សេដ្ឋកិច្ចអឺរ៉ុបទាំងមូលដាំក្បាលចុះក្នុងវិបត្តិមិនធ្លាប់មានក្នុងរយៈពេលជិត៣ទសវត្សរ៍

ដោយ ប៊ី

អន្តរជាតិៈ ព្រះអាទិត្យកំពុងលិចនៅអឺរ៉ុបមែនទេ? ខណៈវិបត្តិសេដ្ឋកិច្ចនៅប្លុកនេះ បាននិងកំពុងចាប់ផ្តើម ដែលបង្កឡើងដោយការដាក់ចេញនូវវិធានការណ៍ដើម្បីទប់ទល់នឹងវីរុសនេះ។

យោងតាមទិន្នន័យបឋម ដែលបានចេញផ្សាយកាលពីថ្ងៃព្រហស្បតិ៍ ទី៣០ ខែមេសា ឆ្នាំ២០២០នេះបានបង្ហាញថា ផលិតផលក្នុងស្រុកសរុបរបស់សហភាពអឺរ៉ុប បានធ្លាក់ចុះ ៣,៥ភាគរយនៅក្នុងត្រីមាសទី១ នៃឆ្នាំ២០២០ ធៀបនឹងត្រីមាសចុងក្រោយនៃឆ្នាំមុន នៅពេលដែលសេដ្ឋកិច្ចក្នុងតំបន់នៅតែរីកចម្រើន។ បើប្រៀបធៀបនឹងត្រីមាសទី១ ឆ្នាំ ២០១៩ ការធ្លាក់ចុះមាន ២,៧ភាគរយ។

ទិន្នផលសេដ្ឋកិច្ចនៅក្នុងប្រទេសចំនួន១៩ ដែលប្រើប្រាស់ប្រាក់អឺរ៉ូបានធ្លាក់ចុះ ៣,៨ភាគរយ ក្នុងរយៈពេលពីខែមករាដល់ខែមីនា។

ការិយាល័យស្ថិតិរបស់សហភាពអឺរ៉ុប បានឱ្យដឹងនៅក្នុងសេចក្តីថ្លែងការណ៍មួយថា “ទាំងនេះគឺជាការធ្លាក់ចុះខ្លាំងបំផុត ដែលបានសង្កេតចាប់តាំងពីឆ្នាំ១៩៩៥” ។

បណ្តាប្រទេសនៅទូទាំងអឺរ៉ុប បានដាក់កម្រិតយ៉ាងតឹងរ៉ឹង លើសកម្មភាពធ្វើដំណើរ និងអាជីវកម្មក្នុងខែមីនា ក្នុងគោលបំណង ដើម្បីការពារការរីករាលដាលនៃជំងឺ COVID-19 ។ ហាងតូចៗត្រូវបានបិទ ហើយរោងចក្រជាច្រើនបានបិទទ្វារ។

ការធ្លាក់ចុះនេះត្រូវបានរំពឹងថា នឹងនៅបន្តកាន់ខ្លាំងនៅក្នុងត្រីមាសទី២ ដោយសារតំបន់ភាគច្រើន បានជាប់គាំងអស់រយៈពេលពេញមួយខែមេសា។

លោក Carsten Brzeski ប្រធានសេដ្ឋវិទូនៅក្រុមហ៊ុន ING ប្រទេសអាល្លឺម៉ង់ បានសរសេរសង្គម Twitter ថា “ត្រៀមខ្លួនអ្នកឱ្យហើយសម្រាប់រឿងអាក្រក់ ដែលនឹងកើតឡើង។ យោងតាមទិន្នន័យប្រចាំត្រីមាសទី១ លោកបាននិយាយថា “ការបិទទ្វារ និងការផ្គត់ផ្គង់ខ្សែសង្វាក់ផលិតកម្មមានរយៈពេលប្រហែលពីរសប្តាហ៍។

រដ្ឋាភិបាលបានឆ្លើយតប ដោយប្រកាសកម្មវិធីការពារការងារ ដើម្បីព្យាយាមទប់ស្កាត់ការកើនឡើងនៃភាពគ្មានការងារធ្វើ។ ទិន្នន័យដែលបានផ្សព្វផ្សាយ កាលពីថ្ងៃព្រហស្បតិ៍បានបង្ហាញ ពីការកើនឡើងតិចតួច នៅក្នុងអត្រាគ្មានការងារធ្វើនៅអឺរ៉ុប ក្នុងខែមីនាដល់៦,៦ ភាគរយពី៦,៥ ភាគរយ ក្នុងខែកុម្ភៈ៕ CNN៕

អ្នកជំនាញ៖ វិស័យអចលនទ្រព្យនៅកម្ពុជានឹងទទួលឥទ្ធិពលវិជ្ជមានបន្ទាប់ពីសេដ្ឋកិច្ចចិនងើបឡើងវិញ

ដោយ ប៊ី

ភ្នំពេញៈ សេដ្ឋកិច្ចរបស់ប្រទេសចិនត្រូវបានរំពឹងថា នឹងងើបឡើងវិញនៅក្នុងត្រីមាសទី២ ខណៈអ្នកជំនាញអចលនទ្រព្យកម្ពុជា បានអះអាងការងើបឡើងវិញនៃសេដ្ឋកិច្ចចិន នឹងជះឥទ្ធិពលវិជ្ជមានដល់វិស័យអចលនទ្រព្យនៅកម្ពុជា ដោយសារវិនិយោគិនចិនឈរនៅលំដាប់លេខ១ក្នុងវិស័យនេះ។

សេដ្ឋកិច្ចរបស់ប្រទេសចិនត្រូវបានរំពឹងថា នឹងងើបឡើងវិញនៅក្នុងត្រីមាសទី២ បន្ទាប់ពីបានធ្លាក់ចុះនៅក្នុងត្រីមាសទី១ ចំពេលដែលការរីករាលដាលនៃជំងឺ Covid-19 ។ នេះបើតាមការព្យាករណ៍របស់សេដ្ឋវិទូកាលពីសប្តាស៍មុន។

លោក Piao Renjin អ្នកវិភាគប្រចាំក្រុមហ៊ុន NH Investment & Securities នៅទីក្រុងសេអ៊ូល បាននិយាយថា ប្រទេសចិនបានឆ្លើយតបយ៉ាងឆាប់រហ័ស ចំពោះការរីករាលដាល នៃការគ្របដណ្តប់លើជំងឺ Covid-19 ដោយមានកញ្ចប់ថវិកាជំរុញសេដ្ឋកិច្ចនិងហិរញ្ញវត្ថុនាំឱ្យមានការស្ទុះងើបឡើងវិញ យ៉ាងឆាប់រហ័សនៅក្នុងទីផ្សារហិរញ្ញវត្ថុ។

អ្នកវិភាគរូបនេះបាននិយាយថា “រដ្ឋាភិបាលចិនត្រូវបានគេព្យាករណ៍ថា នឹងពង្រីកវិធានការជំរុញសារពើពន្ធនិងរូបិយវត្ថុ ហើយអ្នកអាចមើលឃើញការងើបឡើងវិញ នៅក្នុងប្រទេសចិនក្នុងត្រីមាសទី២” ។

លោកលោកច្រឹក សុនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់គេហទំព័រ Propertyarea.asia នៅថ្ងៃទី ២៩ ខែមេសា ឆ្នាំ ២០២០ នេះ ថា ជារួម ចិនបានបោះទុនវិនិយោគច្រើនជាងគេ នៅក្នុងវិស័យអចលនទ្រព្យនៅកម្ពុជា ព្រោះពួកគេដឹងពីសក្តានុពលរបស់វិស័យអចលនទ្រព្យនៅកម្ពុជា។

លោកបានថ្លែងថា “បញ្ហាប្រឈមបច្ចុប្បន្នគឺជាបញ្ហារយៈពេលខ្លី ហើយនៅពេល អ្វីៗត្រឡប់មករកសភាពធម្មតាឡើងវិញ វិស័យអចលនទ្រព្យនៅកម្ពុជានឹងកំណើនកាន់តែខ្លាំងជាងមុនទៅទៀត។លោកបានបន្តថា “ការងើបឡើងវិញសេដ្ឋកិច្ចចិន គឺជារឿងល្អមួយសម្រាប់អចលនទ្រព្យនៅកម្ពុជា ព្រោះគាត់នឹងមកបន្តការវិនិយោគនៅកម្ពុជា” ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍ប្រាប់គេហទំព័រ Propertyarea.asia ស្រដៀងគ្នាថា ការងើបឡើងសេដ្ឋកិច្ចរបស់ប្រទេសចិន នឹងផ្តល់ផលវិជ្ជមាន ដល់វិស័យអចលនទ្រព្យនៅកម្ពុជា ខណៈបច្ចុប្បន្នវិបត្តិការ COVID-19 ធ្វើឱ្យមានផលប៉ះពាល់ជាសកល មិនត្រឹមតែកម្ពុជាប៉ុណ្ណោះទេ។

លោកស្រីបានបន្តថា “ការបើកសេដ្ឋកិច្ចរបស់ប្រទេសចិន នឹងផ្តល់ប្រយោជន៍ដល់វិស័យអចលនទ្រព្យនៅកម្ពុជា ប៉ុន្តែវាទាមទាររយៈពេលទៅខាងមុខ សម្រាប់កម្ពុជាទទួលបានចំហាយកំណើនសេដ្ឋកិច្ចរបស់ចិន” ។

លោកបានលើកឡើងថា “យើងដឹងហើយ ចិនឈរនៅលំដាប់កំពូលនៃអ្នកវិនិយោគក្នុងវិស័យអចលនទ្រព្យនៅកម្ពុជា” ។

លំហូរនៃការវិនិយោគដោយផ្ទាល់ពីបរទេស ចូលក្នុងវិស័យអចលនៈទ្រព្យ (រួមបញ្ចូលទាំងអចលនទ្រព្យ និងខុនដូគ្រប់ប្រភេទ) នៅកម្ពុជាត្រូវបានប៉ាន់ប្រមាណថា មានចំនួនជាង ៤៣៧លានដុល្លារក្នុងឆ្នាំ២០១៩ ។ នេះបើយោងតាមទិន្នន័យពីរបាយការណ៍ត្រួតពិនិត្យប្រចាំឆ្នាំរបស់ធនាគារជាតិនៃកម្ពុជា ដែលបានចេញផ្សាយ នៅថ្ងៃទី២៧ ខែមេសាឆ្នាំ ២០២០ ។

ក្នុងចំណោមលំហូរនៃការវិនិយោគ ដោយផ្ទាល់ពីបរទេសសរុបទៅក្នុងវិស័យអចលនទ្រព្យប្រទេសចិន មានការវិនិយោគធំជាងគេនៅកម្ពុជា។ ប្រទេសចិនបានចូលរួមវិភាគទានប្រហែល៥៨,៨ ភាគរយ(ឬជាង២៦២ លានដុល្លារ) នៃនៃការវិនិយោគដោយផ្ទាល់ពីបរទេសសរុប បន្ទាប់មកប្រទេសសិង្ហបុរី ១៥,២ ភាគរយ ឬ៦៧,៧៥ លានដុល្លារ អាមេរិក៥៣,៥ លានដុល្លារ ២៧,២៥លានដុល្លារពីប្រទេសកូរ៉េខាងត្បូង និង១៥,៥ លានដុល្លារពីប្រទេសជប៉ុន និង ១៩,៥ លានដុល្លារពីប្រទេសដទៃទៀត ៕

អចលនទ្រព្យតម្លៃទាបជាងទីផ្សារស្ថិតក្នុងតំបន់ផ្សារឈូកមាសបានប្រកាសលក់

ដោយ ៖ រ៉ាណេត

ភ្នំពេញ ៖ ស្ថិតនៅតំបន់ទីប្រជុំជន ដែលប្រមូលផ្តុំទៅដោយលំនៅដ្ឋានកម្រិតខ្ពស់ និងមធ្យម ជាមួយនឹងការហ៊ុព័ទ្ធទៅដោយបុរីធំៗជាច្រើន ផ្តល់ភាពងាយស្រួលក្នុងការរស់នៅ និងប្រកបអាជីវកម្មផ្សេងៗ លំនៅដ្ឋានដ៏ស្រស់ស្អាត ស្គឹមស្កៃ ក្នុងរូបភាពជាអគារភ្លោះមានកម្ពស់៣ជាន់ ត្រូវបានដាក់លក់ក្នុងតម្លៃទាបជាងទីផ្សារ និងផ្តល់ឱកាសចំណេញសម្រាប់អ្នកទិញទុកជួល ឬវិនិយោគបន្ត។

ស្ថិតនៅផ្លូវបេតុងដ៏ធំទូលាយងាយស្រួលចរាចរណ៍ លំនៅដ្ឋានដ៏ស្រស់ស្អាតបែបទាន់សម័យ ជាអគារភ្លោះ មានកម្ពស់៣ជាន់ សាងសង់នៅលើផ្ទៃដីសរុបជាង ១៥០០ម៉ែត្រការ៉េ ស្ថិតនៅភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ ត្រូវបានដាក់លក់នៅក្នុងតម្លៃទាបជាងទីផ្សារនៅពេលបច្ចុប្បន្ន រួមជាមួយនឹងការទុកឱកាសចំណេញដល់អ្នកវិនិយោគបន្តផងដែរ។

តាមភាពជាក់ស្ដែងនៃទីតាំងដែលស្ថិតនៅតំបន់ទីប្រជុំជន ក្នុងក្រុងភ្នំពេញ មានផ្លូវថ្នល់ចំនួន ៣ខ្សែនៅព័ទ្ធជុំវិញ ជាពិសេសសំណង់អគារលំនៅដ្ឋានដ៏ស្រស់ស្អាតស្របតាមបទដ្ឋាននគរូបនីយកម្មមួយនេះ ក្រៅពីផ្តល់ភាពងាយស្រួល និងផាសុកភាពខ្ពស់ក្នុងការរស់នៅ ក៏ដូចជាប្រកបអាជីវកម្មផ្សេងៗ ដោយមានការរៀបចំរចនាលម្អរម៉ូដខាងក្នុងលំនៅដ្ឋានយ៉ាងស្រស់ស្អាតជាមួយឈើប្រណីត មានបន្ទប់ដេកចំនួន៨ និងបន្ទប់ទឹកចំនួន៨ មានបន្ទប់ចង្ក្រានធំទូលាយ ហើយរឹតតែ ស័ក្ដិសមទៅនឹងការបម្រើប្រយោជន៍ជាការិយាល័យក្រុមហ៊ុន ស្ថាប័នអង្គការ សាលារៀនឯកជន ឬបម្រើប្រយោជន៍នៅក្នុងវិស័យសឧស្សាហកម្មផងដែរ។

បន្ថែមពីនេះ ដែលជាលក្ខណៈពិសេសមួយទៀតមិនអាចមើលរំលងបាន គឺក្រៅពីស្ថិតនៅក្នុងតំបន់ទីប្រជុំជននៃរាជធានីភ្នំពេញ នៅជិតព្រលានយន្តហោះអន្តរជាតិ-ភ្នំពេញ ជិតផ្សារសហគមន៍នៃបុរីឈូកមាស បុរីភពថ្មី បុរី KC និងគម្រោងលំនៅដ្ឋានមានលក្ខណៈជាបុរីជាច្រើនទៀតនោះ ថែមទាំងមានស្ថានភាពដីធំទូលាយ រាបស្មើរហូតដល់ប្រមាណ ១៥០០ម៉ែត្រការ៉េ ងាយស្រួលក្នុងការអភិវឌ្ឍ ឬបង្កើតគម្រោងសាងសង់នានាបានយ៉ាងប្រសើរ ក្រោមការតភ្ជាប់បង្កប់បណ្តាញអគ្គិសនី ទឹកស្អាតសម្រាប់ប្រើប្រាស់ប្រចាំថ្ងៃ បណ្តាញបង្ហូរទឹក រួមជាមួយនឹងការបំពាក់កាំមេរ៉ាសុវត្ថិភាពរួចរាល់ជាស្រេច ដែលអាចថែរក្សាទ្រព្យសម្បត្តិ និងយានជំនិះយ៉ាងមានសុវត្ថិភាព។

ផ្អែកតាមការបញ្ជាក់ពីសំណាក់ម្ចាស់អគារផ្ទាល់បានឱ្យដឹងថា សម្រាប់តម្លៃនៃការលក់ត្រូវបានកំណត់ត្រឹម ១ ០៨០ ០០០ដុល្លារ (១លាន ៨ម៉ឺនដុល្លារ) តែប៉ុណ្ណោះ (អាចចរចា) ដោយមានការផ្ទេរកម្មសិទ្ធិ ប្រគល់ប្លង់រឹងស្របច្បាប់យ៉ាងត្រឹមត្រូវ ឬអាចដាក់ជួលក្នុងតម្លៃ ៤៨០០ដុល្លារក្នុងមួយខែ (អាចចរចាតាមរយៈពេលកិច្ចសន្យា)។

សម្រាប់ព័ត៌មានលម្អិត លោកអ្នកអាចទាក់ទងជាមួយម្ចាស់ផ្ទាល់តាមរយៈទូរស័ព្ទលេខ ៖ 016 85 85 88, 012 96 93 33, 088 45 48 395 ៕

ចំណេះដឹង! តើការដោះស្រាយវិវាទពាណិជ្ជកម្មក្រៅប្រព័ន្ធតុលាការមានសារៈប្រយោជន៍យ៉ាងណា?

ដោយ វុត្ថា

ភ្នំពេញៈ ជាទូទៅនៅក្នុងការប្រកបអាជីវកម្មតែងតែមានវិវាទ ហើយការដោះស្រាយវិវាទក្រៅប្រព័ន្ធតុលាការ ជាមធ្យោបាយដ៍ល្អប្រសើរ អាចឈានទៅដល់លទ្ធផលគាប់ចិត្តជាយុទ្ធសាស្ត្រឈ្នះៗ និងឆ្លើយតបតម្រូវការរបស់ធុរជនជាតិ និងវិនិយោគិនអន្តរជាតិ ដែលកំពុងធ្វើប្រតិបត្តិការធុរកិច្ចនៅក្នុងប្រទេសកម្ពុជា។

យន្តការដោះស្រាយវិវាទក្រៅប្រព័ន្ធតុលាការនេះ បានជួយសម្រួលបន្ទុកចំណាយ និងជួយពន្លឿនពេលវេលា ក្នុងការដោះស្រាយជម្លោះសម្រាប់ធុរជន ពេលមានវិវាទកើតឡើង ហើយវាមិនមែនជាការប្រកួតប្រជែង ជាមួយយន្តការប្រព័ន្ធតុលាការទេ ប៉ុន្តែវាជាការបំពេញបន្ថែមឱ្យប្រព័ន្ធយុត្តិធម៌។

ជាមួយគ្នានេះ ដើម្បីលើកកម្ពស់បរិយាកាសធុរកិច្ច និងវិនិយោគ រាជរដ្ឋាភិបាលកម្ពុជាបានផ្ដួចផ្ដើមបង្កើតមជ្ឈមណ្ឌលជាតិ នៃមជ្ឈត្តការផ្នែកពាណិជ្ជកម្ម ក្នុងឆ្នាំ២០១៣។ បច្ចុប្បន្ន មជ្ឈមណ្ឌលជាតិនេះ បានកំពុងផ្តល់សេវាផ្លូវច្បាប់ជូនធុរជន និងវិនិយោគិនគ្រប់ជាតិសាសន៍ ដោយប្រើប្រាស់មជ្ឈត្តករម្នាក់ឬច្រើន ដើម្បីដោះស្រាយរាល់វិវាទអាជីវកម្មក្រៅប្រព័ន្ធតុលាការ ដែលមានរយៈពេលយូរ និងច្រើនដំណាក់កាល៕

ស្ពានអាកាសក្បាលថ្នល់តភ្ជាប់រវាងមហាវិថីមុនីវង្ស និងព្រះនរោត្តមបើកដំនើរការនៅព្រឹកថ្ងៃស្អែកនេះហើយ

ដោយគង់ សូរិយា

ភ្នំពេញៈ ខ្នែងស្ពានអាកាសក្បាលថ្នល់ តភ្ជាប់រវាងមហាវិថីព្រះមុនីវង្ស និងមហាវិថីព្រះនរោត្តមបានបើកដំណើរការជាផ្លូវការនាព្រឹកថ្ងៃទី១ ឧសភានេះហើយ។ នេះបើយតាមអ្នកនាំពាក្យរដ្ឋបាលរាជធានីភ្នំពេញបញ្ជាក់ឲ្យដឹង។

លោកម៉េត មាស ភក្តី អ្នកនាំពាក្យរដ្ឋបាលរាជធានីភ្នំពេញបានឲ្យដឹងកាលពីល្ងាចថ្ងៃទី៣០ មេសាកន្លងមកថា ស្ពានអាកាសបត់ឆ្វេងមួយខ្សែថ្មី នៅជាប់នឹងស្ពាន អាកាសក្បាលថ្នល់ចាស់ ដែលតភ្ជាប់ពី មហាវិថីព្រះមុនីវង្ស បត់មកមហាវិថីព្រះនរោត្តម បានស្ថាបនារួចរាល់ និងបើកអោយដំណើរការ ចាប់ពីម៉ោង ៨ព្រឹកថ្ងៃទី១ ខែឧសភាឆ្នាំ២០២០នេះតទៅ ។

លោកបន្តថា “ការស្ថាបនាស្ពានអាកាសថ្មីបន្ថែមទៀតនេះ ដោយសារបច្ចុប្បន្នរាជធានីភ្នំពេញ មានកំណើនយានយន្តរបស់ប្រជាពលរដ្ឋ កើនឡើងយ៉ាងខ្លាំង ធ្វើឲ្យផ្លូវមួយចំនួនក្នុងរាជធានីភ្នំពេញ មានការកកស្ទះចរាចរណ៍ ពិសេសនៅត្រង់ចំណុចក្បាលថ្នល់នេះតែម្តង។ លោកបន្តថា “រដ្ឋបាលរាជធានីភ្នំពេញ បានខិតខំរិះរកមធ្យោបាយសាងសង់ស្ពានថ្មីបន្ថែម និងដាក់អោយដំណើរការក្នុងពេលនេះ អោយការធ្វើចរាចរណ៍របស់ប្រជាពលរដ្ឋកាន់តែប្រសើរឡើង” ។

មកដល់ពេលនេះនៅក្នុងរាជធានីភ្នំពេញ មានស្ពានអាកាសចំនួន៦ កន្លែងគឺ ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសស្តុបផ្សារដីហុយ និងស្ពានអាកាសចោមចៅ ។

ចំណែកលោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ ធ្លាប់បានបញ្ជាក់ថា គម្រោងនេះស្ថាបនាដោយក្រុមហ៊ុន OCIC។ ស្ពានអាកាសក្បាលថ្នល់ពី មហាវិថីព្រះមុនីវង្ស ទៅមហាវិថីព្រះនរោត្តមមានប្រវែង ៧៧ម៉ែត្រ ពីផ្លូវដីដល់គល់ស្ពានក្បាលថ្នល់ និងពីគល់ស្ពានដល់ស្ពានអាកាសចាស់ មានប្រវែង១២៣ ម៉ែត្រ មានទទឹង ៧ម៉ែត្រកន្លះ ពីមហាវិថីព្រះមុនីវង្ស បត់ឆ្វេងឡើងស្ពានឆ្ពោះទៅមហាវិថីព្រះនរោត្តម៕

កំលាំងពលកម្មកម្ពុជាសរុបមានប្រមាណ ១០លាននាក់ ក្នុងចំណោមប្រជាជនសរុប

ដោយ ហ្សូលី

ភ្នំពេញៈ ប្រជនជនកម្ពុជាប្រមាណ៩៩,៧ភាគរយ នៃកម្លាំងពលកម្មសរុប១០ លាននាក់ នៅកម្ពុជាសុទ្ធតែមានការងារធ្វើ។ នេះបើយោងតាមសាររបស់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្រ្តីនៃកម្ពុជា បានថ្លែងក្នុងឱកាសទិវាពលកម្មអន្តរជាតិ១ ឧសភា លើកទី១៣៤ ។

យោងតាមអត្ថន័យក្នុងសារនោះបានបញ្ជាក់ថា វិស័យសេដ្ឋកិច្ចទាំងផ្លូវការនិងក្រៅផ្លូវការបានទាក់ទាញកម្មករ និយោជិតប្រមាណ៣,៧លាននាក់ ខណៈដែលវិស័យកសិកម្មផ្តល់ការងារ ដល់ប្រជាជនពលរដ្ឋកម្ពុជាចំនួន៤លាននាក់ និង៥០០.០០០នាក់ផ្សេងទៀតជាមន្រ្តីសាធារណៈ ដែលបម្រើការនៅតាមស្ថាប័ននានា។ ក្រៅពីនេះ ប្រជាជនកម្ពុជាប្រមាណ១,២៨ លាននាក់ បានចំណាកស្រុកដើម្បីធ្វើការនៅបរទេស។

សម្តេចនាយករដ្ឋមន្រ្តី ហ៊ុន សែន ក៏បានសង្កត់ធ្ងន់ទៅលើការបន្តយកចិត្តទុកដាក់របស់រាជរដ្ឋាភិបាល ក្នុងការលើកកម្ពស់សុវត្ថិភាព សុខភាព និងជីវភាពរស់នៅរបស់ប្រជាពលរដ្ឋដែលជាកម្មករ និងនិយោជិក ជាពិសេសត្រូវបង្កើនការយកចិត្តទុកដាក់ខ្ពស់នៅក្នុងគ្រាដ៏លំបាកអំឡុងវិបត្តិជំងឺ covid-19 នេះ។

បើគិតត្រឹមឆ្នាំ២០១៩ កម្ពុជាមានសហជីពក្នុងស្រុកចំនួន៤៩៩៦ សហព័ន្ធសហជីពចំនួន២១៦ សហជីពពាណិជ្ជកម្មចំនួន៣៣ និងសមាគមនិយោជកចំនួន១១ ដែលបានចុះបញ្ជីស្របច្បាប់ជាផ្លូវការនៅប្រទេសកម្ពុជា។

ប្រទេសកម្ពុជាត្រៀមនឹងប្រារព្ធ ទិវាពលកម្មអន្តរជាតិលើកទី១៣៤ នៅថ្ងទី១ ខែ ឧសភា ឆ្នាំ ២០២០នេះ ក្រោមប្រធានបទ“ សន្តិភាព និងការងារសមរម្យ”។ ដើម្បីបងា្ករនិងទប់ស្កាត់ការរីករាលដាល នៃជំងឺរាតត្បាត Covid-19, កម្មករនិងនិយោជិកទាំងអស់ត្រូវបានណែនាំអោយប្រារព្ធទិវាប្រចាំឆ្នាំនេះ នៅផ្ទះជាមួយសមាជិកគ្រួសាររបស់ពួកគេ៕

អ្នកជំនាញនិយាយពីភាពមិនប្រាកដប្រជានៃវិស័យអចលនទ្រព្យនៅកម្ពុជា

ដោយ ៖ រ៉ាណេត

ភ្នំពេញ ៖ មានការលើកឡើងផ្សេងៗគ្នាពាក់ព័ន្ធទៅនឹងទីផ្សារអចលនទ្រព្យនៅកម្ពុជា ដែលកំពុងទទួលរងនូវគំនាបនៃវិបត្តិជំងឺសាកល និងកំពុងប្រឈមនៅពេលបច្ចុប្បន្ននេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍កាលពីល្ងាចថ្ងៃទី២៩ ខែមេសា ឆ្នាំ២០២០ថា ស្ថិតនៅក្នុងស្ថានភាពនៃវិបត្តិជំងឺសាកល Covid-19 ទោះបីជាទទួលរងនូវឥទ្ធិលអវិជ្ជមានខ្លះ នៅក្នុងវិស័យអចលនទ្រព្យក៏ដោយ ប៉ុន្តែមានការព្យាករណ៍ថា បន្ទាប់ពីការធ្លាក់ចុះទីផ្សារអចលនទ្រព្យនាពេលនេះ កម្ពុជានឹងអាចទទួលបានកំណើនវិនិយោគពីបណ្តាក្រុមហ៊ុនអន្តរជាតិជាដៃគូឡើងវិញ។

លោកបានមានប្រសាសន៍បន្តទៀតថា “នៅត្រឹមរយៈពេល៣ឆ្នាំចុងក្រោយនេះ វិស័យសំណង់ និងអចលនទ្រព្យនៅកម្ពុជាគឺមានការកើនឡើងខ្លាំងលើសពីការរំពឹងទុក ប៉ុន្តែដោយសារតែវិបត្តិនៃជំងឺសាកល ដែលកើមានចាប់តាំងពីខែមករា ឆ្នាំ២០២០ រហូតមកភាពអវិជ្ជមានបានចូលមកក្នុងវិស័យនេះមួយចំណែក ហើយនៅឆ្នាំបន្ទាប់នេះ យើងមិនអាចកំណត់ថា នឹងមានកំណើនខ្ពស់ដូចនេះទៀតនោះទេ ដែលវាក៏អាស្រ័យទៅលើបរិបថ និងស្ថានភាពនៃស្ថិរភាពក្នុងសង្គមជាក់ស្ដែង ជាពិសេសឧបសគ្គនៃជំងឺ Covid-19 ប៉ុន្តែយើងននៅតែមានសុទិដ្ឋិនិយមថា នឹងមានសញ្ញាល្អ ខណៈដែលប្រទេសចិន ដែលជាទីផ្សារដ៏ធំរបស់កម្ពុជាមានស្ថានការកាន់តែល្អ”។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ KW Cambodia លោកឧកញ៉ាបណ្ឌិត គឹម ហ៊ាង ធ្លាប់បានមានប្រសាសន៍កាលពីពេលកន្លងទៅថ្មីៗនេះថា ភាពប្រឈមរបស់សេដ្ឋកិច្ច និងទីផ្សារអចលនទ្រព្យនៅកម្ពុជាស្ថិតនៅក្នុងស្ថានភាពបែបណានោះ គឺវាអាស្រ័យទៅលើមូលហេតុចម្បងតែមួយគត់ គឺជំងឺ Covid-19 ដែលកំពុងរាតត្បាតជាសាកលលោក។

លោកឧកញ៉ាបានបន្តទៀតថា “នៅក្នុងអំឡុងពេលនេះ ថ្វីត្បិតទីផ្សារអចលនទ្រព្យនៅកម្ពុជា បាន និងកំពុងតែប្រឈមទៅនឹងការធ្លាក់ចុះ ប៉ុន្តែភាពល្អប្រសើរអាចនឹងវិលត្រឡប់មកវិញក្នុងពេលដ៏ខ្លី ប្រសិនបើបញ្ហានៃការរាតត្បាតរបស់ជំងឺ Covid-19 ត្រូវបានទប់ស្កាត់ និងដោះស្រាយនៅត្រឹមចុងខែមិថុនា ឬដើមឆមាសទី២ ឆ្នាំ២០២០ ខាងមុននេះ”។ លោកបានបញ្ជាក់ទៀតថា “ដង្ហើមទីផ្សារអចលនទ្រព្យកម្ពុជាមួយចំណែកធំគឺពឹងផ្អែកទៅលើក្រុមហ៊ុនដែលជាអ្នកវិនិយោគអន្តរជាតិ ជាពិសេសនៅក្នុងតំបន់អាស៊ី ។ នៅពេលដែលបណ្តាប្រទេសស្ថិតនៅក្នុងតំបន់អាស៊ីបន្តជួបនឹងវិតបត្តិនៃជំងឺ Covid-19 វាជាបញ្ហាប្រឈមនៃទីផ្សារអចលនទ្រព្យនៅកម្ពុជា”។

ជាមួយគ្នានេះ លោកក៏បានបញ្ជាក់ឱ្យដឹងផងដែរថា សព្វថ្ងៃនេះក្រុមហ៊ុនដែលវិនិយោគក្នុងគម្រោងធំៗនៅតែបន្តមាននៅលើទីផ្សារអចលនទ្រព្យកម្ពុជា ប៉ុន្តែដោយសារតែភាពប្រឈមនៃជំងឺ Covid-19 ក្រុមហ៊ុនទាំងនោះបានស្នើសុំពន្យាពេល។ ដូច្នេះ ប្រសិនបើវិបត្តិនៃជំងឺពិភពលោកមួយនេះត្រូវបានដោះស្រាយកាន់តែលឿន ភាពវិជ្ជមាននៃវិស័យអចលនទ្រព្យនៅកម្ពុជាកាន់តែឆាប់បានត្រឡប់មករកភាពល្អប្រសើរវិញ៕

រដ្ឋាភិបាលគ្រោងចំណាយជិត១០០លានដុល្លារលើគម្រោងបែងចែកដីដើម្បីសង្គម កិច្ចជំហ៊ានទី៣

ដោយវុត្ថា

ភ្នំពេញៈ រដ្ឋាភិបាលកម្ពុជាគ្រោងចំណាយប្រាក់ ប្រមាណ៩៣លានដុល្លារអាមេរិក ដើម្បីផ្តល់ដីសម្បទានសង្គមកិច្ច ជំហ៊ានទី៣ដល់ប្រជាពលរដ្ឋនាពេលខាងមុខនេះ។

លោកបណ្ឌិត ដោក ដូម៉ា អគ្គនាយករងនៃអគ្គនាយកដ្ឋាន លំនៅដ្ឋាននៃក្រសួងរៀបចំដែនដី នគរូបនីយកម្ម និងសំណង់ បានឱ្យដឹងនាព្រឹក ថ្ងៃទី៣០មេសានេះថា គម្រោងបែងចែកដីដើម្បីសង្គមកិច្ចជំហ៊ានទីបី គ្រោងចំណាយថវិកាជាង៩៣លានដុល្លារ ក្នុងនោះ ថវិកាបដិភាគចំនួន១០ភាគរយ ត្រូវអនុវត្តរយៈពេល៦ឆ្នាំ គឺចាប់ផ្តើមពីចុងឆ្នាំនេះតទៅ នៅទូទំាងប្រទេស។

លោកបានប្រាប់វិទ្យុមិត្តភាពកម្ពុជា–ចិននៅថ្ងៃនេះថា ក្រសួងរៀបចំដែនដី និងម្ចាស់ជំនួយគ្រោងពិភាក្សាគ្នា ដើម្បីឈានទៅបើកគម្រោងបែងចែកដីសង្គមកិច្ច និងការអភិវឌ្ឍសេដ្ឋកិច្ចជំហ៊ានទី៣ ដើម្បីជួយកែលម្អជីវភាពប្រជាពលរដ្ឋ អោយប្រជាពលរដ្ឋមានដីធ្វើកសិកម្ម និងមានដីសង់លំនៅដ្ឋាន ខណៈគម្រោងនេះអាចឈានទៅអនុវត្តន៍ផ្លូវការនៅចុងឆ្នាំនេះ។

គម្រោងជំហ៊ានទីបីនេះ មានគោលដៅបីសំខាន់ ទី១ ផ្តោតការចុះបញ្ជីរដីសហគមន៍ជនជាតិដើមភាគតិច ដើម្បីការពារដីរបស់គាត់ ជៀសវាងឲ្យបាននូវការរំខានពីអ្នកខាងក្រៅ ទី២ គឺការប្រើប្រាស់ដី ឃុំ សង្កាត់ ក្នុងរយៈពេលវែងថា តើការប្រើប្រាស់ដី ក្នុងឃុំ សង្កាត់ វាសមស្របទៅនិងសក្ដានុពលរបស់ដី សំរាប់កសិកម្ម សំរាប់សង់ផ្ទះ និងសាងសង់អគារសាធារណៈដែរឬទេ ហើយធ្វើការបែងចែកថាតើ ដីណាជារបស់រដ្ឋ និងរបស់ឯកជន និងគោលដៅទី៣ ការស្វែងរកដីដែលមានសក្ដានុពល សំរាប់ចែកជូនអ្នកក្រីក្រដែលខ្វះខាតដីពិតប្រាកដ។

លោកបណ្ឌិត ដោក ដូម៉ា បានបន្ថែមថា គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចនេះ មានតួនាទីសំខាន់ណាស់ ដោយបានផ្តល់ដីសំរាប់សង់លំនៅដ្ឋានផ្តល់ដី ធ្វើកសិកម្មហើយរៀបចំភូមិលំនៅដ្ឋាន ឲ្យបានត្រឹមត្រូវ មានផ្លូវថ្នល់ ចេញចូលងាយស្រួល សង់សាលារៀន ផ្សារសហគមន៍ បុស្តិ៍សុខភាព អណ្តូងទឹក និងស្រះទឹកស្អាត និងផ្ទះសម្រាប់គ្រូបង្រៀន និងគិលានុប្បដ្ឋាកជួយបណ្តុះបណ្តាលបច្ចេកទេសចិញ្ចឹម ដាំដុះឬប្រភេទដំណាំ ដែលត្រូវនឹងសមាសភាពដី ដែលបានចែកជូន ផ្តល់ពូជដំណាំ ការសាងសង់ប្រព័ន្ធធារាសាស្រ្តនានា ដើម្បីឆ្លើយតបទៅនឹងតម្រូវការស្រោចស្រព ក្នុងការដាំដុះឲ្យទទួលបានទិន្នផលខ្ពស់ ដែលធានាបានសន្តិសុខស្បៀង សម្រាប់សហគមន៍ផងនិងការបញ្ចេញលក់នៅទីផ្សារខាងក្រៅផង។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បង្ហាញថា គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច កំពុងអនុវត្តន៍នៅលើទីតំាងចំនួន១៤កន្លែង ស្ថិតក្នុងខេត្តចំនួន៥ មានដូច ជាខេត្តក្រចេះ ត្បូងឃ្មុំ កំពង់ធំ កំពង់ឆ្នាំង និងខេត្តកំពង់ស្ពឺ។

គម្រោងនេះបានអនុវត្តន៍ ដោយក្រសួងរៀបចំដែនដីនគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ និងលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ(គជអប) ដែលមានរយៈពេល៥ឆ្នាំ ចាប់ពីឆ្នាំ២០១៦ ដល់ឆ្នាំ២០២១ ដោយចំណាយថវិកាប្រមាណ២៦,៨លានដុល្លារអាមេរិក បានមកពីការផ្តល់ហិរញ្ញប្បទានពីធនាគារពិភពលោក និងបដិភាគរបស់រាជរដ្ឋាភិបាល ហើយមានប្រជាពលរដ្ឋទទួលផលប្រមាណ៥១៤១គ្រួសារ៕

លោកឧកញ៉ាម៉ុង ឬទ្ធី ត្អូញត្អែពីការលំបាកប្រកួតប្រជែងជាមួយក្រុមហ៊ុនមិនស្របច្បាប់

ដោយវុត្ថា

ភ្នំពេញៈ លោកឧកញ៉ា ម៉ុង ឬទ្ធី មហាសេដ្ឋីកសិកម្មកម្ពុជា និងជាអគ្គនាយកនៃក្រុមហ៊ុន ម៉ុងឫទ្ធី គ្រុបបានត្អូញត្អែរពីការលំបាក ក្នុងការប្រកួតប្រជែងជាមួយក្រុមហ៊ុនមិនស្របច្បាប់ ដែលរារាំងដល់ការនាំចេញផលិតផលកសិកម្មរបស់កម្ពុជា ទៅកាន់ទីផ្សារអន្តរជាតិជាពិសេសទៅកាន់ទីផ្សារកូរ៉េ។

ក្នុងជំនួបជាមួយតំណាងក្រុមហ៊ុនHyundai នាព្រឹកថ្ងៃទី៣០ មេសានេះ លោក ឧកញ៉ាម៉ុង ឬទ្ធីបានមានប្រសាសន៍ឱ្យដឹងថា កិច្ចពិភាក្សានេះដើម្បីរកដំណោះស្រាយរកទីផ្សារនាំចេញផ្លែស្វាយទាំងក្នុងកញ្ចប់ និងក្រៅកញ្ចប់ ពីចំការរបស់ក្រុមហ៊ុន និងចំការកសិករកម្ពុជា ចេញទៅប្រទេសកូរ៉េខាងត្បូងអោយបានតម្លៃសមរម្យ។

លោកបន្តថា “បញ្ហាដែលជាចំណទនោះគឺក្រុមហ៊ុនស្របច្បាប់ ត្រូវតែបង់ពន្ធគ្រប់បែបយ៉ាងមិនអាចប្រគួតប្រជែងជាមួយ និងក្រុមហ៊ុនមិនស្របច្បាប់បានណាស់”។

យ៉ាងណាក៏ដោយ លោកឧកញ៉ាកសិកម្មរូបនេះ មិនបានបង្ហាញពីចំនួនក្រុមហ៊ុនដែលមិនស្របច្បាប់មានប៉ុន្មាននោះទេ នៅក្នុងប្រតិបត្តិការនាំផលិតផលកសិកម្មចេញពីកម្ពុជាទៅក្រៅប្រទេស។

រដ្ឋាភិបាលប្រទេសកូរ៉េខាងត្បូង បានអនុម័តកាលពីថ្ងៃទី២៩ ខែតុលា ឆ្នាំ២០១៩ នូវការអនុញ្ញាតកម្ពុជាឱ្យនាំចូលស្វាយពីកម្ពុជា ទៅកាន់ប្រទេសកូរ៉េ តែរហូតដល់ពាក់កណ្តាលខែមករា ឆ្នាំ ២០២០ កន្លងមកនេះ ការនាំចេញផ្លែស្វាយស្រស់ពីប្រទេសកម្ពុជាជាលើកដំបូងទៅកាន់ប្រទេសកូរ៉េខាងត្បូង ដោយមានក្រុមHyundai Mao Legacy Co., Ltd ជាអ្នកត្រួតពិនិត្យ។

យោងតាមរបាយការណ៍របស់ក្រសួងកសិកម្មបានបង្ហាញថា នៅឆ្នាំ២០១៩កន្លងមកនេះ កម្ពុជាបាននាំចេញផ្លែស្វាយស្រស់ជិត៦ម៉ឺនតោន ទៅកាន់ប្រទេសវៀតណាម ថៃ សិង្ហបុរី បារាំង រុស្ស៊ី និងចិន៕

ការិយាល័យជួលកំពុងដាំក្បាលចុះជាង៧០ភាគរយនៅតំបន់អាស៊ីក្នុង កំឡុងខែមេសានេះ

ដោយ ហ្សូលី

ភ្នំពេញ៖ ទីផ្សារជួលការិយាល័យ នៅក្នុងបណ្តាប្រទេសនៅតំបន់អាស៊ី និងអាស៊ីប៉ាស៊ីហ្វិក កំពុងជួបប្រទះនូវវិបត្តិធ្លាក់ចុះដល់ជាង៧០ភាគរយ ក្នុងខែមេសា ឆ្នាំ ២០២០នេះ។ នេះបើតាមរបាយការណ៍របស់ក្រុមហ៊ុនអន្តរជាតិ Knight Frank កាលពីយប់ថ្ងៃទី ២៩ ខែមេសា ឆ្នាំ ២០២០នេះ។

របាយការណ៍នោះ បានបង្ហាញពីតារាងនៃបណ្តារទីក្រុង និងប្រទេសក្នុងអាស៊ី ដែលមានអត្រាធ្លាក់ចុះនៃទីផ្សារការិយាល័យ។ ប្រទេសដែលមានការធ្លាក់ចុះនៃសកម្មភាពជួលការិយាល័យទាំងនោះ មានដូចជា ទីក្រុងភ្នំពេញ ប្រទេសកម្ពុជា ទីក្រុងបាងកក ប្រទេសថៃ ទីក្រុងកូឡាឡាំពួរ ប្រទេសម់ាឡេស៊ី ទីក្រុងសេអ៊ូល ប្រទេសកូរ៉េ ទីក្រុងស៊ីដនី ប្រទេសអូស្ត្រាលី ទីក្រុងហ្សាកាតា ប្រទេសឥណ្ឌូនេស៊ី។

លើសពីនេះក៏មានទីក្រុង និងប្រទេសដទៃទៀតរួមមាន សិង្ហបុរី តៃប៉ិ សៀងហៃ ប៉េកាំង និងឥណ្ឌា ដែលទីផ្សារការិយាល័យទទួលរងនូវអត្រាជួលធ្លាក់ចុះ។ លើកលែងតែ ទីក្រុងម៉ានីល ប្រទេសហ្វីលីពីន ខេត្តក្វាងចូវ និងស៊ីនជិន នៃសាធារណរដ្ឋប្រជាមានិតចិន និងទីក្រុងហុងកុងតែប៉ុណ្ណោះ ដែលអត្រាជួលនៅថេរមិនមានការធ្លាក់ចុះ ហើយក៏មិនមានកំណើនដែរ។ នេះបើតាមឱ្យដឹងពីរបាយការណ៍ដែលមានចំណងជើងថា ទីផ្សារអាស៊ីប៉ាស៊ីហ្វិកក្នុងខែមេសា ២០២០: Covid-19 ជះឥទ្ធិពលលើវិស័យអចលនទ្រព្យ។

ហេតុផលដែលមានការធ្លាក់ចុះព្រោះថា ក្រុមហ៊ុនពាណិជ្ជកម្មអន្តរជាតិបានពន្យាពេលនៃកិច្ចព្រមព្រៀងជួល ដោយក្រុមហ៊ុនទាំងនោះសម្អាងហេតុផលថា គ្មានសង្វាក់ផលិតកម្ម គ្មានតម្រូវការសាកលលោក ដែលជាហេតុនាំឱ្យពួកគេមិនមានលំហូរសាច់ប្រាក់ដំណើរការក្រុមហ៊ុននោះទេ។

លោក Tim Armstrong ប្រធានសេវាកាន់កាប់ភ្នាក់ងារពាណិជ្ជកម្ម ប្រចាំក្រុមហ៊ុន Knight Frank នៅអាស៊ិបាស៊ីហ្វិកបានបញ្ជាក់ថា យ៉ាងហោចណាស់ ក្រុមហ៊ុនពាណិជ្ជកម្មទាំងនោះ មិនបានលុបចោលការជួលការិយាល័យនោះឡើយ។ ពួកគេគ្រាន់តែស្នើសុំពន្យាពេលតែប៉ុណ្ណោះ។

លោកបន្តថា “ចិនដីគោក ហាក់ដូចជាមានអត្រាថេរ ម្យ៉ាងសេដ្ឋកិច្ចនៅតំបន់នោះចាប់ផ្តើមមានភាពរឹងមាំឡើងវិញ រីឯកូរ៉េវិញក៏កៀកនឹងឡើងវិញដូចគ្នា”។ លោកបន្តថា “ចំណែកនៅតៃប៉ិវិញ ម្ចាស់អគារហាក់បីដូចជា មានការយោគយល់ច្រើនដូច្នេះហើយទើបបានជាទីផ្សារ មិនសូវជាមានភាពធ្លាក់ចុះគឺពោរពេញដោយតុល្យភាព”។

អាជីវកម្មឬមុខជំនួញ អាចនឹងត្រឡប់មករកសភាពដើមវិញ លុះត្រាតែបុគ្កលិកក្រុមហ៊ុនប្រាកដថា ពួកគេមានបរិយាកាសធ្វើការសុវត្ថិភាពសិន ដោយសារស្ថានភាព Covid-19 មានលក្ខណៈខុសគ្នាទៅតាមតំបន់ និងប្រទេសនិមួយៗ៕