ដោយ ប៊ី

ភ្នំពេញៈ ធនាគារអភិវឌ្ឍន៍អាស៊ី(ADB) បានព្យាករណ៍កាលចុងសប្តាស៍នេះថា ការ​ផ្ទុះឡើងនៃវីរុស COVID-19 នេះ នឹងកាត់បន្ថយកំណើនសេដ្ឋកិច្ច នៅក្នុងតំបន់អាស៊ីដែលកំពុងអភិវឌ្ឍ និងនៅជុំវិញពិភពលោកនៅឆ្នាំនេះ។

មនុស្សជាង៣,២០០នាក់ នៅទូទាំងពិភពលោកបានស្លាប់ ដោយសារជំងឺផ្លូវដង្ហើម ដែលអាចបណ្តាលឱ្យមានជំងឺរលាកសួតនេះ ធ្វើឱ្យប៉ះពាល់ដល់ទីផ្សារហិរញ្ញវត្ថុ និងធ្វើឱ្យខូចខាតដល់សេដ្ឋកិច្ច។

ធនាគារ ABD ដែលមានមូលដ្ឋាននៅទីក្រុងម៉ានីលបានឱ្យដឹងថា ការផ្ទុះឡើងនេះអាចកាត់បន្ថយផលិតផល ក្នុងស្រុកសរុបរបស់ពិភពលោកពី០,១ ទៅ០,៤ភាគរយដោយការព្យាករណ៍អំពីការបាត់បង់ហិរញ្ញវត្ថុ អាចឈានដល់ចន្លោះពី៧៧ពាន់លានដុល្លារទៅ ៣៤៧ពាន់លានដុល្លារ។

ធនាគារអភិវឌ្ឍន៍អាស៊ីបានបញ្ជាក់ថា នៅក្នុងការវិភាគដែលបានគូសបញ្ជាក់ពីសេណារីយ៉ូដែលល្អបំផុត និងអាក្រក់បំផុតថា កំណើនសេដ្ឋកិច្ចនៅក្នុងប្រទេសចិនអាចត្រូវបានកាត់បន្ថយត្រឹម០,៣ភាគរយ ស្មើនឹង១,៧ភាគរយ និងប្រទេសកំពុងអភិវឌ្ឍន៍នៅអាស៊ី ដោយមិនរាប់បញ្ចូលប្រទេសចិន អាចត្រូវបានកាត់បន្ថយត្រឹម០,២ភាគរយ ស្មើនឹង ០,៥ភាគរយ។

ធនាគារអភិវឌ្ឍន៍អាស៊ីបានឱ្យដឹងទៀតថា ការផ្ទុះឡើងនៃវីរុសនេះ អាចនាំឱ្យមានការធ្លាក់ចុះយ៉ាងខ្លាំងនៅក្នុងតម្រូវការក្នុងស្រុក ទេសចរណ៍ និងការធ្វើដំណើរអាជីវកម្ម ពាណិជ្ជកម្ម និងផលិតកម្ម ការរំខានដល់ការផ្គត់ផ្គង់ ការធ្វើឱ្យប៉ះពាល់ដល់កំណើននៅអាស៊ីដែលកំពុងអភិវឌ្ឍន៍។

លោក Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ បាននិយាយកាលពីថ្ងៃពុធកន្លងមកនេះថា “ការរីករាលដាលនៃវីរុសនេះ បានធ្វើឱ្យបាត់ក្តី     សង្ឃឹ​មសម្រាប់កំណើនសេដ្ឋកិច្ចកាន់តែខ្លាំងនៅឆ្នាំនេះ ហើយនិងធ្វើឱ្យទិន្នផលសកលលោក២០២០ ឈានដល់ល្បឿនយឺតបំផុត ចាប់តាំងពីវិបត្តិហិរញ្ញវត្ថុឆ្នាំ ២០០៨-២០០៩”។

ធនាគារពិភពលោកបានឱ្យដឹងថា ខ្លួនកំពុងផ្តល់ថវិកាចំនួន១២ពាន់លានដុល្លារជាបន្ទាន់ដើម្បីជួយប្រទេសកំពុងអភិវឌ្ឍន៍ កែលម្អសេវាកម្មសុខភាព ការឃ្លាំមើលជំងឺ ការទទួលបានការផ្គត់ផ្គង់ផ្នែកវេជ្ជសាស្រ្ត និងដើមទុនសម្រាប់អាជីវកម្ម៕

ដោយ ហ្សូលី

ភ្នំពេញៈ សម្តេចតេជោហ៊ុន សែន នាយករដ្ឋមន្ត្រីកម្ពុជា បានស្នើដល់អគ្គិសនីកម្ពុជា និងរដ្ឋាករទឹក គួរតែផ្តល់ការយោគយល់ដល់កម្មករ កម្មការិនីរោងចក្រ ឱ្យជំពាក់ថ្លៃទឹកភ្លើងសិន ខណៈដែលកម្មករកម្មការិនីកំពុងត្រូវបានផ្អាកការងារ។

សម្តេចតេជោហ៊ុន សែន បានលើកឡើងក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ និងបើកការដ្ឋានសាងសង់ផ្លូវជាតិ១០ តភ្ជាប់ពីសំឡូត ទៅខេត្តកោះកុង នៅព្រឹកថ្ងៃទី៩ មីនា ២០២០។

សម្តេចបានមានប្រសាសន៍ថា “ខ្ញុំស្នើឱ្យអគ្គិសនីកម្ពុជា ក៏ដូចជារដ្ឋាករទឹក នៅកន្លែងខ្លះកម្មករគ្នាត្រូវព្យួរការងារ អញ្ចឹងទៅត្រូវខ្វះលុយបង់ថ្លៃភ្លើង បង់ថ្លៃទឹក អញ្ចឹងអាចផ្តល់ការយោគយល់ឱ្យជំពាក់សិន”។សម្តេចបន្តថា “ការពិតទៅកម្មករកម្មការិនីគ្នាប្រើទឹកប្រើភ្លើងក្រោម ៥០គីឡូវ៉ាត់ទេ វាអត់ច្រើនទេ តែគ្នាមានតម្រូវការ ព្រោះខ្ញុំបានទទួលត្រឹមតែ៦០% ថៅកែចេញ៤០% រដ្ឋចេញ២០% ដូច្នេះយោគយល់ការលំបាក”។

ទន្ទឹមនេះ សម្តេចបានបញ្ជាឱ្យ លោកស៊ុយ សែម និង លោកកែវ រតនៈ ពិនិត្យអំពីបញ្ហានេះ ដោយសម្តេចបញ្ជាក់ថា ផលប៉ះពាល់ទៅលើបញ្ហានេះមានមិនច្រើនទេ ប៉ុន្កែក៏មិនមែនប៉ាវទូទៅដែរ ព្រោះថាបើផ្ទះសំណាក់ សណ្ឋាគារ ក៏សុំឱ្យជំពាក់ឬមិនបង់ថ្លៃដែរនោះក៏មិនកើតដែរ កាលណាសណ្ឋាគារមិនដំណើរការមានអីត្រូវប្រើភ្លើង។

សម្តេចបានសង្កត់ធ្ងន់ថា “ជំហានដំបូងដែលត្រូវដោះស្រាយនោះ គឺកម្មករជាមុនសិន”៕

ដោយៈ រ៉ាណេត

ភ្នំពេញៈ រដ្ឋាភិបាលត្រៀមបម្រុងទុកចំនួន៤០០លានដុល្លារ សម្រាប់ទប់ទល់ជាមួ​យនឹងភាពប្រឈម នៃការរាតត្បាតមេរោគCovid-19 ដែលកំពុងកើតមានមួយករណីមកលើជនជាតិកម្ពុជាលើកដំបូងនៅក្នុងក្រុងសៀមរាប។ នេះបើតាមការឱ្យដឹងពីសំណាក់ ប្រធានអង្គភាពអ្នកនាំពាក្យរាជរដ្ឋាភិបាល លោកផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី។

ថ្លែងនៅក្នុងពិធីបើកអង្គសន្និសីទសារព័ត៌មានស្ដីពី “វឌ្ឍនភាព និងទិសដៅការងារបន្តរបស់ក្រសួងមុខងារសាធារណៈ” កាលពីរសៀលថ្ងៃទី៩ ខែមីនា ឆ្នាំ២០២០ បានលើកឡើងថា “ជាមួយនឹងបញ្ហានៃភាពប្រឈមមេរោគCovid-19 រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំង ទៅលើសុខមាលភាពរបស់កម្ពុជា ជាពិសេសពង្រឹងនិងបង្កើនការចិត្តទុកដាក់ ក្នុងការផ្សព្វផ្សាយពីកិច្ចការពារខ្លួន ទៅដល់ប្រជាពលជនទូទាំងប្រទេសដោយការព្យាយាមរក្សានូវអនាម័យឱ្យបានជាប់ជាប្រចាំ។

លោកបន្តថា “មកទល់នឹងពេលបច្ចុប្បន្ននេះ រាជរដ្ឋាភិបាលកម្ពុជា បានយកចិត្តទុកដាក់ទៅលើសុខមាលភាព របស់ប្រជាជនទូទាំងប្រទេស ជាមួយនឹងការត្រៀមបម្រុនូវកញ្ចប់ថវិកាចំនួន៤០០លានដុល្លារ សម្រាប់ទប់ទល់ជាមួយនឹងវិតបត្តិមេរោគ Covid-19 នេះ”។ លោកបានបន្តទៀតថា “ដូចប្រមុខរាជរដ្ឋាភិបាលធ្លាប់បានមានប្រសាសន៍រួចមកហើយថា ភាពប្រឈមខ្លាំងមិនមែនបញ្ហានៃមេរោគCovid-19 នោះទេ ប៉ុន្តែភាពភ័យខ្លាច និងការផ្សព្វផ្សាយព័ត៌មានមិនពិត ដោយគ្មានមូលដ្ឋានច្បាស់លាស់ទើបជាបញ្ហា”។

ប្រធានអង្គភាពអ្នកនាំពាក្យរាជរដ្ឋាភិបាលកម្ពុជារូមនេះ បានមានប្រសាសន៍បន្តទៀតថា “គិតមកទល់នឹងបច្ចុប្បន្ននេះ ភាពប្រឈមនៃការមេរោគCovid-19 ត្រូវបានកាត់បន្ថយក្នុងអត្រាខ្ពស់ ដែលការទប់ស្កាត់នៃការរីករាលដាល ត្រូវបានធ្វើឡើងប្រកបដោយលទ្ធផលវិជ្ជមាន ហើយថ្នាំបង្ការប្រឆាំងនឹងមេរោគនេះ គ្រោងនឹងត្រូវបានដាក់ចេញឱ្យប្រើប្រាស់នៅត្រឹមចុងខែមីនា ឆ្នាំ២០២០ឆាប់ៗខាងមុខនេះ ខណៈដែលប្រទេសចិន និងសហរដ្ឋអាមេរិក ទទួលបានភាពជោគជ័យខ្ពស់ក្នុងការពិសោធន៍ និងកំពុងជម្រុញការផលិត”៕

ដោយវុត្ថា

ភ្នំពេញៈ ក្រសួងពាណិជ្ជកម្មឱ្យដឹងថា បន្ទាប់ពីក្រសួងសុខាភិបាល បានប្រកាសក្នុងសន្និសិទសារព័ត៌មានស្តីពី ការរកឃើញករណីមេរោគCOVID-19 លើជនជាតិខ្មែរមួយរូប នៅខេត្តសៀមរាប ក្រសួងពាណិជ្ជកម្ម បានសង្កេតឃើញថា ម្ចាស់ហាងលក់ទំនិញធំៗ បងប្អូនអាជីវករ អ្នកលក់ដូរទំនិញទូទៅភាគច្រើន នៅរក្សាការផ្គត់ផ្គង់ទំនិញ និងបន្តលក់ទំនិញតាមតម្លៃធម្មតា ទោះបីមានប្រជាពលរដ្ឋមួយចំនួន សម្រុកទិញទំនិញច្រើនមុខខុសប្រក្រតីក៏ដោយ។

យោងតាមសេចក្តីអំពាវនាវរបស់ក្រសួងពាណិជ្ជកម្ម ចេញផ្សាយនៅថ្ងៃទី៩ ខែមីនា ឆ្នាំ ២០២០ នេះ ក៏បានសម្តែងនូវការកោតសរសើរ និងលើកទឹកចិត្តចំពោះម្ចាស់ហាងលក់ទំនិញ និងបងប្អូនអាជីវករទាំងនោះជាខ្លាំង។

ក្រសួងពាណិជ្ជកម្មឱ្យដឹងទៀតថា ក្នុងពេលជាមួយគ្នានេះ មានហាងលក់ទំនិ​ញមួយចំនួនតូច បានឆ្លៀតឱកាសលក់ដំឡើងថ្លៃទំនិញ ដូចជា ម៉ាស់ការពារមុខ អាកុលលាងដៃ និងទំនិញចាំបាច់មួយចំនួនទៀត ដែលសកម្មភាពទាំងនេះ អាចបង្កឲ្យមានចលា​ចលក្នុងសង្គមធ្ងន់ធ្ងរ។

ក្នុងស្ថានភាពនេះ ក្រសួងពាណិជ្ជកម្ម បានអំពាវនាវ ដូចជា ទី១ សូមប្រជាពលរដ្ឋមេត្តាជ្រាបថា បរិមាណសន្និធិអង្ករ និងស្រូវមិនទាន់កិនដែលមានក្នុងប្រទេស អាចធានាដល់ការប្រើប្រាស់ក្នុងស្រុក និងនាំចេញទៅក្រៅប្រទេសទៀតផង។ ទី២ សូមប្រជាពលរដ្ឋមេត្តារក្សានូវភាពហ្នឹងនរ កុំជ្រួលច្របល់ហួសហេតុ នាំឲ្យជនឱកាសនិយម អាចឆ្លៀតយកចំណេញ តាមរយៈការលក់ដំឡើងថ្លៃទំនិញដោយមិនសមហេតុសមផល។

ទី៣ សូមម្ចាស់ហាងទំនិញទូទៅ ប្រកាន់នូវស្មារតីសាមគ្គីជាតិខ្មែរ កុំឆ្លៀតឱកាសដំឡើងថ្លៃទំនិញស្រេចតែអំពើចិត្ត។ ក្នុងករណីរកឃើញភាពមិនប្រក្រតី អាជ្ញាធរមានសមត្ថកិច្ច នឹងចាត់វិធានការតាមផ្លូវច្បាប់។

ជាមួយគ្នា ក្រសួងពាណិជ្ជកម្ម បាននឹងកំពុងសហការជាមួយស្ថាប័ន ផ្សេងទៀត ចាត់វិធានការសមស្រប ដើម្បីធានានូវចរាចរទំនិញទូទៅ និងការផ្គត់ផ្គង់គ្រឿងឧបភោគបរិភោគចាំបាច់ សម្រាប់បម្រើជីវភាពរបស់ប្រជាជនយើងនៅក្នុងកាលៈទេសៈនេះ។

ក្រសួងពាណិជ្ជកម្ម នឹងចាត់មន្ត្រីជំនាញ ឲ្យសហការជាមួយសមត្ថកិច្ចពាក់ព័ន្ធចុះស្រាវជ្រាវ និងត្រួតពិនិត្យគុណភាព សុវត្ថិភាពទំនិញ ព្រមទាំងដាក់ចេញនូវវិធានការផ្លូវច្បាប់ក្នុងករណីរកឃើញជនខិលខូច ដែលឆ្លៀតឱកាសលក់ទំនិញឡើងថ្លៃ កេងចំណេ​ញជ្រុលហួសហេតុ៕

ដោយ ហ្សូលី

កូរ៉េ៖ កំណើនសេដ្ឋកិច្ចនៅប្រទេសកូរ៉េរងការឈឺចាប់ពីមួយថ្ងៃទៅមួយថ្ងៃ ដោយសារការធ្លាក់ចុះខ្លាំងជាងមុន នេះបើតាមរបាយការណ៍ចេញផ្សាយដោយសារព័ត៌មានជាតិកូរ៉េនៅព្រឹកថ្ងៃចន្ទ ទី ០៩ មីនា ឆ្នាំ ២០២០នេះ។

របាយការណ៍នេះបានបន្តឱ្យដឹងទៀតថា បន្ទាប់ពីមានការឆ្លងមេរោគពីជប៉ុននិងកូរ៉េ បញ្ហាមិនច្បាស់ចាប់ផ្តើមរះថ្មីម្តងមួយៗមកលើសេដ្ឋកិច្ចប្រទេសមួយនេះ ដែលគេបានគិតទុកមុនថា សេដ្ឋកិច្ចនៅកូរ៉េនឹងមានកំណើនយឺតខ្លាំងដល់ទៅ ១.១ ភាគរយ ចំណែកឯជប៉ុនវិញគឺ 0.៤ ភាគរយ។

មូលហេតុដែលបណ្តាលឱ្យមានការធ្លាក់ចុះយ៉ាងនេះដោយសារតែមានការរឹតបន្តឹងអំពិការនាំចេញរបស់កូរ៉េទៅកាន់ទីផ្សារប្រទេសដទៃ ព្រោះថា កូរ៉េកំពុងនាំមុខគេនៅក្នុងការឆ្លងមេរោគលឿនជាងគេបំផុត។ នៅពេលនេះការទំហំនាំចេញរបស់កូរ៉េទៅកាន់ សហរដ្ឋអាមេរិក និងចិន ដែលជាទីផ្សារធំជាងគេបំផុតក្នុងការនាំចូលទំនិញកូរ៉េនោះ ក៏ត្រូវមានការចរចាឡើងវិញអំពិតម្លៃនិងជម្លោះពាណិជ្ជកម្ម។

ធនាគារអភិវឌ្ឍន៍អាស៊ី ADB បានបញ្ជាក់ថា ទិន្នផលសរុបរបស់កូរ៉េនៅឆ្នាំ ២០២០ នឹងធ្លាក់ចុះរហូតដល់ ១៦.៥ពាន់លានដុល្លារ ដែលនេះគឺជា សេណារីយ៉ូអាក្រក់បំផុត។

ក្រឡេកទៅមើលរបាយការណ៍របស់ ក្រុមហ៊ុនពិគ្រោះនិងស្រាវជ្រាវហិរញ្ញវត្ថុធំនៅអាមេរិក S&P បានផ្សាយថា ការចំណាយរបស់ប្រជាជនកូរ៉េចាប់ផ្តើមបន្ធូរបន្ថយ ដោយសារមានការព្រួយបារម្ភអំពីមេរោគកូរ៉ូណានេះ ខណៈប្រទេសកំពុងជួបវិបត្តិសេដ្ឋកិច្ចដូច្នេះពួកគេមិនអាចចាយលុយខ្ជះខ្ជាយបានឡើយ៕

ដោយវុត្ថា

ភ្នំពេញ៖ សមាគមធនគារនៅកម្ពុជា និង សមាគមមីក្រូហិរញ្ញវត្ថុ បានលើកទឹកចិត្តដល់សមាជិកខ្លួនឱ្យបន្តផ្តល់ឥណទានដល់វិស័យអាទិភាពជាពិសេស ផ្នែកអាជីវកម្ម សណ្ឋាគារ ផ្ទះសំណាក់ ទេសចរណ៍ សំណង់ វាយនភណ្ឌកាត់ដេរ និងផលិតស្បែកជើង ដើម្បីនិរន្តភាពអាជីវកម្មទាំងនេះ។

យោងតាមសេចក្តីថ្លែងការណ៍រួមនៃសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ស្តីពីវិធានការការពារផលប៉ះពាល់បណ្តាលមកពីការរីករាលដាលជាសកលនៃវីរុស កូវីដ ១៩ ចេញផ្សាយនៅថ្ងៃទី ៩ ខែមីនា ឆ្នាំ ២០២០ បានឱ្យដឹងថា សមាជិកសមាគមគប្បីរក្សាភាពទន់ភ្លន់ និងពិនិត្យតាមលទ្ធភាពជាក់ស្តែងក្នុងការដោះស្រាយបំណុលយឺតយ៉ាវដែលបណ្តាលមកពីផលប៉ះពាល់វីរុសកូវីដ ១៩ ។

សេចក្តីថ្លែងការណ៍ដដែលបន្តថា សមាជិកសមាគម៍ ត្រូវបន្តតាមដាន និងដាក់ចេញវិធានការ ការពាររីករាលដាលនៃវីរុសកូវីដ ១៩ ទៅលើបុគ្គលិក និងអតិថិជន ដើម្បីធានាឱ្យបាននិរន្តភាពប្រតិបត្តិការរបស់គ្រឹះស្ថានធនាគារ និងហិរញ្ញវត្ថុជាប្រក្រតី។

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏បានអំពាវនាវដល់សមាជិកខ្លួនទាំងអស់រួមមានធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុ គ្រឹះស្ថានឥណទានជនបទ និងក្រុមហ៊ុនភតិសន្យាហិរញ្ញវត្ថុ ចូលរួមអនុវត្តនូវធាំនការខាងលើដើម្បីកាត់បន្ថយផលប៉ះពាល់ជាយថាហេតុ ក៏ដូចជាជំរុញកំណើនសេដ្ឋកិច្ចជាតិបន្ថែមទៀត។

បន្ថែមលើវិធានការ ការពារខាងលើ សមាជិកសមាគមទាំងពីរក៏បាននឹងកំពុងចូលរួមជាមយយរាជរដ្ឋាភិបាលកម្ពុជាំក្នុងគម្រោង សហហិរញ្ញប្បទានទ្រទ្រង់សហគា្រសធុនតូច និងធម្យមតាមរយៈក្រសួងសេដ្ឋកិច្ច និងហិរញ្ញវត្ថុ ។ គម្រោងនេះ នឹងផ្តល់ទុនក្នុងអត្រាការប្រាក់សមរម្យដល់សហគ្រាសធុនតូចនិងធម្យមនៅកម្ពុជាំ លើវិស័យអាទិភាព ហើយដែលគ្រោងចាប់ផ្តើមដំណើរការក្នុងពេលឆាប់ៗខាងមុខនេះ។

នៅក្នុងសេចក្តីថ្លែងការណ៍របស់សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏បានប្រកាសគាំទ្រចំពោះធនាគារជាតិនៃកម្ពុជាដែលបានដាក់ចេញកាលពី៥ ខែមីនា ឆ្នាំ ២០២០កន្លងមកនេះផងដែរលើការទប់ទល់ការរីករាលដាលនៃវីរុស Covid-19 និងផលអវិជ្ជមានជាយថាហេតុផ្សេងទៀត៕