ដោយ​ វុត្ថា​

អា​មេ​រិកៈ​ មហា​ដ្ឋី​អចលន​ទ្រព្យ​ឥណ្ឌូ​នេ​ស៊ី​ និង​ជា​ដៃ​ជំនួញ​ដ៏​ធំ​ជាមួយ​ក្រុមហ៊ុន​របស់​លោក​ Donald​ Trump​ ​បាន​សម្រេច​​ទិញ​អចលនទ្រព្យ​ របស់​លោក​ប្រធាន​ធិ​តី​សហរដ្ឋអាមេរិក​ លោក​ Donald​ Trump​ ​ជា​ប្រភេទ​លំនៅ​ដ្ឋាន​ឈ្មោះថា​ Beverly​ Hills​ តម្លៃ​ ១៣​,៥លាន​ដុល្លារ​សហរដ្ឋអាមេរិក​។

យោង​តាម​ការ​ចុះផ្សាយ​របស់​សារព័ត៌មាន​ Jim​ Heath​ TV​ កាលពី​ពេល​ថ្មី​ៗនេះ​ បាន​ឲ្យដឹង​ តម្លៃ​នេះ​កើនឡើង​ទ្វេដង​ ព្រោះ​ផ្ទះ​នេះ​ដែល​លោក​ត្រាំ​ បាន​ទិញ​កាលពី​ឆ្នាំ​ ២០០៧​ ​មានតម្លៃ​ត្រឹមតែ៧លាន​ដុល្លារ​សហរដ្ឋអាមេរិក​។

សារព័ត៌មាន​បន្ត​ថា​ កូន​ប្រុស​ច្បង់​របស់​លោក​ Trump​ គឺ​លោក​ Donald​ Trump​ Jr​ បាន​ចុះហត្ថលេខា​លក់​ស្ងាត់​ៗទៅ​អោយ​ក្រុ​ហ៊ុន​ Hillcrrest​ Asia​ Ltd​ ជា​ក្រុមហ៊ុន​ចុះបញ្ជី​នៅ​កោះ​ Virgin​ ចក្រភព​អង់គ្លេស​ របស់​ហា​សេដ្ឋី​អចលន​ទ្រព្យ​ឥណ្ឌូ​នេ​ស៊ី​ កាលពី​កន្លង​ទៅ​ថ្មី​ៗនេះ​។

មហាសេដ្ឋី​អលន​ទ្រព្យ​ឥណ្ឌូ​នេ​ស៊ី​ ដែល​បាន​ទិញ​អចលនទ្រព្យ​របស់​លោក​ Trump​ នេះ​មានឈ្មោះ​ថា​ Har​ Tanoesoedibjo​ ជា​ដៃគូ​ជំនួញ​ជាមួយ​លោ​ក្រុមហ៊ុន​របស់​លោក​Trump​ ដែល​បាន​សាងសង់​រមណីយដ្ឋាន​នៅ​កោះ​បាលី​ និង​ទីលាន​វាយកូនគោល​ និង​រមណីយដ្ឋាន​នៅ​ខាងលិច​កោះ​ Java​ ដែល​ស្ថិតនៅ​ខាងត្បូង​នៃ​ទីក្រុង​ Jakarta​។

លោក​ Tanoesoedibjo​ ​មាន​អាយុ៥៤ឆ្នាំ​ ​ត្រូវ​បាន​សារព័ត៌មាន​ Forbes​ ចុះផ្សាយ​ថា​ ជា​អ្នកមាន​លុយ​លំដាប់​ទី៣១​ នៅក្នុង​ប្រទេស​ឥណ្ឌូ​នេ​ស៊ី​ កាលពី​ឆ្នាំ២០១៨​ ដែល​មាន​លុយ​ប្រមាណ១.១​ ពាន់​លាន​ដុល្លារ​សហរដ្ឋអាមេរិក​។

អល​ចន​ទ្រព្យរបស់​លោក​ Trump​ ដែល​មហាសេដ្ឋី​រូប​នេះ​ បាន​ទិញ​ស្ថិតនៅ​រដ្ឋ​កា​លី​ហ្វ​ញ៉ា​ ដែល​មាន​ទំ​ដី​ប្រមា​ន​ ៥​,៤០០ហ្វី​តការ៉េ​។

​លោក​Trump​ បាន​លក់​អចលនទ្រព្យ​របស់​ខ្លួន​ផ្សេង​ៗទៀត​ ចាប់តាំងពី​បាន​ចូលកាន់​តំណែង​ជា​ប្រធានា​ធិប​តេយ្យ​ រួម​ទាំង​មានការ​លក់​ឃ្លាំង​មួយ​កន្លែងនៅ​រដ្ឋ​ South​ Carolina​ ដី​នៅក្នុង​សាធារណរដ្ឋ​ដូ​មី​និក​ និង​ខុន​ដូ​នៅក្នុង​សណ្ឋាគារ​ នៃ​រដ្ឋ​ឡា​សវេហ្គាស​៕

​ដោយ​ ​Donald​ ​Lee​

​ភ្នំ​ពេញៈ​ ​ខណៈ​កម្ពុជា​បន្ត​ទទួល​បានការ​វិនិយោគទុន​ដ៏​ច្រើន​ពី​ចិន​ ​នៅក្នុង​វិស័យ​អចលនទ្រព្យ​ ​ពិសេស​ខុន​ដូ​ ​បាន​ធ្វើឲ្យ​អ្នក​វិនិយោគ​មក​ពី​ប្រទេស​ចិន​ ​ចាប់អារម្មណ៍​វិនិយោគ​នៅ​កម្ពុជា​ ​ច្រើនជាង​ប្រទេសជិតខាង​ដូចជា​ប្រទេស​ថៃ​ ​ដែល​ទីផ្សារ​អចលនវត្ថុ​កំពុង​ធ្លាក់ចុះ​។​

​យោង​តាម​ក្រុមហ៊ុន​ ​Knight​ ​Frank​ ​Cambodia​ ​បាន​ឲ្យដឹង​កាលពី​ពេល​ថ្មី​ៗ​នេះ​ថា​ ​វិស័យ​អចលនទ្រព្យ​ដែល​រួមមាន​ ​ការ​អភិវឌ្ឍ​ខុន​ដូ​ក្នុង​កម្ពុជា​ ​បាន​កើនឡើង​ដោយក្រុម​ហ៊ុន​ចិន​បាន​វិនិយោគ​ប្រមាណ៣,៨ពាន់​លាន​ដុល្លារ​ ​ក្នុង​វិស័យ​អចលនទ្រព្យ​កាលពី​ឆ្នាំមុន​។​ ​ការពិត​ក្រសួង​រៀបចំ​ដែនដី​ ​នគរូបនីយកម្ម​ ​និង​សំណង់​ ​បាន​អនុម័ត​គម្រោង​អចលនទ្រព្យ​ចំនួន​គិតជា​ទឹកប្រាក់២,៧ពាន់​លាន​ដុល្លារ​ ​ក្នុងរយៈពេល៤ខែ​ដំបូង​នៃ​ឆ្នាំនេះ​។​

​ប៉ុន្តែ​នៅក្នុង​ប្រទេស​ថៃ​ដែល​នៅ​ជិតខាង​ ​វិស័យ​អចលនទ្រព្យ​ជាពិសេស​ការ​លក់​ខុន​ដូ​ ​កំពុង​ជួបប្រទះ​ការ​ធ្លាក់ចុះ​យ៉ាង​ខ្លាំង​ ​ជាពិសេស​ជាមួយ​វិនិយោគិន​មក​ពី​ប្រទេស​ចិន​។​

​កត្តា​ចម្បង​ពីរ​ដែល​នាំឲ្យ​វិនិយោគិន​ចិន​ចេញ​ ​ពីទី​ផ្សារ​ខុន​ដូ​របស់​ប្រទេស​ថៃ​ ​មាន​ដូចជា​ ​ទី១​ ​ការ​ពង្រឹង​ប្រាក់​បាត​ដែល​មាន​កំណើន​រហូតដល់​ទៅ២០ភាគរយ​ ​ថ្លៃជាង​ប្រា​ក់យ័ន​ចិន​ ​ដែល​ធ្វើឲ្យ​ការទិញ​អចលនទ្រព្យ​កើនឡើង​ជិត១៥ភាគរយ​ ​ថ្លៃជាង​កាលពី៥ឆ្នាំមុន​។​

​ទី២​ ​ការ​ផ្គត់ផ្គង់​លើស​តម្រូវការ​ក្នុង​វិស័យ​ខុន​ដូ​ ​នៅ​ក្រុង​បាងកក​ ​ដែល​បាន​ធ្វើឲ្យ​តម្លៃ​អចលនទ្រព្យ​ធ្លាក់ចុះ​ស្ទើរតែ​គ្រប់​ផ្នែក​។​ ​

​យោង​តាម​ក្រុមហ៊ុន​ ​Knight​ ​Frank​ ​ប្រទេស​ថៃ​បាន​ឲ្យដឹង​ថា​ ​វិស័យ​អចលនទ្រព្យ​នៅ​បាងកក​ ​បាន​ជួបប្រទះ​នឹង​ការ​ធ្លាក់ចុះ​តម្លៃ​ជា​មធ្យ៦ភាគរយ​ ​ពី​មួយឆ្នាំ​ទៅ​មួយឆ្នាំ​។​ ​កាលពី៥ឆ្នាំមុន​ការ​ផ្គត់ផ្គង់​ខុន​ដូ​ ​នៅ​ទីក្រុង​បាងកក​បាន​កើន​ឡើង​៧ភាគរយ​ ​ប៉ុន្តែ​ឥឡូវនេះ​បាន​ធ្លាក់ចុះ​ពី២​ ​ទៅ៤​ ​ភាគរយ​។​

​លោក​ ​Simon​ ​Lee​ ​ជា​សហ​ស្ថាបនិក​ ​និង​ជា​ប្រធាន​ក្រុមហ៊ុន​ ​Angel​ ​Real​ ​Estate​ ​Consultancy​ ​Co​ ​បាន​ប្រាប់​កាសែត​បាងកក​ប៉ុស្តិ៍​ថា​ ​“​អ្នកទិញ​ជនជាតិ​ចិន​មិន​សប្បាយចិត្ត​ទេ​ ​នៅពេល​ពួកគេ​ដឹង​ថា​ ​អ្នក​អភិវឌ្ឍន៍​បាន​លក់​ខុន​ដូ​ ​ក្នុង​តម្លៃ​ទាប​ជាង​តម្លៃ​លក់ដូរ​ដែល​ពួកគេ​បាន​ចំណាយ​កាលពី​ប៉ុន្មាន​ឆ្នាំមុន​ ​ខណៈ​អ្នក​អភិវឌ្ឍន៍​ចង់​លក់​ខុន​ដូ​យូនី​ត​ដែល​នៅ​សល់​ទាំងអស់​របស់​ពួកគេ​”​។​ ​

​ទីផ្សារ​ខុន​ដូ​កម្ពុជា​នៅតែ​រឹងមាំ​ ​ខណៈ​ដែល​អ្នក​អភិវឌ្ឍន៍​កំពុង​មើលឃើញ​ផល​ចំណេញ​ពី​ទាំង​អ្នកទិញ​ក្នុង​ស្រុក​ ​និង​បរទេស​។​

​លោក​ ​James​ ​Hodge​ ​នាយករង​ក្រុមហ៊ុន​ ​CBRE​ ​Cambodia​ ​បាន​មានប្រសាសន៍​ថា​ ​“​ការ​អភិវឌ្ឍ​ចុងក្រោយ​គេ​ ​គឺ​ត្រូវ​បាន​វិនិយោគ​ដោយក្រុម​អ្នក​វិនិយោគ​ចម្រុះ​ ​ដូចជា​ ​អ្នកមាន​ទ្រព្យសម្បត្តិ​ក្នុង​ស្រុក​ ​និង​អ្នកបរទេស​ជាច្រើន​ ​ដែល​បាន​យក​កំណត់​គោលដៅ​ ​គុណភាព​ ​និង​ការ​យកចិត្ត​ទុក​ក្នុង​ទីផ្សារ​យ៉ាង​ច្បាស់លាស់​របស់​អ្នក​អភិវឌ្ឍ​”​។​

​លោក​បាន​បន្ត​ថា​ ​“​ការទិញ​ខុន​ដូ​យូនី​ត​ជាទូទៅ​គឺជា​រឿង​ធម្មតា​ ​ហើយ​ជា​រឿយ​ៗ​វា​នឹង​កើតឡើង​នៅក្នុង​គ​ម្រោ​ង​ធំៗ​ ​ដែល​អ្នក​អភិវឌ្ឍន៍​គួរតែ​ពង្រីក​វិសាលភាព​បន្ថែម​ទៀត​ដើម្បី​កែសម្រួល​តម្លៃ​ដើម្បី​ទាក់ទាញ​អ្នកទិញ​ច្រើន​ ​ប៉ុន្តែ​វា​ក៏អាច​កើតឡើង​នៅក្នុង​ការ​អភិវឌ្ឍ​តូចតាច​ដែរ​ ​ប្រសិនបើ​គោលដៅ​របស់​អ្នកទិញ​ ​សមស្រប​ជាមួយនឹង​ការ​ផ្តល់​ជូន​វិនិយោគ​នៃ​ការអភិវឌ្ឍន៍​នេះ​”​៕​

ដោយៈ​ រ៉ា​ណេត​

ភ្នំ​ពេញៈ​ តំបន់​ចក្រ​អង្រែ​លើ​ និង​ចក្រ​អង្រែ​ក្រោម​ នឹង​មានការ​ប្រែប្រួល​នៅ​ប៉ុន្មាន​ឆ្នាំខាងមុខ​នេះ​ ដោយ​តំបន់​ស្ថិតនៅ​លើ​ផ្លូវជាតិ​លេខ២នេះ​ នឹង​បញ្ចប់​វត្តមាន​កម្មករ​ និយោជិត​មក​ពី​តាម​បណ្តា​ខេត្ត​ និង​ជំនួស​វិញ​ដោយ​អ្នកធ្វើការ​នៅ​តាម​មជ្ឈមណ្ឌល​ពាណិជ្ជកម្ម​ ខណៈ​រោងចក្រ​ សហគ្រាស​នានា​នឹង​រើ​ទៅកាន់​តំបន់​ជាយក្រុង​។

គិត​ពី​ចំណុច​គល់​ស្ពាន​អាកាស​ក្បាលថ្នល់​ រហូតដល់​ចំណុច​ផ្លូវបំបែក​សាលាខេត្ត​កណ្តាល​ ត្រូវ​បាន​អ្នកជំនាញ​ទទួលស្គាល់​ថា​ ជាទី​តាំង​ដែល​មាន​សក្ដានុពល​ ជាពិសេស​ផ្នែក​សំណង់​លំនៅ​ដ្ឋាន​ និង​អនុគ្រោះ​ដល់​ការ​ធ្វើអាជីវកម្ម​បាន​ ខណៈ​ដែល​បណ្តា​រោងចក្រ​នានា​មាន​វត្តមាន​នៅ​ទីនេះ​។ ប៉ុន្តែ​បច្ចុប្បន្ន​នេះ​ បន្ទាប់​ក្រោយពី​ការ​ចាកចេញ​នៃ​វត្តមាន​រោងចក្រ​ទាំងនោះ​ តើ​ស្ថានភាព​ទីផ្សារ​អចលនទ្រព្យ​ទីនេះ​នឹង​ប្រែប្រួល​បែប​ណា​។

អគ្គនាយក​ក្រុមហ៊ុន​អចន​ទ្រព្យ​ Century​ 21​ Imperial​ Realty​ លោក​ Ken​ Lo​ បាន​មានប្រសាសន៍​ឲ្យដឹង​តាម​ទូរស័ព្ទ​នា​ព្រឹក​ថ្ងៃទី១៧​ មិថុនា​នេះ​ថា​ បើ​ទោះជា​សកម្មភាព​នៃ​ការ​ចាកចេញ​របស់​រោងចក្រ​ និង​ឃ្លាំង​ ឆ្ពោះទៅ​កាន់​តំបន់​នានា​នៅ​តាម​ជាយក្រុង​ក៏ដោយ​ តំបន់​ចាក់​អង្រែ​ហាក់​មិន​មាន​អ្វី​ប្រែប្រួល​ជា​ដំ​កំភួន​នោះ​ទេ​។លោក​បន្ត​ទៀត​ថា​“មិនថា​តែ​តំបន់​ចាក់អង្រែលើ​ ឬចាក់អង្រែក្រោម​នោះ​ទេ​ ជាទូទៅ​តម្លៃ​អចលនទ្រព្យ​នៅ​ទីនេះ​គឺ​បាន​ឡើង​ខ្ពស់​រួច​ទៅ​ហើយ​។

លោក​បាន​បន្ត​ទៀត​ថា​ “ស្ថានភាព​ដី​ និង​អចលនទ្រព្យ​នៅក្នុង​តំបន់​ទាំងនេះ​ គឺ​មិនសូវ​អនុគ្រោះ​ដល់​គម្រោង​អភិវឌ្ឍន៍​ធំ​ ឬជា​តំបន់​ពាណិជ្ជ​ចម្រុះ​ដូចជា​តំបន់​បឹងកេងកង​នោះ​ទេ​ ដោយសារតែ​កត្តា​ហេដ្ឋារចនាសម្ព័ន្ធ​មិន​អំណោយផល​ ហើយ​វិសាលភាព​ផ្ទៃដី​ទំនេរ​មិន​មាន​ទំហំ​ធំ​”។

លោក​បាន​បន្ត​ទៀត​ថា​ បើ​ទោះជា​ស្ថិតនៅ​ក្នុង​សង្កាត់​ និង​ខណ្ឌមានជ័យ​រួមគ្នា​ក៏​ពិតមែន​ ប៉ុន្តែ​បើ​មាន​គម្រោង​អភិវឌ្ឍ​ក្នុង​ទ្រង់ទ្រាយ​ធំ​ គេ​នឹង​ងាក​ទៅកាន់​ទីតាំង​ក្បែរផ្លូវ​លេខ៦០ម៉ែត្រ​ ព្រោះ​នៅ​ទីនោះ​ តម្លៃ​ដី​ប្រហាក់​ប្រហែល​នឹង​តំបន់​ជាប់​ផ្លូវជាតិ​លេខ២ឬ​អាច​ថ្លៃជាង​គ្នា​បន្តិចបន្តួច​ ប៉ុន្តែ​វា​មាន​ភាព​ងាយស្រួល​ក្នុង​ការ​អភិវឌ្ឍ​ ជាពិសេស​មាន​ប្រព័ន្ធ​ហេដ្ឋារចនាសម្ព័ន្ធ​ល្អ​ក្នុង​ការ​ធ្វើ​ចរាចរណ៍​។

ស្រដៀងគ្នា​នឹង​ការ​លើកឡើង​ពី​ភាព​វិជ្ជមាន​ខាងលើ​នេះ​ អគ្គនាយក​ក្រុមហ៊ុន​អចលនទ្រព្យ​ Khmer​ Foundation​ Appraisal​ លោក​ឧកញ៉ា​ នួន​ រិទ្ធី​ បាន​មានប្រសាសន៍​ថា​ ស្ថានភាព​នៃ​តម្លៃ​អចលនទ្រព្យ​ និង​វិស័យ​ដីធ្លី​នៅ​តំបន់​នេះ​ មិន​មាន​អ្វី​គួរ​ឱ្យ​ព្រួយបារម្ភ​នោះ​ទេ​។ លោក​ឧកញ៉ា​បន្ត​ទៀត​ថា​ បើ​និយាយ​ពី​ការប្រែប្រួល​ វា​ពិតជា​ប្រែប្រួល​ ប៉ុន្តែ​ការប្រែប្រួល​នេះ​ គឺ​កាន់តែ​មាន​ភាព​រីកចម្រើន​ទៅមុខ​។

លោក​ឧកញ៉ា​បន្ត​ទៀត​ថា​ “ចាប់ពី​ពេលនេះ​ទៅ​ថ្ងៃ​អនាគត​ ទីតាំង​ដែល​ធ្លាប់តែ​ជា​បណ្តុំ​ឃ្លាំង​ ឬជា​រោងចក្រ​នានា​ នឹង​ប្រែ​មុខមាត់​ទៅ​ជា​បណ្តុំ​លំនៅ​ដ្ឋាន​ ក្លាយទៅជា​តំបន់​ពាណិជ្ជកម្ម​កម្រិតមធ្យម​ រហូត​សាយភាយ​ទៅដល់​តំបន់​មួយចំនួន​ទៀត​ នៅក្នុង​ក្រុង​តាខ្មៅ​”។

លោក​នួន​ រិទ្ឋី​បាន​បន្ត​ទៀត​ថា​ “រូបភាព​ថ្មី​ ដែល​នឹង​ចូល​មក​កែប្រែ​មុខមាត់​តំបន់​ចាក់អង្រែក្រោម​ និង​ចាក់អង្រែលើ​ រួមមាន​ដូចជា​ កែប្រែ​ពី​ឃ្លាំង​ ក្លាយទៅជា​ផ្សារ​ក្នុង​តំបន់​ ទៅជា​ទីតាំង​សម្រាប់​ជួល​ធ្វើជា​ការិយាល័យ​ជាដើម​ ខណៈ​ដែល​បច្ចុប្បន្ន​នេះ​ក៏​កំពុងតែ​កើតមាន​ជា​បណ្ដើរ​ៗរួច​ទៅ​ហើយ​នោះ​”។

លោក​ឧកញ៉ា​បន្ត​ថា​ តម្លៃ​ដី​សម្រាប់​វិស័យ​លំនៅ​ដ្ឋាន​នៅ​តំបន់​នេះ​ អាច​មាន​ចន្លោះ​ចាប់ពី​ ២០០០​ – ២៥០០ដុល្លារ​ក្នុង​មួយ​ម៉ែត្រការ៉េ​ ឬអាច​ឈាន​ដល់៣០០០ដុល្លារ​ ក្នុង​មួយ​ម៉ែត្រការ៉េ​ ដែល​វា​ក៏​អាស្រ័យ​ទៅតាម​ទីតាំង​ ស្ថានភាព​ផ្លូវ​ និង​ទំហំ​ផង​ដែរ​ ប៉ុន្តែ​តម្លៃ​នៃ​ការជួល​អគារ​ការិយាល័យ​វិញ​ អាច​មានតម្លៃ​ក្នុង​ចន្លោះ១០ទ២០ដុល្លារ​ ក្នុង​ម៉ែត្រការ៉េ​សម្រាប់​រយៈពេល​មួយ​ខែ​”៕

ដោយ​ វុត្ថា​

បាងកក​៖ កំណើន​នៃ​ការទិញ​ខុន​ដូ​នៅក្នុង​ទីក្រុង​បាងកក​របស់​ប្រទេស​ថៃ​ពីសំណាក់​ជនជាតិ​ចិន​មានការ​ធ្លាក់ចុះ​ដោយ​សារតែ​លុយ​បាត​របស់​ថៃ​ឡើងថ្លៃ​ខ្ពស់​ និង​ការ​កើនឡើង​នៃ​ការ​ផ្គត់ផ្គង់​។

លោក​ Simon​ Lee​ សហ​ស្ថាបនិក​ និង​ប្រធាន​ក្រុមហ៊ុន​អចលនទ្រព្យ​ Angel​ Real​ Estate​ Consultancy​ បានឱ្យ​ដឹង​កាលពី​ពេល​ថ្មី​ៗនេះ​ ទំហំ​នៃ​ការ​លក់​ខុន​ដូ​ទាំងអស់​ ដែល​ត្រូវ​បាន​ទិញ​ដោយ​ជនជាតិ​ចិន​ក្នុងរយៈពេល​ពាក់កណ្តាល​ឆ្នាំ​កន្លងមក​នេះ​ មានការ​ធ្លាក់ចុះ​ ពោល​គឺ​មានដំណើរ​យឺត​ចាប់តាំងពី​ដើមឆ្នាំ​កន្លងទៅ​ បន្ទាប់ពី​លុយ​បាត​មានតម្លៃ​ថៃ​ និង​សង្គ្រាម​ពាណិជ្ជកម្ម​រវាង​ចិន​-អាមេរិក​បាន​ចាប់ផ្តើម​។

យោង​តាម​កាសែត​បាងកក​ប៉ុស្តិ៍​ចុះផ្សាយ​ថា​ ប្រាក់​បាត​បាន​ឡើងថ្លៃ​ ២០ភាគរយ​ធៀប​នឹង​ប្រាក់​យន់​ចិន​រហូតដល់​ ៤,៤0បាត​ក្នុង​មួយ​បាត​ បើ​ធៀប​នឹង​ប្រាំ​ឆ្នាំមុន​ មាន​ ៥,៨០បាត​ នៅពេល​រលក​ដំបូង​នៃ​ការ​ទិញ​ពចលនទ្រព្យ​ថៃ​ ពីសំណាក់​អ្នកទិញ​ជា​ជនជាតិ​ចិន​បាន​ចាប់ផ្តើម​។

ជាមួយនឹង​កា​រឡើន​ឡើង​ខ្លាំង​ចំពោះ​ប្រាក់​បាត​នោះ​ ជនជាតិ​ចិន​ភាគច្រើន​បាន​ប្តូរ​ពី​ការទិញ​ខុន​ដូ​ដែល​មានតម្លៃ​ ២-៦លាន​បាត​ ក្នុង​មួយ​យូនី​ត ធ្លាក់​ពី​ ៥-១០លាន​បាត​ក្នុង​ពេល​ថ្មី​ៗនេះ​ ខណៈ​ដែល​ពួកគេ​គិត​ពី​ហា​នី​ភ័យ​ដែល​អាច​នឹង​កើតឡើង​។

លោក​ Lee​ បាន​មានប្រសាសន៍​ថា​ ទីផ្សារ​ខុន​ដូ​ដែល​ប្រើប្រាស់​រួច​ម្តង​នៅក្នុង​ប្រទេស​ថៃ​គឺ​មិន​សកម្ម​ដូច​នៅ​ប្រទេស​សិង្ហបុរី​ ទីក្រុង​ហុងកុង​ឬចិន​ទេ​ ដោយ​ជនជាតិ​ថៃ​ចូលចិត្ត​ទិញ​ខុន​ដូ​ថ្មី​ ហើយ​ខុន​ដូ​នៅក្នុង​ទីក្រុង​បាងកក​មានការ​ទាក់ទាញ​ទិញ​ទៀប​បំផុត​ពីសំណាក់​អ្នកទិញ​ពី​ជនជាតិ​ចិន​។

តម្លៃ​កើនឡើង​ខ្ពស់​ និង​ ការ​ស្តុក​ទុក​យូ​ពេល​គឺជា​ហេតុផល​សម្រាប់​អ្នកទិញ​ដែល​ជា​ជនជាតិ​ចិន​ បាន​ប្តូរ​ទិញ​ដៅ​ទៅ​វិនិយោគ​នៅកន្លែង​ផ្សេង​រួមា​ន នៅ​ទីក្រុង​តូក្យូ​ប្រទេស​ជប៉ុន​ជាដើម​ដែល​អាច​ទទួលផល​ចាប់ពី​ ៨ ទៅ​ ១៤​ ភាគរយ​ក្នុង​មួយឆ្នាំ​៕

ដោយ​ ម៉ា​ណេត

​ភ្នំពេញ​៖ ការ​វិនិយោគទុន​របស់​ចិន​នៅ​លើ​អចលនទ្រព្យ​បាន​រីក​រាលដាល​នៅ​ទូទាំង​តំបន់​អាស៊ាន​ដែល​បាន​ផ្លាស់​ប្តូរ​ទិដ្ឋភាព​នៃ​ការអភិវឌ្ឍន៍​ និង​តម្លៃ​អចលនទ្រព្យ​ក្នុង​ទីក្រុង​នៅ​បណ្តា​ប្រទេស​អាស៊ាន​ ពិសេស​កម្ពុជា​។

តម្លៃ​ដីធ្លី​ និង​លំនៅឋាន​នៅក្នុង​បណ្តា​ប្រទេស​អាស៊ាន​បាន​កើនឡើង​ ខណៈ​ពេល​អ្នកវិនិយោគទុន​មក​ពី​ប្រទេស​ចិន​បាន​ពង្រីក​ការទិញ​អចលនទ្រព្យ​របស់​ពួកគេ​នៅក្នុង​តំបន់​អាស៊ាន​។

លោក​ Jirawuth​ Suwannaarj​ នាយក​ និង​ទីប្រឹក្សា​ក្រសួង​ពាណិជ្ជកម្ម​នៃ​នាយកដ្ឋាន​លើកកម្ពស់​ពាណិជ្ជកម្ម​អន្តរជាតិ​នៃ​ក្រសួង​ពាណិជ្ជកម្ម​ថៃ​ប្រចាំ​កម្ពុជា​ បាន​ថ្លែង​នៅក្នុង​បទសម្ភាសន៍​ថ្មី​មួយ​ជាមួយ​កាសែត​ The​ Nation​ ថា​ តម្លៃ​ដី​នៅ​កម្ពុជា​បាន​កើនឡើង​រហូតដល់​ ២០​ ភាគរយ​ក្នុង​មួយឆ្នាំ​ចាប់តាំងពី​ឆ្នាំ​ ២០១៧​ ដោយ​តម្លៃ​លំនៅឋាន​ និង​ពាណិជ្ជកម្ម​ក្នុង​ប្រទេស​បាន​កើនឡើង​ជាង​ ១០​ ភាគរយ​ក្នុង​មួយឆ្នាំ​ចាប់ពី​ឆ្នាំ​ ២០១៧រហូតមកដល់​ពេលនេះ​។

លោក​បាន​បន្ថែម​ថា​ វិនិយោគិន​មក​ពី​ប្រទេស​ចិន​បាន​ចាក់​ចូល​បន្ថែម​ទុន​វិនិយោគ​លើ​វិស័យ​អចលនទ្រព្យ​ និង​សំណង់​នៅ​កម្ពុជា​ជាមួយនឹង​ទឹកប្រាក់​ចំនួន​ ៣១៥​ លាន​ដុល្លារ​អាមេរិក​ក្នុងរយៈពេល​ ៤ ខែ​ដំបូង​នៃ​ឆ្នាំនេះ​។

ក្រុមហ៊ុន​សំណង់​ដែល​មាន​មូលដ្ឋាន​នៅ​ប្រទេស​ចិន​ចំនួន​ ២២៦​ ​បាន​ចុះបញ្ជី​គិត​ត្រឹម​ថ្ងៃទី​ ៣០​ ខែមេសា​ឆ្នាំ​ ២០១៩​ ដើម្បី​ធ្វើអាជីវកម្ម​នៅ​កម្ពុជា​ បន្ទាប់មក​វៀតណាម​មាន​ក្រុមហ៊ុន​ចុះបញ្ជី​ចំនួន​ 26​ និង​ប្រទេស​ថៃ​មាន​ចំនួន​ 14​ ។

លោក​ Jirawuth​ បាន​កត់សម្គាល់​ថា​ “ទីផ្សារ​អចលនទ្រព្យ​នៅក្នុង​ប្រទេស​កម្ពុជា​នៅតែ​មានការ​រីកចម្រើន​យ៉ាង​ខ្លាំង​ជាមួយ​វិនិយោគិន​ចិន​ដែល​កំពុង​ពង្រីក​ការ​វិនិយោគ​របស់​ខ្លួន​នៅក្នុង​ប្រទេស​នេះ​”។

នាយកដ្ឋាន​របស់​លោក​កំពុង​ចរចា​ជាមួយ​តំណាង​ពាណិជ្ជកម្ម​ចិន​នៅ​កម្ពុជា​ដើម្បី​ស្វែងរក​ឱកាស​សម្រាប់​ក្រុមហ៊ុន​ថៃ​ភ្ជាប់​ជាមួយ​ក្រុមហ៊ុន​ចិន​ដើម្បី​ពង្រីក​ការ​វិនិយោគ​របស់​ពួកគេ​នៅក្នុង​វិស័យ​អចលនទ្រព្យ​និង​វិស័យ​សំណង់​នៅ​ទីនោះ​៕

ដោយ​ នៅ​ វឌ្ឈ​នា​

ភ្នំពេញ​៖ នៅក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ​ គម្រោង​វិ​និ​យោ​គធំៗ​ជាច្រើន​បាន​នឹង​កំពុង​រត់ប្រណាំង​គ្នា​ទៅ​អភិវឌ្ឍន៍​ នៅ​តាម​បណ្តោ​ផ្លូវជាតិ​លេខ១​ បន្ទាប់ពី​រដ្ឋាភិបាល​ស្ថាបនា​រួចរាល់​ ដែល​ធ្វើ​ឱ្យ​ផ្លូវ​មួយ​នេះ​កាន់តែ​មាន​សក្តា​នុ​ពល​បន្ថែម​ទៀត​។

ជាមួយ​នឹង​កំនើ​នប្រ​ជា​សាស្រ្ត​ ការអភិវឌ្ឍន៍​ហេ​ដ្ឋា​រចនាសម្ព័ន្ឋ​របស់​រដ្ឋាភិបាល​បាន​ធ្វើឲ្យ​តំបន់​នេះ​ កំពុង​មានការ​រីកចម្រើន​ខ្លាំង​ ដោយមាន​គំរោង​បុរី​លំនៅ​ដ្ឋាន​ មជ្ឈមណ្ឌល​ពាណិជ្ជកម្ម​ ខុន​ដូ​ រមណីយដ្ឋាន​លំដាប់​អន្តរជាតិ​នានា​។ គំរោង​ទាំងនោះ​រួមមាន​ដូចជា​។

១) គម្រោង​ One​ Central​ Tower​

អាគារ​ពាណិជ្ជកម្ម​ចំរុះ​ One​ Central​ Tower​ ដែល​ជា​មជ្ឈមណ្ឌល​ពាណិជ្ជកម្ម​ចំរុះ​ និង​លំនៅ​ដ្ឋាន​ដ៏​ទំនើប​ ទាន់សម័យ​មាន​កម្ពស់៣៨ជាន់​មាន​ចំនួន៥អាគារ​ សាងសង់​នៅ​លើ​ផ្ទៃដី២៤​,០០០ម៉ែត្រការ៉េ​ មានតម្លៃ​ទុន​រហូត២០០លាន​ដុល្លារ​សហរដ្ឋអាមេរិក​ នឹង​ផុស​ឡើង​នៅ​តំបន់​បឹង​ស្នោ​រ ក្បែរ​កោះ​នរា​ ក្រុងភ្នំពេញ​នា​ពេល​ខាងមុខនេះ​។

២ គម្រោង​ផ្សារ​ទំនើប​ Peng​ Hourt​ ECO​ Mall​

គម្រោង​ផ្សារ​ទំនើប​ដ៏​ធំ​បែប​ចម្រុះ​ ​ECO​ Mall​ ​កំពុង​សាង​សាង​នៅ​ជាប់​នៅ​តាម​បណ្តោយ​ផ្លូវជាតិ​លេខ១​ លើ​ផ្ទៃដី៦ហិ​កតា​ និង​ទំហំ​សរុប​អាគារ​ជាង២៦ម៉ឺន​ម៉ែត្រការ៉េ​ ដែល​គ្រោង​នឹង​បញ្ចប់​នៅ​ឆ្នាំ២០២១ខាងមុខនេះ​។ គំរោង​នេះ​អាច​បញ្ចប់​នៅ​ឆ្នាំ២០២១ខាងមុខនេះ​។

៣) គំរោង​រមណីយដ្ឋាន​លំដាប់​អន្តរជាតិ​ EURO​ PARK​

គំរោង​រមណីយដ្ឋាន​ដ៏​ធំ​ ដែល​មាន​ស្តង់​ដា​អន្តរជាតិ​នេះ​ បាន​និង​កំពុង​សាងសង់​ដោយក្រុម​ហ៊ុន​បុរី​ប៉េង​ ហួត​ផង​ដែរ​។ គំរោង​នេះ​ត្រូវ​បាន​ក្រុមហ៊ុន​ប៉េង​ ហួត​បោះទុន​វិនិយោគ​រហូតដល់៦០លាន​ដុល្លារ​អាមេរិក​។

៤) ផ្សារ​សហគមន៍​បែប​ទំនើប​ស៊ី​វី​ល័យ​

ចម្ងាយ​ពី​ស្ពាន​ប្រហែល៣គីឡូម៉ែត្រ​ គឺ​នឹង​ឃើញ​ផ្សារ​ទំនើប​មាន​ភាព​ស្រដៀងគ្នា​នឹង​ផ្សារ​ទំនើប​ TK​ Avenue​ នៅ​ខាង ឆ្វេង​ដៃ​ទើបតែ​បើក​ដំណើរការ​ នោះ​គឺ​ The​ Park​ Community​ Mall​ និង​នៅ​ខាងស្តាំ​យើង​ឃើញ​មាន​ Polaris​ ​F&​B ដែល​មាន​ភោជនីយ​ដ្ឋាន​ទំនើប​ៗដូចជា​ Park​ Caf​é, Brown​ Caf​é, Pizza​ company​, Lucky​ Burger​ និង​ហាង​លក់​សំលៀកបំពាក់​ ព្រមទាំង​ហាងទំនិញ​ផ្សេងទៀត​។

៥) មជ្ឈ​មមណ្ឌល​កម្សាន្ត​របស់​ព្រីនស៍​

ក្រុ​មហ៊ុ​នព្រីនស៍​ (Prince​ Real​ estate​ Group​) ដែល​ជា​ក្រុមហ៊ុន​យក្ស​មួយ​ធ្លាប់​វិនិយោគ​លើ​វិស័យ​ខុន​ដូន​ សណ្ឋា​ការ​ ធនាគារ​ និង​អាគារ​ពាណិជ្ជកម្ម​ក៏បាន​បោះទុន​វិនិយោគ​ធ្វើ​មជ្ឈមណ្ឌល​កម្សាន្ត​មួយ​នៅ​លើ​កោះ​ប្រាក់​ តាម​បណ្តោយ​ទន្លេ​មេ​គង្គ​ស្ថិ​ននៅ​ស្រុក​កៀនស្វាយ​លើ​ផ្ទៃដី​ទំហំ ១៣ហិ​កតា​ ដែល​នឹង​បើក​ដំណើរការ​នៅ​ឆាប់​ៗខាងមុខនេះ​។

៦) គម្រោង​បុរី​នានា​

នៅ​ផ្លូវជាតិ​លេខ១ មាន​គម្រោង​បុរី​ជាច្រើន​ដូចជា​ បុរី​មង្គល​ភ្នំពេញ​ដែល​កំពុង​នឹង​បើក​លក់​ថ្មី​ៗនេះ​នៅ​ជិត​ផ្សារ​ព្រែកឯង​ បុរី​ប៉េង​ហួត​ បុរិ​ហាយ​ធិច​ បុរី​សម្បត្តិ​មាន​ហេង​ បុរី​លឹម​ឈាង​ហាក់​ និង​សំណង់​លំនៅ​ដ្ឋាន​ផ្សេង​ៗទៀតផង​ដែរ​៕