ចំណេះដឹង! តើឥណទានគេហដ្ឋានផ្តល់ផលប្រយោជន៍ដូចម្តេច?

ដោយ វុត្ថា

ភ្នំពេញៈ ឥណទានគេហដ្ឋាន គឺជាប្រភេទផលិតផលឥណទាន មានរយៈពេលវែង ដែលបានបង្កើតឡើង ដើម្បីផ្តល់ជូនសាធារណជន ដែលមានលក្ខណសម្បត្តិគ្រប់គ្រាន់ សម្រាប់ទិញគេហដ្ឋានដែលកំពុងតែសាងសង់ ឬសាងសង់រួចធ្វើជាកម្មសិទ្ធផ្ទាល់ខ្លួន ឬក៏សម្រាប់យកទៅសាងសង់គេហដ្ឋានលើដីកម្មសិទ្ធិដែលមានស្រាប់។

១) ប្រភេទប្រាក់ ទំហំឥណទាន និងរយៈពេលឥណទាន

• ឥណទានគេហដ្ឋាន ត្រូវបានផ្តល់ជូនអតិថិជនជាប្រាក់ដុល្លារអាមេរិក និងមិនត្រូវលើសពី៧០ភាគរយ នៃតម្លៃសរុបរបស់គេហដ្ឋានដែលត្រូវទិញ ឬសាងសង់គេហដ្ឋានលើដីកម្មសិទ្ធិដែលមានស្រាប់នោះឡើយ។

• រយៈពេលខ្ចីអតិបរមា១០ឆ្នាំ ចំពោះ ៖

អតិថិជនជាកម្មករ និយោជិតកំពុងបម្រើការងារ ក្នុងស្ថាប័នសាធារណៈ និងទីភ្នាក់ងារជាតិ-អន្តរជាតិ ដោយមិនត្រូវលើសពីអាយុចូលនិវត្តន៍ឡើយ។

អតិថិជនផ្សេងទៀត ត្រូវមានកាយសម្បទារឹងមាំ និងមានអាយុចាប់ពីពេលទទួលប្រាក់កម្ចីរហូតដល់ កាលាវសាននៃរយៈពេលខ្ចីប្រាក់ មិនត្រូវលើសពីអាយុ៦០ឆ្នាំឡើយ ។

២) លក្ខណសម្បត្តិអតិថិជនដែលអាចទទួលឥណទានគេហដ្ឋាន

• ជនកម្ពុជាគ្រប់រូបដែលជាពលរដ្ឋសកម្ម ឬជានីតិជន

• មានមុខរបរ ប្រាក់បៀវត្សរ៍ ឬប្រភពចំណូលដែលមាននិរន្តរភាព និងមានលទ្ធភាពអាចសងបំណុលបាន។

• មានប្រវត្តិ កេរ្តិ៍ឈ្មោះ អត្តចរិតល្អ និងមានចេតនាសងបំណុល

• មានទីលំនៅអចិន្ត្រៃយ៍ ដោយមានការបញ្ជាក់ដឹងឮ ពីអាជ្ញាធរក្នុងតំបន់របស់ខ្លួនរស់នៅ។

• ធានាផ្តល់ព័ត៌មានត្រឹមត្រូវ ច្បាស់លាស់ គ្រប់គ្រាន់ និងទាន់ពេលវេលាជូនធនាគារ។

• គេហដ្ឋានដែលទិញ ត្រូវស្ថិតក្នុងតំបន់ប្រតិបត្តិការរបស់ធនាគារ ដោយមានការបញ្ជាក់ទទួលស្គាល់ពីអាជ្ញាធរមូលដ្ឋានតាមផ្លូវច្បាប់។

• មិនមានបំណងផ្លាស់ប្តូរទីលំនៅទៅក្រៅ ពីតំបន់ប្រតិបត្តិការរបស់សាខាធនាគារ ដែលខ្លួនបានជំពាក់បំណុលរហូតដល់ពេលសងរួច៕

កិច្ចព្រមព្រៀងពាណិជ្ជកម្មរវាងអាមេរិក និងចិនត្រូវបានរំពឹងថានឹងបញ្ចប់នៅចុងសប្តាហ៍នេះ

ដោយ Donald Lee

ភ្នំពេញ៖ ក្រុមអ្នកវិភាគបានឱ្យដឹងថា ទម្រង់មួយចំនួននៃកិច្ចព្រមព្រៀងពាណិជ្ជកម្មរវាងអាមេរិក និងចិនត្រូវបានរំពឹងថានឹងត្រូវបានធ្វើជាផ្លូវការនៅចុងសប្តាហ៍នេះ មុនពេលពន្ធរបស់អាមេរិកលើទំនិញចិនដែលមានតម្លៃ ១៦០ ពាន់លានដុល្លារចាប់ផ្តើមនៅក្នុងថ្ងៃ អាទិត្យ។

ភាគីទាំងពីរមិនអាចឈានដល់កិច្ចព្រមព្រៀងស្តីពីកិច្ចព្រមព្រៀងដំណាក់កាលទី ១ ដើម្បីបញ្ចប់សង្គ្រាមពាណិជ្ជកម្មរយៈពេល ១៧ ខែនេះទេ។អ្នកចរចាផ្នែកពាណិជ្ជកម្មអាមេរិក និងចិនកំពុងធ្វើការគ្រប់ពេលវេលាដើម្បីចុះហត្ថលេខាលើកិច្ចព្រមព្រៀងពាណិជ្ជកម្ម មុនពេលពន្ធគយនេះចាប់ផ្តើម។ នេះបើយោងតាមទីប្រឹក្សាសេដ្ឋកិច្ចរបស់សេតវិមានលោក Larry Kudlow។

លោកប្រធានាធិបតីអាមេរិក Donald Trump បានពន្យាពេលការតម្លើងពន្ធគយជុំនេះលើទំនិញចិនដែលរួមមានទូរស័ព្ទស្មាតហ្វូនដល់ថ្ងៃទី ១៥ ខែ ធ្នូ ក្នុងកាលបរិច្ឆេទនៅឆ្នាំនេះ។

លោក Kenny Polcari អ្នកយុទ្ធសាស្រ្តទីផ្សារជាន់ខ្ពស់នៅក្រុមហ៊ុន Slatestone Wealth បាននិយាយនៅក្នុងបទសម្ភាសន៍មួយនៅលើទូរទស្សន៍អាមេរិកថា “ពួកគេនឹងចេញមក ហើយនិយាយថា យើងមានកិច្ចព្រមព្រៀង…យើងកំពុងធ្វើការកែសំរួលវា។ ប៉ុន្តែ ដើម្បីបង្ហាញជំនឿចិត្ត យើងនឹងមិនដាក់ពន្ធគយទាំងនេះទេ ហើយបន្ទាប់មកទីផ្សារនឹងប្រមូលផ្តុំគ្នា”។

ក្រុមអ្នកវិភាគបារម្ភថា លោក Trump នឹងគំរាមថា លោកសុខចិត្តរង់ចាំរហូតដល់ការបោះឆ្នោតប្រធានាធិបតីអាមេរិកនៅខែ វិច្ឆិកា ឆ្នាំ ២០២០ ដើម្បីចុះហត្ថលេខាលើកិច្ចព្រមព្រៀងពាណិជ្ជកម្ម។ ទោះយ៉ាងណា មន្ត្រីជាន់ខ្ពស់នៅក្នុងរដ្ឋបាល Trump បានបញ្ជាក់ថា វាមិនទំនងទេដែលថា លោក Trump នឹងអនុញ្ញាតិឱ្យពន្ធចាប់ផ្តើមនៅចុងសប្តាហ៍នេះ។

រដ្ឋមន្រ្តីក្រសួងកសិកម្មអាមេរិកលោក Sonny Perdue បាននិយាយកាលពីថ្ងៃ ច័ន្ទ នៅឯសន្និសីទមួយនៅរដ្ឋ Indiana ថា “យើងមានឱសានវាទមួយដែលនឹងកើតឡើងនៅថ្ងៃទី ១៥ ខែ ធ្នូ សម្រាប់ពន្ធគយផ្សេងទៀត។ ខ្ញុំមិនជឿថា គោលការណ៍ទាំងនេះនឹងត្រូវបានអនុវត្តទេ ហើយខ្ញុំគិតថា យើងអាចនឹងមើលឃើញការគាំទ្រខ្លះៗ ។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុន៕

ស្រុកឧដុង្គ ខេត្តកំពង់ស្ពឺ កំពុងទាក់ទាញការវិនិយោគលើគម្រោងដីឡូតិ៍ និងរមណីយដ្ឋានធម្មជាតិ

ដោយៈ រ៉ាណេត

កំពង់ស្ពឺៈ ស្ថិតនៅក្នុងបរិបទនៃការអភិវឌ្ឍ និងរីកចម្រើននៅក្នុងវិស័យអចលនទ្រព្យនៅកម្ពុជា ជាពិសេសវិស័យដីធ្លី ដែលស្ថិតនៅក្នុងតាមតំបន់ជាយក្រុងនោះ គម្រោងដីឡូតិ៍ដ៏ធំមិនធ្លាប់មានពីមុនមកនោះ បានបង្ហាញវត្តមាននៅក្នុងស្រុកឧដុង្គ ខេត្តកំពង់ស្ពឺ រួមជាមួយនឹងគម្រោងបង្កើតរមណីយដ្ឋាន ឋានសួគ៌ធម្មជាតិ សម្រាប់ស្វាគមន៍ភ្ញៀវទេសចរទាំងក្នុង និងក្រៅតំបន់ផងដែរ។

ជាព្រឹត្តិការណ៍ដ៏អស្ចារ្យ នៃការបើកសម្ពោធលក់គម្រោងដីឡូតិ៍ យូត្រាស់លែន (U trust Land ) និងរមណីយដ្ឋានឋានសួគ៌ធម្មជាតិ លើកដំបូងគេនៅក្នុងខេត្តកំពង់ស្ពឺ កាលពីព្រឹកថ្ងៃទី១១ ខែធ្នូ ឆ្នាំ២០១៩ នេះ ទាំងបណ្តាភ្ញៀវកិត្តិយស អតិថិជន ក៏ដូចជាបណ្តាក្រុមហ៊ុនភ្នាក់ងារជាដៃគូ បានបង្ហាញពីភាពជឿជាក់ទៅលើគម្រោង ដែលស្ថិតនៅក្នុងតំបន់ដ៏មានសក្តានុពល និងមានការអភិវឌ្ឍយ៉ាងឆាប់រហ័សក្នុងពេលដ៏ខ្លីខាងមុខនេះ។

លោក ម៉ន សុខា ស្ថាបនិក និងជាអគ្គនាយកក្រុមហ៊ុនU Trust Investment ដែលកំពុងធ្វើការអភិវឌ្ឍទៅលើគម្រោងខាងលើនេះ បានមានប្រសាសន៍ថា គម្រោងដីឡូតិ៍ យូត្រាស់លែន ដែលទើបតែបានបើកសម្ពោធនេះ គឺជាផ្នែកមួយនៃការវិនិយោគ និងអភិវឌ្ឍន៍របស់ក្រុមហ៊ុនតែប៉ុណ្ណោះ ខណៈដែលនៅមានគម្រោងធំៗជាច្រើនទៀត ដែលកំពុងត្រៀមបង្ហាញ ខ្លួន នៅក្នុងតំបន់ដ៏មានសក្តានុពលនៅតាមតំបន់ជាយក្រុង។

លោក ម៉ន សុខា បានបន្តទៀតថា “ការបើកសម្ពោធថ្ងៃនេះ រួមមាន២គម្រោង ស្ថិតនៅលើផ្ទៃដីរួមទំហំ៦៤ហិកតា រួមមានគម្រោងរមណីយដ្ឋាន ឋានសួគ៌ធម្មជាតិ និងគម្រោងដីឡូតិ៍U Trust Land ដែលមានប្រមាណ៥០០០ឡូតិ៍”។ លោកបានបន្តទៀតថា “នៅក្នុងគម្រោងនេះផងដែរ ក្រុមហ៊ុនបានរៀបចំយ៉ាងពិសេស ស្របតាមបទដ្ឋានដែលបានកំណត់ដោយច្បាប់ និងទទួលស្គាល់ដោយមន្ទីររៀបចំដែនដី នគរូបនីយកម្ម និងសំណង់យ៉ាងត្រឹមត្រូវ ដែលក្រៅពីការស្ថាបនាផ្លូវបេតុងនៅក្នុងគម្រោង និងហេដ្ឋារចនាសម្ព័ន្ធនានាដែលពាក់ព័ន្ធ ការដាក់ប្រព័ន្ធលូ ការរៀបចំបណ្តាញ និងបោះបង្គោលអគ្គិសនី ថែមទាំងមានការអភិវឌ្ឍរមណីយដ្ឋាន សម្រាប់កម្សាន្តលក្ខណៈធម្មជាតិទៀតផង”។

តំបន់ជាយក្រុងរាជធានីភ្នំពេញ ដែលស្ថិតនៅក្នុងភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ គឺមានលក្ខណៈពិសេស និងពោរពេញទៅដោយសក្ដានុពល ដែលស្ថិតនៅក្នុងគម្រោងអភិវឌ្ឍន៍របស់រាជរដ្ឋាភិបាលកម្ពុជា។

លោកម៉ន សុខាបានបន្តទៀតថា “សម្រាប់គម្រោងដីឡូតិ៍យូត្រាស់លែន បានផ្តល់ជម្រើស និងភាពល្អប្រសើរប្រសើរដល់អតិថិជន ក៏ដូចជាបណ្តាក្រុមហ៊ុនភ្នាក់ងារអចលនទ្រព្យនានា ជាមួយនឹងឱកាសអាចទទួលបានចំណេញលើការវិនិយោគបន្ត”។ លោកបានបញ្ជាក់ថា “បច្ចុប្បន្នេះស្ទើរតែគ្មានដីឡូតិ៍ជាយក្រុង មានតម្លៃទាបទៀតនោះទេ ដែលយ៉ាងហោចណាស់ក្នុងមួយឡូតិ៍ ក៏មានតម្លៃជាង៥ពាន់ដុល្លារដែរ ប៉ុន្តែសម្រាប់គម្រោងដីឡូតិ៍ យូត្រាស់ លែន គឺមានតម្លៃចាប់ពី៣៧៩៩ដុល្លារឡើងទៅតែប៉ុណ្ណោះ ដែលការលក់ក្នុងតម្លៃទាបបែបនេះមានមិនច្រើននោះទេ”។

សម្រាប់អ្នកដែលមានចំណាប់អារម្មណ៍ជាមួយគម្រោងនេះ អាចទាក់ទងតាមរយៈទូរស័ព្ទ ៖ ០៨៦ ៥៩ ១០ ១០ / ០៧៧ ៣៧ ៣៧ ៩៣ ។

អភិបាលខេត្តកំពង់ស្ពឺ លោកវ៉ី សំណាង បានទទួលស្គាល់ពីភាពល្អប្រសើរ និងភាពរីកចម្រើន លើផ្នែកហេដ្ឋារចនាសម្ព័ន្ធខេត្តទាំងមូល ខណៈដែលទំហំនៃការវិនិយោគពីសំណាក់ក្រុមហ៊ុនក្នុងស្រុក និងក្រៅស្រុក ជាពិសេសក្រុមហ៊ុនចិនតែម្ដង កាន់តែមានការកើនឡើងឥតឈប់ឈរ។

លោកបន្តថា វាមានកត្តាជាច្រើនដែលជំរុញ ឱ្យសេដ្ឋកិច្ចក្នុងតំបន់មានការកើនឡើង ដែលក្នុងនោះចំពោះតម្រូវការនៃការប្រើប្រាសដីធ្លីក៏មានខ្ពស់”។

លោកបានបញ្ជាក់ថា បច្ចុប្បន្ននេះមានក្រុមហ៊ុនជាច្រើនបាន និងកំពុងដំណើរការនៅក្នុងខេត្ត ដោយឡែកគ្រាន់តែរោងចក្រ មានរហូតដល់ទៅជាង ២០០រោងចក្រ ហើយចំពោះសហគ្រាសខ្នាតតូច និងមធ្យម មានរហូតដល់៦៤០០មូលដ្ឋាន ដែលផ្តល់ការងារដល់កម្លាំងជំនាញរហូតដល់ជាង១២ម៉ឺននាក់ ស្មើនឹងចំណូលប្រមាណ១២ម៉ឺនលានរៀលក្នុងមួយខែ។

លោកបន្តថា “កត្តាទាំងអស់នេះហើយ ដែលជំរុញឱ្យសេដ្ឋកិច្ចក្នុងខេត្តកំពង់ស្ពឺមានការកើនឡើងយ៉ាងឆាប់រហ័ស ហើយការកើនមឡើងនេះនឹងនៅតែបន្តទៅមុខទៀត”៕

កម្ពុជា-គូវ៉ែតជំរុញឱ្យមានការចាប់ផ្តើមតភ្ជាប់ជើងហោះហើររវាប្រទេសទាំងពីរ

ដោយ វុត្ថា

ភ្នំពេញៈ រដ្ឋាភិបាលកម្ពុជា-គូវ៉ែត បានជំរុញឱ្យមានការចាប់ផ្តើមតភ្ជាប់ជើងហោះ Connection Flight រវាងប្រទេសទាំងពីរ ដើម្បីឆ្លើយតបទៅនឹងកំនើននៃការដឹកជញ្ជូន សេដ្ឋកិច្ច និងពាណិជ្ជកម្ម។

លោក ហ៊ុន ហាន ឯកអគ្គរាជទូតកម្ពុជាប្រចាំរដ្ឋគូវ៉ែត នៅក្នុងជំនួបពិភាក្សាការងារជាមួយលោក Sheikh Salman Sabah Al Salem Al Hamoud Al Sabah ប្រធានអាកាសចរស៊ីវិលគូវ៉ែត កាលពីពេលថ្មីៗនេះបានឱ្យដឹងថា ភាគីទាំងងពីរបានបើកកិច្ចព្រមព្រៀង និង MoU ដែលភាគីទាំងពីរបានចុះហត្ថលេខារួមគ្នា ក្នុងអំឡុងទស្សនកិច្ចផ្លូវការ នៃនាយករដ្ឋមន្ត្រីទាំងពីរនៅកម្ពុជា និងគូវ៉ែតឡើងវិញ។

លោកបន្តថា “ភាគីទាំងពីរក៏នឹងខិតខំ និងរកវិធីដើម្បីជម្រុញ ឲ្យមានការចាប់ផ្តើម Connection Flight ពីគូវ៉ែតទៅកម្ពុជា ដើម្បីសម្រួលដល់ការដឹកជញ្ជូន អ្នកដំណើរទេសចរ និងទំនិញផ្សេងៗ”។

លោកបន្ថែមថា កម្ពុជាមានទីកន្លែងសម្រាប់ទាក់ទាញអ្នកទេសចរណ៍ ជាច្រើនកន្លែង (ប្រាសាទល្បីៗ ទេសចរតាមបែបធម្មជាតិ និងឆ្នេរសមុទ្រដ៏ស្រស់ស្អាត) ពីបណ្តាប្រទេសនៅក្នុងប្លុកអារ៉ាប់ទាំងអស់។

ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន ធ្លាប់បានប្រាប់គេហទំព័រ Propertyarea.asia ថា ការតភ្ជាប់អោយមានជើងហោះពីបណ្តានានា មកពីតំបន់ និងមកពីពិភពលោកមកកាន់កាន់កម្ពុជា ពិតជាមានសារៈសំខាន់ ក្នុងការបង្កើនទេសចរណ៍ ពាណិជ្ជកម្ម សេដ្ឋកិច្ច និងវិនិយោគនៅក្នុងប្រទេសឱ្យមានការរីកចំរើនបន្ថែមទៀត។

លោកបន្តថា “ការតភ្ជាប់ត្រង់នាពេលខាងមុខនេះ មិនត្រឹមតែជំរុញអោយមានភ្ញៀវទេសចរចិនមកកម្ពុជា មានការកើនឡើងនោះទេ វាថែមទាំងនាំមកពាណិជ្ជនិងការវិនិយោគបន្ថែមមកកម្ពុជាផងដែរ”។

លោកបន្តថា “ការហោះហើរត្រង់ពីប្រទេសគូវ៉ែតនេះនឹង ផ្ដល់ផលចំណេញជាច្រើនដល់កម្ពុជា ជាពិសេសការចំណាយរបស់ភ្ញៀវទេសចរ ដោយពួកគេមិនបានចំណាយថវិកានៅប្រទេសណាមួយនៅពេលមានការឈប់ចតនោះទេ ដោយថវិការទាំងអស់នឹងត្រូវចំណាយ នៅប្រទេសកម្ពុជាទាំងអស់”។

គណៈប្រតិភូនៃរដ្ឋគូវ៉ែតកាលពីកន្លងមក បានមកបំពេញទស្សនកិច្ចនៅកម្ពុជា ដែលមន្ត្រីកម្ពុជាបានចាត់ទុកថា បាននាំមកនូវកាលានុវត្តភាពថ្មី នៃការបន្តរឹតចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ កម្ពុជា-គូវ៉ែត ដែលមានជាង២០ឆ្នាំមកនេះ ឲ្យកាន់តែរឹងមាំថែមទៀត ។

កន្លងមករដ្ឋសភាកម្ពុជា ក៏បានអនុម័តច្បាប់ស្តីពីការអនុម័ត យល់ព្រមលើអនុស្សរណៈនៃការយោគយល់គ្នាស្តីពីការផ្លាស់ប្តូរហត្ថពលកម្ម រវាងព្រះរាជាណាចក្រកម្ពុជា និងរដ្ឋគូវ៉ែត ក្នុងការផ្តល់ផលប្រយោជន៍ឲ្យគ្នាទៅវិញទៅមក ព្រោះថារដ្ឋគូវ៉ែតត្រូវការកំលាំង ពលកម្ម ហើយពលករកម្ពុជាក៏ត្រូវការប្រាក់ចំណូល ដើម្បីរួមចំណែកអភិវឌ្ឍន៍ទាំងអស់គ្នា។

នៅឆ្នាំ២០១៩នេះ កម្ពុជានឹងបញ្ជូនពលករទៅធ្វើការ នៅប្រទេសគូវ៉ែត និងបានសន្យាថា នៅពេលត្រឡប់ទៅកាន់ប្រទេសវិញ លោកជំទាវនឹងបង្កើតក្រុម ការងារមួយ ដើម្បីជួយសម្រួល និងដោះស្រាយបញ្ហាពលករកម្ពុជានៅគូវ៉ែត ជាមួយក្រសួងការងារ និងបណ្តុះបណ្តាលវិជ្ជាជីវៈកម្ពុជា៕

រដ្ឋាភិបាលចាប់ផ្តើមរៀបចំផែនការមេអភិវឌ្ឍខេត្តកែបអោយទៅជាតំបន់ទេសចរណ៍សម្រាកលំហែកម្រិតខ្ពស់

ដោយ វុត្ថា

ភ្នំពេញៈ រដ្ឋាភិបាលកម្ពុជា បានឹងកំពុងពិភាក្សាលើ”ប្លង់គោលគំនិត និងវិធីសាស្រ្តនៃការរៀបចំបង្កើតផែនការមេ អភិវឌ្ឍទេសចរណ៍ខេត្តកែបអោយទៅជាតំបន់ទេសចរណ៍សម្រាកលំហែកម្រិតខ្ពស់ នៅឆ្នាំ២០២០-២០៣០។

លោកនី ផល្លី អនុរដ្ឋលេខាធិការក្រសួងទេសចរណ៍ នៅក្នុងកិច្ចប្រជុំជាមួយលោក ព្រុំ គន្ធិ អភិបាលរងខេត្តកែប នៅថ្ងៃទី១១ខែធ្នូ ឆ្នាំ២០១៩នេះឱ្យដឹងថា ក្រសួងទេសចរណ៍ បាននិងកំពុងរៀបចំសិក្សាផែនការមេពិសេសមួយ សម្រាប់ខេត្តកែប ដែលនេះគឺជាផ្នែកមួយនៃចក្ខុវិស័យអភិវឌ្ឍន៍តំបន់ឆ្នេរទាំង៤នៅកម្ពុជា។

លោកបន្តថា “ខេត្តកែបមានសក្តានុពលខុសពីខេត្តផ្សេងៗ ក្រសួងទេសចរណ៍មានគម្រោងសិក្សា រៀបចំផែនការមេទុកខេត្តកែបនេះ សម្រាប់ជារមណីដ្ឋានបែបប្រណិតកម្រិតខ្ពស់ ជាទេសចរណ៍បែបធម្មជាតិពិតៗ”។

លោកនី ផល្លីបានបន្ថែមថា ជាចក្ខុវិស័យនៃផែនការមេនេះ ក្រុមការងារនឹងសិក្សាគ្រប់ទិដ្ឋភាពទាំងអស់រួមទាំងបរិស្ថាន ទេសចរណ៍ សេដ្ឋកិច្ចជាងនេះទៅទៀត តំបន់ទេសចរណ៍ក្នុងខេត្តកែបនេះ មិនមែនសំដៅដល់ទេសចរណ៍សម្រាប់ភ្ញៀវ ដែលមានប្រាក់ចំណូលខ្ពស់នោះទេ តែជាកន្លែងសម្រាប់អ្នកដែលស្វែងរកភាពស្ងប់ស្ងាត់។

តំបន់ទេសចរណ៍ជាប់មាត់សមុទ្រនៅកម្ពុជាទាំង៤ មានចក្ខុវិស័យនៃការអភិវឌ្ឍន៍ខុសៗគ្នា ដូចជា តំបន់អភិវឌ្ឍសេដ្ឋកិច្ចពហុបំណង សម្រាប់ឧស្សាហកម្ម និងពាណិ្ជកម្ម តំបន់អភិវឌ្ឍសម្រាប់គោលដៅអេកូទេសចរណ៍ តំបន់អភិវឌ្ឍបែបកសិទេសចរណ៍ ទេសចរណ៍បែបស្រាវជ្រាវ ចំពោះខេត្តកែបក៏នឹងក្លាយជាតំបន់ទេសចរណ៍ បែបប្រណិតនាពេលអនាគត។

ខេត្តកែបជាកន្លែងទាក់ទាញវិនិយោគិនខ្លាំង ក្នុងពេលបច្ចុប្បន្នដោយសារតម្លៃដីនៅក្រុងព្រះសីហនុ កំពុងកើនឡើងយ៉ាងខ្លាំង ដែលជម្រុញដោយវិនិយោគិនចិន និងបានកំពុងតំលើងតម្លៃខ្ពស់ជាង វិនិយោគិនក្នុងស្រុក និងវិនិយោគិនបរទេសផ្សេងទៀត។

លោក សន សៀប ស្ថាបនិក និងនាយកនៃ ក្រុមហ៊ុន Key Real Estate Co., Ltd ធ្លាប់បានប្រាប់សារព័ត៌មានឱ្យដឹងថា ខេត្តកែបកំពុងតែមានប្រជាប្រិយភាពទាក់ទាញភ្ញៀវទេសចរណ៍ក្នុងស្រុក ជាពិសេសពីក្រុងភ្នំពេញ ដែលជានកត្តាធ្វើអោយកើនឡើងនូវតម្រូវការផ្នែកទីកន្លែងស្នាក់នៅ ម្យ៉ាងវិញទៀតវាជាការបើកផ្លូវ សម្រាប់នាក់វិនិយោគក្នុងការមកបណ្តាក់ទុនលើទីផ្សារអចលទ្រព្យដូចជា សណ្ឋាគារ ខុនដូ និងអាផាតមិនផ្សេងៗ។

លោកបន្ថែមថាការលើកកំពស់ និងពង្រីកផ្លូវជាតិលេខ៣ ដែលតភ្ជាប់ពីភ្នំពេញទៅកំពតរបស់រដ្ឋាភិបាលក៏ជាកត្តាជំរុញមួយផងដែរ។ សក្តានុពលទីផ្សារអចលទ្រព្យនេះ មិនត្រឹមតែជាផលប្រយោជន៍ សំរាប់តែអ្នកអភិវឌ្ឍន៍នោះទេ ប៉ុន្តែវាក៏ជាផលល្អសំរាប់ប្រជាជនដែលរស់នៅក្នុងតំបន់ ព្រមទាំងជួយពង្រឹងចរន្តសេដ្ឋកិច្ចផងដែរ៕

ខេត្តសៀមរាបពង្រីកការចែកចាយទឹកស្អាតដោយរោងចក្រតម្លៃ ១៣លានដុល្លារបើកដំណើរការ

ដោយ វុត្ថា

ខេត្តសៀមរាបៈ រោងចក្រប្រព្រឹត្តកម្មទឹកស្អាតទឹកវិល២ និងបំពង់មេនាំទឹកស្អាតទំហំ៧០០មម ប្រវែងជាង៦ពាន់ម៉ែត្រ ស្ថិតក្នុងភូមិសណ្តាន់ សង្កាត់ទឹកវិល ក្រុងសៀមរាបខេត្តសៀមរាប ស្ថិតក្រោមក្របខណ្ឌឥណទានពីទីភ្នាក់ងារបារាំង សម្រាប់កាតអភិវឌ្ឍ ( AFD ) ក្នុងទំហំទឹកប្រាក់វិនិយោជិត១៣លានដុល្លា ត្រូវបានសម្ពោធដាក់ឱ្យដំណើរជាផ្លូវការ។

លោកទៀ សីហា អភិបាលខេត្តសៀមរាបឱ្យដឹងនៅក្នុងពិធីសម្ពោធឱ្យដំណើរការរោងចក្រប្រព្រឹត្តកម្មទឹកស្អាតទឹកវិល២ កាលពីថ្ងៃទី១០ ខែធ្នូម្សិលមិញនេះ បានឱ្យដឹងថាបច្ចុប្បន្ននេះ តម្រូវការប្រើប្រាស់ទឹកស្អាតក្នុងក្រុងសៀមរាប ជាមធ្យមប្រមាណ៦០ពាន់ម៉ែត្រត្រីគុណក្នុង១ថ្ងៃ ក្នុងពេលដែលរដ្ឋាករទឹកស្វយ័តសៀមរាប មានសមត្ថភាពផ្គត់ផ្គង់ទឹកស្អាត មានត្រឹមតែ៣០ពាន់ម៉ែត្រត្រីគុណក្នុង១ថ្ងៃ រួមទាំងរោងចក្រប្រព្រឹត្តកម្មទឹកស្អាតទឹកវិល២ ដែលកំពុងបើកសម្ពោធនេះ ដែលមានសមត្ថភាពផលិតទឹកស្អាតបាន ១៥ពាន់ម៉ែត្រត្រីគុណក្នុង១ថ្ងៃ ។

បើយោងតាមការសិក្សារបស់ក្រុមហ៊ុនបារាំង និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) នៅក្នុងឆ្នាំ២០៣០ខាងមុខ តម្រូវការនៃការប្រើប្រាស់ទឹកស្អាតនឹងកើនឡើងដល់៩០ពាន់ម៉ែត្រត្រីគុណក្នុង១ថ្ងៃ។ ពាក់ព័ន្ធនឹងតម្រូវការទឹកស្អាត ដែលចេះតែកើនឡើងពីមួយឆ្នាំទៅមួយឆ្នាំនោះ រដ្ឋាករទឹកស្វយ័តសៀមរាប មានគម្រោងវិនិយោគទ្រង់ទ្រាយធំ លើការពង្រីកប្រព័ន្ធផ្គត់ផ្គង់ទឹកស្អាត តាមរយៈនៃការគៀងគរប្រភពទុនពីដៃគូអភិវឌ្ឍនានាផងដែរ។

លោកទៀ សីហាបានបន្ថែមថា គម្រោងពង្រីកបណ្តាញចែកចាយទឹកស្អាត ប្រវែង១០០គីឡូម៉ែត្រ ក្រោមឥណទានរបស់ធនាគារអភិវឌ្ឍអាស៊ី ( ADB ) មានទំហំទឹកប្រាក់សរុប៥លានដុល្លារ និងថវិការបស់រដ្ឋាករទឹកស្វយ័តសៀមរាប ផ្ទាល់សរុបប្រមាណ២លានដុល្លាអាមេរិក ដែលចាប់ដំណើរការសាងសង់ កាលពីឆ្នាំ២០១៨នោះគ្រោងបញ្ចប់នៅក្នុងឆ្នាំ២០២០ខាងមុខនេះ ។

លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម បានមានប្រសាសន៍ថា សម្រាប់ក្រុងសៀមរាប ត្រូវមានការគិតគូរទុកជាមុន ក្នុងរយៈពេលវែងពី១០ទៅ២០ឆ្នាំខាងមុខ ដើម្បីត្រៀមដោះស្រាយបញ្ហាផ្គត់ផ្គង់ទឹកស្អាត ជូនប្រជាពលរដ្ឋ និងបម្រើដល់ការអភិវឌ្ឍវិស័យសេដ្ឋកិច្ច និងទេសចរណ៍ ដែលនឹងមានការរីកចម្រើនកាន់តែខ្លាំងថែមទៀតនៅប៉ុន្មានឆ្នាំខាងមុខនេះ ។

លោកបន្ថែមថា គម្រោងនេះរដ្ឋាករទឹកស្វយ័តសៀមរាប បានចុះហត្តលេខាជាមួយក្រុមហ៊ុនសាងសង់រួចហើយ ហើយក្រុមហ៊ុនក៏បានចាប់ផ្តើមការងារជំហានដំបូង និងផ្គត់ផ្គង់សម្ភារៈពីក្រៅប្រទេសជាបន្តបន្ទាប់ និងត្រូវបើកការដ្ឋានសាងសង់ក្នុងពេលឆាប់ៗខាងមុខ ហើយគ្រោងនឹងបញ្ចប់ការដ្ឋានសាងសង់ក្នុងឆ្នាំ២០២៣៕

ខេត្តកំពតបានដាក់ផែនការលើកកម្ពស់សម្រស់ទីក្រុងដើម្បីទាក់ទាញភ្ញៀវទេសចរណ៍

ដោយ ប៊ី

កំពត៖ ខេត្តកំពតបានដាក់ផែនការជំរុញឱ្យស្ថាប័ន និងអាជ្ញាធរពាក់ព័ន្ធ ត្រូវបង្កើនថែមទៀត ពាក់ព័ន្ធលើបញ្ហាសណ្ដាប់ធ្នាប់ សោភ័ណភាព និងអនាម័យ នៅក្នុងក្រុងកំពតសម្រាប់ត្រៀមរៀបចំខ្លួនបម្រើដល់សកម្មភាពនូវព្រឹត្តិការណ៍ពិធីបុណ្យសមុទ្រ និងព្រឹត្តិការណ៍ទេសចរណ៍ធំៗ ប្រចាំឆ្នាំមួយចំនួនទៀត ប្រកបដោយភាពជោគជ័យ។

ការដាក់ផែនការ និងជំរុញបែបនេះធ្វើឡើងនៅថ្ងៃទី១១ ខែធ្នូ ឆ្នាំ២០១៩ ខណៈឯកឧត្តម អភិបាលខេត្ត ដឹកនាំមន្ត្រីនៃមន្ទីរ អង្គភាព ស្ថាប័ន និងអាជ្ញាធរដែលពាក់ព័ន្ធ ចុះត្រួតពិនិត្យការពាក់ព័ន្ធ បញ្ហាសណ្ដាប់ធ្នាប់ សោភ័ណភាព និងអនាម័យតាមដងផ្លូវ នៅជុំវិញក្នុងក្រុងកំពត។ ព្រឹត្តិការណ៍ពិធីបុណ្យសមុទ្រនឹងចាប់ពីថ្ងៃទី២០ ដល់ ២២ ខែធ្នូ ឆ្នាំ២០១៩។

លោក ជាវ តាយ អភិបាលខេត្តកំពត ក៏បានបញ្ជាក់ថា ពេលវេលានៃការរៀបចំព្រឹត្តិការណ៍ពិធីបុណ្យសមុទ្រ លើកទី៨ ជុំទី២ ដែលខេត្តកំពត ត្រូវបានធ្វើជាម្ចាស់ផ្ទះ នៅប៉ុន្មានថ្ងៃទៀត ឆាប់ៗខាងមុខនេះហើយ បើគិតត្រឹមថ្ងៃទី១១ ខែធ្នូ ឆ្នាំ២០១៩នេះ ពេលវេលាមានត្រឹមតែ រយៈពេលប្រមាណ ៩ថ្ងៃទៀតប៉ុណ្ណោះ។

ទន្ទឹមនេះឯកឧត្តម អភិបាលខេត្ត ក៏បានណែនាំដល់ចៅសង្កាត់ និងអភិបាលក្រុង រួមនិងមន្ទីរ អង្គភាពជំនាញពាក់ព័ន្ធទាំងអស់ ត្រូវតែបង្កើនស្មារតីយកចិត្តទុកដាក់ទទួលខុសត្រូវខ្ពស់ អំពីតួនាទីភារកិច្ច របស់ខ្លួនតាមមុខសញ្ញាបន្ថែមទៀត។

ពិសេសអាជ្ញាធរក្រុង សង្កាត់ ទាំងប្រាំត្រូវតែបង្កើនការយកចិត្តទុកដាក់ សហការគ្នាដោយទទួលខុសត្រូវឱ្យបានសស្រាក់សស្រាំទាំងអស់គ្នា បន្ថែមទៀត លើការងារកែលម្អសោភ័ណ្ឌភាព សណ្ដាប់ធ្នាប់សាធារណៈ និងអនាម័យបរិស្ថានក្រុង។

ការងារដែលត្រូវយកចិត្តទុកដាក់សំខាន់ថែមទៀតដែរនោះ គឺអាជ្ញាធរក្រុង សង្កាត់ ក៏ត្រូវយកចិត្តទុកដាក់ ក្នុងចលនាបំផុសផ្សព្វផ្សាយប្រកាស តាមរយៈមធ្យោបាយផ្សេងៗ ដល់មហាជន ប្រជាជន ក៏ដូចសាធារណៈជនទូទៅ ឱ្យបានយល់ជ្រួតជ្រាបទទួលដឹង ដើម្បីចូលរួមអនុវត្ត និងលើកកម្ពស់ទាំងអស់គ្នា ពីបញ្ហាសោភ័ណភាព សណ្ដាប់ធ្នាប់សាធារណៈ និងអនាម័យបរិស្ថាន ក្នុងក្រុងកំពតឱ្យបានល្អប្រសើរឡើង ព្រោះថាការងារជោគជ័យ ត្រូវតែមានការចូលរួមឱ្យបានព្រមគ្នា មិនថាឡើយថ្នាក់ដឹកនាំមន្ត្រីរាជការ ឬប្រជាពលរដ្ឋឡើយ ទើបការងារទាំងអស់នោះទទួលបានលទ្ធផលជោគជ័យល្អប្រសើរ៕

សម្តេចតេជោអំពាវនាវឱ្យពលរដ្ឋវេចខ្ចប់សំរាមឱ្យបានត្រឹមត្រូវ

ដោយ វុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ប្រជាពលរដ្ឋកម្ពុជា វេចខ្ចប់សំរាម ឱ្យបានត្រឹមត្រូវ ខណៈសំរាមនៅក្នុងប្រទេសកម្ពុជានាពេលបច្ចុប្បន្ននេះកើនដល់ ៣ ពាន់តោន ក្នុងមួយថ្ងៃៗ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងពិធីប្រគល់សញ្ញាបត្រជូនដល់និស្សិតនៃសាកលវិទ្យាល័យឯកទេសនៃកម្ពុជា (CUS) សរុបចំនួន ៦,៧៦២នាក់ ក្នុងនោះនារី ២,៧៦១ នៅថ្ងៃទី១១ ខែធ្នូ ឆ្នាំ២០១៩នេះ បានបញ្ជាឱ្យលោក ឃួង ស្រេង អភិបាលក្រុងភ្នំពេញសម្របសម្រួល បែងចែកទីលានចាក់សំរាមឱ្យបានយ៉ាងហោចណាស់៤ទីតាំងតាមការស្នើសុំរបស់អ្នកជំនួញម្នាក់ ដើម្បីដឹកជញ្ជូនសម្រាមពីទីក្រុងភ្នំពេញឱ្យកាន់តែមានភាពងាយស្រួល។

សម្តេចតេជោថា “ មានអ្នកជំនួញម្នាក់ បានយកដីចំនួន៤កន្លែង សម្រាប់ធ្វើកន្លែងចាក់សំរាម ដោយដោះដូរជាមួយទីលានចាក់សំរាមពេលបច្ចុប្បន្ន”។ សម្តេចបន្តថា “ការកើនឡើងសំរាមច្រើនបែបនេះដោយសារតែប្រជាពលរដ្ឋខ្មែរមានរបស់ញាំច្រើន”។

សម្តេចបន្តថា “យើងគួរតែលេង ដែរ ព្រោះយើងបានបែងចែកតំបន់ ៤ ដើម្បីចាក់សំរាម កុំយកតែទៅចាក់នៅស្ទឹងមានជ័យ ។ ចឹងទេ យើងអោយគាត់ដី ៤ កន្លែងនៅខាងក្រៅក្រុងទៅ ហើយឱ្យគេដឹកសំរាមទៅចាក់នៅហ្នឹង ហើយដីគំនរសំរាមបច្ចុប្បន្ននេះ ប្រគល់ឱ្យគាត់ទៅ”។

សម្តេចតេជោបន្ថែមថា“អានោះអាច ១០០ ឬ ១០០ជាងហិកតា ព្រោះ ៤ កន្លែងវាច្រើនដែរ។ ចឹងអាចពិនិត្យមើលអាហ្នឹង ខ្ញុំកំពុងប្រាប់គាត់ដាក់សំណើរមកឱ្យខ្ញុំចាទៅអោយឯកឧត្តម អូន ព័ន្ធមុន្នីរ័ត្នដែលកំពុងតែ ធ្វើការសម្របសម្រួលចំពោះរឿងនេះ ព្រោះសុំសិទ្ធិចាក់ ២ ឆ្នាំ ទៀត អាកន្លែងហ្នឹង២ ឆ្នាំទៀត វានឹងអាចជាភ្នំសំរាម ។ ចឹងទេ ត្រូវបែងចែកអាតំបន់ចាក់ហ្នឹង” ។

សម្តេចបន្ថែមថា “ដឹកសំរាមពី ខាងពញ្ញាលឺ រួចកាត់ក្រុងភ្នំពេញទៅចាក់នៅគំនរសំរាមបឹងជើងឯក។ ចឹងទេ អាក្លិនសំរាមវារត់កាត់ក្រុងរហូត ចុះបើយើងមានតំបន់ ៤ នៅតាមជាយក្រុងវានឹងមានភាពងាយស្រួល” ។

សម្តេចតេជោ ហ៊ុន សែន ក៏បានអំពាវនាវដល់ប្រជាពលរដ្ឋកម្ពុជាដែលរស់នៅក្នុងទីក្រុងភ្នំពេញ ត្រូវវេចខ្ចប់សំរាមឱ្យបានត្រឹមត្រូវ ហើយសម្រាប់ថ្លៃសំរាមនៅក្នុងវិក័យបត្រនៅភ្លើងនឹងត្រូវដកចេញនៅក្នុងខែមករាឆ្នាំ ២០២០ ខាងមុខនេះ៕

សម្តេចតេជោចុះហត្ថលេខាបង្កើតធនាគារ SME ដែលមានទឹកប្រាក់១០០លានដុល្លារអាមេរិក

ដោយ វុត្ថា

ភ្នំពេញៈ សម្តេចតេជោ ហ៊ុន សែននាយករដ្ឋមន្ត្រីកម្ពុជា បានចុះហត្ថលេខាទំលាក់ថវិកាជាតិប្រមាណ ១០០លានដុល្លារអាមេរិក ក្នុងការបង្កើតធនាគារសហគ្រាសធុនតូច និងធម្យមដើម្បីលើកកម្ពស់សេដ្ឋកិច្ចជាតិ និងជួយសម្រួលដល់កសិករ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងពិធីប្រគល់សញ្ញាបត្រជូនដល់និស្សិត សាកលវិទ្យាល័យឯកទេសនៃកម្ពុជាសរុបចំនួន៦,៧៦២នាក់ ដែលធ្វើឡើងនៅមជ្ឍមណ្ឌលកោះពេជ្រ រាជធានីភ្នំពេញនៅថ្ងៃទី១១ ខែធ្នូ ឆ្នាំ២០១៩នេះថា ការចុះហត្ថលេខានេះ គឺដើម្បីលើកម្ពស់ជីវភាពអ្នក ដែលមានអាជីវកម្មធុនតូច និងធម្យម ជាពិសេសលើកស្ទួយកសិករកម្ពុជា។

សម្តចតេជោថា “បីឬ៤ ថ្ងៃនេះ ខ្ញុំក៏បានចុះហត្ថលេខាប្រមាណ ១០០ពាន់លានរៀល ស្មើ១០០លានដុល្លារអាមេរិក ដើម្បីបង្កើតធនាគារហគ្រាសធុនតូច និងមធ្យមដើម្បីជាផ្នែកមួយក្នុងជួយដល់សហគ្រាសធុនតូន និងធម្យមក្នុងការមានលទ្ធភាពទិញស្រូវអង្កររបស់ករសិករ”។ សម្តេចបន្តថា “ចឹងទេ យើងត្រូវតែមើលអោយឃើញ រាជរដ្ឋាភិបាលបានប្រឹងប្រែង តែបណ្តាញវិស័យឯកជនត្រូវតែចូលរួម ដើម្បីគាំទ្រដល់តម្លៃស្រូវរបស់កសិកររបស់យើង និងកសិផលដទៃទៀតរបស់ប្រជាជន” ។

សម្តេចតេជោបន្ថែមថា កាលពីកន្លងទៅរាជរដ្ឋាភិបាលកម្ពុជា បានផ្តល់ដើមទុនបន្ថែមចំនួន៥០លានដុល្លារអាមេរិក ដល់ធនាគារអភិវឌ្ឍន៍ជនបទ ដើម្បីប្រែក្លាយ “ធនាការអភិវឌ្ឍន៍ជនបទ” ទៅជា “ធនាគារអភិវឌ្ឍន៍ជនបទ និងកសិកម្ម” ដែលមានចំណាត់ថ្នាក់ជាធនាគារពាណិជ្ជ សម្រាប់បម្រើវិស័យកសិកម្ម ជាពិសេសប្រើប្រាស់សម្រាប់រក្សាស្ថិរភាពថ្លៃ និងប្រមូលទិញស្រូវពីកសិករ ហើយស្តុកទុក កិនកែច្នៃ និនាំចេញ។

លោក ឡាំ គឹមឡេង អគ្គនាយកនៃអគ្គនាយកដ្ឋានសហគ្រាសធុនតូចមធ្យម និងសិប្បកម្ម នៃក្រសួងឧស្សាហកម្ម និងសិប្បកម្ម ធ្លាប់បានសារព័ត៌មាននៅក្នុងស្រុកឱ្យដឹងថា មានឧបសគ្គ៣យ៉ាង ដែលសហគ្រាសធុនតូច និងធម្យមនៅកម្ពុជា (SMEs) មានការប្រឈម និងពិបាកទទួលបានឥណទានពីធនាគារ ដើម្បីយកទៅពង្រីកអាជីវកម្ម។

ទី១ SMEs ខ្លួនឯងមិនទាន់មានសមត្ថភាពទទួលបានឥណទាន ដោយសារតែមានលក្ខណៈជាគ្រួសារនៅឡើយ ដែលធ្វើតាមទម្លាប់តពីឪពុកម្តាយ ការគ្រប់គ្រងមិនទាន់មានលក្ខណៈស្តង់ដារ ការរៀបចំបញ្ជីរបាយការណ៍ហិរញ្ញវត្ថុនៅមានកម្រតិ ខ្វះខាតទ្រព្យធានា និងមិនមានផែនការអាជីវកម្មច្បាស់លាស់។

ទី២ ធនាគារ មានលក្ខខណ្ឌស្មុគស្មាញ សម្រាប់កំណត់ការផ្តល់ឥណទាន ដោយត្រូវពិនិត្យមើលឲ្យបានច្បាស់លាស់ថា តើនៅពេលផ្តល់ឥណទានដល់ SMEs អាចមានប្រាក់សងត្រឡប់ដល់ធនាគារវិញដែរទេ?។ ចំពោះអត្រាការប្រាក់វិញ អាចមានកម្រិតខ្ពស់ និងរយៈពេលនៃការស្នើសុំអាចមានរយៈពេលយូរ ដោយសារតែត្រូវពិនិត្យបច្ច័យច្រើន មុននឹងផ្តល់ឥណទាន និងទី៣ យន្តការដើម្បីអនុវត្តន៍ការគាំទ្រដល់ SMEs នៅមានកម្រិតនៅឡើយ ពីសំណាក់ក្រសួងស្ថាប័នពាក់ព័ន្ធ បើទោះរាជរដ្ឋាភិបាលមានគោលនយោបាយគ្រប់គ្រាន់រួចហើយក្តី។

លោក ឡាំ គឹមឡេងបានបន្តថា នៅកម្ពុជាមានសហគ្រាសធុនតូច និងមធ្យមចំនួន៥២ម៉ឺនមូលដ្ឋាន (សហគ្រាស) ចែកចេញជា៤ផ្អែក៖ទី១ ផ្នែកកសិកកម្មមាន ២១ភាគរយ នៃចំនួនសហគ្រាសទាំងអស់ ទី២៖ ផ្នែកឧស្សាហកម្ម ឬកម្មន្តសាល មាន៣០ភាគរយ ទី៣៖ ផ្នែកធុរកិច្ច ឬពាណិជ្ជកម្ម មាន៤៣ភាគរយ និងទី៤៖ ផ្នែកសេវាកម្ម និងទេសចរណ៍ ដែលមានប្រហែល៧ភាគរយ។ សហគ្រាសធុនតូច និងមធ្យមនេះបានផ្តល់ការងារជូនពលរដ្ឋខ្មែរពី៧០ទៅ ៧២ភាគរយនៃការងារដែលមាននៅកម្ពុជា ដែលស្មើនឹងប្រមាណ៣ ទៅ៣.៥លាននាក់៕

ឥណ្ឌានឹងក្លាយជាមហាអំណាចសេដ្ឋកិច្ចធំទី៣ជំនួសជប៉ុននៅទសវត្សរ៍ខាងមុខ

ដោយ Donald Lee

ភ្នំពេញៈ ការព្យាករណ៍ថ្មីរបស់វិទ្យាស្ថានស្រាវជ្រាវ ដែលមានមូលដ្ឋាននៅជប៉ុន បានឱ្យដឹងថា សេដ្ឋកិច្ចឥណ្ឌានឹងមានកំណើនធំលំដាប់ទី៣នៅក្នុងពិភពលោក ដែលនឹងទាញទម្លាក់់តំណែងប្រទេសជប៉ុន នៅលើពិភពលោកក្នុងរយៈពេល១០ឆ្នាំខាងមុខ។

របាយការណ៍របស់មជ្ឈមណ្ឌលស្រាវជ្រាវសេដ្ឋកិច្ចជប៉ុន (JCER) បានបញ្ជាក់ថា ការកើនឡើងរបស់ឥណ្ឌានឹងកើតឡើង ស្របពេលដែលចិនជំរុញកំណើន ប្រជាជនខ្ពស់ និងកំណើនសេដ្ឋកិច្ចឌីជីថល ដើម្បីបង្កើនកំណើនសេដ្ឋកិច្ចរបស់ខ្លួន។

របាយការណ៍របស់ JCER បានឱ្យដឹងថា “ផលិតផលក្នុងស្រុកសរុបរបស់ឥណ្ឌាដែលបច្ចុប្បន្នមានចំនួនពាក់កណ្តាល នៃប្រទេសជប៉ុនត្រូវបានរំពឹងថា នឹងឈានមុខជប៉ុនក្នុងឆ្នាំ២០២៩ និងឈានដល់១,៤ ដងក្នុងឆ្នាំ២០៣៥”។

មូលនិធិរូបិយវត្ថុអន្តរជាតិ (IMF) បានឱ្យដឹងថា សេដ្ឋកិច្ចរបស់ជប៉ុននឹងត្រូវជាប់គាំងនៅក្នុងឆ្នាំ២០២០ ខណៈសេដ្ឋកិច្ចខ្លួននៅតែបន្តកំណើនយឺតនៅចុងឆ្នាំនេះ។ IMF បានទម្លាក់ការព្យាករកំណើនរបស់ជប៉ុន ជាថ្មីម្តងទៀតនៅឆ្នាំនេះពី០,៩ភាគរយ មកនៅត្រឹម០,៨ ភាគរយ។

យោងតាមទិន្នន័យរបស់រដ្ឋាភិបាលជប៉ុន ប្រទេសដែលមានសេដ្ឋកិច្ចដ៏ធំបំផុតទី ៣ នៅលើពិភពលោកបានចាប់ផ្តើមធ្លាក់ចុះនៅក្នុងត្រីមាសទី៣ ដោយមានអត្រាកំណើនផលិតផលក្នុងស្រុកសរុប០,២ ភាគរយ។

លើសពីនេះទៀត សង្គ្រាមពាណិជ្ជកម្មជប៉ុន ជាមួយកូរ៉េខាងត្បូង ធ្វើឱ្យប្រជាជនកូរ៉េភាគច្រើនធ្វើពហិការមិនធ្វើអាជីវកម្ម និងសេវាកម្មរបស់ជប៉ុនទាំងអស់។ ទំនាក់ទំនងសេដ្ឋកិច្ចនយោបាយ និងវប្បធម៌រវាងប្រទេសយក្សសេដ្ឋកិច្ចអាស៊ីទាំងពីរ បានឈានដល់កម្រិតទាបជាប្រវត្តិសាស្ត្រ។

ប្រជាជនកូរ៉េខាងត្បូង បានធ្វើពហិការរាល់អ្វីៗទាំងអស់ ដែលផលិតនៅជប៉ុន ចាប់តាំងពីប្រទេសជប៉ុន បានដាក់កម្រិតលើការនាំចេញវត្ថុធាតុដើម ដែលត្រូវការនៅក្នុងខ្សែសង្វាក់ផ្គត់ផ្គង់ផលិតកម្មបច្ចេកវិទ្យារបស់កូរ៉េខាងត្បូង។

IMF បានណែនាំជប៉ុនឱ្យកាត់បន្ថយ ភាពតានតឹងពាណិជ្ជកម្មបច្ចុប្បន្ន ដើម្បីកាត់បន្ថយផលប៉ះពាល់អវិជ្ជមាន ដល់សេដ្ឋកិច្ចជប៉ុន ដែលធ្វើឱ្យប៉ះពាល់ដល់សង្វាក់តម្លៃសកលថែមទៀត។

IMF បានណែនាំថា “ភាពតានតឹងពាណិជ្ជកម្មសកល ដែលកំពុងបន្ត និងការកើនឡើងបន្ថែមទៀត អាចកាត់បន្ថយការនាំចេញ ការវិនិយោគ និងកំណើនសុទ្ធរបស់ជប៉ុន រួមទាំងផលប៉ះពាល់ដោយផ្ទាល់ និងប្រយោល តាមរយៈខ្សែសង្វាក់តម្លៃពិភពលោក និងការជះឥទ្ធិពលមិនល្អដល់វិស័យហិរញ្ញវត្ថុរបស់ជប៉ុន”។

ការកើនឡើងនៃការគាំពារនិយមជាសកល កំពុងធ្វើឱ្យស្ថានភាពពិភពលោកមានសភាពមិនធម្មតា និងកំពុងធ្វើឱ្យមានការធ្លាក់ចុះនៅក្នុងទីផ្សារពិភពលោក។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថាផលប៉ះពាល់នៃសង្គ្រាមពាណិជ្ជកម្មអាមេរិក និងចិន បានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏អស្ចារ្យកាលពី១០ឆ្នាំមុន៕