កម្ពុជាទទួលបានគម្រោងវិនិយោគ ១៥ តម្លៃជិត ២២៦ លានដុល្លារតាំងពីដើមខែនេះ

ដោយ ប៊ី

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានចេញវិញ្ញាបនបត្រចុះបញ្ជីចុងក្រោយដល់គម្រោងវិនិយោគចំនួន ១៥ ចាប់តាំងពីថ្ងៃទី ២ ខែមេសាដែលមានទឹកប្រាក់សរុប ២២៥.៥ លានដុល្លារ ហើយដែលរំពឹងថានឹងបង្កើតការងារបាន ៧៦២០ កន្លែង។

គម្រោងនេះគ្របដណ្តប់លើវិស័យជាច្រើនដូចជាសម្លៀកបំពាក់ ផ្លាស្ទិច ដែក ម្សៅ និងដំឡូងមីកែច្នៃ ផលិតនិងដំឡើងបន្ទះសូឡា កសិដ្ឋានចេក សណ្ឋាគារលំដាប់ផ្កាយ ៣ និងមន្ទីរពេទ្យ។

គម្រោងចំណាយថវិកា ៩៦.១ លានដុល្លាររបស់ក្រុមហ៊ុន Sing-Specialists Medical Centre ជាមន្ទីរពេទ្យគ្រែ ៥០ នៅលើផ្លូវលេខ ៨១ ក្នុងសង្កាត់បឹងរាំង ១០ ក្នុងខណ្ឌដូនពេញរាជធានីភ្នំពេញ។

គម្រោងទឹកប្រាក់ ៥៩,២ លានដុល្លាររបស់ក្រុមហ៊ុន Xigangyihao International Investment ជាសណ្ឋាគារលំដាប់ផ្កាយ ៣ ដែលមាន ៧១០ បន្ទប់ ស្ថិតនៅក្នុងភូមិសង្កាត់លេខ ៣ ក្នុងក្រុងព្រះសីហនុខេត្តព្រះសីហនុ។

គម្រោងទឹកប្រាក់ ១៦,៧ លានដុល្លាររបស់ក្រុមហ៊ុន Hong De Sheng ជារោងចក្រកែច្នៃដែកនៅក្នុងភូមិត្រពាំងក្រសាំង ឃុំត្រពាំងក្រសាំង ក្នុងស្រុកឧដុង្គ ខេត្តកំពង់ស្ពឺ។

គម្រោងផ្សេងទៀតរួមមានគម្រោងចម្ការចេក ១២,៣ លានដុល្លាររបស់ក្រុមហ៊ុន Yql (Cambodia) Investment ស្ថិតនៅក្នុងភូមិបឹងកេតឃុំបឹងកេតក្នុងស្រុកស្ទឹងត្រង់ខេត្តកំពង់ចាម រោងចក្រកែច្នៃដំឡូងមី ១០.៤ លានដុល្លាររបស់ក្រុមហ៊ុន Shine Hanuman Trading នៅភូមិភ្នំបេងឃុំបឹង ស្រុកម៉ាឡៃខេត្តបន្ទាយមានជ័យ និងរោងចក្រ Jintek Cells Technology ដែលមានទឹកប្រាក់ ៧.៧ លានដុល្លារផលិតនិងតំឡើងបន្ទះសូឡានៅក្នុងភូមិព្រៃសាឡា សង្កាត់ព្រៃកាឡា ២ ក្នុងខណ្ឌពោធិសែនជ័យ។

CDC បានយល់ព្រមលើគម្រោងចំនួន ៤០ ដែលមានតម្លៃ ៩០០ លានដុល្លារក្នុងរយៈពេល ៣ ខែដំបូងនៃឆ្នាំនេះ។
គម្រោងទាំងនេះគ្របដណ្តប់លើវិស័យជាច្រើនដូចជាសម្លៀកបំពាក់ ស្បែកជើង និងផលិតផលធ្វើដំណើរគ្រឿងសង្ហារិម ឧបករណ៍ផ្ទះបាយ ឧបករណ៍អគ្គិសនី សណ្ឋាគារ និងផ្សារទំនើបជាដើម៕

សម្តេចតេជោស្នើឱ្យអាស៊ានលុបបំបាត់របាំងមិនមែនពន្ធ និង បង្កើនកិច្ចសម្របសម្រួលពាណិច្ជកម្ម ក្រោយចប់ Covid-19

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បាន្នសើដល់ អាស៊ាន ត្រូវតែគិតគូរជាយុទ្ធសាស្ត្រ ក្នុងការស្តារនិងជំរុញការងើបឡើងវិញនូវកំណើនសេដ្ឋកិច្ច បន្ទាប់ពីវិបត្តិ Covid-19 ត្រូវបានបញ្ចប់ ។

សម្តេចតេជោ ថ្លែងនៅក្នុងពិធី បើកកិច្ចប្រជុំពិសេសស្តីពីបញ្ហាបង្កឡើងដោយជំងឺកូវីដ-១៩ តាមរយៈប្រព័ន្ធវីដេអូពីចម្ងាយ (Video Conference)នៅថ្ងៃទី ១៤ ខែមេសា ឆ្នាំ ២០២០ នេះ បានបញ្ជាក់ថា
អាស៊ានត្រូវពន្លឿនការអនុវត្តផែនការ និងយុទ្ធសាស្ត្រនានាដែលមានស្រាប់ ឱ្យបានលឿន ក៏ដូចជា ជំរុញការធ្វើសមាហរណកម្មសេដ្ឋកិច្ចតំបន់ លុបបំបាត់របាំងមិនមែនពន្ធ និង បង្កើនកិច្ចសម្របសម្រួលពាណិច្ជកម្ម ។

សម្តេចតេបន្ថែមទៀថា “យើងក៏ត្រូជំរុញការអនុវត្តគំនិតផ្តួចផ្តើមនានា សម្រាប់សមាហរណកម្មអាស៊ាន ដោយផ្តោតលើ ១) ការលើកកម្ពស់សហគ្រាសមីក្រូ តូច និងមធ្យម (MSMEs) និង ការបង្កើនធុរកិច្ចថ្មីផ្អែកលើនវានុវត្តន៍បច្ចេកវិទ្យា (Start-up) ២) ការលើកកម្ពស់កិច្ចសហបការរវាងវិស័យឯកជន និងសាធារណៈ ក្នុងក្របខណ្ឌសេដ្ឋកិច្ចឌីជីថល និង ៣) ការអភិវឌ្ឍធនធានមនុស្ស និងជំនាញវិជ្ជាជីវៈឌីជីថល”។

សម្តេចតេជោ ហ៊ុន សែន នាយករដ្ឋមន្ត្រនៃកម្ពុជា និងមេដឹកនាំអាស៊ានដទៃទៀតនៅក្នុងកិច្ចកិច្ចប្រជុំពិសេសស្តីពីបញ្ហាបង្កឡើងដោយជំងឺកូវីដ-១៩ នៅក្នុងតំបន់ និងពិភពលោក បានពិភាគ្សាជុំវិញការបង្កា និងទប់ស្កាត់នៃប្រទេសនីមួយៗ ព្រមទាំងស្វែងរកយុទ្ធសាស្ត្រថ្មីបន្ថែមទៀត ដើម្បីលើកកម្ពស់សេដ្ឋកិច្ចនៅក្នុងតំបន់ ខណដែលប្រទេសនានាបានជួបឱនភាពលើវិស័យសេដ្ឋកិច្ចដែលបង្កឡើងដោយជំងឺ Covid-19 .

ក្រៅពីការជួបប្រជុំកំពូលពិសេសរវាងមេដឹកនាំអាស៊ានហើយនោះ មេដឹកនាំអាស៊ានទាំង១០ ក៏នឹងបើកកិច្ចប្រជុំកំពូលពិសេសជាមួយ មេដឹកនាំដឹកនាំដៃគូអាស៊ាន៣ផ្សេងទៀត រួមមាន៖ ចិន ជប៉ុន និងកូរ៉េខាងត្បូង។ កិច្ចប្រជុំកំពូលអាស៊ានបូក៣នេះ ក៏នឹងជជែកផ្តោតជាសំខាន់ទៅលើបញ្ហាបង្កឡើងដោយជំងឺកូវីដ-១៩ផងដែរ៕

ADB ផ្តល់កញ្ចប់ថវិកា ២០ពាន់លានដុល្លារ បន្ថែមដល់ប្រទេសជាសមាជិកសម្រាប់ទ្រទ្រង់សេដ្ឋកិច្ច

ដោយ ហ្សូលិ

ភ្នំពេញ៖ ធនាគារអភិវឌ្ឍអាស៊ី ADB សម្រេចផ្តល់កញ្ចប់ថវិការសង្គ្រោះបន្ថែមចំនួន ២០ពាន់លានដុល្លារ ដល់ប្រទេសជាសមាជិក ក្នុងនោះក៏មានប្រទេសកម្ពុជាផងដែរនោះ គឺដើម្បីទប់ទល់សេដ្ឋកិច្ចដែលបណ្តាលមកពីវិបត្តិជំងឺឆ្លង Covid-19។ នេះបើតាមសេចក្តីប្រកាសរបស់ធនាគារអភិវឌ្ឍអាស៊ី នៅថ្ងៃទី ១៣ ខែមេសា ឆ្នាំ ២០២០នេះ។

កញ្ចប់ថវិការសម្រាប់សង្ក្រោះប្រទេសនេះគឺចាប់ផ្តើមអនុម័តរយៈពេល១ខែហើយ តែធនាគារអភិវឌ្ឍអាស៊ីបានសម្រេចបង្កើនតួលេខថវិការកាន់តែច្រើនប៉ុណ្ណោះ។ សេដ្ឋកិច្ចសកលោកជួបវិបត្តិកាន់តែខ្លាំងដោយសារតែបុគ្គលិកនៅតាមស្ថាប័ន ក្រុមហ៊ុន រោងចក្រ សហគ្រាស មួយចំនួនត្រូវបង្ខំចិត្តឱ្យនៅផ្ទះហើយ អ្នកខ្លះឈានដល់ភាពគ្មានការងារធ្ចើ។

ប្រធានធនាគារអភិវឌ្ឍអាស៊ី លោក Masatsugu Asakawa បានមានប្រសាសន៍នៅក្នុងវីដេអូថា ទំហំនិងតួលេខនៃវិបត្តិនេះគឺជាភាពចាំបាច់សំខាន់បំផុតដែល ADB ត្រូវពង្រីកការគាំទ្រកាន់តែច្រើន។ ទឹកប្រាក់ដល់ទៅ ១៣ ពាន់លានដុល្លារស្ថិតក្នុងកម្ចីឥណទានដែលអនុញ្ញាតឱ្យសមាជិកប្រទេសទាំងអស់ខ្ចីក្នុងការទប់ទល់និងជំងឺ ហើយ២ពាន់លានដុល្លារផ្សេងទៀតគឺសម្រាប់ជួយដល់វិស័យឯកជន។

សមាជិកនៃធនាគារអភិវឌ្ឍអាស៊ីមានប្រមាណ ៦៧ ប្រទេស មកពីគ្រប់តំបន់នៅជុំវិញពិភពលោក មានដូចជា កម្ពុជា មីយ៉ាន់ម៉ា បង់ក្លាដេស ឥណ្ឌា ហុងកុង ចិន ឡាវ ម់ាឡេស៊ី និងបណ្តារប្រទេសជាច្រើនទៀត។

ធនាគារអភិវឌ្ឍអាស៊ីបានព្រមានកាលពីដើមខែនេះថា វិបត្តិជំងឺឆ្លង Covid-19 នេះនឹងបង្កឱ្យខាតបង់សេដ្ឋកិច្ចដល់ទៅ ៤ទ្រីលានដុល្លារ មិនថាទ្វីបអាមេរិក ទ្វីបអ៉ឺរ៉ុប និងតំបន់អាស៊ី នោះទេ។ ផ្សារហ៊ុនកបានធ្លាក់ចុះនៅក្នុងរយៈពេលយូរ ដោយរដ្ឋាភិបាលនិងធនាគារកណ្តាលនាំគ្នាលូកដៃចូលដើម្បីបន្ធូរបន្ថយការឈឺចាប់នេះ កុំឱ្យកាន់តែមានភាពលំបាកជាងនេះ៕

(Reuters)

សម្តេចតេជោគាំទ្រឱ្យមានការបង្កើតមូលនិធិប្រយុទ្ធប្រឆាំង Covid-19 ក្នុងកម្រិតអាស៊ាន

ដោយ ៖ រ៉ាណេត

ភ្នំពេញ ៖ ប្រមុខរាជរដ្ឋាភិបាល សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញពីការវាយតម្លៃខ្ពស់ និងឯកភាពក្នុងការបង្កើតមូលនិធិអាស៊ានសម្រាប់ឆ្លើយតបទៅនឹងជំងឺ Covid-19 ដើម្បីឆ្លើយតបទៅនឹងតម្រូវការចាំបាច់នានា រួមមានក្នុងផ្នែកបរិក្ខារ និងផ្នែកសុខាភិបាលជាដើម។

នៅក្នុងកិច្ចប្រជុំកំពូលអាស៊ានពិសេស ស្ដីពីជំងឺ Covid-19 កាលពីព្រឹកថ្ងៃទី១៤ ខែមេសា ឆ្នាំ២០២០នេះ សម្ដេចតេជោ ហ៊ុន សែន បានមានប្រសាសន៍ថា ការប្រយុទ្ធនឹងជំងឺ Covid-19 នេះ គឺមិនអាចដោះស្រាយត្រឹមកម្រិតប្រទេសនីមួយៗបានឡើយ ព្រោះភាពជោគជ័យនៃការប្រយុទ្ធនឹងជំងឺនេះទាមទារឱ្យមានការពង្រឹងកិច្ចសហប្រតិបត្តិការលើគ្រប់វិស័យឱ្យកាន់តែស៊ីជម្រៅ និទូលំទូលាយ។ និយាយរួម អាស៊ានត្រូវតែរួមដៃគ្នា និងប្រែក្លាយការប្រយុទ្ធនឹងជំងឺ Covid-19 ទៅជាសមរភូមិរួម។

សម្ដេចតេជោបានបញ្ជាក់ថា “ដោយសារតែ Covid-19 ជាជំងឺថ្មី និងមានចំណុចជាច្រើនពាក់ព័ន្ធទៅនឹងជំងឺនេះដែលយើងនៅមិនទាន់បានយល់ដឹង ដូច្នេះអាស៊ានត្រូវការចាំបាច់នូវការលើកកម្ពស់ការចែករំលែកឱ្យបានទាន់ពេលវេលានូវឧត្តមានុវត្តន៍, ព័ត៌មាន, ទិន្នន័យ ព្រមទាំងបច្ចេកទេស បទពិសោធន៍ និងចំណេះដឹងពាក់ព័ន្ធទៅនឹងវេជ្ជសាស្ត្រអំពីជំងឺនេះក្នុងការការពារ ទប់ស្កាត់ វិនិច្ឆ័យ ព្យាបាល និងតាមដាន”។

សម្ដេចមានប្រសាសន៍បានបន្តទៀតថា “ការបន្តពង្រឹងយន្តការកិច្ចសហប្រតិតបត្តិការអាស៊ានដែលមានស្រាប់ ក៏ដូចជាកិច្ចសហប្រតិបត្តិការជាមួយអង្គការអន្តរជាតិ និងដៃគូសន្ទនានានា ក្នុងវិស័យសុខភាពសាធារណៈ ដើម្បីដោះស្រាយបញ្ហាប្រឈម ដែលកើតចេញពីជំងឺ Covid-19 ប្រកបដោយប្រសិទ្ធភាព និងភាពគ្រប់ជ្រុងជ្រោយ ជាពិសេស ការផ្តល់នូវការគាំទ្រឱ្យគ្នាទៅវិញទៅមករវាងសមាជិកអាស៊ាន ដូចជាការចែករំលែកនូវធនធាន បច្ចេកទេស និងសម្ភារៈ បរិក្ខាវេជ្ជសាស្ត្រ។ល។ ក្នុងស្មារតីនេះ កម្ពុជាសូមវាយតម្លៃខ្ពស់ចំពោះការឯកភាពគ្នាបង្កើត មូលនិធិអាស៊ានសម្រាប់ឆ្លើយតបទៅនឹងជំងឺ Covid-19 ដើម្បីឆ្លើយតបនឹងតម្រូវការចាំបាច់នានា រួមមានក្នុងផ្នែកបរិក្ខារ និងផ្នែកសុខាភិបាល ជាដើម” ៕

លោកឧបនាយករដ្ឋមន្ត្រី ជា សុផារ៉ា ស្នើឱ្យប្រើបណ្ណដីដែលមាន QR Code ងាយស្រួលទិញ-លក់

ដោយ វុត្ថា

ភ្នំពេញ៖ លោក ឧបនាយកដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ស្នើឱ្យប្រើប្រាស់បណ្ណដែលមាន QR Code ជំនួសដោយបណ្ណដីចាស់ដើម្បីមានភាពងាយស្រួលក្នុងការទិញលក់ និងងាយស្រួលក្នុងការគ្រប់គ្រង។

លោកឧបនាយករដ្ឋមន្ត្រី ជា សុផារ៉ា ធ្លាប់បានមានប្រសាសន៍កាលពីពេលថ្មីៗនេះថាការប្រប្រាស់ប័ណ្ណដែលមាន QR Code គឺជាការផ្ដល់លក្ខណៈងាយស្រួលដល់មន្ត្រីជំនាញគ្រប់គ្រង និងដឹងអំពីព័ត៌មានស្ថានភាពដីច្បាស់លាស់ អំពីតំបន់ និងទំហំក្បាលដី និងជាដីនៅតំបន់ណាមួយ តាមរយៈការគ្រប់គ្រងដោយម៉ាស៊ីន Server ជាពិសេសការផ្ដល់ភាពងាយស្រួលដល់អ្នកចង់ទិញ ចង់លក់ ថាជាដីក្លែងក្លាយ ឬជាដីពិតប្រាកដផងដែរ។

លោកឧបនាយកដ្ឋមន្ត្រី ជាមួយគ្នានេះ ក៏បានបញ្ជាដល់ប្រធានមន្ទីរសូរិយោដី គ្រប់ខេត្ត ត្រូវប្រមូលបណ្ណដីចាស់ដែលប្រើប្រាស់នាពេលកន្លងមក និងបច្ចុប្បន្ន យកទៅកំទេចចោល ជំនួសដោយការប្រើប្រាស់បណ្ណថ្មីដែលមាន QR Code។

លោកឧបនាយករដ្ឋមន្ត្រីបន្តថា “ដើម្បីជំរុញអនុវត្តន៍តាមប័ណ្ណថ្មីនេះ សូមឲ្យប្រធានសុរិយោដី និងប្រធានមន្ទីររាជធានីខេត្តទាំងអស់ ប្រមូលយកប័ណ្ណចាស់មកកម្ទេចចោលទាំងអស់ ដោយទុកតែបីសន្លឹកជាឯកសារគំរូតែប៉ុណ្ណោះ និងត្រូវផ្អាកការអនុវត្តន៍ប្រភេទប័ណ្ណចាស់ទាំងនោះ ដោយត្រូវបោះពុម្ពប័ណ្ណថ្មីដែលមាន QR Code មកជំនួសវិញ។

លោកឧបនាយកដ្ឋមន្ត្រីបន្ថែមថា ពាក់ព័ន្ធការចេញប័ណ្ណថ្មីនេះចាប់អនុវត្តន៍ពីពេលនេះតទៅ ក្នុងនោះចំពោះការអនុវត្តន៍ដែលនៅសេសសល់ ទាំងប៉ុន្មានត្រូវផ្អាកជាបន្ទាន់ ហើយត្រូវត្រឡប់មករៀបចំចេញប័ណ្ណថ្មីជំនួសវិញ ដែលជាចាត់ទុកជាប័ណ្ណសំគាល់ ផ្នែកអចលនទ្រព្យរបស់បងប្អូនប្រជាពលរដ្ឋ គឺរាប់ទាំងការចុះបញ្ជីដាច់ដោយដុំ និងរាប់ទាំងការចុះបញ្ជីដាច់ដោយដុំផងដែរ៕

សារជូនពរឆ្នាំថ្មីពី CEO Of Propertyarea.asia ៣៦៥ថ្ងៃបញ្ចប់ដោយក្តីរីករាយ! ឆ្នាំថ្មីពេលវេលានៃការរួបរួម ការប្តេជ្ញាចិត្ត និងការដឹងគុណ

ភ្នំពេញៈ ពេលវេលាពិតជាដើរលឿនមែន រយៈពេល៣៦៥ថ្ងៃបានលួចរំកិលទៅមុខស្ងាត់ៗ និងបន្សល់រឿងរ៉ាវល្អៗជាច្រើនសំរាប់ជីវិត ហើយឆ្នាំថ្មីប្រពៃណីជាតិខ្មែរបានមកដល់យ៉ាងលឿន ជាឆ្នាំជូត ដែលដឹកនាំបុត្រីទី២របស់កបិលមហាព្រហ្ម ព្រះនាងគោរាគៈទេវី។

ជាមួយនឹងក្តីអំណរ លាយទុក្ខភ័យនៃការរាតត្បាតជំងឺ Covid-19 យើងទាំងអស់គ្នាបានប្រឈមជាមួយបញ្ហារួមគ្នា និងត្រូវដោះស្រាយរួមគ្នា ហើយសូមស្មារតីសាមគ្គីកាន់់តែមានភាពឧត្តុងឧត្តម ក្នុងសន្តានចិត្តពលរដ្ឋខ្មែរគ្រប់រូប ដើម្បីឆ្លងកាត់ពេលវេលាដ៏លំបាករួមគ្នា ហើយនឹងរីករាយរួមគ្នាក្នុងអនាគតដ៏ត្រចះត្រចង់មួយនាពេលឆាប់់ៗខាងមុខ។

ជាមួយនឹងក្តីអំណរ និងចូលរួមលើកកំពស់ការយល់ដឹង បង្កើនព៌តមានកាន់តែមានសុក្រិតភាព និងផ្តល់ទំនុកចិត្តដល់មិត្តអ្នកអាន គេហទំព័រ Propertyarea.asia បាននិងកំពុងបន្ត និងប្តេជ្ញាបន្តចូលរួមចំណែកជាមួយរដ្ឋាភិបាល ក្នុងការផ្តល់ព៌តមានប្រកបដោយការទទួលខុសត្រូវ និងលើកទឹកចិត្តដល់អ្នកវិនិយោគជាតិ អន្តរជាតិជាបន្តទៀត។

យើងខ្ញុំប្តេជ្ញានឹងធ្វើឲ្យបានល្អ ផ្តល់ព៌តមានកាន់តែល្អ ប្រកបដោយសុក្រិតភាព ឈរលើគោលការណ៍វិជ្ជាជីវៈជាស្នូល ក្រមសីលធ៌មជាប្រទីប ព្រមជាមួយបទវិភាគស៊ីជម្រៅលើបញ្ហាសេដ្ឋកិច្ច សង្គម ដើម្បីជាពុទ្ឋិតូចមួយក្នុងការរួមចំណែកអភិវឌ្ឍន៍សង្គមជាតិ។

ដោយសារពេលវេលាកាន់តែខើច លោក អ្នកកាន់តែមានពេលវេលាតិច ក្នុងការអានអត្ថបទនានា ខ្ញុំសូមបញ្ចប់នូវសាររបស់ខ្ញុំត្រឹមនេះ និងសូមថ្លែងអំណរគុណដល់ដៃគូពាណិជ្ជកម្មទាំងអស់ដែលបានឧបត្ថម្ភគាំទ្រ ដល់ដំណើរការផ្សាយរបស់គេហទំព័ររបស់យើងខ្ញុំជារៀងរហូតមក។

សូមថ្លែងអំណរគុណផងដែរ ដល់លោក លោកស្រី អ្នកនាងកញ្ញា មិត្តអ្នកអាន ដែលតែងតែគាំទ្រ និងចែករំលែកព៌តមានយើងខ្ញុំយ៉ាងច្រើន។

ជាមួយនឹងក្តីរីករាយ និងអំណរឆ្នាំថ្មីនេះ ក្រុមការងារគេហទំព័រ Propertyarea.asia នៅតែប្រកាសប្តេជ្ញាជាឳឡារិកថា យើងនៅតែបន្តពង្រឹងការប្រកាន់ខ្ជាប់វិជ្ជាជីវៈ ក្រមសីលធ៌ម ផ្តល់ព៌តមានពិត ឥតលំអៀង មានតុល្យភាព ពិសេសចូលរួមចំណែកកំចាត់ព៌តមានក្លែងក្លាយ ហើយបដិសេធជាដាច់ខាតនូវព៌តមានបំភ្លៃ បំភ្លើស បំពុល និងបំប៉ោងជាដាច់ខាត។

អ្វីកាន់តែពិសេសសូមគោរពជូនពរ ថ្នាក់ដឹកនាំប្រទេសជាតិរបស់យើង គ្រប់ជាន់ថ្នាក់ សូមជួបប្រទះតែនឹងពុទ្ឋពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ដោយក្តីគោរពយ៉ាងជ្រាលជ្រៅពី

លោកយិន លាងគង់ៈស្ថាបនិកនិងនាយកប្រតិបត្តិគេហទំព័រ Propertyarea.asia

កម្ពុជា-ថៃសម្រេចបើកច្រកទ្វារព្រំដែនអន្តរជាតិភ្នំដីដើម្បីពង្រីកការផ្លាស់ប្តូរពាណិជ្ជកម្ម

ដោយ វុត្ថា

ភ្នំពេញៈ កម្ពុជា-ថៃ បានឯកភាពលើការបើកច្រកទ្វារ ព្រំដែនអន្តរជាតិភ្នំដី ដើម្បីនាំចូលសត្វជ្រូករស់ពីថៃ និងនាំចេញនូវទំនិញកសិផលពីកម្ពុជា ពោលគឺដើម្បីពង្រីកការធ្វើពាណិជ្ជកម្មទ្វេរភាគី។

យោងតាមកិច្ចប្រជុំនៃភាគីទាំងពីរកាលពីថ្ងៃទី១៣ ខែមេសា ឆ្នាំ ២០២០កន្លងមកមន្ត្រីប្រទេសទាំងពីរបានអះអាងថា ការបើកច្រកទ្វារព្រំដែននេះ ដើម្បីនាំចូលសត្វជ្រូករស់ពីប្រទេសថៃ និងនាំចេញនូវទំនិញកសិផល ពីប្រទេសកម្ពុជា រួមមាន គ្រាប់ពោតចំណីសត្វ ផ្លែស្វាយស្រស់ និងម្ទេស ទៅកាន់ប្រទេសថៃ ។

បើតាមកិច្ចប្រជុំរវាងមន្ត្រីនៃប្រទេសទាំងពីរ ដើម្បីចាត់វិធានការណ៍ទប់ស្កាត់ការរីករាលដាលនូវវីរុស Covid-19 ប្រទេសទាំងពីរបានផ្តោតលើ ការគ្រប់គ្រងចំពោះអ្នកបើកបរ ដែលតម្រូវឲ្យមានលិខិតបញ្ជាក់សុខភាព ពីស្ថាប័នជំនាញរបស់ប្រទេសថៃ និងមានការត្រួតពិនិត្យសុខភាពពីផ្នែកចត្តាឡីស័ក ប្រចាំច្រកទ្វារព្រំដែន នៅរៀងរាល់ពេលធ្វើការឆ្លងកាត់ព្រំដែន ហើយចំពោះមធ្យោបាយដឹកជញ្ជូន ត្រូវមានការបាញ់ថ្នាំ សម្លាប់មេរោគឲ្យបានត្រឹមត្រូវ មុននឹងធ្វើការឆ្លងកាត់។

ដោយឡែកពេលវេលា ក្នុងការបើកច្រកទ្វារព្រំដែន ដើម្បីនាំចូលសត្វជ្រូករស់ នាំចេញនូវទំនិញកសិផលខាងលើ ត្រូវបានអនុញ្ញាតតែក្នុងចន្លោះពីថ្ងៃច័ន្ទ រហូតដល់ថ្ងៃសុក្រ ចាប់ពីម៉ោង៦ព្រឹក រហូតដល់ម៉ោង១២រសៀលតែប៉ុណ្ណោះ។

កម្ពុជា-ថៃបានសម្រេចបិទច្រកព្រំដែនទាំងអស់ ដើម្បីទប់ស្កាត់ការរីករាលនៃជំងឺ Covid-19 លើកលែងតែការដឹកជញ្ជូនទំនិញ តែត្រូវមានការត្រួតពិនិត្យយ៉ាងម៉ត់ចត់ទៅលើអ្នកបើកបរ៕

ការអភិវឌ្ឍវិស័យលំនៅដ្ឋាននៅទូទាំងខេត្តកណ្តាលកំពុងបង្កើនល្បឿនយ៉ាងលឿន

ដោយៈ រ៉ាណេត

កណ្តាលៈ វិស័យហេដ្ឋារចនាសម្ព័ន្ធនានានៅទូទាំងខេត្តកណ្តាល ដែលក្នុងនោះការអភិវឌ្ឍទៅលើវិស័យលំនៅដ្ឋាន ត្រូវបានលោកអភិបាលខេត្តទទួលស្គាល់ថា ពិតជាមានភាពរីកចម្រើនខ្លាំង និងកើតមានស្ទើរទូទាំងខេត្ត ជាពិសេសនៅតាមតំបន់ដែលព័ទ្ធជុំវិញរាជធានីភ្នំពេញ។

លោកអភិបាលខេត្តកណ្តាល លោក គង់ សោភ័ណ្ឌបានមានប្រសាសន៍ឲ្យដឹងកាលពីពេលថ្មីៗនេះ ដោយបានទទួលស្គាល់ថា ស្ទើរតែគ្រប់តំបន់នៅក្នុងខេត្តកណ្តាល ជាពិសេសនៅតាមតំបន់មួយចំនួន ដែលស្ថិតនៅហ៊ុព័ទ្ធជុំវិញរាជធានីភ្នំពេញ គឺកំពុងតែមានសក្ដានុពលក្នុងការវិនិយោគ និងអភិវឌ្ឍក្នុងវិស័យសំណង់គួរឱ្យកត់សម្គាល់ ដែលក្នុងនោះវិស័យលំនៅដ្ឋានកម្រិតមធ្យម និងសមរម្យបានដើរតួឈានមុខគេ ស្របពេលដែលកំណើន នៃចំនួនប្រជាជនបានកើនឡើងរហូតដល់ជាង១លាននាក់។

លោកបន្តថា “ក្រៅពីក្រុងតាខ្មៅ ដែលជាមណ្ឌលពាណិជ្ជកម្មប្រចាំខេត្ត គម្រោងអភិវឌ្ឍន៍ក្នុងវិស័យលំនៅដ្ឋានជាច្រើន បានបង្ហាញវត្តមាននៅតាមតំបន់ដែលមានសក្ដានុពលនានា ជាពិសេសតំបន់ដែលស្ថិតនៅព័ទ្ធជុំវិញរាជធានីភ្នំពេញ។ លោកបានបន្តទៀតថា “ភាពរីកចម្រើននិងអភិវឌ្ឍន៍ទាំងអស់នេះ កើតឡើងដោយសារតែភាពល្អប្រសើរនៃកំណើនសេដ្ឋកិច្ចជាតិ ក៏ដូចជាក្នុងតំបន់ជ្រកក្រោមម្លប់សន្តិភាព ដែលដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

អគ្គនាយកក្រុមហ៊ុនអចលនទ្រព្យ R Investment Group លោកឧកញ៉ា តេង រិទ្ធី បានមានប្រសាសន៍ឲ្យដឹងក្នុងថ្ងៃដដែលថា បច្ចុប្បន្ននេះ ស្ទើរតែគ្រប់តំបន់ទូទាំងខេត្តកណ្តាល សុទ្ធតែមានសក្ដានុពល ស្របពេលដែលគម្រោងនៃការអភិវឌ្ឍជាច្រើន ត្រូវបានចាប់អនុវត្ត។

លោកឧកញ៉ាបានបន្តទៀតថា“ក្រៅពីតំបន់កណ្តាលក្រុងតាខ្មៅ ដែលកំពុងតែមានសកម្មភាពអភិវឌ្ឍន៍ ទៅលើហេដ្ឋារចនាសម្ព័ន្ធរបស់រាជរដ្ឋាភិបាល និងគម្រោងអភិវឌ្ឍន៍វិស័យសំណង់ រួមមានគម្រោងលំនៅដ្ឋានកម្រិតមធ្យមនិងកម្រិតខ្ពស់ ក៏មានគម្រោងសាងសង់អគារពាណិជ្ជកម្មមួយចំនួនផងដែរ។

លោកឧកញ៉ាបានបន្តថា តំបន់ដែលត្រូវបានក្លាយជាគោលដៅវិនិយោគ ក្នុងវិស័យលំនៅដ្ឋាន រួមមានតំបន់ជាយក្រុងតាខ្មៅដូចជាតំបន់ព្រែកហូរ ព្រែកកំពឺស និងតំបន់ស្ថិតតាមបណ្តោយផ្លូវជាតិលេខ ២១A (ស្រុកស្អាង) ហើយក្រៅពីនេះនៅចមានតំបន់ផ្លូវជាតិលេខ២ (ម្ដុំរង្វង់មូលគួរស្រូវ) តំបន់ផ្លូវជាតិលេខ៣ ស្ថិតក្នុងស្រុកកណ្តាលស្ទឹង តំបន់ផ្លូវជាតិលេខ៤ ក្នុងស្រុកអង្គស្នួល តំបន់ផ្លូវជាតិលេខ៥ ស្រុកពញាឮ តំបន់ផ្លូវជាតិលេខ៦ ស្រុកមុខកំពូល និងតំបន់ផ្លូវជាតិលេខ១ ស្ថិតនៅក្នុងស្រុកកៀនស្វាយ។

ជាមួយគ្នានេះ លោកឧកញ៉ាឡាយ លន់ អគ្គនាយកក្រុមហ៊ុនអចលនទ្រព្យ Black Eagle International Co.,Ltd ធ្លាប់បានបង្ហាញពីសក្ដានុពល និងការអភិវឌ្ឍយ៉ាងលឿននៅទូទាំងខេត្តកណ្តាលកាលពីពេលកន្លងទៅថា ខេត្តកណ្តាកមានកត្តាភូមិសាស្ត្រល្អ ជាពិសេស បណ្តាស្រុកមួយចំនួនរបស់ខេត្ត គឺស្ថិតនៅព័ន្ធជុំវិញរាជធានីភ្នំពេញ ហើយនៅពេលបច្ចុប្បន្ននេះ មានតំបន់មួយចំនួនបានកាត់ចូលមកចំណុះរាជធានីភ្នំពេញ ហើយសល់ប៉ុន្មានបានក្លាយជាជាតំបន់ជាយក្រុង ដែលមានការអភិវឌ្ឍយ៉ាងឆាប់រហ័ស។

លោកឧកញ៉ាបន្តថា “ភាពរីកចម្រើន និងអភិវឌ្ឍន៍របស់ខេត្តកណ្តាល មានលក្ខណៈពិសេសខុសពីខេត្តផ្សេង ហើយតម្លៃក៏មានការកើនឡើងគួរឱ្យកត់សម្គាល់។លោកបន្តថា “តម្លៃដីធ្លីដែលស្ថិតនៅក្នុងតំបន់មិនទាន់មានការអភិវឌ្ឍ គិតជាមធ្យមអាចឡើងក្នុងអត្រា១០ទៅ២៥ភាគរយ។ ដោយឡែកតម្លៃដី ដែលស្ថិតនៅក្នុងតំបន់មានការអភិវឌ្ឍ គិតជាមធ្យមមានកំណើនក្នុងចន្លោះចាប់ពី៥០-១២០ភាគរយក្នុងមួយឆ្នាំ”៕

ហេតុផល ៤យ៉ាង ធ្វើឱ្យវិស័យអចលនទ្រព្យកម្ពុជាធ្លាក់ចុះ

ដោយ វុត្ថា

ភ្នំពេញៈ វិស័យអចលនទ្រព្យនៅក្នុងប្រទេសកម្ពុជា ក្នុងរយៈពេលប៉ុន្មានឆ្នាំចុងក្រោយនេះ មានការរីកចម្រើនយ៉ាងខ្លាំង ដោយសារមានការលំហូទុនវិនិយោគ ទាំងក្នុងស្រុក និងបរទេសជាពិសេសមកពីប្រទេសចិន ជប៉ុន និង កូរ៉េ។

ការរីកចំរើននេះ ជាការរីកចំរើនខ្លាំងមួយ នៅក្នុងចំណោមប្រទេសនៅក្នុងតំបន់អាស៊ី ហើយបានរុញឱ្យកំណើនសេដ្ឋកិច្ចកម្ពុជាសម្រេចបានក្នុងរង្វង់៧ភាគរយ ប៉ុន្តែយ៉ាងណាក៏ដោយ នៅចុងឆ្នាំ២០១៩ និងដើមឆ្នាំ ២០២០ នេះ ត្រូវបានគេមើលឃើញថា មានការថមថយ ឬការធ្លាក់ចុះទាំងការវិនិយោគ និងប្រតិបត្តិការទិញ-លក់លើវិស័យអចលនទ្រព្យដោយហេតុចំនួន៤ ដែលអ្នកជំនាញមើលឃើញថា ជាហេតុផលដ៏សំខាន់ក្នុងការរុញច្រានឱ្យវិស័យនេះ ធ្លាក់ចុះរួមមាន៖

១) ការបិទហ្គេមអនឡាញ

រដ្ឋាភិបាលកម្ពុជាបានប្រកាសបិទហ្គេមអនឡាញ កាលពីខែចុងខែសីហា ឆ្នាំ ២០១៩ ដែលធ្វើឱ្យជនជាតិចិនប្រមាណ ២០ម៉ឺននាក់ ដែលជាទីផ្សារដ៏ខាន់មួយ បានចាក់ចេញពីប្រទេសកម្ពុជា ហើយធ្វើឱ្យវិស័យអចលនទ្រព្យកម្ពុជា ទទួលរងផលប៉ះពាល់ផងដែរ។

ការបិទល្បែង Online ត្រូវបានអ្នកជំនាញយល់ឃើញថា បានប៉ះពាល់ដល់តម្លៃដីធ្លី ជួល ទិញលក់និង សកម្មភាពនៅទាំងប្រទេស ជាពិសេសអភិវឌ្ឍន៍ផ្សេងទៀតនៅខេត្តព្រះសីហនុ។

២) វិស្សមកាលចូលឆ្នាំ២០២០

វិនិយោគិនទាំងអាស៊ី និងអឺរ៉ុប បានធ្វើដំណើរចាកចេញពីប្រទេសកម្ពុជា ទៅកាន់ប្រទេសខ្លួន ដើម្បីសម្រាក និងចូលឆ្នាំឆ្នាំសកលឆ្នាំ២០២០ ក្នុងរយៈពេលយូដែលធ្វើឱ្យមានផលប៉ះពាល់ ដល់វិស័យអចលនទ្រព្យរបស់កម្ពុជា។ តែយ៉ាងណាក៏ដោយអ្នកជំនាញលើកឡើងថា គ្រាន់តែមានផលតិចតួចប៉ុណ្ណោះក្នុងអំឡុងពេលវិស្សមកាលនេះ។

៣) ចូលឆ្នាំចិន

វិនិយោគិនចិនជាច្រើនបានសម្រុក ចេញពីប្រទេសកម្ពុជាទៅប្រារព្វពិធីបុណ្យប្រពៃណី និងជួបជុំសាច់ញាតិរបស់ខ្លួននៅក្នុងប្រទេសចិន ទៅតាមទំនៀមទំលាប់ ដែលជាហេតុផលមួយទៀត ធ្វើឱ្យវិស័យអចលនទ្រព្យកម្ពុជាមានការធ្លាក់ចុះ។

៤) វិបត្តិជាសកលនៃជំងឺ Covid-19

វិបត្តិជំងឺ Covid-19 ផ្ទុះឡើងនៅក្នុងទីក្រុងអ៊ួហានរបស់ប្រទេសចិន និងបន្តរីករាលដាលជាកល បានធ្វើឱ្យវិនិយោគិនចិន មិនអាចវិលត្រឡប់មកកាន់ប្រទេសកម្ពុជាវិញបាន ខណៈដែលពួកគេទៅប្រារព្វពិធីបុណ្យចូលឆ្នាំចិន ។ រហូតមកដល់ពេលនេះ គេមិនទាន់ដឹងពីភាពប្រកដប្រជានៃជំនេះនៅឡើយទេ។

វិបត្តជំងឺ Covid-19 នេះ មិនត្រឹមតែកម្ពុជាទទួលរងនូវផលប៉ះពាល់ខ្លាំងនោះទេ តែដូចបណ្តាប្រទេសនានា នៅក្នុងពិភពលោកក៏កំពុងជួបប្រទះផងដែរ ដែលទាមទាឱ្យរដ្ឋាភិបាលបានដាក់ចេញនូវវិធានការនានា ដើម្បីស្រោចស្រង់ឡើងវិញ តាមរយៈលើកលែងពន្ធ និងឱ្យអ្នកមានអគារជួល និងអ្នកអភិវឌ្ឍន៍ជួយលើការបង់ប្រាក់ផងដែរ៕

ចំណេះដឹង! តើការរៀបចំឥណទានឡើងវិញគឺជាអ្វី?

ដោយ វុត្ថា

ភ្នំពេញៈ ការរៀបចំរឥណទានឡើងវិញ ជាដំណើរការមួយដែលត្រូវបានប្រើដោយស្ថាប័នផ្តល់កម្ចីនានា ដើម្បីបញ្ជៀសលទ្ធភាពមានហានិភ័យ នៃបំណុលដែលមានស្រាប់ ឬទាញយកអត្ថប្រយោជន៍ពីអត្រាការប្រាក់ទាបជាងមុន។

ការរៀបចំឥណទានឡើងវិញ អាចត្រូវបានអនុវត្តន៍ដោយបុគ្គលម្នាក់ៗ នៅពេលដែលពួកគេគ្មានលទ្ធភាពទូទាត់បំណុល ដោយសារតែស្ថានភាពហិរញ្ញវត្ថុអាក្រក់និងមិនអាចដោះស្រាយបាន។

ម្ចាស់បំណុលនិងកូនបំណុលត្រូវពិភាក្សាគ្នា អំពីការរៀបចំឥណទានឡើងវិញដោយផ្តោតទៅលើ៖

១/ ការបញ្ចុះអត្រាការប្រាក់របស់ឥណទាន

២/ ការបង្កើនកាលអវសានរបស់ឥណទាន

៣/ការទូទាត់តែប្រាក់ដើមឲ្យស្ថាប័នផ្តល់កម្ចីវិញ (មិនយកការប្រាក់)៕