ដោយ ៖ រ៉ាណេត

ភ្នំពេញ ៖ គម្រោងសាងសង់កីឡដ្ឋានលំដាប់អន្តរជាតិប្រចាំនៅក្នុងខេត្តកំពង់ស្ពឺដែលមានតម្លៃជាង២លានដុល្លារ បានចាប់ផ្ដើមដំណើរការសាងសង់ជាជំហានដំបូងហើយក្រោយការសិក្សា និងកំណត់យកប្លង់មេកាលពីដើមខែឧសភា ឆ្នាំ២០២០កន្លងទៅនេះ។

អភិបាលខេត្តកំពង់ស្ពឺ លោក វ៉ី សំណាង បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី១២ ខែឧសភា ឆ្នាំ២០២០ថា គម្រោងសាងសង់កីឡដ្ឋានលំដាប់អន្តរជាតិ និងលើកដំបូងនៅក្នុងខេត្តកំពង់ស្ពឺ ត្រូវបានចាប់ផ្តើមអនុវត្តជាបណ្តើរហើយ។

លោកបានបន្តថា “ពេលនេះប្លង់មេរួមនៃគម្រោងត្រូវបានកំណត់ និងសម្រេចរួចហើយ នៅឡើយតែប្លង់រចនា និងរៀបចំផ្នែកខាងក្នុង ដែលកំពុងតែសិក្សាលម្អិតបន្ថែម ដើម្បីប្រាកដថា មានភាពសោភ័ណភាព និងគុណភាពខ្ពស់ក្រោយពេលសាងសង់។ ជំហានដំបូងនេះ យើងគ្រាន់តែចាប់ផ្តើមសាងសង់របងនៅជុំវិញស្តាត រួមជាមួយនឹងការកំណត់ទីតាំងនៃបង្គោលគ្រឹះតែប៉ុណ្ណោះ”។

លោកអភិបាលខេត្តបានបញ្ជាក់ថា “ប្លង់មេនៃរចនាសម្ព័ន្ធខាងក្រៅយើងបានកំណត់រួចរាល់ ប៉ុន្តែផ្នែកខាងក្នុងនៅមិនទាន់បានសម្រេច១០០ភាគរយនោះទេ ដែលរហូតមកដល់ពេលនេះ ឯកឧត្តមតំណាងរាស្ត្រ លោកកំពុងតែពិនិត្យ និងសិក្សាជាមួយក្រុមអ្នកជំនាញ ប៉ុន្តែការសិក្សានេះនឹងបញ្ចប់ក្នុងពេលឆាប់ៗ ហើយពេលនេះយើងបានចាប់ផ្តើមដាក់ជាង និងកម្លាំងជំនាញសាងសង់ហើយ ដោយឡែករយៈពេលប៉ុន្មានខែទើបអាចបញ្ចប់ការសាងសង់ខ្ញុំនៅមិនទាន់អាចកំណត់បាននោះទេ ទាល់តែប្លង់រចនាខាងក្នុងចេញ ទើបអាចឱ្យអ្នកជំនាញវាយតម្លៃបាន”។

គម្រោងសាងសង់កីឡដ្ឋានលំដាប់អន្តរជាតិប្រចាំនៅក្នុងទឹកដីខេត្តកំពង់ស្ពឺ ត្រូវបានបើកការដ្ឋានសាងសង់ជាផ្លូវការកាលពីថ្ងៃទី១៥ ខែធ្នូ ឆ្នាំ២០១៩ ដែលមានទីតាំងស្ថិតនៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ នៅលើផ្ទៃដីទំហំ៤ហិកតា ។ គម្រោងកីឡដ្ឋានដែលមានតម្លៃជាង២លានដុល្លារមួយនេះ គ្រោងនឹងធ្វើជាម្ចាស់ផ្ទះនៃកីឡាស៊ីហ្គេម នៅឆ្នាំ២០២៣ខាងមុខនេះ ៕

ដោយវុត្ថា

ភ្នំពេញ៖ វិនិយោគិននៃសមាគមពាណិជ្ជកម្មជាំងស៊ី បានត្អូញត្អែរពីបញ្ហាប្រឈមនានា និងការធ្លាក់ចុះនៃវិនិយោគរបស់ពួកគេនៅក្នុងខេត្តព្រះសីហនុ ដែលបង្កឡើងដោយការរាតត្បាតជាសកលនៃជំងឺ Covid-19 ។

យោងតាមជំនួបពិភាក្សាការងាររវាងតំណាងសមាគមពាណិជ្ជកម្មជាំងស៊ី និងសភាពាណិជ្ជកម្មខេត្តព្រះសីហនុកាលពីម្សិលមិញនេះបានឱ្យដឹងថា សភាពាណិជ្ជកម្មខេត្តព្រះស៊ីហនុ បានទទួលស្គាល់ចំពោះបញ្ហាដ៏លំបាក និងការធ្លាក់ចុះនេះ ហើយបានស្នើឱ្យបន្តការវិនិយោគទៅមុខទៀត ដោយសភាពាណិជ្ជកម្មនៅបន្តជួយសម្របសម្រួលគ្រប់កាលៈទេសៈ។

អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានប្រាប់គេហទំព័រ propertyarea.asia ឱ្យដឹងថា ចាប់តាំងពីការផ្ទុះឡើងនៃជំងឺ Covid-19 កន្លងមកនេះ ការវិនិយោគនានានៅក្នុងខេត្តមានសភាពថមថយ ហើយនេះមិនមែនតែមានការថមថយនៅក្នុងខេត្តព្រះសីហនុនោះទេ គឺនៅទូទាំងពិភពលោក។

លោកបន្តថា “បញ្ហាជំងឺ Covid-19 នេះ គឺជារឿងសកល មិនមែនជារឿងដោយឡែកនោះទេ ហើយគ្រប់សកម្មភាពនានាវាថយទាំងអស់ ហើយអ្វីជាអាទិភាពគឺគ្រប់គ្នាយកចិត្តទុកដាក់ប្រយុទ្ធប្រឆាំងទៅនឹងជំងឺ Covid-19 ដែលកំពុងរីករាលដាលនាពេលនេះ”។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់អចលនវត្ថុកម្ពុជាឱ្យដឹងដែរថា ជារួមការវិនិយោគនានា ក៏ដូចជាការវិនិយោគលើវិស័យអចលនទ្រព្យរបស់កម្ពុជាបាននិងកំពុងថមថយនៅដើមឆ្នាំកន្លងមកនេះ ដែលបង្ករឡើងដោយជំងឺ Covid-19 ។

លោកបន្តថា តែការថមថយនេះ គឺក្នុងរយៈពេលខ្លីប៉ុណ្ណោះ ហើយនៅពេលដែលជំងឺ Covid-19បានបញ្ចប់ អ្វីៗនឹងដំណើរជាធម្មតាឡើងវិញ ជាមួយគ្នានេះ វិនិយោគិនចិននឹងបន្តមកកាន់កម្ពុជា ជាពិសេសខេត្តព្រះសីហនុដោយសារកម្ពុជាមានទំនាក់ទំនងល្អជាមួយប្រទេសចិន ។

សហព័ន្ធសមាគមពាណិជ្ជកម្មខេត្តព្រះសីហនុ បានបង្ហាញរបាយការណ៍របស់ខ្លួនកាលពីកន្លងទៅថ្មីនេះ ថា បរិមាណនៃការជួលទ្រព្យសម្បត្តិពាណិជ្ជកម្ម និងវិនិយោគនៅខេត្តព្រះសីហនុបានធ្លាក់ចុះចំនួន៨៥% និងការលក់ដីធ្លី២៥%។

ទំនាក់ទំនងល្អរវាងរដ្ឋាភិបាលកម្ពុជា-ចិន បានទាក់ទាញវិនិយោគចិនបានមកធ្វើការវិនិយោគនៅខេត្តព្រះសីហនុយ៉ាងច្រើន ជាពិសេស ក្នុងរយៈពេល ២ឆ្នាំចុងក្រោយនេះ ដោយសារខេត្តមានសក្តានុពលដូចជា ព្រលានយន្តហោះ ផ្លូវដឹកជញ្ជូន និង តំបន់ទេសចរណ៍ឆ្នេរសមុទ្រស្រស់ស្អាតជាដើម៕

ដោយ ៖ រ៉ាណេត

ភ្នំពេញ ៖ រដ្ឋាភិបាលប្រទេសអូស្ត្រាតាមរយៈស្ថានទូតអូស្ត្រាលីប្រចាំនៅកម្ពុជា កំពុងសិក្សាពីគម្រោង និងអនុវត្តយុទ្ធសាស្ត្រក្នុងការធ្វើពិពិធកម្មផ្នែកពាណិជ្ជកម្មរវាងប្រទេសទាំង២ រួមជាមួយនឹងគម្រោងទាក់ទាញការវិនិយោគថ្មីបន្ថែមនៅកម្ពុជាផងដែរ។

រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ បានលើកឡើងនៅក្នុងកិច្ចជំនួបពិភាក្សាការងារជាមួយឯកអគ្គរាជទូតអូស្ត្រាលីប្រចាំនៅកម្ពុជា នាព្រឹកថ្ងៃទី១២ ខែឧសភា ឆ្នាំ២០២០នេះថា រដ្ឋាភិបាលអូស្ត្រាលី បានសហការជាមួយកម្ពុជាយ៉ាងជិតស្និទ្ធក្នុងការធានាបាននូវលំនឹងសេដ្ឋកិច្ច និងជីវភាពប្រជាពលរដ្ឋដែលរងផលប៉ះពាល់ពីការរីករាលដាលនៃជំងឺ Covid-19 ហើយក្រៅពីនេះនៅមានការអនុវត្តគម្រោងដទៃទៀតក្នុងវិស័យហេដ្ឋារចនាសម្ព័ន្ធ អប់រំ យេនឌ័រ វិនិយោគ និងពាណិជ្ជកម្មផងដែរ។

លោកបានបញ្ជាក់ថា កម្ពុជា និងអូស្ត្រាលី ក៏ជាភាគីនៃកិច្ចព្រមព្រៀងពាណិជ្ជកម្មសេរីមួយចំនួនដូចជា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងអាស៊ាន-អូស្ត្រាលី និងនូវែលហ្សេឡង់ (AANZ) ហើយកម្ពុជា និងអូស្ត្រាលី នឹងសហការណ៍គ្នាដើម្បីជំរុញការបញ្ចប់ និងអនុវត្តកិច្ចព្រមព្រៀងទាំងនោះឲ្យប្រកបដោយប្រសិទ្ធភាពខ្ពស់។ លោកក៏បានស្នើសុំរដ្ឋាភិបាលអូស្ត្រាលី ពិនិត្យលទ្ធភាពជួយបន្ថែមទៀតក្នុងសកម្មភាពរួមមាន លិខិតបទដ្ឋានគតិយុត្ត និងការអភិវឌ្ឍសមាសធាតុផ្សេងៗក្នុងវិស័យពាណិជ្ជកម្មតាមប្រព័ន្ធអេឡិចត្រូនិក លិខិតបទដ្ឋានគតិយុត្តនៃច្បាប់ស្ដីពីការប្រកួតប្រជែង ក៏ដូចជាចូលរួមអនុវត្តនូវអនុសាសន៍នៃយុទ្ធសាស្ត្រសមាហរណកម្មពាណិជ្ជកម្មកម្ពុជា ២០១៩-២០២៣។

លោកឯកអគ្គរាជទូតអូស្ត្រាលីប្រចាំនៅកម្ពុជា លោក ប៉ាប្លូ កាំង (Pablo Kang) បានលើកឡើងថា រដ្ឋាភិបាលអូស្ត្រាលី បានជួយដល់ក្រសួងពាណិជ្ជកម្មកម្ពុជា រួមមានការជំរុញការអភិវឌ្ឍពាណិជ្ជកម្មតាមប្រព័ន្ធអេឡិចត្រូនិក និងជំនួយបច្ចេកទេសដល់ការរៀបចំសេចក្ដីព្រាងច្បាប់ស្ដីពីការប្រកួតប្រជែង។ លើសពីនោះទៀត អូស្ត្រាលីក៏កំពុងតែសិក្សា និងគ្រោងនឹងបញ្ចប់ការសិក្សានៅឆ្នាំ២០២១នេះ នូវគម្រោងថ្មីមួយដែលផ្ដោតលើការអភិវឌ្ឍសេដ្ឋកិច្ច សម្របសម្រួលវិនិយោគ និងពិពិធកម្មពាណិជ្ជកម្មផងដែរ។

ឯកអគ្គរាជទូតអូស្ត្រាលីបានបញ្ជាក់ថា បច្ចុប្បន្ននេះ កម្ពុជា និងអូស្ត្រាលី ក៏នឹងពិនិត្យលទ្ធភាពក្នុងការពង្រីកការធ្វើពាណិជ្ជកម្មទ្វេភាគី ដោយក្នុងនោះឯកឧត្តមឯកអគ្គរាជទូត បានជម្រាបជូនដែរថា ក្រុមហ៊ុនអូស្ត្រាលីមួយក៏កំពុងតែសិក្សាលទ្ធភាពវិនិយោគក្នុងខ្សែសង្វាក់ផលិតកម្មស្រូវ-អង្ករនៅកម្ពុជា ដើម្បីផ្គត់ផ្គង់ទៅទីផ្សារអូស្ត្រាលី៕

ដោយ ៖ ប៊ី

អន្តរជាតិ ៖ ក្រសួងពាណិជ្ជកម្មរបស់សហរដ្ឋអាមេរិក បានចេញសេចក្ដីព្រាងច្បាប់មួយ ដែលនឹងអនុញ្ញាតឱ្យក្រុមហ៊ុនអាមេរិកមួយចាប់ដៃជាមួយក្រុមហ៊ុន Huawei Technologies ដើម្បីអនុវត្តស្តង់ដារបច្ចេកវិទ្យា 5G របស់ចិន ក្នុងការបង្កើនល្បឿននៃការប្រើប្រាស់ 5G នៅទូទាំងពិភពលោក ។

ក្រុមអ្នកជំនាញបាននិយាយថា សេចក្តីព្រាងច្បាប់មួយពីក្រសួងពាណិជ្ជកម្មអាមេរិកដែលនឹងអនុញ្ញាតឱ្យក្រុមហ៊ុនអាមេរិកធ្វើការជាមួយក្រុមហ៊ុន Huawei Technologies លើស្តង់ដារបច្ចេកវិទ្យា 5G នឹងជួយបង្កើនល្បឿននៃការប្រើប្រាស់ 5G នៅទូទាំងពិភពលោក និងលើកកម្ពស់តម្លាភាពក្នុងកិច្ចសហប្រតិបត្តិការទូរគមនាគមន៍អន្តរជាតិ ប្រសិនបើមានការយល់ព្រម។

ការអត្ថាធិប្បាយនេះបានធ្វើឡើងបន្ទាប់ពីទីភ្នាក់ងារសារព័ត៌មានរ៉យទ័របានផ្សាយថា ក្រសួងពាណិជ្ជកម្មអាមេរិកនឹងចុះហត្ថលេខាលើគោលការណ៍នេះ ដែលនឹងអនុញ្ញាតឱ្យក្រុមហ៊ុនអាមេរិកចូលរួមនៅក្នុងការប្រជុំកំណត់ស្តង់ដារ ដែលក្រុមហ៊ុន Huawei ក៏ជាសមាជិកផងដែរ។

លោក Xiang Ligang អគ្គនាយកនៃក្រុមហ៊ុន Information Consumption Alliance ដែលជាសមាគមឧស្សាហកម្មទូរគមនាគមន៍បានមានប្រសាសន៍ថា “ច្បាប់ថ្មី ប្រសិនបើត្រូវបានអនុម័ត នឹងជួយបង្កើនប្រសិទ្ធភាពក្នុងការកំណត់ស្តង់ដារបច្ចេកទេស និងសន្តិសុខនៃបច្ចេកវិទ្យា 5G ដែលនៅសេសសល់ និងជួយពន្លឿនការស្ថាបនាបណ្តាញ 5G ទូទាំងពិភពលោក។

លោក Xiang បាននិយាយថា “វាស្របនឹងផលប្រយោជន៍របស់ក្រុមហ៊ុន ដែលទាក់ទងនឹងទូរគមនាគមន៍នៅទូទាំងពិភពលោក រួមទាំងអ្នកជំនាញបច្ចេកវិទ្យាអាមេរិក ដែលចង់ធ្វើឱ្យមានសកម្មភាពច្រើននៅក្នុងស្ថាប័នស្តង់ដារអន្តរជាតិ”។

ទីភ្នាក់ងារសារព័ត៌មានរ៉យទ័របានរាយការណ៍ថា សេចក្តីព្រាងច្បាប់នេះកំពុងស្ថិតក្រោមការត្រួតពិនិត្យចុងក្រោយដោយក្រសួង ហើយប្រសិនបើច្បាស់លាស់ វានឹងត្រូវបានដាក់ឱ្យភ្នាក់ងារផ្សេងទៀតសម្រាប់ការអនុម័ត។

ក្រុមហ៊ុន Huawei បដិសេធមិនធ្វើអត្ថាធិប្បាយ។ ទោះយ៉ាងណា ប្រធានសន្តិសុខបច្ចេកវិទ្យាក្រុមហ៊ុន Huawei USA លោក Andy Purdy បានសរសេរលើបណ្តាញសង្គម Twitter ថា “អាចនឹងបើកលទ្ធភាពសម្រាប់កិច្ចសហប្រតិបត្តិការក្នុងកិច្ចខិតខំប្រឹងប្រែងស្តង់ដារ ដែលមានសារៈសំខាន់សម្រាប់ការកំណត់តម្រូវការ និងការផ្តល់វិញ្ញាបនប័ត្រ និងការធ្វើតេស្តឯករាជ្យ។ នេះជាលទ្ធផលជំរុញការធានា និងតម្លាភាព”។

សារព័ត៌មានរ៉យទ័រ បានឱ្យដឹងថា ច្បាប់នេះត្រូវបានរៀបចំឡើងដើម្បីអនុញ្ញាតឱ្យក្រុមហ៊ុនអាមេរិកចូលរួមក្នុងការប្រជុំកំណត់ស្តង់ដារអន្តរជាតិ នៅពេលក្រុមហ៊ុន Huawei មានវត្តមាន។

ក្រសួងពាណិជ្ជកម្មសហរដ្ឋអាមេរិកបានដាក់ក្រុមហ៊ុន Huawei នៅក្នុង “បញ្ជីខ្មៅ” របស់ខ្លួនកាលពីខែឧសភា ឆ្នាំមុន ដោយលើកឡើងពីកង្វល់សន្តិសុខជាតិ។ ការចុះបញ្ជីខ្មៅនេះបានដាក់កម្រិតការលក់ទំនិញ និងបច្ចេកវិទ្យារបស់សហរដ្ឋអាមេរិកដល់ក្រុមហ៊ុន ហើយបានចោទជាសំណួរអំពីរបៀបដែលក្រុមហ៊ុនអាមេរិកអាចចូលរួមក្នុងការបង្កើតស្តង់ដារឧស្សាហកម្ម។

លោក Fu Liang អ្នកវិភាគឯករាជ្យ ដែលបានសង្កេតលើឧស្សាហកម្មទូរគមនាគមន៍អស់រយៈពេលជាងមួយទសវត្សរ៍មកហើយ បានមានប្រសាសន៍ថា “ស្តង់ដារឧស្សាហកម្មមានសារៈសំខាន់ណាស់សម្រាប់ក្រុមហ៊ុនទូរគមនាគមន៍។ បច្ចេកវិទ្យារបស់ពួកគេត្រូវបានចាត់ទុកថាចាំបាច់សម្រាប់ស្តង់ដារ 5G សាកល នឹងមិនត្រឹមតែជម្រុញដល់ឧស្សាហកម្មរបស់ពួកគេប៉ុណ្ណោះទេ ប៉ុន្តែថែមទាំងប្រាក់ចំណូលរបស់ពួកគេផងដែរ”៕ CHINA DAILY/ASIA NEWS NETWORK