គេហទំព័រ Propertyarea.asia ចាប់ផ្តើមផ្សព្វផ្សាយឯកសារច្បាប់ គោលនយោបាយ និងលិខិតបទដ្ឋានគតិយុត្តិនានាររបស់ក្រសួងរៀបចំដែនដី

ដោយគង់ សូរិយា

ភ្នំពេញៈ ដោយទទួលបានការគាំទ្រពីក្រសួងរៀបចំដែនដី នគរូបនីយកម្ម និងសំណង់ គេហទំព័រ Propertyarea.asia បានចាប់ផ្តើមផ្សព្វផ្សាយពីច្បាប់ គោលនយោបាយនានា និងលិខិតបទដ្ឋានគតិយុត្តិនានា ដើម្បីផ្តល់ផលប្រយោជន៍ដល់សាធារណៈជន ក៏ដូចជាអ្នកវិនិយោគនានាបានសិក្សាស្វែងយល់។

តាមរយៈការគាំទ្រនេះ គេហទំព័រ Propertyarea.asia បានបង្កើតមាតិកាថ្មីមួយដោយដាក់ឈ្មោះថា “ច្បាប់” នៅលើបញ្ជីរនៃព័ត៌មានរបស់យើង ដែលអ្នកអាន អាចអាន និងទាញយកទៅប្រើប្រាស់សំរាប់ធ្វើជាឯកសារ ឬប្រើប្រាស់ដើម្បីពង្រីកការយល់ដឹងរបស់ខ្លួន។

យោងតាមជំនួបរវាងលោកលាង មុនីរិទ្ឋ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងលោកយិន លាងគង់ស្ថាបនិក និងជាអគ្គនាយកគេហទំព័រ Propertyarea.asia កាលពីថ្ងៃទី១២ កញ្ញាកន្លងមក លោកលាង មុនីរិទ្ឋបានមានប្រសា សន៍កោតសរសើរពីដំណើរការរបស់គេហទំព័រនេះ ដែលផ្តល់ព័ត៌មានប្រកបដោយ វិជ្ជាជីវៈ ពិត ឥតលំអៀង និងប្រកបដោយក្រមសីលធម៌។

លោកលាង មុនីរិទ្ឋបានមានប្រសាសន៍ថា ក្រសួងមានគោលដៅផ្សព្វផ្សាយឲ្យសាធារណៈជនបានយល់ពីគោលនយោបាយ និងច្បាប់ បទដ្ឋានគតិយុត្តិនានា ដើម្បីឲ្យសាធារណៈជនបានយល់ និងបានឯកភាពតាមការស្នើសុំការគាំទ្រពីក្រុមការងារគេហទំព័រ Propertyarea.asia ដែលចង់ចូលរួមផ្សព្វផ្សាយពីគោលនយោបាយនានា របស់ក្រសួង ដើម្បីពង្រីកការយល់ដឹងដល់សាធារណៈជន ឲ្យបានយល់ពីគោលនយោបាយរបស់រដ្ឋាភិបាល ក្រោមការដឹកនាំរបស់ប្រមុខរដ្ឋាភិបាលកម្ពុជា សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា។

តាមរយៈការគាំទ្រនេះ Propertyarea.asia នឹងផ្សព្វផ្សាយព៌តមាន គោលនយោបាយរបស់ក្រសួង និងច្បាប់ពាក់ព័ន្ឋនានា តាមការណែនាំ និងចង្អុលបង្ហាញពីមន្រ្តីជាន់ខ្ពស់ និងមន្រ្តីជំនាញរបស់ក្រសួងរៀបចំដែនដី នគរូបនីយកម្ម និងសំណង់។

លោកយិន លាងគង់ស្ថាបនិក និងជាអគ្គនាយកគេហទំព័រ Propertyarea.asia បានគោរពថ្លែងអំណរគុណយ៉ាងជ្រាលជ្រៅ ចំពោះលោកឧបនាយករដ្ឋមន្រ្តីជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងលោកលាង មុនីរិទ្ឋដែលបានផ្តល់ការអនុញ្ញាត្ត និងគាំទ្រដល់គេហទំព័រនេះ ដែលកន្លងមកបានចូលរួមផ្សព្វផ្សាយព៌តមាននានាទាក់ ទងនឹងក្រសួង ដើម្បីរួមចំណែកជាមួយរាជរដ្ឋាភិបាល ក្នុងការបង្កើនការយល់ដឹងដល់សាធារណៈជនបានដឹងពីព៌តមាននានា ដែលជាព៌តមានដ៏មានសារៈសំ ខា ន់ទាក់ទងនឹងជីវភាពប្រចាំថ្ងៃ ក៏ដូចជា ការងារពាក់ព័ន្ឋនឹងលិខិតស្នាមនានា។

លោកបន្តថា “ដោយសារការផ្សព្វផ្សាយព៌តមានប្រកបដោយវិជ្ជាជីវៈ និងគោរពនូវក្រមសីលធ៌មជាស្នូល គេហទំព័រPropertyarea.asia បានទទួលបានការគាំទ្រយ៉ាងខ្លាំងពីអ្នកអាន ដោយមួយថ្ងៃចំនួនអ្នកអានគេហទំព័ររបស់យើងខ្ញុំ មានចំនួនអ្នកអាចចន្លោះ ១៥,០០០ ទៅ ២៨,០០០នាក់ជាប្រចាំ”។ លោកបន្តថា “បច្ចុប្បន្ននេះ ក្រុមការងារគេហទំព័របាននិងកំពុងពង្រីកការផ្សព្វផ្សាយ ទៅកាន់បណ្តាញទំនាក់ទំនងសង្គមចំនួន៧ទៀត ដើម្បីពង្រីកវិសាលភាពនៃការផ្សព្វផ្សាយរបស់យើង”។

បណ្តាញទំនាក់ទំនងសង្គមចំនួន៦ដែលបាន និងកំពុងពង្រីកការផ្សព្វផ្សាយរួមមាន Line, Telegram, Twitter, Instagram, Linkedin, youtube, ពិសេសfacebook Page៕

សម្តេចតេជោជំរុញឱ្យប៉ាគីស្ថានបង្កើនកិច្ចសហប្រតិបត្តិការលើវិស័យពាណិជ្ជកម្ម និងវិនិយោគមកកាន់កម្ពុជាកាន់តែច្រើន

ដោយ វុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជំរុញឱ្យសាធារណរដ្ឋអ៊ីស្លាមប៉ាគីស្ថាន បង្កើន និងពង្រឹងកិច្ចសប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគអោយកាន់តែធំទូលាយជាមួយកម្ពុជាបន្ថែមទៀត។

សម្តេចតេជោ ហ៊ុន សែន នៅក្នុងជំនួបពិភាក្សាការងារជាមួយ លោក Qasim Khan Suri អនុប្រធានសភាជាតិនៃសាធារណរដ្ឋអ៊ីស្លាមប៉ាគីស្ថាននាថ្ងៃទី ២០ ខែវិច្ឆិកា ឆ្នាំ ២០១៩ នេះ កម្ពុជានិងប៉ាគីស្ថាន មានទំនាក់ទំនងនឹងគ្នាជាយូរមកហើយ ពិសេសប៉ាគីស្ថានបានទទួលស្គាល់ឯករាជ្យកម្ពុជាតាំងពីឆ្នាំ១៩៥២ ពោលគឺមុនប្រទេសកម្ពុជាទទួលបានឯករាជ្យទៅទៀត។

សម្តេចតេជោ ចង់ឲ្យភាគីទាំងពីរស្វែងរកមធ្យោបាយក្នុងការពង្រឹង និងពង្រីកកិច្ចសហប្រតិបត្តិការទ្វេភាគី ពិសេសគឺកិច្ចសហប្រតិបត្តិការទៅលើវិស័យសេដ្ឋកិច្ច វិនិយោគជាដើម។

ទំហំពាណិជ្ជកម្មទ្វេភាគីនៅមានចំនួនតិចតួចនៅឡើយ ដូច្នេះសម្តេចតេជោ ចង់ភាគីទាំងពីរជំរុញឲ្យទំហំពាណិជ្ជកម្មប្រទេសទាំងពីរអោយមានការកើនឡើងថែមទៀត។

លោក Qasim Khan Suri អនុប្រធានប៉ាគីស្ថាន បានឱ្យដឹងដែរថា ប្រទេសទាំងពីរ គឺមានកិច្ចសហប្រតិបត្តិការយូរលង់មកហើយ ដែលត្រូវពង្រឹងកិច្ចសហប្រតិបត្តិការឲ្យបានខ្លាំងក្លាបន្ថែមទៀត។ ក្រៅពីនេះក៏ចង់ឲ្យមានកិច្ចសហប្រតិបត្តិការក្របខណ្ឌតំបន់ ពិសេសក្នុងក្របខណ្ឌអាស៊ាន។

លោកក៏បានកោតសរសើរពីកំណើនសេដ្ឋកិច្ចរបស់កម្ពុជា និងការរីកចំរើនដ៏ធំធេងនៅកម្ពុជា ជាមួយការអភិវឌ្ឍគ្រប់វិស័យ។ ហើយអ្វីដែល លោក ចង់បានគឺបង្កើនការផ្លាស់ប្តូរទស្សនកិច្ចពីគ្នាទៅវិញទៅមក នៅក្នុងក្របខណ្ឌសភា និងសភា និងទស្សនកិច្ចថ្នាក់ដឹកនាំទៅវិញទៅមកផងដែរ៕

សមាគមចុងភៅពិភពលោក ចង់ធ្វើកម្មវិធីទេសចរណ៍ម្ហូបអាហារនៅមុខប្រាសាទអង្គរ ដើម្បីទាក់ទាញភ្ញៀវចូលមកកម្ពុជា

ដោយ ៖ រ៉ាណេត

ភ្នំពេញ ៖ សមាគមចុងភៅពិភពលោក និងសមាគមចុងភៅកម្ពុជា បានបង្ហាញគម្រោងរៀបចំព្រឹត្តិការណ៍ទេសចរណ៍ និងម្ហូបអាហារដ៏ធំមួយនៅមុខប្រាសាទអង្គរវត្ត ដែលអាចទាក់ទាញភ្ញៀវទេសចរអន្តរជាតិជាច្រើននាក់ ឱ្យមកចូលមកទស្សនាក្នុងប្រទេសកម្ពុជា។

សមាគមចុងភៅកម្ពុជា និងសមាគមចុងភៅពិភពលោក បានបង្ហាញពីបំណងចង់រៀចំព្រឹត្តិការណ៍ម្ហូវអាហារប្រចាំឆ្នាំ នៅមុខប្រាសាទអង្គរវត្ត នៅកំឡុងខែមេសា ឆ្នាំ២០២០ ខាងមុខ ដោយព្រឹត្តិការណ៍មួយនេះ ក៏មានរៀបចំជាសកម្មភាពសប្បុរសធម៌ភ្ជាប់ជាមួយសកម្មភាពទេសចរណ៍ ពោលគឺដើម្បីរៃអង្គាសថវិកាយកទៅជួយកុមារកំព្រា ជនរងគ្រោះ និងការងារមនុស្សធម៌នានា ដែលបានពីការចូលរួមរបស់ភ្ញៀវទេសចរជាតិ-អន្តរជាតិជាច្រើននាក់។

នៅក្នុងកិច្ចជំនួបសុំយោបល់ និងពិភាក្សាការរៀបចំមហាព្រឹត្តិការណ៍ប្រចាំឆ្នាំជាលើកដំបូងកាលពីព្រឹកថ្ងៃទី២០ ខែវិច្ឆិកា ឆ្នាំ២០១៩ តំណាងសមាគមចុងភៅពិភពលោកបានបញ្ជាក់ប្រាប់រដ្ឋមន្ត្រីក្រសួងទេសចរណ៍ លោក ថោង ខុន ថា ព្រឹត្តិការណ៍ខាងលើនេះ គឺធ្លាប់ត្រូវបានរៀបចំប្រកបដោយជោគជ័យជាច្រើនដងរួចមកហើយនៅប្រទេសមីយ៉ាន់ម៉ា និងវៀតណាម ហើយឆ្នាំក្រោយនេះ សមាគម ពិតជាពេញចិត្តចំពោះគោលដៅទេសចរអង្គរ-សៀមរាបជាខ្លាំង។

ព្រឹត្តិការណ៍ទេសចរណ៍ និងម្ហូបអាហារខាងលើនេះ គឺជាផលិតផលទេសចរណ៍ដ៏សំខាន់ ក្នុងការទាក់ទាញភ្ញៀវទេសចរពីទូទាំងពិភពលោក ហើយតាមរយៈការចូលរួមជាមួយព្រឹត្តិការណ៍នេះ ភ្ញៀវទេសចរក៏នឹងចេញទៅទស្សនានៅតាមគោលដៅទេសចរណ៍នានារបស់កម្ពុជាផងដែរ ពិសេសរមណីយដ្ឋានអង្គរ ក្រុងសៀមរាប ក៏ដូចជាតំបន់ជុំវិញ។

ជាការឆ្លើយតបនឹងការលើកឡើងរបស់សមាគមចុងភៅកម្ពុជា និងសមាគមចុងភៅពិភពលោក លោករដ្ឋមន្ត្រីក្រសួងទេសចរណ៍ ថោង ខុន បានបង្ហាញការគាំទ្រយ៉ាងពេញទំហឹងចំពោះគោលបំណង និងសំណើសុំរៀបចំព្រឹត្តិការណ៍ទេសចរណ៍ និងម្ហូបអាហារនេះ ប៉ុន្តែលោកក៏បានបញ្ជាក់ដែរថា ការរៀចំព្រឹត្តិការណ៍នេះទៅបាន គឺត្រូវបានមានការអនុញ្ញាតពីរាជរដ្ឋាភិបាល និងសុំការឯកភាពពីអាជ្ញាធរជាតិអប្សរា និងរដ្ឋបាលខេត្តសៀមរាបជាមុនសិន។

លោករដ្ឋមន្ត្រីបានបង្ហាញទំនុកថា “ក្រសួងទេសចរណ៍ នឹងដាក់សំណើជូនទៅរាជរដ្ឋាភិបាល ដើម្បីសុំការអនុញ្ញាតរៀបចំព្រឹត្តិការណ៍ដ៏សំខាន់នេះឡើង ព្រមទាំងនឹងពិភាក្សាការងារជាមួយអាជ្ញាធរជាតិអប្សរា រដ្ឋបាលខេត្តសៀមរាប និងសមាគមទាំងពីរជាបន្តបន្ទាប់ទៀត”។

ដើម្បីជំរុញការងារនេះ លោករដ្ឋមន្ត្រី ថោង ខុន ក៏បានចាត់ឱ្យមន្ត្រីជំនាញរបស់ក្រសួងទេសចរណ៍ ត្រូវធ្វើការងារពាក់ព័ន្ធជាមួយសមាគមទាំងពីរខាងលើឱ្យបានជិតស្និទ្ធ ដើម្បីរួមគ្នាបង្កើតផលិតផលទេសចរណ៍ដ៏ពិសេសមួយជូនភ្ញៀវទេសចរ និងដើម្បីផ្សព្វផ្សាយពីគោលដៅទេសចរណ៍កម្ពុជា ទៅកាន់ទេសចរអន្តរជាឱ្យកាន់តែទូលំទូលាយ តាមរយៈព្រឹត្តិការណ៍នេះ៕

រដ្ឋមន្ត្រីក្រសួងសាធារណៈការ ជំរុញឲ្យចិនវិនិយោគលើវិស័យដឹកជញ្ជូននៅកម្ពុជា

ដោយ វុត្ថា

ភ្នំពេញ៖ រដ្ឋមន្ត្រីក្រសួងសាធារណៈការ និងដឹកជញ្ជូន បានលើកទឹកចិត្តដល់អ្នកវិនិយោគចិនទាំងអស់ ជាពិសេស អ្នកវិនិយោគមកពីខេត្តហ៊ូណាន ឱ្យចូលរួមសហការជាមួយរាជរដ្ឋាភិបាលកម្ពុជាដើម្បីវិនិយោគលើវិស័យអាទិភាពរបស់កម្ពុជា ជាពិសេសវិស័យសាធារណការ និងដឹកជញ្ជូន ។

លោកទេសរដ្ឋមន្ត្រី ស៊ុន ចាន់ថុល នៅក្នុងជំនួបពិភាក្សាការងារជាមួយគណៈប្រតិភូ ក្រុមហ៊ុនចិន មកពីខេត្តហ៊ូណាន កាលពីថ្ងៃទី ១៩ ខែវិច្ឆិកាឆ្នាំ ២០១៩ ម្សិលមិញនេះ បានឱ្យដឹងគម្រោងជាច្រើនដែលត្រូវវិនិយោគដូចជា គម្រោងសាងសង់ផ្លូវល្បឿនលឿន ផ្លូវតភ្ជាប់តំបន់សេដ្ឋកិច្ចពិសេស និងកំពង់ផែ ផ្លូវតាមតំបន់ព្រំដែន គម្រោងសាងសង់ផ្លូវដែកថ្មី ភ្នំពេញ-បាវិត ភ្នំពេញ-សៀមរាប និងសិរីសោភ័ណ-សៀមរាប គម្រោងតភ្ជាប់ផ្លូវដែកពីរាជធានីភ្នំពេញទៅកំពង់ផែស្វយ័តភ្នំពេញថ្មី គម្រោងសាងសង់ប្រព័ន្ធដឹកជញ្ជូនសាធារណៈ(MRT) ក្នុងរាជធានីភ្នំពេញ គម្រោងសាងសង់មជ្ឈមណ្ឌលភស្តុភារកម្ម ឃ្លាំង ចំណតកុងតឺន័រ និងផែស្ងួត គម្រោងសាងសង់កំពង់ផែទឹកសាបនៅតាមបណ្តោយទន្លេមេគង្គ និងទន្លេសាប គម្រោងសាងសង់ប្រព័ន្ធ និងស្ថានីយចម្រោះទឹកកខ្វក់ នៅខេត្តក្រុងធំៗ និងខេត្តជាប់សមុទ្រផងដែរ ។

លោករដ្ឋមន្ត្រីបន្តថា កម្ពុជាមានទីតាំងស្ថិតនៅចំកណ្តាលបេះដូងនៃភូមិភាគអាស៊ីអាគ្នេយ៍ដែលជាទីតាំងយុទ្ធសាស្រ្តដ៏ល្អប្រសើរមួយសម្រាប់ធ្វើជាមជ្ឈមណ្ឌលភស្តុភារកម្ម និងការតភ្ជាប់តំបន់ ហើយកម្ពុជាជាប្រទេសដែលមានធនធានធម្មជាតិដ៏សំបូរបែប រួមជាមួយនឹងកម្លាំងពលកម្មវ័យក្មេងជាច្រើនប្រកបដោយភាពឧស្សាហ៍ព្យាយាម និងស្វាហាប់ រួមទាំងមានច្បាប់វិនិយោគមួយដ៏ល្អប្រសើរ និងមានក្រុមប្រឹក្សាអភិវឌ្ឍន៍កម្ពុជា (CDC) ជាភ្នាក់ងារវិនិយោគនៃច្រកចេញ-ចូលតែមួយសម្រាប់ការវិនិយោគ រួមទាំងមានការលើកទឹកចិត្តជាច្រើនផ្សេងទៀត។លោករដ្ឋមន្ត្រី សង្ឃឹមជឿជាក់ថា ទំនាក់ទំនង និងកិច្ចសហប្រតិបត្តិការល្អ រវាងកម្ពុជា និងចិន នឹងជំរុញឲ្យអ្នកវិនិយោគចិន ពិចារណានូវកាលានុវត្តភាពជាច្រើនសម្រាប់ការវិនិយោគ និងការធ្វើពាណិជ្ជកម្មនៅកម្ពុជា ហើយតាមរយៈព្រឹត្តិការណ៍នាថ្ងៃនេះ ទំនាក់ទំនងរវាងខេត្តហ៊ូណាន និងកម្ពុជា នឹងកាន់តែភាពល្អប្រសើរឡើងថែមទៀត។

ឯកឧត្ដមទេសរដ្ឋមន្ត្រីបានបន្តថា រាជរដ្ឋាភិបាលកម្ពុជា គឺបានត្រៀមខ្លួនរួចជាស្រេច ក្នុងការបំពេញតួនាទីជាអ្នកសម្របសម្រួល ដល់វិស័យ ឯកជន ជាពិសេស អ្នកវិនិយោគដែលមកពីខេត្តហ៊ូណាន ដើម្បីចាប់ផ្តើម និងពង្រីកអាជីវកម្មនៅកម្ពុជា។

លោកទេសរដ្ឋមន្ត្រីក៏បានបង្ហាញពីគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥ ដែលត្រូវការទុនវិនិយោគជាច្រើនសម្រាប់ អភិវឌ្ឍវិស័យអាទិភាពនានារួមទាំងវិស័យហេដ្ឋារចនាសម្ព័ន្ធផងដែរ ដែលត្រូវការជាចាំបាច់នូវការចូលរួមពីវិស័យឯកជន និងដៃគូអភិវឌ្ឍន៍នានាដើម្បីវិនិយោគលើវិស័យសំខាន់ៗ រួមមាន៖ វិស័យឧស្សាហកម្មធុនស្រាល វិស័យឧស្សាហកម្មកែច្នៃ វិស័យផលិតកម្មកសិកម្ម ឬកសិ-ឧស្សាហកម្ម វិស័យផលិតកម្ម និងការកែច្នៃម្ហូបអាហារ វិស័យទេសចរណ៍ និងការអភិវឌ្ឍធនធានមនុស្ស៕

គម្រោង Crystalville Ream Beach តម្លៃប្រមាណ ១០០០លានដុល្លារត្រៀមបង្ហាញខ្លួនក្នុងពេលខាងមុខនេះ

ដោយៈ រ៉ាណេត

ព្រះសីហនុៈ តំបន់ឆ្នេររាម នៃខេត្តព្រះសីហនុកំពុងបង្ហាញសក្តានុពលកាន់តែខ្លាំង ដោយគំរោងវិនិយោគថ្មីមួយ Crystalville Ream Beach ដែលមានទុនវិនិយោគ១០០០លានដុល្លារនឹងបង្ហាញខ្លួននាពេលខាងមុខនេះ។

គំរោងដ៏ធំនេះ ជាទស្សនទាននៃការអភិវឌ្ឍន៍ចម្រុះ ដែលរួមមានសំណង់លំនៅដ្ឋានប្រភេទវីឡាកម្រិតអភិជន មជ្ឈមណ្ឌលពាណិជ្ជកម្ម ផ្សារទំនើប និងសណ្ឋាគារកម្រិតផ្កាយ៥ នឹងបង្ហាញវត្តមានរបស់ខ្លួននៅពេលឆាប់ៗខាងមុខនេះ ក្រោមការវិនិយោគរួមគ្នាពីសំណាក់ក្រុមហ៊ុនក្នុងស្រុក និងក្រុមហ៊ុនយក្សដ៏ធំមកពីសឹង្ហបូរី។

នាយិកាគ្រប់គ្រងផ្នែកលក់គម្រោងវីឡាបែបលំហែរកាយ និងប្រណីតភាពលើកដំបូងនៅតំបន់ឆ្នេរសមុទ្ររាម ដែលស្ថិតនៅក្នុងគម្រោង Crystalville Ream Beach កញ្ញា លីម សុខាដាវីនបានបង្ហើបប្រាប់ឱ្យដឹងនាព្រឹកថ្ងៃទី២០ វិច្ឆិកានេះថា គម្រោងសាងសង់លំនៅដ្ឋានប្រភេទជាវីឡាបែបលំហែរ និងកម្សាន្តកម្រិតអភិជននេះ គឺជាការវិនិយោគរួមគ្នារវាងក្រុមហ៊ុនក្នុងស្រុកFURI Corporation និងក្រុមហ៊ុនវិនិយោគអចនទ្រព្យដ៏ធំមកពីសាំងហ្គាពួរ គឺជាផ្នែកមួយក្នុងគម្រោងCrystalville Ream Beach។

កញ្ញាបានបន្តទៀតថា “គម្រោងលំនៅដ្ឋានប្រភេទវីឡាលំហែរកាយនេះ នឹងចាប់ ផ្តើមបើកលក់នៅត្រឹមខែមករា ឆ្នាំ២០២០ឆាប់ៗខាងមុននេះ ដែលមានត្រឹមតែ១០០ខ្នងតែប៉ុណ្ណោះ”។កញ្ញាបន្តថា “គំរោងដ៏ប្រណីតនេះមានអាងហែលទឹកគ្រីស្តាល (Crystal Swimming Pool) ដែលមានទំហំរហូតដល់៦ហិកតានៅចំកណ្តាល ដែលជាភាពទាក់ទាញពីបណ្តាមនុស្សនានាចម្រុះជាតិសាសន៍ជាច្រើន”។

កញ្ញាបន្តទៀតថា វីឡាទាំងអស់នេះ មានលក្ខណៈខុសប្លែកពីគម្រោងទូទៅ ដោយសារតែក្រុមហ៊ុនវិនិយោគ និងអភិវឌ្ឍន៍ផ្តោតសំខាន់ទៅលើភាពច្នៃប្រឌិត បង្កើតសោភ័ណភាពស្រស់ស្អាត និងប្រណីតភាព ស័ក្ដិសមទៅនឹងប្រភេទវីឡាស្នាក់នៅបែបលំហែរកាយនៅតំបន់ឆ្នេរសមុទ្រជិតឧទ្យានជាតិរាម ខេត្តព្រះសីហនុ។ កញ្ញាបានបន្តទៀតថា អ្វីដែលរឹតតែអស្ចារ្យ និងជាភាពទាក់ទាញនៅក្នុងគម្រោងមួយនេះ ក្រៅតែពីជាវីឡាសម្រាប់ស្នាក់នៅលំហែរកាយ គឺនៅមានភាពអស្ចារ្យជាច្រើនទៀត ក្រោមគំនិតច្នៃប្រឌិតរបស់អ្នកជំនាញមកពីសាំងហ្គាពួរ ដោយគ្រប់វីឡាទាំងអស់សុទ្ធតែមានអាងហែកទឹកនៅពីមុខ ត្រូវតាមក្បួនហុងស៊ុយជនជាតិចិន មានកន្លែងអង្គុយសម្រាកលេង ឬដេកហាលកំដៅថ្ងៃនាតំបន់សមុទ្រ មានតំបន់ម្លប់ឈើបៃតងនៅព័ទ្ធជុំវិញ ហើយនៅលើដំបូលក៏មានកន្លែងអង្គុយលេង ឬទទួលទានអាហារលក្ខណៈគ្រួសារផងដែរ។

នៅក្នុងគម្រោង Crystalville Ream Beach ត្រូវបានរៀបចំអភិវឌ្ឍន៍នៅលើផ្ទៃដីតំបន់ឆ្នេរសមុទ្ររាម ខេត្តព្រះសីហនុ ទំហំសរុបប្រមាណ៤៣ ហិកតា ដោយត្រូវបានចែកចេញជា ៣ដំណាក់កាលក្នុងការសាងសង់។ ដំណាក់កាលទី១ ក្រុមហ៊ុននឹងសាងសង់លំនៅដ្ឋានបែបលំហែរកាយចំនួន១០០ខ្នង (មាន៣ប្រភេទ វីឡាលំហែរកាយ, វីឡាឆ្នេរខ្សាច់ និងវីឡាកោងកាង) ចំណាយពេលត្រឹម២ឆ្នាំ ហើយដំណាក់ទី២ នឹងចាប់ដំណើរការសាងសង់អាងហែលទឹកគ្រីស្ទាល់ (Crystal Swimming Pool) ដែលមានទំហំរហូតដល់៦ហិកតា ក្រោមជំនាញរបស់ក្រុមហ៊ុនមកពីសាំងហ្គាពួរ ហើយក៏ជាលក្ខណៈពិសេសដែលស្ថិតនៅចំកណ្តាលគម្រោង Crystalville Ream Beach ផងដែរ។

ដោយឡែកដំណាក់ទី៣ ក្រុមហ៊ុននឹងចាប់ផ្តើមសាងសង់សំណង់អគាមជ្ឈមណ្ឌលពាណិជ្ជកម្ម ដែលរួមមាន ខុនដូ អាផាតមិន សណ្ឋាគារកម្រិតផ្កាយ៥ រួមជាមួយនឹងផ្សារទំនើប ដែលផ្តោតសំខាន់ទៅសេវាចំណីអាហារ និងសម្ភារៈប្រើប្រាស់ប្រចាំគម្រោងផងដែរ៕

ប្រទេសបាបាដុស-កម្ពុជាបង្កើតទំនាក់ទំនងការទូត ដើម្បីពង្រីកចំណងមិត្តភាព និងកិច្ចសហប្រតិបត្តិការ

ដោយ វុត្ថា

ភ្នំពេញៈ រដ្ឋាភិបាលនៃបាបាដុស និងរាជរដ្ឋាបាលភិបាលកម្ពុជា បានចាប់ផ្តើមបង្កើតទំនាក់ទំនងការទូត ក្នុងគោលបំណងជំរុញការយោគយល់គ្នាទៅវិញទៅមក និងពង្រីកចំណងមិត្តភាព និងកិច្ចសហប្រតិបត្តិការរវាងប្រជាជនទាំងពីរ។

យោងតាមសេចក្តីថ្លែងការណ៍រួមស្តីពី ការបង្កើតទំនាក់ទំនងការទូតដែលចុះហត្ថលេខាដោយតំណាង នៃប្រទេសទាំងពីរកាលពីថ្ងៃទី១១ ខែវិច្ឆិកា ឆ្នាំ ២០១៩ កន្លងមកនេះបានឱ្យដឹងថា ដោយឈរលើគោលការណ៍ និងគោលបំណងនៃធម្មនុញ្ញនៃអង្គការសហប្រជាជាតិនិងច្បាប់អន្តរជាតិ ជាពិសេសក្នុងគោលបំណងគោរព និងពង្រឹងសន្តិសុខ និងសន្តិភាពអន្តរជាតិ សមភាពរវាងរដ្ឋ និងរដ្ឋអធិបតេយ្យភាពជាតិ ឯករាជ្យភាព សន្ធិសញ្ញាអន្តរជាតិ បូរណភាពទឹកដី និងការមិនជ្រៀតជ្រែកកិច្ចការផ្ទះក្នុងរវាងរដ្ឋ និងរដ្ឋ។

បានសម្រេចបង្កើតទំនាក់ទំនងការទូតថ្នាក់ឯកអគ្គរាជទូត និងរដ្ឋទូត ដោយអនុលោមតាមបទបញ្ញត្តិនៃអនុសញ្ញាទីក្រុងវីយ៉ែនស្តីពី ទំនាក់ទំនងការទូតចុះថ្ងៃទី១៨ ខែមេសាឆ្នាំ១៩៦១ ដោយមានប្រសិទ្ធិភាពចាប់ពីថ្ងៃចុះហត្ថលេខា លើសេចក្តីថ្លែងការណ៍រួមនេះតទៅ។

ជាសក្ខីភាព តំណាងហត្ថលេខីទាំងពីរ ដោយមានការអនុញ្ញាតពីរាជ/រដ្ឋបាភិបាលរៀងៗខ្លួន បានចុះហត្ថលេខាលើសេចក្តីថ្លែងការណ៍រួមនេះ ជាពីរច្បាប់ដើម ជាភាសាអង់គ្លេស និងភាសាខ្មែរ ដែលអត្ថបទាំងពីរនេះមានតម្លៃស្មើគ្នា។

ប្រទេស Barbados គឺជាកោះអធិបតេយ្យមួយនៅក្នុងតំបន់ Lesser Antilles ដែលមានផ្ទៃដីត្រឹមតែ៤៣១គីឡូម៉ែត្រក្រឡា (១៦៦ ម៉ែត្រការ៉េ) ។ ប្រទេសនេះត្រូវបានអះអាងជាប្រទេសអេស្ប៉ាញនៅចុងសតវត្សរ៍ទី១៥ មុនពេលត្រូវបានកាន់កាប់ដោយអង់គ្លេសនៅដើមសតវត្សរ៍ទី១៧ ។ ប្រទេស Barbados គឺជាអាណានិគមអង់គ្លេសរហូតដល់ទទួលបានឯករាជ្យនៅឆ្នាំ១៩៦៦។

នៅឆ្នាំ២០១៩ ប្រជាជននៅក្នុងប្រទេស Barbados នេះ ត្រូវបានគេប៉ាន់ប្រមាណថាមាន២៨៧.០២៥នាក់ ដែលមានដង់ស៊ីតេ៦៦០នាក់ ក្នុងមួយគីឡូម៉ែត្រក្រឡា (១.៧០៤/ ម៉ែត្រការ៉េ)នៅក្នុងជំរឿនឆ្នាំ ២០១០ ដែលធ្វើឱ្យប្រទេសនេះក្លាយជាប្រទេសដែលមានប្រជាជនច្រើនជាងគេលំដាប់ទី១៨៣ នៅលើពិភពលោក និងមានផលិតផក្នុងស្រុកសរុប (GDP) ៤.៧៩៧ ពាន់លានដុល្លារអាមេរិក។

ទីក្រុងធំបំផុតនៃប្រទេស Barbados គឺ Bridgetown ដែលមានប្រជាជន ១១០,០០០ នាក់ និងដង់ស៊ីតេ៧,៣០០ នាក់ក្នុងមួយគីឡូម៉ែត្រក្រឡា៕

សង្គ្រាមពាណិជ្ជកម្មអាមេរិកជំរុញក្រុមហ៊ុនអាស៊ី និងអ្នកវិនិយោគនានាឱ្យងាកទៅរកចិន

ដោយ Donald Lee

ភ្នំពេញ៖ សង្គ្រាមពាណិជ្ជកម្មរវាងអាមេរិក និងចិនកំពុងជំរុញក្រុមហ៊ុនធំៗនៅអាស៊ីឱ្យធ្វើពិពិធកម្មប្រភពទុនវិនិយោគរបស់ពួកគេឱ្យឆ្ងាយពីការពឹងផ្អែកតែលើការផ្លាស់ប្តូរអាមេរិក ខណៈរដ្ឋាភិបាលអាមេរិកគំរាមដំឡើងពន្ធលើការនាំចូលរបស់ចិនម្តងទៀត។

ក្រុមហ៊ុនធំជាងគេនៅអាស៊ីគឺក្រុមហ៊ុន Alibaba Group បានរៃអង្គាសប្រាក់បានជិត ១៣ពាន់លានដុល្លារក្នុងសប្តាហ៍នេះនៅលើផ្សារហ៊ុនហុងកុង។ ការលក់ភាគហ៊ុនហុងកុងដែលកើតឡើងគឺជាការចុះបញ្ជីទីពីរ បន្ទាប់ការចុះបញ្ជីផ្សារហ៊ុននៅទីក្រុងញូវយ៉ក។

ក្រុមអ្នកវិភាគជឿជាក់ថា ក្រុមហ៊ុនធំៗ កំពុងស្វែងរកការធ្វើពិពិធកម្មប្រភពធនធាន និងការវិនិយោគ ក្រៅពីអាមេរិក ខណៈគោលនយោបាយសេដ្ឋកិច្ចដ៏ខ្លាំងក្លារបស់ប្រធានាធិបតី Donald Trump នៅតែបន្តបង្កភាពមិនប្រាកដប្រជានៅក្នុងតំបន់អាស៊ី និងការរៀបចំរចនាសម្ព័ន្ធខ្សែសង្វាក់ឧស្សាហកម្មពិភពលោកឡើងវិញ។

ការអត្ថាធិប្បាយមួយពីកាសែត Global Times ដែលគ្រប់គ្រងចិន បានបញ្ជាក់ថា “ដូច្នេះតើក្រុមហ៊ុន Alibaba នឹងចាកចេញពីសហរដ្ឋអាមេរិកឬ? ចម្លើយគឺទេ។ អាមេរិកជាប្រទេសមានសេដ្ឋកិច្ចធំជាងគេនៅលើពិភពលោក ហើយដើរតួយ៉ាងសំខាន់ក្នុងវិស័យហិរញ្ញវត្ថុ”។

ការអត្ថាធិប្បាយនេះ បានបន្ថែមថា “ប៉ុន្តែក្រុមហ៊ុនអេឡិចត្រូនិកយក្សនេះត្រូវធ្វើពិពិធកម្មប្រភពហិរញ្ញប្បទានរបស់ខ្លួន ក្នុងពេលមានសង្គ្រាមពាណិជ្ជកម្មដើម្បីកាត់បន្ថយការពឹងផ្អែករបស់ខ្លួនលើអាមេរិក។ គេរំពឹងថា ក្រុមហ៊ុននឹងបង្កើនកិច្ចខិតខំប្រឹងប្រែងដើម្បីធានាបាននូវសន្តិសុខហិរញ្ញវត្ថុ នៅពេលសង្គ្រាមពាណិជ្ជកម្មកំពុងបន្ត”។

លើសពីនេះ ក្រសួងពាណិជ្ជកម្មចិន បានបង្ហាញទិន្នន័យបង្ហាញថា ការវិនិយោគផ្ទាល់ពីបរទេស (FDI) បានកើនឡើង ៦,៦ ភាគរយដល់ ១០៧ពាន់លានដុល្លារគិតមកទល់ពេលនេះនៅឆ្នាំនេះ ដោយសារសង្គ្រាមពាណិជ្ជកម្មរវាងអាមេរិក និងចិនកើនឡើងយ៉ាងខ្លាំង។ ក្រុមហ៊ុនបរទេសបានចាប់ដៃគូជាមួយចិន និងបានចូលរួមចំណែកយ៉ាងសំខាន់ដល់ការអភិវឌ្ឍរបស់ប្រទេសនេះ។

ក្រសួងពាណិជ្ជកម្ម បានឱ្យដឹងថា ក្រុមហ៊ុនបរទេសបានចូលរួមចំណែកជិត ២៥ភាគរយនៃទិន្នផលឧស្សាហកម្ម និងមានចំនួន ៥០ភាគរយនៃពាណិជ្ជកម្មបរទេសទាំងអស់។

ចាប់ពីខែ មករា ដល់ខែ តុលា ឆ្នាំនេះ ប្រទេស និងតំបន់កំពូលទាំង ១០ ដែលមានការវិនិយោគនៅចិនមានដូចជាហុងកុង សឹង្ហបូរី តៃវ៉ាន់ កូរ៉េខាងត្បូង អង់គ្លេស ជប៉ុន អាឡឺម៉ង់ ហូល្លង់ និងម៉ាកាវដែលស្មើនឹង ៩៥ភាគរយនៃការប្រើប្រាស់ជាក់ស្តែងនៃការវិនិយោគបរទេសសរុបនៅក្នុងប្រទេស។

អ្នកវិភាគទីផ្សារជឿជាក់ថា សង្គ្រាមពាណិជ្ជកម្មរវាងអាមេរិក និងចិនកំពុងឆ្ពោះទៅរកដំណោះស្រាយដំណាក់កាលទី ១ ប៉ុន្តែលោក Trump នៅតែបន្តគំរាមកំហែងដល់ចិនជាមួយនឹងការដំឡើងពន្ធគយខ្ពស់។

លោក Trump បាននិយាយនៅទីក្រុងវ៉ាស៊ីនតោនកាលពីថ្ងៃ អង្គារ ថា “ប្រសិនបើយើងមិនធ្វើកិច្ចព្រមព្រៀងជាមួយចិនទេ ខ្ញុំនឹងដំឡើងពន្ធខ្ពស់ជាងនេះ”៕

ធនាគារពិភពលោក៖ កម្ពុជាចាំបាច់ត្រូវមានគោលនយោបាយថ្មីៗដើម្បីទាញប្រយោជន៍ពីឱកាសនានាក្នុងទីផ្សារពិភពលោក

ដោយ ប៊ី

ភ្នំពេញ៖ កម្ពុជាចាំបាច់ត្រូវមានគោលនយោបាយថ្មីៗដើម្បីទាញយកអត្ថប្រយោជន៍ពីឱកាសនានាដែលអាចរកបាននៅលើទីផ្សារពិភពលោក នាពេលអនាគតភាព។ របាយការណ៍របស់ធនាគាពិភពលោកក្រោមចំណងជើងថា អនាគតការងារនៅប្រទេសកម្ពុជា៖ តំណភ្ជាប់ជាមួយសេដ្ឋកិច្ចនាពេលខាងមុខ។

លោកស្រី អ៊ិនហ្គូណា ដូប្រាចា ប្រធានគ្រប់គ្រងធនាគារពិភពលោកប្រចាំប្រទេសកម្ពុជា មានប្រសាសន៍ថា “ភាពចម្រុះ និងគុណភាពនៃការងារនៅក្នុងប្រទេសកម្ពុជា ត្រូវបានកែលម្អឱ្យប្រសើរឡើងជាបណ្តើរៗហើយ”។

លោកស្រី បានបន្ថែមថា “ប៉ុន្តែនិន្នាការសកល មានដូចជាការកើនឡើងនូវចំនួនរបស់វណ្ណៈកណ្តាលក្នុងតំបន់អាស៊ី បម្រែបម្រួលលំនាំក្នុងការធ្វើពាណិជ្ជកម្ម និងស្វ័យប្រវត្តិកម្ម តម្រូវឱ្យកម្ពុជាគិតគូរឡើងវិញអំពីយុទ្ធសាស្ត្រការងាររបស់ខ្លួន ខណៈដែលប្រទេសនេះកំពុងឈានឆ្ពោះទៅកាន់ដំណាក់កាលមួយទៀតនៃការអភិវឌ្ឍផ្អែកលើការនាំចេញ”។

របាយការណ៍នេះស្នើជូនអនុសាសន៍បែបយុទ្ធសាស្រ្ត៤ ដើម្បីធានាសម្រាប់ឲ្យមានការងារច្រើននិងប្រសើរនាពេលអនាគត៖ ធ្វើពិពិធកម្មវិស័យនាំចេញឲ្យចូលក្នុងខ្សែចង្វាក់តម្លៃនៃតម្លៃបន្ថែម បង្កើតបរិយាកាសធុរកិច្ចក្នុងស្រុកដែលគាំទ្រដល់ការរីកលូតលាស់នៃក្រុមហ៊ុនក្នុងស្រុក ពង្រឹងការតភ្ជាប់រវាងវិស័យការងារក្នុងស្រុកនិងការនាំចេញនៃសេដ្ឋកិច្ច និងការវិនិយោគលើជំនាញនិងការអប់រំនៃកម្មករ។

របាយការណ៍បានលើកឡើងជាគោលនយោបាយជាក់លាក់ពាក់ព័ន្ធការងារចំនួន ៧ ដែលអាចជួយសម្រេចបានយុទ្ធសាស្រ្តនេះ៖ ទី១ ធ្វើពិពិធកម្មវិស័យនាំចេញនិងការវិនិយោគផ្ទាល់ពីបរទេស ឱ្យចូលទៅក្នុងខ្សែចង្វាក់តម្លៃនៃតម្លៃបន្ថែមកាន់តែខ្ពស់។ បច្ចុប្បន្ននេះ ការងារភាគច្រើនៗតែស្ថិតនៅក្នុងផ្នែកណាដែលមានតម្លៃទាបនៃខ្សែចង្វាក់តម្លៃសកល (global value chains)។

ការកែសម្រួលដំណើរការឱ្យសាមញ្ញ ការផ្តល់ការលើកទឹកចិត្តដល់វិនិយោគិនប្រទេស និងការបង្កើតសេវាត្រួតពិនិត្យធានាគុណភាព នឹងជួយជំរុញការធ្វើពិពិធកម្មនៃវិស័យនាំចេញនិងការវិនិយោគផ្ទាល់ពីបរទេស ឱ្យចូលទៅក្នុងខ្សែចង្វាក់តម្លៃនៃតម្លៃបន្ថែមកាន់តែខ្ពស់ ឬទៅក្នុងផ្នែកណាមួយនៃខ្សែចង្វាក់តម្លៃ។

ទី២ សម្រួលដំណើរការនីតិវិធីឱ្យរលូន និងកាត់បន្ថយចំណាយថ្លៃដើមលើការបង្កើតនិងការពង្រីកសហគ្រាសខ្នាតតូចនិងមធ្យម ដែលមានសក្តានុពលច្រើនគួរសមនៅក្នុងការបង្កើតការងារ។ គោលនយោបាយទាំងនេះ រួមទាំងការកាត់បន្ថយការចំណាយលើធុរកិច្ចសម្រាប់ក្រុមហ៊ុនក្នុងស្រុក ការបង្កើនការចូលរួមរបស់ក្រុមហ៊ុនក្នុងការអភិវឌ្ឍជំនាញសម្រាប់កម្មករ ការបង្កើនការទទួលបានហិរញ្ញវត្ថុតាមរយៈកម្មវិធីជំនួយនិងការលើកទឹកចិត្តសារពើពន្ធ និងការផ្តល់ការគាំទ្រដល់ក្រុមហ៊ុនក្នុងការជ្រើសរើសកម្មករ។

ទី ៣. ជួយដល់អាជីវកម្មតាមគ្រួសារឱ្យពង្រីកផលិតភាពរបស់ខ្លួន និងបង្កើតការងារកាន់តែល្អឡើង។ អាជីវកម្មតាមគ្រួសារ ផ្តល់ការងារមួយក្នុងចំណោមការងារប្រាំ ហើយគេរំពឹងថាចំណែកការងារក្នុងអាជីវកម្មតាមគ្រួសារនេះនឹងកើនឡើងថែមទៀត ជាមួយនឹងការរីកចម្រើនរបស់ទីក្រុង។

បច្ចេកវិទ្យាព័ត៌មាន ឧទាហរណ៍ អាចជួយអាជីវកម្មតាមផ្ទះឱ្យបង្កើនគុណភាពនៃទម្លាប់អនុវត្តជាមូលដ្ឋានក្នុងការធ្វើធុរកិច្ចរបស់ខ្លួន និងសមត្ថភាពរកបានទីផ្សារកាន់តែធំ។ទី ៤. គាំទ្រការអភិវឌ្ឍបណ្តាញតភ្ជាប់រវាងក្រុមហ៊ុនវិនិយោគផ្ទាល់ពីបរទេសសម្រាប់ការនាំចេញ និងក្រុមហ៊ុនផ្គត់ផ្គង់ធាតុចូលក្នុងស្រុក ឧទាហរណ៍ ដោយផ្តល់ការលើកទឹកចិត្តដល់ក្រុមហ៊ុនគ្រប់គ្រងដោយជនបរទេសណាដែលជាវធាតុចូលពីសហគ្រាសខ្នាតតូចនិងមធ្យមក្នុងស្រុកយកទៅប្រើប្រាស់ ការបង្កើតជាបញ្ជីមួយដែលភ្ជាប់អ្នកផ្គត់ផ្គង់ក្នុងស្រុកជាមួយនឹងសមត្ថភាពជាដៃគូជាមួយក្រុមហ៊ុនបរទេស និងការបង្កើតកម្មវិធីអភិវឌ្ឍអ្នកផ្គត់ផ្គងក្នុងស្រុក។

ទី ៥. កសាងប្រព័ន្ធអភិវឌ្ឍន៍ជំនាញមួយដែលនឹងអាចទាក់ទាញបានការវិនិយោគផ្ទាល់ពីបរទេសដែលមានតម្លៃកាន់តែខ្ពស់ និងបង្កើនផលិតភាពនៅតាមគ្រប់ផ្នែកនៃសេដ្ឋកិច្ច។ កម្លាំងពលកម្មនៅប្រទេសកម្ពុជានាពេលបច្ចុប្បន្ននេះ ទទួលបានកម្រិតអប់រំជាមធ្យមបានត្រឹមតែ ៦,៣ឆ្នាំទេ។

អ្នកធ្វើគោលនយោបាយគួរតែផ្តោតលើការធ្វើកំណែទម្រង់ប្រព័ន្ធអប់រំសព្វថ្ងៃនេះ ដើម្បីជួយពលករនៅថ្ងៃស្អែក(ថ្ងៃខាងមុខ) ឱ្យទទួលបានជំនាញច្រើនមុខ ដែលចាំបាច់សម្រាប់ធ្វើការនៅក្នុងសេដ្ឋកិច្ចដែលពឹងផ្អែកលើចំណេះដឹងខ្លាំង ហើយធ្វើការពាក់ព័ន្ធសហគ្រាសនានាឱ្យចូលរួមក្នុងការរចនារៀបចំ ផ្តល់ហិរញ្ញប្បទាន និងការគាំទ្រដល់ប្រព័ន្ធបណ្តុះបណ្តាល បច្ចេកទេសនិងវិជ្ជាជីវៈមួយ ដើម្បីជាប្រយោជន៍ដល់កម្មករនាបច្ចុប្បន្ននេះ។

ទី៦. លើកកម្ពស់ចល័តភាពនៃកម្លាំងពលកម្មនិងការផ្គូផ្គងជំនាញជាមួយការងារ ឱ្យមានប្រសិទ្ធផលខ្ពស់ ដោយបើកឱ្យមានបណ្តាញផ្លូវការសម្រាប់ការធ្វើចំណាកស្រុកជាអន្តរជាតិ និងរៀបចំកម្មវិធីគាំទ្រនានាដែលលើកទឹកចិត្តដល់ការធ្វើចំណាកស្រុកជាលក្ខណៈវិលជុំ និងតាមរយៈការផ្សព្វផ្សាយព័ត៌មានអំពីឱកាសការងារទាំងក្នុងនិងក្រៅប្រទេសដល់និស្សិត អ្នកស្វែងរកការងារ វិទ្យាស្ថានអប់រំនិងបណ្តុះបណ្តាល និងនិយោជក ដើម្បីឱ្យជម្រើសក្នុងការភិវឌ្ឍជំនាញអាចសម្របខ្លួនស៊ីគ្នាជាមួយនឹងតម្រូវការទីផ្សារការងារដែលកំពុងមានការវិវត្តប្រែប្រួល។

ទី៧. យកមកវិញឱ្យបាននូវឯករាជ្យភាពផ្នែកម៉ាក្រូសេដ្ឋកិច្ច និងអត្រាប្តូរប្រាក់មួយដែលមានភាពបត់បែន។ ដំណើរឡើងចុះតម្លៃប្រាក់ដុល្លារអាមេរិកជះឥទ្ធិពលយ៉ាងខ្លាំងដល់វិស័យពាណិជ្ជកម្មនិងទំនិញរបស់កម្ពុជា ដែលទទួលខុសត្រូវលើការបង្កើតការងារភាគច្រើនរបស់ប្រទេស។

នៅពេលដែលប្រទេសកម្ពុជាចាប់ផ្តើមនាំចេញទៅកាន់ប្រទេសនានាកាន់តែច្រើន ស្ថិរភាពម៉ាក្រូសេដ្ឋកិច្ចនិងសារពើពន្ធ នឹងជួយការពារការងារដែលមានស្រាប់ពីកត្តានានាដែលពាក់ព័ន្ធជាមួយប្រាក់ដុល្លារអាមេរិក៕

រដ្ឋបាលរាជធានីភ្នំពេញគ្រោងកែលម្អមហាវិថីម៉ៅសេទុងឱ្យមានផ្លូវថ្មើរជើងឆាប់ៗខាងមុខនេះ

ដោយ វុត្ថា

ភ្នំពេញ៖ ក្រោមគំនិតផ្ដួចផ្ដើមរបស់លោក អភិបាលរាជធានីភ្នំពេញ នឹងរៀបចចំគម្រោងកែលម្អមហាវិថីម៉ៅសេទុង ឱ្យមានផ្លូវថ្មើរជើងតាមបណ្ដោយមហាវិថី នាថ្ងៃអនាគត ខណៈពេលនេះ រដ្ឋបាលរាជធានីភ្នំពេញបាននឹងកំពុងសិក្សាលំអិត។

លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបាន បានប្រាប់គេហទំព័រ propertyarea.asia នៅថ្ងៃទី ២០ ខែវិច្ឆិកា ឆ្នាំ ២០១៩ នេះ ឱ្យដឹងថា រដ្ឋបាលរាជធានីភ្នំពេញបាននឹងកំពុងសិក្សាលើគម្រោងកែលម្អផ្លូវមួយនេះ ដើម្បីសម្រួលដល់ការធ្វើដំណើរថ្មើជើងរបស់ប្រជាពលរដ្ឋនៅក្នុងទីក្រុងភ្នំពេញ។

លោកបន្តថា “នេះ គឺជាគំនិតផ្តួចផ្តើមរបស់លោក អភិបាលរាជធានីភ្នំពេញឱ្យមានផ្លូវថ្មើជើងច្រើនជាងបច្ចុប្បន្ននេះ និងច្រើនកន្លែង ហើយកន្លែងនីមួយៗមានសោភណភាពស្អាតដូចនៅក្នុងគម្រោងរចនាដែលជាគំរូរបស់យើងអញ្ចឹង”។លោកបន្ថែមទៀតថា “យើងមិនទាន់កំណត់ពេលណាថានឹងត្រូវធ្វើនៅពេលនោះទេ ព្រោះយើងទើបនឹងចាប់ផ្តើមសិក្សា បន្ទាប់ពីសិក្សាបញ្ចប់ រដ្ឋបាលរាជធានីភ្នំពេញនឹងជូនដំណឹងបន្តទៀត”។

លោកបន្ថែទៀថា ជាធម្មតា ក្រោយកិច្ចប្រជុំម្តងៗ យើងតែងតែដកស្រង់ខ្លឹមសារខាន់ៗ ឬ សម្រង់ដីនានា យកមកចុះផ្សាយនៅក្នុងហ្វេសបុកផេក ដើម្បីឱ្យអ្នកសារព័ត៌មានយកទៅចុះផ្សាយបន្ត និងឱ្យពលរដ្ឋបានជ្រាបពីគម្រោងរបស់រដ្ឋាបាលរាជធានីភ្នំពេញ តែយើងមិនបានកំណត់ពេលវេលាជាក់លាក់ថាធ្វើនៅពេលណានោះទេ។

អ្នកនាំពាក្យរូបនេះ បញ្ជាក់ទៀតថា គម្រោងនេះ មិនមែនជាគម្រោងទី ១ របស់រដ្ឋបាលរាជធានីភ្នំពេញនោះទេ ព្រោះកន្លងមករដ្ឋបាលរាជធានីភ្នំពេញបានធ្វើនៅតាមបណ្តោយផ្លូវសហព័ន្ធរុស្សី និងផ្លូវព្រះនរោត្តមជាដើម។

លោកម៉េត មាសភក្តីបញ្ជាក់ទៀតថា បន្ថែមពីនេះ រដ្ឋបាលរាជធានីភ្នំពេញគ្រោងរៀបចំផ្លូវសំខាន់ៗនានានៅក្នុងរាជធានីភ្នំពេញ ឱ្យមានផ្លូថ្មើជើងជាអាទិភាពមុនគេ ហើយនៅពេលបញ្ចប់នូវផ្លូវសំខាន់ៗ ទាំងនោះ រដ្ឋបាលរាជធានីភ្នំពេញនឹងបន្តទៅរៀបចំគម្រោងនៅតាមបណ្តោយផ្លូវតូចៗបន្តទៀត។

រដ្ឋបាលរាជធានីភ្នំពេញកាលពីថ្ងៃទី១៩ ខែវិចិ្ឆកា ឆ្នាំ២០១៩ម្សិលមិញនេះបានបើកកិច្ចប្រជុំស្ដីពីគម្រោងសិក្សារៀបចំ និងកែលម្អផ្លូវថ្មើរជើងតាមបណ្ដោយមហាវិថីម៉ៅសេទុង ដើម្បីផ្ដល់ភាពងាយស្រួលដល់បងប្អូនប្រជាពលរដ្ឋជាពិសេសបងប្អូនជនពិការ មានផ្លូវថ្មើរជើងសម្រាប់ធ្វើដំណើរឆ្លងកាត់៕

Wikipedia បើកវេទិកាប្រព័ន្ធផ្សព្វផ្សាយសង្គមប្រឆាំងនឹងហ្វេសប៊ុកដោយគ្មានការផ្សព្វផ្សាយពាណិជ្ជកម្ម

ដោយ Donald Lee

ភ្នំពេញៈ ស្ថាបនិក Wikipedia លោក Jimmy Wales បានបង្កើតវេទិកាប្រព័ន្ធផ្សព្វផ្សាយសង្គម ប្រឆាំងនឹងហ្វេសប៊ុក ដែលមានឈ្មោះថា WT: Social ដើម្បីប្រឆាំងនឹងមាតិកា ដែលមានគុណភាពទាប ដោយរុញច្រានចេញដោយFacebook និង Twitter។

ស្ថាបនិកវិគីភីឌា បានផ្សាយនូវព័ត៌មានដ៏មានឥទ្ធិពល លើបណ្តាញសង្គមយក្ស Facebook និង Twitter កំពុងធ្វើចំពោះសង្គម ហើយហេតុអ្វីបានជាវាចាំបាច់ ក្នុងការបង្កើតវេទិកាជំនួស ដូចជា WT: Social ដែលលើកកម្ពស់ការពិភាក្សាដោយស្មោះត្រង់ និងផ្តល់នូវមាតិកាដែលមានគុណភាព។

លោក Wales បាននិយាយថា“ខ្ញុំបានសន្និដ្ឋានថា បញ្ហាធំបំផុតដែលជំរុញឱ្យប្រព័ន្ធផ្សព្វផ្សាយ ដែលមានគុណភាពទាប គឺវាត្រូវបានគេគាំទ្រការផ្សាយពាណិជ្ជកម្មសុទ្ធសាធ ហើយបណ្តាញសង្គម ដែលផ្តល់ការចែកចាយច្រើន ក៏ត្រូវបានគាំទ្រការផ្សាយពាណិជ្ជកម្មសុទ្ធសាធដែរ”។ លោកបន្តថា Facebook, Twitter និងបណ្តាញសង្គមដទៃទៀតរកប្រាក់ ចំណូលបានផ្អែកលើរយៈពេល ដែលអ្នកនៅលើគេហទំព័ររបស់ពួកគេមើ ល និងចុចលើការផ្សាយពាណិជ្ជកម្ម។ ការចូលរួមត្រូវបានផ្តល់អាទិភាពលើគុណភាព”។

លោក Wales បានបញ្ជាក់ថា WT:Social នឹងមានភាពខុសគ្នា ព្រោះវានឹងមិនត្រូវបានគាំទ្រ ដោយប្រាក់ចំណូលពីការផ្សាយពាណិជ្ជកម្ម ហើយនឹងត្រូវបានគាំទ្រដោយការបរិច្ចាគស្រដៀងនឹងវិគីភីឌា។

លោក Wales បានសរសេរថា “ជំនួសឱ្យការដោះស្រាយរបស់យើងប្រសើរ ចំពោះអ្នកដែលញៀន និងធ្វើឱ្យអ្នកចុច យើងនឹងរកលុយបាន ប្រសិនបើអ្នកជ្រើសរើសគាំទ្រយើងដោយស្ម័គ្រចិត្ត ដែលមានន័យថាគោលដៅរបស់យើង មិនមែនជាការចុចទេ ប៉ុន្តែពិតជាមានអត្ថន័យចំពោះជីវិតរបស់អ្នក”។

លោកWales បាននិយាយថា វេទិកានេះមានគោលបំណងឱ្យមានអ្នកប្រើប្រាស់ពី ៥០ ទៅ៥០០លាននាក់ចូលរួមក្នុងបណ្តាញសង្គម ហើយទិន្នន័យផ្ទាល់ខ្លួនរបស់អ្នកប្រើប្រាស់ទាំងអស់នឹងត្រូវបានការពារ។

គេហទំព័រនេះបាននិយាយថា “យើងនឹងមិនលក់ទិន្នន័យរបស់អ្នកឡើយ។ វេទិការបស់យើងនៅរស់រានមានជីវិត ដោយសប្បុរសធម៌របស់អ្នកបរិច្ចាគម្នាក់ៗ ដើម្បីធានាថា ភាពឯកជនត្រូវបានការពារ ហើយចន្លោះសង្គមរបស់អ្នកគ្មានការផ្សាយពាណិជ្ជកម្ម”។

បណ្តាញសង្គម Twitter បានសម្រេចចិត្តហាមឃាត់ការផ្សាយពាណិជ្ជកម្ម នយោ បាយនៅលើវេទិការបស់ខ្លួននៅឆ្នាំនេះ ដោយសារតែយុទ្ធនាការផ្សព្វផ្សាយព័ត៌មានមិនត្រឹមត្រូវ ត្រូវបានផ្សព្វផ្សាយព័ត៌មានមិនពិតនៅលើបណ្តាញសង្គមខ្លួន។

ការសម្រេចរបស់វេទិកានេះ គឺផ្ទុយស្រឡះពីការសម្រេចចិត្តរបស់ហ្វេសប៊ុក ក្នុងការរក្សានូវសមត្ថភាពសម្រាប់អង្គការ ឬប្រជាជន ក្នុងការបង់ប្រាក់សម្រាប់ការផ្សាយពាណិជ្ជកម្មនយោបាយ និងជំរុញដល់ការផ្សព្វផ្សាយ។

ការស៊ើបអង្កេតរបស់រដ្ឋាភិបាលអាមេរិកបានបង្ហាញថា ប្រតិបតិ្តការរបស់រុស្ស៊ីបានប្រើប្រាស់វេទិកានេះយ៉ាងទូលំទូលាយ នៅក្នុងយុទ្ធនាការផ្តល់ព័ត៌មានមិនត្រឹមត្រូវរបស់ពួកគេ ក្នុងអំឡុងការបោះឆ្នោតប្រធានាធិបតីអាមេរិកឆ្នាំ២០១៦ ដើម្បីជ្រើសរើសប្រធានាធិបតីអាមេរិក Donald Trump។

លោក Mark Zuckerberg បានចង្អុលបង្ហាញ នៅក្នុងសេចក្តីថ្លែងការណ៍ជាសាធារណៈថា ការទប់ស្កាត់ការផ្សព្វផ្សាយនយោបាយ នឹងរំលោភលើការបញ្ចេញមតិដោយសេរី។

ផ្ទុយទៅវិញ លោក Wales បាននិយាយថា អ្នកប្រើប្រាស់វេទិកាប្រព័ន្ធផ្សព្វផ្សាយសង្គមថ្មីរបស់លោក នឹងលុបបំបាត់តួអង្គអាក្រក់ ដែលផ្សព្វផ្សាយព័ត៌មានមិនពិត។

វេទិកានេះបញ្ជាក់ថាថា “WikiTribune ក្លាយជាបណ្តាញសង្គមសម្រាប់មនុស្សដូចអ្នកដែលនៅតែមានជំនឿលើសេចក្តីពិត។

យើងនៅទីនេះ ដើម្បីបង្កើតការតភ្ជាប់ល្អប្រសើរ និងអភិវឌ្ឍការពិភាក្សាប្រកបដោយផលិតភាពជុំវិញអ្វីៗ ដែលកំពុងកើតឡើងនៅលើពិភពលោក និងមានសារៈសំខាន់សម្រាប់យើង។ នៅពេលបណ្តាញសង្គមមានការរីកចម្រើន ពួកគេក៏បានពង្រីកសំលេងរបស់តួអង្គអាក្រក់នៅទូទាំងពិភពលោក”៕