ទំហំពាណិជ្ជកម្មរវាងកម្ពុជា-កាណាដាកើនដល់ ១ពាន់លានដុល្លារ

ដោយ វុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអះអាងថា ប្រទេសកាលណាបានដើរតួនាទីយ៉ាងសំខាន់ក្នុងការអភិវឌ្ឍរបស់ប្រទេសកម្ពុជា ដូចជាក្នុងការស្វែងរកសន្តិភាពសម្រាប់កម្ពុជា ក្នុងនោះប្រទេសកាណាដាក៏បានចូលរួមក្នុងវិស័យសំខាន់ៗផងដែរ ដូចជាការវិនិយោគ ពាណិជ្ជកម្ម ការបោសសំអាតមីនវិស័យធនាគារ និងអប់រំជាដើម។

សម្តេចតេជោ ហ៊ុន សែន នៅក្នុងជំនួបពិភាក្សាការងារជាមួយឯកអគ្គរដ្ឋទូតកាណាដាចប់អាណត្តិ លោកស្រី Domica Pottie កាលពីល្ងាចថ្ងៃទី ១១ ខែតុលា ឆ្នាំ ២០១៩ បានឱ្យដឹងថា សម្រាប់ទំហំពាណិជ្ជកម្មរវាងកាណាដា និងកម្ពុជាវិញជាង១ពាន់លានដុល្លារ ហើយផលិតផលរបស់កម្ពុជាដែលនាំចេញទៅកាន់ប្រទេសកាណាដាច្រើននោះគឺសម្លៀកបំពាក់។

លោកស្រី Domica Pottie ឯកអគ្គរដ្ឋទូតកាណាដា ដែលចប់អណត្តិបានឱ្យដឹង ថា កម្ពុជា និងកាណាដាមានទំនាក់ទំនងជាមួយគ្នាជាយូរមកហើយ ហើយក៏បានចូលរួមក្នុងកិច្ចការជាច្រើនជាមួយប្រទេសកម្ពុជាផងដែរ។ លោកស្រី ក៏បានសម្ដែងការពេញចិត្ត និងបានកោតសរសើរចំពោះការរីកចម្រើនរបស់ប្រទេសកម្ពុជា ក្រោមការដឹកនាំរបស់សម្ដេចតេជោជានាយករដ្ឋមន្ត្រី។

លោកស្រីក៏មានការពេញចិត្តផងដែរសំរាប់ទំនាក់ទំនងរវាងប្រទេសទាំងពីរកម្ពុជាកាណាដា។ លោកស្រីក៏បានកោតសរសើរចំពោះរាជរដ្ឋាភិបាលកម្ពុជាដែលបានយកចិត្តទុកដាក់ចំពោះបងប្អូនកម្មករ កម្មការិនីដែលបម្រើការងារលើវិស័យវឧស្សាហកម្មនេះ។

ជាពិសេសការផ្ដល់នូវតម្រូវការសំខាន់ដល់កម្មករដូចជា ការគិតគូរពីកន្លែងធ្វើការ ប្រាក់ខែ និងរបបគាំពារសង្គមជាដើមជាពិសេសស្ត្រីដែលមានផ្ទៃពោះនោះ។ ដែលចំណុចនេះធ្វើឲ្យលោកស្រីក៏ដូចជាប្រទេសកាណាដាកាន់តែមានជំនឿទុកចិត្តមកលើប្រទេសកម្ពុជា ជាពិសេសការដឹកនាំរបស់សម្ដេចតេជោ ហ៊ុន សែន ជានាយករដ្ឋមន្ត្រី៕

តម្លៃប្រេងសកលឡើងថ្លៃ ខណៈនាវាដឹកប្រេងអ៊ីរ៉ង់ត្រូវបានវាយប្រហារដោយមីស៊ីល

ដោយ Donald Lee

ភ្នំពេញៈ តម្លៃប្រេងនៅជុំវិញពិភពលោកបានកើនឡើង បន្ទាប់ពីមានព័ត៌មានថា នាវាដឹកប្រេងអ៊ីរ៉ង់មួយគ្រឿង នៅសមុទ្រក្រហមត្រូវបានវាយប្រហារ ដោយមីស៊ីលពីប្រទេសអារ៉ាប់ប៊ីសាអូឌីត។ នេះបើយោងតាមរបាយការណ៍របស់ទូរទស្សន៍អ៊ីរ៉ង់។

នាវាដឹកប្រេងរបស់ក្រុមហ៊ុនប្រេងអ៊ីរ៉ង់ បានជួបប្រទះនឹងការផ្ទុះ ដែលបានធ្វើឱ្យកប៉ាល់ដឹកប្រេងនោះឆាបឆេះចម្ងាយ ១០០គីឡូម៉ែត្រ នៅឆ្នេរសមុទ្រ Jeddah ប្រទេសអារ៉ាប់ប៊ីសាអូឌីតកាលពីថ្ងៃសុក្រ។ សារព័ត៌មានអ៊ីរ៉ង់បានរាយការណ៍ថា នាវានេះបានលេចធ្លាយប្រេងច្រើនទៅក្នុងសមុទ្រ។

ក្រុមហ៊ុនដឹកប្រេងជាតិអ៊ីរ៉ង់ (NITC) បានចេញសេចក្តីថ្លែងការណ៍មួយដោយបង្ហាញថា ការផ្ទុះនេះកើតឡើងភាគច្រើនមកពីការវាយប្រហារដោយមីស៊ីល។

ប្រេងឆៅប្រភេទ Brent នាពេលអនាគត បានកើនឡើងជាងពីរភាគរយ ដល់ ៦០,២៦ដុល្លារក្នុងមួយបារ៉ែល។

នេះជាឧប្បត្តិហេតុទី២ ទាក់ទងនឹងផលិតកម្មប្រេងនៅមជ្ឈឹមបូព៌ា ចាប់តាំងពីខែ កញ្ញា។ នៅថ្ងៃទី ១៤ ខែ កញ្ញា រោងចក្រកែច្នៃធំជាងគេ នៅលើពិភពលោកនៅអារ៉ាប់ប៊ីសាអូឌីត រងការវាយប្រហារដោយយន្តហោះគ្មានមនុស្សបើក ដែលបានបំផ្លាញប្រេងជិត ៦លានបារ៉ែលពីទីផ្សារពោល គឺជិតពាក់កណ្តាលនៃផលិតកម្មអារ៉ាប់ប៊ីសាអូឌីត៕

សញ្ញាវិជ្ជមាន៖ កំណើនសេដ្ឋកិច្ចពិភពលោកនឹងងើបឡើងវិញនៅឆ្នាំ២០២០

ដោយ ម៉ាណេត

ភ្នំពេញៈ សេដ្ឋកិច្ចពិភពលោកបានចុះខ្សោយយ៉ាងខ្លាំង នៅឆ្នាំ២០១៩ ដល់២,៣ ភាគរយ នៃកំណើនផលិតផលសរុបក្នុងស្រុកដែលធ្លាក់ចុះពី៣.០ភាគរយ ក្នុងឆ្នាំ២០១៨ ខណៈការស្ទុះងើបឡើងវិញ តិចតួចនឹងកើតមាននៅឆ្នាំ២០២០ ដែលស្មើនឹង ២,៥ភាគរយ។ នេះបើយោងតាមរបាយការណ៍ចុងក្រោយរបស់ The Conference Board Global Economic Outlook 2020។

សេដ្ឋកិច្ចពិភពលោកនឹងកើនឡើងប្រហែល២,៧ភាគរយ នៅពាក់កណ្តាលទសវត្សបន្ទាប់។ អតិថិជននៅជុំវិញពិភពលោក នឹងទទួលបានអត្ថប្រយោជន៍ពីការកើនឡើងប្រាក់ឈ្នួល និងអត្រាអតិផរណាទាប ខណៈអាជីវកម្មបន្តបង្កើនការច្នៃប្រឌិត និងការផ្លាស់ប្តូរឌីជីថល ដើម្បីបង្កើនប្រាក់ចំណូលលំដាប់ឱ្យបានខ្ពស់ និងកាត់បន្ថយការចំណាយ ដើម្បីជៀសវាងការធ្លាក់ចុះយ៉ាងខ្លាំងលើប្រាក់ចំណេញ។

បន្ថែមលើការព្យាករណ៍សម្រាប់ឆ្នាំ២០២០ របាយការណ៍របស់ The Conference Board Global Economic Outlook 2020 ផ្តល់នូវការព្យាករណ៍សម្រាប់កំណើនទិន្នផលសេដ្ឋកិច្ចពិភពលោក ក្នុងនោះរួមមាន១១តំបន់ធំៗ និងការប៉ាន់ស្មានជាលក្ខណៈបុគ្គលសម្រាប់ ៣៣ ប្រទេស និងសេដ្ឋកិច្ចទីផ្សារលេចធ្លោ៣៦ សម្រាប់២០២០-២០២៤ និង ២០២៥-២៩២។

សមាសធាតុសំខាន់ នៃការងើបឡើងវិញនៅឆ្នាំ២០២០ គឺជាមូលដ្ឋានចុងក្រោយនៃការធ្លាក់ចុះនៃផលិតកម្មឧស្សាហកម្ម។

ការធ្លាក់ចុះនេះ ដែលមានដើមកំណើតនៅប្រទេសចិនក្នុងឆ្នាំ២០១៨ បានរីករាលដាលយ៉ាងឆាប់រហ័សនៅទូទាំងពិភពលោកក្នុងឆ្នាំ២០១៩ និងធ្វើឱ្យច្រវ៉ាក់ផ្គត់ផ្គង់សកលជំរុញសេដ្ឋកិច្ចមួយចំនួន (ដូចជានៅអាឡឺម៉ង់ និងជប៉ុន)។ ទីផ្សារដែលកំពុងរីកចម្រើន ជាពិសេសនឹងទទួលបានអត្ថប្រយោជន៍ ពីការងើបឡើងវិញនៃឧស្សាហកម្មការកើនឡើងតម្លៃទំនិញ និងថាមពល និងរូបិយប័ណ្ណមានស្ថេរភាព។

ប្រធានផ្នែកសេដ្ឋកិច្ចនៃក្រុមប្រឹក្សាសន្និសិទលោក Bart van Ark មានប្រសាសន៍ថា “សេដ្ឋកិច្ចពិភពលោកបានទទួលរងឥទ្ធិពលខ្លាំង នៅឆ្នាំ២០១៩ លើសពីការរំពឹងទុក ហើយវាហាក់ ដូចជាយើងបានឈានដល់ពិភពលោក ដែលកំពុងស្ថិតក្នុងសភាពទ្រឹងទ្រឹង”។

លោកបានបន្ថែមថា “ប៉ុន្តែទោះបីការភ័យខ្លាចវិបត្តិសេដ្ឋកិច្ច កំពុងរីករាលដាលក៏ដោយ យើងរំពឹងថានឹងមានការងើបឡើងវិញខ្លះនៅឆ្នាំ២០២០ នៅពេលដែលបញ្ហាអស្ថិរភាពរបស់ចិនកំពុងត្រូវបានដោះស្រាយ ខ្សែសង្វាក់ផ្គត់ផ្គង់កំពុងត្រូវបានរៀបចំឡើងវិញ ហានិភ័យនៃការកើនឡើងនៃជម្លោះពាណិជ្ជកម្ម បានថយចុះហើយកំណើនផលិតភាពនៅតែបន្តងើបឡើងវិញ”។

ខណៈពេលដែលលទ្ធផល នៅតែបន្តចុះកិច្ចសន្យាបណ្តោះអាសន្ន នៅទីតាំងមួយចំនួន (ឧទាហរណ៍នៅប្រទេសអាឡឺម៉ង់ អ៊ីតាលី ជប៉ុន ឬអង់គ្លេស) ក៏ដូចជានៅក្នុងទីផ្សារដែលកំពុងរីកចម្រើនមួយចំនួន (ដូចជាប្រេស៊ីល ម៉ិកស៊ិកកូ និងទួរគី) ទីផ្សារការងាររឹងមាំ និងការចំណាយរបស់អ្នកប្រើប្រាស់ខ្លាំង នឹងបន្តផ្តល់ការចូលរួមចំណែកដ៏សំខាន់ដល់កំណើនសម្រាប់ប្រទេសភាគច្រើន។

គម្លាតធំមិនធម្មតានាពេលបច្ចុប្បន្ន រវាងទំនុកចិត្តអតិថិជនខ្ពស់ និងទំនុកចិត្តអាជីវកម្មធ្លាក់ចុះយ៉ាងឆាប់រហ័ស ទំនងជានឹងត្រូវបានដោះស្រាយដោយពេញចិត្ត ក្នុងការលើកកម្ពស់ទំនុកចិត្តអាជីវកម្ម។

លោក Ataman Ozyildirim នាយកជាន់ខ្ពស់ផ្នែកស្រាវជ្រាវសេដ្ឋ កិច្ចនិងជាប្រធានស្រាវជ្រាវសាកលនៅសន្និសីទបានមានប្រសាសន៍ថា “អ្នកប្រើប្រាស់ពិតជាមិនស៊ាំនឹងព័ត៌មានអវិជ្ជមាននោះទេ ប៉ុន្តែពួកគេទំនងជាមិនឆ្លើយតប ទាល់តែមានហានិភ័យបង្កការគំរាមកំហែងភ្លាមៗដល់ការងារ ប្រាក់ចំណូល និងជីវិត”។

លោកបានបន្តថា “ទស្សនវិស័យខុសគ្នានឹងត្រូវខិតកាន់តែជិតគ្នា។ ភាពខ្លាំងរបស់អ្នកប្រើប្រាស់នឹងនៅតែបន្តមាន ខណៈទំនុកចិត្តអាជីវកម្មនឹងងើបឡើងវិញ ប្រសិនបើការធ្លាក់ចុះនៃផលិតកម្មឧស្សាហកម្ម និងភាពតានតឹងផ្នែកពាណិជ្ជកម្មបានធ្លាក់ចុះ”៕

គម្រោងអគារពាណិជ្ជកម្ម និងផ្សារទំនើបថ្មីៗចំនួន៧ បាននឹងកំពុងសាងសង់ប្រជែងគ្នានៅជុំវិញទីក្រុងកោះពេជ្រ

ដោយនៅ វឌ្ឍនា

ភ្នំពេញៈ អគារមជ្ឈមណ្ឌលពាណិជ្ជកម្មលំដាប់់ពិភពលោក និងផ្សារទំនើបចំនួន៧ បាននិងកំពុងប្រណាំប្រជែងគ្នា សាងសង់យ៉ាងសកម្មនៅសង្កាត់ពាណិជ្ជកម្ម រសរវើកជាងគេកណ្តាលក្រុងភ្នំពេញ ជាបណ្តុំនូវមជ្ឈមណ្ឌលពាណិជ្ជកម្មយ៉ាងស្កេកស្កះ ដែលនឹងធ្វើឲ្យទីក្រុងភ្នំពេញផ្លាស់ប្តូរមុខមាត់ទៅកាន់កម្រិតថ្មីមួយទៀត។

គេហទំព័រ Propertyarea.asia ដែលជាគេហទំព័ត៌អចលនទ្រព្យឈានមុខគេនៅកម្ពុជា នឹងលើកយកគម្រោងទាំងនោះនឹងរះឡើង នៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

១) អគារពាណិជ្ជកម្មចម្រុះ The Peak

The Peak ជាអគារពាណិជ្ជកម្ម ដែលខ្ពស់ជាងគេចំនួន៣នៅតំបន់ដ៏ទាក់ទាញនៃក្រុងភ្នំពេញ ដែលមានកម្ពស់៥៥ជាន់ស្មើនឹង២១៨ម៉ែត្រ។ គំរោងនេះកំពុងសាងសង់់នៅក្បែរស្ពាននាគកោះពេជ្រ ជាមួយនឹងទុនវិនិយោគ៥៨០លានដុលា្លរ បានចាប់បុកគ្រឹះបើកការដ្ឋានសាងសង់ហើយ នៅថ្ងៃទី៣ ខែឧសភា ឆ្នាំ២០១៦នេះ។

មជ្ឈមណ្ឌលពាណិជ្ជកម្មកម្ពស់៥៥ជាន់ដ៏ប្រណីត និងសណ្ឋានគារ The Shangri-La Hotel ប្រកបដោយកិត្យានុភាព ក្នុងពិភពលោកជាយូរណាស់មកហើយ។ ឥឡូវបានចាប់ផ្ដើមសាងសង់ក្នុងទឹកកម្ពុជា។ គម្រោងនេះមានខុនដូសរុបចំនួនប្រមាណ១០១៤ Unite។

មជ្ឈមណ្ឌលពាណិជ្ជកម្ម និងលំនៅដ្ឋានចម្រុះនេះ ត្រូវបានវិនិយោគដោយក្រុមហ៊ុន World Bridge Land Group និងក្រុមហ៊ុនOxley Holding ដែលមានមូលដ្ឋាននៅប្រទេសសឹង្ហបុរី។

២) អគារ Morgan Tower

អាគារ Morgan Tower បោះទុនវិនិយោគប្រមាណជា១៦០លានដុល្លារអាមេរិកក្នុងការសាងសង់អគារ ដែលមានឈ្មោះថា Morgan Tower ដែលមានកម្ពស់រហូតដល់ទៅ២១០ម៉ែត្រ ដែលស្មើទៅនឹង៤៦ជាន់។

អគារ Morgan Tower បាននឹងកំពុងសាងសង់ឡើង ដោយប្រើបច្ចេកវិទ្យាទំនើបដែលអាចសន្សំសំចៃថាមពលអគ្គសនី ដែលស្ថិតនៅក្នុងទីក្រុងកោះពេជ្រ វិនិយោគដោយ ក្រុមហ៊ុន Morgan Group ។ គំរោងនេះស្ថិតក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។

៣) គំរោងខុនដូនិងមជ្ឈមណ្ឌលពាណិជ្ជកម្ម CITY KEY

គំរោងនេះមានឈ្មោះ CITY KEY មានចំនួន៥២ជាន់ និងកំពស់២០៨ម៉ែត្រជាគំរោងខុនដូ និងមជ្ឈមណ្ឌលពាណិជ្ជកម្មថ្មីមួយ បាននិងកំពុងសាងសង់ ដែលវិនិយោគដោយក្រុមហ៊ុនមកពីប្រទេសចិន។

គំរោងដ៏ធំនេះ ស្ថិតនៅក្រោយអាគារ Bali Scenary និងអាគារThe Bridge ដែលស្ថិតក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។

៤) អគារ Thai Boon Roong Commercial Centre Twin Towers

អគារនេះមានកម្ពស់៥៨៦ម៉ែត្រ ស្ថិតនៅក្នុងទីក្រុងភ្នំពេញប្រទេសកម្ពុជា កំពុងស្ថិតនៅក្នុងដំណើរការសាងសង់។ នៅពេលសាងសង់បញ្ចប់អគារនេះ នឹងក្លាយជាអគារប្រើប្រាស់រួម មានទាំងការិយាល័យធ្វើការ ផ្សារទំនើប អាផាតម៉ិន ខុនដូលំដាប់អន្តរជាតិ សណ្ឋាគារកម្រិតផ្កាយ៦ និងសេវាកម្មកំសាន្តដ៏អស្ចារ្យជាច្រើនទៀត។

អគារភ្លោះមជ្ឈមណ្ឌលពាណិជ្ជកម្ម Thai Boon Roong របស់ប្រទេសកម្ពុជា ជាប់ជាអគារខ្ពស់ នៅក្នុងតំបន់អាស៊ាន ក៏ដូចជាខ្ពស់ជាងគេក្នុងនាមអាគារភ្លោះនៅលើពិភពលោក។ មជ្ឈមណ្ឌលពាណិជ្ជកម្មនេះ ស្ថិតក្នុងចំណោមអគារខ្ពស់កប់ពពកចំនួន៦ផ្សេងទៀត មកពីប្រទេសចំនួន៦នៅក្នុងតំបន់អាស៊ាន ហើយអគារទាំងនេះ នឹងក្លាយជាអគារខ្ពស់កប់ពពកនៅក្នុងតំបន់អាស៊ាន។

៥) គម្រោងសាងសង់អគារ Naga 3

ក្រុមហ៊ុន NagaCorp Ltd នៅភ្នំពេញ គ្រោងសាងសងសាខាថ្មី Naga 3 បាននិងកំពុងសាងសង់ក្រោមទុនវិនិយោគជិត៤០០០លានដុល្លារ និងរចនាដោយក្រុមហ៊ុនជំនាញខាងរចនាកាស៊ីណូ Steelman Partners LLP ។

ក្រុមហ៊ុន NagaCorp ដែលមានឈ្មោះក្នុងទីក្រុងហុងកុង មានអាជ្ញាប័ណ្ណផ្តាច់មុខក្នុងការប្រតិបត្តិការកាស៊ីណូនៅរាជធានីភ្នំពេញ និងតំបន់ជុំវិញ។

គម្រោងណាហ្គា៣ នឹងសាងសង់អាគារចំនួនប្រាំ នៅលើផ្ទៃដីចំនួន១៦,៨៣៧ ម៉ែត្រការ៉េ។ នៅពេលសាងសង់រួចរាល់គម្រោងណាហ្គា៣ ត្រូវបានរំពឹងថានឹងមានស ; ណ្ឋាគារកម្ពស់៦៦ជាន់ចំនួនពីរអាគារ សណ្ឋាគារកម្ពស់៤៥ជាន់ចំនួនពីរអាគារ នឹងខុនដូមួយដែលមានកំពស់៤៨ជាន់។

៦) គម្រោងផ្សារទំនើប The One Mall

គម្រោង The One Mall ដែលជាផ្សារទំនើបដ៏ធំ ក្នុងតំបន់កោះពេជ្រនឹងលេចចេញជារូបរាងនៅចំកណ្តាលរាជធានីភ្នំពេញ ដោយនឹងផ្តល់ជូននូវជម្រើសយ៉ាងសម្បូរបែបជាមួយនឹងបទពិសោធន៍ដ៏អស្ចារ្យជាច្រើន ដល់អ្នកទិញទំនិញទាំងឡាយ។

គម្រោងនេះមានកម្ពស់បីជាន់ បាននឹងកំពុងការសាងសង់យ៉ាងសកម្ម ស្ថិតនៅទីតាំងស្ថិតនៅដីឡូតិ៍លេខ១ ផ្លូវរដ្ឋសភា សង្កាត់ទន្លេបាសាក់ ដែលជាទីប្រជុំជនប្រមូលផ្តុំទៅដោយសាលារៀន សណ្ឋាគារ និងក្រុមហ៊ុនអាជីវកម្មជាច្រើន ត្រូវបានគ្រប់គ្រងដោយក្រុមហ៊ុន The One Mall Management (Cambodia) Co., Ltd។

៧) គម្រោងអគារពាណិជ្ជកម្ម The Sunwah Pearl Phnom Penh

គម្រោង The Sunwah Pearl Phnom Penh គឺជាគំរោងអភិវឌ្ឍន៍ធំជាងគេរបស់ ក្រុមហ៊ុន Sunwah ស្ថិតនៅលើផ្លូវសួនសម្តេចហ៊ុនសែន និងនៅចំណុចប្រសព្វនៃទន្លេចំនួន ៣ គឺទន្លេបាសាក់ និងទន្លេសាប នៅលើដីទំហំ១៥,០០០ ម៉ែត្រការ៉េដែលគ្រោងនឹងអភិវឌ្ឍជាប្រភេទលំនៅដ្ឋានប្រណីតចំនួនពីរ អគារការិយាល័យ សណ្ឋាគារលំដាប់ផ្កាយ៥ ក្លឹបហាត់ប្រាណ និងមជ្ឈមណ្ឌលផ្សារទំនើបធំ។

គម្រោងនេះ បានចាប់ផ្តើមសាងសង់កាលពីពាក់កណ្តាលឆ្នាំ ២០១៩ ដែលមានផ្ទៃដីសាងសង់សរុបជាង១៥,០០០ម៉ឺនម៉ែត្រការ៉េ ដែលមានទឹកប្រាក់វិនិយោគសរុបចំនួនជាង ៥៨០លានដុល្លារអាមេរិក។

The Sunwah Pearl Phnom Pen មានកំពស់ខ្ពស់ដែលមាន៦២ជាន់ ជាអាគារខ្ពស់ជាងគេមិនធ្លាប់មាននៅប្រទេសកម្ពុជា ហើយវានឹងក្លាយជាលំនៅឋានរបស់អ្នកដែលចូលចិត្តការរស់នៅប្រកបដោយផាសុកភាព ក្នុងបរិយាកាសប្រណីត និងឆើតឆាយ៕

ចំណេះដឹង! ហេតុអ្វីបិទផ្សាយជាសាធារណៈនូវឯកសារវិនិច្ឆ័យការចុះបញ្ជីដីធ្លីជាប្រព័ន្ធ?

ដោយ វុត្ថា

ភ្នំពេញៈ រដ្ឋាភិបាលកម្ពុជាបានប្រកាសបិទ ផ្សាយជាសាធារណៈ នូវឯកសារ នៃការវិនិច្ឆ័យ នៃការចុះបញ្ជីដីធ្លីលក្ខណៈប្រព័ន្ធជាសាធារណៈ នៅទូទាំងប្រទេសបន្ទាប់ពីរដ្ឋាភិបាលធ្វើការវិនិច្ឆ័យឱ្យពលរដ្ឋត្រួតពិនិត្យ និងតាមគោលនយបាយដីធ្លីរបស់រដ្ឋាភិបាល។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា ការបិទផ្សាយជាសាធារណៈ នូវឯកសារនៃការវិនិច្ឆ័យដីធ្លីជាប្រព័ន្ធ ដើម្បីឲ្យប្រជាពលរដ្ឋ ដែលមានដីធ្លីក្នុងតំបន់វិនិច្ឆ័យ ត្រួតពិនិត្យ ផ្ទៀងផ្ទាត់ក្បាលដីរបស់ខ្លួនថាវាបានត្រឹមត្រូវអស់ហើយឬនៅ ប្រសិនបើមិនត្រឹមត្រូវអាចប្តឹងជំទាស់ដើម្បីសើរើ ពិនិត្យមើលឡើងវិញ។

ដោយអនុវត្តន៍តាមគោលនយោបាយ អនុវិស័យនៃការចំបញ្ជីដីធ្លីជាលក្ខណៈប្រព័ន្ធរបស់រាជរដ្ឋាភិបាល ក្នុងការកែទម្រង់វិស័យដីធ្លី ក្រុមការងាជំនាញក្រោយពីការវែងវែងបញ្ចប់ បានប្រកាសបិទផ្សាយជាសាធារណៈ នូវឯកសារនៃការចុះបញ្ជីដីធ្លី មានប្រភេទដីលំនៅដ្ឋាន ដីស្រែចំការ និងដីផ្សេងៗទៀត។

ក្នុងការបិទផ្សាយជាសាធារណៈ នូវឯកសារនៃការវិនិច្ឆ័យ ការចុះបញ្ជីដីធ្លីលក្ខណៈជាប្រព័ន្ធ ស្របតាមគោលនយោបាយរបស់រាជរដ្ឋាភិបាល ដើម្បីបញ្ជៀសការកើតមានទំនាស់ដីធ្លី ហើយត្រូវបានបិទផ្សាយរយៈពេល១៥ថ្ងៃ គិតពីថ្ងៃបិទផ្សាយ ដោយមានគណកម្មការរដ្ឋបាល និងមន្ត្រីជំនាញសុរិយោដី ប្រចាំការដើម្បីពន្យល់អំពីទិន្នន័យទាំងឡាយនិងក្បាលដី ទទួលពាក្យបណ្តឹង និងដោះស្រាយ។

ក្រោយពីបិទផ្សាយរយៈពេល ១៥ថ្ងៃហើយ បានពិនិត្យឃើញថា គោលបំណងនៃការបិទផ្សាយឯកាសារជាសាធារណៈ នៃការចុះបញ្ជីធ្លីជាលក្ខណៈប្រព័ន្ធនេះ ដើម្បីធានាឱ្យបានត្រឹមត្រូវទាំងផ្នែកច្បាប់ និងទុកឱកាសអ្នកកាន់កាប់ អ្នកពាន់ព័ន្ធធ្វើការតវ៉ាកែតម្រូវលើឯកសារមិនទាន់ត្រឹមត្រូវ ហើយការតវ៉ាទុករយៈពេល១៥ថ្ងៃ ដោយមានមន្ត្រីជំនាញរង់ចាំពន្យល់ ដោះស្រាយ និងទទួលបណ្តឹង។

បន្ទាប់ពីទទួលបានទិន្នន័យក្បាលដីត្រឹមត្រូវអស់ហើយ ទើបចេញវិញ្ញាបណ្ណប័ត្រសម្គាល់អចលនវត្ថុជួនប្រជាពលរដ្ឋយកទៅប្រើប្រាស់៕

ក្រុមប្រឹក្សាអភិវឌ្ឍកម្ពុជាអនុម័តគម្រោងវិនិយោគចំនួន៧ មានទំហំទឹកប្រាក់ជិត ៦០លានដុល្លារ

ដោយ ៖ រ៉ាណេត
ភ្នំពេញ ៖ តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនចំនួន៧ ដែលធ្វើការវិនិយោគលើវិស័យផ្សេងគ្នា និងមានទំហំទឹកប្រាក់សរុប ៥៩,៧លានដុល្លារសហរដ្ឋអាមេរិក

ក្រុមហ៊ុនដែលទទួលបានអជ្ញាប័ណ្ណអនុញ្ញាតទាំង៧ រួមមានដូចខាងក្រោម៖

១- “M.H.K.Y Manufactures CO., LTD” គម្រោងបង្កើតរោងចក្រផ្គុំដំឡើងម៉ូតូ និងម៉ូតូកង់បី ដែលមានទីតាំងវិនិយោគស្ថិតនៅភូមិឫស្សីជ្រោយ ឃុំឫស្សីជ្រោយ ស្រុកមុខកំពូល ខេត្តកណ្តាល មានទុនវិនិយោគប្រមាណ ២,២លានដុល្លារ អាមេរិក និងអាចបង្កើតការងារបានចំនួន ៩១កន្លែង។

២- “ZHENG MENG Cosmetics CO., LTD” គម្រោងបង្កើតរោងចក្រផលិតគ្រឿងសំអាង ដែលមានទីតាំងវិនិយោគស្ថិតនៅដីឡូតិ៍លេខ៨៦០ ភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៤លានដុល្លារអាមេរិក និងអាចបង្កើតការងារបានចំនួន ៦៣កន្លែង។

៣- “BRIDGE INDUSTRY (CAMBODIA) CO., LTD” គម្រោងបង្កើតរោងចក្រផលិតសម្ភារៈបរិក្ខារបម្រើឱ្យ វិស័យសំណង់ ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,៧លានដុល្លារអាមេរិក និងអាចបង្កើតការងារបានចំនួន ២៧១កន្លែង។

៤- “HONGFAXIANG INDUSTRIAL CO., LTD” គម្រោងបង្កើតរោងចក្រផលិតកាបូបគ្រប់ប្រភេទ និងគ្រឿងផ្សំកាបូប ដែលមានទីតាំងវិនិយោគស្ថិតនៅភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល មានទុនវិនិយោគប្រមាណ ៣,៩លានដុល្លារអាមេរិក និងអាចបង្កើតការងារបានចំនួន ២.៥២៧កន្លែង។

៥- “HON CHUAN (CAMBODIA) CO., LTD” គម្រោងបង្កើតរោងចក្រផលិតសំបកដបប្លាស្ទីក គំរបដបប្លាស្ទីក និងផ្លាកសញ្ញាបិទលើដបគ្រប់ប្រភេទ ដែលមានទីតាំងវិនិយោគស្ថិតនៅផ្ទះលេខ ៤៤ ផ្លូវជាតិលេខ៤ ក្រុម៥ ភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ៤,៧លានដុល្លារអាមេរិក និងអាចបង្កើតការងារបានចំនួន ៦៣កន្លែង។

៦- “CAMBODIAN NOBLE TASTE FOOD CO., LTD” គម្រោងបង្កើតរោងចក្រផលិតចំណីសត្វ ដែលមានទីតាំងវិនិយោគស្ថិតនៅភូមិព្រែកសង្កែ ឃុំទឹកថ្លា ស្រុកព្រៃនប់ ខេត្តព្រះសីហនុ មានទុនវិនិយោគប្រមាណ ១៦,៣លានដុល្លារអាមេរិក និងអាចបង្កើតការងារបានចំនួន ១.០៣៤កន្លែង។

៧- “ANGKOR INTERNATIONAL CULTURE INVESTMENT & DEVELOPMENT (CAMBODIA) CO., LTD”គម្រោងបង្កើតឧទ្យានវប្បធម៌កម្ពុជា-ចិន ដែលមានទីតាំងវិនិយោគស្ថិតនៅផ្លូវ៦០ម៉ែត្រ ភូមិទ្រាំង ឃុំស្លក្រាម ក្រុងសៀមរាប ខេត្តសៀមរាប មានទុនវិនិយោគប្រមាណ ២៧,៥លានដុល្លារអាមេរិក និងអាចបង្កើតការងារបានចំនួន ២១៣ កន្លែង។

ចិនវិនិយោគទឹកប្រាក់ ២,៦ពាន់លានដុល្លារនៅតាមបណ្តាខេត្តជាប់តំបន់ឆ្នេរ

ដោយៈ រ៉ាណេត

ភ្នំពេញៈ នៅត្រឹមរយៈ៣ឆ្នាំចុងក្រោយនេះ ទំហំវិនិយោគនៅកម្ពុជាពីសំណាក់ក្រុមហ៊ុនមកពីប្រទេសចិន បានកើនឡើងយ៉ាងខ្លាំង ស្ថិតនៅលំដាប់កំពូលបើធ្វើការប្រៀបធៀបជាមួយបណ្តាប្រទេសផ្សេង ដែលកំពុងវិនិយោគនៅកម្ពុជា ជាពិសេសតាមបណ្តាខេត្ត ក្រុងដែលស្ថិតនៅតំបន់ឆ្នេរ ដែលគិតជាទឹកប្រាក់មានទំហំប្រមាណ ២,៦ពាន់លានដុល្លារ។

នៅត្រឹមរយៈពេល ១០ឆ្នាំចុងក្រោយនេះ សន្ទុះនៃកំណើនសេដ្ឋកិច្ចកម្ពុជាមានការកើនឡើង និងអាចរក្សាបាននូវភាពល្អប្រសើរ ដែលស្ថិតនៅក្នុងរង្វង់៧ភាគរយជាប្រចាំឆ្នាំ។ ដោយឡែកអ្វីដែលជាការគួរកត់សម្គាល់នោះ នៅត្រឹមរយៈពេល ៣ឆ្នាំចុងក្រោយនេះ កម្ពុជាទទួលបានការវិនិយោគពីសំណាក់ក្រុមហ៊ុនធំៗជាច្រើន មកពីប្រទេសចិនទៅលើវិស័យអចលនទ្រព្យ នៅក្នុងទំហំជាច្រើនពាន់លានដុល្លារ ទៅលើតំបន់មួយចំនួនដែលស្ថិតនៅជាប់សមុទ្រ។

អគ្គលេខាធិការងគណៈកម្មាធិការវិនិយោគកម្ពុជា និងជាគណៈកម្មាធិការតំបន់សេដ្ឋកិច្ចពិសេសកម្ពុជា លោក ជា វុទ្ធី បានមានប្រសាសន៍នៅក្នុងសន្និសីទសារព័ត៌មានស្ដីពីសក្ដានុពល នៃការវិនិយោគនៅព្រះរាជាណាចក្រកម្ពុជា កាលពីថ្ងៃទី១០ ខែតុលា ឆ្នាំ២០១៩ថា បច្ចុប្បន្ននេះកាលចូលខ្លួនមកវិនិយោគរបស់ក្រុមហ៊ុនចិន បានចូលរួមចំណែកមួយភាគធំនៅក្នុងកំណើនសេដ្ឋកិច្ចកម្ពុជា។

គិតចាប់ពីឆ្នាំ២០១៦ រហូតមកដល់ខែសីហា ឆ្នាំ២០១៩ ការវិនិយោគមកពីប្រទេសចិន នៅតាមបណ្តាខេត្តជាប់មាត់សមុទ្រ ដូចជា កោះកុង ព្រះសីហនុ និងខេត្តកំពត មានទុនវិនិយោគប្រមាណ២,៦ពាន់លានដុល្លារសហរដ្ឋអាមេរិក ស្មើនឹងប្រមាណ ១១,៥ភាគរយនៃទំហំទុនវិនិយោគសរុប ក្នុងនោះខេត្តកោះកុងទទួលបានការវិនិយោគប្រមាណ ៤៧០លានដុល្លារ ស្មើនឹង២ភាគរយនៃទុនវិនិយោគសរុប”។

លោកជា វុទ្ឋីបានបន្តទៀតថា ខេត្តព្រះសីហនុ ទទួលបានការវិនិយោគប្រមាណ ២ប៊ីលានដុល្លារស្មើនឹង៨,៩ភាគរយ ហើយខេត្តកំពត ទទួលបានទុនវិនិយោគប្រមាណជាង១០០លានដុល្លារ ស្មើនឹង០,៥ភាគរយនៃទុនវិនិយោគសរុប។

លោកបានបញ្ជាក់ថា “បច្ចុប្បន្ននេះ រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន កំពុងធ្វើការចរចាជាមួយក្រុមហ៊ុនចិន ដើម្បីសាងសង់ផ្លូវល្បឿនលឿនភ្នំពេញ បាវិត។ ការវិនិយោគរបស់ក្រុមហ៊ុនចិនលើហេដ្ឋារចនាសម្ព័ន្ធ ក៏ជាផ្នែកមួយគាំទ្រដល់ការអភិវឌ្ឍវិស័យទូរគមនាគមន៍នៅកម្ពុជា ដោយបានកប់ខ្សែកាបអុបទិកនៅក្រោមដីប្រវែងជាង ២០០០០គីឡូម៉ែត្រ និងខ្សែកាបអុបទិកនៅក្រោមបាតសមុទ្រ ដើម្បីតភ្ជាប់ប្រព័ន្ធទូរគមនាគមន៍ពីកម្ពុជាទៅកាន់តំបន់ និងពិភពលោក”។

លោកបានបន្តទៀតថា ប្រទេសចិននៅតែជាដៃគូយ៉ាងសំខាន់ ក្នុងធ្វើពាណិជ្ជកម្ម និងបង្កើនកំណើនសេដ្ឋកិច្ចនៅកម្ពុជាពេលបច្ចុប្បន្ន និងបន្តទៅថ្ងៃអនាគត៕

កម្ពុជាមានសហគមន៍ទេសចរណ៍ ១២៥កន្លែងកំពុងបម្រើឱ្យវិស័យនេះ

ដោយៈ រ៉ាណេត

ភ្នំពេញៈ ប្រទេសកម្ពុជាមានសហគមន៍ចំនួន ១២៥កន្លែង ដែលកំពុងតែមានសកម្មភាព និងបម្រើឱ្យវិស័យទេសចរណ៍យ៉ាងទាក់ទាញ ខណៈដែលសហគមន៍សរុបទាំងអស់មានចំនួនរហូតដល់ទៅជាង២៣០០កន្លែង ដែលស្ថិតនៅក្នុងការគ្រប់គ្រងរបស់ក្រសួងចំនួន៣ផ្សេងគ្នា។

នៅក្នុងចំណោមសហគមន៍ទាំងអស់នៅទូទាំងប្រទេសកម្ពុជា មានសហគមន៍រហូតដល់ទៅជាង២៣០០កន្លែង ប៉ុន្តែសហគមន៍ដែលកំពុងបម្រើប្រយោជន៍ ដល់វិស័យទេសចរណ៍ និងមានភាពទាក់ទាញមានត្រឹមតែ១២៥សហគមន៍តែប៉ុណ្ណោះ ដែលតម្រូវឱ្យមានការជំរុញបង្កើនលទ្ធភាព ដើម្បីចូលរួមជំរុញនិងបង្កើនទេសចរណ៍ឱ្យកាន់តែល្អប្រសើរ។

រដ្ឋមន្ត្រីក្រសួងទេសចរណ៍ លោក ថោង ខុន បានប្រកាសពីសមិទ្ធផលដែលទទួលបានពីវិស័យទេសចរណ៍ ជាមួយនឹងការជំរុញឱ្យក្រសួង និងស្ថាប័នពាក់ព័ន្ធនានាព្យាយាមខិតខំប្រែក្លាយសហគមន៍ ដែលមិនទាន់មានសកម្មភាពទេសចរណ៍ ទៅជាសហគមន៍ ដែលអាចទាក់ទាញភ្ញៀវទេសចរ។ លោកបានបន្តទៀតថា “សហគមន៍ទាំងអស់គួរតែព្យាយាមប្រែក្លាយឱ្យទៅតំបន់គួរជាទីទាក់ទាញ តាមរយៈការបញ្ចូលសកម្មភាពទេសចរណ៍ ការរុករក និងបង្កើតផលិតផលទេសចរណ៍ថ្មីៗ ក្នុងសហគមន៍ បើទោះបីស្ថិតក្រោមការគ្រប់គ្រងរបស់ក្រសួងណាមួយក៏ដោយ”។

ការជំរុញយ៉ាងដូច្នេះ ត្រូវបានធ្វើឡើងក្នុងកិច្ចប្រជុំលើកទី៤ របស់ក្រុមការងារអន្តរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍នាថ្ងៃទី១០ ខែតុលា ឆ្នាំ២០១៩ នៅទីស្ដីការក្រសួងទេសចរណ៍។

ប្រធាននាយកដ្ឋានអភិវឌ្ឍន៍ផលិតផលទេសចរណ៍ លោកជុក ជំនោរ បានឱ្យដឹងថា តាមការធ្វើបច្ចុប្បន្នភាពចុងក្រោយ សហគមន៍ដែលចំណុះ ក្រោមការគ្រប់គ្រងរបស់ក្រសួងទេសចរណ៍ ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ មានចំនួនសរុបជាង២៣០០កន្លែង ក្នុងនោះសហគមន៍ដែលកំពុងមានសកម្មភាព ទេសចរណ៍មានចំនួន១២៥ កន្លែង។

ក្នុងចំណោមសហគមន៍ទាំងនោះ ក្រសួងទេសចរណ៍គ្រប់គ្រងចំនួន៧៩កន្លែង ក្នុងខេត្តចំនួន២០ ដែលកំពុងប្រតិបត្តិការក្នុងនាមជាសហគមន៍ទេសចរណ៍។ ក្រសួងបរិស្ថាន មានសហគមន៍តំបន់ការពារធម្មជាតិចំនួន១៦៨កន្លែង (២០ សហគមន៍ មានបញ្ចូលសកម្មភាពទេសចរណ៍)។ ដោយឡែក ក្រសួង-ស្ថាប័នផ្សេងៗក៏បានកំពុងធ្វើបច្ចុប្បន្នភាពកិច្ចការនេះផងដែរ។

លោកបានបញ្ជាក់ថា រដ្ឋាភិបាលបានជំរុញឱ្យមានការបណ្ដុះបណ្ដាលដល់ប្រជាសហគមន៍នូវស្ដង់ដាបច្ចេកទេស ក៏ដូចជាចំណេះដឹងពាក់ព័ន្ធនឹងការទទួលបដិសណ្ឋារកិច្ច និងការពារសុវត្ថិភាពជូនភ្ញៀវទេសចរ បញ្ហាការពារបរិស្ថាន ការទុកដាក់សំរាម ការពង្រឹងគុណភាពសេវាកម្ម និងអនាម័យជាដើម។

ជាមួយគ្នានេះ បញ្ហាកសាងផ្លូវតភ្ជាប់ទៅកាន់សហគមន៍ ប្រព័ន្ធហេដ្ឋារចនាសម្ព័ន្ធ ការតបណ្ដាញទឹកស្អាត បណ្ដាញអគ្គិសនី បណ្ដាញទូរគមនាគមន៍ ក៏ត្រូវបានជំរុញយ៉ាងម៉ឺងម៉ាត់ផងដែរ។

ការអភិវឌ្ឍសហគមន៍ទេសចរណ៍ បានរួមចំណែកដ៏សំខាន់ ក្នុងការទាក់ទាញភ្ញៀវទេសចរ ពន្យារពេលស្នាក់នៅរបស់ទេសចរ និងចំណូលផ្ទាល់ទៅដល់ប្រជាជនមូលដ្ឋាន។ ជាក់ស្តែងតាមការព្យាករណ៍របស់អង្គការទេសចរណ៍ពិភពលោក (UNWTO) វិស័យទេសចរណ៍វប្បធម៌ មានចំណែកទីផ្សារប្រមាណ៥០ភាទីគរយ នៃទីផ្សារទេសចរណ៍សកលលោក ហើយមានកំណើនប្រចាំឆ្នាំក្នុងអត្រាប្រមាណ៦ភាគរយ។

ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូរ វណ្ឌី បានបង្ហាញការគាំទ្រទៅនឹងគោលការណ៍របស់ថ្នាក់ដឹកនាំក្រសួងខាងលើនេះ ប៉ុន្តែត្រូវតែមានការយកចិត្តទុកដាក់ ទៅលើការបណ្តុះបណ្តាលជំនាញពាក់ព័ន្ធ ទៅដល់បងប្អូនដែលជាប្រជាសហគមន៍ជាចាំបាច់។ លោកបានមានប្រសាសន៍ប្រាប់ តាមទូរស័ព្ទកាលពីល្ងាចថ្ងៃទី១១ ខែតុលា ឆ្នាំ២០១៩នេះថា ពីមួយឆ្នាំទៅមួយឆ្នាំ ការវិវឌ្ឍវិស័យទេសចរណ៍នៅកម្ពុជាតែងតែត្រូវបានរៀបចំ និងមានភាពល្អប្រសើរជាបន្តបន្ទាប់។

លោកបន្តទៀតថា “ទេសចរណ៍សហគមន៍ គឺបានចូលរួមចំណែកយ៉ាងសំខាន់នៅក្នុងវិស័យមួយនេះ ដោយសារតែបច្ចុប្បន្ននេះ ភ្ញៀវទេសចរ ជាពិសេសភ្ញៀវបរទេស តែងមានទំនោរទៅតាមតំបន់សហគមន៍ ដែលមានលក្ខណៈធម្មជាតិ និងវប្បធម៌ប្រចាំតំបន់។ ពួកគេចង់មានពិភពពិតនៃសម្រស់ធម្មជាតិ ទាំងផ្នែកបរិស្ថាន ផ្នែកអាហារ និងអនាម័យ ក៏ដូចជាស្ថានភាពរស់នៅក្នុងតំបន់ជាដើម។

លោកបន្តទៀតថា “ដើម្បីជម្រុញឱ្យទេសចរណ៍សហគមន៍ មានប្រសិទ្ធភាពខ្ពស់ សំខាន់បំផុត រដ្ឋាភិបាល តាមរយៈក្រសួងពាក់ព័ន្ធត្រូវផ្តល់ការអប់រំ ចំណេះដឹង និងជំនាញដល់ប្រជាសហគមន៍ ស្គាល់ពីគុណតម្លៃនៃវិស័យទេសចរណ៍ ដែលអាចរកចំណូលសម្រាប់ទ្រទ្រង់ជីវភាពគ្រួសារ ក៏ដូចជាចូលរួមអភិវឌ្ឍសហគមន៍ទាំងមូលផងដែរ”។

លោកបានបញ្ជាក់ថា “គួរតែមានការអនុវត្តច្បាប់ ស្របតាមរដ្ឋបាលចំពោះអ្នកដែលអនុវត្តន៍ ខុសពីគោលការណ៍ដែលក្រសួងពាក់ព័ន្ធណែនាំ ដូចជាចំពោះអាជីវករដែលលក់លើសតម្លៃ អ្នកដែលលក់របស់របរក្លែងក្លាយ ក៏ដូចជាអ្នកដែលធ្វើអាជីវកម្មដោយការបើកបញ្ឆោតក្នុងរូបភាពផ្សេងទៀតផងដែរ”។

សម្រាប់វិស័យទេសចរណ៍កម្ពុជា ដែលជាទេសចរណ៍វប្បធម៌ និងធម្មជាតិ វិស័យទេសចរណ៍វប្បធម៌ប្រវត្តិសាស្ត្រ មានចំណែកទីផ្សារប្រមាណ៥០ភាគរយ នៃទីផ្សារសរុប ហើយទេសចរណ៍តំបន់ឆ្នេរ មានចំណែកទីផ្សារប្រមាណ២០ភាគរយ អេកូទេសចរណ៍ប្រមាណ២០ភាគរយ និងទីផ្សារទេសចរណ៍កីឡា និងកម្សាន្តផ្សេងៗទៀត៕

អាសន្ន៖ ជប៉ុនបានលុបចោលជើងហោះហើរ និងរថភ្លើង ខណៈនឹងមានព្យុះទីហ្វុងដ៏ធំ

ដោយ Donald Lee

ជប៉ុនៈ អាជ្ញាធរជប៉ុនបានលុបចោលរាល់ជើងហោះហើរក្នុងស្រុក និងមធ្យោបាយធ្វើដំណើរសាធារណៈ ខណៈព្យុះទីហ្វុងដ៏ខ្លាំងបំផុតក្នុងរយៈពេល ៦០ឆ្នាំ នឹងកើតឡើងនៅប្រទេសប្រជុំកោះនេះនៅថ្ងៃសុក្រនេះ។

ព្យុះដែលមានឈ្មោះ Hagibis នឹងកើតឡើងតែប៉ុន្មានសប្តាហ៍ទៀតប៉ុណ្ណោះ បន្ទាប់ពីព្យុះទីហ្វុងបានបោកបក់ ប្រព័ន្ធដឹកជញ្ជូនសាធារណៈនៅទីក្រុងតូក្យូ ហើយបានធ្វើឱ្យមនុស្សរាប់លាននាក់ស្ថិត នៅក្នុងភាពងងឹតបន្ទាប់ពីការដាច់ចរន្តអគ្គិសនី។

អាជ្ញាធរកំពុងព្រមានប្រជាជនអំពីទឹកជំនន់ ការរអិលបាក់ដី និងការកើនឡើងព្យុះដែលបណ្តាលមកពីខ្យល់បក់ ២៥២គីឡូ ម៉ែត្រក្នុងមួយម៉ោង។ អាជ្ញាធរបានលុបចោលការប្រកួតបាល់ឱប ការប្រកួតបាល់ទាត់ពិភពលោក និងអាចផ្លាស់ប្តូរកាលវិភាគនៃការប្រកួត Formula 1 Japanese Grand Prix នៅចុងសប្តាហ៍នេះ។

ទីភ្នាក់ងារឧតុនិយមជប៉ុនបានឱ្យដឹងថា “វាមានលទ្ធភាពនៃកើតឡើងព្យុះទីហ្វុងដែលមានឥទ្ធិពលខ្លាំង នឹងធ្វើឱ្យមានការបាក់ដីនៅតំបន់តូកៃ ឬតំបន់កានតូនៅថ្ងៃស្អែក”។

ទីភ្នាក់ងារឧតុនិយមបានបញ្ជាក់ថា ព្យុះទីហ្វុង Hagibis ប្រហាក់ប្រហែលនឹងព្យុះទីហ្វុងដែលបានបោកបក់កណ្តាលប្រទេសជប៉ុន និងសម្លាប់មនុស្ស ១២០០នាក់។

ក្រុមហ៊ុនអាកាសចរណ៍ ANA បានលុបចោលជើងហោះហើរទាំងអស់ របស់ពួកគេពីព្រលានយន្តហោះទីក្រុងតូក្យូ៕

អ្នកជំនាញ៖ កត្តាគំរាមកំហែងពីក្រៅមិនបង្កផលប៉ះពាល់វិស័យអចលនទ្រព្យកម្ពុជាទេ

ដោយ ម៉ាណេត

ភ្នំពេញៈ សង្គ្រាមពាណិជ្ជកម្មអាមេរិក និងចិននឹងផ្តល់ប្រយោជន៍ដល់កម្ពុជា និងការដកប្រព័ន្ធអនុគ្រោះពន្ធពីអឺរ៉ុប មិនបង្កផលប៉ះពាល់ដល់វិស័យអចលនទ្រព្យកម្ពុជា ខណៈកម្ពុជា ត្រូវពង្រឹងបទបញ្ញាតសំណង់បន្ថែម ដើម្បីទាញយកការវិនិយោគបន្ថែមពីបរទេស។

លោក James Hodge នាយករងក្រុមហ៊ុន CBRE Cambodia បានឱ្យដឹងក្នុងសន្និសិទ្នសារព័ត៌មាននៅថ្ងៃទី១១ តុលានេះថា ការគំរាមកំហែងពីខាងក្រៅដូចជា ការដកប្រព័ន្ធអនុគ្រោះពន្ធពីអឺរ៉ុប វានៅតែមានឳកាស និងពេលវេលាក្នុងការចរចាក្នុងទទួលបានវាមកវិញ ហើយចំណែកសង្គ្រាមពាណិជ្ជកម្មអាមេរិក និងចិនបានបង្កើតឳកាសជាច្រើនដល់កម្ពុជា។

លោកឱ្យដឹងថា “ដូច្នេះថ្មីៗនេះ យើងឃើញរោងចក្រផលិតកម្មចិនជាច្រើនកំពុងសម្លឹងរកកន្លែងវិនិយោគនៅទីនេះ ហើយទីតាំងវិនិយោគផ្សេងទៀត នៅតំបន់អាស៊ីអាគ្នេយ៍ដូចជាវៀតណាម ដោយតម្លៃកម្លាំងពលកម្មនៅទីនេះមានភាពសមរម្យ ខណៈកម្ពុជាក៏តម្លៃកម្លាំងពលកម្មសមរម្យដែរ ក្នុងការប្រកួតប្រជែងជាមួយវៀតណាម ដើម្បីទាញយកវិនិយោគក្រៅប្រទេស”។

ទោះបីជាយ៉ាងក៏ដោយ លោក បានបន្តថា “កិច្ចការសំខាន់ដែលយើងត្រូវធ្វើដើម្បីទាក់ទាញវិនិយោគផ្សេងទៀត ក្រៅពីប្រទេសចិន គឺរៀបចំសមត្ថភាពបទបញ្ញត្តិរបស់កម្ពុជាឱ្យបានប្រសើរ ហើយធ្វើឱ្យកាន់តែប្រសើរឡើងនូវអ្វីដែលយើងមានក្នុងប្រទេស”។

កង្វះខាតបទបញ្ញត្តិទាក់ទងគុណភាពសំណង់ និងការអនុញ្ញាតលក់ ហើយបើអ្វីទាំងអស់នេះ ត្រូវបានធ្វើប្រសើរឡើង វានឹងធ្វើឱ្យវិនិយោគិនផ្សេងៗទៀត មានទំនុកចិត្តក្នុងវិនិយោគនៅទីនេះ និងដាក់ទុនរបស់ពួកគេនៅផងដែរ។

ប្រធានក្រុមហ៊ុនផលិតកង់ធំបំផុតរបស់អាមេរិក Kent International បានមកកម្ពុជា ដើម្បីស្វែងរកទីតាំងសម្រាបង់ការសាងសង់រោងចក្រ ខណៈក្រុមហ៊ុនរងចាំការវិវត្តន៍ចុងក្រោយនៃចាំការចរចារពាណិជ្ជកម្មវាងអាមេរិក និងចិន។

លោក Arnold Kamler ប្រធានក្រុមហ៊ុនកង់អាមេរិក Kent International បានប្រាប់សារព័ត៌មាន Fox Business ដែលមានមូលដ្ឋាននៅអាមេរិកកាលពីពេលថ្មីៗនេះថា ក្រុមហ៊ុនកំពុងសម្លឹងទីតាំង ដើម្បីរៀបចំរោងចក្រកង់នៅកម្ពុជា ខណៈក្រុមហ៊ុនក៏រងចាំការចរចារវាងអាមេរិក និងចិននាពេលខាងមុខ។

លោក Arnold Kamler “យើងត្រៀមខ្លួនរួចជាស្រេច ជាមួយនឹងការវិនិយោគនៅកម្ពុជា ហើយនេះគឺជាដីនៅកម្ពុជា ដែលយើងកំពុងសម្លឹងមើល។ យើងមើលទៅមានបឹង និងមានទឹកនាច និងទឹកជោ ហើយពួកគេចាក់បំពេញវាបានជាមួយដី និងខ្សាច់ដែលជារឿងធម្មតាក្នុងកម្ពុជា ហើយវាជាកន្លែងរោងចក្រដែលនឹងត្រូវសាងសង់”។

លោក “ប៉ុន្តែយើងនៅមានការស្ទាក់ស្ទើរបន្តិច ដើម្បីឱ្យពួកគេបន្តគម្រោងទៅមុខ (កម្ពុជា) ដោយសារការចរចាលោកTrump ជាមួយនឹងចិនទៅរួច ឬមិនរួច”។

កាលពីដើមឆ្នាំនេះ ក្រុមហ៊ុនផលិតដែកធំជាងគេទីពីរ លើពិភពលោកមួយក៏បានសម្លឹងមើលការផ្លាស់ប្តូររោងចក្ររបស់ខ្លួន ពីទីក្រុងស៊ីនជាំង (Xinjiang) នៃប្រទេសចិន មកបង្កើតមូលដ្ឋានផលិតនៅកម្ពុជា។

ក្រុមហ៊ុន China Baowu Steel Group Corp ដែលជាក្រុមហ៊ុនផលិតដែកធំជាងគេរបស់ចិន គ្រោងនឹងផ្លាស់ប្តូររោងចក្រកែផលិតដែកពីរកន្លែង និងម៉ាស៊ីនបម្លែងពីរដើម្បីបង្វែរដែកទៅជាដែកថែប។

ការផ្លាស់ប្តូរទីតាំងនឹងក្លាយជាភស្តុភារដ៏ធំមួយ។ សម្ភារៈបរិក្ខារនឹងត្រូវបានដឹកជញ្ជូនចេញពីរោងចក្របិទទ្វារមួយនៅទីតាំង អាកសួ (Aksu) នៅភាគពាយ័ព្យប្រទេសចិន ដែលមានចំងាយប្រហែល ២,៤៨០ គីឡូម៉ែត្រពីរាជធានីភ្នំពេញ។ នេះបើយោងតាមថ្នាក់ដឹកនាំជាន់ខ្ពស់របស់ក្រុមហ៊ុននេះបានប្រាប់សារព័ត៏មាន Reuters៕