Moody’s អះអាងថា​កម្ពុជា​ទទួល​បាន​ផលប្រយោជន៍​ពី​ការធ្វើ​ពិពិធ​កម្មនៃ​ខ្សែសង្វាក់​ផ្គត់ផ្គង់​ពិភពលោក

ដោយៈ​ប៊ី

ភ្នំពេញៈ ប្រទេស​កម្ពុជា​បានទទួល​ផលប្រយោជន៍ ពី​ការធ្វើ​ពិពិធ​កម្ម​នៃ​ខ្សែសង្វាក់​ផ្គត់ផ្គង់​ពិភពលោក បើទោះបីជា​ការប្រកាស​ល​ទ្ធ​ផល​សម្រេច​ថា​ដក ឬ​មិន​ដក​ប្រព័ន្ធ​អនុគ្រោះ​ពន្ធ​អឺរ៉ុប​ក៏ដោយ។ នេះ​បើ​យោងតាម​ភ្នាក់ងារ​ស្រាវជ្រាវ​សេដ្ឋកិច្ច​របស់​អាម​រិ​ក Moody’s Investors Service នៅ​ថ្ងៃ​អង្គារ​នេះ។

Moody’s បានឱ្យ​ក្នុង​សេចក្តីថ្លែងការណ៍​មួយ ដែល​ត្រូវបាន​ចេញផ្សាយ​នៅក្នុង​ទីក្រុង​ហុងកុង​ថា “ខណៈ​ប្រព័ន្ធ​ពាណិជ្ជកម្ម​ពិភពលោក កាន់តែ​ផ្តោតលើ​តំបន់​តំបន់សំខាន់នីមួយៗ អាស៊ី អឺរ៉ុប និង​សហរដ្ឋអាមេរិក ទំនងជា​នឹងមាន​អ្នកផ្គត់ផ្គង់​ផ្ទាល់ខ្លួន សម្រាប់​ផលិតផល​យុទ្ធសាស្ត្រសំខាន់” ។

Moody’s បាន​អះអាងថា “បណ្តា​ប្រទេស​ដូចជា​កម្ពុជា ឥណ្ឌា និង​ឥណ្ឌូនេស៊ី នឹង​ទទួលបាន​ផលប្រយោជន៍ ពី​ការចូល​ទៅកាន់​ទីផ្សារ​អឺរ៉ុប និង​សហរដ្ឋអាមេរិក​សម្រាប់​ទំនិញ​ជាក់លាក់ ក្រោម​ប្រព័ន្ធ​អនុគ្រោះ​ពន្ធ​ទូទៅ និង​គំនិត​ផ្តួចផ្តើមអ្វីៗទាំងអស់​លើកលែងតែ​អាវុធ ដើម្បី​គាំទ្រ​ដល់​សេដ្ឋកិច្ច ដែលមាន​ប្រាក់ចំណូល​ទាប និង​មធ្យម” ។

ទីភ្នាក់ងារ​វាយតម្លៃ​សហរដ្ឋអាមេរិក​នេះ​បានឱ្យដឹងថា “នៅពេល​និន្នាការ​ទាំងនេះ​កើនឡើង ការធ្វើ​មូល​ដ្ឋា​នីយកម្ម​មួយចំនួន និង​ការផ្លាស់ប្តូរ​ខ្សែសង្វាក់​ផ្គត់ផ្គង់​នៅ​ខាងក្រៅ​ទ្វីបអាស៊ី​ទៅកាន់​អឺរ៉ុប និង​សហរដ្ឋអាមេរិក​ទំនងជា​កើតឡើង” ។

ផលប៉ះពាល់​អវិជ្ជមាន នឹងមាន​លក្ខណៈ​ធ្ងន់ធ្ងរ​បំផុត សម្រាប់​ផលិតករ​អាស៊ី រួមទាំង​អ្នក​ផលិត​ចិន នៅក្នុង​វិស័យ​យុទ្ធសាស្ត្រ ដូចជា​ផលិតផល​ឱសថ ឧបករណ៍​វេជ្ជសាស្ត្រ និង​ទំនិញ​បច្ចេកវិទ្យា​ទំនើប ដែល​សុវត្ថិភាព​នៃ​ការផ្គត់ផ្គង់​គឺជា​កង្វល់​ដ៏​ធំ​បំផុត។

កាលពី​ខែកុម្ភៈ​គណៈកម្មការ​អឺរ៉ុប បានប្រកាស​ផែនការ​ដក​ផ្នែក​អនុគ្រោះ​ពន្ធ ដែល​បាន​ផ្តល់ឱ្យ​កម្ពុជា ខណៈ​ថ្ងៃស្អែក​នេះ​អឺរ៉ុប​នឹង​ប្រកាសថា តើ​ដក ឬ​មិន​ប្រព័ន្ធ​អនុគ្រោះ​ពន្ធ​ពី​កម្ពុជា៕

ក្រុមហ៊ុន​អចលនទ្រព្យ​ដ៏​ល្បី​របស់​អាមេរិក Coldwell Banker Cambodia ចាប់ផ្តើមផ្តល់​សេវាកម្ម​លើកដំបូង​នៅ​កម្ពុជា

ដោយៈ​រ៉ា​ណេ​ត

ភ្នំពេញៈ ក្រុមហ៊ុន​អចលនទ្រព្យ​ដ៏​ល្បីឈ្មោះ ដែលមាន​ប្រភព​មកពី​សហរដ្ឋអាមេរិក Coldwell Banker Cambodia និង​មាន​អាយុ​ជាង ១១០ឆ្នាំ​មកហើយ​នោះ បានប្រកាស​ចាប់ផ្តើម​បើក​ដំណើរ​ការទទួល និង​ផ្តល់​សេវាកម្ម​ក្នុង​ទីផ្សារ​អចលនទ្រព្យ កម្រិត​ខ្ពស់​លើកដំបូង​នៅ​កម្ពុជា។

អគ្គនាយក​ក្រុមហ៊ុន​អចលនទ្រព្យ​អន្តរជាតិ Coldwell Banker Cambodia លោក Ken Lo បាន​មានប្រសាសន៍ប្រាប់​តាម​ទូរស័ព្ទ​នៅ​ព្រឹក​ថ្ងៃទី១១ ខែសីហា ឆ្នាំ២០២០នេះ  ក្រុមហ៊ុន​ភ្នាក់ងារ​អចលនទ្រព្យ​អន្តរជាតិ ដែល​ទើបតែ​សម្ពោធ​បើក​ដំណើរការ ជា​ផ្លូវការ​នៅ​កម្ពុជា​កាលពី​ថ្ងៃទី៨ ខែសីហា ឆ្នាំ២០២០ មួយ​នេះ មាន​ទីស្នាក់ការ​កណ្តាល​នៅ​សហរដ្ឋអាមេរិក ដែលជា​ក្រុមហ៊ុន​ដ៏​ធំ និង​ល្បីឈ្មោះ​លំដាប់​ទី៣ជា​សាកល។

លោក​បន្តទៀតថា “ជាមួយនឹង​ការបើក​ដំណើរ​ការផ្តល់សេវា​នៅ​កម្ពុជា ជា​លើកដំបូង​នៅពេលនេះ ក្រុមហ៊ុន​បាន​ផ្តោត​សំខាន់​ទៅលើ​ឯកទេស និង​ជំនាញ​ផ្នែក​អចលនទ្រព្យ​សម្រាប់​ពាណិជ្ជកម្ម (Commercial Real Estate) និង​ទីផ្សារ​អចលនទ្រព្យ​លំដាប់​ខ្ពស់” ។ លោក​បន្តទៀតថា “ទីផ្សារ​គោលដៅ​របស់​យើង គឺ​ខុសពី​បណ្តា​ក្រុមហ៊ុន​ភ្នាក់ងារ​ទូទៅ នៅ​ដែល​កំពុងដំណើរការ​ស​ព្វ​ថ្ងៃនេះ​នៅ​កម្ពុជា ដោយសារតែ​ពួកគេ​ធ្វើ​សេវាកម្ម​ចំរុះ បានន័យថា មិន​ថា​អចលនវត្ថុ​នោះ​មាន​កម្រិត​តូច ធំ ឬ​មធ្យម​នោះទេ គឺ​ធ្វើ​ទាំងអស់ ប៉ុន្តែ​សម្រាប់​ទីផ្សារ​គោលដៅ របស់​Coldwell Banker Cambodia គឺជា​ប្រភេទ​អចល​ទ្រព្យ​កម្រិត​ខ្ពស់​មានតម្លៃ​ថ្លៃ​អាច​ចាប់ពី១លាន​ដុល្លារ​ឡើងទៅ” ។

ជាមួយនឹង​ការបង្ហាញ​ពី​គោលដៅ​ទីផ្សារ​ខាងលើនេះ លោក Ken Lo ក៏បាន​បញ្ជាក់​ឱ្យដឹង​ផងដែរ​ថា សម្រាប់​ការផ្តល់​សេវាកម្ម នៅក្នុង​ទីផ្សារ​អចល​ទ្រព្យ​នៅ​កម្ពុជា ដែលជា​ការចូលរួមចំណែក​មួយ​យ៉ាងសំខាន់ នៅក្នុង​ការលើកកម្ពស់​វិស័យ​អចលនទ្រព្យ​កម្ពុជា​ឱ្យមាន​ភាពល្អប្រសើរ​មួយកម្រិត ខណៈដែល​បណ្តា​ប្រទេស​ជ​ច្រើន លើ​សាកលលោក​កំពុង​ជួប​វិ​សេដ្ឋកិច្ច តាមរយៈ​ក្រុមហ៊ុន Coldwell Banker Cambodia មានការ​ផ្គត់ផ្គង់​ទៅលើ​ទីផ្សារ Office Space បែប​ទាន់សម័យ​ជាច្រើន​ទីតាំង និង​ស្របតាម​តម្រូវការ​នាពេល​បច្ចុប្បន្ន។

លោក​បាន​បញ្ជាក់ថា ក្រុមហ៊ុន​ជាច្រើន ដែល​កំពុង​ប្រតិបត្តិការ​នៅពេល​បច្ចុប្បន្ន បាន និង​កំពុង​ធ្វើ​ការវិវឌ្ឍ​ទីស្នាក់ការ​របស់ខ្លួន ពី​ការជួល​ផ្ទះល្វែង ឬ​វីឡាតូចៗ មកកាន់​សំណង់​អាគារ​ទំនើបខ្ពស់ៗលំដាប់​ស្ដង់ដារ​អន្តរជាតិ ដែល​ក្រៅពី​អាចជួយ​បង្កើន​កេរ្តិ៍ឈ្មោះ ថែមទាំង​ជួយផ្តល់​ទំនុកចិត្ត ដល់​ដៃគូ​វិនិយោគ​របស់ខ្លួន​ថែមទៀត។ ដូច្នេះ​ការសម្រេចចិត្ត​ជ្រើសរើស Office Space កម្រិតស្តង់ដារ​ធ្វើជា​ទីស្នាក់ការ​ក្រុមហ៊ុន គឺជា​ជម្រើស​ដ៏​ប្រសើរ​បំផុត” ។

ជាមួយគ្នានេះ តាមរយៈ​ក្រុមហ៊ុន​ភ្នាក់ងារ​អចលនទ្រព្យ លំដាប់​អន្តរជាតិ​ដែលមាន​កេរ្តិ៍ឈ្មោះ​ប្រចាំ​នៅ​សហរដ្ឋអាមេរិក ដែល​ទើបតែ​បង្ហាញ​វត្ត​មាននៅ​កម្ពុជា នាពេលនេះ លោក Ken Lo បានធ្វើការ​លើកទឹកចិត្ត​ដល់​បណ្តា​ម្ចាស់​អគារ ក៏ដូចជា​អ្នក​អភិវឌ្ឍន៍​អគារធំៗលំដាប់​អន្តរជាតិ​នៅ​កម្ពុជា ជាពិសេស​អគារ​បម្រើ​វិស័យ Office Space អាច​ជួប​ប្រឹក្សា​ជាមួយ​ក្រុមហ៊ុន Coldwell Banker ក្នុងនាម​ជា​ដៃគូ​សហការ ដើម្បី​ផ្គត់ផ្គង់​ចំណែក​ទីផ្សារ ក៏ដូចជា​ការណែនាំ​អតិថិជនល្អៗ ប្រកបដោយ​ប្រសិទ្ធភាព​ខ្ពស់ ស្របតាម​ចក្ខុវិស័យ​នៃ​ការបណ្តាក់ទុន​វិនិយោគ។

ក្រុមហ៊ុន​ភ្នាក់ងារ​អចលនទ្រព្យ​អន្តរជាតិ Coldwell Banker Cambodia មាន​ទទួល​បម្រើសេវា និង​ប្រឹក្សា​តែ​ចំពោះ​អចលនវត្ថុ​ទាំងឡាយណា ដែលមាន​តម្លៃ​ខ្ពស់​អាច​ចាប់ពី៨០ម៉ឺន​ដុល្លារ ឬ១លាន​ដុល្លារ​រ​ឡើងទៅ ដោយ​ក្នុងនោះ​មិន​ថា​ជា​ប្រភេទ​អគារ​ពាណិជ្ជកម្ម ខុន​ដូ លំនៅដ្ឋាន និង​ទីតាំង​ជួល​ដូចជា Commercial Land, Commercial Industrial, Property Residence ។

បន្ថែម​ពីនេះ ក្រុមហ៊ុន​ក៏មាន​នាំយក​អចលនទ្រព្យ​ពី​កម្ពុជា ទៅ​លក់​នៅលើ​ទីផ្សារ​ក្រៅប្រទេស ហើយក៏​នាំយក​អចលនទ្រព្យ នៅក្រៅ​ប្រទេស​មក​លក់​នៅ​ប្រទេស​កម្ពុជា​វិញ​ផងដែរ ដូចជា​ប្រទេស​អូស្ត្រាលី​ជាដើម ដែលមាន​ប្រជាជន​ខ្មែរ​ទៅ​រស់នៅ និង​សិក្សា​បន្ត​នៅ​ទីនោះ​ច្រើន។ សម្រាប់​អ្នក​ដែលមាន​កូនចៅ​រៀន​ចប់​នៅក្នុង​ស្រុក ហើយ​ត្រូវ​បញ្ជូនទៅ​សិក្សា​បន្ត​នៅ​ប្រទេស​អូ​ស្ត្រា ឬ​កាណាដា អាច​ទិញ​អចលនទ្រព្យ ឬ​លំនៅដ្ឋាន​តាមរយៈ Coldwell Banker Cambodia ដែលជា​ក្រុមហ៊ុន មានការ​ទទួលស្គាល់​លំដាប់​ពិភពលោក៕

រដ្ឋាភិបាល​ត្រៀម​ឆ្វៀល​ដី​នៅក្នុង​តំបន់ការពារធម្មជាតិ និង​របៀង​ជីវចម្រុះ​ក្នុងភូមិសាស្ត្រ​មួយចំនួន​នៃ​ខេត្តកោះកុង  

ដោយ​គង់ សូរិយា

ភ្នំពេញៈ រដ្ឋាភិបាល​កម្ពុជា​បានសម្រេច​ឆ្វៀល​ដី​មួយចំនួន​ស្ថិតនៅ​តំបន់ការពារធម្មជាតិ និង​របៀង​ជីវៈចម្រុះ​ក្នុងភូមិ​សាស្ត្រ​ខេត្តកោះកុង ដែល​ប្រជាពលរដ្ឋ​អាស្រ័យ​ផល​ជាក់ស្តែង។

រដ្ឋមន្ត្រី​ក្រសួងបរិស្ថាន លោក​សាយ សំ​អាល់​បាន​ចូលរួម​ជា​អធិបតី​ក្នុង​ពិធី​បើក​កិច្ចប្រជុំ​អន្តរក្រសួង​ស្តីពី វឌ្ឍនភាព​នៃ​ការងារ​ពិនិត្យ សិក្សា និង​ចងក្រង ឯកសារ​ទីតាំង​ដី នៅក្នុង​តំបន់ការពារធម្មជាតិ​និង របៀង​អភិរក្ស​ជីវៈចម្រុះ ដែល​ប្រជាពលរដ្ឋ​បាន​ប្រើប្រាស់ និង​អាស្រ័យ​ផល ជាក់ស្តែង នៅក្នុង​ភូមិសាស្ត្រ​ខេត្តកោះកុង។

រដ្ឋមន្ត្រី មានប្រសាសន៍ថា កិច្ចប្រជុំ​នាពេលនេះ ជាការ​គោរព​តាម អនុសាសន៍​ណែនាំ​ដ៏​ខ្ពង់ខ្ពស់​របស់​សម្តេច​តេ​ជោ​នាយករដ្ឋមន្ត្រី និង​សេចក្តីប្រកាស​ព៍​ត័​មាន​របស់​ទីស្តីការគណៈរដ្ឋមន្ត្រី នៅ​ថ្ងៃទី៣ កក្កដា ឆ្នាំ២០២០ ។ អនុសាសន៍​រំលឹក​ឡើងវិញ ដ៏​ខ្ពង់ខ្ពស់​របស់​សម្តេច​តេ​ជោ នាយករដ្ឋមន្ត្រី​ក្នុង Facebook ផេ​ក​ផ្លូវការ​របស់​សម្តេច នៅ​ថ្ងៃទី៥ កក្កដា ឆ្នាំ ២០២០ ។

យោងតាម​បទបញ្ជា​របស់​សម្តេច​ក្រ​ឡា​ហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ នៅ​ថ្ងៃទី៨ ខែសីហា ឆ្នាំ២០២០ ស្តីពី​ការជំរុញ​ការទប់ស្កាត់ ការកាប់​រានទន្ទ្រាន​យក​ដី​ដោយ​ខុសច្បាប់ នៅក្នុង​តំបន់ការពារធម្មជាតិ នៅតាម​បណ្តា​ខេត្ត​នានា ។

នៅក្នុង​កិច្ចប្រជុំពេញអង្គ​គណៈរដ្ឋមន្ត្រី កាលពីដើម​ខែកក្កដា​ក​ន្ល​ង​មកនេះ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បានប្រគល់​ភារកិច្ច​ជូន ទៅ​ក្រសួង​ទាំង៣ គឺ​ក្រសួងបរិស្ថាន ក្រសួងកសិកម្ម រុក្ខាប្រមាញ់ និង​នេសាទ និង​ក្រសួង​រៀបចំ​ដែនដី នគររូបនីយកម្ម និង​សំណង់ អោយ​កាត់​ឆ្វៀល​ដីជូ​ន​ប្រជាពលរដ្ឋ ដែល​កំពុង​រស់នៅ​អាស្រ័យ​ផល​ក្នុង​តំបន់​អភិរក្ស តំបន់​សត្វព្រៃ និង​តំបន់​ការពារផ្សេងៗរបស់​រដ្ឋ ក្រសួងបរិស្ថាន បានចេញ​សេចក្តីសម្រេច​ស្តីពី ការបង្កើត​ក្រុមការងារ​ពិនិត្យ សិក្សា និង​ចងក្រង​ឯកសារ​ទីតាំង ដែល​ប្រជាពលរដ្ឋ​បាន​ប្រើប្រាស់ និង​អាស្រ័យ​ផល​ជាក់ស្តែង ក្នុង​តំបន់ការពារធម្មជាតិ និង​របៀង​ជីវចម្រុះ​នៅក្នុង​ភូមិសាស្ត្រ ខេត្តកោះកុង៕

ចំណេះដឹង! តើ​អ្វី​ជាការ​នាំចូល​តាម​របប​ប្រវេសន៍​កាលិក?

ដោយ​វុត្ថា

ភ្នំពេញៈ ប្រវេសន៍​កាលិក គឺជា​នីតិវិធី​គយ ដែល​អាច​អនុញ្ញាត​ឲ្យ​ទំនិញ​នាំចូល​បាន​ក្នុង​ដែន​គយ ក្រោម​ល័ក្ខខ័ណ្ឌ រួច​ផុតពី​ការបង់ពន្ធ​និង​អាករ​ទាំងស្រុង ឬ​ភាគ​ខ្លះ។

ទំនិញ​ទាំងនោះ ត្រូវបាន​នាំចូល​ក្នុង​គោលបំណង ច្បាស់លាស់ ហើយ​ត្រូវ​នាំចេញ​ទៅវិញ ក្នុង​កម្រិត​ពេលវេលា​ជាក់លាក់​មួយ និង​មិន​ធ្វើការ​កែច្នៃ ឬ​ផ្លាស់ប្តូរ លើកលែងតែ​ការ​រំលស់​ជាធម្មតា​តាម​ការប្រើប្រាស់ (មាត្រា ៩ នៃ​ច្បាប់​ស្តីពី​គយ)។

ការ​នាំចូល​ទំនិញ ក្រោម​របប​ប្រវេសន៍​កាលិក អាច​ត្រូវបាន​អនុញ្ញាត ចំពោះ​ករណី​ដូចខាងក្រោម ទី១ ទំនិញ​សម្រាប់​ដាក់តាំង​បង្ហាញ ឬ​ប្រើប្រាស់​ក្នុង​ពី​ធី​តាំ​ពិ​ព័រ​ណ៌ កិច្ចប្រជុំ​ឬ ព្រឹត្តិការណ៍​ប្រហាក់ប្រហែល ដែលមាន​បរិមាណ​សម​ស្រប។ ទី២ បរិក្ខារ​វិជ្ជាជីវៈ​ចាំបាច់​សម្រាប់​អ្នកបច្ចេកទេស ឬ​បុគ្គល​វិជ្ជាជីវៈផ្សេងៗ ដែល​ចូលមក​ព្រះរាជាណាចក្រ​កម្ពុជា​ដើម្បី​បំពេញ​ភារ​កិ​ច្ច្ ឬ​មុខរបរ​ឯកទេស ដោយ​មិន​រាប់បញ្ចូល​នូវ​បណ្តា គ្រឿង​ម៉ាស៊ីន គ្រឿងចក្រ និង​បរិក្ខារ​ឯកទេស សម្រាប់​ប្រើប្រាស់​ក្នុង​វិស័យ​កម្មន្តសាល ឧស្សាហកម្ម ការ​វេច​ខ្ចប់​ទំនិញ អាជីវកម្ម​ធនធានធម្មជាតិ ការកសាង ឬ ការជួសជុល​អគារ ការងារ​ដី ឬ គម្រោង​ប្រហាក់ប្រហែល​នានា។

ទី៣ កុងតឺន័រ ប៉ា​ឡែ​ត កញ្ចប់ គម្រូ​ទំនិញ និង​ទំនិញ​នាំចូល​ផ្សេងទៀត ដែល​ពាក់ព័ន្ធ​នឹង​ប្រតិបត្តិការ​ពាណិជ្ជកម្ម តែ​ពុំមែន​ជា​ផ្នែក​នៃ​ប្រតិបត្តិការ​ពាណិជ្ជក​ម្ម​នៅពេលដែល​ត្រូវបាន​លក់ ឬ​ទិញ ទី៤ទំនិញ​នាំចូល​សម្រាប់​សំណូមពរ​នៃ​ការអប់រំ វិទ្យាសាស្ត្រ និង​វប្បធម៌ រាប់បញ្ចូល​ទាំង​បំណែក​នៃ​បរិក្ខារ​វិទ្យាសាស្ត្រ និង​សម្ភារ​អប់រំ​ដែល​ទទួលបាន​ការអនុញ្ញាត​ឲ្យ​នាំចូល​តាម​របប​ប្រវេសន៍​កាលិក ទី៥ ទំនិញ​នាំចូល​សម្រាប់​វិស័យ​កីឡា​ដែល​ប្រើប្រាស់​ដោយ​អ្នកទេសចរ កីឡាករ អ្នកដំណើរ​សម្រាប់​ការប្រកួតប្រជែង ការបង្ហាញ ឬ ការហ្វឹកហាត់​ក្នុង​ដែន​គយ។

  • សម្ភារ​សម្រាប់​ផ្សព្វផ្សាយ​ទេសចរ សម្រាប់​ទាក់ទាញ​ការ​ទស្សនា​ប្រទេសផ្សេងៗទៀត។
  • ទំនិញ​នាំចូល​ដោយ​អ្នកដំណើរ​ឆ្លងកាត់​ព្រំដែន​សម្រាប់​ប្រើប្រាស់​ផ្ទាល់ខ្លួន
  • ទំនិញ​នាំចូល​សម្រាប់​គោលបំណង​មនុស្សធម៌ រាប់​ប​ញ្ជូ​ល​ទាំង​បរិក្ខារ​មន្ទីរពិសោធន៍ មន្ទីរ​វះកាត់ និង​ទំនិញ​ជំនួយ​សង្គ្រោះ​ជនរងគ្រោះ ដោយ​គ្រោះធម្មជាតិ និង​មហន្តរាយ​ប្រហាក់ប្រហែល។
  • មធ្យោបាយ​ដឹកជញ្ជូន​មនុស្ស និង​ទំនិញ សម្រាប់​គោលបំណង​ពាណិជ្ជកម្ម ដូចជា​នាវា អាកាស​យាន្ត​យានយន្ត​ផ្លូវគោគ ឬ ផ្លូវដែក ដែល​ប្រើប្រាស់​ក្នុង​ចរាចរ​ដឹកជញ្ជូន​ជា​អន្តរជាតិ រាប់បញ្ចូល​ទាំង​គ្រឿង បន្លាស់ គ្រឿង​បន្សំ និង​បរិក្ខារផ្សេៗ ទោះបីជា​មិន​យក​កម្រៃ​ក្តី៕

រដ្ឋាភិបាលផ្តល់ព័ត៌មានដល់វិស័យឯកជនលើការចរចាកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ

ដោយ ៖ រ៉ាណេត
ភ្នំពេញ ៖ រដ្ឋាភិបាលកម្ពុជា តាមរយៈសភាពាណិជ្ជកម្មកម្ពុជា និងក្រសួងពាណិជ្ជកម្ម បានបើកកិច្ចប្រជុំពិគ្រោះយោបល់ ផ្តល់ និងទទួលព័ត៌មានជាមួយវិស័យឯកជន លើការចរចាកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដើម្បីជាទុនសម្រាប់បង្កើនលទ្ធភាពក្នុងការស្វែងរកទីផ្សាររបស់ខ្លួនបន្ថែមនៅទីផ្សារប្រទេសកូរ៉េ។

លោក ស៊ីម សុខខេង រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារចរចា ដោយមានការចូលរួមពីតំណាងមកពីក្រសួង ស្ថាប័ន ក្រុមហ៊ុននានាក្នុងវិស័យឯកជនពាក់ព័ន្ធនានា នៅថ្ងៃទី១១ ខែសីហា ឆ្នាំ២០២០នេះ បានដឹកនាំកិច្ចប្រជុំនៅទីស្ដីការក្រសួងពាណិជ្ជកម្ម ដើម្បីពិគ្រោះយោបល់ ផ្តល់ និងទទួលព័ត៌មានជាមួយវិស័យឯកជនលើការចរចាកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ។

លោករដ្ឋលេខាធិការបានមានប្រសាសន៍បញ្ជាក់ឱ្យដឹងថា កិច្ចប្រជុំនេះត្រូវបានរៀបចំឡើង ដើម្បីប្រមូលធាតុចូល និងសំណូមពរពាក់ព័ន្ធនឹងវិស័យ និងទំនិញសក្តានុពល ដែលកម្ពុជាអាចនាំចេញទៅទីផ្សារកូរ៉េ និងបញ្ហាប្រឈមផ្សេងៗក្នុងការនាំចេញទៅទីផ្សារកូរ៉េនាពេលកន្លងមក សម្រាប់ជាធាតុចូលក្នុងការចរចាកិច្ចព្រមព្រៀងពាណិជ្ជកម្មសេរីជាមួយភាគីកូរ៉េ។

ពាក់ព័ន្ធទៅនឹងគម្រោងបង្កើនលទ្ធភាពក្នុងការផ្គត់ផ្គង់ និងទទួលបានចំណែកទីផ្សារពីកិច្ចចរចាព្រមព្រៀងពាណិជ្ជកម្មសេរីកម្ពុជា-កូរ៉េ នេះ តាមរយៈលោក ឡុង ឌីម៉ង ឯកអគ្គរាជទូតកម្ពុជាប្រចាំនៅប្រទេសកូរ៉េបានប្រាប់ឱ្យដឹងថា ក្រុមការងារពាណិជ្ជកម្មនៃស្ថានទូតកម្ពុជា ដឹកនាំដោយលោក ខាត់ ចិន អនុព័ន្ធពាណិជ្ជកម្ម បាននាំយកផលិតផលគំរូរបស់កម្ពុជាមួយចំនួនទៅបង្ហាញដល់ក្រុមហ៊ុនជាដៃគូដែលមានស្រាប់ និងបន្តស្វែងរកកិច្ចសហការថ្មីបន្ថែមទៀត ដើម្បីនាំយកមុខទំនិញ និងផលិតផលកម្ពុជាចូលទីផ្សារប្រទេសកូរ៉េបន្ថែមទៀត ។

លោកបានបន្តថា “ផលិតផល និងមុខទំនិញថ្មីៗដែលកម្ពុជាមានបំណងនាំចូលទីផ្សារកូរ៉េ រួមមាន ស្ករស គ្រាប់ស្វាយចន្ទី និងម្រេច របស់កម្ពុជា ដើម្បីផ្ដល់ជូនក្រុមហ៊ុនបញ្ជាទិញធំមួយរបស់កូរ៉េដែលមានបំណងចង់បន្ដនាំចូល និងចែកចាយលើទីផ្សារកូរ៉េ ខណៈដែលបច្ចុប្បន្ននេះក្រុមហ៊ុនបាននាំចូលត្រឹមតែជា ផ្លែស្វាយ គល់ស្លឹកគ្រៃ ស្លឹកចេក ត្រយ៉ូងចេក និងរំដេង ។ល៕

គម្រោងសាងសង់ទំនប់ស្ទាក់ទឹកស្រុកឯកភ្នំដ៏ធំតម្លៃ ៤២លានដុល្លារ សម្រេចបានលទ្ធផលប្រមាណ៧០ភាគរយ

ដោយ ៖ រ៉ាណេត

បាត់ដំបង ៖ គម្រោងសាងសង់ទំនប់ទឹកដ៏ធំប្រចាំនៅខេត្តបាត់ដំបង ក្នុងស្រុកឯកភ្នំ ស្ថិតនៅលើដងស្ទឹងសង្កែ តម្លៃប្រមាណ៤២លានដុល្លារក្រោមជំនួយរបស់រដ្ឋាភិបាលកូរ៉េ ដែលនឹងប្រើប្រព័ន្ធបញ្ជាដោយកុំព្យូទ័រ រហូតមកដល់ពេលនេះសម្រេចបានលទ្ធលប្រមាណ៧០ភាគរយហើយ ដែលនឹងគ្រោងបញ្ចប់ និងដាក់ឱ្យដំណើរការក្នុងពេលដ៏ខាងមុខនេះ។

រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បានមានប្រសាសន៍នៅក្នុងដំណើរចុះត្រួតពិនិត្យវឌ្ឍនភាពនៃការសាងសង់ទំនង់ស្ទាក់ទឹកសាលាតាអន កាលពីដើមសប្ដាហ៍នេះថា រហូតមកដល់ពេលជាលទ្ធផលនៃសាងសង់គឺទទួលបានសម្រេចប្រមាណ៧០ភាគរយ ហើយនឹងគ្រោងបញ្ចប់ការសាងសង់ទាំងស្រុងនៅត្រឹមឆ្នាំ២០២១ខាងមុខនេះ។

លោកបានបញ្ជាក់ថា គម្រោងសាងសង់ទំនប់ទឹកដ៏ធំមួយនេះ គឺជាគោលបំណងចម្បងរបស់រដ្ឋាភិបាល ក៏ដូចជាការចង់បានរបស់ប្រជាពលរដ្ឋដែលរស់នៅក្នុងខេត្តបាត់ដំបងផងដែរសម្រាប់បម្រើដល់វិស័យកសិកម្មទាំងរដូវប្រាំង និងរដូវវស្សា ការប្រើប្រាស់ប្រចាំថ្ងៃ ក៏ដូចជាការចូលរួមបង្កើនភាពទាក់ទាញនូវចំនួនទេសចរណ៍ចូលមកកម្សាន្តតំបន់មួយចំនួនទៀតដែលអាស្រ័យផលតាមរយៈទំនប់ទឹកដ៏ធំមួយនេះ”។

គម្រោងមួយនេះត្រូវចំណាយថវិកាចំនួន៤២លានដុល្លារ នឹងត្រូវបញ្ជារដោយប្រព័ន្ធបច្ចេកវិទ្យាកុំព្យូទ័រ ក្រោមជំនួយរបស់រដ្ឋាភិបាលកូរ៉េតាមរយៈការផ្តល់ហិរញ្ញប្បទានសម្បទាន និងបានបើកការដ្ឋានសាងសង់កាលពីខែមករា ឆ្នាំ២០១៩ ហើយគ្រោយនឹងបញ្ចប់នៅត្រឹមខែមិថុនា ឆ្នាំ២០២១ខាងមុខ ។ បន្ទាប់បញ្ចប់ការសាងសង់ ទំនប់ស្ទាក់ទឹកមួយនេះអាចមានលទ្ធភាពផ្គត់ផ្គង់ការស្រោចស្រពលើផ្ទៃដីស្រូវរស្សាប្រមាណ ១១០០០ហិកតា និងស្រូវប្រាំងចំនួន៤០០០ហិកតា។

ក្រៅពីសំណង់អាចស្ទាក់ទឹកសាលាតាអនមួយនេះ នៅក្នុងគម្រោងក៏មានការសាងសង់ទ្វារទឹក ប្រឡាយពង្វាងទឹកតាមប្រឡាយ សាងសង់សំណង់ក្បាលហុង ស្ពាន និងសំណង់ចែកចាយទឹកជាច្រើនកន្លែងទៀត៕

Breaking News៖ CNN ចុះផ្សាយថា រុស្ស៊ីបានចុះបញ្ជីវ៉ាក់សាំងការពារជំងឺ COVID-19 ជាផ្លូវការ ដើម្បីត្រៀមដាក់ប្រើប្រាស់នាពេលខាងមុខ

ដោយ ៖ ប៊ី
អន្តរជាតិ ៖ ប្រធានាធិបតីរុស្ស៊ី លោក ក្លាឌីមៀ ពូទីន បាននិយាយនៅលើទូរទស្សន៍រដ្ឋរបស់រុស្ស៊ី នៅពីថ្ងៃអង្គារនេះថា ប្រទេសរុស្ស៊ីបានចុះបញ្ជីជាផ្លូវការនូវវ៉ាក់សាំងការពារជំងឺ COVID-19 ដែលត្រូវបានបង្កើតឡើងដោយវិទ្យាស្ថាន Gamaleya Institute ដែលមានមូលដ្ឋាននៅទីក្រុងម៉ូស្គូ។

ថ្លែងនៅក្នុងវីដេអូ Conference ដែលផ្សាយបន្តផ្ទាល់ជាមួយរដ្ឋមន្រ្តីគណៈរដ្ឋមន្រ្តីរបស់លោក លោក ពូទីន បាននិយាយថា វ៉ាក់សាំងបានឆ្លងកាត់ការត្រួតពិនិត្យចាំបាច់ និងច្បាស់លាស់ទាំងអស់។

ប្រធានាធិបតីរុស្ស៊ីបានយាយថា កូនស្រីរបស់លោកម្នាក់បានចាក់វ៉ាក់សាំងនេះ ហើយលោកបាននិយាយថា នាងមានសីតុណ្ហភាព (កម្ដៅ) ខ្ពស់បន្តិច ប៉ុន្តែពេលនេះនាងមានភាពធូរស្រាល និងប្រសើរឡើងហើយ។
របាយការណ៍ជាច្រើនអំពីវ៉ាក់សាំងរបស់រុស្ស៊ីបានធ្វើឡើង ចំពេលមានការព្រួយបារម្ភអំពីសុវត្ថិភាព ប្រសិទ្ធភាព និងការចោទប្រកាន់ដែលថា ប្រទេសនេះបានកាត់បន្ថយផ្នែកខ្លះក្នុងការអភិវឌ្ឍន៍វ៉ាក់នេះរបស់រុស្ស៊ី។

មន្ត្រីរុស្ស៊ីបានប្រាប់ CNN កាលពីពេលមុនថា ការសាកល្បងដំណាក់កាលទី ៣ ដ៏សំខាន់នឹងត្រូវធ្វើឡើង បន្ទាប់ពីការចុះឈ្មោះវ៉ាក់សាំងរបស់រដ្ឋ។
ប្រទេសរុស្ស៊ីមិនបានបញ្ចេញទិន្នន័យវិទ្យាសាស្ត្រស្តីពីការធ្វើតេស្តវ៉ាក់សាំងរបស់ខ្លួនទេ ហើយទូរទស្សន៍ CNN ក៏មិនអាចបញ្ជាក់ពីសុវត្ថិភាព ឬប្រសិទ្ធភាពដែលបានអះអាងរបស់រុស្ស៊ីដែរ។
ក្រុមអ្នករិះគន់និយាយថា ការជំរុញវ៉ាក់សាំងរបស់ប្រទេសនេះកើតឡើង ចំពេលមានសម្ពាធនយោបាយពីវិមាន Kremlin ដែលចង់បង្ហាញរុស្ស៊ីជាកម្លាំងវិទ្យាសាស្ត្រពិភពលោក៕

សម្តេចតេជោ និងសម្តេចកិត្តិព្រឹទ្ធបណ្ឌិតនឹងអញ្ជើញចូលរួមសម្ពោធសួនទឹក Garden City Water នៅចុងសប្តាហ៍នេះ

ដោយ ៖ វុត្ថា

ភ្នំពេញ៖ បើមិនមានអ្វីប្រែប្រួលនោះទេ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នឹងអញ្ជើញជាធិបតីនៅក្នុងពិធីបើកដំណើរការសាកល្បងនូវសួនទឹកកម្សាន្តអន្តរជាតិ Garden City Water Park នៅចុងសប្តាហ៍នេះ ដែលស្ថិតនៅមហាវិថីឈ្នះឈ្នះ សង្កាត់ព្រែកតាសេក ខណ្ឌជ្រោយចង្វាររាជធានីភ្នំពេញ។

យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញចេញផ្សាយនៅថ្ងៃទី១១ ខែសីហា ឆ្នាំ២០២០នេះ ស្តីពីការបញ្ចៀសចរាចរណ៍រថយន្តដឹកទំនិញ រថយន្តធុនធំ និងរថយន្តដឹកដីជាបណ្តោះអាសន្ននៅក្នុងអំឡុងពេលបើកដំណើរការសាកល្បងសួនទឹកកម្សាន្តអន្តរជាតិ Garden City Water Park នាថ្ងៃទី១៦ ខែសីហា ឆ្នាំ ២០២០ខាងមុខ។

សួនទឹក Garden City Waterparkដ៏ធំនេះ ត្រូវបានសាងសង់លើផ្ទៃដី៦ហិកតា ស្ថិតនៅក្នុងតំបន់អភិវឌ្ឍន៍ទីក្រុងរណបថ្មីរបស់អ្នកឧកញ៉ា លី យ៉ុងផាត់ ក្នុងសង្កាត់ព្រែកតាសេក ខណ្ឌជ្រោយចង្វារ ចំងាយប្រមាណ១៨គីឡូម៉ែត្រពីរាជធានីភ្នំពេញជាប់នឹងសួនសត្វ Phnom Pen Safari ។

សួនទឹក Garden City Water Park វិនិយោគដោយក្រុមហ៊ុន LYP Group ក្នុងទំហំទឹកប្រាក់វិនិយោគប្រមាណជាង៥៥លានដុល្លារអាមេរិក ដែលសាងសង់ដោយ ក្រុមហ៊ុន white water group របស់ក្រុមហ៊ុនអង់គ្លេស មានឧបករណ៍កម្សាន្តច្រើនជាងសួនទឹក Cartoon Newtwork របស់ថៃ ៥0ភាគរយ មានរលកសម្បនិម្មិតកម្ពស់៣.៥ ម៉ែត្រ និងទំហំ៦.៣ ហិចតា ។

សួនទឹកនេះនឹងក្លាយជាសួនទឹកធំលំដាប់ទី៣ប្រចាំតំបន់អាស៊ាន បន្ទាប់ពីសួនទឹក Sunway lagoon ដែលមានទំហំ៣២ហិចតា របស់ម៉ាឡេស៊ី និងសួនទឹក Ramaynak ទំហំ១៨ហិចតារបស់ថៃទើបតែបើកថ្មីៗនេះ Garden City Water Park ដែលត្រៀមទម្លាក់តំណែងសួនទឹក Cartoon Network Pattaya របស់ថៃលើទំហំដី៥.៧ហិចតា ទៅលំដាប់ទី៤ផងដែរ។

លោក សេង ង៉ុក អគ្គនាយកក្រុមហ៊ុន LYP Group ធ្លាប់បានឱ្យដឹងថា ការអភិវឌ្ឍន៍សួន Garden City Water Park នេះនឹងផ្តល់ឱ្យទីក្រុងភ្នំពេញនូវសួនទឹក និងកន្លែងកម្សាន្តដែលមានលក្ខណៈស្តង់ដារអន្តរជាតិ។ សួនទឹកកម្សាន្តនេះ គឺជាគម្រោងធំជាងគេទី១ក្នុងតំបន់អាស៊ី ពោលគឺដណ្តើមតំណែងធំជាងសួនទឹកកម្សាន្ត នៅប៉ាតាយ៉ា ប្រទេសថៃ ដែលមានឈ្មោះថា Cartoon Network Waterpark រហូតដល់ទៅ៥០ភាគរយឯណោះ។

លោកបញ្ជាក់ថា លក្ខណៈពិសេសរបស់សួនទឹកកម្សាន្ត ដ៏ធំដំបូងគេបង្អស់នៅកម្ពុជានេះ មានកន្លែងសំខាន់ៗដូចជា សមុទ្រសិប្បនិម្មិត ដែលទឹករលកកម្ពស់៣ម៉ែត្រកន្លះ ទឹកជ្រោះធ្លាក់ដ៏ស្រស់ស្អាត កន្លែងរំអិលទឹកខ្ពស់ ទឹករាំតាមចង្វាក់ភ្លេង កន្លែងក្មេងលេងជាច្រើន និងកន្លែងសំខាន់ៗផ្សេងទៀត។ សួនទឹកកម្សាន្ត Garden City Water Parkនេះ សាងសង់រំលេចទៅតាមបែបរចនាបថសម័យអង្គរដែលមានរូបអប្សរា ដំរី បាយ័ន អង្គរវត្ត លាយឡំទៅនឹងរចនាបថសម័យទំនើបមកពីអឺរ៉ុប និងអាមេរិក៕

រដ្ឋាភិបាលអនុម័តគម្រោងវិនិយោគបង្កើតរោងចក្រថ្មីមួយទៀតតម្លៃជាង ១០ លានដុល្លារនៅខេត្តកំពង់ស្ពឺ

ដោយវុត្ថា
ភ្នំពេញ៖ នៅខែសីហានេះ រាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគបង្កើតរោងចក្រសម្លៀកបំពាក់ថ្មីមួយទៀត តម្លៃជាង ១០ លានដុល្លារអាមេរិក នៅក្នុងមូលដ្ឋានខេត្តកំពង់ស្ពឺ។

តាមសំណើសុំវិនិយោគលើគម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន FOREVER FUG GARMENT CO., LTD. គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី ១១ ខែសីហា ឆ្នាំ ២០២០នេះ បានសម្រេចចេញវិញ្ញាបនបត្រចុះបញ្ជីជាស្ថាពរ ដែលមានទីតាំងវិនិយោគស្ថិតនៅដីឡូតិ៍ B ផ្លូវលេខ១២៧ ភូមិត្បូងអង្គ ឃុំព្រៃញាតិ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ១០,៣លានដុល្លារអាមេរិក និងអាចបង្កើតការងារបានចំនួន ២.២៦៣កន្លែង។

អភិបាលខេត្តកំពង់ស្ពឺ លោក វ៉ី សំណាង កាលពីកន្លងមកថ្មីៗនេះ ឱ្យដឹងថា រាជរដ្ឋាភិបាលកម្ពុជា ក៏ដូចជារដ្ឋបាលខេត្ត បានស្វាគមន៍រាល់គម្រោងវិនិយោគទាំងអស់ចូលមកកម្ពុជា ក៏ដូចជាខេត្តកំពង់ស្ពឹដោយមិនប្រកាន់ចំពោះតែវិនិយោគិនចិន អាមេរិក និងអឺរ៉ុបនោះទេ ឱ្យតែមកបណ្តាក់ទុកវិនិយោគផ្តល់កំណើនសេដ្ឋកិច្ច និងកម្លាំងពលកម្មដល់ពលរដ្ឋមកម្ពុជា។

បន្ទាប់ពីស្ថានភាពនៃការរាតត្បាតជំងឺឆ្លងត្រូវបានស្ងប់ស្ងាត់មួយរយៈពេលចុងក្រោយនេះ បណ្តាវិនិយោគិនជាតិ និងអន្តរជាតិជាច្រើន បានចូលមកសិក្សា និងពីភាក្សាទៅលើគម្រោងវិនិយោគរបស់ពួកគេ នៅក្នុងខេត្តកំពង់ស្ពឺនៅក្នុងវិស័យសំខាន់ៗមួយចំនួន ដែលក្នុងនោះក៏មានគម្រោងសាងសង់អគារពាណិជ្ជកម្មផងដែរ។

លោកបន្តថា ខេត្តកំពង់ស្ពឺន បានទាក់ទាញក្រុមហ៊ុនវិនិយោគបរទេស និងនៅក្នុងស្រុកជាច្រើនបានចូលមកសិក្សា និងបណ្តាក់ទុនវិនិយោគលើវិស័យជាច្រើនរួមមានវិស័យទេសចរណ៍ កសិកម្ម និង រោងចក្រសហគ្រាសផ្សេងៗ ដែលបច្ចុប្បន្ននេះ មានរោងចក្រសហគ្រាសប្រមាណជិត២៦១ ដែលបានផ្តល់ឱកាសការជូនពលរដ្ឋជាង ១២ ម៉ឺននាក់ ។

ខេត្តកំពង់ស្ពឺ បានក្លាយជាគោលដៅដ៏ទាក់ទាញ និងមានប្រជាប្រិយភាពលើការវិនិយោគក្នុងវិស័យឧស្សាហកម្ម រោងចក្រ វិស័យកសិ–ឧស្សាហកម្ម វិស័យអចលនទ្រព្យ វិស័យទេសចរណ៍ និងវិស័យអប់រំកម្រិតខ្ពស់ ដែលបានចាក់បញ្ចូលប្រាក់ចំណូល ដល់សេដ្ឋកិច្ចជាតិរាប់ពាន់លានដុល្លារតាមរយៈខេត្តមួយនេះ ៕

ខុនដូតម្លៃសមរម្យមួយនៅតំបន់ជ្រោយចង្វារត្រៀមលក់បញ្ចប់យូនីតជាមួយ ការផ្តល់ជូនយ៉ាងពិសេស

        ដោយស៊ីវ ម៉េង

        ភ្នំពេញៈ  ខុន​ដូ​ប្រណីត និង​មានតម្លៃ​សមរម្យ​បំផុត SH Condo បាន​ត្រៀម​ផ្តល់​កូនសោ​ចូល​ស្នាក់នៅ​ដល់​អតិថិជន និង​លក់​បញ្ចប់​យូ​នី​ត​ជាមួយនឹងការផ្តល់ជូននូវសម្ភារៈបរិក្ខាទំនើប និង​តម្លៃយ៉ាងសមរម្យ។​

ជាមួយនឹង​ភាព​រីកចម្រើន និង​អភិវឌ្ឍន៍​យ៉ាង​ឆាប់រហ័ស​នៃ​តំបន់​ជ្រោយចង្វារ ដែល​ប្រែក្លាយ​ពី​តំបន់​ក្រៅ​ក្រុង​មកជា​ក្រុង​រណប​ដ៏​ទាក់ទាញ សំណង់​លំនៅដ្ឋាន​សហកម្មសិទ្ធិ​នៃ​គម្រោង​ខុន​ដូ SH ជ្រោយចង្វារ បាន និង​កំពុង​ទាក់ទាញ​ការចាប់អារម្មណ៍​យ៉ាងខ្លាំង​ពី​សំណាក់​អតិថិជន​ដែល​ប្រាថ្នា​ការរស់នៅ​បែប​ស៊ី​វិ​ល័យ។

ក្នុងចំណោម​គម្រោង​អភិវឌ្ឍន៍​ជាច្រើន គម្រោង​ខុន​ដូ​តម្លៃ​សមរម្យ​ជាងគេ​នៅ​តំបន់​ជ្រោយចង្វារ SH Condo កំពស់ ២៨ជាន់ បាន និង​កំពុង​ស្វាគមន៍​អតិថិជន ដែល​ប្រាថ្នា​ចង់បាន​ជីវិត និង​ការរស់នៅ​ប្រកបដោយ​ភាពកក់ក្ដៅ ទំនើប ទាន់សម័យ ជាមួយ​ការលក់​ក្នុងតម្លៃ​សមរម្យ និង​មាន​លក្ខខណ្ឌ​បង់ប្រាក់​ល្អប្រសើរ​បំផុត។

គម្រោង​ដែល​កំពុង​ឈានទៅរក​ការបញ្ចប់​ការសាងសង់ ក្នុងពេល​ដ៏​ខ្លី​ខាងមុខនេះ និង​កំពុងបើក​ទា្វរ រង់ចាំ​ទទួល​ស្វាគមន៍​អតិថិជន​មួយ​នេះ មាន​ទីតាំង​ស្ថិតនៅ​លើផ្លូវ​ម៉ាស៊ីនទឹក ក្នុង​សង្កាត់​ជ្រោយចង្វារ ខ័​ណ្ឌ​ជ្រោយចង្វារ រាជធានី​ភ្នំពេញ។ ជាមួយនឹង​តម្លៃ​ទាក់ទាញ​បំផុត អ្នកវិនិយោគ​ខុន​ដូ​នេះ​បាន និង​ផ្តល់ឱកាស​ពិសេស លោកអ្នក​កក់​តែ ៥០០ដុល្លារ នឹង​ទទួល​បានការ បញ្ចុះតម្លៃ​កាន់តែ​ពិសេស បូករួម​ទាំង ការផ្តល់ជូន​នូវ​សម្ភារៈប្រើប្រាស់​ប្រចាំថ្ងៃ​ជាច្រើន រួមមាន​ដូចជា -ទូរ​ទឹកកក -ទូរ​ទស្ស​ន៏ (Smart TV ) ទូរ​ចង្ក្រាន​លើ​ក្រោម ម៉ាស៊ីនទឹក​ក្តៅ (Water Heater 32L)- និង​គ្រឿង​បរិក្ខារ​ក្នុង​បន្ទប់ទឹក​ដ៏​ទាន់សម័យ​ចំនួន​មួយឈុត​ថែមទៀត​ផង។

តំបន់​ជ្រោយចង្វា​ក្នុង​ពេលនេះ និង​អនាគត​ជា​តំបន់​ល្អ​សម្រាប់​អ្នកវិនិយោគ និង​អ្នក​ដែល​ចង់​រស់នៅ ព្រោះ​តំបន់​នេះ​ហុំ​ព័ទ្ធ​ដោយ​ទន្លេ ។ សម្រាប់​អ្នក​ដែល​ចង់​គិតគូ​ពី​ផាសុខភាព អាច​ផ្លាស់ប្តូរ​ទៅ​រស់នៅ​តំបន់​ជ្រោយចង្វារ​វា ដោយសារ​តំបន់​ជ្រោយចង្វា​មានការ​ទាក់ទាញ​ច្រើន ហើយ​គម្រោង​អភិវឌ្ឍ​ធំ​នៅ​តំបន់​នេះ​ច្រើន។

សម្រាប់​ការសាកសួរ​ព័ត៌មាន​បន្ថែម​ពី​គម្រោង​ខុន​ដូ SH  លោកអ្នក​អាចទាក់ទង​តាមរយៈ​ទូរស័ព្ទ​លេខ 089 787 721 ។ Smart 010  725 168 (គីម​ឈាង) 096 505 6666 ។ 017  725  168  ចិន្តា។ 077  725  168  ម៉ា​រី​ណែ​ត ៕