ដោយៈ និស្ស័យ

   ភ្នំពេញៈ សម្ដេចបវរធិបតី ហ៊ុន ម៉ាណែត នាយ​ករដ្ឋមន្រ្តីនៃកម្ពុជា បានជម្រុញឲ្យក្រសួងសាធារណៈការ និងដឹកជញ្ជូន ផ្តោតលើការអភិវឌ្ឍហេដ្ឋារចនាសម្ព័ន្ឋនៅតំបន់ប៉ូលសេដ្ឋកិច្ចចំនួន៥។

សម្តេចបានថ្លែងបែបនេះ ក្នុងពេលអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតការងារក្រសួងសាធារណៈការនៅថ្ងៃទី២៣ មករានេះ។

នៅក្នុងពិធីនេះ សម្តេចបានណែនាំឲ្យបន្តជំរុញការអភិវឌ្ឍ និងតភ្ជាប់ហេដ្ឋារចនាសម្ព័ន្ធដឹកជញ្ជូន និងឡូជីស្ទីក ឲ្យកាន់តែមានភាពប្រទាក់ក្រឡារវាងតំបន់ប៉ូលសេដ្ឋកិច្ច នៃភូមិភាគកណ្ដាល ភូមិភាគឦសាន និងភូមិភាគនិរតី និងជំរុញការអភិវឌ្ឍបណ្តាញខ្សែផ្លូវតភ្ជាប់ទៅកាន់តំបន់ ដែលមានសក្តានុពល សេដ្ឋកិច្ច ទេសចរណ៍ វប្បធម៌ ប្រវត្តិសាស្ត្រ និងតំបន់ព្រំដែន។

សម្ដេចបវរធិបតី ហ៊ុន ម៉ាណែត ថ្លែងថា ក្រសួងត្រូវជំរុញបញ្ចប់ គម្រោងសាងសង់ហេដ្ឋារចនាសម្ព័ន្ធដឹកជញ្ជូន ដើម្បីឈានទៅរកការសម្ពោធ បើកឲ្យប្រើប្រាស់ជាផ្លូវការ ហើយត្រូវជំរុញបញ្ចប់ការសិក្សា និងនីតិវិធីផ្សេងៗ ដើម្បីត្រៀមបើកការដ្ឋានគម្រោងផ្លូវស្ពានមួយចំនួនទៀត តាមការគ្រោងទុកនាពេលខាងមុខនេះ។

សម្ដេចបវរធិបតី ហ៊ុន ម៉ាណែត ថ្លែងថា ក្រសួងបន្តជំរុញការតាមដាន និងត្រួតពិនិត្យលើការអនុវត្តគម្រោងហេដ្ឋារចនាសម្ព័ន្ធ ដឹកជញ្ជូននានាដែលបានប្រកាសបើកការដ្ឋាន និងកំពុងដំណើរការសាងសង់ ដើម្បីបញ្ចប់ឲ្យបាន តាមផែនការគ្រោងទុក និងធានាបាននូវគុណភាព និងភាពធន់ទៅនឹងការប្រែប្រួលអាកាសធាតុ៕

ដោយៈ គង់ សូរិយា

   ភ្នំពេញៈ សម្ដេចបវរធិបតី ហ៊ុន ម៉ាណែត បានថ្លែងថា នៅថ្ងៃទី៣ ខែមេសា ឆ្នាំ២០២៥ខាងមុខ នឹងរៀបចំពិធីសម្ពោធ កំពង់ផែអន្ដរជាតិខេត្តកំពត។

   សម្តេចបានថ្លែងបែបនេះ ក្នុងពេលអញ្ជើញជាអធិបតីដ៏ខ្ពង់ខ្ពស់ ក្នុងពិធីបិទសន្និបាតការងាររបស់ក្រសួងសាធារណៈការ និងដឹកជញ្ជូនកាលពីល្ងាចថ្ងៃទី២៣ មករានេះ។

សម្ដេចបវរធិបតី ហ៊ុន ម៉ាណែតបានថ្លែងបន្តថា “កំពង់ផែនឹងមានឱកាស ដើម្បីដំណើរការអាជីវកម្មរាប់រយឆ្នាំ”។

សម្ដេចបវរធិបតី ហ៊ុន ម៉ាណែត បានថ្លែងថា សមិទ្ធផលដែលក្រសួង សម្រេចបានកន្លងមក បានជួយសម្រួល ដល់ការតភ្ជាប់ប្រទាក់ក្រឡា ការធ្វើដំណើរ និងការដឹកជញ្ជូន ព្រមទាំងចូលរួមលើកកម្ពស់ការធ្វើពិពិធកម្មសេដ្ឋកិច្ច និង ចាប់យកកាលានុវត្តភាពថ្មីៗ ដូចជា ការទាក់ទាញវិនិយោគផ្ទាល់ និងទេសចរណ៍ពីបរទស ដើម្បីរួមចំណែកអភិវឌ្ឍសង្គម-សេដ្ឋកិច្ច៕

ដោយៈ គង់ សូរិយា

    ភ្នំពេញៈ ធនាគារជាតិនៃកម្ពុជា បានដាក់ឱ្យដំណើរការកម្មវិធីទូទាត់បាគងទេសចរ(Bakong Tourists App) ជាមួយក្រុមហ៊ុនបណ្ដាញប័ណ្ណទូទាត់អន្តរជាតិវីសាVisa។

ពិធីនេះមានការអញ្ជើញចូលរួមជាអធិបតីពី លោកំទាវជា សិរី អគ្គទេសាភិបាលធនាគារជាតិនៃកម្ពុជា និងមានការចូលរួមពីតំណាងក្រសួង-ស្ថាប័នរាជរដ្ឋាភិបាល ក្រុមហ៊ុនបណ្តាញទូទាត់អន្តរជាតិ និងវិស័យឯកជនសរុបប្រមាណ៣០០នាក់។

តាមរយៈដំណើរការកម្មវិធីនេះ ទេសចរអន្តរជាតិដែលធ្វើដំណើរកម្សាន្តនៅកម្ពុជា អាចធ្វើប្រតិបត្តិការទូទាត់បែបឌីជីថល បានយ៉ាងងាយស្រួល ដោយគ្រាន់តែទាញយកកម្មវិធីទូទាត់បាគង ទេសចរដាក់ក្នុងទូរសព្ទដៃ ដើម្បីចុះឈ្មោះប្រើប្រាស់ ហើយភ្ជាប់ជាមួយប័ណ្ណទូទាត់វីសា ដែលមានស្រាប់ពីប្រទេសដើមរបស់ខ្លួន។

បន្ទាប់ពីតភ្ជាប់រួចរាល់ អ្នកប្រើប្រាស់អាចផ្ទេរប្រាក់ចូលក្នុងគណនីបាគង ហើយធ្វើប្រតិបត្តិការទូទាត់តាមខេអេចឃ្យូអរកូត ជាមួយអាជី​វ​ករប្រមាណ៤,៥លានកន្លែង នៅក្នុងប្រទេសកម្ពុជា៕

ដោយៈ គង់ សូរិយា

    ព្រះសីហនុៈ  ស្នាមញញឹមនេះ គឺផ្តើមចេញពីវប្បធម៌សន្ទនា ការរកក្តីសង្ឃឹមថ្មី និងបំណងប្រាថ្នារួម ដែលធ្វើឱ្យយើងបានសម្រេចនូវសមិទ្ធផល២ ជូនអ្នករាម ខេត្តព្រះសីហនុ។នេះជាការលើកឡើងរបស់លោកឧបនាយករដ្ឋមន្រ្តីសាយ សំអាល់រដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់។

ឆ្នេរសមុទ្ររាម គឺជាកន្លែងដែលប្រជាជនកម្ពុជា មកពីគ្រប់ទិសទីចូលចិត្តមកកំសាន្ត និងលម្ហែរ តាមរយៈខ្យល់អាកាសល្អ ទេសភាពស្អាត ម្ហូបអាហារឆ្ងាញ់ និងបដិសណ្ឋារកិច្ចល្អ។ ទោះជាយ៉ាងណាក៏ដោយ កន្លែងនេះ កាលពីមុន មានការសង់តូបនៅលើឆ្នេរខ្សាច់ ដែលមិនមានរបៀបរៀបរយ និងពិបាកនៅក្នុងការរស់នៅ។

លោកសាយ សំអាល់បានបន្តថា ក្រុមការងារថ្នាក់ជាតិ និងប្រជាជននៅតំបន់ឆ្នេរនេះ បានពិគ្រោះយោបល់ និងឈរលើជំហររួមថា យើងមានលទ្ធភាព ទាំងរក្សាឆ្នេរជាសួនសាធារណៈ សម្រាប់ឧត្តមប្រយោជន៍ប្រជាជនទូទាំងប្រទេសផង និងអាចរៀបចំជាលំនៅឋានសមរម្យឱ្យបងប្អូន ដែលជាយុទ្ធជននៃកងទ័ពជើងទឹកផងដែរ។

លោកបន្តថា ដោយមានការឯកភាព ស្រុះស្រួលគ្នាខាងលើ ជម្រើសនេះ យើងបានរៀបចំចេញជាភូមិឋានក្សេមមក្សាន្ត ហើយខ្ញុំបានមកប្រគល់ប័ណ្ណកម្មសិទ្ធិ សម្គាល់ម្ចាស់អចលនវត្ថុទាំងអស់ជូនបងប្អូនដែលខ្លះជាអតីត និងបងប្អូនខ្លះទៀតកំពុង បម្រើការជាកងទ័ពជើងទឹក ដោយអារម្មណ៍រីករាយ និងភាតរភាព។

លោកសាយ សំអាល់បានបញ្ជាក់ថា “នេះហើយជាស្មារតី៧មករា គឺសាមគ្គីមានជ័យ!!!”៕

ដោយ: គង់ លាងហួរ
អន្តរជាតិ: យោងតាមរបាយការណ៍របស់ក្រុមហ៊ុន Dongbi Data ដែលមានមូលដ្ឋាននៅទីក្រុងសុិនជិន (Shenzhen)បានឱ្យដឹងថា ប្រទេសចិនបានវ៉ាដាច់សហរដ្ឋអាមេរិក បើគិតពីចំនួនអ្នកជំនាញវិទ្យាសាស្ត្រ និងបច្ចេកវិទ្យាកម្រិតខ្ពស់។

កាសែត South China Morning Post បានរាយការណ៍ ចំនួនអ្នកជំនាញវិទ្យាសាស្ត្រនៅសហរដ្ឋអាមេរិកបានធ្លាក់ចុះយ៉ាងគំហុកពីចំនួន៣៦.៥៩៩នាក់ក្នុងឆ្នាំ២០២០ មកនៅសល់ត្រឹម៣១.៧៨១នាក់ក្នុងឆ្នាំ២០២៥ ដែលមានន័យថា សហរដ្ឋអាមេរិកមានអ្នកវិទ្យាសាស្ត្រចំនួន២៧% នៃចំនួនអ្នកវិទ្យាសាស្ត្រសរុបទូទាំងពិភពលោក។

ផ្ទុយទៅវិញ ចំនួនអ្នកជំនាញវិទ្យាសាស្ត្រនៅប្រទេសចិនបានកើនឡើងពីចំនួន១៨.៨០៥នាក់ ដល់ចំនួន៣២.៥១១នាក់នៅក្នុងអំឡុងរយៈពេលដូចគ្នា ដែលមានន័យថា ប្រទេសចិនមានអ្នកវិទ្យាសាស្ត្រចំនួន២៨%នៃចំនួនអ្នកវិទ្យាសាស្ត្រសរុបទូទាំងពិភពលោក។

បណ្ឌិត្យសភាវិទ្យាសាស្ត្រចិន(Chinese Academy of Sciences) ដែលជាស្ថាប័នស្រាវជ្រាវផ្នែកវិទ្យាសាស្ត្រធំជាងគេបំផុតមួយនៅលើពិភពលោក បាននាំមុខគេ ដោយមានអ្នកវិទ្យាសាស្ត្រកំពូលចំនួន៣.៦១៥នាក់។

ដោយឡែក សាកលវិទ្យាល័យ Harvard University នៅសហរដ្ឋអាមេរិក មានអ្នកវិទ្យាសាស្ត្រចំនួន១.៦៨៣នាក់ប៉ុណ្ណោះ ខណៈសាកលវិទ្យាល័យ Stanford University មានអ្នកវិទ្យាសាស្ត្រចំនួន១.២០៨នាក់។

ក្រៅពីប្រទេសចិន និងសហរដ្ឋអាមេរិក ការសិក្សាបានរកឃើញថា ចំនួនអ្នកវិទ្យាសាស្ត្រនៅប្រទេសអាល្លឺម៉ង់បានស្ថិតក្នុងសភាពទ្រឹង ខណៈដែលចំនួនអ្នកវិទ្យាសាស្ត្រនៅប្រទេសអង់គ្លេស បារាំង ជប៉ុន និងអូស្ត្រាលី ត្រូវបានគេរាយការណ៍ថា មានការធ្លាក់ចុះ។

នៅក្នុងន័យនេះ ការប្រើប្រាស់ពាក្យថា “អ្នកជំនាញផ្នែកវិទ្យាសាស្ត្រ និងបច្ចេកវិទ្យាកម្រិតខ្ពស់”សំដៅទៅលើក្រុមអ្នកស្រាវជ្រាវ ដែលបានបោះពុម្ពផ្សាយឯកសារដ៏មានឥទ្ធិពលនៅក្នុងទស្សនាវដ្ដីអន្តរជាតិល្បីៗ។

លោក Wu Dengsheng ស្ថាបនិកក្រុមហ៊ុន Dongbi Data និងជាសាស្ត្រាចារ្យនៅសាកលវិទ្យាល័យ Shenzhen University បានលើកឡើងថា“ក្នុងរយៈពេល៥ឆ្នាំចុងក្រោយនេះ ទិដ្ឋភាពសកលនៃធនធានមនុស្សមានទេពកោសល្យខាងផ្នែកវិទ្យាសាស្ត្រ និងបច្ចេកវិទ្យាកម្រិតខ្ពស់បានឆ្លងកាត់នូវការផ្លាស់ប្តូរយ៉ាងសុីជម្រៅ”៕ប្រភព: Vnexpress៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះ ក្នុងការជួញដូរនៅព្រឹកថ្ងៃព្រហស្បតិ៍នេះ ខណៈប្រាក់ដុល្លារអាមេរិកបានងើបឡើងថ្លៃវិញ ដោយសារក្រុមអ្នកវិនិយោគនៅតែមានក្តីបារម្ភចំពោះគោលនយោបាយពន្ធគយក្រោមរដ្ឋបាលថ្មីរបស់សហរដ្ឋអាមេរិក។

តួយ៉ាង តម្លៃមាស Spot Gold បានធ្លាក់ចុះ០,២ភាគរយដល់២៧៤៩,៥៩ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,៣៨ភាគរយដល់២៧៦០,៣០ដុល្លារក្នុងមួយអោនគិតត្រឹមម៉ោង១០:៣៨នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៤៥,៥ភាគរយ ដែលធនាគារកណ្តាលអាមេរិក (Fed) នឹងអាចបញ្ចុះអត្រាការប្រាក់របស់ខ្លួនចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូបានងើបឡើងថ្លៃដល់១០៨,២៨ពិន្ទុនៅព្រឹកថ្ងៃព្រហស្បតិ៍នេះ បន្ទាប់ពីបានបិទការជួញដូរត្រឹម១០៨,១៧ពិន្ទុកាលពីថ្ងៃពុធម្សិលមិញ។

ចំណែក តម្លៃលោហៈធាតុប្រាក់ Spot silver បានធ្លាក់ចុះ០,៨១ភាគរយដល់៣១,១៦ដុល្លារក្នុងមួយអោន ខណៈតម្លៃផ្លាទីនបានធ្លាក់ចុះ០,៥ភាគរយដល់៩៦៦,២ដុល្លារក្នុងមួយអោន ហើយតម្លៃ palladium បានធ្លាក់ចុះ០,៧៣ភាគរយដល់៩៩៧,៥ដុល្លារក្នុងមួយអោនគិតត្រឹមម៉ោង១០:៤១នាទីព្រឹក៕

ដោយ: គង់ លាងហួរ
អន្តរជាតិ: នាយករដ្ឋមន្ត្រីនៃប្រទេសសិង្ហបុរី លោក Lawrence Wong បានប្រកាសថា រដ្ឋាភិបាលសិង្ហបុរីប្តេជ្ញារក្សាលំនៅដ្ឋានសាធារណៈឱ្យបន្តមានតម្លៃសមរម្យ សម្រាប់លក់ជូនប្រជាជនរបស់ខ្លួន។នេះបើយោងតាមការដកស្រង់ចុះផ្សាយដោយកាសែត CNA។

លោកបានបញ្ជាក់ថា “អាផាតមុិនថ្មីប្រភេទ Build-to-Order (BTO) នឹងត្រូវបានកំណត់តម្លៃ ឱ្យស័ក្តិសមនឹងកម្រិតប្រាក់ចំណូលរបស់ប្រជាជនសិង្ហបុរី ខណៈការ​ផ្គត់ផ្គង់​លំនៅដ្ឋាន​​ឯកជន​ក៏​កំពុង​ត្រូវ​បាន​បង្កើន​ផង​ដែរ ដើម្បីជួយ​រក្សា​ស្ថិរភាព​តម្លៃ​អចលនទ្រព្យ​”។

អាផាតមុិនប្រភេទ Build-to-Order (BTO) ជាអាផាតមុិនសាធារណៈរបស់រដ្ឋាភិបាលសិង្ហបុរី។ អាផាតមុិនប្រភេទនេះត្រូវបានចាប់ផ្តើមសាងសង់ឡើង លុះត្រាតែចំនួនយូនីតចន្លោះពី៦៥%ទៅ៧០% នៃអគារអាផាតមុិនណាមួយនោះទទួលបានការកក់ទុកពីអតិថិជន។

លោក Lawrence Wong ដែលកាន់មុខតំណែងជារដ្ឋមន្ត្រីក្រសួងហិរញ្ញវត្ថុសិង្ហបុរីផងដែរនោះ បានប្រកាសទទួលស្គាល់អំពីការព្រួយបារម្ភចំពោះលទ្ធភាពទិញផ្ទះក្នុងចំណោមប្រជាជនរបស់ខ្លួន ខណៈរបាយការណ៍បង្ហាញថា តម្លៃអាផាតមុិនសាធារណៈបានកើនឡើងដល់ទំហំទឹកប្រាក់រាប់លានដុល្លារ។

យ៉ាងណាមិញ លោកបានអះអាងថា “ប៉ុន្តែ នោះគ្រាន់តែជាការពិនិត្យមើលចំណុចមួយជ្រុងប៉ុណ្ណោះ។ យើងចាំបាច់ត្រូវក្រឡេកមើលចំណុចមួយជ្រុងផ្សេងទៀត ព្រោះប្រាក់ចំណូលរបស់ប្រជាជនយើងក៏បានកើនឡើងផងដែរ”។

លោកបន្ថែមថា យើងមិន​ត្រឹម​តែ​បង្កើន​ការសាងសង់លំនៅដ្ឋាន​សាធារណៈ​ប៉ុណ្ណោះ​ទេ ក៏​ប៉ុន្តែ យើងក៏​បង្កើន​ការ​ផ្គត់ផ្គង់​លំនៅដ្ឋាន​ដោយអ្នកអភិវឌ្ឍន៍ឯកជន​ផងដែរ តាម​រយៈ​កម្មវិធី​លក់​ដី​របស់​រដ្ឋាភិបាល​​ ដោយសារ​ទីផ្សារ​ទាំង​ពីរ​នេះមាន​ទំនាក់ទំនង​គ្នា​។

លោក Lawrence Wong បានគូសបញ្ជាក់ទៀតថា “ការផ្គត់ផ្គង់ ដែលយើងកំពុងចាក់បញ្ចូលទៅកាន់ទីផ្សារនឹងជះឥទ្ធិពលដល់ស្ថិរភាពទីផ្សារអចលនទ្រព្យទាំងមូលរបស់សិង្ហបុរី”៕ប្រភព: CNA៕