ដោយៈរ៉ាណេត

ភ្នំពេញៈ ប្រទេសជប៉ុនកំពុងសម្លឹងមើល ទីផ្សារការងារនៅប្រទេសកម្ពុជា ក៏ដូចជាកម្លាំងពលកម្មទៅធ្វើការនៅក្រៅប្រទេស ខណៈប្រទេសជាមិត្តរបស់កម្ពុជាមួយនេះ មានគម្រោងត្រូវការជ្រើសរើសពលករជំនាញ មកពីបរទេសលើផ្នែកថែទាំងអគារ សំណង់ដល់ទៅប្រមាណ៣០,០០០នាក់ នាពេលខាងមុខនេះ។

នាយកគ្រប់គ្រងសមាគមថែទាំអគារជប៉ុន លោក ហ៊ីរ៉ូស្ស៊ី ហូរីហ្គូឈិ (Hiroshi HORIGUCHI) បានជម្រាប់ជូនរដ្ឋមន្ត្រីក្រសួងការងារ បណ្តុះបណ្តាល និងវិជ្ជាជីវៈ លោក អ៊ិត សំហេង ក្នុងឱកាសដឹកនាំគណៈប្រតិភូនៃមូលនិធិគាំទ្រ ការអប់រំអន្តរជាតិកម្ពុជា (CIESF) និងសមាគមថែទាំអគារជប៉ុននៅព្រឹកថ្ងៃទី២៦ ខែមីនា ឆ្នាំ២០២០នេះថា សមា​គមរបស់ត្រូវការកម្លាំងជំនាញ ផ្នែកថែទាំអគារសរុបចំនួន៣០០០០នាក់ ដោយក្នុងនោះ លោកក៏កំពុងតែសម្លឹងមើលទីផ្សារកម្លាំងជំនាញពីកម្ពុជាផងដែរ។

លោកបានបន្តថា សមាគមថែទាំអគារជប៉ុន មានសមាជិកប្រមាណជា២,៨០០ក្រុមហ៊ុន និងមានបុគ្គិលធ្វើការជាជនជាតិជប៉ុន រួមជាមួយនឹងពលករមកពីបរទេសប្រមា​ណ១លាននាក់។ លោកបន្តថា ដោយសារប្រទេសជប៉ុនកំពុងជូបប្រទះ នឹងបញ្ហាកំណើនមនុស្សចាស់កើនឡើងខ្ពស់ រីឯកម្លាំងពលកម្មពេញវ័យកំពុងមានកំណើនយឺតនោះ បានធ្វើឱ្យប្រទេសប្រឈមនឹងកង្វះកម្លាំងពលកម្ម ក្នុងនោះការងារលើជំនាញថែទាំអគារនេះក៏អាចនឹងជួបបញ្ហាដូចគ្នាដែរ។

ដូច្នេះ សមាគមត្រូវការជ្រើសរើសកម្លាំងពលកម្ម ពីក្រៅប្រទេសយកទៅបំពេញការងារក្នុងប្រទេសខ្លួន ដែលមានតម្រូវការដល់ទៅប្រមាណ៩០ម៉ឺននាក់ ក្នុងនោះគេត្រូវការកម្លាំងពលកម្មពីក្រៅប្រទេសប្រមាណ៣០,០០០នាក់ ហើយនៅឆ្នាំក្រោយនេះលោ​ក​មានបំណងជ្រើសរើសពលករជំនាញពីប្រទេសកម្ពុជា។

រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៉ិត សំហេង បានប្រគល់ការងារនេះ ទៅឱ្យអគ្គនាយកដ្ឋានបណ្ដុះបណ្ដាលបច្ចេកទេសវិជ្ជាជីវៈ និងអគ្គនាយកដ្ឋានការងារ ឱ្យសហការជាមួយសមាគមថែទាំអគារជប៉ុន ព្រមទាំងសហការជាមួយក្រុមហ៊ុនភ្នាក់ងារបញ្ជូនពលកររបស់កម្ពុជា ដើម្បីប្រកាសជ្រើសរើស បណ្ដុះបណ្ដាលភាសាជប៉ុន និងជំនាញ ប្រលងតេស្ត និងបញ្ជូនពលករទៅធ្វើការនៅប្រទេសជប៉ុន។

លោករដ្ឋមន្ត្រីបានបញ្ជាក់ថា “ចំពោះទីតាំងសម្រាប់ការប្រលងតេស្ត គឺមាន២ជម្រើស ដោយទី១ សមាគមអាចយកគ្រឹះស្ថានបណ្ដុះបណ្ដាលណាមួយ របស់ក្រសួងការ​ងារ និងបណ្ដុះបណ្ដាលវិជ្ជាជីវៈ រៀបចំការប្រឡងតេស្ត ហើយក្រសួងមានគ្រឹះស្ថានដែលបណ្ដុះបណ្ដាលជំនាញលើផ្នែកសំណង់ អគ្គិសនី រថយន្តចំនួន៥កន្លែង និងទី២ សមាគមថែទាំងអគារជប៉ុន អាចសហការជាមួយក្រុមហ៊ុនជ្រើសរើស បណ្ដុះបណ្ដាល និងបញ្ជូនពលករនៅកម្ពុជា ដើម្បីដំណើរការការប្រឡងតេស្តសមត្ថភាព។

ការថែទាំអគារ គឺជាកិច្ចការជំនាញចាំបាច់មួយនៅប្រទេសជប៉ុន ដែលមានទាំងការថែទាំអនាម័យ បរិស្ថាន ការគ្រប់គ្រងគុណភាព សុវត្ថិភាព សោភ័ណភាពសំណង់ និងកិច្ចការសម្អាតទាំងក្នុងអគារ និងបរិវេណជុំវិញអគារ ដែលមានការគាំទ្រ និងទទួលស្គាល់ពីក្រសួងសំណង់ និងរាជរដ្ឋាភិបាលជប៉ុន រហូតដល់មានការចេញច្បាប់ពិសេសមួយសម្រា​ប់ប្រទេសជប៉ុនផងដែរ ខណៈពេលដែលបច្ចុប្បន្ន ទីផ្សារការងារនេះកំពុងមានតម្រូវការយ៉ាងខ្លាំងនៅប្រទេសជប៉ុន។

ដោយវុត្ថា

ភ្នំពេញ ក្រសួងសេដ្ឋកិច្ច និងហិរញ្ញវត្ថុ បានប្រកាសដាក់ចេញវិធានការផ្នែកពន្ធដារដើម្បីកាត់បន្ថយផលប៉ះពាល់ នៃបញ្ហាប្រឈមលើសហគ្រាសឧស្សាហកម្ម ផ្នែកវាយនភណ្ឌកាត់ដេរ ដែលបង្កឡើងដោយការព្យួរ ប្រព័ន្ធអនុគ្រោះពន្ធរបស់សហភាពអឺរ៉ុប ឬ EBA។

យោងតាមសេចក្តីប្រកាសលេខ៣១៩ សហវ ដែលចុះហត្ថេលេខាដោយលោកឧបនាយកដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានផ្សព្វ ផ្សាយនៅថ្ងៃទី ២៦ ខែមីនា ឆ្នាំ ២០២០នេះ ឱ្យដឹងថា  សេចក្តីប្រកាសនេះអនុវត្តចំពោះសហគា្រសវាយនភណ្ឌ ផលិតសម្លៀកបំពាក់ ផលិតស្បែកជើង ផលិតការបូបយួរ និងកាបូបដៃ និងផលិតមួក នៅក្នុងប្រទែសកម្ពុជា ដែលរងផលប៉ះពាល់បណ្តាមកពីការព្យួរប្រព័ន្ធនុគ្រោះពន្ធ (EBA)។

សេក្តីប្រកាសនេះបញ្ជាក់ទៀតថា លើកលែងពន្ធលើប្រាក់ចំណូល រយៈពេល៦ខែ សម្រាប់រោងចក្រសហគ្រាស ដែលរងផលប៉ះពាល់កម្រិត២០% ទៅ៣០ % ដោយលើកលែងពន្ធលើប្រាក់ចំណូលប្រចាំឆ្នាំចំនួន៥០% នៃប្រាក់ពន្ធត្រូវបង់សរុប និងលើកលែងពន្ធចំណូលរយៈពេលមួយឆ្នាំ សម្រាប់រោងចក្រសហគ្រាស ដែលរងផលប៉ះពាល់កម្រិត ៤០ % ទៅ ១០០ % ដោយលើកលែងការបង់ពន្ធ លើប្រាក់ចំណូល១០០% នៃប្រាក់ត្រូវបង់ពន្ធសរុប។

គណៈកម្មការអឺរ៉ុបកាលពីថ្ងៃទី១២ ខែកុម្ភៈ ឆ្នាំ២០២០បានសម្រេចដកជាបណ្តោះអាសន្ននូវផ្នែកខ្លះនៃប្រព័ន្ធអនុគ្រោះពន្ធ “គ្រប់មុខទំនិញលើកលែងសព្វាវុធ” ដែលអនុលោ​មតាមមាត្រា១៩នៃបទប្បញ្ញត្តិស្តីពី ប្រព័ន្ធអនុគ្រោះពន្ធទូទៅ (GSP) របស់សហភាពអឺរ៉ុប។

សហភាពបញ្ជាក់ថា ការដកនេះមានចំនួនប្រហែលមួយភាគប្រាំ ឬ១ពាន់លានអឺរ៉ូ នៃការនាំចេញប្រចាំឆ្នាំ របស់ប្រទេសកម្ពុជាទៅកាន់សហភាពអឺរ៉ុប ពោលស្មើនឹងប្រមា​ណ២០ភាគរយ នៃផលិតនាំចេញទៅសហភាពអឺរ៉ុបតែប៉ុណ្ណោះ។

សម្តេចតេជោហ៊ុន សែន នាយកដ្ឋមន្ត្រីនៃកម្ពុជា កាលពីកន្លងមកនេះប្រកាសលើក​លែងពន្ធដល់រោងចក្រសហគ្រាស ក្នុងរយៈពេលចាប់ពី៦ខែ ទៅ១ឆ្នាំ ចំពោះរោងចក្រសហគ្រាសណា ដែលរងគ្រោះផលប៉ះពាល់បណ្តាមកពីវីរុសកូរ៉ូណា និងEBA។

សម្តេចតេជោបន្តទៀតថា “វិធានការរបស់រាជរដ្ឋាភិបាលពេលនេះ បានបង្ហាញឲ្យច្បាស់ថា កម្ពុជាមិនត្រូវការពន្ធ២០% ដែលអឺរ៉ុបបានសម្រេចព្យួរពីកម្ពុជានោះទេ”។

សម្តេចតេជោ បានប្រកាសយ៉ាម៉ឺងមាត់ពីការអនុវត្តច្បាប់របស់កម្ពុជា កម្ពុជាត្រូវរក្សាឯករាជ្យ និងអធិបតេយ្យភាពកម្ពុជារបស់ខ្លួន។ កម្ពុជានឹងមិនស្នើសុំពន្ធ២០% ពីអឺរុបវិញនោះទេ សម្តេចកម្ពុជាបានអះអាងថា កម្ពុជាបានត្រៀមរួចជាស្រេចចំពោះវិបត្តិកូរ៉ូណា និងបញ្ហា EBA នេះ៕

ដោយៈ រ៉ាណេត

ភ្នំពេញៈ រដ្ឋាភិបាលនឹងទទួលបានចំណូលពន្ធ ពីការបង់ពន្ធដោយក្រុមហ៊ុន រ៉ូយ៉ាល់គ្រុប សរុបជាង៧៤៦លានដុល្លារ ទៅលើគម្រោងបង្កើតរោងចក្រផលិតថាមពលអគ្គិសនីដុតធ្យូងថ្ម ដែលផ្តល់អនុភាព៧០០មេហ្គាវ៉ាត់ នៅស្រុកបុទុមសាគរ ខេត្តកោះកុង។

យោងតាមសេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលកម្ពុជា ឱ្យក្រុមហ៊ុនរ៉ូយ៉ាល់ គ្រុប អ៊ិនវេសម៉ិន គ្រុប ឯ.ក សម្រាប់គម្រោង វិនិយោគសាងសង់រោងចក្រអគ្គិសនីដុតធ្យូងថ្ម អានុភាព ៧០០មេហ្គាវ៉ាត់ជាមួយនឹងគម្រោងបង្កើតរោងចក្រផលិតថាមពលអគ្គសនី ក្រោមការវិនិយោគដោយក្រុមហ៊ុន រ៉ូយ៉ាល់គ្រុប ដែលរដ្ឋសភាបានបើកកិច្ចប្រជុំនាព្រឹកថ្ងៃទី២៦ មិនានេះបានឲ្យដឹងថា រដ្ឋាភិបាលនឹងទទួលបានចំណូលពន្ធសរុបចំនួន ៧៤៦,២៦៨,២៥០ដុល្លារក្នុងរយៈពេល៣៨ឆ្នាំ ស្មើនឹងជិត២០លានដុល្លារក្នុងមួយឆ្នាំ ទៅលើពន្ធនៃប្រាក់ចំណូលមុន បែងចែកភាគលាភ និងពន្ធកាត់ទុកលើការប្រាក់។

ដោយឡែកក្នុងករណីអាករលើតម្លៃបន្ថែម (VAT) ត្រូវបានដាក់ឱ្យអនុវត្តលើថ្លៃលក់ថាមពលអគ្គិសនី រដ្ឋនឹងទទួលបានចំណូលពីអាករនេះ សរុបចំនួន១,២លានដុល្លារ ក្នុងរយៈពេលអាជីវកម្ម៣៥ឆ្នាំ។ ចំណូលពន្ធនេះ មិនទាន់គិតបញ្ចូលចំណូលពន្ធមួយចំនួនទៀតដូចជា ពន្ធលើប្រាក់បៀវត្ស ពន្ធកាត់ទុកលើការជួលនានា និងចំណូលពន្ធមួយចំនួនទៀត។

សេចក្តីព្រាងច្បាប់ដដែលបានឲ្យដឹងទៀតថា គម្រោងវិនិយោគបង្កើតរោងចក្រផលិតថាមពលអគ្គិសនី ដែលមានទ្រង់ទ្រាយធំមួយនេះ កាលពីព្រឹកថ្ងៃទី២៦ ខែមីនា ឆ្នាំ២០២០នេះ រដ្ឋសភា បានអនុម័តលើសេចក្ដីព្រាងច្បាប់ស្តីពីការអនុម័តយល់ព្រម លើការធានាទូទាត់របស់រាជរដ្ឋាភិបាលកម្ពុជា ឱ្យក្រុមហ៊ុន រ៉ូយ៉ាល់ គ្រុប អ៊ិនវេសម៉ិនគ្រុប ឯ.ក សម្រាប់គម្រោង វិនិយោគសាងសង់រោងចក្រអគ្គិសនីដុតធ្យូងថ្ម អានុភាព៧០០មេហ្គាវ៉ាត់ នៅខេត្តកោះកុង ត្រូវបានរដ្ឋសភាអនុម័តទាំងស្រុង។

សម្រាប់ទំហំការងារដែលក្រុមហ៊ុនត្រូវសាងសង់ ដូចជា ការសាងសង់រោងចក្រអគ្គិសនីដុតធ្យូងថ្មនាំចូល អនុភាព៧០០មេហ្គាវ៉ាត់  សាងសង់ប្រព័ន្ធតភ្ជាប់អគ្គិសនីតង់ស្យុង២៣០គីឡូវ៉ុល ប្រវែង៥០គីឡូម៉ែត្រ តភ្ជាប់ពីរោងចក្រអនុស្ថានីយបុទុមសាគរ របស់អគ្គិសនីកម្ពុជា សាងសង់ស្ពានដឹកជញ្ជូនធ្យូងថ្មមាន២កំណាត់ ប្រវែងសរុប៦គីឡូម៉ែត្រ និងកន្លែងស្តុកធ្យូងថ្ម  ត្រូវមានផ្លូវចូលទីតាំងគម្រោង ប្រវែង៤០គីឡូម៉ែត្រ និងមានអនុស្ថានី​យ៍​អគ្គិសនីរបស់រោងចក្រ  និងបន្ថែមបរិក្ខាសម្រាប់បញ្ចេញថាមពល ទៅឱ្យអ្នកប្រើប្រាស់ក្នុងតំបន់ រួមមានប្រជាពលរដ្ឋ និងរោងចក្រ សហគ្រាស ឬតំបន់ឧស្សាហកម្ម ដែលអាចនឹងកើតមាននៅពេលអនាគត។

សេចក្តីព្រាងច្បាប់ខាងលើបានឲ្យដឹងថា រោងចក្រនេះមាន អនុភាពដំឡើង៧០០មេហ្គាវ៉ាត់ អនុភាពសុទ្ធ៦៨០មេហ្គាវ៉ាត់។ អគ្គិសនីកម្ពុជា ធានាទិញថាមពលពីគម្រោង៨០ភាគរយក្នុង១ឆ្នាំ។ ទុនវិនិយោគសរុប ១៣៤៤,២០លានដុល្លារអាមេរិក ក្នុងនោះមានទុនផ្ទាល់៣០ភាគរយ និងកម្ចីពីធនាគារ៧០ភាគរយ។

សម្រាប់គម្រោងផលិតរោងចក្រអគ្គិសនីនេះ រាជរដ្ឋាភិបាលកម្ពុជា បានផ្តល់ការលើ​កទឹកចិត្តមួយចំនួនដូចជា លើកលែងពន្ធនាំចូលគ្រឿងចក្រ គ្រឿងម៉ាស៊ីន បរិក្ខាឧបក​រណ៍ និងសម្ភារៈនានា នៃគម្រោងក្នុងរយៈពេលសាងសង់, អាករលើតម្លៃបន្ថែម (VAT) និងអាករពិសេសជាបន្ទុករបស់រដ្ឋ លើកលែងពន្ធលើប្រាក់ចំណូលរយៈពេលល៩ឆ្នាំ គិតចាប់ពីថ្ងៃប្រតិបត្តិការអាជីវកម្មដំបូង លើកលែងថ្លៃសួយសារ និងកាតព្វកិច្ចហិរញ្ញវត្ថុផ្សេងៗ លើការប្រើប្រាស់ទឹក និងធនធានសំណង់ (ថ្ម គ្រួស ខ្សាច់ សាច់ដី) សម្រាប់ការសាងសង់គម្រោង៕

ដោយ ប៊ី

ភ្នំពេញ៖ លោក វេង សាខុន រដ្ឋមន្ត្រីកសិកម្មកម្ពុជា អះអាងថា ស្បៀងអាហាររបស់កម្ពុជាមិនមានបញ្ហាអ្វីទេ និងអាចបំពេញសេចក្តីត្រូវការរបស់ប្រជាពលរដ្ឋបាន ទោះបីមានវិបត្តិនៃជំងឺ COVID-19។ នេះជាការឆ្លើយតបទៅនឹងក្តីបារម្ភរបស់ប្រជាពលរដ្ឋ អំពីសន្តិសុខស្បៀងរបស់កម្ពុជារួមមាន អង្ករ បន្លែ ត្រី សាច់ នៅគ្រាដែលមានការរីករាលដាលនៃជំងឺកូវីដ១៩ ថាតើអាចបំពេញសេចក្តីត្រូវការ របស់ប្រជាជនបានទេ នៅពេលជំងឺនេះរីករាលដាលខ្លាំង។

លោក វេង សាខុន បានមានប្រសាសន៍នៅថ្ងៃទី២៥ ខែមីនា ឆ្នាំ២០២០នេះ ថា ការដែលលោកហ៊ានអះអាងបែបនេះ ដោយសារតែបច្ចុប្បន្នស្រូវអង្កររបស់កម្ពុជា មានបម្រុងទុកច្រើន ហើយការចិញ្ចឹមសត្វ (ជ្រូក គោ មាន់ ទារ) ចិញ្ចឹមត្រី និងការដាំដុំបន្លែបង្ការ មានដំណើរការជាធម្មតាគ្មានអ្វីប៉ះពាល់នោះឡើយ។

លោករដ្ឋមន្ត្រី វេង សាខុន បានបញ្ជាក់ថា “ចំពោះបញ្ហាសន្តិសុខស្បៀងសម្រាប់កម្ពុជា ខ្ញុំគិតថាមិនមានបញ្ហាអ្វី ដែលកើតឡើងទេ ព្រោះស្រូវយើងមាននៅសល់ច្រើន ការចិញ្ចឹមជ្រូករបស់យើងក៏អាចផ្គត់ផ្គង់ទីផ្សាររហូតដល់៨០ភាគរយ ហើយការចិញ្ចឹមត្រីរបស់យើងក៏ដំណើរការធម្មតា ការដាំដុះបន្លែបង្ការរបស់កសិករក៏ដំណើរការធម្មតា និយាយរួមវិស័យកសិកម្មរបស់កម្ពុជា នៅដំណើរការធម្មតា”។

ជាមួយគ្នានេះ លោករដ្ឋមន្ត្រី បានលើកយកនូវសមិទ្ធផលមួយចំនួន ក្នុងការថែរក្សាសន្តិសុខស្បៀង ដែលសម្រេចដោយក្រសួងកសិកម្ម ក្នុងឆ្នាំ២០១៩មានដូចជា ការងារបង្កបង្កើនផលស្រូវ នៅទូទាំងប្រទេសសម្រេចបានលើផ្ទៃដីចំនួន ៣.៣៣លានហិកតា។ ទិន្នផលស្រូវគិតជាមធ្យមទាំងប្រាំង និងវស្សាសម្រេចបាន ៣.៣៣តោនក្នុង១ហិកតា ដែលមានបរិមាណផលស្រូវសរុបទទួលបានជាង១០.៨៨លានតោន មានអតិរេកស្រូវ (ស្រូវលើស) ចំនួនជាង៥.៧៦លានតោនគិតជាអង្ករស្មើនឹង ៣.៦៩លានតោន។

ដោយឡែកសម្រាប់ផលិតកម្មដំណាំរួមផ្សំ និងឧស្សាហកម្មរយៈពេលខ្លី ទទួលបានបរិមាណផលប្រមាណជាង ១៦លានតោននៅឆ្នាំ២០១៩។

ការនាំចេញផលិតផលកសិកម្មសរុប សម្រេចបានប្រមាណ ៧ លានតោន ដែលក្នុងនេះការនាំចេញផ្លូវការមានចំនួន៤.៨៧លានតោន កើនលើសឆ្នាំមុនជាង១៣% ដែលក្នុងនោះការនាំចេញផ្លែចេក ម្សៅដំឡូងមី គ្រាប់ស្វាយចន្ទី ពោត កៅស៊ូ ស្ករអំពៅ ប្រេងដូងឆៅ បានកើនឡើងគួរឲ្យកត់សម្គាល់។ បរិមាណអង្ករនាំចេញផ្លូវការមានចំនួន ៦២០ពាន់តោនក្នុងឆ្នាំ២០១៩ ធៀបនឹងឆ្នាំ២០១៨ នាំចេញបាន ៦២៦ពាន់តោន។

តាមការស្រាវជ្រាវបានបង្ហាញថា ក្នុងឆ្នាំ២០១៩នេះ ការនាំចេញស្រូវក្រៅផ្លូវការមានចំនួនជាង២លានតោន តាមច្រកសំខាន់ៗក្នុងខេត្តជាប់ព្រំដែន ប្រទេសវៀតណាម។

ពាក់ព័ន្ធការការចិញ្ចឹមសត្វវិញ លោករដ្ឋមន្ត្រីបញ្ជាក់ថា ក្រសួងក៏បានជំរុញការចិញ្ចឹមសត្វជាលក្ខណៈទំនើប ការផលិតចំណីសត្វក្នុងទ្រង់ទ្រាយមធ្យម និងធំ ដើម្បីគាំទ្រដល់ចលនាចិញ្ចឹមសត្វ រួមជាមួយនឹងការលើកកម្ពស់ប្រព័ន្ធផ្តល់សេវាបច្ចេកទេស កែលម្អពូជសត្វ ការកែច្នៃផលិតផលបសុសត្វ ការបង្កើតសត្តឃាតដ្ឋានទំនើប ព្រមទាំងការសម្រួលពាណិជ្ជ-កម្មសត្វ និងផលិតផលសត្វ។

ជាការកត់សម្គាល់កន្លងមក ការចិញ្ចឹមសត្វតាមប្រពៃណីត្រូវបានផ្លាស់ប្តូរបន្តិចម្តងៗ ដោយបានប្តូរទិសដៅផលិតកម្មសម្រាប់តែតម្រូវការក្នុងគ្រួសារ ទៅជាការចិញ្ចឹមសម្រាប់ធ្វើពាណិជ្ជកម្មវិញ។ ការផ្លាស់ប្តូរបែបផែនផលិតកម្មនេះបានកើនឡើងជាលំដាប់ ជាក់ស្តែងក្នុងឆ្នាំ២០១៩នេះ ផលិតកម្មសត្វសម្រេចបានចំនួន៤៥.៨ លានក្បាល កើនឡើង៣.៣% ធៀបនឹងឆ្នាំ២០១៨។

ការចិញ្ចឹមសត្វជាលក្ខណៈពាណិជ្ជកម្ម មានបានកើន៣៧% ធៀបនឹងឆ្នាំ២០១៨។ ការផលិតនិងផ្គត់ផ្គង់សាច់ មានការកើនឡើងជារៀងរាល់ឆ្នាំ ពោលគឺបានកើនពី ២០៩ពាន់តោននៅឆ្នាំ២០១៥ ដល់២៣៩ពាន់តោននៅក្នុងឆ្នាំ២០១៩។

សម្រាប់ការវិស័យជលផលវិញ ក្នុងឆ្នាំ២០១៩ ផលចាប់ពីធម្មជាតិ និងផលវារីវប្បកម្មសម្រេចបានចំនួនជាង៩០៨ពាន់តោន ក្នុងនោះ ផលនេសាទទឹកសាបសម្រេចបាន ៤៧៩ពាន់តោន, ផលនេសាទសមុទ្រ ១២២ពាន់តោន និងផលវារីវប្បកម្ម (ការចិញ្ចឹមត្រី) សម្រេចបានចំនួន ៣០៧ពាន់តោន កើនឡើង ២១% ធៀបនឹងឆ្នាំ២០១៨៕

ដោយ ប៊ី

ភ្នំពេញ៖ ការវិនិយោគឥណ្ឌូនេស៊ីនៅកម្ពុជាមានទំហំទឹកប្រាក់ប្រមាណ ៣៥០ លានដុល្លារ ខណៈសកម្មភាពពាណិជ្ជកម្មបាននិងកំពុងកើនឡើងរវាងប្រទេសទាំងពីរ។

លោក ហោ ណាំបូរ៉ា ឯកអគ្គរដ្ឋទូតកម្ពុជាប្រចាំនៅឥណ្ឌូនេស៊ី បានប្រាប់ស្ថាប័នសារព័ត៌មាន Eurasia Review កាលពីថ្មីៗនេះថា វិនិយោគិនឥណ្ឌូនេស៊ីមានក្តីរំភើបចំពោះសក្តានុពលសេដ្ឋកិច្ច និងមានកំណើនយ៉ាងឆាប់រហ័សរបស់កម្ពុជា។

លោក បានថ្លែងថា “យើងមានទឹកប្រាក់ប្រហែល ៣៥០ លានដុល្លារក្នុងការវិនិយោគឥណ្ឌូនេស៊ីនៅកម្ពុជា។ ខ្ញុំចង់អញ្ជើញវិនិយោគិនឥណ្ឌូនេស៊ីមកកម្ពុជាបន្ថែមទៀត”។

របកគំហើញដ៏ធំបំផុតបានកើតឡើងកាលពីឆ្នាំមុន នៅពេលក្រុមហ៊ុនអាកាសចរណ៍ឥណ្ឌូនេស៊ី Citilink ជាមួយការដឹកជញ្ជួនតម្លៃទាបបានបើកជើងហោះហើរត្រង់រវាងទីក្រុងហ្សាការតានិងភ្នំពេញ។

លោក ណាំបូរ៉ា “វាជាអំណោយដ៏អស្ចារ្យបំផុតក្នុងការកត់សម្គាល់នូវទំនាក់ទំនងមិត្តភាពរវាង ៦០ ឆ្នាំរវាងឥណ្ឌូនេស៊ី និងកម្ពុជា។ ការតភ្ជាប់ផ្លូវអាកាសមានសារៈសំខាន់ណាស់ក្នុងការជំរុញទំនាក់ទំនងសេដ្ឋកិច្ច និងទំនាក់ទំនងរវាងប្រជាជន និងប្រជាជន”។

ក្រសួងពាណិជ្ជកម្មបានឱ្យដឹងថា ពាណិជ្ជកម្មទ្វេភាគីរវាងកម្ពុជានិងឥណ្ឌូនេស៊ីបានកើនឡើង ៤៦ ភាគរយដល់កម្រិតខ្ពស់ជាង ៧៩២ លានដុល្លារកាល បើធៀបនឹង ៥៤៣ លានដុល្លារក្នុងឆ្នាំ ២០១៨ ។

ទិន្នន័យបានបង្ហាញថា ប្រទេសកម្ពុជាបាននាំចេញទំនិញ ៤ ភាគរយច្រើនជាងកាលពីឆ្នាំមុនឬ ២២,៣ លានដុល្លារអាម៉េរិក ខណៈដែលការនាំចូលបានកើនឡើងដល់ ៧៧០ លានដុល្លារកើនឡើង ៤៧ ភាគរយ។

សកម្មភាពពាណិជ្ជកម្មបាននិងកំពុងកើនឡើងរវាងប្រទេសទាំងពីរចាប់តាំងពីខែកញ្ញាឆ្នាំ ២០១៧៕