ដោយ ប៊ី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា សម្តេចនឹងប្រកាសចេញនៅថ្ងៃទី០១ ខែមេសា ឆ្នាំ២០២០ ខាងមុខក្នុងវេទិការាជរដ្ឋាភិបាលវិស័យឯកជន លើកទី១៩ នៅវិមានសន្តិភាពនូវវិធានការបន្ថែមលើវិធានការដែលបានដាក់ចេញកាលពីថ្ងៃទី២៩ ខែមីនា ឆ្នាំ២០១៩កន្លងទៅ ដែលការប្រកាសចេញវិធានការថ្មីនេះ គឺជាការស្រោចស្រង់ខាងសេដ្ឋកិច្ច។

ការថ្លែងយ៉ាងដូច្នេះរបស់សម្តេចតេជោប្រមុខរាជរដ្ឋាភិបាលកម្ពុជា ធ្វើឡើងក្នុងឱកាសសម្តេចអញ្ជើញប្រគល់សញ្ញាបត្រ ជូននិស្សិតវិទ្យាស្ថានវ៉ាន់ដា ៣,៤៥៨នាក់ ដែលរៀបចំឡើង នៅមជ្ឈមណ្ឌលសន្និបាត និងពិព័រណ៍កោះពេជ្រ។

សម្តេចតេជោ បានថ្លែងថា “ខ្ញុំនឹងប្រកាសនៅថ្ងៃទី ១ ខែមេសា ខាងមុខនេះ នូវវិធានការណ៍បន្ថែមទៀត លើវិធានការណ៍ដែលកាលពីថ្ងៃទី ២៩ ខែមីនា ឆ្នាំ ២០១៩ កន្លងទៅ ព្រោះនេះជាការស្រោចស្រង់ខាងសេដ្ឋកិច្ច”។

ជាមួយគ្នានេះដែរ សម្តេចតេជោ ហ៊ុន សែន បានប្រតិកម្មចំពោះអ្នកវិភាគមួយចំនួន ពិសេស លោក រ៉ុង ឈុន ដែលលើកឡើងដដែលពាក់ព័ន្ធនឹងការសម្រេចរបស់អឺរ៉ុប ក្នុងការកាត់ផ្នែកខ្លះនៃប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ (EBA) និងបានបញ្ជាក់អំពីការត្រៀមខ្លួនរួចរាល់ ចំពោះការដោះស្រាយបញ្ហាការកាត់ EBA ក្នុងកម្រិតណាក៏ដោយ មិនឲ្យរោងចក្របិទទ្វារឡើយ។

សម្តេចតេជោ ហ៊ុន សែន បានថ្លែងយ៉ាងដូច្នេះថា “យើងបានត្រៀមទុកពីចំងាយសម្រាប់ផលប៉ះពាល់ដោយ EBA ២០ភាគយ។ កម្ពុជាបញ្ជាក់ច្បាស់ហើយ ថាកម្ពុជាមិនទៅស្នើសុំ ២០ភាគរយនោះត្រឡប់មកវិញទេ សូមអ្នកវិភាគជាពិសេស រ៉ុង ឈុន និយាយស្តាប់ឲ្យបាន គេត្រៀមបម្រុងរួចហើយ ឲ្យបាត់ទៅអា ២០ភាគរយនោះ កុំទៅខ្វល់។ ខ្ញុំបានចុះហត្ថលេខា យល់ព្រមរួចហើយ លើការលើកពន្ធដើម្បីឲ្យរោងចក្រ នៅតែប្រកួតប្រជែងបាន។ អ្នកឯងនិយាយស្អីឡើយ EBA អា EBA នេះវាគង់តែបាត់ទេ គ្រាន់តែវាបាត់មុន ឬបាត់ក្រោយប៉ុណ្ណោះ ឥឡូវបាត់២០ភាគរយអត់មានបញ្ហាអីទេ»។

សម្តេចតេជោ ហ៊ុន សែន បានថ្លែងបញ្ជាក់ថា សម្តេចនឹងមិនយកអធិបតេយ្យជាតិ ទៅដោះដូរនឹងការអនុគ្រោះពន្ធ២០ភាគរយនោះទេ។

កាលពីថ្ងៃទី១២ ខែកុម្ភៈ ឆ្នាំ២០២០ គណៈកម្មការអឺរ៉ុប (EU) បានចេញសេចក្តីសម្រេចកាត់ផ្នែកខ្លះនៃប្រព័ន្ធអនុគ្រោះពន្ធ EBA ក្រោមហេតុផលថា កម្ពុជាធ្វើឱ្យធ្លាក់នូវការគោរពសិទ្ធិមនុស្ស សិទ្ធិនយោបាយ និងលទ្ធិប្រជាធិបតេយ្យ និងទាមទារឱ្យកម្ពុជាកែលំអរនូវចំណុចទាំងអស់នេះ។ តាមការវាយតម្លៃ ការកាត់ផ្នែកខ្លះនៃប្រព័ន្ធអនុគ្រោះពន្ធនេះ មានទឹកប្រាក់ប្រមាណជាង១០០លានដុល្លារអាមេរិក លើកផលិតផល៤0មុខរបស់កម្ពុជា។

សេចក្តីសម្រេចនេះនឹងចូលជាធរមាន នៅរយៈពេល៦ខែទៀត ពោលគឺក្នុងខែសីហា ឆ្នាំ២០២០នេះ ប្រសិនបើសភារបស់អឺរ៉ុបអនុម័តយល់ព្រម តាមការសម្រេចរបស់គណៈកម្មការអឺរ៉ុបនោះ៕

ដោយ ហ្សូលី

ភ្នំពេញ៖ អង្គការទេសចរណ៍ពិភពលោក (UNWTO) បានឱ្យដឹងថា វិស័យទេស​ចរណ៍ក្នុងតំបន់អាស៊ីដាំក្បាលចុះគួរឱ្យបារម្ភ ដែលខាតបង់ទឹកប្រាក់ចន្លោះ៣០ពាន់លាន ដល់ ៥០ពាន់លានដុល្លារ ដោយសារភ្ញៀវទេសចរមានការភ័យខ្លាច នៃការរីករាលដាលវីរុសកូរ៉ូណាឬកូវីដ១៩។

នេះជាសញ្ញាអវិជ្ជមានចំពោះសេដ្ឋកិច្ចនៅតំបន់អាស៊ី ព្រោះថាវិស័យទេសចរណ៍ក៏ដើរតួយ៉ាងសំខាន់ នៅក្នុងការអភិវឌ្ឍសេដ្ឋកិច្ចតំបន់អាស៊ីដែរ។ អង្គការទេសចរណ៍ពិភពលោកសង្កេតឃើញថា ការកម្សាន្តរបស់ភ្ញៀវទេសចរធ្លាក់ចុះ ប្រមាណពី១ដល់៣ភាគរយ នឹងប្រឈមការបាត់បង់ថវិកាដល់ទៅ ៣០ពាន់លានឬ៥០ពាន់លានដុល្លារ។

យ៉ាងណាមិញ អង្គការនៅតែមានការព្យាករណ៍វិជ្ជមានដែលថា កំណើននៅឆ្នាំនេះអាចនឹងកើនប្រមាណ៣ទៅ៤ភាគរយ។ វិស័យទេសចរណ៍មានអត្ថប្រយោជន៍ជាច្រើនជួយដល់ ការអភិវឌ្ឍប្រកបដោយចីរភាព កំណើនសេដ្ឋកិច្ច ផ្តល់ឱកាសការងារនិងការយល់ដឹងអន្តរជាតិ។

តែយ៉ាងណាការផ្សះផ្សារឡើងវិញ នូវផលប៉ះពាល់ទាំងអស់នេះ អង្គការសហប្រជាជាតិ នឹងព្យាយាមរកដំណោះស្រាយមិនថាហិរញ្ញវត្ថុ និងនយោបាយនោះទេ ក្នុងគោលបំណងជួយដល់វិស័យទេសចរណ៍ ក្នុងតំបន់អាស៊ីដើម្បីស្តារសេដ្ឋកិច្ចសារជាថ្មី។

ប្រទេសក្នុងតំបន់អាស៊ីដូចជា កម្ពុជា ឥណ្ឌូនេស៊ី សិង្ហបុរី ថៃ ចិន វៀតណាម ហុងកុង ជប៉ុន កូរ៉េខាងត្បូង សុទ្ធសឹងតែជាប្រទេស ដែលសម្បូរដោយតំបន់ទេសចរណ៍វប្បធម៌ ប្រវត្តិសាស្រ្ត និងតំបន់ទេសចរធម្មជាតិច្រើន តែត្រូវរងផលប៉ះពាល់ជាអនេក។ សូមទស្សនាកម្រងរូបភាព ដកស្រង់ចេញពីសារព័ត៌មានអន្តរជាតិThe Guardian ដែលប្រៀបធៀបចំនួនភ្ញៀវទេសចរមកកាន់តំបន់អាស៊ី កាលពីឆ្នាំមុនៗនិង ឆ្នាំ២០២០ ដូចតទៅ៕

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជំរុញឱ្យមន្ត្រីពាក់ព័ន្ធជួយសម្រួលការដឹកជញ្ជូនវត្ថុធាតុដើមពីប្រទេស ចិនដើម្បីយកមកផ្គត់ផ្គងរោងចក្រកាត់ដេរនៅក្នុងប្រទេសកម្ពុជាឱ្យបានកាន់តែលឿន ខណៈកាប៉ាល់ដឹកជញ្ជូនវត្ថុធាតុដើមមកពីចិនបានមកដល់ប្រទេសកម្ពុជាជាបន្តបន្ទាប់។

សម្ដេចតេជោ ហ៊ុន សែន នៅក្នុងពិធីអញ្ជើញចែកសញ្ញាបត្រដល់និស្សិតវិទ្យាស្ថានវ៉ាន់ដា ចំនួន៣៤៥៨នាក់នាព្រឹកថ្ងៃទី១០ ខែមីនា ឆ្នាំ២០២០ឱ្យដឹងថា រដ្ឋាភិបាលចិនបានផ្តល់កាប៉ាល់ចំនួន៧ ជាមធ្យោបាយដឹកជញ្ជូនវត្ថុធាតុដើមមកកាន់កម្ពុជា ខណៈដែលកាលពីយប់ថ្ងៃទី៩ ខែមីនា កាប៉ាល់ដឹកទំនិញដែលជាវត្ថុធាតុដើមសម្រាប់ផ្គត់ផ្គង់រោងចក្រនៅកម្ពុជាបានមកដល់កំពង់ផែក្រុងព្រះសីហនុដោយផ្ទុកចំនួនជាង៦០កុងតឺណ័រ។

សម្តេចតេជោថ្លែងថា “នេះជាកិច្ចប្រឹងប្រែងសម្របសម្រួលរបស់ចិនក្នុងនាមជាដៃគូយុទ្ធសាស្ត្រគ្រប់ជ្រុងជ្រោយរបស់កម្ពុជា”។ សម្តេចតតេជោក៏បានសុំឲ្យអាជ្ញាធរពាក់ព័ន្ធទាំងអស់ ជាពិសេស ខាងកំពង់ផែ និងគយ ត្រូវធ្វើយ៉ាងណាសម្រួលដល់ការដឹកជញ្ជូននេះអោយដល់រោងចក្របានឆាប់រហ័សបំផុត។

សម្ដេចតេជោថ្លែងថា “កាប៉ាល់ចំនួន៧ ដែលដឹកជញ្ជូនវត្ថុធាតុដើមសម្រាប់ផ្គត់ផ្គង់សង្វាក់ផលិតកម្មរោងចក្រនៅកម្ពុជា មានចំនួន៥ចូលចតនៅកំពង់ផែក្រុងព្រះសីហនុ ហើយកាប៉ាល់ចំនួន២ទៀតនឹងចូលចតនៅកំពង់ផែហូជីមិញ សម្រាប់ផ្គត់ផ្គង់សង្វាក់ផលិតកម្មរោងចក្រដែលស្ថិតនៅក្នុងតំបន់សេដ្ឋកិច្ចពិសេសក្រុងបាវិតដែលមានកម្មករសរុបប្រមាណ ៣១០០០នាក់ និងរោងចក្រស្ថិតនៅក្នុងខេត្តកំពង់ចាមមានចំនួនកម្មករសរុបចំនួនជាង៤០០០នាក់ ដែលរោងចក្រទាំងនេះភាគច្រើនផលិតសម្ភារៈពេទ្យ”។

សម្ដេចតេជោបន្ថែមថា សម្រាប់កាប៉ាល់ទាំង៧នេះ នឹងដឹកជញ្ជូនវត្ថុធាតុដើមសម្រាប់ផ្គត់ផ្គង់រោងចក្រកាត់ដេរនៅកម្ពុជា ជាបន្តបន្ទាប់ក្នុងរង្វិលជុំ។ ដោយឡែក នៅពេលដែលវត្ថុធាតុដើមចូលមកដល់កំពង់ផែ មន្ត្រីពាក់ព័ន្ធ និងអជ្ញាធរត្រូវជួយសម្រួលក្នុងការដឹកជញ្ជូនចូលរោងចក្រ បើក្នុងលក្ខខណ្ឌចាំបាច់ត្រូវដឹកជញ្ជូននៅពេលថ្ងៃ អាចប្រើរថយន្តស៊ីរ៉ែនបើកផ្លូវតែម្ដង សំដៅដល់ការធានា និងជំរុញសង្វាក់ផលិតកម្មរបស់រោងចក្រ។

លោក Wu Guoquan ទីប្រឹក្សាកិច្ចការពាណិជ្ជកម្មនៃស្ថានទូតចិនប្រចាំកម្ពុជាបានឱ្យដឹងកាលពីម្សិលមិញនេះថា មានសុខរួមសុខ មានទុក្ខរួមទុក្ខ គឺជាអត្ថន័យស្នូលនៃសហគមន៍ជោគវាសនារួមរវាងចិន និងកម្ពុជា ហើយភាគីចិនកំពុងតែរិះរកវិធីសាស្រ្ត ដើម្បីពុះពាររាល់លំបាកក្នុងកិច្ចការមួយនេះ។

លោកបន្តថា ក្នុងនោះក្រសួងពាណិជ្ជកម្មចិន និងស្ថានទូតចិនប្រចាំកម្ពុជាកំពុងតែចាត់វិធានការសម្របសម្រួលធានាដល់ការផ្តល់ និងដឹកជញ្ជូនវត្ថុធាតុដើមសម្រាប់វិស័យវាយនភណ្ឌកាត់ដេរនៅក្នុងប្រទេសកម្ពុជា។ សហគ្រាស និងបុគ្គលិកចិនតែងលើកឡើងថា ការលំបាកដែលបងប្អូនកម្ពុជាកំពុងតែជួបប្រទះ វាគឺជាការលំបាករបស់យើងទាំងអស់គ្នា សង្ឃឹមថាយើងអាចជួយដល់ប្រទេសកម្ពុជាដោយអស់ពីកម្លាំងកាយ និងចិត្ត។

ក្រុមហ៊ុនដឹកជញ្ជូនSITC CONTAINER LINES CAMBODIA, ក្រុមហ៊ុនដឹកជញ្ជូនCOSCO SHIPPING/ RCL, ក្រុមហ៊ុនដឹកជញ្ជូនOriental Overseas Container Line, ក្រុមហ៊ុនដឹកជញ្ជូនSINOTRANS / RCL និងក្រុមហ៊ុនដឹកជញ្ជូនផ្សេងទៀត បានសហការរួមគ្នាជាកម្លាំងធានា ក្នុងការធានាបាននូវកិច្ចការដឹកជញ្ជូនវត្ថុធាតុដើមសម្រាប់វិស័យវាយនភណ្ឌកាត់ដេរដោយអស់ពីលទ្ធភាព ដើម្បីសម្រួលដល់ការដឹកជញ្ជូនវត្ថុធាតុដើមច្រើនជាងគេមកកាន់កំពង់ផែក្នុងសប្តាហ៍នេះ។

ក្នុងនោះក្រុមហ៊ុនSITCដែលបានដឹកជញ្ជូនវត្ថុធាតុដើមជាង៦០កុងតឺណឺនឹងមកដល់កំពង់ផែខេត្តព្រះសីហនុមុនគេបង្អស់នាថ្ងៃចន្ទ ទី៩ ខែមីនានេះ។ រីឯភាគីកម្ពុជាវិញ នឹងជួយសម្រួលការចុះចតនៃកប៉ាល់ដឹកវត្តុធាតុដើមនេះក្នុងកំពង់ផែខេត្តព្រះសីហនុ, ជួយលើកកម្ពស់អត្រាប្រសិទ្ធភាពនៃការដាក់ទំនិញចុះនិងអត្រាប្រសិទ្ធភាពនៃការផ្តល់ទំនិញដល់អតិថិជននៅក្នុងកំពង់ផែផ្ទាល់ ជួយផ្តល់អាទិភាពក្នុងការបើកច្រកបៃតងសម្រាប់រៀបចំឯកសារបែបបទ, ជួយផ្តល់អាទិភាពក្នុងការដឹកជញ្ជូនកុងតឺនឺតាមរយៈរថយន្តស្ទូចដោយបានសម្រួលពីខាងគយ និងការរៀបចំផ្សេងទៀតផងដែរ។

លោក Wu Guoquanមានប្រសាសន៍ថា “យើងជឿជាក់ថាស្ថិតនៅក្រោមការគាំទ្រពីរដ្ឋាភិបាលចិន និងរាជរដ្ឋាភិបាលកម្ពុជា ជាមួយនឹងសហគ្រាសដែលពាក់ព័ន្ធ វត្ថុធាតុដើមសម្រាប់វិស័យវាយនភណ្ឌកាត់ដេររបស់ប្រទេសចិន នឹងដឹកជញ្ជូនមកដល់រោងចក្រកម្ពុជាបានយ៉ាងឆាប់រហ័ស ហើយការខាតបង់នៃភាគីកម្ពុជានឹងអាចធ្លាក់ដល់អត្រាទាបបំផុត វិស័យកាត់ដេរសម្លៀកបំពាក់ និងស្បែកជើងក្នុងប្រទេសកម្ពុជា នឹងឆ្លងផុតនូវដំណាក់កាលដ៏លំបាកមួយនេះបានយ៉ាងឆាប់រហ័ស”៕

ដោយ ប៊ី

ភ្នំពេញ៖ លោក Donald Trump ប្រធានាតិបតីសហរដ្ឋអាមេរិក បានផ្ញើលិខិតផ្លូវការមួយពីសេតវិមាននៅទីក្រុងវ៉ាស៊ីនតោនជូនចំពោះសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា អំពីមូលហេតុ និងផលវិបាក ធ្វើឱ្យមានការពន្យារពេលកិច្ចប្រជុំអាស៊ាន-អាមេរិក ដែលគ្រោងធ្វើឡើងនៅខែ មីនា ឆ្នាំ២០២០នេះ ដោយសារតែការរីករាលដាលនៃជំងឺកូវីដ១៩។

លិខិតផ្លូវការរបស់លោក Donald Trump បានសរសេរថា “ខ្ញុំសូមថ្លែងអំណរគុណចំពោះការទទួលយការអញ្ញើញរបស់ខ្ញុំ ចូលរួមកិច្ចប្រជុំកំពូលពិសេសអាស៊ាននៅឡាសវេហ្គាស រដ្ឋនេវ៉ាដា។ ខ្ញុំបានទន្ទឹងរង់ចាំឱកាសនេះ ដើម្បីជំរុញភាពជាដៃគូយុទ្ធសាស្រ្តរបស់យើង”។

អាស៊ាន គឺជាស្នូលនៃទស្សនវិស័យរបស់ខ្ញុំ ចំពោះតំបន់ឥណ្ឌូ-ប៉ាស៊ីហ្វិកដែលបើកចំហ និងសេរី ហើយប្រជាជនអាស៊ាន និងសហរដ្ឋអាមេរិកប្រមាណ ១ ពាន់លាននាក់ត្រូវបានផ្សារភ្ជាប់ដោយទំនាក់ទំនងសេដ្ឋកិច្ចរឹងមាំ និងមានតម្លៃរួម។

ជាអកុសល យើងត្រូវតែពន្យាពេលកិច្ចប្រជុំកំពូលនេះ ដោយមើលឃើញពីហនិភ័យជាសកល ដែលបង្កឡើងដោយការផ្ទុះឡើងនូវវីរុសកូរ៉ូណាថ្មី ២០១៩។ ខ្ញុំជឿជាក់ថា យើងទាំងអស់គ្នាអាចឯកភាពដោយផ្តោតការយកចិត្តទុកដាក់របស់យើងនៅពេលនេះ លើការសម្របសម្រួលការឆ្លើយតបជាសកលដែលការពារ និងធានាសុខភាព និងសុវត្ថិភាពរបស់ប្រជាជនយើង។

នៅពេលដែលយើងប្រឈមមុខនឹងបញ្ហាថ្មីនេះ ខ្ញុំមានមោទនភាពចំពោះភាពជាដៃគូរបស់ប្រជាជាតិយើងលើបញ្ហាជាច្រើន រួមទាំងបញ្ហាសុខភាពសាធារណៈ។ ក្រសួងសុខាភិបាល និងសេវាកម្មបម្រើមនុស្សរបស់ខ្ញុំបានទាក់ទងជាមួយរដ្ឋាភិបាលអាស៊នផ្សេងទៀតដើម្បីចាប់ផ្តើមការសន្ទនាស្តីពីយុទ្ធសាស្ត្រ ដើម្បីការពារប្រឆាំងនឹងវីរុសកូរ៉ូណាមួយនេះ។

យើងមានអ្នកជំនាញការជាច្រើន ដើម្បីត្រៀមជួយ និងបន្តផ្តលជំនួយឧបត្ថម្ភ។ មជ្ឈមណ្ឌលសម្រាប់ត្រួតពិនិត្យ និងការពារជម្ងឺ របស់សហរដ្ឋអាមេរិក មានវត្តមានយ៉ាងសំខាន់ និងមានប្រវត្តិជាច្រើនឆ្នាំ នៅក្នុងបណ្តាប្រទេសអាស៊ាន។ នៅខណៈពេលដែលយើងបន្តធ្វើការងារដោយមិនចេះនឿយហត់ ដើម្បីឆ្លើយតបទៅនឹងការរីករាលដាលនៃវីរុសកូរ៉ូណា កិច្ចសហប្រតិបត្តិការរវាងប្រជាជាតិយើង នឹងបង្ហាញថែមទៀតនូវកម្លាំងនៃភាពជាដៃគូយុទ្ធសាស្ត្រក៏ទូលំទូលាយរបស់យើង។

ទោះបីជាយើងត្រូវតែពន្យាពេលកិច្ចប្រជុំពិសេសនេះ ក៏ក្រុមការងាររបស់យើងបានរៀបចំនូគំនិតផ្ដួចផ្តើមជាច្រើន ដើម្បីបង្ហាញអំពីទំនាក់ទំនងរវាងប្រទេសយើង។ យើងនឹងនៅតែដាក់ឱ្យដំណើរការនូវកម្មវិធីជាំច្រើននៃកម្មវិធីធំៗទាំងនេះ ហើយយើងនឹងស្វែងរកនូវកាលានុវត្តភាព ដើម្បីអនុវត្តគម្រោងកម្មវិធីទាំងអស់នេះនៅក្នុងខែខាងមុខ។

ខ្ញុំមានជំនឿថា ថ្នាក់ដាក់នាំអាស៊ាននិងអាចកោះប្រជុំកំពូលពិសេសនេះឡើងវិញ នៅពេលអនាគតដ៏ខ្លីខាងមុខនេះ”៕

ដោយ ហ្សូលី

ភ្នំពេញ៖ ក្រសួងសេដ្ឋកិច្ចនិងហិរញ្ញវត្ថុបានចេញសេចក្តីប្រកាសអំពាវនាវដល់អ្នកវិនិយោគនិងក្រុមហ៊ុនអភិវឌ្ឍលំនៅដ្ឋាននានា ជួយបញ្ចុះតម្លៃផ្ទះ ខណៈសេដ្ឋកិច្ចកម្ពុជាកំពុងរងផលប៉ះពាល់បន្តិចបន្តួចដោយសារការផ្ទុះនៃមេរោគកូរ៉ូណា ឬកូវីដ ១៩។

នេះបើតាមសេក្តីប្រកាសដែលចេញផ្សាយកាលពីថ្ងៃទី ០៩ មីនា ឆ្នាំ ២០២០ ម្សិលមិញនេះ។

ក្រសួងសេដ្ឋកិច្ចនិងហិរញ្ញវត្ថុ បានលើកទឹកចិត្តដល់ក្រុមហ៊ុនអចលនទ្រព្យដែលវិនិយោគលើវិស័យលំនៅដ្ឋានឱ្យជួយបញ្ចុះតម្លៃផ្ទះក្នុងកម្រិតសមស្រប ខណៈពេលដែលរាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខដឹកនាំ បានសម្រេចផ្តល់ការលើកលែងពន្ធប្រថាប់ត្រាលើការផ្ទេរសិទ្ធ ឬសិទ្ធកាន់កាប់អចលនទ្រព្យលំនៅដ្ឋានគ្រប់ប្រភេទដែលមានតម្លៃស្មើឬទាបជាង ៧ម៉ឺនដុល្លារ ក្នុងរយៈពេល១ឆ្នាំ។

ស្របគ្នានឹងការអំពាវនាវនេះទៀតសោត ដោយសារតែក្រសួងចង់សំណូមពរដល់ក្រុមហ៊ុនអចលនវត្ថុជួយគ្នាក្នុងការអនុវត្តវិធានការបន្ទាន់នានាសម្តៅកាត់បន្ថយផលប៉ះពាល់អវិជ្ជមានពីការរីករាលដាលនៃជំងឺកូរ៉ូណាឬកូវីដេ១៩ មកលើសេដ្ឋកិច្ចនិងសង្គមកម្ពុជា។

គោលបំណងមួយទៀតនោះ គឺដើម្បីជួយសម្រួលជីវភាពរបស់កម្មករ កម្មការិនី និយោជិត ដែលកំពុងព្យួរការងារបណ្តោះអាសន្ននិងអ្នកដែលបាត់បង់ការងារ រួមទាំងជួយសម្រាលការលំបាករបស់ប្រជាជនដែលជួបប្រទះវិបត្តិមួយចំនួនពាក់ព័ន្ធការបង់រំលស់ផ្ទះជាមួយក្រុមហ៊ុនតែម្តង៕

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានឱ្យដឹងថា កម្ពុជាបាននឹងត្រៀមថវិកាចន្លោះ ៨០០ ទៅ ១០០០ លានដុល្លារអាមេរិក ដើម្បីជួយសង្គ្រោះសេដ្ឋកិច្ចកម្ពុជាឱ្យមានស្ថេរភាព និងលំនឹង បើជំងឺផ្លូវដង្ហើមកូវីដ ១៩ អូសន្លាយរហូតដល់ ១ ឆ្នាំ ។

សម្តេចតេជោ ហ៊ុន សែន នៅក្នុងពិធីប្រគល់សញ្ញាបត្រជូននិស្សិតនៃវិទ្យាស្ថានវ៉ាន់ដានៅថ្ងៃទី១០ ខែមីនា ឆ្នាំ ២០២០នេះ ថ្លែងឱ្យដឹងថា កម្ពុជាបានត្រៀមថាវិកាប្រមាណ ៨០០ លាដុល្លារអាមេរិកក្នុងរយៈពេល ៦ខែ ហើយបើជំងឺកូវីដ ១៩ អូសបន្លាយរយៈពេល ១ ឆ្នាំ នឹងអាចត្រៀមថវិកាជាតិប្រមាណចន្លោះ ៨០០ ទៅ ២០០០ លានដុល្លារអាមេរិកក្នុងការសង្គ្រោះសេដ្ឋកិច្ច។

សម្តេចតជោថ្លែងថា “យើងត្រៀមថវិកាប្រមាណ ៨០០ លានដុល្លារក្នុងរយៈពេល ៦ ខែ ដើម្បីសង្គ្រោះសេដ្ឋកិច្ច ហើយបើវាអូសបន្លាយដល់១ ឆ្នាំ យើងក៏ប៉ានស្មានថាវាធ្លាក់កំណើនប៉ុណ្ណា ផលប៉ះពាល់វាធំប៉ុណ្ណា ហើយបាត់បង់ចំណូលប៉ុណ្ណា បើវាដល់មួយឆ្នាំ សេដ្ឋកិច្ចរបស់យើងធ្លាក់ប៉ុណ្ណា ត្រូវប៉ះប៉ូវទំហំទឹកប្រាក់ប៉ុណ្ណា អញ្ចឹងវាស្ថិតនៅក្នុងចន្លោះ ពី ៨០០ ទៅ ២០០០ លានដុល្លារអាមេរិកដើម្បីបំរ៉ុង”។
កំណើនសេដ្ឋកិច្ចកម្ពុជានៅឆ្នាំ២០២០នឹងមានត្រឹមតែ ៦.១%ប៉ុណ្ណោះ។ នេះ

បើតាមការព្យាករណ៍របស់ក្រសួងសេដ្ឋកិច្ចនិងហិរញ្ញវត្ថុកម្ពុជាបានឱ្យដឹងថា កំណើនសេដ្ឋកិច្ចរបស់កម្ពុជានៅឆ្នាំ ២០២០ គឺស្ថិតនៅក្នុងរង្វង់ ៦.៥% ដែលទាញទម្លាក់កំណើនសេដ្ឋកិច្ចកម្ពុជាដែលធ្លាប់តែសម្រេចបានជាង៧ភាគរយក្នុងមួយឆ្នាំក្នុងរយៈពេលពីរទស្សវត្សរ៍មកនេះ។

មានការកត្តាជាច្រើនដែលធ្វើឱ្យធ្លាក់ចុះនៃកំណើនសេដ្ឋកិច្ចរបស់កម្ពុជានេះ ដោយសារការធ្លាក់ចុះនៃកំណើនសេដ្ឋកិច្ចពិភពលោក ភាពមិនប្រាកដប្រជានៅតំបន់មជ្ឈឹមបូព៌ា ជម្លោះពាណិជ្ជកម្មរវាងចិន-សហរដ្ឋអាមេរិក ការប្រែប្រួលអាកាសធាតុ និងការផ្ទុះឡើងនៃជំងឺឆ្លងដែលបង្កដោយកូរ៉ូណាវីរុសថ្មីៗ ឬកូវីដ ១៩ នៅក្នុងប្រទេសចិន ជាដើមដែលបាននឹងកំពុងរីករាលដាលនៅក្នុងពិភពលោក៕