ដោយ ប៊ី

ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់ បានបញ្ជាឱ្យមានការរុះរើសំណង់ខុសច្បាប់១៤កន្លែង នៅខេត្តព្រះស៊ីហនុ ខណៈសំណង់ជាង១០០ តម្រូវឱ្យមានការត្រួតពិនិត្យដំណើរការសាងសង់ឡើងវិញ។

លោកសេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានថ្លែងនៅក្នុងសន្និសីទសារព័ត៌មាន ស្ដីពី “វឌ្ឍនភាព និងទិសដៅការងារបន្ដ របស់ក្រសួងរៀបចំដែនដី នគរូបនីយកម្ម និងសំណង់” នៅថ្ងៃទី១៦ ខែមីនា ឆ្នាំ២០២០នេះថា គណៈកម្មការត្រួតពិនិត្យគុណភាពសំណង់ នៃក្រសួងរៀបចំដដែនដី នគរូបនីយកម្មនិងសំណង់បានត្រួតពិនិត្យសំណង់ជាង៥០០ គម្រោងនៅក្នុងខេត្តព្រះសីហនុ។

លោកបានថ្លែងថា “សំណង់ខុសច្បាប់១៤កន្លែង ត្រូវបានបញ្ជារុះរើ និងសំណង់ជាង១០០ទាមទារឱ្យមានពិនិត្យគុណភាព និងត្រូវបានណែនាំ បន្ទាប់ពីគណៈកម្មការត្រួត​ពិនិត្យគុណភាពសំណង់ បានរកឃើញភាពមិនត្រឹមត្រូវបទដ្ឋានសំណង់”។

នៅក្នុងឱកាសបើកសម្ពោធការដ្ឋានសាងសង់ គម្រោងអភិវឌ្ឍន៍លំនៅដ្ឋាននៅលើភ្នំបូកគោ (កំណប់ឋានសួក៌) កាលពីចុងសប្ដាហ៍កន្លងទៅថ្មីៗនេះ លោកឧបនាយករដ្ឋមន្ត្រីជា សុផារ៉ា បានធ្វើការក្រើនរំលឹកសាជាថ្មីម្ដងទៀត ទៅដល់បណ្តាស្ថាបត្យករ វិស្វករ ក្រុមហ៊ុនម៉ៅការសាងសង់ ជាពិសេសមន្ត្រីជំនាញដែលពាក់ព័ន្ធទាំងអស់ ចាំបាច់ត្រូវតែគោរព និងអនុវត្តទៅតាមច្បាប់សំណង់ ដែលក្រសួងបានដាក់ចេញ ជៀសវាងធ្វើតាមការបង្គាប់បញ្ជាពីសំណាក់ម្ចាស់គម្រោង ដែលជាអ្នកមានលុយ ដែលប្រាស់ចាកពីច្បាប់កំណត់។

លោកឧបនាយករដ្ឋមន្ត្រីបានបញ្ជាក់ថា “គ្រប់ការដ្ឋានសាងសង់ នៅពេលមន្ត្រីក្រ​សួងឬមន្ទីរចុះឆែក បើអត់មានច្បាប់សំណង់ទេ ព្រះរាជអាជ្ញាត្រូវចេញដីកាឃាត់ភ្លាម”។

លោកបន្តថា “ជាងនេះទៅទៀត អ្នកសាងសង់ ត្រូវរក្សានូវផែនការ គឺសាងសង់គោរពតាមប្លង់គោល ប្លង់នគររូបនីយកម្ម មិនត្រូវសង់លើផ្លូវ ប្រឡាយទឹក សង់មិនគោរព ទៅតាមបទដ្ឋានបច្ចេកទេស សង់អត់មានវិស្វករ ស្ថាបត្យករ នៅប្រចាំការដ្ឋាននោះទេ”៕

ដោយៈ រ៉ាណេត

ភ្នំពេញៈ បើទោះជាកម្ពុជាកំពុងតែស្ថិតនៅក្នុងភាពប្រឈម នៃការរាតត្បាតជំងឺ Covid-19 ប៉ុន្តែសម្រាប់វិស័យសំណង់ នៅក្នុងប្រទេសកម្ពុជានៅតែបន្តកើនឡើងគួរឱ្យកត់សម្គាល់រហូតដល់ចំនួន៥២៣គម្រោង កើនឡើងជិត៥០ភាគរយ ប្រើប្រៀបធៀបទៅនឹងរយៈពេលដូចគ្នាកាលពីឆ្នាំកន្លងទៅ។

អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បា​នមានប្រសាសន៍ ក្នុងសន្និសីទសារព័ត៌មានស្ដីពី “វឌ្ឍនភាពការងាររបស់ក្រសួងរៀបចំដែនដី នគរូបនីយកម្ម និងសំណង់ និងលើកទិសដៅបន្តកាលពីព្រឹកថ្ងៃទី១៦ ខែមីនា ឆ្នាំ២០២០ ថា បច្ចុប្បន្ននេះ គម្រោងសាងសង់សំណង់ជាច្រើន នៅតែមានសកម្មភាពក្នុងការអភិវឌ្ឍដដែល ដោយចំនួនសរុបមានរហូតដល់៥២៣គម្រោង គិតត្រឹមចុងខែកុម្ភៈ ឆ្នាំ២០២០ ខណៈដែលក្នុងរយៈពេលដូចគ្នាកាលពីឆ្នាំ២០១៩ មានចំនួនត្រឹមជាង៣០០គម្រោងតែប៉ុណ្ណោះ។

លោកបានបញ្ជាក់ថា “ជាមួយនឹងការកើនឡើងនូវចំនួនគម្រោងអភិវឌ្ឍន៍ ក្នុងវិស័យសំណង់នេះ បានជំរុញឱ្យទុនវិនិយោគកើនឡើងស្ទើរទ្វេដង ហើយវានឹងនៅតែបន្តកើនឡើងទៀត ប្រសិនបើបញ្ហានៃជំងឺCovid-19 ត្រូវបានទប់ស្កាត់ប្រកបដោយប្រសិទ្ធភាពក្នុងពេលដ៏ខ្លីខាងមុខនេះ”។

នៅពេលបច្ចុប្បន្ននេះ សំណង់អគារខ្ពស់ៗនៅកម្ពុជា មានចំនួនជិត២០០០អគារ ដែលក្នុងនោះ អគារបម្រើវិស័យសណ្ឋាគារមានចំនួនជាង១០០០អគារ ហើខុនដូមានចំនួន២៣,០០០យូនីត។  ដោយឡែកសម្រាប់គម្រោងអភិវឌ្ឍន៍ លើវិស័យលំនៅដ្ឋានមានចំនួន៣២៧ទីតាំង រួមមានទាំងគម្រោងអភិវឌ្ឍន៍បែបបុរី និងគម្រោងអភិវឌ្ឍន៍លំនៅដ្ឋានដែលមានលក្ខណៈបែបបុរី។

ក្រុមហ៊ុនអន្តរជាតិដែលចូលមកវិនិយោគ នៅក្នុងវិស័យសំណង់នៅកម្ពុជា សរុបមានចំនួន១៨ប្រទេស ដែលក្នុងនោះការវិនិយោគមកពីប្រទេសចិន ឈរនៅលំដាប់ទី១ ប្រទេសកូរ៉េស្ថិតនៅតំដាប់ទី២ ហើយប្រទេសជប៉ុនស្ថិតនៅលំដាប់ទី៣៕

ដោយ ៖ រ៉ាណេត

ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានសម្រេចកំណត់ការប្រើប្រាស់ដីដែលស្ថិតនៅក្នុងប្លង់គោលនៅតាមបណ្តាស្រុក-ក្រុង នានានៅទូទាំងប្រទេសបានចំនួន១៣ ក្នុងចំណោមស្រុក-ក្រុងសរុបចំនួន២៦ ស្មើនឹង៥០ភាគរយ។

អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បានមានប្រសាសន៍នៅក្នុងអង្គសន្និសីទសារព័ត៌មានស្ដីពី«វឌ្ឍនភាពការងាររបស់ក្រសួងរៀបចំដែនដី នគរូបនីយកម្ម និងសំណង់ និងលើកទិសដៅបន្ត កាលពីព្រឹកថ្ងៃទី១៦ ខែមីនា ឆ្នាំ២០២០ នេះថា “គិតមកត្រឹមព្រឹកថ្ងៃនេះ ក្រសួងរៀបចំដែនដី នគរូបនីយកម្ម និងសំណង់ បានសម្រេចធ្វើការកំណត់នៃការប្រើប្រាស់ដីតាមប្លង់គោលនៅតាមបណ្តាស្រុក-ក្រុងនៅទូទាំងប្រទេសបានចំនួន១៣ ក្នុងចំណោមស្រុក-ក្រុងចំនួន២៦”។

លោកបានបន្តទៀតថា “សម្រាប់ផែនការរៀបចំដែនដីថ្នាក់រាជធានី-ខេត្តបានចំនួន៣ខេត្ត គឺរាជធានីភ្នំពេញ ខេត្តព្រះសីហនុ និងខេត្តបាត់ដំបង ដែលផែនការនៃការរៀបចំដែនដីនេះ ពិតជាមានសារសំខាន់បំផុតក្នុងការរៀបចំ និងកំណត់នូវផែនការយុទ្ធសាស្ត្រសម្រាប់បែងចែកនៃការប្រើប្រាស់ដី ដើម្បីឈានទៅរកការអភិវឌ្ឍន៍”៕

ដោយភារៈ

ភ្នំពេញៈ ក្រុមហ៊ុនដេញថ្លៃអចលទ្រព្យកម្ពុជា​ (Cambodian Property Auction Co., Ltd.) ឬហៅកាត់ថា​CPA ដែលជាក្រុមហ៊ុន​មានអ្នកជំនាញជាតិនិងអន្តរជាតិ លើវិស័យអចលនទ្រព្យជាច្រើនឆ្នាំ បានចាប់ផ្តើមទទួលអចលនទ្រព្យពីម្ចាស់អចលនទ្រព្យនានា ដើម្បីរៀបចំកម្មវិធីដេញថ្លៃ ដោយមានការចូលរួមពីអ្នកវិនិយោគជាតិ អន្តរជាតិជាច្រើន។

ក្រុមហ៊ុននេះបាននិងកំពុងផ្តល់សេវាកម្ម ដេញថ្លៃអចលនទ្រព្យ ដែលជាសេវាកម្មដ៏ល្អបំផុតក្នុង​ការជួយលោកអ្នក លក់អចលទ្រព្យ ដូចជា ផ្ទះ ដី ឬអគារ ជាដើម បានដាច់លឿន ជាងសេវកម្មអចលទ្រព្យផ្សេងៗ។

លោកសន សំរេចភារៈនាយកប្រតិបត្តិក្រុមហ៊ុន Cambodian Property Auction​បានមានប្រសាសន៍ឲ្យដឹងនាព្រឹកថ្ងៃទី១៦ មិនានេះថា ក្រុមហ៊ុនផ្តល់សេវាកម្មដេញថ្លៃអចលនទ្រព្យដំបូងគេនេះ បាននិងកំពុងធ្វើការងារដោយផ្តោតលើក្រមសីលធ៌មវិជ្ជាជីវៈ និងមានលក្ខណពិសេសជាច្រើនដែលលោក អ្នកគួរប្រើប្រាស់សេវាកម្មដេញថ្លៃអចលនទ្រព្យ ជាមួយនឹងក្រុមហ៊ុន CPA ដូចជា ទី១ លក់លឿន៖ ក្រុមហ៊ុន មានអ្នកជំនាញ ក្នុងការផ្តល់ប្រឹក្សា តម្លៃទីផ្សារអចលទ្រព្យឲ្យបានត្រឹមត្រូវ និង ការផ្សព្វផ្សាយដែលមានប្រសិទ្ធភាពជាច្រើនទំរង់ក្នុងការបង្ហាញអចលនទ្រព្យ ដល់អ្នកវិនិយោគជាតិ និងអន្តរជាតិជាច្រើន ​ទើបធ្វើឲ្យការលក់អចលនទ្រព្យរបស់លោកអ្នកលឿន ដោយលោកអ្នកចំណេញទាំងពេលវេលា​និងថវិកា។

ទី២ ភាគរយខ្ពស់នៃការលក់បានជោគជ័យ៖ ដោយសារតែកម្មវិធីដេញថ្លៃ បានបង្កើតនូវ ភាពបន្ទាន់ៗ ពិសេស ពេវេលាកំណត់ សម្រាប់អ្នកចូលរួមដេញថ្លៃ ទើបធ្វើឲ្យការលក់អាចសម្រេចបានជោគជ័យ ក្នុងភាគរយដែលខ្ពស់ចន្លោះពី​៧៥ ទៅ៨០ភាគរយ ដែលដាក់លក់នៅក្នុងកម្មវិធីដេញថ្លៃ។ ពិសេសជាងនេះទៅទៀត អ្នកដែលអញ្ជើញមកកាន់កម្មវិធីដេញថ្លៃ សុទ្ធសឹងតែជាអ្នកមានបំណងចង់ទិញពិតប្រាកដ ហើយបានឆ្លងកាត់ការមើលអលនទ្រព្យរួចហើយមុនពេលកម្មវិធីដេញថ្លៃមកដល់។

ទី៣ ដំណើរការលក់មានតម្លាភាព៖ ម្ចាស់អលនទ្រព្យលែងបារម្មណ៏ពីការលក់លើសថ្លៃ ឬដាក់គងពីលើតម្លៃរបស់អចលទ្រព្យរបស់ខ្លួន ដោយការដេញថ្លៃទទួលបានតម្លៃពិតប្រាកដ ដែលត្រូវបានប្រកាសឡើងនៅក្នុងកម្មវិធីតែម្តង ពុំមានការលាក់លាមរឿងតម្លៃឡើយ​ពិសេសជាងនេះទៅទៀត ក្រុមហ៊ុនមានកោលការណ៏ច្បាស់លាស់ ក្នុងការដេញថ្លៃដោយភាពសុក្រិតនិងត្រឹមត្រូវបំផុត។

ប្រសិនបើអស់លោក មានបំណងចង់លក់អចលទ្រព្យ របស់លោក អ្នកឲ្យបានលឿនសូមទំនាក់ទំនងមកកាន់ក្រុមហ៊ុនCPA Group មានទីតាំងស្ថិតនៅលើបណ្តោយផ្លូវ២៧១ (ចម្ងាយប្រមាណ​២០០ម៉ែត្រ គិតពីច្រកចូលវត្តសន្សំកុសល ឆ្ពោះមកក្បាលថ្នល់) ស្ថិតក្នុងសង្កាត់បឹងទំពុនទី២ ខ័ណ្ឌមានជ័យ រាជធានីភ្នំពេញ ឬសូមទំនាក់ទំនងលេខទូរស័ព្ទ 012/ 015/ 068 79 68 79៕

ដោយវុត្ថា

ភ្នំពេញ៖ រហូតមកដល់ពេលនេះ រដ្ឋាភិបាលកម្ពុជា បានចុះបញ្ជីក្បាលដីបាន ៥លាន ៦ សែនក្បាលដីនៅទូទាំងប្រទេស ខណៈរដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ បានប៉ាន់ស្មានថាមានចំនួន ៧ លានក្បាលដីនៅទូទាំងប្រទេស។

នេះ បើតាមការឱ្យដឹងពីលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់នៅក្នុងសន្និសីទសារព័ត៌មាន ស្តីពីវឌ្ឍនភាពការងាររបស់ក្រសួងរៀបចំដែនដី នគរូបនីយកម្ម និងសំណង់ និងទិសដៅបន្តនាថ្ងៃទី ១៦ ខែមីនា ឆ្នាំ ២០២០ ដែលរៀបចំដោយអង្គភាពអ្នកនាំពាក្យរាជរដ្ឋភិបាល។

លោក សេង ឡូត បន្តថា ក្នុងចំណោមការចុះបញ្ជីក្បាលដីនេះ មានទាំងការចុះបញ្ជីជាប្រព័ន្ធ និងដាច់ដោយដុំជូនប្រជាពលរដ្ឋនៅទាំងប្រទេស ដើម្បីមានភាពងាយស្រួលក្នុងការគ្រប់គ្រង និងប្រើប្រាសដីរបស់ប្រជាពលរដ្ឋ។

លោកបន្តទៀតថា ក្រៅពីនេះ ក៏រដ្ឋាភិបាលបានចុះបញ្ជីដីរបស់សហគមជនជាតដើមភាគតិច ដែលរហូតមកដល់ពេលនេះ គឺបានចំនួនជាង ៣០ សហគមន៍ផងដែរ។ បន្ថែមពីនេះ ក៏បានចុះបញ្ជីដីរដ្ឋផងដែរបានជាច្រើនទីតាំងផងដែរ៕