្យាយាមធ្វើការលើការផលិតវ៉ែនតាឆ្លាតវៃ ដែលដំណើរការដោយបញ្ញាសិប្បនិម្មិត (AI) ផ្ទាល់ខ្លួនរបស់ពួកគេផងដែរ ក្នុងគោលបំណងដូចគ្នាដើម្បីចូលមកជំនួសស្មាតហ្វូន។

វ៉ែនតាឆ្លាតវៃនឹងមិនត្រឹមតែជាអេក្រង់ដែលបំពាក់ជាប់នឹងមុខរបស់អ្នកនោះទេ។ វ៉ែនតាទាំងនេះនឹងក្លាយជាជំនួយការផ្ទាល់ខ្លួនរបស់មនុស្ស ដែលដំណើរការដោយប្រព័ន្ធបច្ចេកវិទ្យា AI ។ អ្នកប្រើប្រាស់អាចធ្វើការបញ្ជាដោយសំឡេង ដោយមិនចាំបាច់ចុចប៉ះផ្ទៃអេក្រង់។

វ៉ែនតាឆ្លាតវៃក៏មានមុខងារបកប្រែភាសាយ៉ាងឆាប់រហ័ស ដែលអាចនឹងលុបបំបាត់របាំងភាសាចេញ។ វ៉ែនតាឆ្លាតវៃក៏អាចផ្តល់ព័ត៌មានជុំវិញពិភពលោកដោយស្វ័យប្រវត្តិ មុនពេលអ្នកប្រើប្រាស់សាកសួរទៅទៀត៕ប្រភព: The Daily Galaxy៕