ដោយ វុត្ថា

ភ្នំពេញ៖ ក្រសួងសាធារណៈការ និងដឹកជញ្ជូនបានឱ្យដឹងថា ការងារជួសជុលផ្លូវជាតិលេខ៣៣ (គម្រោងជំនន់ទឹកភ្លៀង) ដោយក្រាលកៅស៊ូDBST ទទឹង៧m មាន១០កំណាត់ សម្រេចការអនុវត្តបាន៧០% ដែលតាមការប៉ាន់ស្មាននឹងហើយរួចរាល់នៅមុខចូលឆ្នាំខ្មែរមកដល់នាពេលខាងមុខនេះ។

ក្រសួងសាធារណៈការ និងដឹកជញ្ជូបានផ្សព្វផ្សាយនៅលើគេហទំព័រ ហ្វេសបុកផ្លូវការរបស់ខ្លួនកាលពីល្ងាចថ្ងៃទី ១៦ ខែមីនា ឆ្នាំ ២០២០ ម្សិលមិញនេះថា បន្ថែមពីនោះបន្តស្តារលូអ៊ុយលើកំណាត់ផ្លូវជាតិលេខ៣៣A ផងដែរ កាលពីថ្ងៃទី១៥ ខែមីនា ឆ្នាំ២០២០ ដោយមន្ទីរសាធារណការ និងដឹកជញ្ជូនខេត្តកែប។

លោក ជិន វុទ្ធី អនុប្រធានមន្ទីរសាធារណការ និងដឹកជញ្ជូនខេត្តកែបបានមានប្រសាសន៍ថានាអំឡុងពេលចុងក្រោយនេះ កម្លាំងនៃមន្ទីររបស់លោកបាន និងកំពុងមមាញឹកក្នុងការងារជួលជុល ថែទាំផ្លូវសំខាន់ៗ ជាច្រើនខ្សែនៅទូទាំងខេត្ត ដើម្បីសម្រួលដល់ការធ្វើដំណើររបស់ភ្ញៀវទេសចរណ៍។ លោកបន្តថា ជាធម្មតារាល់ចុងសប្តាហ៍ ឬថ្ងៃបុណ្យទានម្តងៗ ភ្ញៀវជាតិ និងអន្តរជាតិតែងមកកម្សាន្តនៅរមណីយដ្ឋាននានាក្នុងខេត្តកែបយ៉ាងច្រើនកុះករ។

លោកអនុប្រធានមន្ទីរបានបន្តថា ដើម្បីលម្អសោភ័ណភាពផ្លូវ ក៏ដូចជាសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរទូទៅក្នុងឱកាសបុណ្យចូលឆ្នាំថ្មីប្រពៃណីជាតិខាងមុខ មន្ទីរបានធ្វើការបែងចែកជាច្រើនក្រុមសម្រាប់កិច្ចការងារដ៏មមាញឹកនេះ។ កម្លាំងទាំងនោះ រួមមានក្រុមប៉ះអ៊ុតផ្លូវ ក្រុមរៀបចំសួនច្បារតាមបណ្តោយផ្លូវជាតិលេខ៣៣ តភ្ជាប់ជាមួយផ្លូវទៅខេត្តកំពតជាដើម។

លោក ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណៈការ និងដឹកជញ្ជូនធ្លាប់បានឱ្យដឹងថា ក្រសួងបានជួសជុលកំណាត់ផ្លូវជាតិលេខ៣៣ ក្នុងភូមិសាស្ត្រកែប និង ខេត្តកំពតនេះ ដោយសារផ្លូវនេះបានទទួលរងនូវផលប៉ះពាល់ដោយជំនន់ទឹក ភ្លៀងនាពេលកន្លងមក។

លោកបន្តថា រាជរដ្ឋាភិបាល មានគម្រោងលើកកម្ពស់គុណភាពផ្លូវខេត្ត ផ្លូវជាតិ ជាច្រើនទៀតទៅដល់គ្រប់ច្រកល្ហក ដើម្បីប្រជារាស្ត្រមានឱកាសរកចំណូលបន្ថែម ស្របតាមគោលនយោបាយកាត់បន្ថយភាពក្រីក្រ របស់រាជរដ្ឋាភិបាល។

លោកទេសរដ្ឋមន្ត្រី ស៊ុន ចាន់ថុល បានអំពាវនាវដល់បងប្អូនប្រជាពលរដ្ឋ ក្រុមហ៊ុនដឹកជញ្ជូន និងអាជ្ញាធរពាក់ព័ន្ធទាំងអស់ឱ្យគោរពច្បាប់ចរាចរណ៍ និងមិនត្រូវដឹកជញ្ជូនលើសទម្ងន់កម្រិតកំណត់ ដើម្បីចូលរួមកាត់បន្ថយគ្រោះថ្នាក់ចរាចរណ៍ ថែរក្សាហេដ្ឋារចនាស្ពានថ្នល់ដែលជាសម្បត្តិដ៏មហាសាល របស់ប្រទេសជាតិយើងឱ្យគង់វង្ស និងប្រើប្រាស់ឱ្យបានយូរអង្វែង៕

ដោយៈ រ៉ាណេត

ភ្នំពេញៈ ភាពកង្វះទីចំណតយានយន្តបានចូលរួម នៅក្នុងបញ្ហាដែលកំពុងប្រឈមនៅពេលបច្ចុប្បន្ន ជាពិសេសនៅក្នុងរាជធានីភ្នំពេញ ដែលកំពុងតែមានកំណើនអគាពា​ណិ​ជ្ជកម្មធំៗ និងខ្ពស់ៗ ដែលចាំបាច់ត្រូវមានការពិចារណា ទៅលើការសាងសង់ទីចំណ​តនេះ ដើម្បីបញ្ចៀសបញ្ហា និងកាត់បន្ថយការកកស្ទះចរាចរណ៍។

អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូតបានថ្លែងក្នុងសន្និសីទសារព័ត៌មានកាលពីព្រឹកថ្ងៃទី១៦ ខែមីនា ឆ្នាំ២០២០ បានទទួលស្គាល់ចំពោះភាពខ្វះខាតទីចំណតរបស់អគារមួយចំនួន ដែលកំពុងតែបង្កជាបញ្ហាប៉ះពាល់ដល់សណ្តាប់ធ្នាប់ ជាពិសេសការកកស្ទះចរាចរណ៍។

លោកបានមានប្រសាសន៍ថា “មុនឆ្នាំ១៩៩៧រាល់ការសាងសង់សំណង់មួយចំនួនធំ មិនមានសុំច្បាប់សាងសង់នោះទេ ហើយក៏មិនបានគិតគិតទៅលើបទដ្ឋានផ្សេងៗផងដែរ”។ លោកបន្ថែមថា “សំណង់ដែលសុំច្បាប់អនុញ្ញាតសាងសង់ ក្នុងចន្លោះឆ្នាំ១៩៩៧ -២០១៥ ចាប់ផ្តើមស្របតាមបទដ្ឋាននៃអនុក្រឹត្យលេខ៨៦ ដោយសំណង់ទាំងនោះបានគិតគូរពីបទដ្ឋានទីចំណត ប៉ុន្តែជាបទដ្ឋាននៅមិនទាន់សមស្រប ទៅតាមស្ថានភាពនៃការអភិវឌ្ឍសេដ្ឋកិច្ចសង្គម ដូចដែលយើងបានឃើញសព្វថ្ងៃនោះទេ”។

អ្នកនាំពាក្យរូបនេះបានបន្តទៀតថា នៅក្នុងអំឡុងពេលខាងលើនេះ បទដ្ឋានសំណ​ង់ មិនបានលម្អិតទៅលើទីចំណតជាសំខាន់នោះទេ ដោយសារតែគ្រានោះយើងចង់បាន និងចង់ឃើញមានការអភិវឌ្ឍ មានភាពរីកដុះដាលនៃសំណង់អគារនានា នៅទូទាំងប្រទេ​ស ហើយការធ្វើចរាចរណ៍ក៏មិនទាន់កកកុញដូចសព្វថ្ងៃនេះដែរ។ ភាពកកស្ទះចរាចរណ៍នៅពេលបច្ចុប្បន្ននេះ វាពិតណាស់ថាមិនមែនជារឿងល្អនោះទេ ប៉ុន្តែវាបានឆ្លុះបញ្ចាំងពីការអភិវឌ្ឍយ៉ាងគំហុករបស់ប្រទេសកម្ពុជា។

ចាប់តាំងពីថ្ងៃទី៣ ខែមេសា ឆ្នាំ២០១៥ រាជរដ្ឋាភិបាលបានចេញអនុក្រឹត្យលេខ៤២ ស្ដីពីនគរូបនីយកម្មនៅក្នុងរាជធានី និងតាមបណ្តាខេត្តក្រុង ក្រសួងចាប់ផ្ដើមកំណត់ពីបទដ្ឋានទីចំណត ដោយគ្រប់សំណើរសុំលិខិតអនុញ្ញាត សាងសង់ទាំងអស់ត្រូវបានកំណត់បទដ្ឋានចំណត ទាំងប្រភេទជាអគារពាណិជ្ជកម្ម ជាភោជនីយដ្ឋាន រោងចក្រ រោងកុន អគារស្នាក់នៅរួម ក៏ដូចជាសណ្ឋាគារជាដើម គឺសុទ្ធតែមានការកំណត់បទដ្ឋានចំណ​តទាំងអស់។

សម្រាប់អគារស្នាក់នៅរួមឬខុនដូ គឺកំណត់១២០ម៉ែត្រការ៉េនៃសំណង់ ត្រូវមានចំណតមួយ អគារសណ្ឋាគារដែលមានចំនួន៥បន្ទប់ គឺមានចំណតមួយ ហើយបើមាន៣០បន្ទប់ ត្រូវមានចំណតរថយន្តក្រុងមួយ។

អគ្គលេខាធិការរងគណៈកម្មកាស្ថាបត្យកកម្ពុជា-អាស៊ាន លោកសាស្ត្រាចារ្យ ទួស សាភឿន ធ្លាប់បានមានប្រសាសន៍ថា នៅក្នុងគម្រោងសាងសង់អគារនីមួយៗ គេតែងតែបានគិតទៅលើទីចំណតយានយន្ត ដែលជាចំណុចសំខាន់មួយ ក្នុងចំណោមចំណុចសំខា​ន់ជាច្រើនទៀតនៅក្នុងតួអគារ។

លោកសាស្ត្រាចារ្យបានបញ្ជាក់ថា “មិនថាចំពោះតែខុនដូ អាផាតមិន មជ្ឈមណ្ឌលពាណិជ្ជកម្ម ឬជាអគារសម្រាប់បម្រើវិស័យការិយាល័យនោះទេ ទីចំណតសម្រាប់យានយន្តគ្រប់គឺចាំបាច់បំផុតដែលត្រូវយកចិត្តទុកដាក់”។

ជាទូទៅទីចំណត គេតែងសាងសង់ប្រមាណ៦០ទៅ៧០ភាគរយ ធៀបទៅនឹងចំនួ​នយូនីតសរុប ដោយមានច្រកចេញ-ចូលទូលាយងាយស្រួលបត់ និងមានសុវត្ថិភាពខ្ពស់។

លោកទួស សាភឿនបានបន្តថា “ជួនកាលគេអាចសាងសង់នៅជាន់ក្រោមដី ឬជាន់ផ្ទាល់ដីឡើងលើជាដើម ដែលវាអាស្រ័យទៅតាមគម្រោងប្លង់មេ។ ជាទូទៅសម្រាប់ទីចំណតរថយន្តមួយគ្រឿង គេត្រូវការទំហំចាប់ពី៣០ ទៅ៣៥ម៉ែត្រការ៉េ ប៉ុន្តែបើផ្ទៃអគាររបស់អាផាតម៉ិនឬអគារការិយាល័យ គេត្រូវគិតចន្លោះពី៤០-៥០ ម៉ែត្រការ៉េ”៕

ដោយ ហ្សូលី

ភ្នំពេញៈ គម្រោងខ្សែក្រវ៉ាត់១ផ្លូវ១របស់ចិនបានកំណត់ថា នឹងត្រូវស្ថាបនាឱ្យចប់ជាស្ថាពរនៅឆ្នាំ២០៤៩ ដែលជាគម្រប់១០០ឆ្នាំនៃសាធារណរដ្ឋប្រជាមានិតចិន។ មហិច្ឆិតារបស់ចិន គឺចង់សម្រេចគោលដៅនេះនៅរយៈពេល២៩ឆ្នាំក្រោយ ខណៈពេលដែលបច្ចុប្បន្នស្ទើរតែទូទាំងពិភពលោក កំពុងជួបប្រទះវិបត្តិសេដ្ឋកិច្ច ដោយសារការផ្ទុះវីរុសឆ្លងកូវីដ១៩។

យោងទៅតាមការផ្សព្វផ្សាយរបស់សារព័ត៌មានក្នុងស្រុក និងក្រៅស្រុកបានឱ្យដឹងថា រាល់គម្រោងធំៗនៅក្នុងតំបន់អាស៊ី ត្រូវបានពន្យាពេលគ្រប់គម្រោង។ មន្ត្រីភ្នាក់ងាររបស់គម្រោងស្ថាបនាប្រទេសចិនបានបញ្ជាក់ថា ចិននឹងបន្តស្ថាបនានៅពេលដែលឧប​សគ្គកំពុងកើតមានបច្ចុប្បន្នកន្លងផុតសិន។

គម្រោងខ្សែក្រវ៉ាត់មួយ ផ្លូវមួយ នឹងត្រូវវិនិយោគនៅតាមបណ្តារប្រទេសជាច្រើននៅជុំវិញអាស៊ី និងអ៉ឺរ៉ុប ដែលក្នុងនោះមានដូចជា កម្ពុជា ឥណ្ឌូនេស៊ី ឥណ្ឌា ជាដើម។ និយាយជារួម គឺមានភាពជាដៃគូជាមួយប្រទេសសរុប១៣៧ប្រទេស ដែលមានការផ្គត់ផ្គង់គ្រឿងសំណង់ ធនធានមនុស្ស វត្ថុធាតុដើម ពីខាងប្រទេសចិនទាំងស្រុង។

មិនមែនត្រឹមតែផលប៉ះពាល់ពីវីរុសតែមួយមុខទេ ធនាគារពិភពលោក (WHO) បានឱ្យដឹងថា ហានិភ័យនៃអំពើពុករលួយ បញ្ហាបរិស្ថាន និងហិរញ្ញវត្ថុដែលត្រូវវិនិយោគមួយចំនួន អាចជួបប្រទះនាពេលខាងមុខ ដែលមិនប្រាកដថានឹងមាននិរន្តភាពឬយ៉ាងណានោះទេ។

គម្រោងខ្សែក្រវ៉ាត់មួយ ផ្លូវមួយ មិនបញ្ជាក់តែនៅលើហេដ្ឋារចនាសម្ព័ន្ធផ្លូវថ្នល់តែប៉ុណ្ណោះទេ តែក៏មានដូចជា ការអភិវឌ្ឍលើបណ្តាញផ្លូវដែក និងកំពង់ផែផងដែរ ក្នុងគោលបំណងបង្កើនទំហំពាណិជ្ជកម្ម ងាយស្រួលនៅក្នុងការដឹកជញ្ជូនទំនិញ ដើម្បីជម្រុញសេដ្ឋកិច្ចប្រទេសនិមួយៗមានកំណើនកាន់តែខ្ពស់។

ជាក់ស្តែងគម្រោងបណ្តាញផ្លូវដែកល្បឿនលឿន តម្លៃជាង៥ពាន់លានដុល្លារនៅឥណ្ឌូនេស៊ី និងទំនប់វារីអគ្គិសនី ត្រូវផ្អាកដំណើរការ ដោយសារខ្វះខាតធនធានមនុស្ស និងការដាក់រឹតបន្តឹងការធ្វើដំណើរ។ កត្តាទាំងអស់នេះ អាចជាឧបសគ្ករារាំងនៃគម្រោងខ្សែក្រវ៉ាតមួយផ្លុវមួយរបស់ចិន មកទល់ពេលនេះ មិនទាន់មានដំណោះស្រាយនៅឡើយទេ៕

ដោយៈ រ៉ាណេត

ភ្នំពេញៈ តាមការសិក្សារបស់អ្នកជំនាញ នៅក្នុងវិស័យអចលនទ្រព្យបានឱ្យដឹងថា ពីមួយឆ្នាំទៅមួយឆ្នាំ ជាមួយនឹងកំណើននៃចំនួនប្រជាសាស្ត្រ បានធ្វើឱ្យតម្រូវការលំនៅដ្ឋានកើនឡើង រហូតដល់ប្រមាណ៥ម៉ឺនខ្នងក្នុងមួយឆ្នាំ ដែលជម្រុញអ្នកវិនិយោគ និងអភិវឌ្ឍន៍ ក្នុងវិស័យជាច្រើនបណ្តាក់ទុនសាងសង់ ដើម្បីឆ្លើយតបទៅនឹងតម្រូវការយ៉ាងផុលផុស ដែលក្នុងរួមមានបណ្តុំលំនៅដ្ឋានលក្ខណៈបែបបុរី និងគម្រោងអភិវឌ្ឍន៍បុរីបានកើនឡើងដល់៣២៧ទីតាំងរួចទៅហើយ។

អគ្គនាយករដ្ឋបាល និងជាអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បានមានប្រសាសន៍កាលពីថ្ងៃទី១៦ ខែមីនា ឆ្នាំ២០២០ថា បើទោះជាវិស័យសំណង់លំនៅដ្ឋាន នៅពេលបច្ចុប្បន្ននេះ មានការអភិវឌ្ឍ និងរីកចម្រើនយ៉ាងគំហុកក៏ដោយ ប៉ុន្តែចំនួននៃការផ្គត់ផ្គង់ទាំងនេះ នៅមិនទាន់លើសពីតម្រូវការជាក់ស្ដែងនោះឡើយ។

លោកបានបញ្ជាក់ថា “ជាការឆ្លើយតបទៅនឹងតម្រូវការជាក់ស្ដែង ផ្នែកវិស័យឯកជនបានខិតខំ ក្នុងការអភិវឌ្ឍទៅលើគម្រោងសំណង់លំនៅដ្ឋានជាច្រើន ជាពិសេសនៅតាមតំបន់ទីប្រជុំជននៃបណ្តាស្រុកខេត្ត ក៏ដូចជានៅតាមតំបន់ជាយក្រុងផងដែរ ដែលគិតមកដល់ពេលនេះ គម្រោងសំណង់លំនៅដ្ឋានមានលក្ខណៈដូចជាបុរី និងគម្រោងអភិវឌ្ឍន៍បុរីបានកើនឡើងរហូតដល់៣២៧ទីតាំងនៅទូទាំងប្រទេស”។

លោកបានមានប្រសាសន៍បន្តទៀតថា អ្វីដែលក្រសួងដែនដីចង់បាន គឺការអភិវឌ្ឍ ការវិនិយោគ ការសាងសង់វិស័យសំណង់ ដែលជាការបង្កើនធនធាន និងសេដ្ឋកិច្ចសម្រា​ប់ប្រទេសជាតិ ហើយកំណើននៃការវិនិយោគ និងអភិវឌ្ឍន៍វិស័យលំនៅដ្ឋានដ៏ផុសផុលនៅពេលនេះ នៅមិនទាន់លើសតម្រូវការនៅឡើយនោះទេ។

លោកបញ្ជាក់ថា តាមទ្រឹស្ដីសេដ្ឋកិច្ចបានបញ្ជាក់ថា បើការផ្គត់ផ្គង់លើស លុះត្រាតែតម្លៃត្រូវបានធ្លាក់ចុះ ប៉ុន្តែសម្រាប់តម្លៃលំនៅដ្ឋាន នៅកម្ពុជានាពេលបច្ចុប្បន្ននេះ មិនមានការធ្លាក់ចុះនោះទេ ផ្ទុយទៅវិញមានតែការរក្សាតម្លៃទីផ្សារ និងអាចបន្តកើនឡើង ដែលជាសញ្ញាបញ្ជាក់ថា តម្រូវការទីផ្សារនៅតែបន្តមាន។

ប្រធានសមាគមអ្នកអភិវឌ្ឈន៍លំនៅដ្ឋានកម្ពុជា លោកឧកញ៉ា លី ហួរ បានមានប្រសាសន៍ថាកាលពីចុងសប្ដាហ៍កន្លងទៅថា សំណង់លំនៅស្ថាន នៅតែជាតម្រូវការយ៉ា​ងខ្ពស់ទៅថ្ងៃអនាគត ដូច្នេះសមាគមក៏ត្រូវតែបន្តការខិតខំទៅមុខយូរអង្វែង និងបន្តពង្រីកសក្តានុពលរបស់ខ្លួន ឈរលើចក្ខុវិស័យនិងទិសដៅវែងឆ្ងាយ ក្នុងការចូលរួមជាមួយរាជ   រដ្ឋាភិបាលកម្ពុជា។

លោកឧកញ៉ាបញ្ជាក់ថា “បច្ចុប្បន្នសមាគមរបស់លោក មានសមាជិកសរុប៥៨ក្រុ​ម​ហ៊ុន សុទ្ធសឹងជាក្រុមហ៊ុនអភិវឌ្ឍលំនៅឋាន និងមានការគាំទ្រយ៉ាងពេញទំហឹង ពីអ្នកវិនិយោគលើវិស័យអចលនទ្រព្យជាតិ និងអន្តរជាតិព្រមទាំងរដ្ឋាភិបាលកម្ពុជាផងដែរ”។

លោកឧកញ៉ាលី ហួរបានបន្តទៀតថា ឈរលើភាពរីកចំរើននៃវិស័យអភិវឌ្ឍលំនៅស្ថានឥតឈប់ឈរ ដែលជាផ្នែកមួយនៃឆ្អឹងខ្នងសេដ្ឋកិច្ចជាតិនោះ សមាគមបានរួមចំណែ​កអភិវឌ្ឍវិស័យអចលនទ្រព្យមិនថា នៅរាជធានីភ្នំពេញទេ សូម្បីតែនៅតាមបណ្តាខេត្តផងដែរ ដោយបានប្រែក្លាយដី អោយមានតំលៃពោរពេញ ទៅដោយសំណង់អគារទំនើប បុរីលំនៅស្ថាន មជ្ឈមណ្ឌលពាណិជ្ជកម្ម  អគារការិយាល័យ ផ្សារទំនើបនិងសំណង់បែបទំនើបៗមានបណ្តាញហេដ្ឋារចនាសម្ព័ន្ធ បណ្តាញផ្លូវ បណ្តាញទឹកនិងមានប្រព័ន្ធអគ្គិសនី លើកកំពស់ជីវភាពរស់នៅរបស់ប្រជាពលរដ្ឋ បានសមរម្យ”៕

ដោយវុត្ថា

ភ្នំពេញ៖ ក្រសួងរៀបចំដែនដី និងគរូបនីយកម្ម និងសំណង់ គ្រោងសហការជាមួយអគ្គនាយកពន្ធដារដាក់ឱ្យមានការប្រមូលពន្ធលើអចលនទ្រព្យនៅកន្លែងច្រកចេញចូលតែមួយ (One Window Service) ដើម្បីប្រមូលពន្ធលើវិស័យអចលនទ្រព្យឱ្យកាន់តែមានប្រសិទ្ធភាពខ្ពស់ និងបានកាន់តែdfលឿនជូនដល់ប្រជាពរដ្ឋនាពេលខាងមុខ។

លោក សេង ឡូត អ្នកនាំពាក្រសួងរៀបចំដែនដី នគរូបនីយកម្ម និងសំណង់ នៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងរៀបចំដែនដី នគរូបនីយកម្ម និងសំណង់» នាថ្ងៃទី ១៦ ខែមីនា ឆ្នាំ ២០២០ នេះ ឱ្យដឹងថា ក្រសួងរៀបចំដែនដី នគរូបនីយកម្ម និងសំណង់កន្លងមកនេះ បានពិភាក្សានៅក្នុងក្របខណ្ឌផ្ទៃក្នុងអស់រយៈពេល៣ ដងរួចហើយ តែមិនទាន់បានមានកិច្ចប្រជុំពិភាក្សាជាមួយអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថនៅឡើយទេ ។

តែយ៉ាងណាក៏ដោយ លោកបន្តថា បានជំរាបដល់អគ្គនាយកដ្ឋានពន្ធដារដើម្បីពនិត្យមើលលទ្ធភាពទៅលើមន្ត្រីរបស់ខ្លួនមានចំនួនគ្រប់គ្រាន់អាចបញ្ជូនមកទទួលពន្ធនៅអង្គភាពច្រកចេញចូលតែមួយនៅថ្នាក់រដ្ឋបាលក្រោមជាតិបានឬទេ។

លោកបន្ថែមទៀតថា “ពីមុនច្រកចេញចូលតែមួយនៅមន្ទីររៀចំដែនដីនគរូបនីយកម្ម និងសំណង់ និងសូរិយោដី តែក្រោយមកយើងបានអនុវត្តតាមអនុក្រឹត្យរបស់រាជរដ្ឋាភិបាល ក៏ក្រសួងបានបញ្ជូនទៅនៅក្រោមរដ្ឋបាលរាជធានីខេត្តវិញ។

លោកបន្ថែមទៀតថា “ខាងពន្ធដារកំពុងធ្វើកិច្ចការនេះ ហើយខ្ញុំជឿថា មិនយូមិនឆាប់ យើងនឹងទទួលបានព័ត៌មានជាវិជ្ជមានពីអគ្គនាយដ្ឋានពន្ធដារ ដើម្បីរួមគ្នាធ្វើយ៉ាងមិចជំរុញឱ្យការផ្តល់សេវាសាធារណៈនេះ បានកាន់តែលឿន និងប្រសើរជាងមុន”។
លោកសេង ឡូតបន្ថែមថា “ហើយខ្ញុំនៅតែជឿថា កិច្ចការនេះ នៅដំណើរការទៅបានដោយសារតែមានការកើនឡើងនូវបច្ចេកវិទ្យាទំនើបនាពេលបច្ចុប្បន្ននេះ”។

ការិយាល័យច្រកចេញចូលតែមួយ ជាកន្លែងដែលអតិថិជនត្រូវបានទទួលទម្រង់បែបបទ ព័ត៌មានគ្រប់គ្រាន់ ច្បាស់លាស់ស្ដីពីការផ្ដល់សេវារដ្ឋបាល កម្រៃសេវា និងអាករផ្សេងៗ និងជាកន្លែងផ្ដល់នូវលទ្ធផលសម្រេចជាផ្លូវការលើសេចក្ដីស្នើសុំដល់អតិថិជនវិញ។

សេចក្តីសម្រេចស្ដីពីការបង្កើតច្រកចេញចូលតែមួយ និងការិយាល័យប្រជាពលរដ្ឋ នៅថ្នាក់ស្រុក ខណ្ឌ ត្រូវបានសម្ដេច ហ៊ុន សែន ប្រមុខរដ្ឋាភិបាលកម្ពុជា ចុះហត្ថលេខាកាលពីថ្ងៃទី៣០ មិថុនា ២០០៨បានឱ្យដឹងថាការិយាល័យច្រកចេញចូលតែមួយ មានសមត្ថកិច្ចផ្ដល់ជូនប្រជាពលរដ្ឋ ក្រុមហ៊ុន និងសហគ្រាសនូវសេវារដ្ឋបាល ដែលប្រជាពលរដ្ឋ ក្រុមហ៊ុន និងសហគ្រាសត្រូវការជាប្រចាំ ឲ្យបានទាន់ពេលវេលា មានតម្លាភាព តាមនីតិវិធី និងមានប្រសិទ្ធភាព៕

ដោយៈ រ៉ាណេត

ភ្នំពេញៈ គម្រោងអភិវឌ្ឍន៍ធំៗជាច្រើន ជាពិសេសផ្នែកឧស្សាហកម្ម តំបន់សេដ្ឋកិច្ចពិសេស រួមនឹងគម្រោងអភិវឌ្ឍន៍សំណង់ លំនៅដ្ឋានកម្រិតមធ្យមជាច្រើន បាននិងកំពុងចាប់ផ្តើមបង្ហាញវត្តមាន នៅតំបន់ជុំវិញភ្នំឧដុង្គជាបន្តបន្ទាប់ ស្របទៅតាមគោលការណ៍របស់រដ្ឋាភិបាល ដែលធ្វើឱ្យតម្រូវការនៃការប្រើប្រាស់ដីមានការកើនឡើងខ្ពស់។

ជាមួយនឹងការមើលឃើញពីសក្ដានុពលនៅក្នុងតំបន់ ក៏ដូចជាតម្រូវការនៃការប្រើប្រាស់ដីខាងលើនេះ អគ្គនាយកក្រុមហ៊ុន KW Sen Sok និងជានាយកក្រុមហ៊ុនអចលនទ្រព្យ SAM SN REALTY Co,.Ltd លោកសំ សុខនឿន បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី១៦ ខែមីនា ឆ្នាំ២០២០នេះថា ដោយសារតែព្រឹត្តិការណ៍នៃជំងឺ Covid-19 បានធ្វើឱ្យមនុស្សភាគច្រើន យល់មានការប៉ះពាល់យ៉ាងខ្លាំង មកលើវិស័យអចលនទ្រព្យ ជាពិសេសការទិញ–លក់ដីធ្លីតែម្ដង រហូតធ្វើឱ្យអ្នកខ្លះសម្រេចចិត្តលក់ដីចេ​ញក្នុងតម្លៃក្រោមទីផ្សារ។

លោកបានបន្តទៀតថា“សម្រាប់អ្នកដែលសម្រេចចិត្តលក់ដី ឬអចលនទ្រព្យក្រោ​មតម្លៃទីផ្សារនៅពេលនេះ នឹងមានការស្ដាយក្រោយជាក់ជាមិនខាន ដែលក្រោយពេលការទប់ស្កាត់ជំងឺនេះ ត្រូវបានធ្វើឡើងជោគជ័យ នឹងធ្វើឱ្យតម្លៃដីឡើងថ្លៃ ហើយវាក៏ជាឱកាសសម្រាប់អ្នកមានលុយទិញដីទុកផងដែរ”។

ដោយឡែកងាកទៅកាន់តំបន់ភ្នំឧដុង្គ ត្រូវបានលោក សំ សុខនឿន បានបញ្ជាក់ថា តំបន់ជុំវិញភ្នំឧដុង្គ ដែលស្ថិតនៅក្នុងស្រុកពញាឮ ខេត្តកណ្តាល ក៏នឹងប្រែក្លាយទៅជាតំបន់អភិវឌ្ឍន៍ខ្លាំងផងដែរ ដែលមានតម្រូវការខ្ពស់ក្នុងវិស័យឧស្សាហកម្ម ដែលរើចេញពីរាជធានីភ្នំពេញ ស្របតាមគោលនយោបាយរបស់រាជរដ្ឋាភិបាល។ នៅពេលដែលមានតម្រូវការប្រើប្រាស់ដីសម្រាប់វិស័យឧស្សាហកម្ម រោងចក្រ វានឹងជម្រុញឱ្យមានការអភិ​វ ឌ្ឍលើវិស័យលំនៅដ្ឋានផងដែរ ជាពិសេសទៅលើលំនៅដ្ឋានសម្រាប់ផ្គត់ផ្គង់ការស្នាក់នៅរបស់កម្មករ–កម្មការិនីតែម្ដង។

លោកបញ្ជាក់ថា “ពេលនេះសម្រាប់អ្នកដែលមានលុយ គួរទិញដីនៅតំបន់ទុកខណៈដែលតម្លៃនៅមានកម្រិត ហើយនឹងកើនឡើងនៅពេលឆាប់ៗខាងនេះ”។

អគ្គនាយកក្រុមហ៊ុនអចលនទ្រព្យ Century 21 Fortuna Investment លោក វ៉ា វីរៈ បានមានប្រសាសន៍ប្រាប់តាមទូរស័ព្ទ ដោយទទួលស្គាល់ពីសក្ដានុពលនៃតំបន់ខាងលើនេះថា ពិតជាកំពុងតែមានតម្រូវការប្រាកមែន ហើយស្ទើរតែគ្រប់តំបន់ជាយក្រុងរាជធានីភ្នំពេញទាំងអស់ ក៏មានតម្រូវការប្រើប្រាស់ដីដូចគ្នា ជាពិសេសត្រឹមចម្ងាយចាប់ពីប្រមាណ ២០– ៣០គីឡូម៉ែត្រពីក្រុង។

លោកបានបន្តទៀតថា “តំបន់ខាងលើនេះមានភាពល្អប្រសើរច្រើន ក្រៅពីនៅជិតក្រុង និងមានផ្លូវហាយវេ ដែលរដ្ឋាភិបាលកំពុងតែធ្វើការកែលម្អជាបណ្តើរ ដើម្បីផ្តល់ភាពងាយស្រួលដល់ការដឹកជញ្ជូន វានៅមានវិសាលភាពធំទូលាយ ងាយស្រួលអភិវឌ្ឍ ហើយតម្លៃក៏នៅធូរថ្លៃ”។ លោកបន្ថែមថា “កត្តាភូមិសាស្ត្រនៅទីនេះ ល្អប្រសើរទាំងការរស់នៅ ក៏ដូចជាផ្តល់ភាពងាយស្រួលដល់វិស័យដឹកជញ្ជូន”។

លោក វ៉ា វិរៈ បានមានប្រសាសន៍បន្តទៀតថា “នៅតំបន់នេះវាមានសក្ដានុពលខ្លាំ​ងដោយសារ តែមានហេដ្ឋារចនាសម្ព័ន្ធសំខាន់ៗជាច្រើន នៅព័ន្ធជុំវិញ ដូចជាផ្លូវហាយវេ (ផ្លូវជាតិលេខ៥) ផ្លូវជាតិលេខ៥១ ដែលជាគោលដៅនៃការអភិវឌ្ឍវិស័យឧស្សាហកម្ម គម្រោងបង្កើតតំបន់សេដ្ឋកិច្ចពិសេស របស់ធនាគារកាណាឌីយ៉ា រួមជាមួយនឹងគម្រោងអភិវឌ្ឍន៍បុរី និងបណ្តុំលំនៅដ្ឋានបែបបុរី ខណៈដែលគម្រោងកសាងហេដ្ឋារចនាសម្ព័ន្ធបន្ថែមទៀតរបស់រដ្ឋាភិបាលកំពុងតែយកចិត្តទុកដាក់”៕