កំណើនសេដ្ឋកិច្ចនៅតំបន់អាស៊ានបូក៣ នឹងមានការស្ទុះងើបឡើងវិញក្នុងរង្វង់ជាង ៥ភាគរយនៅឆ្នាំ២០២១

ដោយ ប៊ី

ភ្នំពេញៈ កំណើនក្នុងតំបន់អាស៊ានបូក៣ (ចិន ជប៉ុន កូរ៉េខាងត្បូង) នឹងធ្លាក់ចុះយ៉ាងខ្លាំងដល់២ភាគរយនៅឆ្នាំ២០២០ បន្ទាប់មកនឹងមានការស្ទុះងើបឡើងវិញយ៉ាងខ្លាំងដល់៥.៥ភាគរយនៅឆ្នាំ២០២។ នេះបើយោងតាមការរបាយការណ៍ចុងក្រោយរបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន (AMRO) ។

ការិយាល័យ AMRO រំពឹងថាកំណើនក្នុងតំបន់អាស៊ានបូក៣ នឹងធ្លាក់ចុះយ៉ាងខ្លាំងដល់២ភាគរយនៅឆ្នាំ២០២០ បន្ទាប់មកនឹងមានការស្ទុះងើបឡើងវិញយ៉ាងខ្លាំង ដល់ ៥.៥ភាគរយនៅឆ្នាំ២០២។ ជាលទ្ធផលការងើបឡើងវិញ នៃសេដ្ឋកិច្ចរបស់ប្រទេសចិន នឹងចុះខ្សោយជាងមុននៅ ៣,៥ ភាគរយក្នុងឆ្នាំ ២០២០ ។

បណ្តាប្រទេសអាស៊ាន កំពុងមានការរីករាលដាលនៃការឆ្លង COVID-19 ហើយរដ្ឋាភិបាលបានចាត់វិធានការ យ៉ាងតឹងរឹងរួមទាំងការបិទប្រទេស ដើម្បីទប់ស្កាត់ការផ្ទុះឡើង និងបានអនុម័តកញ្ចប់ថវិកាដ៏ធំដើម្បីគាំទ្រសេដ្ឋកិច្ចរបស់ពួកគេ។

ទោះជាយ៉ាងណាក៏ដោយ សេដ្ឋកិច្ចអាស៊ានត្រូវបានរំពឹងថា នឹងចុះខ្សោយយ៉ាងខ្លាំង និងកើនឡើងជាមធ្យម១,១ភាគរយក្នុងឆ្នាំ២០២០ មុននឹងងើបឡើងដល់ ៥,២ ភាគរយនៅឆ្នាំ ២០២១ ។

បណ្ឌិត Hoe Ee Khor ប្រធានផ្នែកសេដ្ឋកិច្ចរបស់ការិយាល័យ AMRO មានប្រសាសន៍ថា “ឆ្នាំ២០១៩ជាឆ្នាំដែលមានព្រឹត្តិការណ៍ខ្ពស់មួយ ដែលត្រូវបានកត់សម្គាល់ដោយភាពតានតឹងពាណិជ្ជកម្មរវាងសហរដ្ឋអាមេរិក និងចិន ជម្លោះក្នុងភូមិសាស្ត្រនយោបាយភាព ចលាចលនយោបាយ និងលក្ខខណ្ឌអាកាសធាតុអាក្រក់។

លោកបន្ថែមថា “ដូចយើងកំពុងបិទជំពូកឆ្នាំ២០១៩ លើកំណត់សំគាល់ភ្លឺជាងមុន ជាមួយនឹងការបញ្ចប់កិច្ចចរចាពាណិជ្ជកម្ម សហរដ្ឋអាមេរិក-ចិនដំណាក់កាលទី១ ភាពតានតឹងភូមិសាស្ត្រនយោបាយនៅមជ្ឈឹមបូព៌ាបានឆាបឆេះឡើង ធ្វើឱ្យតម្លៃប្រេងឡើងថ្លៃ មិនយូរ មិនឆាប់ ជំងឺ COVID-19បានផ្ទុះឡើងនៅក្នុងប្រទេសចិន ហើយប្រែទៅជាជំងឺរាតត្បាតទូទាំងពិភពលោក។

ទីផ្សារសេដ្ឋកិច្ច និងហិរញ្ញវត្ថុដែលមានការវិវត្តយ៉ាងឆាប់រហ័ស ពីការរីករាលដាលជំងឺ COVID-19 យ៉ាងឆាប់រហ័ស បានបណ្តាលឱ្យមានតម្រូវការដើម្បីវាយតម្លៃទស្សនវិស័យសេដ្ឋកិច្ចឡើងវិញ។

ដោយឡែកទស្សនវិស័យសេដ្ឋកិច្ច សម្រាប់ប្រទេសនីមួយៗនៅអាស៊ាន មានការផ្លាស់ប្តូរ និងមានទម្លាក់កំណើនសេដ្ឋកិច្ច ដោយសារការរីករាលដាលនៃជំងឺ COVID-19 ដែលបង្កឱ្យប៉ះពាល់ដល់កំណើនសេដ្ឋកិច្ចជាសកល។

របាយការណ៍ខាងលើបានឱ្យដឹងថា កំណើនសេដ្ឋកិច្ចរបស់ប្រទេសកម្ពុជានៅឆ្នាំនេះ ត្រូវបានព្យាករថានឹងមានចំនួន២,៧ភាគរយ ប៉ុន្តែនឹងកើនឡើងដល់៦,៨ ភាគរយនៅឆ្នាំក្រោយ។

បន្ទាប់ពីការរីករាលដាលនៃជំងឺផ្តា COVID-19 ការិយាល័យ AMRO បានព្យាករណ៍ថា សេដ្ឋកិច្ចថៃនឹងប្រឈមនឹងឱនភាព៦,០ ភាគរយនិងងើបឡើងវិញដល់៤.០ ភាគរយនៅឆ្នាំក្រោយ។

សឹង្ហបូរីនឹងប្រឈមមុខនឹងការធ្លាក់ចុះ១.០ ភាគរយហើយ នឹងស្ទុះងើបឡើងវិញដល់២ភាគរយ ខណៈដែលប្រទេសម៉ាឡេស៊ី នឹងប្រឈមមុខនឹងកំណើនអប្បបរមា០,១ និងងើបឡើងដល់ ៤,៦ ភាគរយ។

ឥណ្ឌូណេស៊ីនឹងមានកំណើន២,៣ភាគរយ និងងើបឡើងដល់៥,៣ភាគរយ។ ប្រទេសប្រ៊ុយណេដារូសាឡឹម នឹងប្រឈមនឹងធ្លាក់ចុះ៣,០ភាគរយ និងធ្លាក់ចុះបន្ថែមទៀតដល់ ២,៩ ភាគរយ ខណៈដែលប្រទេសឡាវនឹងប្រឈមនឹង៣,៨ ភាគរយ និងងើបឡើងវិញដល់៦,២ ភាគរយ។

មីយ៉ាន់ម៉ានឹងប្រឈមមុខនឹងការធ្លាក់ចុះ៤,៥ ភាគរយ និងងើបឡើងវិញដល់៦,៩ ភាគរយ។ ហ្វីលីពីននឹងប្រឈមមុខធ្លាក់ចុះ៤,៥ ភាគរយនិងងើបឡើងវិញដល់៦,៧ ភាគរយ។ ប្រទេសវៀតណាម នឹងប្រឈមមុខធ្លាក់ចុះ៤,៥ ភាគរយ និងងើបឡើងវិញដល់ ៧,០ភាគរយ៕

គម្រោងអគារពាណិជ្ជកម្មកប់ពពកជាច្រើននៅទីក្រុងភ្នំពេញបានជាប់គាំងដោយសារវិបត្តិ Covid-19

ដោយ វុត្ថា

ភ្នំពេញៈ គម្រោងអគារខុនដូ និងមជ្ឈមណ្ឌលពាណិជ្ជកម្មកប់ពពកមួយចំនួន នៅក្នុងទីក្រុងភ្នំពេញ កំពុងមានភាពជាប់គាំងបណ្តើរៗហើយ នៅក្នុងអំឡុងពេលដែលកម្ពុជាបាន និងកំពុងប្រយុទ្ធប្រឆាំងទៅនឹងការរីករាលដាលជាសកលនៃជំងឺ Covid-19 ។

មិនត្រឹមតែសកម្មភាពនៃសាងសង់ត្រូវជាប់គាំងនោះទេ សកម្មភាពពាណិជ្ជកម្មនានាហាក់មិនដំណើរ និងសេដ្ឋកិច្ចត្រូវបានព្យាករណ៍ថយ មកត្រឹមជាង២ភាគរយ ដោយសារតែបង្កឡើងដោយសារវីរុសកូរ៉ូណា ឬ Covid-19 ។

គម្រោងដែលត្រូវបានគេមើលជាប់គាំង នៅក្នុងកំឡុងពេលនៃការរីករាលដាលជាសកលនៃជំងឹ Covid-19 ដូចនៅខាងក្រោម៖

១) អគារ Glory International Centre

អាគារពាណិជ្ជកម្ម Glory International Centre ក្រោមការវិនិយោគរបស់ក្រុមហ៊ុនចិនវិនិយោគប្រមាណ២០០លានដុល្លារអាមេរិក ស្ថិតនៅក្បែរទីក្រុងរណបកោះពេជ្រ ស្ថិតនៅខាងក្រោយអគារThe Bridge ហាកគ្មានសកម្មភាពសងសង់ ហើយត្រូវបានរំពឹងថានឹងបើកឲ្យដំណើរកានៅឆ្នាំ២០២។ គំរោងនេះស្ថិតក្នុងសង្កាត់ទន្លេបាសាក់ ខ័ណ្ឌចំការមក រាជធានីភ្នំពេញ។

អគារ Glory International Centre អភិវឌ្ឍន៍ដោយក្រុមហ៊ុនអចលនទ្រព្យ Yuan Chuang Real Estate រួមមាន អគារខុន ផ្សារទំនើប អាផាតមិន សណ្ឋាគារ និងអគារការិយាល័យ។ អគារពាណិជ្ជកម្ម Glory បានចាប់ផ្តើមការងារសាងសង់កាលពីពីឆ្នាំ ២០១៧ ត្រូវការរយៈពេលសាងសង់បួនទៅប្រាំឆ្នាំ ពោលគឺអគារពាណិជ្ជកម្មមួយនេះរំពឹងថា នឹងបើកសម្រាប់ការធ្វើអាជីវកម្មនៅឆ្នាំ២០២៣ ឬឆ្នាំ២០២៤ខាងមុខ។

២) គំរោងខុនដូនិងមជ្ឈមណ្ឌលពាណិជ្ជកម្ម CITY KEY

គំរោងនេះមានឈ្មោះ CITY KEY មានចំនួន៥២ជាន់ និងកំពស់២០៨ម៉ែត្រជាគំរោងខុនដូ និងមជ្ឈមណ្ឌលពាណិជ្ជកម្មថ្មីមួយ ដែលវិនិយោគដោយក្រុមហ៊ុនមកពីប្រទេសចិន។

គំរោងដ៏ធំនេះ ស្ថិតនៅក្រោយអាគារ Bali Scenary និងអាគារ The Bridge ដែលស្ថិតក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។

៣) គម្រោង Sino Plaza

គម្រោង Sino Plaza នេះ គឺត្រូវបានសាងសង់ឡើងនៅនៅទល់មុខផ្សារបឹងត្របែក ខណ្ឌចំការមន រាជធានីភ្នំពេញ ដែលមានទំហំ២១៧,០០០ម៉ែត្រការ៉េ ដែលនឹងមានអគារលំនៅឋាន ការិយាល័យ ផ្សារទំនើប ភោជនីយដ្ឋាន រោងភាពយន្ត និងសណ្ឋា គារផ្កាយ៥មួយផងដែរ។

ដើម្បីប្រកួតប្រជែងនឹងគម្រោងវិនិយោគ ដែលមានទំហំយក្សផ្សេងទៀត គម្រោង Sino Plaza នឹងមានអគារចំនួន៤ រួមមានអគារអាផាតមិន៤២ជាន់ចំនួន២ អគារ៣៦ ជាន់ចំនួន១ សម្រាប់ជាសណ្ឋាគារផ្កាយប្រាំ និងរោងភាពយន្ត និងអគារ៤៣ជាន់មួយ សម្រាប់យូនីតការិយាល័យ និងខុនដូ។

៤) អគារ Thai Boon Roong Commercial Centre Twin Towers

អគារនេះ មានកម្ពស់៥៦៨ ម៉ែត្រស្ថិតនៅក្នុងទីក្រុងភ្នំពេញប្រទេសកម្ពុជា កំពុងស្ថិតនៅក្នុងដំណើរការសាងសង់។ នៅពេលសាងសង់បញ្ចប់អគារនេះ នឹងក្លាយជាអគារប្រើប្រាស់រួម មានទាំងការិយាល័យធ្វើការ ផ្សារទំនើប អាផាតម៉ិន ខុនដូលំដាប់អន្តរជាតិ សណ្ឋាគារកម្រិតផ្កាយ៦ និងសេវាកម្មកំសាន្តដ៏អស្ចារ្យជាច្រើនទៀត។

អគារភ្លោះមជ្ឈមណ្ឌលពាណិជ្ជកម្ម Thai Boon Roong របស់ប្រទេសកម្ពុជា ជាប់ជាអគារខ្ពស់នៅក្នុងតំបន់អាស៊ាន ក៏ដូចជាខ្ពស់ជាងគេក្នុងពិភពលោក ក្នុងនាមអាគារភ្លោះនៅលើពិភពលោក។ មជ្ឈមណ្ឌលពាណិជ្ជកម្មនេះ ស្ថិតក្នុងចំណោមអគារខ្ពស់កប់ពពកចំនួន៦ផ្សេងទៀត មកពីប្រទេសចំនួន៦នៅក្នុងតំបន់អាស៊ាន ហើយអគារទាំងនេះ នឹងក្លាយជាអគារខ្ពស់កប់ពពកនៅក្នុងតំបន់អាស៊ាន។

យ៉ាងណាសកម្មភាពសាងសង់ជញ្ជាំងទប់ដីរបស់គំរោងនេះ ហាក់ត្រូវបានផ្អាកហើយ និងមិនដឹងពីការបរិច្ឆេទបើកសម្ភោធបើកការដ្ឋានសាងសង់ នៅពេលណាជាក់លាក់នៅឡើយទេ។

៥) គម្រោង KOWLOON BAY

គម្រោងសាងសង់អគារពាណិជ្ជកម្មចំរុះបែបទំនើប ដែលមានកម្ពស់រហូតដល់៥៩ជាន់ ដែលមានទីតាំងស្ថិតនៅតាមបណ្តោយផ្លូវសុធារស់ ជិតផ្សារទំនើប AEON 1 នៅលើផ្ទៃដីទំហំ១,៥០ហិកតាបានផ្អាកការសាងសង់ជាផ្លូវការហើយ។ គំរោងនេះបានសិក្សាតាំងពីអំឡុងពាក់កណ្តាលឆ្នាំ២០១៧នោះ រហូតមកដល់ពេលនេះនៅតែមិនទាន់មានសកម្មនៅឡើយ ខណៈដែលធ្លាយដំណឹងមកថាគំរោងនេះ បានប្រកាសផ្អាកសម្រេចផ្អាកមួយរយៈសិន។

៦) គម្រោងអភិវឌ្ឍន៍ចម្រុះ អ & អេហ្វ

គម្រោងអភិវឌ្ឍន៍ចម្រុះ អ & អេហ្វ ស៊ីធី មានទីតាំងស្ថិតនៅក្នុងតំបន់មានសក្តានុពលថ្មី លើមហាវិថីព្រះមុន្នីវង្ស និងជិតមហាវិថីសម្តេចហ៊ុនសែន(ផ្លូវ៦០ម៉ែត្រ)។ គម្រោងអ & អេហ្វ ស៊ីធីសាងសង់ឡើងលើផ្ទៃដី ៧៦០,០០០ ម៉ែត្រការ៉េមានសួនច្បារឯកជនដ៏ស្រស់ស្អាត ទំហំរាប់ពាន់ម៉ែត្រការ៉េ ដែលបានរចនាដោយក្រុមហ៊ុនដ៏ល្បីល្បាញរបស់ពិភពលោក Pierre Landscape។

គម្រោង អ & អេហ្វនេះបានជាប់គាំងហើយ ប៉ុន្តែគំរោងរបស់ក្រុមហ៊ុនយក្ស R&F ស្ថិតនៅលើមហាវិថីសម្តេចតេជោហ៊ុន សែនបាននិងកំពុងដំណើរការសាងសង់នៅឡើយ៕

តើក្តីស្រម៉ៃនៃគម្រោងខ្សែក្រវ៉ាត់១ផ្លូវ១ របស់ប្រធានាធិបតីចិនស៊ី ជីនពីងអាចសម្រេចបានឬទេ?

ដោយ ហ្សូលី

ភ្នំពេញៈ គម្រោងខ្សែក្រវ៉ាត់មួយផ្លូវមួយ ដែលជាការផ្តួចផ្តើមរបស់ប្រធានាធិបតីចិនលោកស៊ី ជីនពីង នឹងត្រូវស្ថាបនានៅតាមបណ្តាប្រទេស រួមមាន កម្ពុជា ឥណ្ឌូនេស៊ី មីយ៉ាន់ម៉ា និងម៉ាឡេស៊ីជាដើម ប៉ុន្តែត្រូវបានជាប់គាំងដោយសារតែវិបត្តិជំងឺ Covid-19 ។

ជាក់ស្តែងប្រទេសចិន បានស្ថិតនៅក្នុងស្ថានភាពធូរស្បើយច្រើនហើយ ពាក់ព័ន្ធវិបត្តិជំងឺឆ្លងនេះ ប៉ុន្តែនៅឡើយតែបណ្តារប្រទេសជាដៃគូ ដែលកំពុងប្រឈមនឹងការឆ្លងជំងឺនេះជាបន្តបន្ទាប់ឥតឈប់ឈរ។ បច្ចុប្បន្នការងារនៃគម្រោងនេះ ត្រូវបានបញ្ឈប់រួចហើយនៅតំបន់សេដ្ឋកិច្ចខេត្តព្រះសីហនុ និងរបៀងសេដ្ឋកិច្ចចិន-ប៉ាគីស្ថាន។

កត្តារារាំងក្តីស្រម៉ៃរបស់លោកប្រធានាធិបតី ស៊ី ជីនពីង មួយទៀតនោះ គឺការរឹតបន្តឹងការធ្វើដំណើរចេញចូលរបស់ប្រទេសនិមួយ។ ថ្វីត្បិតតែកម្មករចិន បានត្រៀមខ្លូនរួចជាស្រេច ក្នុងការវិលត្រឡប់ទៅបំពេញការងារក្តី ប៉ុន្តែការធ្វើដំណើរឆ្លងកាត់តំបន់ អាស៊ី និង អ៉ឺរ៉ុប នៅតែចងជាបញ្ហា។ ប្រទេសចំនួ ១៣០ ជុំវិញពិភពលោកបានធ្វើការរឹតបន្តឹងដាក់បម្រាមមិនឱ្យជនជាតិចិន ដែលធ្វើដំណើរមកពីប្រទេសចិន ចូលមកក្នុងទឹកដី ប្រទេសគេឡើយ។ យ៉ាងណាមិញ រដ្ឋាភិបាលចិនកំពុងចរចា ដោយយកគម្រោងខ្សែក្រវ៉ាត់មួយផ្លូវមួយ ធ្វើជាខែលដោះស្រាយបម្រាមនេះ។

យោងតាមរបាយការណ៍របស់ក្រុមប្រឹក្សា ទំនាក់ទំនងបរទេស (CFR) ដែលមានចំណងជើងថា “តើជំងឺ Covid-19 មានន័យអ្វីចំពោះគម្រោងខ្សែក្រវ៉ាត់១ផ្លូវ១” បានកត់សម្គាល់ថា កម្មករចិនមិនអាចវិលត្រឡប់ទៅរកគម្រោងនៅក្រៅប្រទេសបានទេ គម្រោងនឹងមិនមានលក្ខណៈពេញលេញទេ ហើយអាចត្រូវគេបោះបង់ចោលទាំងអស់គ្នា។

ប្រសិនជាប្រធានាធិបតីចិន ចង់ឱ្យល្បឿននៃគម្រោងនេះសម្រេចកាន់តែឆាប់នោះ លុះត្រាតែប្រទេសចិនស្វះស្វែងជួយប្រទេសជិតខាង ទ្រទ្រង់សង្វាក់ផលិតកម្ម ទប់ស្កាត់មេរោគឆ្លង និងពន្លឿនការស្តារសេដ្ឋកិច្ចឱ្យបានឆាប់រហ័សបំផុត ទើបអាចមើលឃើញក្តីសង្ឃឹមនៃគម្រោងនេះបាន។ នេះបើតាមរបាយការណ៍ដដែលបានបញ្ជាក់។

អ្នកសិក្សាថាមពល និងបរិស្ថានមកពី Gateway House មានមូលដ្ឋាននៅទីក្រុង Mumbai លោក Amit Bhandari បានប្រាប់សារព័ត៌មានអន្តរជាតិថា ជំងឺ Covid-19 នឹងធ្វើឱ្យកំណើនសេដ្ឋកិច្ចយឺត ប្រសិនបើមិនមានការថយចុះជាក់ស្តែង នៅក្នុងសកម្មភាពសេដ្ឋកិច្ចរបស់បណ្តាប្រទេសអាស៊ីអាគ្នេយ៍។

ប្រទេសដែលពឹងផ្អែកលើវិស័យទេសចរណ៍ នឹងកាន់តែឈឺចាប់។ ការធ្លាក់ចុះសេដ្ឋកិច្ច ដែលបណ្តាលមកពី Covid-19 នឹងធ្វើឱ្យស្ថានភាពបំណុលរបស់ប្រទេសមួយចំនួនជាដៃគូគម្រោងរឹតតែគ្មាននិរន្តរភាព៕

ចំណេះដឹង! តើសម្បទានិកលើដីមានសិទ្ធិអ្វីខ្លះ?

ដោយ វុត្ថា

ភ្នំពេញៈ សម្បទានជាសិទ្ធិស្របច្បាប់ ដែលមានចែងក្នុងច្បាប់ រាជរដ្ឋាភិបាលចេញអាជ្ញាប័ណ្ណផ្តល់ឲ្យរូបវន្តបុគ្គល ឬនីតិបុគ្គលកាន់កាប់ដី និងប្រើប្រាស់ដីតាមច្បាប់វិនិយោគ ។

ដីសម្បទានសេដ្ឋកិច្ច ដែលផ្តល់ទៅឱ្យសម្បទានិក ជាដីដែលឆ្លើយតបនឹងផលប្រយោជន៍សេដ្ឋកិច្ច ដែលអាចទាញយកផលពីកសិកម្ម ឧស្សាហកម្ម។

ច្បាប់ភូមិបាល ឆ្នាំ២០០១ មាត្រា ៥៦ សិទ្ធិរបស់សម្បទានិកលើដី ដែលបានផ្តល់ជាសម្បទានក្នុងអំឡុងពេលនៃសម្បទាន ។ សម្បទាននិកអាចទាញយកផលពីការធ្វើសកិកម្ម ដែលរួមទាំងការអារសាងសង់សិប្បកម្ម រោងចក្រផងដែរ។

លើសពីនេះសិទ្ធិរបស់សម្បទានិក ត្រូវបានការពារដោយច្បាប់ដូចជាកម្មសិទ្ធិករដែរ។ រយៈពេលកន្លងមករាជរដ្ឋាភិបាល បានធ្លាប់ផ្តល់ដីសម្បទានដល់វិនិយោគិនដែរ ប៉ុន្តែហាក់ដូចជាមិនមានប្រសិទិ្ធភាពទេ ថែមទាំងបង្កឲ្យមានវិវាទជាច្រើនករណី រវាងវិនិយោគិន និងប្រជាពលរដ្ឋនៅតំបន់ដីសម្បទាននោះ។

ហេតុនេះរាជរដ្ឋាភិបាល បានចេញបទបញ្ជាកំណត់វិធានការពង្រឹង និងបង្កើនប្រសិទ្ធិភាពលើការគ្រប់គ្រងសម្បទានដីសេដ្ឋកិច្ច ដែលត្រូវបានផ្អាក់ជាបណ្តោះអាសន្ន (បទបញ្ជាស្តីពីវិធានពង្រឹង និងបង្កើនប្រសិទ្ធិភាព នៃការគ្រប់គ្រងសម្បាទានដីសេដ្ឋកិច្ច ឆ្នាំ២០១២)។

យោងតាមការយកចិត្តទុកដាក់ពីរាជរដ្ឋាភិបាលកម្ពុជា គ្រប់បុគ្គលទាំអស់ទទួលបានសិទ្ធិស្របច្បាប់លើដីធ្លី តាមទម្រង់ កម្មសិទ្ធិ ភោះគៈ ផលុបភោគ សិទ្ធិជួលអចិន្ត្រៃយ៍ ដែលអាចសាងសង់សំណងនៅលើដីទាំងអស់នោះបាន៕

ក្រុមហ៊ុនអ៊ឺរ៉ុប ស្នើឱ្យពន្យាការដក EBA ពីកម្ពុជា

ដោយវុត្ថា

ភ្នំពេញ៖ សម្ព័ន្ធសម្លៀកបំពាក់យីហោអ៊ឺរ៉ុប (European Branded Clothing Alliance) បានស្នើឱ្យសហភាពអឺរ៉ុបពន្យារពេលដកប្រព័ន្ធអនុគ្រោះពន្ធដែលបានផ្តល់ឱ្យកម្ពុជាក្រោមគម្រោងកម្មវិធី “អ្វីគ្រប់យ៉ាងលើកលែងតែអាវុធ” (EBA) របស់សហភាពអឺរ៉ុប។

នៅក្នុងលិខិតមួយផ្ញើទៅកាន់ប្រធានគណៈកម្មការអឺរ៉ុប លោក Ursula von der Leyen កាលពីសប្តាហ៍មុន ប្រធានសម្ព័ន្ធសម្លៀកបំពាក់យីហោអ៊ឺរ៉ុប លោក Ignacio Sierra Armas បាននិយាយ ថា ជំងឺផ្លូវដង្ហើមប្រភេទថ្មី Covid-19 បាន បង្កើតជាបញ្ហាប្រឈមដែលមិនធ្លាប់មាននៅក្នុងសាកលភាវូបនីយកម្មរបស់យើង” ។

លោកបន្តថា ការបិទហាងលក់ដូរសម្លៀកបំពាក់លក់រាយក្នុងរយៈពេលមិនប្រាកដប្រជានៅក្នុងប្រទេសដែលជាហភាពអឹរ៉ុប ខណៈការកើតឡើងនូវជំងឺCovid-19 កំពុងជះឥទ្ធិពលយ៉ាងខ្លាំងដល់ការអភិវឌ្ឍការងារ និងកំណើន។
លោក Sierra បានស្នើសុំវិធានការគាំទ្រចំនួន ៧ ពីសហគមន៍អ៊ឺរ៉ុបនិងបណ្តាប្រទេសជាសមាជិក ដើម្បីបង្កើនភាពប្រាកដប្រជានិងអនុញ្ញាតឱ្យបន្តគាំទ្រដល់និយោជិករបស់យើងនៅក្នុងសហភាពអ៊ឺរ៉ុបក៏ដូចជាកម្មករនៅក្នុងប្រទេសផលិតកម្ម” ។

វិធានការណ៍នេះរួមមានសំណើទៅសហភាពអឺរ៉ុប ឲ្យ ពន្យារពេលការដកប្រព័ន្ធ EBA របស់កម្ពុជាដោយសារកាលៈទេសៈពិសេស និងប៉ះពាល់ដល់ឧស្សាហកម្មពិភពលោកយ៉ាងខ្លាំងរួចទៅហើយ។

គណៈកម្មការអឺរ៉ុបបានសម្រេចដកផ្នែកខ្លះនៃមុខទំនិញនាំចូលពីប្រទេសកម្ពុជាកាលពីថ្ងៃទី ១២ ខែកុម្ភៈដោយអះអាងថា“ រំលោភសិទ្ធិមនុស្ស” ជាប្រព័ន្ធ។ ការដកប្រព័ន្ធអនុគ្រោះពន្ធ EBA នេះនឹងជះឥទ្ធិពលដល់ផលិតផលសម្លៀកបំពាក់ និងស្បែកជើងដែលបានជ្រើសរើសក៏ដូចជាទំនិញធ្វើដំណើរ និងស្ករទាំងអស់របស់កម្ពុជាដែលមានតម្លៃប្រហែល ១ ពាន់លានអឺរ៉ូឬមួយភាគប្រាំនៃការនាំចេញប្រចាំឆ្នាំរបស់កម្ពុជាទៅកាន់សហភាពអឺរ៉ុប។

បើតាមគណៈកម្មការសហភាពអឺរ៉ុប ការដកប្រព័ន្ធអនុគ្រោះពន្ធនេះនឹងចូលជាធរមាននៅថ្ងៃទី ១២ ខែសីហាឆ្នាំ ២០២០ ខាងមុខនេះ លើកលែងតែសភាអឺរ៉ុប និងក្រុមប្រឹក្សារបស់សភាអឺរ៉ុប ជំទាស់ចំពោះការដកនេះ ។

លោក Sierra បាននិយាយថា ការលក់ដូរនៅក្នុងវិស័យសម្លៀកបំពាក់នៅក្នុងសហភាពអ៊ឺរ៉ុបបានធ្លាក់ចុះប្រហែល ៩០ ភាគរយដោយសារការរំខានដែលបណ្តាលមកពីជំងឺ Covid-19 ។ ស្រដៀងគ្នាដែរ និយោជិកឥឡូវនេះត្រូវបានទទួលការគាំទ្រផ្នែកហិរញ្ញវត្ថុពីនិយោជិករបស់ពួកគេបន្ថែមលើការគាំទ្រពីរដ្ឋដើម្បីជៀសវាងការបាត់បង់ការងារ។

លោកបន្ថែមថា “ការធ្លាក់ចុះយ៉ាងខ្លាំងនៃការលក់បែបនេះជះឥទ្ធិពលជៀសមិនរួចទៅលើការបញ្ជាទិញ” ។ សម្ព័ន្ធសម្លៀកបំពាក់យីហោអ៊ឺរ៉ុប (European Branded Clothing Alliance) មានមូលដ្ឋាននៅទីក្រុងព្រុចសែលស និងតំណាងឱ្យហាងលក់ទំនិញសម្លៀកបំពាក់លក់រាយជាង ៦០ ទីតាំង៕

លោកឧបនាយករដ្ឋមន្ត្រីជា សុផារ៉ាសម្រេចបង្កើតក្រុមការងារបច្ចេកទេសសិក្សានិងរៀបចំអាងប្រព្រឹត្តកម្មទឹកខ្វក់ខេត្តព្រះសីហនុ

ដោយវុត្ថា

ភ្នំពេញៈ លោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានសម្រេចបង្កើតក្រុមការងារបច្ចេកទេសសិក្សា និងរៀបចំអាងប្រព្រឹត្តកម្មទឹកខ្វក់ ស្ថិតក្រុងព្រះសីហនុ ខេត្តព្រះសីហនុ។

យោងតាមសេចក្តីសម្រេច ដែលចុះហត្ថលេខាកាលពីថ្ងៃទី៧ ខែមេសាឆ្នាំ ២០២០ ឱ្យដឹងថា មានសមភាព៥រូប ដឹកនាំដោយលោកប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ជាប្រធាន។

ក្រុមការងារនេះ មានភារកិច្ចសម្របសម្រួលជាមួយក្រុមហ៊ុន អិកវ៉ធើរ ថេកណឡជី សិក្សាប្លង់លម្អិតនៃអាងប្រព្រឹត្តកម្មទឹកខ្វក់នៅស្ថានីយ៍ទី១ (PS1) និង ២ ( PS2 រួមជាមួយ PS 3) ស្ថិតនៅក្រុងព្រះសីហនុ ខេត្តព្រះសីហនុ ដើម្បីបំរើឱ្យការងារសំណង់ស៊ីវិល។

សម្របសម្រួលជាមួយអាជ្ញាធរដែនដី និងអ្នកពាក់ព័ន្ធក្នុងដំណើរការការដ្ឋាន ។ សិក្សា និងរៀបចំ Bypass (ផ្លូវវាង) តាមបំពង់លូសម្រាប់ទឹកហូរ ចូលផ្ទាល់ទៅសមុទ្រ និងធ្វើមុខទឹកបិត បើក ដោយទុកតែទឹកខ្វក់ ឱ្យហូរចូលទៅក្នុងអាងចម្រោះ ដើម្បីធ្វើប្រព្រឹត្តកម្ម ។

ជាមួយគ្នានេះ ក្រុមការងារបច្ចេកទេសនេះ ក៏អាចប្រើប្រាស់យន្តការក្រុមការងារ និងទីប្រឹក្សាបច្ចេកទេសដែលមានស្រា ប់ក្នុងការងារស្ថាបនាផ្លូវទាំង៣៤ខ្សែ ក្នុងខេត្តព្រះសីហនុ ឱ្យជួយការងារតាមការចាំបាច់៕

កម្ពុជាបាននាំចេញទំនិញមានតម្លៃ១.០៨ពាន់លានដុល្លារទៅកាន់ទីផ្សារអាមេរិក ក្នុងរយៈពេលពីរខែដំបូងនៃឆ្នាំនេះ

ដោយ ប៊ី

ភ្នំពេញៈ ទិន្នន័យរបស់ការិយាល័យស្ថិតិជំរឿន របស់សហរដ្ឋអាមេរិកបានឱ្យដឹងកាលពីថា ប្រទេសកម្ពុជាបាននាំចេញទំនិញ មានតម្លៃប្រមាណ១.០៨ពាន់លានដុល្លារទៅសហរដ្ឋអាមេរិក ក្នុងរយៈពេលពីរខែដំបូងនៃឆ្នាំនេះ កើនឡើង៤៦,៩៦ភាគរយ បើធៀបនឹងរយៈពេលដូចកាលពីឆ្នាំមុន ការនាំចេញមានតម្លៃ៧៣៧,១លានដុល្លារ។

ទិន្នន័យបានបង្ហាញថា ពាណិជ្ជកម្មទ្វេភាគីរវាងប្រទេសទាំងពីរ មានតម្លៃប្រមាណ ១១៣៦លានដុល្លារក្នុងអំឡុងពេលនេះ កើនឡើង៣៩,៩៦ភាគរយ ពី៨១២លានដុល្លារក្នុងឆ្នាំ ២០១៩។ ការនាំចូលរបស់កម្ពុជាមានចំនួន៥៣,២ លានដុល្លារ ធ្លាក់ចុះ២៨,៩៧ ភាគរយពី៧៤,៩លានដុល្លារនៅឆ្នាំ២០១៩។

ប្រទេសកម្ពុជាភាគច្រើននាំចេញសម្លៀកបំពាក់ ស្បែកជើង សម្ភារៈធ្វើដំណើរ អង្ករ និងផលិតផលកសិកម្មផ្សេងទៀត ទៅកាន់សហរដ្ឋអាមេរិក និងនាំចូលរថយន្ត គ្រឿងអេឡិចត្រូនិក និងផលិតផលសម្រេចគ្រប់ប្រភេទ។

ទោះយ៉ាងណា GMAC នៅថ្ងៃទី ២៤ ខែមីនានេះបានចេញសេចក្តីថ្លែងការណ៍មួយដោយជំរុញឱ្យអ្នកទិញកុំបញ្ឈប់ការដឹកជញ្ជូនទំនិញ ដែលបានផលិតរួចហើយ ក៏ដូចជាទំនិញដែលកំពុងផលិត។

ការអំពាវនាវរបស់GMACធ្វើឡើង បន្ទាប់ពីអ្នកបញ្ជាទិញសំខាន់ៗ របស់សហរដ្ឋអាមេរិក និងអ៊ឺរ៉ុបរួមមានក្រុមហ៊ុន H&M, Zara, Mango, Primark, Macys និង JC Penney កាលពីសប្តាហ៍មុនបានប្រកាសថា ពួកគេកំពុងបញ្ឈប់ការ ផលិតដោយសារតែការរីករាលដាលនៃ Covid-19 បានធ្វើឱ្យប៉ះពាល់ដល់តម្រូវការសកល។

ទិន្នន័យរបស់ក្រសួងពាណិជ្ជកម្មអាមេរិកបានបង្ហាញថា ការនាំចេញរបស់កម្ពុជាទៅសហរដ្ឋអាមេរិក មានតម្លៃប្រហែល៥.៣៦ពាន់លានដុល្លារកាលពីឆ្នាំមុន កើនឡើង ៤០ ភាគរយបើធៀបនឹងឆ្នាំ២០១៨ ដែលមានចំនួន៣,៨១៨ពាន់លានដុល្លារ។ ការនាំចូលបានកើនឡើង១៥ភាគរយ ដល់ ៥១៣,៤លានដុល្លារកាល ធៀបនឹងចំនួន៤៤៥,៨ លានដុល្លារនៅឆ្នាំ២០១៨កាលពីឆ្នាំមុន៕

សម្តេចតេជោៈពលរដ្ឋខ្មែរត្រូវតែមានស្បៀងទទួលទានទោះបីប្រទេសស្ថិត ក្នុងស្ថានភាពបែបណាក៏ដោយ

ដោយគង់ សូរិយា

ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា ពលរដ្ឋខ្មែរត្រូវតែមានស្បៀងអាហារទទួលទាន ទោះបីស្ថានភាពក្នុងប្រទេសបែបណាក៏ដោយ។

សម្តេចបានសរសេរលើគណនីផ្ទាល់ខ្លួន លើបណ្តាញទំនាក់ទំនងសង្គម នារសៀលថ្ងៃទី៨ មេសានេះថា នៅក្នុងដំណាក់កាលដែលកម្ពុជា កំពុងប្រយុទ្ឋប្រឆាំងនឹងជំងឺកូវីដ-១៩ ពេលនេះរាជរដ្ឋាភិបាលបានផ្អាកការនាំចេញអង្ករ និងត្រីទៅក្រៅប្រទេស ដើម្បីអោយផលិតផលទាំងនេះកាន់តែសំបូរ និងងាយស្រួលរកទិញ ជាមួយតម្លៃធម្មតានៅទូទាំងប្រទេស។ ប៉ុន្តែចំពោះអង្ករក្រអូបដែលមានកុងត្រា នាំចេញទៅប្រទេសចិនជាមិត្តគឺនៅដំណើរការធម្មតា។

ក្រៅពីអង្ករ និងត្រី គឺសម្តេចតេជោនាយករដ្ឋមន្រ្តី បានឲ្យត្រៀមអំបិល និងត្រៀមរោងចក្រផលិតមី និផលិតទឹកសុទ្ធដបសម្រាប់ជួយប្រជាពលរដ្ឋផងដែរ។ សម្តេចបញ្ជាក់ថា “ដូច្នេះទោះបីកម្ពុជាស្ថិតក្នុងស្ថានភាពបែបណាក៏ដោយ ក៏ប្រជាពលរដ្ឋខ្មែរត្រូវតែមានស្បៀងអាហារទទួលទានដែរ”៕

អ្នកជំនាញអចលនទ្រព្យហុងកុងប្រាប់ពីគន្លឹះដែលអាចធ្វើឱ្យវិស័យជួលអចលនវត្ថុនៅតែមានចរន្ត

ដោយ ហ្សូលី

ភ្នំពេញ៖ វិស័យជួលអចលនវត្ថុដូចជា ការិយាល័យ ខុនដូ អាផាតមិន និងលំនៅដ្ឋាន ហាក់មានសភាពស្ងប់ស្ងាត់មិនថា នៅប្រទេសកម្ពុជា ឬតំបន់អាស៊ាននោះទេ កំពុងជួបប្រទះនឹងភាពជាប់គាំងដោយសារវិបត្តិជំងឺ Covid-19។ ហេតុនេះហើយទើបអ្នកជំនាញអចលនទ្រព្យនៅប្រទេសហុងកុងប្រាប់ពីវិធីសាស្រ្តដែលជួយឱ្យក្រុមហ៊ុនឬម្ចាស់អចលនវត្ថុនៅតែមានចរន្តជួលដូចធម្មតា។

ស្ថាបនិកក្រុមហ៊ុនអភិវឌ្ឍន៍អចលនៈទ្រព្យ Tai Hung Fai លោក Edwin Leong Siu-hung ដែលជាមហាសេដ្ឋីលំដាប់ទី ១៩ លើពិភពលោក បានថ្លែងប្រាប់នៅក្នុងកិច្ចសម្ភាសអន្តរជាតិ កាលពីថ្ងៃទី ០៨ មេសា ឆ្នាំ ២០២០នេះថា វិស័យជួលអចលនវត្ថុដូចជា ការិយាល័យ អគារ និងអចលនវត្ថុផ្សេងៗទៀតកំពុងជាប់គាំង ព្រោះរយៈពេលប៉ុន្មានខែចុងក្រោយនេះ គ្មាននរណាមានទឹកចិត្តចង់បើកជំនួញនោះទេ ដោយសារតែតម្លៃជួលអចលនវត្ថុនៅតែខ្ពស់។

លោកបន្តថា នៅក្នុងស្ថានភាពដើម្បីឱ្យមានផ្លូវរស់ទាំងអស់គ្នា ម្ចាស់អចលនវត្ថុគប្បីយោគយល់ដល់អ្នកជួល ដោយប្រើប្រាស់វិធីសាស្ត្រធ្វើឱ្យចរន្តសាច់ប្រាក់នៅតែចូលក្នុងហោប៉ៅបានដូចជា ម្ចាស់អចលនវត្ថុគួរតែបញ្ចុះតម្លៃចន្លោះពី ២០% ទៅ ៥០% ទៅតាមទីតាំងនិងទំហំអចលនវត្ថុនោះ។ មួយទៀតនោះ ដើម្បីទាក់ទាញឱ្យអ្នកជួលព្រមចុះកុងត្រាថ្មី ម្ចាស់អចលនវត្ថុអាចស្នើលក្ខខណ្ឌពិសេសដូចជា បន្ថែមរយៈពេលជួលដោយមិនគិតថ្លៃចាប់ពី ១ ខែទៅ ៣ ខែ ប៉ុន្តែរក្សាតម្លៃនៅដដែលឬក៏បញ្ចុះតម្លៃក្នុងចំនួនតិច។

មហាសេដ្ឋីរូបនេះបញ្ជាក់ថា នេះជាការជួយដល់អ្នកជួលឱ្យមានដង្ហើមនៅក្នុងបង្វិលសាច់ប្រាក់ ព្រោះពួកគេអាចមានឱកាសនៅក្នុងការរកលុយសម្រាប់ជីវភាពរស់នៅផ្ទាល់ខ្លួនផង និងផ្គត់ផ្គង់តម្លៃជួលផង។ ប្រសិនបើអ្នកជួលមិនមានទំនុកចិត្តដែលអាចផ្គត់ផ្គង់តម្លៃជួលផងនោះ គឺស្ថានការណ៍នឹងពិបាកទាំងអស់គ្នា។

«ទោះបីជាម្ចាស់អចលនវត្ថុគិតថា មិនខ្វះទេអ្នកជួលនិងមិនលើកលែងតម្លៃផងនោះ ច្បាស់ណាស់ទោះបីជារង់ចាំដល់ចុងឆ្នាំ ២០២០ ក៏គ្មាននរណាម្នាក់ហ៊ានមកជួលដែរ» លោក Edwin Leong Siu-hung ពន្យល់។

ប្រធានគណៈកម្មាធិការប្រតិបត្តិរបស់សមាគមអ្នកអភិវឌ្ឍន៍អចលនទ្រព្យ លោក Stewart Leung Chi-kin បានមានប្រសាសន៍ថា ទោះយ៉ាងណាកិច្ចសន្យាបន្តមិនអាចដំណើរការបានទេពីព្រោះអ្នកជួលខ្លះអាចនឹងពិបាកបង់ថ្លៃសេវាគ្រប់គ្រង វិក័យប័ត្រ និងប្រាក់ឈ្នួល ព្រោះអាជីវកម្មកំពុងប្រឈមហានិភ័យ។

លោកបន្តថា ការអនុវត្តជាធម្មតាគឺត្រូវពិនិត្យមើលកិច្ចសន្យាជួលដែលមានស្រាប់ហើយចរចាម្តងទៀត បន្ទាប់ពីបីខែដើម្បីពិនិត្យមើលថាតើស្ថានភាពនោះយ៉ាងដូចម្តេច។ អ្នកអភិវឌ្ឍន៍នីមួយៗស្ថិតនៅក្នុងស្ថានភាពខុសគ្នា ប៉ុន្តែធ្វើយ៉ាងណាស្វែងរកដំណោះស្រាយនិងត្រូវជំនះពេលលំបាកទាំងនេះជាមួយគ្នា៕

(South China Morning Post)

មជ្ឈមណ្ឌលពាណិជ្ជកម្មGold Tower42ជួបនឹងប្រវត្តិសាស្រ្តខ្មៅងងងឹតច្រំដែល

ដោយស៊ីវ ម៉េង

ភ្នំពេញៈ តើវាជាការចៃដន្យឬ? នៅពេលដែលប្រវត្តិសាស្រ្តច្រដែលបានលងបន្លាច មជ្ឈមណ្ឌលពាណិជ្ជកម្មនិងលំនៅដ្ឋានGold Tower42ដែលបានឆ្លងកាត់ទសវត្សរ៍ដ៏ខ្មៅងងឹត ម្តងហើយម្តងទៀត។

មជ្ឈមណ្ឌលពាណិជ្ជកម្មGold Tower42 ជាមជ្ឈមណ្ឌលពាណិជ្ជកម្មចម្រុះដោយមានផ្សារទំនើប ការិយាល័យ ខុនដូ បន្ទីរពេទ្យ និសេវាកម្មចម្រុះជាច្រើនទៀត តែយ៉ាងណាក៏ដោយការប្រកាសលក់គំរោងនេះជាថ្មី មិនទាន់បានធ្វើនៅឡើយទេ ខណៈដំបូងឡើយគំរោងនេះគ្រោងបញ្ចប់ការសាងសង់ចុងឆ្នាំ២០១៩ ប៉ុន្តែការសាងសង់បានយឺតជាងការគ្រោងទុក ដែលអាចបញ្ចប់់នៅឆ្នាំនេះវិញ។

ការសាងសង់អាគារនេះ បានផ្អាកដំណើរការនៅកំឡុងវិបត្តិសេដ្ឋកិច្ច និងហិរញ្ញវត្ថុសាកលកាលពីឆ្នាំ២០០៨ ដែលកំឡូងពេលនោះការសាងសង់បានសម្រេចត្រឹមជាន់ទី ៣១ មុនពេលអាគារនេះបានផ្អាករយៈពេលស្ទើរមួយទសវត្សរ៍ ប៉ុន្តែការសាងសង់បានជួបភាពរអាក់រអួល ពិសេសការលក់ខុនដូ និងផ្សារនៅក្នុងគំរោងនេះ ដោយសារវិបត្តិសេដ្ឋកិច្ចកើតមានជាថ្មី ដែលបណ្តាលមកពីជំងឺCovid-19។

នៅពេលបញ្ចប់ការសាងសង់ Gold Tower 42 នឹងមានកំពស់រហូតដល់១៩២ម៉ែត្រ ហើយវានឹងក្លាយជាអាគារខ្ពស់ជាងគេទី១ នៅក្រុងភ្នំពេញនាឆ្នាំ២០១៩នេះ ខណៈអាគារខ្ពស់ផ្សេងទៀតមិនទាន់បានបញ្ចប់ការសាងសង់។

លោក Kim Tae Yeon ប្រធានក្រុមហ៊ុន YUNWOO ប្រចាំកម្ពុជាបានឲ្យដឹងកាលពីពេលប្រកាសចាប់ផ្តើមសាងសង់អាគារនេះ ជាថ្មីកាលពីចុងឆ្នាំមុនថា អាគារនេះបានចំណាយប្រាក់សាងសង់អស់ ១០០លានដុល្លារហើយ និងត្រូវចំណាយប្រាក់១៤០លានដុល្លារទៀត ដើម្បីបញ្ចប់គំរោងនេះនៅចុងឆ្នាំ២០១៩ខាងមុខ។ មជ្ឈមណ្ឌលពាណិជ្ជកម្មនេះរួមបញ្ចូលផ្សារទំនើប អាគារការិយាល័យ ខុនដូសរុបចំនួន ៣៩៩យូនីត។

នៅពេលចាប់់ផ្តើមជាថ្មីនេះ ក្រុមហ៊ុនYUNWOOបានចុះកិច្ចព្រមព្រៀង ជាមួយក្រុមហ៊ុន Hongtao Decoration និងក្រុមហ៊ុនសាងសង់ឈ្មោះWaiman Construction& Engineering ដែលមានមូលដ្ឋាននៅប្រទេសចិន ដើម្បីសាងសង់បញ្ចប់អាគារនេះ។
យ៉ាងណាPropertyarea.asiaសូមជូនពរឲ្យការសាងសង់ និងដំណើរការលក់របស់អាគារនេះបានទទួលជោគជ័យតាមការគ្រោងទុក៕