ស្ថានប័នពិភពលោកធំៗចំនួន៤បញ្ជាក់ថាសេដ្ឋកិច្ចកម្ពុជានឹងរក្សាបានកំណើន៧ភាគរយសំរាប់ឆ្នាំ២០១៩នេះ

ដោយ : ម៉ាណេត

ភ្នំពេញ : ស្ថាប័នវាយតម្លៃសេដ្ឋកិច្ចពិភពលោកធំៗចំនួន៤ បានវាយតម្លៃស្រដៀងគ្នាថា សេដ្ឋកិច្ចកម្ពុជានឹងរក្សាបានកំណើនក្នុងរង្វង់៧ភាគរយ សំរាប់ឆ្នាំ២០១៩នេះ បើទោះបីសេដ្ឋកិច្ចសាកលបានថមថយកំណើនក្តី។

ក្នុងជំនួបជាមួយលោកបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅរសៀលថ្ងៃទី១១ ខែតុលា ឆ្នាំ២០១៩កន្លងមក ក្រុមការងារបេសកកម្ម Article IV នៃមូលនិធិរូបិយវត្ថុអន្តរជាតិ (IMF) បានបញ្ជាក់ថា ទោះបីជាកំណើនសេដ្ឋកិច្ចសកលមានការថមថយក្តី ក៏សេដ្ឋកិច្ចកម្ពុជាក្នុងឆ្នាំ២០១៩នេះ នៅតែសម្រេចបាននូវកំណើនរឹងមាំក្នុងរង្វង់អត្រា៧ភាគរយ ដែលត្រូវបានគាំទ្រដោយការបន្តកំណើនខ្ពស់នៃការនាំចេញ និងវិស័យសំណង់ ខណៈដែលអតិផរណាត្រូវបានរក្សាឱ្យស្ថិតក្នុងកម្រិតទាបប្រមាណ២.៥ ភាគរយ ។

ទន្ទឹមនេះ ស្ថានភាពហិរញ្ញវត្ថុសាធារណៈរបស់កម្ពុជា នៅបន្តស្ថិតក្នុងភាពល្អប្រសើរ ស្របពេលដែលបំណុលសាធារណៈ ស្ថិតក្នុងកម្រិតហានិភ័យទាប ដែលអាចគ្រប់គ្រងបាន។

ជាមួយគ្នានេះធនាគារពិភពលោក (World Bank) នៅថ្ងៃទី១០ ខែតុលា ឆ្នាំ២០១៩នេះ បានចេញផ្សាយរបាយការណ៍ថ្មីមួយ ដោយព្យាករណ៍ពីកំណើនសេដ្ឋកិច្ចកម្ពុជា នៅឆ្នាំ២០១៩ថា នៅតែបន្ដភាពរឹងមាំក្នុងអត្រា៧ភាគរយផងដែរ។

របាយការណ៍បានកត់សម្គាល់ថា វិស័យនាំចេញរបស់កម្ពុជានៅឆ្នាំ២០១៩នៅតែរឹងមាំ ខណៈវិស័យសំណង់នៅតែមានភាពមមាញឹកដដែល។

តម្លៃរបស់គម្រោងវិនិយោគថ្មី ដែលត្រូវបានអនុម័តរួច (តាមរយៈការវិនិយោគផ្ទាល់ពីបរទេស និងមូលនិធិក្នុងស្រុក) មានសន្ទុះកើនក្នុងអំឡុងពេល៦ខែដំបូង នៃឆ្នាំ២០១៩។ ជិត៤០ភាគរយ នៃវិនិយោគផ្ទាល់ពីបរទេស ហូរចូលពីប្រទេសចិន។

វិស័យទេសចរណ៍នៅរក្សាភាពរឹងប៉ឹង ដោយក្នុងនោះ ការមកដល់របស់ភ្ញៀវអន្តរជាតិកើនដល់១១.២ភាគរយ ត្រឹមខែមិថុនា ឆ្នាំ២០១៩ ហើយក្នុងនោះទៀតជិត៤០ភាគរយ នៃភ្ញៀវអន្តរជាតិ គឺមកពីប្រទេសចិន។

ជាមួយគ្នានេះ World Bank ក៏បានព្យាករណ៍ផងដែរ អំពីសេដ្ឋកិច្ចកម្ពុជា នៅឆ្នាំ២០២០ និងឆ្នាំ២០២១ មានកំណើន៦.៨ភាគរយ។

នៅក្នុងការធ្វើបច្ចុប្បន្នភាព នៃការបោះពុម្ពផ្សាយសេដ្ឋកិច្ចប្រចាំឆ្នាំ ដ៏លេចធ្លោរបស់ខ្លួនស្តីពី ចក្ខុវិស័យអភិវឌ្ឍន៍អាស៊ី(ADO) ឆ្នាំ ២០១៩ ធនាគារអភិវឌ្ឍន៍អាស៊ីបានរក្សាការព្យាករណ៍របស់ខ្លួន អំពីកំណើនផលិតផលក្នុងស្រុកសរុបសម្រាប់កម្ពុជាមានកំណើន ៧,០ ភាគរយនៅឆ្នាំនេះ និងមានកំណើន៦,៨ ភាគរយនៅឆ្នាំ២០២០។

លោកស្រី Sunniya Durrani-Jamal នាយកប្រចាំប្រទេសរបស់ធនាគារអភិវឌ្ឍន៍អាស៊ីបានមានប្រសាសន៍ថា“សេដ្ឋកិច្ចកម្ពុជាបន្តរីកចម្រើន ក្នុងល្បឿនមួយដ៏រឹងមាំ ដោយសារតែការបន្តពង្រឹង នៅក្នុងវិស័យប្រពៃណី ដូចជា សម្លៀកបំពាក់ ទេសចរណ៍ ពាណិជ្ជកម្ម និងសំណង់”។

លោកស្រីបានឱ្យដឹងថា “ដោយមានការកើនឡើង នូវភាពមិនប្រាកដប្រជានៅក្នុងបរិយាកាសពាណិជ្ជកម្មពិភពលោក និងផលប៉ះពាល់ លើសេវាកម្មដូចជាទេសចរណ៍ កម្ពុជាត្រូវការជាបន្ទាន់នូវយុទ្ធសាស្ត្រធ្វើពិពិធកម្មចម្រុះទៅជាផលិតផល និងសេវាកម្មដែលមានតម្លៃខ្ពស់”។

លោកស្រីបានបន្តថា “នេះនឹងតម្រូវឱ្យកាត់បន្ថយហានិភ័យ ដែលបានមកពីការផ្តល់ប្រាក់កម្ចី ដល់វិស័យអចលនៈទ្រព្យហួសប្រមាណ ការអភិវឌ្ឍកម្លាំងពលកម្មដែលមានជំនាញ និងផលិតភាពបន្ថែមទៀត ដើម្បីបង្ហាញអំពីការកើនឡើងប្រាក់ឈ្នួល និងការទាក់ទាញការវិនិយោគដើមទុន មានគុណភាពខ្ពស់ដែលទាំងអស់នេះ ត្រូវការអភិបាលកិច្ច និងស្ថាប័នរឹងមាំ”។

ផលិតផលក្នុងស្រុកសរុបកម្ពុជាពិតប្រាកដ បានកើនឡើងជាលំដាប់ប្រមាណ៧ភាគរយ ក្នុងមួយឆ្នាំជាមធ្យមចាប់តាំងពីមានវិបត្តិហិរញ្ញវត្ថុ ពិភពលោកក្នុងឆ្នាំ ២០០៨ និងបន្តធ្វើកំណែទម្រង់ហួសកំរិតអធិបតេយ្យភាព ដែលត្រូវបានគេវាយតម្លៃប្រហាក់ប្រហែលគ្នា។ នេះបើយោងតាមការបញ្ជាក់របស់ស្ថាប័ន Moodys ដែលមានមូលដ្ឋាននៅអាមេរិកកាលពីពេលថ្មីៗនេះ។

កំណើននេះត្រូវបានជំរុញដោយការនាំចេញ ជាពិសេស សម្លៀកបំពាក់ ទេសចរណ៍ និងសំណង់ ដែលមានការចូលរួម១០,៦ភាគរយ កំណើន១៧,៩ភាគរយ និងកំណើន១២,៤ ភាគរយ នៃផលិតផលសរុបក្នុងស្រុកនៅឆ្នាំ២០១៨។

កំណើនយ៉ាងឆាប់រហ័សមានតុល្យភាព នឹងបញ្ហាប្រឈមទាក់ទង នឹងការប្រកួតប្រជែងសេដ្ឋកិច្ច មូលដ្ឋាននាំចេញតូចចង្អៀត និងប្រាក់ចំណូលទាប ទោះបីជាមានការកើនឡើងប្រាក់ចំណូល ដែលចង្អុលបង្ហាញពីសមត្ថភាពស្រូបយកទាប៕

CVEA សហការជាមួយស្ថាប័ន NAR មកពីសហរដ្ឋអាមេរិកបើកវគ្គបណ្តុះបណ្តាលជំនាញអចលនទ្រព្យ

ដោយ ៖ រ៉ាណេត

ភ្នំពេញៈ សមាគមអ្នកវាយតម្លៃ និងភ្នាក់ងារអចលវត្ថុកម្ពុជា (CVEA) បានសហការជាមួយNational Association of Realtors (NAR)របស់សហរដ្ឋអាមេរិក រៀបចំបើកវគ្គសិក្សាស្ដីពី Certified International Property Specialist (CIPS) ដើម្បីចែករំលែកចំណេះដឹង និងបណ្តុះបណ្តាលជំនាញផ្នែកអចលនទ្រព្យ។

ក្នុងគោលបំណងផ្សព្វផ្សាយនូវចំណេះដឹង និងជំនាញផ្នែកអចលនទ្រព្យជាតិ និងអន្តរជាតិដល់បណ្តាសាធារណៈជន ជាពិសេសអ្នកដែលស្ថិតនៅក្នុងវិស័យ នៅព្រឹកថ្ងៃទី១៤ ខែតុលា ឆ្នាំ២០១៩ នៅសណ្ឋាគារភ្នំពេញ សមាគមអ្នកវាយតម្លៃ និងភ្នាក់ងារអចលវត្ថុកម្ពុជា បានសហកាតជាមួយស្ថាប័ន National Association of Realtors (NAR) របស់សហរដ្ឋអាមេរិក បើកវគ្គបណ្តុះបណ្តាល ជំនាញអចលនទ្រព្យអន្តរជាតិ (Certified International Property Specialist (CIPS)។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ក្នុងពិធីបើកកម្មវិធីខាងលើនេះថា វគ្គសិក្សានេះមានរយៈពេល៥ថ្ងៃ ដោយគិតចាប់ពីថ្ងៃទី១៤ ដល់ថ្ងៃទី១៨ ខែតុលា ឆ្នាំ២០១៩ ក្រោមការបណ្តុះបណ្តាលពីលោក Furhad Waquad ដែលជាអ្នកមានជំនាញ និងចំណេះដឹងខ្ពស់ផ្នែកទីផ្សារអចលទ្រព្យអន្តរជាតិ។

លោកបន្តទៀតថា “សម្រាប់អ្នកដែលចូលរួមនៅក្នុងវគ្គបណ្តុះបណ្តាលនេះ នឹងទទួលបានចំណេះដឹងបន្ថែម ពីទីផ្សារអចលនទ្រព្យក្នុងស្រុក ទីផ្សារអចលនទ្រព្យ និងមុខជំនួញផ្សេងៗ ដែលពាក់ព័ន្ធនៅក្នុងសហរដ្ឋអាមេរិក ទីផ្សារនៅក្នុងតំបន់អាស៊ីប៉ាស៊ីហ្វិក ទីផ្សារអចលនទ្រព្យអន្តរជាតិ ក៏ដូចជាទីផ្សារនៅតំបន់អឺរ៉ុបផងដែរ (Local Markets, The Business of U.S Real Estate, Asia/Pacific & International Real Estate, The Americas & International Real Estate, Europe & International Real Estate)”។

លោកបានបន្តទៀតថា ជាក់ស្ដែងសិក្ខាកាម ដែលចូលរួមនៅក្នុងវគ្គបណ្តុះបណ្តាលជំនាញពិសេសមួយនេះ ភាគច្រើនជាថ្នាក់ដឹកនាំតាមក្រុមហ៊ុនអចលនទ្រព្យ អ្នកវិនិយោគអចលនទ្រព្យ,ពាណិជ្ជករ និងបុគ្គលដែលពាក់ព័ន្ធ ហើយក្រោយពេលបញ្ចប់ការសិក្សា នឹងមានការប្រគល់វិញ្ញាបនបត្របញ្ជាក់ពីគុណភាព នៃការទទួលបានចំណេះដឹង និងជំនាញយ៉ាងពិតប្រាកដ៕

សម្តេចតេជោនឹងអញ្ជើញបើកការដ្ឋានសាងសង់ឡើងវិញនូវផ្លូវសំខាន់ៗចំនួន៣៤ខ្សែនៅទូទាំងក្រុងព្រះសីហនុ

ដោយវុត្ថា

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នឹងអញ្ជើញចូលរួមជាអធិបតីនៅក្នុងពិធីសម្ពោធបើកគម្រោងស្ថាននាផ្លូវចំនួន៣៤ខ្សែ នៅក្នុងខេត្តព្រះសីហនុនាពេលឆាប់ៗខាងមុខនេះ។

លោក ឃាង ភារម្យ អ្នកនាំពាក្យសាលាខេត្តព្រះសីហនុបានឱ្យដឹងកាលពីពេលថ្មីៗនេះថា គម្រោងស្ថាបនាផ្លូវទាំង៣៤ខ្សែ ក្នុងភូមិសាស្ត្រខេត្តព្រះសីហនុនឹងចាប់ផ្តើមមអនុវត្តចាប់ពីថ្ងៃនេះតទៅ ដោយធ្វើទាំងថ្ងៃ ទាំងយប់ និងប្រើរយៈពេល៨ខែក្នុងនោះមានអ្នកទទួលម៉ៅការចំនួន៧ក្រុមហ៊ុន។

លោកបន្ថែមថា “ពិធីបើកការដ្ឋានសាងសង់ នឹងធ្វើឡើងនៅពេលឆាប់ៗ ក្រោមអធិបតីភាពដ៏ខ្ពង់ខ្ពស់របស់ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា”។

លោកបន្ថែមថា “ទំហំផ្លូវត្រូវបានពង្រីកអស់លទ្ធភាព ទៅតាមប្លង់ប្រព័ន្ធសុរិយោដី អមទៅដោយសួនច្បារ និងផ្លូវថ្មើរជើង”។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីពេលកន្លងទៅបានទម្លាក់កញ្ចប់ថវិកាជាតិប្រមាណចំនួន ១០០លានដុល្លារអាមេរិក ដើម្បីស្ថាបនាឡើងវិញនូវហេដ្ឋារចនាសម្ព័ន្ធសំខាន់ៗ នៅក្នុងក្រុងនៃខេត្តព្រះសីហនុ បន្ទាប់ពីទទួលរងនូវការខូចខាតដោយសារទឹកជំនន់។

គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក) កាលពីពេលថ្មីៗនេះ បានសម្រេចលើកគម្រោងអភិវឌ្ឍហេដ្ឋារចនាសម្ព័ន្ធ ផ្លូវក្រុងក្នុងខេត្តព្រះសីហនុ សរុបចំនួន ៣៤ខ្សែ ប្រវែង ៨៤៥០៥ ម៉ែត្រ ចែកចេញជាបីប្រភេទ៖ ក. ប្រភេទទី ១៖ មហាវិថី មានចំនួន ៣ ខ្សែ ប្រវែងសរុប ២២ ៧៣១ ម៉ែត្រ មានទទឹង ៥០ ម៉ែត្រ ផ្លូវរថយន្ត ៦ គន្លង ផ្លូវទោចក្រយានយន្ត២គន្លង។

ខ. ប្រភេទទី២ វិថីចំនួន១៤ ខ្សែ ប្រវែងសរុប ៤៩ ៩៥៧ ម៉ែត្រ មានទទឹងពី ២០ ម៉ែត្រ ទៅ ៤០ ម៉ែត្រ ផ្លូវរថយន្ត ២ ទៅ ៤ គន្លង ផ្លូវទោចក្រយានយន្ត ២ គន្លង ។ និងខ. ប្រភេទទី ២ ៖ វិថី មានចំនួន ១៤ ខ្សែ ប្រវែងសរុប ៤៩ ៩៥៧ ម៉ែត្រ មានទទឹងពី ២០ ម៉ែត្រ ទៅ ៤០ ម៉ែត្រ ផ្លូវរថយន្ត ២ ទៅ ៤ គន្លង ផ្លូវទោចក្រយានយន្ត២គន្លង។

តាមរយៈក្រសួងរៀបចំដែន នគរូបនីយកម្ម និងសំណង់ រដ្ឋាភិបាលបានសម្រេចធ្វើការស្ថាបនា និងសាងសង់ហេដ្ឋារចនាសម្ព័ន្ធនានា នៅទូទាំងខេត្តព្រះសីហនុ រហូតដល់ចំនួន៣៤ខ្សែ នេះ ក្នុងគោលដៅប្រែក្លាយក្រុងព្រះសីហនុ ឱ្យទៅជាទីក្រុងដ៏ទំនើប ពោរពេញទៅដោយសោភ័ណភាព បរិស្ថានល្អ សម្រាប់ការរស់នៅ ទេសចរណ៍ និងធុរកិច្ច ជាពិសេសធានាបាននូវគុណភាពខ្ពស់ ដែលអាចប្រើប្រាស់បានយូរអង្វែង៕

ផ្នែកសំខាន់បួននៃវិស័យអចលនទ្រព្យកម្ពុជានៅតែមានឱកាសរីកចម្រើនសំរាប់់រយៈពេលវែង

ដោយគង់ សូរិយា

ភ្នំពេញៈ នៅពេលប្រទេសមានសុខសន្តិភាព និងសេដ្ឋកិច្ចកម្ពុជានៅតែមានភាពល្អប្រសើរបែបនេះ ផ្នែកសំខាន់ៗចំនួនបួននៃវិស័យអចលនទ្រព្យ នៅតែត្រូវបានមើលឃើញថាមានឱកាសរីកចម្រើនសំរាប់រយៈពេលវែងបន្តទៀត។

សក្តានុពលក្នុងវិស័យដីធ្លី

តើអ្នកវិនិយោគគួរវិនិយោគលើផ្នែកអ្វី ដើម្បីទទួលបានប្រាក់ចំណេញខ្ពស់ និងមានហានិភ័យទាប? លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងឲ្យដឹងថា ការវិនិយោគលើអនុវិស័យទាំងបួនរួមមានដីធ្លី ខុនដូ ផ្សារទំនើប អាគារការិយាល័យនៅតែមានសក្តានុពលប្រហាក់ប្រហែគ្នា ប៉ុន្តែប្រជាពលរដ្ឋខ្មែរនិយមវិនិយោគលើវិស័យដីធ្លី ដោយសារវាចំណេញបានលឿន។

ដោយឡែកនៅបរទេស អ្នកវិនិយោគមិនសូវទិញដីនោះទេ ដោយសារដីចង្អៀត តែស្រុកខ្មែរយើងនៅសល់ដីទំនេរច្រើន ដែលធ្វើឲ្យអ្នកមានប្រាក់ច្រើនបច្ចុ ប្បន្នភាគច្រើន គឺមានដោយសារចំណេញពីការលក់ដី ដែលបានទិញក្នុងតំលៃទាប និងលក់ក្នុងតំលៃខ្ពស់។

លោកបន្តថា “ការមានបានរបស់មនុស្សមួយចំនួន ដោយសារភ័ព្វព្រេងសំណាង និងដោយសារតំលៃដីនៅស្រុករបស់យើង ចេះតែបន្តកើនឡើង ព្រោះអ្វី? គឺបើធៀបជាមួយប្រទេសជិតខាង កម្ពុជាមានសក្តានុពលសម្រាប់វិនិយោគច្រើន ទើបអ្នកវិនិយោគចូលមកវិនិយោគច្រើននៅកម្ពុជា។

អ្នកវិនិយោគធំៗចូលមក ពួកគេសាងសង់អាគារខុនដូសម្រាប់លក់ឲ្យជនជាតិខ្មែរយើង និងលក់ឲ្យជនបរទេស ដែលធ្វើឲ្យដីឡើងថ្លៃ និងធ្វើឲ្យមានលំហូរទុនវិនិយោគមកកម្ពុជា”។

ទោះបីជាស្ថានភាពនយោបាយមានការប្រែប្រួល តែលោកមើលឃើញថា ការប្រែប្រួលនយោបាយ មានកម្រិតតិចតួច ពោលគឺកម្ពុជានៅតែមានសន្តិភាព និងស្ថិរភាពនយោបាយរយៈពេលវែងតទៅទៀត។

យោងតាមការសិក្សារបស់ក្រុមហ៊ុន CBRE Cambodia បានរកឃើញថា តម្លៃដីធ្លីនៅកម្ពុជាបានកើនឡើងជាមធ្យម៧ភាគរយជារៀងរាល់ឆ្នាំ។

សក្តានុពលទីផ្សារការិយាល័យ

ការវិនិយោគកសាងអាគារការិយាល័យសម្រាប់ជួល ត្រូវបានអ្នកជំនាញមើលឃើញថា ជាការវិនិយោគរយៈពេលវែង ដែលអ្នកវិនិយោគអាចទាញយកប្រាក់បានជារៀងរហូត បន្ទាប់ពីសាងសង់អាគាររួច។

អាគារការិយាល័យត្រូវបែងចែកជាបីប្រភេទ គឺអាគារការិយាល័យកម្រិត A កម្រិត B និងអាគារការិយាល័យកម្រិត C ដែលភាគច្រើនអាគារកម្រិត A កំពុងមានការរីកចំរើន ពិសេសអាគារកម្រិត A បានផ្គត់ផ្គង់លើសទីផ្សារហើយ ព្រោះអាគារកម្រិត A វាថ្មីសម្រាប់អាជីវកម្ម និងមានតំលៃថ្លៃ ដូច្នេះទីផ្សាររបស់វាទាមទាររយៈពេលយូរបន្ថែមទៀត។

អាគារការិយាល័យកម្រិត A ត្រូវបានគេសំដៅដល់អាគារវិមានវឌ្ឍនៈ អាគារភ្នំពេញថោវើ និងវិមានកាណាឌីយ៉ា និងមានអាគារការិយាល័យកម្រិតAបាននិងកំពុងសាងសង់ថ្មីៗបន្ថែមទៀត ប៉ុន្តែទីផ្សារនេះមិនទាន់មានតម្រូវការខ្ពស់នោះទេ ដោយសារអាគារកម្រិត A មានតំលៃថ្លៃ និងស្ថិតនៅចំគោលដៅក្រុមហ៊ុនមានឈ្មោះល្បីៗជាអន្តរជាតិ។

ចំណែកអាគារការិយាល័យកម្រិត B និង C ដែលមានតំលៃជួលចាប់ពី៨ដល់១៣ដុល្លារ គឺមានការពេញនិយមនៅក្រុងភ្នំពេញ ដោយសារអាគារការិយាល័យកម្រិតនេះ មានតំលៃសមរម្យ ហើយក្រុមហ៊ុនភាគច្រើនប្រើប្រាស់ការិយាល័យប្រភេទនេះ ដោយសារវាអាចសន្សំប្រាក់ពួកគេបានច្រើន និងមានភាពងាយស្រួលចតយានយន្តផងដែរ។

លោកច្រឹក សុខនីមបានបន្តថា “ការវិនិយោគអាគារការិយាល័យ ជាការវិនិយោគដោយប្រើប្រាស់ទុនធំ តែប្រមូលលុយមកវិញតិច តែអាចប្រមូលបានយូរជារៀងរហូត ដែលអាគារខ្លះអាចប្រើប្រាស់បានពី៥០ ទៅដល់៧០ឆ្នាំ”។លោកបន្តថា “ការវិនិយោគអាគារការិយាល័យជួលមានសក្តានុពលរយៈពេលយូរ”។

សក្តានុពលខុនដូ និងអាផាតម៉ិន

ការវិនិយោគខុនដូឬអាផាតម៉ិន គឺជាផលិតផលតាមបែបផែនសម័យទំនើប ដែលធាតុពិតខុនដូ និងអាផាតម៉ិនមិនខុសគ្នានោះទេ។ ខុសទំហំបន្ទប់ គ្រាន់តែអាផាតម៉ិន មានម្ចាស់រួមតែមួយលើអាគារណាមួយនោះ ដែលគាត់អាចលក់អាគាររួម តែខុនដូគឺមានម្ចាស់ច្រើននៅលើអាគារតែមួយ ដូច្នេះបើគាត់ចង់លក់គឺអាចលក់ បន្ទប់ណាមួយ។

ការវិនិយោគខុនដូនិងអាផាតម៉ិននៅតែពេញនិយម និងផ្តល់ឳកាសប្រមូលប្រាក់មកវិញក្នុងរយៈពេលវែង និងចំណាយទុនច្រើន ដូចការវិនិយោគអាគារការិយាល័យផងដែរ។ ការវិនិយោគអាផាតម៉ិន និងខុនដូនៅតែពេញនិយម ពិសេសខុនដូគួរតែវិនិយោគលើខុនដូសម្រាប់ប្រជាពលរដ្ឋមានជីវភាពមធ្យមគឺជាការវិនិយោគត្រឹមត្រូវ ព្រោះមូលដ្ឋានទីផ្សារសម្រាប់អ្នកមានប្រាក់ចំណូលមធ្យមជាទីផ្សារធំទូលាយ។

នាពេលអនាគតទីផ្សារខុនដូនឹងមានតម្រូវការច្រើន ដោយសារការធ្វើសមាហរណកម្មសេដ្ឋកិច្ចអាស៊ាន កាលពីចុងឆ្នាំមុន ដែលទាក់ទាញអ្នកធ្វើការនិងអ្នកវិនិយោគកាន់តែច្រើនមកកាន់កម្ពុជា ហើយពេលណាពួកគេមកកម្ពុជា ពួកគេត្រូវការកន្លែងស្នាក់នៅ។ ម្យ៉ាងទៀតទីក្រុងភ្នំពេញកាន់តែរីក ចរាចរណ៍កាន់តែចង្អៀត ដូច្នេះប្រជាពលរដ្ឋនឹងសម្រេចចិត្តរស់នៅតាមខុនដូកាន់តែច្រើន ព្រោះបើពួកគេធ្វើការក្នុងទីក្រុង ពួកគេនឹងប្រឈមមុខនឹងការខាតបង់ពេលវេលា ខាតបង់ថវិកាដោយសារការកកស្ទះចរាចរ មកធ្វើការមិនទាន់ពេល ដូច្នេះខុនដូនឹងជាជម្រើសរបស់ពួកគេនាពេលអនាគត។

ផ្សារទំនើប

ដោយសារកំនើនជីវភាពប្រជាពលរដ្ឋ លំហូរវិនិយោគបរទេស និងភ្ញៀវទេសចរណ៍បានធ្វើឲ្យការវិនិយោគផ្សារទំនើបកើនឡើង ដោយនៅឆ្នាំនេះផ្សារទំនើបតូច ធំប្រមាណ១០ទៀត នឹងបើកដំណើរការនៅក្រុងភ្នំពេញ ខេត្តព្រះសីហនុ និងខេត្តសៀមរាប។

ការកើនឡើងនូវផ្សារទំនើប វាជាផ្នែកមួយដែលបង្ហាញពីអំណាចនៃការទិញរបស់ប្រជាពលរដ្ឋខ្មែរកើនឡើង ដោយសារការរីកចម្រើនសេដ្ឋកិច្ច និងកំនើនប្រាក់ចំណូលរបស់ប្រជាពលរដ្ឋម្នាក់ៗ។

អ្នកមនាងអាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia ធ្លាប់បានមានប្រសាសន៍ថា ការវិនិយោគផ្សារទំនើបច្រើន ដោយសារកំលាំងទិញកើនឡើងខ្ពស់ ប៉ុន្តែយ៉ាងណាក៏ដោយផ្សារទំនើបនៅកម្ពុជា នៅមិនទាន់លើសតម្រូវការនៅឡើយទេ ទោះបីជាមានការផ្គត់ផ្គង់ច្រើនក៏ដោយ។

អ្នកនាងបន្ថែមថា “ការវិនិយោគផ្សារទំនើប អ្នកវិនិយោគអាចរកប្រាក់ចំណេញពីការវិនិយោគលឿន ប៉ុន្តែផ្សារនិមួយៗទាមទារ ឲ្យមានការកែលំអរជាប្រចាំរៀងរាល់៥ឆ្នាំ ម្តង ដើម្បីឆ្លើយតបតាមបែបផែន និងដំណើរវិវត្តន៍នៃសេដ្ឋកិច្ចសង្គម៕

អ្នកជំនាញសេដ្ឋកិច្ច៖ រដ្ឋាភិបាលកម្ពុជាគួរធ្វើពិពិធកម្មប្រភពប្រទេសវិនិយោគ

ដោយៈ រ៉ាណេត

ភ្នំពេញៈ ក្រុមអ្នកជំនាញនិងអ្នកវិភាគសេដ្ឋកិច្ចឯករាជ្យបានលើកឡើងថា កម្ពុជា គួរតែមានការធ្វើពិពិធកម្មប្រភពប្រទេសវិនិយោគ ដោយមិនត្រូវរំពឹងទៅលើតែប្រទេសណាមួយជាចម្បងនោះទេ។

យោងតាមរបាយការណ៍ ដែលបង្ហាញដោយក្រុមប្រឹក្សាអភិវឌ្ឍកម្ពុជា (CDC) កាលពីចុងសប្ដាហ៍កន្លងទៅនេះបានបញ្ជាក់ថា ក្នុងចំណោមប្រទេសជាច្រើនដែលកំពុងតែមានសកម្មភាពវិនិយោគនៅក្នុងប្រទេសកម្ពុជា ប្រទេសចិនបានដើរតួយ៉ាងសំខាន់ និងឈរនៅលំដាប់ទី១ ដោយគ្រប់គ្រងលំហញូរវិនិយោគផ្ទាល់ពីបរទេស នៅកម្ពុជារហូតដល់ប្រមាណ ៣៥,៣១ភាគរយ នៃទំហំទុនវិនិយោគសរុប ខណៈដែលទំហំទុនវិនិយោគក្នុងស្រុករបស់កម្ពុជាមានប្រមាណ ៤៤,៧ភាគរយ។

អ្នកវិភាគសេដ្ឋកិច្ចឯករាជ្យកម្ពុជា លោក ង៉ែត ជូ បានមានប្រសាសន៍កាលពីចុងសប្ដាហ៍កន្លងមកថា ការទទួលបានទុនវិនិយោគ ពីបណ្តាប្រទេសនានាលើគ្រប់វិស័យ សុទ្ធតែជាការរួមចំណែក ក្នុងការអភិវឌ្ឍសេដ្ឋកិច្ចកម្ពុជាទាំងអស់។

លោកបានបន្តទៀតថា “យើងសាទរ ចំពោះគ្រប់វត្តមាននៃអ្នកវិនិយោគទាំងអស់ ហើយកម្ពុជា ក៏មិនមាននិន្នាការរើសអើងចំពោះប្រទេសណាមួយនោះទេ”។

ជាមួយនឹងទិន្នន័យ ដែលបង្ហាញពីទំហំទុនវិនិយោគនៅកម្ពុជា របស់ក្រុមប្រឹក្សាអភិវឌ្ឍកម្ពុជា ខាងលើនេះលោក ង៉ែត ជូ បាន មានប្រសាសន៍បន្តទៀតថា “វាគឺជាសូចនាករដ៏ល្អមួយ ដែលបង្ហាញពីភាពល្អប្រសើរ សំរាប់តំបន់សេដ្ឋកិច្ចពិសេសនៅកម្ពុជា”។ លោកបានបន្តទៀតថា “កម្ពុជាត្រូវតែរៀបចំឱ្យមានលក្ខណៈពិសេស និងងាយស្រួលដើម្បីឱ្យមានភាពទាក់ទាញលើការវិនិយោគ ទាំងទីតាំង ភាពអនុគ្រោះពីរដ្ឋាភិបាល ក៏ដូចជាការកសាងហេដ្ឋារចនាសម្ព័ន្ធផងដែរ”។

លោកបានបញ្ជាក់ថា បើទោះជាពេលនេះ កម្ពុជាទទួលបានលទ្ធផលល្អ ក្នុងការវិនិយោគ ប៉ុន្តែយើងចង់មានពិពិធកម្មប្រភពវិនិយោគ មកពីបណ្តាប្រទេសជាច្រើនទៀត ជាជាងមានតែប្រភពវិនិយោគធំត្រឹមតែ១ ឬ២ប្រទេស ដែលអាចជាហានិភ័យណាមួយកើតឡើង នៅពេលប្រទេសប្រភពវិនិយោគជួបវិបត្តិ ជាក់ស្ដែងដូចជាប្រទេសចិនជាដើម។

ស្រដៀងគ្នាទៅនឹងការលើកឡើងខាងលើនេះ លោកបណ្ឌិតហុង វណ្ណៈ អ្នកវិភាគ និងស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា បានមានប្រសាសន៍ថា ការទទួលបានទុនវិនិយោគ ពីបណ្តាប្រទេសអន្តរជាតិ ជារឿងដែលល្អ និងគាំទ្រ ប៉ុន្តែអ្វីដែលសំខាន់នោះ កម្ពុជាចាំបាច់ត្រូវតែពង្រឹងសមត្ថភាព ដើរតួនាទីជាអ្នកវិនិយោគក្នុងស្រុកខ្លួនឯង ដោយជំរុញ និងលើកម្ពស់ផ្នែក SME ដើម្បីបំពេញនូវតម្រូវការប្រើប្រាស់ក្នុស្រុក ជាជាងការទិញផលិតផលពីក្រៅស្រុក។

លោកបានបន្តទៀតថា “បច្ចុប្បន្ននេះរដ្ឋាភិបាល បានធ្វើកំណែទម្រង់ស៊ីជម្រៅផ្ទៃក្នុង ជាពិសេសផ្នែកច្បាប់វិនិយោគ ដើម្បីជួយសម្រួលការពាណិជ្ជករក្នុង និងក្រៅស្រុក ប៉ុន្តែវានៅមិនទាន់គ្រប់គ្រាន់នៅឡើយនោះទេ”។ លោកបន្តថា ការធ្វើបច្ចុប្បន្នភាពសេដ្ឋកិច្ច គឺជាចំណុចសំខាន់ ហើយព្យាយាមបន្តធ្វើកិច្ចសហប្រតិបត្តិការជិតស្និទ្ធ ជាមួយអន្តរជាតិ ដែលមានទីផ្សារធំទូលាយ សម្រាប់ធ្វើការនាំចេញផលិតផលរបស់កម្ពុជា ដែលពិសេស កសិផលដែលជាផលិតផលសំខាន់របស់កម្ពុជា”។

បណ្តាប្រទេសដែលកំពុង តែមានភាពសកម្មក្នុងការវិនិយោគនៅកម្ពុជា រួមមានដូចជា ប្រទេសចិនប្រមាណ ៣៥,៣១ភាគរយ ជប៉ុន៧,៨៧ ភាគរយ វៀតណាម ២,៩៩ភាគរយ សិង្ហបុរី១,៨៥ ភាគរយ កូរ៉េ១,៧៩ ភាគរយ ម៉ាឡេស៊ី ១,៤៨ ភាគរយ ថៃ១,៣៦ភាគរយ និងបណ្តាប្រទេសដទៃទៀតសរុបប្រមាណ២,៦៤ភាគរយ៕

ការសិក្សា៖ សេដ្ឋកិច្ចប្រទេសចិននៅតែមានភាពរ៉ឹងមាំសំរាប់ឆ្នាំ២០២០ខាងមុខ

ដោយ វុត្ថា

ភ្នំពេញៈ ក្រុមស្រាវជ្រាវអាជីវកម្ម ដែលមានមូលដ្ឋាននៅទីក្រុងញូវយ៉កបានព្យាករណ៍កាលពីពេលថ្មីៗនេះថា សេដ្ឋកិច្ចរបស់ប្រទេសចិនត្រូវបានមើលថា នឹងមានភាពប្រសើរឡើងនៅឆ្នាំ២០២០ខាងមុខនេះ ដោយសារការរៀបចំរចនាសម្ព័ន្ធឧស្សាហកម្មត្រូវបានបញ្ចប់។

លោក Erik Lundh សេដ្ឋវិទូជាន់ខ្ពស់ប្រចាំក្រុមប្រឹក្សា The Conference Board បានឱ្យដឹងកាលពីពេលថ្មីៗនេះថា យុទ្ធនាការរបស់ប្រទេសចិន ក្នុងការរៀបចំរចនាសម្ព័ន្ធឧស្សាហកម្ម នឹងរួមចំណែកយ៉ាងច្រើនដល់ការកែលម្អសេដ្ឋកិច្ចរបស់ប្រទេស។

លោកបានបន្ថែមទៀតថា កំណើនផលិតភាព កាន់តែច្រើននៅក្នុងប្រទេសចិន ត្រូវបានគេមើលឃើញ ក្នុងរយៈពេលមួយទសវត្សរ៍ខាងមុខ ដែលនឹងកាត់បន្ថយផលប៉ះពាល់នៃការថយចុះផលិតផលក្នុងស្រុកសរុបជាបន្តបន្ទាប់។

បើយោងតាមរបាយការណ៍សន្ទស្សន៍ សេដ្ឋកិច្ចពិភពលោកបានឱ្យដឹងថា ពិភពលោក ទំនងជានឹងមានកំណើនសេដ្ឋកិច្ច
២,៥ភាគរយ ក្នុងឆ្នាំ២០២០ និងជាមធ្យម ២,៧ ភាគរយសម្រាប់មួយទសវត្សរ៍ បន្ទាប់ធ្លាក់ចុះពី ៣,៣ភាគរយកាលពីឆ្នាំ២០១០ដល់ឆ្នាំ ២០១៩ នេះ។

លោក Erik Lundh បញ្ជាក់ថា “ទោះបីមានការភ័យខ្លាច នៃវិបត្តិសេដ្ឋកិច្ចកំពុងរីករាលដាលក៏ដោយ យើងរំពឹងថានឹងមានការងើបឡើងវិញនៅឆ្នាំ២០២០ ដោយសារបញ្ហាភាពជាច្រើន ត្រូវបានប្រទេសចិនកំពុងដោះស្រាយ”។ លោកបន្ថែមថា “ខ្សែចង្វាក់ផ្គត់ផ្គង់កំពុងត្រូវបានរៀបចំឡើងវិញ ហានិភ័យនៃការកើនឡើង នូវជម្លោះពាណិជ្ជកម្មបានថយចុះ ហើយកំណើនផលិតភាពនៅតែបន្តងើបឡើងវិញ”។

របាយការណ៍ដដែលបន្ថែមថា មធ្យមភាគសម្រាប់ចន្លោះឆ្នាំ២០២០ ២០២៩ សម្រាប់សេដ្ឋកិច្ចត្រូវបានគេប៉ាន់ស្មានថា មានកំនើន ១,៩ភាគរយ ខណៈដែលការព្យាករណ៍និន្នាការ សម្រាប់ទីផ្សារកំពុងរីកចម្រើន និងសេដ្ឋកិច្ចកំពុងអភិវឌ្ឍន៍រួមគ្នា គឺស្មើនឹងកំនើន៣,៥ភាគរយ។

ក្រុមស្រាវជ្រាវបាននិយាយថា កត្តាសំខាន់ៗដែលកំណត់សក្តានុពលកំណើនសេដ្ឋកិច្ចរយៈពេលវែង នៃសេដ្ឋកិច្ចពិភពលោក រួមមាននិន្នាការនៃការផ្គត់ផ្គង់កម្លាំងពលកម្ម និងការធ្វើចំណាកស្រុក ការទទួលយកបច្ចេកវិទ្យាឌីជីថល ការចែកចាយប្រាក់ចំណូល និងសម្ពាធជាច្រើនទៅលើបរិស្ថាន និងកំណើនផលិតភាព៕

ចំណេះដឹង! តើអ្វីជាគោលនយោបាយរបស់រដ្ឋាភិបាលក្នុងការគ្រប់គ្រងដីសម្បទាន សេដ្ឋកិច្ចនៅកម្ពុជា?

ដោយ វុត្ថា

ភ្នំពេញៈ សម្បទានជាសិទ្ធិស្របច្បាប់ ដែលមានចែងក្នុងច្បាប់ ដែលរាជរដ្ឋាភិបាលចេញអាជ្ញាប័ណ្ណផ្តល់ឲ្យរូបវន្តបុគ្គល ឬនីតិបុគ្គលកាន់កាប់ដី និងប្រើប្រាស់ដីតាមច្បាប់វិនិយោគ ។

ដីសម្បទានសេដ្ឋកិច្ច ជាដីដែលឆ្លើយតបនឹងផលប្រយោជន៍សេដ្ឋកិច្ច ដែលអាចទាញយកផលពីកសិកម្មឧស្សាហកម្ម។

ច្បាប់ភូមិបាលឆ្នាំ២០០១ ត្រង់មាត្រា៥៦ សិទ្ធិរបស់សម្បទានិកលើដី ដែលបានផ្តល់ជាសម្បទាន ក្នុងអំឡុងពេលនៃសម្បទាន។ សម្បទាននិកអាចទាញយកផល ពីការធ្វើកសិកម្ម ដែលរួមទាំងការអារសាងសង សិប្បកម្ម រោងចក្រផងដែរ។

លើសពីនេះសិទ្ធិរបស់សម្បទានិក ត្រូវបានការពារដោយច្បាប់ដូចជាកម្មសិទ្ធិករ ដែរ។ រយៈពេលកន្លងមករាជរដ្ឋាភិបាល បានធ្លាប់ផ្តល់ដីសម្បទាន ដល់វិនិយោគិនដែរ ប៉ុន្តែហាក់ដូចជាមិនមានប្រសិទិ្ធភាពទេ ថែមទាំងបង្កឲ្យមានវិវាទជាច្រើនករណី រវាងវិនិយោគិន និងប្រជាពលរដ្ឋនៅតំបន់ដីសម្បទាននោះ។

ហេតុនេះរាជរដ្ឋាភិបាល បានចេញបទបញ្ជាកំណត់វិធានការពង្រឹង និង់បង្កើនប្រសិទ្ធភាពលើការគ្រប់គ្រងសម្បទានដីសេដ្ឋកិច្ច ដែលត្រូវបានផ្អាក់ជាបណ្តោះអាសន្ន (បទបញ្ជាស្តីពីវិធានពង្រឹង និងបង្កើនប្រសិទ្ធិភាព នៃការគ្រប់គ្រងសម្បាទានដីសេដ្ឋកិច្ច ឆ្នាំ២០១២)។

ដោយយោងតាមការយកចិត្តទុកដាក់ពីរាជរដ្ឋាភិបាលកម្ពុជា គ្រប់បុគ្គលទាំអស់ទទួលបានសិទ្ធិស្របច្បាប់លើដីធ្លី តាមទម្រង់ កម្មសិទ្ធិ ភោគៈ ផលុបភោគ សិទ្ធិជួលអចិន្រ្តៃយ៍ ដែលអាចសាងសង់សំណងនៅលើដីទាំងអស់នោះបាន៕

ប្រធាន CREA ៖ ស្ថានភាពវិស័យអចលនទ្រព្យនៅកម្ពុជាមិនមានសញ្ញាអាក្រក់ដូចឆ្នាំ២០០៨នោះទេ

ដោយ ៖ រ៉ាណេត

ភ្នំពេញ៖ ស្រដៀងគ្នាទៅនឹងការសិក្សា និងរបាយការណ៍របស់ធនាគារពិភពលោកដែលបង្ហាញថា កំណើនសេដ្ឋកិច្ចរបស់ប្រទេសកម្ពុជាក្នុងឆ្នាំ២០១៩ -២០២០ នៅតែបន្តមានកំណើននោះ ប្រធានសមាគមអ្នកជំនាញអចលនទ្រព្យកម្ពុជា បានបញ្ជាក់ថា ទីផ្សារអចលនទ្រព្យកម្ពុជា នៅមិនទាន់សញ្ញាណាមួយដែលបង្ហាញពីស្ថានការណ៍អាក្រក់ដូចកាលពីឆ្នាំ២០០៨នោះទេ។

ស្របពេលដែលសង្គ្រាមពាណិជ្ជកម្មរវាងប្រទេសមហាអំណាចចិន និងសហរដ្ឋអាមេរិក នៅមិនទាន់បានបញ្ចប់នៅឡើយនោះ មានមនុស្សជាច្រើន ជាពិសេសអ្នកជំនួញក្នុងស្រុកបានបង្ហាញពីការព្រួយបារម្ភពីឱនភាពសេដ្ឋកិច្ចពិភពលោកដែលអាចជះឥទ្ធិពលអាក្រក់មកលើប្រទេសកម្ពុជារហូតសម្រេចចិត្តផ្អាកសកម្មភាពវិនិយោគ។

តាមរយៈការឆ្លើយឆ្លងតាមបណ្តាញទំនាក់ទំនង Telegram លោក ឃាង ពុទ្ធី ប្រធានសមាគមអ្នកជំនាញអចលនទ្រព្យកម្ពុជា បានអះអាងថា វិស័យអចលនទ្រព្យនៅកម្ពុជា នៅតែបន្តមានសញ្ញាវិជ្ជមាន និងល្អប្រសើរដដែលបើទោះជាសង្គ្រាមពាណិជ្ជកម្មរវាងប្រទេសមហាអំណាចចិន និងសហរដ្ឋអាមេរិកនៅមិនទាន់បានបញ្ចប់ក៏ដោយ។

លោកបានបញ្ជាក់ថា “មិនថាឆ្នាំ២០១៩ ឬឆ្នាំ២០២០នោះទេ សេដ្ឋកិច្ចកម្ពុជានៅតែបន្តមានកំណើនដដែល ដោយសារតែកម្លាំងនៃការវិនិយោគជាតិ និងអន្តរជាតិជាច្រើននៅតែបន្តសកម្មភាព”។ លោកបានបន្តទៀតថា “បច្ចុប្បន្ននេះមានគម្រោងវិនិយោគជាច្រើនកំពុងតែបន្តសកម្មភាពយ៉ាងសកម្ម ដែលនៅក្នុងមានដូចជាគម្រោងមជ្ឈមណ្ឌលពាណិជ្ជកម្ម គម្រោងសំណងលំនៅដ្ឋាន រួមជាមួយនឹងការសាងសង់ហេដ្ឋារចនាសម្ព័ន្ធរបស់រាជរដ្ឋាភិបាលផងដែរ”។

លោក ឃាង ពុទ្ធី បានបន្តទៀតថា “ពាក់ព័ន្ធទៅនឹងសង្គ្រាមពាណិជ្ជកម្មចិនជាមួយអាមេរិច បើទោះបីប៉ះពាល់ ក៏ប៉ះពាល់បន្តិចបន្តួចតែប៉ុណ្ណោះ ដែលវាអាស្រ័យ លើឥរិយាបទរបស់អ្នកវិនិយោគទុនជាតិ និងអន្តរជាតិ ក្នុងការៀបចំគម្រោងក្នុងការទិញ ឬលក់អចលនទ្រព្យឱ្យបានត្រឹមត្រូវ និងមានការប្រយ័ត្នប្រយ៉ែងខ្ពស់ មានតម្លាភាព និងប្រកបដោយជំនាញ ចំណេះដឹងរបស់ខ្លួន”។

លោកបន្តទៀតថា “បច្ចុប្បន្ន រដ្ឋាភិបាលក៏បានរៀបចំច្បាប់ផ្សេងៗ ដើម្បីការពារហានិភ័យណាមួយកើតឡើងទាំងអ្នកអភិឌ្ឍន៍ និងអតិថិជន ដែលកាន់តែបង្កើនទំនុកកាន់តែខ្ពស់”។ ជាមួយគ្នានេះលោកក៏បានអំពាវនាវដល់ប្រជាពលរដ្ឋ និងអ្នកវិនិយោគលើវិស័យអចលនទ្រព្យទាំងអស់កុំឱ្យមានការព្រួយបារម្ភខ្លាំងពេកចំពោះបញ្ហានេះ ហើយបន្តអាជីកម្ម និងការវិនិយោគរបស់ខ្លួនដែលមានបច្ចុប្បន្នឆ្ពោះទៅរកឧត្តមភាពនៅថ្ងៃអនាគត។

លោក James Hodge នាយករងក្រុមហ៊ុន CBRE Cambodia បានឱ្យដឹងក្នុងសន្និសិទ្នសារព័ត៌មាននៅថ្ងៃទី១១ តុលា ឆ្នាំ២០១៩ ថា ការគំរាមកំហែងពីខាងក្រៅដូចជា ការដកប្រព័ន្ធអនុគ្រោះពន្ធពីអឺរ៉ុប វានៅតែមានឳកាស និងពេលវេលាក្នុងការចរចាក្នុងទទួលបានវាមកវិញ ហើយចំណែកសង្គ្រាមពាណិជ្ជកម្មអាមេរិក និងចិនបានបង្កើតឳកាសជាច្រើនដល់កម្ពុជា។ លោកបញ្ជាក់ថា “ថ្មីៗនេះ យើងឃើញរោងចក្រផលិតកម្មចិនជាច្រើនកំពុងសម្លឹងរកកន្លែងវិនិយោគនៅទីនេះ ហើយទីតាំងវិនិយោគផ្សេងទៀត នៅតំបន់អាស៊ីអាគ្នេយ៍ដូចជាវៀតណាម ដោយតម្លៃកម្លាំងពលកម្មនៅទីនេះមានភាពសមរម្យ ខណៈកម្ពុជាក៏តម្លៃកម្លាំងពលកម្មសមរម្យដែរ ក្នុងការប្រកួតប្រជែងជាមួយវៀតណាម ដើម្បីទាញយកវិនិយោគក្រៅប្រទេស”។

លោកបានបន្តថា “កិច្ចការសំខាន់ដែលយើងត្រូវធ្វើដើម្បីទាក់ទាញវិនិយោគផ្សេងទៀត ក្រៅពីប្រទេសចិន គឺរៀបចំសមត្ថភាពបទបញ្ញត្តិរបស់កម្ពុជាឱ្យបានប្រសើរ ហើយធ្វើឱ្យកាន់តែប្រសើរឡើងនូវអ្វីដែលយើងមានក្នុងប្រទេស”។
យោងតាមរបាយការណ៍ថ្មី ដែលចេញផ្សាយដោយធនាគារពិភពលោក កាលពីថ្ងៃទី១០ ខែតុលា ម្សិលមិញនេះបានបង្ហាញថា វិស័យសំណង់នៅតែបន្តមានសន្ទុះខ្លាំងនៅក្នុងឆ្នាំ ២០១៩ ដោយសារវិនិយោគិន បន្តបោះទុនវិនិយោគលើគម្រោងនានានៅទូទាំងប្រទេស។

វិនិយោគិនចិននៅតែបន្តនាំមុខគេ នៅក្នុងតារាងវិនិយោគដោយផ្ទាល់ពីបរទេស (FDI) ចូលមកក្នុងប្រទសកម្ពុជាដែលស្មើនឹង៤០ភាគរយ នៃការវិនិយោគផ្ទាល់ពីបរទេសសរុប។

របាយការណ៍ដដែលបានបង្ហាញបន្តថា ខណៈលទ្ធផលវិស័យអចលនទ្រព្យ បាននឹងកំពុងរីកចម្រើនខ្លាំង ការនាំចូលដែកថែបមកកាន់ប្រទេសកម្ពុជាបានកើនឡើង៦៣,៥ ភាគរយពីមួយឆ្នាំទៅមួយឆ្នាំ។

របាយការណ៍ដដែលក៏បានបង្ហាញពីកំណើននៃការនាំចូលរថយន្ត និងផលិតផលប្រេងចូលមកក្នុងប្រទេសកម្ពុជា ដោយសារកំណើនសេដ្ឋកិច្ចរបស់កម្ពុជា មានការរីកចំរើនយ៉ាងឆាប់រហ័ស។

របាយការណ៍បានលើកឡើងថា “ការកើនឡើងនៃការប្រើប្រាស់ក្នុងស្រុក បានជំរុញឱ្យមានកំណើននៃការនាំចូល ដោយក្នុងនោះការនាំចូលផលិតផលប្រេង និងយានយន្តបានកើនឡើង ៩១,០ ភាគរយ និង ១៨,៥ ភាគរយ”។

ក្នុងឆ្នាំ២០១៩នេះ ធនាគារពាណិជ្ជនៅកម្ពុជា ក៏ជួយជំរុញកំណើនឥណទានផងដែរ ដោយក្នុងនោះកំណើនឥណទានកើនជិត ៣០ភាគរយ ពីមួយឆ្នាំទៅមួយឆ្នាំនៅក្នុងខែមិថុនា ឆ្នាំ២០១៩កន្លងមកនេះ៕

កូរ៉េនឹងជួយអភិវឌ្ឍន៍ក្រុងសៀមរាបឱ្យក្លាយជាទីក្រុងបៃតង

ដោយ វុត្ថា

ភ្នំពេញ៖ មូលនិធិសហប្រតិបត្តិការអភិវឌ្ឍន៍សេដ្ឋកិច្ចកូរ៉េ (EDCF) ប្រចាំប្រទេសកម្ពុជា បានចុះហត្ថលេខាលើកំណត់ហេតុជំនួយស្មារតីលើសំណើគម្រោងអភិវឌ្ឍន៍ទីក្រុងបៃតងក្នុងខេត្តសៀមរាប (AIDE MÉMOIRE ON THE EDCF PCP MISSION ON GREEN SIEM REAP URBAN DEVELOPMENT PROJECT)។

លោកស្រី ហ៊ី យ៉ុងលី (Ms. Hye Kyung Lee) នាយកស្ថាប័នហិរញ្ញប្បទានពីមូលនិធិសហប្រតិបត្តិការអភិវឌ្ឍន៍សេដ្ឋកិច្ចកូរ៉េ (EDCF) ប្រចាំប្រទេសកម្ពុជា កាលពីពេលថ្មីៗនេះ បានឱ្យដឹងថាការចុះកំណត់ហេតុជំនួយស្មារតីនេះ ក្នុងគោលបំណងរៀបចំបង្កើតឯកសារអនុគម្រោងចំនួន០២ ក្នុងក្របខ័ណ្ឌគម្រោងអភិវឌ្ឍន៍ទីក្រុងបៃតងក្នុងខេត្តសៀមរាប លោកស្រីបន្តថា គម្រោងទំាង ២នោះរួមមានគឺគម្រោងសាងសង់ផ្លូវវាងក្រុងសៀមរាប និងគម្រោងសាងសង់ និងពង្រីកបណ្តាញលូខ្នែង លូខ្នែងរងជំហានទី២ ក្រោយពីការចុះបេសកកម្មរួមគ្នាលើការពិនិត្យស្ថានភាពជាក់ស្តែង និងកត្តាប្រឈមក្នុងក្រុងសៀមរាបចំនួន០៥ថ្ងៃ កាលពីថ្ងៃទី៦-១០ ខែ តុលា ឆ្នាំ២០១៩ ។

ខេត្តសៀមរាប គឺជាមជ្ឈមណ្ឌលសេដ្ឋកិច្ចដ៏សំខាន់របស់ព្រះរាជាណាចក្រកម្ពុជា ដោយផ្អែកលើសក្តានុពលទេសចរណ៍ រួមទាំងសម្បត្តិបេតិកភណ្ឌវប្បធម៌ដ៏សម្បូរបែប តំបន់ប្រវត្តិសាស្ត្រធម្មជាតិដែលមានប្រាសាទបុរាណរាប់រយគ្របដណ្តប់លើផ្ទៃដីទំហំ ៤០១ គីឡូម៉ែត្រការ៉េ ជាពិសេសប្រាសាទអង្គរវត្តដែលជាតំបន់បេតិកភណ្ឌពិភពលោក លើសពីនេះទៀត ខេត្ត សៀមរាប ត្រូវបានគេស្គាល់ថាជាតំបន់បេតិកភណ្ឌពិភពលោក ដែលបានក្លាយទៅជាតំបន់ទេសចរណ៍ដ៏ល្បីល្បាញបំផុតមួយ។

មិនត្រឹមតែប៉ុណ្ណោះ ខេត្តសៀមរាប បានក្លាយជាមជ្ឈមណ្ឌលទេសចរណ៍អន្តរជាតិ ដែលទទួលបានភ្ញៀវទេសចរអន្តរជាតិ ចំនួនពាក់កណ្តាល នៃចំនួនភ្ញៀវទេសចរសរុបប្រទេសកម្ពុជា ខណៈដែលកាលនៅក្នុងខែមិថុនា ឆ្នាំ ២០១៦ ក្រសួងទេសចរណ៍ នៃព្រះរាជាណាចក្រកម្ពុជា បានទទួលពានរង្វាន់ «ប្រទេសកម្ពុជា គឺជាគោលដៅទេសចរណ៍ដ៏ល្អបំផុតនៅលើពិភពលោក» ផ្តល់ជូនដោយក្រុមប្រឹក្សាទេសចរណ៍ និងពាណិជ្ជកម្មអ៊ឺរ៉ុប ដោយបានប្រកាសជាផ្លូវការថា «ប្រទេសកម្ពុជា គឺជាគោលដៅទេសចរណ៍វប្បធម៌ដ៏ពេញនិយមបំផុតក្នុងឆ្នាំ២០១៦» ហើយក៏ជាមោទនភាពផងដែរសម្រាប់ខេត្តសៀមរាប ដែលប្រាសាទអង្គរវត្តត្រូវបានគេចាត់ទុកថាជាគោលដៅទេសចរណ៍ដ៏អស្ចារ្យនៅ អាស៊ីសម្រាប់ឆ្នាំ២០១៦ និងក្នុងឆ្នាំ២០១៧ ឆ្នាំ២០១៨ ប្រាសាទអង្គរវត្តត្រូវបានបោះឆ្នោតជ្រើសរើសទីតាំងទេសចរណ៍ល្អបំផុតលើពិភពលោកដោយគេហទំព័រទេសចរណ៍ Trip Advisor ៕

ការចរចាពាណិជ្ជកម្មរវាងអាមេរិក និងចិននាំទៅរកការបញ្ចប់សង្គ្រាមពាណិជ្ជកម្ម

ដោយ Donald Lee

សង្គ្រាមពាណិជ្ជកម្មរវាងអាមេរិក និងចិនបានឈានដល់ការបញ្ឃប់ជាបណ្តោះអាសន្ន។ ប្រធានាធិបតីអាមេរិកលោក Donald Trump បានផ្អាកការដំឡើងពន្ធលើទំនិញចិនដែលមានតម្លៃ ២៥០ ពាន់លានដុល្លារដែលនឹងចូលជាធរមាននៅខែនេះ។

លោក Trump បានអះអាងថា កិច្ចចរចាពាណិជ្ជកម្មជុំទីមួយគឺជាជោគជ័យ ហើយថាសម្លេងរវាងអ្នកចរចាពាណិជ្ជកម្មបានប្រែទៅជាវិជ្ជមាន បន្ទាប់ពីការកើតឡើងការបង្កហេតុជាច្រើនសប្តាហ៍មកនេះ។

នៅក្នុងសន្និសីទកាសែតនៅការិយាល័យ Oval លោក Trump បាននិយាយថា “មានការទាស់ទែងគ្នាយ៉ាងខ្លាំងរវាងអាមេរិក និងចិន ហើយឥឡូវនេះវាជាថ្ងៃបុណ្យនៃក្តីស្រឡាញ់។ នោះជារឿងល្អ” ។

លោក Trump បានបន្ថែមទៀតថា កិច្ចព្រមព្រៀងទាំងមូលនឹងរួមបញ្ចូលការការពារកម្មសិទ្ធិបញ្ញា និងផលិតផលកសិកម្មដែលមានតម្លៃដល់ទៅ ៥០ ពាន់លានដុល្លារអាមេរិកដល់ចិន។

លោក Trump បានសរសេរនៅថ្ងៃសុក្រ ថា “រឿងល្អៗ កំពុងកើតឡើងនៅឯកិច្ចពិភាក្សាពាណិជ្ជកម្មចិន។ អារម្មណ៍កក់ក្តៅជាងមុននាពេលបច្ចុប្បន្នដូចជាថ្ងៃចាស់។ ខ្ញុំនឹងជួបជាមួយឧបនាយករដ្ឋមន្ត្រីចិននៅថ្ងៃនេះ។ ទាំងអស់គ្នាចង់ឃើញមានអ្វីកើតឡើងគួរឱ្យកត់សម្គាល់!”៕