គម្រោងផ្សារទំនើបមួយចំនួនត្រូវបានពន្យាពេលសាងសង់ និងសម្ពោធដាក់ចូល នៅក្នុងទីផ្សារនៅឆ្នាំនេះ

ដោយវុត្ថា

ភ្នំពេញៈ គម្រោងផ្សារទំនើបមួយចំនួននៅក្នុងប្រទេសកម្ពុជា ត្រូវបានពន្យាពេលសាងសង់ និងសម្ពោធដាក់ចូលទៅក្នុងទីផ្សារនៅក្នុងឆ្នាំនេះ  ខណៈការព្យាករណ៍ពីអ្នកជំនាញទំហំនៃការជួល  (Retails) នៅក្នុទីផ្សារទំនើបនេះបន្តធ្លាក់ចុះ រហូតដល់បំណាច់ឆ្នាំ ២០២០នេះ។

លោកស្រីអាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានប្រាប់គេហទំព័រPropertyarea.asia នៅថ្ងៃទី ៧ ខែសីហា ឆ្នាំ ២០២០នេះ ឱ្យដឹងថា គម្រោងផ្សារទំនើបមួយចំនួន ត្រូវបានពន្យាពេលនៃការសាងសង់ និងសម្ពោធដាក់ឱ្យដំណើរចូលទៅក្នុងទីផ្សារ ស្របពេលដែលទីផ្សារនៅក្នុងវិស័យនេះ ទទួលរងផលប៉ះពា ល់ពីជំងឺ Covid-19។

លោកស្រីពន្យល់ថា “គម្រោងផ្សារទំនើប បានពន្យាពេលការងារសាងសង់ និងដាក់ចូលទៅក្នុងផ្សារព្រោះតែទីផ្សារនេះ មិនមានអំណោយផល ហើយម្ចាស់តូបជួលមួយចំនួន បានផ្លាស់ប្តូរទីតាំងរបស់ខ្លួន ដូច្នេះវានឹងបន្តទទួលរងនូវផលប៉ះពាល់ពេលមួយឆ្នាំ និង អូសបន្លាយដល់ដាច់ឆ្នាំ២០២០នេះ”។លោកស្រីបញ្ជាក់ទៀតថា “ប្រសិនបើវិបត្តិនៃជំងឺ Covid-19នេះនៅតែអូសបន្លាយនោះ វានឹងនៅតែបន្តជះឥទ្ធិអាក្រក់ លើវិស័យមួយនេះបន្ថែមទៀត”។

ទោះជាយ៉ាងណា លោកស្រី អាន សុធិតា មិនបានបញ្ជាក់ពីចំនួនគម្រោងផ្សារទំនើបដែលបានពន្យាពេលសាងសាង់ ដែលបង្កឡើងដោយសារភាពរំាងស្ទះ នៃការដឹកសម្ភារៈយកមកសាងងសង់ និងសម្ពោដាក់ចូលទៅក្នុងទីផ្សារនៅក្នុងឆ្នាំនេះនោះទេ ខណៈ កម្ពុជាកំពុងប្រឈមនឹងវិបបត្តិសេដ្ឋកិច្ចសកល។

យោងតាមរបាយការណ៍ ដែលចេញដោយក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia បានបង្ហាញថា ទីផ្សារជួលតូបនៅក្នុងផ្សារទំនើប (Retail) នៅកម្ពុជា គិតត្រឹមចុងឆមាសទី១ (ចុងខែមិថុនា) មានភាពអវិជ្ជមានខ្លាំង ពោលគឺធ្លាក់រហូតដល់ដក១៩ភាគរយ ដែលបង្កឡើងដោយការរីករាលដាលនៃជំងឺ Covid-19 ៕

ទីផ្សារដីធ្លីនៅក្នុងខណ្ឌដង្កោនៅតែបន្តមានតម្រូវការ

ដោយ ៖ រ៉ាណេត

ភ្នំពេញ ៖ ខណ្ឌដង្កោនៅតែបន្តមានប្រជាប្រិយភាព និងមានការទិញ-លក់ជាធម្មតា ដែលមិនថមថយដូចនៅតាមបណ្តាខណ្ឌមួយចំនួនទៀតក្នុងរាជធានីភ្នំពេញនោះទេ ជាពិសេសសកម្មភាពនៃការអភិវឌ្ឍន៍របស់ក្រុមមួយចំនួននៅតែបន្តសាងសង់យ៉ាងមមាញឹក។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី៧ ខែសីហា ឆ្នាំ២០២០នេះថា ទីផ្សារដីធ្លីនៅក្នុងខណ្ឌដង្កោដែលស្ថិតនៅភាគខាងត្បូងរាជធានីភ្នំពេញនៅតែមានតម្រូវការដដែល។

លោកស្រីបានបញ្ជាក់ថា “ខណ្ឌដង្កោមានល្ខណៈពិសេសជាងបណ្តាខណ្ឌមួយចំនួនទៀតដែលស្ថិតនៅជុំវិញក្រុង ដោយសារតែតែក្រៅពីមានបណ្តាញហេដ្ឋារចនាសម្ព័ន្ធដែលវិនិយោគឡើងដោយរាជរដ្ឋាភិបាល រួមជាមួយនឹងវិស័យឯកជន គឺនៅមានគម្រោងអភិវឌ្ឍន៍ធំៗជាច្រើនទៀត ដែលក្នុងនោះរួមមានការអភិវឌ្ឍក្នុងវិស័យលំនៅដ្ឋានកម្រិតមធ្យម កម្រិតលើមធ្យម ជាពិសេសគម្រោងអភិវឌ្ឍន៍ផ្សារទំនើប និងមណ្ឌលពាណិជ្ជកម្មកម្រិតអន្តរជាតិជាច្រើនទៀត”។

លោកស្រីបន្តថា “នៅក្នុងខណ្ឌនេះមានការកើនឡើងនៃចំនួនប្រជាជន មិនមែនមានតែនៅក្នុងខណ្ឌដង្កោនេះមួយនោះទេ គឺវាមានការកើនឡើងស្ទើរតែគ្រប់ខណ្ឌ ប៉ុន្តែអ្វីដែលធ្វើឱ្យខណ្ឌនេះមានតម្រូវការស្នាក់នៅច្រើន រហូតមានការចូលខ្លួនមកអភិវឌ្ឍន៍ សំណង់បុរីជាច្រើន ដោយសារតែខណ្ឌនេះ មានវិសាលភាពធំទូលាយងាយស្រួលក្នុងការអភិវឌ្ឍន៍ ជាពិសេសតម្លៃដីធ្លីនៅមានកម្រិតនៅឡើយ ដែលវាជាការផ្តល់ឱកាសសម្រាប់បណ្តាអ្នកវិនិយោគ” ។

ស្រដៀងគ្នានឹងការលើកឡើងខាងលើនេះ លោកឧកញ៉ា តេង រិទ្ធី អគ្គនាយកក្រុមហ៊ុនភ្នាក់ងារអចលនទ្រព្យ R Investment Group ធ្លាប់បានមានប្រសាសន៍ថា ដង្កោ គឺជាខណ្ឌងាយស្រួលក្នុងការអភិវឌ្ឍន៍ ព្រោះខណ្ឌនេះមានសណ្ឋានដី និងអំណោយផលល្អច្រើន ម្យ៉ាងទៀត ភូមិសាស្ត្រនេះមានទីតាំងស្ថិតនៅជិត ទីប្រជុំជននៃរាជធានីភ្នំពេញ ដែលជាបណ្តុំនៃមណ្ឌលពាណិជ្ជ ហើយវាក៏មានភាពងាយស្រួល ក្នុងការពង្រីកខ្លួនទៅដល់ស្រុកកណ្ដាលស្ទឹង ដែលឃុំមួយចំនួនស្ថិតក្នុងស្រុកមួយនេះ ត្រូវបានកាត់ចូលមកក្នុងខណ្ឌដង្កោ។

លោកឧកញ៉ាបន្តថា លើសពីនេះទៅទៀត ក្រៅពីមានទំនោរទៅលើទីផ្សារលំនៅដ្ឋាន ខណ្ឌដង្កោ ក៏មានសួនឧស្សាហកម្មមួយចំនួននៅទីនោះផងដែរ រហូតត្រូវបានគេចាត់ទុកថា ជាតំបន់មានការអភិវឌ្ឍចម្រុះ។ ម្យ៉ាងទៀត ចំពោះទិសដៅនៃការអភិវឌ្ឍន៍នាពេលអនាគត វានឹងឆ្ពោះទៅរកតំបន់ជាយក្រុង ដែលស្ថិតនៅជុំវិញរាជធានីភ្នំពេញចម្ងាយប្រមាណ៣០គីឡូម៉ែត្រ ព្រោះបច្ចុប្បន្នតំបន់កណ្ដាលក្រុងភ្នំពេញ ស្ទើរតែអស់ដីក្នុងការអភិវឌ្ឍគម្រោងលំនៅឋានទៅហើយ ដែលធ្វើឱ្យអចលនវត្ថុកាន់តែមានតម្លៃខ្ពស់។

បច្ចុប្បន្ន គម្រោងធំៗដែលកំពុងបង្កើនភាពទាក់ទាញនៅភាគខាងត្បូងរាជធានីភ្នំពេញ ដែលស្ថិតនៅតំបន់ផ្លូវ៦០ម៉ែត្រ គឺនៅមានគម្រោងអភិវឌ្ឍន៍ក្រុងដ៏ធំរបស់ ING City បន្ថែមពីលើគម្រោងអភិវឌ្ឍន៍របស់ក្រុមហ៊ុន ប៉េង ហួត ក្រុមហ៊ុន ជីបម៉ុង រួមជាមួយនឹងគម្រោងបុរីកម្រិតមធ្យមជាច្រើនទៀតដែលស្ថិតនៅក្បែរផ្លូវជាតិលេខ២ និងផ្លូវជាតិលេខ៣ ជាពិសេសគម្រោងសាងសង់ព្រលានយន្តថ្មី ដែលកំពុងដំណើរការសាងសង់យ៉ាងមមាញឹក៕

រោងចក្រអគ្គិសនីកម្លាំង ៤០០មេហ្គាវ៉ាត់ ៣៨០ លានដុល្លារអាមេរិក ក្នុងខេត្តកណ្តាលនឹងបើកដំណើរការនៅចុងខែនេះ

ដោយ ៖ រ៉ាណេត 

កណ្តាល ៖ រោងចក្រផលិតថាមពលអគ្គិសនីដើរដោយប្រេងខ្មៅ ដែលមានអនុភាពរហូតដល់៤០០មេហ្គាវ៉ាត់ នៅក្នុងខេត្តកណ្តាល នឹងក្លាយជាសមិទ្ធផលថ្មីមួយទៀតរបស់អាជ្ញាធរអគ្គិសនីកម្ពុជា បន្ទាប់ពីបើកដំណើរការនៅត្រឹមចុងខែសីហា ឆ្នាំ២០២០ខាងមុខនេះ។ 

អភិបាលខេត្តកណ្តាល លោក គង់ សោភ័ណ្ឌ បានមានប្រសាសន៍បញ្ជាក់ប្រាប់កាលពីពេលកន្លងទៅថ្មីៗនេះថា គម្រោងរោងចក្រអគ្គិសនីដែលដើរដោយប្រេងខ្មៅ និងឧស្ម័នអានុភាព ៤០០ម៉េហ្កាវ៉ាត់ ដែលស្ថិតនៅក្នុងស្រុកនៅល្វាឯម ខេត្តកណ្តាល រហូតមកដល់ពេលនេះការសាងសង់ និងតម្លើងសម្ភារៈបច្ចេកទេសសម្រេចជាង៩០ភាគរយ ហើយ ដោយគ្រោងនឹងដាក់ដំណើរការចុងខែសីហា ឆ្នាំ២០២០។

លោក គង់ សោភ័ណ្ឌ បានបញ្ជាក់ទៀតថា គម្រោងរោងចក្រអគ្គិសនីដែលមានអានុភាព ៤០០មេហ្កាវ៉ាត់មួយនេះ គឺសម្រាប់បម្រើដល់ការផ្គត់ផ្គង់ប្រើប្រាស់ និងចែកចាយទៅតាមបណ្តាខេត្តមួយចំនួនដែលស្ថិតនៅជិតគ្នា ហើយនៅមាន អនុស្ថានីយ ១កន្លែងទៀត ផ្តល់អនុភាព ២៣០គីឡូវ៉ុល សម្រាប់ផ្គត់ផ្គង់ក្នុងខេត្តកណ្តាលទាំងមូល។

គម្រោងរោងចក្រអគ្គិសនីខាងលើនេះ ត្រូវបានសាងសង់ឡើងលើផ្ទៃដីសរុប ៤៣ហិកតា មានតម្លៃវិនិយោគប្រមាណ ៣៨០ លានដុល្លារអាមេរិក ចែកចេញជាពីរគម្រោងធំៗ ទី១ គឺ ការសាងសង់រោងចក្រម៉ាស៊ីនភ្លើង អនុភាពទំហំ២០០មេហ្គាវ៉ាត នាំចូលពីប្រទេសហ្វាំងឡង់ និងសាងសង់ដោយក្រុមហ៊ុនចិន China Gezhouba Group Corporation និង ទី២ គឺជាការសាងសង់រោងចក្រម៉ាស៊ីនភ្លើងអនុភាព២០០មេហ្គាវ៉ាត នាំចូលពីប្រទេសអាឡឺម៉ង់ នឹងត្រូវសាងសង់ដោយក្រុមហ៊ុនចិន China National Heavy Machinery Corporation៕

ការនាំចេញរបស់កម្ពុជាទៅកាន់ទីផ្សារសហរដ្ឋអាមេរិក សម្រេចបាន ២,៧៥ពាន់លានដុល្លារនៅឆមាសទី១ ឆ្នាំនេះ

ដោយ៖ ប៊ី

ភ្នំពេញ៖ ពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកមានតម្លៃ ២,៨៩ ពាន់លានដុល្លារនៅឆមាសទីមួយនៃឆ្នាំនេះកើនឡើង ១៥,៨ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យពីការិយាល័យជំរឿនសហរដ្ឋអាមេរិក នៅក្នុងសប្តាហ៍នេះ។

ទិន្នន័យ បានបង្ហាញថា ការនាំចេញរបស់កម្ពុជាទៅទីផ្សារអាមេរិកមានទំហំទឹកប្រាក់ ២,៧៥ពាន់លានដុល្លារនៅឆមាសទី១ ឆ្នាំ២០២០ នេះ  ២៣ ភាគរយ បើធៀបនឹងទំហំទឹកប្រាក់ ២,២៤ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

កំណើននេះត្រូវបានគាំទ្រដោយការដឹកជញ្ជូនផលិតផល ដែលទាក់ទងនឹងការធ្វើដំណើរ ដូចជាកាបូបដៃ កាបូបស្ពាយ និងវ៉ាលី ដែលត្រូវបានអនុគ្រោះពន្ធ ដោយប្រព័ន្ធអនុគ្រោះពន្ធរបស់សហរដ្ឋអាមេរិក ដែលបានចូលជាធរមានកាលពីខែកក្កដាឆ្នាំ ២០១៦ ។ ចាប់តាំងពីពេលនោះមក ការនាំចេញរបស់កម្ពុជាទៅកាន់សហរដ្ឋអាមេរិកទទួលបានកំណើនគួរឱ្យកត់សម្គាល់ជារៀងរាល់ឆ្នាំ។

ទោះយ៉ាងណា ផលិតផលសម្លៀកបំពាក់ និងស្បែកជើងផលិតនៅកម្ពុជាមិនត្រូវបានរាប់បញ្ចូលក្នុងប្រព័ន្ធអនុគ្រោះពន្ធរបស់អាមេរិកនេះ។

ជាមួយគ្នានេះដែរ ទិន្នន័យបានបង្ហាញថា ប្រទេសកម្ពុជាបាននាំចូលទំនិញពីអាមេរិកមានតម្លៃ ១១៤,៦លានដុល្លារក្នុងរយៈពេល ៦ ខែគិតត្រឹមថ្ងៃទី ៣០ ខែមិថុនា ធ្លាក់ចុះ ៤៥,៤៣ ភាគរយ។

របាយការណ៍របស់ធនាគារជាតិនៃកម្ពុជា ចេញផ្សាយនៅថ្ងៃទី ៤ ខែមីនា បាននិយាយថា ឱនភាពពាណិជ្ជកម្មរបស់កម្ពុជាជាមួយបណ្តាប្រទេសផ្សេងទៀតនៅលើពិភពលោកបានបន្តកើនឡើងដល់ ៧,៧៦ ពាន់លានដុល្លារកាលពីឆ្នាំមុន ដែលជាការកើនឡើងជាង ៣១ ភាគរយ បើប្រៀបធៀបទៅនឹងឆ្នាំមុនមួយទៀត។

កាលពីឆ្នាំមុនកម្ពុជាបាននាំចូលទំនិញមានតម្លៃ ២២,៣៤ ពាន់លានដុល្លារ ខណៈនាំចេញតែ ១៤,៦៣ ពាន់លានដុល្លារប៉ុណ្ណោះ។

តួលេខរបស់ធនាគារកណ្តាល បានបង្ហាញថា អត្រាកំណើនប្រចាំឆ្នាំពីមួយឆ្នាំទៅមួយឆ្នាំក្នុងការនាំចូលមានចំនួន ១៨,៦ ភាគរយកាលពីឆ្នាំមុន ខណៈការនាំចេញបានធ្លាក់ចុះ ១២,៧ ភាគរយ។

របាយការណ៍ បានឱ្យដឹងថា ប្រទេសកម្ពុជាបាននាំចេញវាយនភ័ណ្ឌ ស្បែកជើង អង្ករ និងកង់ ហើយបាននាំចូលប្រេង យានយន្ត គ្រឿងសំណង់ ចំណីអាហារ ភេសជ្ជៈ និងវត្ថុធាតុដើមសម្រាប់វិស័យផលិតកម្ម៕

ការនាំចេញ​ផលិតផល​កសិផល​រប​ស់​កម្ពុជា​បាន​កើនឡើង​រហូតដល់​ជិត ៥លាន​តោន​ក្នុង​មួយឆ្នាំ

ដោយៈ រ៉ា​ណេ​ត

ភ្នំពេញៈ នៅក្នុង​រយៈពេល៦ឆ្នាំ​ចុង​ក្រោយនេះ ការនាំចេញ​ផលិតផល​កសិផល​រប​ស់​កម្ពុជា ទៅកាន់​ទីផ្សារ​អន្តរជាតិ​មានការ​កើន​ឡើងជា​លំដាប់ ជាក់ស្ដែង​នៅក្នុង​ឆ្នាំ២០១៩កន្លងទៅនេះ កម្ពុជា​បាន​បង្កើន​ពី ៣,៤៤លាន​តោន ទៅដល់ ៤,៨លាន​តោន ទៅកាន់​ទីផ្សារ​ចំនួន៥៩ប្រទេស។

តាមរយៈ​របាយការណ៍ ដែល​ចេញ​ដោយ​ក្រសួងកសិកម្ម​នៅ​ថ្ងៃទី៦ ខែសីហា ឆ្នាំ២០២០បាន​បង្ហាញថា កំណើន​បរិ​មាណនៃ​ការនាំចេញ​នេះ ជា​កត្តា​ឆ្លុះបញ្ចាំង​អំពី​ការផ្លាស់ប្តូរ​ជា​វិជ្ជមាន​ទាំង​បរិមាណ និង​គុណភាព​នៃ​ផលិតកម្ម​កសិកម្ម​នៅក្នុង​ប្រទេស​កម្ពុជា។

របាយការណ៍​ដដែល​បានកត់សម្គាល់ ទៅលើ​ចំណុចសំខាន់ៗមួយចំនួន ដូចជា អនាម័យ និង​ភូតគាម​អនាម័យ​ដើរតួនាទី​មិនអាច​ខ្វះ​បាន ជា​ស្ពាន​ចម្លង​ផលិតផល​កសិកម្ម​ទៅកាន់​ទីផ្សារ​បរទេស ជាពិសេស​ផលិតផល​កសិកម្ម​មួយចំនួន ដែលជា​ប្រភេទ​ផលិតផល​ដែល​ជាប់​កម្រិត​កំណត់ ឬ​ជា​ក្រុម​ផលិតផល​ដែលមាន​កម្រិត​ហានិភ័យ​ខ្ពស់ ចម្លង​សមាសភាព​ចង្រៃ​ខ្ពស់​ដូចជា ផលិតផល​បន្លែ ផ្លែឈើ​ស្រស់ មើម និង​បណ្ដា​ទំនិញ​ដទៃទៀត​ដែល​ចាត់ ក្នុង​កម្រិត​ហានិភ័យ នៃ​ស្ដង់ដារ​ភូតគាម​អនាម័យ​អន្ដរជាតិ​លេខ៣២ ។

ការនាំចេញ​ទំនិញ​ប្រភេទ​នេះ  ទាមទារ​ឱ្យ​សមត្ថកិច្ច​ភូតគាម​អនាម័យ​កម្ពុជា ធ្វើសំណើ​សុំ​ចរចា​របើក​ទីផ្សារ ជាមួយ​សមត្ថកិច្ច​ភូតគាម​អនាម័យ នៃ​ប្រទេស​នាំចូល តាមរយៈ​ការស្នើសុំ​វាយតម្លៃ​ហានិភ័យ សមាសភាព​ចង្រៃ​ពាក់ព័ន្ធ នឹង​ការ​នាំចូល​ទំនិញ​ដែល​បានស្នើ​សុំ។

ផលិតផលសំខាន់ៗដែល​បាន និង​កំពុង​នាំចេញ​ទៅកាន់​ទីផ្សារ​បរ​ទេស ក្រោយពី​បាន​ឆ្លងកាត់​ការចរចារ បើក​ទីផ្សារ​ដោយ​រៀបចំ​ជា​ពិធីសារ​ស្តីពី លក្ខខណ្ឌ​តម្រូវ​ភូតគាម​អនាម័យ​ជាមួយ​ប្រទេស​នាំចូលសំខាន់ៗមួយចំនួន រួមមាន អង្ករ ចំណិត​ដំឡូង​មី​ក្រៀម ពោត ផ្លែ​ចេក ផ្លែស្វាយ​ស្រស់ ផ្លែ​ស្រការ​នាគ។

កាលពី​អំឡុង​ខែមិថុនា ឆ្នាំ២០២០កន្លងទៅថ្មីៗនេះ កម្ពុជា​បានសម្រេច​ពិធីសារ​ស្តីពី​លក្ខខណ្ឌ​តម្រូវ​ភូតគាម​អនាម័យ សម្រាប់​ការនាំចេញ​ផ្លែស្វាយ​ស្រស់ ទៅកាន់​ទីផ្សារ​ប្រទេស​ចិន។

អគ្គនាយកដ្ឋាន​កសិក​ម្ម បាននិងកំពុង​ដំណើរកា​រ​វាយតម្លៃ និង​ចុះបញ្ជី​បណ្តា​កសិដ្ឋាន និង​ទីតាំង​កែច្នៃ សម្រាប់​នាំចេញ​ផ្លែស្វាយ​ទៅ​ប្រទេស​ចិន ដោយ​ត្រូវអនុវត្ត​ការអនុវត្ត​កសិកម្ម​ល្អ (GAP) និង​ត្រូវ​ឆ្លងកាត់​ការធ្វើ​ប្រព្រឹត្តិកម្ម សម្លាប់​សមាសភាព​ចង្រៃ​ដោយ​ប្រើ​ចំហាយ​ទឹក​ក្តៅ (Vapor Heat Treatment – VHT) ឬ​ប្រព្រឹត្តិកម្ម ទឹក​ក្តៅ (Hot Water Treatment – HWT)៕

លោក​ស៊ុន ចាន់ថុល៖ រដ្ឋាភិបាល​កំពុង​ព​ង្រឹ​ក និង​ពង្រឹង​គម្រោង​ហេដ្ឋារចនាសម្ព័ន្ធ​សំខាន់​ជាច្រើន​ដើម្បី​ជំរុញ​កំនើនសេដ្ឋកិច្ច

ដោយ​វុត្ថា

ភ្នំពេញៈ រដ្ឋាភិបាល​កម្ពុជា​បាន​នឹង​កំពុង​ពង្រីក និង​ពង្រឹង​គម្រោង​ហេ​ដ្ឋា​រចនា​ស  ម្ព័​ន្ធ​សំខាន់​ជា​ច្រើ​នៅ​ទូទាំងប្រទេស ដើម្បី​ជំរុញ​កំណើនសេដ្ឋកិច្ច​សង្គមជាតិ  តាមរយៈ​ការកាត់បន្ថយ​ថ្លៃដើម និង​ជំរុញ​ការដឹកជញ្ជូន​ឱ្យបានរ​ហ័យ និង​ទាន់ពេល។

លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន​បាន​មានប្រសាសន៍​នៅក្នុង​ពិធី​សំណេះសំណាល​ជាមួយ​មន្ត្រីរាជការ បុគ្គលិក កម្មករ​នៃ​មន្ទីរ​សាធារណការ និង​ដឹកជញ្ជូន​ខេត្តបន្ទាយមានជ័យ​កាលពីពេល​ថ្មី​នេះ បានឱ្យដឹងថា    រដ្ឋាភិបាល​តាមរយៈ​ក្រសួង​បាន​នឹង​កំពុង​អនុវត្ត គម្រោង​ស្ថាបនា​ពង្រីក និង​លើកកម្ពស់​កម្រិត​គុណភាព​ផ្លូវជាតិសំខាន់ៗនៅ​ក្កម្ពុជា និង​គម្រោង​សាងសង់​ហេដ្ឋារចនាសម្ព័ន្ធសំខាន់ៗនានា។

លោក​ទេសរដ្ឋមន្ត្រី​បន្តថា គម្រោង​ហេដ្ឋារចនាសម្ព័ន្ធ​ទាំងនោះ​រួមមាន ផ្លូវ​ក្រវាត់ក្រុង​ទី១ ទី២ ទី៣ ផ្លូវ​ល្បឿន​លឿន​ភ្នំពេញ-ព្រះសីហនុ ផ្លូវ​ល្បឿន​លឿន​ភ្នំពេញ-បាវិត ស្ពាន​ស្ទឹងត្រង់ ស្ពាន​ខេត្តក្រចេះ កំពង់ផែ​ពហុ​បំណង​ខេត្ត​ព្រះសីហនុ និង​កំពង់ផែ​សមុទ្រ​ទឹក​ជ្រៅ ជាដើម។

លោក​ស៊ុន ចាន់ថុល​បាន​បន្តថា គោលជំហ និង​គោលការណ៍​របស់​ក្រសួង​នាពេល​បច្ចុប្បន្ននេះ គឺ​ការសាងសង់​ផ្លូវ​ឱ្យបាន​រឹងមាំ ដែល​អាច​ប្រើប្រាស់​ជាប់​បានយូរ​អង្វែង ពោលគឺ មិនមែន​ធ្វើ​មុខខូច ក្រោយ ធ្វើ​ក្រោយ​ខូច​មុខ ឬ​ចាក់​ស្ដើង​ស៊ី​ក្រាស ចាក់​ក្រាស់​ស៊ី​ស្ដើង​នោះឡើយ។

លោក​បន្ថែមថា គោលការណ៍​នេះ ត្រូវតែ​អនុវត្ត​ឱ្យបាន​ម៉ឺងម៉ាត់​បំផុត តាមរយៈ​ការប្រើប្រាស់​យន្ត​ការចុះពិនិត្យ​ឱ្យបាន​ដិតដល់ និង​ការបង្កើត​ក្រុមការងារ​ត្រួតពិនិត្យ​ពិសេស​ដើម្បី តាមដាន​ការសាងសង់​របស់​ក្រុមហ៊ុន​សាងសង់ និង​ក្រុមហ៊ុន​ទីប្រឹក្សាបច្ចេកទេស។

អ្នកនាំពាក្យ​ក្រសួង​សាធារណៈការ និង​ជញ្ជូន លោក វ៉ា​ស៊ីម សូ​រី​យ៉ា បានឱ្យដឹង​ដែរ​ថា ជាការ​ពិតណាស់ រដ្ឋាភិបាល​បាន​នឹង​កំពុង​អនុវត្តន៍​ស្តារ និង​ភិ​វឌ្ឍន៍​ហេដ្ឋារចនាសម្ព័ន្ធ​នានា នៅក្នុង​ប្រទេស​កម្ពុជា ឱ្យ​កាន់​តែមាន​ល្អ​ប្រសើរឡើង​ពីមួយថ្ងៃ​ទៅមួយថ្ងៃ ដោយ​ប្រែក្លាយ​ពី​ផ្លូវ​ពី​បេតុង ទៅ​ផ្លូវ​AC និង​លើកកម្ពស់​បច្ចេកវិទ្យាថ្មីៗ ក្នុង​កសាង​ផ្លូវ​តប​តាម​អនុសាសន៍​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា និង​ធ្វើឱ្យមាន​គុណភាព​ខ្ពស់។

លោក​បន្តថា “យើង​បាន​កសាង​ផ្លូវ​ផ្លូវដែក កំពង់ផែ និង​ផ្លូវ​ល្បឿន​លឿន​មាន​ទាំង​បំពាក់​ភ្លើង​បំភ្លឺ​ផ្លូវ កាមេរ៉ា​សុវត្ថិភាព និង​មាន​សុវត្ថិភាព​ខ្ពស់ ក្នុងន័យ​ធ្វើយ៉ាងណា​ឱ្យ​វា​ទំនើប ដូច​នៅ​បណ្តា​ប្រទេស​អភិវឌ្ឍន៍​នានា នៅក្នុង​ពិភពលោក ដែល​យើង​កំពុង​អនុវត្តបណ្តើរៗ ហើយ​ត្រូវ​ប្រើពេល​យូរ និង​ចំណាយ​ថវិកា​ច្រើន​ក្នុង​កិច្ចការ​នេះ” ។ លោក​បន្តថា “ក្រោយ​ធ្វើ​ទំនើបកម្ម និង​ត​ភ្ជាប់​ជាមួយ​ផ្លូវ​ហាយវ៉េ​អាស៊ី ផ្លូវដែក និង​អាកាសយានដ្ឋាន​អន្តរជាតិ កំពង់ផែ​កុងតឺន័រ​ថ្មី​ក្នុង​ខេត្ត​ព្រះសីហនុ នឹង​ប្រែក្លាយ​ប្រទេស​កម្ពុជា​ទៅជា​ឃ្លាំង​ផ្ទុក និង​ដឹកជញ្ជូន​ទំនិញ​ដ៏​សំខាន់ ក្នុង​តំបន់​អាស៊ាន ដែល​អាច​ឲ្យ​កប៉ាល់ធំៗចូល​ចត​បាន” ។

ដោយឡែក ចំពោះ​ការធ្វើ​វិនិយោគ លើ​គម្រោង​ហេដ្ឋារចនាសម្ព័ន្ធធំៗ គឺជា​យុទ្ធសាស្ត្រ​សំខាន់​មួយ របស់​ប្រទេស​កម្ពុជា​ដើម្បី​ជំរុញ​កំណើនសេដ្ឋកិច្ច ស្របពេល​ការខិតខំ​របស់​រដ្ឋាភិបាល ក្នុងការ​កែលំអ​ហេដ្ឋារចនាសម្ព័ន្ធ​របស់​ប្រទេស ដើម្បី​ទ្រទ្រង់​កំណើន​ក្នុង​វិស័យ​ផលិតកម្ម និង​ពង្រីក​ឧបករណ៍ប្រើប្រាស់៕

កម្ពុជា​កំពុង​រក​ជំរុញ​ការដឹកជញ្ជូន និង​ពង្រីក​ការ​ពាណិជ្ជកម្ម​ជាមួយ​ប្រទេសជិតខាង

ដោយៈ រ៉ា​ណេ​ត

ភ្នំពេញៈ ការ​រឹតត្បិត​នូវ​ចរាច​ណ៍​ឆ្លងកាត់​ព្រំដែន​ប្រទេស បានក្លាយ​ទៅជា​ឧបសគ្គ​ក្នុង​ធ្វើ​ពាណិជ្ជកម្ម​រវាង​ប្រទេស និង​ប្រទេស​ដែល​ក្រៅពី​ប៉ះពាល់​ដល់​សេដ្ឋកិច្ច​រួម ថែមទាំង​ជះឥទ្ធិពល​អាក្រក់ ដល់​ពាណិជ្ជករ​ដោយផ្ទាល់ ខណៈដែល​រាជរដ្ឋាភិបាល​កម្ពុជា​កំពុង​រក​ដំណោះស្រាយ​ធ្វើឱ្យមាន​ភាពល្អប្រសើរ​ឡើង​វិញ។

អនុប្រធាន​សភាពាណិជ្ជកម្ម​កម្ពុជា លោក​ឧកញ៉ា លឹម ហេង បាន​មានប្រសាសន៍​តាម​ទូរស័ព្ទ​នៅ​ល្ងាច​ថ្ងៃទី៦ ខែសីហា ឆ្នាំ២០២០ថា រដ្ឋាភិបាល​កម្ពុជា តាមរយៈ​សភាពាណិជ្ជកម្ម​កម្ពុជា បាននិងកំពុង​ជំរុញ​ឱ្យ​សភាពាណិជ្ជកម្ម តាម​បណ្តា​ខេត្ត​ដែល​ស្ថិតនៅ​តំបន់​ព្រំដែន​ជាមួយ​ប្រទេសជិតខាង ពង្រឹង​កិច្ចទំនាក់ទំនង​ឱ្យបាន​ស៊ីជម្រៅ ផ្តោត​សំខាន់​លើ​វិស័យ​ដឹកជញ្ជូន និង​ការវិនិយោគផ្សេងៗឱ្យ​កាន់​តែមាន​ភាពងាយស្រួល។

លោ​កក​ញ៉ាប​ន្ត​ទៀតថា ជាមួយគ្នានេះ តំណាង​សភាពាណិជ្ជកម្ម​តាម​ខេត្ត​ក៏ត្រូវ​កត់សម្គាល់ នូវ​ផល​លំបាក​ដែលជា​ឧបសគ្គផ្សេងៗ ដើម្បី​ស្វែងរក​ដំណោះស្រាយ​បឋម​ជាមួយ​អាជ្ញាធរ​ជាប់​តំបន់​ព្រំដែន ហើយ​ក្នុងករណី​មិន​អាចមាន​លទ្ធផល ត្រូវ​រៀបចំ​ជា​របាយការណ៍​បញ្ជូនមក​កាន់​សភាពាណិជ្ជកម្ម​ក​ម្ពុ​ជា ដើម្បី​បង្កើត​កិច្ចពិភាក្សា និង​ស្នើសុំ​ដល់​រាជរដ្ឋាភិបាល​ធ្វើការ​ដោះស្រាយ​ជូន។

ពាក់ព័ន្ធ​ទៅនឹង​ការធ្វើ​ពាណិជ្ជកម្ម ក៏ដូចជា​ការដឹកជញ្ជូន​ឆ្លងកាត់​ព្រំដែន កាលពីពេល​កន្លងទៅថ្មីៗនេះ ដោយសារ​ភាពភ័យខ្លាច​នៃ​ការ​រាតត្បាត​ជំងឺ Covid-19 ភាគី​នៃ​ប្រទេសជិតខាង​កម្ពុជា រួមមាន​ប្រទេស​វៀតណាម និង​ប្រទេស​ថៃ បានសម្រេច​បិទ​ច្រកព្រំដែន​មួយចំនួន​ដោយ​ឯកតោភាគី ដែល​ទង្វើ​នេះ​បាន​ជះ​ឥ​ទ្ធ​ពល​អវិជ្ជមាន ដល់​ពាណិជ្ជករ និង​ទទួលរង​នូវ​ការខាតបង់​ផងដែរ។

លោក​ឧកញ៉ា លឹម ហេង បាន​មានប្រសាសន៍​បញ្ជាក់ថា កាលពីពេល​កន្លងទៅ ដោយសារ​តែមាន​ការបិទ​ច្រកព្រំដែន ដោយ​ឯកតោភាគី ដូចជា ប្រទេស​វៀតណាម និង​ប្រទេស​ថៃ​ជាដើម បានធ្វើឱ្យ​ទាំង​ពាណិជ្ជករ​កម្ពុជា ក៏ដូចជា​ពាណិជ្ជកម្ម​ដែល​ស្ថិតនៅ​ក្នុងប្រទេស​សាមី​ខ្លួនឯង ទទួលរង​នូវ​ការខាតបង់​ប្រយោជន៍ ដូចជា​ការដឹកជញ្ជូន​ដំឡូង ស្រូវ អង្ករ និង​ផលិតផល​ផ្នែក​កសិកម្មផ្សេងៗមួយចំនួនទៀត ទៅកាន់​ទីផ្សារ​ដែល​ត្រូវ​ឆ្លងកាត់​ព្រំដែន។ ដូច្នេះ ដើម្បី​ជួយ​សម្រួល​ដល់​ភាពលំបាក ដែល​ធ្លាប់​កើតមាន​ទាំងនេះ ទើប​រាជរដ្ឋាភិបាល​ក​ម្ពុ​ជា​យកចិត្តទុកដាក់​ក្នុង​ការជួយ​ដោះស្រាយ៕

ចំណេះដឹង! តើ​គោលការណ៍​សេដ្ឋកិច្ច​ទីផ្សារ​មាន​អ្វីខ្លះ?

ដោយ​វុត្ថា

ភ្នំពេញៈ គោលការណ៍​សេដ្ឋកិច្ច​ទីផ្សារ គឺជា​សកម្មភាព​ដោយ​សេរី នៅក្នុង​ដំណើរការ​ផលិតកម្ម និង​ពាណិជ្ជកម្ម​គឺ៖ -សិទ្ធិ​ជា​ម្ចាស់​លើ​កម្មសិទ្ធិ និង​សិទ្ធិ​សហគ្រិន​ក្នុង​ការធ្វើ​អាជីវកម្ម និង​ពាណិជ្ជកម្ម​ដោយ​សេរី។

ខាងក្រោម​នេះ​គឺជា​គោលការណ៍ខ្លះៗ នៅក្នុង​សេដ្ឋកិច្ច​ទីផ្សារ ដែល​អ្នក​ត្រូវ​ដឹង និង​អនុវត្ត​ឱ្យបាន​ត្រឹមត្រូវ៖

-ការលប់បំបាត់​ទម្រង់​និង​បែបបទផ្សេងៗ ដែល​បង្អាក់​ដល់​ផលិតកម្ម និង​ពាណិជ្ជកម្ម។

– ថ្លៃទំនិញ​ឬ​សេវាកម្ម​បង្កើតឡើង ដោយ​កិច្ច​ព្រមព្រៀងគ្នា​រវាង​អ្នកលក់ និង​អ្នកទិញ ឬ​សមភាព​រវាង​បរិមាណ​ផ្គត់ផ្គង់ និង​តម្រូវការ​ក្នុង​ទីផ្សារ។

– ថ្លៃ​ទីផ្សារ​ទំនិញ​និង​សេវាកម្ម មាន​លក្ខណៈ​បរា​នុម​តិ ដោយ​ឆ្លុះបញ្ចាំង​ពី​ប្រភព​ថ្លៃដើម​នៃ​ផលិតផល។

– ការធ្វើអន្តរាគមន៍រ​បស់​រដ្ឋ​ក្នុង​សេដ្ឋកិច្ច ត្រូវបាន​ប្រើប្រាស់​និយ័ត​ករ​សេដ្ឋកិច្ច ដោយ​ស្ថិតក្នុង​ក្របខ័ណ្ឌ​ច្បាប់​សេដ្ឋកិច្ច ជៀសវាង​ការប្រើប្រាស់​វិធានការ រដ្ឋបាល​ប្រមូលផ្តុំ។ និយ័ត​ករ​សេដ្ឋកិច្ចសំខាន់ៗមាន គោលនយោបាយ​សារពើពន្ធ ហិរញ្ញវត្ថុ និង​ឥណទាន ច្បាប់​ការងារ ច្បាប់​ប្រឆាំងនឹង​ការ​ផ្តាច់មុខ ការបង្កើត​កម្មវិធី​ជាតិ​ដើម្បី​អភិវឌ្ឍន៍​ជាដើម៕

គេហទំព័រ Cambodia Financial Times នឹងចេញនូវមាតិកាព័ត៌មានថ្មីមួយដែលផ្តោតលើភាពស៊ីវីល័យ និងបែបផែនជីវិតសម័យថ្មី

គេហទំព័រ Cambodia Financial Times ដែលជាគេហទំព័រលេចធ្លោលើព័ត៌មានហិរញ្ញវត្ថុ និងសេដ្ឋកិច្ច បច្ចុប្បន្នបានបញ្ចេញគម្រោងថ្មីមួយទៀតរបស់ខ្លួនដែលមានឈ្មោះថា Biz Lifestyle ដើម្បីផ្សារភ្ជាប់ឱ្យជីវិតនិងការរស់នៅប្រចាំថ្ងៃកាន់តែមានភាពងាយស្រួលនិងស៊ីវីល័យ ទាន់សម័យឌីជីថល។

Biz Lifestyle ជ្រកកោនម្លប់របស់ Cambodia Financial Times មួយនេះធានាថានឹងនាំមកជូននូវបទពិសោធន៍ថ្មី និងរបៀបរបបនៃការរស់នៅបែបទាន់សម័យ ស៊ីវីល័យ និងពេញនិយម ស្របពេលកំនើនប្រាក់ចំណូល និងជីវភាពរបស់ប្រជាពលរដ្ឋកាន់តែប្រសើរឡើង។

Lifestyle បែបថ្មីតាមបែបកម្រិតមធ្យម និងកម្រិតខ្ពស់ដូចជា ការថែរក្សាសុខភាពប្រចាំថ្ងៃ ការស្លៀកពាក់ឱ្យសមស្របទៅតាមព្រឹត្តការណ៍កម្មវិធី ទម្លាប់រស់នៅក្នុងបរិយា កាសប្រកបដោយផាសុកភាព សម្រាប់យុគសម័យឌីជីថល ព្រមទាំងបង្ហាញពីគន្លឹះនិងវិធីសាស្រ្តបង្កើនភាពងាយស្រួលដល់ការរស់នៅ។

កញ្ញា ហេង ហ្សូលី និពន្ធនាយកនៃគម្រោង Biz Lifestyle បានឱ្យដឹងថា ជាកិច្ចបើកទំព័រថ្មីនៃភាពទាន់សម័យ និងជាតម្រូវការរបស់ប្រជាជនកម្ពុជាសម័យថ្មី ទំព័រហ្វេសប៊ុកផេក Biz Lifestyle បានត្រៀមខ្លួនរួចជាស្រេច ក្នុងការដាក់បង្ហាញពីរសនិយម ភាពទាន់សម័យកាល តាមរយៈការចែករំលែកចំណេះដឹង និងប្រធានបទជាច្រើនដូចជា សំណេរអត្ថបទ វីដេអូខ្លីៗ បទសម្ភាសន៍ និងរូបភាពស្រស់ស្អាតជាច្រើន ចែកជូនដល់ប្រិយមិត្តក្នុងបណ្តាញសង្គម ជាពិសេសអ្នកជំនួញ បុគ្គលិកជាន់ខ្ពស់ យុវវ័យ ព្រមទាំងទស្សនិកជនទាំងអស់ ដែលនិយមចូលចិត្តតាមដានការរស់នៅបែបស៊ីវីល័យ និងហ៊ឺហារ។

កញ្ញាបន្តថា ដើម្បីមានឱកាសទទួលបានបទពិសោធន៍ក្នុងការរស់នៅតាមបែបសម័យថ្មី បែបអភិជន និងហ៊ឺហារ សូមរង់ចាំតាមដាន និងគាំទ្រ Biz Lifestyle។

ក្រុមការងារទាំងអស់បើកចំហចិត្តនិងគំនិត រង់ចាំទទួលពាក្យរិះគន់ដើម្បីស្ថាបនា និងអភិវឌ្ឍខ្លួនឱ្យក្លាយជាទីកន្លែងមួយដែលផ្តល់ចំនេះដឹងពាក់ព័ន្ធនឹង Lifestyle ជាពិសេសពួកយើងរង់ចាំស្វាគមន៍ពីបណ្តារក្រុមហ៊ុន ម្ចាស់ផលិតផល និងសេវាកម្មទាំងអស់ សហការគ្នាដើម្បីផ្សព្វផ្សាយពីគុណភាព គុណតម្លៃរបស់ផលិតផលនិងសេវាកម្មរបស់លោកអ្នក។

Biz Lifestyleចូលរួមលើកកំពស់គុណតម្លៃ និងគុណភាពនៃជីវិតរបស់លោកអ្នក៕

រដ្ឋាភិបាលកូរ៉េខាងត្បូង ដាក់ចេញវិធានការជាច្រើន ដើម្បីទប់ស្កាត់តម្លៃអចលនទ្រព្យកំពុងហក់ឡើងខ្លាំង

ដោយ៖ ប៊ី
អន្តរជាតិ៖ ចាប់តាំងពីលោកប្រធានាធិបតី Moon Jae-in បានចូលកាន់តំណែងក្នុងឆ្នាំ ២០១៧ លទ្ធភាពទិញលំនៅដ្ឋាននៅទីក្រុងសេអ៊ូលបានធ្លាក់ចុះដល់កម្រិតអាក្រក់បំផុត បើទោះបីជាមានការរឹតត្បិតលើប្រាក់កម្ចីទិញផ្ទះ និងពន្ធអចលនទ្រព្យថ្មីក៏ដោយ។

រដ្ឋបាលរបស់លោកមូនបានប្រកាសនូវវិធានការណ៍ចំនួន ២៣ ដាច់ដោយឡែកពីគ្នា ដើម្បីធ្វើឱ្យតម្លៃផ្ទះស្ថិតក្នុងតម្លៃសមរម្យក្នុងរយៈពេល ៣ ឆ្នាំចុងក្រោយនេះ ប៉ុន្តែកំពុងប្រឈមនឹងការរិះគន់ថាវិធានការណ៍នេះកំពុងធ្វើឱ្យប៉ះពាល់ដល់អ្នកមិនសូវមានធនធាន។
ខាងក្រោមនេះជាគោលការណ៍ទីផ្សារអចលនទ្រព្យសំខាន់ៗ៖

ឆ្នាំ ២០១៧
នៅឆ្នាំ ២០១៧ រដ្ឋាភិបាលបានរឹតបន្តឹងការកំណត់ប្រាក់កម្ចីសម្រាប់អ្នកទិញផ្ទះរហូតដល់ ៤០ ភាគរយនៃតម្លៃលំនៅដ្ឋានពី ៧០ភាគរយជាដំណាក់កាលសម្រាប់លំនៅដ្ឋានភាគច្រើននៃទីក្រុងសេអ៊ូល និងជាយក្រុង។ ការសងបំណុលត្រូវបានកំណត់ត្រឹម ៤០ ភាគរយនៃប្រាក់ចំណូលប្រចាំឆ្នាំនៅក្នុងតំបន់ដែលបានជ្រើសរើស ធ្លាក់ចុះពី ៥០ ភាគរយ។ ពន្ធលើប្រាក់ចំណេញត្រូវបានកើនឡើង ១០ ភាគរយ ហើយអ្នក ដែលមានផ្ទះច្រើនជាង ៣ ត្រូវបង់ពន្ធ ២០ ភាគរយ។
កាលពីខែធ្នូឆ្នាំ ២០១៧ រដ្ឋាភិបាលបានប្រកាសផែនការកាត់បន្ថយពន្ធលើប្រាក់ចំណេញសម្រាប់ម្ចាស់ផ្ទះ ដែលចុះឈ្មោះខ្លួនឯង ជាអ្នកជួលដើម្បីបង្កើនការផ្គត់ផ្គង់ទីផ្សារ។

ឆ្នាំ ២០១៨
រដ្ឋាភិបាលបានកំណត់តំបន់ជាច្រើនទៀតនៃទីក្រុងសេអ៊ូល ជាតំបន់ ដែលត្រូវបានគេប៉ាន់ស្មានថានឹងត្រូវរឹតបន្តឹងលើច្បាប់បញ្ចាំអចលនទ្រព្យ និងបានប្រកាសផែនការតម្លើងអត្រាពន្ធលើកម្មសិទ្ធិលើអចលនទ្រព្យដែលមានតម្លៃជាង ៦០០ លានវ៉ុន (៥០១.០០០ ដុល្លារ) ហើយបានស្នើឱ្យមានការបន្ធូរបន្ថយការរឹតបន្តឹងនៅក្នុងសង្កាត់ពាណិជ្ជកម្មរបស់ក្រុងសេអ៊ូល ដើម្បីសាងសង់ផ្ទះបន្ថែមទៀត និងនឹងអភិវឌ្ឍដីសម្រាប់សាងសង់ផ្ទះថ្មីចំនួន ៣០០.០០០ ខ្នង។

ឆ្នាំ ២០១៩
រដ្ឋាភិបាលបានប្រកាសផែនការសាងសង់ទីក្រុងរណបថ្មីនៅជិតទីក្រុងសេអ៊ូលនៅឯតំបន់ Goyang និង Bucheon និងបានកំណត់តម្លៃលើការលក់ការអភិវឌ្ឍថ្មីនៅផ្នែកខ្លះនៃទីក្រុងសេអ៊ូល។
នៅក្នុងខែធ្នូរដ្ឋាភិបាលបានរឹតបន្តឹងច្បាប់ដាក់បញ្ចាំបន្ថែមទៀតសម្រាប់គេហដ្ឋាន ដែលមានតម្លៃខ្ពស់ និងបានហាមឃាត់ការផ្តល់ប្រាក់កម្ចីទិញផ្ទះដែលមានតម្លៃជាង ១,៥ ពាន់លានវ៉ុន (១,២៥ លានដុល្លារ) ។

ឆ្នាំ ២០២០
ក្រៅពីទីក្រុងសេអ៊ូល ខេត្ត Gyeonggi-do ដែលនៅព័ទ្ធជុំវិញរដ្ឋធានីត្រូវបានគេកំណត់ថាជា តំបន់ ដែលស្ថិតក្រោមច្បាប់រឹតត្បិតខ្ចីជាងមុន រួមទាំងការហាមឃាត់ប្រាក់កម្ចីលើទ្រព្យសម្បត្តិដែលមានតម្លៃជាង ១,៥ ពាន់លានវ៉ុន។ រដ្ឋាភិបាលក៏បានឱ្យដឹងផងដែរថា ខ្លួននឹងបង្កើនការប្រមូលពន្ធប្រាក់ចំណេញ និងពន្ធផ្សេងៗលើកម្មសិទ្ធិលើអចលនទ្រព្យសាជីវកម្ម។
នៅក្នុងវិធានការថ្មីបំផុតរបស់ខ្លួន រដ្ឋាភិបាលកាលពីថ្ងៃអង្គារ បានបញ្ជាក់ថា ខ្លួននឹងផ្គត់ផ្គង់ផ្ទះថ្មីជាង ១៣២,០០០ នៅក្នុងទីក្រុងសេអ៊ូលរហូតដល់ឆ្នាំ ២០២៨ ដោយបន្ធូរបន្ថយការកំណត់កម្ពស់ និងផ្លាស់ប្តូរទីតាំងយោធា និងអចលនទ្រព្យរដ្ឋផ្សេងទៀតទៅក្នុងតំបន់លំនៅដ្ឋាន៕