រដ្ឋាភិបាលចិន នៅតែបន្តផ្តល់ជំនួយថ្មីបន្ថែមទៀតដល់កម្ពុជា

ដោយ ៖ វុត្ថា

ភ្នំពេញ៖ រដ្ឋាភិបាលប្រទេសចិនបានបង្ហាញពីគម្រោងផ្តល់ជំនួយដល់ប្រទេសកម្ពុជា ជាពិសេស សម្ភារៈបរិក្ខាពេទ្យជាច្រើនប្រភេទបន្ថែមទៀត សម្រាប់គាំទ្រក្នុងកិច្ចទប់ស្កាត់ជំងឺ Covid-19 ខណៈដែលកម្ពុជា នៅមានអ្នកឆ្លងនូវជំងឺនេះត្រឹមតែ ១នាក់ ក្នុងចំណោម ១២២នាក់ ដែលត្រូវបានព្យាបាលជាសះស្បើយ។

ស្ថានទូតចិនប្រចាំនៅកម្ពុជា បានផ្សព្វផ្សាយនៅព្រឹកថ្ងៃទី១២ ខែឧសភា ឆ្នាំ ២០២០នេះថា សម្ភារៈទប់ស្កាត់នឹងជំងឺ COVID-19 ដែលជាជំនួយថ្មីមួយទៀតរបស់ចិន នឹងមកដល់ប្រទេសកម្ពុជាជាបន្តបន្ទាប់ តាមរយៈការដឹកជញ្ជូនតាមផ្លូវអាកាស។

ស្ថានទូចចិនបានបញ្ជាក់ទៀតថា សម្ភារៈទាំងនោះរួមមានសារធាតុតេស្តរកជំងឺឆ្លង Covid-19 ចំនួន ៥០០១៦សម្រាប់ សម្លៀកបំពាក់ការពារចំនួន១៨០០០កំផ្លេ វ៉ែនតាការពារចំនួន ៣០០០០ និងប្រដាប់វាស់កម្ដៅចំនួន ២០០គ្រឿង ដែលសម្ភារៈទាំងនេះនឹងត្រូវបានទទួលដោយក្រសួងសុខាភិបាលកម្ពុជា។

លោក Wang Wentian ឯកអគ្គរដ្ឋទូតចិនប្រចាំកម្ពុជា ធ្លាប់បានឱ្យដឹងថា ចិន និងកម្ពុជា ជាសហគមន៍ជោគវាសនារួម ដែលរួមសុខរួមទុក្ខជាមួយគ្នា និងជាបងប្អូនល្អដែលប្រៀបដូចដៃ និងជើង ។ លោកបានបន្តថា ភាគីចិននឹងបន្តផ្តល់រាល់ជំនួយទៅតាមលទ្ធភាពជូនដល់ភាគីកម្ពុជាទាំងស្រុងក្នុងការប្រយុទ្ធប្រឆាំងយកជម្នះជាមួយនឹងជម្ងឺឆ្លងប្រភេទថ្មីនេះ។

លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជាបានឱ្យដឹងថា ក្រោយពីកម្ពុជាមានការផ្ទុះឡើងនូវជម្ងឺវីរុស COVID-19 ភាគីចិនបានជំនួយសម្ភារៈប្រយុទ្ធប្រឆាំងនឹងជម្ងឺវីរុសនេះជាច្រើន និងបានចាត់ក្រុមអ្នកជំនាញវេជ្ជសាស្ត្រចិន មកជួយបង្កើនជំនឿចិត្ត ក្នុងការប្រយុទ្ធប្រឆាំងនឹងជម្ងឺវីរុសជូនដល់កម្ពុជា។ លោកបន្តថា “ភាគីកម្ពុជានឹងចងចាំរាល់ការជួយរបស់ភាគីចិន ក្នុងក្រអៅបេះដូង នឹងសហការទំនាក់ទំនងជាមួយភាគីចិនយ៉ាងស្អិតល្មួត ដើម្បីយកជម្នះលើកិច្ចប្រយុទ្ធប្រឆាំងនឹងជម្ងឺវីរុសក្នុងពេលឆាប់ៗនេះ” ។

ចាប់តាំងពីមានកាផ្ទុះឡើងនូវជំងឺ Covid-19 នៅកម្ពុជាកន្លងមកនេះ រដ្ឋាភិបាលចិបានផ្តល់ជំនួសជាសម្ភារៈវិជ្ជសាស្ត្រ និងជំនួយជាសម្ភារៈជាច្រើនតោនដល់ក្រសួងការពារជាតិកម្ពុជា ក្រសួងសុខាភិបាល អង្គការសមាគម និងស្ថាប័នរដ្ឋនានា ដើម្បីចូលរួមទប់ស្កាត់ ការរីករាលដាលនូវជំងឺ Covid-19 នៅក្នុងប្រទេសកម្ពុជា៕

ក្រសួងទេសចរណ៍ថៃព្យាករណ៍ថា ចំនួនទេសចរបរទេសនឹងធ្លាក់ចុះជាង ៦០ភាគរយ ក្នុងឆ្នាំ ២០២០

ដោយ ៖ ហ្សូលី

បាងកក ៖ អាជ្ញាធរទេសចរណ៍ប្រទេសថៃ (TAT) បានធ្វើការព្យាករណ៍ថា ចំនួនភ្ញៀវទេសចរបរទេសនឹងធ្លាក់ចុះប្រមាណជាង ៦០ភាគរយ ដោយសារការរាតត្បតនៃវិបត្តិសកលលោក។

ចំនួនភ្ញៀវទេសចរបរទេសក្នុងប្រទេសថៃអាចនឹងធ្លាក់ចុះ ២ ភាគ ៣ ឫ នៅត្រឹម ១៤ លាននាក់នៅឆ្នាំ២០២០នេះ ដែលជាកម្រិតទាបបំផុតក្នុងរយៈពេល ១៤ ឆ្នាំចុងក្រោយនេះដោយសារការឆ្លងរាតត្បាតនៃជំងឺ COVID-19 ដែលជាហេតុនាំឱ្យប៉ះពាល់ដល់ការធ្វើដំណើររបស់ភ្ញៀវទេសចរទូទាំងពិភពលោក។ នេះបើតាមការប៉ាន់ស្មានពីអាជ្ញាធរទេសចរណ៍ថៃ (TAT) បានបង្ហាញកាលពីថ្ងៃចន្ទ ទី ១១ ខែឧសភា ឆ្នាំ ២០២០នេះ។

អាជ្ញាធរទេសចរណ៍ថៃព្យាករណ៍ថា នៅឆ្នាំ ២០២០នេះ នឹងមានភ្ញៀវទេសចរបរទេសចន្លោះពី ១៤ លាន ទៅ ១៦ លាននាក់តែប៉ុណ្ណោះដែលមកលេងប្រទេសថៃ។ ចំនួននេះមានការធ្លាក់ចុះយ៉ាងខ្លាំង បើប្រៀបធៀបកាលពីឆ្នាំ ២០១៩កន្លងទៅ មានភ្ញៀវទេសចរបរទេសដល់ទៅចំនួន ៣៩,៨ លាននាក់ ដែលបានមកទស្សនាប្រទេសស្ថិតក្នុងតំបន់អាស៊ីអាគ្នេយ៍មួយនេះ។

លោក Yuthasak Supasorn ប្រធានអាជ្ញាធរទេសចរណ៍ថៃមានសង្ឃឹមថា ភ្ញៀវទេសចរបរទេសនឹងវិលត្រឡប់មកប្រទេសថៃវិញនៅក្នុងខែតុលា ដែលជារដូវទេសចរណ៍របស់ប្រទេសខ្លួន។

វិស័យទេសចរណ៍មានសារសំខាន់ណាស់សម្រាប់ប្រទេសថៃ ដោយសារចំណូលបានមកពីភ្ញៀវទេសចរបរទេសមានចំនួន ១,៩៣ ទ្រីលានបាត (៥៩,៩៨ ពាន់លានដុល្លារ) ឬស្មើនឹង ១១ ភាគរយ នៃផលិតផលក្នុងស្រុកសរុបកាលពីឆ្នាំមុន៕

ក្រសួងពាណិជ្ជកម្ម ពិភាក្សាអំពីថ្លៃដើមផលិតកម្ម និងនាំចេញអង្ករកម្ពុជាទៅកាន់ទីផ្សារគោលដៅសហភាពអឺរ៉ុប

ដោយ ៖ រ៉ាណេត

ភ្នំពេញ ៖ ក្រសួងពាណិជ្ជកម្ម បានបើកកិច្ចប្រជុំពិភាក្សាលើរបាយការណ៍សិក្សាអំពីថ្លៃដើមផលិតកម្ម និងនាំចេញអង្ករកម្ពុជា (Rice Export Cost Study) ដើម្បីអាចទទួលបានគុណភាព ឧត្តមភាព និងភាពវិជ្ជមាននៃការនាំចេញទៅកាន់ទីផ្សារគោលដៅសំខាន់ៗ ជាពិសេសទីផ្សារសហភាពអឺរ៉ុប។

រដ្ឋលេខាធិការក្រសួងពាណិជ្ជកម្ម លោក សុខ សុភ័ក្ត្រ ដែលដឹកនាំកិច្ចប្រជុំក្រោមការការចូលរួមពីថ្នាក់ដឹកនាំ-មន្រ្តីជំនាញក្រសួងពាណិជ្ជកម្ម តំណាងសហព័ន្ធស្រូវអង្ករកម្ពុជា និងកម្មវិធីខ្សែច្រវ៉ាក់តម្លៃកសិកម្មកម្ពុជា (CAVAC) នៅទីស្តីការក្រសួងពាណិជ្ជកម្ម កាលពីថ្ងៃទី១១ ខែឧសភា ឆ្នាំ២០២០ បានមានប្រសាសន៍បញ្ជាក់ថា ការសិក្សា និងពិភាក្សាទៅលើថ្លៃដើមនៃផលិតកម្មមួយនេះគឺមានសារសំខាន់បំផុតសម្រាប់ទ្ធភាពនៃការនាំចេញអង្ករកម្ពុជាទៅកាន់ទីផ្សារអន្តរជាតិ។

លោក សុខ សុភ័ក្ត្រ បានស្នើឱ្យស្ថាប័នពាក់ព័ន្ធទាំងរដ្ឋ និងផ្នែកឯកជន បន្តសហការ និងធ្វើការរួមគ្នា ដើម្បីដោះស្រាយបញ្ហាប្រឈមនានាក្នុងវិស័យស្រូវ-អង្ករកម្ពុជា លើតម្លៃអង្ករនាំចេញ ហើយលោកនឹងបន្តរាយការណ៍អំពីបញ្ហាប្រឈមជូនថ្នាក់ដឹកនាំ និងស្នើសុំសេចក្តីសម្រេចពីថ្នាក់ដឹកនាំ ដើម្បីដោះស្រាយបញ្ហាប្រឈមទាំងនេះ។

គម្រោងសិក្សាថ្លៃដើមផលិតកម្ម និងនាំចេញអង្ករកម្ពុជានេះ ត្រូវបានស្នើឡើងដោយក្រសួងពាណិជ្ជកម្ម ក្រោមកិច្ចសហការនិងគាំទ្រផ្នែកបច្ចេកទេស និងហិរញ្ញវត្ថុពីអង្គការ «កម្មវិធីខ្សែច្រវ៉ាក់តម្លៃកសិកម្មកម្ពុជា» ឬ កាវ៉ាក់ (CAVAC) ដែលគម្រោងនេះមានបំណងរកឱ្យឃើញពីបញ្ហាប្រឈម ឧត្តមភាព ឬលទ្ធភាពពង្រឹងភាពប្រកួតប្រជែងបច្ចុប្បន្នរបស់វិស័យស្រូវ-អង្ករកម្ពុជា។

អង្គប្រជុំបានពិភាក្សាលើផ្នែកពាក់ព័ន្ធសំខាន់ៗដែលប៉ះពាល់ដល់តម្លៃនាំចេញអង្ករកម្ពុជារួមមាន ៖ អគ្គិសនី ដឹកជញ្ជូនពីឃ្លាំងទៅកំពង់ផែ ថ្លៃចំណាយនៅកំពង់ផែ ចំណាយលើការនាំចេញ ថ្លៃដឹកជញ្ជូនពីកំពង់ផែទៅប្រទេសគោលដៅ (នាំចូល) និងចំណាយពាក់ព័ន្ធផ្សេងៗទៀត។

ការសិក្សាបានផ្តោតសំខាន់លើភាពប្រកួតប្រជែងវិស័យស្រូវ-អង្ករកម្ពុជា ដោយវិភាគលើខ្សែច្រវ៉ាក់តម្លៃរបស់វិស័យស្រូវ-អង្ករ ចាប់តាំងពីការបង្កបង្កើនផល ការសម្ងួត និងកិន រហូតដល់ការនាំចេញដែលរួមទាំងការដឹកជញ្ជូន និងការរត់ការឯកសារផងដែរ សម្រាប់ការនាំចេញទៅកាន់ប្រទេសគោលដៅ (នាំចូល) នៅសហភាពអឺរ៉ុប និងបណ្តាប្រទេសផ្សេងទៀត។ របាយការណ៍នៃលទ្ធផលសិក្សានេះ នឹងផ្សព្វផ្សាយជូនវិស័យឯកជន និងបណ្តាក្រសួងស្ថាប័នពាក់ព័ន្ធ សំដៅដាក់ចេញផែនការ និងគោលនយោបាយអភិវឌ្ឍន៍វិស័យស្រូវ-អង្ករកម្ពុជា និងឈានទៅចាប់យកទីផ្សារអង្ករក្រៅប្រទេស៕

កម្ពុជាស្នើ 7-Eleven ដាក់លក់ផលិតផលខ្មែរឱ្យបាន ៥០%

ដោយវុត្ថា

បាងកក៖ ឯកអគ្គរាជទូតកម្ពុជាប្រចាំនៅក្នុងប្រទេសថៃ លោកអ៊ូក សោភ័ណ បានស្នើដល់ក្រុមហ៊ុន 7-Eleven Inc. ដែលគ្រោងនឹងបើកដំណើរនៅកម្ពុជានាពេលខាងមុខនេះ គោរពកិច្ចសន្យា ដោយប្រើប្រាស់បុគ្គលិកខ្មែរឱ្យបានច្រើន និងដាក់លក់ផលិតផលខ្មែរឱ្យបាន ៥០%។

នេះបើយោងតាមការផ្សព្វផ្សាយរបស់ស្ថានទូតកម្ពុជាប្រចំានៅក្នុងប្រទេសថៃស្តីពីលទ្ធផលជំនួបពិភាក្សាការងាររវាងលោកអ៊ូក សោភ័ណ ឯកអគ្គរាជទូតកម្ពុជាប្រចាំនៅថៃជាមួយលោក Chairoj Tiwatmuncharoen អនុប្រធានជាន់ខ្ពស់ក្រុមហ៊ុន CP ALL Plc. និងជាអគ្គនាយកក្រុមហ៊ុន CP ALL (Cambodia) Co., Ltd អំពីគម្រោងវិនិយោគហាងលក់ទំនិញ 7-Eleven នៅក្នុងប្រទេសកម្ពុជាកាលពីថ្ងៃទី ១១ ខែឧសភា ឆ្នាំ ២០២០ម្សិលមិញនេះ។

លោក អ៊ូក សោភ័ណ ឯកអគ្គរាជទូតកម្ពុជាសម្តែងការសាទរចំពោះក្រុមហ៊ុន CP ALL ដែលបានទទួលសិទ្ធិធ្វើអាជីវកម្មហ្វ្រេនឆាយពីក្រុមហ៊ុន 7-Eleven Inc. នៅជប៉ុន និងសហរដ្ឋអាមេរិក និងកម្ពុជាជាដើម។

លោក Chairoj Chairoj Tiwatmuncharoen បានគូសបញ្ជាក់ពីការប្តេជ្ញាចិត្តរបស់ក្រុមហ៊ុន ក្នុងការអនុវត្តពាក្យសន្យាខាងលើ និងបានស្នើសុំស្ថានទូតកម្ពុជា ជួយសម្របសម្រួលផ្តល់ព័ត៌មានអំពីផលិតផលខ្មែរ ដាក់បញ្ចូលក្នុងបញ្ជីមុខទំនិញសម្រាប់លក់នៅក្នុងសាខាដំបូងនៅកម្ពុជា។

ក្រុមហ៊ុន CP All Plc ដែលបានចុះបញ្ជីនៅថៃបានប្រកាសអំពីផែនការបើកហាងទំនិញខ្នាតតូចចំនួន ៧០០កន្លែងនៅកម្ពុជា។ នេះបើយោងតាមរបាយការណ៍របស់ផ្សារមូលបត្រថៃ (SET) បានចេញផ្សាយកាលពីពេលថ្មីៗនេះ។ ក្រុមហ៊ុន CPALL ទទួលបានកិច្ចព្រមព្រៀងពាណិជ្ជកម្មមេ ដើម្បីបើកហាងនៅឡាវ និងកម្ពុជា។

របាយការណ៍ដដែលនេះបានឲ្យដឹងថា “ផ្អែកតាមការស្ទង់មតិទីផ្សារ និងការប៉ាន់ប្រមាណបឋមរបស់ក្រុមហ៊ុន គឺនឹងបើកហាងនេះឲ្យបានចំនួនហាង៧០០កន្លែងនៅកម្ពុជា និងចំនួនហាង៥០០កន្លែងនៅឡាវ គ្រោងនឹងបើកនៅពេលខាងមុខ”។

ក្រុមហ៊ុនថៃនេះ គ្រោងបើកហាងទំនិញនៅកម្ពុជាក្នុងឆ្នាំ២០២១ ដែលមានរយៈពេល៣០ឆ្នាំ ហើយអាចបន្តបាន២០បន្ថែមទៀត។ ការចូលមកវិនិយោគនេះ ក្រសួងពាណិជ្ជកម្មអះអាងថា មិនបង្កឲ្យមានផលប៉ះពាល់ហាងទំនិញនៅកម្ពុជាឡើយ។

លោក ស៊ាង ថៃ អ្នកនាំពាក្យក្រសួងពាណិជ្ជកម្ម បានអះអាងដែរថា ក្រុមហ៊ុន CP ALL គ្រោងនឹងបើកហាងទំនិញ7-Eleven ពី៧០០ទៅ១០០០សាខានៅទូទាំងប្រទេសកម្ពុជា ក្នុងរយៈពេល៥ឆ្នាំដំបូង។ ជំហានបន្ទាប់ ក្រុមហ៊ុននេះ នឹងបើកលក់ហ្វ្រេនឆាយ 7-Eleven ដល់អ្នកជំនួញក្នុងប្រទេសកម្ពុជា។ ក្រុមហ៊ុន CP ALL បានបោះទុនតម្កល់ជាង៥ពាន់ដុល្លារ ក្នុងការចុះបញ្ជីពាណិជ្ជកម្មនៅក្រសួង។

អ្នកនាំពាក្យរូបនេះ អះអាងថា គម្រោងនេះ គឺមិនបង្កឲ្យមានផលប៉ះពាល់ដល់អ្នកលក់ទំនិញនៅកម្ពុជាឡើយ។ លោក បានបន្ថែមថា វាជាការបង្កើនទំហំសេដ្ឋកិច្ចកម្ពុជា។

ក្រុមហ៊ុន CP ទាំងអស់ដំណើរការហាងទំនិញ១១,០០០ កន្លែង ក្រោមស្លាកយីហោ 7-eleven នៅថៃ ដែលមានអតិថិជនជាមធ្យម១១,៨ លាននាក់ជារៀងរាល់ថ្ងៃ។ ក្រុមហ៊ុននេះទទួលបានសិទ្ធិផ្តាច់មុខពីក្រុមហ៊ុន 7-Eleven Inc នៅសហរដ្ឋអាមេរិកក្រោមកិច្ចព្រមព្រៀងអាជ្ញាប័ណ្ណប្រចាំតំបន់កាលពីឆ្នាំ ១៩៨៩។ ក្រុមហ៊ុនមេនេះគឺជាក្រុមហ៊ុនដែលមានតម្លៃ ៦៣ពាន់លានដុល្លារ៕

ក្រសួងទេសចរណ៍ចាប់ផ្តើមពីភាក្សាពីផែនការមេក្នុងការអភិវឌ្ឍវិស័យទេសចរណ៍ ពិសេសគំរោងព្រលានយន្តហោះខេត្តមណ្ឌលគិរី

ដោយ គង់ ម៉ាលីន

ភ្នំពេញៈ គណៈកម្មការរៀបចំផែនការមេទេសចរណ៍ខេត្តមណ្ឌលគីរី គាំទ្ររាជរដ្ឋាភិបាល ចំពោះគម្រោងសាងសង់ព្រលានយន្តហោះ ដែលជាតម្រូវការដ៏សំខាន់ ដើម្បី អភិវឌ្ឍន៍ទេសចរណ៍ខេត្តមណ្ឌលគិរី។

អង្គប្រជុំដែលបានធ្វើឡើងកាលពីថ្ងៃទី១១ ឧសភាកន្លងមកបានឲ្យដឹងថា ការអភិវឌ្ឍវិស័យទេសចរណ៍នៅខេត្តមណ្ឌលគិរី ចាំបាច់ត្រូវមានការចូលរួមពីវិស័យពាក់ព័ន្ធ និងហេដ្ឋារចនាសម្ពន្ធផ្នែកដឹកជញ្ជូន ពិសេសគឺការបង្កើតព្រលានយន្តហោះថ្មី ដែលមានតួនាទីសំខាន់ ក្នុងការបម្រើការដឹកជញ្ជូនទេសចរ អ្នកដំណើរ ទំនិញផ្សេងៗ ដូចជាបន្លែ ផ្កា ផ្លែឈើទៅកាន់គោលដៅនានាក្នុងប្រទេស។

រាជរដ្ឋាភិបាលបានកំណត់រួចមកហើយថា ខេត្តមណ្ឌលគិរី និងភូមិភាគឦសានទាំងមូល គឺជាគោលដៅអេកូទេសចរណ៍ដ៏ធំរបស់កម្ពុជា ដែលត្រូវមានការអភិវឌ្ឍប្រកបដោយនិរន្តរភាព និងការទទួលខុសត្រូវខ្ពស់។ គណៈកម្មការអន្តរក្រសួង បានបង្ហាញការគាំទ្រ ចំពោះការងារសិក្សារៀបចំផែនការមេ អភិវឌ្ឍន៍ទេសចរណ៍ ខេត្តមណ្ឌលគិរីនេះ ដោយកំណត់ថា វិស័យទេសចរណ៍ ពិសេសវិស័យអេកូទេសចរណ៍ ជាវិស័យអាទិភាពសម្រាប់ការអភិវឌ្ឍសេដ្ឋកិច្ចនៅក្នុងខេត្ត បន្ទាប់មក គឺវិស័យកសិកម្ម ដែលមានសក្ដានុពលខ្លាំងបំផុត ដូចជាការដាំដុះបន្លែសេរីរាង្គដ៏មានរសជាតិឆ្ងាញ់ពិសា ផ្កាល្អៗ ផ្លែឈើ កាហ្វេ ដើម្បីផ្គត់ផ្គង់តម្រូវការក្នុងខេត្ត និងទូទាំងប្រទេស។

រដ្ឋមន្ត្រីក្រសួងទេសចរណ៍ លោកថោង ខុន បានលើកឡើងថា វិស័យទេសចរណ៍ជាវិស័យអន្តរវិស័យ ដែលត្រូវមានការគាំទ្រពីវិស័យពាក់ព័ន្ធ ដូចជា បរិស្ថាន កសិកម្ម វប្បធម៌ ប្រព័ន្ធទឹកស្អាត អគ្គិសនី គមនាគមន៍ ការសម្រួលឱ្យមានប្រព័ន្ធបច្ចេកវិទ្យាទំនើប និងវិស័យជាច្រើនទៀត ពិសេសគឺការ រៀបចំប្លង់គោលប្រើប្រាស់ដីធ្លី របស់ខេត្តទាំងមូល ប្រព័ន្ធហេដ្ឋារចនាសម្ពន្ធ និងព្រលានយន្តហោះ ដែលគណៈកម្មការអន្តរក្រសួង សូមគាំទ្រទាំងស្រុងចំពោះ រាជរដ្ឋាភិបាលដែលបានរៀបចំ គម្រោងកសាងព្រលានយន្តហោះមួយនៅខេត្តមណ្ឌលគិរី សម្រាប់ដឹកជញ្ជូនភ្ញៀវទេសចរ និងអ្នកដំណើរពីតំបន់ទេសចរណ៍ធំៗ ដូចជា រាជធានីភ្នំពេញ សៀមរាប-អង្គរ តំបន់ឆ្នេរសមុទ្រ និងតំបន់អេកូទេសចរណ៍នៅភូមិភាគនិរតី តំបន់ទេសចរណ៍នៅភាគពាយព្យ មានខេត្តបាត់ដំបងជាដើម។

លោកបានបន្ថែមថា “ទៅថ្ងៃអនាគតព្រលានយន្តហោះ ខេត្តមណ្ឌលគិរីនេះ អាចនឹងត្រូវប្រើប្រាស់ជាព្រលានយន្តហោះក្នុងតំបន់ (Regional airport) តភ្ជាប់ខេត្តមណ្ឌលគិរី ទៅគោលដៅទេសចរណ៍ជិតខាង ដូចជា ប្រទេសថៃ វៀតណាម និងឡាវ ព្រមជាមួយទីក្រុងសំខាន់ៗ ផ្សេងទៀតរបស់អាស៊ាន និងហួសទៅដល់ទីក្រុងសំខាន់ៗរបស់ប្រទេសចិនផងដែរ” ។

អភិបាលខេត្តមណ្ឌលគិរី លោកស្វាយ សំអ៊ាង បានលើកឡើងពីសក្ដានុពលទេសចរណ៍ និងតំបន់ទេសភាពទាក់ទាញប្រមាណ៣៩កន្លែង ក្នុងនោះមានទាំងតំបន់ទឹកជ្រោះ និងទឹកធ្លាក់ធម្មជាតិ តំបន់វប្បធម៌ជនជាតិដើមភាគតិច ទេសភាពសមុទ្រឈើ ដែនជម្រកសត្វព្រៃ តំបន់ការពារធម្មជាតិ រមណីយដ្ឋានទេសចរណ៍កែច្នៃ ជ្រលងដងអូរ និងភ្នំធម្មជាតិ ចម្ការដំណាំចម្រុះពូជដែលអំណោយផល ដល់វិស័យកសិទេសចរណ៍ និងបម្រើដល់សេចក្ដីត្រូវការរបស់ប្រជាពលរដ្ឋ និងភ្ញៀវទេសចរ។

ម្យ៉ាងទៀត ទេសភាពតាមដងផ្លូវនៅក្នុងខេត្ត ក៏ផ្ដល់នូវភាពស្រស់ត្រកាល គួបនឹងអាកាសធាតុអំណោយផលដល់ការទស្សនា និងស្នាក់នៅសម្រាប់ភ្ញៀវទេសចរផងដែរ។

អភិបាលខេត្តបានបន្តថា ការកសាងផ្លូវទៅច្រកទ្វារព្រំដែន ជាចំណុចចាំបាច់សម្រាប់តភ្ជាប់ការធ្វើដំណើររបស់ភ្ញៀវទេសចរ និងសម្រួលដល់ការដឹកជញ្ជូនកសិផល ទំនិញរបស់ប្រជាពលរដ្ឋទៅកាន់ប្រទេសជិតខាង ពិសេសគឺប្រទេសវៀតណាម។

លោករដ្ឋមន្ត្រី ថោង ខុនបានបង្ហាញការជឿជាក់ថា ផែនការមេអភិវឌ្ឍន៍ទេសចរណ៍ខេត្តមណ្ឌលគិរីនេះ ត្រូវតែជាផែនការដែលមានលក្ខណៈ សមាហរណកម្មជាមួយវិស័យផ្សេងៗ (Intergrated Master Plan) ពិសេសប្លង់គោលប្រើប្រាស់ដីធ្លី (ដែលក្រសួងរៀបចំដែនដីកំពុងរៀបចំ) ដើម្បីសម្រេចចក្ខុវិស័យធ្វើឱ្យខេត្តមណ្ឌលគិរី និងតំបន់ភូមិភាគឦសាន្តទាំងមូល ឱ្យក្លាយជាគោលដៅទេសចរណ៍ ប្រកបដោយគុណភាព និងនិរន្តរភាព ពិសេសគឺជាគោលដៅអេកូទេសចរណ៍ចម្បងរបស់ប្រទេសជាតិ។

សេចក្ដីព្រាងផែនការមេអភិវឌ្ឍន៍ វិស័យទេសចរណ៍ខេត្តមណ្ឌលគិរី អាចនឹងត្រូវបញ្ចប់នៅដំណាចខែសីហា ឆ្នាំ២០២០ នេះ៕

អ្នកស្រាវជ្រាវស្នើឱ្យរដ្ឋាភិបាលត្រៀមបង្កើនកញ្ចប់ថវិកាផ្សព្វផ្សាយពីសក្តានុពលទេសចរណ៍កម្ពុជាទៅកាន់ពិភពលោក

ដោយ វុត្ថា

ភ្នំពេញៈ អ្នកស្រាវជ្រាវនៃរាជបណ្ឌិត្យសភាកម្ពុជា បានស្នើដល់ក្រសួងទេសចរណ៍ត្រៀមកញ្ចប់ថវិកា ដើម្បីត្រៀមផ្សព្វផ្សាយទេសចរណ៍កម្ពុជា ទៅកាន់ពិភពលោកនៅពេលដែលវិបត្តិកូវីដ១៩បញ្ចប់ ខណៈដែលទេសចរណ៍កម្ពុជា ក៏ដូចជាពិភពលោកទទួលរងនូវផលប៉ះពាល់យ៉ាងធ្ងន់ធ្ងរ ដោយសារការរាតត្បាតនៃជំងឺកូវីដ១៩នេះ។

លោកហេង សុភី មន្ត្រីស្រាវជ្រាវវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា បានបង្ហាញឯកសារសេដ្ឋកិច្ច និងទេសចរណ៍កម្ពុជាក្នុងដំណាក់កាលជំងឺកូវីដ១៩ ដែលចេញផ្សាយថ្ងៃទី១១ ខែឧសភា ឆ្នាំ ២០២០កន្លងមកបានឱ្យដឹងថា ប្រសិនបើស្ថានភាពវិបត្តិនេះ នៅបន្តរយៈពេលយូរតទៅទៀត ក្រសួងទេសចរណ៍កម្ពុជា គួរតែស្នើទៅអង្គការទេសចរណ៍ពិភពលោក ដើម្បីរកចំណុចរួមមួយក្នុងការសម្រាលនិងស្រោចស្រង់ដល់វិស័យនេះ ដូចជា ការចេញបណ្ណធ្វើដំណើរដល់ពលរដ្ឋណា ដែលគ្មានជំងឺកូវីដ១៩អាចធ្វើដំណើរទូទាំងពិភពលោកបាន។

លោកតុប សុភ័កអ្នកនាំពាក្យក្រសួងទេសចរណ៍កម្ពុជា បានប្រាប់គេហទំព័រ propertyarea.asia នៅថ្ងៃទី១១ ខែឧសភានេះដែរថា ផែនការរបស់ក្រសួងគឺមានកញ្ចប់ថវិកា ក្នុងការផ្សព្វផ្សាយផលិតផលទេសចរណ៍ នៅក្នុងប្រទេសទាំងក្របខណ្ឌក្នុងនិងក្រៅប្រទេស តាមរយៈបណ្តាញសារព័ត៌មាននានា ជាពិសេសនៅ CNN និងអនឡាញជាដើម និងចុះទៅផ្ទាល់ ដើម្បីទាក់ទាញភ្ញៀវទេសចរណ៍ឱ្យមកលេងកម្ពុជា ដូចទៅនឹងឆ្នាំកន្លងមកនេះ។

លោកបន្តថា បន្ទាប់កំពុងរងវិបត្តិពីជំងឺកូវីដ១៩ បានធ្វើឱ្យសកម្មភាពនៃការចុះផ្សព្វផ្សាយដោយផ្ទាល់ត្រូវបានផ្អាក ដោយសារបារម្ភពីការឆ្លងនូវជំងឺកូវីដ១៩ និងដោយសារតាមការអំពាវនាវរបស់រាជរដ្ឋាភិបាល ក្នុងការបន្ថយការចំណាយផ្សេងៗ ក្នុងអំឡុងនៃការផ្ទុះនូវជំងឺកូវីដ១៩នាពេលនេះ។

យ៉ាងណាក៏ដោយលោកអះអាងថា សកម្មភាពនៃការផ្សព្វផ្សាយ និងធ្វើកិច្ចសហប្រតិបត្តិការជាមួយបណ្តាប្រទេស និងដៃគូនានាកម្ពុជានៅតែធ្វើធម្មតា តាមរយៈ Video Conference ដោយខុសពីឆ្នាំកន្លងមកនេះ។

លោកបន្តថា “យើងមិនទាន់ប៉ាន់ស្មានថាជំងឺកូវីដនេះ នឹងត្រូវបញ្ចប់នៅពេលណាដែរ អញ្ចឹងខ្ញុំមិនទាន់ហ៊ានថាយ៉ាងម៉េច ចំពោះការចុះផ្សព្វផ្សាយដោយផ្ទាល់អំពីផលិតផលទេសចរណ៍របស់យើងនៅក្រៅប្រទេសនោះទេ” ។

ក្រសួងទេសចរណ៍បានអំពាវនាវដល់ម្ចាស់សណ្ឋាគារ និងសេវាកម្មស្នាក់នៅទេសចរណ៍ទាំងអស់នៅក្នុងប្រទេសកម្ពុជា សូមយកឱកាសនេះកែលម្អគុណភាពឱ្យប្រសើរឡើង ដោយមានចក្ខុវិស័យសុទិដ្ឋិនិយមថា វិស័យទេសចរណ៍កម្ពុជា នឹងវិលត្រឡប់ទៅរកភាពប្រសើរឡើងវិញ ក្រោយវិបត្តិនៃការរីករាលដាលជាសកល នៃវីរុសកូវីដ១៩ ស្របតាមយុទ្ធនាការ «Stay Home Today, Travel Tomorrow» ។

របាយការណ៍ក្រសួងទេសចរណ៍បង្ហាញថា វិបត្តិនៃជំងឺកូវីដ១៩បានធ្វើឱ្យអាជីវកម្មទេសចរណ៍ទាំងឡាយ នៅទូទាំងប្រទេសកម្ពុជា ត្រូវបានផ្អាកដំណើរការ និងបិទបញ្ចប់អាជីវកម្មចំនួនសរុប២,៨៦៥ទីតាំង និងបានធ្វើឱ្យប៉ះពាល់ការងាររបស់បុគ្គលិកចំនួន៤៦,៣៦៩នាក់។ ចំណែកឯមគ្គុទ្ទេសក៍ទេសចរណ៍ ដែលបានព្យួរអាជ្ញាបណ្ណទេសចរណ៍មានចំនួនសរុប៩៦នាក់។

របាយការណ៍ពីអង្គការទេសចរណ៍ពិភពលោកបានបង្ហាញថា នាអំឡុងឆ្នាំ២០២០នេះភ្ញៀវទេសចរ ទូទាំងពិភពលោកនឹងមានការធ្លាក់ចុះពី២០% ទៅ៣០% ពោលគឺធ្លាក់ចុះពីកំណើន ដែលបានប៉ាន់ស្មាន ពី៣% ទៅ៤% នាដើមខែមករាឆ្នាំ២០២០ ។ នេះបណ្តាលឱ្យខាតបង់ពី៣០ ទៅ៥០ពាន់លានដុល្លារអាមេរិក ក្នុងការចំណាយរបស់ភ្ញៀវទេសចរអន្តរជាតិ។

វិបត្តិនេះ បើធៀបនឹងផលប៉ះពាល់ នៃការវាយប្រហារអគារពាណិជ្ជកម្ម សហរដ្ឋអាមេរិកក្នុងឆ្នាំ២០០១ ការផ្ទុះឡើងនៃជំងឺសារ៍កាលពីឆ្នាំ២០០៣ និងវិបត្តិសេដ្ឋកិច្ចសាកលឆ្នាំ២០០៩ វិបត្តិលើកនេះគឺធំជាង ព្រមទាំងមិនទាន់អាចប៉ាន់ស្មាននៅពេលណា ដែលនឹងត្រូវបញ្ចប់នៅឡើយទេ៕

ជប៉ុនគ្រោងបន្ថែមកញ្ចប់ថវិកាទ្រទ្រង់សេដ្ឋកិច្ចជាលើកទី២បន្ទាប់ពីបានបញ្ចេញ ១ទ្រីលានដុល្លារលើកទី១

ដោយ ហ្សូលី

តូក្យូៈ រដ្ឋាភិបាលជប៉ុនគ្រោងនឹងបន្ថែមថវិកា ជម្រុញសេដ្ឋកិច្ចរាប់ពាន់លានដុល្លារបន្ថែមទៀត ដើម្បីទប់ទល់នឹងវិបត្តិសេដ្ឋកិច្ចចាប់ពីខែមិថុនាខាងមុខ បន្ទាប់ពីប្រទេសនេះបានប្រកាសថា ខ្លួនបានត្រៀមថវិកាជាង១ទ្រីលានដុល្លារ ដើម្បីទប់ទល់វិបត្តិសេដ្ឋកិច្ចក្នុងត្រីមាសទី១កន្លងមក។

នាយករដ្ឋមន្ត្រីប្រទេសជប៉ុន លោកស៊ីនហ្សូ អាបេ បាននិយាយកាលពីពេលថ្មីៗនេះថា ប្រទេសជប៉ុននឹងចាត់វិធានការជំរុញបន្ថែម ដើម្បី “ប្រយុទ្ធប្រឆាំងនឹងការឆ្លងរាលដាលនៃជំងឺរាតត្បាតវីរុសនេះ” ។

កញ្ចប់ថ្មីនេះ មានគោលបំណងជួយទប់ស្កាត់ការប៉ះទង្គិច ដល់ប្រទេសសេដ្ឋកិច្ចធំបំផុតទី៣ របស់ពិភពលោក ដែលសេដ្ឋកិច្ចកំពុងដាំក្បាលចុះយ៉ាងខ្លាំង ចំពេលមានការធ្លាក់ចុះនៃតម្រូវការជាសាកល និងស្ថានភាពអាសន្ន ក្នុងតំបន់ដែលត្រូវបានបន្តរហូតដល់ចុងខែឧសភា។

លោកអាបេបាននិយាយថា រដ្ឋាភិបាលនឹងពិចារណាលើជំហានបន្ថែម ដូចជា ជំនួយដល់ក្រុមហ៊ុន ដែលកំពុងព្យាយាមបង់ថ្លៃឈ្នួល ការគាំទ្រដល់និស្សិត ដែលបានបាត់បង់ការងារក្រៅម៉ោង និងប្រាក់ឧបត្ថម្ភបន្ថែមទៀត ដល់ក្រុមហ៊ុនដែលរងគ្រោះដោយសារការលក់ធ្លាក់ចុះ។

កញ្ចប់ថវិការនេះ កំពុងស្ថិតនៅក្នុងដំណាក់កាលពិភាក្សាថា តើគួរតែបន្ថែមឬយ៉ាងណា។

លោកស៊ីនហ្សូ អាបេបានបន្ថែមថា រដ្ឋាភិបាលបានត្រៀមរួចរាល់ ដើម្បីរៀបចំ កញ្ចប់ថវិកាបន្ថែមជាលើកទី២ ឱ្យបានទាន់ពេលវេលា និងអាចមានលទ្ធភាពអនុម័តនៅថ្ងៃទី១៧ ខែមិថុនាខាងមុខ។ ការអនុម័តអាស្រ័យលើថា តើមានខេត្តចំនួនប៉ុន្មានដែលនឹងអាចលើកវិធានការបន្ទាន់របស់រដ្ឋ ដែលបានអនុវត្តន៍នៅទូទាំងប្រទេស។

លោកអាបេបញ្ជាក់ថា “យើងនឹងប្រឹងប្រែងឱ្យអស់ពីសមត្ថភាព ដើម្បីជួយឱ្យក្រុមហ៊ុនរក្សានិរន្តរភាពអាជីវកម្មរបស់ពួកគេ និងការពារការងារ”។

លោក Katsutoshi Inadome អ្នកយុទ្ធសាស្ត្រប្រាក់ចំណូលថេរ នៅក្រុមហ៊ុន Mitsubishi UFJ Morgan Stanley Securities បានមានប្រសាសន៍ថា “ទំហំថវិកាបន្ថែមទីពីរនឹងតូចជាងថវិកាទីមួយ។

ទោះយ៉ាងណាក៏ដោយ ការចេញប័ណ្ណបំណុលបន្ថែម គឺមិនអាចជៀសវាងបាននោះទេ។

យោងតាមការស្ទង់មតិរបស់រ៉យទ័របានបង្ហាញថា សេដ្ឋកិច្ចរបស់ប្រទេសជប៉ុនទំនងជាបានធ្លាក់ចុះ ក្នុងរយៈពេល ២ត្រីមាសជាប់គ្នានៃឆ្នាំនេះ ដោយសារតែការរីករាលដាលនៃការរាតត្បាត Covid-19 ៕ Al-Jazeera

អ្នកជំនាញផ្នែកដីធ្លី លោកកាង សុធី បង្ហើបពីវិធីសាស្ត្រវិនិយោគដីនិងទទួលបានចំណេញច្រើន

ការវិនិយោគដីដោយសេរីភាពទើបទទួលបានចំណេញលឿន

ដោយៈ រ៉ាណេត

ភ្នំពេញៈ វិស័យអចលនទ្រព្យកម្ពុជានាពេលបច្ចុប្បន្ននេះ អ្នកវិនិយោគភាគច្រើន សុទ្ធតែ បានបង្ហាញពីចំណាប់អារម្មណ៍ ទៅលើការធ្វើជំនួញ លើផ្នែកដីធ្លីច្រើនជាង វិស័យ សំណង់ ដោយសារតែការវិនិយោគដី អាចធ្វើបានចាប់ពីទំហំតូចឡើងទៅ រហូតដល់ ទ្រង់ទ្រាយធំ និងងាយទទួលបានចំណេញ។

លោក កាង សុធី អគ្គនាយកក្រុមហ៊ុន អចលនទ្រព្យ អន្តរជាតិ Century 21 Land Station ដែលមានអសយដ្ឋាននៅ ផ្ទះលេខ១០០ ផ្លូវលេខ១៣ ភូមិប៉ាយាប សង្កាត់ភ្នំពេញថ្មី ខណ្ឌសែនសុខ បានមានប្រសាសន៍ឲ្យដឹងកាលពីពេលថ្មីៗនេះថា ការវិនិយោគលើវិស័យដីធ្លី ត្រូវបាន បែងចែក ជាច្រើន រូបភាព និង ច្រើនសណ្ឋានសម្រាប់អ្នក ដែលចង់ចូលប្រឡូក នៅក្នុងវិស័យមួយនេះ សុទ្ធតែមានឱកាសទាំងអស់ ហើយក៏អាចរីកលូតលាស់ ក្នុងពេល ដ៏ខ្លីផងដែរ។

លោកបានបន្តទៀតថា “សម្រាប់អ្នកដែលដាក់ចិត្តរកស៊ី នៅក្នុងវិស័យនេះ ទាមទារឱ្យមានការចេះ សង្កេត បរិយាកាសជុំខ្លួន និងមានភាពឆ្លាតវៃ ក្នុងការសម្រេចិត្ត” ។

លោកកាង សុធី បានបន្តទៀតថា “ការទិញ ដី ទុក លក់ យកចំណេញត្រូវតែធ្វើឡើង ដោយភាពរីករាយ និងមានសេរីភាពក្នុងការសម្រេចចិត្ត។ មានមនុស្សមួយចំនួន បានបាត់បង់ឱកាស ដោយសារតែមហិច្ឆតាខ្ពស់។ ចង់បានចំណេញច្រើនហួសប្រមាណ។

លោក បានក្រើនរំលឹកថា គួរបង្កើនការលក់ ក្នុងរយៈពេលដ៏ខ្លី ទោះចំណេញតិច ក៏ដោយ ប៉ុន្តែមានឱកាសលក់បានច្រើនដង ដោយមិនត្រូវអូសបន្លាយពេលត្រូវតែលក់ នោះទេ ។

លោកបន្តថា “បើលក់ដាច់បានភ្លាម រកទិញកន្លែងថ្មីជំនួសបន្ថែមវិញភ្លាម ទើបយើងអាចមានឱកាសទទួលបានចំណេញច្រើនពីការវិនិយោគដី” ៕

ក្រសួងសេដ្ឋកិច្ច៖ ការវិនិយោគពីផ្នែកឯកជនលើផ្នែកសំណង់ អាចប្រែប្រួលស្ថានការណ៍ឲ្យល្អប្រសើរឡើងវិញ

ដោយ ប៊ី

ភ្នំពេញៈ ការវិនិយោគឯកជន និងសំណង់ អាចប្រែប្រួលស្ថានការណ៍ឲ្យត្រឡប់មកល្អប្រសើរឡើងវិញ ខណៈស្ថានភាពសេដ្ឋកិច្ចសាកល កំពុងស្ថិតក្នុងស្ថានភាពធ្លាក់ចុះនិងមិនច្បាស់លាស់។ នេះបើយោងតាមការសេចក្តីថ្លែងការរបស់ក្រសួងសេដ្ឋកិច្ច និងហិរញ្ញវត្ថុចេញផ្សាយកាលពីពេលថ្មីៗនេះ។

អគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុ បានបង្ហាញពីព្រឹត្តិបត្រសិ្ថតិសេដ្ឋកិច្ច និងហិរញ្ញវត្ថុកាលពីពេលថ្មីៗនេះ ខណៈដែលសេដ្ឋកិច្ចសកលឆ្នាំ២០២០ត្រូវបានរំពឹងទុកថា នឹងធ្លាក់ចុះក្នុងអត្រាអវិជ្ជមានប្រមាណ៣ភាគរយ លើស្ថានភាពដែលកំពុងប្រឈម នៃការរីករាលដាលជំងឺកូវីដ១៩ ។

បើគិតត្រឹមត្រីមាសទី១ ឆ្នាំ២០២០ នេះ ស្ថានភាពនៃការប៉ះទង្គិចមានការវិវត្តផ្សេងៗគ្នា។

សេចក្តីថ្លែងការណ៍របស់ អគ្គនាយកដ្ឋានគោលនយោបាយបានឱ្យដឹងថា វិស័យអចលនទ្រព្យ ទោះបីមានការអនុញ្ញាតលើសំណើរសុំវិនិយោគ និងសាងសង់យ៉ាងណាក្តី ក៏ការវិនិយោគឯកជន និងផ្នែកសំណង់ អាចប្រែប្រួលស្ថានការណ៍ឲ្យត្រឡប់មកល្អប្រសើរឡើងវិញ” ។

សេចក្តីថ្លែងការខាងលើបានបន្តថា តាមការប្រមើលមើល ពីកំលាំងសេដ្ឋកិច្ចសាកលក្នុងពេលអនាគត កំពុងស្ថិតក្នុងស្ថានភាពធ្លាក់ចុះ និងមិនច្បាស់លាស់។

លោក អ៉ិន ណាង អគ្គនាយកក្រុមហ៊ុនភ្នាក់ងារអចលនទ្រព្យ Show Up Real Estate ដែលកំពុងមានគម្រោងជាច្រើននៅក្នុងដៃបានមានប្រសាសន៍ថា “ក្នុងរយៈពេលជាងកន្លះខែចុងក្រោយនេះ ជាពិសេសក្រោយភាពស្ងប់ស្ងាត់នៃការាលដាលជំងឺ Covid-19 នៅកម្ពុជា ទីផ្សារអចលនទ្រព្យបានចាប់ផ្តើមកម្រើកឡើងវិញបន្តិច ជាក់ស្ដែងដូចជាគម្រោងដែលក្រុមហ៊ុនរបស់លោក មានសកម្មភាពលក់ចេញជាបន្តបន្ទាប់ ទាំងគម្រោងលំនៅដ្ឋាន ក៏ដូចជាគម្រោងផ្នែកដីឡូតិ៍ផងដែរ។

លោកបានបន្តទៀតថា “អចលនទ្រព្យពេលនេះ បានផ្តល់ផលចំណេញដល់អតិថិជន ជាពិសេសវិស័យលំនៅដ្ឋាន ដោយសារតែមានការអនុគ្រោះពន្ធប្រថាប់ត្រា ពីរដ្ឋាភិបាល (តម្លៃក្រោម៧ម៉ឺនដុល្លារ) ដែលជាការចូលរួមលើកទឹកចិត្ត ដល់ក្រុមហ៊ុនអភិវឌ្ឍន៍ និងជំរុញការលក់” ។ លោកបន្តថា “អតិថិជនថែមទាំងទទួលបាន នូវការផ្តល់ជូន លក្ខខណ្ឌងាយស្រួលពីក្រុមហ៊ុនអភិវឌ្ឍន៍ ក៏ដូចជាក្រុមហ៊ុនទទួលលក់ផងដែរ ពិសេសតម្លៃក៏មានការបន្ទាបចុះ” ។

លោកបញ្ជាក់ថា អ៉ិន ណាង បានអះអាងថា ប្រសិនបើកម្ពុជានៅតែអាចរក្សាបាននូវស្ថានភាពល្អប្រសើរ លើការទប់ស្កាត់ការរីករាលដាលនៃជំងឺ Covid-19 បាន ទីផ្សារអចលនទ្រព្យនឹងចាប់ផ្តើមមានចរន្តឡើងវិញ ក្នុងរយៈពេលយ៉ាងខ្លីខាងមុខ” ។

យោងតាមទិន្នន័យពីក្រសួងដែនដី នគរូបនីយកម្ម និងសំណង់បានឱ្យដឹងថា វិស័យសំណង់របស់កម្ពុជា បានទាក់ទាញទុនវិនិយោគជាង២,៥០០លានដុល្លារ ជាមួយគំរោងដែលបានអនុម័តចំនួន១០០០គម្រោង ក្នុងត្រីមាសទី១នៃឆ្នាំនេះ។

ក្រសួងបានឱ្យដឹងថា ទុនវិនិយោគពីវិស័យសំណង់នៅក្នុងត្រីមាស១នេះ បានកើនឡើង៥១ភាគរយ បើធៀបនឹងរយៈពេលដូចគ្នាកាលពីឆ្នាំមុន បើទោះបីជាកម្ពុជាកំពុងជួបនឹងវិបត្តិCOVID-19 ៕

ចំណេះដឹង! តើភូមិសាស្ត្រខេត្តកណ្តាលមានសក្តានុពលវិនិយោគដូចម្តេច?

ដោយ វុត្ថា

ភ្នំពេញៈ ខេត្តកណ្តាល ជាខេត្តមួយក្នុងចំណោមរាជធានី ខេត្តទាំង២៥នៃកម្ពុជា ដែលមានព្រំប្រទល់ខាងលិច ទល់នឹងខេត្តកំពង់ស្ពឺ ខាងកើត ទល់នឹងខេត្តព្រៃវែងខាងជើងទល់នឹងខេត្តកំពង់ឆ្នាំង កំពង់ចាម ខាងត្បូងទល់នឹងខេត្តតាកែវ និងខេត្តអានយ៉ាង ប្រទេសវៀតណាម។

បើមើលស្ថានភាពភូមិសាស្ត្រ កត្តាប្រជាសាស្ត្រ និងការរីកចម្រើនផ្នែកនគរូបនីយកម្ម គឺខេត្តកណ្តាលជាខេត្តមានការរីកចម្រើន និងទទួលឥទ្ឋិពលមុនខេត្តដទៃទៀតពីរាជធានីភ្នំពេញ។

យោងតាមរបាយការណ៍ឆ្នាំ២០១៩កន្លងមកនេះបានបង្ហាញថា ខេត្តកណ្តាលមានភូមិសាស្ត្រល្អ គឺហ៊ុំព័ទ្ធជុំវិញរាជធានីភ្នំពេញ មានរោងចក្រសហគ្រាសជាង៤៧០ ក្នុងនោះ មានរោងចក្រកាត់ដេសំលៀកបំពាក់ និងដេរស្បែកជើងចំនួន១៨៣រោងចក្រ មានកម្មករជាង១៦ម៉ឺននាក់ រកចំនូលបាន៣៧លាន$ក្នុងខែៗ ហើយជារៀងរាល់ឆ្នាំ ខេត្តកណ្តាលសល់ស្បៀងគិតជាអង្កជាង៥ម៉ឺនតោនសម្រាប់ការនាំចេញ។

យោងតាមការចុះផ្សាយរបស់គេហទំព័រ ខេត្តកណ្តាលបង្ហាញថា សក្ដានុពលរបស់ខេត្តកណ្ដាល មានដូចជា វិស័យ កសិកម្ម ឧស្សាហកម្ម និង ទេសចរណ៍ ជា វិស័យ គោលក្នុងការអភិវឌ្ឍសេដ្ឋកិច្ចខេត្ត។ សម្រាប់ប្រព័ន្ធហេដ្ឋារចនាសម្ព័ន្ធ ក្នុងខេត្តកណ្ដាល គឺខេត្តមានផ្លូវជាតិធំសំខាន់ៗជាច្រើន សម្រាប់តភ្ជាប់ទៅកាន់បណ្ដាខេត្តនានា ដូចជាផ្លូវជាតិលេខ ១ លេខ ២ លេខ ៣ លេខ ៤ លេខ ៥ លេខ ៦ លេខ ៨ លេខ ១១ លេខ ២១ និងលេខ៥១ ។

ខេត្តកណ្ដាល ក៏មានស្ពានធំៗឆ្លងទន្លេផងដែរ ដូចជា ស្ពានអ្នកលឿង ស្ពានព្រែកតាមាក់ ស្ពានព្រែកក្តាម ស្ពានកោះធំ ស្ពានព្រែកសំរោង និងមានស្ពានកោះអន្លង់ចិនដែលបាននិងកំពុងសាងសង់យ៉ាងសកម្ម។

ជាពិសេសខេត្តកណ្ដាលឆាប់ៗខាងមុខនេះ នឹងមានព្រលានយន្តហោះកម្រិតអន្តរជាតិមួយ១កន្លែង ដែលបានចំណាយទឹកប្រាក់វិនិយោគប្រមាណ១៥០០លានដុល្លារ ដោយសាងសង់លើទំហំផ្ទៃដីជាង២៦០០ហិកតា។

ដូចនេះ ខេត្តកណ្ដាលជាខេត្តមួយ ដែលមានកក្កានុពលល្អ សម្រាប់ក្រុមហ៊ុន នានា ចូលមកវិនិយោគនាថ្ងៃខាងមុខ៕