តំណាងអង្គការសហប្រជាជាតិទទួលស្គាល់ និងកោតសរសើរពីវឌ្ឍនភាពយ៉ាងលឿនរបស់កម្ពុជា

ដោយ ៖ រ៉ាណេត 

ភ្នំពេញ ៖ ទីប្រឹក្សាពិសេសបស់អគ្គលេខាធិការអង្គការសហប្រជាជាតិ បានទទួលស្គាល់ និងកោតសរសើរពីកិច្ចអភិវឌ្ឍ និងរីកចម្រើនយ៉ាងឆាប់រហ័សរបស់ប្រទេសកម្ពុជា ក្រោមការដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

នៅក្នុងកិច្ចចូលជួបសម្ដែងការគួរសមជាមួយសម្ដេចតេជោ ហ៊ុន សែន នៅវិមានសន្តិភាពកាលពីព្រឹកថ្ងៃទី១០ ខែមករា ឆ្នាំ២០២០ ទីប្រឹក្សាពិសេសរបស់អគ្គលេខាធិការអង្គការសហប្រជាជាតិ លោក Jeffrey D. Sachs បានសម្ដែងនូវភាពភ្ញាក់ជាមួយនឹងការអភិវឌ្ឍប្រទេសជាតិយ៉ាងត្រចះត្រចងក្នុងរយៈពេលដ៏ខ្លីបំផុត។

លោក Jeffrey D. Sachs លើកឡើងថា លោកពិតជាមានកិត្តិយស និងសប្បាយរីករាយជាខ្លាំងដែលបានជួបសម្ដេចតេជោសារជាថ្មីម្ដងទៀត បន្ទាប់ពីបានជួបសម្ដេចតេជោការពី ១៥ ឆ្នាំមុននៅគេហដ្ឋានរបស់សម្ដេចតេជោនៅវិមានឯករាជ្យ។ លោកបានមានប្រសាសន៍ថាក្នុងដំណើរទស្សនកិច្ចនៅកម្ពុជាពេលនេះ គឺបានឃើញដោយផ្ទាល់ភ្នែកនូវការអភិវឌ្ឍរបស់កម្ពុជា ដែលក្នុងនោះមានទាំងការអភិវឌ្ឍលើវិស័យសេដ្ឋកិច្ច ការអភិវឌ្ឍលើវិស័យសុខាភិបាល និងការអភិវឌ្ឍន៍លើដទៃទៀតដែលហួសពីការស្មាន។

នៅក្នុងដំណើរទស្សនកិច្ចនេះ ក្រៅពីប្រទេសកម្ពុជា លោកនឹងទៅប្រទេសឡាវ និងម៉ាឡេស៊ី ដើម្បីធ្វើយ៉ាងណាពង្រឹង និងជំរុញលើកទឹកចិត្តកិច្ចសហប្រតិបត្តិការរវាងប្រទេសអាស៊ាននិងសហគមន៍អឺរ៉ុប ពិសេសជំរុញកិច្ចសហប្រតិបត្តិការលើវិស័យពាណិជ្ជកម្ម សេដ្ឋកិច្ច ដឹកជញ្ជូន និងអាយធី (IT) ដើម្បីធ្វើយ៉ាងណាឱ្យសហគមន៍អឺរ៉ុបនិងអាស៊ានមានទំនាក់ទំនង និងសហប្រតិបត្តិការល្អ ។

លោកបានបន្តថា អាស៊ាន គឺមានសក្តានុពលខ្ពស់បើបូកបញ្ចូលទាំង អាស៊ាន-ចិន អាស៊ាន-ជប៉ុន និងអាស៊ាន-កូរ៉េ នោះតំបន់អាស៊ាននឹងមានការអភិវឌ្ឍដោយគ្មានដែនកំណត់ ជាពិសេសលើវិស័យបច្ចេកវិទ្យាដែលបច្ចេកវិទ្យាទាំងនេះអាចយកមកប្រើប្រាស់ដើម្បីជំរុញការអភិវឌ្ឍប្រកបដោយចីរភាព ហើយលោកបានត្រៀមជានិច្ច ដើម្បីជួយដល់កម្ពុជាជំរុញដល់ការអភិវឌ្ឍកម្ពុជាតំបន់អាស៊ាន និងតំបន់ដទៃទៀតឱ្យមានការអភិវឌ្ឍប្រកបដោយចីរភាព។

សម្តេចតេជោ ហ៊ុន សែន បានថ្លែងអំណរគុណចំពោះលោក Jeffrey D. Sachs ហើយក៏បានជម្រាបជូនថាការអភិវឌ្ឍទាំងឡាយណាដែលមាននៅកម្ពុជានោះគឺសុទ្ធសឹងតែជាការខិតខំប្រឹងប្រែងរបស់ប្រជាពលរដ្ឋកម្ពុជា និងសហការីរបស់សម្ដេចដែលនាំកម្ពុជាទៅការអភិវឌ្ឍដល់ចំណុចនេះ។

សម្តេចតេជោបានជម្រាបជូនថា កម្ពុជាមានមហិច្ឆិតាធ្វើយ៉ាងណាជំរុញកម្ពុជាឱ្យក្លាយទៅជាប្រទេសចំណូលមធ្យមកម្រិតខ្ពស់នៅឆ្នាំ ២០៣០ នឹងប្រទេសមានចំណូលខ្ពស់នៅឆ្នាំ ២០៥០ កន្លងមកកម្ពុជាបានដាក់ចេញនូវគោលនយោបាយផលិតស្បៀង គឺការនាំអង្ករចេញហើយក៏បានទទួលភាពជោគជ័យ ជាពិសេសលើគោលនយោបាយផលិតស្បៀង។ កម្ពុជាដែលជាប្រទេសមួយធ្លាប់តែខ្វះស្បៀងអាហារ បានប្រែក្លាយជាប្រទេសមួយដែលមានការផលិតស្បៀងទៅវិញ។ ពេលនោះ រាជរដ្ឋាភិបាលបានដាក់ចេញនូវគោលនយោបាយឧស្សាហកម្មផងដែរ ដើម្បីធ្វើយ៉ាងណា ជំរុញឧស្សាហកម្មកម្ពុជា ក្នុងទិសដៅជំរុញកម្ពុជាឆ្ពោះទៅកាន់ប្រទេសមានចំណូលមធ្យមកម្រិតខ្ពស់ និងប្រទេសដែលមានចំណូលខ្ពស់ នៅឆ្នាំ២០៥០៕

វិភាគ៖ សង្គ្រាមពាណិជ្ជកម្មរវាងអាមេរិក និងចិននឹងត្រូវការពេលវេលាយូរទៀតឬយ៉ាងណា?

ដោយ Donald Lee

ភ្នំពេញ៖ ខណៈពេលដែលទីផ្សារនៅតែមានសុទិដ្ឋិនិយមចំពោះការបញ្ឈប់សង្គ្រាមពាណិជ្ជកម្មរវាងអាមេរិក និងចិន តែជាក់ស្តែងគឺកិច្ចព្រមព្រៀងដំណាក់កាលទី ១ នៅតែបន្សល់ទុកពន្ធពាណិជ្ជកម្មជាច្រើនដែលបង្កផលប៉ះពាល់ដល់សេដ្ឋកិច្ចប្រទេសទាំងពីរ ហើយកិច្ចព្រមព្រៀងដំណាក់កាលទី ២ ទំនងជានឹងកើតឡើងនៅឆ្នាំ ២០២១ បន្ទាប់ពីការបោះឆ្នោតទូទៅរបស់អាមេរិក។ នេះបើយោងតាម ប្រធានាធិបតីអាមេរិក។

ប្រធានាធិបតីអាមេរិក Donald Trump និយាយថា លោកចង់បញ្ចប់កិច្ចព្រមព្រៀងពាណិជ្ជកម្មរវាងអាមេរិក និងចិនដំណាក់កាលទី ២ បន្ទាប់ពីការបោះឆ្នោតសកលអាមេរិកនៅខែ វិច្ឆិកា ឆ្នាំ ២០២០ ។ លោក Trump បានប្រាប់អ្នកយកព័ត៌មានអំពីចេតនារបស់លោក មុនពេលដំណើរទស្សនកិច្ចរបស់លោកអនុប្រធានាធិបតីចិន Liu He ដើម្បីចុះហត្ថលេខាលើដំណាក់កាលទី ១ កិច្ចព្រមព្រៀងពាណិជ្ជកម្ម។

លោក Trump បាននិយាយកាលពីថ្ងៃ ព្រហស្បតិ៍ ថា “យើងនឹងចាប់ផ្តើមការចរចាដំណាក់កាលទី ២ ភ្លាមៗ។ វានឹងចំណាយពេលបន្តិច”។

លោក Trump បានបន្ថែមថា “ខ្ញុំគិតថា ខ្ញុំប្រហែលជាចង់រង់ចាំដើម្បីបញ្ចប់វា រហូតដល់ក្រោយការបោះឆ្នោត ពីព្រោះខ្ញុំគិតថា យើងអាចធ្វើបានប្រសើរជាងនេះបន្តិច ប្រហែលជាកិច្ចព្រមព្រៀងល្អជាងនេះ”។

ទីក្រុងប៉េកាំងបានសង្កត់ធ្ងន់ជាបន្តថា ការចុះហត្ថលេខាលើដំណាក់កាលទី ១ គ្រាន់តែជាកិច្ចព្រមព្រៀងបឋមមួយ ហើយគ្មានវិធីណាដែលតំណាងឱ្យការបញ្ចប់ជម្លោះពាណិជ្ជកម្មទេ។

បទអត្ថាធិប្បាយមួយពីប្រព័ន្ធផ្សព្វផ្សាយគ្រប់គ្រងដោយរដ្ឋរបស់ប្រទេសចិន បានបញ្ជាក់ថា “ទោះបីជាទីផ្សារលើកទឹកចិត្តដល់ដំណាក់កាលទី ១ ក៏ដោយ ភាពពិតដ៏អាក្រក់នោះគឺថាភាគីទាំង ២ បានទុកពន្ធគយជាច្រើនលើផលិតផលរបស់គ្នាទៅវិញទៅមក ប៉ុន្តែពួកគេនៅតែមិនបានឃើញផ្ទាល់ភ្នែកលើបញ្ហា និងភាពតានតឹងជាច្រើន”។

បទអ្នកអត្ថាធិប្បាយបានបន្ថែមថា “សរុបមក សង្គ្រាមពាណិជ្ជកម្មបានចាប់ផ្តើម ដោយសារតែពន្ធគយ ហើយគួរតែបញ្ចប់ដោយការដកពន្ធចេញទាំងអស់។ វាមិនអាចសង្កត់ធ្ងន់បានទេថា បញ្ហានេះមិនត្រឹមតែល្អសម្រាប់ប្រទេសចិន ប៉ុណ្ណោះទេប៉ុន្តែថែមទាំងអាមេរិក និងសេដ្ឋកិច្ចពិភពលោកផងដែរ”។

កិច្ចព្រមព្រៀងពាណិជ្ជកម្មអាមេរិក និងចិនដំណាក់កាលទី ១ បានផ្អាកជាបណ្តោះអាសន្នចំពោះជម្លោះដែលមានរយៈពេលជិត ២ ឆ្នាំ និងជាសង្គ្រាមពាណិជ្ជកម្មដ៏ថ្លៃបំផុតមួយនៅក្នុងប្រវត្តិសាស្រ្តមនុស្សជាតិ និងបាននាំមកនូវសញ្ញាដំបូងនៃការថយចុះក្នុងសង្គ្រាមពាណិជ្ជកម្មរយៈពេល ១៧ ខែរវាងប្រទេសដែលមានសេដ្ឋកិច្ចធំបំផុតទាំងពីរលើពិភពលោក។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះ ដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុន។

ផលប៉ះពាល់នៃសង្រ្គាមពាណិជ្ជកម្មរវាងអាមេរិក និងចិនបណ្តាលឱ្យមានការធ្លាក់ចុះកំណើនសេដ្ឋកិច្ចពិភពលោក និងការតម្រៀបឡើងវិញនូវខ្សែសង្វាក់តម្លៃពិភពលោកនៅក្នុងតំបន់អាស៊ីប៉ាស៊ីហ្វិក៕

លោកឧបនាយករដ្ឋមន្ត្រី ជា សុផារ៉ា បានចាត់វិធានការបន្ទាន់ដោយបញ្ជូនមន្រ្តីចុះពិនិត្យការដ្ឋានសំណង់ទូទាំងប្រទេស

ដោយវុត្ថា

ភ្នំពេញ៖ លោក ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីសម្រេចចាត់តាំងមន្ត្រីត្រួតពិនិត្យសំណង់នៅទូទាំងប្រទេស បន្ទាប់ពីមានសំណង់អគារបាក់ស្រុតជាបន្តបន្ទាប់។

យោងតាមសេចក្តីសម្រេចដែលចុះហត្ថលេខាដោយលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀចំដែនដី នគរូបនីយកម្ម និងសំណង់កាលពីថ្ងៃទី ៩ ខែមករា ឆ្នាំ ២០១៩ ម្សិលមិញនេះបានចាត់តាំងក្រុមមន្ត្រីត្រួតពិនិត្យសំណង់ទទួលបន្ទុករួម និងមន្ត្រីត្រួតពិនិត្យសំណង់រាជធានី ខេត្ត ជាច្រើនរូប។

ប្រការ ២ នៅក្នុងសេចក្តីសម្រេចនេះ បានចែងថា មន្ត្រីត្រួតពិនិត្យសំណង់ទទួលបន្ទុករួម មានតួនាទី និងភារកិច្ច ដឹកនាំកំណត់ទិសដៅអនុវត្តដល់មន្ត្រីត្រួតពិនិត្យសំណង់រាជធានី ខេត្ត បន្ទាប់ពីទទួលបានគោលការណ៍ពីថ្នាក់ដឹកនាំក្រសួង។ តាមដាន និងត្រួតពិនិត្យការអនុវត្តការងារបស់មន្ត្រីត្រួតពិនិត្យសំណង់រាជធានី ខេត្ត។

ធ្វើរបាយការណ៍គោរពស្នើសុំការត្រួតពិនិត្យ និងសម្រេចពីថ្នាក់ដឹកនាំក្រសួងលើការផ្អាក ការកែតម្រូវ ការបញ្ឈប់ ការតម្រូវរុះរើ និងចាត់វិធានការចាំបាច់ផ្សេងទៀត ក្នុងករណីការងារសាងសង់ ឬរុះរើ មិនអនុលោមតាមបទបញ្ញត្តិបច្ចេកទេសសំណង់ និងបទប្បញ្ញត្តិជាធរមានដទៃទៀ ។

ធ្វើរបាយការណ៍បូកសរុបលទ្ធផលការងារប្រចាំខែ ត្រីមាស ឆមាស និងប្រចាំឆ្នាំជូនថ្នាក់ដឹកនាំក្រសួង។ និងបំពេញការងារផ្សេងទផៀតដែលក្រសួងប្រគល់ជូន។

សម្រាប់មន្ត្រីត្រួតពិនិត្យសំណង់រាជធានី ខេត្ត មានតួនាទី និងភារកិច្ចពិនិត្យ និងផ្តល់យោបល់ទាំងលើទិដ្ឋភាពច្បាប់ និងបច្ចេកទេសលើគម្រោងសាងសង់ និងតាមដានត្រួតពិនិត្យការសាងសង់។ ចុះត្រួតពិនិត្យ និងបោះបង្គោលព្រំកំណត់ទីតាំងស្នើសុំសាងសង់ ឬ រុះរើ ។
ចុះត្រួតពិនិត្យការងារសាងសង់រុះរើ និងធ្វើរបាយការណ៍អំពីលទ្ធផលនៃការចុះត្រួតពិនិត្យជូនថ្នាក់ដឹកនាំក្រសួងពិនិត្យ និងសម្រេចលើការផ្អាក ការកែលម្រូវ ការបញ្ឈប់ការតម្រូវឱ្យរុះរើ ចាត់វិធានការណ៍ចាំបាច់ផ្សេងទៀត ឬ លើកសំណើរសុំធ្វើអធិការកិច្ចសំណង់ ក្នុងករណីឃើញថា ការងារសាងសង់ ឬរុះរើ មិនអនុលោមតាមបទប្បញ្ញត្តិបច្ចេកទេសសំណង់ និងបទប្បញ្ញត្តិជាធរមានដទៃទៀត។

សហការជាមួយរដ្ឋបាលរាជធានីខេត្តក្រុង ស្រុក ខណ្ឌ គោលដៅ ដើម្បីចុះតាមដាន និងត្រួតពិនិត្យអនុវត្តបទប្បញ្ញត្តិបច្ចេកទេសសំណង់ និងបទបទប្បញ្ញត្តិជាធរមានដទៃទៀត។

សហការជាមយយរដ្ឋបាលរាជធានី ខេត្ត ក្រុង ស្រុក ខណ្ឌ គោលដៅ ដើម្បីចុះតាមដាន និងត្រួតពិនិត្យការអនុវត្តបទប្បញ្ញាត្តិបច្ចេកទេសសំណង់ និងបទប្បញ្ញត្តិនគរូបនីយកម្មចំពោះគម្រោងសាងសង់រហូតដល់បញ្ចប់ការដ្ឋាន។

ប្រមូល និងចងក្រងទិន្ន័យ និងធ្វើរបាយការណ៍តាមដានការដ្ឋាននីមួយៗ ដែលបានចុះត្រួតពិនិត្យបោះបង្គោលព្រំកំណត់ទីតាំងស្នើសុំសាងសង់ ឬ រុះរើ។ និងបំពេញការងារផ្សេងទៀតដែលក្រសួងប្រគល់ជូន៕

ក្រុមហ៊ុនផលិតបេតុងរបស់ចិនដ៏ធំមួយត្រូវបានបញ្ជាឱ្យបិទការដ្ឋានដោយរដ្ឋបាលខេត្តព្រះសីហនុ

ដោយវុត្ថា

ព្រះសីហនុ៖ លោក គួច ចំរើន អភិបាលខេត្តព្រះសីហនុ បានប្រាប់ក្រុមហ៊ុនផលិតបេតុង YU FENG DA ដែលជាក្រុមហ៊ុន មានទីតាំងស្ថិតនៅភូមិ ៥ សង្កាត់៤ ក្រុងខេត្តព្រះសីហនុ ឱ្យបិទការដ្ឋានទាំងស្រុង នៅថ្ងៃទី ១០ ខែមករា ឆ្នាំ ២០២០នេះ បន្ទាប់ពីទទួលបានបណ្តឹងពីបទរំលោភទំនុកចិត្ត (បន្ថយគុណភាពបេតុង) ។

នេះបើយោងតាមកិច្ចប្រជុំប្រជុំដោះ ស្រាយ ករណីវិវាទរវាងក្រុមហ៊ុនសំណង់ ZHENG YOUNGLE និងក្រុមហ៊ុនផលិតបេតុង YU FENG DA កាលពីថ្ងៃទី ៩ ខែមករា ឆ្នាំ ២០១៩ ម្សិលមិញនេះ ក្រោមអធិបតីភាពលោក ឡៅ ទិត្យសីហា រដ្ឋលេខាធិការក្រសួងដែនដី និង ឯកឧត្តម គួច ចំរើន អភិបាល នៃគណ:អភិបាលខេត្តព្រះសីហនុ និង និង លោក គួច ចំរើន អភិបាល នៃគណ:អភិបាលខេត្តព្រះសីហនុ។

តាមការលើកហេតុផលរបស់ក្រុមហ៊ុនសំណង់ ZHENG YOUNGLE មានទីតាំងស្ថិតនៅភូមិ១ សង្កាត់លេខ៣ ក្រុងព្រះសីហនុ ពីបទរំលោភលើ ទំនុកចិត្ត(បន្ថយគុណភាពបេតុង) ដែលក្រុមមហ៊ុនកំពុងសាងសង់សំណង់ នៅជាន់ទី៦ និងទី៧ មានទីតាំងស្ថិតនៅភូមិ១ សង្កាត់លេខ៣ ក្រុង ខេត្តព្រះសីហនុ។

ក្រោយស្តាប់របាយការណ៍ លោក គួច ចំរើន បានបញ្ជាក់ថា ក្រុមហ៊ុនលាយបេតុង YU FENG DA មិនមានវិជ្ជាជីវៈ ទំនួលខុសត្រូវអំពីគុណភាពបេតុង ជូនអតិថិជន ឬអ្នកប្រើប្រាស់ ដូច្នេះត្រូវបង្កើត គណ:កម្មការវាយតម្លៃសំណង់ក្នុងការរុះរើចេញនៅជាន់ទី៦ និងទី៧ ព្រមទាំងវាយតម្លៃនៃការសាងសង់ឡើងវិញ ដើម្បីឱ្យក្រុមហ៊ុនសំណង់មានលទ្ធភាព ធ្វើការសាងសង់សំណង់បន្តទៀត ទៅតាមបទដ្ឋានបច្ចេកទេស និងតាមការគ្រោងទុក។

លោក គួច ចំរើន ក៏បានបញ្ជាឱ្យក្រុមហ៊ុនលាយបេតុង YU FENG DA ត្រូវធ្វើការបិទការដ្ឋានទាំងស្រុង នៅថ្ងៃសុក្រទី១០ ខែមករា ឆ្នាំ២០២០ នេះ។

លោកអភិបាលខេត្តបន្តថា ចំពោះក្រុមហ៊ុនបេតុង ត្រូវសងជាសំណងដល់ក្រុម ហ៊ុនសាងសង់ ZHENG YOUNGLE ទៅតាមផ្លូវច្បាប់ជាធរមាន ព្រោះក្រុមហ៊ុនបេតុងក៏បាន ទទួលកំហុសឆ្គងពីបច្ចេកទេសគុណភាពបេតុងយកមកចាក់ហួសម៉ោង និងខ្វះគុណភាពផង ដែរ៕

រដ្ឋបាលរាជធានីភ្នំពេញគ្រោងស្ថាបនាផ្លូវក្រោមដីមុខសាកលវិទ្យាល័យភូមិន្ទភ្នំពេញ

ដោយ ៖ រ៉ាណេត 

ភ្នំពេញ ៖ ដោយមើលឃើញពីភាពជាក់ស្ដែងនៃជំនន់ការកកស្ទះចរាចរណ៍ជាប្រចាំថ្ងៃនៅមុខសាកលវិទ្យាល័យភូមិន្ទភ្នំពេញ រដ្ឋបាលសាលារាជធានីភ្នំពេញបានដាក់គម្រោងផែនការសាងសង់ផ្លូវក្រោមដីមួយខ្សែទៀតឆ្លងកាត់វិថីហព័ន្ធរុស្ស៊ី ត្រង់ចំណុចមុខវិទ្យាស្ថានភាសាបរទេស IFL ក្នុងពេលឆាប់ៗខាងមុខនេះ។

តាមរយៈសេចក្ដីប្រកាសនៅលើគណនីផ្លូវការរបស់រដ្ឋបាលរាជធានីភ្នំពេញកាលពីល្ងាចថ្ងៃទី៩ ខែមករា ឆ្នាំ២០២០ម្សិលមិញនេះបានបញ្ជាក់ថា នៅពេលឆាប់ៗខាងមុខនេះ រដ្ឋបាលរាជធានីភ្នំពេញនឹងសាងសង់ផ្លូវក្រោមដីមួយខ្សែទៀតដើម្បីបង្កភាពងាយស្រួលដល់ការធ្វើដំណើររបស់បណ្តាសិស្ស និស្សិត ដែលចេញចូលសាលា ជាពិសេសការធ្វើចរាចរណ៍របស់ប្រជាពលរដ្ឋនៅលើផ្លូវសហព័ន្ធរុស្ស៊ីដែលតែងកកស្ទះជាប់ជាប្រចាំថ្ងៃ។

នៅក្នុងសេចក្ដីប្រកាសដដែលបានលើកឡើងថា “នាពេលឆាប់ៗខាងមុខនេះ នឹងមានផ្លូវក្រោមដីត្រង់ចំណុច មុខសាកលវិទ្យាល័យភូមិន្ទភ្នំពេញ និងវិទ្យាស្ថានភាសាបរទេស (IFL)។ នារសៀលថ្ងៃព្រហស្បតិ៍ ១៥កើត ខែបុស្ស ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៩ ខែមករា ឆ្នាំ២០២០នេះ រដ្ឋបាលរាជធានីភ្នំពេញ បានបើកកិច្ចប្រជុំស្ដីពីការស្ថាបនាផ្លូវក្រោមដី ត្រង់ចំនុចមុខសាកលវិទ្យាល័យភូមិន្ទភ្នំពេញ និងវិទ្យាស្ថានភាសាបរទេស (IFL) ស្ថិតនៅក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ ដើម្បីជួយសម្រួលការធ្វើដំណើរ របស់សិស្សនិស្សិតដែលមកសិក្សា នៅសាកលវិទ្យាល័យភូមិន្ទភ្នំពេញ និងវិទ្យាស្ថានភាសាបរទេស(IFL) និងបញ្ចៀសការកកស្ទះចរាចរណ៍ នៅត្រង់ចំណុចនោះ”៕

ចំណេះដឹង! តើអ្វីជាគោលនយោបាយគាំពារនិយម?

ដោយវុត្ថា

ភ្នំពេញៈ គោលនយោបាយគាំពារនិយម ជាគោលនយោបាយសេដ្ឋកិច្ចនៃការរឹតត្បិតការនាំចូលពីប្រទេសដទៃទៀត តាមរយៈវិធីសាស្ត្រដូចជាតម្លើងពន្ធគយ លើទំនិញនាំចូល កូតានាំចូល និងបទបញ្ញត្តិផ្សេងៗទៀតរបស់រដ្ឋាភិបាល។

គោលនយោបាយគាំពារនិយមនេះ ត្រូវបានអនុវត្តដោយប្រទេសជាច្រើន ទោះបីអ្នកសេដ្ឋកិច្ចស្ទើរតែទាំងអស់យល់ថា សេដ្ឋកិច្ចពិភពលោកជាទូទៅទទួលបានអត្ថប្រយោជន៍ពីពាណិជ្ជកម្មសេរី។

ម្យ៉ាងទៀត គោលនយោបាយគាំពារនិយមនេះ គឺសកម្មភាព ឬគោលនយោបាយរបស់រដ្ឋាភិបាលចំពោះពាណិជ្ជកម្មអន្តរជាតិ ក្នុងគោលបំណងជួយជ្រោមជ្រែងផលិតផល ឬសេវាក្នុងស្រុកជាអាទិ៍ ការកម្រិតឬការរឹតត្បឹតការនាំចូល ការដាក់ពន្ធទៅលើផលិតផលនាំចូល ការកំណត់កូតា វិធានការរដ្ឋបាល ការឧបត្ថម្ភធន៘ ពួកគេតម្លើងថ្លៃនាំចូលដែលធ្វើឱ្យតម្លៃថ្លៃជាងផលិតផលក្នុងស្រុក។

សម្រាប់ប្រទេសកំពុងអភិវឌ្ឍនៅតែជួបប្រទះ នឹងបញ្ហាប្រឈមក្នុងការនាំចេញកសិផលទៅប្រទេសអភិវឌ្ឍ ដែលអនុវត្តគោលនយោបាយគាំពារនិយម តាមរយៈការកំណត់អត្រាពន្ធខ្ពស់លើការនាំចូលកសិផល។ បច្ចុប្បន្នការអនុវត្តនយោបាយគាំពារនិយម របស់សហរដ្ឋអាមេរិក បានបង្កឲ្យមានជម្លោះពាណិជ្ជកម្មយ៉ាងខ្លាំងក្លា ជាមួយនឹងបណ្តាប្រទេសផ្សេងៗទៀត ជាពិសេសជាមួយនឹងចិន។

សម្រាប់តំបន់អាស៊ី-ប៉ាស៊ីហ្វិក ដែលមានការលូតលាស់សេដ្ឋកិច្ចដ៏ខ្លាំងក្លាដែរនោះ បានស្ថិតនៅចំកណ្តាល នៃការប្រកួតប្រជែងរបស់មហាអំណាចធំៗ ដែលស្តែងឡើងតាមការប្រជែងគ្នា រវាងគំនិតផ្តួចផ្តើម «ខ្សែក្រវាត់ និងផ្លូវ» របស់ចិន និងយុទ្ធសាស្រ្ត «ឥណ្ឌូ ប៉ាស៊ីហ្វិក» របស់អាមេរិក ជប៉ុន ឥណ្ឌា និងអូស្រ្តាលី។

អាស៊ាន និងតំបន់ទន្លេមគង្គ ក៏ទទួលរងឥទ្ធិពល និងសម្ពាធពីការប្រកួតប្រជែងនេះដែរ ដែលនាំឲ្យប្រទេសសមាជិកអាស៊ានទាំងអស់ ផ្តោតសារៈសំខាន់ក្នុងការរក្សាមជ្ឈភាពរបស់សហគមន៍ខ្លួន៕

រោងចក្រ សហគ្រាសរបស់ប្រទេសចិនជាង៧០០កំពុងវិនិយោគនៅកម្ពុជា

ដោយៈ រ៉ាណេត 

ភ្នំពេញៈ ជាមួយនឹងកំណើននៃការវិនិយោគ ដោយផ្ទាល់ពីបរទេសយ៉ាងច្រើនរហូតជាង១០០០ក្រុមហ៊ុន រួមទាំងសហគ្រាស និងរោងចក្រនៅកម្ពុជា ដែលមានទំហំសរុបជាង៣៥០០លានដុល្លារ វត្តមានក្រុមហ៊ុនចិនមានរហូតច្រើនជាង៧០០ កំពុងដំណើរការ ខណៈដែលគម្រោងថ្មីៗជាច្រើនទៀតកំពុងត្រៀមខ្លួនចូលមកបន្តទៀត។

បច្ចុប្បន្ននេះ វត្តមានរោងចក្រជាង៧០០ ក្នុងចំណោមជាង១០០០រោងចក្រ ជារបស់ក្រុមហ៊ុនចិន កំពុងតែប្រតិបត្តិការនៅក្នុងប្រទេសកម្ពុជា ដោយបានផ្តល់ការងារជូនប្រជាពលរដ្ឋខ្មែររាប់សិបម៉ឺននាក់។

អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍បង្ហាញពីការសាទរ ទៅនឹងកំណើននៃចំនួនក្រុមហ៊ុនចិន ដែលកំពុងតែវិនិយោគនៅកម្ពុជាយ៉ាងលើសលប់នៅពេលបច្ចុប្បន្ននេះ។

លោកឧកញ៉ាបានបន្តទៀតថា“យើងសាទរជាមួយនឹងវត្តបណ្តាក្រុមហ៊ុន ដែលមកវិនិយោគ និងបណ្តាក់ទុនធ្វើជំនួញនៅកម្ពុជាទាំងអស់ ដោយមិនប្រកាន់និន្នាការឬសញ្ជាតិណាមួយនោះទេ”។

ដោយឡែកសម្រាប់ក្រុមហ៊ុនចិន ដែលកំពុងតែវិនិយោគនៅកម្ពុជា យើងទទួលស្គាល់ថាពិជាមានកំណើនយ៉ាងច្រើន។

លោកឧកញ៉ាបានបន្តទៀតថា “នៅពេលមានកំណើនក្រុហ៊ុនអន្តរជាតិ ចូលមកកម្ពុជាកាន់តែច្រើន យើងទទួលបានប្រយោជន៍ក៏កាន់តែច្រើន ដែលក្រៅពីទទួលបានចំណូលសម្រាប់ជំរុញកំណើនសេដ្ឋកិច្ចជាតិ យើងក៏ទទួលបាននូវបទពិសោធន៍ បច្ចេកទេស និងចំណេះដឹង ជំនាញថ្មីៗបន្ថែមទៀត ដែលទាំងអស់នេះសុទ្ធតែជាចំណុចល្អដែលយើងទទួលបានបន្ថែម”។ លោកឧកញ៉ាបន្តថា “សម្រាប់វត្តមានក្រុមហ៊ុនចិន នៅកម្ពុជា តាមរយៈសភាពាណិជ្ជកម្មកម្ពុជា បានធ្វើការមួយចំនួនជាមួយសមាគមអ្នកវិនិយោគចិននៅកម្ពុជាផងដែរ ដើម្បីធ្វើយ៉ាងណាអាចធានា និងសម្រួលភាពងាយស្រួលក្នុងការវិនិយោគ”។

រយៈតាមរយៈនៃកិច្ចទំនាក់ទំនងរវាងចិន និងកម្ពុជាបានសម្រេចនូវសមិទ្ធផលជាច្រើនដូចជាកាលពីឆ្នាំ២០១៨ ទំហំវិនិយោគចិននៅកម្ពុជាមានទឹកប្រាក់រហូតដល់ទៅ៦ពាន់លានដុល្លា ខណៈដែលទំហំពាណិជ្ជកម្មកម្ពុជា ចិន មានចំនួនជាង៧ពាន់លានដុល្លារ ។

ដោយឡែកក្នុងឆ្នាំ២០១៩កន្លង ទៅទំហំពាណិជ្ជកម្មរវាងកម្ពុជា-ចិន សម្រេចបានជិត ៧ពាន់លានដុល្លា ដោយរដ្ឋាភិបាលចិនបានផ្តល់កូតានាំអង្ករពីកម្ពុជា ចំនួន៤០ម៉ឺនតោន។

យោងតាមរបាយការណ៍របស់ក្រសួងពាណិជ្ជកម្មកម្ពុជាបានបង្ហាញថា ជាមួយនឹងកិច្ចទំនាក់ទំនងយ៉ាងជិតស្និទ្ធ រវាងប្រទេសទាំង២ កម្ពុជាបានបង្កើតមជ្ឈមណ្ឌលពាណិជ្ជកម្មចំនួន៤ នៅសាធារណរដ្ឋប្រជាមានិតចិន ដូចជា នៅទីក្រុងក្វាងចូវ នៅទីក្រុងហាយនីង នៅទីក្រុងស៊ីអាន និងប្រចាំនៅទីក្រុងហុងកុង។

មជ្ឈមណ្ឌលពាណិជ្ជកម្មទាំងអស់នោះ ជាទីតាំងសម្រាប់ដាក់តាំងបង្ហាញ និងផ្សព្វផ្សាយរកទីផ្សារ សម្រាប់ផលិតផលសក្តានុពលកម្ពុជា ដូចជា អង្ករ ម្រេច ស្ករត្នោត អំបិល កាហ្វេ ទឹកផ្លែឈើ ស្រាបៀរ គ្រាប់ស្វាយចន្ទី ដំណាប់ផ្លែឈើ ក្រមា វត្ថុអនុស្សាវរីយ៍ និងសៀវភៅផ្សព្វផ្សាយអំពីវិនិយោគ និងទេសចរណ៍។

ការចាប់ផ្តើមចរចា លើកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន នឹងជួយដល់ការធ្វើពិពិធកម្មសេដ្ឋកិច្ច និងបើកច្រកទីផ្សារបន្ថែមទៀតសម្រាប់ទំនិញ និងសេវារបស់កម្ពុជា ដែលនេះជាគោលដៅយុទ្ធសាស្រ្ត នៃយុទ្ធសាស្រ្តចតុកោណដំណាក់កាលទី៤។
ការពង្រីកបាននូវទីផ្សារនាំចេញ ដែលមានលក្ខណៈអចិន្រ្តៃយ៍ នឹងរួមចំណែកយ៉ាងសំខាន់ ក្នុងការពង្រឹងអធិបតេយ្យភាពជាតិ និងឯករាជ្យភាពនៃសេដ្ឋកិច្ចកម្ពុជាពីការពឹងផ្អែកតែទៅលើភាពអនុគ្រោះពន្ធ ដែលមានលក្ខណៈបណ្តោះអាសន្ន។

មិនតែប៉ុណ្ណោះ វានឹងជួយឱ្យរដ្ឋាភិបាល អាចឈានទៅសម្រេចបាននូវចក្ខុវិស័យ និងទទួលបានឋានៈ ជាប្រទេសចំណូលមធ្យមកម្រិតខ្ពស់ក្នុងឆ្នាំ២០៣០ និងជាប្រទេសចំណូលខ្ពស់ក្នុងឆ្នាំ២០៥០៕

ក្រុមហ៊ុនផលិតគ្រឿងសង្ហារឹមដ៏ធំរបស់អាមេរិកគ្រោងឈានជើងចូលទីផ្សារកម្ពុជា

ដោយ ប៊ី

ភ្នំពេញៈ អ្នកផលិតគ្រឿងសង្ហារឹមមួយចំនួន កំពុងតាមប្រមាញ់ប្រទេសកម្ពុជា និងបង់ក្លាដែសសម្រាប់សាងសង់រោងចក្រ ដោយកង្វះកម្មករនៅវៀតណាម ដែលជាអ្នកទទួលផលដ៏ធំធេង ពីសង្គ្រាមពាណិជ្ជកម្មអាមេរិក ជាមួយប្រទេសចិន កំពុងតែកើនឡើងខ្លាំង។

លោកClarence Smith នាយកប្រតិបត្តិនៃក្រុមហ៊ុន Haverty Furniture Cos ដែលប្រើរោងចក្រនៅអាស៊ី ដើម្បីផលិតផលិតផលម៉ាករបស់ក្រុមហ៊ុនបានថ្លែងថា អត្រាការងារនៅប្រទេសវៀតណាមកំពុងកើនឡើង ហើយចំនួនកម្មករកំពុងខ្វះខាត។

លោកSmith បានថ្លែងនៅក្នុងកិច្ចសម្ភាសន៍មួយថា “ទោះបីអ្នកផ្គត់ផ្គង់អាស៊ីនៅតែបន្តរកប្រភពឈើជាច្រើន ដែលពួកគេប្រើពីតំបន់អាឡាបាសាន នៃអាមេរិកក៏ដោយ ក៏ការផលិតគ្រឿងសង្ហារឹម ឈើមិនវិលត្រឡប់មកអាមេរិកវិញទេ”។

ការនាំយកការងារផលិតកម្មត្រឡប់មកអាមេរិកវិញ គឺជាគោលដៅមួយរបស់រដ្ឋបាល Trump ក្នុងគោលដៅដាក់ពន្ធគយលើទំនិញផលិតនៅប្រទេសចិន។

អ្នកលក់រាយគ្រឿងសង្ហារឹម ដែលមានមូលដ្ឋាននៅអាត្លង់តា បានតតាំងនឹងការរំខានដល់ការផ្គត់ផ្គង់ ខ្សែសង្វាក់ផ្គត់ផ្គង់កាលពីឆ្នាំមុន ខណៈក្រុមហ៊ុនផលិតចាកចេញពីប្រទេសចិន ហើយបើកប្រតិបត្តិការនៅប្រទេសវៀតណាម។ អ្នកផ្គត់ផ្គង់ខ្លះឈប់ធ្វើជំនួញឱ្យក្រុមហ៊ុន Haverty ដែលបង្ខំឱ្យខ្លួនរកប្រភពថ្មីៗ ក្រៅពីវៀតណាម ហើយបណ្តាលឱ្យមានការខ្វះខាតរបស់របរមួយចំនួន នៅកន្លែងតាំងបង្ហាញប្រហែល១២០នៅអាមេរិក។

លោក Smith បានថ្លែងថា “ឥឡូវនេះការរំខានភាគច្រើន ស្ថិតនៅពីក្រោយពួកគេ ទោះបីដំណាក់កាលដំបូង នៃកិច្ចព្រមព្រៀងពាណិជ្ជកម្មសហរដ្ឋអាមេរិក និងចិននឹងនៅតែរក្សាពន្ធ២៥ភាគរយ លើគ្រឿងសង្ហារឹមដែលផលិតនៅចិនក៏ដោយ”។លោកបន្តថា “ ក្រុមហ៊ុនHaverty នៅតែនាំចូលស្បែក និងគ្រឿងបន្លាស់ពីប្រទេសចិន ទោះបីជាខ្លួនលែងទទួលគ្រឿងសង្ហារឹមឈើពីប្រទេសចិនក៏ដោយ”។

លោកបានមានប្រសាសន៍ថា “ការផ្លាស់ប្តូរទីតាំងរោងចក្រនឹងមិនបញ្ចប់ទេ ពួកគេបានសាងសង់រោងចក្រនៅកម្ពុជារួចហើយ។ វាផ្លាស់ប្តូរ ដូចអ្វីដែលវាតែងតែបានផ្លាស់ប្តូរ”។

លោកSmith បានប្រៀបធៀបការផ្លាស់ប្តូរ ពីប្រទេសចិនទៅប្រទេសវៀតណាម និងទៅក្នុងបណ្តាប្រទេសអាស៊ី កំពុងអភិវឌ្ឍន៍ផ្សេងទៀត ទៅនឹងការផ្លាស់ប្តូរឧស្សាហកម្មគ្រឿងសង្ហារឹមរបស់អាមេរិកទៅរដ្ឋ North Carolina ពីរដ្ឋ Michigan កាលពីមួយសតវត្សរ៍មុន។ ឧស្សាហកម្មគ្រឿងសង្ហារឹម ដែលត្រូវបានគេមើលឃើញថា មានការលេចចេញជាថ្មីនៅរដ្ឋNorth Carolina ប៉ុន្តែលោកSmithបាននិយាយថា វាមានតម្លៃទាបសម្រាប់រោងចក្រនៅអាស៊ី ក្នុងការធ្វើគ្រឿងសង្ហារឹមឈើពីឈើ ដែលប្រមូលបាននៅក្នុងរដ្ឋ Carolinas ជាជាងឱ្យក្រុមហ៊ុនផលិតផលិតផដូចគ្នានៅអាមេរិក៕ (The Nation)៕

រដ្ឋាភិបាលកំពុងជំរុញអនុវត្តន៍គម្រោងសាងសង់ផ្លូវល្បឿនលឿនពីភ្នំពេញ-បាវិត

ដោយៈ រ៉ាណេត 

ភ្នំពេញៈ រដ្ឋាភិបាលបាននិងកំពុងជំរុញ ការអនុវត្តលើគម្រោងសាងសង់ផ្លូវល្បឿនលឿនពីភ្នំពេញទៅច្រកទ្វារព្រំដែន ក្រុងបាវិតឱ្យបានឆាប់រហ័ស ដើម្បីតភ្ជាប់ផ្លូវល្បឿនលឿនរបស់វៀតណាម ពីហូជីមិញមកច្រកទ្វារព្រំដែនម៉ុកបៃ ដែលភាគីវៀតណាមគ្រោងសាងសង់ និងដាក់ឱ្យដំណើរការនៅក្នុងឆ្នាំ២០២៥ខាងមុខ។

ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន លោកស៊ុន ចាន់ថុល បានលើកឡើង នៅក្នុងពិធីបិទសន្និបាតបូកសរុបការងារសាធារណការ និងដឹកជញ្ជូនឆ្នាំ២០១៩ និងលើកទិសដៅការងារឆ្នាំ២០២០ នៅរសៀលថ្ងៃទី៩ ខែមករា ឆ្នាំ២០២០ នេះថា ក្រសួងបានចុះកិច្ចព្រមព្រៀង ក្របខណ្ឌរវាងរាជរដ្ឋាភិបាលកម្ពុជា ជាមួយក្រុមហ៊ុន China Railway International Group Co., Ltd ដើម្បីសិក្សាគម្រោងសាងសង់ផ្លូវល្បឿនលឿនភ្នំពេញ-បាវិត។

លោកស៊ុន ចាន់ថុល បានបន្តថា ក្រុមការងារកាលពីពេលកន្លងទៅថ្មីៗនេះ បានជួបពិភាក្សាជាមួយ លោកងៀន វ៉ាន់ថេរដ្ឋមន្រ្តីដឹកជញ្ជូនវៀតណាម ដើម្បីពិនិត្យលទ្ធភាពក្នុងការជំរុញការវិនិយោគលើការសាងសង់ និងតភ្ជាប់ផ្លូវល្បឿនលឿនភ្នំពេញ-បាវិត និងម៉ុកបៃ-ហូជីមិញ។

គម្រោងផ្លូវល្បឿនលឿនភ្នំពេញ-បាវិត ក៏ធ្លាប់ត្រូវបានសិក្សាជំហានដំបូងដោយទីភ្នាក់ងារ JICA រួចហើយ ដោយគម្រោងនេះ គ្រោងចំណាយថវិកាប្រមាណជាង២ពាន់លានដុល្លារសហរដ្ឋអាមេរិក ។

ផ្លូវល្បឿនលឿន ជាផ្លូវសម្រាប់យានយន្តធ្វើចរាចរណ៍ មានបរិក្ខារបែងចែកទ្រូងផ្លូវជាពីរចំណែកខុសទិសគ្នា ឬចែកជាគន្លងផ្លូវ គ្មានកន្លែងផ្លូវប្រសព្វលើផ្ទៃរាបមួយ ឬត្រូវមានផ្លូវប្រសព្វតិចបំផុតក្នុងករណីចាំបាច់ និងបំពាក់គ្រប់គ្រាន់នូវបរិក្ខារផ្លូវថ្នល់ ដើម្បីធានាលំហូរចរាចរណ៍ សុវត្ថិភាព និងដើម្បីបន្ថយពេលវេលាធ្វើដំណើរ និងមានកន្លែងកំណត់សម្រាប់ឲ្យយានយន្តចេញនិងចូលផ្លូវល្បឿនលឿន។

ការសាងសង់បណ្តាញផ្លូវល្បឿនលឿន (Expressway) ជាកត្តាដ៏ធំជាងគេសម្រាប់ពង្រឹងសមត្ថភាពបណ្តាញផ្លូវនៅកម្ពុជា ព្រោះផ្លូវល្បឿនលឿន អាចបម្រើសេវាកម្មដឹកជញ្ជូនល្អជាងផ្លូវធម្មតា និងត្រូវបានគេចាត់ទុកជាមូលដ្ឋាន សម្រាប់វិស័យឧស្សាហកម្មទំនើបៗ និងសកម្មភាពដឹកជញ្ជូនធនធ្ងន់៕

តើរដ្ឋាភិបាលបើកសម្ភោធសាងសង់ហេដ្ឋារចនាសម្ព័ន្ធធំៗអ្វីខ្លះក្នុងឆ្នាំ២០១៩

ដោយវុត្ថា

ភ្នំពេញៈ របាយការណ៍របស់ក្រសួងសាធារណៈការ និងដឹកជញ្ជូនបានបង្ហាញថា គម្រោងស្តារ និងសាងសង់លើវិស័យសាធរណៈការ និងដឹកជញ្ជូនចំនួន៣ ដែលមានតម្លៃរាប់រយលានដុល្លារ ត្រូវបានបើករដ្ឋានសាងសង់ជាផ្លូវការ ក្រោមអធិបតីភាពសម្តេចតេជោហ៊ុន សែន នាយករដ្ឋមន្ត្រីនៃកម្ពុជា ក្នុងចំណោមហេដ្ឋារចនាសម្ព័ន្ធនានា។

គម្រោងហេដ្ឋារចនាសម្ព័ន្ធធំៗចំនួន៤ នៅក្នុងចំណោមហេដ្ឋារចនាសម្ព័ន្ធដែលត្រូវបានសម្ពោធបើករដ្ឋានស្ថាបនា ដោយសម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ដែលគេហទំព័រPropertyarea.asiaសូមលើកយកគំរោង

១ គម្រោងផ្លូវក្រវ៉ាត់ក្រុងទី៣
កម្ពុជាចំណាយថវិកាជិត ៣០០លានដុល្លារសហរដ្ឋអាមេរិក ដើម្បីសាងសង់ផ្លូវក្រវ៉ាត់ ក្រុងទី៣ ដែលមានប្រវែងជាង៥០គីឡូម៉ែត្រ ក្នុងគោលបំណងកាត់បន្ថយការកកស្ទះចរាចរក្នុង ទីក្រុង និងការធ្វើសមាហរណកម្មផ្ទៃក្នុង ។ ផ្លូវក្រវ៉ាត់ក្រុងទី៣នេះ ត្រូវបានបើកការដ្ឋានសាងសង់នៅថ្ងៃទី១៤ ខែមករា ឆ្នាំ២០១៩ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និង ឯកអគ្គរដ្ឋទូតចិនប្រចាំនៅកម្ពុជា។

គម្រោងផ្លូវនេះ ចំណាយថវិកាសរុបប្រមាណ២៧៣លានដុល្លារអាមេរិក ដែលជាហិរញ្ញប្បទានសម្បទានពីរដ្ឋាភិបាលចិន ហើយរាជរដ្ឋាភិបាលកម្ពុជា ចូលរួមថវិកាបដិភាគសម្រាប់ការដោះស្រាយផលប៉ះពាល់ ការបោសសម្អាតមីននិងយុទ្ធភ័ណ្ឌមិនទាន់ផ្ទុះ ពន្ធ និងសួយសារអាករ ។ ការស្ថាបនា នឹងប្រើរយៈពេល៤២ខែ ដែលគ្រោងបញ្ចប់នៅខែធ្នូ ឆ្នាំ២០២១។

២ គម្រោងសាងសង់ផ្លូវល្បឿនលឿន

គម្រោងសាងសង់ផ្លូវល្បឿនលឿនរាជធានីភ្នំពេញ -ក្រុងព្រះសីហនុ ដែលបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩កន្លងទៅ។

គម្រោងផ្លូវល្បឿនលឿនរាជធានីភ្នំពេញ-ក្រុងព្រះសីហនុនេះ មានប្រវែងប្រមាណ ១៩០,០៣៥ គីឡូម៉ែត្រ និងគ្រោងប្រើប្រាស់ថវិកាវិនិយោគជិត២ពាន់លានដុល្លារសហរដ្ឋអាមេរិក ដែលបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ រហូតមកដល់ពេលនេះ ដំណើរការសាងសង់សម្រេចបាន ៧,៣០% ហើយគិតត្រឹមខែវិច្ឆិកា ឆ្នាំ២០១៩។

៣ គម្រោងស្ថាបនាផ្លូវក្រុងព្រះសីហនុ៣៤ខ្សែ

គម្រោងស្ថាបនាហេដ្ឋារចនាសម្ព័ន្ធថ្មីឡើងវិញនូវផ្លូវចំនួន៣៤ខ្សែ ដែលមានប្រវែងជាង៨៤គីឡូម៉ែត្រ នៅក្រុងព្រះសីហនុ បានបើកជាផ្លូវការក្នុងទំហំទឹកប្រាក់សរុបជាង ២០០លានដុល្លារ ត្រូវបានសម្តេចអគ្គមហាសេនាបតីតេជោហ៊ុន សែន នឹងអញ្ជើញបើកការដ្ឋានស្ថាបនាកាលពីថ្ងៃទី១៦ខែវិច្ឆិកា២០១៩កន្លងមកនេះ។

ក្នុងរយៈពេល២ឆ្នាំចុងក្រោយនេះ ផ្លូវក្នុងខេត្តព្រះសីហនុបានរងការខូចខាតទាំងស្រុងដោយសារកំណើននៃការអភិវឌ្ឍយ៉ាងគំហុក ។

ការស្ថាបនាផ្លូវផ្លូវចំនួន ៣៤ខ្សែនេះ ឡើងវិញត្រូវការពេលវេលាប្រមាណជា៨ខែ ទៅ១ឆ្នាំ ។

តាមរយ:ការស្តារឡើងវិញនូវហេដ្ឋារចនាសម្ព័ន្ធ ក្រោមការយកចិត្តទកដាក់ពីប្រមុខរាជរដ្ឋាភិបាល នឹងធ្វើអោយខេត្តព្រះសីហនុ មានភាពស៊ីវិល័យទាក់ទាញការវិនិយោគបន្ថែមទៀត ស្របទៅនឹងគោលនយោបាយអភិវឌ្ឍន៍ ឧស្សាហកម្មរបស់រាជរដ្ឋាភិបាលក្នុងការប្រែក្លាយ អោយទៅជាខេត្តឧស្សាហកម្មគំរូពហុបំណង តែមួយគត់និងជាខេត្តបំពង់ករសេដ្ឋកិច្ចរបស់កម្ពុជា។

៤ គម្រោងចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ

សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង លោក ប្រយុទ្ធ ចាន់អូចា នាយករដ្ឋមន្ត្រីនៃប្រទេសថៃ កាលពី ទី២២ ខែមេសា ឆ្នាំ២០១៩នេះ បានអញ្ជើញជាអធិបតីចាក់បេតុង តភ្ជាប់មុខតំណស្ពានមិត្តភាពកម្ពុជា-ថៃ នៅលើទឹកដីក្រុងប៉ោយប៉ែត ខេត្តបន្ទាយមានជ័យ។

ស្ពានមិត្តភាពកម្ពុជា-ថៃ ទីតាំងស្ពានស្ទឹងបត់ គឺជាប់ទឹកដីស្រុកអារញ្ញប្រាថេតខេត្តស្រះកែវ ប្រទេសថៃ ដោយមេដឹកនាំប្រទេសទាំងពីរ បានចេញមកស្វាគមន៍គ្នានៅលើស្ពានស្ទឹងបត់- បានណងអៀន ដែលមានប្រវែង៦២០ម៉ែត្រ។ ប្រទេសជិតខាងជាប់ព្រំដែនទាំង២រួមមាន៖

១ ចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ (ស្ទឹងបត់-បានណងអៀន)
២ បើកការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥~ ផ្លូវជាតិលេខ៥៨ និងផ្លូវ៣) ព្រមទាំងពិធីចុះហត្ថលេខាលើកិច្ចព្រមព្រៀងប្រតិបត្តិការរួមគ្នា លើការដឹកជញ្ជូនផ្លូវដែកឆ្លងកាត់ព្រំដែន និងពិធីប្រគល់ ទទួលក្បាលរថភ្លើង៕