ក្រុមហ៊ុនរុករករ៉ែមាសអូស្ត្រាលី ប្រមូលបានទុនវិនិយោគ ៧៥លានដុល្លារបន្ថែម ដើម្បីជំរុញការរុករករ៉ែមាសនៅកម្ពុជា

ដោយ ប៊ី

ភ្នំពេញ៖ ក្រុមហ៊ុន Renaissance Minerals (Cambodia) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Emerald Resources NLនៅក្នុងប្រទេសអូស្រ្តាលី បានឱ្យដឹងថា ខ្លួនបានរៃអង្គាសថវិកាបានច្រើន ក្នុងអំឡុងពេលត្រីមាសទី ១ ឆ្នាំនេះ សម្រាប់សកម្មភាពអភិវឌ្ឍន៍ជាច្រើនទៀតឆ្ពោះទៅរកការផលិតមាសនៅឆ្នាំក្រោយ។

នៅក្នុងរបាយការណ៍ប្រចាំត្រីមាសដែលទើបតែបានចេញផ្សាយកាលពីថ្ងៃអង្គារ ទី ២៨ ខែមេសា ឆ្នាំ២០២០ ក្រុមហ៊ុន បានឱ្យដឹងថា ខ្លួនបានជោគជ័យក្នុងការអង្គាសប្រាក់បានចំនួន ៧៥ លានដុល្លារតាមរយៈការគាំទ្រពីម្ចាស់ភាគហ៊ុនដែលមានស្រាប់ និងការបន្ថែមម្ចាស់ភាគហ៊ុនស្ថាប័នដែលមានការទទួលស្គាល់ជាសកល។

របាយការណ៍នេះបានកត់សម្គាល់ថាការ ផ្តល់ថវិកានេះត្រូវបានប្រើដើម្បីឆ្ពោះទៅសកម្មភាពជម្រុញការអភិវឌ្ឍន៍នៅឯគម្រោងអូក្វាវដែលជាគម្រោងជឿនលឿនបំផុតរបស់ក្រុមហ៊ុន ក៏ដូចជាកម្មវិធីរុករកក្នុងតំបន់របស់ខ្លួននៅលើផ្ទៃដីរុករករ៉ែនៅកម្ពុជា ១,២២៦ គីឡូម៉ែត្រការ៉េ។

ក្រុមហ៊ុន Emerald និងក្រុមហ៊ុន Sprott ដែលជាអ្នកផ្តល់ហិរញ្ញប្បទានឈានមុខគេលើវិស័យរ៉ែនៅទូទាំងពិភពលោកបាន ចុះហត្ថលេខាលើកិច្ចព្រមព្រៀងឥណទានសម្រាប់គម្រោងហិរញ្ញវត្ថុគម្រោងដែលមានទឹកប្រាក់ ៦០ លានដុល្លារ ដោយក្រុមហ៊ុនបានឱ្យដឹងថា នេះគឺជាព្រឹត្តិការណ៍សំខាន់មួយសម្រាប់ការអភិវឌ្ឍគម្រោងរុករករ៉ែមាសនៅតំបន់អូក្វាវ។

លើសពីនេះទៀត ក្រុមហ៊ុន Emerald ក៏បានចុះហត្ថលេខាលើកិច្ចសន្យារ៉ែដែលមានទឹកប្រាក់ ២៣០ លានដុល្លារជាមួយក្រុមហ៊ុនរ៉ែ Mining and Civil Australia ដើម្បីផ្គត់ផ្គង់ឧបករណ៍រុករករើ និងផ្តល់សេវាកម្មរុករុករ៉ែនៅឯគម្រោងរ៉ែមាសអូក្វាវក្នុងរយៈពេលជាង ៧ ឆ្នាំ៕

រដ្ឋាភិបាលសម្រេចដោះដូរផ្ទៃបឹងតាមោឃទំហំ៣៤ហិកតាជាមួយទីតាំងដី ចំនួន៣ផ្សេងទៀត

ដោយវុត្ថា

ភ្នំពេញ៖ រដ្ឋាភិបាលបានសម្រេចដោះដូរផ្ទៃបឹងតាមោឃ (បឹងកប់ស្រូវ) ទំហំ៣៤ ហិកតា ស្ថិតនៅសង្កាត់គោករកា ខណ្ឌព្រែកព្នៅ រាជរាជធានីភ្នំពេញ ជាមួយដីចំនួន៣ទីតាំងជូនលោកស្រី គីម ហ៊ាង។

យោងតាមលិខិតរបស់ទីស្តី ការគណៈរដ្ឋមន្ត្រីដែលបានចុះហត្ថលេខា កាលពីថ្ងៃទី ២៧ ខែមេសា ឆ្នាំ ២០២០ កន្លងមកដែលបានផ្ញើរជូន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ រដ្ឋមន្ត្រីក្រសួងធនធានទឹក និងឧតុនិយម និងអភិបាលនៃគណៈអភិបាលរាជធានីភ្នំពេញ។

នៅក្នុងកម្មវត្ថុនៃលិខិតនេះបានចែងថា ករណីសំណើសុំដោះដូរដីជូនលោកស្រី គីម ហ៊ាងមានដីទំហំ៣ហិកតា ស្ថិតនៅខាងកើតវិមានឈ្នះ ឈ្នះ ក្នុងនោះដីទំហំ២ហិកតា ស្ថិតនៅតំបន់ទីក្រុងរណបហ្គាឌិនស៊ីធី ព្រែកព្នៅ ខណ្ឌព្រែកព្នៅ និងដីអតីតទីលានចាក់សំរាម ស្ទឹងមានជ័យទំហំ៤,៨ហិកតា ស្ថិតនៅខណ្ឌមានជ័យ ជាមួយនឹងផ្ទៃបឹងតាមោឃ (បឹងកប់ស្រូវ)ទំហំ៣៤ហិកតា ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ។

សេចក្តីដូចបានចែងនៅក្នុងកម្មវត្ថុខាងលើនេះ ទីស្តីការគណៈរដ្ឋមន្ត្រីបានបញ្ជាក់ថា ចំពោះសំណើរដោះដូរដីទាំងបីទីតាំងនេះ ជាមួយនឹងផ្ទៃបឹងតាមោឃ (បឹងកប់ស្រូវ) ទំហំ៣៤ហិកតា ស្ថិតនៅក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ រាជរដ្ឋាភិបាលសម្រេចដូចខាងក្រោម៖

១) ផ្តល់ជូនលោកស្រី គីម ហ៊ាង នូវផ្ទៃដីផ្ទៃបឹងតាមោឃទំហំ៣០ហិកតា ប៉ុន្តែត្រូវដោះស្រាយលគោលនយោបាយ ដល់អ្នកកាន់កាប់ផ្ទៃដីបឹងទំហំ៣០ហិកតា ដែលមានឯកសារកាន់កាប់ក្នុងតម្លៃ៥ដុល្លារអាមេរិកក្នុងមួយម៉ែត្រការ៉េ។ ទី២ អនុញ្ញាត្តពន្ធជាបន្ទុករបស់រដ្ឋ និងលើកលែងសេវាអន្តរក្រសួងនានា ក្នុងការផ្ទេរកម្មសិទ្ធិទាំងអស់ខាងលើ។

កាលពីថ្ងៃទី២ សីហា ឆ្នាំ២០១៨ ទីស្តីការគណៈរដ្ឋមន្ត្រី ក៏បានដាក់សំណើរសុំដីចំនួន២០ហិកតា នៅបឹងតាមោឃ ស្ថិតក្នុងសង្កាត់ព្រែកព្នៅ ខណ្ឌសែនសុខ ដើម្បីធ្វើជាផ្សារផ្គត់ផ្គង់បន្លែ និងចំណតរថយន្ត។

ក្នុងលិខិតនោះក៏បានបញ្ជាក់ផងដែរថា រាជរដ្ឋាភិបាលបានយល់ព្រម ជាគោលការណ៍យកដីចំនួន២០ហិកតា នៅបឹងតាមោឃ ដើម្បីសាងសង់ផ្សារផ្គត់ផ្គង់បន្លែ ផ្លែឈើ និងជាចំណតរថយន្ត និងអនុញ្ញាតរើផ្សារបន្លែពីផ្សារដើមគរ ទៅផ្សារថ្មីនៅបឹងតាមោកវិញ។

បឹងតាមោឃ ឬបឹងទំនប់កប់ស្រូវ គឺជាបឹងធម្មជាតិដ៏ធំមួយ ក្នុងចំណោមបឹងស្តុកទឹកធំៗក្នុងរាជធានីភ្នំពេញ មានផ្ទៃបឹងទំហំ៣២៣៩,៧ ហិកតា ដែលមានទីតាំងឋិតនៅក្នុងខ័ណ្ឌព្រែកព្នៅ។

នៅថ្ងៃទី៣ ខែកុម្ភៈ ឆ្នាំ២០១៦ រដ្ឋាភិបាល ក៏បានចេញអនុក្រឹត្យស្តីពីការកំណត់ផ្ទៃបឹងចំនួន៣២៣៩ហិចតា ដែលគ្របដណ្តប់បឹងតាមោឃ (បឹងកប់ស្រូវ) និងដីជុំវិញ ទុកជាទ្រព្យសម្បត្តិសាធារណៈរបស់រដ្ឋ៕

ប្រធាន CVEA អះអាងថា រយៈពេល៥ឆ្នាំចុងក្រោយវិស័យអចលនទ្រព្យកម្ពុជារីកចម្រើនខ្លាំង

ដោយៈ ច្រាយ ចំណាន

ភ្នំពេញៈ នៅក្នុងរយៈពេល៥ឆ្នាំចុងក្រោយនេះ វិស័យអចលនទ្រព្យនៅកម្ពុជាមានភាពរីកចម្រើនគួរឱ្យកត់សម្គាល់ ជាមួយនឹងតម្លៃទុនវិនិយោគរាប់ពាន់លានដុល្លារ ប៉ុន្តែកំណើននេះ បើប្រៀបធៀបជាមួយបណ្តាប្រទេសក្នុងតំបន់ កម្ពុជានៅតែមានកម្រិតនៅឡើយ។ នេះបើតាមការអះអាងរបស់ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។

ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោកច្រឹក សុខនីមបានមានប្រសាសន៍ប្រាប់តាមទូរស័ព្ទកាលពីថ្ងៃទី២៩ ខែមេសា ឆ្នាំ២០២០ ថា ការវិនិយោគលើវិស័យអចលនទ្រព្យ ក្នុងរយៈពេល៥ឆ្នាំចុងក្រោយនេះ មានការរីកចម្រើនគួរឱ្យកត់សម្គាល់ ដោយសារលំហូចូលនៃវិនិយោគបរទេស និងស្ថេរភាពសេដ្ឋកិច្ច និងនយោបាយនៅក្នុងប្រទេស។

លោកបានបញ្ជាក់ថា “វិស័យអចលនទ្រព្យនៅកម្ពុជា បានរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។ នៅរាជធានីភ្នំពេញ ខេត្តសៀមរាប ក្រុងព្រះសីហនុ ក្រុងប៉ោយប៉ែត បាវិត កែប និងតំបន់់ផ្សេងៗទៀត ត្រូវបានមើលឃើញពីកំណើន ឥតឈប់ឈរនៃការសាងសង់ ដែលកំពុងដំណើរការស្របពេលល ដែលការវិនិយោគធំៗភាគច្រើនមកពីប្រទេសចិន ដែលបានជួយជំរុញឱ្យមានភាពរីកចំរើនយ៉ាងខ្លាំង” ។ លោកបន្តថា “ជាក់ស្តែងនៅក្នុងទីក្រុងភ្នំពេញ មានគម្រោងអភិវឌ្ឍន៍ជាច្រើនទាំងលំនៅដ្ឋាន ពាណិជ្ជកម្ម និងគម្រោងអភិវឌ្ឍន៍ចម្រុះ ដែលបានបញ្ចប់ការសាងសង់ និងកំពុងដំណើរការក្នុងផែនការសាងសង់ ហើយជាលទ្ធផលយើងឃើញមានការផ្គត់ផ្គង់ខុនដូ អាផាតមិន បុរី និងលំនៅដ្ឋានផ្សេងៗទៀតមានការកើនឡើង” ។

ស្ថិតនៅក្នុងស្ថានការនៃវិបត្តិជំងឺសាកល Covid-19 ទោះបីជាទទួលរងនូវឥទ្ធិលអវិជ្ជមានខ្លះ នៅក្នុងវិស័យអចលនទ្រព្យក៏ដោយ ប៉ុន្តែមានការព្យាករណ៍ថា បន្ទាប់ពីការធ្លាក់ចុះទីផ្សារអចលនទ្រព្យនាពេលនេះ កម្ពុជានឹងអាចទទួលបានកំណើនវិនិយោគពីបណ្តាក្រុមហ៊ុនអន្តរជាតិជាដៃគូឡើងវិញ។ នេះបើផ្អែកតាមរបាយការណ៍ដែលបង្ហាញពីវត្តមានក្រុមហ៊ុនទទួលបានអាជ្ញាប័ណ្ណថ្មី ចេញដោយក្រុមប្រឹក្សាអភិវឌ្ឍន៍កម្ពុជា កាលពីពេលកន្លងទៅ។

ក្នុងរយៈពេល៥ឆ្នាំខាងមុខ កំណើននៃវិស័យអចលនទ្រព្យនៅកម្ពុជា នៅតែត្រូវបានគេរំពឹងថា នឹងមានការកើនឡើងយ៉ាងខ្លាំង ចំពោះការអភិវឌ្ឍ ខុនដូ និងបុរី ការវិនិយោគផ្ទាល់ពីបរទេសតម្លៃដីតម្រូវការ និងការផ្គត់ផ្គង់ ហើយកម្ពុជានៅតែរក្សាបានភាពលំនឹងនៃកំណើនក្នុងវិស័យអចលនទ្រព្យ និងសំណង់ ប៉ុន្តសន្ទុះនៃកំណើនសេដ្ឋកិច្ច ក៏ដូចជា ភាពរីកចម្រើននៅក្នុងវិស័យណាមួយ វាមិនអាចចេះតែកើនឡើងរហូតបាននោះទេ គឺអាចនឹងដល់ចំណុចណាមួយធ្លាក់ចុះវិញជាមិនខាន។

លោកច្រឹក សុខនីម បានបន្តទៀតថា “សម្រាប់វិស័យអចលនទ្រព្យ និងសំណង់នៅកម្ពុជានៅត្រឹមរយៈ៣ឆ្នាំចុងក្រោយនេះ មានកំណើនយ៉ាងគំហុកហួសពីក្ដីរំពឹង។

ដោយឡែកសម្រាប់នៅឆ្នាំបន្ទាប់ យើងមិនអាចកំណត់ថា នឹងមានកំណើនខ្ពស់ដូចនេះទៀតនោះទេ ដែលវាក៏អាស្រ័យទៅលើបរិបថ និងស្ថានភាពនៃស្ថិរភាពក្នុងសង្គមជាក់ស្ដែង ជាពិសេសឧបសគ្គនៃជំងឺ Covid-19 ប៉ុន្តែយើងននៅតែមានសុទិដ្ឋិនិយមថា នឹងមានសញ្ញាល្អ ខណៈដែលប្រទេសចិន ដែលជាទីផ្សារដ៏ធំរបស់កម្ពុជាមានស្ថានការកាន់តែល្អជាបន្តបន្ទាប់។

ជាមួយគ្នានេះ លោកក៏បានធ្វើការប្រៀបធៀបជាមួយប្រទេសជិតខាង ដូចជាប្រទេសថៃ ប្រទេសវៀតណាម វិស័យសំណង់នៅកម្ពុជា នៅតែមានភាពល្អប្រសើរដដែល ដោយសារតែកត្តាតម្លៃនៅកម្ពុជា មានកម្រិតទាបជាង ហើយវិសាលភាព និងឱកាសវិនិយោគនៅមានភាពទូលំទូលាយច្រើន៕

អគ្គនាយកដ្ឋានពន្ធដារនឹងចុះផ្តល់ប័ណ្ណសម្គាល់ការបង់ពន្ធអចលនទ្រព្យនៅទីក្រុងភ្នំពេញ

ដោយ វុត្ថា

ភ្នំពេញៈ ដើម្បីសម្រួលដល់ការបង់ពន្ធលើអចលនទ្រព្យប្រចាំឆ្នាំ អគ្គនាយកដ្ឋានពន្ធដារ បានរៀបចំបោះពុម្ពប័ណ្ណសម្គាល់ ការបង់ពន្ធអចលនទ្រព្យ (កាតអចលនទ្រព្យ) និងផ្តល់ជូនម្ចាស់អចលនទ្រព្យ ដែលបានធ្វើបច្ចុប្បន្នភាពព័ត៌មានអចលនទ្រព្យ និងបង់ប្រាក់កម្រៃសេវា៥០០០រៀល ដើម្បីស្នើសុំធ្វើកាតអចលនទ្រព្យ។

យោងតាមសេចក្តីជូនដំណឹងរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុស្តីពី ការចុះផ្តល់សេវាពន្ធដារលើការប្រគល់ប័ណ្ណ សម្គាល់ការបង់ពន្ធអចលនទ្រព្យនៅរាជធានីភ្នំពេញ ចេញផ្សាយនៅថ្ងៃទី២៩ ខែមេសា ឆ្នាំ ២០២០ នេះ ផ្ញើរជូនម្ចាស់អចលនទ្រព្យទាំងអស់បានឲ្យដឹងថា មានម្ចាស់អចលនទ្រព្យមួយចំនួន ដែលបានបង់ប្រាក់កម្រៃសេវា និងបានស្នើសុំធ្វើកាតអចលនទ្រព្យរួចហើយ ប៉ុន្តែពុំទាន់ទទួលបាននូវកាតអចលនទ្រព្យនៅឡើយ ដោយរដ្ឋបាលសារពើពន្ធ ពុំអាចធ្វើការទំនាក់ទំនងម្ចាស់អចលនទ្រព្យបាន និងម្ចាស់អចលនទ្រព្យមួយចំនួនទៀត នៅពុំទាន់បានអញ្ជើញមកទទួលយកកាតអចលនទ្រព្យពីរដ្ឋបាលសារពើពន្ធ។

សេចក្តីជូនដំណឹងដដែលបន្ថែមថា ដូចនេះដើម្បីជំរុញការប្រគល់កាត់អចលនទ្រព្យដែលបានបោះពុម្ពខាងលើ អគ្គនាយកដ្ឋានពន្ធដារ នឹងចុះផ្តល់សេវាប្រគល់កាតអចលនទ្រព្យដល់ទីតាំង ដែលអលចនទ្រព្យស្ថិតនៅ ឬម្ចាស់អចលនទ្រព្យអាចអញ្ជើញមកទទួលយកកាតអចលនទ្រព្យដោយផ្ទាល់ នៅអគ្គនាយកដ្ឋានពន្ធដារ រៀងរាល់ម៉ោងធ្វើការ និងសូមផុ្តល់ព័ត៌មានមួយចំនួនដូចជា បង្កាន់ដៃបង់ប្រាក់ចុងក្រោយ (ថតចម្លង) ឬ ឈ្មោះអចលនទ្រព្យ ឬ អត្តសញ្ញាណកម្មអចលនទ្រព្យ (PIN) ដើម្បីឱ្យរដ្ឋបាលសារពើពន្ធងាយស្រួល ស្វែងរកកាតអចលនទ្រព្យជូនបានឆាប់រហ័យ។

សេចក្តីជូនដំណឹងដដែលបញ្ជាក់ទៀតថា ចំពោះម្ចាស់អចលនទ្រព្យដែលពុំទាន់បានស្នើសុំកាតអចលនទ្រព្យ សូមអញ្ជើញរួសរាន់ស្នើសុំចុះបញ្ជី និងធ្វើបច្ចុប្បន្នភាពព័ត៌មានអចលនទ្រព្យ និងបង់ប្រាក់កម្រៃសេវា៥០០០រៀល ដើម្បីស្នើសុំធ្វើកាតអចលនទ្រព្យនៅនាយកដ្ឋានពន្ធអចលនទ្រព្យ នៃអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌ ដែលអចលនទ្រព្យនោះស្ថិតនៅ ដើម្បីបានសារពើពន្ធបោះពុម្ពកាតអចលនទ្រព្យជូនភ្លាម៕

អ្នកជំនាញអះអាងថា ការជួលខុនដូនៅកម្ពុជាមិនរងផលប៉ះពាល់នោះទេ

ដោយ ប៊ី

ភ្នំពេញៈ ខុនដូសម្រាប់ជួលនៅកម្ពុជាមិនរងផលប៉ះពាល់ ដោយសារការរីករាលដាលជំងឺ COVID-19 នោះទេ ហើយតម្លៃជួលខុនដូមិនមានការប្រែប្រួលខ្លាំងនោះទេ។ នេះបើយោងតាមការអះអាងរបស់អ្នកជំនាញអចលនទ្រព្យ។

លោកច្រឹក សុនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់គេហទំព័រ Propertyarea.asia នៅថ្ងៃទី ២៩ ខែមេសា ឆ្នាំ ២០២០ នេះ ថា ការជួលខុនដូ មិនមានការធ្លាក់ចុះខ្លាំងនោះទេ ព្រោះការជួលខុនដូមានរយៈពេលវែង ខណៈម្ចាស់ខុនដូមានការអនុគ្រោះដល់អ្នកជួលតិចតូចបន្ថែម។

លោកបានបន្តថា “កិច្ចការជួលខុនដូមានកុងត្រារយៈពេល ដែលមិនធ្វើឱ្យការជួលមានការធ្លាក់ចុះខ្លាំងនោះទេ ហើយវាអាចធ្លាក់ចុះតិចតូចអំឡុងពេលនេះ។ លោកបន្តថា “វាមិនមែនជាឧបសគ្គធំ ឬក្លាយជាបញ្ហាធំសម្រាប់ការជួលខុនដូនោះទេ អំឡុងពេល COVID-19 ហើយម្ចាស់ខុនដូ នៅតែទទួលបានចំណូលបានពីការជួលនេះដែរ” ។

លោកបានលើកឡើងថា សម្រាប់តម្លៃជួលខុនដូ មិនមានការប្រែប្រួលខ្លាំងនោះទេ ខណៈម្ចាស់ខុនដូមួយចំនួន ដែលនៅសល់ខុនដូជួលបញ្ចុះតម្លៃខ្លះ ប៉ុន្តែម្ចាស់ខុនដូមួយចំនួនទៀតមិនបញ្ចុះតម្លៃ ព្រោះវាជាបញ្ហារយៈពេលខ្លី និងមិនមានផលប៉ះពាល់ខ្លាំងពេកទេ។

លោកបានថ្លែងថា “ដូច្នេះអ្នកជួលនៅតែជួលបន្ត និងមិនមានការផ្លាស់ប្តូរខ្លាំងនោះទេ ដោយសារការជួលមានកុងត្រារយៈពេល១ឆ្នាំទៅ២ឆ្នាំឯណោះ” ។

តម្លៃជួលខុនដូអាស្រ័យទៅលើប្រភេទខុនដូ។ ការជួលខុនដូ១បន្ទប់គេង មានតម្លៃចាប់ពី ៧០០ ទៅ១២០០ ដុល្លារក្នុងមួយយូនីត។ ខុនដូជួលមាន២បន្ទប់គេងមានតម្លៃចាប់១២០០ ទៅ១៥០០ ដុល្លារក្នុងមួយយូនីតក្នុងមួយខែ និង៣បន្ទប់គេងមានតម្លៃ២០០០ដុល្លារជាង។ នេះបើយោងតាមលើកឡើងរបស់លោកច្រឹក សុខនីម។

រយៈពេល៣ខែដើមឆ្នាំ២០២០នេះ ខុនដូចំនួនជិត៣០០០យូនីត បានបញ្ចប់ការសាងសង់ និងដាក់ចូលក្នុងទីផ្សារ ខណៈតម្រូវការយូនីតខុនដូហាក់មានកំនើនយឺត ដោយសារវិបត្តិ Covid-19។ នេះបើយោងតាមរបាយការណ៍ដែលទើបចេញផ្សាយ ដោយក្រុមហ៊ុនភ្នាក់ងារអចលនទ្រព្យអន្តរជាតិCBRE Cambodiaបានឲ្យដឹងនៅរសៀលថ្ងៃទី១៥ ខែមេសា ឆ្នាំ២០២០កន្លងមកនេះ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍ថា វិបត្តិនៃជំងឺ Covid-19 ពិតជាបានគំរាមកំហែងដល់សេដ្ឋកិច្ចជាសាកល ដែលក្នុងនោះប្រទេសកម្ពុជា ក៏ទទួលរងនូវឥទ្ធិពលអាក្រក់មួយនេះផងដែរ។

លោកស្រីបានបន្តទៀតថា “តិចឬច្រើនប្រទេសកម្ពុជា ពិតជាទទួលរងនូវឥទ្ធិពលមួយនេះ ប៉ុន្តែសម្រាប់វិស័យអចលនទ្រព្យ ហាក់មានភាពល្អប្រសើរច្រើន ជាក់ស្ដែងនៅក្នុងត្រីមាសទីមួយកន្លងទៅនេះ ទាំងវិស័យសំណង់ និងអចលនទ្រព្យនៅតែបន្តរក្សាបានភាពល្អប្រសើរ” ។

លោកស្រីមានបន្តទៀតថា សម្រាប់វិស័យអចលនទ្រព្យនៅកម្ពុជា បើប្រៀបធៀបជាមួយប្រទេសជិតខាង គឺងាយនឹងមានឱកាសត្រឡប់មករកភាពល្អប្រសើរវិញ ក្នុងពេលដ៏ខ្លី ដោយសារតែតម្រូវការទីផ្សារភាគច្រើនជាជនជាតិក្នុងស្រុក ហើយចំពោះទីផ្សារក្រៅស្រុកភាគច្រើន មកពីប្រទេសចិន និងសិង្ហបុរី ដែលកំពុងទទួលបានសញ្ញាវិជ្ជមានជាបណ្តើរៗ ក្នុងរួចផុតពីវិបត្តិជំងឺCovid-19 ស្របពេលដែលបណ្តាប្រទេសនានានៅប៉ែកអឺរ៉ុប កំពុងតែជួបសភាពធ្ងន់ធ្ងរ៕

ក្រុមហ៊ុនធំមួយរបស់អូស្ត្រាលីគ្រោងវិនិយោគលើវារីអគ្គិសនីសម្រាប់ផ្គត់ផ្គង់ឧស្សាហកម្មធុនធ្ងន់នៅកម្ពុជា

ដោយ វុត្ថា

ភ្នំពេញៈ ឯកអគ្គរដ្ឋទូតថ្មី នៃប្រទេសអូស្ត្រាលីប្រចាំកម្ពុជាបានអះអាងថា ក្រុមហ៊ុនខ្នាតអន្តរជាតិរបស់អូស្ត្រាលីមួយ បានបង្ហាញបំណងពីការចូលរួមវិនិយោគ លើវារីអគ្គិសនី ដើម្បីផ្គត់ផ្គង់លើឧស្សាហកម្មធុនធ្ងន់ ដែលរួមមានការវិនិយោគលើឧស្ម័នធម្មជាតិរាវ (LNG) និងអាជីវកម្មរ៉ែនៅកម្ពុជា។

លោក Pablo Kang ឯកអគ្គរដ្ឋទូតប្រទេសអូស្ត្រាលីប្រចាំកម្ពុជា នៅក្នុងជំនួបពិភាក្សាការងារ ជាមួយលោកស៊ុយ សែម រដ្ឋមន្ត្រីក្រសួងរ៉ែនិងថាមពល កាលពីម្សិលមិញនេះបានឱ្យដឹងថា រាជរដ្ឋាភិបាលតាមរយៈក្រសួងរ៉ែ និងថាមពល ដែលកន្លងមកនេះ បានខិតខំប្រឹងប្រែង ក្នុងចូលរួមអភិវឌ្ឍសេដ្ឋកិច្ចជាតិ ឱ្យមានការរីកចំរើនឥតឈប់ឈរ។ ជាពិសេស សម្រេចបាននូវការផ្គត់ផ្គង់អគ្គិសនី ដល់បណ្តាភូមិទាំងអស់ស្ទើតែគ្រប់១០០ ភាគរយនៅទូទាំងប្រទេស។

លោកបន្ថែមថា “ដើម្បីចូលរួមអភិវឌ្ឍលើវិស័យអគ្គិសនី មានក្រុមហ៊ុនខ្នាតអន្តរជាតិរបស់អូស្ត្រាលី តាមរយៈស្ថានទូតបានបង្ហាញចំណាប់អារម្មណ៍ ក្នុងការវិនិយោគលើវារីអគ្គិនីនៅកម្ពុជាផងដែរ” ។

លោកស៊ុយ សែម រដ្ឋមន្ត្រីក្រសួងរ៉ែ និងថាមពល បានសម្តែងការស្វាគមន៍ចំពោះបំណងនេះ និងអរគុណដល់រដ្ឋាភិបាលអូស្ត្រាលី ដែលកន្លងមកនេះ បានជួយគាំទ្រទាំងបច្ចេកទេស និងហិរញ្ញវត្ថុដល់រដ្ឋាភិបាលកម្ពុជា ក្នុងការអភិវឌ្ឍន៍លើគ្រប់វិស័យរបស់ក្រសួងរ៉ែ និងថាមពលផងដែរ។

លោករដ្ឋមន្ត្រី ក៏បានស្នើដល់រដ្ឋាភិបាលអូស្ត្រាលី តាមរយៈលោក Pablo Kang ឯកអគ្គរដ្ឋទូតថ្មី នៃប្រទេសអូស្ត្រាលីប្រចាំកម្ពុជា ពិនិត្យលទ្ធភាពផ្តល់ជំនួយលើសម្ភារៈថាមពលដើរដោយពន្លឺព្រះអាទិត្យ ដែលអាចផ្គត់ផ្គង់ដល់ភូមិដាច់ស្រយ៉ាល ខណៈបច្ចុប្បន្នតំបន់ដាច់ស្រយ៉ាលទាំងនោះ មិនទាន់មានបណ្តាញជាតិនៅឡើយ៕

តម្លៃជួលការិយាល័យនៅក្រុងភ្នំពេញបានចាប់ផ្តើមធ្លាក់ចុះមិនធ្លាប់មាន

ដោយ វុត្ថា

ភ្នំពេញៈ អ្នកជំនាញបានអះអាងថា ទីផ្សារការិយាល័យជួល នៅក្នុងទីក្រុងភ្នំពេញ បានធ្លាក់ចុះតម្លៃចាប់ពី១០ ទៅ១៥ភាគរយ ចាប់តាំងពីដើមឆ្នាំ២០២០ រហូតមដល់ពេលនេះ ដោយសារការរាតត្បាតជាសកលនៃជំងឺកូវីដ១៩ និងការស្នើសុំបញ្ចុះតម្លៃពីអតិថិជនព្រមទាំងមានការបញ្ចុះតម្លៃដោយម្ចាស់អគារ។

លោកស្រីអាន សុធីតា នាយិការប្រចាំប្រទេសនៃក្រុមហ៊ុនអន្តរជាតិ CBRE Cambodia បានប្រាប់គេហទំព័រ propertyarea.asia កាលពីថ្ងៃម្សិលមិញនេះឱ្យដឹងថា ក្នុងស្ថានភាពនៃវិបត្តិនៃជំងឺកូវីដ១៩ បានធ្វើឲ្យទីផ្សារជួលការិយាល័យ មានការធ្លាក់ចុះនៃតម្លៃជួល ដោយសារតែមានអតិថិជនទាមទាឱ្យមានការបញ្ចុះតម្លៃ និងម្ចាស់អគារមួយចំនួនទៀត បានបញ្ចុះតម្លៃដោយខ្លួនឯង ដើម្បីរក្សាអតិថិជន និងចាប់យកអតិថិជនថ្មីៗបន្ថែម។

លោកស្រីបន្តថា ម្ចាស់អគារមួយចំនួន បានបញ្ចុះតម្លៃ ប្រមាណ១០ ទៅ២០ភាគរយ និង៣០ភាគរយ ហើយអ្នកខ្លះក៏មិនយកតម្លៃថ្លៃ ជួលរយៈពេល២ទៅ៣ខែ អាស្រ័យលើម្ចាស់អគារ។ តែបើយើងមើលទីផ្សាររួម អតិថិជនបានពន្យាពេលក្នុងការជួលការិយាល័យថ្មី ហើយមួយចំនួនទៀតស្វែងរកការិយាល័យថ្មី តែជាបណ្តោះអាសន្ន។

លោកស្រីបន្ថែមថា “បើយើងមើលការដាក់ជួលការិយាល័យថ្មី នៅក្នុងទីផ្សារវិញ គឺត្រូវបានម្ចាស់អគារបានបញ្ចុះតម្លៃ ពី១០ទៅ១៥ភាគរយ ដើម្បីទាក់ទាញអតិថិជនថ្មីឱ្យទទួលការិយាល័យនៅក្នុងអគារបស់ពួកគាត់” ។

យោងតាមរបាយការណ៍របស់ក្រុមហ៊ុអន្តរជាតិ CBRE Cambodia បានបង្ហាញថា ក្នុងត្រីមាសទី១ នៃឆ្នាំ២០២០ មិនមានអគារការិយាល័យថ្មី ត្រូវបានសម្ពោធដំណើការសាងសង់ និងបញ្ចប់នោះទេ ។ នៅក្នុងកំឡុងនៃវិបត្តិជំងឺកូវីដ១៩នេះ ត្រូវបានព្យាករណ៍ថា អគារការិយាល័យប្រមាណ៨៩,០០០ម៉ែត្រការ ដែលភាគច្រើនជាប្រភេទB ហើយស្ថិតនៅខាងក្រៅតំបន់ពាណិជ្ជកម្ម (CBD)។

ក្រុមហ៊ុន CBRE Cambodia យល់ឃើញថា ក្នុងស្ថានភាពនៃវិបត្តនៃជំងឺកូវីដ១៩ ដែលគ្មានភាពប្រាកដប្រជា នឹងធ្វើឲ្យទីផ្សារការិយាល័យជួលបន្តធ្លាក់ចុះ ដោយសារគម្រោងមួយចំនួនត្រូវបានផ្អាក ។ តែយ៉ាងណាក៏ដោយ គេឃើញមានគម្រោងអគារការិយាល័យមួយបានដាក់ចូល ទៅក្នុងទីផ្សារ គឺអគារ Central Capital Tower ស្ថិតនៅក្នុងតំបន់ទួលគោក បើទៅបីអគារនេះ មិនទាន់បានបញ្ចប់ការសាងសង់យ៉ាងណាក្តី។

ជារួមវិបត្តិនៃជំងឺកូវីដ១៩ ដែលកំពុងរីករាលដាលជាកល បាននឹងកំពុងជះឥទ្ធិផលអាក្រក់លើវិស័យសេដ្ឋកិច្ចសកល ជាពិសេសវិស័យសំខាន់ៗ របស់កម្ពុជាដែលជាសសរស្តម្ភក្នុងជំរុញសេដ្ឋកិច្ច នៅក្នុងប្រទេសឱ្យមានសន្ទុះរីកចំរើន រួមមាន វិស័យទេសចរណ៍ អចលនទ្រព្យ និងសំណង់ ឧស្សាហកម្ម វាយនភណ្ឌកាត់ដេរ និង ការដឹកជញ្ជូនជាដើម៕

ចំណេះដឹង! តើកម្មវត្ថុនៃកិច្ចសន្យាលក់ទិញត្រូវមានលក្ខណៈបែបណា?

ដោយ វុត្ថា

ភ្នំពេញៈ កិច្ចសន្យាលក់ ទិញ ត្រូវមានលក្ខណៈជាវត្ថុជាក់លាក់ ដែលអាចធ្វើកិច្ចសន្យាលក់ទិញបាន ធ្វើការសំគាល់ ឬក៏អាចកំណត់នៅរូបរាងបរិមាណ និងគុណភាព។ តាមក្រមរដ្ឋប្បវេណីឆ្នាំ២០០៧ មាត្រា១១៩ បានឲ្យនិយមន័យនៃវត្ថុថា សំដៅទៅលើរបស់ដែលមានរូបរាង្គជា សារធាតុរាវ ជាសារធាតុរឹង។

កម្មវត្ថុត្រូវតែជាវត្ថុអាចធ្វើកើត បើកាលណាវត្ថុនៅក្នុងកិច្ចសន្យាលក់ ទិញ គឺជាវត្ថុមួយ ដែលមិនអាចធ្វើកើតនោះ វាជាមូលហេតុដែលនាំឲ្យមានការមោឃៈភាពនៃកិច្ចសន្យាលក់ទិញនោះ។ ភាពអាចធ្វើកើតនេះ ត្រូវតែមានភាពទូទៅ។ មានន័យថា មនុស្សទូទៅសុទ្ធតែមានលទ្ធភាពអាចធ្វើបានទាំងអស់គ្នា មិនមែនអាចធ្វើបានឡើយ។

វត្ថុដែលមិនអាចធ្វើកើតមានមកពីបញ្ហាពីរយ៉ាង៖

ភាពមិនអាចធ្វើកើតដោយសារតែអំពើ។ ឧទាហរណ៏៖ សង់ផ្ទះវីឡាក្នុងរយៈពេល១យប់។ល។

ភាពមិនអាចធ្វើកើតដោយសារតែច្បាប់។ ឧទាហរណ៏៖ សាងសង់ផ្ទះលើដីដែលច្បាប់មិនអនុញ្ញាតឱ្យសាងសង់។

តែដើម្បីកំណត់ថា កិច្ចសន្យានោះត្រូវមោឃៈភាព ឬយ៉ាងណានោះ យើងត្រូវតែកំណត់ទៅលើលក្ខណៈដាច់ខាត ឬមិនដាច់ខាត បើលក្ខណៈដាច់ខាតនោះ វានាំឱ្យមានមោឃៈកិច្ចសិន្យាតែបើ លក្ខណៈមិនដាច់ខាតនោះ កិច្ចសន្យានៅតែមានសុពលភាពដ៏ដែល។

ឧទាហរណ៏៖ លោក “ក” បានទទួលចុះកិច្ចសន្យាជាមួយលោក “ខ” ថា លោក នឹងធ្វើការសាងសង់ផ្ទះឱ្យលោក “ខ” មិនចេះសាងសង់។

កម្មវត្ថុ ត្រូវតែជាវត្ថុ ត្រូវស្ថិតនៅក្នុងពេលបច្ចុប្បន្ន មានន័យថា នៅពេលដែលគូភាគី បានធ្វើការចុះកិច្ចសន្យាទិញលក់ វត្ថុ ដែលត្រូវលក់ ត្រូវតែមានយ៉ាពិតប្រាកដ ហើយស្ថិតនៅនាពេលបច្ចុប្បន្នទៀតផង។ ប៉ុន្តែមានកិច្ចសន្យាលក់ទិញនូវវត្ថុមួយចំនួន អាចធ្វើបានផងដែរ ទោះបីជាវត្ថុដែលលក់ នោះមិនស្ថិតនៅក្នុងពេលបច្ចុប្បន្នក៏ដោយ ក៏កិច្ចសន្យានោះ នៅតែមានសុពលភាពដដែល ដោយសារកម្មវត្ថុនៃកិច្ចសន្យានោះ វាអាចកើតឡើងនាពេលអនាគត។

ឧទាហរណ៏៖ កិច្ចសន្យាសាងសង់ផ្ទះលក់ ដែលផ្ទះនោះ នឹងត្រូវបានសាងសង់រួចនៅពេលអនាគតខាងមុខ។ លក្ខខណ្ឌមួយទៀត គឺតម្លៃនៃកិច្ចសន្យាលក់ទិញ៕

អាជីវកម្មទេសចរណ៍ជិត ៣០០០ ទីតាំង បានផ្អាកដំណើរការដោយសារវិបត្តិ Covid-19

ដោយ ៖ រ៉ាណេត

ភ្នំពេញ ៖ ក្រោមឥទ្ធិពលនៃវិបត្តិជំងឺសាកល Covid-19 បានបង្កផលប៉ះពាល់ដល់អាជីវកម្មទេសចរណ៍នៅទូទាំងប្រទេសកម្ពុជា ជិត៣០០ទីតាំង ត្រូវបានផ្អាកដំណើរការ និងបិទបញ្ចប់អាជីវកម្ម ស្មើនឹងជិត៣០ភាគរយនៃចំនួនសរុប និងបានធ្វើឱ្យប៉ះពាល់ការងាររបស់បុគ្គលិកចំនួន ៤៦,៣៦៩នាក់ ដោយក្នុងនោះ មគ្គុទ្ទេសក៍ទេសចរណ៍ចំនួន៩៦នាក់បានព្យួរអាជ្ញាបណ្ណទេសចរណ៍របស់ខ្លួន។

រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានមានប្រសាសន៍ប្រាប់ក្រុមអ្នកសារព័ត៌មាន នៅថ្ងៃទី២៩ ខែមេសា ឆ្នាំ២០២០នេះថា “គិិតត្រឹមថ្ងៃទី១៧ ខែមេសា ឆ្នាំ២០២០ អាជីវកម្មទេសចរណ៍ដែលត្រូវបានបិទ (បិទដោយការផ្អាកដំណើរការ និងបិទបញ្ចប់អាជីវកម្ម) នៅទូទាំងប្រទេសមានចំនួនសរុប ២,៨៦៥ ទីតាំង ស្មើនឹង ២៩.៥៧ភាគរយ ធៀបនឹងទីតាំងអាជីវកម្មទេសចរណ៍សរុបដែលមាន ៩,៦៨៩ ទីតាំង” ។

លោកបានបញ្ជាក់ថា អាជីវកម្មនៅក្នុងវិស័យទេសចរណ៍ដែលទទួលរងនូវផលប៉ះពាល់រួមមានដូចជា សណ្ឋាគារ ផ្ទះសំណាក់ ភោជនីយដ្ឋាន ម៉ាស្សា ស្ប៉ា ទីភ្នាក់ងារទេសចរណ៍ ខារ៉ាអូខេ រង្គសាល ឌីស្កូតែក បៀហ្គាឌិន និងកីឡាទេសចរណ៍ និងបានប៉ះពាល់ដល់បុគ្គលិកចំនួន ៤៦,៣៦៩ នាក់ ស្មើនឹង ៤២.៦ភាគរយ ធៀបនឹងបុគ្គលិកសរុប ១០៨,៨៤៧ នាក់ និងមគ្គុទ្ទេសក៍ទេសចរណ៍ព្យួរអាជ្ញាបណ្ណទេសចរណ៍សរុបចំនួន ៩៦ នាក់ ស្មើនឹង ១.៥ភាគរយ ធៀបនឹងចំនួនមគ្គុទ្ទេសក៍ទេសចរណ៍សរុប ៦,៤១៦ នាក់”។

លោករដ្ឋមន្ត្រីបានថ្លែងលម្អិតទៀតថា ៖

* ចំពោះសេវាកម្មស្នាក់នៅផ្នែកសណ្ឋាគារ ត្រូវបានបិទនៅទូទាំងប្រទេសមានចំនួន ២៨២ សណ្ឋាគារ (១៥,៤៨៨ បន្ទប់) ស្មើនឹង ២៧ភាគរយ ធៀបនឹងចំនួនសណ្ឋាគារសរុបដែលមាន ១,០៤៤ ទីតាំង (៤៨,៧៩១ បន្ទប់) និងប៉ះពាល់បុគ្គលិក ១៦,២០៣ នាក់ ស្មើនឹង ៤១ភាគរយ ធៀបនឹងបុគ្គលិកសរុប ៣៩,១៥១ នាក់។

* ចំពោះផ្ទះភ្ញៀវ (ផ្ទះសំណាក់) ត្រូវបានបិទនៅទូទាំងប្រទេសមានចំនួន ៤០៥ ទីតាំង (៥,៦៤៤ បន្ទប់) ស្មើនឹង ១៥ភាគរយ ធៀបនឹងចំនួនផ្ទះភ្ញៀវសរុបដែលមាន ២,៦៤៣ ទីតាំង (៣៤,៩៥៧ បន្ទប់) និងប៉ះពាល់បុគ្គលិក ២,០៨៧ នាក់ ស្មើនឹង ១៩.៥ភាគរយ ធៀបនឹងបុគ្គលិកសរុប ១០,៦៦៩ នាក់។

* ចំពោះភោជនីយដ្ឋាន ត្រូវបានបិទនៅទូទាំងប្រទេសមានចំនួន ៣៧១ ទីតាំង (១៧,០២៧ កៅអី) ស្មើនឹង ១០.៨ភាគរយ ធៀបនឹងចំនួន ភោជនីយដ្ឋានសរុបដែលមាន ៣,៤១៥ ទីតាំង (១៦៧,៦៣៨ កៅអី) ប៉ះពាល់បុគ្គលិក ៣,២០១ នាក់ ស្មើនឹង ១១.១១ភាគរយ ធៀបនឹងបុគ្គលិកសរុប ២៨,៧៣៨ នាក់។

* ចំពោះទីភ្នាក់ងារទេសចរណ៍ ត្រូវបានបិទនៅទូទាំងប្រទេសមានចំនួន ៤៧ ទីតាំង ស្មើនឹង ៦.៤៧ភាគរយ ធៀបនឹងចំនួនអាជីវកម្មទីភ្នាក់ងារទេសចរណ៍សរុប ៧២៦ ទីតាំង ប៉ះពាល់បុគ្គលិក ២០៨ នាក់ ស្មើនឹង ៦ភាគរយ ធៀបនឹងបុគ្គលិកសរុប ៣,៤៤៤ នាក់។

* ចំពោះមគ្គុទ្ទេសក៍ទេសចរណ៍ បានព្យួរអាជ្ញាបណ្ណទេសចរណ៍នៅទូទាំងប្រទេសមានចំនួន ៩៦ នាក់ ស្មើនឹង ១.៥ភាគរយ ធៀបនឹងចំនួនមគ្គុទ្ទេសក៍ទេសចរណ៍សរុប ៦,៤១៦ នាក់។

* ចំពោះសេវាកម្សាន្តទេសចរណ៍មនុស្សពេញវ័យ (ខារ៉ាអូខេ រង្គសាលឌីស្កូតែក បៀហ្គាឌិន) ត្រូវបានបិទអាជីវកម្មទាំងស្រុងនៅទូទាំងប្រទេសមានចំនួន ១,១៤៧ ទីតាំង ប៉ះពាល់បុគ្គលិកសរុប ១៨,២០៤ នាក់។ ប្រភេទសេវាកម្មខារ៉ាអូខេ ត្រូវបានបិទនៅទូទាំងប្រទេសមានចំនួន ៨៨០ ទីតាំង (ស្មើនឹង ១០០ភាគរយ) និងប៉ះពាល់បុគ្គលិកសរុប ១៤,១៦១ នាក់ ប្រភេទសេវាកម្មរង្គសាលឌីស្កូតែក ត្រូវបានបិទនៅទូទាំងប្រទេសមានចំនួន ២០០ ទីតាំង (ស្មើនឹង ១០០ភាគរយ) និងប៉ះពាល់បុគ្គលិកសរុប ៣,០៧៨ នាក់ ប្រភេទសេវាកម្មបៀហ្គាឌិន ត្រូវបានបិទនៅទូទាំងប្រទេសមានចំនួន ៦៧ ទីតាំង (ស្មើនឹង ១០០ភាគរយ) និងប៉ះពាល់បុគ្គលិកសរុប ៩៦៥ នាក់។

* ចំពោះសេវាកម្មស្ប៉ា និងម៉ាស្សា ត្រូវបានបិទនៅទូទាំងប្រទេសមានចំនួន ៥៩០ ទីតាំង (៤ ៦៤៤គ្រែ) ស្មើនឹង ៨៨ភាគរយ ធៀបនឹងចំនួន អាជីវកម្មស្ប៉ា និងម៉ាស្សាសរុបដែលមាន ៦៦៨ ទីតាំង (៥ ២៩៣ គ្រែ) ប៉ះពាល់បុគ្គលិក ៥,៩៤៨ នាក់ ស្មើនឹង ៩៥ភាគរយ ធៀបនឹងបុគ្គលិកសរុប ៦,២៤៧ នាក់។

* ចំពោះអាជីវកម្មកីឡាទេសចរណ៍ (កីឡាប៊ូលីង អាងហែលទឹក ទូកកៃយ៉ាក់ បាឡុងបង្ហោះ ស្នូកឃ័រ ម៉ាស៊ីនហ្គេម) ត្រូវបានផ្អាកបណ្តោះអាសន្ននៅទូទាំងប្រទេសមានចំនួន ២៣ ទីតាំង ស្មើនឹង ៥០ភាគរយ ធៀបនឹងចំនួនអាជីវកម្មកីឡាទេសចរណ៍សរុប ៤៦ ទីតាំង និងប៉ះពាល់បុគ្គលិក ៥១៨ នាក់ ស្មើនឹង ២២ភាគរយ ធៀបនឹងបុគ្គលិកសរុប ២,៣២២ នាក់៕

រដ្ឋមន្ត្រីទេសចរណ៍អាស៊ាន ដាក់ចេញគោលការណ៍ចំនួន៧ ដើម្បីស្ដារវិស័យទេសចរណ៍ឡើងវិញក្រោយវិបត្តិ Covid-19

ដោយ ៖ រ៉ាណេត

ភ្នំពេញ ៖ រដ្ឋមន្រ្តីក្រសួងទេសចរណ៍កម្ពុជា ក្នុងនាមជាម្ចាស់ផ្ទះរៀបចំវេទិកាទេសចរណ៍អាស៊ាន ឆ្នាំ២០២១ បានដឹកនាំកិច្ចប្រជុំពិសេសរដ្ឋមន្ត្រីទេសចរណ៍អាស៊ាន ស្តីពីផលប៉ះពាល់នៃជំងឺកូវីដ-១៩ លើវិស័យទេសចរណ៍អាស៊ាន ដោយមានការចូលរួមពីរដ្ឋមន្រ្តីទេសចរណ៍អាស៊ានទាំង ១០ប្រទេស និងអគ្គលេខាធិការអាស៊ាន តាមរយៈប្រព័ន្ធវីដេអូខនហ្វឺរឹន (Video Conference)។

ក្នុងនាមជាម្ចាស់ផ្ទះរៀបចំវេទិកាទេសចរណ៍អាស៊ាននៅឆ្នាំ២០២១ខាងមុខ (ATF 2021) និងក្នុងអណត្តិរបស់ខ្លួនជាប្រធានដឹកនាំវិស័យទេសចរណ៍អាស៊ានឆ្នាំ២០២០ នៅព្រឹកថ្ងៃទី២៩ ខែមេសា ឆ្នាំ២០២០ រដ្ឋមន្ត្រីក្រសួងទេសចរណ៍ លោក ថោង ខុន បានសហការជាមួយលេខាធិការដ្ឋានអាស៊ាន និងប្រទេសជាសមាជិក រៀបចំកិច្ចប្រជុំពិសេសនេះឡើង ក្នុងគោលបំណងពិភាក្សារកដំណោះស្រាយអំពីវិបត្តិកូវីដ-១៩ លើវិស័យទេសចរណ៍ក្នុងតំបន់អាស៊ាន។

កិច្ចប្រជុំបានចែករំលែកបទពិសោធន៍ ការអនុវត្តល្អៗ ស្ដីពីវិធានការទប់ស្កាត់កូវីដ-១៩ និងផលប៉ះពាល់ក្នុងប្រទេសសមាជិកនីមួយៗ ក៏ដូចជាផែនការយុទ្ធសាស្ត្រ និងសកម្មភាពជួយសង្គ្រោះវិស័យទេសចរណ៍នៅចំពោះមុខ ក្នុងដំណាក់កាលនៃការដោះស្រាយវិបត្តិ (Mitigation Phase) ឬដំណាក់កាលនៃត្រៀមងើបឡើងវិញ (Early Recovery) ក៏ដូចជាផែនការស្ដារឡើងវិញបន្ទាប់ពីវិបត្តិកូវីដ-១៩ ( Post Covid-19 Crisis Recovery Plan)។

រដ្ឋមន្ត្រីទេសចរណ៍អាស៊ានបានសម្រេចដាក់ចេញនូវសេចក្តីប្រកាសរួមរំលេចអំពីលទ្ធផលនៃកិច្ចប្រជុំពិសេស ដោយផ្ដោតលើចំណុចសំខាន់ៗ ដូចខាងក្រោម៖

១- ជំរុញការសម្របសម្រួលរបស់អាស៊ានក្នុងការពន្លឿនការផ្លាស់ប្តូរព័ត៌មាន ស្តីអំពីសុខភាពទាក់ទងនឹងការធ្វើដំណើរ និងវិធានការចាំបាច់នានា ដែលអនុវត្តដោយរដ្ឋជាសមាជិកអាស៊ានទំាងអស់ ក្នុងការគ្រប់គ្រងការរីករាលដាលនៃជំងឺកូវីដ-១៩ តាមរយៈប្រតិបត្តិការកាន់តែសកម្មឡើងរបស់ក្រុមការងារទំនាក់ទំនងវិបត្តិទេសចរណ៍អាស៊ាន (ASEAN Tourism Crisis Communication Team-ATCCT) តាមរយៈការផ្តល់ព័ត៌មានទាន់ពេលវេលា និងទុកចិត្តបាន ដល់ភ្ញៀវទេសចរដែលធ្វើដំណើរចេញនិងចូលក្នុងប្រទេស ព្រមទាំងការីទេសចរណ៍នានានៅក្នុងតំបន់។

២- ពង្រឹងកិច្ចសហប្រតិបត្តិការរវាងស្ថាប័នទេសចរណ៍ជាតិអាស៊ាន (NTOs) ជាមួយនឹងវិស័យអាស៊ានពាក់ព័ន្ធផ្សេងៗទៀត ជាពិសេសជាមួយវិស័យសុខាភិបាល ព័ត៌មាន ដឹកជញ្ជូន និងអន្តោប្រវេសន៍ ក៏ដូចជាដៃគូខាងក្រៅរបស់អាស៊ានផ្សេងៗទៀត ព្រមទាំងអង្គការ និងសហគមន៍អន្តរជាតិនានា សំដៅរួមគ្នាអនុវត្តវិធានការទាំងឡាយ និងបង្កើតឱ្យមានទម្រង់ការផ្សេងៗគ្នារបស់ភាគីនីមួយៗ ដើម្បីជំរុញការឆ្លើយតបទាន់ពេលវេលា ឆាប់រហ័ស មានតម្លាភាព ច្បាស់លាស់លើការដោះស្រាយ និងការកាត់បន្ថយផលប៉ះពាល់នៃជំងឺកូវីដ-១៩ ក៏ដូចជាវិបត្តិដទៃទៀតនាពេលអនាគត។

៣- បង្កើនកិច្ចសហប្រតិបត្តិការឱ្យកាន់តែជិតស្និទ្ធបន្ថែមទៀត ក្នុងការចែករំលែកព័ត៌មាន និងការផ្លាស់ប្តូរការ អនុវត្តល្អៗ រវាងប្រទេសសមាជិកអាស៊ាន ក៏ដូចជាដៃគូអាស៊ានផ្សេងៗទៀត ស្តីពីការឆ្លើយតបចំពោះវិបត្តិ ការត្រៀមខ្លួនសម្រាប់ការទំនាក់ទំនង ការសម្របសម្រួលការតភ្ជាប់ កិច្ចខិតខំនិងវិធានការសង្គ្រោះផ្សេងៗ ដើម្បីគាំទ្រវិស័យទេសចរណ៍ ក៏ដូចជាការចាប់យកមេរៀនសំខាន់ៗស្តីពីវិបត្តិ ដើម្បីបានជារបាយការណ៍បន្ទាប់ពីវិបត្តិសម្រាប់ជាឯកសារយោងរបស់រដ្ឋជាសមាជិកអាស៊ាន ក្នុងការគ្រប់គ្រងឱ្យកាន់តែប្រសើរនូវវិបត្តិណាមួយឬជំងឺរាតត្បាតនានា នាពេលអនាគត។

៤- អនុវត្តនូវវិធានការ និងគោលនយោបាយដ៏ច្បាស់លាស់នានា ដើម្បីបង្កើនទំនុកចិត្តរបស់ភ្ញៀវទេសចរក្នុងស្រុកនិងអន្តរជាតិ ដែលមកទស្សនាតំបន់អាស៊ីអាគ្នេយ៍ រួមទាំងការរៀបចំបង្កើតឱ្យមានស្តង់ដា និងគោលការណ៍ណែនាំច្បាស់លាស់ ស្តីអំពីបរិយាកាសការងារប្រកបដោយសុវត្ថិភាព និងផ្តល់សុខភាពល្អប្រសើរជាងមុន សំដៅការពារអ្នកបំរើការងារ និងសហគមន៍ក្នុងផ្នែកបដិសណ្ឋារកិច្ច និងឧស្សាហកម្មដែលជាប់ ពាក់ព័ន្ធវិស័យទេសចរណ៍នានា ក៏ដូចជាគោលដៅ និងស្ថាប័នទេសចរណ៍ទាំងឡាយក្នុងរដ្ឋជាសមាជិកអាស៊ាន។

៥- គាំទ្រដល់ការរៀបចំ និងការអនុវត្តផែនការស្តារឡើងវិញក្រោយវិបត្តិកូវីដ-១៩ ដោយមិនត្រូវបន្ធូរកិច្ចខិតខំប្រឹងប្រែងក្នុងការរក្សាការពារសុខភាពសាធារណៈ ដែលរួមមានដូចជា ការកសាងសមត្ថភាពទេសចរណ៍អាស៊ាន ការចូលរួមជាមួយភាគីពាក់ព័ន្ធនានាក្នុងការបង្កើតទំនុកចិត្តអ្នកប្រើប្រាស់និងអាជីវកម្ម ស្វែងយល់ពីដំណោះស្រាយបែបច្នៃប្រឌិត និងនវានុវត្តន៍ក្នុងការពង្រឹងនិងជំរុញវិស័យទេសចរណ៍អាស៊ាន ជាពិសេសតាមរយៈការប្រើប្រាស់បច្ចេកវិទ្យាឌីជីថល ដោយផ្តោតសំខាន់ទៅលើកិច្ចខិតខំប្រឹងប្រែងផ្នែកទីផ្សារ និងកម្មវិធីផ្សព្វផ្សាយទេសចរណ៍រួម ក្នុងគោលដៅជំរុញអាស៊ានឱ្យក្លាយជាគោលដៅទេសចរណ៍តែមួយ

៦- ជំរុញការអនុវត្តគោលនយោបាយមីក្រូ និងម៉ាក្រូសេដ្ឋកិច្ច ក្នុងចំណោមគោលនយោបាយនានា ដោយផ្តល់នូវការគាំទ្រផ្នែកបច្ចេកទេស និងការសម្រួលផ្នែកហិរញ្ញវត្ថុ ការបន្ធូរបន្ថយពន្ធ និងការកសាងសមត្ថភាព ជាពិសេស លើជំនាញឌីជីថលសម្រាប់ភាគីពាក់ព័ន្ធក្នុងវិស័យទេសចរណ៍ និងធ្វើដំណើរ ដោយផ្តោតការយកចិត្តទុកដាក់ជាពិសេសលើសហគ្រាសខ្នាតតូចបំផុត តូច និងមធ្យម (MSMEs) ក្រុមជនដែលងាយរងគ្រោះ ព្រមទាំងសហគមន៍ដែលរងផលប៉ះពាល់នានា។

៧- បន្តកិច្ចសហប្រតិបត្តិការជាមួយដៃគូសន្ទនាអាស៊ាន អង្គការអន្តរជាតិនានា និងភាគីពាក់ព័ន្ធក្នុងវិស័យទេសចរណ៍ ដើម្បីកសាងតំបន់អាស៊ីអាគ្នេយ៍ទាំងមូល ឱ្យមានភាពរឹងមាំ និងត្រៀមខ្លួនរួចជាស្រេចក្នុងការគ្រប់គ្រងវិស័យទេសចរណ៍ប្រកបដោយចីរភាព និងបរិយាបន្ន បន្ទាប់ពីវិបត្តិណាមួយ៕