តើបុណ្យសមុទ្រនៅខេត្តកំពតលើកទី៨ មានអ្វីពិសេស?

ដោយៈ រ៉ាណេត

កំពតៈ ការប្រារព្វពិធីបុណ្យសមុទ្រប្រចាំឆ្នាំលើកទី៨ ជុំទី២នៃខេត្តកំពត ដែលនឹងធ្វើឡើងរយៈពេល៣ថ្ងៃ ចាប់ពីថ្ងៃទី២០-២២ខែធ្នូ ឆ្នាំ២០១៩ខាងមុខនេះ នឹងធ្វើឡើងក្រោមប្រធានបទ “ទីក្រុងស្អាត ឆ្នេរល្អ ទេសចរណ៍រុងរឿង” ជាមួយនឹងក្ដីរំពឹងទុកយ៉ាងជឿជាក់ថា អាចទទួលបានកំណើនភ្ញៀវទេសចរចូលរួមច្រើន និងបានផ្សព្វផ្សាយពីសក្ដានុពលទេសចរណ៍នៅកម្ពុជាយ៉ាងទូលាយ។

យោងតាមសេចក្ដីប្រកាសរបស់ក្រសួងទេសចរណ៍បានបង្ហាញថា ពិធីបុណ្យសមុទ្រលើកទី៨ ជុំទី២ ដែលខេត្តកំពតធ្វើជាម្ចាស់ផ្ទះ នឹងប្រារព្ធធ្វើក្រោមប្រធានបទ “ទីក្រុងស្អាត ឆ្នេរល្អ ទេសចរណ៍រុងរឿង” គឺក្នុងគោលបំណងអបអរសាទរឆ្នេរសមុទ្រកម្ពុជាជា សមាជិកក្លឹបឆ្នេរសមុទ្រដែលស្អាតជាងគេលើសាកលលោក ក៏ដូចជាជំរុញលើកតំលៃ និងផ្សព្វផ្សាយសក្តានុពលទេសចរណ៍ ពិសេសអេកូទេសចរណ៍នៅតំបន់ឆ្នេរសមុទ្រកម្ពុជា។

លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍កាលពីពេលថ្មីៗនេះថា គិតមកដល់ពេលនេះ ក្រោមការខិតខំពីសំណាក់មន្ត្រីជំនាញ និងគណៈកម្មការពាក់ព័ន្ធ ជាពិសេស រដ្ឋបាលខេត្ត ក្នុងការរៀបចំហេដ្ឋារចនាសម្ព័ន្ធ ក៏ដូចជាការរៀបចំតុបតែងលម្អរនៅក្នុងក្រុង និងទីធ្លាសម្រាប់ការប្រារព្វកម្មវិធី គឺយើងសម្រេចបានប្រមាណ៨០ភាគរយហើយ។

លោកបន្តទៀតថា បន្ទាប់បានរៀបចំពិធីបុណ្យសមុទ្រលើកទី១កាលពិពេលកន្លងទៅ ខេត្តកំពតទទួលបានភ្ញៀវទេសចរជាច្រើន រាប់ទាំងភ្ញៀវជាតិ និងភ្ញៀវអន្តរជាតិផងដែរ ដោយសារតែក្រៅពីមានភាពទាក់ទាញទៅលើធនធានធម្មជាតិ ជាពិសេសតំបន់សមុទ្រ គឺថ្នាក់ខេត្តបានរក្សានូវហេដ្ឋារចនាសម្ព័ន្ធ ដែលបានបន្សល់ទុកកាលពីជុំទី១ រួមផ្សំនឹងការបង្កើតផលិតផលទេសចរណ៍ថ្មីៗ។

លោកថោង ខុនបានបន្តថា “ខេត្តកំពតឆ្នាំនេះមានកន្លែងកម្សាន្តជាច្រើន ដែលក្រៅពីតំបន់តំបន់ឆ្នេរ តំបន់បូកគោ តំបន់ទឹកឈូ និងតំបន់ធម្មជាតិជាច្រើនទៀតនោះ គឺមានតំបន់ទេសចរណ៍ធម្មជាតិកែច្នៃ ជាច្រើនកន្លែងទៀត ដូចជាតំបន់ដូងទេ តំបន់ស្រែអំបិល តំបន់កំពង់ក្របៅ និងតំបន់ចំការម្រេចផងដែរ ដែលសុទ្ធតែជាគោលដៅទេសចរណ៍ទាំងអស់។

លោកបានបន្ថែមទៀតថា “ពិធីបុណ្យសមុទ្រឆ្នាំនេះ កាន់តែមានភាពកុះករជាងមុន ដោយសារតែក្រៅពីការរៀបចំកម្មវិធីកម្សាន្តជាច្រើន ដែលជាការរៀបចំរបស់ក្រសួង និងថ្នាក់ជាតិ ក៏មានការចូលរួមសម្ដែង និងកម្សាន្តពីសំណាក់អ្នកសិល្បៈមកពីប្រទេសជាមិត្តផងដែរ ដូចជាប្រទេសចិន វៀតណាម ថៃ ឥណ្ឌូនេស៊ី និងប្រទេសឥណ្ឌាជាដើម”។

ពិធីបុណ្យសមុទ្រលើកទី៨ ជុំទី២នៅខេត្តកំពត ឆ្នាំ២០១៩នេះ នឹងត្រូវបែងចែកជា៣សកម្មភាពសំខាន់ៗដូចជា ទី១ ការផ្សាយបន្តផ្ទាល់នូវការសម្តែងទស្សទីយភាពសិល្បៈ ការប្រគុំតន្ត្រី ដោយមានការចូលរួមពីសំណាក់ក្រុមសិល្បករ សិល្បការិនី តារាចំរៀងជាតិ និងអន្តរជាតិ និងការបាញ់កាំជ្រួចអបអរសាទរពិធីបុណ្យសមុទ្រលើកទី៨ ឆ្នាំ២០១៩។

ទី២ មហោស្រពម្ហូបអាហារខ្មែរ និងអន្តរជាតិ ស្រា និងភេសជ្ជៈ ព្រមទាំងការបង្ហាញផលិតផលទេសចរណ៍ និងគម្រោងអភិវឌ្ឍន៍ទេសចរណ៍របស់ខេត្តតាមតំបន់ឆ្នេរ និងការតាំងពិព័រណ៍ផលិតផលកសិទេសចរណ៍ និងផលិតផលក្នុងស្រុក និងទី៣ សកម្មភាពកីឡាលើទឹក និងកីឡាលើឆ្នេរខ្សាច់ និងមានការសម្តែងពីសំណាក់ក្រុមសិល្បករ សិល្បការិនី តារាចំរៀង និងកីឡាករ កីឡាការិនីជាតិ អន្តរជាតិ និងក្រុមហ៊ុនជាច្រើន៕

រដ្ឋាភិបាលផ្សព្វផ្សាយពីការកសាងមូលដ្ឋានគ្រឹះសម្រាប់អភិវឌ្ឍន៍ទីក្រុងប្រកបដោយនិរន្តរភាព វៃឆ្លាត

ដោយ វុត្ថា

ភ្នំពេញៈ រដ្ឋាភិបាលកម្ពុជា តាមរយៈអគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព សហការជាមួយក្រុមហ៊ុន Dynamic Technologies និងក្រុមហ៊ុន Urbanetic រៀបចំសិក្ខាស្តីពី ការកសាងមូលដ្ឋានគ្រឹះសម្រាប់អភិវឌ្ឍន៍ទីក្រុង ប្រកបដោយនិរន្តរភាពវៃឆ្លាត និងគួរឱ្យចង់រស់នៅសម្រាប់ថ្ងៃអនាគត។

រដ្ឋលេខាធិការក្រសួងបរិស្ថានលោក សូ ខនឬទ្ធីគុណបានមានប្រសាសន៍ក្នុងសិក្ខាសាលាកាលពីថ្ងៃទី១៩ ខែវិច្ឆិកា ឆ្នាំ២០១៩កន្លងមកថា ក្រសួងបរិស្ថាន ក៏ដូចជាក្រុមប្រឹក្សាជាតិអភិវឌ្ឍន៍ដោយចីរភាព សហការជាមួយសួងស្ថាប័ន អង្គការដៃគូអភិវឌ្ឍន៍ អង្គការសង្គមស៊ីវិល និងវិស័យឯកជន ក្នុងការរៀបចំ និងដាក់ឱ្យប្រើប្រាស់ជាផ្លូវការនូវគោលនយោបាយ ផែនការយុទ្ធសាស្រ្ត និងផែនទីបង្ហាញផ្លូវស្តីពីការអភិវឌ្ឍន៍បៃតង ព្រមទាំងវិធីសាស្រ្តរៀបចំផែនការយុទ្ធសាស្រ្តទីក្រុងបៃតង និងផែនការអភិវឌ្ឍន៍ទីក្រុងនិរន្តរភាពសម្រាប់រាជធានីភ្នំពេញឆ្នាំ២០១៨-២០៣០ ដើម្បីជំរុញការអភិវឌ្ឍដោយចីរភាពរបស់កម្ពុជា ជាពិសេសដើម្បីលើកកម្ពស់ការអភិវឌ្ឍទីក្រុង ទីប្រជុំជនប្រកបដោយនិរន្តរភាព។

លោកបន្តថា “ទីក្រុងជាកម្លាំងម៉ាស៊ីននៃកំណើនសេដ្ឋកិច្ចជាតិ ពីព្រោះថាទីក្រុងជាមជ្ឈមណ្ឌលនៃការប្រើប្រាស់ធនធានដ៏ច្រើន ក្នុងនោះរួមមានធនធានថាមពល ទឹក និងធនធានធម្មជាតិផ្សេងៗទៀត ត្រូវបានប្រើប្រាស់ច្រើនក្នុងវិស័យឧស្សាហកម្ម និងសម្រាប់ការរស់នៅក្នុងទីក្រុង”។

រដ្ឋលេខាធិការរូបនេះបញ្ជាក់ថា សិក្ខាសាលានេះ សង្កត់ធ្ងន់ទៅលើចំនុចសំខាន់ៗ ចំនួន៣ដូចជា ទី១ ការធ្វើអោយប្រសើរឡើងនូវផែនការទីក្រុង និងការអនុវត្តឧបករណ៍វិទ្យាសាស្រ្តសម្រាប់ការអភិវឌ្ឍដោយចិរភាព និងបរិស្ថានសំណង់បៃតង ដើម្បីសម្រេចនូវចក្ខុវិស័យរបស់ទីក្រុងទីប្រជុំជន ក្របខណ្ឌច្បាប់ និងបទបញ្ញត្តិសមស្រប ការធ្វើផែនការទីក្រុងដែលមានហេដ្ឋារចនាស្រាប់សម្ព័ន្ធ និងការពង្រឹងសមត្ថភាពបច្ចេកទេស។

ទី២ ការវិនិយោគលើហេដ្ឋារចនាសម្ព័ន្ធក្រុង ប្រកបដោយនិរន្តរភាព ដើម្បីបំពេញតម្រូវការជាមូលដ្ឋានរបស់ទីក្រុង និងលើកកម្ពស់សុខមាលភាព ការប្រគួតប្រជែង ផែនការវិនិយោគតាមវិស័យ និងការរៀបចំផែនការមេទីក្រុងប្រកបដោយបរិយាប័ន្ន។

ទី៣ ធានាឱ្យបាននូវនគនរូបនីយកម្ម ប្រកបដោយបរិយាប័ន្ន ទីប្រជុំជនវិសមភាពគំរាមគំហែងដល់និរន្តភាពនៃការអភិវឌ្ឍ និងសង្គម។ ចក្ចុវិស័យនៃការបរិយាប័ន្នដោយមានរាប់បញ្ជូលនូវសេដ្ឋកិច្ច ការពង្រីកទីក្រុង និងបរិយាប័ន្នសង្គមនឹងរួមចំណែកការពារហានិភ័យផ្សេងៗ នៃការរៀបចំ និងការអភិវឌ្ឍទីក្រុងទីប្រជុំជន។

សិក្ខាសាលាស្ដីពី “ការកសាងមូលដ្ឋានគ្រឹះ សម្រាប់អភិវឌ្ឍន៍ទីក្រុងប្រកបដោយនិរន្តរភាព វៃឆ្លាត និងគួរឱ្យចង់រស់នៅសម្រាប់ថ្ងៃអនាគត” គឺជាសក្ខីភាពបញ្ជាក់នូវស្មារតីឯកភាពគ្នាលើភាពចាំបាច់ ក្នុងការបន្តការធ្វើទំនើបកម្មស្ថាប័ន និងការធ្វើកំណែទម្រង់ក្នុងវិស័យបរិស្ថាន និងធនធានធម្មជាតិបន្ថែមទៀត ពិសេសគឺការកសាងសមត្ថភាពមន្ត្រីរាជការ៕

ចំណេះដឹង! តើគោលនយោបាយសម្បទានដីកសិកម្មត្រូវបានអនុវត្តន៍ដូចម្តេច?

ដោយ វុត្ថា

ភ្នំពេញៈ គោលនយោបាយរបស់រាជរដ្ឋាភិបាល អំពីសម្បទានដីកសិកម្ម គឺត្រូវអនុលោមទៅតាមច្បាប់ភូមិបាលដែលចែងថា ដីសម្រាប់អាជីវកម្មអតិថិផល មិនអាចមានទំហំលើសពី ១០,០០០ ហិចតាទេ។

សម្បទានដែលសំរេចហើយលើសពីទំហំកំណត់នេះ ជាកម្មវត្ថុនៃការកាត់បន្ថយ។ សម្បទានិកមិនអាចធ្វើការផ្ទេរសិទ្ធិលើដីសម្បទានបានទេ។ រីឯដីសម្បទានដែលមិនបានធ្វើអាជីវកម្ម ក្នុងរយៈពេល១២ខែបន្ទាប់ពីបានអនុញ្ញាតិនឹងត្រូវលុបចោល។

ច្បាប់ភូមិបាលតម្រូវឱ្យរៀបចំអនុក្រឹត្យស្តីពី និតិវិធីនៃការផ្តល់សម្បទាន និងការកាត់បន្ថយសម្បទានកន្លងមក ដែលមានទំហំលើសពី ១០.០០០ហិកតា។ គោលនយោបាយនេះ ត្រូវអនុវត្តន៍ដោយប្រុងប្រយ័ត្ន និងច្បាស់លាស់ ដោយសហការជាមួយក្រុមប្រឹក្សាអភិវឌ្ឍន៍កម្ពុជា ដើម្បីជៀសវាងការបាត់ជំនឿទុកចិត្តពីសំណាក់អ្នកវិនិយោគ។

គោលនយោបាយ និងនីតិវិធីជាក់លាក់ សម្រាប់ណែនាំការផ្តល់សម្បទានគោលដៅសេដ្ឋកិច្ច និងការកាត់បន្ថយទំហំសម្បទានដែលមានស្រាប់ នឹងត្រូវកំណត់ក្នុងអនុក្រឹត្យ។ សេចក្តីស្នើគោលនយោបាយនេះ ជាប់ពាក់ព័ន្ធនឹងការបង្កើតប្លង់គោល ដើម្បីណែនាំដល់ការផ្តល់សម្បទានកសិកម្ម និងការហាមឃាត់លើការផ្តល់សម្បទាននៅតំបន់មួយចំនួន។

ផែនការនេះ ត្រូវសម្របសម្រួល ទៅក្នុងផែនការប្រើប្រាស់ដីរបស់ខេត្ត ក្រុង និងមូលដ្ឋាន ហើយត្រូវសមស្របនឹងគោលការណ៍ជាមូលដ្ឋាននៃការកម្ម អំពីចំនួនសម្បទាន អំពីគោលបំណងទំហំនឹងទីតាំង៕

អានបន្ថែម៖ ចំណេះដឹង! តើចំណុចសំខាន់ៗអ្វីខ្លះនៃគោលនយោបាយលើការដោះស្រាយវិវាទដីធ្លី?

សឹង្ហបូរី ហុងកុង និងតៃវ៉ាន់ឈរលំដាប់កំពូលទាំង២០ ក្នុងចំណាត់ថ្នាក់កម្លាំងពលកម្មជំនាញលើពិភពលោក

ដោយ Donald Lee

ភ្នំពេញៈ ការស្ទង់មតិប្រចាំឆ្នាំ ការទាក់ទាញបរទេស និងការរក្សាកម្លាំងពលកម្មជំនាញរបស់ប្រទេសនានាបានចាត់ចំណាត់ថ្នាក់ប្រទេស និងតំបន់អាស៊ីប៉ាស៊ីហ្វិកចំនួន ៣ ក្នុងចំណោមប្រទេសទាំង២០នៅលើដំលាប់កំពូលតារាង។

សឹង្ហបូរីក្លាយជាប្រទេសអាស៊ីតែមួយគត់ ដែលជាប់ចំណាត់ថ្នាក់កំពូលទាំង១០ នៅក្នុងបញ្ជី ដែលត្រូវបានចងក្រង ដោយសាលាធុរកិច្ចមានមូលដ្ឋាននៅប្រទេសស្វីស IMD។ ប្រព័ន្ធអប់រំដែលមានការអភិវឌ្ឍខ្ពស់របស់សឹង្ហបូរី បានបង្កើនពិន្ទុរបស់ខ្លួនគ្រប់គ្រាន់ ដើម្បីយកឈ្នះប្រទេសអាឡឺម៉ង់នៅក្នុងចំណាត់ថ្នាក់។

របាយការណ៍របស់ IMD បានឱ្យដឹងថា “សឹង្ហបូរីបានជាប់ចំណាត់ថ្នាក់កំពូលទាំង ១០ ដែលឈានមុខគេក្នុងការត្រៀមខ្លួន និងការធ្វើឲ្យប្រសើរឡើងនូវការវិនិយោគ និងការអភិវឌ្ឍ។ ការកើនឡើងរបស់សឹង្ហបូរីដល់លទ្ធផលទាំង១០ ជាចម្បងពីការអនុវត្តរបស់ខ្លួន នៅក្នុងវិធានការនៃការត្រៀមខ្លួនរួមមានការវាយតម្លៃការអប់រំ ទី១ ភាគរយនៃនិស្សិតបញ្ចប់ការសិក្សាផ្នែកវិទ្យាសាស្ត្រ ទី២ ប្រសិទ្ធភាពនៃការអប់រំបឋម និងមធ្យមសិក្សា និងទី៣ និងការប្រមួលផ្តុំរបស់និស្សិត”។

ប្រទេសស្វីសត្រូវបានជាប់ចំណាត់ថ្នាក់ ជាប្រទេសកំពូលនៅក្នុងចំណាត់ថ្នាក់ទេពកោសល្យពិភពលោកនេះ។

ចំណាត់ថ្នាក់ IMD បានវាស់វែងការវិនិយោគ និងការអភិវឌ្ឍរបស់ប្រទេសក្នុងភាពប៉ិនប្រសប់តាមរយៈកម្មវិធីអប់រំ និងការបង្រៀនកូន និងកត្តាជីវិតដែលមានគុណភាពផ្សេងទៀត ដែលអាចជំរុញឱ្យមានការរក្សាបាននូវទេពកោសល្យ និងការទាក់ទាញទេពកោសល្យបរទេសនៅបរទេស។

របាយការណ៍បានឱ្យដឹងថា “ដើម្បីវាយតម្លៃប្រទេសចំនួន៦៣ ដែលយើងសិក្សានោះចំណាត់ថ្នាក់ IMD World Talent Rankings វាយតម្លៃកត្តា៣យ៉ាង។ កត្តាវិនិយោគ និងអភិវឌ្ឍន៍វាស់វែងនូវធនធាន ដែលបានប្តេជ្ញាចិត្ត ដើម្បីបង្កើនដើមទុនមនុស្សដែលដាំដុះនៅផ្ទះ។

កត្តាវាយតម្លៃពីវិសាលភាព ដែលប្រទេសមួយទាក់ទាញទេពកោសល្យក្នុងស្រុក និងបរទេស។ កត្តាត្រៀមខ្លួនកំណត់គុណភាពនៃជំនាញ និងសមត្ថភាពដែលមាននៅក្នុងប្រទេសមួយ”៕

រដ្ឋាភិបាលនឹងធ្វើសន្និសីទសារព័ត៌មានស្ដីពី “កិច្ចព្រមព្រៀងពាណិជ្ជកម្មសេរីរវាងកម្ពុជា-ចិន” នៅចុងសប្តាហ៍នេះ

ដោយ វុត្ថា

ភ្នំពេញៈ រដ្ឋាភិបាលកម្ពុជា តាមរយៈអង្គភាពអ្នកនាំពាក្យរាជរដ្ឋាភិបាល នឹងរៀបចំសន្និសីទសារព័ត៌មាន ស្ដីពី”កិច្ចព្រមព្រៀងពាណិជ្ជកម្មសេរីរវាងកម្ពុជា-ចិន” នៅថ្ងៃព្រហស្បត្តិ៍ ទី២១ ខែវិច្ឆិកា ឆ្នាំ២០១៩ នេះ។

យោងតាមសេចក្តីជូនដំណឹងរបស់អង្គភាពអ្នកនាំពាក្យ នៃរាជរដ្ឋាភិបាលកម្ពុជា បានឱ្យដឹងនៅថ្ងៃទី១៩ ខែវិច្ឆិកា ឆ្នាំ ២០១៩ នេះ បានឱ្យដឹងថា សន្និសីទនេះ គឺមានទិសដៅ និងគោលបំណងពង្រឹងការយល់ដឹងដល់សាធារណៈជន ពីការប្រឹងប្រែងរបស់ក្រសួងពាណិជ្ជកម្មនៅក្នុងវិស័យពាណិជ្ជកម្មរវាងកម្ពុជា-ចិន។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាកាលពីពេលថ្មីៗនេះបានមានប្រសាសន៍ថា កម្ពុជានឹងបើកកិច្ចចរចាធ្វើកិច្ចព្រមព្រៀងពាណិជ្ជកម្មសេរីជាមួយចិន នៅថ្ងៃទី៤ ខែធ្នូ ឆ្នាំ២០១៩ខាងមុខនេះ ហើយនឹងបញ្ចប់ក្នុងរយៈពេលខ្លី។

សម្តេចតេជោថា “ការធ្វើពាណិជ្ជកម្មសេរីជាមួយចិននេះ នឹងធ្វើឲ្យពាណិជ្ជកម្មរបស់កម្ពុជាកាន់តែប្រសើរ ហើយការរកស៊ីជាមួយចិននេះ មិនមែនមានតែកម្ពុជាឡើយ សូម្បីអាមេរិក ក៏រកស៊ីជាមួយចិនដែរ”។

ស្ថានទូតចិនប្រចាំនៅកម្ពុជាបានឱ្យដឹងកាលពីកន្លងមកថា ដើម្បីសម្រេចឈានដល់កុងសុងស៊ីសចម្បង នៃថ្នាក់ដឹកនាំកំពូលរវាងចិន និងកម្ពុជា ភាគីទាំងពីរនឹងរៀបចំកិច្ចពិភាក្សាផ្លូវការលើកដំបូងស្តីអំ ពីការសិក្សាស្រាវជ្រាវលទ្ធភាព កិច្ចព្រមព្រៀងពាណិជ្ជកម្មសេរីរវាងភាគីចិន និងកម្ពុជា ក្នុងរដ្ឋធានីប៉េកាំង ថ្ងៃទី៣ ខែធ្នូ នាពេលខាងមុខនេះ។

ប្រភពដដែលបន្តថា នេះជាការរៀបចំដ៏ពិសេសមួយនៃភាគីចិន ដោយផ្អែកលើទំនាក់ទំនងមិត្តភាពរវាងចិន និងកម្ពុជា។ ពេលមុននេះ ថ្នាក់ប្រតិបត្តិការងារនៃស្ថាប័នពាណិជ្ជកម្មរវាងភាគីចិន និងកម្ពុជាបានបង្កើតយន្តការទំនាក់ទំនងរួចជាស្រេច ដើម្បីជម្រុញកិច្ចការ ដែលពាក់ព័ន្ធឲ្យមានទំនាក់ទំនងយ៉ាងជិតស្និទ្ធល្អ៕

សម្ដេចក្រឡាហោម ស ខេងជំរុញឱ្យអន្តរក្រសួងយកចិត្តទុកដាក់អភិវឌ្ឍតំបន់អេកូទេសចរណ៍ និងសហគមន៍

ដោយយៈ រ៉ាណេត

ភ្នំពេញៈ សម្តេចក្រឡាហោម ស ខេង បានជំរុញឱ្យអន្តរក្រសួងដែលពាក់ព័ន្ធ គណអភិបាលខេត្ត ក្រុង រាជធានី ជាពិសេសក្រសួងទេសចរណ៍ ដែលជាប្រធានក្រុមការងារអន្តរក្រសួង ត្រូវពង្រឹកការយកចិត្តទុកដាក់ក្នុងកិច្ចថែរក្សា អភិរក្ស និងអភិវឌ្ឍតំបន់អេកូទេសចរណ៍ និងសហគមន៍ឱ្យមានប្រសិទ្ធភាពខ្ពស់បំផុត។

មានប្រសាសន៍ក្នុងពិធីបើកវេទិកាជាតិអេកូទេសចរណ៍លើកទី១ កាលពីព្រឹកថ្ងៃទី១៩ ខែវិច្ឆិកា ឆ្នាំ២០១៩នេះ នៅសណ្ឋាគារ ហ្គាដិនស៊ីធី សម្ដេចក្រឡាហោម ស ខេង បានមានប្រសាសន៍ថា បច្ចុប្បន្ននេះសហគមន៍ ស្ថិតនៅក្រោមការគ្រប់គ្រងរបស់ក្រសួងទេសចរណ៍ ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ មានរហូតដល់ជាង ២,៣០០កន្លែង ប៉ុន្តែសហគមន៍ដែលមានសកម្មភាពទេសចរណ៍ និងអេកូទេសចរណ៍ មានចំនួនត្រឹមតែប្រមាណ១២៩ កន្លែងប៉ុណ្ណោះ។

សម្តេចបានគាំទ្រ និងស្នើឲ្យមានការបញ្ចូលសកម្មភាពទេសចរណ៍ និងអេកូទេសចរណ៍ទៅក្នុងសហគមន៍ ដែលមានសក្តានុពល ក៏ដូចជាពង្រឹងសមត្ថភាពសហគមន៍ដែលមានស្រាប់ តាមរយៈការបង្កលក្ខណៈងាយស្រួល ក្នុងការជំរុញការអភិវឌ្ឍសហគមន៍ទាំងនោះ ដោយក្រសួង-ស្ថាប័នពាក់ព័ន្ធ និងគណៈអភិបាលរាជធានី-ខេត្ត ត្រូវជួយសហគមន៍ទាំងនោះទៅតាមជំនាញ និងសមត្ថកិច្ចរៀងៗខ្លួន។

ក្រសួងទេសចរណ៍ ក្នុងនាមជាប្រធានក្រុមការងារអន្តរក្រសួង ត្រូវធ្វើការទទួល ស្គាល់តាមផ្លូវច្បាប់ ចំពោះសហគមន៍ដែលមានសកម្មភាពទេសចរណ៍ និងអេកូទេសចរណ៍ និងត្រូវធានាការបែងចែក ប្រកបដោយសមធម៌រវាងសហគមន៍ និងដៃគូពាក់ព័ន្ធនានា។

សម្តេចក្រឡាហោម ស ខេង បានបន្ថែមថា ចំពោះការងារអភិវឌ្ឍន៍ហេដ្ឋារចនាសម្ព័ន្ធ និងសម្បទាទ្រទ្រង់ ក្រសួងទេសចរណ៍ ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ ត្រូវសហការជាមួយក្រសួងសាធារណៈការ និងដឹកជញ្ជូន និងក្រសួងអភិវឌ្ឍន៍ជនបទ និងគណៈអភិបាលរាជធានី-ខេត្ត ពិនិត្យលទ្ធភាពក្នុងការសាងសង់ផ្លូវភ្ជាប់ទៅគោលដៅសហគមន៍ទេសចរណ៍អាទិភាព។ ជាមួយគ្នានោះ ក្រសួងរ៉ែ និងថាមពល និងអាជ្ញាធរអគ្គិសនីកម្ពុជា ត្រូវធ្វើការសិក្សាលម្អិតអំពីលទ្ធភាព ក្នុងការផ្គត់ផ្គង់អគ្គិសនីក្នុងតម្លៃទាបជាងទីផ្សារសម្រាប់ការប្រើប្រាស់ក្នុងសហគមន៍។

ក្នុងក្របខណ្ឌនៃក្រុមការងារអន្តរក្រសួង ដែលមានក្រសួងទេសចរណ៍ជាប្រធាន សម្រាប់ការគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ ក្រសួងទេសចរណ៍ ត្រូវសហការជាមួយក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ និងក្រសួង-ស្ថាប័នពាក់ព័ន្ធ ធ្វើការកំណត់តំបន់អេកូទេសចរណ៍អាទិភាព រួមមានតំបន់ភូមិភាគឥសាន្ត តំបន់បឹងទន្លេសាប និងទន្លេមេគង្គ តំបន់ឆ្នេរសមុទ្រ តំបន់ជួរភ្នំក្រវ៉ាញ តំបន់ជួរភ្នំដងរែក រួមជាមួយតំបន់អភិរក្សនានា ដែលត្រូវធានាកិច្ចការពារធនធានធម្មជាតិ និងជំរុញការអភិវឌ្ឍសកម្មភាពទេសចរណ៍ និងសហគមន៍នៅទីនោះ ក្រោមទស្សនទាន «ការអភិវឌ្ឍបម្រើការអភិរក្ស ការអភិរក្សទ្រទ្រង់ការអភិវឌ្ឍ»៕

មជ្ឈមណ្ឌលពាណិជ្ជកម្មលំដាប់អន្តរជាតិកំពស់ចាប់ពី ២០០ម៉ែត្រឡើងចំនួន១០ បាននិងកំពុងសាងសង់នៅភ្នំពេញ

ដោយ វុត្ថា

ភ្នំពេញៈ មជ្ឈមណ្ឌលពាណិជ្ជកម្ម និងលំនៅដ្ឋានប្រណីតស្តង់ដាអន្តរជាតិចំនួន៨ ដែលមានកំពស់ចាប់ពី២០០ម៉ែត្រឡើង បាននិងកំពុងសាងសាង់យ៉ាងសកម្ម និងត្រៀមផ្លាស់ប្តូរមុខមាត់រាជធានីភ្នំពេញខាងមុខនេះ។

១) អគារពាណិជ្ជកម្មចម្រុះ The Peak

The Peak ជាអគារពាណិជ្ជកម្ម ដែលខ្ពស់ជាងគេចំនួន៣ នៅតំបន់ដ៏ទាក់ទាញនៃក្រុងភ្នំពេញ ដែលមានកម្ពស់៥៥ជាន់ស្មើនឹង២១៨ម៉ែត្រ ។ គំរោងនេះកំពុងសាងសង់់នៅក្បែរស្ពាននាគកោះពេជ្រ ជាមួយនឹងទុនវិនិយោគ៥៨០លានដុលា្លរ បានចាប់បុកគ្រឹះបើកការដ្ឋានសាងសង់ហើយ នៅថ្ងៃទី៣ ខែឧសភា ឆ្នាំ២០១៦នេះ។

មជ្ឈមណ្ឌលពាណិជ្ជកម្មកម្ពស់៥៥ជាន់ដ៏ប្រណីតនេះ នឹងរួមបញ្ចូលនូវសណ្ឋាគារ The Shangri-La Hotel ដែលប្រកបដោយកិត្យានុភាព ក្នុងពិភពលោកជាយូរណាស់មកហើយ ឥឡូវបានចាប់ផ្ដើមសាងសង់ក្នុងទឹកកម្ពុជា ដែលគម្រោងនេះ មានចំណុះសរុប ចំនួនប្រមាណ១០១៤ Unite។ គំរោងនេះ ត្រូវបានវិនិយោគដោយក្រុមហ៊ុន World Bridge Land Group។

២) អគារ Morgan Tower

អាគារ Morgan Tower បោះទុនវិនិយោគប្រមាណ១៦០លានដុល្លារអាមេរិក ក្នុងការសាងសង់អគារដែលមានឈ្មោះថា Morgan Tower ដែលមានកម្ពស់រហូតដល់ទៅ២១០ ម៉ែត្រ ដែលស្មើទៅនឹង៤៦ជាន់។

អគារ Morgan Tower បាននឹងកំពុងសាងសង់ឡើង ដោយប្រើបច្ចេកវិទ្យាទំនើបដែលអាចសន្សំសំចៃថាមពលអគ្គសនី ដែលស្ថិតនៅក្នុងទីក្រុងកោះពេជ្រ វិនិយោគដោយ ក្រុមហ៊ុន Morgan Group ។ គំរោងនេះ ស្ថិតក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។

៣) គំរោងខុនដូនិងមជ្ឈមណ្ឌលពាណិជ្ជកម្ម CITY KEY

គំរោងនេះមានឈ្មោះ CITY KEY មានចំនួន៥២ជាន់ និងកំពស់២០៨ម៉ែត្រ ជាគំរោងខុនដូ និងមជ្ឈមណ្ឌលពាណិជ្ជកម្មថ្មីមួយ ដែលបាននិងកំពុងសាងសដងដែលវិនិយោគដោយក្រុមហ៊ុនមកពីប្រទេសចិន។

គំរោងដ៏ធំនេះ ស្ថិតនៅក្រោយអាគារ Bali Scenary និងអាគារ The Bridge ដែលស្ថិតក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។

៤) អាគារមេនៃគំរោង Olympia

មជ្ឈមណ្ឌលពាណិជ្ជកម្ម Olympia Tower មានអាគារមេកំពស់២១៣ម៉ែត្រ និងមានកំពស់សរុប៥៥ជាន់ ដែលមជ្ឈមណ្ឌលពាណិជ្ជកម្ម និងលំនៅដ្ឋានដ៏ធំកណ្តាលក្រុងភ្នំពេញនេះ ត្រូវបានវិនិយោគដោយក្រុមហ៊ុន OCIC។

៥) អគារ R &F Glory

អាគារលំនៅដ្ឋាន និងមជ្ឈមណ្ឌលពាណិជ្ជកម្មដ៏ធំមួយទៀត គឺគម្រោងអគារ R&F Glory ជាគម្រោងដ៏ធំមួយនៅភ្នំពេញ និងជាការអភិវឌ្ឍរបស់ក្រុមហ៊ុនអ & អេហ្វ គ្រុបកាលពីនៅឆ្នាំ២០១៨។ គម្រោង អគារ R&F Glory សាងសង់លើផ្ទៃដីប្រហែល១៥,០០០ ម៉ែត្រការ៉េ និងមានទំហំផ្ទៃក្រឡាសំណង់សរុប២១២,៩៨៧.១៥ ម៉ែត្រការ៉េ។

គម្រោងមានមានទីតាំងស្ថិតនៅប៉ែកខាងត្បូង នៃមហាវិថីព្រះមុន្នីវង្សជិតផ្លូវសម្តេច ហ៊ុន សែននិងផ្លូវ២១៧។ គម្រោង អគារ R&F Glory ក្លាយនឹងជាអគារលំនៅដ្ឋានខ្ពស់បំផុតមួយ ដំបូងគេនៅរាជធានីភ្នំពេញ ដែលមាន២០៧ម៉ែត្រ និង៥៨ជាន់។

៦) គំរោង Gold Tower 42

គំរោងនេះកំពុងសាងសង់ជិតបញ្ចប់ហើយ និងគ្រោងបញ្ចប់នៅចុងឆ្នាំនេះ។ វាជាគម្រោងដែលវិនិយោគដោយក្រុមហ៊ុនYUNWOO Cambodia ដែលដំបូងឡើយមានកំពស់ត្រឹម៤២ជាន់ ប៉ុន្តែក្រោយពេលសាងសង់ឡើងវិញ បន្ទាប់ពីផ្អាកការសាងសង់រយៈពេលជាង១០ឆ្នាំ គំរោងនេះត្រូវបានដដំឡើងដល់កំពស់៤៧ជាន់ ស្មើនឹងកំពស់សរុប២១១ម៉ែត្រ។

វាជាមជ្ឈមណ្ឌលពាណិជ្ជកម្មចម្រុះ រួមមានផ្សារទំនើប ខុនដូ ការិយាល័យ មន្ទីរពេទ្យជាដើម។

៧) អាគារ Prince Financial Tower

មជ្ឈមណ្ឌលពាណិជ្ជកម្មនេះ កំពុងសាងសង់លើផ្លូវភ្លោះក្រមួន “ស” (ផ្លូវភ្លោះកាណាឌីយ៉ា) ដែលជាអាគារភ្លោះមានកំពស់៤៧ជាន់ ស្មើនឹងកំពស់២០៣ម៉ែត្រ។ គំរោងនេះកំពុងសាងសង់់ និងវិនិយោគដោយក្រុមហ៊ុនអចលនទ្រព្យយក្ស Prince Real Estate Group។

៨) មជ្ឈមណ្ឌលពាណិជ្ជកម្ម One Central Tower

គម្រោងនៃមជ្ឈមណ្ឌលពាណិជ្ជកម្មនេះ ជាគំរោងដែលខ្ពស់ជាងគេនៅក្បែរផ្លូវជាតិលេខ១ នាពេលបច្ចុប្បន្ននេះ គំរោងនេះនឹងប្រើប្រាស់ចម្រុះសំរាប់មជ្ឈមណ្ឌលពាណិជ្ជកម្ម និងលំនៅដ្ឋានប្រណីត។ គម្រោងនេះមានចំនួន៤អាគារ ស្មើនឹង៣៨ជាន់ និងមានកំពស់២០០ម៉ែត្រ។

គំរោងនេះបានចាប់ផ្តើមសាងសង់កាលពីពេលថ្មីៗនេះ ស្ថិតនៅក្បែរផ្សារសហគមន៍ The Park ស្ថិតនៅក្នុងសង្កាត់និរោធ ខ័ណ្ឌច្បារអំពៅ រាជធានីភ្នំពេញ។

៩) មជ្ឈមណ្ឌលពាណិជ្ជកម្ម MESONG

មជ្ឈមណ្ឌលលំនៅដ្ឋានលំដាប់ពិភពលោកថ្មីមួយទៀត ឈ្មោះ MESONG កំពស់៧១ជាន់ ស្មើនឹងកំពស់២៥២ម៉ែត្រ បាននិងកំពុងវិនិយោគដោយក្រុមហ៊ុន Wonder Prime One ដែលមានមូលដ្ឋាននៅទីក្រុងហុងកុង។

អាគារកប់ពពកនេះ ជាគំរោងអភិវឌ្ឍន៍ចម្រុះរួមមាន ផ្សារទំនើប ភោជនីយដ្ឋាន និង លំនៅដ្ឋានបែបសហកម្មសិទ្ឋសរុប១២៧០យូនីត។ គំរោងនេះ ស្ថិតនៅក្បែរនឹងស្ពាននាគទីក្រុងកោះពេជ្រ និងគ្រោងបញ្ចប់នៅចុងឆ្នាំ២០២២។

១០) មជ្ឈមណ្ឌលពាណិជ្ជកម្មលំដាប់ពិភពលោក Thai Boon Roong Twin Tower

មជ្ឈមណ្ឌលពាណិជ្ជកម្មភ្លោះលំដាប់ពិភពលោក និងជាអាគារភ្លោះខ្ពស់ជាងគេនៅលើពិភពលោក បាននិងកំពុងដំណើរការសាងសង់ ដោយក្រុមហ៊ុន Thai Boon Roong និងសហការវិនិយោគដោយក្រុមហ៊ុនយក្សមកពីប្រទេសចិន។

គំរោងនេះមានចំនួន១៣៣ជាន់ ស្មើនឹងកំពស់ ៥៨៧ម៉ែត្រ ដោយមិនទាន់រួមបញ្ចូលនូវអង់តែននៅឡើយទេ។ មជ្ឈមណ្ឌលពាណិជ្ជកម្មលំដាប់ពិភពលោកនេះ ដំបូងឡើយគ្រោងចំណាយទុន ៣០០០លានដុល្លារអាមេរិក ប៉ុន្តែក្រោយមកបង្កើនដល់៦០០០លានដុល្លារអាមេរិក។

មជ្ឈមណ្ឌលពាណិជ្ជកម្មនេះ មិនត្រឹមមានអាគារភ្លោះនោះទេ តែក៏មានអាគារកប់ពពកកំពស់៤៥ជាន់ចំនួន៤អាគារបន្ថែមទៀត ដែលនឹងធ្វើឲ្យគំរោងនេះក្លាយជាមជ្ឈមណ្ឌលពាណិជ្ជកម្មចម្រុះធំជាងគេ នៅតំបន់អាស៊ានក្រោយពេលសាងសង់បញ្ចប់៕

ក្រុមហ៊ុនថៃធំៗពីរទិញភាគហ៊ុនគម្រោងអភិវឌ្ឍថាមពលពន្លឺព្រះអាទិត្យនៅកម្ពុជា

ដោយ ប៊ី

ភ្នំពេញៈ ក្រុមហ៊ុន B.Grimm Solar Power 1 បានចុះកិច្ចព្រមព្រៀងជាមួយក្រុមហ៊ុន Pramote Laocharoenwong ដើម្បីទិញភាគហ៊ុនទាំងអស់របស់ក្រុមហ៊ុន Ray Power Supply ក្នុងតម្លៃតម្លៃសរុប ៣០០,០០០ ដុល្លារអាមេរិក ក្នុងការអភិវឌ្ឍគម្រោង ថាមពលពន្លឺព្រះអាទិត្យ នៅលើដីនៅស្រុកសិរីសោភ័ណ ខេត្តបន្ទាយមានជ័យ។

ក្រុមហ៊ុន B.Grimm Solar Power 1 ដែលជាបុត្រសម្ព័ន្ធរបស់ក្រុមហ៊ុន B.Grimm Power Public Company Limited, កាលពេលថ្មីៗបានចុះកិច្ចព្រមព្រៀង ជាមួយក្រុមហ៊ុន Pramote Laocharoenwong ដើម្បីទិញភាគហ៊ុនទាំងអស់របស់ក្រុមហ៊ុន Ray Power Supply ក្នុងតម្លៃតម្លៃសរុប៣០០,០០០ដុល្លារអាមេរិក (៩,០៧ លានបាត)។

យោងតាមឯកសាររបស់ខ្លួន ជាមួយផ្សារភាគហ៊ុនថៃថ្ងៃនេះ ប្រតិបត្តិការគឺស្របតាមគោលការណ៍ ដែលបានអនុម័តដោយក្រុមប្រឹក្សាភិបាលថៃ កាលពីថ្ងៃទី១៣ ខែវិ ច្ឆិកាឆ្នាំ ២០១៩។

ការទិញយកនេះ កំពុងរង់ចាំការយល់ព្រមពីក្រសួងរ៉ែ និងថាមពល និងអាជ្ញាធរមានសមត្ថកិច្ចពាក់ព័ន្ធរបស់កម្ពុជា។

ក្រុមហ៊ុន Ray Power Supply ត្រូវបានផ្តល់សិទ្ធិក្នុងការអភិវឌ្ឍន៍គម្រោងកសិដ្ឋានថាមពលពន្លឺព្រះអាទិត្យ នៅលើដីនៅស្រុកសិរីសោភ័ណ ខេត្តបន្ទាយមានជ័យ ដោយអនុលោមតាមកិច្ចព្រមព្រៀង ទិញថាមពលអគ្គីសនីចំនួន៣០មេហ្គាវ៉ាត់ ជាមួយអគ្គិសនីកម្ពុជាដែលមានរយៈពេល២០ឆ្នាំ។

កាលបរិច្ឆេទប្រតិបត្តិការពាណិជ្ជកម្ម ដែលបានគ្រោងទុកគឺនៅក្នុងខែ តុលា ឆ្នាំ ២០២០៕ (បភព The Nation)៕

សម្ដេចតេជោ ហ៊ុន សែន ទទួលបានពានរង្វាន់ «ភាពជាអ្នកដឹកនាំ និងអភិបាលកិច្ចល្អ» ពីសហព័ន្ធសន្តិភាពសកល

ដោយ ៖ រ៉ាណេត

ភ្នំពេញ ៖ ក្រោយពីបញ្ចប់នូវពិធីបើក “កិច្ចប្រជុំកំពូលអាស៊ីប៉ាស៊ីហ្វិកលើកទី២” ដែលកម្ពុជាទទួលធ្វើជាម្ចាស់ផ្ទះ នៅវិមានសន្តិភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញឡើងទទួលពានរង្វាន់ «ភាពជាអ្នកដឹកនាំ និងអភិបាលកិច្ចល្អ» ដែលប្រគល់ដោយលោកជំទាវ ហាក់ ចា ហាន់ មូន (Hak Ja Han Moon) សហស្ថាបនិកសហព័ន្ធសន្តិភាពសកល។

កិច្ចប្រជុំកំពូលអាស៊ីប៉ាស៊ីហ្វិកលើកទី២ ក្រោមប្រធានបទ ការឆ្លើយតបចំពោះបញ្ហាប្រឈមគន្លឹះនាពេលបច្ចុប្បន្ននេះរួមមាន សន្តិភាព ការបង្រួបបង្រួមជាតិ ការពឹងពាក់គ្នាទៅវិញទៅមក វិបុលភាពទៅវិញទៅមក និងគុណតម្លៃសកល» ដែលបានបានប្រាព្ឋពិធីបើកកាលព្រឹកមិញនេះ គឺមានអ្នកចូលរួមជាង៨០០នាក់ ដែលមានសមាសភាពជាអតីប្រធានាធិបតី នាយករដ្ឋមន្ត្រី អតីតថ្នាក់ដឹកនាំប្រទេស រដ្ឋសភា ព្រឹទ្ធសភា អង្គការក្រៅរដ្ឋាភិបាល ធុរកិច្ចជនអង្គភាពសារព័ត៌មាន និងស្ថាប័ននានាជាច្រើនទៀត។

អ្នកចូលរួមនឹងបន្តប្រជុំពិភាក្សាគ្នាគ្នាជាបន្តទៀតនៅក្នុងវិមានសន្តិភាពដែលនឹងបញ្ចប់ទៅនៅពេលល្ងាចនេះ។ បន្ទាប់មក សម្តេចតេជោ ហ៊ុន សែន នឹងរៀបចំអាហារពេលល្ងាចជូនភ្ញៀវកិត្តិយសនៅសណ្ធាគារសុខានៅល្ងាចនេះផងដែរ។

ពានរង្វាន់ដែលសម្ដេចតេជោ ហ៊ុន សែន ទទួលបានកាលពីព្រឹកមិញនេះ គឺផ្តើមចេញពីការដឹកនាំប្រកបសិទ្ធភាពក្នុងការពន្លត់ភ្លើងសង្គ្រាមរាំរ៉ែនៅកម្ពុជា រួមជាមួយនឹងការព្យាយាមកសាងសមិទ្ធផល អភិវឌ្ឍប្រទេស ផ្តល់សន្ដិសុខសង្គម និងភាពកក់ក្ដៅដល់ប្រជាពលរដ្ឋនៅទូទាំងប្រទេស រហូតមានការទទួលស្គាល់ពីភាពរីកចម្រើនរបស់កម្ពុជានៅលើឆាកអន្តរជាតិ ៕

អគ្គនាយដ្ឋានពន្ធដារប្រមូលបានចំណូលជាង ២៤០០លានដុល្លារក្នុងរយៈពេល ១០ខែ

ដោយ ៖ រ៉ាណេត

ភ្នំពេញ៖ អគ្គនាយកដ្ឋានពន្ធដារ ប្រមូលបានចំណូលសម្រាប់ថវិការជាតិចំនួនប្រមាណជាង២៤០០លានដុល្លារ ក្នុងរយៈពេល១០ខែ ឆ្នាំ២០១៩ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៨កន្លងទៅមានការកើនឡើងរហូតដល់ប្រមាណ២៨,៣១ភាគរយ ដែលចំនួននេះលើសពីផែនការប្រចាំឆ្នាំ។

តាមរយៈសេចក្ដីប្រកាសព័ត៌មាន ស្ដីពី លទ្ធផលកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែតុលា ឆ្នាំ២០១៩ បានបង្ហាញថា នៅត្រឹមយៈពេល ១០ខែ ឆ្នាំ២០១៩នេះ ចំណូលពន្ធ-អាករដែលអគ្គនាយកដ្ឋានពន្ធដារប្រមូលបាន មានចំនួន ៩ ៦១៦.៨៣ ប៊ីលានរៀល ស្មើនឹងប្រមាណ ២៤០៤.២១ លានដុល្លារអាមេរិក កើនឡើង២៨.៣១ភាគរយ បើប្រៀបធៀបនឹងរយៈពេលដូចគ្នានៃឆ្នាំ២០១៨។

មានប្រសាសន៍ក្នុងកិច្ចប្រជុំបូកសរុបលទ្ធផលការងារប្រចាំខែតុលា និងលើកទិសដៅសម្រាប់អនុវត្តបន្ត ឆ្នាំ២០១៩ របស់អគ្គនាយកដ្ឋានពន្ធដារ លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារបានបញ្ជាក់ថាកំណើននៃការប្រមូលពន្ធរបស់អគ្គនាយកដ្ឋានពន្ធដារ ព្រោះការអនុវត្តដោយជោគជ័យនូវប្រព័ន្ធស្នើសុំបង្វិលសងអាករលើតម្លៃបន្ថែម (E-VAT Refund) ដែលបច្ចុប្បន្នអ្នកជាប់ពន្ធ និងសហគ្រាស មានការយល់ដឹងច្រើន ក៏ដូចជាការខិតខំប្រឹងប្រែងប្រមូលចំណូលពន្ធរបស់ថ្នាក់ដឹកនាំនិងមន្ត្រីពន្ធដារគ្រប់ជាន់ថ្នាក់។

លោកបានបង្ហាញបញ្ជាក់ថា ក្នុងខែតុលា ឆ្នាំ២០១៩ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញ Online របស់អគ្គនាយកដ្ឋានពន្ធដារ) មានចំនួន ៨៨៧,៦៤ប៊ីលានរៀល (ប្រមាណ២២១,៩១លានដុល្លារ) ស្មើនឹងប្រមាណ ៩,៧០ភាគរយនៃផែនការប្រចាំឆ្នាំ កើនឡើងប្រមាណ ២១,៨៥ភាគរយ បើប្រៀបធៀបកាលពីឆ្នាំ២០១៨ ដែលចំណូលពន្ធ-អាករក្នុងខែតុលា ប្រមូលបានត្រឹម១៥៦,១៩ប៊ីលាន ស្មើនឹងប្រមាណ៣៩,៧៩លានដុល្លារតែប៉ុណ្ណោះ។

ដោយឡែកសម្រាប់រយៈពេល១០ខែក្នុងឆ្នាំ២០១៩នេះ ចំណូលពន្ធ-អាករសរុបដែលអគ្គនាយកដ្ឋានប្រមូលបាន(តាមប្រព័ន្ធគ្រប់គ្រងទិន្នន័យចំណូលអន ឡាញ) មានចំនួន៩៦១៦,៨៣ប៊ីលានរៀល (២៤០៤,២១លានដុល្លារ) ស្មើនឹង១០៥,០៦ភាគរយនៃផែនការប្រចាំឆ្នាំ។ បើប្រៀបធៀបទៅនឹងឆ្នាំរយៈពេលដូចគ្នាកាលពីឆ្នាំ២០១៨ មានការកើនឡើង២១២១,៩៩ប៊ីលានរៀល (ប្រមាណ៥៣០,៥០លានដុល្លារ) ស្មើនឹងប្រមាណ២៨,៣១ភាគរយ ។

លោកបានណែនាំបន្ថែមដល់គ្រប់អង្គភាព ឱ្យបន្តខិតខំពង្រឹងការអនុវត្តច្បាប់ វិន័យការងារ ប្រកបដោយប្រសិទ្ធភាព និងត្រូវមានភាពទន់ភ្លន់តែម៉ឺងម៉ាត់ និងគ្រប់ជ្រុងជ្រោយដោយប្រកាន់នូវ «ទម្លាប់ហ្មត់ចត់ លើកិច្ចការតូចតាច ទើបអាចមានឱកាសទទួលកិច្ចការធំបាន» ដែលនេះជាប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា៕