ដោយ ប៊ី

ភ្នំពេញៈ ក្រសួងសុខាភិបាលកម្ពុជា បានចំណាយថវិកាប្រមាណ៧លានដុល្លារហើយ លើការទិញសម្ភារពេទ្យ និងបរិក្ខារមួយចំនួន ដើម្បីផ្ដល់ជូនដល់គ្រប់២៥ខេត្ត–ក្រុង សម្រាប់ការពារពីជំងឺកូវីដ១៩ ខណៈកម្ពុជានឹងទទួលបាន១១លានម៉ាស់ គ្រប់តាមផែន​ការដែលបានដាក់ចេញដោយរដ្ឋាភិបាលនៅដើមខែឧសភា។

លោកស្រីយក់ សម្បត្តិ រដ្ឋលេខាធិការក្រសួងសុខាភិបាល បានថ្លែងក្នុងសន្និសីទសារព័ត៌មាន ស្ដីពីបច្ចុប្បន្នភាពជំងឺ COVID-19 នៅក្នុងប្រទេសកម្ពុជា ដែលរៀបចំដោយ ក្រសួងសុខាភិបាល នាព្រឹកថ្ងៃទី២៧ ខែមេសា ឆ្នាំ២០២០ នៅទីស្ដីការក្រសួងសុខាភិបាលថា កម្ពុជានឹងទទួលបាន១១លានម៉ាស គ្រប់តាមផែនការនៅសប្តាហ៍ទីមួយខែក្រោយនេះ។

លោកស្រីបានថ្លែងថា “ក្រសួងមានថវិការបស់សប្បុរសជន តាមរយៈការអំពាវនាវរបស់សម្តេចតេជោហ៊ុន សែន ហើយរហូតមកដល់ថ្ងៃនេះ រដ្ឋាភិបាលទទួលបានថវិកាសរុប១៣លានដុល្លារ ហើយយើងបានប្រើប្រាស់អស់ប្រមាណ៧លានដុល្លារ ក៏ប៉ុន្តែ យើងនៅសល់លុយ៦,៩លានដុល្លារនៅក្នុងគណនីរបស់យើង”។

លោកស្រីយក់ សម្បត្តិបានបន្ថែមថា ដោយឡែកថវិកាជាតិយើង យើងបែងចែកចេញជាពីរ។ ទី១ ថវិកាលើកទឹកចិត្តមន្ត្រីពេទ្ររបស់យើង ដែលធ្វើការនៅជួរមុខ ហើយមកដល់ពេលនេះ យើងទទួលបានថវិកាពីក្រសួងសេដ្ឋកិច្ច ប្រហាក់ប្រហែល១ដុល្លារដែលសម្រាប់ផ្តល់ទៅគ្រប់ខេត្ត–ក្រុងទាំងអស់។

លើសពីនោះទៀត លោកស្រី យក់ សម្បត្តិ បានគូសបញ្ជាក់ថា ថវិកាជិត៧លានដុល្លារ ដែលក្រសួងសុខាភិបាលបានចំណាយ ក្រសួងបានទិញម៉ាស សម្រាប់ពាក់ទូទៅ សរុបចំនួន១១លានម៉ាស តាមផែនការរបស់សម្ដេចតេជោហ៊ុន សែន ដែលសម្ដេចបានដាក់ជូនមកក្រសួង ហើយក្រសួង ក៏បានផ្ទេរថវិកាចប់សព្វគ្រប់ផងដែរ នៅតែទទួលម៉ាស បញ្ចូលក្នុងឃ្លាំងតែប៉ុណ្ណោះ។

ចំពោះឃ្លាំងស្ដុបវិញ លោកស្រី យក់ សម្បត្តិ បានឱ្យដឹងថា សព្វថ្ងៃគឺយើង មានឃ្លាំងស្ដុបចំនួន២។ ទី១ គឺឃ្លាំងរបស់ក្រសួងសុខាភិបាល នៅផ្លូវជាតិលេខ៣ និងឃ្លាំងមួយទៀត គឺឃ្លាំងយុទ្ធសាស្ដ្រនៅផ្លូវជាតិលេខ៦អា។

លោកស្រីបន្ដថា បច្ចុប្បន្ននៅក្នុងឃ្លាំងរបស់ក្រសួងសុខាភិបាល មានម៉ាសសរុប៨លានម៉ាស នៅក្នុងឃ្លាំងយុទ្ធសាស្ដ្រ៕

ដោយគង់ សូរិយា

ភ្នំពេញៈ រដ្ឋមន្រ្តីក្រសួងសុខាភិបាល លោកវេជ្ជបណ្ឌិតម៉ម ប៊ុនហេងបានព្រមានថា សូមប្រជាពលរដ្ឋបង្កើនការប្រុងប្រយ័ត្ន ទាក់ទងនឹងការរីករាលដាលមេរោគCovid-19 ដោយលោកបានសង្កត់ធ្ងន់ថា “កុំរង់ចាំឃើញក្តារមឈូស​ទើបស្រក់ទឹកភ្នែក”។

លោកបានមានប្រសាសន៍ ក្នុងសន្និសីទសារព៌តមានស្តីពីបច្ចុប្បន្នភាពនៃជំងឺCovid-19នៅកម្ពុជានាព្រឹកថ្ងៃទី២៧ មេសានេះថា សំរាប់ជំងឺគ្រុនចាញ់ ជំងឺគ្រុនឈាមយើងអាចព្យាករណ៍បាន ប៉ុ​ន្តែជំងឺCovid-19មិនអាចព្យាករណ៍បាននៅឡើយ ដោយសារវាជាជំងឺថ្មី។ លោកបន្តថា ហានិភ័យជំងឺនេះ នឹងត្រូវកាត់បន្ថយនៅពេលមានវ៉ាក់សាំងការពារ និងថ្នាំព្យាបាលជាក់លាក់ ដែលទទួលស្គាល់ដោយអង្គការសុខភាពពិភពលោក។

លោកស្រីឳ វណ្ណឌីនរដ្ឋលេខាធិការក្រសួងសុខាភិបាលបានថ្លែងថា កម្ពុជាស្ថិតក្នុងដំណាក់កាល ត្រូវតែបន្តប្រុងប្រយ័ត្នខ្ពស់ទាក់ទងនឹងជំងឺនេះ ហើយប្រជាជនកម្ពុជាមាន​ហានិភ័យទាក់ទងនឹងជំងងឺនេះនៅឡើយ។

លោកស្រីបន្តថា “យើងត្រូវតែបន្តប្រុងប្រយ័ត្ន ព្រោះការរីករាលដាលជំងឺនេះនឹងកើតមានជាថ្មី ប្រសិនជាយើងមានការធ្វេសប្រហែស”៕

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា តាមរយៈក្រសួងឧស្សាហកម្ម បច្ចេកទេស វិទ្យាសាស្ត្រ និងនវានុវត្តន៍ បាន និងកំពុងរៀបចំកម្មវិធីធ្វើពីពិធកម្មលើវិស័យឧស្សាហកម្ម ជាមួយនឹងបច្ចេកទេសបែបទំនើប ដើម្បីបង្កើនលទ្ធភាព សមត្ថភាព ក្នុងការផលិតប្រកបដោយគុណភាពខ្ពស់ ដែលកាន់តែមានឱកាសច្រើនក្នុងការប្រកួតប្រជែងនៅលើទីផ្សារសាកល។

រដ្ឋលេខាធិការក្រសួងឧស្សាហកម្ម បច្ចេកទេស វិទ្យាសាស្ត្រ និងនវានុវត្តន៍ លោក ហេង សុខគង់ បានមានប្រសាសន៍កាលពីចុងសប្ដាហ៍កន្លងទៅនេះថា វិស័យឧស្សាហកម្មនៅកម្ពុជាបច្ចុប្បន្ននេះ ភាគច្រើនគឺដំណើរការនៃសង្វាក់ផលិតកម្មត្រូវពឹងផ្អែកទៅលើកម្លាំងកម្មករធ្វើជាស្នូលបន្ទាប់ពីវត្ថុធាតុដើម ប៉ុន្តែនៅក្នុងពេលដ៏ខ្លីខាងមុខនេះ កម្ពុជា នឹងធ្វើពីពិធកម្មនៃវិស័យមួយនេះឱ្យស្របទៅតាមគោលការណ៍នៃឧស្សាហកម្មជំនាន់ទី៤ ក្រោមរូបភាពនៃដំណើរការផលិតគឺប្រើប្រាស់នូវបច្ចេកវិទ្យាបែបទំនើប ដើម្បីបង្កើនគុណភាព។

លោក ហេង សុខគង់ បានបញ្ជាក់ថា “ពេលនេះ សម្រាប់ម៉ាស៊ីនដេរមួយយើងប្រើម្ជុលតែមួយសម្រាប់ដេរសម្លៀកបំពាក់ បន្ដិចទៀតយើងនឹងបង្កើនផលិតភាពជាមួយបច្ចេកវិទ្យា ដោយម៉ាស៊ីនដេរមួយមានបំពាក់ម្ជុល៥ សម្រាប់ដេរសម្លៀកបំពាក់។ ពេលនេះ គាត់ (កម្មករ) ចាក់ស្រេះរន្ធលេវម្ដងមួយៗ ហើយចំណាយពេលយូរ បន្តិចទៀតគាត់នឹងចំណាយពេលតិច ហើយអាចចាក់ស្រេះរន្ធលេវបានរហូតដល់ចំនួន៥ក្នុងពេលតែមួយ។ មានន័យថា ចំណាយពេលដូចគ្នា ប៉ុន្តែលទ្ធភាពក្នុងការផលិតបានច្រើនជាងមុន មានគុណភាពល្អជាងមុន មានលទ្ធភាពខ្ពស់ក្នុងការប្រកួតប្រជែងនៅលើទីផ្សារសេរី”។

លោកក៏បានបញ្ជាក់ថា “បច្ចុប្បន្ននេះ ក្រោមការជួយជ្រោមជ្រែងពីរដ្ឋាភិបាលជប៉ុន គេបានបង្រៀនកម្មករជំនាញនូវបច្ចេកទេសមួយចំនួន ដែលក្រៅពីបង្រៀននៅតាមសហគ្រាស ឬរោងចក្រក្នុងស្រុក ពួកគេថែមទាំងផ្ដល់ឱកាសដល់កម្មករជំនាញទាំងនោះទៅសិក្សាស្វែងយល់បន្ថែមពីជំនាញបច្ចេកទេសនៅតាមបណ្តារោងចក្រដៃគូនានា ដូចជានៅក្នុងប្រទេសជប៉ុន និងប្រទេសថៃ ដែលមានរោងចក្រក្រុមហ៊ុនជប៉ុនច្រើន។ ដូច្នេះ ក្រោយពេលដែលកម្មករជំនាញទាំងនោះបានយល់ដឹងច្បាស់ ពួកគេនឹងក្លាយទៅជាគ្រូបង្គោល ដើម្បីជួយបណ្តុះបណ្តាលជំនាញបន្តទៅកាន់កម្មករ -កម្មការិនីដទៃទៀតនៅតាមរោងចក្រ សហគ្រាសនានានៅក្នុងប្រទេសកម្ពុជា”។

ជាមួយគ្នានេះលោកក៏បានបញ្ជាកផងដែរថា បច្ចុប្បន្ននេះ ដោយសារតែវិបត្តិនៃជំងឺឆ្លង Covid-19 បានធ្វើឱ្យប៉ះពាល់ដល់ការនាំចេញរបស់កម្ពុជា បើទោះជាវត្ថុធាតុដើមត្រូវបាននាំចូល និងផ្គត់ផ្គង់ដោយប្រទេសចិន។ ប៉ុន្តែបន្ទាប់ពីវិបត្តិនេះត្រូវបានផុតរលត់ នោះការនាំចេញបស់កម្ពុជា នឹងត្រឡប់មករកភាពល្អប្រសើរវិញ ជាមួយនឹងការបង្កើនលទ្ធភាពគ្រប់គ្រាន់ក្នុងការប្រកួតប្រជែងជាមួយនឹងបច្ចកទេសនៃការផលិតល្អប្រសើរជាងមុន៕

ដោយ ប៊ី

ភ្នំពេញ៖ ការនាំចេញរបស់កម្ពុជាទៅថៃបានកើនឡើងយ៉ាងខ្លាំងក្នុងរយៈពេល ៣ ខែដំបូងនៃឆ្នាំនេះ បើទោះបីជាប្រទេសទាំងពីរប្រឈមនឹងការធ្វើពាណិជ្ជកម្មឆ្លងព្រំដែនយ៉ាងតឹងរ៉ឹង ដោយសារតែជំងឺ COVID-19 យ៉ាងណាក៏ដោយ។

ចាប់ពីខែមករាដល់ខែមីនាឆ្នាំនេះ ការនាំចេញសរុបរបស់កម្ពុជាទៅថៃមានតម្លៃ ៦១២ លានដុល្លារ កើនឡើង ១១៥ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ នេះយោងតាមទិន្នន័យផ្លូវការពីក្រសួងពាណិជ្ជកម្មរបស់ប្រទេសថៃកាលពីចុងសប្តាស៍នេះ។

ប្រទេសកម្ពុជាបាននាំចូលទំនិញពីប្រទេសថៃតម្លៃ ១,៨៩១ លានដុល្លារ កើនឡើង ១៧ ភាគរយ បើធៀបនឹងឆ្នាំចាស់។

ទិន្នន័យបានបង្ហាញថា ពាណិជ្ជកម្មទ្វេភាគីរវាងកម្ពុជា និងថៃបានកើនឡើង ៣១ ភាគរយក្នុងរយៈពេល ៣ ខែដំបូងដល់ ២.៥០៣ លានដុល្លារ។

លោក Keerati Rushchano អគ្គនាយកនៃនាយកដ្ឋានពាណិជ្ជកម្មបរទេស (DFT) បានឱ្យដឹងថា ប្រទេសកម្ពុជាបានមើលឃើញកំណើនខ្ពស់បំផុតនៅក្នុងការនាំចេញរបស់ប្រទេសថៃ ដែលបានជំរុញដោយការនាំចេញភេសជ្ជៈ មិនមែនគ្រឿងស្រវឹង រថយន្ត ឧបករណ៍អគ្គិសនី គ្រឿងផ្គុំ និងផលិតផលបសុសត្វ។

លោកថ្លែងថា “នៅពីក្រោយប្រទេសកម្ពុជា ជាទិសដៅនាំចេញរបស់ប្រទេសថៃ គឺប្រទេសឡាវ និងមីយ៉ាន់ម៉ា សម្រាប់ភេសជ្ជៈមិនមានជាតិស្រវឹង កុំព្យូទ័រ ក្រណាត់ ប្រេងម៉ាស៊ូត និងអំបោះ និងប្រទេសម៉ាឡេស៊ី សម្រាប់ផលិតផលកៅស៊ូ កុំព្យូទ័រឧបករណ៍អគ្គិសនី និងគ្រឿងផ្គុំ”។

លោក Keerati បានឲ្យដឹងថា ការរីករាលដាលCovid-19បានបណ្ដាលឲ្យ DFT ត្រូវផ្អាកពិព័រណ៍ពាណិជ្ជកម្ម តាមព្រំដែននៅស្រុកអារញ្ញប្រាថេត ខេត្តស្រះកែវ ដែលជាប់ព្រំដែនជាមួយកម្ពុជា ចាប់ពីថ្ងៃទី២៨ ខែមីនា ដល់ថ្ងៃទី៣១ ខែមីនា នៅឆ្នាំនេះ។

ផលិតផលកសិកម្មមានចំនួនភាគច្រើននៃការនាំចេញរបស់កម្ពុជាទៅប្រទេសថៃ ខណៈដែលការនាំចេញរបស់ថៃមកកម្ពុជារួមមានធនធានថាមពល ជី កសិកម្ម ស៊ីម៉ងត៍ ផ្គត់ផ្គង់អាហារ និងគ្រឿងសំអាង។

កាលពីឆ្នាំ ២០១៥ មេដឹកនាំរដ្ឋាភិបាលទាំង ២ បានឯកភាពបង្កើនពាណិជ្ជកម្មទ្វេភាគីទ្វេដងដល់ ១៥ ពាន់លានដុល្លារនៅឆ្នាំ ២០២០ ពី ៥ ពាន់លានដុល្លារក្នុងឆ្នាំ ២០១៥៕

ដោយ ហ្សូ​លី

សេ​អ៊ូ​លៈ សេដ្ឋកិច្ច​របស់​ប្រទេស​កូរ៉េខាងត្បូង ត្រូវបាន​គេ​រំពឹងថា នឹង​ធ្លាក់ចុះ ០,៣ ភាគរយ​នៅ​ឆ្នាំនេះ ខណៈដែល​ជំងឺ​រាតត្បាត​ឆ្លង​រាលដាល Covid-19 បានធ្វើឱ្យ​ប៉ះពាល់​ដល់​ស​កម្ម​ភាព​សេដ្ឋកិច្ច​ទូទាំង​ពិភពលោក។ នេះ​បើតាម​ការព្យាករណ៍​រប​ស់​វិទ្យាស្ថាន​ស្រាវជ្រាវ​សេដ្ឋកិច្ច​ឯកជន​មួយ បាន​និយាយ​កាលពី​ថ្ងៃអាទិត្យ ទី២៦ ខែ មេសា ឆ្នាំ ២០២០នេះ។

ទោះយ៉ាងណា​ការព្យាករណ៍ របស់​វិទ្យាស្ថាន​ស្រាវជ្រាវ​ហ៊ីយ៉ាន់ដាយ បានបង្ហាញ​កំនើនសេដ្ឋកិច្ច​ខ្ពស់ជាង​មូលនិធិ​រូបិយវត្ថុ​អន្ដរជាតិ (IMF) ដែល​បាន​ព្យាករណ៍​ថា សេដ្ឋកិច្ច​របស់​ប្រទេស​កូរ៉េ​នឹង​ធ្លាក់ចុះ១,២ ភាគរយ​នៅ​ឆ្នាំនេះ ដោយសារ​សេដ្ឋកិច្ចពិភពលោក ត្រូវបាន​គេ​រំពឹងថា នឹង​ឈានដល់​ឆ្នាំ​អាក្រក់​បំផុត ចាប់តាំងពី​វិបត្តិ​សេដ្ឋកិច្ច​ដ៏​ខ្លាំង​លើ​ជំងឺ​រាតត្បាត។

ទន្ទឹមនឹងនេះ មូលនិធិ​រូបិយវត្ថុ​អន្តរជាតិ IMF បាន​និយាយថា សេដ្ឋកិច្ចពិភពលោក​ត្រូវបាន​រំពឹងថា​នឹង​ធ្លាក់ចុះ៣ភាគរយ​នៅ​ឆ្នាំនេះ។

ក្រុមហ៊ុន Hyundai រំពឹងថា សេដ្ឋកិច្ច​របស់​ប្រទេស​កូរ៉េ​នឹង​ធ្លាក់ចុះ០,៩ភាគរយ នៅក្នុង​ឆមាស​ទី១ ប៉ុន្តែ​គេ​រំពឹងថា​នឹង​កើនឡើង១,៤ភាគរយ​នៅក្នុង​ឆមាស​ទី២ ដោយសារ​រដ្ឋាភិបាល​បានប្រកាស​កញ្ចប់​ថវិកា​ដ៏​ច្រើន ដើម្បី​ជំរុញ​កំណើនសេដ្ឋកិច្ច​ឡើងវិញ។

សេដ្ឋកិច្ច​របស់​ប្រទេស​កូរ៉េខាងត្បូង បាន​ធ្លាក់ចុះ១,៤ភាគរយ នៅក្នុង​ត្រីមាស​ទី១ ក្នុងឆ្នាំនេះ ដែលជា​ការធ្លាក់ចុះ​យ៉ាងខ្លាំង​ប្រចាំត្រីមាស ចាប់តាំងពី​ត្រីមាស​ទី៤ នៃ​ឆ្នាំ ២០០៨ ។

លោក Hong Nam-ki រដ្ឋមន្ត្រីក្រសួង​ហិរញ្ញវត្ថុ បាន​និយាយ​កាលពី​សប្តាហ៍​មុន​ថា ការ​រាតត្បាត​រាតត្បាត​ចំពោះ​ការនាំចេញ និង​ទីផ្សារការងារ​របស់​ប្រទេស​កូរ៉េ អាច​នឹង​កើនឡើង​នៅ​ត្រីមាស​ទី។

កាលពី​សប្តាហ៍​មុន​រដ្ឋាភិបាល បានប្រកាស​កញ្ចប់​ជំនួយ ដែលមាន​តម្លៃ៤០ពាន់​ពាន់​លាន​វ៉ុ​ន (៣២ ពាន់​លាន​ដុល្លារ) សម្រាប់​ឧស្សាហកម្មសំខាន់ៗ ដែល​រងគ្រោះ​ដោយ​ជំងឺ​រាតត្បាត និង​គ្រោង​ថវិកា១០ពាន់​ពាន់​លាន​វ៉ុ​ន​ផ្សេងទៀត ដើម្បី​ការពារ​ទីផ្សារការងារ។

ចំណែកឯ​ការនាំចេញរ​បស់​កូរ៉េខាងត្បូង បាន​ធ្លាក់ចុះ២៧ភាគរយ ក្នុង​រយៈពេល ២០ ថ្ងៃ​ដំបូង​នៃ​ខែមេសា ឆ្នាំ២០២០នេះ ដែលមាន​ទំហំ​ទឹកប្រាក់​ដល់២១,៧ពាន់​លាន​ដុល្លារ៕

ប្រភព(Yonhap News)

ដោយ ប៊ី

ភ្នំពេញៈ ក្រុមហ៊ុន 9F Group ដែលជា​វេទិកា​ឌីជីថល​ឈានមុខ​គេ​របស់​ចិន រួមបញ្ចូល​គ្នា និង​ផ្តល់​សេវាកម្ម​ហិរញ្ញវត្ថុ​ផ្ទាល់ខ្លួន បានឱ្យដឹង​កាល​ចុង​សប្តាហ៍​នេះ​ថា ក្រុមហ៊ុន បាន​សហការ​ជាមួយ​ធនាគារ  Chief (Cambodia) Commercial Bank (CCB) ដើម្បី​ណែនាំ​ដំណោះស្រាយ​ឌីជីថល​ថ្មី នៅក្នុង​ទីផ្សារ​ផ្តល់ប្រាក់​កម្ចី​នៅ​កម្ពុជា។

ក្រុមហ៊ុន​ដែលមាន​គោលបំណង​ពង្រឹង​ទីផ្សារ នៅ​អាស៊ីអាគ្នេយ៍​បន្ថែមទៀត​នេះ បានឱ្យដឹង​ទៀតថា ខ្លួន​បាន​ឈានដល់​កិច្ចសហប្រតិបត្តិការ ជា​យុទ្ធសាស្ត្រ​ជាមួយ​ធនាគារ CCB ក្នុង​កិច្ចព្រមព្រៀង​មួយ ដែល​ក្រុមហ៊ុន​ទាំងពីរ​រួមគ្នា ផ្តល់​សេវា​ឥណទាន​មីក្រូ​តាម​ប្រព័ន្ធ​អន​ឡាញ​នៅ​កម្ពុជា។

សេចក្តីថ្លែងការណ៍​មួយ​របស់​ក្រុមហ៊ុន 9F Group បានសរសេរថា “វេទិកា​សេវា​កម្មនេះ នឹង​ផ្តល់ជូន​ប្រជាជន​ក្នុងស្រុក នូវ​សេវាកម្ម​ដាក់បញ្ចូល​ហិរញ្ញវត្ថុ​ឌីជីថល កាន់តែ​សាមញ្ញ និង​ងាយស្រួល​នៅក្នុង​ប្រទេស។

សេចក្តីថ្លែងការណ៍​បាន​បន្ថែមទៀតថា ក្រុមហ៊ុន 9F Group នឹង​ផ្តល់ជូន​ធនាគារ​នូវ​ដំណោះស្រាយ​ហិរញ្ញវត្ថុ​ឌីជីថល តាម​តម្រូវ​ការដែល​រួមមាន​កម្មវិធី​ទូរស័ព្ទ​ចល័ត ប្រព័ន្ធ​ផ្តល់ប្រាក់​កម្ចី​តាម​អ៊ិន​ធរ​ណេ​ត ដំណើរការ​ពេញលេញ​ប្រព័ន្ធ​ពិនិត្យ​ឥណទាន និង​ម៉ូ​ដែល​ផ្សេងទៀត ដើម្បី​ជួយ​លើកកម្ពស់​កម្រិត រចនាសម្ព័ន្ធ​ហិរញ្ញវត្ថុ​ឌីជីថល និង​ជំរុញ​ការផ្លាស់ប្តូរ​ឌីជីថល​របស់​ធនាគារ។

ធនាគារ CCB ដែលជា​ធនាគារពាណិជ្ជ​កម្ម ដំបូង​គេ​នៅ​ប្រទេស​កម្ពុជា​ត្រូវបាន​គ្រប់គ្រង​ដោយ​ឯកជន ដោយ​ក្រុមហ៊ុន​ហិរញ្ញវត្ថុ​ហុងកុង Chief Financial Group ដែលមាន​មូលដ្ឋាន​នៅ​ទីក្រុង​ហុងកុង។ ធនាគារ​នេះ បានចាប់ផ្តើម​ប្រតិបត្តិការ​អាជីវកម្មរ​បស់​ខ្លួន​នៅក្នុង​ប្រទេស​កម្ពុជា​កាល​ពី៧ឆ្នាំមុន ដោយមាន​ដើមទុន​ដំបូង​ប្រមាណ១០លាន​ដុល្លារ។ នៅ​ចុង​ឆ្នាំមុន​ទ្រព្យសម្បត្តិ​សរុប​របស់ខ្លួន​មាន​ជាង១០០លាន​ដុល្លារ។

តំបន់​អាស៊ីអាគ្នេយ៍​គឺជា​ចំណុច​ដ៏​សំខាន់​មួយ នៅក្នុង​យុទ្ធសាស្ត្រ​ក្រៅប្រទេស​របស់​ក្រុមហ៊ុន 9F Group។ ក្រុម​នេះ​ប្រើ​បច្ចេកវិទ្យា​ឌីជីថល​ជា​ក្បាលស្ពាន ដើម្បី​ជួយ​ដល់​ធនាគារ និង​សហគ្រាស​ក្នុងស្រុក​ជាមួយនឹង​ការផ្លាស់ប្តូរ​ឌីជីថល៕