ការសិក្សា៖ វិស័យអចលនទ្រព្យជាជម្រើសវិនិយោគដែលមានសុវត្ថិភាពជាងគេក្នុងកំឡុងពេលនេះ

ដោយ ប៊ី

ភ្នំពេញ៖ ខណៈការរីករាលដាលនៃជំងឺ Covid-19 បង្កឱ្យមានបញ្ហាយ៉ាងខ្លាំងនៅក្នុងទីផ្សារហិរញ្ញវត្ថុជាសកល វិស័យអចលនទ្រព្យអាចជាជម្រើសដ៏ល្អសម្រាប់វិនិយោគិន ដែលស្វែងរកផលចំណេញ និងរួចផុតពីហានិភ័យនាពេលខាងមុខ។ នេះបើយោងតាមការលើកឡើងរបស់លោកស្រី Amanda Carpo អ្នកជំនាញអចលនទ្រព្យដែលមានមូលដ្ឋានប្រទេសហ្វីលីពីន កាលពីថ្ងៃពុធ ទី៦ ខែឧសភា ឆ្នាំ២០២០ ។

លោកស្រី Carpo សហស្ថាបនិកក្រុមហ៊ុន KMC Solutions ដែលផ្តល់ការិយាល័យឯកជន កន្លែងធ្វើការ និងការជួលបុគ្គលិក បាននិយាយថា អចលនទ្រព្យនៅតែមានសក្តានុពលខ្លាំងក្នុងការផ្តល់ឱ្យវិនិយោគិននូវផលចំណេញល្អ បើទោះសេដ្ឋកិច្ចម៉ាក្រូសេដ្ឋកិច្ចធ្លាក់ចុះ។

លោកស្រី Carpo បានឱ្យដឹងថា “ការវិនិយោគលើអចលនទ្រព្យគឺជាគំនិតល្អក្នុងការធ្វើពិពិធកម្មផលវិនិយោគរបស់អ្នក។ ការលេងភាគហ៊ុនមានភាពងាយនឹងបង្កជាហេតុគ្រោះថ្នាក់ដល់ការវិនិយោគ ហើយអាចប្រឈមនឹងហានិភ័យជាទូទៅ ហើយអចលនទ្រព្យអាចជួយគ្រប់គ្រងភាពប្រែប្រួល និងហានិភ័យ និងធ្វើឱ្យការវិនិយោគរបស់អ្នកកាន់តែមានប្រសិទ្ធិភាព” ។

លោកស្រី បន្តថា “ជាងពេលណាៗទាំងអស់ វិនិយោគិនត្រូវយល់ពីផលប៉ះពាល់នៃការប្រែប្រួល។ នោះគឺជាអ្វីដែលយើងនឹងជួបប្រទះនាពេលអនាគតដ៏ខ្លីខាងមុខនេះ” ។

ការស្ទង់មតិរបស់ក្រុមហ៊ុន YouGov Plc ដែលមានមូលដ្ឋាននៅចក្រភពអង់គ្លេស ថ្មីៗនេះ បានចាត់ចំណាត់ថ្នាក់វិស័យអចលនទ្រព្យជាការវិនិយោគមានសុវត្ថិភាពបំផុតទីបី បន្ទាប់ពីមាស និងការដាក់ប្រាក់។

លោកស្រី Carpo បាននិយាយថា ទំនុកចិត្តបែបនេះកើតឡើងដោយមានហេតុផលល្អ។ លោកស្រី បានបន្តថា “អចលនទ្រព្យផ្តល់ភាពងាយស្រួលដល់ម្ចាស់កម្មសិទ្ធិ លើវិធីរកប្រាក់ចំណូល – វាមិនត្រឹមតែទិញ ឬលក់ប៉ុណ្ណោះទេ។ វិនិយោគិនអាចកែលំអ ឬជួសជុលសម្រាប់ជួល ឬជួលក្នុងជម្រើសផ្សេងទៀតជាច្រើន” ។

លោក Oscar Jorda ទីប្រឹក្សាគោលនយោបាយជាន់ខ្ពស់ធនាគារ Oscar Jorda បាននិយាយថា ជាប្រវត្តិសាស្ត្រ វិស័យអចលនទ្រព្យគឺជាការវិនិយោគប្រសើរជាងការលេងភាគហ៊ុន។

នៅក្នុងឯកសារស្រាវជ្រាវដែលមានចំណងជើងថា អត្រានៃផលចំណេញត្រឡប់មកវិញលើអ្វីៗគ្រប់យ៉ាងឆ្នាំ ១៨៧០-២០១៥ ដែលបានតាមដានទិន្នន័យប្រវត្តិសាស្ត្រដែលមានអាយុកាលជាងមួយសតវត្សរ៍ លោក Jorda បាននិយាយថា ជាទូទៅ អចលនទ្រព្យលំនៅដ្ឋានផ្តល់ផលចំណេញត្រឡប់ប្រសើរជាងការលេងភាគហ៊ុន ខណៈវាមានហានិភ័យ និងភាពប្រែប្រួលជាងការលេងភាគហ៊ុន។

លោកស្រី Carpo បាននិយាយថា “សព្វថ្ងៃនេះ វាពិបាកក្នុងការក្រឡេកមើលការស្ថានភាពរបស់ផ្សារភាគហ៊ុន ហើយមិនចង់ទាញប្រាក់របស់អ្នកចេញទេ។ នៅពេលអ្នកទាញប្រាក់របស់អ្នកចេញ អ្នកប៉ះប៉ូវនឹងខាតបង់របស់អ្នក” ។

លោកស្រីបាននិយាយថា “វាសំខាន់ណាស់ក្នុងការវិនិយោគ វាជាការសំខាន់ដើម្បីធ្វើពិពិធកម្ម ហើយវិស័យអចលនទ្រព្យអាចជាការការពារដ៏ល្អមួយ។ វានឹងមានការស្ទុះងើបសេដ្ឋកិច្ចឡើងវិញ នៅពេលដែលសង្គមអាចបើកម្តងទៀត ហើយវានឹងកើតឡើងដោយខានតែបាន” ។

លោកស្រី Carpo បាននិយាយថា វិស័យអចលនទ្រព្យនៅប្រទេសហ្វីលីពីនកំពុងក្លាយជាវិស័យមួយដែលមានភាពធន់ទ្រាំខ្លាំងនៅក្នុងសេដ្ឋកិច្ច ទោះបីជាមានវិបត្តិ Covid-19 ក៏ដោយ។ តម្រូវការពិតប្រាកដសម្រាប់លំនៅដ្ឋានពីអ្នកធ្វើការក្នុង និងក្រៅស្រុកនៅក្នុងប្រទេសនេះអាចរក្សាទីផ្សាលំនៅដ្ឋានមានស្ថានភាពល្អ។

លោកស្រី បន្តថា “ខុនដូមានគុណប្រយោជន៍លើវិស័យអចលនទ្រព្យផ្សេងទៀត ដោយសារអ្នកអភិវឌ្ឍន៍មានទីតាំងនៅក្នុងតំបន់ដែលមានតម្រូវការខ្លាំង។ នេះ សហការជាមួយភាពទាក់ទាញ និងសក្តានុពលសម្រាប់បន្ថែមភាពទាក់ទាញលើគម្រោងរបស់ពួកគេ” ៕

លោក អ៉ិន ណាង ៖ ចង់ចំណេញពីការវិនិយោគដី គប្បីយល់ច្បាស់ពីចំណុចសំខាន់ចំនួន៣

ដោយ ៖ រ៉ាណេត

ភ្នំពេញ ៖ មនុស្សជាច្រើនបាននិយាយថា ការរកស៊ីនៅក្នុងវិស័យអចលនទ្រព្យ ជាពិសេសការទិញ-លក់ដីធ្លី គឺជារឿងងាយស្រួល និងឆាប់មានបំផុត ប៉ុន្តែវាមិនមែនងាយស្រួលដូចការគិតនោះទេ។

អគ្គនាយកក្រុមហ៊ុនភ្នាក់ងារអចលនទ្រព្យ Show Up Real Estate លោក អ៉ិន ណាង បានចែករំលែកនូវចំណេះដឹងខ្លីៗដែលជាគោលការណ៍គ្រឹះ និងជាទុនយ៉ាងសំខាន់សម្រាប់ឈរជើង និងរកស៊ីបានយូរនៅក្នុងវិស័យអចលនទ្រព្យ ប្រកបដោយភាពជោគជ័យខ្ពស់។

លោក អ៉ិន ណាង បានមានប្រសាសន៍ថា “ការចូលខ្លួនមកប្រឡូក ឬរកស៊ីនៅក្នុងវិស័យអចលនទ្រព្យវាមិនមែនជារឿងលំបាក និងពិបាកធ្វើនោះទេ ប៉ុន្តែអ្វីដែលសំខាន់ គឺភាពរឹងមាំ ដែលអាចឈរជើង និងរកស៊ីនៅក្នុងសង្គមដែលពោរពេញទៅដោយការប្រកួតប្រជែងមួយនេះបានយូរអង្វែង និងទទួលភាពជោគជ័យ។ ឧទារហណ៍ថា ប្រសិនបើចំណាយលុយទិញដីសម្រាប់វិនិយោគ គឺត្រូវតែមានទំនុកចិត្តខ្ពស់ថា នឹងអាចទទួលបានចំណេញ។

លោកបានបញ្ជាក់ថា សម្រាប់ការរកស៊ីនៅក្នុងវិស័យអចលនទ្រព្យ ថវិកាដែលជាទុនដំបូង វាគឺជាចំណុចសំខាន់មិនអាចខ្វះបាន ប៉ុន្តែនៅមានធាតុផ្សំផ្សេងៗមួយចំនួនទៀត ដែលអ្នករកស៊ីនៅក្នុងវិស័យមួយនេះ គប្បីត្រូវតែមាន នោះគឺចំណេះដឹង ភាពឆ្លាតវៃ និងស្វែងយល់ពីព័ត៌មានពាក់ព័ន្ធនានាជាច្រើនទៀតដូចជា៖

១- ចេះសិក្សាពីតម្លៃក្នុងស្រុក ៖ នេះជាកិច្ចការដំបូងដែលអ្នកត្រូវដឹងពីតម្លៃអចលនទ្រព្យក្នុងពេលបច្ចុប្បន្ន ស្គាល់ពីតំបន់នីមួយៗ ជាពិសេសគឺតំបន់កំពុងអភិវឌ្ឍន៍ និងតំបន់គ្រោងអភិវឌ្ឍន៍។ នៅពេលដែលអ្នកដឹងពីតម្លៃអចលនទ្រព្យក្នុងតំបន់ណាមួយច្បាស់ នោះអ្នកនឹងងាយស្រួលក្នុងការលក់ -ទិញ ដោយទទួលបានផលចំណេញច្រើន។ អ្នកត្រូវដឹងឱ្យច្បាស់ថា តម្លៃនៃអចលនទ្រព្យមួយនេះ វានឹងកើនតម្លៃនៅក្នុងរយៈពេលប៉ុន្មានឆ្នាំទៀត ។

២- កុំមើលរំលងតំបន់ជាយក្រុង ៖ នៅពេលការអភិវឌ្ឍកាន់តែរីកចម្រើន តំបន់ក្រុងកាន់តែចង្អៀត នោះក្រុមអ្នកវិនិយោគនឹងងាកទៅកាន់តំបន់ជាយក្រុងវិញម្ដង ដូច្នេះ អ្នកត្រូវដឹងថា បច្ចុប្បន្នតើការអភិវឌ្ឍនៅក្នុងទីក្រុងដល់កម្រិតណា ហើយវានឹងជះឥទ្ធិពលទៅដល់ជាយក្រុងនៅពេលណា? ឆ្ពោះទៅទិសមួយណា? នៅពេលដែលអ្នកដឹងថា តំបន់ជាយក្រុងណាមួយ នឹងក្លាយជាតំបន់អភិវឌ្ឍន៍អាទិភាព នោះអ្នកនឹងមើលឃើញពីតម្រូវការទីផ្សារ និងការទទួលបានផលចំណេញពីពីការវិនិយោគ។

៣- តាមដានព័ត៌មានឱ្យបានល្អិតល្អន់ ៖ ត្រូវមានទំនាក់ទំនងល្អជាមួយនឹងស្ថាប័នឯកជន ឬរដ្ឋ ដើម្បីទទួលបានព័ត៌មាននានា លើវិស័យអចលនទ្រព្យ ព្រោះអ្នកនឹងដឹងថា តំបន់ណានឹងក្លាយជាតំបន់អភវិឌ្ឍន៍ តំបន់ណានឹងត្រូវរដ្ឋាភិបាលរក្សាទុក ។ ម្យ៉ាងទៀត រាល់ការមានទំនាក់ទំនងល្អ មិនថាចំពោះស្ថាប័នរដ្ឋ ឬឯកជននោះទេ អ្នកអាចនឹងទទួលបានផលចំណេញច្រើន ទាំងគម្រោងអភិវឌ្ឍរបស់រដ្ឋាភិបាល ទាំងការពង្រីកទីផ្សាររបស់អ្នកកាន់តែទូលាយ៕

ខេត្តកំពតនឹងមានរមណីយដ្ឋានឆ្នេរខ្សាច់ស្អាតថ្មីមួយស្ថិតនៅក្នុងតំបន់កែបថ្មី

ដោយ ៖ វុត្ថា

ភ្នំពេញ៖ រដ្ឋបាលខេត្តកំពតបានដាក់ចេញផែនការអភិវឌ្ឍឆ្នេរស្អាតថ្មីមួយស្ថិតនៅក្នុងតំបន់កែបថ្មី ដើម្បីបង្កើនផលិតផលទេសចរណ៍ឲ្យកាន់តែសម្បូរបែបសម្រាប់ឱ្យភ្ញៀវទេសចរ អាចទស្សនាកំសាន្ត និងស្នាក់នៅយូរជាងមុន ខណៈកន្លងមក ខេត្តជាប់មាត់សមុទ្រមួយនេះ មិនមានតំបន់ឆ្នេរសម្រាប់ទទួលភ្ញៀវទេសចរនោះទេ។

លោក សយ ស៊ីណុល ប្រធានមន្ទីរទេសចរណ៍ខេត្តកំពត នៅក្នុងសន្និសីទសារព័ត៌មាន ស្តីពីវឌ្ឍនភាព និងទិសដៅការងារបន្តរបស់រដ្ឋបាលខេត្តកំពតនៅ ព្រឹកថ្ងៃទី៨ ខែឧសភា ឆ្នាំ២០២០នេះឱ្យដឹងថា រដ្ឋបាលខេត្តកំពតនឹងបន្តអភិវឌ្ឍន៍ឆ្នេរថ្មីស្អាតដើម្បីលើកកម្ពស់វិស័យទេសចរណ៍ ប្រកបដោយចិរភាព និងគុណភាព ដើម្បីទាក់ទាញភ្ញៀវទេសចរឲ្យចូលមកទស្សនាកម្សាន្តច្រើនក្នុងខេត្ត។

លោកឱ្យដឹងបន្តថា “ខេត្តកំពត គឺជាខេត្តស្ថិតនៅក្នុងតំបន់ឆ្នេរ ប៉ុន្តែពុំមានឆ្នេរខ្សាច់សម្រាប់បំរើសេចក្តីត្រូវការរបស់ប្រជាពលរដ្ឋ និងភ្ញៀវទេសចរនៅឡើយ ដូច្នេះ រដ្ឋបាលខេត្តកំពត បានធ្វើការសិក្សារៀបចំបង្កើតនូវរមណីយដ្ឋានឆ្នេរខ្សាច់ថ្មីមួយ ដែលមានទីតាំងស្ថិតនៅក្នុងតំបន់កែបថ្មី នៅខាងលិចខេត្តកំពត ដើម្បីទាក់ទាញភ្ញៀវទេសចរចូលមកទស្សនាក្នុងខេត្តកំពត។

លោកបន្ថែមថា “រដ្ឋបាលខេត្ត កំពុងសិក្សាកន្លងមកប្រសិទ្ធិនាមឈ្មោះអ្វីនៅឆ្នេរនោះ ? ហើយកន្លងមកនេះរដ្ឋបាលខេត្តមានមហិច្ឆតាថា ធ្វើឲ្យបើកដំណើរការបានខ្លះបណ្តើរៗ មុនពេលចូលឆ្នាំ ប៉ុន្តែដោយសារយើងមានបញ្ហាជំងឺ Covid-19 ទៅ យើងក៏ពន្យារពេលទៅ” ។

លោកប្រធានមន្ទីរទេសចរណ៍ខេត្តរូបនេះ បន្ថែមថា ក្នុងរយៈពេល ៥ ឆ្នាំ ចុងក្រោយ ភ្ញៀវទេសចរបានកើនឡើងជាបន្តបន្ទាប់ គ្រាន់តែឆ្នាំ ២០១៩ កន្លងមកនេះ ខេត្តកំពត ទទួលបានភ្ញៀវទេសចរ ១លាន៦សែននាក់ ក្នុងនោះភ្ញៀវអន្តរជាតិជាង១០ភាគរយ ខណៈបច្ចុប្បន្ននេះ ខេត្តមានតំបន់ទេសចរណ៍ចំនួន ១៧ កន្លែង សហគមន៍ទេសចរណ៍ចំនួន ៤ កន្លែង និងគោលដៅទាក់ទាញចំនួន ៤ កន្លែង (ចម្ការម្រេច ស្រែអំបិល សំណង់បិតិកភ័ណ្ឌ និងសក្តានុពលទេសភាពដងព្រែក) ។

លោកបញ្ជាក់ថា បន្ថែមពីនេះ ខេត្តកំពតមានកំពងផែទឹកជ្រៅ ដែលអាចផ្តល់លទ្ធភាព ដល់ការចូលចតរបស់នាវាទេសចរណ៍ធំៗ ។ ស្របគ្នានេះដែរ ខេត្តកំពតជួបបញ្ហាប្រឈម នៃកន្លែងស្នាក់នៅ និងភោជនីយដ្ឋាន កម្រិតមធ្យម និងលើមធ្យម និងមជ្ឈមណ្ឌលសេវាកម្មជាច្រើនផ្សេងទៀត។

លោក ភូ លិ អភិបាលរងខេត្តកំពត បានឱ្យដឹងដែរថា បច្ចុប្បន្ន រមណីយដ្ឋានឋានសួគ៌បូគោ នៅតែជាគោលដៅទាក់ទាញទេសចរណ៍ជាទីបំផុត សម្រាប់ភ្ញៀវជាតិ-អន្តរជាតិ ចូលមកទស្សនាកម្សាន្ត ក្នុងចំណោមរមណីយដ្ឋានផ្សេងៗរបស់ខេត្ត។ ជាមួយគ្នានេះផងដែរ ការកើនឡើងជាបន្តបន្ទាប់នូវសេវាកម្មផ្ទះសំណាក់ បឹងកាឡូ សណ្ឋាគារ អាហារដ្ឋាន ភោជនីយដ្ឋាន សុទ្ធតែបានលើកស្ទួយកម្រិតជីវភាព របស់ប្រជាពលរដ្ឋឲ្យមានភាពល្អប្រសើរខ្លាំង។

លោកបន្តថា ចំពោះហេដ្ឋារចនាសម្ព័ន្ធរូបវ័ន្តដទៃទៀត ត្រូវបាន និងកំពុងសាងសង់ កែលំអរជាបន្តបន្ទាប់ សំដៅប្រែក្លាយទឹកដីខេត្តកំពត ជាទឹកដីទាក់ទាញភ្ញៀវទេសចរ ប្រកបដោយភាពស្រស់បំព្រង និងផាសុកភាព ស័ក្តិសមជាខេត្តដែលត្រូវទទួលបានជ័យលាភី ផ្ការំដួល៣ទង។

យោងតាមរបាយការណ៍របស់ក្រសួងទេសចរណ៍ បានបង្ហាញថា វិស័យទេសចរណ៍កម្ពុជានៅមានសក្តានុពលច្រើនក្នុងការជំរុញការអភិវឌ្ឍសង្គម និងការទ្រទ្រង់កំណើនសេដ្ឋកិច្ចជាតិ ដើម្បីសម្រេចបាននូវគោលដៅភ្ញៀវទេសចរចំនួន១៥ លាននាក់ ជាមួយចំណូលប្រមាណ១០ពាន់លានដុល្លារអាមេរិក និងការបង្កើតការងារបានប្រមាណ ២លាននាក់ នៅឆ្នាំ២០៣០ ៕

ចំណេះដឹងច្បាប់! អ្វីជាទ្រព្យសម្បត្តិដោយឡែក?

ដោយ ៖ វុត្ថា

ភ្នំពេញ៖ ទ្រព្យសម្បត្តិដោយឡែក គឺជាទ្រព្យសម្បត្តិដែលស្ថិតនៅក្រោមកម្មសិទ្ធិរបស់សហព័ទ្ធ (ប្តី ឬ ប្រពន្ធ)ណាម្នាក់ ដូចខាងក្រោម៖

ក. ទ្រព្យសម្បត្តិដែលប្តី ឬប្រពន្ធមាននៅមុនពេលរៀបអាពាហ៍ពិពាហ៍ ។

មានន័យថាភាគីប្តី ឬប្រពន្ធមានទ្រព្យនោះ នៅមុនពេលរៀបអាពាហ៍ពិពាហ៍ ទោះបីក្រោយរៀប អាពាហ៍ពិពាហ៍ក៏ដោយ ក៏គេចាត់ទុកថា ទ្រព្យនោះ ជាទ្រព្យដោយឡែករបស់ប្តី ឬប្រពន្ធនោះដដែល។

ឧទាហរណ៍៖ ប្តីមានផ្ទះមួយល្វែងមុនពេលរៀបអាពាហ៍ពិពាហ៍ ទោះក្រោយរៀបអាពាហ៍ពិពាហ៍ ក៏ផ្ទះនោះ នៅតែជាទ្រព្យរបស់ប្តីដដែល គឺមិនអាចរាប់ជាទ្រព្យរួមនោះទេ។

ខ. ទ្រព្យសម្បត្តិដែលប្តី ឬប្រពន្ធទទួលបានដោយប្រទានកម្ម សន្តតិកម្ម ឬអច្ច័យទាន នៅក្នុងអំឡុងពេលអាពាហ៍ពិពាហ៍ ។

ក្នុងករណីប្រសិនបើម្ចាស់អំណោយទ្រព្យអោយទៅប្តី ឬប្រពន្ធនោះមានន័យថា អំណោយនោះនឹងក្លាយទៅជាទ្រព្យដោយឡែករបស់ប្តី ឬប្រពន្ធនោះ។ លើកលែងតែម្ចាស់អំណោយបានបញ្ជាក់ថាឱ្យទាំងប្តី និងប្រពន្ធ ទើបទ្រព្យនោះក្លាយទៅជាទ្រព្យរួមរបស់ប្តី និប្រពន្ធ ។

ឧទាហរណ៍៖ ឪពុករបស់លោក “ក” បានប្រគល់ផ្ទះមួយល្វែងឱ្យគាត់នៅក្នុងពេលចំណងអាពាហ៍ពិពាហ៍។ នោះ គេចាត់ទុកថាផ្ទះនោះជាទ្រព្យដោយឡែករបស់លោក “ក” ទោះបីជាទ្រព្យនោះបានមកក្នុងអំឡុងពេលអាពាហ៍ពិពាហ៍ក៏ដោយ។

គ. ទ្រព្យសម្បត្តិជាតម្លៃតបទាក់ទងនឹងការចាត់ចែងទ្រព្យដោយឡែក គេចាត់ទុកថាជាទ្រព្យដោយឡែក។

ឧទាហរណ៍៖ ប្តីមានផ្ទះមួយខ្នងដែលជាទ្រព្យដោយឡែករបស់ខ្លួន ក្រោយមកនៅក្នុងអំឡុងពេលអាពាហ៍ពិពាហ៍ ប្តីបានលក់ផ្ទះនោះក្នុងតម្លៃ៥ម៉ឺនដុល្លារ ដូច្នេះប្រាក់ដែលបានមក ពីការលក់ផ្ទះនោះ ក៏គេចាត់ទុកថាជាទ្រព្យរបស់ប្តីដដែល ទោះបីជាប្តីលក់នៅក្នុងអំឡុងពេលជីវិតអាពាហ៍ពិពាហ៍ក៏ដោយ។ ម្យ៉ាងវិញទៀតប្រសិនបើប្តីយកលុយនោះទៅទិញដីហើយ លក់ទៅវិញបានប្រាក់ចំណេញបន្ថែមទៀតក៏ដោយ ក៏វានៅតែជាទ្រព្យដោយឡែករបស់ប្តីព្រោះផលចំណេញនោះកើតចេញពីតម្លៃតបនៃវត្ថុដែលជាទ្រព្យដោយឡែករបស់ប្តី ៕

ADB គ្រោងផ្តល់ហិរញ្ញប្បទានដល់កម្ពុជាប្រមាណ ១៣០០លានដុល្លារ សម្រាប់អភិវឌ្ឍន៍ប្រទេស

ដោយ ៖ រ៉ាណេត

ភ្នំពេញ ៖ ធនាគារអភិវឌ្ឍន៍អាស៊ី ADB តាមរយៈកម្មវិធី/គម្រោងអភិវឌ្ឍន៍ និងជំនួយបច្ចេកទេស (COBP) ឆ្នាំ២០២១-២០២៣ គ្រោងគ្រោងនឹងផ្តល់ហិរញ្ញប្បទានប្រមាណ ១៣០០លានដុល្លារ ដែលនឹងចូលរួមយ៉ាងសកម្មក្នុងការអនុវត្តយុទ្ធសាស្រ្តភាពជាដៃគូសម្រាប់អភិវឌ្ឍន៍កម្ពុជាឆ្នាំ២០១៩-២០២៣ ។

រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានលើកឡើងនៅក្នុងកិច្ចប្រជុំបូកសរុបការងារស្ដីពីការរៀបចំកម្មវិធី គម្រោងអភិវឌ្ឍន៍ និងជំនួយបច្ចេកទេសឆ្នាំ២០២១-២០២៣ នៅទីស្ដីក្រសួងជាមួយនាយិកាតំណាងធនាគារអភិវឌ្ឍន៍អាស៊ី ADB នៅថ្ងៃទី៨ ខែឧសភា ឆ្នាំ២០២០ តាមរយៈ Video Conferenceថា បច្ចុប្បន្ន រាជរដ្ឋាភិបាលបានផ្តល់នូវអាទិភាពខ្ពស់បំផុតទៅលើកិច្ចការប្រយុទ្ធប្រឆាំងនឹងជំងឺ Covid-19 ដែលកំពុងរាតត្បាតលើសាកលលោក។

លោក វង្សី វិស្សុត មានប្រសាសថា “ក្នុងបរិការណ៍ នៃការរីករាលដាលនៃជំងឺកូវីដ-១៩, រាជរដ្ឋាភិបាលបាន ផ្តល់នូវអាទិភាពខ្ពស់បំផុត លើកិច្ចការប្រយុទ្ធប្រឆាំង នឹងជំងឺកូវីដ-១៩ ដើម្បីទប់ស្កាត់ការឆ្លង, ការចម្លង និងការពារអាយុជីវិតរបស់ប្រជាជន។ ជាក់ស្តែងចំនួននៃការឆ្លងមានត្រឹមតែ ១២២ ករណីប៉ុណ្ណោះ ដែលភាគច្រើននៃការឆ្លង ជម្ងឺនេះ គឺការនាំចូល ឬមានប្រភពខាងក្រៅ និងមួយចំនួនតូច ជាការឆ្លងបន្តទៅប្រជាពលរដ្ឋក្នុងស្រុក”។

ទន្ទឹមនឹងនេះ រាជរដ្ឋាភិបាលក៏ផ្តោតការយកចិត្តទុកដាក់ លើការជួយអន្តរាគមន៍ ដើម្បីការរក្សាលំនឹង ជីវភាពប្រជាជន ពិសេសសម្រាប់ប្រជាជនក្រីក្រ និងក្រុមជនងាយរងគ្រោះ ព្រមទាំងអ្នកបាត់បង់ ការងារ តាមរយៈការដាក់ចេញនូវគោលនយោបាយ និងកម្មវិធីជំនួយសង្គម, ការបន្តអនុវត្ត គម្រោងសាច់ប្រាក់ពលកម្ម និងការរៀបចំវគ្គបណ្តុះបណ្តាលជំនាញទន់ និងការផ្តល់ប្រាក់ឧបត្ថម្ភដល់កម្មករ នៅពេលដែលរោងចក្រព្យួរអាជីវកម្ម។

លោក វង្សី វិស្សុត ក៏បានសង្កតធ្ងន់ផងដែរថា កម្ពុជានៅមានលំហក្នុងការខ្ចីថ្មីបន្ថែម ដោយសារអនុបាតបំណុលគន្លឹះៗទាំងអស់របស់កម្ពុជា មានកម្រិតទាបនៅឡើយ ធៀបនឹងអនុបាតគោល តាមបទដ្ឋានបច្ចេកទេសអន្តរជាតិ។ កម្មវិធី/គម្រោងអភិវឌ្ឍន៍ និងជំនួយបច្ចេកទេសនេះ គឺមួយផ្នែកជាសមិទ្ធិផលនៃការពិភាក្សា ប្រកបដោយភាពគ្រប់ជ្រុងជ្រោយរួមគ្នា រវាងក្រសួងស្ថាប័ន របស់រាជរដ្ឋាភិបាល និង ADB កាលពីថ្ងៃទី០៦ ខែមីនា ឆ្នាំ២០២០ និងមួយផ្នែកទៀត គឺជាការស្នើសុំរបស់រាជរដ្ឋាភិបាលបន្ទាន់ និងការវិវត្តថ្មីៗរបស់កម្ពុជាផ្ទាល់តែម្តង។

ជាក់ស្តែង កម្មវិធីគាំទ្រចំណាយ និងការឆ្លើយតបទៅនឹងជំងឺ Covid-19 (COVID 19 Active Response and Expenditure Support Program) ដែលមានទឹកប្រាក់សរុបចំនួន ២៥០ លានដុល្លារ ត្រូវបានផ្តល់ការអនុម័តដោយក្រុមប្រឹក្សាភិបាល ADB កាលពីពេលថ្មីៗនេះ តាមសំណើបន្ទាន់ របស់កម្ពុជាផងដែរ។ បន្ថែមពីនេះ ក្នុងកិច្ចគាំទ្រដល់ការ អភិវឌ្ឍសហគ្រាសធុនតូច-មធ្យម (SME) នៅកម្ពុជា, ក្រសួងសេដ្ឋកិច្ច និងហិរញ្ញវត្ថុក៏បានស្នើឱ្យ ADB ពិនិត្យមើលការបញ្ចូលនូវសមាសភាពនៃធានាឥណទាន (Guarantee) សម្រាប់ SME ទៅក្នុងគម្រោងជំរុញ ការអភិវឌ្ឍកសិធុរកិច្ចប្រកបដោយការប្រកួតប្រជែង (Competitive Agribusiness Development Project) ដែលមានទឹកប្រាក់សរុបចំនួនប្រមាណ ១១១ លានដុល្លារអាមេរិក ដែលនឹងជួយដោះស្រាយ បញ្ហាប្រឈមជាគន្លឹះរបស់ SME។

តាមរយៈកម្មវិធី/គម្រោងអភិវឌ្ឍន៍ និងជំនួយបច្ចេកទេស (COBP) ឆ្នាំ២០២១-២០២៣ នេះ ADB គ្រោងនឹងផ្តល់ហិរញ្ញប្បទានប្រមាណ ១៣០០ លានដុល្លារ ដែលនឹងចូលរួមយ៉ាងសកម្មក្នុងការធ្វើយ៉ាងណាឱ្យការអនុវត្តយុទ្ធសាស្រ្តភាពជាដៃគូសម្រាប់អភិវឌ្ឍន៍កម្ពុជា ឆ្នាំ២០១៩-២០២៣ របស់ ADB សម្រេចបានជោគជ័យ ក៏ដូចជាដើម្បីឆ្លើយតបទៅ នឹងតម្រូវការនៃកិច្ចអភិវឌ្ឍរបស់កម្ពុជា។ បើគិតទាំងសហហិរញ្ញប្បទានពីដៃគូអភិវឌ្ឍន៍ផ្សេងៗ រួមជាមួយថវិកាបដិភាគរបស់រាជរដ្ឋាភិបាល កម្មវិធី/គម្រោងអភិវឌ្ឍន៍ និងជំនួយបច្ចេកទេស ឆ្នាំ២០២១-២០២៣ របស់ ADB មានទឹកប្រាក់ចំនួនប្រមាណ ១៥០០លានដុល្លារ។

គិតចាប់ពីឆ្នាំ១៩៩២ រហូតដល់បច្ចុប្បន្ន ADB បានផ្តល់ហិរញ្ញប្បទាន សហប្រតិបត្តិការដល់ប្រទេសកម្ពុជា សម្រាប់ហិរញ្ញប្បទាន គម្រោងអភិវឌ្ឍន៍នានា មានទឹកប្រាក់សរុបចំនួនប្រមាណ ៣ ៤៨៥ លានដុល្លារអាមេរិក ដែលក្នុងនោះ ឥណទានសម្បទាន ចំនួនប្រមាណ ២ ៩៨៣ លានដុល្លារអាមេរិក និងហិរញ្ញប្បទានឥតសំណង ចំនួនប្រមាណ ៥០២លានដុល្លារ៕

GMAC ស្នើសុំម្ចាស់អាគារបញ្ចុះតម្លៃជួល ៣០ ភាគរយ

ដោយ ៖ រ៉ាណេត

ភ្នំពេញ ៖ សមាគមរោងចក្រកាត់ដេរនៅកម្ពុជា ហៅកាត់ GMAC បានចេញសេចក្ដីអំពាវនាវដោយស្នើដល់បណ្តាម្ចាស់អាគារនានាដែលជួល និងបម្រើដល់វិស័យកាត់ដេរនៅកម្ពុជា ពិចារណាក្នុងការបញ្ចុះតម្លៃយ៉ាងតិច៣០ភាគរយ ដើម្បីចូលរួមជួយទ្រទ្រង់ដល់វិស័យឧស្សាហកម្មនៅកម្ពុជា ក៏ដូចជារាជរដ្ឋាភិបាលផងដែរ។

នៅក្នុងសេចក្ដីអំពាវនាវរបស់សមាគមរោងចក្រកាត់ដេរនៅកម្ពុជានារសៀលថ្ងៃទី៨ ខែឧសភា ឆ្នាំ២០២០នេះបានលើកឡើងថា ឧស្សាហកម្មកាត់ដេរសម្លៀកបំពាក់ ផលិតស្បែកជើង ផលិតផលធ្វើដំណើរ ដែលជាឧស្សាហកម្មមួយក្នុងចំណោមឧស្សាហកម្មផ្សេងៗទៀតនៅកម្ពុជា បាន និងកំពុងទទួលរងនូវផលប៉ះពាល់យ៉ាងធ្ងន់ធ្ងរពីវិបត្តិនៃជំងឺ Covid-19 ជាក់ស្ដែង មានរោងចក្រចំនួន១៨០ត្រូវបានព្យួរផលិតកម្មរបស់ខ្លួន និងរោងចក្រចំនួន៦០ផ្សេងទៀត កំពុងប្រឈមការព្យួរផលិតកម្មដូចគ្នាក្នុងពេលដ៏ខ្លីខាងមុខនេះ។

ការព្យួរផលិតកម្មទាំងអស់ខាងលើនេះបានបង្ហាញពីភាពមិនអាចទ្រទ្រង់នូវបន្ទុកក្នុងការចំណាយជាប្រចាំបានបន្ទាប់ពីការបញ្ជាទិញរបស់ទីផ្សារអន្តរជាតិត្រូវបានផ្អាក និងលុបចោលជាច្រើន។

ជាមួយគ្នានេះ សមាគមរោងចក្រកាត់ដេរនៅកម្ពុជា បានបញ្ជាក់ពីផលលំបាកយ៉ាងធ្ងន់ធ្ងររបស់ឧស្សាហកម្មកាត់ដេរ ដែលតម្រូវឱ្យបណ្តាម្ចាស់អាគារជួលឱ្យរោងចក្រនានាពិចារណាក្នុងការបញ្ចុះតម្លៃឱ្យបានកម្រិតច្រើន ដែលតិចបំផុតត្រឹម៣០ភាគរយនៃតម្លៃជួលសរុប សម្រាប់រយៈ៣-៦ខែ ដើម្បីជាការចូលរួមជាមួយរាជរដ្ឋាភិបាលក្នុងការជួយទ្រទ្រង់ដល់វិស័យមួយនេះ និងស្ដារសេដ្ឋកិច្ចនៅកម្ពុជា ដែលកំពុងប្រឈមជាមួយនឹងវិបត្តិនៃជំងឺសាកលនៅពេលបច្ចុប្បន្ន៕

ប្រុងប្រយ័ត្ន៖ បទល្មើសផ្នែកហិរញ្ញវត្ថុមានការកើនឡើង នៅក្នុងអំឡុងពេលវិបត្តិ Covid-19

ដោយ ៖ វុត្ថា

ភ្នំពេញ ៖ បច្ចុប្បន្ន ការរីករាលដាលនៃជំងឺ Covid-19 បានធ្វើឱ្យមានផលប៉ះពាល់អវិជ្ជមានជាច្រើនដល់សុខុមាលភាព និងស្ថានភាពសេដ្ឋកិច្ចរបស់ប្រជាជនស្ទើរទូទាំងពិភពលោក។ ទន្ទឹមនេះ បទល្មើសផ្នែកហិរញ្ញវត្ថុក៏មានការកើនឡើងផងដែរ ដូចជា៖ បទល្មើសឆបោក បច្ចេកវិទ្យា ជួញដូរមនុស្ស និងបោកបន្លំមូលនិធិរដ្ឋាភិបាល ឬជំនួយហិរញ្ញវត្ថុអន្តរជាតិជាដើម។

នេះ គឺជាការលើកឡើងរបស់ធនាគារជាតិនៃកម្ពុជានៅរសៀលថ្ងៃទី ៨ ខែមេសា ឆ្នាំ ២០២០នេះ និងអំពាវនាវឱ្យស្ថានប័នពាក់ព័ន្ធនានារាយការណ៍ និងយកចិត្តទុកដាក់ទប់ស្កាត់ឱ្យបានខ្ពស់នៅក្នុងអំឡុងនៃវិបត្តិជំងឺ Covid-19 នេះ ។

ធនាគារជាតិនៃកម្ពុជាបានបញ្ជាក់ថា ស្ថិតក្នុងស្ថានភាពនេះ ក្រុមការងារហិរញ្ញវត្ថុ (FATF) បានរៀបចំឯកសារគោលនយោបាយមួយ ស្តីពីបញ្ហាប្រឈម និងគោលនយោបាយឆ្លើយតបប្រឆាំងនឹងហានិភ័យនៃការសម្អាតប្រាក់ និងហិរញ្ញប្បទានភេរវកម្មថ្មីៗ ក្នុងអំឡុងពេលដែលជំងឺ Covid-19 កំពុងរីករាលដាលនៅតាមបណ្តាប្រទេសនានាក្នុងពិភពលោក។

ធនាគារជាតិបន្ថែមថា អាស្រ័យហេតុនេះ អង្គភាពស៊ើបការហិរញ្ញវត្ថុកម្ពុជា (ស.ហ.ក) សូមលើកទឹកចិត្តបុគ្គលរាយការណ៍ទាំងអស់ឱ្យធ្វើការតាមដាន ដោយយកចិត្តទុកដាក់នូវហានិភ័យការសម្អាតប្រាក់ និងហិរញ្ញប្បទាន-ភេរវកម្ម និងចាត់វិធានការឱ្យបានទាន់ពេលវេលា និងប្រកបដោយប្រសិទ្ធភាព។

ពាក់ព័ន្ធនឹងសេចក្ដីព្រាងច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេវរកម្ម កម្ពុជាបាននឹងកំពុងពិនិត្យ កែសម្រួលដោយក្រសួងមហាផ្ទៃ នឹងបានត្រូវបញ្ជូនទៅសុំការអនុម័តពីគណៈរដ្ឋមន្ត្រី។

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានឱ្យដឹងថា សេចក្ដីព្រាងច្បាប់នេះ ធ្វើឡើងដើម្បីឆ្លើយតបនឹងការវិវត្តន៍សង្គមផង និងដើម្បីធ្វើឱ្យស្របទៅនឹងបទដ្ឋានអន្តរជាតិដែលតម្រូវឱ្យកម្ពុជាមានយន្តការជាក់លាក់ផង។

សម្តេចបន្ថែមថា ភាពខ្វះខាតនៃច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេវរកម្ម កម្ពុជាត្រូវបានគេចាត់ចូលជាប្រទេសស្ថិតក្នុងបញ្ជីប្រផេះ ជាប្រទេសមានហានីភ័យខ្ពស់ ធ្វើឱ្យអ្នកវិនិយោគមានការរារែក និងអាចប៉ះពាល់ដល់វិស័យសេដ្ឋកិច្ច។ ប្រសិនបើកម្ពុជានៅតែបន្តភាពខ្វះខាតច្បាប់នេះទៀត នោះនឹងអាចប្រឈមចុះក្នុងបញ្ជីខ្មៅ ។

ទីភ្នាក់ងារសារព័ត៌មាន Reuter កាលពីពេលថ្មីៗ នេះបានចុះផ្សាយថា ប្រទេសសកម្ពុជាត្រូវបានស្នើដាក់បញ្ចូលទៅក្នុងបញ្ជីនៃបណ្ដាប្រទេសដែលសហភាពអឺរ៉ុបត្រូវបង្កើនការត្រួតពិនិត្យលើការលាងលុយកខ្វក់ ។

សារព័ត៌មាននេះបានផ្សាយថា ប្រទេសកម្ពុជាគឺជាប្រទេសនៅក្នុងចំណោមប្រទេស ១១ផ្សេងទៀតនៅទូទាំងពិភពលោក ដែលត្រូវបានស្នើដាក់បញ្ចូលទៅក្នុងបញ្ជីនៃប្រទេស «ដែលបង្កការគំរាមកំហែងខ្លាំងទៅដល់ប្រព័ន្ធហិរញ្ញវត្ថុរបស់សហភាពអឺរ៉ុប» ដោយសារបរាជ័យក្នុងការលុបបំបាត់ការលាងលុយកខ្វក់៕

កោះសេះ ទំហំ៥០០ហិកតា នឹងត្រូវអភិវឌ្ឍន៍ជាតំបន់ទេសចរណ៍ថ្មីនៃខេត្តកំពត

ដោយ ៖ រ៉ាណេត

កំពត ៖ រដ្ឋាភិបាលតាមរយៈក្រសួងទេសចរណ៍ និងអាជ្ញាធរខេត្តកំពតគ្រោងនឹងរៀបចំកោះសេះដែលមានផ្ទៃដី៥០០ហិកតា ជាគោលដៅទេសចរណ៍ថ្មីសម្រាប់ទាក់ទាញភ្ញៀវទេសចរណ៍ជាតិ និងអន្តរជាតិបន្ថែមទៀត ក្រៅពីតំបន់ទេសចរណ៍សំខាន់ៗផ្សេងទៀតនៅក្នុងខេត្ត។

ប្រធានមន្ទីរទេសចរណ៍ខេត្តកំពត លោក សយ ស៊ីណុល បានមានប្រសាសន៍នៅក្នុងអង្គសន្និសីទសារព័ត៌មានស្ដីពីវឌ្ឍនភាព និងទិសដៅអនុវត្តបន្តរបស់ខេត្តកំពត នៅទីស្ដីការគណរដ្ឋមន្ត្រី នាព្រឹកថ្ងៃទី៨ ខែឧសភា ឆ្នាំ២០២០នេះថា រដ្ឋបាលខេត្ត បាន និងកំពុងរៀបចំគោលដៅទេសចរណ៍ថ្មីនៅលើកោះសេះ ឱ្យមានការដឹកជញ្ជូនភ្ញៀវទេសចរណ៍ ការពារសុវត្ថិភាពជូនភ្ញៀវទេសចរ និងកៀរគរឱ្យមានការវិនិយោគលើកោះមួយនេះ ដើម្បីរៀបចំឱ្យមានកញ្ចប់ទស្សនកិច្ចថ្មីសម្រាប់ខេត្តកំពត។

លោកបានបញ្ជាក់ថា “សក្ដានុពលទេសចរណ៍ដែលមាននៅលើកោះសេះ គឺមានភាពល្អប្រសើរស្រស់ស្អាត និងពោរពេញទៅដោយសម្រស់ធម្មជាតិយ៉ាងទាក់ទាញ ដែលស្ថិតនៅក្បែរព្រំដែនសមុទ្រជាមួយវៀតណាម។ ជាមួយគ្នានេះរាល់ការវិនិយោគនៅតំបន់ទេសចរណ៍នេះ ត្រូវមានប្លង់គោល និងប្លង់មេអភិវឌ្ឍន៍ឱ្យបានច្បាស់លាស់ មិនអាចធ្វើដោយគ្មានការឆ្លងកាត់ការត្រួតពិនិត្យពីសំណាក់អាជ្ញាធរខេត្ត ឬរាជរដ្ឋាភិបាលនោះឡើយ”។

យោងតាម Wikipedia បានឱ្យដឹងថា កោះសេះ គឺជាកោះមួយរបស់ប្រទេសកម្ពុជា ដែលមានទីតាំងស្ថិតនៅឈូងសមុទ្រថៃ នៅខាងក្នុងឧទ្យានជាតិរាមខេត្តព្រះសីហនុ ដែលមានចម្ងាយ១,៥ គីឡូម៉ែត្រខាងត្បូងកោះថ្មី និងប្រហែល៩គីឡូម៉ែត្រ ខាងត្បូងដីសំខាន់នៃឃុំរាមខេត្តព្រះសីហនុ និងមានចម្ងាយ៤.៣ គីឡូម៉ែត្រពីកោះត្រល់ ឬកោះភូគុក ។

ជាមួយនឹងគោលបំណង ដើម្បីធ្វើឱ្យខេត្តកំពតមានសក្ដានុពល និងកាន់តែមានភាពទាក់ទាញផងនោះ កាលពីពេលកន្លងទៅ រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានកំណត់យកខេត្តកំពតធ្វើជាខេត្តគំរូក្នុងការរៀបចំវិថីម្ហូបអាហារ (Food Street) ជំរុញឱ្យកសាងផ្លូវដាក់ភ្លើងបំភ្លឺទៅកាន់កំពង់ផែទេសចរណ៍ថ្មី រៀបចំចាក់ខ្សាច់បង្កើតឆ្នេរកំពតថ្មី ពង្រឹងគុណភាពសេវាដឹកជញ្ជូនទេសចរតាមផ្លូវទឹក និងរមណីយដ្ឋានទេសចរណ៍នានានៅក្នុងខេត្តកំពត ត្រូវពង្រឹងសេវាកម្មឱ្យបានល្អប្រសើរឡើងវិញជាដើម៕

ប្រាសាក់ ឧបត្ថម្ភថវិកាចំនួន ២០០លានរៀល ជូនកាកបាទក្រហមកម្ពុជា

ភ្នំពេញ៖ ដូចសព្វដងនិងជាថ្មីម្តងទៀត គ្រឹះស្ថានមីក្រូហិរញ្ញវត្ថុប្រាសាក់ ម.ក បានឧបត្ថម្ភថវិកាចំនួន ២០០លានរៀល ជូនចំពោះកាកបាទក្រហមកម្ពុជា ក្នុងឱកាសពិធីអបអរសាទរខួបលើក ១៥៧ ទិវាពិភពលោកកាកបាទក្រហម និង អឌ្ឍចន្ទក្រហម ថ្ងៃទី ៨ ខែឧសភា ឆ្នាំ ២០២០ ក្រោមប្រធានបទ «ខ្ញុំស្រឡាញ់សន្តិភាព និងកាកបាទក្រហមកម្ពុជា» ។

លោក សាយ សូនី អនុប្រធាននាយកប្រតិបត្តិរបស់ប្រាសាក់ បានមានប្រសាសន៍ថា «ប្រាសាក់បានផ្សារភ្ជាប់ខ្លួនយ៉ាងសកម្មទៅនឹងកិច្ចការសង្គមជាច្រើន ដើម្បីបង្កើតជាគុណតម្លៃ និងផ្ដល់ជាផលប្រយោជន៍ជូនសង្គម។

ស្របទៅនឹងទស្សនៈវិស័យ និងទំនួលខុសត្រូវសង្គមរបស់ស្ថាប័ន ក្រៅពីឧបត្ថម្ភថវិកាជូនកាកបាទក្រហមកម្ពុជា ប្រាសាក់ក៏បានចូលរួមក្នុងកម្មវិធីជាច្រើនដូចជា ចូលរួមប្រយុទ្ធប្រឆាំងជំងឺកូវីដ១៩ សាងសង់អគារបណ្ណាល័យ ឧបត្ថម្ភការវះកាត់មាត់ឆែប ចូលរួមឧបត្ថម្ភដល់សិស្សពូកែ ឧបត្ថម្ភទិវាអំណានជាតិ ឧបត្ថម្ភកម្មវិធីចំណេះដឹងហិរញ្ញវត្ថុ យុទ្ធនាការ «ខ្ញុំស្រលាញ់ប្រាក់រៀល» ចូលរួមបរិច្ចាគឈាម គាំទ្រកម្មវិធីពង្រឹងសមត្ថភាពរបស់យុវជន និងផ្តល់ជំនួយសង្គ្រោះបន្ទាន់ដល់សហគមន៍ជាដើម» ។

លោក សាយ សូនី បានបន្ថែមថា «ប្រាសាក់ ពិតជាមានសេចក្ដីរីករាយណាស់ដែលបានចូលរួមគាំទ្រដល់សកម្មភាពសង្គម និងមនុស្សធម៌របស់កាកបាទក្រហមកម្ពុជា។ ប្រាសាក់សង្ឃឹមថា ការឧបត្ថម្ភថវិកានាពេលនេះ នឹងចូលរួមចំណែកក្នុងការជួយឱ្យកាកបាទក្រហមកម្ពុជាកាន់តែមានលទ្ធភាពទូលំទូលាយជួយដល់ជនងាយរងគ្រោះបន្ថែមទៀត» ។

អំពីប្រាសាក់៖

ប្រាសាក់ ជាគ្រឹះស្ថានមីក្រូហិរញ្ញវត្ថុមានអាជ្ញាប័ណ្ណទទួលប្រាក់បញ្ញើពីសាធារណជនពីធនាគារជាតិនៃកម្ពុជា និងប្រតិបត្តិការ 25 ឆ្នាំក្នុងវិស័យហិរញ្ញវត្ថុនៅកម្ពុជា។ ប្រាសាក់ផ្តល់សេវាហិរញ្ញវត្ថុដ៏សម្បូរបែបជូនដល់អតិថិជន រួមមាន៖ សេវាឥណទាន ប្រាក់បញ្ញើសន្សំ ទូទាត់វិក្កយបត្រភ្លើង ទូទាត់វិក្កយបត្រទឹក សេវាហិរញ្ញវត្ថុឌីជីថល ដកប្រាក់តាមម៉ាស៊ីនអេធីអឹមប្រាសាក់ទោះជាគ្មានប័ណ្ណអេធីអឹម ផ្ទេរប្រាក់ ប្តូរប្រាក់ ទិញកាតទូរស័ព្ទ សេវាខេមបូឌានស៊ែរស្វ៊ីច (CSS) សេវាទូទាត់រហ័ស បើកប្រាក់បៀវត្ស អេធីអឹម ម៉ាស៊ីនដាក់ប្រាក់ សេវាធនាគារចល័ត ម៉ាស៊ីនឆូតកាត សេវាទូទាត់តាមប្រព័ន្ធបាគង សេវាបញ្ជាក់សមតុល្យគណនី និងសេវាហិរញ្ញវត្ថុដទៃផ្សេងៗទៀតជូនដល់អតិថិជន។ សម្រាប់ព័ត៌មានបន្ថែមសូមចូលទៅកាន់ www.prasac.com.kh ៕

ក្រុមហ៊ុនយក្ស Facebook និង Google បន្តអនុញ្ញាតឱ្យបុគ្គលិករបស់ខ្លួនធ្វើពីផ្ទះរហូតចុងឆ្នាំនេះ

ដោយ ៖ ប៊ី

ក្រុមហ៊ុនយក្ស Facebook និង Google បានឱ្យដឹងថា ក្រុមហ៊ុនមេរបស់ពួកគេនឹងអនុញ្ញាតឱ្យនិយោជិកបន្តធ្វើការពីផ្ទះរហូតដល់ចុងឆ្នាំនេះ។
ក្រុមហ៊ុនយក្សបច្ចេកវិទ្យាទាំងពីរនេះ បានប្រកាសពីផែនការបើកការិយាល័យរបស់ខ្លួនឡើងវិញឆាប់ៗនេះ ប៉ុន្តែកំពុងអនុញ្ញាតឱ្យមានភាពបត់បែនការងារតាមផ្ទះបន្ថែមទៀត។

ក្រុមហ៊ុន Google បានឱ្យដឹងថា ខ្លួននឹងរក្សាគោលការណ៍ការធ្វើការងារពីផ្ទះរបស់ខ្លួនដល់ថ្ងៃទី១ ខែមិថុនា ប៉ុន្តែត្រូវពន្យារពេលសម្រាប់ការធ្វើការពីចម្ងាយ។
ក្រុមហ៊ុន Facebook បានឱ្យដឹងថា ខ្លួននឹងបើកការិយាល័យរបស់ខ្លួនឡើងវិញនៅថ្ងៃទី៦ ខែកក្កដា នៅពេលស្ថានភាពរឹតបន្តឹងដើម្បីការជំងឺរាតត្បាត COVID-19 ត្រូវបានបន្ធូរបន្ថយបណ្តើរៗ។

នាយកប្រតិបត្តិក្រុមហ៊ុន Google លោក Sundar Pichai បាននិយាយថា និយោជិកដែលត្រូវការវិលត្រឡប់មកការិយាល័យវិញនឹងចាប់ផ្តើមធ្វើចាប់ពីខែកក្កដា ដោយមានវិធានការសុវត្ថិភាពបន្ថែម។
លោក Pichai បានបន្ថែមថា ប៉ុន្តែនិយោជិកភាគច្រើនដែលអាចបំពេញការងាររបស់ពួកគេពីផ្ទះនឹងអាចធ្វើបានរហូតដល់ដំណាច់ឆ្នាំនេះ។

ការប្រកាសនេះធ្វើឡើងស្របគ្នានឹងក្រុមហ៊ុន Facebook នៅពេលដែលក្រុមហ៊ុនកាន់តែច្រើនចាប់ផ្តើមដាក់ចេញនូវយុទ្ធសាស្រ្តការត្រឡប់ធ្វើការងារវិញ។
អ្នកនាំពាក្យម្នាក់របស់ក្រុមហ៊ុន Facebook បាននិយាយថា “ក្រុមហ៊ុន Facebook បានបោះជំហានបន្ទាប់ក្នុងការវិលត្រឡប់ទៅរកទស្សនវិជ្ជាការងារវិញ។ ដូចដែលអ្នកអាចស្រមៃថា នេះគឺជាស្ថានភាពដែលកំពុងវិវឌ្ឍន៍ នៅពេលដែលនិយោជិក និងក្រុមគ្រួសាររបស់ពួកគេធ្វើការសម្រេចចិត្តសំខាន់ៗ: ត្រឡប់ទៅធ្វើការវិញ”។

អ្នកនាំពាក្យរូបនោះបានបន្ថែមថា ក្រុមហ៊ុន Facebook នៅតែកំណត់ថា តើនិយោជិកណាដែលនឹងត្រូវស្នើសុំត្រឡប់ចូលធ្វើការនៅការិយាល័យវិញ។
វេទិកាប្រព័ន្ធផ្សព្វផ្សាយសង្គមនេះស្ថិតក្នុងចំណោមក្រុមហ៊ុនបច្ចេកវិទ្យាដំបូងគេ ដែលបានស្នើសុំឱ្យបុគ្គលិករបស់ខ្លួនចាប់ផ្តើមធ្វើការពីចម្ងាយ។ ក្រុមហ៊ុន Facebook បានផ្តល់ប្រាក់រង្វាន់ដល់និយោជិកចំនួន ១.០០០ ដុល្លារ (៨០៧ ដុល្លារ) សម្រាប់ថ្លៃឈ្នួលការងារពីផ្ទះ និងថែទាំកុមារ។

និន្នាការសម្រាប់ធ្វើការពីផ្ទះអាចសមនឹងក្រុមហ៊ុនមួយចំនួន ខណៈពេលដែលពួកគេរៀបចំការិយាល័យឡើងវិញដើម្បីបំពេញតាមគោលការណ៍ណែនាំថ្មីនៃគម្លាតសង្គម៕