ស្ថានីយ៍ក្រោមដីធំជាងគេនៅអាស៊ី តម្លៃជិត ៣០០០លានដុល្លារ នឹងបញ្ចប់ការសាងសង់នៅឆ្នាំ ២០២០នេះ

ដោយ ៖ ហ្សូលី

ភ្នំពេញ ៖ គម្រោងស្ថាបនាស្ថានីយ៍ក្រោមដីធំជាងគេនៅតំបន់អាស៊ីដែលមានឈ្មោះថា The Bandra Kurla Complex (BKC) នៅប្រទេសឥណ្ឌា គ្រោងនឹងបញ្ចប់ការសាងសង់នៅត្រឹមឆ្នាំ ២០២០នេះ។

ស្ថានីយ៍ក្រោមដីនៅប្រទេសឥណ្ឌា ទីក្រុង Mumbai បានក្លាយជា «ស្ថានីយ៍ក្រោមដីដ៏ធំជាងប្រចាំតំបន់អាស៊ី» ។ ស្ថានីយ៍នេះគឺជាប្រព័ន្ធឆ្លងកាត់លឿនជាងគេ ដែលគ្រោងចំណាយទឹកប្រាក់ប្រមាណជា ២.៩ពាន់លានដុល្លារ ស្ថិតនៅកណ្តាលទីក្រុង Mumbai ដែលជាទីប្រជុំជន និងបម្រើដល់ប្រជាពលរដ្ឋសាធារណៈយ៉ាងច្រើន។

ស្ថានីយ៍ក្រោមដីមានទីតាំងស្ថិតនៅលើផ្នែកនៃខ្សែរថភ្លើង Colaba-Bandra-SEEPZ ដែលមានប្រវែង ៣៣.៥ គីឡូម៉ែត្រ (ជាខ្សែទី ៣) ដែលភ្ជាប់ទៅនឹងស្រុក Cuffe Parade នៅភាគខាងត្បូងបំផុតនៃទីក្រុង ទៅកាន់តំបន់កែច្នៃនាំចេញគ្រឿងអេឡិចត្រូនិក Santacruz។ នៅពេលបញ្ចប់ការសាងសង់ BKC នឹងដើរតួជាមជ្ឈមណ្ឌលសំខាន់បំផុតសម្រាប់អ្នកដំណើរដែលចង់ផ្លាស់ប្តូរទៅចំណតខ្សែទី ២ ហើយឆ្ពោះទៅកាន់ព្រលានយន្តហោះទីក្រុង Mumbai។

អ្វីដែលកាន់ពិសេសនោះ ស្ថានីយ៍នេះចំណាយរយៈពេលសាងសង់ត្រឹមតែ ១៤ ខែប៉ុណ្ណោះ ពោលគឺវាចាប់ផ្តើមកាលពីខែមេសា ឆ្នាំ ២០១៩ ហើយទាមទារការសាងសង់បញ្ចប់ត្រឹមឆ្នាំ ២០២០នេះឱ្យបាន។ ម្ចាស់គម្រោងនេះគឺជាក្រុមហ៊ុន Mumbai Metro Rail Corporation Ltd (MMRC) ដែលជាក្រុមហ៊ុនសាងសង់រថភ្លើងក្រោមដីនៅប្រទេសឥណ្ឌា។

ក្រុមហ៊ុនព្យាករណ៍ថា ស្ថានីយ៍ក្រោមដីនេះអាចទទួលអ្នកដំណើរបានប្រមាណជា ១ លាននាក់ ហើយវាក៏នឹងអាចជួយកាត់បន្ថយការកកស្ទះចរាចរណ៍នៅក្នុងទីក្រុងដែលមានប្រជាជនច្រើនមួយនេះផងដែរ៕
Construction Review

លោកឧបនាយកដ្ឋមន្ត្រី ជា សុផារ៉ា ៖ ការស្ថាបនាផ្លូវទំាង ៣៤ ខ្សែនៅខេត្តព្រះសីហនុ ចាប់ផ្តើមដាក់ខឿន និងកម្រាលចិញ្ចើមផ្លូវ

ដោយ ៖ វុត្ថា
ភ្នំពេញ ៖ លោកឧបនាយកដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ការស្ថាបនាផ្លូវទំាង ៣៤ ខ្សែនៅខេត្តព្រះសីហនុបានចាប់ផ្តើមដល់ដំណាក់កាលដាក់ខឿន និងកម្រាលចិញ្ចើមផ្លូវ បន្ទាប់ពីលោកបានស្នើដល់ក្រុមហ៊ុនធ្វើការសាងសង់ទាំងថៃ្ង ទាំងយប់ ដើម្បីឱ្យសម្រេចតាមផែនការដើម្បីទទួលអ្នកវិនិយោគ និងទេសចរណ៍មកដល់ក្នុងពេលឆាប់ៗនេះ។

លោកឧបនាយកដ្ឋមន្ត្រី ជា សុផារ៉ា បានសរសេរនៅក្នុងទំព័រ Facebook ផ្លូវការនៅថ្ងៃទី ៨ ខែឧសភា ឆ្នាំ ២០២០ នេះថា “ខ្ញុំសូមជម្រាបជូនអំពីវឌ្ឍនភាពនៃការងារស្ថាបនាផ្លូវនៅខេត្តព្រះសីហនុ ដែលចាប់ផ្តើមដាក់ខឿន(curb) និងកម្រាលចិញ្ចើមផ្លូវ (sidewalk) ដែលធើ្វពីថ្មក្រានីត”។

អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានឱ្យដឹងថា ការស្ថាបនាផ្លូវទាំង ៣៤ ខ្សែនៅក្នុងខេត្តព្រះសីហនុ រហូតមកដល់ពេលនេះ សម្រេចបានប្រមាណជិត ៧០ ភាគរយហើយ ។ លោកបន្តថា សកម្មភាពនៃការស្ថាបនាផ្លូវទាំងនេះ នៅតែដំណើរការធម្មតា និងឈានទៅរកសម្រេចតាមផែនការ។

លោកឧបនាយករដ្ឋមន្ត្រីកាលពីកន្លងមកមកនេះបាន ស្នើដល់ក្រុមហ៊ុនធ្វើការស្ថាបនាទាំងថៃ្ង ទាំងយប់ ដើម្បីឱ្យសម្រេចផែនការមុនរដូវភ្លៀងមកដល់អោយបានជាមូលដ្ឋាន ត្រៀមខ្លួនទទួលអ្នកវិនិយោគ និងទេសចរណ៍មកដល់ក្នុងពេលឆាប់ៗនេះ តាមការលើកឡើងរបស់សម្តេចតេជោ”។

ផ្លូវទាំង៣៤ខ្សែ នៅក្នុងខេត្តព្រះសីហនុត្រូវបានបើកការដ្ឋានសាងសង់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រីកម្ពុជា កាលពីថ្ងៃទី១៦ ខែវិច្ឆិកា ឆ្នាំ២០១៩ អនុវត្តដោយក្រុមហ៊ុនឯកជនចំនួន៦និងកងវិស្វកម្មចំនួន២ គឺកងវិស្វកម្មសម្តេចតេជោ ហ៊ុន សែន សៀមរាប និងកងវិស្វកម្មលេខ១៧៨ស្ពានថ្នល់នៃក្រសួងការពារជាតិ៕

ក្រុមហ៊ុនម៉ាឡេស៊ីកំពុងសម្លឹងរកឱកាសទិញភាគហ៊ុនក្នុងស្ថាប័នហិរញ្ញវត្ថុមួយនៅកម្ពុជា

ដោយ ប៊ី

ភ្នំពេញ៖ ក្រុមហ៊ុន Gunung Capital Bhd ដែលបានចុះបញ្ជីនៅក្នុងប្រទេសម៉ាឡេស៊ី និងជាក្រុមហ៊ុនកាន់កាប់ការវិនិយោគជាចម្បងលើការដឹកជញ្ជូនផ្លូវគោក កំពុងស្វែងរកឱកាសក្នុងការទិញភាគហ៊ុន ២០ ភាគរយនៅក្នុងស្ថាប័នហិរញ្ញវត្ថុមួយនៅកម្ពុជា។

បណ្តាញសារព័ត៌មានម៉ាឡេស៊ី Bernama បានរាយការណ៍កាលពីម្សិលមិញនេះថា ថ្នាក់គ្រប់គ្រងរបស់ក្រុមហ៊ុនត្រូវបានអញ្ជើញដោយអ្នកផ្សព្វផ្សាយ ដើម្បីទទួលបានការវាយតម្លៃសំណើរចូលរួមធ្វើអាជីវកម្មធនាគារនៅកម្ពុជា។

ថ្នាក់គ្រប់គ្រងក្រុមហ៊ុនបច្ចុប្បន្នកំពុងស្ថិតក្នុងការពិភាក្សាជឿនលឿនមួយទាក់ទងនឹងការចូលរួម នៅក្នុងស្ថាប័នហិរញ្ញវត្ថុ។ ភាគីនានាក៏កំពុងពិភាក្សាគ្នាផងដែរស្តីពីតំរូវការគុណភាព និងបរិមាណដទៃទៀត ដូចជាបញ្ហាអភិបាលកិច្ច ដែលកំណត់ដោយអាជ្ញាធរពាក់ព័ន្ធនៅក្នុងព្រះរាជាណាចក្រកម្ពុជាស្តីពីការចូលរួមភាគហ៊ុនបរទេស។

សារព័ត៌មាន Bernama បានរាយការណ៍ថា “នៅក្នុងដំណាក់កាលវាយតម្លៃ និងពិភាក្សានេះ ក្រុមហ៊ុនមិនអាចបញ្ជាក់ពីចំនួនទឹកប្រាក់នៃការវិនិយោគដែលពាក់ព័ន្ធនោះទេ”។

“នៅពេលបញ្ចប់ការវាយតម្លៃសំណើរ ហើយលទ្ធផលរំពឹងទុកនៃការវិនិយោគភាគហ៊ុនមានអត្ថប្រយោជន៍យ៉ាងច្រើនដល់ក្រុមហ៊ុន បន្ទាប់មក ថ្នាក់ដឹកនាំនឹងស្វែងរកឱកាស ចូលរួមភាគហ៊ុនប្រកបដោយអត្ថន័យយ៉ាងហោចណាស់ភាគហ៊ុន ២០ ភាគរយដើម្បីទទួលបានឱកាសវិនិយោគនេះ”៕

គម្រោងសាងសង់កំពង់ផែទេសចរណ៍ខេត្តកំពត សម្រេចបានជាង៣០ភាគរយ

ដោយ ៖ រ៉ាណេត

កំពត ៖ ស្របទៅតាមគម្រោង និងផែនការលើការអភិវឌ្ឍកំពង់ផែទេសចរណ៍ ដែលអាចឈានទៅការដាក់ឱ្យប្រើប្រាស់ជាផ្លូវការយ៉ាងយូរត្រឹមដើមឆ្នាំ២០២១ ខាងមុខនេះ បច្ចុប្បន្នបានសម្រេចលទ្ធផលប្រមាណ៣០ភាគរយ ។

ប្រធានមន្ទីរទេសចរណ៍ខេត្តកំពត លោក សយ ស៊ីណុល បានមានប្រសាសន៍នៅក្នុងអង្គសន្និសីទសារព័ត៌មាននៅទីស្ដីការគណៈរដ្ឋមន្ត្រី កាលពីព្រឹកថ្ងៃទី៨ ខែឧសភា ឆ្នាំ២០២០នេះថា គិតត្រឹមដើមខែឧសភា ឆ្នាំ២០២០នេះ លទ្ធផលនៃការសាងសង់កំពង់ផែទេសចរណ៍អន្តរជាតិនៅខេត្តកំពត បានសម្រេចប្រមាណ៣០ភាគរយហើយ។

លោកបានមានប្រសាសន៍បន្តទៀតថា “កំពង់ផែមួយនេះគឺជាចំណែកមួយយ៉ាងសំខាន់ក្នុងការបម្រើនៅក្នុងវិស័យទេសចរណ៍បន្ថែមពីលើសក្ដានុពលដែលមានស្រាប់ ដែលក្នុងនោះមានតំបន់រមណីយដ្ឋានសរុបចំនួន១៧ សហគមន៍ទេសចរណ៍ចំនួន៤ និងតំបន់គោលដៅទាក់ទាញទេសចរណ៍ចំនួន៤។ នៅក្នុងចំណោមគោលដៅទាក់ទាញទេសចរណ៍ចំនួន៤ រួមមានដូចជា ទី១ – តំបន់ចម្ការម្រេច ដែលបានទាក់ទាញទេសចរបរទេសប្រមាណ៣០ភាគរយ ទី២- តំបន់កសិទេសចរ ដែលបានទាក់ទាញទេសចរប្រមាណ៥ម៉ឺននាក់កាលពីឆ្នាំ២០១៩ ទី៣- តំបន់ស្រែអំបិល និងទី៤ -តំបន់សំណង់បេតិកភ័ណ្ឌដែលបន្សល់ទុកពីសម័យអាណានិគមបារាំង និងតំបន់ទេសចរណ៍កំពង់បាយ”។

លោកបានបញ្ជាក់ថា “បច្ចុប្បន្ននេះ យើងមានរបាំងដោយសារវិបត្តិនៃជំងឺ Covid-19 ប៉ុន្តែក្រោយពីបញ្ចប់ និងគ្រប់គ្រងវិបត្តិមួយនេះបាន ខណៈពេលដែលកំពង់ផែទេសចរណ៍អន្តរជាតិបញចប់ការសាងសង់ជាស្ថាពរ យើងជឿជាក់ថា កំណើនទេសចរនឹងកើនឡើងខ្ពស់ ជាពិសេសអាចស្រូបទាញទេសចរអន្តរជាតិប៉ែកអឺរ៉ុប ដែលក្នុងនោះក៏ធ្លាប់មានសារព័ត៌មាអាមេរិកសរសេរផ្សព្វផ្សាយពីសក្ដានុពលនៃខេត្តកំពតដែលជាគោលដៅទេសចរ១ក្នុងចំណោមគោលដៅទាំង៥២នៅលើពិភពលោក”។

គម្រោងអភិវឌ្ឍន៍ធ្វើផ្លូវទៅកំពង់ផែទេសចរណ៍ ដែលជាជំនួយរបស់ធនាគារអភិវឌ្ឍន៍អាស៊ី ADB ស្ថិតនៅ ភូមិជុំក្រៀល ឃុំជុំក្រៀល ស្រុកទឹកឈូ ខេត្តកំពត។

ខេត្តកំពតមានកំពង់ផែចំនួន៤ ដែលទី១ គឺកំពង់ផែ វិញ ហួរ ដែលមានជម្រៅទឹករហូតដល់១៤ម៉ែត្រ អាចសម្រាប់ដឹកជញ្ជូនទំនិញតាមកប៉ាល់ធំៗ។ ទី២ កំពង់ផែរបស់ឧកញ៉ា ទ្រី ភាព សម្រាប់ដឹកជញ្ជូនប្រេងចូល។ ទី៣ កំពង់ផែរបស់ជំទាវ កែវ ម៉ាលី សម្រាប់ដឹកជញ្ជូននាំចេញស្រូវ និងផលិតផលផ្សេងៗចេញចូលប្រទេសថៃ និងទី៤ គម្រោងកំពង់ផែទេសចរណ៍អន្តរជាតិខេត្តកំពត ដែលបើកសម្រាប់ភ្ញៀវទេសចរបរទេសដែលធ្វើដំណើរតាមកប៉ាល់ ពិសេសទេសចរមកពីប្រទេសវៀតណាម និងថៃអាចចូលចតបាន៕

រដ្ឋាភិបាលចាប់ផ្តើមពិនិត្យសេចក្តីព្រាងផែនការតភ្ជាប់ហេដ្ឋារចនាសម្ព័ន្ធនៃបណ្តាប្រទេសមេគង្គ-ឡានឆាង ដើម្បីជំរុញការវិនិយោគ

ដោយ ៖ វុត្ថា

ភ្នំពេញ ៖ រដ្ឋាភិបាលកម្ពុជា និងស្ថាប័នពាក់ព័ន្ធនានាចាប់ផ្តើមពិនិត្យ និងផ្តល់យោបល់លើសេចក្តីព្រាងផែនការនៃកិច្ចសហប្រតិបត្តិការលើការតភ្ជាប់ហេដ្ឋារចនាសម្ព័ន្ធនៃបណ្តាប្រទេសមេគង្គ-ឡានឆាង ២០២០-២០៣០ ដើម្បីជំរុញដល់ការវិនិយោគលើគ្រប់វិស័យ។

នេះ បើយោងតាមកិច្ចប្រជុំពិភាក្សាកាលពីថ្ងៃទី ៧ ខែឧសភា ឆ្នាំ ២០២០ ម្សិលមិញនេះ ដែលដឹកនាំដោយលោក ខាយ ឃុនហេង រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងការចូលរួមពីថ្នាក់ដឹកនាំ មន្ត្រីបច្ចេកទេស និងអង្គភាពពាក់ព័ន្ធក្រោមឱវាទក្រសួង។

លោក ខាយ ឃុនហេង ឱ្យដឹងថា ផែនការនេះនឹងផ្តល់អត្ថប្រយោជន៍ដល់ការបង្កើតការតភ្ជាប់ហេដ្ឋារចនាសម្ព័ន្ធក្នុងចំណោមប្រទេសក្នុងតំបន់មេគង្គ-ឡានឆាង និងផ្តល់នូវទិសដៅបង្ហាញផ្លូវ សម្រាប់កិច្ចសហប្រតិបត្តិការដោយផ្តោតការយកចិត្តទុកដាក់លើការខិតខំប្រឹងប្រែងសំខាន់ៗសំដៅជំរុញការអភិវឌ្ឍប្រកបដោយនិរន្តរភាព និងការផ្លាស់ប្តូរវប្បធម៌រវាងគ្នា ក៏ដូចជាកសាងនូវសហគមន៍មួយដែលចែករំលែកអនាគតនៃសន្តិភាព និងវិបុលសុខជាមួយគ្នាក្នុងចំណោមបណ្តាប្រទេសមេគង្គ-ឡានឆាង។

ម្យ៉ាងវិញទៀត ផែនការនេះ ក៏នៅជួយដល់រដ្ឋាភិបាលនៃបណ្តាប្រទេសមេគង្គ-ឡានឆាង ក្នុងការពង្រឹងកិច្ចសហប្រតិបត្តិការលើការអភិវឌ្ឍ និងអនុវត្តគម្រោងនានាក្នុងការធ្វើអោយប្រសើរឡើងនូវការតភ្ជាប់ហេដ្ឋារចនាសម្ព័ន្ធ និងការជំរុញការវិនិយោគ នៅក្នុងតំបន់មេគង្គ-ឡានឆាង។

កិច្ចសហប្រតិបត្តិការមេគង្គ-ឡានឆាង ត្រូវបានផ្តួចផ្តើមបង្កើតឡើងដោយលោក លី ខឺឈាង ក្នុងកិច្ចប្រជុំកំពូលចិន-អាស៊ានលើកទី១៧ កាលពីថ្ងៃទី១៣ ខែវិច្ឆិកា ឆ្នាំ២០១៤ នៅប្រទេសមីយ៉ាន់ម៉ា ដែលយោងតាមគំនិតផ្ដួចផ្ដើមរបស់ថៃ ស្ដីពីការអភិវឌ្ឍប្រកបដោយចីរភាពនៃអនុតំបន់មេគង្គ-ឡានឆាង កាលពីឆ្នាំ២០១២។

កិច្ចសហប្រតិបត្តិការមេគង្គ-ឡានឆាង បានកំណត់នូវកិច្ចប្រជុំជាច្រើន បែងចែកជា ៤កម្រិត។ ក្នុងនោះកិច្ចប្រជុំក្រុមការងារធ្វើឡើង ១ ឬ ២ដងក្នុងមួយឆ្នាំ និងទៅតាមការចាំបាច់, កិច្ចប្រជុំឧត្តមមន្ត្រីធ្វើឡើង ១ដងក្នុងមួយឆ្នាំ និងទៅតាមការចាំបាច់, កិច្ចប្រជុំរដ្ឋមន្ត្រីការបរទេសធ្វើឡើង ១ដងក្នុងមួយឆ្នាំ ដោយឡែកកិច្ចប្រជុំកំពូលវិញ ត្រូវធ្វើឡើង ២ឆ្នាំម្តង។

កិច្ចសហប្រតិបត្តិការមេគង្គ-ឡានឆាង បង្កើតឡើងក្នុងគោលបំណងលើកកម្ពស់កិច្ចសហប្រតិបត្តិការលើគ្រប់វិស័យ បង្កើតសហគមន៍មួយដែលរួមអនាគត គ្នាប្រកបដោយសនិ្តភាព និងវិបុលភាព ថែរក្សាសន្តិភាព ស្ថិរភាព និងជំរុញការអភិវឌ្ឍន៍ក្នុងតំបន់ពន្លឿន «ក្រវ៉ាត់សេដ្ឋកិច្ច និងវិថីសូត្រ» «វិថីសូត្រសមុទ្រសតវត្សរ៍ទី២១» ដែលហៅកាត់ថា «ផ្លូវមួយ-ខ្សែក្រវ៉ាត់មួយ»។

មេគង្គ-ឡានឆាង មានផ្ទៃទន្លេសរុបប្រវែងប្រមាណ ៤,៨៨០គីឡូម៉ែត្រ ហូរកាត់ប្រទេសចំនួន៦ គឺ ចិន មីយ៉ាន់ម៉ា ថៃ ឡាវ កម្ពុជា និងវៀតណាម។ មានផ្ទៃស្ដុកទឹក ៧៩៥,០០០គីឡូម៉ែត្រការ៉េ ផ្គត់ផ្គង់ប្រជាជនប្រមាណ ៣២៦លាននាក់នៅក្នុងអនុតំបន់មេគង្គ-ឡានឆាង៕

អ្នកជំនាញបង្ហើបប្រាប់ពីតំបន់របស់ទីផ្សារលំនៅដ្ឋានក្នុងបុរីដែលកំពុងមានតម្រូវការច្រើនពីអតិថិជន

ដោយ ហ្សូលី

ភ្នំពេញ៖ ទីផ្សារលំនៅដ្ឋានក្នុងបុរីកំពុងមានរីកស្គុះស្គាយពេញប្រទេសកម្ពុជា មិនថានៅក្នុងទីក្រុង ទីប្រជុំជនឬនៅតាមបណ្តារជាយក្រុងទេ ដោយឡែកបច្ចុប្បន្នដោយសារការរីករាលដាលនៃ Covid-19 ដូច្នេះតម្រូវការមានភាពខុសៗគ្នា ចំណែកឯតំបន់ដែលកំពុងមានសក្តានុពលក៏មានភាពខុសគ្នាដែរ ទើបអ្នកជំនាញឆ្លៀតឱកាសមកបង្ហាញប្រាប់ពីតំបន់របស់លំនៅដ្ឋានក្នុងបុរីដែលកំពុងមានសន្ទុះតម្រូវការ។

លោក ហៃ រ៉ាវី នាយកក្រុមហ៊ុនអចលនទ្រព្យ Daily Realty Group បានថ្លែងប្រាប់គេហទំព័រ Property Area Asia នៅរសៀលថ្ងៃទី ០៧ ខែឧសភា ឆ្នាំ ២០២០ នេះថា លំនៅដ្ឋានក្នុងបុរី និងដី កំពុងតែមានទីផ្សារច្រើននៅពេលបច្ចុប្បន្ន ហើយតំបន់ដែលមានភ្ញៀវសម្រុកទៅទិញច្រើននោះមានដូចជា ខណ្ឌច្បារអំពៅ ខណ្ឌសែនសុខ ជាដើម។

លោកបន្តថា មូលហេតុដែលអ្នកជាវអចលនវត្ថុសម្លឹងរកតំបន់ទាំងនោះច្រើន ព្រោះតែតម្លៃនៅទីនោះមានភាពធូរថ្លៃ ប៉ុន្តែខណ្ឌទួលគោក ខណ្ឌបឹងកេងកងវិញ មិនសូវជាមានបុរីច្រើនប៉ុន្មានទេ គឺមានតែបុរីពីមុនៗដែលមានតម្លៃថ្លៃ។ ជាធម្មតា តំបន់ដែលមានតម្លៃដីធូរច្រើនតែមានតម្រូវការច្រើនជាងតំបន់មានតម្លៃដីថ្លៃ។

នាយកក្រុមហ៊ុនអចលនទ្រព្យរូបនេះបន្ថែមថា សូម្បីតែខណ្ឌព្រែកព្នៅក៏មានតម្លៃសមរម្យផងដែរ ដោយសារតែតម្លៃដីនៅធូរដូច្នេះហើយទើបមានការសាងសង់ច្រើន។ និយាយជារួម តម្រូវការតំបន់នេះមានច្រើនព្រោះទីនោះមានសក្តានុពលអភិវឌ្ឍដូចជា រោងចក្រ ឃ្លាំង អាជីវកម្មមួយចំនួនលើកទៅម្តុំនោះ ទើបបណ្តាលឱ្យប្រជាជនដែលចង់វិនិយោគអាចរស់នៅនិងប្រកបអាជីវកម្មបាន។

ទន្ទឹមនេះ អ្នកជំនាញអចលនទ្រព្យ និងជាអគ្គនាយកក្រុមហ៊ុនអចលនទ្រព្យ Easy Property បានលើកឡើងថា លំនោដ្ឋានក្នុងបុរីនៅម្តុំខណ្ឌកំប៉ូល ខណ្ឌព្រែកព្នៅ និងខណ្ឌដង្កោរ មានអតិថិជនច្រើនដោយសារតែតម្លៃមានភាពធូរថ្លៃច្រើនក្រោម ៧ម៉ឺនដុល្លារ ឬលើហ្នឹងតែបន្តិចបន្តួចប៉ុណ្ណោះ។

លោករៀបរាប់ថា ការពិតដោយសារតែភ្ញៀវភាគច្រើនជាអ្នករស់នៅតំបន់ទាំងនោះស្រាប់ឬក៏នៅឆ្ងាយពីហ្នឹងបន្តិច ឬក៏គាត់អាចរកស៊ីនៅជិតៗតំបន់នោះ ទើបសម្រេចថាទិញតែម្តង។ ម្យ៉ាងដោយសារបុរីច្រើនតែសាងសង់នៅកៀកនឹងផ្សារ ឬតំបន់រកស៊ី។ ចំណែកឯលំនៅដ្ឋានដែលមានតម្លៃលើ ៧ម៉ឺនដុល្លារវិញអាចខិតមកចូលក្រុងបន្តិចដូចជានៅម្តុំវេងស្រេង និងឬស្សីកែវជាដើម តែទៅតាមទំហំដែរ អាចដល់១០ម៉ឺនដុល្លារបើសិនជាផ្លូវមុខ និងក្រោម ១០ម៉ឺនបើសិនជានៅផ្លូវខាងក្នុង។

ដោយឡែក លោកស្រី តាំង ហ៊ួរ នាយិកាក្រុមហ៊ុនអចលនទ្រព្យ Amatak Property Service បានឱ្យដឹងថា បុរីលំនៅដ្ឋានដែលនៅតាមជាយក្រុងអាចមានចរន្តទិញលក់ លុះត្រាតែគម្រោងនោះមានតម្លៃលក់ល្អ ឬក៏ជាប្រភេទផ្ទះលក់ប្រញាប់។ នៅតាមតំបន់ផ្លូវជាតិលេខ ១ ផ្លូវជាតិលេខ ២ ជាដើម គឹមានចលនាទិញលក់ប្រសិនជាលក្ខខណ្ឌបង់ប្រាក់ងាយស្រួល៕

ក្រុមហ៊ុន NagaCorp បានបង្ហាញការរចនាថ្មីនៃគម្រោង Naga 3 តម្លៃ ៣៥០០លានដុល្លារ

ដោយ ប៊ី

ភ្នំពេញ៖ ក្រុមហ៊ុន NagaCorp កំពុងបង្ហាញពិភពលោកនូវទិដ្ឋភាពថ្មីនៃការពង្រីកទំហំដ៏ធំនៃអចលនទ្រព្យរបស់ខ្លួននៅកម្ពុជា។ នេះបើយោងតាមការចុះផ្សាយរបស់គេហទំព័រ Calvinayre កាលពីម្សិលមិញនេះ។

នៅសប្តាហ៍នេះ ក្រុមហ៊ុនស្ថាបត្យកម្ម Skidmore, Owings & Merrill ឬ SOM ដែលមានមូលដ្ឋាននៅទីក្រុងឈីកាហ្គោ សហរដ្ឋអាមេរិក បានបង្ហាញរូបភាពថ្មីរបស់គម្រោងសាងសង់ Naga 3 ដែលក្រុមហ៊ុនប្រតិបត្តិករកាស៊ីណូ NagaCorp គម្រោងនឹងវិនិយោកទឹកប្រាក់ ៣,៥ពាន់លានដុល្លារ នៅរាជធានីភ្នំពេញ។ ផែនការ ដែលត្រូវបានប្រកាសជាលើកដំបូងកាលពីមួយឆ្នាំមុន គិតត្រឹមកាលពីខែមុន បានទទួលការកែសសម្រួលយ៉ាងសំខាន់ ដែលរួមមានការកាត់បន្ថយពីសណ្ឋាគារចំនួន ៥ អគារ មកត្រឹម ៣វិញ។

ទោះយ៉ាងណា ក្រុមហ៊ុន SOM បានសង្កត់ធ្ងន់ថា អគារមួយក្នុងចំណោមអគារទាំង ៣ នឹងជានិមិត្តសញ្ញាដ៏សំខាន់ និងខ្ពស់បំផុតនៅក្នុងទីក្រុង។ ជាលទ្ធផល គម្រោងសាងសង់ Naga 3 នឹងក្លាយជាកន្លែងសំខាន់បំផុតសម្រាប់ទីក្រុងនាពេលអនាគត ជាពិសេសនៅពេលណាហ្គាខបបានពង្រីកសិទ្ធិផ្តាច់មុខកាស៊ីណូនៅភ្នំពេញរហូតដល់ឆ្នាំ ២០៤៦ ។

បច្ចុប្បន្ន NagaWorld ត្រូវបានបិទរួមជាមួយអាជីវកម្មនៅរាជធានីភ្នំពេញជាច្រើនទៀតតាមបញ្ជារបស់រដ្ឋាភិបាល ដើម្បីកាត់បន្ថយការឆ្លងជំងឺ COVID-19 ៕

អ្នកជំនាញ ៖ វិស័យដីធ្លីជាផ្នែកមួយនៃអចលនទ្រព្យដែលមានប្រជាប្រិយខ្ពស់ក្នុងការវិនិយោគ

ដោយ ៖ រ៉ាណេត

ភ្នំពេញ ៖ នៅពេលនិយាយពីទីផ្សារអចលនទ្រព្យ ភាគច្រើនគេតែងបង្ហាញពីចំណាប់អារម្មណ៍ទៅលើវិស័យដីធ្លី ដែលជាផ្នែកមួយមានភាពសកម្ម និងមានប្រជាប្រិយភាពខ្ពស់លើការវិនិយោគ និងងាយស្រួលក្នុងការទទួលបានភាគលាភ។ នេះបើតាមការអះអាងរបស់អ្នកជំនាញនៅក្នុងវិស័យមួយនេះ។

មិនថានៅតំបន់ជាយក្រុង ឬនៅតាមបណ្តាខេត្តនោះទេ វិស័យដីធ្លីបានដើរតួយ៉ាងសំខាន់នៅក្នុងទីផ្សារអចលនទ្រព្យលើការទិញ-លក់ សម្រាប់អភិវឌ្ឍន៍បម្រើឱ្យវិស័យដទៃទៀតដូចជាលំនៅដ្ឋាន តំបន់ពាណិជ្ជកម្ម សួនឧស្សាហកម្ម ទីតាំងសិប្បកម្ម ក៏ដូចជាអភិវឌ្ឍន៍ទៅជាតំបន់កម្សាន្តកែច្នៃផ្សេងៗដ៏ទាក់ទាញផងដែរ។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Land Station Real Estate លោក កាង សុធី បានមានប្រសាសន៍ថា “បច្ចុប្បន្ន ទីផ្សារអចលនទ្រព្យភាគច្រើនត្រូវបានគេផ្តោតទៅលើវិស័យដីធ្លី ដែលមានប្រជាប្រិយភាពខ្ពស់ និងពេញនិយមជាងគេលើការវិនិយោគបើប្រៀបធៀបទៅនឹងប្រភេទអចលនទ្រព្យផ្សេងៗទៀត ក្រោមហេតុផលជាក់ស្ដែងថា ការដាក់លក់ដីតែងមានការលក់ចេញបានលឿនជាងការអចលនទ្រព្យដទៃទៀត ដូចជាលំនៅដ្ឋាន និងឃ្លាំងជាដើម។

ការវិនិយោគដីដោយសេរីភាពទើបទទួលបានចំណេញលឿន

លោកបានបញ្ជាក់ថា “ប្រភេទអចលនទ្រព្យដែលពេញនិយមជាងគេ គឺដីធ្លី ព្រោះយើងអាចយកមកកែច្នៃ និងអភិវឌ្ឍន៍បានគ្រប់ប្រភេទ មានទាំងឃ្លាំង ផ្ទះ រោងចក្រ ទីតាំងសម្រាប់សិប្បកម្ម Resort (តំបន់កម្សាន្តកែច្នៃ) រហូតត្រូវបានគេនិយាយថា សម្រាប់លំនៅដ្ឋាន ពួកគាត់ចង់ទិញពេលណាក៏បាន ប៉ុន្តែបើទិញដីដែលស្ថិតនៅតំបន់ល្អ អាចកែច្នៃ និងអភិវឌ្ឍន៍សម្រាប់វិស័យផ្សេងៗបាន គឺមិនងាយរកទិញនោះទេ។ ពោលគឺនៅក្នុងចំណោមអ្នករកស៊ីផ្នែកអចលនទ្រព្យចំនួន ១០ នាក់ គឺមានអ្នកទិញដី ដើម្បីទុកលក់បន្តយកចំណេញមានរហូតទៅដល់ ៨នាក់ទៅហើយ ពោលគឺមានត្រឹមតែ ២ នាក់ប៉ុណ្ណោះ ដែលជ្រើសរើសទិញផ្ទះ។ ដូច្នេះ វិស័យដីធ្លី នៅតែមានប្រជាប្រិយភាព និងមានភាពទាក់ទាញលើការវិនិយោគ” ។

ស្រដៀងគ្នាទៅនឹងការលើកឡើងខាងលើនេះ នាយកក្រុមហ៊ុនភ្នាក់ងារអចលនទ្រព្យអន្តរជាតិ KW Sen Sok លោក សំ សុខនឿន បានមានប្រសាសន៍ថា ការរកស៊ី ទិញ -លក់ ដី គឺមានអត្រាចំណេញខ្ពស់បើប្រៀបទៅនឹងការទិញផ្ទះ ឬខុនដូ។ លោកបានបញ្ជាក់ថា “បើគេធ្វើការប្រៀបធៀបដោយការយកលុយ១០ម៉ឺនដុល្លារទៅទិញផ្ទះ ឬទិញខុនដូ សម្រាប់ជួល ឬលក់បន្តយកចំណេញ ជាមួយនឹងការយកលុយទៅទិញដីដែលមានតម្លៃ១០ម៉ឺនដូចគ្នា ភាគច្រើនគឺគេរើសយកដី ដោយសារតែដីងាយស្រួលលក់ក្នុងរយៈពេលខ្លី និងមានទីផ្សារធំទូលាយ” ។

លោក សំ សុខនឿន បានមានប្រសាសន៍បន្តទៀតថា “ការទិញផ្ទះទុកលក់បន្តយកចំណេញគឺត្រូវចំណាយយូរទើបអាចរកបានទីផ្សារបន្ត ហើយអត្រានៃការទទួលបានប្រាក់ចំណេញក៏មានកម្រិតទាប ប៉ុន្តែបើទិញដីសម្រាប់វិនិយោគបន្ត គឺអាចទទួលបានអត្រាចំណេញភាគរយខ្ពស់ ហើយចំណាយពេលតិចក្នុងការរកទីផ្សារ ដោយសារដីនៅតែមានតម្រូវការទីផ្សារខ្ពស់មិនថាចំពោះពេលបច្ចុប្បន្ន ឬបន្តទៅពេលអនាគតនោះទេ” ៕

SMEs ផលិតចំណីអាហារមិនមានផលប៉ះពាល់ដោយសារ Covid-19 នោះទេ

ដោយ ៖ វុត្ថា

ភ្នំពេញ ៖ លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យម (FASMEC) អះអាងថា បើទោះបីពិភពលោក ក៏ដូចជាកម្ពុជាទទួលរងនូវផលប៉ះពាល់នូវជំងឺ Covid-19 កន្លងមកនេះក៏ដោយ សម្រាប់សហគ្រាសធុនតូច និងមធ្យម ដែលផលិតចំណីអាហារនៅក្នុងប្រទេសកម្ពុជា មិនមានផលប៉ះពាល់នោះទេ ។

លោកឧកញ៉ា តែ តាំងប៉ នៅក្នុងសន្និសីទសារព័ត៌មានស្តីពី «គម្រោងសហហិរញប្បទានទ្រទ្រង់សហគ្រាសធុនតូច និងមធ្យម និងបញ្ហាប្រឈមរបស់ធនាគារសហគ្រាសធុនតូច និងមធ្យម»នាថ្ងៃទី៧ ខែមេសា ឆ្នាំ ២០២០ នេះ បានឱ្យដឹងថា ទាំងការផលិតចំណីអាហាររបស់សហគ្រាសធុនតូច និងមធ្យមនៅកម្ពុជាមានកំណើនការផ្គត់ផ្គង់ក្នុងស្រុក គឺមិនព្រួយបារម្ភប៉ះពាល់ដោយ ជំងឺ Covid-19 ឡើយ ។

លោកបន្តថា អ្វីដែលមានផលប៉ះពាល់ខ្លាំង គឺសហគ្រាសធុនតូច និងមធ្យម (SMEs) ផលិតសម្លៀកបំពាក់ និងដេរស្បែកជើសម្រាប់ធ្វើការនាំចេញទៅកាន់ទីផ្សារអឺរ៉ុប និងសហរដ្ឋអាមេរិក ដោយសារតែប្រទេសទាំងនេះ ប្រកាសបិទទីផ្សារនាំចូលពីបណ្តាប្រទេសនៅក្នុងតំបន់អាស៊ី ក៏ដូចជាតំបន់ដទៃទៀត ដោយសារការព្រួយបារម្ភពីការឆ្លងនូវជំងឺ Covid-19 ។

លោកឧកញ៉ាថ្លែងថា “ ចឹងបានថា បញ្ហា SMEs ផ្នែកផលិតចំណីអាហារហ្នឹង…អត់មានបញ្ហាបារម្ភថាខ្ចីលុយគេហើយ ផលិតហើយ អត់នាំចេញទេ គឺមិនប៉ះពាល់ទេ តែបើប៉ះពាល់ គឺប៉ះពាល់ដល់ឧស្សាហកម្មកាត់ដេរឯណោះទេ ដែលសហគមន៍អឺរ៉ុប និងអាមេរិកគេផ្អាក់ការបញ្ជាទិញ ។ ចំពោះ SMEs ដែលត្រូវដែលផលិតចំណីអាហារនេះ គឺមិនប៉ះពាល់ទេ” ។

លោកឧកញ៉ាបន្ថែមថា “ម្យ៉ាងតាំងពីយើងមានជំងឺ Covid-19 ផ្អាកការនាំចេញនូវផលិតផលសម្រេចពីបរទេស បានធ្វើឱ្យ SMEs យើងនៅក្នុងស្រុកលក់បាន តែបើប៉ះពាល់គឺសហគ្រាសដែលផលិត និងលក់ផលិតផលសម្រាប់ភ្ញៀវទេសចរមួយចំនួនប៉ុណ្ណោះ ដោយសារគេមិនអោយធ្វើចរាចរណ៍នៅក្នុងពិភពលោក។

លោក ឈា ឡាហ៊ី ប្រធាននាយកដ្ឋានសហគ្រាសធុនតូច និងមធ្យម នៃកក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងដែរថា នៅក្នុងអំឡុងជំងឺ Covid-19 ប្រទេសនៅក្នុងពិភពលោក ក៏ដូចជាកម្ពុជាបាននឹងកំពុងជួយលើកម្ពស់ដល់សហគ្រាសធុនតូច និងមធ្យមនៅក្នុងប្រទេស ទាំងបច្ចេកទេស និងធនធាន ហើយការគិតគូរ ចាប់តាំងពីមុននៃការផ្ទុះឡើងនូវជំងឺ Covid-19 ។

លោកពន្យល់ថា សហគ្រាសធុនតូច និងមធ្យមនេះ ជាឆ្អឹងខ្នងសេដ្ឋកិច្ចក្នុងការជំរុញសហគ្រាសធុនធំៗ ឱ្យដំណើរការ និងសេដ្ឋកិច្ចជាតិមានការរីកចំរើន ។

លោកថ្លែងថា តាមកាប៉ាន់ស្មានគឺមានប្រមាណជាង ៧ ម៉ឺនសហគ្រាសធុនតូច និងមធ្យមនៅទូទាំងប្រទេស តែ តាមទិន្ន័យរបស់ក្រសួងផែនការ ដែលបានធ្វើជំរឿនកាលពីកន្លងមកនេះ មានចំនួនជាង ៥៣ ម៉ឺន សហគ្រាសធុនតូច និងមធ្យមនៅទូទាំងប្រទេស ហើយ ពី ២ ម៉ឺនសហគ្រាសធុនតូច និងធម្យមត្រូវបានគ្រប់គ្រងដោយស្ថាប័នរដ្ឋ ឬ ក្រៅប្រព័ន្ធ ដោយក្នុងនោះមានកម្លាំងពលកម្មដែលកំពុងបំរើដល់វិស័យសហគ្រាសធុនតូច និងមធ្យមមានជាង១ លាននាក់៕

អ្នកជំនាញនិយាយពីសារៈសំខាន់នៃការរៀបចំប្លង់គោលប្រើប្រាស់ដីរបស់រដ្ឋាភិបាល

ដោយ ៖ វុត្ថា

ភ្នំពេញ៖ អ្នកជំនាញបានលើកឡើងថា ការរៀបចំប្លង់គោលប្រើប្រាស់ដីរបស់រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ នៅទូទាំងខេត្ត-ក្រុងនៃប្រទេសកម្ពុជា គឺមានភាពងាយស្រួលក្នុងការអភិវឌ្ឍលើហេដ្ឋារចនាសម្ព័ន្ធព្រមទាំងសំណង់អគារផ្សេងៗ ខណៈរហូតមកដល់ពេលនេះសម្រេចបានចំនួន១៣ ក្នុងចំណោមស្រុក-ក្រុងចំនួន២៦ ។

លោក សន សៀប អគ្គនាយកក្រុមហ៊ុនអចលនទ្រព្យ Key Real Estate ធ្លាប់បានប្រាប់គេហទំព័រ propertyarea.asia កាលពីពេលថ្មីៗនេះថា ប្លង់គោលប្រើប្រាស់ដីរបស់រដ្ឋាភិបាល ត្រូវបានកំណត់ជាក់លាក់ថា ដីនៅក្នុងទីក្រុងណាមួយអាចយកទៅប្រើប្រាស់អ្វីបាន ឬសាងសង់អគារបានកំពស់ប៉ុន្មានជាន់ជាដើម។

លោកបន្តថា “នៅពេលដែលយើងមិនទាន់មានច្បាប់ប្រើប្រាស់ដីនេះ វាមានផលលំបាកក្នុងការទិញដី ឬក៏ត្រូវរៀបចំឯកសារមុនក្នុងការសាងសង់ទៅតាមប្រភេទដែលអាចធ្វើបាន ហើយត្រូវការចំណាយលុយមុន ហើយប្រការនេះ អ្នកវិនិយោគមិនចង់មានការចំណាយច្រើននោះទេ។

លោកបន្តថា “អ្វីដែលរដ្ឋាភិបាលកំពុងរៀបចំប្លង់គោលប្រើប្រាស់ដីនេះ គឺជាការល្អប្រើសើរបំផុត និងអត្ថប្រយោជន៍ខ្ពស់សម្រាប់អ្នកវិនិយោគ និងអ្នករកស៊ីខាងវិស័យចលនទ្រព្យ ប្រជាពលរដ្ឋធម្មតា និងរដ្ឋាភិបាល ជាពិសេសអាចគ្រប់គ្រងទៅលើតាមតំបន់ដែលរដ្ឋាភិបាលបានដាក់យុទ្ធសាស្ត្រក្នុងរៀបចំក្រុង និងមានភាពងាយស្រួលក្នុងការរៀបចំហេដ្ឋារចនាសម្ព័ន្ធផងដែរ។

នាយិការក្រុមហ៊ុន CBRE Cambodia ប្រចាំកម្ពុជា លោកស្រី អាន សុធីតា បានឱ្យ ដឹងដែរថា ការរៀបចំឱ្យមានការប្លង់គោលប្រើប្រាស់ដីនៅគ្រប់ខេត្តក្រុងនៅក្នុងប្រទេសកម្ពុជា វាផ្តល់នូវភាពងាយស្រួលក្នុងការអភិវឌ្ឍក្រុង និងរៀបចំហេដ្ឋារចនាសម្ព័ន្ធក្នុងរយៈពេលវែងទៅមុខទៀត ។

លោកស្រីបន្តថា “ការអនុវត្តឱ្យបានត្រឹមត្រូវ និងមានប្រសិទ្ធភាពចំពោះប្លង់គោលប្រើប្រាស់ដីនេះ ដើម្បីបញ្ជៀសនូវហានិភ័យផ្សេងៗ ជាពិសេសលើការរៀបចំនគរូបនីយកម្ម និងសំណង់ក្នុងខេត្តក្រុងនានា។

អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បានឱ្យដឹងកាលពីពេលថ្មីៗនេះថា រហូតមកដល់ពេលនេះ ក្រសួងរៀបចំដែនដី នគរូបនីយកម្ម និងសំណង់ បានសម្រេចធ្វើការកំណត់នៃការប្រើប្រាស់ដីតាមប្លង់គោលនៅតាមបណ្តាស្រុក-ក្រុងនៅទូទាំងប្រទេសបានចំនួន១៣ ក្នុងចំណោមស្រុក-ក្រុងចំនួន២៦ ។

លោកបន្តទៀតថា “សម្រាប់ផែនការរៀបចំដែនដីថ្នាក់រាជធានី-ខេត្តបានចំនួន៣ខេត្ត គឺរាជធានីភ្នំពេញ ខេត្តព្រះសីហនុ និងខេត្តបាត់ដំបង ដែលផែនការនៃការរៀបចំដែនដីនេះ ពិតជាមានសារសំខាន់បំផុតក្នុងការរៀបចំ និងកំណត់នូវផែនការយុទ្ធសាស្ត្រសម្រាប់បែងចែកនៃការប្រើប្រាស់ដី ដើម្បីឈានទៅរកការអភិវឌ្ឍ។

ក្រសួងរៀបចំដែនដី នគរូបនីយកម្ម និងសំណង់បាននឹងកំពុងរៀបចំប្លង់គោលប្រើប្រាស់ដីនៅគ្រប់រាជធានី-ខេត្ត និងរៀបចំទុកជាឯកសារយុទ្ធសាស្ត្រគោល បម្រើឱ្យមហិច្ឆិតារបស់រាជរដ្ឋាភិបាល និងគោលដៅ ទស្សនវិស័យដល់ឆ្នាំ២០៣៥ ក្នុងការគ្រប់គ្រងតំរង់ទិសការអភិវឌ្ឍសេដ្ឋកិច្ច ក្នុងព្រំប្រទល់រដ្ឋបាលរាជធានី ខេត្ត និងតំបន់ទីប្រជុំជនពាក់ព័ន្ធទាំងឡាយនៅជាប់ជុំវិញ ឆ្លើយតបបាននឹងកំណើននៃការវិនិយោគឯកជន និងចំនួនប្រជាជន តាមរយៈការតម្រង់ទិស និងជម្រុញការវិនិយោគសាធារណៈ ស្របតាមរបបសេដ្ឋកិច្ចទីផ្សារសេរី និងការអភិវឌ្ឍតាមបែបប្រជាធិបតេយ្យថ្នាក់ក្រោមជាតិ៕