ដោយ ប៊ី

ភ្នំពេញ៖ វិស័យសាធារណៈរបស់ប្រទេសកម្ពុជានឹងត្រូវបានផ្សារភ្ជាប់ជាលក្ខណៈឌីជីថលជាមួយបណ្តាប្រទេសដទៃទៀតនៅក្នុងគំនិតផ្តួចផ្តើមថ្មីដែលបានចាប់ផ្តើម ដោយកម្មវិធីអភិវឌ្ឍន៍សហប្រជាជាតិ (UNDP)។

កម្មវិធីនៅកម្ពុជានេះគឺជាកម្មវិធីចុងក្រោយនៃគំរោងបង្កើនល្បឿន UNDP Accelerator Labs ដែលត្រូវបានដាក់ឱ្យប្រើប្រាស់នៅទ្វីបអាហ្រ្វិក អាមេរិកខាងត្បូង អាស៊ី និងអឺរ៉ុបខាងកើត។ គោលបំណងគឺដើម្បីប្រមូលផ្តុំគំនិតនៅថ្នាក់មូលដ្ឋានជាមួយបច្ចេកវិទ្យា និងទិន្នន័យជាក់ស្តែងដើម្បីឆ្លើយតបនឹងបញ្ហាពិភពលោកដែលស្មុគស្មាញ ដូចជាការផ្លាស់ប្តូរអាកាសធាតុ ភាពអត់ការងារធ្វើរបស់យុវជន និងវិសមភាព។

លោក Nick Beresford តំណាងប្រជាជន UNDP បានមានប្រសាសន៍ថា កម្មវិធីថ្មីនៅកម្ពុជានេះនឹងផ្តោតលើការបង្កើតថ្មីនៅក្នុងវិស័យសាធារណៈ។

លោកបានមានប្រសាសន៍ថា “យើងគិតថា វាមានតម្លៃច្រើនណាស់នៅក្នុងមន្រ្តីរាជការខ្លួនឯង ដែលច្រើនតែមានគំនិតនិងសក្តានុពលល្អ ប៉ុន្តែពួកគេត្រូវការកន្លែងមានសុវត្ថិភាពដើម្បីអាចធ្វើការពិសោធន៍ និងនាំយកគំនិតទាំងនេះមកសេវាកម្ម ដូច្នេះនោះគឺជាអ្វីដែលយើងចង់ព្យាយាមធ្វើការជាមួយពួកគេជាការលើកលើកទឹកចិត្ត។ ការច្នៃប្រឌិតថ្មីនេះគឺមកពីរដ្ឋាភិបាល”។

លោក Beresford បានឱ្យដឹងថា បច្ចេកវិទ្យាមានតួនាទីសំខាន់ក្នុងការសំរេចគោលដៅអភិវឌ្ឍន៍របស់អង្គការសហប្រជាជាតិ។ លោកបានមានប្រសាសន៍ថា “យើងទាំងអស់គ្នាត្រូវតែមានភាពជាសហគ្រិនអោយលឿន និងខ្លាំងជាងមុន ប្រសិនបើយើងឈានដល់គោលដៅអភិវឌ្ឍន៍ប្រកបដោយចីរភាពនៅឆ្នាំ ២០៣០”។

លោកបានមានប្រសាសន៍ថា “មន្ទីរពិសោធន៍បង្កើនល្បឿននៅកម្ពុជា និង ៥៩ ប្រទេសផ្សេងទៀតគឺជាវិធីសាស្រ្តថ្មីក្នុងការស្វែងរកដំណោះស្រាយប្រកបដោយចីរភាពចំពោះបញ្ហាប្រឈមស្មុគស្មាញក្នុងវិស័យអភិវឌ្ឍន៍”៕

ដោយវុត្ថា

ភ្នំពេញ៖ លោក Zhang Yong ដែលមានដើមកំណើនមកប្រទេសចិន បានក្លាយជាអ្នកមានលុយច្រើនជាងគេបំផុត នៅក្នុងប្រទេសសិង្ហបុរី ដោយមានលុយជិត ១៦ ពាន់លានដុល្លារអាមេរិក។

លោក Zhang Yong កើតឆ្នាំ ១៩៦៩ នៅក្នុងទីក្រុង Sichuan នៃប្រទេសចិន ។ លោកជាស្ថាបនិកក្រុមហ៊ុន Haidilao International Holding Ltd ដែលបំរើសេវាភោជនីយដ្ឋានដ៏ល្បីល្បាញ Hai Dilao និងទទួលបានការគាំទ្រយ៉ាងច្រើន។

នៅចុងឆ្នាំ ២០១៨ ភោជនីយដ្ឋាន Hai Dilao Hot Pot មានចំនួន ៤៦៦ កន្លែងដែលកំពុងប្រតិបត្តិការនៅក្នុងទីក្រុងជាង ១០០នៅទូទាំងពិភពលោក ។

ក្រៅពី ភោជនីយដ្ឋាន Hai Dilao Hot Pot ដែលបានក្លាយជាភោជនីយដ្ឋាន hotpot ធំជាងគេ និងល្បីល្បាញ លោក ក៏បានបើកភោជនីយដ្ឋានទី ២ គឺLou Wai Lou នៅឆ្នាំ ១៩៩៨។ លុះដល់ឆ្នាំ ២០១០ លោក បានបើកសាលាបណ្តុះបណ្តាលលើការគ្រប់គ្រងភោជនីយដ្ឋាន។ នៅឆ្នាំ ២០១៣ មហាសេដ្ឋីរូបនេះ បានបើកភោជនីយដ្ឋាន Hai Dilao Hot Pot ជាលើកដំបូងនៅសហរដ្ឋអាមេរិកក្នុងរដ្ឋ Los Angeles។

ទស្សនាវដ្តី Forbes បានចុះផ្សាយថា គិតត្រឹមខែកញ្ញាឆ្នាំ ២០១៩ លោក Zhang Yong មាន ទ្រព្យសម្បត្តិចំនួន ១៥,១ ពាន់លានដុល្លារដែលធ្វើឱ្យលោកក្លាយជាអ្នកមានជាងគេបំផុតនៅក្នុងប្រទេសសិង្ហបុរី។ ជាមួយគ្នានេះ លោកក៏បានជាប់ចំណាត់ថ្នាក់លេខ ២២៤ ក្នុងបញ្ជីមហាសេដ្ឋីពិភពលោកឆ្នាំ ២០១៩ របស់ Forbes ផងដែរ។

លោកបានរៀបការជាមួយលោកស្រី Shu Ping ដែលជាសហស្ថាបនិក និងជានាយកប្រតិបត្តិនៃក្រុមហ៊ុន Sichuan Haidilao Catering ហើយបានប្តូរមករស់នៅក្នុងប្រទេសសឹង្ហបូរីនៅក្នុងឆ្នាំ ២០១០ ជាមួយនឹងភោជនីយដ្ឋានដ៏ល្បីល្បាញរបស់អ្នកទាំងពីរ។ មកដល់ពេលនេះ អ្នកទាំងពីរក៏ទទួលបានសញ្ជាតិសិង្ហបុរី ហើយក៏បង្កើតបកូនប្រុសមួយ៕

ដោយ ៖ រ៉ាណេត

ភ្នំពេញ ៖ អនុវត្តទៅតាមផែនការដែលបានគ្រោងទុក កម្លាំងមន្ត្រីជំនាញបានធ្វើចុះត្រួតពិនិត្យពីស្ថានភាព និងទីតាំងសម្រាប់រៀបចំពិធីបើកសម្ពោធការដ្ឋានស្ថាបនាផ្លូវជាតិលេខ២ និងផ្លូវលេខ២២ ក្រោមធអិបតីដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅត្រឹមព្រឹកថ្ងៃទី១១ ខែកុម្ភៈ ឆ្នាំ២០២០ខាងមុខនេះ ។

កាលពីចុងសប្ដាហ៍កន្លងទៅនេះ តាមរយៈនាយកដ្ឋានផ្លូវថ្នល់បានឱ្យដឹងថា កម្លាំងមន្ត្រីជំនាញបានចុះធ្វើការត្រួតពិនិត្យទីតាំងមួយចំនួនដែលស្ថិតនៅតាមបណ្តោយផ្លូវជាតិលេខ២ ដើម្បីសម្រេចជ្រើសទីតាំងសម្រាប់រៀបចំពិធីបើកសម្ពោធការដ្ឋានស្ថាបនាផ្លូវជាតិលេខ២ និងលេខ២២ ឱ្យមានភាពល្អប្រសើរឡើងវិញ។

កំណាត់ផ្លូវជាតិលេខ ២ ដែលស្ថិតនៅក្នុងគម្រោងសាងសង់ និងស្ថាបនាឡើងវិញនេះមានប្រវែងសរុបចំនួន ៦២,៥៦គីឡូម៉ែត្រ ដោយគិតចាប់ពីរង្វង់មូលតាខ្មៅ-អូរចំបក់ ដល់រង្វង់មូលក្រុងដូនកែវ ខេត្តតាកែវ និងផ្លូវជាតិលេខ ២២ មានប្រវែងសរុបចំនួន ៩,៦១ គីឡូម៉ែត្រ ចាប់គិតពីរង្វង់មូលក្រុងដូនកែវ ដល់អង្គតាសោម ផ្លូវជាតិលេខ ៣ ក្រោមក្របខណ្ឌឥណទានពីសាធារណរដ្ឋកូរ៉េ ក្នុងទំហំថវិកាប្រមាណ៤៥ លានដុល្លារអាមេរិក ដោយប្រគល់សិទ្ធិឱ្យក្រុមហ៊ុន Hanshin Engineering & Construction Co., Ltd ជាអ្នកសាងសង់។

សម្រាប់ការសាងសង់ចាប់ពីរង្វង់មូលតាខ្មៅ រហូតដល់រង្វង់មូលអូរចំបក់ដែលមានប្រវែង ៥៧គីឡូម៉ែត្រ និង៩គីឡូម៉ែត្រ នៅលើផ្លូវជាតិលេខ២២គ្រោងក្រាលកៅស៊ូ AC សង់ស្ពានថ្មី និងពង្រីកទទឹងផ្លូវឲ្យបាន ១៣ម៉ែត្រ តាមទំហំចរាចរណ៍ និងតាមដំណាក់កាល។ ដោយឡែកចាប់ពីរង្វង់មូលគួរស្រូវ ទៅទិសខាងត្បូងប្រវែង ៨គីឡូម៉ែត្រ គ្រោងនឹងសាងសង់ជា ៤គន្លង ៕

ដោយ ប៊ី

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តឱ្យបើកដំណើរនូវគម្រោងវិនិយោគថ្មីៗចំនួន ៧ រួមមានរោងចក្រកាត់ដេរ និងកាបូប នៅក្នុងខែមករា ឆ្នាំ២០២០ ខណៈគម្រោងវិនិយោគថ្មីទាំងនេះបានចាក់ចូលទុនវិនិយោគប្រមាណ ៣៣ លានដុល្លារអាមេរិក និងបង្កើតការងារថ្មីជូនពលរដ្ឋរាប់ពាន់កន្លែងនៅកម្ពុជា។

គណៈកម្មាធិការវិនិយោគកម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរតាមសំណើសុំវិនិយោគរបស់ក្រុមហ៊ុនខាងលើដូចខាងក្រោម៖

១៖ SUN AWESOME GARMENT CO., LTD. គម្រោងបង្កើតរោងចក្រកាត់ដេរសម្លៀកបំពាក់ និងបោកគក់ ដែលមានទីតាំងវិនិយោគស្ថិតនៅភូមិកប្បាស ឃុំខ្វិតធំ ស្រុកព្រៃឈរ ខេត្តកំពង់ចាម មានទុនវិនិយោគប្រមាណ៦.៩លានដុល្លារអាមេរិក និងអាចបង្កើតការងារបានចំនួន ៦១០នាក់។

២៖ FAMOUS LEATHERWARE (CAMBODIA) CO., LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅដីទ្បូតិ៍លេខ១៥២៩ (អគារលេខ៧ និងលេខ៨) ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានទុនវិនិយោគប្រមាណ៥.៣លានដុល្លារអាមេរិក និងអាចបង្កើតការងារបានចំនួន ៣១៤នាក់។

៣៖ XIN HAK MUY MAKE CLOTHES ASSIST MATERIAL CO., LTD. គម្រោងបង្កើតរោងចក្រត្បាញខ្សែបន្ទះ ខ្សែយឺត និងអំបោះដេរ ដែលមានទីតាំងវិនិយោគស្ថិតនៅផ្លូវលេខ២៧១ ភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មានទុនវិនិយោគប្រមាណ២.៥លានដុល្លារអាមេរិក និងអាចបង្កើតការងារបានចំនួន ២៣២នាក់។

៤៖ KIMBAO BAG INDUSTRY CO., LTD. គម្រោងបង្កើតរោងចក្រផលិតកាបូប និងថង់យួរគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល មានទុនវិនិយោគប្រមាណ២.៥លានដុល្លារអាមេរិក និងអាចបង្កើតការងារបានចំនួន ៣៣៤នាក់។

៥៖ KNITERACY ASIA COMPANY LIMITED គម្រោងបង្កើតរោងចក្រកាត់ដេរ និងចាក់សម្លៀកបំពាក់ ទីតាំងវិនិយោគស្ថិតនៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល មានទុនវិនិយោគប្រមាណ ២.៤លានដុល្លារអាមេរិក និងអាចបង្កើតការងារបានចំនួន ១,០២៦កន្លែង។

៦៖ K.Y ODYSSEY GARMENT CO.,LTD គម្រោងបង្កើតរោងចក្រកាត់ដេរសម្លៀកបំពាក់ ទីតាំងវិនិយោគស្ថិតនៅភូមិត្រាវ ឃុំទឹកល្អក់ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ១០.៧លានដុល្លារអាមេរិក និងអាចបង្កើតការងារបានចំនួន១,៧៩៧កន្លែង។

៧៖ KING LIAN (CAMBODIA) GARMENT FACTORY CO.,LTD គម្រោងបង្កើតរោងចក្រកាត់ដេរសម្លៀកបំពាក់ ទីតាំងវិនិយោគស្ថិតនៅភូមិបុស្សតានៃ ឃុំកាហែង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៣.១លានដុល្លារអាមេរិក និងអាចបង្កើតការងារបានចំនួន១,២២៥កន្លែង៕

ដោយ ប៊ី

ភ្នំពេញៈ ប្រទេសកម្ពុជាបានស្វាគមន៍ គម្រោងវិនិយោគរបស់ជប៉ុនចំនួន១៣៧គម្រោ​ងដែលមានតម្លៃ២,៥ពាន់លានដុល្លារ ក្រោមក្របខ័ណ្ឌនៃការវិនិយោគផ្ទាល់របស់ជប៉ុននៅចន្លោះឆ្នាំ១៩៩៤ និងឆ្នាំ២០១៩។

ការធ្វើបច្ចុប្បន្នភាពនេះ ត្រូវបានផ្តល់ដោយលោក ប៊ុន ចន្ធី អនុរដ្ឋលេខាធិការក្រសួងពាណិជ្ជកម្មក្នុងសិក្ខាសាលាស្តីពី “ការទទួលបានអត្ថប្រយោជន៍ ពីខ្សែសង្វាក់ដ៏មានតម្លៃ តាមរយៈបណ្តាញ MSME” នៅទីក្រុងភ្នំពេញនាពេលថ្មីៗនេះ។

លោកប៊ុន ចន្ធីបានបន្តថា គម្រោងវិនិយោគទាំងនេះ ផ្តោតសំខាន់លើផ្នែកអេឡិចត្រូនិក អគ្គិសនី គ្រឿងបន្លាស់រថយន្ត យានយន្ត ឧបករណ៍បច្ចេកទេស កសិឧស្សាហកម្ម កែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ ផ្សារទំនើប និងការវិនិយោគផ្សេងៗទៀត។លោកបន្តថា បច្ចុប្បន្ននេះមានសហគ្រាសធុនតូច និងមធ្យមរបស់ជប៉ុនចំនួន ១,៧៩៩ កំពុងវិនិយោគលើវិស័យជាច្រើន ដូចជាធនាគារ អាកាសចរណ៍ និងម្ហូបអាហារនៅកម្ពុជាផងដែរ។

លោកបានបន្តថា “អាជីវកម្ម និងការវិនិយោគរបស់ជប៉ុននៅកម្ពុជា មានភាពល្បីល្បាញ ដោយសារគុណភាពរបស់ពួកគេ”។ លោកបន្តថា “ពួកគេបន្ថែមតម្លៃទំនិញក្នុងស្រុកបង្កើតការងារ និងជួយលើកកម្ពស់ជីវភាពរស់នៅរបស់ពលករកម្ពុជា ដែលត្រូវនឹងចក្ខុវិស័យ និងបេសកកម្មរបស់រាជរដ្ឋាភិបាលកម្ពុជា”។

ចំនួនក្រុមហ៊ុនជប៉ុនដែលធ្វើអាជីវកម្មនៅកម្ពុជា កើនឡើងជារៀងរាល់ឆ្នាំ។ ការសម្រេចចិត្តរបស់ពួកគេក្នុងការវិនិយោគ និងពង្រីកប្រតិបត្តិការរបស់ពួកគេ នៅក្នុងកម្ពុជាបង្ហាញពីទំនុកចិត្តយ៉ាងខ្លាំង ទៅលើរដ្ឋាភិបាលកម្ពុជា និងក្នុងបរិយាកាសវិនិយោគរបស់ខ្លួន៕