ដោយ: គង់ លាងហួរ
អន្តរជាតិ: យោងតាមក្រុមហ៊ុនប្រឹក្សាអចលនទ្រព្យ Savills បានរាយការណ៍ថា តម្លៃលំនៅដ្ឋានលំដាប់ខ្ពស់ក្នុងបណ្តាទីក្រុងនានាក្នុងតំបន់អាសុីបានជួបប្រទះនឹងការប្រែប្រួលក្នុងឆមាសទី១ ឆ្នាំ២០២៥។ ជាមួយគ្នានេះ ក្រុមហ៊ុន Savills បានបង្ហាញការព្យាករណ៍សម្រាប់ឆមាសទី២។

ជាក់ស្តែង ក្នុងរយៈពេល៦ខែដំបូងដើមឆ្នាំ២០២៥នេះ តម្លៃផ្ទះលំដាប់ខ្ពស់នៅទីក្រុងគូឡាឡាំពួរនៃប្រទេសម៉ាឡេសុីបានកើនឡើង០,៦ភាគរយដល់ទំហំទឹកប្រាក់ចំនួន២៤០ដុល្លារអាមេរិកក្នុងមួយហ្វីតការ៉េ។

នៅឆមាសទី២ ឆ្នាំ២០២៥ តម្លៃផ្ទះលំដាប់ខ្ពស់នៅក្នុងទីក្រុងគូឡាឡាំពួរត្រូវបានគេរំពឹងថា នឹងកើនឡើងចន្លោះពី០ភាគរយទៅ១,៩ភាគរយ។

ចំណែក តម្លៃផ្ទះលំដាប់ខ្ពស់នៅទីក្រុងសុីដនី នៃប្រទេសអូស្ត្រាលីសម្រេចបានអត្រាកំណើនក្នុងរង្វង់១,៨ភាគរយដល់ទំហំទឹកប្រាក់ចំនួន២.០០០ដុល្លារក្នុងមួយហ្វីតការ៉េនៅឆមាសទី១ និងត្រូវបានគេរំពឹងថា នឹងកើនឡើងចន្លោះពី៤ភាគរយទៅ៥,៩ភាគរយក្នុងឆមាសទី២។

ស្របពេលជាមួយគ្នានេះ តម្លៃផ្ទះលំដាប់ខ្ពស់នៅទីក្រុងបុមបៃ នៃប្រទេសឥណ្ឌាសម្រេចបានអត្រាកំណើនក្នុងរង្វង់០,៤ភាគរយដល់ទំហំទឹកប្រាក់ចំនួន១.២០០ដុល្លារក្នុងមួយហ្វីតការ៉េនៅឆមាសទី១ និងត្រូវបានគេរំពឹងថា នឹងកើនឡើងចន្លោះពី២ភាគរយទៅ៣,៩ភាគរយក្នុងឆមាសទី២។

តម្លៃផ្ទះលំដាប់ខ្ពស់នៅក្នងទីក្រុងសិង្ហបុរីសម្រេចបានអត្រាកំណើនក្នុងរង្វង់០,២ភាគរយដល់ទំហំទឹកប្រាក់ចំនួន១.៨១០ដុល្លារក្នុងមួយហ្វីតការ៉េនៅឆមាសទី១ និងត្រូវបានគេរំពឹងថា នឹងកើនឡើងចន្លោះពី០ភាគរយទៅ១,៩ភាគរយក្នុងឆមាសទី២។

តម្លៃផ្ទះលំដាប់ខ្ពស់នៅទីក្រុងប៉េកាំងនៃប្រទេសចិនបានថយចុះក្នុងរង្វង់០,៥ភាគរយមកនៅត្រឹមទំហំទឹកប្រាក់ចំនួន១.៤៩០ដុល្លារក្នុងមួយហ្វីតការ៉េនៅឆមាសទី១ និងត្រូវបានគេរំពឹងថា នឹងស្ថិតនៅទ្រឹងក្នុងឆមាសទី២។

រីឯ តម្លៃផ្ទះលំដាប់ខ្ពស់នៅទីក្រុងសៀងហៃបានថយចុះក្នុងរង្វង់១,៥ភាគរយមកនៅត្រឹមទំហំទឹកប្រាក់ចំនួន១.៩៨០ដុល្លារក្នុងមួយហ្វីតការ៉េនៅឆមាសទី១ និងត្រូវបានគេរំពឹងថា នឹងកើនឡើងចន្លោះពី០ភាគរយទៅ១,៩ភាគរយក្នុងឆមាសទី២។

តម្លៃផ្ទះលំដាប់ខ្ពស់នៅទីក្រុងសុិនជិនបានថយចុះក្នុងរង្វង់១,៧ភាគរយមកនៅត្រឹមទំហំទឹកប្រាក់ចំនួន១.៤៤០ដុល្លារក្នុងមួយហ្វីតការ៉េនៅឆមាសទី១ និងត្រូវបានគេរំពឹងថា នឹងបន្តថយចុះ១,៩ភាគរយក្នុងឆមាសទី២៕ប្រភព: Savills៕

ដោយ: គង់ លាងហួរ
អន្តរជាតិ: យោងតាមកាសែត South China Morning Post បានរាយការណ៍ថា បណ្តាអ្នកទិញផ្ទះនៅតាមទីក្រុងធំៗរបស់ប្រទេសចិនមិនបង្ហាញសុទិដ្ឋិនិយមចំពោះការបន្ធូរបន្ថយគោលនយោបាយថ្មីរបស់អាជ្ញាធរចិននោះទេ ខណៈពួកគេរំពឹងថា តម្លៃផ្ទះអាចនឹងបន្តធ្លាក់ចុះបន្ថែមទៀត។

ជាមួយគ្នានេះ ក្រុមអ្នកវិភាគ និងក្រុមអ្នកទិញមួយចំនួនបានព្រមានថា ការថយចុះនូវទំនុកចិត្តអាចនឹងកាត់បន្ថយប្រសិទ្ធភាពវិធានការនានា ដែលបានដាក់ចេញក្នុងគោលបំណងស្តារទីផ្សារអចលនទ្រព្យឱ្យស្ទុះងើបឡើងវិញ។

លោក Qiu Lixiao បុគ្គលិកភ្នាក់ងារអចលនទ្រព្យនៅក្រុមហ៊ុន Pacific Rehouse ក្នុងទីក្រុងសៀងហៃ បានលើកឡើងថា “ក្រុមអ្នកទិញរំពឹងថា តម្លៃផ្ទះនឹងបន្តធ្លាក់ចុះ។ ហេតុដូច្នេះ ទីផ្សារកំពុងស្ថិតក្នុងស្ថានភាពដុនដាបចុះយ៉ាងខ្លាំង”។

លោក​ Qiu បាន​បន្ថែម​ថា ការដាក់ចេញវិធានការ និងកិច្ច​ខិត​ខំ​ប្រឹង​ប្រែង​នានាដើម្បី​ជំរុញ​ការ​លក់​ផ្ទះ​ថ្មី និង​ផ្ទះប្រភេទទី២(Second-hand) ​មិន​មាន​ប្រសិទ្ធភាព​នោះទេ។នេះបើយោងតាមការដកស្រង់សម្តីចុះផ្សាយដោយកាសែត South China Morning Post។

លោកបានបន្តថា ទីភ្នាក់ងាររបស់លោកមិនសូវទទួលបានការសាកសួរព័ត៌មានពីអតិថិជនទេ ចាប់តាំងពីរដ្ឋបាលក្រុងប៉េកាំងបានលុបចោលការរឹតបន្តឹងការទិញផ្ទះក្នុងតំបន់ជាយរដ្ឋធានីប៉េកាំង។

កាលពីថ្ងៃទី៨ ខែសីហា សាលាក្រុងប៉េកាំងបានប្រកាសថា ខ្លួននឹងអនុញ្ញាតឱ្យប្រជាជនអាចទិញផ្ទះថ្មី និងផ្ទះប្រភេទទី២ នៅខាងក្រៅផ្លូវក្រវ៉ាត់ក្រុងទី៥ ដែលហ៊ុមព័ទ្ធជុំវិញតំបន់ជាយក្រុងប៉េកាំង។

ការលុបចោលការរឹតបន្តឹងនេះត្រូវបានគេវាយតម្លៃថា ជាការបោះជំហានយ៉ាងធំរបស់រដ្ឋបាលមូលដ្ឋានរបស់ប្រទេសចិនក្នុងគោលដៅស្រោចស្រង់ទីផ្សារអចលនទ្រព្យ។ជាមួយគ្នានោះ ទីក្រុងសៀងហៃត្រូវបានរំពឹងថា នឹងចាត់វិធានការស្រដៀងគ្នានេះ៕ប្រភព: SCMP៕

ដោយ: គង់ លាងហួរ
អន្តរជាតិ: គម្រោងសាងសង់រដ្ឋធានីថ្មី Nusantara លើកោះ Borneo របស់ប្រទេសឥណ្ឌូនេសុីហាក់ពុំមែនជាអាទិភាពបន្ទាន់របស់រដ្ឋាភិបាលក្រោមការដឹកនាំរបស់ប្រធានាធិបតីឥណ្ឌូនេសុីបច្ចុប្បន្នលោក Prabowo Subianto នោះទេ។

លោក Siti Zuhro អ្នកជំនាញនយោបាយនៅទីភ្នាក់ងារស្រាវជ្រាវ និងនវានុវត្តន៍ឥណ្ឌូនេស៊ី (BRIN) បានអះអាងថា វិធីសាស្រ្តរបស់លោក Prabowo មានភាពខុសប្លែកពីអតីតប្រធានាធិបតីឥណ្ឌូនេសុីលោក Joko widodo។

លោក Joko widodo ជឿជាក់ថា ការអភិវឌ្ឍន៍សេដ្ឋកិច្ចអាចសម្រេចទៅបាន តាមរយៈការបណ្តាក់ទុនវិនិយោគលើគម្រោងសាងសង់ហេដ្ឋារចនាសម្ព័ន្ធធំៗ។នេះបើយោងតាមការចុះផ្សាយដោយសារព័ត៌មាន CNA។

ផ្ទុយទៅវិញ លោក Prabowo មានចក្ខុវិស័យក្នុងការកសាងភាពធន់ផ្នែកសេដ្ឋកិច្ចចាប់តាំងពីថ្នាក់មូលដ្ឋាន ដូចជា ការបង្កើតសហករណ៍ភូមិ និងគំនិតផ្តួចផ្តើមកាត់បន្ថយភាពក្រីក្រ តាមរយៈកម្មវិធីផ្តល់អាហារឥតគិតថ្លៃនៅតាមសាលារៀន។

ផែនការរបស់លោក Prabowo ក្នុងការអភិវឌ្ឍន៍សហករណ៍ចំនួន៨០.០០០កន្លែងនៅគ្រប់តំបន់ជនបទទូទាំងប្រទេសឥណ្ឌូនេស៊ីត្រូវការទុនវិនិយោគ២៥ពាន់លានដុល្លារអាមេរិក ខណៈគំនិតផ្តួចផ្តើមផ្តល់អាហារដោយឥតគិតថ្លៃនៅតាមសាលារៀនត្រូវបានគេរំពឹងថា នឹងចំណាយទុនវិនិយោគចំនួន៧ពាន់លានដុល្លារក្នុងមួយឆ្នាំៗ។

កម្មវិធីអាទិភាពផ្សេងទៀតរបស់លោក Prabowo រួមមានការពិនិត្យសុខភាពដោយឥតគិតថ្លៃ ការលើកលែងថ្លៃសាលា ថ្លៃអាហារ និងថ្លៃស្នាក់នៅសម្រាប់សិស្សមកពីគ្រួសារមានប្រាក់ចំណូលទាប និងការសាងសង់ផ្ទះមានតម្លៃសមរម្យឱ្យបានចំនួន១លានយូនីតក្នុងមួយឆ្នាំ។

រដ្ឋាភិបាលឥណ្ឌូនេសុីនាពេលបច្ចុប្បន្នរបស់លោក Prabowo មានបំណងផ្តល់អាទិភាពដល់កម្មវិធីគោលនយោបាយថ្មីរបស់ខ្លួន ដែលត្រូវការទុនវិនិយោគយ៉ាងច្រើនសន្ធឹកសន្ធាប់ ខណៈគម្រោងនានារបស់រដ្ឋាភិបាលពីមុនត្រូវបានទុកមួយឡែក។

រដ្ឋបាលរបស់អតីតប្រធានាធិបតីឥណ្ឌូនេសុីលោក Joko widodo បានបោះទុនវិនិយោគចំនួន៨៩ទ្រីលានរូពៀ (ប្រមាណ៥,៥ពាន់លានដុល្លារ)ក្នុងការអភិវឌ្ឍន៍រដ្ឋធានី Nusantara នៅចន្លោះឆ្នាំ២០២២ និងឆ្នាំ២០២៤។

ចំណែក រដ្ឋបាលលោក Prabowo បានប្តេជ្ញាបោះទុនវិនិយោគលើគម្រោងរដ្ឋធានីថ្មីនេះក្នុងទំហំទឹកប្រាក់ត្រឹមតែ៤៨,៨ទ្រីលានរូពៀប៉ុណ្ណោះនៅចន្លោះឆ្នាំ២០២៥ និងឆ្នាំ២០២៩ខាងមុខ៕ប្រភព: CNA៕

(ភ្នំពេញ)៖ ឆ្លើយតបនឹងតម្រូវការ និងស្មារតីជាតិនិយមគាំទ្រផលិតផលខ្មែរ អ្នកឧកញ៉ា លាង ម៉េង ស្ថាបនិកក្រុមហ៊ុន ខ្មែរ ប៊ែរវើរីជីសបានគូសបញ្ជាក់ថា បច្ចុប្បន្នអ្នកជំនាញរបស់ក្រុមហ៊ុន ក្រុមហ៊ុន ខ្មែរ ប៊ែរវើរីជីស បាននិងកំពុងធ្វើការសិក្សាស្រាវជ្រាវ ឈានទៅផលិតទំនិញថ្មីៗប្រមាណ ១០មុខបន្ថែមទៀត ដើម្បីបំពេញតម្រូវការក្នុងស្រុក និងជំនួសទំនិញនាំចូល។

ទំនិញថ្មីដែលក្រុមហ៊ុននេះ គ្រោងសិក្សាក្នុងការវិនិយោគ មានដូចជាទឹកដោះគោ ឬតែជាដើម។ បើទោះបីជាក្រុមហ៊ុនមានគម្រោងពង្រីកការផលិតផលិតផលថ្មីក៏ដោយ ប៉ុន្តែក្រុមហ៊ុននៅតែពង្រឹងទៅលើផលិតផលចាស់ដដែល។

អ្នកឧកញ៉ា លាង ម៉េង លើកឡើងបែបនេះ ធ្វើឡើងក្នុងកម្មវិធី FRESH BUSINESS ពិភាក្សាលើប្រធានបទ៖ «យន្តការផលិតផលិតផលថ្មី ស្របពេលនិន្នាការគាំទ្រផលិតផលក្នុងស្រុកមានសន្ទុះខ្លាំង»។

ដោយៈ ចំណាន

    ភ្នំពេញៈ រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់បានបង្ហាញនូវការប្រែក្លាយទស្សនទាន “ប្រជាពលរដ្ឋខ្មែរគ្រប់រូបមានលំនៅឋាន សមរម្យសម្រាប់ការរស់នៅជាទ្រនំសុភមង្គល”ឱ្យទៅជាសកម្មភាពជាក់ស្តែង និងរស់រវើក។

ព័ត៌មាននេះ ត្រូវបានប្រកាសក្នុងកិច្ចប្រជុំ ក្រោមអធិបតីភាព លោកសាយ សំអាល់រដ្ឋមន្រ្តីក្រសួងរៀបចំដែនដី នគរូបនីយកម្ម និង​សំណង់កាលពីដើមសប្តាហ៍នេះ។

លោកសាយ សំអាល់ បានដឹកនាំកិច្ចប្រជុំផ្ទៃក្នុង ពិភាក្សាលើសេចក្តីព្រាងអនុក្រឹត្យស្តីពីការបង្កើតមូលនិធិលំនៅឋាន ដែលនឹងក្លាយទៅជាឧបករណ៍យ៉ាងសំខាន់ក្នុងផ្តល់លទ្ធភាព ឱ្យប្រជាពលរដ្ឋកម្ពុជា ក៏ដូចជាអង្គការ ស្ថាប័នពាក់ព័ន្ធ ចូលរួមក្នុងការលើកម្ពស់លទ្ធភាពផ្តល់លំនៅឋាន ជូនប្រជាជនដែលមានប្រាក់ចំណូលទាប សម្រាប់ការរស់នៅ។

កិច្ចប្រជុំពិគ្រោះយោបល់ បានផ្តល់ឱកាសឱ្យអ្នកពាក់ព័ន្ធបានយល់​កាន់តែទូលំទូលាយ និងឯកភាពលើខ្លឹមសារសេចក្តីព្រាងអនុក្រឹត្យនេះ៕