ដោយ ៖ រ៉ាណេត
ភ្នំពេញ ៖ ដោយមើលឃើញពីភាពជាក់ស្ដែងនៃការកកស្ទះចរាចរណ៍ជារៀងរាល់ថ្ងៃ ដែលស្ទើរតែគ្មានវិធីដោះស្រាយទៅហើយនោះ សាលារាជធានីភ្នំពេញ មានគម្រោងរៀបចំចិញ្ចើមផ្លូវជា២គន្លងសម្រាប់អ្នកថ្មើរជើង និងសម្រាប់ផ្លូវម៉ូតូបើកបរ ដើម្បីជួយសម្រួលដល់ការធ្វើដំណើរ។
ដោយសារតែកំណើននៃប្រជាពលរដ្ឋចូលមករស់នៅ និងប្រកបការងារ អាជីវកម្មនៅរាជធានីភ្នំពេញកាន់តែច្រើន ដែលជំរុញឱ្យមានកំណើនយានយន្តបង្កការកកស្ទះជារៀងរាល់ថ្ងៃ ជាពិសេសនៅខណៈពេលព្រឹក ពេលថ្ងៃត្រង់ និងពេលល្ងាចជារៀងរាល់ថ្ងៃ។
ជាមួយគ្នានេះ ដោយសារតែគ្មានជម្រើស អ្នកបើកបរម៉ូតូជាច្រើនបានបំពានច្បាប់ដោយជ្រើសយកការបើកបរនៅលើចិញ្ចើមផ្លូវយ៉ាងអាណាធិបតេយ្យ និងគ្មានសណ្តាប់ធ្នាប់។
ជាដំណោះស្រាយនូវបញ្ហាចាំបាច់មួយនេះ រដ្ឋបាលសាលារាជធានីភ្នំពេញ បានសម្រេចលើកជាគម្រោងរៀបចំចញ្ចើមផ្លូវជា២គន្លង ដោយមួយគន្លងសម្រាប់អ្នកថ្មើរជើង ហើយមួយគន្លងទៀតសម្រាប់អនុញ្ញាតឱ្យម៉ូតូបើកបរ ដើម្បីកាត់បន្ថយការកកស្ទះចរាចរណ៍ដោយជាជំហានដំបូងនឹងអនុវត្តនៅក្នុងខណ្ឌចំនួន៥។
លោក ឃួង ស្រេង អភិបាលរាជធានីភ្នំពេញ បានលើកឡើងថា “ខ្ញុំក៏មានគម្រោងដែរ ក្នុងរាជធានីភ្នំពេញ ម៉ូតូ និងអ្នកថ្មើរជើង ត្រូវឡើងលើចិញ្ចើមផ្លូវ” ។
លោកបានបន្ថែមថា “ខ្ញុំអត់គិតពី ២ភាគ៣ទៀតទេ គិត២ភាគ៣ លែងកើតហើយ រាជធានីបច្ចុប្បន្ន គិត២ភាគ៣ ឱ្យគេលក់ដូរទៀត លែងបានហើយ លែងទទួលយកកើតហើយ គិតរឿងផ្លូវថ្មើរជើង និងផ្លូវជិះម៉ូតូ ឡើងទៅលើចិញ្ចើម ធ្វើឱ្យគាត់ជិះខាងលើ ផ្លូវខាងក្រោម ទុកសម្រាប់រថយន្ត ទី១កាត់បន្ថយគ្រោះថ្នាក់ចរាចរណ៍ ទី២កាត់បន្ថយការកកស្ទះចរាចរណ៍ នេះជាចំណុចសំខាន់ ដែលរាជធានីភ្នំពេញ ត្រូវតែខិតខំប្រឹងប្រែងរកដំណោះស្រាយជូនប្រជាពលរដ្ឋ” ។
ការលើកឡើងនេះត្រូវបានធ្វើឡើងនៅក្នុងឱកាសជួបជុំជាមួយអាជ្ញាធរមូលដ្ឋាន (សង្កាត់,ខណ្ឌ) គ្រប់ស្ថាប័ន្ធពាក់ព័ន្ធ កាលពីរសៀលថ្ងៃទី៣ ខែតុលា ឆ្នាំ២០១៩។
សូមបញ្ជាក់ផងដែរថា ខណ្ឌទាំង៥ដែលនឹងត្រូវអនុវត្តមុនគេនោះរួមមាន ខណ្ឌដូនពេញ ខណ្ឌ៧មករា ខណ្ឌទួលគោក ខណ្ឌចំការមន និងខណ្ឌបឹងកេងកង ខណៈដែលការងារនេះ បាននឹងកំពុងរៀបចំពិនិត្យត្រៀមបើកសិក្ខាសាលាក្នុងពេលខាងមុខ ៕
