ដោយវុត្ថា

ភ្នំពេញៈ ប្រធានក្រុមប្រឹក្សាភិបាល ក្រុមហ៊ុនសាងសង់អាកាសយានដ្ឋានអន្តរជាតិសៀមរាបអង្គរ (AIAI) លោកLu Weiបានអះអាងថា  អាកាសយានដ្ឋានអន្តរជាតិសៀម រាបអង្គរថ្មី (AIAI) នឹងបញ្ចប់ការសាងសង់រួចរាល់ជាស្ថាពរនៅឆ្នាំ២០២៣ ដោយប្រើពេលវេលាសាងសង់រយៈពេល៣៦ខែ។

ការសាងសង់អាកាសយានដ្ឋានថ្មីនេះ បាននិងកំពុងសាងសង់បន្ទាប់ពីបានចាប់ផ្តើមដំណើរការសាងសង់ ចាប់តាំងពីថ្ងៃទី១៥ ខែមិនា ឆ្នាំ២០២០កន្លង​មកនេះ។

ការអះអាងរបស់លោក Lu Wei ប្រធានក្រុមប្រឹក្សាភិបាល ក្រុមហ៊ុនសាងសង់អាកាសយានដ្ឋានអន្តរជាតិសៀមរាបអង្គរ(AIAI) បានធ្វើឡើងនៅនៅក្នុងជំនួបពិភាក្សាការងារជាមួយលោក នាយឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិលនាថ្ងៃទី១១ ខែឧសភា ឆ្នាំ ២០២០នេះ។

លោកបន្តថា “ដំណើរការសាងសង់ក្រុមហ៊ុន បានសហការយ៉ាងជិតស្និតជាមួយក្រុមការងារបច្ចេកទេស របស់រដ្ឋលេខាធិការដ្ឋានអាកាសចរស៊ីវិល ដោយផ្តោតសំខាន់ទៅនឹងការបំពាក់ឧបករណ៏បច្ចេកទេស និងរចនាបទអាកាសយានដ្ឋាន”។

លោកLu Wei ក៏បានអញ្ជើញលោក នាយឧត្តមសេនីយ៍ បណ្ឌិតម៉ៅ ហាវណ្ណាល់ រដ្ឋមន្រ្តីប្រតិភូអមនាយយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរស៊ីវិល ទៅធ្វើទស្សនកិច្ច និងពិនិត្យលើការងារសាងសង់តាមពេលវេលាសមស្របឆាប់ៗខាងមុខ។

លោកនាយឧត្តមសេនីយ៍បណ្ឌិតម៉ៅ ហាវណ្ណាល់បានថ្លែងថា ក្នុងនាមថ្នាក់ដឹកនាំ របស់រដ្ឋលេខាធិការដ្ឋានអាកាសចរស៊ីវិល តែងតែគាំទ្រយ៉ាងពេញទំហឹង និងជម្រុញដំណើរសារសង់ អាកាសយានដ្ឋានអន្តរជាតិសៀមរាបថ្មី ទៅតាមផែនការដែលបានកំណត់។

លោកនាយឧត្តម សេនីយ៍ បានជម្រុញ និងឯកភាពឱ្យ ក្រុមហ៊ុនសាងសង់អាកាសយានដ្ឋានអន្តរជាតិសៀមរាបអង្គរ(AIAI) និងក្រុមការងារបច្ចេកទេសរបស់រដ្ឋលេខាធិ​ការដ្ឋានអាកាសចរ ធ្វើការសហការគ្នាជាប្រចាំ ដើម្បីត្រូតពិនិត្យការងារ បញ្ហប្រឈមរកដំនោះស្រាយ និងឱ្យមានការរៀបចំប្រជុំជារៀងរាល់ថ្ងៃទី២៥ ប្រចាំខែ ដើម្បី ពិនិត្យលើវឌ្ឈនភាពការងារបច្ចេកទេស និងការសាងសង់អាកាសយានដ្ឋាន៕

ដោយ ហ្សូលី 

ភ្នំពេញ៖ បច្ចុប្បន្នលំនៅដ្ឋានរស់នៅប្រចាំថ្ងៃ មិនថាក្នុងបុរី ឬនៅតាមតំបន់នានានោះទេ សុទ្ធសឹងតែជាតម្រូវការចាំបាច់សម្រាប់អ្នកចង់ជាវអចលនវត្ថុ។ ជាក់ស្តែង មានមូលហេតុជាច្រើនដែលបណ្តាលឱ្យផ្នែកលំនៅដ្ឋានទាក់ទាញជាងអចលនវត្ថុផ្សេងៗ ដូច្នេះអ្នកជំនាញអចលនវទ្រព្យបានពន្យល់និងរៀបរាប់ពីហេតុផលដែលលំនៅដ្ឋាននៅតែមានតម្រូវការច្រើន។

លោកស្រី តាំង ហ៊ួរ អ្នកជំនាញអចលនទ្រព្យនិងជានាយិកាក្រុមហ៊ុនអចលនទ្រព្យ Amaktak Property Service បានមានប្រសាសន៍ប្រាប់គេហទំព័រ Property Area Asia ថា មូលហេតុដែលលំនៅដ្ឋាននៅតែមានតម្រូវការនោះដោយសារលំនៅដ្ឋានមួយចំនួនមានការលក់ប្រញាប់ដូច្នេះហើយអាចមានឱកាសមានតម្លៃសមរម្យច្រើន ឬអាចក្រោមជាងទីផ្សារក៏មាន។ 

លោកស្រីបន្តថា មួយវិញទៀត វិស័យលំនៅដ្ឋានបច្ចុប្បន្នមានជាប្រភេទលំនៅដ្ឋានសម្រាប់ប្រកបអាជីវកម្មផងដែរ ដែលអនុញ្ញាតឱ្យអ្នកជាវអាចប្រកបអាជីវកម្មបាន ឬបង្កើតមុខរបរបានទៀតផងដោយអាស្រ័យទៅតាមតំបន់ដែរ។  

ចំណុចខ្លាំងរបស់លំនៅដ្ឋានមួយទៀតនោះ គឺលក្ខខណ្ឌបង់ប្រាក់ ព្រោះម្ចាស់លំនៅដ្ឋាន ឬម្ចាស់គម្រោងអភិវឌ្ឍលំនៅដ្ឋានមួួយចំនួនផ្តល់ជូនលក្ខខណ្ឌបង់ប្រាក់ងាយស្រួលដូចជា ការបង់រំលស់ សម្រួលរយៈពេលបង់ឱ្យមានរយៈពេលវែង និងមានការយោគយល់ដល់អតិថិជនដោយបត់បែនទៅតាមស្ថានភាពអតិថិជនទៀតផង។ 

ទន្ទឹមនេះ នាយកគ្រប់គ្រងក្រុមហ៊ុន Daily Realty លោក ហៃ រ៉ាវី ធ្លាប់បានមានប្រសាសន៍ដែរថា ភាគច្រើនលំនៅដ្ឋានគឺមានតម្រូវការច្រើនជាងគេ ដោយសារតែអ្នកជាវត្រូវការសម្រាប់យកមកប្រកបអាជីវកម្មផ្សេងៗ ឬក៏ចង់ទិញទុកយកផលចំណេញនៅពេលក្រោយមានភាពងាយស្រួលលក់។ ម្យ៉ាងវិញទៀត ដោយសារតែអតិថិជនមានបំណងចង់ជាវទុកសម្រាប់ឱ្យកូនក្រែងលោត្រូវឡើងពីខេត្តមកសិក្សានៅទីក្រុង ឬក៏គូស្នេហ៍មួយចំនួនដែលទើបរៀបការដូច្នេះតម្រូវការមានផ្ទះរស់នៅគឺនៅតែមាន។ 

លោកបានសង្កត់ធ្ងន់ថា លំនៅដ្ឋានក្នុងបុរីគឺកំពុងទាក់ទាញខ្លាំង ដោយសារតែអ្នកជាវអចលនវត្ថុគិតថាគម្រោងលំនៅដ្ឋានបុរី មានគម្រោងច្បាស់លាស់។ មិនតែប៉ុណ្ណោះ ការរចនាមានភាពស្រស់ស្អាត មិនថាផ្នែកខាងក្រៅ និងការឌីសាញខាងក្នុង ជាពិសេសមានសួនលំហែកាយជាដើម។ 

បន្ថែមពីនេះ លោក ម៉ម សិរីបញ្ញា អគ្គនាយកក្រុមហ៊ុនអចលនទ្រព្យ Easy Property បានលើកឡើងពីមូលហេតុថា ភាគច្រើនគម្រោងលំនៅដ្ឋានច្រើនតែសាងសង់នៅក្បែរតំបន់ទីប្រជុំជន និងជាទីតាំងល្អ ក្នុងការរកស៊ី និងរស់នៅ។ ចំណុចខ្លាំងនោះមានផ្សារនៅក្បែរ ដែលបង្ករឱ្យពលរដ្ឋងាយស្រួលបង្កើតជំនួញ និងធ្វើឱ្យការរស់នៅមានភាពទាន់សម័យនិងងាយស្រួល។ ហេតុផលទាំងអស់នេះហើយ ដែលបណ្តាលឱ្យវិស័យលំនៅដ្ឋានហាក់បីដូចជាមានតម្រូវការច្រើនជាងគេ៕

ដោយ​៖​ វុត្ថា

ភ្នំពេញ៖ ផ្សារទំនើប Chip Mong Sen Sok តម្លៃជាង ៤១ លានដុល្លារអាមេរិក របស់ក្រុមហ៊ុន “CHIP MONG RETAIL CO., LTD”  ស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញគ្រោងនឹងបញ្ចប់សាងសង់នៅក្នុងត្រីមាសទី៣ ឆ្នាំ២០២០ ខាងមុខ។ នេះបើយោងតាមការផ្សព្វផ្សាយ នៅលើទំព័រ Facebook ផ្លូវការ Chip Mong Sen Sok Mall កាលពីពេលថ្មីៗនេះ ។

ផ្សារទំនើបមួយនេះ ត្រូវបានក្រុមហ៊ុន Chip Mong Retail បុកគ្រឹះសាងសង់ កាលពីថ្ងៃទី ១២ ខែកក្កដា  ២០១៨ នៅលើផ្ទៃក្រឡាសរុបប្រមាណ ៤ ម៉ឺនម៉ែត្រការ៉េ ដែលនឹងផ្ដល់សេវាកម្មដូចជា ហាងលក់គ្រឿងឧបភោគបរិភោគគ្រប់បែបយ៉ាង ភោជនីយដ្ឋាន កន្លែងកម្សាន្តកុមារ ហាងលក់សម្លៀកបំពាក់ទូទៅ សម្លៀកបំពាក់កីឡាប្រេនល្បីៗ ក្លឹបហាត់ប្រាណ ជាពិសេសរោងភាពយន្តដ៏ទំនើបទាន់សម័យ។

ផ្សារទំនើបថ្មីមួយនេះ គឺជាការឆ្លើយតបទៅនឹងតម្រូវការរបស់ប្រជាពលរដ្ឋដែលកើនឡើងជាបន្តបន្ទាប់ ជាពិសេសសម្រាប់អ្នកដែលកំពុងរស់ក្នុងខណ្ឌសែនសុខទាំងអស់។

ក្រុមប្រឹក្សាអភិវឌ្ឍន៍កម្ពុជា (CDC) កន្លងមកនេះ បានអនុម័តឱ្យក្រុមហ៊ុន “CHIP MONG RETAIL CO., LTD” អនុវត្ត​គម្រោងសាងសង់ផ្សារទំនើប ដែលមានទីតាំងវិនិយោគស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មានទុនវិនិយោគប្រមាណ៤១,៥លានដុល្លារអាមេរិក និងអាចបង្កើតការងារបានចំនួន៣៣៨កន្លែង។

ក្រុមហ៊ុន CHIP MONG RETAIL CO., LTD” កាលពីខែធ្នូ ឆ្នាំ ២០១៩ កន្លងមកនេះ បានសម្ពោធផ្សារទំនើប​ ជីប ម៉ុង ណូរ៉ូ ម៉ល មានផ្ទៃសរុបទំហំ១៧,៩០០ម៉ែត្រការ៉េ មានកម្ពស់៥ជាន់ ស្ថិតនៅតាមបណ្តោយមហាវិថីព្រះនរោត្តម ដោយបានជ្រើសរើសដៃគូពាណិជ្ជកម្ម ដូចជាភោជនីយដ្ឋាន រោងភាពយន្តប្រណិត ផ្សារទំនើប ជីប ម៉ុង និងហាងលក់រាយជាច្រើនទៀតដោយការសម្រិតសម្រាំងបំផុត។

ក្រុមហ៊ុន CHIP MONG RETAIL វិនិយោគលើគម្រោងទាំងអស់របស់ខ្លួន គិតជាទឹកប្រាក់សរុបចំនួន៣០០លានដុល្លារអាមេរិក ដែលការវិនិយោគនេះ ផ្តោតលើការសាងសង់ និងប្រតិបត្តិការ ផ្សារទំនើបខ្នាតតូច ផ្សារទំនើបខ្នាតធំ មជ្ឈមណ្ឌលពាណិជ្ជកម្ម និងផ្សារទំនើបខ្នាតយក្ស។

លោកស្រី អាន សុធីតា នាយិការប្រចាំប្រទេស នៃក្រុមហ៊ុន CBRE Cambodia បានឱ្យដឹងដែរថា ការអភិវឌ្ឍ ឬការសាងសង់ផ្សារទំនើបនេះ កំពុងមានតម្រូវការខ្ពស់ និងមានសក្តានុពលខ្ពស់នៅក្នុងប្រទេសកម្ពុជា ប៉ុន្តែវាជោគជ័យឬអត់នោះអាស្រ័យលើកត្តាជាច្រើន  ហើយអ្នកអភិវឌ្ឍន៍ប្រាកដជាដឹងយ៉ាងច្បាស់ ចំពោះការអភិវឌ្ឍន៍ផ្សារទំនើបបែបនេះ។

លោកស្រីបន្តថា  ការអភិវឌ្ឍគម្រោងផ្សារទំនើប បើទោះមានច្រើន យ៉ាងណាច្រើនក្តី វាអាស្រ័យលើពេលវេលា ចំណុចលេចធ្លោ និងភាពខុសប្លែកពីគេ ព្រមទាំងមានយុទ្ធសាស្ត្រទាក់ទាញអ្នកជួល រួមជាមួយនឹងការគ្រប់គ្រងបានល្អទើបទទួលបានជោគជ័យក្នុងការបើកអាជីវកម្មផ្សារទំនើបនេះ។

ខណ្ឌសែនសុខ ដែលស្ថិតនៅប៉ែកខាងជើងរាជធានីភ្នំពេញ កំពុងទាក់ទាញចំណាប់អារម្មណ៍វិនិយោគិន ជាមួយនឹងគម្រោងជាច្រើន ដែលកំពុងតែលេចរូបរាងជាបណ្តើរៗ។ គម្រោងទាំងអស់មានដូចជា ផ្សារទំនើបអ៊ីអនម៉ល និងមានផ្សារបោះដុំ និងលក់រាយ (ផ្សារម៉ាក្រូ) មជ្ឈមណ្ឌលសន្និបាត និងពិព័រណ៍សែនសុខ និងគម្រោងប្រភេទផ្ទះអាជីវកម្ម (Shop House) ដែលមានតម្លៃខ្ទង់សែនដុល្លារក្នុងមួយល្វែងជាដើម៕

ដោយ ៖ រ៉ាណេត

ភ្នំពេញ ៖ ដំណើរការនៃការសាងសង់សំណង់ធំៗជាច្រើនដែលមានតម្លៃសរុបរាប់រយលានដុល្លារ កំពុងតែបន្តសកម្មភាពយ៉ាងមមាញឹកដើម្បីឈានទៅបញ្ចប់តាមផែនការ និងឆ្លើយបតទៅនឹងតម្រូវការទីផ្សារ។

តម្រូវការទីផ្សារអចលនទ្រព្យនៅតែមាន ជាពិសេសតម្រូវការលំនៅដ្ឋានជាក់ស្ដែងសម្រាប់ស្នាក់នៅដែលមានតម្លៃចន្លោះជាង១០ម៉ឺនដុល្លារ ឬក្រោម១០ម៉ឺនដុល្លារ។ នេះបើតាមការឱ្យដឹងតាមរយៈទូរស័ព្ទពីសំណាក់លោកស្រី តាំង ហួរ នាយិកាក្រុមហ៊ុនអចលនទ្រព្យ AMATAK Property Service កាលពីព្រឹកថ្ងៃទី១១ ខែឧសភា ឆ្នាំ២០២០។

លោកស្រីបានបញ្ជាក់ថា “បច្ចុប្បន្ន តំបន់ផ្លូវជាតិលេខ១ រាប់ចាប់គិតពីចំណុចគល់ស្ពានព្រះមុនីវង្ស (ស្ពានច្បារអំពៅ) រហូតដល់តំបន់ផ្សារព្រែកឯងស្ទើរតែមិនមែនជាតំបន់ជាយក្រុងទៀតនោះទេ ហើយក៏បានក្លាយជាផ្លូវក្រវ៉ាត់ក្រុងយ៉ាងសំខាន់ដែលមានកំណើនប្រជាជនកម្រិតមធ្យមរស់នៅច្រើន និងជម្រុញឱ្យចរន្តសេដ្ឋកិច្ចនៅក្នុងតំបន់កាន់តែល្អប្រសើរជាងមុន”។ លោកស្រីបានមានប្រសាសន៍បន្តទៀតថា “គម្រោងសំណង់ធំៗនៅតំបន់នេះភាគច្រើនជាប្រភេទគម្រោងអភិវឌ្ឍន៍លំនៅដ្ឋានដែលមានតម្លៃមធ្យម និងកំពុងមានតម្រូវការទីផ្សារខ្ពស់នៅពេលបច្ចុប្បន្ន និងបន្តទៅថ្ងៃអនាគត”។

អគ្គនាយកក្រុមហ៊ុនភ្នាក់ងារអចលនទ្រព្យ Kraty Realty Co,. Ltd លោក ចក់ ស៊ីណាត បានមានប្រសាសន៍ថា ភាគច្រើនគម្រោងដែលកំពុងមានសកម្មភាពសាងសង់នៅពេលនេះ គឺជាគម្រោងចាស់ដែលបន្សល់មកកាលពីឆ្នាំកន្លងទៅ ហើយសម្រុកសកម្មភាពរបស់ខ្លួនដើម្បីបញ្ចប់ទៅតាមផែនការដែលម្ចាស់គម្រោងបានគ្រោងទុក។

លោកបានមានប្រសាសន៍បញ្ជាក់ថា “ទោះជាស្ថិតនៅក្នុងការគំរាមកំហែងពីវិបត្តិនៃជំងឺ Covid-19 ក៏ដោយ ប៉ុន្តែសម្រាប់គម្រោងចាស់ដែលបានចាប់ដំណើរការតាំងពីឆ្នាំមុន ពួកគេនៅតែបន្តសកម្មភាពអភិវឌ្ឍន៍ដដែល ហើយក៏មានតម្រូវការទីផ្សាររួចជាស្រេច។ ផ្ទុយទៅវិញ សម្រាប់តែគម្រោងថ្មីដែលទើបតែចាប់ផ្តើមត្រឹមដើមឆ្នាំ២០២០ គឺអាចផ្អាកការអនុវត្តគម្រោងដោយសារតែវិបត្តិមួយនេះ”។

លោក ចក់ ស៊ីណាត បានមានប្រសាសន៍បន្តទៀតថា “នៅពេលដែលមានគម្រោងអភិវឌ្ឍន៍សំណង់ធំៗកើតមានជាបន្តបន្ទាប់ គម្រោងតូចៗក៏នឹងចាប់ផ្តើមបង្ហាញខ្លួនផងដែរ ហើយវានឹងជម្រុញឱ្យចរន្តទិញ-លក់ ដីធ្លីនៅក្នុងតំបន់ ក៏ដូចជាតំបន់ជិតខាងចាប់ផ្តើមមានដង្ហើម ហើយតម្លៃក៏មានកំណើនផងដែរ ប៉ុន្តែកំណើនទាប ឬខ្ពស់ ក៏អាស្រ័យទៅតាមទីតាំង ស្ថានភាពដី និងទំហំដីផងដែរ”។

គម្រោងសំណង់ធំៗដែលគេឃើញកំពុងមានសកម្មភាពយ៉ាងមមាញឹកនៅពេលបច្ចុប្បន្ននេះ បន្ទាប់ពីគម្រោងដែលមានទុនរាប់រយលានដុល្លាររបស់បុរីប៉េងហួត និងគម្រោងខុនដូក្រោមការវិនិយោគដោយក្រុមហ៊ុនចិន គឺមានគម្រោងបុរី The Palm , គម្រោងបុរី KS Residence គម្រោងបុរី កៀនស្វាយ ផាក , គម្រោងបណ្តុំលំនៅដ្ឋាន កៀនស្វាយផ្លាហ្សា រួមជាមួយនឹងគម្រោងបណ្តុំលំនៅដ្ឋានដែលមានលក្ខណៈជាបុរីជាច្រើនគម្រោងផ្សេងទៀត៕