ដោយ ៖ ប៊ី

ក្រុងតូក្យូ ៖ ប្រទេសជប៉ុននឹងចាប់ផ្តើមកម្មវិធីឧបត្ថម្ភធនមួយដើម្បីលើកទឹកចិត្តដល់ក្រុមហ៊ុនផលិតក្នុងស្រុកដើម្បីផ្ទេរមូលដ្ឋានផលិតកម្មនៅក្រៅប្រទេសរបស់ពួកគេទៅកាន់តំបន់អាស៊ីអាគ្នេយ៍ ដោយសារតែជំងឺរាតត្បាត COVID-19 បានបង្អាក់ដល់បណ្តាញផ្គត់ផ្គង់របស់ពួកគេដែលពឹងផ្អែកយ៉ាងខ្លាំងទៅលើប្រទេសចិន។

កម្មវិធីឧបត្ថម្ភធន ២៣.៥ ពាន់លានយ៉េន (៧ ពាន់លានបាត) ឬ (ប្រមាណ២១៥.៧ លានដុល្លារ) នេះ ដែលត្រូវបានដាក់បញ្ចូលទៅក្នុងកញ្ចប់ជួយសង្គ្រោះបន្ទាន់របស់រដ្ឋាភិបាលដើម្បីបន្ធូរបន្ថយការធ្លាក់ចុះនៃសេដ្ឋកិច្ចពីជំងឺរាតត្បាត នឹងជួយក្រុមហ៊ុននានាធ្វើពិពិធកម្មខ្សែសង្វាក់ផ្គត់ផ្គង់របស់ពួកគេ ដោយជួយផ្នែកហិរញ្ញវត្ថុដល់ការសាងសង់កន្លែងផលិតកម្មក៏ដូចជាការសិក្សាពីលទ្ធភាពនៅក្នុងបណ្តាប្រទេសអាស៊ាន។

គំនិតផ្តួចផ្តើមនេះបានកើតឡើងបន្ទាប់ពីក្រុមហ៊ុនផលិតរថយន្តជាច្រើន និងក្រុមហ៊ុនផលិតផ្សេងទៀតបានទទួលរងនូវកង្វះខាតផ្នែកសម្ភារៈ ដែលផលិតនៅក្នុងប្រទេសចិន បន្ទាប់ពីការផ្ទុះឡើងនៃមេរោគថ្មីនេះបានចាប់ផ្តើមកាលពីចុងឆ្នាំមុននៅក្នុងទីក្រុង Wuhan ភាគកណ្តាលប្រទេសចិន។

មន្ត្រីក្រសួងសេដ្ឋកិច្ចពាណិជ្ជកម្ម និងឧស្សាហកម្មបាននិយាយថា “សូម្បីតែមុនពេលការផ្ទុះវីរុសនេះ មានតម្រូវការកាន់តែច្រើនសម្រាប់ក្រុមហ៊ុនជប៉ុនក្នុងការបង្កើតមូលដ្ឋានផលិតកម្មនៅក្នុងតំបន់អាស៊ាន។ គម្រោងឧបត្ថម្ភធននេះ នឹងជួយប្រទេសរបស់យើងកសាងទំនាក់ទំនងល្អប្រសើរជាមួយបណ្តាប្រទេសអាស៊ានផងដែរ”។

ដើម្បីចៀសវាងហានិភ័យផ្សេងៗដែលទាក់ទងនឹងការពឹងផ្អែកយ៉ាងខ្លាំងទៅលើផលិតកម្មនៅក្នុងប្រទេសចិន ដូចជាបាតុកម្មប្រឆាំងជប៉ុន ការតម្លើងប្រាក់ឈ្នួល និងសង្គ្រាមពន្ធរបស់ខ្លួនជាមួយសហរដ្ឋអាមេរិក ក្រុមហ៊ុនជប៉ុនបានជ្រើសរើសយកសមាគមប្រជាជាតិអាស៊ីអាគ្នេយ៍សម្រាប់មូលដ្ឋានផលិតកម្មជំនួសក្រោមយុទ្ធសាស្ត្រ “ប្រទេសចិនបូកមួយ”។

នៅក្នុងកិច្ចខិតខំប្រឹងប្រែងមួយផ្សេងទៀតដើម្បីពង្រឹងខ្សែសង្វាក់ផ្គត់ផ្គង់ រដ្ឋាភិបាលនឹងចំណាយថវិកាចំនួន ២២០ ពាន់លានយ៉េន ដើម្បីជំរុញផលិតផលក្នុងស្រុក ដែលបច្ចុប្បន្នត្រូវបាននាំចូលយ៉ាងច្រើនពីតំបន់មួយចំនួន។ ប្រាក់ឧបត្ថម្ភនេះនឹងរួមបញ្ចូលផងដែរនៅក្នុងកម្មវិធីជំរុញសេដ្ឋកិច្ច ប្រាក់ឧបត្ថម្ភនេះនឹងគាំទ្រផ្នែកហិរញ្ញវត្ថុដល់ការផ្លាស់ប្តូរទីតាំងផលិតកម្មនៅបរទេសរបស់ក្រុមហ៊ុនជប៉ុននៅឯប្រទេសកំណើតខ្លួន។

កម្មវិធីនេះក៏នឹងផ្តោតសំខាន់ទៅលើក្រុមហ៊ុនផលិតសម្ភារៈ ដែលចាំបាច់សម្រាប់ប្រជាជនជប៉ុន ដើម្បី “ឱ្យមានសុខភាពល្អ” ចំពេលមានការផ្ទុះឡើងជំងឺ COVID-19 រួមទាំងម៉ាស និងទឹកលាងសម្អាតជាតិអាល់កុល។ ក្រុមហ៊ុនទាំងនេះអាចទទួលបានប្រាក់ឧបត្ថម្ភ នៅពេលពួកគេបើករោងចក្រថ្មីឬបង្កើនសមត្ថភាពផលិតដែលមានស្រាប់នៅក្នុងប្រទេសជប៉ុន។

ក្រសួងបានឱ្យដឹងថា ការឧបត្ថម្ភធននេះនឹងគ្របដណ្តប់រហូតដល់ ២ ភាគ ៣ នៃការវិនិយោគក្នុងការជំរុញផលិតកម្មក្នុងស្រុកនៃសម្ភារៈ សំខាន់ៗ សម្រាប់ក្រុមហ៊ុនធំៗ និង ៣ ភាគ ៤ សម្រាប់ក្រុមហ៊ុនខ្នាតតូចនិងមធ្យម។

យោងតាមសមាគមឧស្សាហកម្ម អនាម័យ ផលិតផលជប៉ុន ម៉ាសចំនួន ៨០ ភាគរយ នៅក្នុងប្រទេសក្នុងឆ្នាំ ២០១៨ ត្រូវបាននាំចូលភាគច្រើនមកពីប្រទេសចិន។ ម៉ាសបានខ្វះខាតចាប់តាំងពីការផ្ទុះឡើងនៃមេរោគថ្មីនេះ ដែលជំរុញឱ្យ នាយករដ្ឋមន្រ្តីលោក ស៊ីន ហ្សូអាបេ បើកដំណើរការកម្មវិធីចែកចាយម៉ាសក្រណាត់ពីរនៅទូទាំងប្រទេស។

ថវិកាសម្រាប់កម្មវិធីឧបត្ថម្ភធនទាំងពីរត្រូវបានដាក់បញ្ចូលក្នុងកញ្ចប់ថវិកាបន្ថែម ២៥,៦៩ ទ្រីលានយ៉េនសម្រាប់ឆ្នាំ ២០២០ ដើម្បីផ្តល់ហិរញ្ញប្បទានដល់សកម្មភាពជំរុញសេដ្ឋកិច្ច។

យោងតាមទិន្នន័យពាណិជ្ជកម្មរបស់ក្រសួងហិរញ្ញវត្ថុជប៉ុន ផ្នែកគ្រឿងបន្លាស់រថយន្តមកពីប្រទេសចិនមានចំនួន ៣៦,៩ ភាគរយ នៃការនាំចូលសរុបរបស់ប្រទេសជប៉ុនក្នុងឆ្នាំ ២០១៩ ខណៈទូរស័ព្ទមកពីប្រទេសជិតខាងអាស៊ីមានចំនួន ៨៥.៥ ភាគរយនៃតម្លៃនាំចូលសរុប។

លោក Takahiro Fujimoto សាស្រ្តាចារ្យនៅមហាវិទ្យាល័យសេដ្ឋកិច្ច Tokyo’s Graduate School of Economics បាននិយាយថា កម្មវិធីឧបត្ថម្ភធនគឺសមហេតុផលក្នុងទស្សនៈខ្លះសម្រាប់រយៈពេលវែង ព្រោះកម្មវិធីទាំងនេះ នឹងជម្រុញឱ្យក្រុមហ៊ុនផលិតរបស់ជប៉ុន មានតុល្យភាពផលិតកម្មល្អប្រសើរក្នុងចំណោមប្រទេសជប៉ុន ចិន និងអាស៊ាន។

ប៉ុន្តែ លោក Fujimoto ដែលជំនាញខាងបណ្តាញផ្គត់ផ្គង់របស់ក្រុមហ៊ុនជប៉ុន បានចង្អុលបង្ហាញថា ការធ្វើពិពិធកម្ម និងការធ្វើមូលដ្ឋានីយកម្មនៃមូលដ្ឋានផលិតកម្មសកលរបស់ពួកគេមិនគួរត្រូវបានផ្សព្វផ្សាយទេ ប្រសិនបើវាអាចធ្វើឱ្យប៉ះពាល់ដល់គុណប្រយោជន៍នៃការចំណាយរបស់ក្រុមហ៊ុន។
លោកបានមានប្រសាសន៍ថា “វាមានសារៈសំខាន់ណាស់ក្នុងការធ្វើឱ្យប្រព័ន្ធផលិតកម្មរបស់ពួកគេមានទាំងការប្រកួតប្រជែង និងសម្របខ្លួនទៅនឹងគ្រោះមហន្តរាយ”៕ Kyodo News

ដោយវុត្ថា

ភ្នំពេញ៖ ក្រុមហ៊ុន Alibaba របស់មហាសេដ្ឋីលំដាប់ពិភពលោក Jack Ma បង្កើតព្រឹត្តិការណ៍ប្រកួតប្រជែងទេពកោសល្យពាណិជ្ជកម្មអេឡិចត្រូនិកឆ្នាំ២០២០ (The Alibaba Global E-commerce Talent – GET) ដែលនឹងប្រព្រឹត្តិទៅនៅខែមិថុនា និងកក្តដា នៅកម្ពុជាសម្រាប់ថ្នាក់ជាតិ និងថ្នាក់អន្តរជាតិនៅថ្ងៃទី២៥ ខែសីហា ឆ្នាំ២០២០។

យោងតាមសេចក្តីជូនដំណឹងរបស់ ក្រសួងអប់រំ យុវជន និងកីឡា នៅថ្ងៃទី ៦ ខែឧសភា ឆ្នាំ ២០២០ នេះ ឱ្យដឹងថា សាកលវិទ្យាល័យបាត់ដំបងបានសហការជាមួយក្រុមហ៊ុនអាលីបាបា រៀបចំកម្មវិធីប្រកួតប្រជែងទេពកោសល្យពាណិជ្ជកម្មអេឡិចត្រូនិកសាកលអាលីបាបា ឆ្នាំ២០២០ (The Alibaba Global E-commerce Talent – GET) ដើម្បីបង្កើតដំណោះស្រាយឌីជីថលសម្រាប់អាជីវកម្មបុគ្គល និងស្ថាប័នដែលរងផលប៉ះពាល់ដោយការរីករាលដាលនៃជំងឺកូវីដ-១៩។

ក្រសួងអប់រំ បានញ្ជាក់ថា កាលបរិច្ឆេទទទួលពាក្យតាមអនឡាញរហូតដល់ថ្ងៃទី២១ ខែឧសភា ឆ្នាំ២០២០ ហើយសម្រាប់លក្ខខណ្ឌចូលរួម កម្មវិធី Alibaba GET Global Challenge សម្រាប់សហគ្រិនវ័យក្មេង និងយុវវ័យមានអាយុចាប់ពី ១៨ ដល់ ៣០ ឆ្នាំ។

ក្រសួងអប់រំបន្ថែមថា សម្រាប់អ្នកដែលមានបំណង ចុះឈ្មោះជាក្រុមដែលមានសមាជិកពី ៣ ទៅ ៥ នាក់ (សមាជិកយ៉ាងតិចម្នាក់អាចប្រាស្រ័យទាក់ទង ភាសាអង់គ្លេសបានល្អ) មានគំនិតអាជីវកម្មថ្មី ឬអាជីវកម្មដែលបានដំណើរការតិចជាង១ឆ្នាំ និងមិនធ្លាប់ទទួលបានការឧបត្ថម្ភថវិកាពីស្ថាប័នណាមួយដែលមានទឹកប្រាក់លើសពី ១០០,០០០ ដុល្លារសម្រាប់គម្រោងបច្ចុប្បន្ន។

សម្រាប់រង្វាន់ការប្រកួតប្រជែងថ្នាក់អន្តរជាតិរួមមាន៖

– ចំណាត់ថ្នាក់លេខ១៖ ១៤,០០០ ដុល្លារនៃមូលនិធិអាជីវកម្ម + ដំណើរស្វែងរករបកគំហើញសេដ្ឋកិច្ចឌីជីថលនៅទីស្នាក់ការកណ្តាលក្រុមហ៊ុន Alibaba នៅទីក្រុងហាំងចូវប្រទេសចិន + ចុះឈ្មោះចូលរៀនជាមួយធនាគារ Alibaba GET Talent ដែលមានទំនាក់ទំនងជាមួយគ្រូបង្រៀន វិនិយោគិន និយោជក ប្រកបដោយសក្តានុពល និងឱកាសអាជីវកម្ម។
– ចំណាត់ថ្នាក់លេខ២៖ ៧,០០០ ដុល្លារនៃមូលនិធិអាជីវកម្ម + ចុះឈ្មោះចូលរៀនជាមួយធនាគារ Alibaba GET Talent។
– ចំណាត់ថ្នាក់លេខ៣៖ ១,៤០០ ដុល្លារនៃមូលនិធិអាជីវកម្ម + ចុះឈ្មោះចូលរៀនជាមួយធនាគារ Alibaba GET Talent៕

ដោយ ប៊ី

អន្តរជាតិ៖ ក្រុមហ៊ុន Lufthansa ដែលជាក្រុមអាកាសចរណ៍ឈានមុខគេនៅអឺរ៉ុបបានជាប់គាំងនៅក្នុងកិច្ចពិភាក្សាដ៏ចង្អៀតមួយជាមួយរដ្ឋាភិបាលអាឡឺម៉ង់ស្តីពីលក្ខខណ្ឌនៃការជួយសង្គ្រោះ ខណៈក្រុមហ៊ុនកំពុងបាត់បង់ចំណូល ១ លានដុល្លារក្នុង១ម៉ោង ហើយកំពុងព្យាយាមដើម្បីរួចផុតពីការក្ស័យធន។

ក្រុមអាកាសចរណ៍ឈានមុខគេនៅអឺរ៉ុបនេះ បានបើកកិច្ចប្រជុំប្រចាំឆ្នាំលើកដំបូងរបស់ខ្លួន កាលពីថ្ងៃអង្គារកន្លងនេះ ដោយបង្ហាញពីការខាតបង់នៅត្រីមាសទី ១ ដែលមានទឹកប្រាក់ ១,២ ពាន់លានផោន (១,៣ ពាន់លានដុល្លារ) ដោយសារជំងឺ COVID-19។

យោងតាមទីភ្នាក់ងារព័ត៌មាន Bloomberg បានឱ្យដឹងថា ក្រុមហ៊ុន Lufthansa (DLAKY) បានបដិសេធមិនឆ្លើយសំណួរពីម្ចាស់ភាគហ៊ុនទាក់ទងនឹងព័ត៌មានលម្អិតនៃការពិភាក្សាអំពីថវិកាសង្គ្រោះ។ ភ្នាកងារព័ត៌មាននេះ បានឱ្យដឹងកាលពីសប្តាហ៍មុនថា រដ្ឋាភិបាលស្វីសបានយល់ព្រមធានា ៨៥ ភាគរយនៃកញ្ចប់ប្រាក់កម្ចី ១,៥ ពាន់លានដុល្លារសម្រាប់ក្រុមហ៊ុនដឹកជញ្ជូនស្វ៊ីសរបស់ខ្លួន។ ក្រុមនេះក៏មានក្រុមហ៊ុនអាកាសចរណ៍នៅក្នុងប្រទេសអាល្លឺម៉ង់ អូទ្រីស និងបែលហ្ស៊ិកផងដែរ។

កាសែត Der Spiegel ប្រចាំសប្តាហ៍របស់អាល្លឺម៉ង់ និង Bloomberg បានរាយការណ៍កាលពីថ្ងៃសុក្រកន្លងមកនេះថា ក្រុមហ៊ុន Lufthansa កំពុងចរចាថវិកាសង្គ្រោះចំនួន ១០ ពាន់លានផោន (១០,៨ ពាន់លានដុល្លារ) ជាមួយប្រទេសអាល្លឺម៉ង់ ដែលនឹងផ្តល់ឱ្យរដ្ឋាភិបាល ២៥,១ ភាគរយនៃក្រុមហ៊ុន និងមានកៅអីនៅក្រុមប្រឹក្សាត្រួតពិនិត្យរបស់ខ្លួន។

ក្រុមហ៊ុន Lufthansa បានបដិសេធមិនធ្វើអត្ថាធិប្បាយលើរបាយការណ៍នេះទេ។ ប៉ុន្តែក្រុមហ៊ុនបានថ្លែងនៅក្នុងលិខិតមួយផ្ញើទៅបុគ្គលិកនៅថ្ងៃទី ៣ ខែឧសភា និងបានចែករំលែកជាមួយ CNN Business ថា ខ្លួនជឿជាក់ថា កិច្ចចរចា “អាចត្រូវបានធ្វើឱ្យមានការសន្និដ្ឋានយ៉ាងរហ័ស”។

ក្រុមប្រឹក្សាប្រតិបត្តិបានសរសេរនៅក្នុងលិខិតនោះថា “ការគាំទ្ររបស់រដ្ឋាភិបាលអាឡឺម៉ង់នឹងជាជំហ៊ានមួយដែលអាចសម្រាចបានសម្រាប់អនាគតរបស់យើង។ សមត្ថភាពប្រកួតប្រជែង និងសមត្ថភាពវិនិយោគបន្តជាតម្រូវការចាំបាច់សម្រាប់បញ្ហានេះ”។

ក្រុមអ្នកវិភាគព្រួយបារម្ភថា ការជ្រៀតជ្រែករបស់រដ្ឋាភិបាលអាចរារាំងសមត្ថភាពរបស់ក្រុមហ៊ុន Lufthansa ក្នុងការអនុវត្តកម្មវិធីរៀបចំរចនាសម្ព័ន្ធ ដែលបានគ្រោងទុកដែលនឹងកាត់ជើងហោះហើររបស់ខ្លួន ១៣ ភាគរយ ហើយអាចនឹងកាត់បន្ថយការងារចំនួន ១ ម៉ឺននាក់។ ប្រហែលជា ២ ភាគ ៣ នៃបុគ្គលិករបស់ខ្លួន ឬច្រើនជាង ៨០,០០០ នាក់បានកាត់បន្ថយម៉ោងធ្វើការរួចហើយ។

នាយកប្រតិបត្តិលោក Carsten Spohr បានសង្កត់ធ្ងន់កាលពីថ្ងៃអង្គារកន្លងមកនេះថា ក្រុមហ៊ុន Lufthansa ចង់ការពារ “សេរីភាពក្នុងការសំរេចចិត្ត និងសកម្មភាពសហគ្រិន របស់ខ្លួន ។

លោកបានប្រាប់ម្ចាស់ភាគហ៊ុនតាមរយៈសន្និសីទកាសែតថា “ឥឡូវនេះយើងត្រូវការការគាំទ្រពីរដ្ឋាភិបាល ប៉ុន្តែយើងមិនត្រូវការការគ្រប់គ្រងរបស់រដ្ឋាភិបាលទេ”។

លោក Daniel Roeska អ្នកវិភាគស្រាវជ្រាវជាន់ខ្ពស់នៅក្រុមហ៊ុន Bernstein បាននិយាយថា ការបន្ថែម“សមាសធាតុនយោបាយ” ក្នុងក្រុមប្រឹក្សារបស់ក្រុមហ៊ុន Lufthansa នឹងធ្វើឱ្យអ្វីៗកាន់តែពិបាកថែមទៀត ពីព្រោះប្រវត្តិសាស្ត្របានបង្ហាញថា ការសម្រេចចិត្តរបស់ខ្លួនគឺជាមធ្យោបាយដ៏ល្អបំផុតសម្រាប់ក្រុមហ៊ុនអាកាសចរណ៍ដើម្បីរួចផុតពីវិបត្តិ។

លោកបានបន្ថែមថា “ការព្រួយបារម្ភតែធំគឺថាតើឥទ្ធិពលរបស់រដ្ឋាភិបាលនឹងមានរយៈពេលប៉ុន្មាន។ យើងសង្ឃឹមថា អ្នកវិនិយោគក៏នឹងមានឱកាសចូលរួមក្នុងការតម្លើងភាគហ៊ុនដើម្បីបង្ហាញពីការគាំទ្ររបស់ពួកគេចំពោះក្រុមហ៊ុននេះ”៕

ដោយ ប៊ី

ការលក់ផលិតស៊ីម៉ងត៍ និងសម្ភារៈសំណង់របស់ក្រុមហ៊ុនស៊ីម៉ងត៍ Siam Cement Group Public Co ltd (SCG) បានកើនឡើង ៧ ភាគរយនៅត្រីមាសទី ១ ឆ្នាំ ២០២០។ នេះបើយោងតាមរបាយការណ៍ប្រចាំត្រីមាសរបស់ក្រុមហ៊ុន។

របាយការណ៍ត្រីមាសទី ១ ឆ្នាំ ២០២០ ខាងលើបានឱ្យដឹងថា ក្រុមហ៊ុនបុត្រសម្ព័ន្ធនៅកម្ពុជារបស់ ក្រុមហ៊ុន SCG មានទ្រព្យសកម្មសរុប ៣៧៣ លានដុល្លារកើនឡើង ៥ ភាគរយ បើធៀបនឹងរយៈពេលដូចគ្នាកាលពីមុន និងលក់បាន ៦៧ លានដុល្លារកើនឡើង ៧ ភាគរយបើប្រៀបធៀបនឹងត្រីមាសមុន។

នៅទូទាំងពិភពលោក ក្រុមហ៊ុនបានចុះបញ្ជីចំណូលពីការលក់ប្រមាណ ៣.៣៧ ពាន់លានដុល្លារធ្លាក់ចុះ ៦ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ការធ្លាក់ចុះនេះត្រូវបានសន្មតថា ដោយសារតែតម្រូវការពិភពលោកចុះខ្សោយ។

ប្រាក់ចំណេញជាទូទៅត្រូវបានរងផលប៉ះពាល់យ៉ាងធ្ងន់ធ្ងរក្នុងរយៈពេលនេះឈានដល់ត្រឹមតែ ២២៣ លានដុល្លារ ធ្លាក់ចុះ ៤០ ភាគរយ ធៀបនឹងរយៈពេលដូចគ្នាកាលពីឆ្នាំមុន និងធ្លាក់ចុះ ២ ភាគរយ ធៀបនឹងត្រីមាសមុន។

លោក Roongrote Rangsiyopash ប្រធាននិងជានាយកប្រតិបត្តិក្រុមហ៊ុន បានថ្លែងថា ចំពេលបរិយាកាសអរិភាព និងសេដ្ឋកិច្ចពិភពលោកកំពុងរងផលប៉ះពាល់ដោយជំងឺរាតត្បាត ក្រុមហ៊ុនកំពុងខិតខំប្រឹងប្រែងយ៉ាងខ្លាំងបំផុតក្នុងការរក្សាលទ្ធផលប្រតិបត្តិការនៃត្រីមាសទី ១ ឆ្នាំ ២០២០។

លោកបានមានប្រសាសន៍ថា ក្រុមហ៊ុនមានការប្តេជ្ញាចិត្តខ្ពស់ក្នុងការរក្សា និងដំណើរការអាជីវកម្មឱ្យបានរឹងមាំជាមួយនឹងផែនការគ្រប់គ្រងបន្តអាជីវកម្មរឹងមាំ រួមជាមួយផែនការឆ្លើយតបនឹងការរំខានផ្សេង និងការប្រកាន់ខ្ជាប់យ៉ាងតឹងរឹងចំពោះវិធានការសុខភាព និងសុវត្ថិភាពរបស់រដ្ឋាភិបាល៕