ដោយៈ គង់ សូរិយា

    ភ្នំពេញៈ ​រដ្ឋាភិបាល​កម្ពុជាគ្រោងចំណាយថវិកាប្រមាណ១០ពាន់លានដុល្លារអាមេរិក សម្រាប់​​ឆ្នាំ​២០២៦ខាង​មុខ កើនឡើង​​ជិត៨ភាគរយ បើ​ធៀប​នឹង​ច្បាប់ហិរញ្ញវត្ថុឆ្នាំ២០២៥ ដែល​កំពុង​អនុវត្តន៍​នា​ពេល​នេះ​។

នេះបើយោង​តាម​សេចក្តីប្រកាសព័ត៌មានស្តីពី “លទ្ធផលកិច្ចប្រជុំពេញអង្គគណៈរដ្ឋមន្រ្តី” ដឹកនាំ​ដោយសម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាកាលពីសប្តាហ៍មុន។

យោង​តាមសេចក្តី​ប្រកាស​ព័ត៌មាន សេចក្តីព្រាងច្បាប់ស្តីពី​ហិរញ្ញវត្ថុ​សម្រាប់​ការ​គ្រប់​គ្រង​ឆ្នាំ​២០២៦ មានចំនួន​៦ ជំពូក និង១៥ មាត្រា ហើយ​ត្រូវបានរៀបចំឡើង ដោយផ្តល់អាទិភាពលើការពង្រឹងសមត្ថភាពការពារអធិបតេយ្យជាតិ និងបូរណភាពទឹកដី ការទ្រទ្រង់និរន្តរភាពនៃកិច្ចប្រតិបត្តិការរបស់ស្ថាប័នរដ្ឋ ការគាំទ្រការអនុវត្តអាទិភាពគោលនយោបាយសំខាន់ៗ ព្រមទាំងវិធានការកែទម្រង់គន្លឹះ និងជាក់ស្តែងនានា​ ដែលត្រូវបន្តអនុវត្តនៅក្នុងឆ្នាំ២០២៦ ជាពិសេសគាំទ្រការបន្តអនុវត្តកម្មវិធីគោលនយោបាយអាទិភាពទាំង៦ វិធានការគន្លឹះទាំង៥ និងអាទិភាពគន្លឹះទាំង៥ ដូចមានចែងក្នុងយុទ្ធសាស្ត្របញ្ចកោណ-ដំណាក់កាលទី១ ដើម្បីឆ្លើយតបទៅនឹងទិសដៅនៃការអភិវឌ្ឍរបស់កម្ពុជាក្នុងដំណាក់កាលថ្មី ទាំងក្នុងក្របខ័ណ្ឌផ្ទៃក្នុងប្រទេស ទាំងក្នុងក្របខ័ណ្ឌតំបន់ និងពិភពលោក។

សេចក្តី​ប្រកាស​ព័ត៌មានដដែល​​បញ្ជាក់​ថា ​រាជរដ្ឋាភិបាលគ្រោងចំណាយថវិការដ្ឋសរុបចំនួន៤០,៩១៣ប៊ីលានរៀល (ប្រហែល​ ១០,១ ប៊ីលាន​ដុល្លារ​អាមេរិក) ស្មើនឹង១៨,៨៥% នៃ ផ.ស.ស ឬកើនចំនួន ៧,៨% ធៀបនឹងច្បាប់ហិរញ្ញវត្ថុឆ្នាំ២០២៥។

សេចក្តី​ប្រកាស​ព័ត៌មាន​​បាន​បន្ត​ថា ​តាមការវាយតម្លៃសេដ្ឋកិច្ចកម្ពុជាត្រូវបានព្យាករថា នឹងសម្រេចបានកំណើនក្នុងរង្វង់៥,២% សម្រា ប់ឆ្នាំ២០២៥ និងប្រមាណ៥,០% សម្រាប់ឆ្នាំ២០២៦ ស្របពេលដែលផ.ស.ស. សម្រាប់មនុស្សម្នាក់ត្រូវបានរំពឹងថា នឹងកើនឡើងដល់ ៣០២០ ដុល្លារអាមេរិក​ បើធៀបនឹងប្រមាណ២៨៥៨ ដុល្លារអាមេរិកក្នុងឆ្នាំ២០២៥។

កំណើនសេដ្ឋកិច្ចឆ្នាំ២០២៦ ត្រូវបានគាំទ្រដោយវិស័យ និងអនុវិស័យជាចន្ទល់ជំរុញកំណើន រួមមាន ១. វិស័យឧស្សាហកម្ម ២. វិស័យសេវាកម្ម ៣ វិស័យកសិកម្ម ដែលបន្តគាំទ្រដោយអនុវិស័យនេ សាទ និងការចិញ្ចឹមសត្វ។ អត្រាអតិផរណាជាមធ្យម​ប្រចាំឆ្នាំត្រូវបានព្យាករថា នឹងស្ថិតក្នុងរង្វង់២,៨%៕

ដោយៈ គង់ សូរិយា

    ភ្នំពេញៈ រយៈពេលប៉ុន្មានឆ្នាំចុងក្រោយនេះ រដ្ឋាភិបាលបានវិនិយោគលើហេដ្ឋារចនាសម្ព័ន្ឋធំៗជាច្រើន ដើម្បីលើកកំពស់សេដ្ឋកិច្ចជាតិ និងសមាហរណកម្មខ្លួនឯងទៅក្នុងតំបន់។

ជាក់ស្តែងគំរោងហេដ្ឋារចនាសម្ព័ន្ឋធំៗចំនួន២ បាននិងកំពុងផ្តល់ផលប្រយោជន៍ដោយផ្ទាល់ និងប្រយោលដល់ប្រជាពលរដ្ឋមូលដ្ឋាន និងសេដ្ឋកិច្ច សង្គម។

កំពង់ផែទេសចរណ៍កែប-កោះទន្សាយ ដើរតួនាទីយ៉ាងសំខាន់ក្នុងការផ្តល់សេវាដឹកជញ្ជូនជូនអតិថិជន ក៏ដូចជាបង្កើតការងារធ្វើ និងបង្កើនជីវភាពរស់ជូនប្រជាពលរដ្ឋ នៅក្នុងខេត្តកែបទាំងមូល មានទីតាំងឋិតក្នុងភូមិសាស្រ្តឆ្នេរ ប្រកបដោយសម្រស់ធម្មជាតិដ៏ស្រស់ត្រកាល ជាមួយនឹងការកែលម្អក្រុង និងការសាងសង់ហេដ្ឋារចនាសម្ព័ន្ធថ្មីៗជាច្រើនបន្ថែមផងដែរ។

កំពង់ផែនេះ ត្រូវបានសម្ពោធបើកឱ្យប្រើប្រាស់ជាផ្លូវការ កាលពីថ្ងៃទី១៩ ខែមករា ឆ្នាំ២០២២ ដែលសាងសង់លើទីតាំងកំពង់ផែចាស់មានផ្ទៃក្រឡាសរុប៣៤៧០ ម៉ែត្រការ៉េ និងមានផ្លូវបេតុងចូលផែទំហំ ១៣មx១០០ម និងអគាររដ្ឋបាលទំហំ១០មx៣០ម ដោយរួមបញ្ចូលទាំងអគាររដ្ឋបាលលក់សំបុត្រ និងអគារអ្នកដំណើររង់ចាំ។

ចំណែកហេដ្ឋារចនាសម្ព័ន្ឋ នៅភូមិភាគកណ្តាលប្រទេស គឺស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ បានផ្តល់អត្ថប្រយោជន៍យ៉ាងធំធេង តាមរយៈការបង្ខិតចូលគ្នារវាងខេត្តកំពង់ចាម និងខេត្តត្បូងឃ្មុំ ជួយសម្រួល ដល់ការធ្វើដំណើររបស់បងប្អូនប្រជាពលរដ្ឋ បម្រើដល់ការដឹកជញ្ជូនទំនិញកសិផលទៅកាន់ទីផ្សារ ទាក់ទាញការវិនិយោគ លើកកម្ពស់ជីវភាពរស់នៅរបស់ប្រជាជន ជាពិសេសចូលរួមចំណែកដល់ការជំរុញកំណើនសេដ្ឋកិច្ចជាតិផងដែរ។

ស្ពាននេះ គឺជាស្ពានយុទ្ធសាស្ត្រមួយយ៉ាងសំខាន់ ក្នុងវិស័យដឹកជញ្ជូន មានប្រវែង១១៣១ម៉ែត្រ ទទឹង១៣,៥០ម៉ែត្រ ដោ​យតភ្ជាប់ស្រុកស្ទឹងត្រង់ ខេត្តកំពង់ចាម និងស្រុកក្រូចឆ្មារ ខេត្តត្បូងឃ្មុំ បានបើកការដ្ឋានសាងសង់ នាថ្ងៃទី៨ ខែកុម្ភៈ ឆ្នាំ២០១៨ និងបញ្ចប់ការសាងសង់ នាថ្ងៃទី២៣ ខែវិច្ឆិកា ឆ្នាំ២០២១៕

ដោយ: សហសេវិក
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនៅព្រឹកថ្ងៃចន្ទដើមសប្តាហ៍នេះ បន្ទាប់ពីសហរដ្ឋអាមេរិក និងប្រទេសចិន បានឈានដល់ក្របខ័ណ្ឌកិច្ចព្រមព្រៀងពាណិជ្ជកម្មនៅទីក្រុងគូឡាឡាំពួនៃប្រទេសម៉ាឡេសុី ដែលអាចបន្ធូរបន្ថយភាពតានតឹងរវាងប្រទេសមហាអំណាចទាំង២។

តួយ៉ាង តម្លៃមាស Spot Gold បានធ្លាក់ចុះ០,៨៨ភាគរយមកនៅត្រឹម៤.០៧៥ដុល្លារអាមេរិកក្នុងមួយអោន បន្ទាប់ពីបានបិទការជួញដូរត្រឹមទំហំទឹកប្រាក់ចំនួន៤១១១,៥២ដុល្លារអាមេរិកក្នុងមួយអោនកាលពីថ្ងៃសុក្រសប្តាហ៍មុន។

ជាមួុយគ្នានេះ តម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ១,១៥ភាគរយមកនៅត្រឹម៤០៩០,៣ដុល្លារក្នុងមួយអោនគិតត្រឹមម៉ោង៩:៥២នាទីព្រឹកដូចគ្នា បន្ទាប់ពីបានបិទការជួញដូរត្រឹមទំហំទឹកប្រាក់ចំនួន៤១៤៥,៦ដុល្លារក្នុងមួយអោនកាលពីថ្ងៃសុក្រសប្តាហ៍មុន៕