កម្ពុជានឹងនាំចេញផលិតផលស្រស់ចំនួន១៦មុខទៅកាន់ទីផ្សារកូរ៉េនៅចុងខែមិថុនាខាងមុខនេះ

ដោយ ប៊ី

ភ្នំពេញៈ ក្រុមហ៊ុន Hyundai Agro ដែលមូលដ្ឋាននៅប្រទេសកម្ពុជា នឹងនាំចេញបន្លែស្រស់ និងគ្រឿងផ្សំស្រស់ៗផ្សេងទៀតពីប្រទេសកម្ពុជា ទៅកាន់ប្រទេសកូរ៉េនៅចុងខែមិថុនាឆ្នាំនេះ។

លោក Chang Hoon Lee ប្រធានក្រុមហ៊ុន បាននិយាយសេចក្តីប្រកាសព័ត៌មានចុងសប្តាហ៍នេះថា អាហារស្រស់ប្រហែល ១៦ប្រភេទ នឹងត្រូវប្រមូល និងវេចខ្ចប់ បន្ទាប់មកនាំចេញទៅប្រទេសកូរ៉េខាងត្បូង។ ផលិតផលស្រស់ៗរួមមានស្លឹកគ្រៃ ស្លឹកចេក ត្រយូងចេក ស្លឹកក្រូចសើច ត្រកួន និងជាច្រើនមុខទៀត។

លោកបានថ្លែងថា “យើងបានបញ្ជូនស្លឹកគ្រៃ សម្រាប់អ្នកនាំចូលពិនិត្យ ហើយពួកគេបានសំរេចចិត្តទទួលយកវា។ ឥឡូវនេះយើងកំពុងរៀបចំជួបកសិករ ដើម្បីផ្គត់ផ្គង់ស្លឹកគ្រៃ ហើយបុគ្គលិករបស់ខ្ញុំនឹងធ្វើដំណើរទៅគ្រប់ខេត្ត ដើម្បីស្វែងរកផលិតផលដែលមានគុណភាពល្អជាមួយនឹងជាតិគីមីតិចជាងមុន” ។

លោកបានបន្តថា យើងត្រូវការកសិករដែលស្មោះត្រង់ និងសមហេតុផល ហើយយើងនឹងផ្គត់ផ្គង់ជី និងថ្នាំសំលាប់សត្វល្អិតផ្ទាល់ខ្លួនរសប់យើង ដើម្បីធ្វើឱ្យមានសុវត្ថិភាពក្នុងការបរិភោគ។ រហូតមកដល់ពេលនេះ យើងបានរកឃើញកសិករ៥នាក់ ដើម្បីដាំដំណាំនេះ ហើយពួកគេទាំងអស់ពិតជាចង់សហការជាមួយយើង។

លោក Chang Hoon Lee បានបន្តថា “យើងត្រូវការប្រហែលពី៥០ ទៅ១០០ តោនក្នុងមួយឆ្នាំ នៃដំណាំនីមួយៗរបស់ស្លឹកចេក ត្រយូងចេក ស្លឹកក្រូចសើច និងសឹ្លកគ្រៃ ។ ល។ ទោះយ៉ាងណា យើងនឹងចាប់ផ្តើមបើកម្តងមួយៗមួយជំហានម្តង។ យើងកំពុងរៀបចំប្រអប់ក្រ ដាសបិទផ្លាកយីហោ និងឯកសារពាក់ព័ន្ធរួចហើយ” ។

យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជាបាននាំចេញផលិតផលកសិកម្មសរុបជាង២លានតោន និង១លានតោនក្រៅផ្លូវការបន្ថែមទៀត ក្នុងរយៈពេល៤ ខែដើមឆ្នាំនេះ៕

ប្រទេសថៃគ្រោងអនុញ្ញាតឲ្យបើកអាជីវកម្មឡើងវិញក្នុងកំឡុងពាក់កណ្តាលខែឧសភានេះ

ដោយ ហ្សូលី

បាងកកៈ ផ្សារទំនើបលក់ទំនិញ មជ្ឈមណ្ឌលហាត់ប្រាណ និងសួនកម្សាន្ត ដែលត្រូវបានគេចាត់ទុកថា ជាកន្លែងដែលមានដង់ស៊ីតេខ្ពស់ ក្នុងការឆ្លងរីករាលដាលមេរោគ Covid-19 ត្រូវបានគេរំពឹងថានឹងបើកដំណើរការម្តងទៀត ប្រសិនបើចំនួននៃការឆ្លងថ្មី Covid-19 នៅតែបន្តធ្លាក់ចុះមួយសប្តាហ៍ទៀត។

មជ្ឈមណ្ឌលប្រតិបត្តិការសង្គ្រោះបន្ទាន់ ផ្នែកសុខភាពសាធារណៈ បានរៀបចំការប្រជុំជាមួយតំណាង នៃក្រុមអាជីវកម្មចំនួន៨នៅក្នុងបប្រទេសថៃ ដើម្បីពិភាក្សាអំពីការត្រៀមសំរាប់ដំណាក់កាលបន្ទាប់ នៃការបន្ធូរបន្ថយការឆ្លងវីរុស និងស្តារសេដ្ឋកិច្ចឡើងវិញ។

កិច្ចប្រជុំនេះ ក៏មានការចូលរួមពីភ្នាក់ងារពាក់ព័ន្ធ ដូចជា ក្រសួងមហាផ្ទៃ ក្រសួងទេសចរណ៍ និងកីឡា ក្រសួងសុខាភិបាល សាលាក្រុង និងអង្គភាពរដ្ឋបាលមូលដ្ឋានផងដែរ។

ជាលទ្ធផល រដ្ឋាភិបាលថៃ គ្រោងអនុញ្ញាតឲ្យមានការបើកផ្សារទំនើប ភោជនីយដ្ឋាន និងហាងអាហារ ការបើកអាជីវកម្មសុខភាព រួមទាំងស្ប៉ា និងហាងម៉ាស្សា ហាងថែរក្សាសម្ផស្ស កន្លែងប្រជុំសន្និបាត សិក្ខាសាល សួនកម្សាន្ត និងឧទ្យានទឹក។

ប្រមុខរដ្ឋាភិបាលថៃលោកប្រាយុទ្ឋ ចាន់អូចាបានមានប្រសាសន៍ថា នៅថ្ងៃទី ១៧ ខែឧសភា ឆ្នាំ ២០២០នេះ អាជីវកម្ម និងជំនួញនឹងបន្តដំណើរការសារជាថ្មី ដើម្បីស្តារវិស័យទេសចរណ៍ និងផ្តល់ឱកាសដល់ពលរដ្ឋមានការងារធ្វើវិញ។ យ៉ាងណាក៏ដោយ ការទប់ស្កាត់និងថែរក្សាអនាម័យ នៅតែមានជានិច្ច៕ Bangkok Post

វិស័យបដិសណ្ឋារកិច្ចអន្តរជាតិនៅក្នុងប្រទេសចិនចាប់ផ្តើមបើកដំណើរការឡើងវិញ

ដោយ វុត្ថា

ប៉េកាំងៈ វិស័យបដិសណ្ឋកិច្ច ដែលវិនិយោគលើវិស័យសណ្ឋាគារលំដាប់អន្តរជាតិនៅក្នុងប្រទេសចិន ចាប់ផ្តើមបើកប្រតិបត្តិការជាបណ្តើរៗ បន្ទាប់ប្រទេសចិនបានគ្រប់គ្រង និងការពារនៃការរាតត្បាតនូវជំងឺកូវីដ១៩ បានយ៉ាងល្អប្រសើរនាពេលកន្លងមកនេះ។

យោងតាមការចុះផ្សាយរបស់សារព័ត៌មាន Xinhua កាលពីចុងសប្តាហ៍កន្លងមកនេះបានឱ្យដឹងថា គិតត្រឹមថ្ងៃសុក្រនេះ សណ្ឋាគាររបស់ក្រុមហ៊ុនបដិសណ្ឋារកិច្ច Hilton ចំនួន២៥០ទីតាំង នៅក្នុងប្រទេសចិន បានបើកប្រតិបត្តិការអាជីវកម្មរបស់ខ្លួនឡើងវិញ ហើយ។

លោក Chris Nassetta ប្រធាន និងជានាយកប្រតិបត្តិក្រុមហ៊ុន Hilton បានថ្លែងថា“ការបើកសណ្ឋាគារទាំងអស់របស់យើង នៅក្នុងប្រទេសចិន គឺជាជំហ៊ានដំបូងនៃដំណើរការនៃការស្តារឡើងវិញនៃពិភពលោក” ។ លោកបានបន្ថែមថា “យើងមានទំនុកចិត្តថានឹងមានថ្ងៃភ្លឺជាងនេះទៀត” ។

Xinhau បានបន្តថា ៩៨ភាគរយនៃសណ្ឋាគារជាង៤៧០ របស់ក្រុមហ៊ុនបដិសណ្ឋារកិច្ច InterContinental Hotels Group PLC (IHG)នៅប្រទេសចិនបានដំណើរការតាំងពីថ្ងៃទី ៥ ខែឧសភា កន្លងមកនេះ បើទោះបីសណ្ឋាគារទាំងនោះ ត្រូវបានបិទជាប ណ្តោះអាសន្នដោយសារជំងឺរាតត្បាតកូវីដ១៩ ។

លោក Jolyon Bulley នាយកប្រតិបត្តិនៃក្រុមហ៊ុន InterContinental Hotels Group PLC (IHG) បានឱ្យដឹងថា ប្រទេសចិនគឺជាទីផ្សារធំលំដាប់ទី២ និងជាប្រទេសដែលរីកចម្រើនលឿនបំផុត។

លោកថ្លែងថា “យើងមានទំនុកចិត្ត ចំពោះទស្សនវិស័យរយៈពេលវែង នៃឧស្សាហកម្មបដិសណ្ឋារកិច្ចនៅក្នុងប្រទេសចិន” ។

លោក Bulley បញ្ជាក់ថា ការអភិវឌ្ឍនគរូបនីយកម្ម ប្រាក់ចំណូលរបស់ប្រជាជនមានការកើនឡើង និងការកែលំអហេដ្ឋារចនាសម្ព័ន្ធទេសចរណ៍ និងកត្តាផ្សេងៗទៀតនឹងជំរុញកំណើននៃតម្រូវការទីផ្សារសណ្ឋាគាររបស់ប្រទេសចិន៕

ក្រុមហ៊ុនអាកាសចរណ៍អន្តរជាតិចំនួន៧នៅកម្ពុជានៅតែបន្តដំណើរការសេវាកម្មហោះហើរធម្មតា

ដោយៈ រ៉ាណេត

ភ្នំពេញៈ បើទោះជាមានការគំរាមកំហែងពីវិបត្តិនៃជំងឺ Covid-19 មកទល់នឹងពេលនេះ ក្រុមហ៊ុនអាកាសចរណ៍អន្តរជាតិនៅកម្ពុជាចំនួន៧ នៅតែបន្តដំណើរការរបស់ខ្លួនដដែល ខណៈពេលដែលចំនួននៃអ្នកធ្វើដំណើរតាមយន្តហោះ បានធ្លាក់ ចុះយ៉ាងគំហុករហូតដល់ជាង ៩០ភាគរយ។

អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោកស៊ិន ចាន់សិរីវុត្ថា បានមានប្រសាសន៍កាលពីថ្ងៃចុងសប្ដាហ៍កន្លង ទៅនេះថា ចាប់តាំងពីខែមករា រហូតដល់ខែមេសា ឆ្នាំ២០២០ ស្ថានភាពនៃការធ្វើដំណើរចេញចូលរបស់អ្នកដំណើរ តាមជើងហោះហើរនានា ជាពិសេសជនបរទេស គឺមានការធ្លាក់ចុះយ៉ាងគំហុក រហូតដល់ជាង៩០ភាគរយ ដែលធ្វើឱ្យប៉ះពាល់យ៉ាងធ្ងន់ធ្ងរ និងបាត់បង់ចំណូលយ៉ាងច្រើន។

លោកបានបញ្ជាក់ថា “មិនថាចំពោះការធ្វើដំណើរ ពីបណ្តាប្រទេសនានាមកកាន់កម្ពុជា ឬការធ្វើដំណើរចាកចេញពីកម្ពុជា ឆ្ពោះប្រទេសដទៃទៀតនោះទេ គឺមានការធ្លាក់ចុះយ៉ាងខ្លាំង ដែលបានជះឥទ្ធិលទៅដល់ចំណូលថវិកាជាតិផងដែរ។

ស្ថិតនៅក្នុងស្ថានភាពដែលកំពុងប្រឈម និងមានភាពស្ងប់ស្ងាត់ទៅលើការធ្វើដំណើរតាមការហោះហើរនេះ នៅដើមខែឧសភា ឆ្នាំ២០២០ មានក្រុមហ៊ុនអាកាសចរណ៍ទាំងក្នុងស្រុក និងក្រៅស្រុកសរុបចំនួន៧ នៅតែបន្តដំណើរការប្រត្តិបត្តិការរបស់ខ្លួនដដែល ហើយភាគច្រើនគឺដឹកជញ្ជូនទំនិញ ជំនួសការដឹកអ្នកដំណើរច្រើនជាង។

លោកស៊ិន ចាន់សិរីវុត្ថា បានបញ្ជាក់ថា ទោះជាមានភាពស្ងប់ស្ងាត់ ក្រោមហេតុផលនៃការភ័យខ្លាច របស់អ្នកដំណើរចំពោះជំងឺ Covid-19 ប៉ុន្តែពេលនេះមានក្រុមហ៊ុនអាកាសចរណ៍អន្តរជាតិចំនួន៧ បាននិងកំពុងបន្តដំណើរការរបស់ខ្លួន ដែលក្នុងនោះរួមមានក្រុមហ៊ុន Air China ដែលដឹកអ្នកដំណើរ និងទំនិញចេញ-ចូលមកពីប្រទេសចិន ក្រុមហ៊ុន Asian Airline មកពីប្រទេសកូរ៉េ ក្រុមហ៊ុន All Nippon Airways មកពីប្រទេសជប៉ុន ក្រុមហ៊ុន Cambodian Airways និង Cambodia Angkor Air ដែលជាក្រុមហ៊ុនអាកាសចរណ៍ក្នុងស្រុក ក្រុមហ៊ុន Cathay Airways និង Cathay Pacific មកពីហុងកុង ដែលបម្រើលើការដឹកជញ្ជូនទំនិញ ជាពិសេសសម្ភារៈប្រើប្រាស់លើផ្នែកវេជ្ជសាស្ត្រ។

លោកបានលើកឡើងផងដែរថា នៅក្នុងចំណោមអាកាសយានដ្ឋានទាំង៣នៅកម្ពុជា អាកាសយានដ្ឋានភ្នំពេញ-អន្តរជាតិ មានភាពសកម្មជាងគេ ប៉ុន្តែនៅអាកាសយានដ្ឋានសៀមរាប គឺមានតែ អាកាសចរណ៍ Cambodia Angkor Air តែប៉ុណ្ណោះ ដែលធ្វើការហោះហើរម្ដងម្កាល ហើយនៅអាកាសយានដ្ឋានកងកេង ក្រុងព្រះសីហនុ គឺមានក្រុមហ៊ុនហ៊ុនហោះហើរក្នុងស្រុកចំនួន៤ ដែលមានសកម្មភាពម្ដងម្កាលផងដែរ។

រហូតមកដល់បច្ចុប្បន្ននេះ មិនទាន់មានក្រុមហ៊ុនអាកាសចរណ៍ ក្នុងស្រុកណាមួយរបស់កម្ពុជា ប្រកាសក្ស័យធនដោយសារ Covid-19 ឡើយ ខណៈយោងតាមស្ថិតិបានឱ្យដឹងថា បន្ទាប់ពីកើតមានជំងឺ Covid-19 នេះ ក្នុងខែមករាឆ្នាំ២០២០ ភ្ញៀវមានការថយចុះជាមធ្យមប្រមាណ២០ភាគរយ។

កាលពីខែកុម្ភៈ អ្នកដំនើរតាមផ្លូវអាកាសបានថយចុះប្រមាណ៥០ភាគរយ នៅក្នុងខែមីនាថយចុះជាង៧០ភាគរយ ហើយចំពោះខែមេសានេះ បានថយចុះរហូតដល់ជាង៩០ភាគរយ៕

ចំណេះដឹង! តើអាករលើការស្នាក់នៅត្រូវបានកំណត់អត្រាប៉ុន្មានភាគរយ?

ដោយ វុត្ថា

ភ្នំពេញៈ អារករស្នាក់នៅ (Accommodation Tax) គឺត្រូវបានកំណត់ និងប្រមូលលើការស្នាក់នៅក្នុងសណ្ឋាគារ ដែលជាប់ពន្ធក្នុងរបបស្វ័យប្រកាស សម្រាប់គុណប្រយោជន៍ថវិកាថ្នាក់ក្រោមជាតិ វៀរលែងតែសកម្មភាព ដូចជា៖ការប្រជុំឬសិក្ខាសាលា។

យោងតាមឯកសាររបស់អគ្គនាយកដ្ឋានពន្ធដារកម្ពុជាបានបង្ហាញថា អាករលើការស្នាក់ត្រូវបានកំណត់តាមអត្រា២% លើការស្នាក់នៅក្នុងសណ្ឋាគារ ផ្ទះសំណាក់ ក្នុងព្រះរាជាណាចក្រកម្ពុជា។

អ្នកជាប់ពន្ធ ដែលធ្វើការផ្គត់ផ្គង់សេវាស្នាក់នៅ ត្រូវទទួលខុសត្រូវក្នុងការបង់ប្រាក់អាករនេះ ជូនរដ្ឋបាលសារពើពន្ធ យ៉ាងយឺតបំផុតត្រឹមថ្ងៃទី២០ នៃខែបន្ទាប់ពីខែដែលមានការផ្គត់ផ្គង់។

សម្រាប់មូលដ្ឋានគិតជាអាករ គឺជាថ្លៃបន្ទប់ស្នាក់នៅក្នុងសណ្ឋាគារ ដោយរួមបញ្ចូលទាំងពន្ធ-អាករ និងបន្ទុកសេវាផ្សេងៗ (service charge) ប៉ុន្តែត្រូវលើកលែងអាករលើតម្លៃបន្ថែម និងអាគារស្នាក់នៅខ្លួនឯង៕

តើស្ថានភាពសេដ្ឋកិច្ចចិនបច្ចុប្បន្នមានសភាពយ៉ាងណាដែរ ក្រោយពីក្តោបក្តាប់ Covid-19 បាន?

ដោយ ហ្សូលី

ប៉េកាំង៖ មួយរយៈនេះ ប្រទេសចិនហាក់បីដូចជាគ្រប់គ្រងការរាតត្បាតជំងឺ Covid-19 នៅក្នុងដៃបាន ហើយសេដ្ឋកិច្ចប្រទេសនេះទៀតសោត ចាប់ផ្តើមវិលត្រឡប់មកស្ថានភាពធម្មតាឡើងវិញ។ អ្នកវិភាគសេដ្ឋកិច្ចហ៊ានអះអាងបែបនេះ ដោយសារការសង្កេតឃើញថា នៅប្រទេសចិនចាប់ផ្តើមសភាពអ៊ូអរ មន្ទីរពេទ្យមានអ្នកជំងឺតិចបំផុត ក៏ដូចជាតួលេខឬទិន្នន័យសេដ្ឋកិច្ច។

ក្នុងចំនោមផ្នែកជាច្រើននៅក្នុងសេដ្ឋកិច្ច ការបញ្ជាទិញក្នុងស្រុក ជាពិសេសការទិញទំនិញតាមរយៈប្រព័ន្ធអនឡាញបានជាសះស្បើយក្នុងល្បឿនលឿនបំផុត។ អំឡុងពិធីបុណ្យឈប់សម្រាក May Day ក្នុងខែឧសភានេះ ទិន្នន័យបង្ហាញថា ការទិញទំនិញអនឡាញតាមរយៈអ្នកលក់រាយមានការកើនឡើងលើស ៣០ ភាគរយ បើប្រៀបធៀបជាមួយឆ្នាំមុន។ យោងតាមតួលេខដែលផ្សព្វផ្សាយដោយ State Post Bareau Show បានឱ្យដឹងថា ត្រឹមរយៈពេល ៥ថ្ងៃ ការកម្មង់ទំនិញមានដល់ទៅជាង ១០០០លានកញ្ចប់។

ក្រឡេកទៅមើលនៅតាមបណ្តារសណ្ឋាគារ និងភោជនីយដ្ឋានវិញ ទិន្នន័យដដែលបង្ហាញថា វិស័យទាំងនេះបានដំណើរការអាជីវកម្មប្រមាណជា ៧០ភាគរយ បន្ទាប់ពីធ្វើការបិទទ្វារតាំងពីឆ្នាំ ២០១៩។ សូម្បីតែវិស័យទេសចរណ៍ ដែលរងឥទ្ធិពលខ្លាំងបំផុតក៏ចាប់មានភាពប្រសើរឡើងវិញ ជាក់ស្តែងដូចជានៅទីក្រុងសៀងហៃ សួនកម្សាន្ត DisneyLand នឹងប្រតិបត្តិការការងារនៅថ្ងៃចន្ទសប្តាហ៍ក្រោយនេះ។

របាយការណ៍បានពីរដ្ឋបាលខេត្តហ៊ូណានបញ្ជាក់ថា ការឈប់សម្រាក May day នេះ ទីក្រុងបានស្វាគមន៍ភ្ញៀវទេសខរណ៍ប្រហែលជិត ៤លាននាក់។ រីឯខេត្ត យុនណានវិញ មានភ្ញៀវទៅកម្សាន្តដល់ទៅជិត ១០លាននាក់។ តួលេខនេះគឺជាភស្តុតាងបញ្ជាក់ថា ប្រទេសចិនមានភាពរីកចម្រើនផ្នែកសេដ្ឋកិច្ចឡើងវិញហើយ។

តម្រូវការអគ្គិសនីមានការកើនឡើង ០.៣ ភាគរយ បើធៀបនឹងឆ្នាំមុន គ្រាន់តែខេត្តជាំងស៊ូមួយ តម្រូវការអគ្កិសនីហក់ឡើងដល់ ៤៧.៧ ពាន់លានគីឡូវ៉ាត់ ក្នុងមួយម៉ោង។

ទំហំពាណិជ្ជកម្មអន្តរជាតិរបស់ចិនកាលពីខែមេសា ទាំងការនាំចូល និងនាំចេញ បានឈានទៅដល់ ២.៥ទ្រីលានយ័ន។ ថ្វីត្បិតតែតួលេខនេះតិចជាងឆ្នាំ ២០១៩ក៏ពិតមែន ប៉ុន្តែវាបង្ហាញថា ចិនបានខិតខំប្រឹងប្រែងយ៉ាងខ្លាំងក្នុងការទ្រទ្រង់សេដ្ឋកិច្ចពាណិជ្ជកម្មរបស់ខ្លួនអំឡុងពិភពលោកកំពុងជួបប្រទះនឹងវិបត្តិសកលលោកនេះ។

ជាការពិតណាស់ សេដ្ឋកិច្ចចិនបានងើបឡើងវិញពិតប្រាកដ ប៉ុន្តែមិនអាចដើរទៅមុខម្នាក់ឯងឡើយ លុះត្រាតែពិភពលោកធូរស្បើយនឹងឧបសគ្គជំងឺឆ្លងនេះសិន ទើបអាចនិយាយបានថា សេដ្ឋកិច្ចប្រទេសមួយមានស្ថានភាពប្រសើរឡើង៕ CGTN

ក្រុមហ៊ុន Apple នឹងបើកហាងមួយចំនួនរបស់ខ្លួនឡើងវិញ បន្ទាប់ពីបិទទ្វារអស់រយៈពេលជិត២ខែ

ដោយ ៖ ប៊ី

អន្តរជាតិ ៖ ក្រុមហ៊ុន Apple កំពុងត្រៀមបើកហាងរបស់ខ្លួននៅអាមេរិកបម្រើដល់អតិថិជនម្តងទៀត បន្ទាប់ពីបិទទ្វារជិត២ខែ បណ្តាលមកពីការរាតត្បាត ជំងឺ COVID-19 ។

ក្រុមហ៊ុន បានឱ្យដឹងកាលពីថ្ងៃសុក្រ ខែឧសភា ឆ្នាំ២០២០ ម្សិលមិញនេះថា ខ្លួននឹងបើកហាងលក់រាយមួយចំនួនឡើងវិញនៅសប្តាហ៍ក្រោយនៅទូទាំងរដ្ឋចំនួន ៤ រួមមាន រដ្ឋអាយដាហូ រដ្ឋខារ៉ូលាយណា ខាងត្បូងរដ្ឋអាឡាបាម៉ា និងអាឡាស្កា។ ក្រុមហ៊ុន Apple (AAPL) មិនបានបង្ហាញពីចំនួនហាងដែលនឹងបើកឡើងវិញនោះទេ ប៉ុន្តែវាមានហាងសរុបចំនួន ៦ នៅទូទាំងរដ្ឋទាំង ៤នេះ។ ហាងដំបូងដែលត្រូវបើកដំណើរការវិញនឹងស្ថិតនៅក្នុងតំបន់ Boise រដ្ឋអាយដាហូ នៅថ្ងៃច័ន្ទខាងមុខនេះ។

អ្នកនាំពាក្យក្រុមហ៊ុនបានឱ្យដឹងនៅក្នុងសេចក្តីថ្លែងការណ៍មួយ ដែលបានផ្តល់ដល់ទូរទស្សន៍ CNBC ថា “យើងខកខានចំពោះអតិថិជនរបស់យើង ដែលទន្ទឹងរងចាំ និងផ្តល់ការគាំទ្រ”។ ព័ត៌មាននេះត្រូវបានរាយការណ៍ដំបូងដោយស្ថានីយទូរទស្សន៍ CNBC ។
អ្នកនាំពាក្យរូបនោះបានបន្ថែមថា ក្រុមហ៊ុន Apple នឹងផ្តោតជាចម្បងទៅលើសេវា Genius Bar របស់ខ្លួន ដែលផ្តល់សេវាកម្មដោយផ្ទាល់ និងផ្នែកបច្ចេកវិទ្យា នៅពេលមនុស្សកាន់តែច្រើនប្រើប្រាស់ផលិតផលរបស់ខ្លួនដើម្បីរក្សាទំនាក់ទំនងនៅពេលធ្វើការពីផ្ទះ។

ហាងនឹងដាក់ចេញនូវវិធានការណ៍សុវត្ថិភាពបន្ថែម ដូចជាការត្រួតពិនិត្យសីតុណ្ហភាព និងការបិទបាំងមុខសម្រាប់បុគ្គលិក និងអតិថិជនដោយក្រុមហ៊ុន ផ្តល់នូវម៉ាស ដល់អតិថិជនណាដែលមិនមានម៉ាស។ ក្រុមហ៊ុនក៏នឹងអនុវត្តគោលការណ៍គម្លាតសង្គម។

អ្នកនាំពាក្យរូបនោះបាននិយាយថា “យើងណែនាំឱ្យអតិថិជនទិញតាមអ៊ិនធ័រណេត ដែលអាចធ្វើទៅបានសម្រាប់ការដឹកជញ្ជូនដោយគ្មានការទាក់ទង ឬយកតាមហាង”។

ក្រុមហ៊ុន Apple បានបិទហាងទាំងអស់របស់ខ្លួននៅខាងក្រៅប្រទេសចិនកាលពីដើមខែមីនា ខណៈពេលដែលហាងរបស់ខ្លួននៅតាមប្រទេសនានាក្នុងតំបន់អាស៊ីត្រូវបានបិទកាលពីខែកុម្ភៈ ដោយសារតែការផ្ទុះដំបូងនៃជំងឺ COVID-19 នៅវូហាន។ ចាប់តាំងពីពេលនោះមកក្រុមហ៊ុនបានបើកហាងមួយឡើងវិញនៅរដ្ឋធានីសេអ៊ូលរបស់កូរ៉េខាងត្បូង ក៏ដូចជាហាងទាំងអស់នៅអូស្ត្រាលី និងអូទ្រីស។ ហាង Apple ទាំងអស់នៅប្រទេសអាល្លឺម៉ង់ក៏នឹងបើកដំណើរការវិញដែរនៅថ្ងៃច័ន្ទ។

ក្រុមហ៊ុននេះមានហាងចំនួន ៥១០ កន្លែងនៅទូទាំងពិភពលោក ដែលក្នុងនោះមានហាងចំនួន ២៧១ នៅសហរដ្ឋអាមេរិក៕

ក្រុមហ៊ុន HYUNDAI កំពុងសិក្សាបច្ចេកទេសដំណាំស្វាយនៅកម្ពុជា ដើម្បីនាំចេញទៅកាន់ទីផ្សារកូរ៉េ

ដោយ ៖ រ៉ាណេត

ភ្នំពេញ ៖ តំណាងក្រុមហ៊ុនដ៏ធំរបស់ប្រទេសកូរ៉េខាងត្បូង HYUNDAI បានដឹកនាំគណៈប្រតិភូចុះធ្វើទស្សនកិច្ច និងផ្លាស់ប្ដូរយោបល់សិក្សាទៅលើបច្ចេកទេស និងរកមធ្យោបាយក្នុងការកែច្នៃ និងបង្កើនសង្វាក់ផលិតកម្មវេចខ្ចប់ផ្លែស្វាយកម្ពុជា សម្រាប់នាំចេញទៅកាន់ទីផ្សារកូរ៉េឱ្យកាន់តែច្រើនបន្ថែមទៀតស្របទៅនឹងគោលនយោបាយរបស់រាជរដ្ឋាភិបាល។

លោកឧកញ៉ាបណ្ឌិត ម៉ុង ឫទ្ធី បានលើកឡើងថា កាលពីសុក្រទី៨ ខែឧសភា ឆ្នាំ២០២០ ក្រុមគណៈប្រតិភូកម្ពុជា រួមជាមួយនឹងគណៈប្រតិភូតំណាងក្រុមហ៊ុន HYUNDAI បានចុះពិនិត្យ និងធ្វើទស្សនកិច្ចលើសង្វាក់ផលិតកម្មក្នុងការរៀបចំ និងវេចខ្ចប់ផ្លែស្វាយកម្ពុជាសម្រាប់នាំចេញទៅកាន់ទីផ្សារប្រទេសកូរ៉េ។

លោកឧកញ៉ា ម៉ុង ឫទ្ធី បានបញ្ជាក់ថា “ខ្ញុំផ្ទាល់បានដឹកនាំគណប្រតិភូកម្ពុជាយើង និងលោក LEE CHANGHOON តំណាងក្រុមហ៊ុន HYUNDAIដឹកនាំគណៈប្រតិភូកូរ៉េ ដេីម្បីផ្លាស់ប្តូរទស្សនកិច្ចគ្នាទៅវិញទៅមក។ ជាដំបូងចូលមេីលខ្សែសង្វាក់ផលិតកម្មលាងសំអាតវេចខ្ចប់ផ្លែស្វាយ របស់ក្រុមហ៊ុន HYUNDAI សម្រាប់នាំចេញទៅកាន់ទីផ្សារអន្តរជាតិជាពិសេសប្រទេសកូរ៉េខាងត្បូង”។

លោកឧកញ៉ាបានបន្តទៀតថា “បន្ទាប់មកគណប្រតិភូបាននាំគ្នាចុះទៅពិនិត្យមេីលផ្នែកខ្លះនៅក្នុងតំបន់អភិវឌ្ឍន៍របស់ក្រុមហ៊ុន ម៉ុង ឫទ្ធី គ្រុប ដែលមានទីតាំងស្ថិតនៅក្នុងខេត្តព្រះព្រះសីហនុ។ ក្រោយពីបានបំពេញទស្សនកិច្ចសិក្សារួចហេីយភាគីទាំងពីរ និងបន្តកិច្ចពិភាក្សាជាបន្តបន្ទាប់ទៀត ដេីម្បីរិះរកមធ្យោបាយនាំចេញកសិផលរបស់ព្រះរាជាណាចក្រកម្ពុជាយើងទៅកាន់ទីផ្សារអន្តរជាតិឱ្យបានកាន់តែច្រេីន” ។

ក្រុមហ៊ុន Hyundai Corporation គឺជាក្រុមហ៊ុនពហុផលិតផលរបស់ប្រទេសកូរ៉េខាងត្បូង បានសហការជាក្រុមហ៊ុនដាំស្វាយនៅក្នុងស្រុកដ៏ធំ Mao Legacy Co Ltd ចាប់តាំងពីខែវិច្ឆិកា ឆ្នាំ ២០១៦ ដើម្បីបង្កើនសក្តានុពលផលិត និងកែច្នៃរួមគ្នាលើផ្ទៃដីចម្ការស្វាយប្រហែល ២៤០០ ហិកតានៅខេត្តកំពង់ស្ពឺ។ តាមរយៈក្រុមហ៊ុនដ៏ធំហ៊ីយុនដាយ កម្ពុជាបានធ្វើការនាំចេញផ្លែស្វាយទៅកាន់ទីផ្សារប្រទេសកូរ៉េខាងត្បូងជាលើកដំបូងចាប់តាំងពីពាក់កណ្តាលខែមករាឆ្នាំ ២០២០ បន្ទាប់ពីអាជ្ញាធរកូរ៉េទទួលស្គាល់គុណភាពស្តង់ដាអនាម័យ។

តាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានបង្ហាញថា ត្រឹមរយៈពេល២ខែកាលពីដើមឆ្នាំ២០២០ កម្ពុជាបាននាំចេញស្វាយស្រស់ចំនួន ១៦ ៨៦៨ តោនទៅកាន់ទីផ្សារអន្តរជាតិ រួមមានប្រទេសថៃ វៀតណាម បារាំង រុស្ស៊ី កូរ៉េខាងត្បូង និងហុងកុង៕

រដ្ឋាភិបាលសាងសង់មជ្ឈមណ្ឌលសហគ្រិនភាពលើកដំបូងនៅកម្ពុជា ដែលនឹងបញ្ចប់នៅពេលឆាប់ៗនេះ

ដោយ ៖ វុត្ថា

ភ្នំពេញ ៖ អាគារមជ្ឈមណ្ឌលនវានុវត្តន៍ និងសហគ្រិនភាពផ្នែកឌីជីថល ស្ថិតនៅក្នុងបរិវេណវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន (NIPTICT) កម្ពស់ ៤ ជាន់ គ្រោងនឹងបញ្ចប់ការសាងសង់ជាស្ថាពរនៅចុងខែមិថុនា ឆ្នាំ២០២០ខាងមុនេះ ។

នេះបើយោងតាមការចុះផ្សាយរបស់វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) កាលពីថ្ងៃទី៨ ខែឧសភា ឆ្នាំ២០២០ ម្សិលមិញនេះ ខណៈដែលលោក កាន ច័ន្ទមេត្តា រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ និងថ្នាក់ដឹកនាំវិទ្យាស្ថានជាតិ NIPTICT ចុះពិនិត្យការសាងសង់អាគារ ។

លោក កាន ច័ន្ទមេត្តា បានថ្លែងថា បេសកកម្មរបស់អាគារមជ្ឈមណ្ឌលនវានុវត្តន៍ឌីជីថល គឺលើកកម្ពស់ការចាប់ផ្ដើមជំនួញថ្មី និងសហគ្រិនភាពផ្នែកឌីជីថល និង ភ្ជាប់ទំនាក់ទំនងរវាងគ្រឹះស្ថានអប់រំ សហគ្រាស និងរដ្ឋាភិបាល។

អាគារមជ្ឈមណ្ឌលបច្ចេកវិទ្យា (Tech Center) នេះ ត្រូវបានបើកការដ្ឋាសាងសង់ កាលពីថ្ងៃទី២១ ខែតុលា ឆ្នាំ២០១៩កន្លងមកនេះ ដោយប្រើប្រាស់មូលនិធិនៃប្រតិបត្តិករទូរគមនាគមន៍បង់វិភាគទានចំនួន១ ភាគរយនៃចំណូលដុល ដើម្បីចូលរួមអភិវឌ្ឍន៍ដល់ការបណ្តុះបណ្តាលធនធានមនុស្ស និងការស្រាវជ្រាវ និងការអភិវឌ្ឍផ្នែកទូរគមនាគមន៍ បច្ចេកវិទ្យាគមនាគមន៍ និងព័ត៌មានស្របតាមគោលនយោបាយអភិវឌ្ឍន៍វិស័យ ទ-ប.គ.ព របស់កម្ពុជា។

អាគារមជ្ឈមណ្ឌលបច្ចេកវិទ្យា មានកម្ពស់ ៤ជាន់ និងទំហំអាគារសរុប ៣៨០០ម៉ែត្រក្រឡា នឹងក្លាយជាមជ្ឈមណ្ឌលស្រាវជ្រាវ និងអភិវឌ្ឍន៍បច្ចេកវិទ្យា ឌីជីថលដំបូងគេនៅកម្ពុជា ដែលកើតឡើងពីកិច្ចសហការរួមគ្នារវាងវិទ្យាស្ថានជាតិ NIPITCT ជាគ្រឹះស្ថានស្រាវជ្រាវរបស់រដ្ឋ និងក្រុមហ៊ុន Viettel (Cambodia)។

អគារមជ្ឈមណ្ឌលបច្ចេកវិទ្យា (Tech Center) នឹងត្រូវប្រើប្រាស់សម្រាប់ជម្រុញការស្រាវជ្រាវ និងប្រែក្លាយសមិទ្ធផលដែលកើតចេញពីការស្រាវជ្រាវ និងអភិវឌ្ឍន៍ផ្នែកបញ្ញាសប្បនិម្មិត (AI) វិទ្យាសាស្រ្តទិន្នន័យ (Data Science) អ៊ិនធឺណិតនៃវត្ថុ (IoT) បច្ចេកវិទ្យាពពក (Cloud Computing) សុវត្ថិភាពអ៊ិនធឺណិត ទៅជាបច្ចេកវិទ្យាឌីជីថលដែលអាចធ្វើអាជីវកម្មបានដូចជាបច្ចេកវិទ្យាបម្រើឱ្យរដ្ឋាភិបាលឌីជីថល (GovTech) បច្ចេកវិទ្យាសម្រាប់អប់រំ (EduTech) បច្ចេកវិទ្យាសម្រាប់កសិកម្ម (AgriTech) បច្ចេកវិទ្យាសម្រាប់ហិរញ្ញវត្ថុ (FinTech) បច្ចេកវិទ្យាសម្រាប់សុខាភិបាល (HealthTech) ។ល។ ៕

រដ្ឋមន្ត្រីការបរទេសចិន៖ មិត្តភាពចិន -កម្ពុជា គឺជាមិត្តភាពដែលមិនអាចបំបែកបាន

ដោយ ៖ វុត្ថា

ប៉េកាំង ៖ លោក Wang Yi ទីប្រឹក្សារដ្ឋ និងជារដ្ឋមន្រ្តីក្រសួងការបរទេសនៃសាធារណរដ្ឋប្រជាមានិតចិនបានអះអាងថា មិត្តភាពចិន – កម្ពុជា គឺជាមិត្តភាពដែលមិនអាចបំបែកបាន និងបានទប់ទល់ទៅនឹងការសាកល្បងនៃការផ្លាស់ប្តូរអន្តរជាតិ ហើយវាអាចត្រូវបានគេហៅថាជាគំរូនៃការផ្លាស់ប្តូររវាងប្រទេស និងរដ្ឋ។

ការអះអាងរបស់លោក Wang Yi ទីប្រឹក្សារដ្ឋ និងជារដ្ឋមន្រ្តីក្រសួងការបរទេសនៃសាធារណរដ្ឋប្រជាមានិតចិនធ្វើឡើងកាលពីល្ងាថ្ងៃទី៨ ខែឧសភា ឆ្នាំ ២០២០ ម្សិលមិញនេះ នៅក្នុងព្រះរាជសវនការដ៏វិសេសវិសាលជាមួយព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។

លោក Wang Yi ថ្លែងថា ព្រះករុណា ព្រះមហាក្សត្រ បានទទួលមរតកជាប្រពៃណីដ៏មានតម្លៃនៃសម្តេចព្រះ នរោត្តម សីហនុ ជាមួយប្រទេសចិន និងបានចូលរួមចំណែកយ៉ាងសំខាន់ៗ ក្នុងការលើកកម្ពស់ចំណងមិត្តភាពកម្ពុជា – ចិន ឲ្យកាន់តែមានភាពល្អប្រសើរ។ ដោយឈរលើមូលដ្ឋាននៃការបង្កើតភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយ ភាគីទាំងពីរកំពុងខិតខំប្រឹងប្រែងលើកកម្ពស់ការកសាងសហគមន៍នៃវាសនារួមគ្នា និងឈានទៅរកយុគសម័យថ្មីនៃការអភិវឌ្ឍន៍រួម និងវិបុលភាពរួមគ្នារវាងចិននិងកម្ពុជា។

លោក Wang Yi បន្ថែមថា ភាគីចិនមានសេចក្តីរីករាយដោយឃើញថាក្រោមម្លប់បារមីរបស់ ព្រះករុណា ព្រះមហាក្សត្រ និងក្រោមការដឹកនាំរបស់សម្តេចនាយករដ្ឋមន្រ្តី ហ៊ុន សែន ប្រទេសកម្ពុជាក៏មានការជឿនលឿនទៅមុខគួរឱ្យកត់សម្គាល់ ក្នុងការប្រយុទ្ធប្រឆាំងនឹងជំងឺរាតត្បាត COVID-19។

លោក Wang Yi ជឿជាក់ថាប្រជាជនកម្ពុជានឹងជៀសផុតពីការរីករាលដាលនៃជំងឺនេះ។ ទន្ទឹមនឹងនេះទាំងចិន និងកម្ពុជា នៅតែប្រឈមនឹងហានិភ័យនិងបញ្ហាប្រឈមនៃការងើបឡើងវិញនៃជំងឺនេះ ចំពោះប្រជាជនក្នុងស្រុក និងការនាំចូលពីខាងក្រៅ។ ភាគីទាំងពីរគួរតែពង្រឹងថែមទៀតនូវសាមគ្គីភាព និងកិច្ចសហប្រតិបត្តិការ ព្រមទាំងការផ្លាស់ប្តូរបទពិសោធន៍ក្នុងការការពារ និងគ្រប់គ្រង ហើយស្ដារឡើងវិញនូវជីវិតសេដ្ឋកិច្ច និងសង្គម ក្នុងខណៈពេលដែលប្រកាន់ខ្ជាប់នូវការការពារនិងការត្រួតពិនិត្យ ចំពោះការរីករាលដាលនៃជំងឺ COVID-19 ។

ខណៈពេលដែលព្រះករុណា ព្រះមហាក្សត្រ ទ្រង់គង់ប្រថាប់ពិនិត្យព្រះរាជសុខភាព នៅរដ្ឋធានីប៉េកាំង ព្រះអង្គបានសព្វព្រះរាជហឫទ័យបង្ហូតទង់ព្រះមហាក្សត្រត្រឹមពាក់កណ្តាលដង នៅមុខព្រះរាជដំណាក់ ដើម្បីកាន់ទុក្ខដល់អ្នកស្លាប់ដោយសារជំងឺ COVID-19។ ចំណែកឯ សម្តេចព្រះមហាក្សត្រី ព្រះវររាជមាតាជាតិខ្មែរ ព្រះអង្គបានប្រារព្ធពិធីតាមបែបព្រះពុទ្ធសាសនានៅព្រះបរមរាជវាំងនៃប្រទេសកម្ពុជា ដើម្បីបួងសួងដល់ប្រជាជនចិន។ ដំណើរទស្សនកិច្ចរបស់ សម្តេចនាយករដ្ឋមន្រ្តី ហ៊ុនសែន ទៅកាន់ប្រទេសចិនក៏បានសម្តែងការគាំទ្រយ៉ាងខ្លាំង។ ភាគីចិន និងចងចាំជានិច្ចនូវចំណុចនេះ។

ព្រះករុណា ព្រះមហាក្សត្រ សព្វព្រះរាជហឫទ័យប្រោសព្រះរាជទានការសួរសុខទុក្ខយ៉ាងកក់ក្តៅជូនចំពោះលោកប្រធានាធិបតី Xi JinPing និងលោកជំទាវ ។ ព្រះអង្គ ស្តេចមានព្រះរាជឱង្ការថា ខ្ញុំនឹងបន្តទៅមុខតាមផ្លូវចំណងមិត្តភាពកម្ពុជា – ចិន ដែលបានកសាងដោយសម្តេចព្រះ នរោត្តម សីហនុ និងថ្នាក់ដឹកនាំគ្រប់ជំនាន់នៃប្រទេសចិន បន្តមរតក និងអភិវឌ្ឍមិត្តភាពរវាងប្រទេសទាំងពីរ ដើម្បីផ្តល់ផលប្រយោជន៍កាន់តែប្រសើរថែមទៀតដល់ប្រជាជននៃប្រទេសទាំងពីរ។

ព្រះករុណាមានព្រះរាជបន្ទូលថា “ខ្ញុំជឿជាក់យ៉ាងមុតមាំថាទំនាក់ទំនងកម្ពុជា – ចិន នឹងត្រូវបានពង្រឹងបន្ថែមទៀត ហើយមិត្តភាពប្រជាជននឹងបន្តកាន់តែស៊ីជម្រៅថែមទៀតផងដែរ”។
ព្រះករុណា ព្រះមហាក្សត្រ បានអបអរសាទរប្រទេសចិន ចំពោះសមិទ្ធិផលសំខាន់ៗដែលសម្រេចបាន ក្នុងការប្រយុទ្ធប្រឆាំងនឹងការរាតត្បាតនៃជំងឺ COVID-19 ក្រោមការដឹកនាំដ៏ឈ្លាសវៃរបស់លោកប្រធានាធិបតី Xi JinPing និងបានវាយតម្លៃខ្ពស់ចំពោះទស្សនវិជ្ជាអភិបាលកិច្ចដែលផ្តោតលើប្រជាជនរបស់ប្រទេសចិន និងបានថ្លែងអំណរគុណចំពោះប្រទេសចិន ដែលបានជួយដល់ប្រទេសកម្ពុជា ក្នុងការប្រយុទ្ធប្រឆាំងនឹងការរីករាលដាលនៃជំងឺនេះ។ ភាគីកម្ពុជា មានឆន្ទៈក្នុងការពង្រឹងការផ្លាស់ប្តូរបទពិសោធន៍នៃការការពារការឆ្លងរាលដាលជាមួយប្រទេសចិន និងការពារសុវត្ថិភាពដល់ជីវិតប្រជាជន៕

1...2,4112,4122,413...3,254 Page 2,412 of 3,254