ដោយ ប៊ី

ភ្នំពេញ៖ ផ្សារហ៊ុនកម្ពុជារហូតមកពេលនេះបាននិងកំពុងទាក់ទាញក្រុមហ៊ុន និងគ្រឹះស្ថានហិរញវត្ថុជាច្រើនក្នុងការចូលរួមបោះមូលបត្រកាន់ច្រើន បើទោះបីកម្ពុជាកំពុងប្រឈមនឹងវិបត្តិCOVID-19 ក៏ដោយ។

ក្រុមហ៊ុន អ អិម អេ (ខេមបូឌា) ម.ក (RMA Cambodia) កាលពីថ្ងៃទី៣០ ខែមេសា ឆ្នាំ២០២០នេះ បានចុះបញ្ជីលក់មូលបត្របំណុលចំនួន ៨០ពាន់លានរៀល ដែលស្មើនឹង២០លានដុល្លារអាមេរិក ដែលមានរយៈពេល៥ឆ្នាំជាមួយអត្រាគូប៉ុង ៥.៥០%ក្នុងមួយឆ្នាំនៅផ្សារមូលបត្រកម្ពុជា ដែលជាការ បោះផ្សាយលក់មូលបត្របំណុល លើកដំបូងនៅក្នុងប្រវត្តិសាស្រ្តរបស់ខ្លួន។

ជាមួយគ្នានេះដែរ ធនាគារ អេស៊ីលីដា ភីអិលស៊ី (“ធនាគារ”) បានបញ្ចប់ដំណើរការបរិវិសកម្ម កាលពីថ្ងៃសុក្រ ទី២៤ ខែមេសា ឆ្នាំ២០២០។ ធនាគារបានទទួលការអនុម័តពី គណៈកម្មការមូលបត្រកម្ពុជា លើលទ្ធផលនៃការធ្វើបរិវិសកម្ម នៅថ្ងៃទី៣០ ខែមេសា ឆ្នាំ២០២០ ។

ទាក់ទងនឹងការបោះផ្សាយមូលបត្របំណុលរបស់ RMA Cambodia លោក ស៊ូ សុជាតិ អគ្គនាយក នៃគណៈកម្មការមូលបត្រកម្ពុជា ដែលជានិយតករមូលបត្ររបស់កម្ពុជា បានឱ្យដឹងដែរថា ការបោះផ្សាយមូលបត្របំណុល ដោយជោគជ័យរបស់ RMA Cambodia នឹងក្លាយជាគំរូមួយសម្រាប់ប្រតិបត្តិការនាពេលអនាគត។ មូលបត្របំណុល ដែលមានបុគ្គលធានានេះ ផ្តល់នូវជម្រើស ឧបករណ៍ហិរញ្ញវត្ថុថ្មីមួយសម្រាប់ក្រុមហ៊ុនឯកជនក្នុងវិស័យផ្សេងៗ ដើម្បីប្រមូលមូលនិធិកាន់តែច្រើនជាមួយនឹងរយៈពេលវែងជាងមុន។

លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា បានឱ្យដឹងដែរថា ទោះបីមានស្ថានភាពទីផ្សារ មានភាពមិននឹងនរក៏ដោយ នឹងនៅតែបន្តសម្រេច ក្នុងការចុះបញ្ជីលក់មូលបត្របំណុលរបស់ក្រុមហ៊ុន RMA Cambodia នៅផ្សារមូលបត្រកម្ពុជាបានដោយរលូន។ ក្នុងស្ថានភាពបែបនេះ វាជាសញ្ញានៃការតស៊ូ និងបង្ហាញពីសញ្ញាវិជ្ជមានដល់វិនិយោគិននានា។

សម្រាប់ធនាគារអេស៊ីលីដាបានទទួលការអនុម័តពី គណៈកម្មការមូលបត្រកម្ពុជា លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី មានប្រសាសន៍ថា “ទោះបីជាមានផលប៉ះពាល់យ៉ាងខ្លាំងជាសកល ពីការរីករាលដាលនៃវីរុសកូវីដ-១៩ យ៉ាងណាក៏ដោយ ក៏វិនិយោគិនប្រមាណ ២.៤៩៧ នាក់ បានចូលរួមក្នុងដំណើរការបរិវិសកម្ម ដោយចំណាយពេលវេលាដ៏មានតម្លៃ និងថវិកា ដើម្បីវិនិយោគនៅក្នុង ធនាគារ អេស៊ីលីដា ភីអិលស៊ី”។

លោក បានមានប្រសាសន៍ថា “ការចូលរួមយ៉ាងសកម្មនេះ ស្តែងចេញពីការជឿទុកចិត្តរបស់សាធារណជន ចំពោះលទ្ធផលប្រតិបត្តិការ និងស្ថានភាពហិរញ្ញវត្ថុដ៏រឹងមាំ ក៏ដូចជាការឈានមុខគេរបស់ធនាគារ អេស៊ីលីដា ភីអិលស៊ី នៅក្នុងវិស័យធនាគារនៅកម្ពុជា”។

លោកបានបន្ថែមថា “ធនាគារ អេស៊ីលីដា ភីអិលស៊ី គ្រោងនឹងចុះបញ្ជីភាគហ៊ុនជាផ្លូវការនៅក្នុងក្រុមហ៊ុនផ្សារមូលបត្រកម្ពុជា នៅក្នុងខែឧសភា ឆ្នាំ២០២០ ។ បន្ទាប់ពីការចុះបញ្ជីនេះត្រូវបានបញ្ចប់ ធនាគារ អេស៊ីលីដា ភីអិលស៊ី នឹងក្លាយជាធនាគារពាណិជ្ជដំបូងគេ ដែលមានការជួញដូរភាគហ៊ុនជាសាធារណៈនៅកម្ពុជា” ។

លោក Han Kyung Tae អគ្គនាយកក្រុមហ៊ុន យាន់តា ស៊ីឃ្យួរឹធី (ខេមបូឌា) ភីអិលស៊ី បានមានប្រសាសន៍ថា “ទោះបីជាស្ថិតនៅក្នុងកំឡុងពេលនៃការរីករាលដាលនៃវីរុសកូវីដ-១៩ យ៉ាងណាក៏ដោយ ក៏ការធ្វើបរិវិសកម្មមូលបត្រកម្មសិទ្ធិរបស់ធនាគារ អេស៊ីលីដា ភីអិលស៊ី ទទួលបានលទ្ធផលល្អ”។

ធនាគារ អេស៊ីលីដា ភីអិលស៊ី និងគណៈគ្រប់គ្រងធនាគារ បានបង្ហាញនូវការប្តេជ្ញាចិត្តខ្ពស់ ក្នុងការជម្រុញការចុះបញ្ជី ទៅតាមផែនការដែលបានគ្រោងទុក ហើយការប្តេជ្ញាចិត្តនេះហាក់ដូចជាការសម្រេចចិត្តដ៏ប្រយ័ត្នប្រយែងមួយ។

លោក Han Kyung Tae បានថ្លែងបន្តថា ក្នុងនាមជាក្រុមហ៊ុនធានាទិញមូលបត្រដែលដឹកនាំគម្រោងដ៏សំខាន់នេះ ក្រុមហ៊ុន យាន់តា ស៊ីឃ្យួរឹធី (ខេមបូឌា) ភីអិលស៊ី នឹងបន្តធ្វើឲ្យអស់ពីសមត្ថភាព ដើម្បីជួយទាំងក្រុមហ៊ុនបោះផ្សាយ និងទាំងវិនិយោគិនយ៉ាងច្រើន ដែលបានចូលរួមក្នុងដំណើរការបោះផ្សាយលក់មូលបត្រកម្មសិទ្ធិជាសាធារណៈនេះ ដោយផ្តោតលើការបង្កើនសន្ទនីយភាពដល់ភាគហ៊ុនរបស់ធនាគារនៅក្នុងទីផ្សារបន្ទាប់”។

លោក បានបន្តថា “យើងខ្ញុំជឿជាក់ថា ការជួយក្រុមហ៊ុនបោះផ្សាយក្នុងការធ្វើការបោះផ្សាយភាគហ៊ុនបន្តបន្ទាប់មកទៀត និងការរៀបចំវិធីសាស្រ្តជួញដូរតាមការចរចានាពេលអនាគត នឹងជួយបង្កើនសន្ទនីយភាព និងទាក់ទាញវិនិយោគិនបរទេសកាន់តែច្រើន មិនត្រឹមតែសម្រាប់ភាគហ៊ុនរបស់ ធនាគារ អេស៊ីលីដា ភីអិលស៊ី ប៉ុណ្ណោះទេ ថែមទាំងសម្រាប់ទីផ្សារមូលធននៅកម្ពុជាផងដែរ”៕

ដោយវុត្ថា

ភ្នំពេញៈ សហគ្រាសខ្នាតតូចបំផុត តូចនិងមធ្យម (MSMEs) និងប្រភេទអាជីវកម្មបង្កើតថ្មី( Tech Startup)នៅកម្ពុជា កំពុងទទួលរងផលបះពាល់ដោយសារការរីករាលដាលជាសកលនៃជំងឺកូវីដ–១៩ ខណៈស្ថាប័នពាក់ព័ន្ធបាននិងកំពុងស្វែងរកដំណោះស្រាយសមស្របជួយឱ្យកាន់តែប្រសើរក្រោយចប់កូវីដ១៩។

នេះបើយោងតាមការផ្សព្វផ្សាយរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍នៅថ្ងៃទី ១ ខែឧសភា ឆ្នាំ ២០២០ នេះ បន្ទាប់ពីកិច្ចប្រជុំវាង លោក ទេសរដ្ឋមន្រ្តី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ និងកិច្ចប្រជុំជាមួយតំណាងក្រសួងប្រៃសណីយ៍ និងទូរគមនាគមន៍ និងភាគីពាក់ព័ន្ធកាលពីរសៀលថ្ងៃទី៣០ ខែមេសា ឆ្នាំ២០២០ ស្តីពីការវាយតម្លៃផលប៉ះពាល់នៃជំងឺកូវីដ–១៩ទៅលើ MSMEs និង Tech Startup នៅកម្ពុជា ។

លោកទេសរដ្ឋមន្រ្តី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ឱ្យដឹងថា កិច្ចប្រជុំនាពេលនេះគឺមានសារ:សំខាន់ ដើម្បីបានស្តាប់បទឧទ្ទេសនាម នូវលទ្ធផលអង្កេតស្រាវជ្រាវពីអ្នកជំនាញ និងការផ្លាស់ប្តូរយល់ទាក់ទងនិងផលបច្ច័យដែលជាវិបត្តិបង្កឡើងពីជំងឺកូវីដ–១៩ ទៅលើវិស័យ MSMEs និងប្រភេទអាជីវកម្មបង្កើតថ្មី ( Tech Startup )នៅកម្ពុជា ។

លោកទេសរដ្ឋមន្ត្រីបន្តថា យើងក៏អាចប្រមូលធាតុចូល តាមរយ:អនុសាសន៍ ក៏ដូចជាកង្វល់នានា ដែលបានលើកឡើងពីវាគ្មិនពាក់ព័ន្ធ រួមជាមួយវិធានការណ៌ជាអាទិភាពមួយចំនួនដែលត្រូវប្រកាន់យក ដើម្បីស្តារភាពរស់រវើកឡើងវិញ ក្រោយពីវិបត្តិCovid-19 បានថមថយនិងរលត់ទៅ។

លោក កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍បាន  ឱ្យដឹងថា កិច្ចសហការដ៏ល្អរវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងប្រៃសណីយ៍និងទូរគមនាគមន៍ លើគំនិតផ្តួចផ្តើមមួយចំនួនបានជួយលើកកំពស់វិស័យ MSMEs និងប្រភេទអាជីវកម្មបង្កើតថ្មី (Tech Startup) នៅកម្ពុជា ក្នុងបរិបទនៃបដិវត្តន៍ឧស្សាហកម្មជំនាន់ទី៤។

លោកបន្ថែមថា “”លទ្ធផលបង្ហាញពីការអង្កេត ស្រាវជ្រាវ ចាត់ទុកជាការពាំនាំនូវសម្លេងនៃវិស័យឯកជនពាក់ព័ន្ធខាងលើ ដើម្បីពិនិត្យមើលថាតើបច្ច័យទាំងអស់នេះរដ្ឋាភិបាល ស្ថាប័នពាក់ព័ន្ធ ក៏ដូចជាដៃគូអភិវឌ្ឍន៍ ប្រកាន់យកវិធានការណ៌ រឺកត្តាអាទិភាពយ៉ាងណាខ្លះ? ដើម្បីគាំទ្រទៅដល់ Eco-Systemរបស់យើង ដូចជាតាមរយ:វិធានការណ៍ហិរញវត្ថុ គោលនយោបាយ ពន្ធដា និងពាក់ព័ន្ធធនាគារដែលផ្តល់កម្ចីជាដើម”។

លោកស៊ឹម ច័ន្ទគីរីរ័ត្ន តំណាងមកពីសមាគមសហគ្រិនវ័យក្មេងកម្ពុជាបានឱ្យដឹងដែរថា  ផលប៉ះពាល់នៃជំងឺកូវីដ–១៩ ទៅលើសហគ្រាសខ្នាតតូចបំផុត តូចនិងមធ្យម (MSMEs) និងប្រភេទអាជីវកម្មបង្កើតថ្មី (Tech Startup) នៅកម្ពុជា បានចាប់ផ្តើមឡើងកាលពីចុងខែមីនា និងចុងខែមេសាឆ្នាំ២០២០កន្លងមក។

លោកទេសរដ្ឋមន្រ្តី ចម ប្រសិទ្ធ ឱ្យដឹងបន្ថែមថា ផលប៉ះពាល់ពីជំងឺកូវីដ–១៩ បានបង្អាក់ដំណើររីកលូតលាស់សេដ្ឋកិច្ចជាសកល។ ចំពោះកម្ពុជាក៏ដូចគ្នា ផ្តើមចេញពីបញ្ហានេះ ពិតណាស់រាជរដ្ឋាភិបាល ក្រសួងស្ថាប័នពាក់ព័ន្ធ ភ្នាក់ងារអភិវឌ្ឍន៍ វិស័យធនាគារ និងដៃគូឯកជនត្រូវរួមគ្នារិះរកមធ្យោបាយសមស្រប ដើម្បីធ្វើឲ្យប្រសើរឡើងវិញនៃឱកា​ស​អាជីវកម្មក្រោយ កូវីដ–១៩ ។

លោកចម ប្រសិទ្ធថ្លែងថា  “យើមិនអាចធ្វើអ្វីដោយគ្មានការវិភាគ និងកំណត់មុខសញ្ញាច្បាស់លាស់ទេ គឺយើត្រូវកំណត់កត្តាអាទិភាព តាមវិស័យនីមួយៗ ហើយក្រសួងស្ថាប័នពាក់ព័ន្ធ ជាតួអង្គសំខាន់ក្នុងការចូលរួមសហការទាំងអស់គ្នា”៕

ដោយវុត្ថា

ភ្នំពេញ៖ កម្ពុជាស្នើឱ្យសហរដ្ឋអាមេរិកពិចារណាក្នុងការជួយគាំទ្រលើវិស័យកំពង់ផែ ដឹកជញ្ជូន និងហេដ្ឋារចនាសម្ព័ន្ធផ្លូវគោក និងផ្លូវដែក ជាពិសេសការ កសាងសមត្ថភាពដល់មន្ត្រីជំនាញនៅក្នុងការកសាងផ្លូវថ្នល់ ក្នុងរូបភាពជាការផ្តល់នូវវគ្គបណ្តុះបណ្តាលឬការផ្លាស់ប្តូរនូវក្រុមជំនាញការ ទស្សនកិច្ចសិក្សារវាងកំពង់ផែស្វយ័តក្រុងព្រះសីហនុ និងកំពង់ផែទីក្រុង Los Angeles ជាដើម។

សំណើរនេះ ត្រូវបានធ្វើឡើងនៅក្នុងជំនួបពិភាក្សាការងាររវាង លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន និង លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា កាលពីថ្ងៃទី ៣០ ខែមេសា ឆ្នាំ ២០២០ ម្សិលមិញនេះ នៅទីស្តីការក្រសួង ។

លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានឱ្យដឹងថា ចំពោះសំណើររបស់ភាគីកម្ពុជានេះ នឹងទទួលយកទៅពិចារណា ដើម្បីឈានទៅដល់ការពង្រីកបន្ថែមទៀតនូវកិច្ចសហប្រតិបត្តិការរវាងប្រទេសទាំងពីរលើវិស័យទាំងនេះ។

លោកបន្តថា សម្រាប់ខួបលើកទី៧០នៃទំនាក់ទំនងការទូតរវាងប្រទេសកម្ពុជា និងសហរដ្ឋអាមេរិក ដែលខែនីមួយៗនៃឆ្នាំនេះនឹងផ្តោតទៅលើប្រធានបទផ្សេងៗគ្នា ដូចជាខែមេសា និងឧសភា គឺជាខែសម្រាប់បរិស្ថាន និងសុខភាពសាធារណៈ រីឯខែកញ្ញា ត្រូវផ្តោតលើប្រធានបទពាណិជ្ជកម្មនិងវិនិយោគ ដែលនឹងមានការធ្វើទស្សនកិច្ចពីក្រុមប្រឹក្សាធុរកិច្ចអាស៊ាន-អាមេរិក មកកាន់ កម្ពុជាជាដើម។

លោកទេសរដ្ឋមន្ត្រី ស៊ុន ចាន់ថុល បានសម្តែងនូវការកោតសរសើរចំពោះកិច្ចសហការ និងទំនាក់ទំនងទ្វេភាគីរវាងប្រទេសទាំងពីរ និងបានបង្ហាញភាពរីករាយ និងស្វាគមន៍ចំពោះកិច្ចសហការជាមួយសហរដ្ឋអាមេរិកទាក់ទងនឹងគម្រោងនានានៅពេលអនាគតក្នុងវិស័យសាធារណការ និងការដឹកជញ្ជូន។

លោកបន្ថែមទៀតថា ចំពោះស្ថានភាពនៅកម្ពុជាមានភាពល្អប្រសើរ រួមទាំងស្ថានភាពសេដ្ឋកិច្ច ជាពិសេសការធ្វើចរាចរណ៍ដោយរលូននៃការដឹកជញ្ជូនឆ្លងកាត់ព្រំដែនជាមួយប្រទេសជិតខាង ទោះបីជាមានការអនុវត្តនូវវិធានការចត្តាឡីស័ក ដែលដាក់ឱ្យនៅដាច់ដោយឡែកចំនួន១៤ថ្ងៃ ចំពោះបញ្ជាការនាវិកបរទេសដែលចូលមកកម្ពុជា និងចំពោះការដឹកជញ្ជូនឆ្លងកាត់ព្រំដែនតាមផ្លូវគោកជាមួយប្រទេសវៀតណាម ដើម្បីបញ្ចៀសការចម្លងនៃជំងឺនេះ តម្រូវឱ្យមានការផ្លាស់ប្តូរអ្នកបើកបររថយន្តដឹកទំនិញនៅតំបន់ស៕

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលកម្ពុជា បាន និងកំពុងសិក្សាលម្អិតទៅលើការរៀបចំជាកញ្ចប់វិធានការថ្មីសម្រាប់ជួយអន្តរាគមន៍ដល់វិស័យឯកជននានា ជាពិសេស សហគ្រាសធុនតូច និងមធ្យម ដែលត្រូវបានចាត់ទុកជាចំណែកនៃឆ្អឹងខ្នងសេដ្ឋកិច្ចកម្ពុជា។

លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍នៅក្នុងកិច្ចប្រជុំពិសេសរបស់គណៈកម្មាធិកាគោលនយោបាយសេដ្ឋកិច្ច និងហិរញ្ញវត្ថុជាមួយវិស័យឯកជនស្ដីពីស្ថានភាពអាជីវកម្មនាពេលបច្ចុប្បន្ន និងវិធានការចាំបាច់នានានៅក្នុងបរិបទជំងឺ Covid-19 កាលពីថ្ងៃទី៣០ ខែមេសា ឆ្នាំ២០២០ម្សិលមិញនេះថា រាជរដ្ឋាភិបាលតែងតែចាត់ទុកវិស័យឯកជនជាចលករដ៏សំខាន់ក្នុងការជំរុញកំណើនសេដ្ឋកិច្ចជាតិ។

លោកឧបនាយករដ្ឋមន្ត្រីបានមានប្រសាសន៍បន្តទៀតថា “នៅក្នុងបរិការណ៍នៃការរីករាលដាលជំងឺ Covid-19 នេះ រាជរដ្ឋាភិបាល និងវិស័យឯកជនកំពុងតែប្រឈមនឹងបញ្ហារួមក្នុងការបន្តលើកកម្ពស់កិច្ចអភិវឌ្ឍន៍សង្គម-សេដ្ឋកិច្ចកម្ពុជាប្រកបដោយចីរភាព ឬអាចនិយាយបានថា រាជរដ្ឋាភិបាល និងវិស័យឯកជនកំពុងធ្វើដំណើរក្នុងទូកតែមួយ រួមសុខ រួមទុក្ខជាមួយគ្នា។ វិស័យឯកជន និងរាជរដ្ឋាភិបាល ត្រូវបន្តសហការយ៉ាងជិតស្និទ្ធក្នុងការត្រៀមកម្លាំងរួចជាស្រេចក្នុងការចាប់យកកាលានុវត្តភាពថ្មីនានាដែលអាចកើតមានឡើងក្នុងអំឡុងពេល និងក្រោយវិបត្តិជំងឺ Covid-19 ”។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានបញ្ជាក់ថា “ការចូលរួមចំណែកក្នុងការរំលែកទុក្ខលំបាក និងដោះស្រាយបញ្ហាប្រឈមរួមចំពោះមុខ ក្នុងការជួយស្ដារការអភិវឌ្ឍប្រទេសកម្ពុជាក្នុងអំឡុងពេលលំបាកនេះ គឺជាកត្តាចាំបាច់មិនអាចខ្វះបាន។ ជាក់ស្ដែង រាជរដ្ឋាភិបាលបានដាក់ចេញនូវវិធានការអន្តរាគមន៍ចំនួន៣ជុំរួចមកហើយ ដើម្បីគ្រប់គ្រងផលប៉ះពាល់នៅក្នុងវិស័យសំខាន់ៗដោយគិតគូរលើគ្រប់ទិដ្ឋភាពដូចជា ទី១-ជួយដល់ក្រុមហ៊ុន រោងចក្រ សហគ្រាស និងអាជីវកម្មដែលទទួលរងផលប៉ះពាល់ ដើម្បីឱ្យក្រុមហ៊ុនទាំងនោះអាចបន្តអាជីវកម្មបាន។ ទី២-ជួយដល់កម្មករ និយោជិត ដែលបាត់បង់ ឬព្យួរការងារឱ្យមានលំនឹងជីវភាព ហើយទី៣-ទ្រទ្រង់កំណើន ជាពិសេស ជួយដល់សហគ្រាសធុនតូច និងមធ្យម ដែលជាឆ្អឹងខ្នងនៃសេដ្ឋកិច្ចជាតិ។

នៅក្នុងកិច្ចប្រជុំពិសេសនេះ តំណាងធុរជនសំខាន់ៗនៃវិស័យឯកជន លើកឡើងពីការវាយតម្លៃស្ថានភាពធុរកិច្ចបច្ចុប្បន្ននៅកម្ពុជា ជាពិសេសបញ្ហាដែលកំពុង ជួបប្រទះក្នុងវិស័យនីមួយៗបន្ថែមទៀត និងស្នើជាវិធានការជូនរាជរដ្ឋាភិបាលពិចារណា សំដៅចូលរួមចំណែកស្ដារ និងជំរុញកំណើនសេដ្ឋកិច្ចឡើងវិញ។ ជាមួយគ្នានេះ វិស័យឯកជនក៏បានសម្ដែងឆន្ទៈយ៉ាងមុះមុត និងការអត់ធ្មត់របស់ខ្លួនក្នុងការចូលរួមចំណែកជាមួយរដ្ឋាភិបាលក្នុងការដោះស្រាយបញ្ហាប្រឈម និងពាក់ព័ន្ធនានា។

ការរីករាលដាលនៃជំងឺ Covid-19 បាន និងកំពុងគំរាមកំហែងកាន់តែខ្លាំងមកលើដំណើរការអាជីវកម្មក្នុងវិស័យសេដ្ឋកិច្ចសំខាន់ៗរបស់កម្ពុជា ដោយសារតែកំណើនសេដ្ឋកិច្ចតំបន់ និងសាកលមានការថមថយ ជាពិសេស ការធ្លាក់ចុះនៃតម្រូវការទីផ្សារខាងក្រៅ ការបិទការធ្វើដំណើររបស់ប្រទេសក្នុងតំបន់ និងសាកលលោក និងប្រសិទ្ធភាពនៅមានកម្រិតនៃការអនុវត្តវិធានការបង្ការ និងទប់ស្កាត់ការឆ្លងនៃជំងឺដែលកំពុងតែរាតត្បាតមួយនេះ ៕