ដោយៈ រ៉ាណេត

ភ្នំពេញៈ រដ្ឋាភិបាលបានអនុម័តគម្រោងវិនិយោគ បង្កើតរោងចក្រថ្មីចំនួន២បន្ថែមទៀត មានតម្លៃទឹកប្រាក់សរុបជិត១០លានដុល្លារ ដែលមានទីតាំងស្ថិតនៅស្រុកអង្គស្នួល ខេត្តកណ្តាល និងក្នុងរាជធានីភ្នំពេញ។

តបតាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនចំនួន២ ទៅលើគម្រោងបង្កើតរោងចក្រផលិតកេសកាតុង និងរោងចក្រផលិតស្បែកជើង។ សម្រាប់ក្រុមហ៊ុនដែលទទួលបាននូវការគាំទ្រទាំង២ខាងលើនេះ រួមមាន ទី១- ក្រុមហ៊ុន “TIMBERPACK CARTON CO., LTDស្នើសុំបង្កើតរោងចក្រផលិតកេសកាតុង មានទីតាំងវិនិយោគស្ថិតនៅភូមិអណ្តូង ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ៣,៨លានដុល្លារអាមេរិក និងអាចបង្កើតការងារបានចំនួន ១៣៦កន្លែង។

ទី២- ក្រុមហ៊ុន “FORTRESS INTERNATIONAL CO., LTD” ស្នើសុំបង្កើតរោងចក្រផលិតស្បែកជើង មានទីតាំងវិនិយោគស្ថិតនៅភូមិព្រៃកីខ សង្កាត់ពងទឹក ខណ្ឌដង្កោ រាជធានីភ្នំពេញ មានទុនវិនិយោគប្រមាណ៥,៦លានដុល្លារអាមេរិក និងអាចបង្កើតការងា​របានចំនួន១.៩២៨កន្លែង។

ជាមួយនឹងការគាំទ្រទៅលើគម្រោងវិនិយោគខាងលើនេះ បានបង្ហាញឱ្យឃើញពីភាពមានជំនឿពីសំណាក់ធុរកិច្ចអន្តរជាតិ ដែលជឿជាក់មកលើកម្ពុជា និងអាចធានាបាននូវសុខសុវត្ថិភាពខ្ពស់នៅក្នុងវិស័យពាណិជ្ជកម្ម និងការវិនិយោគ៕

ដោយ ប៊ី

ភ្នំពេញៈ ក្រុមហ៊ុនKrungsri Finnovate ជាក្រុមហ៊ុនបណ្តាក់ទុនរួមសាជីវកម្ម (CVC) ដែលស្ថិតនៅក្រោមBank of Ayudhya (BAY) គ្រោងនឹងចំណាយប្រាក់ចំនួន ១០លានដុល្លារអាមេរិក លើការចាប់ផ្តើមអាជីវកម្មមិនរកស៊ីក្នុងស្រុកចំនួន៣ នៅក្នុងឆមាសទីមួយនៃឆ្នាំ២០២០ និងត្រូវបានរាយការណ៍ថា កំពុងស្វែងរកឱកាសវិនិយោគនៅក្នុងការចាប់ផ្តើមអាជីវកម្មនៅក្នុងប្រទេសកម្ពុជា។

ប្រទេសផ្សេងទៀត ដែលកំពុងត្រូវបានមើលគឺឥណ្ឌូណេស៊ី និងហ្វីលីពីនសម្រាប់ការពង្រីកអាជីវកម្ម នៅក្នុងទីផ្សារអាស៊ានក្នុងយុគសម័យឌីជីថល។

ក្រុមហ៊ុន Krungsri Finnovate មានគោលដៅអភិវឌ្ឍន៍ នូវបច្ចេកវិទ្យាឌីជីថលរបស់ធនាគារនៅក្នុងប្រទេសថៃ ក៏ដូចជាប្រទេសជិតខាងដែលមានកម្ពុជា។ ក្រុមហ៊ុនបានពិភាក្សាជាមួយក្រុមហ៊ុនថ្មីៗរបស់ថៃជាច្រើន។

លោកThakorn Piyapan ប្រធានផ្នែកធនាគារឌីជីថល និងការច្នៃប្រឌិតថ្មីនៅធនាគារBAYបានថ្លែងថា ក្នុងចំណោមប្រទេសទាំងបីយើងរំពឹងថា នឹងឈានដល់កិច្ចព្រមព្រៀងនៅខែ មិថុនា។

លោកThakorn បានមានប្រសាសន៍ថា ទឹកប្រាក់ចំនួន១០លានដុល្លារគឺស្មើពាក់កណ្តាល នៃទឹកប្រាក់សរុបរបស់ក្រុមហ៊ុន Krungsri Finnovate សម្រាប់ការវិនិយោគនៅឆ្នាំនេះ ហើយក្រុមហ៊ុនអាចកៀរគរថវិកាបន្ថែមប្រសិនបើចាំបាច់។

ក្រុមហ៊ុន CVC មានមូលនិធិដំបូងដែលមានតម្លៃ៣០លានដុល្លារ នៅពេលដែលវាត្រូវបានដាក់បញ្ចូលក្នុងឆ្នាំ២០១៨។ តួលេខនេះបានកើនឡើងដល់៥០លានដុល្លារនៅពេលដែលការប្រមូលមូលនិធិ២០លានដុល្លារ ចុងក្រោយត្រូវបានដាក់បញ្ចូល។

ទឹកប្រាក់ចំនួន៥០លានដុល្លារ ត្រូវបានវិនិយោគនៅក្នុងក្រុមហ៊ុន Grab ក្រោមការវិនិយោគរបស់ក្រុមហ៊ុន Mitsubishi UFJ Financial Group Inc ដែលមានទឹកប្រាក់ចំនួន ៧០៦លានដុល្លារអាមេរិកនៅក្នុងក្រុមហ៊ុននេះ៕

ដោយវុត្ថា

ភ្នំពេញៈ អភិបាលខេត្តសៀមរាប លោកទៀ សីហា បានអះអាងថា ហេដ្ឋារចនាសម្ព័ន្ធផ្លូវចំនួន១០១ ខ្សែនៅក្នុងក្រុងសៀមរាបដែលកំពុងស្ថាបនា និងជួសជុលនឹងបញ្ចប់ រួចរាល់នៅក្នុងរយៈពេល៣ខែទៀត ខណៈហេដ្ឋារចនាសម្ព័ន្ធផ្លូវសំខាន់ៗទាំងនេះបាននឹងកំពុងមមាញឹកក្នុងស្ថាបនា និងជុសជុល។

ថ្លែងប្រាប់ក្រុមអ្នកសារព័ត៌មាន នៅក្នុងឱកាសចុះត្រួតពិនិត្យសកម្មភាពស្ថាបនាផ្លូវនានាក្នុងក្រុងសៀមរាបនាព្រឹកថ្ងៃទី៩ខែមីនា ឆ្នាំ២០២០កន្លងមក អភិបាលខេត្តវ័យក្មេងរូបនេះបានថ្លែងថា បើទោះបីស្ថានភាពភ្ញៀវទេសចរមកទស្សនាខេត្តសៀមរាប មានការថយចុះយ៉ាងណាក្តី ក៏អាជ្ញាធរខេត្តសៀមរាប បានកំពុងតែបង្កើនការងារអភិវឌ្ឍន៍ជាច្រើននៅក្នុងខេត្ត។

លោកបន្តថា ផ្លូវចំនួន១០១ខ្សែ នៅក្នុងក្រុងសៀមរាបបានកំពុងស្ថាបនា និងជួសជុល ក្នុងនោះមានផ្លូវប្រភេទចាក់បេតុង ផ្លូវចាក់កៅស៊ូ និងផ្លូវក្រាលគ្រួសក្រហម ហើយផ្លូវទាំងនេះ និងរួចរាល់ អាចធ្វើចរាចរបាននៅក្នុងអំឡុង៣ខែទៀត បើសិនជាគ្មានបាតុភូអ្វីធ្វើឱ្យប៉ះពាល់ដំណើរការងារសាងសង់នេះ។

លោកបន្ថែមថា ក្រៅពីនេះអាជ្ញាធរខេត្តសៀមរាប បានកំពុងតែជំរុញឱ្យអាជ្ញាធរក្រុងស្រុក បង្កើនការអភិវឌ្ឍន៍តំបន់រមណីយដ្ឋានទេសចរណ៍ថ្មីៗ ផ្សេងៗក្រៅពីប្រាសាទ ឱ្យចប់នៅត្រឹមឆ្នាំនេះ ដើម្បីត្រៀមទទួលភ្ញៀវទេសចរ ដែលឯកឧត្តមរំពឹងថា៦ខែឬ១ឆ្នាំទៀត ភ្ញៀវទេសចរ និងមកទស្សនាខេត្តសៀមរាបច្រើនឡើងវិញ។

លោកទៀ សីហាបានសម្តែងសុទិដ្ឋិនិយមថា ពេលនោះខេត្តសៀមរាប និងមានអ្វី​ៗល្អទទួលភ្ញៀវទេសចរបាន ដូចជាមានផ្លូវស្អាត មានផ្ទះស្អាត និងមានតំបន់ទេសចរណ៍ថ្មីៗជាច្រើនទៀតក្រៅពីអង្គរ។ ជាមួយគ្នានេះដែរ អាជ្ញាធរខេត្តសៀមរាបក៏មានផែនការអភិវឌ្ឍន៍ក្រុងឆ្នាំ២០២០ដល់ឆ្នាំ២០២៤ ក្នុងគោលដៅធ្វើយ៉ាងឱ្យខេត្តសៀមរាបកាន់តែមានភាពរីកចម្រើន។

ជាលទ្ធផលនៅថ្ងៃនេះ  លោកទៀ សីហា អភិបាល នៃគណៈអភិបាលខេត្តបានដឹកនាំមន្ទីរ អង្គភាពចុះពិនិត្យការដ្ឋានសាសង់ផ្លូវចំនួន ៣ខ្សែក្នុងនោះ ទី១-ផ្លូវភូមិតាវៀន ចាប់ពីក្រោយផ្សារលើ កាត់ផ្ទះតាអុចរហូតដល់ផ្លូវវាងក្រុង មានប្រវែង១២៥០ម៉ែត្រ ទទឹង១០ម៉ែត្រ និងដាក់លូមុខកាត់ ១ម៉ែត្រ(លូជ្រុង) ហើយផ្លូវនេះអនុវត្តបាន ប្រមាណ ៩៧% ដែលជាគម្រោងរបស់រដ្ឋបាលខេត្ត ដោយសាងសង់ប្រភេទផ្លូវបេតុង។

ទី២-ផ្លូវភូមិតាវៀនចាប់ពីផ្លូវ៧មករា ចំណុចហាងលក់គ្រឿងសំណង់លី ហាំងសេង​រហូតដល់ក្រោយគ្លីនិក នាគទេពមឋនប្រវែង៧៩០ម៉ែត្រ ទទឹង៦,៥ម៉ែត្រ (លូជ្រុង) ហើយផ្លូវនេះអនុវត្តបានប្រមាណ៣០% ដែលជាគម្រោងរបស់រដ្ឋបាលខេត្ត ដោយសាងសង់ផ្លូវប្រភេទផ្លូវបេតុង និងទី៣-ផ្លូវក្រវ៉ាត់ក្រុង ចាប់ពីចុងកៅស៊ូរហូតដល់ផ្លូវបំបែកជន្លង់មានប្រវែង២២៣០ ទទឹង១៤ម៉ែត្រ អនុវត្តបាន ៦០% និងការដាក់លូមូលមុខកាត់១ម៉ែត្រតាមបណ្តោយផ្លូវ អនុវត្តបាន៧០% ដែលជាគម្រោងរបស់ក្រសួងសាធារណការនិងដឹកជញ្ជូន ដោយសាងសង់ផ្លូវប្រភេទផ្លូវ DBST៕

ដោយ ៖ រ៉ាណេត

ព្រះសីហនុ ៖ វេទិកានៃកិច្ចប្រជុំមហាសន្និបាតតំបន់សមុទ្រអាស៊ីបូពា៌លើកទី៧ ដែលមានសមាជិកចំនួន១១ប្រទេស (EAST ASEAN SEAS Congress) នឹងត្រូវរៀបចំនៅក្រុងព្រះសីហនុ ខេត្តព្រះសីហនុក្នុងនាមជាម្ចាស់ផ្ទះ នៅចុងឆ្នាំ២០២១ ខាងមុខនេះ។

ត្រូវនឹងថ្ងៃទី៩ ខែមីនា ឆ្នាំ២០២០ លោកស្រី អែមមី គុសែល (Ms. Aimee T.Gonzales) នាយកប្រតិបត្តិអង្គការ PEMSEA ចូលជួបពិភាក្សាការងារជាមួយឯកឧត្តម គួច ចំរើន អភិបាលនៃគណៈអភិបាល ខេត្តព្រះសីហនុ ក្នុងគោលបំណងពិនិត្យ និងសិក្សាឈ្វេងយល់ពីការអភិវឌ្ឍថ្មីៗ និងលទ្ធភាព របស់រដ្ឋបាលខេត្តព្រះសីហនុ ដែលគ្រោងធ្វើជាម្ចាស់ផ្ទះមហាសន្និបាតតំបន់សមុទ្រអាស៊ីបូព៌ា (EAST ASEAN SEAS Congress) នៅចុងខែធ្នូ ឆ្នាំ២០២១ខាងមុខ ដែលជាកិច្ចប្រជុំថ្នាក់ តំបន់លើកទី៧ និងជាវេទិកាបណ្ដាញរដ្ឋបាលមូលដ្ឋាន PNLG។

នាយិកាប្រតិបត្តិអង្គការ PEMSEA លោកស្រី អែមមី គុសែល កាលពីថ្ងៃទី៩ ខែមីនា ឆ្នាំ២០២០ នៅក្នុងកិច្ចជំនួបពិភាក្សាការងារក្នុងការត្រៀម និងឈ្វេងយល់ពីការអភិវឌ្ឍថ្មីៗ និងលទ្ធភាពរបស់រដ្ឋបាលខេត្តព្រះសីហនុ ដែលនឹងគ្រោងធ្វើនៅចុងខែធ្នូ ឆ្នាំ២០២១ បានមានប្រសាសន៍ថា អង្គការ PEMSEA បាន និងកំពុងអនុវត្តន៍គម្រោងក្នុងប្រទេសជាសមាជិកចំនួន១១ប្រទេសលើការរៀបចំមហាសន្និបាតតំបន់សមុទ្រអាស៊ីបូពា៌។

សមាជិកទាំង១១ប្រទេស ដែលនឹងត្រូវចូលរួមក្នុងកិច្ចប្រជុំ រួមមានប្រទេសកម្ពុជា ចិន កូរ៉េខាងត្បូង ឥណ្ឌូណេស៊ី ជប៉ុន ឡាវ ហ្វីលីពីន កូរ៉េខាងជើង សិង្ហបុរី ទីម័រ និងប្រទេសវៀតណាម ដោយមានប្រាំខេត្ត-ក្រុង បាន និង កំពុងអនុវត្តន៍កម្មវិធីគ្រប់គ្រងបរិស្ថានតំបន់ឆ្នេរ បែបសមាហរណកម្ម (ICM) ក្រោមការសម្របសម្រួល និងការផ្ដល់ជំនួយបច្ចេកទេសពីអង្គការ PEMSEA។

លោកស្រី អែមមី គុសែល បានបញ្ជាក់ថា “ក្រុងព្រះសីហនុ មានអំណោយផលល្អក្នុងការរៀបចំធ្វើមហាសន្និបាតអាស៊ីបូព៌ា ព្រោះខេត្តព្រះសីហនុ ក៏ជាសមាជិកអង្គការ PEMSEA និងធ្វើការងារជាច្រើនចាប់ពីឆ្នាំ២០០៦មក។ នៅឆ្នាំ២០០៨ ខេត្តព្រះសីហនុ ក៏បានធ្វើជាម្ចាស់ផ្ទះនៃមហាសន្និបាតអាស៊ីបូព៌ា។ មហាសន្និបាតនេះ នឹងផ្ដល់ឱកាសឱ្យមន្ត្រីរាជរដ្ឋាភិបាល និងមន្ត្រីមកពីប្រទេសនានាចូលរួមប្រមាណជា ៥០០ ទៅ ៦០០នាក់ ក្នុងនោះក៏មានមន្ត្រីថ្នាក់ជាតិ និងថ្នាក់ ក្រោមជាតិចូលរួមផងដែរ”។

អភិបាលខេត្តព្រះសីហនុ លោក គួច ចំរើន បានបង្ហាញពីកិច្ចស្វាគមន៍ និងគាំទ្រការរៀបចំមហាសន្និបាតអាស៊ីបូព៌ា EAST ASEAN SEAS Congress លើកទី៧ ឆ្នាំ២០២១ នៅខេត្តព្រះ សីហនុ ហើយដល់ពេលនោះក្រុង/ខេត្តព្រះសីហនុ នឹងរៀបចំឱ្យបានល្អ ដើម្បីត្រៀមលក្ខណបើកមហាសន្និបាតនេះ ព្រមទាំងបានបង្ហាញពីសក្តានុពលរបស់ខេត្តព្រះសីហនុ និងជាការចែករំលែកនូវបទពិសោធន៍ ចំណេះដឹងថ្មីៗរវាងប្រទេសផ្សេងៗ ដើម្បីយកមកធ្វើការកែលម្អកាន់តែស៊ីជម្រៅក្នុងការទាក់ទាញភ្ញៀវទេសចរជាតិ និងអន្តរជាតិនាពេលខាងមុខ។

អង្គការភាពជាដៃគូក្នុងការគ្រប់គ្រងបរិស្ថានតំបន់សមុទ្រអាស៊ីបូព៌ា (Partnerships In Environmental Management of the Seas ofEsia) ហៅកាត់ថា PEMSEA ក្រោមការគាំទ្រពីអង្គការបរិស្ថានពិភពលោក (GEF) ដែលបានចាប់ផ្ដើមអនុវត្តន៍គម្រោងការការពារ និងគ្រប់គ្រងការបំពុលសមុទ្រចាប់តាំងពីឆ្នាំ១៩៩៣។ បច្ចុប្បន្ននេះ PEMSEA ត្រូវបានទទួលស្គាល់ថាជាអង្គការ អន្តរជាតិ ដើម្បីជាយន្តការសម្រាប់សម្របសម្រួលការងារក្នុងតំបន់អាស៊ីបូព៌ា។ អង្គការ PEMSEA មានការិយាល័យសម្រាប់ធ្វើការជាលេខាធិការដ្ឋានដល់ ដៃគូទាំងអស់នៅទីក្រុង ខេត្ត ដែលមានអាស័យដ្ឋានក្នុង ក្រសួងបរិស្ថាន នៃប្រទេសហ្វីលីពីន៕