អ្នកជំនាញៈកំណើនអ្នកទិញខុនដូក្នុងស្រុកចូលរួមបំពេញចន្លោះឱ្យការថយចុះ នៃវិនិយោគិនបរទេស

ដោយៈ ប៊ី

ភ្នំពេញៈ អ្នកជំនាញបានអះអាងថា ចំនួនវិនិយោគខុនដូក្នុងស្រុក ចាប់ផ្តើមមានកំណើនឡើង ខណៈអ្នកទិញខុនដូ នៅកម្ពុជា ជាជនបរទេសមានការថយចុះ និងជំនួសមកវិញដោយជនជាតិខ្មែរ និងទីផ្សារក្នុងស្រុក។

នាយិកាក្រុមហ៊ុន CBRE Cambodia លោកស្រីអាន សុធីតាបានប្រាប់ Propertyarea.asia នៅថ្ងៃទី១១ ខែសីហា ឆ្នាំ២០២០នេះថា តាមការសង្កេតរបស់លោកស្រីបច្ចុប្បន្ន តម្រូវការខុនដូក្នុងស្រុកកើនឡើង ជំនួសឱ្យតម្រូវការក្រៅប្រទេស។

លោកបានថ្លែងថា“ខុនដូប្រភេទមធ្យម និងប្រភេទតម្លៃសមរម្យមានតម្រូវការច្រើនសម្រាប់ទីផ្សារក្នុងស្រុក”។ លោកបន្តថា “បច្ចុប្បន្នខុនដូយូនីតតម្លៃមធ្យម ត្រូវបានទិញដោយអ្នកវិនិយោគក្នុងស្រុកប្រមាណ៥០ភាគរយ និងខុនដូប្រ​ភេទតម្លៃសមរម្យដែលលក់ចេញ១០យូនីត មាន៦ទៅ៧យូនីតត្រូវបានទិញដោយជនជាតិខ្មែរ”។

លោកស្រីបានឱ្យដឹងទៀតថា “គិតត្រឹមឆមាសទី១ឆ្នាំ ២០២០ នេះ កម្ពុជាមានខុនដូសរុបប្រមាណ២ម៉ឺនយូនីត ហើយបច្ចុប្បន្ននេះចំនួនអ្នកទិញខុនដូ នៅកម្ពុជាជាជនបរទេសមានការថយចុះ និងជំនួសមកវិញដោយជនជាតិខ្មែរ និងទីផ្សារក្នុងស្រុក ដោយសា​រតែផ្នត់គំនិតរបស់ជនជាតិខ្មែរ ដែលចង់រស់នៅក្នុងខុនដូកាន់តែកើនឡើង ពីមួយឆ្នាំទៅមួយឆ្នាំ”។

លោកស្រីបានឱ្យដឹងថា វាក៏មិនចំលែកនោះទេ ដែលអ្នករស់នៅក្នុងខុនដូគឺជាប្រ​ជាជនក្នុងស្រុក ព្រោះថានៅបណ្ដាប្រទេសជាច្រើន ជាពិសេសប្រទេសជិតខាងកម្ពុជា មានបទពិសោធន៍រួចហើយ ដោយពីមុនអ្នករស់នៅក្នុងខុនដូ ជាជនបរទេសតែក្រោយមកក៏ជាជនជាតិខ្លួនវិញ។

អ្នកទិញអចលនទ្រព្យជាច្រើន កំពុងស្វែងរកចាប់យកឱកាស ក្នុងការទិញអចលនទ្រព្យស្ទើតែគ្រប់ទីកន្លែង និងគ្រប់ប្រភេទ ដែលមានសក្ដានុពលទូទាំងប្រទេសកម្ពុជា ខណៈវិស័យនេះបានចាប់ងាកចេញពីវិបត្តិ COVID-19។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា បានថ្លែងឲ្យដឹងនៅពេលថ្មីៗនេះថា ទីផ្សារអចលនទ្រព្យបាន និងកំពុងចាប់ផ្តើមងាកចេញពីវិបត្តិ COVID-19 ខណៈអ្នកវិនិយោគក្នុងវិស័យនេះ កំពុងស្វែងរកឱកាស ដើម្បីចាប់យកអចលនទ្រព្យ នៅទីតាំងដែលមានសក្តានុពល នៅទីតាំងផ្សេងៗស្ទើពេញផ្ទៃប្រទេស។

លោកបានថ្លែងថា “អ្នកទិញអចលនទ្រព្យកាន់តែច្រើន កំពុងស្វែងរកចាប់យកអច​លនទ្រព្យស្ទើតែគ្រប់ទីកន្លែងក្នុងប្រទេស”។ លោកបន្តថា “សក្តានុពលនៃទីផ្សារអចលនទ្រព្យនៅកម្ពុជា បានចាប់ផ្តើមកើនឡើងជាលំដាប់”។

លោកបន្ថែមថា “វិស័យអចលនទ្រព្យនៅកម្ពុជា បច្ចុប្បន្នមានភាពរស់រវើក ហើយខ្ញុំនៅតែមានសុទិដ្ឋិនិយមថា វិស័យនេះនឹងកើនឡើងទ្វេដង នៅពេលដែលជំងឺ Covid-19 បានផុតរលត់ទាំងស្រុង”៕

មជ្ឈមណ្ឌលពាណិជ្ជកម្មចំនួន៦របស់កម្ពុជានៅចិន ដើរតួនាទីយ៉ាងសំខាន់ទាក់ទាញវិនិយោគិនចិន

ដោយ៖ ប៊ី

ភ្នំពេញ៖ ប្រទេសកម្ពុជា បានបង្កើតមជ្ឈមណ្ឌលពាណិជ្ជកម្មចំនួន៦ នៅប្រទេសចិន ខណៈមជ្ឈមណ្ឌលទាំងនេះបានដើរតួនាទីយ៉ាងសំខាន់ក្នុងការបង្កើតឱកាសវិនិយោគ និងពាណិជ្ជកម្មដល់ការទាក់ទាញវិនិយោគិនចិន។

មជ្ឈមណ្ឌលទាំងនេះមាននៅក្រុងក្វាងចូវខេត្តក្វាងទុង ក្រុង Xi’an ខេត្ត Shaanxi; ក្រុង Haining ខេត្តស៊ីជាំង ក្រុងយ៉ានតៃ ខេត្តសានទុង ហុងកុង និងគុនមីងខេត្តយូណាន។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ធ្លាប់មានប្រសាសន៍ថា “មជ្ឈមណ្ឌលទាំងនេះ បានដើរតួនាទីយ៉ាងសំខាន់ជាវេទិកាបង្ហាញផលិតផលកម្ពុជា និងចែករំលែកព័ត៌មានស្តីពីទេសចរណ៍ក៏ដូចជាឱកាសវិនិយោគ និងពាណិជ្ជកម្មដល់ពាណិជ្ជករ និងវិនិយោគិនចិន”។

កាលពីខែឧសភាឆ្នាំមុន មន្រ្តីកម្ពុជាជាង ១០០ នាក់បានចូលរួមការតាំងពិព័រណ៍អន្ដរជាតិសូត្រតាមផ្លូវអន្តរជាតិលើកទី ៤ នៅក្រុង Xi’an នៃខេត្តសាអានស៊ី។
នៅខែបន្ទាប់ អនុប្រធានមន្ទីរពាណិជ្ជកម្មខេត្ត Shaanxi លោក Shi Zhijun មានប្រសាសន៍ថា រដ្ឋាភិបាល Shaanxi គួរតែរៀបចំព្រឹត្តិការណ៍សេដ្ឋកិច្ច និងពាណិជ្ជកម្មបន្ថែមទៀត ដើម្បីផ្តល់ព័ត៌មានដល់ក្រុមហ៊ុនចិនអំពីច្បាប់វិនិយោគនៅកម្ពុជា។

លោកបានមានប្រសាសន៍ថា “យើងចាំបាច់ត្រូវផ្លាស់ប្តូរទស្សនកិច្ចជាញឹកញាប់រវាងមន្រ្តីជាន់ខ្ពស់មកពីខេត្ត Shaanxi និងប្រទេសកម្ពុជា ដើម្បីជំរុញកិច្ចសហប្រតិបត្តិការ និងការទទួលយកព័ត៌មានទៅវិញទៅមក។

លោកបានថ្លែងថា “យើងលើកទឹកចិត្តក្រុមហ៊ុននៅខេត្ត Shaanxi ឱ្យវិនិយោគនៅកម្ពុជា។ ថ្មីៗនេះយើងបង្កើតវេទិកាអាជីវកម្មមួយ ដើម្បីផ្តល់នូវការវាយតម្លៃហានិភ័យ និងសេវាកម្មហិរញ្ញវត្ថុផ្សេងៗទៀត។

យោងតាមទិន្នន័យរបស់ក្រសួងផ្លូវការ ចិនបានវិនិយោគទឹកប្រាក់ប្រមាណ ១៤,៧ ពាន់លានដុល្លារនៅកម្ពុជាពីឆ្នាំ ១៩៩៤ ដល់ឆ្នាំ ២០១៦។

ទំហំពាណិជ្ជកម្មទ្វេភាគីរវាងកម្ពុជា និងចិនបានកើនឡើងដល់ ៩,៤២ពាន់លានដុល្លារអាមេរិកក្នុង២០១៩។ នេះបើយោងតាមទិន្នន័យរបស់ស្ថានទូតចិនប្រចាំកម្ពុជា។

រដ្ឋាភិបាលកម្ពុជា និងចិនមានមហិច្ឆតា ពង្រីកការធ្វើពាណិជ្ជកម្មវិនិយោគសេវា និងកិច្ចសហប្រតិបត្តិការឱ្យកាន់តែស៊ីជម្រៅជាងមុន សំដៅសម្រេចឱ្យបានគោលដៅពាណិជ្ជកម្មសរុប ១០ពាន់លានដុល្លារអាមេរិកនៅឆ្នាំ២០២៣ ខណៈការចរចាលើការបង្កើតកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន ត្រូវបានបិទបញ្ចប់ជាផ្លូវការ៕

រដ្ឋាភិបាលកំពុងចចារជាមួយក្រុមហ៊ុនចិនដើម្បីរៀបចំហេដ្ឋារចនាសម្ព័ន្ធ រំដោះជំនន់ទឹកភ្លៀងក្នុងក្រុងភ្នំពេញ

ដោយវុត្ថា

ភ្នំពេញ៖ ខណៈដែលទីក្រុងភ្នំពេញកំពុងប្រឈមទៅនឹងជំនន់ទឹកភ្លៀង និងហេដ្ឋារចនាសម្ព័ន្ធ និងក្រុងត្រូវបានពពង្រីកនាពេលបច្ចុប្បន្ននេះ រដ្ឋាភិបាលតាមរយៈស្ថាប័នពាក់ព័ន្ធនានាបាននឹងកំពុងពិភាក្សា និងចចារជាមួយក្រុមហ៊ុនចិន ដើម្បីស្តារស្ទឹកព្រែកត្នោតនៅភាគខាងត្បូងនៃទីក្រុងភ្នំពេញដើម្បីរំដោះជំនន់ទឹភ្លៀងនៅក្នុងក្រុង។

លោក ចាន់ យុត្ថា រដ្ឋលេខាធិការក្រសួងធនធានទឺក និងឧតុនិយម នៅក្នុងសន្និសីទសារព័ត៌មានស្តី «ស្ថានភាពរបបជលសាស្រ្តក្នុងអាងទន្លេមេគង្គ និងទន្លេសាបនាពេលបច្ចុប្បន្ន» នៅថ្ងៃទី ១១ ខែសីហា ឆ្នាំ ២០២០នេះ បានឱ្យដឹងថា កាលពីម្សិលមិញនេះ រដ្ឋមន្ត្រីក្រសួងធនធានទឹក បានដឹកនាំកិច្ចប្រជុំជាមួយស្ថាប័នពាក់ព័ន្ធពិភាក្សា និងចចារថ្លៃស្តារស្ទឹងព្រែកត្នោតជាមួយក្រុមហ៊ុនចិន ដើម្បីរំដោះទឹកជំនន់ភ្លៀងនៅក្នុងទីក្រុងភ្នំពេញ ខណៈស្ទឹងព្រែកត្នោតនេះ មានសភាពរួមតូចនៅក្នុងផ្នែកខាងក្រោម ។

លោកបន្តថា “ទីក្រុងភ្នំពេញ និងហេដ្ឋារចនាសម្ព័ន្ធត្រូវបានពង្រីកជាបន្តបន្ទាប់ ដូច្នេះ ហើយទីក្រុងភ្នំពេញត្រូវការទំនប់ដើម្បីទប់ទឹក ជាពិសេសស្តារនៅស្ទឹកព្រែកត្នោត ខណៈដែលនៅភាគខាងក្រោមត្រូវបានរួមតូច ”។

លោកបន្តថា “ទីក្រុងភ្នំពេញមានជំនន់ ៣ ផ្នែក គឺជំនន់ទឹកភ្លៀង ជំនន់ទឹកទន្លេមេគង្គត្រូវបានគំរាមកំហែង និងជំនន់ទឹកនៅស្ទឹងព្រែកត្នោត “។ លោកបន្តថា ដោយមើលឃើញពីបញ្ហានេះរដ្ឋាភិបាលកម្ពុជា បានពិភាក្សាជាមួយក្រុមហ៊ុនចិន ដើម្បីស្តារស្ទឹងព្រែកត្នោតនេះឡើងវិញ ក្នុងការកាត់បន្ថយជំនន់ទឹកភ្លៀងនៅក្នុងក្រុងភ្នំពេញ ។

លោកបន្ថែមថា “នៅក្នុងផែនការនេះ គឺដើម្បីធ្វើយ៉ាងណាកុំឱ្យមានជំនន់ទឹកភ្លៀង នៅក្នុងក្រុងភ្នំពេញ និងទាញទឹកទៅស្រោចស្របវិស័យកសិកម្មដែលមានផ្ទៃដីជាង ១០០ ហិកតា ដែលនឹងត្រូវប្រើប្រាស់រយៈពេល ៣៦ ខែ ទើបរួចរាល់ ហើយនឹងជួយរំដោះទឹកជំនន់ទឹកទន្លេមេគង្គ និងស្ទឹងព្រែកត្នោតកាន់តែមានប្រសិទ្ធិភាពក្នុងរយៈពេល ២ ទៅ ៣ ឆ្នាំទៀត” ។

លោកញ្ជាក់ទៀតថា ទីក្រុងភ្នំពេញ ត្រូវតែមានការរៀបចំហេដ្ឋារចនាសម្ព័ន្ធ ទំនប់ទប់ទឹក ឱ្យបានត្រឹមត្រូវ ដើម្បីស្រូបយកទឹកនៅក្នុងទីក្រុងឱ្យបានលឿន និងរៀបចំឱ្យមានអាងស្តុកទឹកផងដែរ ដើម្បីឆ្លើយតបទៅនឹងពង្រីកហេដ្ឋារចនាសម្ព័ន្ធ និងទីក្រុង៕

ខេត្តមណ្ឌលគីរី កំពុងព្រាងផែនការមេសម្រាប់អភិវឌ្ឍន៍ និង ជំរុញវិស័យទេសចរណ៍

ដោយ ៖ រ៉ាណេត

មណ្ឌលគីរី ៖ ស្ថិតនៅក្នុងគម្រោងដែលអាចនឹងប្រែក្លាយជាប៉ូលសេដ្ឋកិច្ចទី៤ប្រចាំកម្ពុជា បច្ចុប្បន្នខេត្តមណ្ឌលគីរី ក្រៅពីមានគម្រោងអភិវឌ្ឍន៍ហេដ្ឋារចនាសម្ព័ន្ធរូបវ័ន្ដនានា ក៏ដូចជាគម្រោងសាងសង់ព្រលានយន្ដហោះក្នុងតំបន់ រដ្ឋាភិបាលបាន និងកំពុងព្រាងរៀបចំផែនការមេសម្រាប់អភិវឌ្ឍន៍វិស័យទេសចរណ៍ផងដែរ។

រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន នៅក្នុងកិច្ចបើកសិក្ខាសាលាពិគ្រោះយោបល់លើសេចក្តីព្រាងបឋមផែនការមេ សម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរីនាថ្ងៃទី១០ ខែសីហា ឆ្នាំ២០២០ នៅក្រុងសែនមនោរម្យ បានជំរុញឱ្យរដ្ឋបាលខេត្តធ្វើយ៉ាងណាឱ្យវិស័យទេសចរណ៍នៅក្នុងខេត្តនេះ អាចទាក់ទាញបានភ្ញៀវទេសចរកាន់តែច្រើនជាងមុនបន្ថែមទៀត ដើម្បីរួមចំណែកក្នុងការទ្រទ្រង់កំណើនសេដ្ឋកិច្ច-សង្គម និងបង្កើតការងារផងដែរ។

លោកបណ្ឌិត ថោង ខុន បានប្រសាសន៍ថា សេចក្ដីព្រាងផែនការមេនៃការអភិវឌ្ឍវិស័យទេសចរណ៍នៅទូទាំងខេត្តនេះ ត្រូវបានកំណត់ចក្ខុវិស័យអភិវឌ្ឍទៅលើ តំបន់អាទិភាព (Zoning) កំណត់ទិសដៅ និងទិសយុទ្ធសាស្ត្រអាទិភាពសំខាន់ៗ និងការកំណត់យន្តការស្ថាប័នអនុវត្តផែនការមេ។ល។

ជាមួយគ្នានេះ លោករដ្ឋមន្តី្រក៏បានផ្តល់យោបល់បន្ថែមទៅលើសេចក្តីព្រាងបឋមផែនការមេសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី រួមមាន៖

* ទី១៖ ការអភិវឌ្ឍវិស័យទេសចរណ៍ខេត្តមណ្ឌលគិរី ត្រូវតែគោរពទៅតាមអភិក្រមនៃការអភិវឌ្ឍប្រកបដោយនិរន្តរភាព និងការទទួលខុសត្រូវ «ការអភិវឌ្ឍបម្រើការអភិរក្ស និងការអភិរក្សទ្រទ្រង់ដល់ការអភិវឌ្ឍ» ដើម្បីបានជាប្រយោជន៍សេដ្ឋកិច្ចសង្គម និងប្រជាពលរដ្ឋមូលដ្ឋានរួមចំណែកដល់ការថែរក្សាការពារ និងអភិរក្សធនធានធម្មជាតិ និងបេតិកភណ្ឌវប្បធម៌ ពិសេសរក្សាបាននូវអត្តសញ្ញាណដើមរបស់ខេត្តមណ្ឌលគិរី។

* ទី២៖ ការអភិវឌ្ឍត្រូវតែឆ្លើយតបទៅនឹងចក្ខុវិស័យនៃការអភិវឌ្ឍជាតិ ឆ្នាំ២០២០-២០៣៥ និងបណ្តាឆ្នាំខាងមុខ ដោយផ្អែកលើស្ថានភាពបច្ចុប្បន្ន និងការប្តេជ្ញាចិត្តរបស់រាជរដ្ឋាភិបាល។

* ទី៣៖ កំណត់វិសាលភាពនៃសកម្មភាពវិនិយោគ-អភិវឌ្ឍនៅតំបន់ដែនជម្រកសត្វព្រៃទាំង៥ (ដែនជម្រកសត្វព្រៃភ្នំព្រេច ណាមលៀរ លំផាត់ កែវសីមា និងស្រែពក) និងរបៀងទេសចរណ៍វប្បធម៌ និងអេកូទេសចរណ៍ ប៊ូស្រា-ដាក់ដាំ ដោយលើកទឹកចិត្តឲ្យមានការអភិវឌ្ឍតែសកម្មភាពអេកូទេសចរណ៍ និងទេសចរណ៍ធម្មជាតិ ភ្ជាប់ជាមួយទេសចរណ៍វប្បធម៌ជនជាតិដើមភាគតិចពិសេស គប្បីជំរុញលើកទឹកចិត្ត ពង្រឹងវិស័យសហគមន៍ ទេសចរណ៍ឱ្យបានល្អ និងមានប្រសិទ្ធភាព។

* ទី៤៖ អាជ្ញាធរខេត្តគ្រប់សមត្ថកិច្ចគ្រប់កម្រិត និងជំនាញ ត្រូវអនុវត្តឲ្យបានខ្ជាប់ខ្ជួនម៉ឺងម៉ាត់ជាដាច់ខាតតាមបទបញ្ជារបស់ប្រមុខរាជរដ្ឋាភិបាល ក្នុងការទប់ស្កាត់ការទន្ទ្រានដីរដ្ឋ ដីព្រៃជាកម្មសិទ្ធិឯកជន។

* ទី៥៖ ធ្វើការការចុះបញ្ជីរមណីយដ្ឋានទេសចរណ៍សំខាន់ៗក្នុងខេត្តឱ្យបានរួសរាន់ដើម្បីធានានិរន្តរភាព និងប្រសិទ្ធភាពនៃការប្រើប្រាស់ និងអភិវឌ្ឍតំបន់ទាំងអស់នេះ៕

អភិបាលខេត្តបាត់ដំបងបញ្ជាឱ្យមន្ត្រីក្រោមឱវាទផ្ដល់សេវាសាធារណៈលើវិស័យដីធ្លីឱ្យមានប្រសិទ្ធភាពខ្ពស់

ដោយ ៖ វុត្ថា

ភ្នំពេញ ៖ អភិបាលខេត្តបាត់ដំបងបានបញ្ជាឱ្យមន្ត្រីក្រោមឱវាទគ្រប់ជាន់ថ្នាក់ និងរដ្ឋបាលស្រុក ក្រុង ទាំង១៤ យកចិត្តទុកដាក់ផ្តល់សេវាសាធារណៈលើវិស័យដីធ្លីឱ្យមានប្រសិទ្ធភាពខ្ពស់ និងកាន់តែប្រសើរជាងមុន។

លោក ងួន រតនៈ អភិបាលខេត្តបាត់ដំបងនៅក្នុងកិច្ចអញ្ជើញដឹកនាំប្រជុំ ស្ដីពីបញ្ហាការផ្ដល់សេវាកម្មរៀបចំដែនដី នគរូបនីយកម្ម សំណង់ និងសូរិយោដីខេត្ត កាលពីថ្ងៃទី១០ ខែសីហា ឆ្នាំ ២០២០ម្សិលមិញនេះ បានឱ្យដឹងថាអាជ្ញាធរគ្រប់ជាន់ថ្នាក់ត្រូវខិតខំរិះរកគ្រប់មធ្យោបាយផ្ដល់សេវាកម្មជូនប្រជាពលរដ្ឋ ជាពិសេសបញ្ហាដីធ្លីនេះ ឲ្យកាន់តែប្រសើរជាងមុនថែមទៀត។

លោកបន្តថា មន្ត្រីគ្រប់ជាន់ថ្នាក់ និងរដ្ឋបាលស្រុកក្រុងទាំង១៤ ត្រូវធ្វើយ៉ាងណាសម្របសម្រួលដល់បងប្អូនប្រជាពលរដ្ឋ ឲ្យមកទទួលសេវាកម្មកាន់តែមានភាពងាយស្រួលជាងមុន ដើម្បីជាផលប្រយោជន៍ដល់ខ្លួនគាត់ផង និងដើម្បីផ្ដល់ភាពងាយស្រួលក្នុងការ គ្រប់គ្រងរបស់រាជរដ្ឋាភិបាលផងដែរ។

លោកបន្តថា ជាមួយគ្នានេះ ការប្រមូលពន្ធជូនរដ្ឋក្នុងខេត្តបាត់ដំបង មានការសង្កេតឃើញថា អត្រាពន្ធការស្នាក់នៅមានការធ្លាក់ចុះ បើប្រៀបធៀបនឹងឆ្នាំ២០១៩ ដោយសារតែវិបត្តិជំងឺកូវិដ-១៩ បានផ្ទុះឡើង ធ្វើឲ្យអាត្រាភ្ញៀវបរទេសមានការធ្លាក់ចុះ។

នៅក្នុងកិច្ចប្រជុំដែលមានការចូលរួមពីមន្ត្រីពាក់ព័ន្ធកាលពីម្សិលមិញនេះ មានគោលបំណងពិភាក្សារកដំណោះស្រាយលើបញ្ហាផ្តល់សេវាសាធារណៈ ជាពិសេសេវិស័យដីធ្លីនៅក្នុងខេត្តដែលកំពុងមាន និងលើកទិសដៅអនុវត្តបន្ត ដើម្បីសម្រួលដល់ការផ្ដល់សេវាសាធារណៈជូនប្រជាពលរដ្ឋឲ្យកាន់តែមានភាពប្រសើរឡើង ៕

ខេត្ត​ចំនួន៤ នៅតែមាន​សកម្មភាព​ម​មា​ញឹក​ក្នុង​វិស័យ​ឧស្សាហកម្ម និង​ការវិនិយោគ

ដោយៈ រ៉ា​ណេ​ត

ភ្នំពេញៈ រហូតមកដល់​ពាក់កណ្តាល​ត្រីមាស​ទី៣ឆ្នាំនេះ របាយការណ៍​ដែល​បានលើកឡើង​ដោយ​រដ្ឋបាលខេត្ត​បាន​បង្ហាញថា ក្នុងចំណោម​ខេត្ត ក្រុង​ទាំង២៥ គេ​សង្កេតឃើញ​មាន​ខេត្ត​ចំនួន៤ នៅតែមាន​សកម្មភាព​វិនិយោគ និង​ដំណើរការ​ក្នុង​វិស័យ​ឧស្សាហកម្ម​ដដែល។

នៅក្នុង​កំឡុង​ពេលដែល​កម្ពុជា កំពុង​ប្រឈម​ជាមួយ​វិបត្តិ​សេដ្ឋកិច្ច​សាកល ដែល​បណ្តាលមកពី​ការរីក​រាលដាល នៃ​ជំងឺឆ្លង covid-19 ក្រៅពី​វិស័យ​ទេសចរណ៍ ដែល​ទទួលរង​នូវ​ផលប៉ះពាល់​យ៉ាងធ្ងន់ធ្ងរ​នោះ សម្រាប់​វិស័យ​ឧស្សាហកម្ម រោងចក្រ​កាត់ដេរ​នៅ​កម្ពុជា ពិតជា​ទទួលរង​នូវ​ផលប៉ះពាល់​មួយផ្នែក​ដែរ ប៉ុន្តែ​នៅក្នុង​ដំណាក់កាល​នេះ​ក៏មាន​វត្តមាន​រោងចក្រថ្មីៗទើប​បង្កើតឡើង ក្រោយ​ការទទួលបាន​សេចក្ដីសម្រេច​គាំទ្រ ពី​រដ្ឋាភិបាល តាមរយៈ​ក្រុមប្រឹក្សា​អភិវឌ្ឍន៍​កម្ពុជា​ជិត១០០ក្រុមហ៊ុន។ នេះ​បើ​យោងតាម​ការបង្ហាញ​រប​ស់ CDC កាលពីពេល​កន្លងទៅនេះ។

ជាមួយគ្នានេះ តាមរយៈ​ការបង្ហាញ​នូវ​របាយការណ៍ ពី​រដ្ឋបាលខេត្ត​នៅត្រឹម​ដើម​ត្រីមាស​ទី៣ គេ​កត់សម្គាល់​ក្នុង​ចំនួន​ខេត្ត​ក្រុង​ទាំង២៥ ក្នុងនោះ​មាន​ខេត្ត​ចំនួន៤នៅតែ​បង្ហាញ​ពី​សម្មភាព​នៃ​ការវិនិយោគ​ដដែល ជាពិសេស​ក្នុង​វិស័យ​ឧស្សាហកម្ម និង​សំណង់ ដោយ​ខេត្ត​ទាំង៤នេះ​រួមមាន ៖

ទី១- ខេត្តកំពង់ស្ពឺ មាន​រោងចក្រ​កាត់ដេរ សហគ្រាស​ខ្នាតតូច និង​មធ្យម​សរុប​មាន​ចំនួន២៦១គម្រោង ដោយ​ក្នុងនោះ​កំពុងតែ​ដំណើរការ​សង្វាក់​ផលិតកម្ម មាន​ចំនួន១៦១ ហើយ​គម្រោង​ចំនួន១០០ទៀត កំពុងតែ​ដើរ​តាម​នីតិវិធី និង​ត្រៀម​ដំណើរការ​ក្នុងពេល​ខាងមុខនេះ។

ជាមួយនឹង​ដំណើរការ​ផលិតកម្ម របស់​រោងចក្រ​កាត់ដេរ​សម្លៀកបំពាក់ រោងចក្រ​កាត់​ស្បែកជើង រោងចក្រ​កាបូប រោងចក្រ​ផលិត​គ្រឿងអគ្គិសនី រោងចក្រ​ផលិត​សម្ភារៈ​សំណង់ រួមជាមួយ​នឹង​បណ្តា​សហគ្រាស​នានា​ទាំងអស់នេះ បានផ្តល់​ចំណូល​ដល់​ប្រជាពលរដ្ឋ​ក្នុង​តំបន់ ក៏ដូចជា​ជា​ចំណាក​មកពី​បណ្តា​ខេត្ត​ដទៃទៀត ស្មើនឹង​ប្រមាណ​ជាង៣០លាន​ដុល្លារ តាមរយៈ​ការផ្តល់​ឱកាស​ការងារ​ជាប្រចាំ​ខែ។

ទី២ខេត្តស្វាយរៀង មាន​ក្រុមហ៊ុន រោងចក្រ សហគ្រាស គ្រឹះស្ថាន​ឯកជន ធនាគារ គ្រឹះស្ថាន​មីក្រូហិរញ្ញវត្ថុ សុ​រប​ចំនួន២១៦កន្លែង នៅ​ក្នុងនោះ​រោងចក្រ​សហគ្រាស​ចំ​មួន ១១៣កន្លែង បាន​បង្កើត​ការងារ​ធ្វើ​ជូន​ប្រជាពលរដ្ឋ​ប្រមាណ៨ម៉ឺន​នាក់ ដោយបាន​រួមចំណែក​លើ​ក​កម្ពស់​ជីវភាព​រស់​នៅ និង​កាត់បន្ថយ​ភាពក្រីក្រ​របស់​ប្រជាពលរដ្ឋ។

នៅក្នុង​ខេត្តស្វាយរៀង មាន​តំបន់​សេដ្ឋកិច្ច​ពិសេស​ចំនួន១១ ប៉ុន្តែ​តំបន់​សេដ្ឋកិច្ច​ដែល​ដំណើរការ​មាន​ចំនួន៨ទីតាំង។

ទី៣- ខេត្តកំពង់ចាម មាន​រោងចក្រ​ធុន​ធំ​ចំនួន១៧មូលដ្ឋាន (រោងចក្រ​កាត់ដេរ​កែច្នៃ​ជ័រកៅស៊ូ) ហើយ​រោងចក្រ​ធុន​មធ្យម​ចំនួន១៣៥មូលដ្ឋាន (ផលិត​ទឹក​សុទ្ធ ម៉ាស៊ីនកិនស្រូវ កែច្នៃ​ជ័រកៅស៊ូ) ក្រៅពីនេះ​មាន​សិប្បកម្ម​លក្ខណៈ​គ្រួសារ មាន​ចំនួន១១៩៤មូល    ដ្ឋា​ន (ការធ្វើ​អាជីវកម្ម​លក្ខណៈ​គ្រួសារ ផលិត​ដប​ទឹក​សុទ្ធ ទឹក​សុទ្ធ កាត់​កញ្ចក់ ផ្សារ​ដែក ជាដើម)។

ទី៤- ខេត្ត​ព្រះសីហនុ មាន​តំបន់​សេដ្ឋកិច្ច​ពិសេស​ចំនួន១០ទីតាំង ស្ថិតនៅលើ​ផ្ទៃដី​ប្រមាណ២៥៨៦,២៦ហិកតា ដែលមាន​ទំហំ​ទុនវិនិយោគ​សរុប​ជាង១៤៨១លាន​ដុល្លារ ក្នុងនោះ​មាន៤ទីតាំង​កំពុងដំណើរការ​យ៉ាងសកម្ម ហើយ៦ទីតាំង​ទៀត​កំពុង​សាងសង់។

នៅក្នុង​តំបន់​សេដ្ឋកិច្ច​ពិសេស ដែលមាន​ដំណើរការ​ខាងលើនេះ មាន​វត្តមាន​រោងចក្រ សហគ្រាស​សរុប​ចំនួន១៥១រោងចក្រ ហើយ​ចំនួន៦៦រោងចក្រ​ផ្សេងទៀត កំពុង​ដំណើរ​នៅក្រៅ​តំបន់​សេដ្ឋកិច្ច​ពិសេស៕

រដ្ឋាភិបាល និង​វិស័យ​ឯកជន​កំពុងធ្វើការ​រួមគ្នា​ជំរុញ​វិស័យ​ទេសចរណ៍

ដោយ​គង់ សូរិយា

ភ្នំពេញៈ ក្រសួងទេសចរណ៍ សហគ្រិន​ខ្មែរ (KE) ជា​អង្គភាព​មួយ​ដែល​ស្ថិតនៅក្រោម​ក្រសួង​សេដ្ឋកិច្ច និង​ហិរញ្ញវត្ថុ និង Impact Hub Phnom Penh បាន​សហការ​ចាប់ផ្តើម​អនុវត្តន៍​គម្រោង “ទេសចរណ៍​ខ្មែរ​សម័យថ្មី” (Khmer Tourism For The Future)។

ទេសចរណ៍​ខ្មែរ​សម័យថ្មី ជា​កម្មវិធី​បណ្តុះបណ្តាល​សហគ្រិន​មួយ ដែល​បង្កើតឡើង ក្នុង​គោលបំណង​គាំទ្រ​ធុរកិច្ច​ថ្មី (Startup) និង​អាជីវកម្មផ្សេងៗក្នុង​វិស័យ​ទេសចរណ៍​ឱ្យមាន​ភាព​ធន់ នវានុវត្តន៍​ភាព និង​ភាព​ច្នៃប្រឌិត ក្នុងការ​លើកស្ទួយ​វិស័យ​ទេសចរណ៍ និង​ប្រជាជន​ក្នុង​តំបន់ ដែល​កំពុងតែ​រង​ផលប៉ះពាល់​យ៉ាងធ្ងន់ធ្ងរ ដោយសារ​ជំងឺ​កូ​វីដ១។

កម្មវិធី​នេះ នឹងចូលរួម​បង្កើតជា​ផ្លូវ​ដើរ​ដ៏​ថ្មី​មួយ សម្រាប់​វិស័យ​ទេសចរណ៍​កម្ពុជា​ដែល​ប្រកបដោយ​ចីរភាព និង​អាច​ក្រោកឈរ​ឡើងវិញ នៅក្នុង​រយៈពេល១២ខែ​ទៅមុខទៀត។ កម្មវិធី​នេះ​ត្រូវបាន​ចងក្រង​ឡើង សម្រាប់​យុវជន ឬ​សហគ្រិន​ដែលមាន​គំរូ​អាជីវកម្ម ដែល​គិតគូរ​ទៅដល់​បរិស្ថាន ឬ​អ្នក​ដែលមាន​ធុរកិច្ច​ថ្មី (Startup) ដ៏​មាន​សក្តានុពល និង​ឥទ្ធិពល​វិជ្ជមាន​ទៅដល់​វិស័យ​ទេសចរណ៍​ក្នុងស្រុក។

គោលដៅ​ចុងក្រោយ​របស់​កម្មវិធី​នេះ គឺ​ចង់​ធ្វើឱ្យមាន​ភាពជាក់លាក់ និង​បង្កើន​គំរូ​អាជីវកម្មថ្មីៗ ដែល​ផ្តោតទៅលើ​ទីផ្សារ​ក្នុងស្រុក​ឲ្យ​បាន​ច្រើនជាង​មុន។

លោក​បណ្ឌិត វណ្ណ មុនិ​ណ្ឌ នាយក​សហគ្រិន​ខ្មែរ​បាន​មានប្រសាសន៍ថា «ក្នុងនាម​ជា​អង្គភាព​មួយ ដែល​ស្ថិតនៅក្រោម​ក្រសួង​សេដ្ឋកិច្ច និង​ហិរញ្ញវត្ថុ​សហគ្រិន​ខ្មែរ (Khmer Enterprise) មាន​ចក្ខុវិស័យ ក្នុងការ​ប្រែក្លាយ​ទៅជា​វេទិកា​ថ្នាក់ជាតិ​មួយ សម្រាប់​លើកកម្ពស់​សកម្មភាព​ស​ហ​គ្រិន នៅក្នុង​ប្រទេស​កម្ពុជា។

លោក​បន្តថា “កម្មវិធី «ទេសចរណ៍​ខ្មែរ​សម័យថ្មី” មាន​គោលបំណង​ជួយ​គាំទ្រ​ទៅដល់​សហគ្រិន​ក្នុង​វិស័យ​ទេសចរណ៍ ដែល​កំពុងតែ​ស្ថិតនៅក្នុង​ដំណាក់កាល​ដំបូង នៃ​ការបង្កើត​អាជីវកម្ម តាមរយៈ​ការបង្រៀន​អំពី​ការធ្វើ​ជំនួញ ការ​បង្វឹក​ការភ្ជាប់​បណ្តាញ​និង​ការចុះ​ធ្វើ​ទស្សនកិច្ច​សិក្សា” ។

ជាមួយគ្នានេះ Olivia Hough នាយក​គ្រប់គ្រង Impact Hub Phnom Penh បានឱ្យដឹងថា វិស័យ​ទេសចរណ៍​គឺជា​វិស័យ​មួយ ក្នុងចំណោម​វិស័យ​សំខាន់បំផុត សម្រាប់​សេដ្ឋកិច្ច​របស់​កម្ពុជា ប៉ុន្តែ​វិស័យ​មួយ​នេះ ប្រហែលជា​ត្រូវបាន​រង​ការប៉ះពាល់ គួរឱ្យ​កត់​សំ​ម្គា​ល់។ នេះ​ជា​ពេលវេលា​មួយ​ដ៏​សំខាន់ ហើយក៏​ជា​ពេលដែល​យើង​ត្រូវ​ចូលរួម​គ្នា ដើម្បី​គិតគូរ និង​ពិចារណា​ឡើងវិញ​នូវ​អ្វី នៃ​អនាគត​ទេសចរណ៍ ដែល​ពួកយើង​ចង់ឃើញ និង​កសាង ឬ​ប្រុងប្រៀប​ធុរកិច្ច​ថ្មី (Startup) និង​អាជីវកម្មផ្សេងៗ ដើម្បី​ត្រៀមខ្លួន​សម្រាប់​អនាគត​មួយ​នេះ។

លោក​សុខ សុគន្ធ អនុប្រធាន​គម្រោង GMS បាន​និយាយថា  ក្រសួងទេសចរណ៍ មាន​ក្តីរំភើប​រីករាយ​ណាស់ ដែល​បាន​ចូលរួម​គាំទ្រ នៅក្នុង​កម្មវិធី​សហគ្រិនភាព​មួយ​នេះ។ ទាំងអស់គ្នា ពួកយើង​អាច​កសាង​វិស័យ​ទេសចរណ៍ នាពេល​អនាគត​របស់​ប្រទេស​កម្ពុជា​អោយមាន​ភាព​ធន់ ទូលំទូលាយ និង​ឈានទៅរក​ចីរភាព ៕

កម្ពុជា​មិនមាន​ការព្រួយបារម្ភ​បើទោះជា​ការសម្រេច​ដក​ផ្នែក​ខ្លះ ឬ​មិន​ដក​នៃ​ប្រព័ន្ធ​អនុគ្រោះ​ពន្ធ EBA

ដោយ៖ ប៊ី

ភ្នំពេញៈ បើ​មិនមាន​អ្វី​ប្រែប្រួល​នោះទេ នៅសល់តែ​ក្នុង​រយៈពេល១ថ្ងៃ​ទៀត ការសម្រេច​ដក​ផ្នែក​ខ្លះ នៃ​ប្រព័ន្ធ​អនុគ្រោះ​ពន្ធ​របស់​គណៈកម្មការ​អឺរ៉ុប ដែល​បាន​ផ្តល់ឱ្យ​កម្ពុជា ក្រោម​គម្រោង​ពាណិជ្ជកម្ម អ្វី​គ្រប់យ៉ាង​លើកលែងតែ​អាវុធ (EBA) នឹង​ចូល​ជាធរ​មាននៅ​ថ្ងៃស្អែក ទី១២ ខែសីហា ឆ្នាំ ២០២០ខាងមុខនេះ។

ទោះជា​យ៉ាងណា ការដក​ប្រ​ព័​ន្ឋ​អនុគ្រោះ​ព​ន្ឋ​ដក ឬ​មិន​ដក២០ភាគរយ​នេះ មិនមាន​អ្វី​គួរ​ឲ្យ​បារម្ភ​សម្រាប់​កម្ពុជា​នោះទេ ខណៈ​កម្ពុជា​នឹង​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​ប្រទេស​ជាច្រើន​នៅលើ​ពិភពលោក។

លោក​បណ្ឌិត សុខ ទូច ប្រធាន​រាជបណ្ឌិត្យសភាកម្ពុជា បានបង្ហាញ​ជំនឿ​ចិត្ត​យ៉ាង​មុតមាំ​ថា​គណៈកម្មការ​សហភាព​អឺរ៉ុប នឹងមិន​ដក​ប្រព័ន្ធ​អនុគ្រោះ​ពន្ធ EBA ពី​កម្ពុជា​នោះទេ ខណៈ​តាម​ការគ្រោងទុក​គណៈកម្មកា​រ​សហភាព​អឺរ៉ុប នឹង​សម្រេច​ដក​ឬ​មិន​ដក​ពី​កម្ពុជា​នៅ​ថ្ងៃទី១២ ខែសីហា ឆ្នាំ ២០២០ខាងមុខនេះ។

ថ្លែង​នៅក្នុង​វេទិកា​តុមូល​ជជែក ពី​កិច្ចព្រមព្រៀង​ពាណិជ្ជកម្ម​សេរី​កម្ពុជា-ចិន កាលពី​ចុងខែ​កក្កដា ឆ្នាំ២០២០ លោក​បណ្ឌិត​សុខ ទូច បានឱ្យដឹងថា ការដក​ប្រព័ន្ធ​អនុគ្រោះ​ពន្ធ EBA របស់​គណៈកម្មការ​ស​ហ​ភាព​អឺរ៉ុប គឺជា​ជញ្ជីង​នយោបាយ ដែល​បានដាក់​បន្ទុក​មកលើ​ក​ម្ពុ​ជា។

លោ​កប​ណ្ឌិ​រសុខ ទូច​ថ្លែង “ខ្ញុំ​មានជំនឿថា EBA នឹងមិន​ត្រូវបាន​ដកចេញ​ពី​កម្ពុជា ព្រោះនេះ ជា​ជញ្ជីង​នយោបាយ​របស់​សហភាព​អឺរ៉ុប” ។ លោក​សង្កត់​ធ្ល​ន់​ថា “បើ​ដក EBA សហភាព​អឺរ៉ុប គឺ​ខ្សោយ​ខាង​ធនធាន​ផ្នែក​នយោបាយ តែ​យ៉ាង​កម្ពុជា​ក៏ត្រូវ​ធ្វើការ​ចរចា​ព្រោះ​មាន​ផលិត​ច្រើនណាស់ ដែល​ត្រូវ​ការធ្វើ​នាំចេញ ដើម្បី​ជំរុញ​កំណើន​សេដ្ឋកិច្ចជាតិ” ។

លោក​សុខ សុភ័ក្ដ្រ រដ្ឋលេខាធិការ​ក្រសួងពាណិជ្ជកម្ម​បាន​ព​ន្យ​ល់​ថា កិច្ចព្រមព្រៀង​ពាណិជ្ជកម្ម​សេរី ខុសពី​ប្រព័ន្ធ​អនុគ្រោះ​ពន្ធ​EBA ដែល​សហភាព​អឺរ៉ុប​ឱ្យមក​កម្ពុជា ព្រោះ​ប្រព័ន្ធ​នេះ មិនមាន​ការចរចា​នោះទេ ពោលគឺ​សហភាព​អឺរ៉ុប បានផ្តល់​ឱ្យដល់​កម្ពុជា​ដោយ​ឯកតោភាគី ។

លោក​បន្តថា “នៅពេលដែល​កម្ពុ​ជាមាន​សេដ្ឋកិច្ច​រីកចំរើន សហភាព​អឺរ៉ុប​នឹង​ដក​ទៅវិញ​ដោយ​ស្វ័យប្រវត្តិ” ។ លោក​បន្ថែមថា “ការចរចា​ពាណិជ្ជកម្ម​សេរី​កម្ពុជា-ចិន​នេះ គឺ​ទទួលបាន​ផលប្រយោជន៍​ទៅវិញទៅមក និង​ម្យ៉ាង​គឺ​ដោយសារតែ​កម្ពុ​ជាមាន​ទំនាក់ទំនង និង​កិច្ចសហការ​ល្អជា​មួយ​ប្រទេស​ចិន ពោលគឺ​មិនមែន​ភាគី​ចិន ជួយ​ជ្រោមជ្រែង​ក្នុង​ការចុះ​ព្រមព្រៀង​ពាណិជ្ជកម្ម​សេរី​សម្រេច​នៅពេលនេះ​ទេ” ។

យោងតាម​សេចក្តីប្រកាស​ព័ត៌មាន របស់​គណៈកម្មការ​អឺរ៉ុប​បានឱ្យដឹង​កាលពី​ខែកក្កដា​កន្លងមកនេះ​ថា ការដក​ផ្នែក​ខ្លះ​នៃ​ការអនុគ្រោះ​ពន្ធ និង​ការជំនួស​មកវិញ​ជាមួយនឹង​ពន្ធ​ស្តង់ដារ​របស់​សហភាព​អ៊ឺរ៉ុប  នឹង​ប៉ះពាល់​ដល់​ផលិតផល​សម្លៀកបំពាក់ និង​ស្បែកជើង ដែល​បានជ្រើសរើស និង​រាល់​ទំនិញ​សម្រាប់​ការធ្វើដំណើរ​និង​ស្ករ ស។

សេចក្តីប្រកាស​ដដែល​ប​ន្ត​ថា ការដក​នេះ​មាន​ចំនួន​ប្រហែល១ភាគ​ប្រាំ ឬ១ពាន់​លាន​អឺរ៉ូ នៃ​ការនាំចេញ​ប្រចាំឆ្នាំ​របស់​ប្រទេស​កម្ពុជា ទៅកាន់​សហភាព​អឺរ៉ុប។ លើកលែងតែ​សភា​អឺរ៉ុប និង​ក្រុមប្រឹក្សា​ជំទាស់​រឿងនេះ បើ​ពុំ​នោះទេ​វិធានការ​នេះ នឹង​ចូល​ជាធរ​មាននៅ​ថ្ងៃទី១២ ខែសីហា ឆ្នាំ ២០២០ ។

ការព្រមាន​ដក ឬ​ព្យួរ​ប្រព័ន្ធ​អនុគ្រោះ​ពន្ធ EBA របស់​គណៈ​សហភាព​អឺរ៉ុប​នេះ បានធ្វើ​ផលិតផល​នាំចេញ​របស់​កម្ពុជា ប្រមាណ៤០មុខ រួមមាន សម្លៀកបំពាក់​កាត់ដេរ សម្ភារៈ​ធ្វើដំណើរ វ៉ា​លី​ធ្វើដំណើរ កាបូបស្ពាយ ស្បែកជើង និង​ស្ករស​ផង​នោះ ត្រូវ​បង់ពន្ធ​ឡើងវិញ​ក្នុង​ចំណែក២០ភាគរយ​នោះ៕

រដ្ឋាភិបាល​កំពុង​តាមដាន​សកម្មភាព​អភិវឌ្ឍន៍​របស់​ក្រុមហ៊ុន​ឯកជន​វិនិយោគនៅតាម​តំបន់​កោះ

ដោយ វុត្ថា

ភ្នំពេញៈ រដ្ឋាភិបាល​កម្ពុជា តាមរយៈ​អន្តរក្រសួង បាននិងកំពុង​តាមដាន​សកម្មភាព​រប​ស់​ក្រុមហ៊ុន​ឯកជន ដែល​ទទួលបាន​សិទ្ធិ​វិយោគ នៅតាម​បណ្តា​កោះ​នានា នៅតាម​បណ្តា​ខេត្ត​ជាប់មាត់​សមុទ្រ​របស់​នៅ​កម្ពុជា។

អ្នកនាំពាក្យ​នាំពាក្យ​រដ្ឋបាលខេត្ត​ព្រះសីហនុ លោក​ឃាង ភា​រម្យ​បាន​មានប្រសាសន៍​ឱ្យដឹងថា កន្លងមកនេះ ក្រុមមន្ត្រី​របស់​អន្តរក្រសួង ដែល​ដឹកនាំ​ដោយ​ក្រុមប្រឹក្សា​អភិវឌ្ឍន៍ បាន​ចុះមក​ពិនិត្យមើល​ដោយផ្ទាល់ នូវ​សកម្មភាព​អ​វឌ្ឍន៍​កោះ​មួយចំនួន នៅក្នុង​ខេត្ត​ព្រះសីហនុ ។

លោក​បន្តថា “ការ​ចុះមក​ពិនិត្យមើល​នេះ ធ្វើឡើង​ក្នុង​គោលបំណង​ពិនិត្យ ពី​វឌ្ឍនភាព​នៃ​គម្រោង​វិនិយោគ​របស់​ក្រុមហ៊ុន​ឯកជន នៅតាម​បណ្តា​កោះ​មួយចំនួន​នៅក្នុង​មូលដ្ឋាន​ខេត្ត​ព្រះសីហនុ​កាលពី​កន្លងមកនេះ” ។ លោក​បន្តថា “កោះ​ដែល​ក្រុមមន្ត្រី​អន្តរក្រសួង​បាន​ចុះ​ត្រួតពិនិត្យ​រួមមាន​កោះ​ថ្មី កោះ​ឬ​ស្សី កោះ​តា​គាវ កោះក្របី កោះ​ប្រឹស និង​កោះរ៉ុង​ជាដើម ក្នុងន័យ​តាមដាន​រាល់​ការអនុវត្ត​គម្រោង​វិនិយោគ ដែល​ទទួលបាន​ពី​រាជរដ្ឋាភិបាល​ហ្នឹង អ្នក​វិនិយោគិន​បាន​ធ្វើបាន​អ្វីខ្លះ? ហើយ​បានធ្វើ​ទៅតាម​ផែនការ ឬ​កម្មវិធី​វិនិយោគ​របស់ខ្លួន​ដែរឬទេ?” ។

លោក​បញ្ជាក់ថា  គម្រោង​វិនិយោគ​នៅតាម​បណ្តា​កោះ និង​ឆ្នេរសមុទ្រ​នៅក្នុង​ខេត្ត​ព្រះសីហនុ នាពេល​បច្ចុប្បន្ននេះ មាន​ចំនួន២០គម្រោង ដែលមាន​ទុន​ប្រមាណ​ជាង៣ ពាន់​លាន​ដុល្លារ​អាំ​មេ​រិ​ក” ។

ប្រតិភូ​ក្រុមប្រឹក្សា​អភិវឌ្ឍន៍​កម្ពុជា និង​ក្រសួង​ស្ថាប័ន​ពាក់ព័ន្ធ កាលពី​កន្លងមកនេះ ក៏បាន​ចុះមក​ពិនិត្យ​គម្រោង​វិនិយោគ របស់​បណ្តា​ក្រុមហ៊ុន​មួយចំនួន នៅ​ខេត្តកោះកុង ដែល​បាន​ចុះកិច្ចសន្យា​ជួល​កោះ ឆ្នេរ និង​រមនីយដ្ឋាន​នានា​ជាមួយ​រដ្ឋាភិបាល​ផងដែរ។

តាមរយៈ​ការពិនិត្យ​គម្រោង​ទាំងនេះ ប្រធាន​គណៈប្រតិភូ​បាន​សំណូមពរ​មក​រដ្ឋបាល​ខេត្ត​បន្ត​កិច្ចសហការ និង​សម្របសម្រួល​គម្រោង​ទាំងនេះ អោយ​អនុវត្តបាន​ល្អប្រសើ​តាម​ផែនការ​វិនិយោគ និង​ខិតខំ​បង្កលក្ខណៈ​ងាយស្រួល ជំរុញ​ការវិនិយោគ​នៅក្នុង​ខេត្ត ឲ្យ​បានល្អ​ប្រសើរ៕

ចំណេះដឹង! តើ​អ្វី​ជាការ​វិនិយោគ?

ដោយ វុត្ថា

ភ្នំពេញៈ តាមន័យ​សេដ្ឋកិច្ច៖ វិនិយោគ​គឺជា​ការធ្វើ​ប្រតិបត្តិការ ដើម្បី​បង្កើត​មូលធន មានដូចជា ទ្រព្យ​ក្នុង​ការរក្សា​ស្ថេរភាព សម្រាប់​បម្រើ​សេចក្តីត្រូវការ និង​ចាំបាច់។ការវិនិយោគ​នេះ មាន​គោលដៅ​ផងដែរ​ដើម្បី​បង្កើត​តម្លៃ​នៃ​បេតិកភណ្ឌ។

តាមន័យ​នេះ ការវិនិយោគ​មាន​ដូចតទៅ៖

  • ការ​បង្កើតជា​សហគ្រាស បរទេស​ដែលមាន បុត្រ​សម្ព័ន្ធ ការិយាល័យ​តំណាង និង​សាខា។
  • ការទិញ​សហគ្រាស​ដែលមាន​រួចជាស្រេច
  • ចូល​ដើមទុន​សម្រាប់​សហគ្រាស​បង្កើត​ថ្មី
  • ចូល​ដើមទុន​សម្រាប់​សហគ្រាស​ដែលមាន​ស្រាប។

តាមន័យ​គតិយុត្ត៖ វិនិយោគ​ជា​ប្រតិបត្តិ​ការប្រើប្រាស់ នូវ​ឧបករណ៍​គតិយុត្ត ដើម្បី​ធ្វើ​ឲ្យ​សេដ្ឋកិច្ច ក្នុងសង្គម​ដំណើរការ​បានល្អ។ វា​អាចជា​ការន​ង្កើ​ត​ឡើង តាមរយៈ​ប្រើប្រាស់​ទុន ឬ​ហ៊ុន​ដែលជា​ដើមទុន សម្រាប់​បង្កើត​គ្រោង​សេដ្ឋកិច្ច ដែល​បានផ្តល់​ឲ្យ​អ្នកវិនិយោគទុន​បាន​ទួល​នូវ​ផលចំណេញ ក្នុង​គម្រោង​របស់​អ្នកវិនិយោគ​ទាំងនោះ។

តាមច្បាប់​អន្តរជាតិៈ ការវិនិយោគទុន គឺជា​ការជាប់​កិច្ចសន្យា​រវាង​វិនិយោគិន​បរទេស និង​វិនិយោគិន​ខ្មែរ លើ​ទឹកដី​ណាមួយ​តាម​កិច្ចព្រមព្រៀង​ជាមុន ទោះ​នៅទីណា​ក៏ដោយ​ដោយ​អនុលោម​តាមច្បាប់ និង​បញ្ញា​ត្តិ​របស់​ភាគី​ចុះកិច្ចសន្យា៕