ដោយ វុត្ថា
ភ្នំពេញៈ រដ្ឋបាលរាជធានីភ្នំពេញ បានសម្រេចទទួលយកតាមគម្រោងគំរូប្លង់ស្ពានអាកាសថ្មើរជើងចំនួន២ ទីតាំងរបស់ក្រុមហ៊ុន Space Media បន្ទាប់ពីក្រុមហ៊ុនចុះសិក្សារួមគ្នាជាមួយមន្ទីរសាធារណការ និងដឹកជញ្ជូនរាជធានីភ្នំពេញ និងមន្ទីររៀបចំដែនដី នគរូបនីយកម្ម សំណង់ និងសុរិយាដី។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឱ្យដឹងនៅថ្ងៃទី១៥ ខែវិច្ឆិកានេះថា ពិធីបើកការដ្ឋានសាងសង់ជាផ្លូវការ នូវស្ពានអាកាសថ្មើរជើងទាំងពីរនេះ មិនទាន់បានកំណត់ពេលវេលាជាក់លាក់នៅឡើយទេ តែយ៉ាងណាក៏ដោយលោកថា មិនជាយូរនោះទេ ពោលគឺនឹងធ្វើឡើងនៅក្នុងពេលឆាប់ៗនេះ។
លោកថា “មកដល់ពេលនេះយើងមិនទាន់កំណត់ពេលណាថា នឹងបើករដ្ឋានសាងសង់នោះទេ ប៉ុន្តែតាមផែនការគឺក្នុងពេលឆាប់ៗនេះ ហើយការសាងសង់អាចចំណាយពេលមួយឆ្នាំទើបបញ្ចប់”។លោកបន្តថា “ចំណែកថវិកាសាងសង់វិញ គឺជាគម្រោងថវិការរបស់រដ្ឋបាលរាជធានីភ្នំពេញ តែមិនទាន់បានកំណត់ថាមានទំហំប៉ុណ្ណានោះទេ ”។
យោងតាមការចុះផ្សាយសារព័ត៌មានក្នុងស្រុកងបានឱ្យដឹងថា រដ្ឋបាលរាជធានីសន្យាស្ថាបនាស្ពានអាកាសថ្មើរជើងចំនួន២កន្លែង នៅត្រង់ផ្សារដើមគរ និងមុខសាសាបឋមសិក្សាសន្ធរម៉ុក និងគ្រោងបញ្ចប់នៅពាក់កណ្តាលឆ្នាំ២០២០ ខាងមុខ ខណៈដែលកុ្រមការងារជំនាញ បានចាប់ផ្តើមកំណត់ទីតំាងស្ថាបនា និងខួងដីយកទៅពិសោធន៍រួចរាល់។
លោក ឃួង ស្រេង អភិបាលរាជធានីភ្នំពេញបានថ្លែងនៅក្នុងកិច្ចប្រជុំស្ដីពី ការសុំច្បាប់ និងបើកការដ្ឋានសាងសង់ស្ពានអាកាសថ្មើរជើងរបស់ក្រុមហ៊ុន Space Media កាលពីម្សិលមិញនេះថា ការពន្លឿនស្ថាបនាស្ពានអាកាសថ្មើរជើងទំាង២កន្លែងនេះ ដោយសារតែមានការគាំទ្រពីប្រជាពលរដ្ឋ ចង់ឲ្យមានការស្ថាបនាឲ្យបានឆាប់។
លោកបន្តថា គម្រោងស្ថាបនាស្ពានអាកាសថ្មើរជើងនៅតំបន់មុខផ្សារ ដើមគរក្រុមមន្រ្តីជំនាញ បានចាប់ផ្តើមស្ថាបនាជាបណ្តើរៗហើយ ដូចជាការកំណត់ទីតំាងការដ្ឋាន ការខួងដីយកទៅពិសោធន៍ និងការដោះស្រាយផលប៉ៈពាល់ជាមួយប្រជាពលរដ្ឋ។
លោកឃួង ស្រេង បានបញ្ជាក់ទៀតថា ចំណែកគម្រោងស្ថាបនាស្ពានអាកាសថ្មើរជើង នៅត្រង់មុខសាលាបឋមសិក្សាសន្ធរម៉ុកវិញ អាចនឹងចុះកំណត់ទីតំាងស្ថាបនានៅសប្តាហ៍ក្រោយ ដោយសារក្រុមអ្នកជំនាញ ត្រូវការសិក្សាឲ្យបានល្អិតល្អន់បន្ថែមទៀត ព្រោះស្ពានអាកាសនេះ នៅលើចំនុចផ្លូវប្រសព្វទំាង៤ទិសតែម្តង ដើម្បីបង្កលក្ខណៈងាយស្រួលដល់សិស្សានុសិស្សបានឆ្លងកាត់ផ្លូវនេះ ដោយសុវត្ថិភាពទោះពួកគេមកពីទិសខាងណាក៏ដោយ។
លោកបន្ថែមថា “គម្រោងស្ថាបនាស្ពានអាកាសថ្មើរជើងទំាង២នេះ នឹងស្ថាបនាឡើងឲ្យធានាបានគុណភាពខ្ពស់បំផុត រហូតដល់ ៥០ឆ្នាំឡើងទៅ ពិសេសការរចនាជណ្តើរឡើង ឲ្យមានភាពងាយស្រួលឡើងចុះទំាងកុមារនិងមនុស្សចាស់ ដែលអាចធ្វើដំណើរឆ្លងកាត់បាន”។
តំណាងក្រុមហ៊ុន Space Media ដែលទទួលសិទ្ធិក្នុងស្ពានអាកាសថ្មើរជើងទំាង២កន្លែងនេះ បានសន្យានឹងអនុវត្តន៍ផែនការស្ថាបនា គ្រោងស្ពានអាកាសថ្មើរជើងទំាង២កន្លែងនេះអោយ ហើយតាមផែនការកំណត់ ហើយប្រកបដោយគុណភាពនិងសោភ័ណភាព ដើម្បីទាក់ទាញប្រជាពលរដ្ឋឲ្យធ្វើដំណើរឆ្លងកាត់ស្ពានអាកាសថ្មើរជើងនេះ។
មកដល់ពេលនេះរាជធានីភ្នំពេញ មានស្ពានអាកាសថ្មើរជើងចំនួន៣កន្លែងហើយ ដោយនៅតំបន់ជម្ពូវ័ន្តខណ្ឌពោធិសែនជ័យមានចំនួន២កន្លែង និងនៅតំបន់ភ្លើងស្តុបនាងគង្ហីង មានចំនួន១កន្លែង ហើយរដ្ឋបាលរាជធានីភ្នំពេញ គ្រោងពង្រីកគម្រោងស្ថាបនានេះឲ្យបានច្រើនកន្លែងបន្ថែមទៀត ដើម្បីឆ្លើយតបទៅនឹងប្រទេសជាតិ មានការអភិវឌ្ឍនិងទីក្រុងមានភាពស៊ីវិល័យ និងបង្កលក្ខណៈងាយស្រួលដល់ប្រជាពលរដ្ឋ ឆ្លងកាត់ផ្លូវប្រកបដោយសុវត្ថិភាព៕
