ដោយ ប៊ី

ឥណ្ឌាៈ រដ្ឋមន្រ្តីក្រសួងហិរញ្ញវត្ថុឥណ្ឌា លោក Anurag Thakur កាលពីថ្ងៃចន្ទបាននិយាយថា សង្គ្រាមពាណិជ្ជកម្មរវាងអាមេរិក និងចិន និងការផ្ទុះឡើងនៃវីរុស COVID-19 បានធ្វើឱ្យប៉ះពាល់ដល់ពាណិជ្ជកម្មពិភពលោក។

លោកបានបន្ទោសសង្រ្គាមពាណិជ្ជកម្មរវាងអាមេរិក និងចិន និងការផ្ទុះឡើងនៃមេរោគឆ្លងនេះចំពោះការធ្លាក់ចុះនៃសេដ្ឋកិច្ច ដោយបាននិយាយថា ផលប៉ះពាល់របស់ទាំងនេះនឹងប៉ះពាល់ដល់សេដ្ឋកិច្ចរបស់ប្រទេសទាំងអស់។

លោកបានថ្លែងថា “ដំបូងសង្រ្គាមពាណិជ្ជកម្មអាមេរិក ចិន បានបង្កឱ្យសេដ្ឋកិច្ចធ្លាក់ចុះនៅទូទាំងពិភពលោក ហើយឥឡូវនេះកូរ៉ូណាវីរុសបានប៉ះពាល់ដល់សេដ្ឋកិច្ច និងប៉ះពាល់ដល់ពាណិជ្ជកម្មពិភពលោក”។ លោកបន្ថែមថា “ដូច្នេះវាជារឿងធម្មតាទេដែលផលប៉ះពាល់របស់វានឹងធ្លាក់ចុះដល់សេដ្ឋកិច្ចរបស់ប្រទេសទាំងអស់”។

លោករដ្ឋមន្រ្តី Anurag Thakur បានប្រតិកម្មចំពោះការព្យាករណ៍ផលិតផលក្នុងស្រុកសរុបរបស់ឥណ្ឌានៅ ៥,៣% ក្នុងឆ្នាំ ២០២០។

ប៉ុន្តែកាលពីពេលថ្មីៗនេះ រដ្ឋមន្រ្តី លោក Anurag Thakur បាននិយាយថា ពិភពលោកមានទំនុកចិត្តលើប្រទេសឥណ្ឌា និងសេដ្ឋកិច្ចរបស់ខ្លួន ខណៈរដ្ឋាភិបាលមានគោ​លបំណងធ្វើឱ្យប្រទេសឥណ្ឌា ស្ថិតក្នុងចំណោមប្រទេសមានសេដ្ឋកិច្ចកំពូលទាំងបី នៅឆ្នាំ ២០២៥។

លោករដ្ឋមន្រ្តីបាននិយាយថា “យើងបានក្លាយជាប្រទេសមានសេដ្ឋកិច្ចធំជាងគេទី ៥របស់ពិភពលោក ហើយក្នុងរយៈពេល៥ឆ្នាំខាងមុខ គោលដៅគឺធ្វើឱ្យប្រទេសឥណ្ឌាស្ថិតក្នុងចំណោមប្រទេសមានសេដ្ឋកិច្ចធំជាងគេទាំងបីលើពិភពលោក”។

លោកក៏បានផ្តោតលើគំនិតផ្តួចផ្តើម របស់រដ្ឋាភិបាលនាពេលថ្មីៗនេះ ដែលឈ្មោះ Vivaad se Vishwa ជាគ្រោងការណ៍ ដើម្បីដោះស្រាយជម្លោះរវាងអ្នកធ្វើការពាក់ព័ន្ធនឹងពន្ធ និងអ្នកបង់ពន្ធ។

លោកThakur បាននិយាយថា ស្ថាប័នហិរញ្ញវត្ថុផ្សេងៗគ្នារួមទាំង IMF និង RBI បានព្យាករថា ប្រទេសឥណ្ឌានឹងទទួលបានកំណើនសេដ្ឋកិច្ចជាថ្មីម្តងទៀត៕

ដោយវុត្ថា

ភ្នំពេញៈ អភិបាលរាជធានីភ្នំពេញ  លោក ឃួងស្រេង បានសម្រេចឱ្យស្ថាបនាគម្រោងរៀបចំផ្លូវថ្មើរជើង នៅតាមបណ្តោយទន្លេចតុមុខ ចាប់ពីប្រៃសណីយ៍កម្ពុជារហូតដល់មុខព្រះបរមរាជវាំង ស្ថិតក្នុងភូមិសាស្ត្រខណ្ឌដូនពេញ រាជធានីភ្នំពេញ ដើម្បីបង្កើនសោភណភាពក្នុងការទាក់ទាញទេសចរណ៍បន្ថែម បន្ទាប់ពីសិក្សារួចរាល់។

លោកឃួង ស្រេងបានថ្លែងបើកកិច្ចប្រជុំស្ដីពី គម្រោងរៀបចំផ្លូវថ្មើរជើងក្នុងក្របខណ្ឌរាជធានីភ្នំពេញជាមួយមន្ត្រីពាក់ពា័ន្ធនាថ្ងៃទី១០ ខែមីនា ឆ្នាំ ២០២០នេះបានសម្រេ​ចឯកភាពតាមគម្រោងរបស់មន្ទីរសាធារណការ និងដឹកជញ្ជូនរាជធានីភ្នំពេញ ដោយបែងចែកចេញជាបីដំណាក់កាលក្នុងការស្ថាបនាគម្រោងមួយនេះ។

លោកអភិបាលក្រុងរូបនេះថ្លែងថាថា “គម្រោងបង្កើតផ្លូវថ្មើរជើងនេះ នឹងក្លាយជាកញ្ចប់ទេសចរណ៍ថ្មី សម្រាប់រាជធានីភ្នំពេញ ដើម្បីទាក់ទាញភ្ញៀវទេសចរឲ្យមកលេងរាជធានីភ្នំពេញបានកាន់តែច្រើន”។ លោកថា“ផ្លូវថ្មើរជើងនេះ ភ្ញៀវទេសចរអាចមានជម្រើសដើរលេងកម្សាន្តច្រើន ដូចជានៅតំបន់រមណីយដ្ឋានប្រវត្តិសាស្រ្ត វត្តភ្នំ សួនកុមារ ប្រៃស​ណីយ៍ ផ្សាររាត្រី តំបន់ទេសភាពមាត់ទន្លេដ៏ស្រស់ស្អាត វត្តឧណ្ណាលោម សារមន្ទីរជាតិ ព្រះបរមរាជវំាង ដែលធ្វើឲ្យភ្ញៀវដើរទស្សនាកម្សាន្ត សប្បាយប្រកបដោយភាពរីករាយ”។

លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ធ្លាប់បានឲ្យដឹងថា ក្រុមការងារត្រៀមកែលម្អផ្លូវ ចិញ្ចើមផ្លូវ សួនច្បារ ដាំដើមឈើ និងភ្លើងលម្អពណ៌នាពេល រាត្រី រួមទំាង ផ្សារាត្រី ផាប់ស្ទ្រីត ផ្សារណាត់ ផ្សារកសិផល ក្លឹបកម្សាន្ត ស្កាយបា កន្លែងលក់វត្ថុអនុស្សាវរីយ ផលិតផលកសិកម្ម ចំណតយានយន្ត និងចំណតផែទូកទេសចរណ៍ ដែលឆ្លើយតបទៅនឹងតម្រូវការ នៃការបង្កើតផ្លូវថ្មើរជើង ប្រកបដោយភាពទាក់ទាញ។

លោកបន្តថា “គម្រោងកែលម្អទំាងនេះ គឺមានភាពបន្ស៊ីគ្នា ដែលធានាបានសុខដុមនីយកម្ម រវាងវិស័យទេសចរណ៍ និងការរៀបចំហេដ្ឋារចនាសម្ព័ន្ធទីក្រុង គឺធានាបានសណ្តាប់ធ្នាប់ ចរាណ៍ និងមិនរំខាន់ដល់ផ្លូវថ្មើរជើង”។

បើតាមគម្រោង កញ្ចប់ទេសចរណ៍ផ្លូវថ្មើរជើងនេះអាចបង្កើតឡើង ក្នុងមួយសប្តាហ៍​ចំនួន៣ថ្ងៃ គឺចាប់ពីថ្ងៃសុក្រ ថ្ងៃសៅរ៍ និងថ្ងៃអាទិត្យចាប់ពីម៉ោង១៦រសៀល ដល់ម៉ោង១២យប់ ហើយមិនអនុញ្ញាតឲ្យមានយាន្ត ជំនិះផ្សេង ឆ្លងកាត់ឡើយ គឺសម្រាប់តែថ្មើរជើងតែប៉ុណ្ណោះ។ គម្រោងបង្កើតកញ្ចប់ទេសចរណ៍ថ្មើរជើងនេះ បានធ្វើឡើង ក្រោមកិច្ចសហការ រវាងរដ្ឋបាលសាលារាជធានីភ្នំពេញ និងក្រសួងទេសចរណ៍ ក្រោមការចង្អុលបង្ហាញពីលោកឧបនាយករដ្ឋមន្រី្ត អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ៕

ដោយ ហ្សូលី

ភ្នំពេញៈ ក្រុមប្រឹក្សាអាជីវកម្មអាស៊ាន (ABAC) បានស្នើឱ្យមានការផ្តួចផ្តើម ដើម្បីផ្សព្វផ្សាយពីការវិនិយោគនៅតំបន់អាស៊ាន តាមរយៈការសម្របសម្រួលពាណិជ្ជកម្មនៅក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន (AEM) និងមានការចូលរួមពីក្រុមប្រឹក្សាយោបល់អាជីវកម្មអាស៊ាន ក្នុងទីក្រុងដាណាង ប្រទេសវៀតណាម នៅថ្ងៃទី១០ខែមីនា ឆ្នាំ ២០២០នេះ។

ក្រុមប្រឹក្សាអាជីវកម្មអាស៊ាន បានស្នើសុំឱ្យមានការអភិវឌ្ឍមីក្រូសេដ្ឋកិច្ច សហគ្រាសខ្នាតតូច និងខ្នាតកណ្តាលនៅតំបន់អាស៊ាន ត្រូវផ្តោតសំខាន់ទៅលើចំនុចគន្លឹះចំនួន៥ដូចជាE -commerce វិស័យទេសចរណ៍ ប្រព័ន្ធដឹកជញ្ជូន និងគ្រប់គ្រងភស្តុភារ និងកំណែទម្រង់នយោបាយជាប់លាប់។

ក្រុមប្រឹក្សាបានធ្វើការស្រាយបំភ្លឺអំពីតួនាទីស្នូល នៃការផ្សព្វផ្សាយពីសេដ្ឋកិច្ចសក លលោក និងការចូលរួមចំណែកកសាងសហគមន៍សេដ្ឋកិច្ចអាស៊ាន (AEC) ឱ្យបរិយា កាសកាន់តែមានភាពស្រស់ស្រាយនិងសកម្ម រួមជាមួយនឹងឱកាសជាច្រើន ដែលមានគម្រោងធំៗ ដូចជា ការអភិវឌ្ឍន៍ធនធានមនុស្ស បណ្តាញពាណិជ្ជកម្មឌីជីថល និងការដំឡើងខ្លួនទៅជាប្រព័ន្ធប្រឹក្សាដ៏ជំនាញ សម្រាប់អាជីវកម្មឬមុខជំនួញក្នុងតំបន់អាស៊ាន។

ក្រសួងឧស្សាហកម្ម និងពាណិជ្ជកម្ម បានធ្វើជាអធិបតីនៃកិច្ចប្រជុំត្រៀមរបស់មន្រ្តីសេដ្ឋកិច្ចជាន់ខ្ពស់អាស៊ាន កាលពីថ្ងៃទី៨ មីនា ឆ្នាំ ២០២០ កន្លងទៅថ្មីៗនេះ។ អ្នកចូលរួមបានពិភាក្សា ទៅលើប្រធានបទសំខាន់ៗអាទិភាពចំនួន១៣ ដែលជាការដាក់ស្នើពីខាងប្រទេសវៀតណាម ដោយផ្អែកលើការតំរង់ទិសធំៗចំនួន៣ គឺការជំរុញការតភ្ជាប់សេដ្ឋកិច្ចក្នុងតំបន់ បង្កើនភាពជាដៃគូដើម្បីសន្តិភាព និងការអភិវឌ្ឍប្រកបដោយចីរភាព និងការបង្កើនសមត្ថភាពបន្ស៊ាំ នឹងអាស៊ាននិងប្រសិទ្ធភាពប្រតិបត្តិការ។

សមាគមប្រជាជាតិអាស៊ីអាគ្នេយ៍ (អាស៊ាន) ត្រូវបានបង្កើតឡើងក្នុងឆ្នាំ ១៩៦៧ មានប្រទេសចំនួន១០ ដូចជា ព្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី ភូមា ហ្វីលីពីន សឹង្ហបូរី ថៃនិងវៀតណាម៕

ដោយៈ រ៉ាណេត

ភ្នំពេញៈ ក្នុងនាមជាមហាមិត្តដ៏ជិតស្និទ្ធមិនអាចកាត់ថ្លៃបាន រហូតមកដល់ពេលនេះរដ្ឋាភិបាលចិន ដែលបច្ចុប្បន្នកំពុងតែជួបនូវវិបត្តិសេដ្ឋកិច្ច និងជំងឺCovid-19 ដ៏ធ្ងន់ធ្ងរនោះ បានព្យាយាមជួយសម្រួលដល់រាជរដ្ឋាភិបាលកម្ពុជាជាច្រើន ដែលក្នុងនោះត្រឹមតែក្នុងវិស័យហេដ្ឋារចនាសម្ព័ន្ធនានានៅទូទាំងប្រទេស ចិនបានផ្តល់ជំនួយរហូតដល់ជិត៣០០០លានដុល្លារសម្រាប់ការស្ថាបនាផ្លូវថ្នល់ និងស្ពាន។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានមានប្រសាសន៍ប្រាប់ អ្នកសារព័ត៌មាននៅដើមសប្ដាហ៍នេះ ក្នុងឱកាសប្រារព្វពិធីបើកសម្ពោធដាក់ឱ្យដំណើរការជាផ្លូវការផ្លូវជាតិលេខ៥៥ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែននាយករដ្ឋមន្រ្តីនៃកម្ពុជាថា រហូតមកដល់ពេលនេះ បើទោះជាស្ថិតនៅក្នុងស្ថានភាពអាក្រក់នៃជំងឺCovid-19 យ៉ាងណាក៏ដោយ ក៏រដ្ឋាភិបាលចិន មិនបានផ្អាកគម្រោងផ្តល់ជំនួយណាមួយមកលើកម្ពុជានោះទេ ។

លោកទេសរដ្ឋមន្ត្រីបានអះអាងថា ចិន គឺជាប្រទេសដែលបានផ្តល់ហិរញ្ញប្បទានច្រើនជាងគេសម្រាប់ការសាងសង់ផ្លូវថ្នល់ និងស្ពាននៅកម្ពុជា ដែលគិតមកដល់ពេលបច្ចុប្បន្ននេះ គម្រោងហេដ្ឋារចនាសម្ព័ន្ធ ដែលរួមមានផ្លូវថ្នល់ប្រើប្រាស់ហិរញ្ញប្បទាន និងជំនួយឥតសំណងរបស់ចិន បានសាងសង់រួចរាល់មានចំនួន២៧ខ្សែ ស្មើនឹងប្រវែងសរុប ២ ៧៧៩ គីឡូម៉ែត្រ ប្រើប្រាស់ថវិកាប្រមាណ១៦៣៦លានដុល្លារអាមេរិក។

ដោយឡែកគម្រោងដែលកំពុងសាងសង់ មានចំនួន៥ខ្សែ ស្មើនឹងប្រវែងប្រមាណ ៤៩៧.២០គីឡូម៉ែត្រ ប្រើប្រាស់ថវិកាប្រមាណ៧៥៨.៨៣ លានដុល្លារអាមេរិក។

លោកបានបន្ថែមទៀតថា “ផ្លូវថ្នល់ និងស្ពាន បានដើរតួនាទីយ៉ាងសំខាន់ណាស់សម្រាប់ប្រើប្រាស់ជាប្រយោជន៍ដល់សេដ្ឋកិច្ចជាតិ តាមរយៈការដឹកជញ្ជូន ដូច្នេះរាជរដ្ឋាភិបាលបានខិតខំប្រឹងប្រែងជម្នះ ដើម្បីសម្រេចឱ្យបានទៅតាមផែនការ ដែលបានគ្រោងទុក”។

ក្រោមជំនួយរបស់រដ្ឋាភិបាលចិន ស្ពានធំៗ ដែលបានសាងសង់រួចមានចំនួន៨ស្ពាន មានប្រវែងសរុប៧៤៣៤ ម៉ែត្រ ប្រើប្រាស់ថវិកាប្រមាណ២៣៣ លានដុល្លារអាមេរិក និងស្ពានកំពុងសាងសង់ ដូចជា ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ និងស្ពានឆ្លងកាត់ទន្លេបាសាក់ (សិត្បូ) នៃគម្រោងខ្សែក្រវាត់ក្រុងទី៣ ជាដើម មានប្រវែងសរុប ២ ១២៧ម៉ែត្រ ប្រើប្រាស់ថវិកាប្រមាណ១១៣លានដុល្លារអាមេរិក។

សរុបគម្រោងដែលប្រើប្រាស់ហិរញ្ញប្បទានសហប្រតិបត្តិការ និងជំនួយឥតសំណ​ងរបស់ចិនដែលបានសាងសង់រួច និងកំពុងសាងសង់មានទឹកប្រាក់សរុបរហូតដល់ប្រមា​ណ២ ៧៤១លានដុល្លារអាមេរិក៕

ដោយ ៖ រ៉ាណេត

ភ្នំពេញ ៖ បើទោះជាស្ថិតនៅក្នុងស្ថានភាពដែលកំពុងប្រឈមទៅនឹងភាពខ្វះខាតការផ្គត់ផ្គង់វត្ថុធាតុដើម ខណៈដែលរដ្ឋាភិបាលចិនកំពុងជំរុញ និងជួយដោះស្រាយ រដ្ឋាភិបាលកម្ពុជានៅតែបន្តទទួលបានសំណើរលើការវិនិយោគបន្ថែមពីសំណាក់ក្រុមហ៊ុនជាតិ និងអន្តរជាតិបន្ថែមចំនួន៤គម្រោង ដែលមានទំហំទុនសរុប ១៧,៤លានដុល្លារ។

ជាការឆ្លើយតបទៅនឹងការស្នើសុំ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុញ្ញាត និងអនុម័តលើគម្រោងបើករោងចក្រថ្មីចំនួន៤ទៀតឱ្យដំណើរការក្រោមទុនវិនិយោគសរុបចំនួន១៧,៤លានដុល្លារ ដែលមានទីតាំងស្ថិតនៅខេត្ត / ក្រុងចំនួន៣ផ្សេងគ្នា ។

គម្រោងបង្កើតរោងចក្រថ្មីចំនួន៤ ដែលគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញវិញ្ញាបនប័ត្រចុះបញ្ជីជាស្ថាពររួមមាន៖

១- ក្រុមហ៊ុន TIMBERPACK CARTON CO., LTD គម្រោងបង្កើតរោងចក្រផលិតកេសកាតុង ដែលមានទីតាំងវិនិយោគស្ថិតនៅភូមិអណ្តូង ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ ៣.៨លានដុល្លារអាមេរិក និងអាចបង្កើតការងារបានចំនួន ១៣៦កន្លែង។

២- ក្រុមហ៊ុន FORTRESS INTERNATIONAL CO., LTD គម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅភូមិព្រៃកីខ សង្កាត់ពងទឹក ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៥.៦លានដុល្លារអាមេរិក និងអាចបង្កើតការងារបានចំនួន ១ ៩២៨ កន្លែង។

៣- ក្រុមហ៊ុន QI YOU FOOTWEAR (CAMBODIA) CO., LTD គម្រោងបង្កើតរោងចក្រផលិតស្បែកជើងគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងប្រុយ ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ ៥.៥លានដុល្លារអាមេរិក និងអាចបង្កើតការងារបានចំនួន ១ ៨៣៤ កន្លែង។

៤- ក្រុមហ៊ុន TEXSSEL (CAMBODIA) CO., LTD គម្រោងបង្កើតរោងចក្រកាត់ដេរ និងចាក់សម្លៀកបំពាក់ កន្សែងបង់ក មួក ស្រោមដៃ ស្រោមជើង ភួយ បូគ្រប់ប្រភេទ និងវាយនភណ្ឌបម្រើក្នុងផ្ទះ ដែលមានទីតាំងវិនិយោគ ស្ថិតនៅភូមិសេរីភត្ត ឃុំពោធិ៍អង្គ្រង ស្រុកបរសេដ្ឋ ខេត្តកំពង់ស្ពឺ មានទុនវិនិយោគប្រមាណ ២.៥លានដុល្លារអាមេរិក និងអាចបង្កើតការងារបានចំនួន ១ ០៣៤ កន្លែង៕

ដោយវុត្ថា

ភ្នំពេញ៖ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងារោងចក្រកាន់ដេរចំនួន ៧ ដែលស្នើសុំព្យួរការងារកាលពីពីមុនបានចាប់ផ្តើមដំណើរការឡើងវិវញ បន្ទាប់ពីទទួលបានវត្ថុធាតុដើមដែលទើបនឹងដឹកពីប្រទេសចិនមកដល់ប្រទេសកម្ពុជាកាលពីយប់មិញនេះ ។

លោក ហេង សួរ បានប្រាប់សារព័ត៌មាននៅថ្ងៃទី ១០ ខែមីនា ឆ្នាំ ២០២០ នេះ ឱ្យដឹងថា ការមកដល់នៃវត្ថុធាតុដើមពីប្រទេសចិននេះ ជួយឱ្យរោងចក្រដែលព្យួរការងារមួយចំនួនចាប់ផ្តើមដំណើរការឡើងវិញផងដែរក្នុងនោះរោងចក្រដែលសុំព្យួរការងារចំនួន៧ដែលមានកម្មករសរុបប្រមាណ ១០,១០៣នាក់ ស្រ្តី ៩,១៧៣នាក់បានដំណើរការឡើងវិញ។

លោកថ្លែងថា “ការមកដល់នៃវត្ថុធាតុដើមទាំងនេះ វានឹងជួយឲ្យរោងចក្រដែលមិនទាន់ព្យួរកាន់តែអាចដំណើរការទៅមុខដោយមិនបាច់ព្យួរ។ ប្រសិនជាវាផ្គត់ផ្គង់ទៅរោងចក្រដែលព្យួរ គឺវានឹងធ្វើឲ្យរោងចក្រនោះបើកឡើងវិញ។ កង្វះវត្ថុធាតុដើមនេះ បានធ្វើឱ្យរោងចក្រចំនួន ៥០ព្យួរការងារ នាំឱ្យប៉ះពាល់កម្មករ និយោជិត ២០,៩៤០នាក់ ស្រ្តី ១៦,១៨៣នាក់”។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងពិធីចែកសញ្ញាបត្រដល់និស្សិតវណ្ណដារ នៅថ្ងៃទី ១០ ខែមីនានេះបានឱ្យដឹងថា មិត្តចិនបានសម្របសម្រួលនាវាចំនួន៧គ្រឿងឱ្យដឹកវត្ថុធាតុដើមមកផ្គត់ផ្គង់នៅក្នុងរោងចក្រកាត់ដេរនៅកម្ពុជា ខណៈមានរោងចក្រមួយចំនួនសុំព្យួរការងារដែលបង្ករឡើងដោយខ្វះវត្ថុធាតុដើម និង ជំងឺកូវីត១៩។

បើតាមសម្តេចតេជោ នាវាទំាង ៧ គ្រឿនោះ នាវា ៥គ្រឿង នឹងដឹកទំនិញចូលកំពង់ផែក្រុងព្រះសីហនុ រីឯនាវាពីរទៀតដឹកវត្ថុធាតុដើមចូលទីក្រុងហូជីមិញ ប្រទេសវៀតណាម ហើយដឹកបន្តតាមរថយន្តទៅផ្គត់ផ្គង់រោងចក្រនានានៅក្រុងបាវិត ខេត្តស្វាយរៀង និងបន្តដឹកហូតដល់មានការបញ្ចប់ជំងឺកូវីដ១៩ ។

សម្តេចតេជោ ហ៊ុន សែន បានចាត់ទុកការពន្លឿនការដឹកវត្ថុធាតុដើមពីចិនមកកាន់ប្រទេសកម្ពុជានេះ គឺកើតចេញពីទំនាក់ទំនងល្អរវាងកម្ពុជា និងចិន ជាពិសេសភាពជាដៃគូទំនាក់ទំនងគ្រប់ជ្រុងជ្រោយរវាងប្រទេសទាំងពីរ។
នាវាដឹកវត្ថុធាតុដើមប្រមាណ ១៩១ទូបានចូលមកដល់ប្រទេសកម្ពុជាហើយនៅយប់ថ្ងៃទី០៩ ខែមីនា ឆ្នាំ២០២០ ដើម្បីផ្គត់ផ្គង់នៅតាមរោងចក្រនានា។ វត្ថុធាតុដើមទាំងនេះ បានធ្វើឱ្យរោងចក្រព្យួរការងារចាប់ផ្តើមដំណើរការឡើងវិញបណ្តើរៗហើយ។ ជំងឺកូវីត១៩ដែលវាយលុកនៅក្នុងប្រទេសចិន បានធ្វើឱ្យរអាក់រអួលដល់ការផ្គត់ផ្គង់វត្ថុធាតុដើមពីប្រទេសចិន និងនាំឱ្យអាកខានដល់ដំណើរការរោងចក្រនៅក្នុងប្រទេសកម្ពុជាផងដែរ៕