ចំណេះដឹង!តើត្រូវធ្វើដូចម្តេចដើម្បីទទួលបានគម្រោងវិនិយោគមានលក្ខណៈ សម្បត្តិគ្រប់គ្រាន់?

ដោយវុត្ថា

ភ្នំពេញៈ អនុលោមតាមច្បាប់ស្តីពីវិនិយោគនៃព្រះរាជាណាចក្រកម្ពុជាមានតែគម្រោងវិនិយោគមានលក្ខណៈសម្បត្តិគ្រប់គ្រាន់ទេដែលមានសិទ្ធិទទួលបាននូវផលប្រយោជន៍ដែលស្ថិតក្នុងក្របខ័ណ្ឌនៃច្បាប់នេះ។

គម្រោងវិនិយោគមានលក្ខណៈសម្បត្តិគ្រប់គ្រាន់ហៅកាត់ថា គ. ល. គមានន័យថាគម្រោងវិនិយោគដែលទទួលបានវិញ្ញាបនបត្រចុះបញ្ជីជាស្ថាពរ។

ដើម្បីទទួលស្គាល់ជាគម្រោងវិនិយោគមានលក្ខណៈ សម្បត្តិគ្រប់គ្រាន់អ្នកវិនិយោ​គ អ្នកវិនិយោគត្រូវដាក់សំណើវិនិយោគ នៅក្រុមប្រឹក្សាអភិវឌ្ឍន៍កម្ពុជា (ក.អ.ក) ឬ អនុគណៈកម្មាធិការវិនិយោគ ខេត្ត រាជធានី និងទទួលបានវិញ្ញាបនបត្រចុះបញ្ជីជាស្ថាពរ។

គម្រោងមានលក្ខណៈសម្បត្តិគ្រប់គ្រាន់នេះ មានបីប្រភេទដូចជាទី១ គម្រោងវិនិយោគមានលក្ខណៈសម្បត្តិគ្រប់គ្រាន់ បម្រើទីផ្សារក្នុងស្រុក ទី២ គម្រោងវិនិយោគមានលក្ខណៈសម្បត្តិគ្រប់គ្រាន់បម្រើឲ្យការនាំចេញ និងទី៣ គម្រោងវិនិយោគ មានលក្ខណៈសម្បត្តិគ្រប់គ្រាន់ដែលជាឧស្សាហកម្មគាំទ្រ៕

តម្លៃដីនៅតំបន់មាត់ព្រែកខេត្តកំពតកំពុងបន្តឡើងថ្លៃ

ដោយ ៖ រ៉ាណេត

កំពត ៖ មិនថាស្ថិតនៅក្នុងស្ថានភាពនៃវិបត្តិសេដ្ឋកិច្ចដែលបណ្តាប្រទេសជាច្រើនកំពុងជួបប្រទះនោះទេ សម្រាប់តែទីផ្សារដីធ្លីនៅក្នុងខេត្តកំពត ដែលជាតំបន់គោលដៅទេសចរណ៍លំដាប់អន្តរជាតិប្រចាំនៅកម្ពុជា ហាក់មិនបានស្រពោននោះឡើយ ផ្ទុយទៅវិញគឺនៅតែមានតម្រូវការ ហើយតម្លៃនៅលើទីផ្សារកាន់តែបន្តកើនឡើងជាលំដាប់ ជាពិសេសនៅជាប់មាត់ព្រែក។

នាយកក្រុមហ៊ុនអភិវឌ្ឍន៍គម្រោងដីឡូតិ៍ TH Land Real Estate លោក វិន ឈុនហ៊ាត បានមានប្រសាសន៍នៅល្ងាចថ្ងៃទី១៤ ខែសីហា ឆ្នាំ២០២០នេះថា នៅក្នុងមួយរយៈពេលចុងក្រោយនេះ ទីផ្សារលក់ដីធ្លីនៅតាមតំបន់មួយចំនួនក្នុងខេត្តកំពតហាក់មានការធ្លាក់ចុះបន្តិច ដែលក្រៅពីឥទ្ធិពលនៃជំងឺ Covid-19 ក៏មានកក្តាអាកាសធាតុចូលរួមផងដែរដូចជាមានភ្លៀងធ្លាក់ច្រើនជាដើម ប៉ុន្តែចំពោះតម្លៃមិនធ្លាក់ចុះនោះទេ។

លោកបានបញ្ជាក់ថា “ចំពោះការលក់ជាក់ស្ដែងនៅក្នុងអំឡុងពេល៣-៤ខែចុងក្រោយនេះគឺមានការធ្លាក់ចុះបន្តិច ប៉ុន្តែតម្លៃដីធ្លី មិនធ្លាក់នោះទេ គឺមានតែបន្តកើនឡើង ហើយតំបន់ជាប់មាត់ព្រែកខ្លះស្ថិតក្នុងស្រុកទឹកឈូ ដែលជាគោលដៅទេសចរណ៍ប្រចាំខេត្តមានតម្លៃចាប់ពីជាង១០០ដុល្លារ រហូតដល់២៥០ដុល្លារក្នុងមួយម៉ែត្រការ៉េក៏មាន ដែលអាស្រ័យទៅតាមស្ថានភាព និងទំហំដី។ សម្រាប់ដីដែលមានចម្ងាយឆ្ងាយពីមាត់ព្រែកប្រមាណជាង១គីឡូម៉ែត្រ អាចនៅត្រឹម២៥-៣៥ដុល្លារក្នុងមួយម៉ែត្រប៉ុណ្ណោះ”។

លោកបញ្ជាក់ថា “ដីស្ថិតនៅជាប់មាត់ព្រែកនៃស្រុកទឹកឈូដូចគ្នា ប៉ុន្តែតម្លៃគឺមានកម្រិតខុសគ្នា គឺអាស្រ័យទៅលើស្ថានភាពដី ទំហំ និងការរៀបចំដី។ ភាគច្រើនដីនៅតំបន់គោលដៅទេសចរណ៍មួយនេះ មិនសូវមានទំនេរធំៗនោះទេ និងមានម្ចាស់ច្រើនគ្នា ប៉ុន្តែអ្នកវិនិយោគ និងអភិវឌ្ឍន៍អាចទិញភ្ជាប់គ្នាបាន ហើយតម្លៃអាស្រ័យលើការចរចាជាមួយម្ចាស់នីមួយៗ”។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ថា “ទឹកដីខេត្តកំពតមិនស័ក្ដិសមទៅនឹងអគារពាណិជ្ជកម្មធំៗនោះទេ ប៉ុន្តែស័ក្ដិសម និងមានសក្ដានុពលទៅលើវិស័យសំណង់បម្រើដល់ទេសចរណ៍ រួមមានដូចជាសណ្ឋាគារ លំនៅដ្ឋានបែបលំហែរ ការអភិវឌ្ឍជាតំបន់ទេសចរធម្មជាតិ បឹងហ្គាឡូ ជាដើម។

លោកស្រីបញ្ជាក់ថា “ក្រៅពីតំបន់ដែលស្ថិតនៅក្បែរជើងភ្នំបូគោ ដែលមានគម្រោងអភិវឌ្ឍន៍ជាទីក្រុងរណបបែបទាន់សម័យដ៏ធំរបស់ក្រុមហ៊ុនសុខា រួមជាមួយនឹងគម្រោងអភិវឌ្ឍន៍បុរីលំនៅដ្ឋានមួយចំនួនទៀតនោះ ក៏មានអ្នកអភិវឌ្ឍន៍ក្នុងស្រុកមួយចំនួនសំឡឹងមើលពីឱកាសនៃការវិនិយោគបន្ថែម ស្របពេលដែលរដ្ឋាភិបាល បាន និងកំពុងយកចិត្តទុកដាក់ធ្វើវឌ្ឍនភាពនៃសោភ័ណភាណខេត្តមួយនេះឱ្យក្លាយទៅជាគោលដៅទេសចរណ៍លំដាប់អន្តរជាតិ”។

លោកស្រីបន្តថា សម្រាប់តម្លៃទីផ្សារដីធ្លីនៅពេលនេះ មិនទាន់ឈានដល់ចំណុចកំពូលនៅឡើយនោះទេ ពោលគឺអាចនៅបន្តកើនឡើង ជាពិសេសក្រោយពេលវិបត្តិនៃជំងឺសាកលត្រូវបានសាបរលាបផុតទៅនៅថ្ងៃខាងមុខនេះ ៕

ក្រុមហ៊ុនAlibaba អាចជាទិសដៅវាយប្រហារថ្មីក្នុងយុទ្ធសាស្ត្រសង្រ្គាមបច្ចេកវិទ្យារបស់លោក Trump

ដោយ ៖ ប៊ី

អន្តរជាតិ ៖ សហរដ្ឋអាមេរិកមានគោលដៅវាយប្រហារក្រុមហ៊ុនបច្ចេកវិទ្យាធំៗបំផុតរបស់ប្រទេសចិន ដូចជា ក្រុមហ៊ុន Huawei និងក្រុមហ៊ុន ByteDance ដែលមានកម្មវិធីTikTok ក្រុមហ៊ុន Tencent ដែលមានកម្មវិធីWeChat ។ ក្រុមហ៊ុន Alibaba ដែលជាក្រុមហ៊ុនលក់រាយ និងលក់ទំនិញតាមអនឡាញធំជាងគេបំផុតនៅលើពិភពលោកអាចនឹងក្លាយជាក្រុមហ៊ុនបន្ទាប់ក្នុងគោលដៅវាយប្រហាររបស់អាមេរិក។

សកម្មភាពប្រឆាំងនឹងក្រុមហ៊ុនចិន កំពុងបង្កើនកម្តៅយ៉ាងខ្លាំង នៃការរុញច្រានរបស់រដ្ឋបាល Trump ប្រឆាំងនឹងសមត្ថភាពបច្ចេកវិទ្យាកំពុងរីកចម្រើនរបស់ទីក្រុងប៉េកាំង ដែលបង្ខំឱ្យអ្នកពាក់ព័ន្ធសកលជ្រើសរើសរវាងចិន និងសហរដ្ឋអាមេរិក។

លោក Alex Capri អ្នកស្រាវជ្រាវមកពីមូលនិធិ Hinrich Foundation និងជាសាស្ត្រាចារ្យជាន់ខ្ពស់នៅសាកលវិទ្យាល័យជាតិសឹង្ហបុរី បានមានប្រសាសន៍ថា “យើងកំពុងស្ថិតក្នុងដំណើរផ្លាស់ប្តូរគំរូមួយ ហើយភូមិសាស្ត្រនយោបាយកំពុងឆ្លងកាត់ការផ្លាស់ប្តូរជាប្រវត្តិសាស្ត្រនាពេលបច្ចុប្បន្ននេះ”។

លោកបានបន្ថែមថា ក្រុមមន្ត្រីក្រុងវ៉ាស៊ីនតោនកំពុងធ្វើការចោទប្រកាន់បន្ថែមទៀតប្រឆាំងនឹងក្រុមហ៊ុនបច្ចេកវិទ្យាចិន ដែលជាការបង្ហាញថា រដ្ឋបាលពិតជាកំពុងសំឡឹងរកការធ្វើឱ្យឧស្សាហកម្មបច្ចេកវិទ្យាបែកបាក់”។

មិនដូចក្រុមហ៊ុន ByteDance ឬក្រុមហ៊ុន Huawei ទេដែលការពង្រីកពិភពលោកត្រូវបានធ្វើឱ្យរអាក់រអួល បន្ទាប់ពីទីក្រុងវ៉ាស៊ីនតោនបានផ្តាច់ក្រុមហ៊ុនទាំងពីរនេះពីប្រើប្រាស់លើទឹកដីអាមេរិក។ ក្រុមហ៊ុន Alibaba (BABA) មិនមានជោគជ័យច្រើនទេក្នុងការពង្រីកទីផ្សារនៅបស្ចិមប្រទេស ប៉ុន្តែការពិតដែលថា ក្រុមហ៊ុន Alibaba ជាក្រុមហ៊ុនដ៏ធំបំផុតមួយរបស់ប្រទេសចិនអាចជាហេតុផលគ្រប់គ្រាន់សម្រាប់ទីក្រុងវ៉ាស៊ីនតោនដើម្បីកំណត់គោលដៅវាយប្រហារ។

ក្រុមហ៊ុន Alibaba មិនទាន់ត្រូវបានគំរាមកំហែងជាមួយនឹងការដាក់ទណ្ឌកម្មដូចគ្នាជាមួយនឹងក្រុមហ៊ុនខាងនោះទេ ដែលប្រធានាធិបតីអាមេរិកលោក ដូណាល់ ត្រាំ បានប្រឆាំងនឹងក្រុមហ៊ុនបច្ចេកវិទ្យាចិនទាំងនេះ ហើយលោក Trump ក៏បាននិយាយដោយឥតលាក់លៀមចំពោះស្ថាបនិកក្រុមហ៊ុនលោក Jack Ma ដោយបានហៅលោកថាជា “មិត្តភក្តិរបស់ខ្ញុំ” កាលពីដើមឆ្នាំនេះ បន្ទាប់ពីមហាសេដ្ឋីចិនរូបនេះបាននិយាយថា លោកនឹងបរិច្ចាគសំភារៈសម្រាប់ប្រយុទ្ធប្រឆាំងនឹងជំងឺរាតត្បាតCOVID-19។
ប៉ុន្តែក្រុមហ៊ុននេះគឺស្ថិតនៅក្នុងគោលដៅរបស់មន្រ្តីអាមេរិក។

រដ្ឋមន្រ្តីក្រសួងការបរទេសលោក Mike Pompeo បានត្រួតពិនិត្យឈ្មោះក្រុមហ៊ុន Alibaba កាលពីសប្តាហ៍មុន នៅពេលដែលលោកបានជំរុញឱ្យក្រុមហ៊ុនអាមេរិកដកបច្ចេកវិទ្យា ដែលគ្រប់គ្រងដោយជនជាតិចិន ដោយមិនទុកចិត្តពីបណ្តាញឌីជីថលរបស់ពួកគេ។
លោក Pompeo បាននិយាយថា ទីក្រុងវ៉ាស៊ីនតោនចង់ការពារ “ព័ត៌មានផ្ទាល់ខ្លួន របស់ជនជាតិអាមេរិក និងកម្មសិទ្ធិបញ្ញាដ៏មានតំលៃបំផុតរបស់អាជីវកម្មរបស់យើង – រួមទាំងការស្រាវជ្រាវវ៉ាក់សាំង Covid-19 ពីការចូលប្រើប្រព័ន្ធអេឡិចត្រនិក ដែលគ្រប់គ្រងដោយក្រុមហ៊ុន” ដូចជា Alibaba និង Tencent (TCEHY) ក្នុងចំណោមក្រុមហ៊ុនដទៃទៀត ។

លោក Capri “ក្រុមហ៊ុនអន្តរជាតិធំៗ កំពុងត្រូវបានជ្រើសរើសជាក្រុមហ៊ុនជាតិ សម្រាប់យុទ្ធសាស្រ្ត ហើយកំពុងត្រូវបានប្រើប្រាស់ ដោយមិនគិតពីថាតើពួកគេចូលចិត្តឬអត់”។
ក្រុមហ៊ុនដូចជា Alibaba ត្រូវបានចិញ្ចឹមបីបាច់ថែរក្សាដោយប្រទេសចិន ហើយពួកគេកាន់កាប់ចំណែកទីផ្សារដោយមិនចាំបាច់ប្រកួតប្រជែងជាមួយក្រុមហ៊ុនបរទេស”៕ CNN

លោកឧបនាយករដ្ឋមន្ត្រី ហោ ណាំហុង ជំរុញឱ្យកម្ពុជា- អូស្ត្រាលីបង្កើនទំហំពាណិជ្ជកម្មទ្វេភាគីបន្ថែមទៀត

ដោយ ៖ វុត្ថា

ភ្នំពេញ ៖ ឧបនាយករដ្ឋមន្ត្រីនៃកម្ពុជា លោក ហោ ណាំហុង បានជម្រុញដល់រដ្ឋាភិបាលអូស្ត្រាលី បង្កើនទំហំពាណិជ្ជកម្មទ្វេភាគីជាមួយកម្ពុជាបន្ថែមទៀត ខណៈពាណិជ្ជកម្មនៃប្រទេសទាំងពីរ នៅមានកម្រិត និងមិនសមស្រប ទៅនឹងសក្ដានុពល ដោយនៅឆ្នាំ២០១៩ មានត្រឹមតែ២៤៩លានដុល្លារអាមេរិកប៉ុណ្ណោះ។

លោក ហោ ណាំហុង ឧបនាយករដ្ឋមន្ត្រីនៃកម្ពុជា នៅក្នុងជំនួបជាមួយ លោក Pablo Kang ឯកអគ្គរដ្ឋទូតអូស្រ្តាលីប្រចាំនៅកម្ពុជា កាលពីថ្ងៃទី ១៣ ខែសីហា ឆ្នាំ ២០២០ម្សិលមិញនេះ បានស្នើឲ្យជញ្ជីងពាណិជ្ជកម្មរវាងប្រទេសទាំងពីមានសកម្ម និងមានទំហំធំជាងនេះ។

លោកឧបនាយករដ្ឋមន្ត្រីក៏អំពាវនាវឲ្យសហគ្រាសអូស្ដ្រាលីដាក់ទុនវិនិយោគនៅកម្ពុជា ជាពិសេស លើវិស័យកសិកម្ម និងទេសចរណ៍ក្រោយពីជំងឺ Covid-19 បានស្ងប់ស្ងាត់ទៅនាពេលខាងមុខមុខនេះផងដែរ។

លោកឧបនាយករដ្ឋមន្ត្រីបានបន្ថែមថា ទំនាក់ទំនងការទូតកម្ពុជា-អូស្ដ្រាលីបានភ្ជាប់តាំងពីឆ្នាំ១៩៥២ គឺមុនកម្ពុជាទទួលបានឯករាជ្យពីបារាំង។ លោក ហោ ណាំហុងបន្តថា តាំងពីនោះមកអូស្ដ្រាលីតែងតែបានផ្ដល់ជំនួយមកកម្ពុជាជារៀងរាល់ឆ្នាំព្រមទាំងផ្ដល់អាហារូបករណ៍ឲ្យនិស្សិត និងមន្ត្រីកម្ពុជាទៅសិក្សា និងកម្មសិក្សានៅអូស្ដ្រាលី។

ឯកអគ្គរដ្ឋទូតអូស្រ្តាលីប្រចាំនៅកម្ពុជា លោក Pablo Kang បានឱ្យដឹងថា អូស្រ្ដាលីបានផ្ដល់ជំនួយដល់ក្រសួងសុខាភិបាលនូវសម្ភារៈ និងរថយន្ដពេទ្យ ដើម្បីទប់ស្កាត់នឹងជំងឺ Covid-19 និងបានថ្លែងសរសើររាជរដ្ឋាភិបាលកម្ពុជា ចំពោះកម្មវិធីឧបត្ថម្ភសាច់ប្រាក់ដល់ប្រជាជនក្រីក្រ កម្មករ និងកម្មការិនី។

ឆ្លើយតបទៅនឹងការស្នើរបស់លោកឧបនាយករដ្ឋមន្ត្រី ហោ ណាំ ហុង លោក Pablo Kang ឱ្យដឹងថា អូស្ត្រលីចង់ជំរុញការវិនិយោគលើវិស័យថាមពល និងការនាំយកអង្ករក្រអូបកម្ពុជាទៅអូស្ដ្រាលី ខណៈកម្ពុជាមានសក្តានុពលចំពោះវិស័យកសិកម្ម៕

ប្រធាន CVEA អំពាវនាវឱ្យម្ចាស់អចលនវត្ថុប្រើប្រាស់សេវាភ្នាក់ងារស្របច្បាប់ ជៀសវាងខាតបង់ទ្រព្យ

ដោយ ៖ រ៉ាណេត

ភ្នំពេញ ៖ ក្រោមការសម្លឹងឃើញពីឱកាសនៃការទទួលបានចំណូលខ្ពស់ពីទីផ្សារអចលនទ្រព្យនៅកម្ពុជា បច្ចុប្បន្នមានក្រុមហ៊ុនជាតិ និងអន្តរជាតិជាច្រើន ក៏ដូចជាភ្នាក់ងារលក្ខណបុគ្គល បាន និងកំពុងជ្រៀតចូលនៅក្នុងទីផ្សារមួយនេះជាច្រើន។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍តាមទូរស័ព្ទនៅថ្ងៃទី១៤ ខែសីហា ឆ្នាំ២០២០នេះថា បច្ចុប្បន្នមានមនុស្សកាន់តែច្រើនងាកមកចាប់អារម្មណ៍នឹងទីផ្សារអចលនទ្រព្យ ដោយសារតែវិស័យមួយនេះនៅមានឱកាសច្រើនក្នុងការទទួលបានចំណូល និងផលចំណេញពីការវិនិយោគ។

លោក ច្រឹក សុខនីម បានបញ្ជាក់ថា “នៅក្នុងទីផ្សាររួម សព្វថ្ងៃនេះមានក្រុមហ៊ុនដែលដើរតួជាភ្នាក់ងារជំនាញក្នុងវិស័យអចលនទ្រព្យកម្ពុជាស្របច្បាប់ ដោយមានការចុះបញ្ជីត្រឹមត្រូវនៅក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ ដែលចំនួនទាំងនេះមិនបានរាប់បញ្ចូលបុគ្គលមួយចំនួនទៀតដែលបង្កើតជាក្រុមបម្រើដល់វិស័យនេះនៅឡើយ”។

លោកបន្តថា “វិស័យអចលនទ្រព្យនៅកម្ពុជា គឺនៅមានភាពទូលំទូលាយច្រើន ដែលត្រឹមចំនួនក្រុមហ៊ុនបម្រើសេវាក្នុងនាមជាភ្នាក់ងារស្របច្បាប់ជាង៣០០ក្រុមហ៊ុន និងភ្នាក់ងារលក្ខណៈបុគ្គលប្រមាណជាង៣ម៉ឺននាក់នោះ នៅមិនទាន់ចង្អៀតនៅឡើយនោះទេ ប៉ុន្តែអ្វីដែលសំខាន់គឺអតិថិជន ដែលជាម្ចាស់អចលនវត្ថុ គប្បីចេះជ្រើសរើសការផ្តល់សេវា ការប្រឹក្សាពីសំណាក់អ្នកជំនាញ ក៏ដូចជាក្រុមហ៊ុនស្របច្បាប់ដែលមានក្រមសីលធម៌ និងវិជ្ជាជីរៈត្រឹមត្រូវ ជៀសវាងបាត់បង់ឱកាសចំណេញពីការវិនិយោគ ហើយថែមទាំងខាតបង់នូវទ្រព្យធនថែមទៀត”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍បន្តទៀតថា “ដោយមើលឃើញពីភាពចន្លោះប្រហោងដែលតែងកើតមាននៅក្នុងទីផ្សារអចលនទ្រព្យរួម ក្នុងរយៈពេលជិត២០ខែកន្លងទៅនេះ តាមរយៈសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបណ្តុះបណ្តាលសិក្ខាកាមមិនក្រោម២០០០នាក់នោះទេ ក្រោមការទទួលស្គាល់ពីក្រសួងអប់រំ និងក្រសួងសេដ្ឋកិច្ច”។

លោកបញ្ជាក់ “យើងនៅតែបន្តបើកវគ្គបណ្តុះបណ្តាលជំនាញក្នុងនាមជាភ្នាក់ងារអចលនទ្រព្យអាជីពជាបន្តបន្ទាប់ ហើយនឹងឈានដល់ការបណ្តុះបណ្តាលកម្រិតបរិញ្ញាបត្រក្នុងពេលឆាប់ៗខាងមុខនេះ បន្ទាប់ពីទទួលបានការអនុញ្ញាត និងសម្រេចជាផ្លូវការពីសំណាក់ក្រសួងអាណាព្យាបាលទាំង២ រួមមានក្រសួងអប់រំយុវជន និងកីឡា និងក្រសួងសេដ្ឋកិច្ច និងហិរញ្ញវត្ថុជាផ្លូវការ”។

លោក ច្រឹក សុខនីម បានប្រាប់ឱ្យដឹងថា នៅពេលបណ្តាភ្នាក់ងារដែលប្រតិបត្តិការនៅក្នុងទីផ្សារអចលនទ្រព្យពោរពេញដោយចំណេះដឹង និងមានជំនាញច្បាស់ មានក្រមសីលធម៌ និងវិជ្ជាជីវៈពិតប្រាកដ គឺជាការចូលរួមចំណែកយ៉ាងសំខាន់ក្នុងការពង្រឹងវិស័យមួយនេះ ដែលកាន់តែផ្តល់ទំនុកចិត្តដល់បណ្តាអ្នកវិនិយោគនានាឱ្យចូលមកកាន់កម្ពុជាបានកាន់តែច្រើន៕

ចិនមានគម្រោងពង្រីកបណ្តាញផ្លូវដែកឱ្យបាន ២០០,០០០ គីឡូម៉ែត្រ មុនឆ្នាំ ២០៣៥

ដោយ ៖ ហ្សូលី

ប៉េកាំង ៖ ប្រទេសចិនមានផែនការពង្រីកបណ្តាញផ្លូវដែក រយៈពេលវែង ដើម្បីធ្វើឱ្យប្រសើរឡើងនូវនគរូបនីយកម្ម និងជម្រុញសេដ្ឋកិច្ចក្នុងស្រុកឱ្យកាន់តែមានភាពរីកចម្រើនបន្ថែមទៀត តាមគម្រោងអភិវឌ្ឍន៍ហេដ្ឋារចនាសម្ព័ន្ធរបស់រដ្ឋាភិបាល។

ចិនមានគោលបំណងធ្វើឱ្យបាននូវការស្ថាបនាប្រព័ន្ធផ្លូវដែកប្រមាណជា ២០០,០០០ គីឡូម៉ែត្រ មុនឆ្នាំ ២០៣៥ ក្នុងនោះមានរួមបញ្ចូលទាំងផ្លូវដែកល្បឿនលឿនចំនួន ៧០,០០០ គីឡូម៉ែត្រផងដែរ។ នេះបើតាមឱ្យដឹងតាមផែនការដែលបានចុះផ្សាយដោយក្រុមហ៊ុនផ្លូវដែករដ្ឋចិន China State Railway Group ដែលស្ថិតក្រោមការគ្រប់គ្រងរបស់រដ្ឋាភិបាល។

យោងតាមទិន្នន័យដដែលបានបង្ហាញទៀតថា គោលដៅប្រៀបធៀបជាមួយនឹងប្រវែងសរុប ១៤១,៤០០ គីឡូម៉ែត្រនៃផ្លូវដែក ដែលមានស្រាប់បើគិតត្រឹមចុងខែកក្កដា ឆ្នាំ ២០២០នេះ ក្នុងនោះដែរក៏មានផ្លូវដែកល្បឿនលឿនប្រវែង ៣៦,០០០ គីឡូម៉ែត្រ ដែលជាចំនួនច្រើនបំផុតនៅលើពិភពលោក។

គម្រោងផែនការនោះមានន័យថា បណ្តាញផ្លូវដែកចិននឹងមានការកើនឡើងប្រមាណ ៣៣.៣៣ ភាគរយពីឆ្នាំនេះ និងកើនឡើង ១៣៣ ភាគរយនៃការពង្រីកបណ្តាញផ្លូវដែកល្បឿនលឿន។ នេះបើតាមការគណនារបស់ទីភ្នាក់ងារសារព័ត៌មាន Reuters។

នេះជាភាពជោគជ័យមួយតាមផែនការអភិវឌ្ឍន៍ហេដ្ឋារចនាសម្ព័ន្ធ ២០១៦-២០២០ ដែលបានចុះផ្សាយកាលពីឆ្នាំ ២០១៦ កន្លងទៅនេះ ចិនមានគោលបំណងពង្រីកបណ្តាញផ្លូវដែកចំនួន ១៥០,០០០ គីឡូម៉ែត្រ នៅឆ្នាំ ២០២០ និងផ្លូវដែកល្បឿនលឿន ៣០,០០០ គីឡូម៉ទ្រផងដែរ។

ក្រុមហ៊ុនបាននិយាយថា ចិនក៏នឹងជម្រុញការកសាងផ្លូវដែកនៅក្នុងកន្លែងដែលគ្របដណ្តប់ដោយក្រុមជនជាតិភាគតិច និងតំបន់ព្រំដែន ព្រមទាំងតំបន់ដែលមានការអភិវឌ្ឍនៅភាគកណ្តាលនិងខាងលិចប្រទេស ដើម្បីកាត់បន្ថយភាពក្រីក្រ និងធ្វើឱ្យតំបន់ជនបទកាន់តែមានភាពប្រសើរឡើងវិញ។

ប្រទេសដែលមានសេដ្ឋកិច្ចធំជាងគេលើពិភពលោកលំដាប់ទី ២ នេះ បានប្តេជ្ញាជម្រុញការធ្វើនគរូបនីយកម្ម និងការវិនិយោគហេដ្ឋារចនាសម្ព័ន្ធថ្មី នាំឱ្យសេដ្ឋកិច្ចប្រទេសមានភាពរីកចម្រើនបន្ទាប់ពីមេរោគបានរាតត្បាត៕

ការនាំចេញរបស់កម្ពុជាទៅកាន់ទីផ្សារជប៉ុន សម្រេចបានជិត៨០០លានដុល្លារក្នុងឆមាសទី១

ដោយ ៖ ប៊ី

ភ្នំពេញ ៖ ប្រទេសកម្ពុជាបាននាំចេញទំនិញមានតម្លៃ ៧៩១,៦៦ លានដុល្លារទៅកាន់ប្រទេសជប៉ុននៅឆមាសទី១ ឆ្នាំនេះ ធ្លាក់ចុះ ០,២១ ភាគរយបើធៀបនឹង ៧៩៣,៣៨ លានដុល្លារក្នុងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យចុងក្រោយពីអង្គការពាណិជ្ជកម្មក្រៅប្រទេសជប៉ុន (Jetro) នៅថ្ងៃទី១៣ ខែសីហា ឆ្នាំ២០២០។

ប្រទេសកម្ពុជាបាននាំចូលទំនិញពីជប៉ុនមានតម្លៃ ២១៨,៦១ លានដុល្លារក្នុងឆមាសទី១ ឆ្នាំនេះ ធ្លាក់ចុះ ៣៩ ភាគរយ ធៀបនឹងរយៈពេលដូចគ្នាកាលពីមុនដែលមានតម្លៃ ២៥៦លានដុល្លារ។
ប្រទេសទាំងពីរប្តេជ្ញាជំរុញពាណិជ្ជកម្មទ្វេភាគីឱ្យបានជាង ២ពាន់លានដុល្លារនៅឆ្នាំនេះ ទោះបីជំងឺCOVID-19 រាតត្បាតកាន់តែធ្ងន់ធ្ងរក៏ដោយ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់គេទំព័រ Propertyarea.asia នៅថ្ងៃទី១៤ ខែសីហា ឆ្នាំ២០២០ ថា បើទោះបីមានវិបត្តិCOVID-19 ក៏គម្រោងវិនិយោគរបស់ជប៉ុននៅបន្តដំណើរការនៅកម្ពុជា ព្រោះវិនិយោគិនជប៉ុនបានស្គាល់ច្បាស់ពីកម្ពុជា។

លោកឧកញ៉ាមានប្រសាសន៍ថា កាលពីពេលថ្មីៗ សភាពាណិជ្ជកម្មកម្ពុជា និងសភាពាណិជ្ជកម្មជប៉ុន បានជួបគ្នា ដើម្បីពិភាក្សាពីការវិនិយោគនៅកម្ពុជា ក្នុងនោះក្រុមហ៊ុនជប៉ុន បានចាប់អារម្មណ៍ក្នុងការបោះទុនវិនិយោគនៅកម្ពុជា។
លោក ឧកញ៉ា បានបន្តថា “គម្រោងវិនិយោគជាច្រើនរបស់ជប៉ុននៅកម្ពុជាដូចជា ធនាគារ ផ្សារទំនើប និងមន្ទីពេទ្យ ហើយថែមទាំងមានសមាគមពាណិជ្ជកម្មប្រចាំកម្ពុជា ធ្វើឱ្យវិនិយោគជប៉ុនមានជំនឿចិត្តក្នុងការបោះទុនវិយោគនៅកម្ពុជា”។ លោកឧកញ៉ា បានថ្លែងថា “ការរំពឹងទុកពាណិជ្ជកម្មទ្វេរភាគីរវាងកម្ពុជា និងជប៉ុនអាចសម្រេចបានតាមគោលដៅដូចដែលបានរំពឹងទុក”។

ទិន្នន័យពីក្រុមប្រឹក្សាអភិវឌ្ឍន៍កម្ពុជា បានបង្ហាញថា ចន្លោះពីឆ្នាំ ១៩៩៥ ដល់ខែកញ្ញាកាលពីមុនមានគម្រោងវិនិយោគចំនួន ១៤១ របស់ជប៉ុន ដែលមានទឹកប្រាក់វិនិយោគ ២,៥ ពាន់លានដុល្លារនៅកម្ពុជា។
ក្នុងចំណោមគម្រោងវិនិយោគទាំងអស់នោះ គម្រោងចំនួន ៦៦ ស្ថិតនៅក្នុងតំបន់សេដ្ឋកិច្ចពិសេសដោយមានទុនវិនិយោគប្រមាណ ៣៤០លានដុល្លារ។

ទិន្នន័យបានបង្ហាញថា គម្រោងភាគច្រើនវិនិយោគលើវិស័យថាមពល ការតម្លើងគ្រឿងអេឡិចត្រូនិច គ្រឿងបន្លាស់រថយន្ត កសិឧស្សាហកម្ម ឧស្សាហកម្មកែច្នៃ អាហារបដិសណ្ឋារកិច្ច សុខភាព និងផ្នែកលក់រាយ។

ទិន្នន័យរបស់ Jetro បង្ហាញថា ការនាំចេញរបស់កម្ពុជាទៅជប៉ុនបានកើនឡើងដល់ ១,៧ ពាន់លានដុល្លារកាលពីឆ្នាំមុន កើនឡើង ៧,៧ ភាគរយ បើធៀបនឹងឆ្នាំ ២០១៨៕

ក្រុមហ៊ុន Gold Coast គ្រោងបោះទុន ៤២,៨ លានដុល្លារសាងសង់មជ្ឈមណ្ឌលពាណិជ្ជកម្មនៅខេត្តកំពត

 

ដោយវុត្ថា

កំពត៖ក្រុមហ៊ុន Gold Coast International Development Co.,LTD បានសម្រេចបោះទុនវិនិយោគប្រហែល ៤២,៨ លានដុល្លាអាមេរិច សាងសង់មជ្ឈមណ្ឌលពាណិជ្ជកម្ម សណ្ឋាគារកម្រិតផ្កាយ៤ អាគារផ្សារទំនើប មណ្ឌលកំសាន្ត ខុនដូរ និងសេវាទេសចរណ៍នៅជាប់មាត់សមុទ្រ មានទីតាំងស្ថិតនៅភូមិថ្កូវ ឃុំឬស្សីស្រុកខាងលិច ស្រុកកំពង់ត្រាច ខេត្តកំពត ។

នេះ បើយោងតាមលទ្ធផលនៃកិច្ចប្រជុំពិភាក្សាស្ដីពីគម្រោងវិនិយោគ នៅស្រុកកំពង់ត្រាច រវាលោក ជាវ តាយ អភិបាលខេត្តកំពត និងអគ្គក្រុមហ៊ុន Gold Coast International Development Co.,LTD កាលពីថ្ងៃទី ១៣ ខែសីហា ឆ្នាំ ២០២០ម្សិលមិញនេះ ដែលមានការចូលរួមពីប្រធានមន្ទីរអង្គភាពជំនាញ អភិបាលស្រុកកំពង់ត្រាច និងមន្ត្រីជំនាញសរុបចំនួន ៤០ នាក់។

លោក ជាវ តាយ អភិបាលខេត្តកំព មានប្រសាសន៌ថា រដ្ឋបាលខេត្ត ទទួលយកសំណើសុំវិនិយោគរបស់ក្រុមហ៊ុន Gold Coast International Development Co.,LTD ដើម្បីរដ្ឋបាលខេត្តរៀបចំក្រុមការងារជំនាញធ្វើការលើការងារបច្ចេកទេស ផ្លូវច្បាប់ និងឯកសារពាក់ព័ន្ធ រួចគោរពស្នើសុំទៅក្រុមប្រឹក្សាអភិវឌ្ឍន៌កម្ពុជា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃក្រកម្ពុជា ពិនិត្យនិងសម្រេចលើគម្រោងស្នើសុំនេះ។

ខេត្តកំពតជាខេត្តមួយដែលមានកំពុងមានសក្តានុពលខ្ពស់លើការវិនិយោគ និងទាក់ទាញភ្ញៀវទេសចរមកពីគ្រប់ទិសទីទាំងជាតិ និងអន្តរជាតិ ឱ្យមកលេងកម្សាន្តនៅក្នុងខេត្តមួយនេះ ដោយសារតែខេត្តមួយនេះ មានអំណោយផលផ្នែកធម្មជាតិ សមុទ្រ ព្រែក ភ្នំ និងសក្តានុពលផ្សេងទៀត ហើយនៅមិនឆ្ងាយពីរាជធានីភ្នំពេញ ដោយចំណាយពេលធ្វើដំណើរប្រមាណតែ ២ ទៅ ៣ ម៉ោងពីភ្នំពេញ។

ខេត្តកំពត បើទោះបីកម្ពុជាជួបវិបត្តិសេដ្ឋកិច្ចសកល ដោយសារការរាតត្បាតជំងឺកូវីដ ១៩យ៉ាងណាក្តី កន្លងមកនេះ បានទតទទួលនៅគម្រោងវិនិយោគជាច្រើនតាមរយៈការបោះទុនពីអ្នកវិនិយោគក្នុងស្រុក លើរមណីយដ្ឋាន តំបន់ទេសចរណ៍ វិស័យបដិសណ្ឋារកិច្ច និង អគារពាណិជ្ជកម្មជាច្រើនផ្សេងទៀត ៕

ថវិកាប្រមាណ ៣០០ លាដុល្លារត្រូវបានវិនិយោគលើការដំាដំឡូងមីនៅកម្ពុជា ក្នុងមួយឆ្នាំៗ

ដោយ ៖ វុត្ថា

ភ្នំពេញ ៖ ក្នុងមួយឆ្នាំៗ ថវិកាប្រហែល ៣០០លានដុល្លារ ត្រូវបានវិនិយោគដើម្បីដាំដំឡូងមីលើផ្ទៃដីទំហំធំជាង ៦០០ ០០០ហិកតា ដែលបានជួយជំរុញកំណើនសេដ្ឋកិច្ចថ្មីដ៏រឹងមាំ ខណៈដែលការនាំចេញភាគច្រើនជាមើមដំឡូងមីស្រស់ និងចំណិតដំឡូងមីក្រៀមមានតម្លៃប្រហែល ៧២៨លានដុលារអាម៉េរិក។

នេះបើយោងតាសសេចក្តីព្រាងច្បាប់ស្ដីពីគោលនយោបាយជាតិដំឡូងមី ២០២០-២០២៥” បង្ហាញនៅក្នុងកិច្ចប្រជុំពេញអង្គគណៈរដ្ឋមន្ត្រី នាថ្ងៃទី ១៤ ខែសីហា ឆ្នាំ២០២០នេះ ក្រោមអធិបតីភាពរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

សេចក្តីព្រាងច្បាប់នេះ បានឱ្យដឹងថា ការរីកចម្រើនយ៉ាងឆាប់រហ័សនៃតំបន់ដាំដុះដំឡូងមី ក្នុងទសវត្សចុងក្រោយនេះបានធ្វើឱ្យដំណាំដំឡូងមី ក្លាយជាដំណាំសំខាន់ទីពីរ បន្ទាប់ពីស្រូវនៅកម្ពុជា។ ដំឡូងមីមានចំណែកចន្លោះពី៣ ទៅ៤ភាគរយនៃផលិតផលសរុបក្នុងស្រុក។

ប្រជាជននៅជនបទច្រើនជាង៩០ ០០០(ប្រាំបួនម៉ឺន) គ្រួសាររស់នៅក្នុងខេត្តចំនួន ១៣ កំពុងប្រកបរបរដាំដុះដំឡូងមី និងពលករជាច្រើនកំពុងបម្រើការក្នុងវិស័យនេះ ក្នុងដំណាក់កាលផ្សេងៗ ដូចជា ដាំដុះ ប្រមូលផល កែច្នៃ និងនាំចេញ។

កន្លែងប្រមូលទិញផលិតផលដំឡូងមីមានចំនួន ៥៥០កន្លែង ភាគច្រើនស្ថិតក្នុងខេត្តចំនួនប្រាំ ដូចជា ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ និងខេត្តត្បូងឃ្មុំ។

គោលនយោបាយជាតិដំឡូងមី ២០២០-២០២៥នេះ ធ្វើឱ្យផលិតផលដំឡូងមីកម្ពុជា នឹងក្លាយជាដំណាំយុទ្ធសាស្រ្តមួយ ដែលផ្តល់ប្រាក់ចំណូលច្រើនដល់កសិករ និងជាមូលដ្ឋាននៃការអភិវឌ្ឍឧស្សាហកម្មកែច្នៃនៅកម្ពុជា។ កម្ពុជាពិតជាអាចបោះជំហានទៅរកការអភិវឌ្ឍសេដ្ឋកិច្ចជាតិដោយយកផលិតផលដំឡូងមី ជួយជំរុញកំណើន និងចែករំលែកផលប្រយោជន៍នៃកំណើននេះដល់គ្រប់ភាគីពាក់ព័ន្ធទាំងអស់៕

កម្ពុជាកំពុងត្រៀមខ្លួនសម្រាប់បទដ្ឋានថ្មីនៃវិស័យពាណិជ្ជម្ម ជាមួយហុងកុង ដើម្បីឱ្យកាន់តែមានភាពល្អប្រសើរជាងមុន

ដោយ ៖ រ៉ាណេត

ភ្នំពេញ ៖ ជាការចូលរួមយ៉ាងសកម្មជាមួយរាជរដ្ឋាភិបាលលើការធ្វើកិច្ចទំនាក់ទំនង និងពង្រីកទំហំពាណិជ្ជកម្មជាមួយបណ្តាប្រទេសនានានៅលើសាកលលោក តាមរយៈសភាពាណិជ្ជកម្មកម្ពុជា បាន និងកំពុងត្រៀមខ្លួនសម្រាប់បទដ្ឋានថ្មីនៃការអនុវត្តក្នុងវិស័យពាណិជ្ជកម្មរវាងហុងកុង និងកម្ពុជា។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ប្រាប់តាមទូរស័ព្ទនាព្រឹកថ្ងៃទី១៤ ខែសីហា ឆ្នាំ២០២០នេះថា ការិយាល័យសេដ្ឋកិច្ច និងពាណិជ្ជកម្មហុងកុង បានរៀបចំបទដ្ឋានថ្មីពាក់ព័ន្ធទៅនឹងការធ្វើពាណិជ្ជកម្មនានាជាមួយបណ្តាបណ្តាប្រទេសជាដៃគូ ដែលក្នុងនោះក៏មានកម្ពុជាផងដែរ។

លោកឧកញ៉ាបានមានប្រសាសន៍បញ្ជាក់ថា “កម្ពុជា-ហុងកុង មានកិច្ចទំនាក់ទំនងយ៉ាងជិតស្និទ្ធជាមួយគ្នាយូរមកហើយ ដោយក្នុងនោះភាពជាដៃគូលើការធ្វើពាណិជ្ជកម្មក៏មានភាពល្អប្រសើរផងដែរ ជាពិសេសវិស័យឧស្សាហកម្ម”។ លោកបញ្ជាក់ថា “ខ្ញុំធ្លាប់បានជួបជាមួយរដ្ឋមន្ត្រីពាណិជ្ជកម្មហុងកុងកាលពីពេលកន្លងទៅដោយបានធ្វើសិក្ខាបង្ហាញពីឱកាស និងភាពល្អប្រសើរលើការវិនិយោគជាច្រើននៅក្នុងប្រទេសកម្ពុជា ក្នុងគោលបំណងធ្វើយ៉ាងណាឱ្យមានវឌ្ឍនភាពកាន់តែប្រសើរជាងមុន”។

កិច្ចទំនាក់ទំនងពាណិជ្ជកម្មរវាងកម្ពុជា និងហុងកុង កាលពីពេលកន្លងទៅនេះភាគច្រើនគឺផ្តោតសំខាន់ទៅលើវិស័យឧស្សាហកម្ម ហើយក្រៅពីនេះក៏មានមយចំណែកក្នុងវិស័យកសិឧស្សាហកម្ម ហើយកាលពីពេលថ្មីៗនេះក៏មានការបង្ហាញពីការចាប់អារម្មណ៍ទៅលើវិស័យហិរញ្ញវត្ថុដោយការដាក់ធនាគារហុងកុងនៅលើទីផ្សារកម្ពុជាថែមទៀតផង។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង ក៏បានមានប្រសាស៍បញ្ជាក់ទៀតថា “បន្ថែមពីលើអ្វីដូចដែលបានបង្ហាញខាងលើនេះ ហុងកុង ក៏បង្កើតជាសមាគមអ្នកច្បាប់នៅកម្ពុជា ដើម្បីការពារផលប្រយោជន៍ដល់អ្នកវិនិយោគហុងកុងធំៗផងដែរ ហើយទាំងអស់នេះហើយសុទ្ធតែជាសមិទ្ធផល និងការបង្កើនកិច្ចទំនុកចិត្តដល់វិនិយោគិននៃប្រទេសទាំង២”។

ភ្ជាប់ទៅនឹងគោលបំណងនៃការធ្វើពិពិធកម្មពាណិជ្ជកម្មរវាងប្រទេសទាំង២ឱ្យកាន់តែមានភាពទូលំទូលាយ កាលពីថ្ងៃទី១៣ ខែសីហា ឆ្នាំ២០២០ម្សិលមិញនេះ ការិយាល័យសេដ្ឋកិច្ច និងពាណិជ្ជកម្មហុងកុង បានរៀបចំសិក្ខាសាលាតាមប្រព័ន្ធអនឡាញ ស្ដីពីការត្រៀមខ្លួនសម្រាប់បទដ្ឋានថ្មីពាក់ព័ន្ធទៅនឹងការធ្វើពាណិជ្ជកម្មនានាជាមួយបណ្តាបណ្តាប្រទេសជាដៃគូ។

គោលបំណងនៃសិក្ខាសាលានេះ គឺដើម្បីចែករំលែកអំពីវិធីសាស្ត្រក្នុងការឆ្លើយតបរបស់ហុងកុងចំពោះបញ្ហាប្រឈមកើតឡើងដោយសារជំងឺកូវីដ-១៩ និងការត្រៀមខ្លួនក្រោយពេលវិបត្តិកូវីដ-១៩។ សិក្ខាសាលាបានពិភាក្សាទៅលើប្រធានបទសំខាន់ៗដូចខាងក្រោម៖

១. វិធានការណ៍ប្រឆាំងនឹងការរាតត្បាតពហុវិស័យ និងជំនួយក្នុងការផ្ដល់ការគាំទ្រដល់ធុរកិច្ច និងការងារររបស់រដ្ឋាភិបាលហុងកុង។

២. គំនិតផ្តួចផ្តើមក្នុងការជួយសហគ្រាសធុនតូចនិងមធ្យមរបស់ ក្រុមប្រឹក្សាអភិវឌ្ឍពាណិជ្ជកម្មហុងកុង ដើម្បីរក្សាទំនាក់ទំនងជាមួយដៃគូអន្តរជាតិ និងធ្វើធុរកិច្ចជាធម្មតាជាមួយទីផ្សាររបស់ ក្រុមប្រឹក្សាអភិវឌ្ឍពាណិជ្ជកម្មហុងកុង តាមរយៈប្រព័ន្ធអនឡាញ។

៣. ទីក្រុងហុងកុងនៅតែជាទីតាំងទាក់ទាញការវិនិយោគ និងក្របខណ្ឌមួយចំនួនគាំទ្រដល់ធុរកិច្ចក្នុងអំឡុងនៃជម្ងឺរាតត្បាតកូវីដ១៩។

៤. ការទទួលយកបទដ្ឋានថ្មីរបស់ហុងកុងក្នុងការធ្វើដំណើរ និងយុទ្ធសាស្ត្រស្ដារឧស្សាហកម្មទេសចរណ៍ហុងកុងឡើងវិញ៕