រដ្ឋាភិបាលគាំទ្រឲ្យរោងចក្រកាត់ដេរបង្វែរមកផលិតម៉ាស និងសម្ភារៈការពារជំងឺCovid-19 សម្រាប់នាំចេញ

ដោយវុត្ថា

ភ្នំពេញៈ រដ្ឋាភិបាលកម្ពុជាបានប្រកាសគាំទ្រ និងលើកទឹកចិត្តឱ្យបណ្តារោងចក្រកាត់ដេរ ចូលរួមធ្វើការផលិតម៉ាសគ្រប់ប្រភេទ សម្ភារៈពេទ្យ និងសម្លៀកបំពាក់សម្រាប់ការពារជំងឺឆ្លង សម្រាប់ផ្គត់ផ្គង់តម្រូវការក្នុងស្រុក និងនាំចេញ ខណៈរោងចក្រមួយចំនួនប្រឈមនឹងការព្យួរ និងបិទជាបណ្តោះអាសន្នដែលបង្កឡើងដោយជំងឺ Covid–19។

នេះបើយោងតាមលិខិតរបស់លោក អូន ព័ន្ធមុនីរ័ត្ន ឧបនាយករដ្ឋន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តបទៅនឹងសំណើរសមាគមរោងចក្រកាត់ដេរកម្ពុជា ដែលត្រូវបានផ្សព្វផ្សាយនៅថ្ងៃទី១៣ ខែឧសភា ឆ្នាំ ២០២០នេះ។

លោក អូន ព័ន្ធមុនីរ័ត្នបានឱ្យដឹងថា “យោងតាមសំណើរបស់សមាគមរោងចក្រកាត់ដេរនៅកម្ពុជា ក្នុងបរិការណ៍នៃការរាតត្បាតជំងឺកូវីដ១៩ ដែលកម្ពុជា និងសាកលលោកកំពុងមានតម្រូវការម៉ាសគ្រប់ប្រភេទ សម្ភារៈពេទ្យ និងសម្លៀកបំពាក់សម្រាប់ការពារជំងឺឆ្លង រាជរដ្ឋាភិបាលកម្ពុជាគាទ្រ និងលើកទឹកចិត្តឲ្យបណ្តារោងចក្រកាត់ដេរនៅកម្ពុជា ចូលរួមធ្វើការផលិតម៉ាសគ្រប់ប្រភេទ សម្ភារៈពេទ្យ និងសម្លៀកបំបាក់សម្រាប់ការងារជំងឺឆ្លង សម្រាប់ផ្គត់ផ្គង់តម្រូវការក្នុងស្រុក និងបម្រើការនាំចេញ។

សមាគមរោងចក្រកាត់ដេរនៅកម្ពុជា (GMAC) បានឱ្យដឹងកាលពីចុងសប្តាហ៍មុននេះថា មានរោងចក្រចំនួន១៨០ បានប្រកាសព្យួរការងារកម្មករ និងមានកម្មករនិយោជិតជាច្រើនម៉ឺននាក់ ត្រូវបានប៉ះពាល់ការងារ និងរោងចក្រចំនួន៦០ផ្សេងទៀត នឹងព្យួរផលិតកម្មនាពេលខាងមុខនេះ ដែលបង្កឡើងដោយជំងឺCovid-19។

ក្រសួងសុខាភិបាលកម្ពុជា បានចំណាយថវិកាប្រមាណ៧លានដុល្លារ លើការទិញម៉ាស់ សម្ភារៈពេទ្យ និងបរិក្ខារមួយចំនួន ដើម្បីផ្ដល់ជូនដល់គ្រប់២៥ខេត្ត–ក្រុង សម្រាប់ការពារពីជំងឺកូវីដ១៩ ខណៈកម្ពុជានឹងទទួលបាន១១លានម៉ាស់គ្រប់តាមផែនការដែលបានដាក់ចេញដោយរដ្ឋាភិបាលនៅដើមខែឧសភានេះ៕

អភិបាលខេត្តបាត់ដំបងអះអាងថា គម្រោងដំណើរការព្រលានយន្តហោះឡើងវិញកំពុងពន្លឿនការសិក្សាលម្អិត

ដោយ ៖ រ៉ាណេត

បាត់ដំបង ៖ អនុវត្តទៅតាមផែនការ និងគោលនយោបាយដែលបានដាក់ចេញដោយប្រមុខរាជរដ្ឋាភិបាលកម្ពុជា តម្រូវឱ្យមានការស្តារ និងស្ថាបនាព្រលានយន្តហោះក្នុងខេត្តបាត់ដំបង ដើម្បីដាក់ឱ្យដំណើរការឡើងវិញនោះ ពេលនេះកំពុងស្ថិតនៅក្នុងដំណាក់សិក្សាលម្អិតពីសំណាក់មន្ត្រីពាក់ព័ន្ធ និងក្រុមហ៊ុនជំនាញក្នុងស្រុក។

អភិបាលខេត្តបាត់ដំបង លោក ងួន រតនៈ បានមានប្រសាសន៍នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្តរបស់រដ្ឋបាលខេត្តនៅទីស្ដីការគណៈរដ្ឋមន្ត្រី កាលពីព្រឹកថ្ងៃទី១៣ ខែឧសភា ឆ្នាំ២០២០នេះថា បច្ចុប្បន្ននេះ គម្រោងស្ថាបនាព្រលានយន្តហោះខេត្តបាត់ដំបង គឺត្រូវបានមន្ត្រីជំនាញ និងក្រុមការងារកំពុងតែយកចិត្តទុកដាក់ក្នុងការសិក្សា។

លោកបានមានប្រសាសន៍បន្តទៀតថា “មន្ត្រីជំនាញផ្នែកបច្ចេកទេសអាកាសចរស៊ីវិល រួមជាមួយក្រុមហ៊ុនជំនាញក្នុងស្រុក ពួកគាត់កំពុងតែសិក្សាលម្អិតពាក់ព័ន្ធទៅនឹងការរៀបចំហេដ្ឋារចនាសម្ព័ន្ធនានាដែលពាក់ព័ន្ធទៅនឹងស្ដារ និងស្ថាបនាបន្ថែមទៅលើទីធ្លានៃព្រលានចាស់ ថាតើគួរតែរក្សាទំហំព្រលានចាស់ ឬត្រូវធ្វើ និងពង្រីក”។

លោកបានបន្តថា “ការស្ដារ ឬស្ថាបនាឡើងវិញក្នុងទំហំប៉ុណ្ណានោះ គឺត្រូវសិក្សាឱ្យច្បាស់ពីតម្រូវការជាក់ស្ដែង និងពិតប្រាកដនៅក្នុងស្រុក។ ជាមួយគ្នានេះក្រុមហ៊ុនជំនាញក៏កំពុងសិក្សាយ៉ាងលម្អិតទៅលើទីធ្លាសម្រាប់ទីចំណតរបស់យន្តហោះក្នុងស្រុក ក៏ដូចជាទីសម្រាប់រថយន្តចូលចតសម្រាប់ដឹកអ្នកដំណើរ និងសម្រាប់ដឹកទំនិញផងដែរ ដោយឡែកពាក់ព័ន្ធទៅនឹងពេលវេលានៃការចាប់អនុវត្តគម្រោងជាក់លាក់នៅពេលណា ហើយចំណាយថវិកាអស់ប៉ុន្មាន នៅមិនទាន់អាចបញ្ជាក់បាននោះទេ”។

អគ្គនាយករងបច្ចេកទេស រដ្ឋលេខាធិការដ្ឋានអាកាសចរស៊ីវិល លោក ស៊ីន ចាន់សិរីវុត្ថា បានមានប្រសាសន៍អាកាសយានដ្ឋានខេត្តបាត់ដំបងនៅពេលបច្ចុប្បន្ននេះ គឺជាប្រភេទអាកាសយានដ្ឋានក្នុងស្រុក មានលក្ខណៈតូចចង្អៀត និងទ្រុឌទ្រោម ដែលយើងត្រូវតែពិនិត្យ ដើម្បីស្ដារ និងកែលម្អរឡើងវិញឱ្យស្របតាមទៅស្ដង់ដារអន្តរជាតិ ដែលការផ្តួចផ្ដើមនេះត្រូវបានរដ្ឋមន្ត្រីទទួលបន្ទុកអាកាសចរស៊ីវិល បានប្រគល់ការងារឱ្យក្រុមមន្ត្រីជំនាញ ដើម្បីលើកសំណើរ ថាតើត្រូវកែលម្អរ និងអភិវឌ្ឍន៍អាកាសយានដ្ឋានមួយនេះរបៀបណា។

លោក ស៊ីន ចាន់សិរីវុត្ថា បានមានប្រសាសន៍ថា “ជាជំហានដំបូងយើងគិតថា ត្រូវស្ដារឡើងវិញដើម្បីឱ្យបានគ្រប់ស្ដង់ដារសុវត្ថិភាពត្រឹមកម្រិត 3C ដែលយើងអាចទទួលចុះចតយន្តហោះក្នុងស្រុកប្រកបដោយសុវត្ថិភាព។ បន្ទាប់មកទៀត យើងបានពិនិត្យមើលផែនការអភិវឌ្ឍន៍របស់នគរូបនីយកម្មនៅខេត្តបាត់ដំបង ដែលបានបង្ហាញពីភាពសមស្រប ទៅនឹងផែនការនៃការអភិវឌ្ឍ និងយល់ស្របក្នុងការកែសម្រួល និងស្តារអាកាសយានដ្ឋានមួយនេះឡើងវិញសម្រាប់ប្រើប្រាស់ក្នុងរយៈពេលខ្លី និងមធ្យម ប៉ុន្តែសម្រាប់រយៈពេលវែង គឺចាំបាច់ត្រូវតែមានការផ្លាស់ប្ដូរទីតាំងថ្មី” ៕

ខេត្តបាត់ដំបងទាក់ទាញលំហូរទុនវិនិយោគលើវិស័យអចលនទ្រព្យ ជាង៧៦លានដុល្លារ

ដោយៈ រ៉ាណេត

បាត់ដំបងៈ នៅក្នុងរយៈពេលជិតមួយទសវត្សរ៍ចុងក្រោយ ដែលវិស័យសំណង់ និងអចលនទ្រព្យនៅកម្ពុជាមានភាពរីកចម្រើន និងអភិវឌ្ឍន៍ស្ទើរទូទាំងប្រទេស សម្រាប់តែខេត្តបាត់ដំបង កំណើនទុនវិនិយោគនៅក្នុងវិស័យអចលនទ្រព្យ បានកើនឡើងរហូតដល់ជាង៧៦លានដុល្លារ។

អភិបាលខេត្តបាត់ដំបង លោក ងួន រតនៈ បានមានប្រសាសន៍នៅក្នុងអង្គសន្និសីទសារព័ត៌មានស្ដីពីវឌ្ឍនភាព និងទិសដៅការងាររដ្ឋបាលខេត្តបាត់ដំបង នៅទីស្ដីការគណៈរដ្ឋមន្ត្រីនៅពញរឹកថ្ងៃទី១៣ ខែឧសភា ឆ្នាំ២០២០នេះថា វិស័យអចលនទ្រព្យ និងសំណង់នៅក្នុងខេត្តបាត់ដំបងនាពេលបច្ចុប្បន្ននេះ គឺមានការអភិវឌ្ឍ និងរីកចម្រើនគួរឱ្យកត់សម្គាល់។

លោកបានបញ្ជាក់ទៀតថា ក្រោមការអនុវត្តតាមគោលនយោបាយ របស់ប្រមុខរាជរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ត្រីកម្ពុជា ខេត្តបាត់ដំបងចាប់តាំងពីឆ្នាំ២០១២ រហូតមក វិស័យសេដ្ឋកិច្ចនៅក្នុងខេត្ត ក៏ដូចជាកម្រិតជីវភាពរបស់ប្រជាជនមានការកើនឡើងជាបន្តបន្ទាប់។ លោកបន្តថា ដោយឡែកសម្រាប់តែវិស័យអចលទ្រព្យនៅទូទាំងខេត្តក៏មានភាពរីកចម្រើន និងអភិវឌ្ឍន៍ផងដែរ ដែលនៅក្នុងនោះវិស័យសំណង់បានដើរតួយ៉ាងសំខាន់ ក្នុងការជួយជំរុញកំណើនសេដ្ឋកិច្ចក្នុងតំបន់ផងដែរ។

នៅក្នុងអង្គសន្និសីទសារព័ត៌មានដដែលនេះ លោកងួន រតនៈ បានបញ្ជាក់ថា “ចាប់តាំងពីឆ្នាំ២០១២ រហូតមកត្រឹមចុងឆ្នាំ២០១៩ វិស័យសំណង់ និងអចលនទ្រព្យនៅទូទាំងខេត្តបាត់ដំបង ការរៀបចំពុះដីឡូតិ៍ សំណង់បុរីលំនៅដ្ឋាន រោងចក្រសហគ្រាសជាដើម មានសរុបរហូតដល់៨៣៩គម្រោង ស្មើនឹងប្រមាណ៣២៥,៣១៨ម៉ែត្រការ៉េ ដែលមានទុនវិនិយោគសរុបចំនួន៧៦,១៨៤,៤១០ដុល្លារ ដែលជាទិន្នន័យបង្ហាញពីភាពរីកចម្រើននៅក្នុងវិស័យមួយនេះ”។

បច្ចុប្បន្ននេះខេត្តបាត់ដំបង បានអភិវឌ្ឍន៍ខ្លួនយ៉ាងសកម្ម ជាពិសេសបានទាក់ទាញការវិនិយោគជាមួយគម្រោងធំៗជាច្រើន នៅក្នុងវិស័យឧស្សាហកម្ម និងកសិកម្ម និងទេសចរណ៍។ សម្រាប់កំណើនសេដ្ឋកិច្ច មានចំនួនស្មើនឹងប្រមាណ៨,១៨ភាគរយ នៃសេដ្ឋកិច្ចរបស់ប្រទេសកម្ពុជា ដោយប្រាក់ចំណូលគិតជាមធ្យមប្រចាំឆ្នាំចំនួន១៦១៦,៤ ដុល្លារក្នុងម្នាក់៕

ទំហំពាណិជ្ជកម្មទ្វេភាគីរវាងកម្ពុជា និងជប៉ុនសម្រេចបាន៥៨៦លានដុល្លារ ក្នុងត្រីមាសទី១ឆ្នាំនេះ

ដោយ ប៊ី

ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា និងជប៉ុនបានកើនឡើងដល់ជាង ៥៨៦ លានដុល្លារក្នុងត្រីមាសទី១ឆ្នាំនេះ កើនឡើង៤,៩០ភាគរយ បើធៀបនឹងរយៈពេលដូចគ្នាកាលឆ្នាំមុន។ នេះបើយោងតាមរបាយការណ៍អង្គការពាណិជ្ជកម្ម ក្រៅប្រទេសរបស់ជប៉ុន (JETRO) កាលពីម្សិលមិញនេះ។

ការនាំចេញរបស់កម្ពុជាទៅកាន់ជប៉ុន មានតម្លៃជាង៤៧៥លានដុល្លារក្នុងត្រីមាសទី១ ឆ្នាំ២០២០ កើនឡើង៤,៤ភាគរយ បើធៀបនឹងរយៈពេលដូចគ្នាកាលពីឆ្នាំមុន ខណៈការនាំចូលរបស់កម្ពុជាពីជប៉ុនមានតម្លៃ១១១ លានដុល្លារ កើនឡើង៧ភាគរយ។

កម្ពុជា និងជប៉ុនបានប្តេជ្ញារួមគ្នា ក្នុងការបង្កើនទំហំពាណិជ្ជកម្មទ្វេភាគីដល់ជាង២ ពាន់លានដុល្លារនៅឆ្នាំនេះ។

យោងតាមទិន្នន័យរបស់ JETRO បានបង្ហាញថា ប្រទេសកម្ពុជាបាននាំចេញទំនិញជាង១,៧ពាន់លានដុល្លារ ទៅកាន់ប្រទេសជប៉ុនកាលពីឆ្នាំមុន កើនឡើង៧,៧ភាគរយ ធៀបនឹងឆ្នាំ២០១៨ ។ កម្ពុជាបាននាំចូលផលិតផលមានតម្លៃជង ៥៦៣លានដុល្លារកើនឡើង៣៣,៤ ភាគរយក្នុងឆ្នាំ២០១៩ ធៀបនឹងឆ្នាំ ២០១៨។

ទិន្នន័យពីក្រុមប្រឹក្សាអភិវឌ្ឍន៍កម្ពុជា(CDC)បានបង្ហាញថា ចន្លោះពីឆ្នាំ១៩៩៥ ដល់ខែកញ្ញា ឆ្នាំមុនគម្រោងវិនិយោគចំនួន១៤១ របស់ជប៉ុនមានទឹកប្រាក់២,៥ ពាន់លានដុល្លារនៅកម្ពុជា។ ក្នុងចំណោមគំរោងវិនិយោគទាំាំងនោះ មានគំរោងចំនួន៦៦ ស្ថិតនៅក្នុងតំបន់សេដ្ឋកិច្ចពិសេសដោយមានទុនវិនិយោគប្រមាណ ៣៤០ លានដុល្លារ។

ទិន្នន័យបានបង្ហាញថា គម្រោងភាគច្រើនគឺថាមពល ការតម្លើងគ្រឿងអេឡិចត្រូនិច គ្រឿងបន្លាស់រថយន្ត ឧស្សាហកម្ម កសិ– ឧស្សាហកម្ម កែច្នៃអាហារ បដិសណ្ឋារកិច្ច សុខភាព និងផ្នែកលក់រាយ៕

បន្ទាប់ពីកាត់ចូលក្នុងរដ្ឋបាលរាជធានីតើតំបន់កំបូលទាក់ទាញការវិនិយោគយ៉ាងដូចម្តេច?

ដោយវុត្ថា

ភ្នំពេញៈ តំបន់កំបូលដែលពីមុនត្រូវបានគេគិតថា មានចំងាយឆ្ងាយពីរាជធានីភ្នំពេញ តែរហូតមដល់ពេលនេះតំបន់នេះស្ថិតនៅមិនឆ្ងាយនោះទេ ខណៈកំបូលគឺជាខណ្ឌថ្មី ដែលត្រូវបានកាត់ចេញពីខណ្ឌពោធិ៍សែនជ័យ ។ តំបន់នេះកំពុងមានសក្តានុខ្ពស់ ដែលមានរោងចក្រច្រើន និងប្រជាពលរដ្ឋតំាងទីលំនៅច្រើន ព្រមទាំងមានហេដ្ឋារចនាសម្ព័ន្ធយ៉ាងល្អប្រសើរ។

លោកកាង សុធី នាយកប្រតិបត្តិក្រុមហ៊ុន Century21 Land Station បានឱ្យដឹងកាលពីចុងសប្តាហ៍កន្លងមកនេះថា សម្រាប់ដីធ្លីនៅក្នុងតំបន់នេះ មានតម្លៃចន្លោះពី៥០ទៅ១០០ដុល្លារអាមេរិក នៅក្នុងមួយម៉ែត្រការ៉េដែលអាចសាងសង់លំនៅឋានបាន។ ម្យ៉ាងទៀត តំបន់នេះមានសក្តានុពលខ្ពស់ ដែលអ្នកមានធនធានអាចទិញដីសម្រាប់សាងសង់ឃ្លាំងសម្រាប់ស្តុកទំនិញផ្សេងៗ ។

លោកបន្តថា “យើងក៏អាចសាងសង់បន្ទប់ជួល សម្រាប់កម្មករស្នាក់នៅ លំនៅឋានសម្រាប់រស់នៅ និងអាចធ្វើអ្វីៗទៅតាមប្រថ្នារបស់យើងគ្រប់គ្នាបាន”។ លោកបន្ថែមថា “ជាពិសេសតំបន់កំបូលមានភាពទាក់ទាញខ្ពស់ ដោយសារនៅជាបន់នេះ នឹងផ្លូវជាតិលេខ៤ ដែលជាផ្លូវសេដ្ឋកិច្ចដ៏សំខាន់របស់កម្ពុជា ដែលមានការនាំចេញ នាំចូលនូវទំនិញគ្រប់ប្រភេទទៅកាន់កំពង់ផែអន្តរជាតិខេត្តព្រះសីហនុ”។

លោកឃឹម ស៊ុនសូដា អភិបាលខណ្ឌកំបូលធ្លាប់បានឱ្យដឹងកាលពីពេលថ្មីៗថា បើទោះជារយៈពេលនៃការបង្កើតខណ្ឌកំបូល គិតមកទល់ពេលនេះ មានរយៈពេលខ្លីក៏ពិតមែន ប៉ុន្តែសមិទ្ធផលជាច្រើនត្រូវបានលេចចេញកជាបណ្តើរៗ ដូចជា ការរៀបចំសណ្តាប់ធ្នាប់ រៀបចំសួនច្បារ និងដាំដើមឈើលំអរសោភ័ណ្ឌភាព តាមដងផ្លូវជាតិលេខ៤ ជួលជុលផ្លូវចាក់គ្រួសតាមភូមិ សង្កាត់ សម្រាប់ឲ្យប្រជាពលរដ្ឋធ្វើដំណើរបានស្រួល និងដាក់ភ្លើងអំពូលសឡាតាមបង្គោលក្នុងសង្កាត់មួយចំនួន។

ខណ្ឌកំបូលជាខណ្ឌមួយ ស្ថិតនៅប៉ែកខាងលិចនៃរាជធានីភ្នំពេញ ដែលមានព្រំប្រទល់ខាងលិចទល់នឹងស្រុកអង្គស្នួល ខេត្តកណ្តាល ព្រំប្រទល់ខាងកើតទល់នឹងខណ្ឌពោធិ៍សែនជ័យ ព្រំប្រទល់ខាងត្បូងទល់នឹងខណ្ឌដង្កោ និងព្រំប្រទល់ខាងជើងទល់នឹងខណ្ឌព្រែកព្នៅ មានផ្ទៃក្រឡាសរុបប្រមាណ៩ពាន់ហិចតាជាងមាន៧សង្កាត់ សង្កាត់កំបូល សង្កាត់កន្ទោក សង្កាត់ឳឡោក សង្កាត់ស្នោរ សង្កាត់ភ្លើងឆេះរទេះ សង្កាត់បឹងធំនិងសង្កាត់ប្រទះឡាង៕

ខ័ណ្ឌព្រែកព្នៅបាននិងកំពុងទាក់ទាញវិនិយោគលើលំនៅឋាន និងបណ្តុំអាគារពាណិជ្ជកម្ម

ដោយ វុត្ថា

ភ្នំពេញៈ តំបន់ព្រែកព្នៅ បច្ចុប្បន្ននេះបាននិងកំពុងទាក់ទាញការវិនិយោគលំនៅឋាន និងពាណិជ្ជកម្ម ដែលជំរុញឱ្យតំបន់នេះ កាន់តែមានសក្តានុពលក្នុងវិស័យអចលនទ្រព្យ ដោយមិនចាញ់តំបន់ដទៃនៃទីក្រុងភ្នំពេញនោះទេ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានឲ្យដឹងនៅថ្ងៃទី១២ ឧសភា ឆ្នាំ ២០២០នេះឱ្យដឹងថា ខណ្ឌព្រែកព្នៅចាប់ផ្តើមមានការអភិវឌ្ឍដី ដោយតំបន់វាលស្រែ បឹង ត្រូវបានលុប ហើយក្លាយជាតំបន់លំនៅដ្ឋាន និងអាគារពាណិជ្ជកម្ម។

លោកបន្តថា “ដីមួយចំនួនត្រូវបានកែប្រែដីទំនេរជាលំនៅឋាន និងសាងសង់បូរី ខណៈបច្ចុប្បន្ន សន្ទុះនៃការអភិវឌ្ឍន៍លំនៅឋានមានល្បឿនលឿន ព្រោះអ្នកអភិវឌ្ឍបាន និងកំពុងចាប់ឳកាសក្នុងការវិនិយោគ ដោយសារតម្លៃដីសម្រាប់វិនិយោគអាចរកផលចំណេញបាន។

លោកច្រឹក សុខនីមបន្តថា តំបន់នេះបាននឹងកា្លយជាតំបន់លំនៅឋាន ដោយគម្រោងលំនៅឋានជាច្រើន ដូចគម្រោងបុរីមួយចំនួនបាន និងកំពុងបោះទីតាំងវិនិយោគរបស់ខ្លួននៅទីនេះ។

ជាមួយគ្នានេះ លោកឌឹត ចណ្ណា នាយកប្រតិបត្តិក្រុមហ៊ុនអចលនទ្រព្យ Lucky Real Estate Cambodia ឱ្យដឹងដែរថា ស្ថានភាពអចលនទ្រព្យនៅខណ្ឌព្រែកព្នៅឃើញមានសន្ទុះច្រើន ដោយមានគម្រោងបន្ថែមច្រើន ហើយឥឡូវយើងឃើញមានការអភិវឌ្ឍន៍ចំរុះដូចជាលំនៅឋាន អាជីវកម្ម និងផ្សារ។

លោកឌិត ចណ្ណាបានបន្តថា “តំបន់ព្រែកព្នៅ អាចនឹងកា្លយជាតំបន់ដែលមានការអភិវឌ្ឍន៍ចំរុះ ដោយសារយើងឃើញ មានការអភិវឌ្ឍន៍លំនៅឋាន ការធ្វើអាជីវកម្មផ្សេងៗ និងក៏ឃើញមានវិនិយោគិនចិនចូលទៅអភិវឌ្ឍនៅតំបន់នេះដែរ” ។

តំបន់ព្រែកព្នៅដែលស្ថិតនៅខាងជើង ឆៀងខាងលិចនៃរាជធានីភ្នំពេញ ជាតំបន់មួយក្នុងចំណោមតំបន់ ដែលបាននិងកំពុងបង្ហាញពីសក្តានុពលដ៏សំខាន់ សម្រាប់ការអភិវឌ្ឍន៍ គម្រោងលំនៅឋានដែលមានតម្លៃសមរម្យ និងមានចំងាយប្រហែល១៥គីឡូម៉ែត្រពីទីក្រុងភ្នំពេញ។

នាពេលបច្ចុប្បន្ននេះ មានគម្រោងសំណង់លំនៅដ្ឋានបែបទំនើប និងទាន់សម័យរបស់ក្រុមហ៊ុនអភិវឌ្ឍបុរី ខេ ស៊ីស្ថិតក្នុងតំបន់ព្រែកព្នៅ នៃរាជធានីភ្នំពេញនេះ បាននឹងកំពុងតែមានភាពទាក់ទាញមួយ និងសម្រុកសាងសង់យ៉ាងមមាញឹក ដើម្បីបញ្ចប់ទៅតាមគម្រោងទាំងស្រុងនៅត្រឹមឆ្នាំ២០២១ ៕

សញ្ញាវិជ្ជមាន៖ ទីផ្សារអគារពាណិជ្ជកម្មនៅហុងកុងចាប់ផ្តើមមានចរន្តទិញ-លក់ឡើងវិញ

ដោយ ហ្សូលី

ភ្នំពេញៈ ជាលើកដំបូងហើយ ក្នុងរយៈពេលជាងមួយទសវត្សរ៍កន្លងមកនេះ ដែលអចលនទ្រព្យពាណិជ្ជកម្មដ៏សំខាន់ នៃទីក្រុងហុងកុង បានត្រលប់មករកភាពល្អប្រសើរឡើងវិញ ដោយប្លុកអគារទាំងមូលត្រូវបានគេដាក់លក់ នៅហុងកុង ដែលជាទីក្រុងមានអចលនទ្រព្យថ្លៃជាងគេបំផុតនៅលើពិភពលោក។

វិនិយោគិនអចលនទ្រព្យរយៈពេលវែងមួយចំនួនព្យាករណ៍ថា នឹងមានការធ្លាក់ចុះនៅក្នុងពាណិជ្ជកម្ម របស់ទីក្រុងពាក់ព័ន្ធវិស័យអចលនទ្រព្យ ដែលនេះជាការព្យាករណ៍ខុសស្រឡះមួយ។

ផ្នែកលក់រាយរបស់ហុងកុង ត្រូវបានទទួលរងនូវផលប៉ះពាល់យ៉ាងខ្លាំង ពីដំបូងដោយសារការតវ៉ាប្រឆាំងនឹងរដ្ឋាភិបាលរាប់ខែ ហើយនឹងមានស្ថានភាពកាន់តែយ៉ាប់យឺនបន្ទាប់មកការរីករាលដាលនៃមេរោគឆ្លង Covid-19 ។

សេដ្ឋកិច្ចទីក្រុងបានធ្លាក់ចុះ អាក្រក់បំផុតនៅក្នុងត្រីមាសទីមួយ នៃឆ្នាំនេះដោយវាបានដាំកក្បាលចុះ៨,៩ ភាគរយ។

អគារកម្ពស់៦ជាន់ ស្ថិតនៅលើផ្លូវហេនេស៊ី ត្រូវបានដាក់លក់តម្លៃ១ពាន់លានដុល្លារហុងកុង (១៣០លានដុល្លារអាមេរិក) បច្ចុប្បន្នត្រូវបានកាន់កាប់ដោយក្រុមហ៊ុននាឡិកាប្រណីតស្វីស Breitling និងគ្រឿងអលង្ការហុងស៊ុយលួន។ វាមានផ្ទៃក្រឡាសរុប ១០,០០០ហ្វីតការ៉េ និងត្រូវបានអភិវឌ្ឍជាអគារពាណិជ្ជកម្មថ្មី ដែលមានផ្ទៃក្រឡាសរុប ៣០០,០០០ហ្វីតការ៉េ។

លោក Reeves Yan ប្រធានទីផ្សារមូលធននៅទីក្រុងហុងកុង សម្រាប់ក្រុមហ៊ុនអចលនទ្រព្យអន្តរជាតិ CBRE ដែលជាភ្នាក់ងារតែមួយគត់ សម្រាប់លក់បានមានប្រសាសន៍ថា “ ទ្រព្យសម្បត្តិតិចតួចណាស់ ដែលផ្លាស់ប្តូរនៅហុងកុងនេះ ដោយសារតែទីតាំងមានសក្តានុពលមិនគួរឱ្យជឿ ហើយតម្លៃអាចចរចាបាន” ។

យោងតាម CBRE បានឱ្យដឹងថា ចំនួននៃអគារពាណិជ្ជកម្ម២០ ត្រូវបានកត់ត្រាថាលក់ចេញនៅក្នុងត្រីមាសទី១៕

អ្នកជំនាញ៖ តំបន់ស្ថិតនៅតាមផ្លូវជាតិលេខ៦ នៅតែផ្តល់ឱកាសចំណេញសម្រាប់អ្នកវិនិយោគ

ដោយៈ រ៉ាណេត

ភ្នំពេញៈ តំបន់ជាយក្រុង ត្រើយខាងកើតនៅតាមផ្លូវជាតិលេខ៦A រាប់ចាប់ពីគល់ស្ពានជ្រោយចង្វារ ខណ្ឌជ្រោយចង្វារ រហូតដល់ចំណុចស្ពានព្រែកតាម៉ាក់ នៅតែមានភាពទាក់ទាញ និងផ្តល់ឱកាសចំណេញសម្រាប់អ្នកវិនិយោគ ជាពិសេសការអភិវឌ្ឍលើវិស័យលំនៅដ្ឋាន។

អ្នកជំនាញនៅក្នុងវិស័យអចលនទ្រព្យ លោកស្រី តាំង ហួរ នាយិកាក្រុមហ៊ុនអចលនទ្រព្យ AMATAK Property Service បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី១២ ខែឧសភា ឆ្នាំ២០២០ថា ស្ទើរតែគ្រប់តំបន់ជាយក្រុងទាំងអស់ សុទ្ធតែមានសក្ដានុពល និងការអភិវឌ្ឍជាមួយនឹងគម្រោងធំៗជាច្រើន។

លោកស្រីបញ្ជាក់ថា “នៅត្រើយខាងកើត ជាពិសេសតំបន់ជ្រោយចង្វារ បានប្រែក្លាយពីតំបន់លំនៅដ្ឋានតូចៗ ទៅជាអគារពាណិជ្ជកម្ម សំណង់ខុនដូ អាផាតមិនជាច្រើនគម្រោងរួចទៅហើយ។ លោកស្រីបន្ថែមថា “បើគិតចាប់ពីព្រែកលៀប រហូតដល់តំបន់ព្រែកអញ្ចាញ នៅជាប់ផ្លូវជាតិលេខ៦ បានក្លាយជាតំបន់អភិវឌ្ឍន៍លំនៅដ្ឋានដ៏ទាក់ទាញដែលមានបុរីមិនតិចជាង១០នោះទេ ដូចជា បុរីអ័រគីដេ បុរីប៉េងហួត បុរី The Flora និងបុរីជាច្រើនទៀតកំពុងសាងសង់” ។

ជាមួយនឹងភាពរីកចម្រើននេះ លោកស្រី តាំង ហួរ បានមានប្រសាសន៍បន្តទៀតថា “នៅតំបន់ខាងកើត គឺផ្តល់ភាពល្អប្រសើរដល់ការរស់នៅ ដែលក្រៅពីមានភាពអំណោយផលខ្យល់ទន្លេ ទីតាំងភូមិសាស្ត្រមានភាពងាយស្រួលចេញ ចូលក្រុង ដែលតភ្ជាប់ដោយស្ពានឆ្លងទន្លេជាច្រើន ថែមទាំងមានសុវត្ថិភាព គ្មានការរំខាន់ពីការដឹកជញ្ជូនដោយរថយន្តធំៗដូចផ្លូវជាតិលេខ១ ផ្លូវជាតិលេខ៤ និងផ្លូវជាតិលេខ៥នោះទេ។ ភាពល្អប្រសើរទាំងអស់នេះហើយ ដែលធ្វើឱ្យតំបន់នេះមានភាពទាក់ទាញ និងប្រជាប្រិយភាពក្នុងការវិនិយោគ” ។

លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal (KFA) ធ្លាប់បានមានប្រសាសន៍ថា មិនថាពេលនេះ ឬថ្ងៃអនាគតនោះទេ តំបន់ជ្រោយចង្វារនៅតែមានភាពទាក់ទាញ និងមានសក្ដានុពលសម្រាប់ការវិនិយោគ។

លោកឧកញ៉ាបានបន្តថា “ភាពទាក់ទាញទាំងអស់នោះ ក៏ព្រោះតែនៅតំបន់នេះមានគម្រោងអភិវឌ្ឍធំៗជាច្រើន ដូចជា ទីក្រុងរណប និងមជ្ឈមណ្ឌលពិព័រណ៍ខ្នាតអន្តរជាតិរបស់ក្រុមហ៊ុន OCIC និងទីក្រុងរណប និងមជ្ឈមណ្ឌលកម្សាន្តលំដាប់អន្តរជាតិរបស់ក្រុមហ៊ុន លី យ៉ុងផាត់ រួមជាមួយបណ្តុំលំនៅដ្ឋានបែបទំនើបកម្រិតខ្ពស់ជាដើម” ។

បន្ថែមពីនេះនៅមានស្ថាប័នរដ្ឋធំៗ និងបណ្តាញហេដ្ឋារចនាសម្ព័ន្ធជាច្រើនត្រូវបានបង្កើតឡើង ជាពិសេស ស្ពានជាច្រើនកន្លែងក៏បានសាងសង់រួចរាល់ ងាយស្រួលក្នុងការធ្វើដំណើរឆ្លងកាត់ និងចេញចូលក្រុង។

លោកឧកញ៉ានួន រិទ្ឋីបានបន្តថា សកម្មភាពអភិវឌ្ឍន៍ទាំងអស់នេះហើយ ដែលជាកត្តារុញច្រានទំនោរចិត្តរបស់អ្នកវិនិយោគជាតិ និងអន្តរជាតិ ឱ្យងាកទៅធ្វើការវិនិយោគនៅតំបន់នេះ ហើយវាអាចនឹងបន្តរហូតដល់ព្រំប្រទល់ រវាងខណ្ឌជ្រោយចង្វារ និងស្រុកមុខកំពូលខេត្តកណ្តាល។

ដោយឡែកចំពោះតម្លៃដី ក៏នៅតែបន្តកើនឡើងជាបន្តបន្ទាប់ ដែលនៅតែផ្តល់ឱកាសចំណេញសម្រាប់អ្នកវិនិយោគ៕

ការសិក្សា៖ បណ្តាប្រទេសអាស៊ានចំនួនបីអាចនឹងចំណាយពេលយូរក្នុងការស្តារសេដ្ឋកិច្ចរបស់ខ្លួន

ដោយ ប៊ី

ភ្នំពេញៈ ប្រទេសចំនួនបីដែលមានសេដ្ឋកិច្ច ពឹងផ្អែកលើនាំចេញនៅអាស៊ីអាគ្នេយ៍អាចចំណាយពេលយូរ ដើម្បីស្តារសេដ្ឋកិច្ចរបស់ខ្លួន ដោយសាររងផលប៉ះពាល់ពីជំងឺ COVID-19 ។ នេះបើយោងតាមការសិក្សារបស់ធនាគារ Morgan Stanley ដែលមូលដ្ឋានៅអាមេរិក។

ធនាគារវិនិយោគអាមេរិក Morgan Stanley បានឱ្យដឹងនៅក្នុងរបាយការណ៍ ដែលបានចេញផ្សាយកាលពីថ្ងៃចន្ទកន្លងមកនេះថា ស្ថានភាពនេះមានន័យថា សេដ្ឋកិច្ចដូចជា ប្រទេសថៃ ម៉ាឡេស៊ី និងសឹង្ហបូរី ប្រហែលជាត្រូវរង់ចាំរហូតដល់ត្រីមាសទី១ ឆ្នាំ ២០២១ ទើបអាចងើបឡើងវិញ។

របាយការណ៍នេះបានឱ្យដឹងថា ប្រទេសទាំងនេះ បានអនុវត្តន៍ការបិទប្រទេសដែលនាំឱ្យមានការប៉ះទង្គិចទ្វេរដងលើការនាំចេញ និងតម្រូវការក្នុងស្រុក។

របាយការណ៍បានឱ្យដឹងថា “ផលប៉ះពាល់នៃវិបត្តិសេដ្ឋកិច្ចសកល និងកំណើនរចនាសម្ព័ន្ធខ្ពស់ ជាមូលហេតុដែលយើងរំពឹងថា សេដ្ឋកិច្ចរបស់ពួកគេនឹងវិលត្រឡប់មកល្អប្រសើរវិញបន្ទាប់ពីប្រទេសចិន” ។

ទោះយ៉ាងណាក៏ដោយ ប្រសិនបើការផលប៉ះពាល់ពី Covid-19 មានរយៈពេលយូរជាងនេះ ការងើបឡើងវិញនៃសេដ្ឋកិច្ចរបស់ប្រទេសខាងលើ អាចនឹងប្រទះនឹងបញ្ហា ហើយសេដ្ឋកិច្ចប្រទេសទាំងនេះ នឹងដើរពីក្រោយសេដ្ឋកិច្ចអាស៊ីបូព៌ាដូចជា ប្រទេសកូរ៉េ និងតៃវ៉ាន់ ដែលបានមើលឃើញជោគជ័យក្នុងការគ្រប់គ្រងជំងឺ COVID-19 ។

ចំណែកនៅតំបន់អាស៊ីផ្សេងទៀត ដែលមិនរាប់បញ្ចូលប្រទេសជប៉ុន សេដ្ឋកិច្ចរបស់ប្រទេសចិន ទំនងជានឹងវិលត្រឡប់មករកភាពល្អប្រសើរឡើងវិញ នៅត្រឹមត្រីមាសទី៣ នៃឆ្នាំ២០២០ ។

ធនាគារ Morgan Stanley បានផ្អែកលើការវិភាគនេះលើកត្តាបីយ៉ាង ពីការរកឃើញនេះថា តើសេដ្ឋកិច្ចនីមួយៗមានឥទ្ធិពលយ៉ាងណា ចំពោះវិបត្តិសេដ្ឋកិច្ចសកល ការឆ្លើយតបរបស់ស្ថាប័ន ដើម្បីដោះស្រាយស្ថានភាព Covid-19 និងផលប៉ះពាល់នៃតម្រូវការក្នុងស្រុក និងឆន្ទៈក្នុងការបន្ធូរបន្ថយគោលនយោបាយ។

វាក៏សន្មតផងដែរថា ករណី Covid-19 ប្រចាំថ្ងៃ នឹងកើនឡើងដល់ត្រីមាសទី២ ជាមួយនឹងការបើកដំណើរការសេដ្ឋកិច្ចជាបណ្តើរ។ នេះអាចបញ្ជាក់ថា ត្រីមាសទី ២ អាចជាត្រីមាស អាក្រក់បំផុតសម្រាប់តំបន់ភាគច្រើននៃតំបន់៕

ក្រុមហ៊ុនយក្សចិន Huawei បង្ហាញចំណាប់អារម្មណ៍ចង់វិនិយោគលើគម្រោងជាច្រើននៅកម្ពុជា

ដោយគង់ សូរិយា

ភ្នំពេញៈ ក្រុមហ៊ុនលំដាប់យក្សរបស់ប្រទេសចិន Huawei បានបង្ហាញចំណាប់់អារម្មណ៍ចង់វិនិយោគនៅក្នុងផ្នែកជាច្រើននៅប្រទេសកម្ពុជា។ នេះបើតាមនាយកប្រតិបត្តិក្រុមហ៊ុននេះបង្ហើបឲ្យដឹង។

ក្នុងជំនួបជាមួយទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន Huawei Technology (Cambodia) Co., Ltd. លោក YAO Yuya នាយកប្រតិបត្តិក្រុមហ៊ុនប្រចាំកម្ពុជា កាលពីរសៀលថ្ងៃទី១២ ឧសភាកន្លងមក លោកYAO YuYa បានសម្តែងនូវចំណាប់អារម្មណ៍ចង់វិនិយោគលើគម្រោងជា ច្រើននៅកម្ពុជា ទាក់ទង នឹងការប្រើប្រាស់ប្រព័ន្ធព័ត៌មានវិទ្យា តាមអនឡាញ ដើម្បីផ្តល់សេវាសាធារណៈ តាមរយៈបទបង្ហាញរបស់ខ្លួន ដែលលើកឡើងអំពីសមិទ្ធផល សម្រេចបានសំខាន់ៗរបស់ក្រុមហ៊ុន ដែលបានធ្វើប្រតិបត្តិការនៅប្រទេសចិន។

លោកទេសរដ្ឋមន្ត្រី បានណែនាំឱ្យលោក YAO Yuya ចូលរួមសហការជាមួយនាយកដ្ឋានព័ត៌មាន វិទ្យា និងទំនាក់ទំនងសាធារណៈរបស់ក្រសួង ដើម្បីស្វែងយល់វិស័យសំខាន់ៗដែលក្រុមហ៊ុន HUAWEI អាចផ្តល់ការគាំទ្រឯកទេសបាន។

ជាមួយគ្នានេះទេសរដ្ឋមន្ត្រីស៊ុន ចាន់ថុលបានគូសបញ្ជាក់អំពីអត្ថប្រយោជន៍នៃការដាក់ឱ្យប្រើប្រាស់កម្មវិធីថែទាំផ្លូវ (ROAD CARE Mobile App) ដើម្បីកាត់បន្ថយគ្រោះថ្នាក់ចរាចរណ៍ ដែលកើតឡើងដោយសារជង្ហុកសំបុកមាន់ និងផ្លូវខូច ព្រមទាំងជួយឱ្យប្រជាពលរដ្ឋ ធ្វើដំណើរលើប្រព័ន្ធបណ្តាញផ្លូវ ប្រកបដោយសុវត្ថិភាព ការប្រើប្រាស់ជញ្ជីងថ្លឹងរថយន្ត ដោយស្វ័យប្រវត្តិបង្កប់នៅក្នុងដី (Weighs in motion) និងកាំមេរ៉ាចាប់ល្បឿន រថយន្តសំដៅធានាកុំឱ្យមានរថយន្តដឹកទំនិញលើសកម្រិតកំណត់។

លោកទេសរដ្ឋមន្ត្រីបានជម្រាបជូនភ្ញៀវ អំពីការប្រើប្រាស់ប្រព័ន្ធព័ត៌មាន វិទ្យានៃបដិវត្តឧស្សាហកម្មជំនាន់៤.០ ដើម្បីផ្តល់សេវាសាធារណៈជូនប្រជាពលរដ្ឋកម្ពុជា ប្រកបដោយ ប្រសិទ្ធភាព តម្លាភាព ដែលក្នុងនោះរួមមាន៖ ប្រព័ន្ធស្វ័យប្រវត្តិកម្មការចុះបញ្ជីយានយន្ត ការត្រួតពិនិត្យ លក្ខណៈបច្ចេកទេសយានយន្ត កម្មវិធីថែទាំផ្លូវ ROAD CARE Mobile App ជាដើម។

លោកស៊ុន ចាន់់ថុលក៏បានជម្រាបជូនភ្ញៀវ អំពីគម្រោងប្រើប្រាស់Block Chainរបស់ក្រសួង ដើម្បីកាត់បន្ថយនីតិវិធីស្មុគស្មាញ ក្នុងការបំពេញការងារ និងក្លាយជាក្រសួងឈានមុខគេក្នុងការ ប្រើប្រាស់ក្រដាសស្នាមតិចតូច(Paperless) ដើម្បីពន្លឿនលំហូរការងារឱ្យកាន់តែមានប្រសិទ្ធភាពខ្ពស់៕