ឥណទានសំរាប់វិស័យអលចទ្រព្យនៅក្នុងប្រទេសចិនមានកំណើនយឺត

ដោយ វុត្ថា

ប៉េកាំងៈ ទិន្នន័យរបស់ធនាគារកណ្តាលរបស់ប្រទេសចិនបានបង្ហាញថា ប្រាក់កម្ចីលើវិស័យអចលនទ្រព្យរបស់ប្រទេសចិន បានបន្តកើនឡើងក្នុងល្បឿនយឺតនៅក្នុងត្រីមាសទីមួយ ដោយសារតែប្រទេសនេះ រក្សានូវការអនុវត្តច្បាប់លើការទិញផ្ទះនៅតែមានភាពតឹងរ៉ឹង។

យោងតាមរបាយការណ៍ពីធនាគារប្រជាជនចិន (PBOC) ដែលសារព័ត៌មាន Xinhua បានចុះផ្សាយកាលពីចុងសប្តាហ៍កន្លមកនេះឱ្យដឹងថា ប្រាក់កម្ចីលើអចលវត្ថុរបស់ចិនបានកើនឡើង១៣,៩ភាគរយ ស្មើនឹងទំហំទឹកប្រាក់៤៦,១៦ពាន់ពាន់លានយន់ (ប្រហែល ៦,៥៩ ពាន់ពាន់លានដុល្លារអាមេរិក) គិតត្រឹមចុងខែមីនា ពោលអត្រាកំនើននេះកើនប្រមាណ០,ពិន្ទុភាគរយទាបជាងកាលពីចុងឆ្នាំមុន។

របាយការណ៍ដដែលបន្តថា ការផ្តល់ប្រាក់កម្ចីមានទ្រព្យបញ្ចាំ បុគ្គលកើនឡើង ១៥,៩ភាគរយ ពីមួយឆ្នាំទៅមួយឆ្នាំដល់៣ ១,១៥ពាន់ពាន់លានយន់ នៅចុងត្រីមាសទីមួយឆ្នាំនេះ ពោលគឺធ្លាក់ចុះ ០,៨ ភាគរយនឹងចុងខែធ្នូឆ្នាំមុន។

លោក Zou Lan មន្ត្រីធនាគារប្រជាជនចិន (PBOC) បានឱ្យដឹងថា សមាមាត្រនៃប្រាក់កម្ចីអចលនទ្រព្យបានបន្តធ្លាក់ចុះ ខណៈពេលដែលការផ្តល់ប្រាក់កម្ចីដល់សហគ្រាសខ្នាតតូច និងធម្យម និងចង្វាក់ផលិតកម្មបានរក្សានូវកំណើនថេរ។

អ្នកធ្វើគោលនយោបាយរបស់ប្រទេសចិនបានប្តេជ្ញាថា នឹងធានាឱ្យមានស្ថេរភាព និងការអភិវឌ្ឍទីផ្សារអចលនទ្រព្យ ដោយបានបញ្ជាក់មម្តងហើយម្តងទៀតថា ផ្ទះគឺសម្រាប់ការរស់នៅមិនមែនសម្រាប់ការវិនិយោគនោះទេ៕

ក្រុមហ៊ុន KrisEnergy ទទួលបានកិច្ចព្រមព្រៀងឥណទាន៨៧លានដុល្លារ ដើម្បីអភិវឌ្ឍការរុករកប្រេងដំណាក់កាលទី១នៅកម្ពុជា

ដោយ ប៊ី

ភ្នំពេញៈ ក្រុមហ៊ុន KrisEnergy ដែលជាក្រុមហ៊ុនដែលទទួលបានសម្បទានសម្រាប់អណ្តូងប្រេងនៅប្លុក A ក្នុងប្រទេសកម្ពុជាទទួលបានកិច្ចព្រមព្រៀងឥណទានតម្លៃ៨៧លានដុល្លារ។ នេះបើយោងតាមសេចក្តីថ្លែងការណ៍ របស់ក្រុមហ៊ុនកាលពីចុងសប្តាហ៍កន្លងមកនេះ។

កិច្ចព្រមព្រៀងទីតាំងឥណទាន ត្រូវបានចុះហត្ថលេខាជាមួយក្រុមហ៊ុន Kepinvest Singapore Pte និងបង្កើតហិរញ្ញប្បទាន គម្រោងសម្រាប់ការផ្តល់មូលនិធិ នៃការអភិវឌ្ឍគម្រោងអភិវឌ្ឍន៍រយៈពេលខាងមុខ របស់ក្រុមហ៊ុននៅឯប្លុកAរបស់កម្ពុជា ដែលជាធន ធានប្រេង និងឧស្ម័នអភិវឌ្ឍន៍នៅឯនាយសមុទ្រ ដែលមានទីតាំងស្ថិតនៅក្នុងដែនទឹកសមុទ្រខ្មែរ លើផ្ទៃក្រឡាសរុប៣០៨៣ គីឡូម៉ែត្រក្រឡា។

យោងតាមសេចក្តីថ្លែងការណ៍មួយ ដែលត្រូវបានផ្សព្វផ្សាយនៅលើគេហទំព័ររបស់ក្រុមហ៊ុនបានឱ្យដឹងថា ដូចដែលបានប្រកាសនៅថ្ងៃទី៩ ខែធ្នូឆ្នាំ ២០១៩ ក្រុមហ៊ុនកំពុងអភិវឌ្ឍវេទិកា ដែលត្រូវបានហៅថា Mini-Platform សម្រាប់អណ្តូងប្រេងអប្សរាក្នុងឯប្លុក A របស់កម្ពុជា។

សេចក្តីថ្លែងការណ៍បានឱ្យដឹងថា “ដោយសារតែដំណើរការផលិតកម្មជាច្រើននៅលើដែនទឹកសមុទ្រខ្មែរ ការអភិវឌ្ឍអណ្តូងប្រេងអប្សរា នឹងស្ថិតក្នុងដំណាក់កាលជាច្រើនដើម្បីកាត់បន្ថយហានិភ័យ និងផ្តល់ពេលវេលាសម្រាប់ការប្រមូល និងវិភាគទិន្នន័យសំខាន់ៗដែលត្រូវអនុវត្តនៅក្នុងដំណាក់កាលនាពេលអនាគត។

សេចក្តីថ្លែងការណ៍បានឱ្យដឹងទៀតថា “ប្រសិនបើដំណាក់កាលនៃការអភិវឌ្ឍន៍ប្លុក A របស់កម្ពុជា ត្រូវបានដំណើរការតាមការគ្រោងទុក ផលិតកម្មកម្រិតខ្ពស់ត្រូវបានរំពឹងថានឹងមាននៅចន្លោះឆ្នាំ២០២៤ និង ២០២៦” ។

យ៉ាងហោចណាស់អណ្តូងពីរ ក្នុងចំណោមអណ្តូងទាំង៥ នឹងកំណត់ទិសដៅ ដែលមានអណ្តូងរុករកប្រេង ដែលទទួលបានជោគជ័យពីមុន។ មីនីដំណាក់កាលទី១ អាគ្រោងនឹងចាប់ផ្តើមផលិតកម្មប្រេងនៅឆ្នាំ២០២០ និងឈានដល់កម្រិតខ្ពស់បំផុតនៃការផលិតប្រេង៧.៥០០ បារ៉ែលក្នុងមួយថ្ងៃ។

ក្រុមហ៊ុនប៉ាន់ប្រមាណថា ថវិកាប្រមាណ៨៧លានដុល្លារនេះ នឹងត្រូវបានផ្តល់សម្រាប់ការអភិវឌ្ឍដំណាក់កាលទី១ រហូតទាល់តែប្រេងដំបូង ត្រូវបានផលិតដែលបច្ចុប្បន្នត្រូវបានកំណត់សម្រាប់ឆ្នាំ២០២០ ៕

ចំណេះដឹង! តើការផ្សះផ្សា និងដោះស្រាយវិវាទរវាងអ្នកអភិវឌ្ឍអចលនវត្ថុនិងអ្នកទិញមាននិតិវិធីដូចម្តេច?

ដោយ វុត្ថា

ភ្នំពេញៈ វិវាទរវាងអ្នកអភិវឌ្ឍអចលនវត្ថុ និងអ្នកទិញពាក់ព័ន្ធកិច្ចសន្យាលក់-ទិញអចលនវត្ថុ អាចជាកម្មវត្ថុសម្រុះសម្រួល និងផ្សះផ្សាដោយក្រសួង ឬមន្ទីរ។

យោងតាមប្រកាសស្តីពីការគ្រប់គ្រងអាជីវកម្ម អភិវឌ្ឍអចលនវត្ថុរបស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ក្រសួង ឬមន្ទីរ សម្រុះសម្រួលនិងផ្សះផ្សាវិវាទ តាមការស្នើសុំរបស់ភាគីវិវាទ ក្នុងរយៈពេល២ខែយ៉ាងយូ។ ការផ្សះផ្សាវិវាទ អាចឈានទៅការចុះកិច្ចព្រមព្រៀងផ្សះផ្សា ដែលត្រូវចុះហត្ថលេខាដោយគូវិវាទ និងមានការទទួលដឹងលឺ ដោយនាយកដ្ឋានឬមន្ទីរ។ កិច្ចព្រមព្រៀងផ្សះផ្សា មានអនុភាពអនុវត្តភ្លាមៗ ចំពោះគូភាគី។

ប្រការ៤១នៃប្រកាសខាងលើបានចែងថា គូភាគីវិវាទ ដែលមិនពេញចិត្តចំពោះការសម្រេច ឬវិធានការផ្សេងៗរបស់ក្រសួង ឬមន្ទីរ មានសិទ្ធិដាក់ពាក្យបណ្តឹងតវ៉ាមកក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុ មុននឹងអនុវត្តនីតិវិធីបណ្តឹង ទៅតុលាការ លើកលែងតែរឿងព្រហ្មទណ្ឌ។

ក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុត្រូវដោះស្រាយបណ្តឹងក្នុងរយៈពេល៩០ថ្ងៃ នៃថ្ងៃធ្វើការក្រោយពីទទួលបានពាក្យបណ្តឹងតវ៉ា ឬក្នុងរយៈពេលមួយសមស្រប។

ក្នុងការដោះស្រាយវិវាទ ក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុ អាចអញ្ជើញភាគីវិវាទ ដើម្បីសាកសួរឬផ្តល់ភស្តុតាងតាមការចាំបាច់។ សេចក្តីសម្រេចស្តីពីការដោះស្រាយវិវាទ ត្រូវធ្វើឡើងជាលាយលក្ខណ៍អក្សរ ដោយមានការបញ្ជាក់ពីអង្គហេតុ សំអាងហេតុ និងការសន្និដ្ឋាន។ ក្នុងករណីមិនពេញចិត្ត នឹងសេចក្តីសម្រេចរបស់ក្រុមប្រឹក្សានីតិកម្ម ភាគីវិវាទអាចដាក់ពាក្យបណ្តឹងតវ៉ា ទៅតុលការមានសមត្ថកិច្ច ដោយអនុលោមតាមបទប្បញ្ញាត្តិជាធរមាន៕

វិស័យឯកជនថៃបានស្នើរដ្ឋាភិបាលរបស់ខ្លួន ផ្អាកការយកពន្ធលើដីធ្លី និងអាគារថ្មីរយៈពេលមួយឆ្នាំ

ដោយ ៖ ប៊ី

អន្តរជាតិ ៖ វិស័យឯកជនថៃបានស្នើរដ្ឋាភិបាលរបស់ខ្លួន ផ្អាកសកម្មភាពយកពន្ធលើដីធ្លី និងអាគារថ្មីរយៈពេលមួយឆ្នាំដោយលើកឡើងពីបរិយាកាសសេដ្ឋកិច្ចបច្ចុប្បន្នមិនទាន់មានភាពប្រសើរឡើងវិញក្នុងការចាប់ផ្តើមប្រមូលនៅខែសីហាឆ្នាំនេះ ដូចការគ្រោងទុក។

លោក Supant Mongkolsuthree ប្រធានសហព័ន្ធឧស្សាហកម្មថៃ (FTI) បន្ទាប់ពីកិច្ចប្រជុំលើកទី ២ នៃគណៈកម្មាធិការប្រឹក្សាដល់នាយករដ្ឋមន្រ្តីលោក ប្រាយុទ្ធ ច័ន្ទអូចា បាននិយាយថា ពន្ធដី និងអាគារថ្មីចាំបាច់ត្រូវពន្យារពេលឥឡូវនេះ ដែលសាធារណជន និងអាជីវកម្ម នឹងទទួលបានការពន្យារពេលបង់ពន្ធ ដោយសារតែផលប៉ះពាល់យ៉ាងខ្លាំងពីជំងឺរាតត្បាត COVID-19។

ពន្ធលើដីធ្លី និងអាគារថ្មីបានចូលជាធរមាននៅដើមឆ្នាំនេះ ហើយគ្រោងនឹងចាប់ផ្តើមប្រមូលនៅខែមេសា ប៉ុន្តែរដ្ឋាភិបាលបានសម្រេចពន្យាពេលការអនុវត្តរហូតដល់ខែសីហា ដើម្បីផ្តល់ឱ្យអាជ្ញាធរមូលដ្ឋាន និងអ្នកបង់ពន្ធនូវពេលវេលាបន្ថែមទៀតដើម្បីត្រៀម។

ពន្ធនេះអនុវត្តចំពោះកន្លែងស្នាក់នៅដីចម្ការ តំបន់ពាណិជ្ជកម្ម និងដីមិនទាន់អភិវឌ្ឍន៍។ អត្រាខុសគ្នាអាស្រ័យលើរបៀបប្រើប្រាស់អចលនទ្រព្យ។

រចនាសម្ព័ន្ធថ្មីនេះត្រូវបានមើលឃើញថា ដី និងអាគារប្រើប្រាស់សំរាប់ស្នាក់នៅដែលមានតម្លៃត្រឹម ៥០ លានបាតត្រូវបានលើកលែងសម្រាប់ផ្ទះធំៗ រីឯផ្ទះដែលមានតំលៃពី ៥០ – ៧៥ លានបាត ត្រូវបានបង់ពន្ធ ០.០៣ ភាគរយ អចលនទ្រព្យតម្លៃ ៧៥-១០០ លានបាតនៅ ០,០៥ ភាគរយ និងច្រើនជាង ១០០ លានបាតតម្រូវឱ្យបង់ ០,១ ភាគរយ។

អ្នកដែលមានផ្ទះផ្ទាល់ខ្លួនដែលមានតម្លៃត្រឹម ១០ លានបាតនៃតម្លៃផ្ទះរបស់ពួកគេ តែមិនមានដីធ្លីទេ មានលក្ខណៈគ្រប់គ្រាន់សម្រាប់ការលើកលែងពន្ធ។ លំនៅដ្ឋានដែលមានតម្លៃកំណត់ជាង ១០-៥០ លានបាតត្រូវបានគិតថ្លៃ ០,០២ ភាគរយ ច្រើនជាង ៥០-៧៥ លានបាតត្រឹម ០,០៣ ភាគរយ ច្រើនជាង ៧៥-១០០ លានបាតត្រឹម ០,០៥ ភាគរយ និងជាង ១០០ លានបាតស្មើនឹង ០,១ ភាគរយ។

ប្រសិនបើម្ចាស់ផ្ទះមានផ្ទះលើសពីមួយកន្លែង វាតម្រូវឱ្យបង់ពន្ធ ០.០២ ភាគរយសម្រាប់អ្នកដែលមានការវាយតម្លៃខ្ពស់រហូតដល់ ៥០ លានបាត ហើយអត្រាពន្ធដូចគ្នានឹងផ្ទះធំត្រូវបានអនុវត្តសម្រាប់អ្នកដែលមានការវាយតម្លៃខ្ពស់ជាង ៥០ លានបាត៕

អនុស្ថានីយ៍អគ្គិសនីកំពង់ចាមមានលទ្ធភាពអាចផ្គត់ផ្គង់ជូនពលរដ្ឋបាន ៤ ខេត្ត

ដោយ ៖ វុត្ថា

កំពង់ចាម ៖ អនុស្ថានីយ៍អគ្គិសនីកំពង់ចាមមានអានុភាព ផលិតថាមពលអគ្គិសនីរហូតដល់ទៅ ១០០ MW (មេហ្គាវ៉ាត់) មានវិសាលភាពអាចផ្គត់ផ្គង់អគ្គិសនី ជូនប្រជាពលរដ្ឋទូទាំងខេត្តកំពង់ចាម និងផ្នែកខ្លះរបស់ខេត្តត្បូងឃ្មុំ កំពង់ធំ និងខេត្តព្រៃវែងផងដែរ ខណៈតាមផែនការរបស់រដ្ឋាភិបាលគឺឱ្យពលរដ្ឋមានភ្លើងអគ្គិសនីប្រើប្រាស់គ្រប់ភូមិនៅទូទាំងប្រទេសនាពេលខាងមុខនេះ។

អភិបាលខេត្តកំពង់ចាម លោក អ៊ុន ចាន់ដា អភិបាល បានមានប្រសាសន៍ប្រាប់ឱ្យដឹងកាលពីព្រឹកថ្ងៃទី២ ខែឧសភា ឆ្នាំ២០២០ នៅក្នុងឱកាសដឹកនាំមន្ត្រីជំនាញចុះត្រួតពិនិត្យមើលអនុស្ថានីយ៍ចែកចាយអគ្គីសនីខេត្តកំពង់ចាម ស្ថិតនៅឃុំក្រឡា ស្រុកកំពង់សៀម ថា ការផ្គត់ផ្គង់ថាមពលអគ្គិសនីកាលពីពេលកន្លងមកនេះ មានការរីកចំរើនគួរឱ្យកត់សម្គាល់ ទាំងប្រភពអគ្គិសនី ទាំងអនុស្ថានីយ៍ និងទាំងបណ្តាញអគ្គិសនីគ្រប់ប្រភេទ។

លោកបានបញ្ជាក់ថា បច្ចុប្បន្ននេះ ក្នុងគោលដៅរបស់ខេត្ត ក៏ដូចជារាជរដ្ឋាភិបាលកម្ពុជា នៅក្នុងវិស័យអគ្គិសនី មិនត្រឹមតែខិតខំជំរុញការអភិវឌ្ឍលើគ្រប់ផ្នែកនៃការផ្គត់ផ្គង់អគ្គិសនីនោះទេ គឺធ្វើយ៉ាងណាឱ្យប្រភពអគ្គិសនីមានគ្រប់គ្រាន់ មានគុណភាព មានស្ថិរភាព សុវត្ថិភាពៃ និងមានតម្លៃកាន់តែសមរម្យបន្ថែមទៀតជូនដល់ពលរដ្ឋ និងអ្នកវិនិយោគ។

រដ្ឋមន្ត្រីក្រសួងរ៉ែ និងថាមពល លោក ស៊ុយ សែម ធ្លាប់បានអះអាងសារថា សម្រាប់ឆ្នាំ ២០២០ នេះតទៅ កម្ពុជាលែងខ្វះខាតអគ្គិសនីប្រើប្រាស់ទៀតហើយ មិនដូចឆ្នាំ ២០១៩ កន្លងមកនេះនោះទេ ដែលបានជួបប្រទះបញ្ហាខ្វះខាតអគ្គិសនីយដោយមានការផ្តាច់ការផ្គត់ផ្គង់នៅតំបន់មួយចំនួន។

លោកបន្តថា ក្រសួងតែងតែធ្វើផែនការមេមួយយ៉ាងម៉តចត់ដើម្បីឱ្យអ្នកវិនិយោគ ឬរដ្ឋាភិបាលខ្លួនឯងធ្វើការវិនិយោគប្រភពអគ្គិសនីមួយឱ្យបានពិតប្រកដ និងរៀបចំបណ្តាញខ្សែមួយឱ្យបានត្រឹមត្រូវ ដើម្បីផ្គត់ផ្គង់អគ្គិសនីនៅទូទាំងប្រទេស។

លោកបញ្ជាក់ថា “សម្រាប់ឆ្នាំ ២០២០ នេះ កម្ពុជាត្រូវការអគ្គិសនីបន្ថែមប្រមាណ ៤១៤ មេហ្គាវ៉ាត់ ខណៈយើងមានជាង ៧០០ មេហ្គាវ៉ាត់សម្រាប់ផ្គត់ផ្គង់នៅក្នុងប្រទេស។ ដូច្នេះ អាចនិយាយបានថា សម្រាប់ឆ្នាំ ២០២០ នេះ មិនអាចខ្វះខាតនោះទេនារដូវប្រាំងនេះ ព្រោះគម្រោងអគ្គិសនីមានលើសពីសេចក្តីត្រូវការ ដែលមកដល់ពេលនេះ ការតបណ្តាញអគ្គិសនីសម្រេចបានស្ទើរតែគ្រប់ ១០០ភាគរយ សម្រាប់ឱ្យប្រជាពលរដ្ឋប្រើប្រាស់ ហើយតាមផែនការ គឺនឹងតបណ្តាញឱ្យចប់នៅត្រឹមឆ្នាំ ២០២០នេះ ឱ្យពលរដ្ឋបានប្រើប្រាស់គ្រប់ខ្នងផ្ទះ៕

ការនាំចេញសម្លៀកបំពាក់ និងស្បែកជើងកម្ពុជាត្រូវបានព្យាករណ៍ថានឹងធ្លាក់ចុះពី ៥០ ទៅ ៦០ ភាគរយនៅត្រីមាសទី ២

ដោយ ៖ ប៊ី

ភ្នំពេញ ៖ ការនាំចេញសម្លៀកបំពាក់ និងស្បែកជើងរបស់ប្រទេសកម្ពុជាត្រូវបានព្យាករណ៍ថានឹងធ្លាក់ចុះពី ៥០ ទៅ ៦០ ភាគរយនៅត្រីមាសទី២ ដោយសារផលប៉ះពាល់នៃជំងឺរាតត្បាតឆ្លងរាលដាល COVID-19។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈកម្ពុជា លោក ហេង សួរ មានប្រសាសន៍ថា ការនាំចេញក្នុងត្រីមាសទី១ មានការថយចុះ ៨០ ភាគរយ បើធៀបនឹងរយៈពេលដូចគ្នាកាលពីឆ្នាំមុន ស្របពេលដែលជំងឺ COVID-19 បានផ្ទុះឡើងនៅអឺរ៉ុប និងសហរដ្ឋអាមេរិក ដែលជាទីផ្សារធំបំផុតសម្រាប់ផលិតផលសម្លៀកបំពាក់របស់កម្ពុជា។ នេះបើយោងតាមការចុះផ្សាយរបស់គេទំព័រ VN News នៅថ្ងៃនេះ។

នៅពាក់កណ្តាលខែមេសា រោងចក្រកាត់ដេរប្រហែល ១០ ទៀតនៅកម្ពុជាត្រូវបញ្ឈប់ប្រតិបត្តិការដែលប៉ះពាល់ដល់កម្មករជាង ៦,០០០ នាក់។ ក្នុងកំឡុងពេលដែលពួកគេត្រូវបានផ្អាកការងារ កម្មករត្រូវបានទទួលប្រាក់ខែ ៧០ ដុល្លារក្នុងមួយខែ ដែលក្នុងនោះ ៤០ ដុល្លារជាថវិការបស់រដ្ឋាភិបាល និង ៣០ ដុល្លារពីនិយោជករបស់ពួកគេ។

យោងតាមលោក ហេង សួរ រោងចក្រកាត់ដេរចំនួន ១៣០ នៅកម្ពុជាបានផ្អាកប្រតិបត្តិការដោយសារការបញ្ជាទិញធ្លាក់ចុះ និងដោយសារតែការផ្ទុះឡើងនៃជំងឺ COVID-19 ដោយបានប៉ះពាល់ដល់កម្មករ ១០០,០០០ នាក់។

យោងតាមទិន្នន័យពីក្រសួងឧស្សាហកម្ម កម្ពុជាមានរោងចក្រចំនួន ១,០៩៩ ដែលប្រតិបត្តិការនៅក្នុងឧស្សាហកម្មវាយនភណ្ឌ ស្បែកជើង និងកាបូប៕

អគ្គនាយកដ្ឋានគយ និងរដ្ឋាករកម្ពុជា សម្រេចកែសម្រួលនីតិវិធីនៃការគ្រប់គ្រងទំនិញផ្ទុកក្នុងកុងតែន័រដែលមានច្រើនម្ចាស់

ដោយ ៖ វុត្ថា

ភ្នំពេញ ៖ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានចេញលិខិតមួយច្បាប់កែប្រែនិតិវិធីនៃការគ្រប់គ្រងទំនិញផ្ទុកក្នុងកុងតែន័រមានម្ចាស់ច្រើន ដើម្បីសម្រួលដល់ដំណើរការពាណិជ្ជកម្មនាំចេញ-នាំចូលឱ្យកាន់តែប្រសើរ ខណៈដែលកម្ពុជាកំពុងទទួលរងនូវផលប៉ះពាល់ពីជំងឺ Covid-19 ។

យោងតាមលិខិតលេខ ១០៣៨/២០ អ.គ.រ ដែលចុះហត្ថលេខាដោយ លោក គុណ ញឹម កាលពីថ្ងៃ២៩ ខែមេសា ឆ្នាំ ២០២០ ផ្ញើជូនលោក លោកស្រី ប្រធាននាយកដ្ឋាន សាខា និងការិយាល័យ និងរដ្ឋាករ ឱ្យដឹងថា ក្នុងគោលបំណងជំរុញនូវកិច្ចសម្រួលពាណិជ្ជកម្មបន្ថែមទៀត ដល់ធុរជននាំចេញ និងនាំចូល អគ្គនាយកដ្ឋានគយ និងរដ្ឋាករសម្រេចកែសម្រួលនីតិវិធីនៃការគ្រប់គ្រងទំនិញផ្ទុកកុងតែន័រដែលមានច្រើនម្ចាស់ដោយពុំតម្រូវឱ្យសាខាគយ និងរដ្ឋាករពាក់ព័ន្ធស្នើសុំមក អ.គ.រ ដើម្បីទទួលបាននូវការអនុញ្ញាតទៀតឡើយ នៅពេលរៀបចំបំពេញបែបបទបញ្ចេញទំនិញពីគយ។

លោក គុណ ញឹម បន្តថា ក្នុងន័យនេះ ប្រធានសាខាគយ និងរដ្ឋាករមានសមត្ថកិច្ចពាក់ព័ន្ធមានសិទ្ធិសម្រេចនៅនឹងកន្លែងដោយអនុញ្ញាតឱ្យកាត់សៀលរើទំនិញពីកុងតែន័រនៃមុខទំនិញដែលមានច្រើនម្ចាស់ ដើម្បីបំពេញបែបបទបញ្ចេញទំនិញពីគយ និង/ ឬ សម្រាប់ការរក្សាទុកក្នុងឃ្លាំងតាមនីតិវិធី និងបទបញ្ញត្តិជាធរមាន។

អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី៩ ខែមករា ឆ្នាំ ២០១៨ កន្លងមកនេះ បានចេញលិខិតលេខ ០០៥២ / ១៨ អគរ នៅក្នុងការពង្រឹងប្រសិទ្ធភាពនៃការគ្រប់គ្រងទំនិញផ្ទុកក្នុងកុងតែន័រ ដែលរក្សាទុកនៅសន្និធិគយបណ្តោះអាសន្ន ឬ ឃ្លាំងទំនិញដែលគ្រប់គ្រងដោយគយមុននឹងបំពេញបែបបទបញ្ចេញទំនិញពីគយចំពោះទំនិញមានម្ចាស់ច្រើន (LCL) ៕

បណ្ឌិតគីម ហ៊ាង ប្តេជ្ញាធ្វើឱ្យតម្លៃអចលនទ្រព្យនៅតំបន់ជុំវិញបូកគោកើនឡើង១០ដងក្នុងរយៈពេល១០ឆ្នាំ

ដោយ វុត្ថា

ភ្នំពេញ៖ លោកឧកញ៉ាបណ្ឌិត គីម ហ៊ាង អគ្គនាយកក្រុមហ៊ុន Keller Williams Cambodia និងទីប្រឹក្សាផ្ទាល់របស់អ្នកឧកញ៉ា សុខ គង់ ប្រធានក្រុមហ៊ុន Sokimex Investment Group បានប្តេជ្ញាធ្វើអោយតម្លៃអចលនទ្រព្យនៅតំបន់គំរោងឋានសួគ៌បូកគោរបស់ អ្នកឧកញ៉ា សុខ គង់ កើនឡើង១០ដង ក្នុងរយៈពេល ១០ឆ្នាំ។

លោកឧកញ៉ាបណ្ឌិត គីម ហ៊ាង បានសរសេរនៅលើទំព័រ Facebook ផ្លូវការនាថ្ងៃទី ១ ខែឧសភា ឆ្នាំ ២០២០ នេះ ខណៈដែលលោកបានចុះពិនិត្យផ្ទាល់នូវតំបន់គំរោងឋានសួគ៌បូកគោរបស់អ្នកឧកញ៉ា សុខ គង់ ថា “ក្នុងនាមជាទីប្រឹក្សាផ្ទាល់របស់អ្នកឧកញ៉ា សុខ គង់ ប្រធានក្រុមហ៊ុន Sokimex Investment Group ខ្ញុំបាទមានការងារសំខាន់តែមួយគត់ គឺធ្វើអោយតម្លៃអចលនទ្រព្យនៅតំបន់នេះ កើនឡើង១០ដង ក្នុងរយៈពេល ១០ឆ្នាំ!” ។

លោកឧកញ្ញ៉ាបណ្ឌិត គីម ហ៊ាង បានឱ្យដឹងថា លោកបណ្ឌិតបានស្នើសុំទៅអ្នកឧកញ៉ា សុខ គង់ ប្រធាន Sokimex Investment Group Co., Ltd ធ្វើជាទីប្រឹក្សារបស់គាត់ដោយមិនទទួលប្រាក់ខែ ដើម្បីបានឱកាសអោយក្រុមការងាររបស់លោកជួយលក់គំរោងឋានសួគ៌បូកគោ និងគំរោងច្រើនទៀត! ។

គម្រោងលំនៅដ្ឋានកំណប់ឋានសួគ៌របស់ អ្នកឧកញ៉ា សុខ គង់ ត្រូវបានបើកការដ្ឋានសាងសង់កាលពីដើមខែមីនា ឆ្នាំ ២០២០កន្លងមកនេះ ក្រោមការអញ្ញើញចូលរួមពីលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដី នគររូបនីយកម្ម និងសំណង់ នៅលើភ្នំបូកគោ ដោយមាន៤ ទីតាំង ទីតាំងទី១-បុរីមរតឋានសួគ៌ភូមិគ្រឹះបេតុងកម្ពស់ ២ជាន់ មានចំនួន ១៣៩១ខ្នង លើផ្ទៃដីទំហំ ១៦ម៉ែត្រ គុណនឹង ២២ម៉ែត្រ។

ទីតាំងទី២-បុរីអម្រឹតឋានសួគ៌ ផ្ទះល្វែងកម្ពស់ ៣ជាន់ មាន ៤២៤០ល្វែង មានផ្ទៃដីទំហំ៥ម៉ែត្រ គុណនឹង២១ម៉ែត្រ ក្នុងនោះមានផ្សារ មន្ទីរពេទ្យ និងសាលារៀន។

ទីតាំង៣-ក្រោនអ៊ីស្តេត ភូមិគ្រឹះកម្ពស់៣ជាន់ មាន ៥៥៨៥ខ្នង លើផ្ទៃដីដីទំហំ ១០ម៉ែត្រគុណនឹង១៨ម៉ែត្រ ផ្ទះល្វែងកម្ពស់៣ជាន់ ១៥៩៥២ល្វែង មានផ្ទៃដីទំហំ៦ ម៉ែត្រគុណនឹង១៤ម៉ែត្រ និងទីតាំងទី៤ បុរី ម៉ោន ស៊ីវីយូ សាងសង់ភូមិគ្រឹះ មានកម្ពស់៣ជាន់ ចំនួន៦៣៧ខ្នង ក្នុងនោះ ភូមិគ្រឹះប្រភេទ-ក ចំនួន៣៦ខ្នងទំហំផ្ទៃដី៣៥ គុណនិង២៥ម៉ែត្រ និងភូមិគ្រឹះប្រភេទ-ខ ៦០១ខ្នងមានផ្ទៃដី២០គុណនឹង២៥ម៉ែត្រ។

អនុលោមតាមអនុក្រឹត្យរបស់រាជរដ្ឋាភិបាល កាលពីកន្លងមកនេះ បានសម្រេចដាក់ឲ្យប្រើប្រាស់ប្លង់គោលប្រើប្រាស់ដីគម្រោងអភិវឌ្ឍន៍ក្រុងបូកគោ ហើយក្រុមហ៊ុនបានរៀបចំគម្រោងអភិវឌ្ឍន៍លំនៅដ្ឋាន នៅលើភ្នំបូកគោ ដោយពុះបំបែកដីជាឡូត៍តូចៗ មានដីឡូត៍ សម្រាប់សាងសង់ផ្ទះល្វែង សម្រាប់សាងសង់ភូមិគ្រឹះ និងសម្រាប់សាងសង់អគារពាណិជ្ជកម្ម ជាដើម ៕

លោក ខន គង្គា៖ ការសិក្សា៥ចំណុចពីអ្នកអភិវឌ្ឍន៍របស់ភ្នាក់ងារអចលនទ្រព្យនឹងធ្វើឱ្យអ្នកទិញមានទំនុកចិត្ត

ដោយ ប៊ី

ភ្នំពេញ៖ អ្នកជំនាញអចលនទ្រព្យបានអះអាងថា ជាមួយការទទួលយកគម្រោងអចលនទ្រព្យសម្រាប់លក់ ភ្នាក់ងារអចលនទ្រព្យត្រូវសិក្សា៥ចំណុចពីអ្នកអភិវឌ្ឍន៍ដើម្បីធ្វើឱ្យអតិថិជនមានទំនុកចិត្ត ខណៈអ្នកអភិវឌ្ឍន៍ក៏ត្រូវសិក្សាពីភ្នាក់ងារអចលនទ្រព្យដើម្បីទទួលបានជោគជ័យក្នុការលក់គម្រោងរបស់ខ្លួន។

លោក ខន គង្គា អគ្គនាយកក្រុមហ៊ុនអចលនទ្រព្យ ERA បានប្រាប់គេហទំព័រ Propertyarea.asia នៅថ្ងៃទី ១ ឧសភា ឆ្នាំ ២០២០ នេះថា ធម្មតាគម្រោងមានច្រើនសម្រាប់ភ្នាក់ងារយកមកដាក់លក់ ខណៈភ្នាក់ងារត្រូវសិក្សាពីចំណុចមួយចំនួនដើម្បីទទួលបានជោគជ័យក្នុងការលក់។

លោក បានបន្តថា “ទី១ ច្បាប់សាងសង់របស់គាត់ (អ្នកអភិវឌ្ឍ) គាត់មានចុះបញ្ជីពន្ធដារត្រឹមត្រូវ ឬអត់? បើសិនជាគាត់បំពេញបាននូវលក្ខខណ្ឌហ្នឹង យើងអាចសហការជាមួយគាត់បានហើយ។

ពេលសួរតើធ្វើយ៉ាងដូចម្តេចដើម្បីធ្វើឱ្យអតិថិជនមានទំនុកចិត្តគម្រោងដែលភ្នាក់ងារយកមកដាក់លក់ លោក គង្គា បានឱ្យដឹងថា “ធម្មតា យើងមិនអាចនិយាយបាន ១០០ ភាគរយនោះទេជាក់ស្តែង។ យើងអាចនិយាយថា បើសិនគម្រោងហ្នឹងគ្រប់លក្ខខណ្ឌដែលយើងបានត្រួតពិនិត្យគឺមានន័យថា លទ្ធភាពនៃជោគជ័យរបស់គាត់មានច្រើន។ ឧទាហរណ៍ ទី១ ការកាន់កាប់ដីរបស់គាត់ជាដីរបស់គាត់ផ្ទាល់ ទី២ គាត់មានចុះបញ្ជីពាណិជ្ជកម្ម ទី៣ គាត់មានច្បាប់សាងសង់ ទី៤ គាត់ប្រកាសពន្ធ និងទី៥គាត់មានអជ្ញាប័ណ្ណសាងសង់ ឬអជ្ញាប័ណ្ណអភិវឌ្ឍន៍” ។

លោកបានថ្លែងថា “មាន ៥ ចំណុចនេះជាកត្តាមួយដែលយើងអាចនិយាយបានថា គាត់ឆ្លងកាត់ ៥០ ភាគរយ បន្ទាប់មកទៀតយើងសិក្សាពីប្រវត្តិរបស់គាត់ ចំណេះជំនាញរបស់គាត់ តើថាគាត់ធ្វើអ្វីខ្លះនៅក្នុងវិស័យនេះ។ បើគាត់មានបទពិសោធមួយ ធ្លាប់ឆ្លងកាត់ ធ្លាប់អភិវឌ្ឍ យើងនឹងសិក្សាបន្ថែមទៀត រហូតដល់សម្រេចចិត្តថា យើងអាចឈានទៅដល់ការយកគម្រោងនោះមកលក់” ។

ជាមួយគ្នានេះដែរ អតិថិជន ឬអ្នកទិញត្រូវការធានាមួយដើម្បីមានទំនុកចិត្តក្នុងការទិញអចលនទ្រព្យក្នុងគម្រោងមួយ។

ជាមួយគ្នានេះដែរ សម្រាប់អ្នកអភិវឌ្ឍន៍ សំខាន់គាត់យកលទ្ធផល។ អ្វីដែលគាត់មើលមកយើងថាតើ យើងមានលទ្ធភាពជួយលក់គាត់បានជោគជ័យ ឬអត់។

លោក គង្គា បានថ្លែងថា អាស្រ័យលើលទ្ធផលគឺទី។ ទី២ គឺកម្លាំងរបស់យើង អាចមានកម្លាំងគ្រប់គ្រាន់។ ឧទាហរណ៍ បើសិនក្រុមហ៊ុនមានកម្លាំង ៤ ទៅ៥នាក់ ហើយងគម្រោងតម្លៃ ៤០០ ទៅ ៥០០ លានដុល្លារ យើងធ្វើបានយ៉ាងដូចម្តេច?

លោក បានបន្តថា “បើនិយាយពីគម្រោង ក្រុមហ៊ុនណាក៏លេខ១ដែរ តែការអនុវត្តជាក់ស្តែង។ អ្នកអភិវឌ្ឍន៍ប្រាកដជាដឹងកិច្ចការនេះ ដូច្នេះអ្វីជាក់ស្តែងគឺលទ្ធផលដែលយើងផ្តល់គាត់” ៕

អ្នកជំនាញស្នើឱ្យអ្នករកស៊ីក្នុងវិស័យអចលនទ្រព្យប្តូរយុទ្ធសាស្ត្រទីផ្សារដោយការ Live លក់តាមអនឡាញ

ដោយ វុត្ថា

ភ្នំពេញ៖ អ្នកជំនាញបានស្នើដល់បណ្តាអ្នករកស៊ីក្នុងវិស័យអចលនទ្រព្យទាំងអស់ ប្តូរយុទ្ធសាស្ត្រទីផ្សារដោយការ Live លក់គម្រោង និងអចលនទ្រព្យនានាតាមអនឡាញ ខណៈដែលបច្ចុប្បន្ននេះអតិថិតិជនភាគច្រើនស្នាក់នៅតាមផ្ទះដោយសារភ័យខ្លាចឆ្លងនូវជំងឺកូវីដ១៩ និងប្រើប្រាស់បណ្តាញទំនាក់ទំនងសង្គមច្រើន ជាពិសេសបណ្តាញសង្គម Facebook។

លោក Chenda Moek អ្នកជំនាញមកពីក្រុមហ៊ុន realestate.com.kh បានឱ្យដឹងនៅក្នុងកម្មវិធីស្ដីពី “ការផ្ដល់ប្រឹក្សាអាជីវកម្មអចលនវត្ថុ” ដែលរៀបចំដោយសមាគមអ្នកវាយតម្លៃ និងភ្នាក់អចលនវត្ថុកម្ពុជា តាមរយៈអនឡាញ កាលពីពេលថ្មីៗនេះថា ក្នុងរយៈពេលដែលមានការផ្ទុះឡើងនូវជំងឺកូវីដ១៩ ស្ទើតែគ្រប់វិស័យទទួលរងផលប៉ះពាល់ ជាមួយគ្នានេះវិស័យអចលនទ្រព្យក៏ទទួលរងផលប៉ះពាល់ខ្លាំងណាស់ដែរតាមរយៈការលក់គម្រោងមិនចេញដែលធ្វើប៉ះពាល់ដល់លំហូរសាច់ប្រាក់។

លោកបន្តថា “ក្នុងរយៈពេលនេះ ទាំងម្ចាស់គម្រោង និងភ្នាក់ងារអចលនទ្រព្យទាំងអស់ត្រូវមានការប្ដូរយុទ្ធសាស្ត្រទីផ្សារតាមរយៈការពង្រឹងអនឡាញដោយការ Live លក់នូវផលិតផលរបស់ខ្លួន ដោយកុំឱ្យអតិថិជនភ្លេចឈ្មោះបាន” ។

លោកបន្ថែមថា “បច្ចុប្បន្ននេះ យើងឃើញគម្រោងដីឡូត៍ និងលំនៅឋានមួយចំនួនបានទៅ Live លក់គម្រោង ខណៈដែលមានមនុស្សនៅក្នុងផ្ទះច្រើន កំពុងតែអនឡាញ ហើយក្នុងរយៈពេលនេះ យើងត្រូវសាងកេរ្តិ៍ឈ្មោះដោយបង្ហាញពីផលិតផលរបស់យើងទៅកាន់អតិថិជន” ។

លោក Mot Chantharith ម្ចាស់គម្រោងលំនៅឋានមួយ បានឱ្យដឹងដែរថា ចាប់តាំងពីមានការផ្ទុះនូវជំងឺកូវីដ១៩កន្លងមកនេះ បានធ្វើឱ្យជីវកម្មលក់លំនៅឋានមានការធ្លាក់ចុះ ខណៈដែលការចំណាយនានាកើនឡើង ដូចជាការចំណាយទៅលើកម្មករ និងសេវាកម្មផ្សេងៗ ដែលទាំងអស់នេះ គឺជាហានីភ័យខ្ពស់នៅក្នុងវិស័យអចលនទ្រព្យ និងការប្រកបមុខរបរ។

លោកបន្តថា “ចំណែកអតិថិជនបានដាក់សំណើសុំពន្យាពេលការបង់ប្រាក់មកក្រុមហ៊ុនច្រើនដែលធ្វើឱ្យចំណូលមានការធ្លាក់ចុះ ។ ជាមួយគ្នានេះ យើងក៏បានពិភាក្សាជាមួយអតិថិជនផងដែរ ពីផលប៉ះពាល់នេះ ហើយបើយើងមិនយល់ព្រមអនុគ្រោះ តាមសំណើរបស់ពួកគេ និងធ្វើឱ្យអតិថិជនរត់ចោលយើង បើយើងអនុគ្រោះធំពេកៗ ក៏មានបញ្ហាហិរញ្ញវត្ថុផងដែរ។ ដូច្នេះយើងត្រូវថ្លឹងថ្លែងពីបញ្ហានេះ” ។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់អចលនវត្ថុកម្ពុជា បានឱ្យដឹងថា វិស័យអចលនទ្រព្យរបស់កម្ពុជាបាននឹងកំពុងថមថយក្នុងរយៈពេលខ្លីជាពិសេសក្នុងអំឡុងផ្ទុះនូវជំងឺកូវីដ១៩ នេះ យ៉ាងណាក៏ដោយសកម្មភាពនៃការរកស៊ីតាមប្រព័ន្ធអនឡាញនៅតែមានសកម្មភាពរស់រង្វើក ដែលប្រការនេះជំរុញឱ្យវស័យអចលនទ្រព្យនៅតែបន្តទៅឆ្ពោះទៅមុខ។

លោកបន្តថា បើទោះបីពួកគេ នៅសម្ងំក្នុងផ្ទះ តែពួកគេនៅតែស្រាវជ្រាវតាមរកទិញ និងលក់ដូរជាប្រចាំដែរ ប្រការនេះ នឹងមិនធ្វើឱ្យវិស័យអចលនទ្រដែលជាសសរស្តម្ភសេដ្ឋកិច្ច មិនថមថយខ្លាំងនោះទេ ខណៈដែលកម្ពុជាកំពុងទទួលរងនូវជំងកូវីដនេះ ក៏ដោយ។

លោកបន្ថែមថា វិស័យអចលនទ្រព្យរបស់កម្ពុជាបានទទួលរងផ្ទួនៗ នៃការថមថយតាមរយៈការបិទល្បែងអនឡាញ ការចូលឆ្នាំសកល ចូលឆ្នាំចិន និងចុងក្រោយបំផុតគឺផលប៉ះពាល់ដោយជំងឺកូវីដ១៩ តែយ៉ាងណាក៏ដោយគឺក្នុងរយៈពេលខ្លីប៉ុណ្ណោះ រដ្ឋាភិបាលបាននឹងកំពុងគិតយ៉ាងយកចិត្តទុកដាក់លើបញ្ហានេះ ៕