កម្ពុជារៀបចំកំណត់ទីតាំងតំបន់ធម្មជាតិសក្តានុពល ដើម្បីស្នើដាក់ចូលក្នុងបញ្ជីត្រៀមនៃបេតិកភណ្ឌពិភពលោករបស់អង្គការUNESCO

ដោយ៖ ប៊ី

ក្រចេះ៖ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានបញ្ជាក់ថា កម្ពុជាកំពុងសិក្សារៀបចំកំណត់ទីតាំងតំបន់ធម្មជាតិមានសក្តានុពលដើម្បីស្នើដាក់ចូលក្នុងបញ្ជីត្រៀមនៃបេតិកភណ្ឌពិភពលោករបស់អង្គការយូណេស្កូ (UNESCO)។ នេះបើយោងតាមការព័ត៌មានចេញផ្សាយដោយ ក្រសួងបរិស្ថាននៅថ្ងៃទី៥ ខែកញ្ញា ឆ្នាំ២០២០។

ការបញ្ជាក់បែបនេះ របស់លោក នេត្រ ភក្ត្រា បានធ្វើឡើងនៅព្រលប់ថ្ងៃទី៣ ខែកញ្ញា ឆ្នាំ២០២០នេះ ក្នុងឱកាសដែលលោកបានដឹកនាំក្រុមអ្នកសារព័ត៌មានចម្រុះស្ថាប័ន ចុះយកព័ត៌មាននៅរមណីយដ្ឋានព្រែកកាំពីមានទីតាំងស្ថិតនៅក្នុង ឃុំសំបុក ស្រុកចិត្របុរី ខេត្តក្រចេះ។

អ្នកនាំពាក្យក្រសួងបរិស្ថានរូបនេះ បានបញ្ជាក់យ៉ាងដូច្នេះថា “ខ្ញុំបញ្ជាក់ផងដែរ មិនមែនត្រឹមតែព្រែកកាំពី មួយទេដែលជាតំបន់អភិរក្សសត្វផ្សោត និងតំបន់ដែលនៅជុំវិញទន្លេមគង្គ ដែលជាកន្លែងជម្រកសត្វផ្សោត ដែលយើងបានសិក្សាប៉ុន្តែ មាន៤កន្លែងយើងធ្វើការសិក្សា ក៏ដូចជាចងក្រងឯកសារដើម្បីត្រៀមជាបញ្ជីត្រៀមស្នើសុំដាក់បញ្ជូលទៅក្នុងបញ្ជីបេតិកភណ្ឌពិភពលោក របស់អង្គការយូណេស្កូហ្នឹង មានគឺទី១៖ ព្រែកកាំពី, ទី២៖ ដែនជម្រកសត្វព្រៃព្រែកប្រសព្វ, ទី៣៖ តំបន់បេតិកភណ្ឌធម្មជាតិភ្នំត្បែង និងទី៤៖ តំបន់សហគមន៍ការពារធម្មជាតិត្មាតប៉ើយ”។

លោកក៏បានឱ្យដឹងដែលថារហូតមកដល់ពេលនេះ ក្រុមការងារដែលដឹកនាំដោយក្រសួងបរិស្ថាន បានធ្វើការងារចងក្រងនូវឯកសារមួយចំនួនហើយ និងកំពុងតែបន្តបន្ថែមទៀត ដើម្បីសិក្សានៅក្នុងតំបន់ព្រែកកាំនេះ ដើម្បីរៀបចំឱ្យបាននូវឯកសារទាំងឡាយណាឱ្យបានគ្រប់ជ្រុងជ្រោយ ជាពិសេសនៅតាមតំបន់ជាប់ទន្លេមេគង្គ ដែលជាជម្រករបស់សត្វផ្សោតជាដើម។

ថ្លែងប្រាប់អ្នកសារព័ត៌មាន នាឱកាសនេះដែរលោក នេត្រ ភក្ត្រា បានឱ្យដឹងថា ព្រែកកាំពី គឺជារមណីយដ្ឋានទេសចរណ៍ធម្មជាតិមួយដែលមានសម្រស់ទេសភាពទឹកទន្លេដ៏ស្រស់បំព្រង ហើយក៏ជាទីកន្លែងជម្រកដ៏សុខសាន្តសម្រាប់សត្វផ្សោតទន្លេមេគង្គចំនួន៩២ក្បាល។ ខណៈសព្វថ្ងៃព្រែកកាំពី កំពុងបានក្លាយទៅជាតំបន់លំហែកាយមួយដ៏ពេញនិយម និងល្បីឈ្មោះសម្រាប់ខេត្តក្រចេះ ហើយមានប្រជាប្រិយភាពទាក់ទាញភ្ញៀវទេសចរជាតិ និងអន្តរជាតិ មកទស្សនាច្រើនបំផុត គឺក្នុងរដូវប្រាំង។

លោកបានបន្ថែមទៀតថា សម្រាប់ប្រទេសកម្ពុជា ជាប្រទេសមួយក្នុងចំណោមប្រទេសចំនួន៣ នៅលើពិភពលោកដែលមានវត្តមានសត្វផ្សោតទឹកសាបរស់នៅចំនួន៩២ក្បាល ខណៈប្រទេសកម្ពុជា ជាមួយប្រទេសដែលមានចំនួនសត្វផ្សោតនេះច្រើនជាងគេផងដែរ។ ដោយឡែកប្រទេសចំនួន២ទៀត ដែលមានវត្តមានសត្វផ្សោតទឹកសាបនេះ គឺប្រទេសឥណ្ឌូនេស៊ី មានចំនួន និងប្រទេសភូមា។

ទី២៖ ដែនជម្រកសត្វព្រៃព្រែកប្រសព្វ ដែលមានផ្ទៃដី សរុបចំនួន ១២,៧៧០ហិកតា ស្ថិតក្នុងភូមិសាស្ត្រស្រុកព្រែកប្រសព្វ និងស្រុកសំបូរ ខេត្តក្រចេះ ដែលជាតំបន់ធម្មជាតិមួយរបស់កម្ពុជា មានវត្តមានសត្វក្តានរស់នៅ ដែលជាប្រភេទសត្វជិតផុតពូជនៅលើពិភពលោក ជាពិសេសតំបន់នេះមានវត្តមានប្រភេទសត្វកម្រផ្សេងៗទៀតជាដើម។

ទី៣៖ តំបន់បេតិកភណ្ឌធម្មជាតិភ្នំត្បែង បានបង្កើតឡើងកាលពីថ្ងៃទី១៣ ខែកញ្ញា ឆ្នាំ២០១៦ ដោយចំណាររបស់រាជរដ្ឋាភិបាលកម្ពុជា តាមរយៈសំណើរបស់រដ្ឋមន្ត្រីក្រសួងបរិស្ថាន តំបន់បេតិកភណ្ឌភ្នំត្បែង មានផ្ទៃដីប្រមាណ ២ម៉ឺន ៥ពាន់ហិកតា មានភូមិសាស្ត្រជាប់ស្រុកចំនួនបួន គឺស្រុកសង្គមថ្មី, ស្រុកគូលែន, ស្រុករវៀង និងក្រុងព្រះវិហារ។ តំបន់បេតិកភណ្ឌមួយនេះ មានភាពល្អឯកលើសម្រស់ធម្មជាតិដ៏ស្រស់ត្រកាល ទឹកជ្រោះចំនួន៣ដំណាក់តាំង ពីកំពូលរហូតជើងភ្នំ និងមានទេសភាពចំការចេករបស់ប្រជាពលរដ្ឋតាមដងផ្លូវទៅកាន់ភ្នំត្បែង ដែលមានកម្ពស់ប្រមាណ៤០០ម៉ែត្រ ដែលអ្នកធ្វើដំណើរត្រូវឆ្លងកាត់កាំជណ្តើរ១៣៨០កាំ។ មិនត្រឹមតែប៉ុណ្ណោះ ភ្នំត្បែងគឺជាទីតាំងប្រវត្តិសាស្ត្រដែលពលរដ្ឋកម្ពុជាគោរពបូជា ទីសក្ការៈ ទាំងនោះរួមមាន ថ្មបីដុំជាដើម។

បច្ចុប្បន្នតំបន់បេតិកភណ្ឌភ្នំត្បែង បានក្លាយជាទីចាប់អារម្មណ៍ របស់ភ្ញៀវ ទេសចរណ៍ ជាពិសេស យុវជន ក្នុងការ កំសាន្ត ចុងសប្តាហ៍ដោយការបោះតង់ជាក្រុម និងជាលក្ខណៈគ្រួសារជាដើម។

ទី៤៖ សហគមន៍ទេសចរណ៍ធម្មជាតិត្មាតប៉ើយ មានទីតាំងនៅភូមិត្មាតប៉ើយ ឃុំព្រីងធំ ស្រុកជាំក្សាន្ត ខេត្តព្រះវិហារ មានផ្ទៃដី១,៧៦០ហិកតា។ បច្ចុប្បន្ននេះ សត្វព្រៃសំខាន់ៗ នៅក្នុងសហគមន៍ត្មាតប៉ើយនេះ មានប្រមាណជាង១០ប្រភេទ ក្នុងនោះមានសត្វត្រយងយក្សដែលតំណាងឱ្យប្រទេសកម្ពុជា និងមានចំនួនជាង៥០០ក្បាល ហើយ ៩៩ភាគរយសត្វនេះមានវត្តមាននៅក្នុងក្នុងប្រទេសកម្ពុជា ក្នុងក្របខណ្ឌទូទាំងពិភពលោក, សត្វក្រៀល, សត្វត្រយងចង្កំកស, សត្វត្មាត ព្រមទាំងប្រភេទសត្វកម្រផ្សេងៗទៀតផងដែរ៕

ផ្លូវក្រវ៉ាត់ក្រុងសៀមរាបត្រូវបានជ្រើសរើសសាងសង់ជា ៤ គន្លង

ដោយវុត្ថា

ភ្នំពេញ៖តាមយោបល់និងរបាយការណ៍បណ្ដោះអាសន្នរបស់ក្រុមហ៊ុនទីប្រឹក្សាបច្ចេកទេសបានឱ្យដឹងថា ការសាងសង់ផ្លូវក្រវ៉ាត់ក្រុងសៀមរាបមានបីជម្រើស ដោយក្នុងនោះគួរសាងសង់ជាផ្លូវមាន៤គន្លង ដើម្បីឆ្លើយតបទៅនឹងទំហំចរាចរណ៍និងកំណើនសេដ្ឋកិច្ចនាពេលបច្ចុប្បន្ន និងអនាគត។

លោក សូរ វិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន នៅក្នុងកិច្ចប្រជុំពិនិត្យលើរបាយការណ៍បណ្តោះអាសន្ន  នៅថ្ងៃទី ៤ ខែកញ្ញា ឆ្នាំ ២០២០ម្សិលមិញនេះ ឱ្យដឹងថាការជ្រើសរើសខ្សែផ្លូវនៃការសិក្សា គម្រោងសាងសង់ផ្លូវក្រវ៉ាត់ទីក្រុងសៀមរាប ស្ថិតក្នុងក្របខណ្ឌកម្ចីមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF Loan)។

លោកបន្តថា ការឯកភាពយកការសាងសង់ផ្លូវក្រវ៉ាត់ក្រុងជម្រើសទី១ (សាងសង់ជាផ្លូវមាន៤គន្លង ) ដោយហេតុថាជម្រើសនេះមិនប៉ះពាល់ដល់តំបន់អភិរក្សរបស់អជ្ញាធរអប្សរា អាជ្ញាធរទន្លេសាប និងមានផលប៉ះពាល់ទ្រព្យសម្បត្តិរបស់ប្រជាពលរដ្ឋតិច ទោះបីជាផ្លូវវាងក្រុងជម្រើសទី១នេះឆ្ងាយពីទីក្រុងបន្តិចក្ដី។

ទោះជាយ៉ាងនេះក្ដី លោកបន្តថា ការជ្រើសរើសនេះ មិនមែនជាការសម្រេចចុងក្រោយឡើយ ដោយសារគម្រោងនេះត្រូវសិក្សាឱ្យបានលម្អិតបន្ថែមទៀត ដោយផ្ដោតជាសំខាន់ទៅលើផលប៉ះពាល់សង្គម សេដ្ឋកិច្ច និងថវិកាសម្រាប់សាងសង់។

លោកបន្តថា នេះគឺជាកិច្ចប្រជុំថ្នាក់បច្ចេកទេសរៀបចំឡើង ក្នុងគោលបំណងស្ដាប់ការធ្វើបទបង្ហាញរបស់ក្រុមហ៊ុនទីប្រឹក្សាបច្ចេកទេសអំពីលទ្ធផលនៃការសិក្សាលើគម្រោងសាងសង់ផ្លូវក្រវាត់ក្រុងសៀមរាប ក៏ដូចជាការប្រមូលធាតុចូលបន្ថែមទៀតពីភាគី និងស្ថាប័នពាក់ព័ន្ធ សំដៅឈានទៅធ្វើរបាយការណ៍បញ្ចប់នៃគម្រោងនេះ មុនពេលដាក់ជូនថ្នាក់ដឹកនាំសម្រេច។

លោករដ្ឋលេខាធិការក៏បានរំលឹកដែរថា ដោយឡែក សម្រាប់ គម្រោងធ្វើឱ្យប្រសើរឡើងវិញផ្លូវទាំង៣៨ខ្សែនៅក្នុងទីក្រុងសៀមរាប ទទួលបានគោលការណ៍ឯកភាពពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងកិច្ចប្រជុំគណៈរដ្ឋមន្ត្រីកាលពីម្សិលមិញនេះ ក្រោមការចំណាយថវិការបស់រដ្ឋចំនួន១៥០លានដុល្លារសម្រាប់ស្ដា ដើម្បីបង្កើនសោភ័ណភាព និងបង្កលក្ខណៈងាយស្រួលដល់ការធ្វើចរាចរណ៍ និងស័ក្ដិសមជាតំបន់ទេសចរណ៍ប្រចាំប្រទេស៕

ក្រុមហ៊ុន​អេស្បាញ នឹង​ផ្តល់​សេវា​ដំណោះស្រាយ​បច្ចេកវិទ្យា​បដិសណ្ឋាកិច្ច​នៅ​កម្ពុជា

ដោយ៖ ប៊ី

ភ្នំពេញ៖ ក្រុមហ៊ុន Amadeus បានប្រកាស​កិច្ចព្រមព្រៀង​ថ្មី​ជាមួយ​ក្រុមហ៊ុន Sunway Hotels & Resorts ដើម្បី​ផ្តល់នូវ​ដំណោះស្រាយ​បច្ចេកវិជ្ជា​ដ៏​ទូលំទូលាយ ដែល​អាចឱ្យ​ពួកគេ​ធ្វើឱ្យ​ប្រសើរឡើង​នូវ​ការ​កក់​ទុក និង​កម្មវិធី​យុទ្ធសាស្ត្រ​ទី​ទីផ្សារ​នៅ​ទូទាំង​អចលនទ្រព្យ​ទាំង ១១ របស់​ក្រុមហ៊ុន​សាន់វេ​នៅ​ប្រទេស​ម៉ាឡេស៊ី កម្ពុជា និង​វៀតណាម។

នេះ​គឺជា​ការ​ធ្វើឡើង​ពេលវេលា ព្រោះ​វិធីសាស្ត្រ​ជំរុញ​ទិន្នន័យ ដើម្បី​ទទួលបាន​ភ្ញៀវ និង​ការរក្សា​ភ្ញៀវ​គឺមាន​សារៈសំខាន់​ជាងពេលណាៗទាំងអស់។ នេះ​បើ​យោងតាម​ការស្រាវជ្រាវរ​បស់ Amadeus ដែលមាន​មូលដ្ឋាន​ប្រទេស​អេស្បាញថ្មីៗនេះ។

ការស្រាវជ្រាវ បាន​បង្ហាញថា ៧៦ភាគរយ នៃ​មេដឹកនាំ​ឧស្សាហកម្ម​បដិសណ្ឋារកិច្ច​ជាន់ខ្ពស់​នៅ​ទូទាំង​ពិភពលោក​កំពុង​រៀបចំ​ផែនការ​ដើម្បី​ទាក់ទាញ​ភ្ញៀវថ្មីៗ ដើម្បី​រកប្រាក់​ចំណូល​ដែល​កំពុង​រង​ផលប៉ះពាល់​ពី​អាជីវកម្ម​ធម្មតា​របស់​ពួកគេ ដោយ ៧៥ ភាគរយ​ចែករំលែក​ថា​ទិន្ន័យ​នឹងមាន​សារៈសំខាន់​ក្នុងការ​អនុវត្ត​ផែនការ​ស្តារឡើងវិញរ​បស់ អំឡុង​ជំងឺ​កូ​វីដ១៩ ។

លោក Dato ‘Tan Kia Loke នាយក​គ្រប់គ្រង​ជាន់ខ្ពស់​របស់​ក្រុមហ៊ុន​សាន់វេ​គ្រុប​ប្រចាំ​ការិយាល័យ​ប្រធាន បានឱ្យដឹងថា ក្នុងនាម​ជា​សណ្ឋាគារ​ឯករាជ្យ វា​អាចជា​ការប្រកួតប្រជែង​ដើម្បី​ប្រកួតប្រជែង​ជាមួយនឹង​ក្រុមហ៊ុន​យីហោធំៗ ដែលមាន​លទ្ធភាព​ទទួល​បាន​ធនធាន​បន្ថែមទៀត រួមទាំង​ការផ្តល់​បច្ចេកវិទ្យា​តាម​ស្តង់ដារ។

លោក បាន​បន្តថា “តាមរយៈ​ការអនុវត្ត​ដំណោះស្រាយ Amadeus នៅក្នុង​អាជីវកម្ម​របស់​យើង យើង​អាចអនុវត្ត​បច្ចេកវិទ្យា ដែល​ពាក់ព័ន្ធ​បំផុត​សម្រាប់​ដំណើរការ​របស់​យើង។ នេះ​ជាការ​បន្ថយ​ចំណាយ​ប្រតិបត្តិការ​ទូទៅ​របស់​យើង ស្របពេល​យើង​មានលទ្ធភាព​ប្រើប្រាស់​បច្ចេកវិទ្យា​នេះ យើង​ត្រូវការ​ផ្តល់ជូន​អតិថិជន​នូវ​សេវាកម្ម​ជាច្រើន​របស់​យើង” ។

ដំណោះស្រាយ​បច្ចេកវិទ្យា​បដិសណ្ឋារកិច្ច​របស់​ក្រុមហ៊ុន Amadeus ធ្វើឱ្យ​ក្រុមហ៊ុន​អាច​ផ្តល់​សេវាកម្ម​ផ្ទាល់ខ្លួន​ខ្ពស់​ដល់​ភ្ញៀវ​របស់ខ្លួន។ លោក Dato ‘KL Tan បន្តថា “ក្នុងនាម​ជា​ក្រុម​សណ្ឋាគារ​ដែលមាន​មន្ទា​ប់ និង​វីឡា​ដាច់ដោយឡែក​ជាង ៣.៣០០ ដែលមាន​រួមមាន​ទាំង​អ​កន្លែង​ប្រជុំ​សន្និបាត​តម្រូវការ និង​តំរូវការ​របស់​ភ្ញៀវ​យើង​មាន​ភាពខុស​គ្នាច្រើន​នៅ​ទូទាំង​សណ្ឋាគារ​ទាំងអស់។

លោក បានឱ្យដឹងថា “តាមរយៈ​ការបង្រួបបង្រួម​ទិន្នន័យ​របស់​ភ្ញៀវ​ទាំងអស់ និង​ការ​ផ្តល់នូវ​ការយល់ដឹង​ដ៏​មានតម្លៃ​លើ​ប្រវត្តិរូប​របស់​បុគ្គលនីមួយៗ ដំណោះស្រាយ​បច្ចេកវិទ្យា​នេះ​អនុញ្ញាតឱ្យ​យើង​បង្កើត​បទពិសោធន៍ និង​ផ្ទាល់ខ្លួន ដែល​គួរ​ចងចាំ​ដែ ដើម្បី​ទាក់ទាញ​ការវិលត្រឡប់​របស់​ភ្ញៀវ” ៕

ផលប៉ះពាល់​គម្រោង​សាងសង់​ខ្សែ​បញ្ជូន​អគ្គិសនី ២៣០គីឡូវ៉ុល នៅ​ខេត្ត​ឧ​ត្ត​រ​មានជ័យ​ចាប់ផ្តើម​ដោះស្រាយ

ដោយ ៖ វុត្ថា

ឧ​ត្ត​រ​មានជ័យ ៖ ផលប៉ះពាល់​រវាង​ប្រជាពលរដ្ឋ​ក្នុង​តំបន់​ស្រុក​ត្រពាំង​ប្រា​ទ ខេត្ត​ឧ​ត្ត​រ​មានជ័យ ជាមួយ​គម្រោង​សាងសង់​ស្ថានីយ និង​បណ្តាញ​បញ្ជូន​អគ្គិសនី​កម្លាំង ២៣០គីឡូវ៉ុល មកកាន់​ខេត្តសៀមរាប ត្រូវបាន​រដ្ឋបាលខេត្ត​ចាប់ផ្តើម​ដំណើរ​ដោះស្រាយ​ជាជំហានៗហើយ។

នៅ​រសៀល​ថ្ងៃទី៤ ខែកញ្ញា ឆ្នាំ២០២០ រដ្ឋបាលខេត្ត​ឧ​ត្ត​រ​មានជ័យ និង​តំណាង​ក្រុមហ៊ុន​វិនិយោគ រួមទាំង​មន្ត្រី​ជំនាញ​មន្ទីរ​ពាក់ព័ន្ធ​បាន​បើក​កិច្ចពិភាក្សា​ស្តីពី​ការដោះស្រាយ​ផលប៉ះពាល់​ដីធ្លី សំណង់ផ្ទះ​សំបែង ដើមឈើ របស់​ប្រជាពលរដ្ឋ សម្រាប់​គម្រោង​សាងសង់​ខ្សែ​បញ្ជូន​អគ្គិសនី ២៣០គីឡូវ៉ុល ពី​រោងចក្រ អគ្គិសនី​ដុត​ធ្យូងថ្ម នៅ​ខេត្ត​ឧ​ត្ត​រ​មានជ័យ ទៅ​អនុ​ស្ថានីយ៍​អគ្គិសនី​សៀមរាប។

គម្រោង​ខាងលើនេះ​ត្រូវបាន​វិនិយោគ​ដោយ​ក្រុមហ៊ុន Han Seng Coal Mines Co., Ltd ជាមួយនឹង​ទុនវិនិយោគ​ជិត ៣០០ លាន​ដុល្លារ ដែល​គ្រោង​នឹង​ដាក់ឱ្យ​ដំណើរការ​នៅ​ចុងឆ្នាំ ២០២១ ។

លោក វិចទ័រ ហ្សូ​នា អគ្គនាយក​នៃ​អគ្គនាយកដ្ឋាន​ថាមពល ក្រសួង​រ៉ែ និង​ថាមពល ធ្លាប់បាន​ប្រាប់​ដឹង​ទៀតថា គម្រោង​រោងចក្រ​អគ្គិសនី​ដុត​ធ្យូង​របស់​ក្រុមហ៊ុន Han Seng Coal Mines Co., Ltd មាន​ទុនវិនិយោគ​ចំនួន ២៩៤,៣ លាន​ដុល្លារ នឹងដាក់​ឲ្យ​ដំណើរការ​នៅ​ចុងឆ្នាំ ២០២១ ដើម្បី​បង្កើន​សមត្ថភាព​ផ្គត់ផ្គង់​អគ្គិសនី​នៅ​កម្ពុជា ខណៈដែល​កំណើន​នៃ​ការផ្គត់ផ្គង់​ថាមពល​ដែល​ផលិត​ក្នុងស្រុក​នឹង​កើនឡើង ពិសេស​ចាប់ពី​ឆ្នាំ ២០២១ តទៅ។

លោក​ថ្លែងថា “ការបង្កើន​ការផ្គត់ផ្គង់​ថាមពល​គឺជា​គោលការណ៍​នៃ​ការអភិវឌ្ឍ​វិស័យ​ឧស្សាហកម្ម កសិកម្ម និង​វិស័យផ្សេងៗទៀត​ដែលជា​ស្នូល និង​មូលដ្ឋានគ្រឹះ​ក្នុងការ​បង្កើត​ការងារ​សម្រាប់​ប្រជាជន​ខ្មែរ។ នា​រយៈពេល ២-៣ ឆ្នាំ​ចុង​ក្រោយនេះ ដើម្បី​បំពេញតម្រូវការ​ដែលមាន​កំណើន​ដ៏​ខ្ពស់ កម្ពុជា​បាន​នាំចូល​ថាមពល​អគ្គិសនី​ពី​ប្រទេស ថៃ ឡាវ និង​វៀតណាម​ក្នុង​បរិមាណ​ចន្លោះ​ពី ៤៦០-៥០០ មេ​ហ្គា​វ៉ា​ត់​ក្នុង​មួយឆ្នាំ” ។

ជាមួយគ្នានេះ រដ្ឋាភិបាល​ក៏មាន​ផែនការ​ពង្រីក​ការវិនិយោគ​លើ​ការផលិត​ថាមពល​បន្ថែម​ទៀតផង​ដែរ ហើយ​ចាប់​ឆ្នាំ ២០២៣ ទៅ​កម្ពុជា​ក៏មាន​ផែនការ​កាត់បន្ថយ​ការ​នាំចូល​ថាមពល​ពី​បរទេស​ឲ្យ​មក​នៅក្នុង​រង្វង់ ៣០០ មេ​ហ្គា​វ៉ា​ត់​ក្នុង​មួយឆ្នាំ៕

ចំណេះដឹង! តើ​ការ​បំពេញបែបបទ​បញ្ចេញ​ទំនិញ​នាំចេញ​មាន​និតិ​វិធី​ដូចម្តេច?

ដោយ វុត្ថា

ភ្នំពេញ៖ សាខាគយ និង​រដ្ឋាករ​នាំចេញ​មានមុខ​ងារ និង​ភារកិច្ច​ធ្វើជា​សេនាធិការ​ឲ្យ អគ្គនាយកដ្ឋាន​គយ និង​រដ្ឋាករ​កម្ពុជា លើ​ការងារ​បំពេញបែបបទ គយ​លើ​ទំនិញ​នាំចេញ​ស្ថិតក្រោម​រូបភាព​វិនិយោគ និង​ការងារ​ផ្សេងទៀត​ដូច​មានចែង​ក្នុង​ប្រការ៤ នៃ​ប្រកា​សលេខ ៣៨៩ សហវ.ប្រក ចុះ​ថ្ងៃទី១៧ ខែមិថុនា ឆ្នាំ២០១០ ។

អគ្គនាយកដ្ឋាន​គយ និង​រដ្ឋាករ​កម្ពុជា បញ្ជាក់ថា ការត្រួតពិនិត្យ​រូបវ័ន្ត​ទំនិញ​នាំចេញ​នៅ​សាខាគយ​និង​រដ្ឋាករ​នាំចេញ ត្រូវធ្វើឡើង​តែម្តង​រួមគ្នា​រវាង​មន្ត្រី​គយ​និង​រដ្ឋាករ និង​មន្ត្រី​កាំកុងត្រូល លើ​ទម្រង់​ឯកសារ​ត្រួតពិនិត្យ​តែមួយ​រួមគ្នា គឺកំណត់​ហេតុ​រួម​ស្តីពី​ការត្រួតពិនិត្យ​ទំនិញ​វាយនភ័ណ្ឌ​នាំចេញ ។

ទំនិញ​នាំចេញ​ដែលជា​កម្មវត្ថុ​នៃ​ការធ្វើ​បែបបទ​គយ​នាំចេញ​នៅ​សាខាគយ​និង​រដ្ឋាករ​នាំចេញ គឺជា​ទំនិញ នាំចេញ​ស្ថិត​ក្រោមរូបភាព​វិនិយោគ​នៅតាម​បណ្តា​សន្និធិ​គយ​បណ្ដោះអាសន្ន និង/ឬ អាជីវ​កម្មដ្ឋាន​នានា របស់​វិនិយោគិន និង​ទំនិញ​នាំចេញ​ផ្សេងទៀត តាម​ការកំណត់​របស់ អគ្គនាយកដ្ឋាន​គយ និង​រដ្ឋាករ​កម្ពុជា ។

ក្រោយពេល​ត្រួតពិនិត្យ​រូបវ័ន្ត​ទំនិញ​ផ្ទុក​ក្នុង​កុងតឺន័រ​រួចរាល់ មន្ត្រី​គយ​នៃ​សាខាគយ​និង​រដ្ឋាករ​នាំចេញ និង​មន្ត្រី​កាំកុងត្រូល​ធ្វើការ​កិប​សៀ​ល​គយ និង​សៀ​ល​កាំកុងត្រូលរៀងៗខ្លួន ។  សៀ​ល​គយ​នាំចេញ​កិប នៅ​ផ្នែក​ខាងស្តាំ​នៃ​ទ្វារ​កុងតឺន័រ នឹងត្រូវ​កាត់ចេញ​វិញ​មុនពេល​លើកឡើង​មធ្យោបាយ​ដឹកជញ្ជូន​នាំចេញ ដោយ​មន្ត្រី​គយ​និង​រដ្ឋាករ​មាន​សមត្ថកិច្ច​នៅ​មាត់​ច្រកចេញ ក្រោយពេល​ពិនិត្យ​ផ្ទៀងផ្ទាត់​លេខ​សៀ​ល ជាក់ស្តែង និង​ឯកសារ​គយ​នាំចេញ (សេចក្តីណែនាំ​លេខ ៨២២គ.រ ចុះ​ថ្ងៃទី១២  ខែវិច្ឆិកា ឆ្នាំ២០០៣) ៕

ខណ្ឌច្បារអំពៅ តំបន់ផ្លូវ ១១៤(ផ្លូវរោងចក្រថៃហ្គ័រ)ចាប់ផ្តើមក្លាយជាទីបណ្តុំលំនៅដ្ឋានទាន់សម័យ

ដោយ ៖ រ៉ាណេត

ភ្នំពេញ ៖ ធ្លាប់តែជាតំបន់ដែលអមសងខាងផ្លូវដោយចំការបន្លែ ផ្លែឈើធម្មជាតិ និងសួនផ្កា ផ្លូវជាតិ១១៤ (ផ្លូវរោងចក្រស្រាបៀរថៃហ្គ័រ) ឬផ្លូវក្រវ៉ាត់ក្រុងទី២ នៅពេលនេះបានក្លាយទៅជាតំបន់ដែលមានភាពទាក់ទាញក្នុងការវិនិយោគ និងអភិវឌ្ឍន៍វិស័យលំនៅដ្ឋានបែបទាន់សម័យដោយមានតម្លៃចាប់ពីជាង១០ម៉ឺនដុល្លារឡើងទៅ។

អ្នកជំនាញអចលនទ្រព្យកម្ពុជា បានមានប្រសាសន៍ប្រាប់តាមទូរស័ព្ទនៅរសៀលថ្ងៃទី៤ ខែកញ្ញា ឆ្នាំ២០២០នេះថា បច្ចុប្បន្ននេះ តំបន់ដែលស្ថិតនៅក្បែរផ្លូវក្រវ៉ាត់ក្រុងទី២ ឬផ្លូវលេខ១១៤ (ផ្លូវរោងចក្រស្រាបៀរថៃហ្គ័រ) មិនមែនត្រឹមតែជាតំបន់ដែលពោរពេញទៅដោយចំការស្វាយ ចំការផ្កា និងបន្លែស្រស់ទៀតនោះទេ ជាក់ស្ដែងពេលនេះទីតាំងមួយនេះត្រូវបានចាក់ដីបំពេញ និងជំនួសដោយវត្តមានសំណងលំនៅដ្ឋានស្អេកស្កះ។

លោកស្រីបានបន្តថា “ចាប់ពីចំណុចស្តុបបំបែកចេញពីផ្លូវជាតិលេខ១ ដែលស្ថិតនៅសងខាងផ្លូវ១១៤ ឬផ្លូវក្រវ៉ាត់ក្រុងទី២ (ផ្លូវរោងចក្រស្រាបៀរថៃហ្គ័រ) នេះ ភាគច្រើនមានសំណង់ផ្ទះវីឡាធំៗ និងគម្រោងសាងសង់បណ្តុំលំនៅដ្ឋានជាច្រើន ហើយក្នុងនោះក៏មានសំណង់បុរីដែលកំពុងអភិវឌ្ឍន៍លំនៅដ្ឋានជាច្រើនផងដែរ៕

លោកស្រីបន្តថា “នៅតំបន់នេះមានលក្ខខណ្ឌល្អជាច្រើនដែលអំណោយផលដល់ការរស់នៅ ព្រោះផ្លូវ១១៤ បានប្រែក្លាយជាផ្លូវសេដ្ឋកិច្ចយ៉ាងប្រសើរ និងងាយស្រួលធ្វើដំណើរ ដោយគ្រាន់តែចំណាយពេលជាង១០នាទីតាមផ្លូវជាតិលេខ១ ឬក៏អាចធ្វើដំណើរតាមក្រុងតាខ្មៅក៏ចំណាយពេលជាង១០នាទីដូចគ្នាឆ្លងតាមស្ពានព្រែកសំរោង នោះអាចបន្តឆ្ពោះទៅផ្លូវ៦០ម៉ែត្រ ទៅដល់ផ្សារទំនើបអ៉ីអនម៉ល៣ និងងាយស្រួលចេញទៅតាមបណ្តាខេត្តផ្សេងៗក៏បាន”។

បើតាមការបញ្ជាក់ពីសំណាក់អ្នកជំនាញអចលនទ្រព្យកម្ពុជាបានឱ្យដឹងថា បច្ចុប្បន្ននៅតំបន់ក្បែរផ្លូវ១១៤នេះមានគម្រោងបុរីលំនៅដ្ឋានជាច្រើនកំពុងសាងសង់យ៉ាងមមាញឹក ជាពិសេស បុរី គីម ស័ង ដែលគេមើលឃើញថាកំពុងមានសកម្មភាពសាងសង់យ៉ាងសកម្មនៅលើដីទំហំប្រមាណ៥ហិចតា ជាប្រភេទវីឡាកូនកាត់ វីឡាភ្លោះ និងប្រភេទហ្សបហោស៍ ស្ថិតនៅតាមបណ្តោយផ្លូវលេខ១១៤នេះតែម្ដង ចម្ងាយប្រមាណ៥០ម៉ែត្រពីរោងចក្រផលិតស្រាបៀរថៃហ្គ័រ និងក្បែរទីលានវាយកូនហ្គោលរបស់ក្រុមហ៊ុនវឌ្ឍនៈដែលកំពុងអភិវឌ្ឍន៍។

ហេតុផលសំខាន់ដែលជំរុញឱ្យបណ្តាក្រុមហ៊ុនអភិវឌ្ឍបុរីសំណង់លំនៅដ្ឋានជាច្រើនចូលមកកាន់តំបន់នេះក៏ព្រោះតែភាពអំណោយផលជាច្រើន ដូចជា ជាតំបន់បៃតង មានទន្លេពីរអមសងខាង ល្អសម្រាប់ការរស់នៅប្រកបដោយផាកសុខភាព និងមានវិសាលភាពធំទូលាយងាយស្រួលអភិវឌ្ឍន៍ ជាពិសេស មានហេដ្ឋារចនាសម្ព័ន្ធផ្លូវថ្នល់ជាច្រើនអនុគ្រោះដល់ការធ្វើចរាចរណ៍ ហើយនៅថ្ងៃខាងមុខនេះ តម្លៃអចលនទ្រព្យនៅតំបន់នេះនឹងមានសន្ទុះឡើងថ្លៃជាមិនខាន។

លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal ធ្លាប់បានមានប្រសាសន៍ថា ស្ទើរតែគ្រប់តំបន់ជាយក្រុងទាំងអស់សុទ្ធតែមានតម្រូវការទីផ្សារ និងសកម្មភាពអភិវឌ្ឍន៍ទាំងអស់ ជាពិសេសការអភិវឌ្ឍន៍ក្នុងវិស័យលំនៅដ្ឋាន
លោកឧកញ៉ាបានមានប្រសាសន៍បន្តទៀតថា “សម្រាប់នៅតំបន់ផ្លូវជាតិ១១៤ (ផ្លូវរោងចក្រស្រាបៀរថៃហ្គ័រ) ដូចដែលបានលើកឡើងខាងលើ បច្ចុប្បន្នពិតជាមានសកម្មភាពសាងសង់សំណង់លំនៅដ្ឋានច្រើនជាងឆ្នាំកន្លងទៅ ដែលជាការបង្ហាញឱ្យឃើញពីកាលានុវត្តភាព និងភាពអភិវឌ្ឍសេដ្ឋកិច្ចនៅកម្ពុជា ក្រោមគោលនយោបាយរបស់រាជរដ្ឋាភិបាល ដែលជំរុញ និងលើកទឹកចិត្តដល់បណ្តាអ្នកវិនិយោគនានានៃវិស័យឯកជន”។

លោកឧកញ៉ាបញ្ជាក់ថា “ការបង្ហាញវត្តមាន និងសកម្មភាពសាងសង់សំណង់លំនៅដ្ឋានទាំងនេះ ជាការអនុវត្តទៅតាមគម្រោង និងផែនការរបស់អ្នកអភិវឌ្ឍន៍ ប៉ុន្តែសម្រាប់តម្លៃនៃអចលនទ្រព្យ ជាពិសេសដីធ្លីនៅតំបន់នេះ ហាក់ឈានដល់ចំណុចមួយខ្ពស់រួចទៅហើយ”។

ជាមួយនឹងការលើកឡើងខាងលើនេះ លោកឧកញ៉ា នួន រិទ្ធី ក៏បានបញ្ជាក់ថា ពេលនេះតំបន់ដែលស្ថិតនៅតាមបណ្តោយផ្លូវ១១៤ ឬផ្លូវក្រវ៉ាត់ក្រុងទី២នេះ នៅតែផ្តល់ឱកាសល្អសម្រាប់អ្នកវិនិយោគ និងអភិវឌ្ឍន៍ក្នុងវិស័យលំនៅដ្ឋាន មិនថាពេលនេះ ឬ ៣-៥ឆ្នាំ ខាងមុខទៀត៕

 

កម្ពុជា-អាមេរិក ត្រៀមរៀបចំកិច្ចប្រជុំប្រឹក្សាចម្រុះក្របខណ្ឌពាណិជ្ជកម្ម និងវិនិយោគនៅពេលខាងមុខនេះ

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា តាមរយៈក្រសួងពាណិជ្ជកម្ម ត្រៀមបើកកិច្ចប្រជុំប្រឹក្សាចម្រុះក្របខណ្ឌពាណិជ្ជកម្ម និងវិនិយោគពិភាក្សាទ្វេភាគីរវាងកម្ពុជា និងសហរដ្ឋអាមេរិក នៅពេលខាងមុខ ដើម្បីពង្រឹងទំនាក់ទំនងពាណិជ្ជកម្ម និងវិនិយោគរវាងប្រទេសទាំងពីរ។

នៅក្នុងកិច្ចពិភាក្សារវាងរដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្ដិ និងលោក ប៉ាទ្រីក មើហ្វី (W. Patrick Murphy) ឯកអគ្គរដ្ឋទូតសហរដ្ឋអាមេ

រិកប្រចាំនៅកម្ពុជា នៅថ្ងៃទី៣ ខែកញ្ញា ឆ្នាំ២០២០ បានលើកឡើងពីសក្តានុពលពាណិជ្ជកម្មទ្វេភាគី ដែលបានកើនឡើងពី ៣,៣ ពាន់លានដុល្លារអាមេរិកក្នុងឆ្នាំ២០១៨ មកដល់ ៤,៧ពានលានដុល្លារអាមេរិកក្នុងឆ្នាំ២០១៩ ក្នុងអាត្រាកំណើនប្រមាណ ៤២ ភាគរយ។

លោករដ្ឋមន្ត្រីពាណិជ្ជកម្ម ប៉ាន សូរស័ក្ដិ ក៏បានលើកឡើងពីវឌ្ឍនភាពនៃកំណែទម្រង់ស៊ីជម្រៅរបស់រាជរដ្ឋាភិបាលកម្ពុជា ទាំងក្នុងក្របខ័ណ្ឌស្ថាប័ន និងគតិយុត្តិ ដែលធានាបង្កើនបរិយាកាសធុរកិច្ច និងវិនិយោគឱ្យកាន់តែប្រសើរនៅកម្ពុជា ជាពិសេស ការចូលជាធរមាននៃច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក និងការបង្កើតអនុក្រឹត និងបទបញ្ញត្តិពាក់ព័ន្ធ និងបានស្នើភាគីអាមេរិកបន្តជំរុញវិនិយោគិនរបស់ខ្លួនមកធ្វើធុរកិច្ច និងវិនិយោគក្នុងវិស័យពាណិជ្ជកម្មតាមប្រព័ន្ធអេឡិចត្រូនិកនេះឱ្យបានកាន់តែច្រើន។

ជាលទ្ធផលនៃកិច្ចប្រជុំពិភាក្សាខាងលើនេះ តំណាងរដ្ឋាភិបាលនៃប្រទេសទាំង២ បានសម្តែងនូវសុទិដ្ឋិនិយមក្នុងកិច្ចសហប្រតិបត្តិការរវាងរួមគ្នា ជាពិសេសក្នុងវិស័យពាណិជ្ជកម្ម និងវិនិយោគ ហើយថែមទាំងបានឯកភាពជាបឋមក្នុងការរៀបចំកិច្ចប្រជុំក្រុមប្រឹក្សាចម្រុះក្របខ័ណ្ឌពាណិជ្ជកម្ម និងវិនិយោគកម្ពុជា-អាមេរិកលើកទី៦ តាមរយៈ Video Conference នៅពេលខាងមុខនេះ៕

ក្រុមហ៊ុនដ៏ធំលំដាប់ទី៣របស់កូរ៉េខាងត្បូងស្វែងដែគូវិនិយោគនៅកម្ពុជា

ដោយ ៖ វុត្ថា

កូរ៉េ ៖ ស្របពេលដែលកិច្ចព្រមព្រៀងពាណិជ្ជកម្មសេរីរវាងកម្ពុជា-កូរ៉េ ត្រូវបានបញ្ចប់ក្នុងដំណាក់ទី២ និងត្រៀមឈានចូលដល់ជុំទី៣នៅពេលឆាប់ៗខាងមុខនេះ ក្រុមហ៊ុនដ៏ធំលំដាប់ទី៣ នៅក្នុងប្រទេសកូរ៉េ បាន និងកំពុងចាប់អារម្មណ៍ស្វែងរកក្រុមហ៊ុនដៃគូវិនិយោគនៅកម្ពុជា។

ឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូងបានបញ្ជាក់នៅថ្ងៃទី៤ ខែកញ្ញា ឆ្នាំ២០២០នេះថា បច្ចុប្បន្នក្រៅពីមានបណ្តាក្រុមហ៊ុនកូរ៉េជាច្រើនដែលបានធ្វើកិច្ចសហការវិនិយោគ និងពាណិជ្ជកម្មរួមគ្នាជាមួយកម្ពុជារួចទៅហើយនោះ បច្ចុប្បន្នមានក្រុមហ៊ុនដ៏ធំមួយផ្សេងទៀតស្ថិតនៅលំដាប់ទី៣នៅក្នុងប្រទេសកូរ៉េ ក៏បានបង្ហាញពីចំណាប់អារម្មណ៍ចូលមកវិនិយោគនៅបន្ថែមនៅកម្ពុជាផងដែរ។

លោក ឡុង ឌីម៉ង់ បានបញ្ជាក់ថា “ថ្ងៃនេះមកចែចូវគេដល់កន្លែងទីស្នាក់ការកណ្ដាលក្រុមហ៊ុន GTG Wellness ដែលជាក្រុមហ៊ុនធំលំដាប់ទី៣របស់កូរ៉េដែលផលិតឧបករណ៍បរិក្ខារការពារ ព្យាបាល ថែទាំសម្រស់និងសុខភាព”។ លោកបានបន្តថា “ក្រុមហ៊ុននេះមានចំណាប់អារម្មណ៍ចាប់ដៃជាមួយដៃគូកម្ពុជាដើម្បីដំឡើងរោងចក្រផលិតស្រោមដៃកៅស៊ូ ព្រោះស្រោមដៃបច្ចុប្បន្ននេះនៅក្នុងពិភពលោកយើងមានតម្រូវការខ្ពស់ណាស់។ ជាមួយគ្នានេះ ស្ថាប័នជាតិពាក់ព័ន្ធសំខាន់ៗបានបញ្ជាក់ពីការត្រៀមខ្លួនក្នុងការសម្របសម្រួលជូនកិច្ចការវិនិយោគដ៏មានសារៈសំខាន់មួយនេះផងដែរ”។

យោងតាមទីភ្នាក់ងារសារព័ត៌មាន Yonhap របស់កូរ៉េខាងត្បូង បានឱ្យដឹងថា ពាណិជ្ជកម្មរវាងប្រទេសទាំងពីរបានឈានដល់កម្រិតខ្ពស់មួយ ដែលតម្លៃ ១ពាន់លានដុល្លារអាមេរិកក្នុងឆ្នាំ ២០១៩ កើនឡើង ៦ ភាគរយបើប្រៀបធៀបទៅនឹងឆ្នាំ២០១៨។ ប្រទេសកម្ពុជាបាននាំចេញផលិតផលមានតម្លៃ ៣៣៦ លានដុល្លារទៅកាន់ប្រទេសកូរ៉េខាងត្បូង និងនាំចូល ៦៩៧ លានដុល្លារពីប្រទេសកូរ៉េខាងត្បូង។ ប្រទេសកម្ពុជាគឺជាទិសដៅនាំចេញធំជាងគេទី ៥៨ របស់ប្រទេសកូរ៉េខាងត្បូង៕

តើសេដ្ឋកិច្ចមហាយក្សចិននិងនាំមុខសហរដ្ឋអាមេរិកនៅឆ្នាំ២០៣២មែនឬ ?

ដោយ៖ ប៊ី
ប៉េកាំង៖ ចិននឹងយកឈ្នះសហរដ្ឋអាមេរិក ដោយនឹងក្លាយជាមហាអំណាចសេដ្ឋកិច្ចលេខ១ នៅលើពិភពលោកនៅឆ្នាំ២០៣២ បើទោះភាពតានតឹងជាមួយសហរដ្ឋអាមេរិក នឹងនៅតែបន្តកើនឡើងយ៉ាងណាក៏ដោយ។ នេះបើយោងតាមការព្យាករណ៍របស់មជ្ឈមណ្ឌលស្រាវស្រាវការអភិវឌ្ឍ (DRC) នៃក្រុមប្រឹក្សារដ្ឋចិន មានមូលដ្ឋានក្នុងទីក្រុងប៉េកាំង។

ការព្យាករណ៍របស់ក្រុមអ្នកស្រាវជ្រាវមកពីមជ្ឈមណ្ឌល DRC ដែលចេញផ្សាយនៅក្នុងសប្ដាហ៍នេះ ធ្វើឡើងដោយផ្អែកលើភាពជោគជ័យ នៃយុទ្ធសាស្ត្រអភិវឌ្ឍថ្មីៗរបស់រដ្ឋាភិបាលចិន ដែលបាននិងកំពុងផ្ដោតជាសំខាន់ លើទីផ្សារនៅក្នុងស្រុក ជំរុញកំណើនសេដ្ឋកិច្ច និងការប្រកួតជែងខាងបច្ចេកវិទ្យា និងភូមិសាស្រ្តនយោបាយ ជាមួយសហរដ្ឋអាមេរិក។ នេះបើតាមការដកស្រង់ព័ត៌មានពី South China Morning Post នៅរសៀលថ្ងៃសុក្រ ទី០៤ ខែកញ្ញា ឆ្នាំ២០២០។

បើតាមការព្យាករណ៍ដដែល គ្មានកត្តាអ្វីអាចមកបង្អាក់ដំណើរ នៃកំណើនសេដ្ឋកិច្ចចិនបានឡើយ ដោយចំណែកទីផ្សាររបស់ចិន នៅក្នុងសេដ្ឋកិច្ចសកលនឹងកើនឡើងដល់ ១៨.១ភាគរយនៅក្នុងឆ្នាំ២០២៥ បើធៀបទៅនឹង ១៦.២ភាគរយកាលពីឆ្នាំ២០១៩ ខណៈចំណែក ឬភាគរយនៃសេដ្ឋកិច្ចសកលរបស់សហរដ្ឋអាមេរិក នឹងធ្លាក់ចុះ មកនៅត្រឹម ២១.៩ភាគរយនៅឆ្នាំ២០១៥ ធៀបទៅនឹង ២៤.១ភាគរយកាលពីឆ្នាំ២០១៩។ តែទន្ទឹមគ្នាកំណើនសេដ្ឋកិច្ចបែបនេះ នឹងធ្វើឱ្យជម្លោះរវាងចិន និងសហរដ្ឋអាមេរិក នឹងកើនឡើងរឹតតែខ្លាំង នៅរយៈពេល ០៥ឆ្នាំខាងមុខ។

កាលពីខែសីហាកន្លងទៅ លោក ចាស្ទីន លីន យីហ្វុ (Justin Lin Yifu) ជាសាស្ត្រាចារ្យម្នាក់មកពីសាកលវិទ្យាល័យប៉េកាំង និងជាអតីតប្រធានផ្នែកសេដ្ឋកិច្ច នៃធនាគារពិភពលោក ក៏បានព្យាករណ៍ដែរថា សេដ្ឋកិច្ចចិននឹងវ៉ាដាច់សហរដ្ឋអាមេរិកនៅឆ្នាំ២០៣០។ តែទោះបែបនេះក្ដី ក៏នៅមានមតិជាច្រើនយល់ថា ចិននឹងមិនអាចវ៉ាដាច់ សហរដ្ឋអាមេរិក ក្លាយជាមហាអំណាចសេដ្ឋកិច្ចលេខ ១ នៅលើពិភពលោកបានឡើយ ប្រសិនបើប្រជាជនចិនវ័យចំណាស់បន្តកើនឡើង ហើយទោះជាចិនធ្វើបានសម្រេចមែន ក៏វាគ្រាន់តែជាការវ៉ាដាច់ នៅរយៈពេលខ្លីប៉ុណ្ណោះ។

ផលិតផលសរុបស្រុក (GDP) របស់ចិនរំពឹងទុកថានឹងមានតម្លៃ ១៤.៤ ទ្រីលានដុល្លារ (១ទ្រីលាន ស្មើ ១,០០០,០០០,០០០,០០០) នៅក្នុងឆ្នាំ២០២០ ខណៈចំណូលប្រចាំឆ្នាំរបស់ប្រជាជនម្នាក់ៗ មាន ៦ ១៩២.៣៩ ដុល្លសារក្នុងឆ្នាំ២០១៩។ បច្ចុប្បន្ន ចិនមានចំនួនប្រជាជនជាង ១.៤៣ ពាន់លាននាក់នៅឆ្នាំ២០២០៕

សេដ្ឋកិច្ចរបស់ប្រទេសឈានមុខគេទីមួយក្នុងពិភពលោកកំពុងតែជួបឱនភាព

ដោយ ៖ ប៊ី

អន្តរជាតិ ៖ ក្បាលម៉ាស៊ីនសេដ្ឋកិច្ចរបស់សហរដ្ឋអាមេរិកកំពុងតែជិតអស់សាំងហើយ។ ការចំណាយរបស់អ្នកប្រើប្រាស់មានប្រហែល ៧០ ភាគរយនៃផលិតផលក្នុងស្រុកសរុបរបស់សហរដ្ឋអាមេរិក ដែលធ្វើឱ្យវាក្លាយជាកត្តាសំខាន់តែមួយគត់ ក្នុងការងើបឡើងវិញពីវិបត្តិសេដ្ឋកិច្ចអាក្រក់បំផុត។

ការចំណាយរបស់អ្នកប្រើប្រាស់នេះបានធ្លាក់ចុះ ១២,៩ភាគរយ ដែលមិនធ្លាប់មានពីមុននៅក្នុងខែមេសា ខណៈហាង និងភោជនីយដ្ឋាននៅទូទាំងប្រទេសបានបិទទ្វារ ហើយមនុស្សភាគច្រើនមិនបានចេញពីផ្ទះនោះទេ។

កញ្ចប់ជំនួយរបស់រដ្ឋាភិបាលអាមេរិកចំនួន ២,២ ទ្រីលានដុល្លារ (នៃ៣ ទ្រីលានដុល្លារ) រួមទាំងការទូទាត់ផ្ទាល់ដល់ ១២០០ ដុល្លារដល់គ្រួសារ និងប្រាក់បន្ថែមចំនួន ៦០០ ដុល្លារសម្រាប់អត្ថប្រយោជន៍ភាពអត់ការងារធ្វើប្រចាំសប្តាហ៍ បានជំរុញឱ្យមានការចាប់ផ្តើមនៃការងើបឡើងវិញនៃការចំណាយក្នុងខែឧសភា។ ប៉ុន្តែនៅពេលរដូវស្លឹកឈើជ្រុះខិតជិតមកដល់ដោយគ្មានសញ្ញានៃការបញ្ចប់នៃជំងឺរាតត្បាត និងជំនួយបន្ថែមដែលជាប់ទាក់ទងនៅក្នុងសភាអតិថិជនហាក់ដូចជាកំពុងថមថយម្តងទៀត។

អ្នកវិភាគ និងសេដ្ឋវិទូមានការព្រួយបារម្ភថា អ្នកប្រើប្រាស់ នឹងធ្លាក់ចុះហើយធ្លាក់ចុះម្តងទៀតដោយមិនមានថវិកាបន្ថែមពីរដ្ឋាភិបាល។ ជំនួយផ្ទាល់ចុងក្រោយ និងមូលនិធិសម្រាប់អ្នកគ្មានការងារធ្វើនៅជុំចុងក្រោយ បានជួយមនុស្សជាច្រើនបន្តបង់ថ្លៃឈ្នួល និងទិញរបស់ចាំបាច់។ ការទូទាត់ដោយផ្ទាល់ក៏បានជួយដល់មនុស្សជាច្រើន ដែលមិនត្រូវការពួកគេចាក់បញ្ចូលលុយចូលក្នុងសេដ្ឋកិច្ច ដោយជំរុញអាជីវកម្មជាច្រើនពីអ្នកលក់រាយសម្លៀកបំពាក់រហូតដល់ការកែលំអគេហដ្ឋាន និងលក់រាយគ្រឿងបន្លាស់រថយន្ត។
ខណៈដែលមនុស្សជាច្រើននៅ Wall Street រំពឹងថានឹងមានកញ្ចប់ជំនួយមួយចំនួន បន្ទាប់ពីសភាកោះប្រជុំកាលពីខែកញ្ញា។

លោក Brad McMillan ប្រធានផ្នែកវិនិយោគនៃក្រុមហ៊ុន Commonwealth Financial Network បានមានប្រសាសន៍ថា “វានៅតែត្រូវបានមើលឃើញថាតើយើងនឹងឃើញថា ការស្តារឡើងវិញនៅតែបន្ត ដូច្នេះការទូទាត់បន្ថែមទាំងនេះគួរបញ្ឈប់”។
យោងតាមសន្ទស្សន៍ទំនុកចិត្តអ្នកប្រើប្រាស់ ដែលត្រូវបានធ្វើឡើងដោយក្រុមហ៊ុន បានឱ្យដឹងថា ការភ័យខ្លាចដែលធ្វើឱ្យបិទទ្វារអាជីវកម្ម ដែលបង្កដោយដោយជំងឺCOVID-19 និងការបាត់បង់ការងារបានធ្វើឱ្យទំនុកចិត្តអតិថិជនធ្លាក់ចុះនៅក្នុងខែ មេសា។ វិសាលភាព និងផលប៉ះពាល់នៃជំងឺរាតត្បាត ដែលមិនប៉ាន់ប្រមាណបាន បានជំរុញឱ្យមនុស្សកាត់បន្ថយការចំណាយ ដែលពួកគេត្រូវការ និងផ្តោតអារម្មណ៍ទៅលើអ្វីដែលចាំបាច់ ខណៈពួកគេមិនចេញពីផ្ទះ។
ប៉ុន្តែការកើនឡើងនូវទំនុកចិត្តនៅក្នុងខែមិថុនា បានផ្តល់ក្តីសង្ឃឹមដល់អ្នកសេដ្ឋកិច្ចថា អ្នកប្រើប្រាស់
ចាប់ផ្តើមមានភាពធូរស្រាលក្នុងការចំណាយរបស់ពួកគេ។

ក្តីសង្ឃឹមទាំងនោះបានស្ងប់ទៅវិញ នៅពេលដែលភាពជឿជាក់បានបាត់បង់វិញនៅខែសីហា។
ទន្ទឹមនឹងនេះ ការជំរុញការចំណាយ ដែលត្រូវបានមើលឃើញនៅក្នុងខែឧសភា និងមិថុនាបានបង្កើនក្តីសង្ឃឹមសម្រាប់ការងើបឡើងវិញយ៉ាងខ្លាំង។ ប៉ុន្តែនៅក្នុងខែកក្កដាបង្ហាញថា ផ្លូវទៅកាន់ការស្តារឡើងវិញអាចនឹងមានការលំបាកជាងការគិតទុកជាមុន ជាពិសេសបើគ្មានជំនួយពីរដ្ឋាភិបាលទេ ហើយបើគ្មានវ៉ាក់សាំងដើម្បីបន្ថយការគំរាមកំហែងពីជំងឺរាតត្បាត នោះការងើបឡើងវិញនឹងបន្តជួបផលលំបាក៕ AP