ដោយវុត្ថា

ព្រះវិហារ៖ ក្រុមហ៊ុនឆាយណាហ្គ្រេតខល បានបោះទុនអភិវឌ្ឍលើដីសម្បទានសេដ្ឋកិច្ចចំនួន ៥ ៨៧១ហ.ត ស្ថិតនៅក្នុងស្រុករវាង ខេត្តព្រះវិហារ ធ្វើការដាំដុះដំណាំកសិ-ឧស្សាហកម្ម ប្រភេទដំណាំសូត្រជាវត្ថុធាតុដើមប្រើប្រាស់ជាប្រយោជន៍សម្រាប់ផលិតសរសៃសូត្រធ្វើខ្សែពួរប្រើក្នុងកប៉ាល់ ផលិតបាវ ជាផលិតផលធន់នឹងទឹកប្រៃ ស្វិតជាប់បានល្អ។

តាមការចុះផ្សាយរបស់ក្រសួងកសិកម្ម រុក្ខាប្រមញ្ញ និងនេសាទនៅថ្ងៃទី ២៥ ខែមេសាឆ្នាំ ២០២០ នេះ ឱ្យដឹងថា
បច្ចុប្បន្នក្រុមហ៊ុនដាំបាន ១ ២០០ ហិកតា ក្នុងនោះដាំដំណាំសូត្រនេះបាន ១៨០ហិកតា ដោយប្រើប្រាស់កម្លាំងពលកម្មក្នុងស្រុកចំនួន ៨០នាក់ និងមួយចំនួយធំទៀតធ្វើការម៉ៅ (ជាចំការ និងគិតថ្ងៃ) និងជំនាញការចិន ៩នាក់។ នៅឆ្នាំ២០២១ គ្រោងនឹងបង្កើតរោងចក្រផលិតសរសៃសូត្រ និងកែច្នៃ ហើយពង្រីកផ្ទៃដីដាំដុះបន្ថែមដើម្បីបង្កើនបរិមាណបំពេញឲ្យតម្រូវការរោងចក្រ។

ក្រសួងបន្តថា ដំណាំសូត្រមានអាយុ ២ឆ្នាំអាចប្រមូលផលបាន ហើយក្នុង ១ឆ្នាំអាចប្រមូលផលបាន ៣ដង ហើយក្នុង១ហ.ត អាចផ្តល់ផល ២៥-៣០តោន ក្នុង៣០ តោនអាចផលិតបានសរសៃសូត្របាន ៣តោន ហើយក្នុង ១តោនសរសៃសូត្រមានតម្លៃ ១៥០០-២០០០ដុល្លារ។ វាជាប្រភេទដំណាំងាយដាំ មិនរើសដី ត្រូវ ការទឹកតិច ធន់នឹងអាកាសធាតុក្តៅ និងផ្តល់ទិន្នផលខ្ពស់។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានកោតសរសើរ និងលើកទឹកចិត្តដល់ក្រុមហ៊ុនឲ្យខិតខំពង្រីកផ្ទៃដីដាំដុះតាមផែនការដែលបានគ្រោងទុក និងបង្កើតរោងចក្រផលិត និងកែច្នៃឲ្យបានទាន់ពេលដើម្បីចូលរួមអភិវឌ្ឍតំបន់នេះឲ្យក្លាយជាតំបន់ឧស្សាហកម្មសរសៃសូត្រនាពេលអនាគត និងជាពិសេសបង្កើតការងារ និងប្រើប្រាស់ពលកម្មនៅមូលដ្ឋាននេះឲ្យអស់លទ្ធភាព។

លោករដ្ឋមន្ត្រីបានណែនាំឲ្យក្រុមហ៊ុនយកចិត្តទុកដាក់អំពីសុខភាព ជីវភាពប្រចាំថ្ងៃ និងចំណូលគ្រួសារ របស់កម្មករដែលបម្រើការឲ្យក្រុមហ៊ុនទាំងអ្នកធ្វើការពេញម៉ោង និងក្រៅម៉ោង ដើម្បីរក្សាភាពឈ្នះ-ឈ្នះ រវាងនិយោជក និងនិយោជិក ក្នុងកាល:ទេស:ដែលយើងកំពុងជួបវិបត្តិជំងឺឆ្លងសកលកូវីដ-១៩។

លោកបញ្ជាក់ទៀតថា ក្រុមហ៊ុនត្រូវសហការឲ្យបានពេញលេញ ជាមួយរដ្ឋបាលព្រៃឈើ មន្ទីរកសិកម្ម រុក្ខាប្រមាញ់ និងនេសាទខេត្ត និងអាជ្ញាធរមូលដ្ឋានដើម្បីអនុវត្តច្បាប់ គោលការណ៍ណែនាំ ផែនការអភិវឌ្ឍ របស់រាជរដ្ឋាភិបាល ក្រសួងកសិកម្ម រុក្ខាប្រមាញ់ និងនេសាទ ធ្វើយ៉ាងណាប្រើប្រាស់ធនធានដីនេះឲ្យអស់សក្តានុពល មានប្រសិទ្ធភាពទាំងសង្គម និងសេដ្ឋកិច្ច៕

ដោយ ៖ រ៉ាណេត

ភ្នំពេញ ៖ ក្រុមហ៊ុន យក្សចិនចំនួន២ ដែលមានជំនាញ និងឯកទេសកំពូលផ្នែកសាងសាង់សំណង់ CCCC និងក្រុមហ៊ុនជំនាញកំពូលផ្នែកបច្ចេកវិទ្យាទូរគមនាគមន៍នាសម័យចុងក្រោយនៅលើពិភពលោក ដែលកំពុងមានវត្តមាន និងវិនិយោគលើគម្រោងធំមួយចំនួននៅកម្ពុជារួចទៅហើយនោះ បានបង្ហាញ ពីឆន្ទៈ និងផែនការអភិវឌ្ឍន៍លើវិស័យសំខាន់ៗជាច្រើនរបស់ខ្លួនបន្ថែមទៀត។

នៅក្នុងកិច្ចជំនួបពិភាក្សាការងារជាមួយរដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត នៅទីស្ដីការក្រសួងកាលពីល្ងាំចថ្ងៃទី២៤ ខែមេសា ឆ្នាំ២០២០ លោក Yuya Yao នាយកប្រតិបត្តិក្រុមហ៊ុន Hauwei បានបង្ហាញពីភាពរីករាយដែលបានសហការវិនិយោគនៅកម្ពុជា ។

លោកបានបញ្ជាក់ផងដែរថា នៅពេលបច្ចុប្បន្ននេះ និងបន្តទៅថ្ងៃអនាគត ក្រុមហ៊ុន Hauwei មានផែនការ និងគម្រោងអភិវឌ្ឍន៍ទៅលើហេដ្ឋារចនាសម្ព័ន្ធទូរគមនាគមន៍នៅកម្ពុជាជាច្រើនថែមទៀត ជាមួយការជឿជាក់ទទួលបានភាពជោគជ័យក្នុងអត្រាកម្រិតខ្ពស់បំផុត ។

ដោយឡែក លោក Zhan Jinsheng នាយក ប្រតិបត្តិ ក្រុមហ៊ុន CCCC (China Communications Constructions Company ) ដែលជាក្រុមហ៊ុនដ៏ធំកំពុងមានដំណើរការប្រតិបត្តិការទៅលើគម្រោងសាងសាង់ហេដ្ឋារចនាសម្ព័ន្ឌធំៗ និងសំខាន់ៗនៅកម្ពុជាបានលើកឡើងថា បទពិសោធន៍ការងារជាង ១២០ ឆ្នាំរបស់ក្រុមហ៊ុន CCCC ដែលបានបង្កើតតាំងពីឆ្នាំ១៨៩៧ និងបានចុះបញ្ជីលក់ភាគហ៊ុននៅផ្សារមូលបត្រក្រុងសៀងហៃ និងហុងកុង។ លោកបានបន្តថា ក្រុមហ៊ុន CCCC ជាក្រុមហ៊ុនធំជាងគេក្នុងពិភពលោកផ្នែកសំណង់ហេដ្ឋារចនាសម្ព័ន្ធ កំពង់ផែ ផ្លូវ ស្ពាន រួមបញ្ចូលទាំងស្ពានឆ្លងសមុទ្រវែងជាងគេលើពិភាពលោកភ្ជាប់ពីទីក្រុងហុងកុងទៅម៉ាកាវ។ ក្រុមហ៊ុនបានដើរតួនាទីសំខាន់ក្នុងការគាំទ្រគម្រោងខ្សែក្រវ៉ាត និងផ្លូវ (Project in Belt and Road) របស់ប្រទេសចិន។

រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត បានជម្រាបជូនក្រុមហ៊ុនអំពីការងារអាទិភាពរបស់ក្រសួងក្នុងការអភិវឌ្ឍហេដ្ឋារចនាសម្ព័ន្ធទូរគមនាគមន៍ឱ្យកាន់តែល្អទាំងគុណភាព វិសាលភាព និងថ្លៃសេវា ដែលមានជាអាទិ៍ ហេដ្ឋារចនាសម្ព័ន្ធបណ្តាញខ្សែកាប្លិ៍អុបទិកក្រោមបាតសមុទ្រ (submarine cable), បណ្តាញខ្សែកាប្លិ៍អុបទិកឆ្អឹងខ្នង (Backbone network), បណ្តាញខ្សែកាប្លិ៍អុបទិកចែកចាយ (Access Network), និងមាត់ច្រកអ៊ីនធឺណេតអន្តរជាតិ (International Internet Gateway) ជាដើម។

លោករដ្ឋមន្ត្រីបានសង្កត់ធ្ងន់ថាការគ្រប់គ្រងលើប្រតិបត្តិការហេដ្ឋារចនាសម្ព័ន្ធទូរគមនាគមន៍ជាចំណុចគន្លឹះមួយមិនត្រឹមតែសម្រាប់ការប្រកួតប្រជែងផ្នែកសេដ្ឋកិច្ចប៉ុណ្ណោះទេ ប៉ុន្តែរួមបញ្ចូលនូវផ្នែកសន្តិសុខជាតិ និងការប្រជែងឥទ្ធិពលភូមិសាស្រ្តនយោបាយផងដែរ។

ជាមួយគ្នានេះ លោកបានជំរុញដល់ក្រុមហ៊ុនទាំងពីរឱ្យបន្ថែមការវិនិយោគ និងសហការគ្នាកសាងហេដ្ឋារចនាសម្ព័ន្ធទូរគមនាគមន៍នៅកម្ពុជាឱ្យកាន់តែទូលំទូលាយដើម្បីជាមូលដ្ឋានរឹងមាំមួយក្នុងការកាត់បន្ថយគន្លាតឌីជីថល និងការនាំយកកម្ពុជាចូលទៅក្នុងយុគ្គសម័យបដិវត្តន៍ឧស្សាហកម្មទី៤៕

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា បាន និងកំពុងពិចារណាក្នុងការបែងចែកនូវចំណែកតំបន់ ដោយជ្រើសយកខេត្តដែលមានសក្ដានុពល និងអាទិភាពចាត់បញ្ចូលទៅក្នុងផ្នែកសំខាន់ៗចំនួន៤ ដើម្បីធ្វើពិពិធកម្ម និងបង្កើនលទ្ធភាពក្នុងការជំរុញកំណើនសេដ្ឋកិច្ចជាតិតាមរយៈការអនុវត្តបែបបច្ចេកវិទ្យា វិទ្យាសាស្ត្រ និងនវានុវត្តន៍។

រដ្ឋលេខាធិការក្រសួងឧស្សាហកម្ម បច្ចេកទេស វិទ្យាសាស្ត្រ និងនវានុវត្តន៍ លោក ហេង សុខគង់ បានមានប្រសាសន៍នៅក្នុងពិធីសន្និសីទសារព័ត៌មានស្ដីពីវឌ្ឍនភាព និងអនុវត្តទិសដៅបន្ត នៅទីស្ដីការគណៈរដ្ឋមន្ត្រីកាលពីពេលកន្លងទៅថ្មីៗនេះថា បច្ចុប្បន្ន កម្ពុជាកំពុងតែសិក្សាយ៉ាងលម្អិតទៅលើការកំណត់ និងសម្រេចជ្រើសយកខេត្តមួយចំនួនដាក់ជាតំបន់ពិសេសក្នុងការបង្កើនលទ្ធភាព និងអភិវឌ្ឍន៍ ស្របតាមយុគសម័យជំនាន់ទី៤ ដោយបច្ចេកទេសទំនើបសម័យឌីជីថល។

លោក ហេង សុខគង់ បានមានប្រសាសន៍ថា “យើងក៏មានការរៀបចំជាតំបន់នៅតាមបណ្តាខេត្តមួយចំនួននៅទូទាំងប្រទេស ពីព្រោះយើងមិនអាចអភិវឌ្ឍន៍បច្ចេកវិទ្យា វិទ្យាសាស្ត្រ ទៅគ្រប់ទាំង២៥ខេត្តក្រុងព្រមគ្នាតែម្ដងនោះទេ”។ លោកបានបន្តទៀតថា “យើងនឹងពិនិត្យទៅលើសក្ដានុពលនៃខេត្តណាដែលមានអាទិភាពគួរធ្វើមុនគេ ហើយខេត្តណាដែលយើងគួរដាក់ជាសួនវិទ្យាសាស្ត្រ ខេត្តណាស័ក្ដិសមជាសួនឧស្សាហកម្ម ខេត្តណាស័ក្ដិសមជាសួននវានុវត្តន៍ ខេត្តណាស័ក្ដិសមជាសួនឌីជីថល ដែលសុទ្ធតែស្ថិតនៅក្នុងការគិតពិចារណានៃការបែងចែកទាំងអស់” ។

លោក ហេង សុខគង់ បានមានប្រសាសន៍បន្តទៀតថា “ខេត្តព្រះសីហនុ ច្បាស់ណាស់ថានឹងមានអាទិភាពមុនគេ ដោយសារតែខេត្តនេះស្ថិតនៅក្រោមគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ ប៉ុន្តែយើងមានការបែចែកជាតំបន់ មានន័យថា មិនមែនមានតែខេត្តមួយនេះទេ ពោលគឺមានការជ្រើសរើសចាប់ពី៤ខេត្ត ឬ៥ខេត្ត ហើយនឹងត្រូវរៀបចំជាមួយប្លុក ជាតំបន់សហគ្រាសធុនតូច និងមធ្យម (SME Zoon) ដូចជា ខេត្តកំពង់ចាម ត្បូងឃ្មុំ ដែលសម្បូរដោយចំការកៅស៊ូ ខេត្តកណ្តាល កំពង់ឆ្នាំង បាត់ដំបង និងខេត្តបន្ទាយមានជ័យ សម្បូរទៅដោយដំណាំស្រូវ ថាតើគួរធ្វើតំបន់ទាំងនេះយ៉ាងណា ដើម្បីជួយលើកកម្ពស់ខ្សែសង្វាក់ផលិតកម្មឱ្យកាន់តែវែង អាចកែច្នៃក្នុងការផលិតឱ្យអស់លទ្ធភាព ដែលទទួលបានចំណេញកាន់តែខ្ពស់ អាចធានាបាននូវវឌ្ឍនភាពនៃភាពរកចម្រើនរបស់កម្ពុជាទៅថ្ងៃអនាគត់”។

ជាមួយនឹងការលើកឡើងពីគម្រោងនៃការជ្រើសរើសបណ្តាខេត្តនានានៅទូទាំងប្រទេស កម្ពុជាក៏មានគម្រោងកែប្រែវិស័យឧស្សាហកម្ម ជាពិសេសវិស័យរោងចក្រឱ្យក្លាយទៅជាបែបទំនើបកម្ម (Smarty Factory) ស្របតាមយុគសម័យជំនាន់ទី៤ ដែលរាល់ដំណើរដោយសង្វាក់ផលិតកម្ម ប្រាកដទទួលបាននូវគុណភាព សុវត្ថិភាព និងបរិស្ថានល្អ នៅក្នុងរោងចក្រមានពន្លឺ និងខ្យល់ចេញចូលគ្រប់គ្រាន់ មិនប៉ះពាល់ដល់បុគ្គលិក កម្មករ មានហានិភ័យតិច លទ្ធភាពផលិតមានសមត្ថភាពខ្ពស់។

ដោយវុត្ថា

ភ្នំពេញ៖ រដ្ឋាភិបាលចិនតាមរយៈក្រសួងការពារជាតិសធារណៈមានិតចិនបានបន្តផ្តល់ជំនួយជាសម្ភារៈវិជ្ជសាស្ត្រចំនួន ១១ មុខ ស្មើនឹង ១៦ តោនសម្រាប់ប្រយុទ្ធប្រឆាំងជំងឺកូវីដ ១៩ នៅក្នុងប្រទេសកម្ពុជា ខណៈជំងឺមួយនេះ បាននឹងកំពុងរាតត្បាត និងកំពុងព្រួយបារម្ភជាសកល។

លោក ស៊ុ សុជាតិ អ្នកនាំពាក្យក្រសួងការពារជាតិកម្ពុជានៅបានប្រាប់អ្នកសារព័ត៌មានក្រោយពិធីប្រគល់-ទទួលនូវជំនួយនាថ្ងៃទី ២៥ ខែមេសា ឆ្នាំ ២០២០ នៅឯព្រលានយន្តហោះអន្តរជាតិកម្ពុជាអន្តរជាតិភ្នំពេញឱ្យដឹងថា រហូតមកដលពេលនេះ ភាគីចិនតាមរយៈក្រសួការពារជាតិនៃប្រទេសចិនមកដល់ភាគីកម្ពុជាចំនួន ៣ លើកចាប់តាំងពីខែមីនាកន្លងមកនេះ មានទាំងអ្នកជំនាញព្យាបាលជំងឺកូវីដ ១៩ ចំនួន ៤ រូបផងដែ។

លោកបន្តថា ជំនួយទាំងនេះ មានសំខាន់ខ្លាំងណាស់ក្នុងការប្រយុទ្ធប្រឆាំជំងឺកូវីដ ១៩ ដែលកំពុងកើតមាននៅក្នុងប្រទេសកម្ពុជា ហើយការផ្តល់ជំនួយរបស់ភាគីចិនមកដល់កម្ពុជាបានឆ្លុះបញ្ចាំងពីចំណងមិត្តភាពរវាងកម្ពុជា-ចិន ដែលមានទំនាក់ទំនងគ្រប់ជ្រុងជ្រោយ។
លោកបន្ថែមទៀតថា ម្យ៉ាងវាបានឆ្លុះបញ្ចាំនូវ ជាទឹកចិត្តនៃកងទ័ពរបស់ប្រទេសចិន មកលើកងទ័ពកម្ពុជាក្នុងការប្រយុទ្ធប្រឆាំងជំងឺកូវីដ ១៩ នៅក្នុងប្រទេសកម្ពុជាផងដែរ។

តំណាងកងទ័ពនៃប្រទេសចិន បានឱ្យដឹងថា ការផ្តល់ជំនួយជាសម្ភារៈជាវិជ្ជសាស្ត្រដល់កងទ័ពកម្ពុជានាពេលនេះ គឺ ដោយសារតែកម្ពុជា-ចិនមានទំនាក់ទំនងយ៉ាងស៊ីជម្រៅរវាងថ្នាក់ដឹកនាំនៃប្រទេសទាំងពីរ។ លោកបន្តថា ប្រទេសទាំងពីរមានការជួយគ្នាទៅវិញមក ក្នុងគ្រាដែលលំបាក មិនត្រឹមតែប៉ុណ្ណោះប្រទេសកម្ពុជា និងចិនជាបងប្អូន និងមិត្ដដែកថែប ដែលមិនខ្វះគ្នា។

លោកបន្ថែមទៀតថាចាប់តាំងពីមានការផ្ទុះឡើងនូវជំងឺកូវីដ ១៩ មក ប្រទេសទាំងពីរតែងតែមានទំនាក់ទំនងគ្នាយ៉ាងល្អប្រសើរនិងជួយគ្នាទៅវិញមក ក្រោមការដឹកនាំនៃប្រទេសទាំងពីរ។

រដ្ឋាភិបាលចិនចាប់តាំងពីមានកាផ្ទុះឡើងនូវជំងឺកូវីដ ១៩ មិនត្រឹមតែផ្តល់ជំនួសជាសម្ភារៈវិជ្ជសាស្ត្រជូនដល់ក្រសួងការពារជាតិកម្ពុជានោះទេ ថែមទាំងបានផ្តល់ជំនួសជាសម្ភារៈជាច្រើនតោនដល់ក្រសួងសុខាភិបាល និងស្ថាប័នរដ្ឋនានាដើម្បីចូលរួមទប់ស្កាត់ ការរីករាលដាលនូវជំងឺកូវីដ ១៩ នៅក្នុងប្រតេសកម្ពុជា៕

ដោយវុត្ថា

ភ្នំពេញៈ មន្ត្រីជាន់ខ្ពស់នៃក្រសួងរ៉ែ និងថាមពលបានឱ្យដឹងថា ក្រសួងបាននឹងកំពុងដាក់ឱ្យមានការដេញថ្លៃ នូវគម្រោងវិនិយោគថាមពលអគ្គិសនី ដើរដោយពន្លឺព្រះអាទិ​ត្យថ្មីមួយ (Solar Energy System) ក្នុងទំហំ៤០មេហ្គាវ៉ាត់មួយកន្លែង នៅក្នុងខេត្តកំពង់ឆ្នាំង ទោះកម្ពុជាកំពុងប្រឈមនូវផលប៉ះពាល់ នៃការរីករាលនៃជំងឺកូវីដ១៩ក៏ដោយ។

លោកវិចទ័រ ហ្សូនា អគ្គនាយកនៃអគ្គនាយកដ្ឋានថាមពល បានប្រាប់គេហទំព័រ propertyarea.asia កាលពីកន្លងមកថ្មីៗនេះថា កម្ពុជាកំពុងដាក់ឱ្យមានការដេញថ្លៃគម្រោងវិនិយោគ ប្រព័ន្ធថាមពលពន្លឺព្រះអាទិត្យសូឡា នៅក្នុងខេត្តកំពង់ឆ្នាំង តែរហូតមកដល់ពេលនេះ មិនទាន់ដឹងពីទំហំនៃការដេញថ្លៃនៅឡើយទេ ព្រោះវាងអាស្រ័យលើកការដាក់តម្លៃដែលលក់អោយអាជ្ញាធរអគ្គិសនីកម្ពុជា(EDC) ។

លោកបន្តថា “គម្រោងវិនិយោគនេះ មានទំហំប្រមាណ៤០មេហ្គាវ៉ាត់ រួមជាមួយដីខ្លួនឯង និងខ្សែភ្លើង បូករួមទាំងអស់ ហេដ្ឋារចនាសម្ព័ន្ធល្អអាចថា មានតម្លៃខ្ពស់ជាងប្រ​មាណ៣,៨០សេនដុល្លារក្នុងមួយគីឡូវ៉ាត់ម៉ោងក្នុងការដាក់ដេញថ្លៃ”។

រដ្ឋាភិបាលបាននឹងកំពុងយកចិត្ដទុកដាក់យ៉ាងខ្លាំង លើបញ្ហាអគ្គិសនីនាពេលបច្ចុប្បន្ននេះ ខណៈដែលពេលកន្លងមកនេះ កម្ពុជាបានជួបប្រទះនូវបញ្ហាខ្វះខាតការផ្គត់ផ្គង់ ដោយសារការប្រើប្រាស់មានការកើនឡើង រួមជាមួយនឹងការរីងហួតអាងទឹកវារីអគ្គិសនីជាដើម ដែលបានធ្វើឲ្យអគ្គិសនីកម្ពុជា សម្រេចធ្វើការដាច់ផ្ដាច់ចរន្ដអគ្គិសនីពីតំបន់មួយទៅផ្គត់ផ្គង់តំបន់មួយ ដើម្បីចែករំលែកនៃការប្រើប្រាស់។

យ៉ាងណាក៏ដោយ រដ្ឋាបាលកម្ពុជាបានសន្យាថា នឹងមិនឲ្យមានបញ្ហាទាំងនេះកើតឡើងម្ដងទៀតឡើយចាប់ពីឆ្នាំ២០២០តទៅ ដោយរដ្ឋាភិបាលបានលើកទឹកចិត្ដដល់ក្រុមហ៊ុននានា ធ្វើការវិនិយោគលើការផលិតថាពលអគ្គិសនីទាំងវារីអគ្គិសនី ស្ថានីផលិតថាពលដើរដោយពន្លឺព្រះអាទិត្រ ធ្យូថ្ម ក៏ដូចជាទិញនូវម៉ាស៊ីនភ្លើងខ្នាតយក្សផងដែរ ដើម្បីធានាឲ្យបាននូវការផ្គត់ផ្គង់នេះ។

បើតាមលោក វិចទ័រ ហ្សូនា នៅក្នុងដើមឆ្នាំ ២០២០នេះ រដ្ឋាភិបាលបានអនុម័តគម្រោងវិនិយោគ លើការសាងសង់រោងចក្រអគ្គិសនីថ្មីចំនួន៣ ដែលមានទុនវិនិយោគប្រមាណ១,៧០០លានដុល្លារ រួមមាន ទី១ គម្រោងរោងចក្រអគ្គិសនីដុតធ្យូងថ្ម២៦៥មេហ្កាវ៉ាត់ នៅស្រុកត្រពាំងប្រាសាទ ខេត្តឧត្តរមានជ័យ។

ទី២ គម្រោងខ្សែបណ្ដាញ២៣០គីឡូវ៉ុល ភ្ជាប់ពីរោងចក្រអគ្គិសនី ស្រុកត្រពាំងប្រាសាទ មកអនុស្ថានីយខាងកើតសៀមរាប និងទី៣ គម្រោងរោងចក្រអគ្គិសនីដុតធ្យូងថ្ម អានុភាព៧០០មេហ្កាវ៉ាត់នៅស្រុកបុទុមសាគរ ខេត្តកោះកុង។

រដ្ឋាភិបាលបញ្ជាក់ថា ការអនុញ្ញាតឱ្យមានការវិនិយោគ លើវិស័យអគ្គិសនីយ៍នេះបន្ថែមទៅក្នុងផែនការមេឆ្នាំ២០២០ ដល់ឆ្នាំ២០៣០ ដើម្បីបំពេញឲ្យបានគ្រប់គ្រាន់នូវប្រភពអគ្គិសនី សម្រាប់ផ្គត់ផ្គង់ឲ្យសេចក្តីត្រូវការអគ្គិសនីពីឆ្នាំ២០២១ ដល់ឆ្នាំ២០២៤៕