រយៈពេល២ថ្ងៃខេត្តកំពតទទួលបានកំណើនទេសចរជាង៧ម៉ឺននាក់

ដោយ ៖ រ៉ាណេត

កំពតៈ ក្នុងរយៈពេល២ថ្ងៃនៃឱកាសឈប់សម្រាក សងពិធីបុណ្យចូលឆ្នាំថ្មីប្រពៃ​ណីជាតិខ្មែរ សម្រាប់តែខេត្តកំពត ទទួលបានកំណើនទេសចរជាង៧ម៉ឺននាក់ ដែលមានកំណើនលើសថ្ងៃទី១ជិតទ្វេដង។

យោងតាមមន្ទីរទេសចរណ៍ខេត្តកំពត ដែលបានបង្ហាញទិន្នន័យនៃនៅព្រឹកថ្ងៃទី១៩ ខែសីហា ឆ្នាំ២០២០នេះបានឲ្យដឹងថា ក្នុងរយៈពេល២ថ្ងៃនៃឱកាសឈប់សម្រាកនេះមានទេសចរជាង៧ម៉ឺននាក់ បានចូលទៅកម្សាន្តនៅតាមតំបន់នានាទូទាំងខេត្ត រហូតធ្វើឱ្យខ្វះការផ្គត់ផ្គង់ផ្នែកសេវាស្នាក់នៅរយៈពេលខ្លី បើទោះជានៅតំបន់ខ្លះត្រូវបានបោះតង់ក៏ដោយ។

នៅក្នុងរបាយការណ៍ដដែលបានបញ្ជាក់ថា រយៈពេល២ថ្ងៃ (ថ្ងៃទី១៧-១៨ ខែសីហា ឆ្នាំ២០២០) ភ្ញៀវទេសចរបានទៅកម្សាន្ត តាមគោលដៅទេសចរណ៍នានានៅខេត្តកំពតចំនួន៧០.៧៨៧នាក់ ក្នុងនោះភ្ញៀវទេសចរជាតិចំនួន៧០.៣៨៣នាក់ និងភ្ញៀវបរទេសចំនួន ៤០៤នាក់។ ដោយឡែកចំពោះស្ថានភាពទូទៅនៅតែបន្តរក្សាបានសភាពល្អប្រសើរ។

ជាមួយនេះដែរ ដើម្បីបង្ការទប់ស្កាត់ការឆ្លងរីករាលដាលនៃជំងឺកូវីដ១៩ ក្រុមការងា​រមន្ទីរទេសចរណ៏ខេត្តកំពត បានសហការជាមួយផ្នែកពាក់ពន្ធ័ ចុះជំរុញការអនុវត្តវិធានសុវត្ថិភាពទេសចរណ៍ និងការណែនាំរបស់ក្រសួងសុខាភិបាល នៅតាមរមណីយដ្ឋាន សហគមន៍ និងសេវាកម្មទេសចរណ៍នានាក្នុងខេត្តយ៉ាងសកម្ម។

នៅព្រឹកថ្ងៃជាមួយគ្នានេះ ក្រសួងទេសចរណ៍ក៏បានបង្ហាញឱ្យដឹកផងដែរថា នៅថ្ងៃទី២នៃការឈប់សម្រាកនេះ ទេសចរចេញដើរកម្សាន្តនៅទូទាំងប្រទេស មានរហូតដល់ជាង២៧ម៉ឺននាក់ ដែលជាចំនួនដ៏ច្រើនបំផុត រហូតមានតំបន់កម្សាន្តខ្លះត្រូវបានបិទបន្ទាប់ពីសង្កេតឃើញ ការអនុវត្តវិធានការមានភាពចន្លោះប្រហោង ជាក់ស្ដែងដូចជាតំបន់កម្សាន្ត ផាប់ស្ត្រីត នៅខេត្តសៀមរាបជាដើម។

នៅក្នុងរបាយការណ៍របស់ក្រសួងទេសចរបញ្ជាក់ថា ក្នុងថ្ងៃទី២នាឱកាសឈ​ប់សម្រាកសងថ្ងៃចូលឆ្នាំខ្មែរ ដែលត្រូវនឹងថ្ងៃទៅ១៨ ខែសីហា ឆ្នាំ២០២០នេះ មានភ្ញៀវទេសចរ និងប្រជាពលរដ្ឋដែលចេញដើរទស្សនាកម្សាន្ត នៅទូទៅប្រទេសមានចំនួន ២៧៧,០៧៨នាក់ កើនឡើង១៨.៧៥ភាគរយ ធៀបនឹងថ្ងៃទីមួយម្សិលមិញ ក្នុងនោះខេត្តសៀមរាប និងខេត្តកំពតមានអ្នកទៅលេងច្រើនជាងរាជធានី-ខេត្តដទៃ៕

ភ្ញៀវទេសចរណ៍ជិត២៨ម៉ឺននាក់ចេញដើរកំសាន្តនៅក្នុងថ្ងៃឈប់សំរាកទី២

ដោយ ៖ គង់ សូរិយា

ភ្នំពេញៈ ភ្ញៀវទេសចរណ៍ជាតិ អន្តរជាតិជិត២៨ម៉ឺននាក់បានចេញដើរកំសាន្តនៅតាមរមណីយដ្ឋាននានាទូទាំងប្រទេស នៅក្នុងថ្ងៃបុណ្យសំរាកដែលមានរយៈពេលមួយសប្តាហ៍នេះ។

យោងតាមរបាយការណ៍របស់ក្រសួងទេសចរណ៍បានបង្ហាញថា ក្នុងថ្ងៃទីពីរនាឱកាសឈប់សម្រាកសងថ្ងៃចូលឆ្នាំខ្មែរ ដែលត្រូវនឹងថ្ងៃទៅ១៨ ខែសីហា ឆ្នាំ២០២០នេះ មានភ្ញៀវទេសចរ និងប្រជាពលរដ្ឋ ដែលចេញដើរទស្សនាកម្សាន្តនៅទូទៅប្រទេសមានចំនួន២៧៧,០៧៨នាក់ កើនឡើង១៨.៧៥% ធៀបនឹងថ្ងៃទីមួយម្សិលមិញ។

ក្នុងចំណោមខេត្តគោលដៅទេសចរណ៍នានា ខេត្តសៀមរាប និងខេត្តកំពតមានប្រជាប្រិយភាព ដោយមានអ្នកទៅដើរកំសាន្តជាងរាជធានី-ខេត្តដទៃ។

លោក ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថា ក្នុងចំណោមភ្ញៀវសរុបមានចំនួនសរុប ២៧៧,០៧៨នាក់នេះ មានភ្ញៀវជាតិមានចំនួន២៧៧,៦៤៩នាក់ និងភ្ញៀវអន្តរជាតិមានចំនួន ២,៧៧០នាក់។

គោលដៅទេសចរណ៍សំខាន់ៗមួយចំនួន រួមមាន៖

* ខេត្តសៀមរាបមានចំនួន ៤៤,៣៦៤នាក់

* ខេត្តកំពតមានចំនួន ៣៩,៩៨៣នាក់

* ខេត្តបាត់ដំបងមានចំនួន ២៦,៩៨៧នាក់

* ខេត្តកែបមានចំនួន ២៣,២២៩នាក់

* ខេត្តព្រះសីហនុមានចំនួន ២៣,១៤៩នាក់

* ខេត្តរតនគិរីមានចំនួន ១៤,២៩៤នាក់

* ខេត្តព្រះវិហារមានចំនួន ១២,៤៣០នាក់

* ខេត្តមណ្ឌលគិរីមានចំនួន ១០,២៥៤នាក់។

ចំណែកសភាពការណ៍សន្តិសុខ សណ្ដាប់ធ្លាប់នៅតាមកន្លែង មានភ្ញៀវទៅទស្សនានោះ មិនមានបញ្ហាអ្វីធំដុំនោះឡើយ៕

កម្ពុជាកំពុងសិក្សាពីការអភិវឌ្ឍការធ្វើពាណិជ្ជកម្មឌីជីថលលំដាប់អន្តរជាតិ

ដោយៈ វុត្ថា

ភ្នំពេញៈ តំណាងរដ្ឋាភិបាល និងវិស័យឯកជន សភាណិជ្ជកម្មកម្ពុជា បានចូលរួមវេទិកាអភិវឌ្ឍន៍ ពាណិជ្ជកម្មឌីជីថលអន្តរជាតិលើកទី២ និងសន្និសីទពាណិជ្ជកម្មឌីជីថលពិភពលោកលើកទី១ ដើម្បីអាចធ្វើពិពិធកម្មពាណិជ្ជកម្មតាមបែបបច្ចេកវិទ្យា។

លោកបណ្ឌិតតាន់ មុនី្នវណ្ណ អនុប្រធានសភាពាណិជ្ជកម្មកម្ពុជា តំណាងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នៅល្ងាចថ្ងៃទី១៨ ខែសីហា ឆ្នាំ២០២០ បានចូលរួម ក្នុងវេទិកាអភិវឌ្ឍន៍ពាណិជ្ជកម្មឌីជីថលអន្តរជាតិលើកទី២ និងសន្និសីទពាណិជ្ជកម្មឌីជីថលពិភពលោកលើកទី១» តាមប្រព័ន្ធអនឡាញ ។

លោកបណ្ឌិតបានឱ្យដឹងថា “ព្រឹត្តិការណ៍នេះ ត្រូវបានរៀបចំឡើងដោយសមាគម ស្រាវជ្រាវអង្គការពាណិជ្ជកម្មពិភពលោកចិន ដោយមានការចូលរួមពីមន្ត្រីជាន់ខ្ពស់អញ្ជើ​ញមកពីក្រសួង/ស្ថាប័នរដ្ឋ និងវិស័យឯកជននៃប្រទេសចិន ព្រមទាំងតំណាងនៃអង្គការអន្តរជាតិ សភាពាណិជ្ជកម្ម និងឧស្សាហកម្មមកពីបណ្ដាប្រទេសនានាក្នុងពិភពលោក”។

លោកបានបញ្ជាក់ឱ្យដឹងថា គោលបំណងនៃព្រឹត្តិការណ៍នេះ ធ្វើឡើងដើម្បីពិភា​   ក្សាអំពីហានិភ័យនៃពាណិជ្ជកម្មសកល ទម្រង់ថ្មីនៃការផ្សាយផ្ទាល់តាមប្រព័ន្ធអេឡិចត្រូនិក និងនិន្នាការថ្មីនៃពាណិជ្ជកម្មឌីជីថល ក្នុងកាលៈទេសៈនៃជំងឺរាតត្បាតថ្មី ព្រមទាំងដើម្បីជំរុញផលិតផលប្រទេសរបស់ខ្លួន បង្កើតដៃគូជាមួយសភាពាណិជ្ជកម្មផ្សេងៗ និងបង្កើនទំនាក់ទំនងពាណិជ្ជកម្ម និងសេដ្ឋកិច្ចដោយផ្ទាល់ជាមួយសហគ្រាសចិន។

ក្នុងកិច្ចប្រជុំនេះផងដែរ លោកបណ្ឌិតតាន់ មុន្នីវណ្ណ បានថ្លែងសុន្ទរកថាដោយលើកឡើងអំពីចំណុចសំខាន់ៗដូចជា- ផលប៉ះពាល់នៃជំងឺរាតត្បាតជាសកល កូវីដ-១៩

– តួនាទីដ៏សំខាន់ និងនិន្នាការក្នុងការប្រើប្រាស់បច្ចេកវិទ្យា និងសេវាតាមប្រព័ន្ធឌីជីថល។

– ទំនាក់ទំនងពាណិជ្ជកម្មរវាងអាស៊ាន និងចិន

– ទំនាក់ទំនងពាណិជកម្មរវាងកម្ពុជា និងចិន

ជាមួយគ្នានេះ លោកបណ្ឌិតក៏បានលើកទឹកចិត្តអ្នកទាំងអស់គ្នា ឱ្យមានភាពរឹងមាំ និងសហការគ្នា ក្នុងការជម្នះឧបសគ្គនានា ក្នុងអំឡុងនៃជំងឺរាតត្បាតនេះ ហើយសភាពាណិជ្ជកម្មកម្ពុជា តែងតែត្រៀមខ្លួននិងស្វាគមន៍ក្នុងការសហការ និងចាប់ដៃគូពាណិជ្ជកម្មជាមួយធុរជនមកពីបណ្ដាប្រទេសនានា ដើម្បីលើកកម្ពស់កំណើនពាណិជ្ជកម្មរវាងប្រទេសយើងទាំងអស់គ្នា៕

កម្ពុជា​នាំចេញ​ផ​លិ​ផល​កសិផល​ជាង ៦០មុខ​ទៅកាន់​ទីផ្សារ​អន្តរជាតិ​ស្មើនឹងជិត៥លាន​តោន

ដោយៈ រ៉ា​ណេ​ត

ភ្នំពេញៈ ផលិតផល​កសិផលរ​បស់​កម្ពុជា ដែល​បានធ្វើការ​នាំចេញ​ទៅកាន់​ទីផ្សារ​អន្តរជាតិ​នៅត្រឹម​ដើម​ឆមាស​ទី២ ឆ្នាំ២០២០នេះ​មាន​ចំនួន​ជាង៦០មុខ ស្មើនឹង​ប្រមាណ​ជិត៥លាន​តោន។

យោងតាម​របាយការណ៍ ដែល​បង្ហាញ​ដោយ​ក្រសួងកសិកម្ម រុក្ខាប្រមាញ់ និង​នេសាទ​បាន​បញ្ជាក់ថា គិត​ត្រឹម​ដើម​ឆមាស​ទី២ ឆ្នាំ២០២០កន្លងទៅនេះ ការនាំចេញ​ផលិតផល​កសិផល​រប​ស់​កម្ពុជា ទៅកាន់​ទីផ្សារ​អន្តរជាតិ​នៃ​ប្រទេស​ចំនួន៥៩ មាន​ចំនួន​ជាង៦០មុខ ស្មើនឹង៤.៨តោន​មានការ​កើនឡើង​ខ្ពស់ បើ​ធៀប​ទៅនឹង​រយៈពេល​ដូចគ្នា​កាលពី​ឆ្នាំ២០១៩ ដែលមាន​ត្រឹម៣,៤លាន​តោន​តែប៉ុណ្ណោះ។

អគ្គនាយកដ្ឋាន​កសិក​ម្ម នៃ​ក្រសួងកសិកម្ម រុក្ខាប្រមាញ់ និង​នេសាទ លោក ងិន ឆាយ ធ្លាប់បាន​បញ្ជាក់​ឱ្យដឹងថា កំណើន​នៃ​បរិមាណ​នាំចេញ​នេះ ជា​កត្តា​ឆ្លុះបញ្ចាំង​អំពី​ការផ្លាស់ប្តូរ​ជា​វិជ្ជមាន​ទាំង​បរិមាណ និង​គុណភាព​នៃ​ផលិតកម្ម​កសិកម្ម នៅក្នុង​ប្រទេស​កម្ពុជា។

លោក​បន្តថា “ផលិតផល​កសិកម្ម​ក​ម្ពុ​ជា៦១មុខ​នេះ ត្រូវបាន​ចែកជា២ក្រុម ទី១ក្រុម​ផលិតផល ដែល​មិន​ជាប់​កម្រិត​កំណត់​ការនាំចេញ​ទំនិញ​ពី​កម្ពុជា ទៅកាន់​ប្រទេស​ឬ​ដែនដី ដែល​ធ្លាប់បាន​នាំចេញ​រួចហើយ ការ​នាំចូល​ផលិតផល​ទាំងនេះ តម្រូវឱ្យមាន​វិញ្ញាបនបត្រ​ភូតគាម​អនាម័យ ដើម្បី​ធានា​អះអាង​អំពី​ការបំពេញ អនុលោមភាព​ទៅតាម​ល្ខ​ខណ្ឌ​តម្រូវ។

ក្រុមទី២ គឺជា​ប្រភេទ​ផលិតផល​ដែល​ជាប់​កម្រិត​កំណត់ ឬ​ជា​ក្រុម​ផលិតផល​ដែលមាន​កម្រិត​ហានិភ័យ​ខ្ពស់ (ទំនិញ​ដែលមាន​សក្តានុពល​ហានិភ័យ សមាសភាព​ចង្រៃ​ខ្ពស់​ដូចជា​ផលិតផល​បន្លែ ផ្លែឈើ​ស្រស់ មើម និង​បណ្ដា​ទំនិញ​ដទៃទៀត​ដែល​ចាត់​ក្នុង​កម្រិត​ហានិភ័យ​នៃ​ស្ដង់ដារ​ភូតគាម​អនាម័យ​អន្ដរជាតិ​លេខ៣២ (ISPM 32) ក្នុង​ក្រុមទី៣ និង​ទី៤ស្ដីពី ចំណាត់ថ្នាក់​ទំនិញ​អាស្រ័យ លើ​កម្រិត​ហានិភ័យ​បង្កឡើង​ដោយ​សមាសភាព​ចង្រៃ)” ។

យោងតាម​របាយការណ៍​របស់​ក្រសួងកសិកម្ម រុក្ខាប្រមាញ់ និង​នេសាទ​បានបង្ហាញ​ពី​ស្ថានភាព​នៃ​ការនាំចេញ​ផលិតផល​កសិកម្ម​រប​ស់​កម្ពុជា ស្ថិតក្នុង​និន្នាការ​កើនឡើង​ជា​លំដាប់ ហើយ​មាន​សន្ទុះ​គួរឱ្យកត់សម្គាល់ ក្នុង​រយៈពេល៦ឆ្នាំ​ចុង​ក្រោយនេះ ដែល​នៅ​ឆ្នាំ២០១៤ ការនាំចេញ​ផលិតផល​កសិកម្ម សម្រេចបាន​ចំនួន​ប្រមាណ​ជាង ៣,៤៤លាន​តោន និង​បាន​កើន​រហូតដល់​ជាង៤,៨លាន​តោន គិត​ត្រឹម​រយៈពេល​ត្រីមាស​ទី១នៃ​ឆ្នាំ២០២០ ៕

ខេត្ត​មណ្ឌល​គិ​រ​រី​ចាប់ផ្តើម​ផ្តោតលើ​បញ្ហា​បរិ​ស្ថា​ក្នុង​មូលដ្ឋាន​ដោយ​ត្រៀម​ដី១០០ហិច​តា​សំរាប់​ទីលាន​ចាក់់សំរាម

ដោយ ហ្សូ​លី

មណ្ឌលគិរីៈ រដ្ឋបាលខេត្ត​មណ្ឌលគិរី មាន​គម្រោង​សាងសង់​កន្លែង​ចាក់សំរាម​ថ្មី​នៅលើ​ផ្ទៃដី​ចំនួន១០០ហិច​តា ក្នុង​គោលបំណង​កាត់បន្ថយ​ផលប៉ះពាល់​បរិស្ថាន និង​រក្សា​សោភ័ណភាព​របស់​ខេត្តមណ្ឌលគិរី​ទាំងមូល ដែល​កំពុង​មានឈ្មោះ​ល្បីល្បាញ​ជា​គោលដៅ​ទេសចរណ៍ធម្មជាតិ។

អភិបាលខេត្ត​មណ្ឌលគិរី លោក​ស្វាយ សំ​អ៊ាង បានឱ្យដឹង​កាលពីពេលថ្មីៗនេះ​ថា រដ្ឋបាលខេត្ត​បាន​ត្រៀម​ដី ទំហំ​ជាង១០០ហិច​តា​នៅ​ជាយក្រុង ដើម្បី​បង្កើត​កន្លែង​ចាក់សម្រាម​ថ្មី ខណៈ​ពេលនេះ​កន្លែង​ចាក់សម្រាម​ចាស់​ជិត​ពេញ​ទៅហើយ។

លោក​បន្តថា “ការចំណាយ​ដី១០០ហិច​តា សាងសង់​កន្លែង​ចាក់សំរាម​ថ្មី​នេះ​នឹង​ជួយ​បង្កើន​មុខមាត់ និង​សោភ័ណភាព​ទីក្រុង រួមទាំង​ខេត្ត​ទាំងមូល​ឱ្យ​កាន់​តែមាន​ភាពស្រស់ស្អាត អនាម័យ​ជាង​មុន និង​ជាការ​បង្ការ​សកម្មភាព​ចោល សំរាម​ពាសវាល​ពាសកាល​ផងដែរ” ។

លោក ស្វាយ សំ​អ៊ាង អភិបាលខេត្ត​មណ្ឌលគិរី បានលើកឡើង​ទៀតថា កាលណា​បរិស្ថាន​នៅក្នុង​ខេត្ត​ទាំងមូល​មាន​អនាម័យ​ស្អាត ក៏​ជា​កត្តា​មួយ​រួមចំណែក​នៃ​ការទាក់ទាញ​ភ្ញៀវទេសចរ​ឱ្យមក​កម្សាន្ត​នៅក្នុង​ខេត្ត​កាន់តែច្រើន។

ខេត្តមណ្ឌលគិរី​បាន និង​កំពុង​ក្លាយទៅជា​ទីតាំង​ទេសចរណ៍ ដ៏​មាន​ប្រជាប្រិយភាព​មួយ ដោយសារតែ​ទេសភាព​ដ៏​ស្រស់ត្រកាល និង​ការអភិវឌ្ឍ​ហេដ្ឋារចនាសម្ព័ន្ធ​ឆាប់រហ័ស ងាយស្រួល​ក្នុងការ​ធ្វើដំណើរ។ កត្តា​ទាំងអស់នេះ​បាន​ជម្រុញ​ឱ្យ​ភ្ញៀវទេសចរ​ជាតិ-អន្តរជាតិ​សម្រុក​ទៅ​កម្សាន្ត​នៅ​ខេត្ត​មួយ​នេះ ជាពិសេស​ទាក់ទាញ​បណ្តារ​ក្រុមហ៊ុន​វិនិយោគ​ទាំង​ក្នុង​និង​ក្រៅប្រទេស មក​វិនិយោគ​លើ​វិស័យ​ទេសចរណ៍ នាំឱ្យ​ខេត្ត​កាន់តែ​មាន​ភាព​រីកចម្រើន​ជា​បន្តបន្ទាប់៕

ប្រទេស​ចិន​ទាក់ទាញ​ទំហំ​ទឹកប្រាក់​វិនិយោគ​ពី​បរទេស​កើន​ដល់ ៦៣,៤៧ពាន់​លាន​យ័ន

ដោយ​វុត្ថា

ប៉េកាំងៈ គិត​ត្រឹម​ខែកក្កដា ឆ្នាំ២០២០កន្លងមកថ្មីៗនេះ ទំហំ​ប្រើប្រាស់​ទុន​បរទេស​ជាក់ស្តែង នៅ​ទូទាំងប្រទេស​មាន​ដល់​ទៅ៦៣,៤៧ ពាន់​លាន​យ័ន កើនឡើង១៥.៨ ភាគរយ បើ​ធៀប​នឹង​រយៈពេល​ដូចគ្នា​នៃ​ឆ្នាំ២០១៩ ហើយ​សម្រេចបាន​នូវ​កំណើន​វិជ្ជមាន​នៃ​ការគៀងគរ​ទុន​បរទេស ក្នុង​រយៈពេល​តែមួយ​ខែ​ក្នុង​រយៈពេល ៤ ខែជាប់ៗគ្នា បើ​និយាយ​ជាទូទៅ។

រដ្ឋាភិបាល​ចិន​បានបង្ហាញ​របាយការណ៍​កាលពីពេលថ្មីៗនេះ​ថា ក្នុង​រយៈពេល៧ ខែ​ដំបូង​ក្នុងឆ្នាំនេះ ប្រទេស​ចិន​បាន​ប្រើប្រាស់​ទុន​បរទេស​សរុប៥៣៥,៦៥ ពាន់​លាន​យាន់​ប្រាក់​ចិន ដែល​បាន​កើនឡើង០.៥ ភាគរយ សហគ្រាស​បរទេស​ថ្មី ដែល​ត្រូវបាន​បង្កើតឡើង​នៅក្នុង​ប្រទេស​ចិន មាន​សរុប១៨,៨៣៨ ។

គម្រោង​វិនិយោគ​នៅ​បរទេស (ក្រៅប្រទេស) សំខាន់ៗមួយចំនួន បាន​ព​ន្លឿ​ន​ការអនុវត្ត ហើយ​ទិន្នន័យ​ទាំងនេះ មិន​ត្រឹមតែ​បានបញ្ជាក់​យ៉ាង​ពេញលេញ​ថា ជំនឿ​ចិត្តរ​បស់ទុន​បរទេស ចំពោះ​ទីផ្សារ​ចិន​មិនត្រូវ​កាត់បន្ថយ​នោះទេ ថែមទាំង​ក៏​ជាការ​តបត​វិញ​យ៉ាងខ្លាំង​ក្លា ចំពោះ​ពាក្យសម្តី​ខុស​ទំនង​ដែល​ឃោសនា​បំប៉ោង ដោយ​អ្នកនយោបាយ​អាមេរិក ស្តីពី”ការ​ផ្តាច់ទំនាក់ទំនង​សេដ្ឋកិច្ច​ជាមួយ​ចិន” ។

ដោយសារ​ទទួលរង​ផលប៉ះពាល់ ដែល​បណ្តាលមកពី​ការរីក​រាលដាល​នៃ​ជំងឺ​កូ​វីដ ១៩ សកម្មភាព​ពាណិជ្ជកម្ម​ពិភពលោក​ទាំងមូល បាន​ធ្លាក់ចុះ​យ៉ាងខ្លាំង​តាំងពី​ចូលឆ្នាំ​នេះ​មក ប៉ុន្តែ​ដំណើរការ​ពាណិជ្ជកម្ម​អន្តរ​ជាតិចិន​ទាំងមូល នៅតែមាន​ភាពល្អប្រសើរ​ជាង​ការប៉ាន់ប្រមាណ​របស់​ទីផ្សារ និង​អង្គភាព​សេដ្ឋកិច្ចសំខាន់ៗនៅ​ទូទាំង​ពិភពលោក។

ទិន្នន័យ​បានបង្ហាញ​ថា ការនាំចេញ​ផែ្ន​ក​ពាណិជ្ជកម្ម​អន្តរជាតិ​របស់​ចិន បាន​រក្សា​និន្នាការ​កំណើន​ក្នុង​រយៈពេល៤ខែជាប់ៗគ្នា ដែល​សម្រេចបាន​នូវ​កំណើន២ខ្ទង់​ជា​លើកដំបូង​នៅ​ខែកក្កដា រីឯ​ការនាំ​ចូល​វិញ​ក៏បាន​រក្សា​កំណើន ក្នុង​រយៈពេល​ពីរ ខែជាប់ៗគ្នា​ផងដែរ។ លទ្ធផល​ជា​ផ្លែផ្កា​ដែល​បានទទួល​មក​ដោយ​មិន​ងាយ​នេះ គឺ​ក្រោម​បរិបទ​នៃ​សេដ្ឋកិច្ចពិភពលោក ដែល​ធ្លាក់ចុះ​យ៉ាងធ្ងន់ធ្ងរ និង​សេចក្តីត្រូវការ​ក្នុង​ទីផ្សារ ទទួលរង​ផលប៉ះពាល់ ដែល​បង្ហាញ​យ៉ាង​ពេញលេញ​នូវ​ភាព​ធន់​ដ៏​រឹងមាំ​នៃ​សេដ្ឋកិច្ច​ចិន។

ក្រោម​បរិបទ​នៃ​បរិយាកាស​អន្តរជាតិ និង​ការរីក​រាលដាល​នៃ​ជំងឺឆ្លង​នៅ​ទូទាំង​ពិភពលោក​មាន​ភាពស្មុគស្មាញ និង​តឹងរ៉ឹង។ វិធានការ​មួយចំនួន​របស់​ប្រទេស​ចិន ដើម្បី​លំនឹង​ពាណិជ្ជកម្ម​អន្តរជាតិ ព្រមទាំង​លទ្ធផល​យ៉ាងច្បាស់​លាស់ ដែល​ទទួលបាន​ដោយ​ប្រទេស​ចិន មិន​ត្រឹម​តែមាន​អំណោយផល ដល់​ការ​ដំណើរការ​ប្រកបដោយ​ស្ថិរភាព​នៃ​ខ្សែសង្វាក់​ឧស្សាហកម្ម និង​ខ្សែសង្វាក់​ផ្គត់ផ្គង់​ពិភពលោក​ទាំងមូល​ប៉ុណ្ណោះ​ទេ ថែមទាំង​បាន​បំពេញ​បំ​ន្ថែ​ម​កម្លាំងចលករ នៃ​ការ​ងើប​ឡើងវិញ​ទៅក្នុង​សេដ្ឋកិច្ចពិភពលោក ដែល​កំពុង​រង​ការខូចខាត​យ៉ាងធ្ងន់ធ្ងរ​ទៀតផង៕

ក្រុង​ពាណិជ្ជកម្ម​ភ្នំ​តូច​កំពុង​ទាក់ទាញ​ចំណាប់អារម្មណ៍​យ៉ាងខ្លាំង​លើស​ការរំពឹងទុក

ដោយៈ រ៉ា​ណេ​ត

ភ្នំពេញៈ ក្រុង​ពាណិជ្ជកម្ម​ភ្នំ​តូច កំពុង​លេច​រូបរាង​ឡើងលើ​ផ្ទៃដី១០០ហិកតា នៅក្នុង​តំបន់​ប៉ូល​សេដ្ឋកិច្ច​ផ្លូវ៥១ នៃ​ឃុំ​ភ្នំ​តូច ស្រុក​ឧដុង្គ ខេត្តកំពង់ស្ពឺ ដែល​ទទួលបាន​ការចាប់​អារម្មណ៍​យ៉ាងខ្លាំង ពី​សំណាក់​អ្នកវិនិយោគ អាជីវករ និង​សារ​ធា​រណៈ​ជន ព្រោះ​តំបន់​នេះ ស្ថិតក្នុង​ផែនការ​យុទ្ធសាស្ត្រ​អភិវឌ្ឍ​ទីក្រុង និង​កំពុងមាន​ការអភិវឌ្ឍ​ជាច្រើន​របស់​រដ្ឋ​និង​ឯកជន ព្រម​ជាមួយនិង​កត្តា​ភូមិសាស្ត្រ​និង​ប្រជាសាស្ត្រ។

លោក ង៉ឺ​យ ធី តំណាង​ក្រុមហ៊ុន ខេ​អេ​ច​លែ​ន​បាន​មានប្រសាសន៍​ឲ្យ​ដឹង​កាលពី​ថ្ងៃទី១៧ សីហា​កន្លងមក​ថា ដោយបាន​ឆ្លងកាត់​ការសិក្សា អំពី​តម្រូវការ​របស់​អតិថិជន និង​ចរន្ត​នៃ​ការអភិវឌ្ឍ ព្រមទាំង​មាន​ចក្ខុវិស័យ​ច្បាស់លាស់ ក្រុមហ៊ុន​ខេ​អេ​ច​លែ​ន បានផ្ដល់​ការប្រឹក្សា ក្នុងការ​អភិវឌ្ឍ​ក្រុង​ពាណិជ្ជកម្ម​ភ្នំ​តូច​នេះ​ឡើង ដើម្បី​ផ្ដល់ឱកាស​ចំណេញ​ជូន​អតិថិជន និង​រួមចំណែក​អភិវឌ្ឍ​តំបន់​សេដ្ឋកិច្ច​ផ្លូវ៥១ ឱ្យ​កាន់តែ​រីកចំរើន​ឆាប់រហ័ស។

លោក​ង៉ឺ​យ ធី បាន​បន្ត​ឱ្យដឹងទៀតថា “ក្រុង​ពាណិជ្ជកម្ម​ភ្នំ​តូច​ដ៏​មាន​សក្ដានុពល​នេះ បានទទួល​ការចាប់អារម្មណ៍​យ៉ាងខ្លាំង ពី​គ្រ​ប់ម​ជ្ឍ​ដ្ឋា​ន​លើស​ការរំពឹងទុក ព្រោះ​នៅក្នុង​គម្រោង​មានការ​អភិវឌ្ឍ​ជាច្រើន ដូចជា មជ្ឍមណ្ឌល​ពាណិជ្ជកម្ម ផ្សារ ផ្ទះ​អាជីវកម្ម វីឡា និង​ដី​ឡូ​តិ៍ និង​ទីធ្លារ​សម្រាប់​រៀបចំ​កម្ម​វិធី និង​ពិព័រណ៍​ពាណិជ្ជកម្ម” ។ លោក​បន្តថា “មិន​ត្រឹមតែ​ប៉ុណ្ណោះ ទីតាំង​ទីក្រុង​ពាណិជ្ជ​កម្មនេះ ក៏​ហ៊ុ​ព័ទ្ធ​ទៅដោយ​ផ្លូវសំខាន់ៗជាច្រើន ជាពិសេស​ផ្លូវជាតិ៥១” ។

ផ្លូវជាតិ​លេខ៥១ ជា​ផ្លូវ​ក្រវ៉ាត់​ក្រុង​នាពេល​អនាគត និង​ជា​ផ្លូវ​សរសៃឈាម​សេដ្ឋកិច្ច​ដ៏​សំខាន់ ត​ភ្ជាប់​គ្នា​រវាងផ្លូវ​ជាតិ​លេខ៣ លេខ៤ និង​លេខ៥ ដែល​អាច​ដឹកជញ្ជូន​ទំនិញ​ទៅមក ពី​ខេត្តកំពត កំពង់ផែ​អន្តរជាតិ​ខេត្ត​ព្រះសីហនុ ខេត្តកោះកុង ខេត្តកំពង់ស្ពឺ និង ច្រកព្រំដែន​កម្ពុជា​ថៃ។ មិន​ត្រឹមតែ​ប៉ុណ្ណោះ ផ្លូវជាតិ​លេខ៥១ ក៏​ជាប់​នឹង​ផ្លូវ​ល្បឿន​លឿន​ពី​ភ្នំពេញ​ទៅ​ខេត្ត​ព្រះសីហនុ ដែល​ផ្ដល់​ភាពងាយស្រួល​ដល់​ការដឹកជញ្ជូន ជួយ​កាត់បន្ថយ​ការចំណាយ​និង​ចំណេញ​ពេលវេលា។

ម្យ៉ាងវិញទៀត នៅ​ជុំវិញ​ក្រុង​ពាណិជ្ជកម្ម​ភ្នំ​តូច មាន​សួន​ឧស្សា​កម្ម​កាណាឌីយ៉ា​ទំហំ៥០០ហិកតា​របស់​អ្នកឧកញ៉ា​ពុង ឃាវ​សែ មាន​ផែស្ងួត មាន​រោងចក្រ សហគ្រាសធំៗ ឃ្លាំង​ផ្ទុកទំនិញ​នានា ក៏ដូចជា​គម្រោង​អភិវឌ្ឍ​លំនៅដ្ឋាន​ជាដើម ដែល​ជួយ​ជម្រុញ​សេដ្ឋកិច្ច​កាន់តែ​រីកចំរើន។

លោក វ៉ី សំណាង អភិបាលខេត្ត​កំពង់ស្ពឺ បាន​មានប្រសាសន៍ ថា ខេត្តកំពង់ស្ពឺ​បាន​កែប្រែ​មុខមាត់​ថ្មី ក្លាយជា​ខេត្ត​ដែលមាន​សក្ដានុពល​ផ្នែក​ឧស្សាហកម្ម ក​សិ​ឧ​ស្សហកម្ម ពាណិជ្ជកម្ម សេវាកម្ម និង​ទេសចរណ៍​ជាដើម។

នៅ​ទូទាំង​ខេត្តកំពង់ស្ពឺ មាន​រោងចក្រ សហគ្រាស​ចំនួន១៦១រោងចក្រ ក្នុងនោះ រោងចក្រ​កំពុងដំណើរការ​ចំនួន១៤៣ និង១៨ទៀត​កំពុង​សាងសង់  និង​ប្រើប្រាស់​កម្លាំង​ពលកម្ម​សរុប១២០,៧៣៤ នាក់។ ចំណែក​វិស័យ​សហគ្រាស​ធុន​តូច មធ្យម និង​សិប្បកម្ម​មាន​សរុប​ចំនួន១ ៥០៨មូលដ្ឋាន ប្រើ​កម្លាំង​ពលកម្ម​សរុប១៣, ៣៩៥ នាក់។

លោក ង៉ឺ​យ ធី តំណាង​ក្រុមហ៊ុន ខេ​អេ​ច​លែ​ន បាន​បញ្ជាក់ថា សម្ទុះ​នៃ​ការអភិវឌ្ឍ​ដ៏​មាន​សក្ដានុពល​ទាំងនេះ គឺជា​មូល​ហេតុដែល​ធ្វើឱ្យ​ក្រុង​ពាណិជ្ជកម្ម​ភ្នំ​តូច ទទួលបាន​ការចាប់អារម្មណ៍ និង​គាំទ្រ​យ៉ាងខ្លាំង​ពី​សំណាក់​អតិថិជន ដើម្បី​ចាប់យក​ឱកាស​ចំណេញ​ដ៏​ច្រើន​សន្ធឹកសន្ធាប់​នេះ៕

សម្ដេច​តេ​ជោ បង្ហាញ​ពី​មោទនភាព​លើ​ការអភិវឌ្ឍន៍​វិស័យ​អចលនទ្រព្យ​នៅតាម​បណ្តា​ខេត្ត

ដោយ ៖ រ៉ា​ណេ​ត

ភ្នំពេញ ៖ សម្ដេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា​បានបង្ហាញ​ពី​មោទនភាព​ចំពោះ​សមិទ្ធផល​ដែល​សម្រេចបាន​នៅ​កម្ពុជា ខណៈដែល​ប្រទេស​ជាច្រើន​នៅលើ​ពិភពលោក​កំពុង​ប្រឈម​នឹង​វិបត្តិ​សេដ្ឋកិច្ច ជាពិសេស​វិស័យ​សំណង់​នៅ​ទូទាំងប្រទេស​មានការ​អភិវឌ្ឍ​ន៍​ឥតឈប់ឈរ ទាំង​នៅក្នុង​រាជធានី​ភ្នំពេញ ក៏ដូចជា​នៅតាម​បណ្តា​ខេត្ត​ផងដែរ។

សម្ដេច​តេ​ជោ ហ៊ុន សែន បាន​សរសេរ​នៅលើ​បណ្តាញ​សង្គម​ផ្លូវការ​នា​ថ្ងៃទី១៨ ខែសីហា ឆ្នាំ២០២០នេះ​ថា ក្នុង​កាលៈទេសៈ​ដែល​ប្រទេស​កម្ពុជា​កំពុងតែ​ប្រឈម​នឹង​ការប្រយុទ្ធប្រឆាំង​ជំងឺឆ្លង​រាតត្បាត Covid-19 ការអភិវឌ្ឍ​ប្រទេស​ក៏​កំពុងតែ​ដំណើរការ​ទៅមុខ​ជាធម្មតា​ក្នុងនោះ​វិស័យ​សំណង់​កំពុងតែ​មានការ​រីកចម្រើន​គួរឱ្យកត់សំគាល់។

សម្ដេច​តេ​ជោ បាន​បន្តទៀតថា “ក្នុង​រយៈពេល​ជាង ១០ឆ្នាំ​ចុង​ក្រោយនេះ វិស័យ​សំណង់​នៅក្នុង​ប្រទេស​កម្ពុជា​បាន​បន្ត​រីកចម្រើន​ទាំង​នៅ​រាជធានី​ភ្នំពេញ និង​តាម​បណ្តា​ខេត្ត​មួយចំនួនទៀត គឺ​សុទ្ធសឹងតែ​បានបង្ហាញ​ពី​តួលេខ​អភិវឌ្ឍន៍​កើនឡើង​ជាមួយនឹង​សំណង់​អគារ​លំនៅដ្ឋាន​ខុន​ដូ , អា​ផាត​មិន , សំណង់​អគារ​ពាណិជ្ជកម្មខ្ពស់ៗ និង​សំណង់​លំនៅដ្ឋាន​លក្ខណៈ​បុរី​ជាដើម” ។

ជាមួយគ្នានេះ​ផងដែរ សម្ដេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា ក៏បាន​បង្ហាញ​ពី​ភាពជឿជាក់​ផងដែរ​ថា “ការសាងសង់​អគារខ្ពស់ៗជា​សូចនាករ​នៃ​ភាព​រីកចម្រើន​ផ្នែក​សេដ្ឋកិច្ច ហើយ​នៅពេល​ខាងមុខ​កម្ពុជា​យើង​នឹងមាន​អាគារខ្ពស់ៗបន្ថែមទៀត​ទាំង​ទីក្រុង​ភ្នំពេញ និង​តាម​បណ្ដា​ខេត្ត” ។

ទោះបី​ការកសាង​ផ្នែក​សំណង់​នេះ​កំពុងតែ​បោះជំហាន​ទៅមុខ ហើយ​តម្រូវការ​បុគ្គលិក ឬក៏​កម្មករ​ជាច្រើន​យ៉ាងណាក៏ដោយ  សូម​ម្ចាស់​ក្រុមហ៊ុន  ឬ​ម្ចាស់​ការដ្ឋាន  សូម​យកចិត្តទុកដាក់​ថែរក្សា​សុខភាព​បុគ្គលិក​កម្មករ​ឲ្យ​យល់​អំពី​របៀប​នៃ​ការថែរក្សា​សុខភាព​ជាពិសេស ការថែរក្សា​កុំឱ្យ​មាន​ឆ្លង​ជំងឺ Covid-19 ត្រូវមាន​ការលាង​សម្អាត​ដៃ មាន​ម៉ាស​ពាក់​ឲ្យ​បាន​ត្រឹមត្រូវ​ក្នុងករណី​ចាំបាច់​និង​ដើម្បី​ចៀសវាង​ការឆ្លង​ពី​ម្នាក់​ទៅ​ម្នាក់ ពីព្រោះ​ការដ្ឋាន​សំណង់​មាន​បុគ្គលិក​កម្មករ​ធ្វើការ​ច្រើន។ សូម​យកចិត្តទុកដាក់​ថែរក្សា​បុគ្គលិក​កម្មករ​កុំឱ្យ​ឆ្លង​ជំងឺ  Covid-19 ។

គិត​ត្រឹម​ដើម​ឆមាស​ទី២នៃ​ឆ្នាំ២០២០ ទុនវិនិយោគ​នៅក្នុង​វិស័យ​សំណង់​នៅ​ទូទាំងប្រទេស​កម្ពុជា បាន​បន្ត​កើនឡើង​រហូតដល់​ជិត ៤០០០លាន​ដុល្លារ លើ ២៥២២គម្រោង ដែលមាន​ផ្ទៃក្រឡា​សំណង់​សរុប​ជាង៨,៦លាន​ម៉ែត្រការ៉េ។

យោងតាម​របាយការណ៍​របស់​ក្រសួង​រៀបចំ​ដែនដី នគរូបនីយកម្ម និង​សំណង់ បានបង្ហាញ​នៅ​ថ្ងៃទី៦ ខែកក្កដា ឆ្នាំ២០២០នេះ បានឱ្យដឹងថា បើ​ធៀប​នឹង​រយៈពេល​ដូចគ្នា​កាលពី​ឆ្នាំ២០១៩ មាន​ចំនួន ២ ០៤៧ គម្រោង លើ​ផ្ទៃក្រឡា​សរុប​ប្រមាណ ៣,៧លាន​ម៉ែត្រការ៉េ ដែលមាន​តម្លៃ​ប៉ាន់ស្មាន​លើ​ទុនវិនិយោគ​ជិត ៣៣៩២ លាន​ដុល្លារ មានការ​កើនឡើង​ចំនួន ១៣, ២៦ ភាគរយ។

របាយការណ៍​ដដែល​បាន​បន្តថា សម្រាប់​ដែន​សមត្ថកិច្ច​ក្រសួង​រៀបចំ​ដែនដី នគរូបនីយកម្ម និង​សំណង់ បានចេញ​លិខិតអនុញ្ញាត​ចំនួន ២០៧ គម្រោង មាន​ផ្ទៃក្រឡា​សំណង់​ប្រមាណ​ជាង ៦ លាន​ម៉ែត្រការ៉េ ដែលមាន​តម្លៃ​ទុនវិនិយោគ​ប្រមាណ​ជាង ៣០៦៧ លាន​ដុល្លារ​អាមេរិក បើ​ធៀប​នឹង​ឆមាស​ទី១ ឆ្នាំ២០១៩ មាន​ចំនួន ១៥៤ គម្រោង លើ​ផ្ទៃក្រឡា​សំណង់​សរុប​ជិត ៦,៣ លាន​ម៉ែត្រការ៉េ ដែលមាន​តម្លៃ​ទុនវិនិយោគ​ប្រមាណ ៣០៧៤ លាន​ដុល្លារ គឺមាន​ការថយចុះ​ប្រមាណ ០,២១ ភាគរយ ។

សម្រាប់​ដែន​សមត្ថកិច្ច​រដ្ឋបាល-រាជធានី​ខេត្ត មាន​ចំនួន​សរុប ២៣១៥ គម្រោង មាន​ផ្ទៃក្រឡា​សំណង់ ២,២លាន​ម៉ែ​ក្រ​ការ៉េ ដែលមាន​តម្លៃ​ទុនវិនិយោគ ៧៧៤ លាន​ដុល្លារ ។ បើ​ធៀប​នឹង​ឆមាស​ឆ្នាំ២០១៩ មាន​ចំនួន ១៨៩៣ គម្រោង មាន​ផ្ទៃក្រឡា​សំណង់​ចំនួន​ជាង ១ លាន​ម៉ែត្រការ៉េ មានតម្លៃ​ទុនវិនិយោគ ៣១៨ លាន​ដុល្លារ កើនឡើង​ប្រមាណ ១៤៣,២៨ ភាគរយ៕

គម្រោង​សាងសង់​ផ្លូវ​ក្រវ៉ាត់​ក្រុង​ទី៣ កំពុងដំណើរការ​តាម​ការគ្រោងទុក

ដោយ វុត្ថា

ភ្នំពេញ៖ គម្រោង​សាងសង់​ផ្លូវ​ក្រវ៉ាត់​ក្រុង​ទី៣ នៅតែ​បន្ត​ដំណើរការ​ទៅមុខ បើទោះបី​កម្ពុជា​កំពុង​ប្រឈម​ទៅនឹង​វិបត្តិ​ជំងឺ​កូ​វីដ-១៩ យ៉ាងណាក្តី ខណៈ​បច្ចុប្បន្ននេះ សម្រេចបាន​លទ្ធផល​ប្រមាណ​ជាង ៤០ភាគរយ ។

លោក វ៉ា​ស៊ីម សូរិយា អ្នកនាំពាក្យ​ក្រសួង​សាធារណការ និង​ដឹកជញ្ជូន បាន​ប្រាប់​គេហទំព័រ propertyarea.asia  ថ្មីៗនេះ​ថា រាល់​គម្រោង​សាងសង់​ហេ​ដ្ឋ​រចនាសម្ព័ន្ធ​ទាំងអស់​នៅ​កម្ពុជា ជាពិសេស​គម្រោង​ផ្លូវ​ក្រវ៉ាត់​ក្រុង​ទី៣ នាពេល​បច្ចុប្បន្ននេះ កំពុងដំណើរការ​ដោយ​រលូន និង​អាច​បញ្ចប់​ទៅតាម​ផែនការ និង​ការគ្រោងទុក។

លោក​បន្តថា គម្រោង​សាងសង់​ផ្លូវ​ក្រវ៉ាត់​ក្រុង​ទី៣ នេះ សាងសង់​ដោយ​ក្រុមហ៊ុន​ចិន ហើយ​ក្រុមហ៊ុន​ចិន​ជាធម្មតា គឺ​អនុវត្ត​លឿន ជាង​ការរំពឹងទុក ដែល​រហូតមក​ដល់ពេលនេះ ជា​លទ្ធផល​នៃ​ការសាងសង​ផ្លូវ​ក្រវ៉ាត់​ក្រុង​ទី៣ នៅតែ​បន្តដំណើរ​ទៅមុខ។

លោក​បន្តថា “យើង​បាន​ពិនិត្យឃើញថា ក្រុមហ៊ុន​សាងសង់​បាន​គោរព​តាម​បទដ្ឋាន​ស្តង់ដារ ទាំង​គុណភាព​បេតុង​នៃ​ទម្រ​ជើង​សសរស្ពាន​អាកាស ទាំង​គុណភាព​ផ្លូវ ដែល​អាច​ទ្រទ្រង់​ទម្ងន់​យាន​ចរាចរណ៍​ចំរុះ​បាន​រហូតដល់២០ឆ្នាំ ស្របទៅតាម​ផែនការមេ ដែល​ចាប់​អនុវត្ត​នៅ​ប៉ែក​ខាងលិច​ក្រុង​លើកដំបូង ដើម្បី​ជួយ​សម្រួល​ដល់​ការកកស្ទះ​ចរាចរណ៍​នៅក្នុង​ក្រុង ជាពិសេស​ផ្លូវ​វេ​ង​ស្រេង ផ្លូវ​ទួល​ពង្រ ហើយ​ថែមទាំង​ជួយ​សម្រួល​ដល់​ការធ្វើដំណើរ និង​ដឹកជញ្ជូន​ត្រង់​ចេញពី​ក្រុងព្រះសីហនុ​ឆ្ពោះទៅកាន់​តំបន់​ព្រំដែន​ក្រុង​បាវិត ដោយ​បំបែក​ចេញពី​ចំណុច​ដើមផ្លូវ​ក្រវ៉ាត់​ក្រុង​ទី៣នៃ​ផ្លូវជាតិ​លេខ៤ នឹង​ចុះទៅ​ផ្លូវជាតិ​លេខ១” ។

ផ្លូវ​ក្រវាត់ក្រុង​ខ្សែ​ទី៣ គឺជា​ផ្លូវ​ដ៏​សំខាន់​ក្នុង​ការជួយ​កាត់បន្ថយ​ការកកស្ទះ និង​ជួយ​សម្រួល​ចរាចរណ៍​ក្នុង​រាជធានី​ភ្នំពេញ ម្យ៉ាងទៀត​គឺជា​ការតភ្ជាប់​ផ្ទៃក្នុង និង​សមាហរណកម្ម​តំបន់ ពិសេស​ត​ភ្ជាប់​ផ្លូវ​អាស៊ាន​ហាយវ៉េ និង​ផ្លូវ​របៀង​សេដ្ឋកិច្ចសំខាន់ៗ របស់​មហា​អនុតំបន់​មេគង្គ។ រួមចំណែក​ក្នុងការ​សម្រួល​ការដឹក​ជញ្ជូន​ឆ្លងកាត់​ព្រំដែន ជំរុញ​ពាណិជ្ជកម្ម​អន្តរជាតិ និង​ប្រែក្លាយ​ទឹកដី​ដែល​នៅ​សងខាង​ផ្លូវ​ខ្សែ​ក្រវាត់ក្រុង​នេះ ទៅជា​តំបន់​អភិវឌ្ឍ​ថែមទៀត​ផង។

ផ្លូវ​នេះ​មួយ​ខ្សែ​នេះ ត្រូវ​ស្ថាបនា​ផ្លូវ​ដោយមាន​ប្រវែង​សរុប៤៧.៦គីឡូម៉ែត្រ ជា​ប្រភេទ​ផ្លូវ៤គន្លង ដោយមាន​ទទឹង​តួ​ផ្លូវ​សរុប២៥ម៉ែត្រ សម្រាប់​ផ្លូវ​រថយន្ត៤គន្លង មាន​ទទឹង៣.៥០ម៉ែត្រ /គន្លង និង​ផ្លូវ​ទោចក្រយានយន្ត២គន្លង ទទឹង២.២៥ ម៉ែត្រ/គន្លង ដោយ​ចាប់ ពី​ផ្លូវជាតិ​លេខ៤ ម្តុំ​អូរ​ដឹ​ម ត្រង់​គីឡូម៉ែត្រ​លេខ ១៤+ ១០៥ ទៅ​ចំណុច​បញ្ចប់​ភ្ជាប់​នឹង​ផ្លូវជាតិ​លេខ១ ត្រង់​គីឡូម៉ែត្រ​លេខ ២៤+៨៤០ ដោយ​ត្រូវ​ង​កាត់​ផ្លូវជាតិ​លេខ ៣ត្រង់ ចំណុច​គីឡូម៉ែត្រ លេខ២១+២០០កាត់​ផ្លូវជាតិ លេខ២ ត្រង់ចំណុច​គីឡូម៉ែត្រ​លេខ ២២+៨០០ និង​កាត់​ផ្លូវ ជាតិ​លេខ២១ត្រង់ចំណុច​គីឡូម៉ែត្រ​លេខ ១៨+ ៤០០ និង​ផ្លូវ​ខ្នែង​ប្រវែង ៥.៣៧គីឡូម៉ែត្រ។

ក្រសួង​សាធារណការ និង​ដឹកជញ្ជូន ក្នុងនាម​រាជរដ្ឋាភិបាល​កម្ពុជា​បាន ចុះកិច្ចសន្យា​សាងសង់ ជាមួយ​ក្រុមហ៊ុន​សំណង់​សៀង​ហៃ​ចិន ក្នុងការ​អនុវត្ត​ការងារ​សាងសង់​ផ្លូវ​ក្រវ៉ាត់​ក្រុង​ទី៣ នេះ ដែល​នឹងមាន​ការត្រួតពិនិត្យ​ប​ច្ចក​ទេស​ដោយ​ក្រុមហ៊ុន ក្វាង​ចូ​វ​វ៉ាន់​អាន មកពី​ប្រទេស​ចិន​ផងដែរ។

ផ្លូវ​ក្រវ៉ាត់ ក្រុង​ទី៣នេះ ជា​ខ្សែ​ផ្លូវ​ថ្មី​មួយ ដែល​ត​ភ្ជាប់​ផ្លូវជាតិសំខាន់ៗរបស់​ប្រទេស​កម្ពុជា ដោយ​ចាប់ពី​ស្ពាន​ព្រែក​ព្នៅ​ផ្លូវជាតិ​លេខ៥ ឆ្លង​មក​ផ្លូវជាតិ​លេខ៤ (កំណាត់​ផ្លូវ​នេះ​បាន​សាងសង់​រួចរាល់​ហើយ ដោយ​សាលា​រាជធានី​ភ្នំពេញ) ភ្ជាប់​មក​ផ្លូវជាតិ​លេខ៣ ផ្លូវជាតិ​លេខ២ ផ្លូវជាតិ​លេខ២១ និង ផ្លូវជាតិ​លេខ១ ដោយ​ភ្ជាប់​ទៅនឹង​កំពង់ផែ​ភ្នំពេញ​ថ្មី ដែល បាន​សាងសង់ឡើង ក្រោម​ក្របខ័ណ្ឌ​ឥណទាន​សម្បទាន ពី សាធារណរដ្ឋ​ប្រជាមានិត​ចិន​ដូចគ្នា។ ផ្លូវ​ក្រវាត់ក្រុង​ទី៣នេះ មាន​ចម្ងាយ​ត្រឹមតែ​ជាង១គីឡូម៉ែត្រ​ពី​គម្រោង​ព្រលានយន្តហោះ៕

សារ​ព្រមាន៖ អ្នកដើរ​កម្សាន្ត​តាម​កោះ និង​តំបន់ភ្នំ​ត្រូវ​បង្កើន​ការប្រុងប្រយ័ត្ន​ដោយសារ​លក្ខខណ្ឌ​អាកាសធាតុ​មិន​អំណោយផល

ដោយ ៖ សូរិយា

ភ្នំពេញ ៖ មន្ត្រី ជាន់ខ្ពស់​ក្រសួង​ធនធានទឹក និង​ឧតុនិយម បានធ្វើការ​ក្រើនរំលឹក​ដល់​ទេសចរ​ជាតិ និង​អន្តរជាតិ ដែល​ធ្វើដំណើរ​កម្សាន្ត​នៅតាម​តំបន់​កោះ និង​ភ្នំ​នានា ត្រូវ​បង្កើន​ការប្រុងប្រយ័ត្ន​ឱ្យបាន​ខ្ពស់​ដោយសារ​អាច​ប្រឈម​នឹង​អាកាសធាតុ​សម្ពាធ​ទាប ដែល​បណ្តាលមកពី​កូន​ព្យុះ​មកពី​សមុទ្រ​ខាងត្បូង។

អ្នកនាំពាក្យ​ក្រសួង​ធនធានទឹក និង​ឧតុនិយម លោក ចាន់ យុ​ត្ថា បាន​មានប្រសាសន៍ ថា សម្ពាធ​ទាប​សកម្ម ACTIV LOW ដែល​បាន​កើតមាន​នៅលើ​ភាគ​ខាងជើង​ប្រទេស​ហ្វីលីពីន​នឹង​វិ​វត្ត​ទៅជា​វិ​សម្ពាធ TD នៅ​យប់​ដើម​ថ្ងៃទី១៨ខែសីហា ឆ្នាំ២០២០ ។ ពេល​ដើរ​ចូលដល់​ក្នុង​សមុទ្រ​ចិន​ខាងត្បូង​នឹង​អាច​ក្លាយទៅជា​កូន​ព្យុះ​ទី៧មាន​ទិសដៅ​ឡើងគោក​នៅ​ចន្លោះ​ប្រទេស​ចិន​និង​កោះ​ហៃណាំ​នៅ​ថ្ងៃទី២០ខែសីហា។

លោក​ចាន់ យុ​ត្ថា បាន​ប្រាប់​ឱ្យដឹងទៀតថា​បាតុភូធធម្មជាតិ​ខាងលើ​មានដំណើរ​លឿន​ដូចជា​ព្យុះ​ទី៤ តែ​គ្មាន​កម្លាំង​ស្រូបខ្យល់​មូសុង​និរតី​ខ្លាំង​នឹង​បង្កឱ្យមាន​ភ្លៀង​ច្រើន​លើ​ផ្ទៃសមុទ្រ​ក្នុងប្រទេស​កម្ពុជា​ទេ​តែ​ធ្វើឱ្យមាន​ភ្លៀង​ធ្លាក់​រាយប៉ាយ​ច្រើន​ទាំង​នៅក្នុង​ប្រទេស​កម្ពុជា និង​តំបន់​ផ្ទៃ​រងទឹក​ភ្លៀង​របស់​អា​ង​ទន្លេមេគង្គ​លើ​នាំឱ្យ​ទឹកទន្លេ​នៅក្នុង​ប្រទេស​កម្ពុជា​បន្ត​ជន់​ឡើង​ថែម​ជាថ្មី។

ក្រសួង​ធនធានទឹក និង​ឧតុនិយម នៅ​ថ្ងៃទី១៨ខែសីហា​ឆ្នាំ២០២០នេះ បាន​ជូនដំណឹង ស្តីពី​ស្ថានភាព​អាកាសធាតុ​សម្រាប់​ពីថ្ងៃ​ទី១៩ដល់​ថ្ងៃទី២៥ខែសីហា​ថា​ប្រទេស​កម្ពុជា​ទទួលរង​ឥទ្ធិពល​ពី​ជ្រលង​នៃ​ប្រព័ន្ធ​សម្ពាធ​ទាប​អូស​កាត់​លើ​ប្រទេស​ថៃ ឡាវ និង​ប្រទេស​វៀតណាម ខណៈពេល​សម្ពាធ​ទាប​សកម្ម​ក្នុង​សមុទ្រ​នៅ​ខាងត្បូង​ក្លាយជា​កូន​ព្យុះ​ទី៧មានដំណើរ​ឡើងគោក​ន​ភាគខាងត្បូង​ប្រទេស​ចិន​នៅ​ថ្ងៃទី២០ខែសីហា។

ក្នុង​សេចក្តីជូនដំណឹង​បាន​សរសេរ​ទៀតថា​ស្ថានភាព​ដូចខាងលើ​ធ្វើឱ្យ​បណ្តា​ខេត្ត នៅ​តំបន់​វាលទំនាប​កណ្តាល​មាន​សីតុណ្ហភាព អប្បបរមា​ពី ២៥ទៅ ២៧ អង្សា​សេ សីតុណ្ហភាព​អតិបរមា​មាន​ពី៣០ទៅ៣២អង្សា​សេ។

នៅ​តំបន់​ភាគ​ពាយព្យ​អាចមាន​ភ្លៀង​ធ្លាក់​កម្រិត​ច្រើន។

បណ្តា​ខេត្ត​នៅ​តំបន់​ជួរ​ភ្នំ​ដងរែក និង​ខ្ពង់រាប​ភាគ​ឦសាន​មាន​សីតុណ្ហភាព អប្បបរមា​ពី ២៣ទៅ២៥អង្សា​សេ   សីតុណ្ហភាព​អតិបរមា​មាន​ពី២៨ទៅ៣០អង្សា​សេ អាចមាន​ភ្លៀង​ធ្លាក់​រាយប៉ាយ​ច្រើន។

តំបន់​មាត់សមុទ្រ មាន​សីតុណ្ហភាព អប្បបរមា​ពី ២៦ទៅ២៨អង្សា​សេ   សីតុណ្ហភាព​អតិបរមា​មាន​ពី ២៨ទៅ៣០អង្សា​សេ អាចមាន​ភ្លៀង​ធ្លាក់​ក្នុង​កម្រិត​ពី​ខ្សោយ​ទៅ​មធ្យម។

ការ​ព្យាករ​សម្រាប់​ពីថ្ងៃ​ទី២២ដល់​ថ្ងៃទី២៥ខែសីហា អាច​នឹងមាន​ភ្លៀង​ធ្លាក់​ច្រើន​បាតុភូត​ផ្គរ​រន្ទះ និង​ខ្យល់​កន្ត្រាក់​នៅតែ​បន្ត​កើតមាន សូម​ប្រុងប្រយ័ត្ន៕